\id PHP
\h Filipenses
\toc1 Filipenses
\mt Filipenses
\c 1
\s Tachīꞌn Pablo cātzoꞌknuniꞌlh xalanīꞌn nac Filipos tī ixtaꞌaꞌkaꞌīꞌ
\p
\v 1 Quinaꞌn, Pablo ē Timoteo, īꞌscujnuꞌnīꞌn Jesucristo tī quincālacsacnīꞌtaꞌn. Quinaꞌn iccāmacāꞌniꞌyāchāꞌn huāꞌmāꞌ carta nac Filipos. Quit Pablo tī iccātzoꞌknuniꞌyān milīpōꞌktucaꞌn tī huiꞌlāꞌnaꞌnchipitit ē aꞌkaꞌīꞌniꞌnīꞌtaꞌntit Jesucristo ē nā xanapuxcuꞌnuꞌ ē nā tī tamaktāyanaꞌn tī cāmāpācuhuīcan diáconos.
\v 2 QuinTātaꞌcaꞌn Dios ē quiMāpaꞌksīniꞌcaꞌn Jesucristo cacātasicuaꞌlanātlahuan huiꞌxinaꞌn ē tzej calatapāꞌtit.
\s Pablo cālīꞌorarlīlh tī ixtaꞌaꞌkaꞌīꞌ
\p
\v 3 Aꞌcxniꞌ iccālacapāstacān, icmaxquīꞌ tapāxcatcaꞌtzīn Dios.
\v 4 Aꞌcxniꞌ icorarlīmāꞌlh, pōꞌktu quilhtamacuj cāꞌtapāxuhuān iclīsquiꞌniꞌmāꞌlh Dios mimpālacatacaꞌn.
\v 5 Icmāstāꞌ tapāxcatcaꞌtzīn ixpālacata aꞌcxniꞌ pūla aꞌkaꞌīꞌtit, ē tzucutit quilātāꞌscujāuj ixpālacata xatze tachihuīn tū Dios mācaꞌtzīnīniꞌn. Hasta chuhuaꞌj quilātāꞌscujāujcus.
\v 6 Quit iclīpāhuan Dios tī tzucunīꞌt cāmāsuꞌyuniꞌyān chī nalītlahuaꞌyāꞌtit ixtalacasquiꞌnīn, ē iccaꞌtzī nacāmāsuꞌyuniꞌtēlhayān hasta natlahuakōꞌ aꞌcxniꞌ namimpala Jesucristo.
\v 7 Laktzaꞌ iccāpāxquīꞌyān ē lacxtim Dios quincāsicuaꞌlanātlahuan. Chuntzaꞌ tze chī icpuhuan mimpālacatacaꞌn. Huiꞌxinaꞌn ē quit lacxtim quincālakalhuꞌmanān Dios masqui tachīꞌn quit o masqui icyālh na ixlacatīncaꞌn māpaꞌksīniꞌnīꞌn naꞌiclītāya xatze tachihuīn ē naꞌiclīmāsuꞌyu tū ixlīcānaꞌ. Huiꞌxinaꞌn quilāmaktāyayāuj naꞌiclītāya xatze tachihuīn.
\v 8 Dios ūꞌtzaꞌ caꞌtzī chī iccāpāxquīꞌyān milīpōꞌktucaꞌn chuntzaꞌ chī Jesucristo cāpāxquīꞌyān.
\v 9 Aꞌcxniꞌ icorarlīmāꞌlh Dios, icsquiꞌniꞌ āꞌchulāꞌ nalāpāxquīꞌyāꞌtit. Nā icsquiꞌniꞌ nacaꞌtzīyāꞌtit tū Dios lacasquiꞌn ē tzej nalacapāstacnaꞌnāꞌtit.
\v 10 Chuntzaꞌ nacaꞌtzīyāꞌtit chī nalīlacsacāꞌtit tū xatze. Nā chuntzaꞌ xalactze nalītaxtuyāꞌtit ē jā tū naꞌaꞌnan tū cātalīputzānaꞌnīyān aꞌcxniꞌ namimpala Cristo.
\v 11 Nā icsquiꞌniꞌ Dios līlacatejtin nalītahuiꞌlaꞌyāꞌtit ixlīmāpaꞌksīn Jesucristo ē ūꞌtzaꞌ nalīlakachiꞌxcuhuīꞌcan Dios ē nalaktaquilhpūtacan.
\s Ixlatamat Pablo pōꞌktu ixlaꞌ Cristo
\p
\v 12 Tāꞌtimīn, iclacasquiꞌn nacaꞌtzīyāꞌtit tū quinaꞌkspulanīꞌt ūꞌtzaꞌ āꞌchulāꞌ maktāyalh māꞌkahuanī xatze tachihuīn ixlaꞌ Jesucristo.
\v 13 Quit ictachīꞌnīꞌt, ē ixlīpōꞌktucaꞌn soldados tī tamaktakaꞌlha palacio tacaꞌtzītzaꞌ quilīchīꞌcanīꞌt ixpālacata icmāsuꞌyu tū ixlaꞌ Cristo. Nā ixlīpōꞌktucaꞌn āꞌmakapitzīn huāꞌtzāꞌ nā tacaꞌtzī huāꞌmāꞌ.
\v 14 Makapitzīn tī taꞌaꞌkaꞌīꞌ cālīmāhuixcānīcanīꞌt aꞌcxniꞌ tacaꞌtzīlh quit ictachīꞌnīꞌt. Ē āꞌchulāꞌ tamāsuꞌyu ixtachihuīn Dios ē jā tajicuaꞌn.
\p
\v 15 Masqui makapitzīn talīꞌaꞌkchihuīnaꞌn Cristo ixpālacata quintaquiclhlaktzīꞌn ē tatapāpitzicuꞌtun, āꞌmakapitzīn talīꞌaꞌkchihuīnaꞌn ixpālacata xlacaꞌn talacasquiꞌn lhūhuaꞌ tachiꞌxcuhuīꞌt nataꞌaꞌkaꞌīꞌniꞌ Cristo.
\v 16 Tī tze ixtalacapāstacniꞌcaꞌn, xlacaꞌn talīmāsuꞌyu Cristo ixpālacata quintapāxquīꞌ. Tacaꞌtzī quihuiꞌlīcanīꞌt huāꞌtzāꞌ naꞌiclītāya xatze tachihuīn ixlaꞌ Jesucristo.
\v 17 Tī taquiclhcaꞌtzan, xlacaꞌn tatapāpitzicuꞌtun aꞌcxniꞌ talīꞌaꞌkchihuīnaꞌn Cristo. Tapuhuan chuntzaꞌ āꞌchulāꞌ naquintamakapātīnīn līhuan ictachīꞌniꞌ.
\v 18 Jā quimacaꞌtzi tū ixpālacata talīꞌaꞌkchihuīnaꞌn Cristo. Masqui tamāsuꞌyu ixpālacata tatapāpitzicuꞌtun, masqui tamāsuꞌyu ixpālacata quintapāxquīꞌ, talīꞌaꞌkchihuīnaꞌn Cristo ē ūꞌtzaꞌ iclīpāxuhua.
\p
\v 19 Āꞌchulāꞌ icpāxuhua ixpālacata iccaꞌtzī huāꞌmāꞌ tzej nataxtuyāchaꞌ ē naꞌictaxtu nac pūlāchīꞌn ixpālacata huiꞌxinaꞌn quilālīmaktāyamāꞌnauj minoracioncaꞌn. Nā quimaktāya Espíritu Santo ixpālacata ictapaꞌksīniꞌ Jesucristo.
\v 20 Quit ickaꞌlhīmāꞌlh tū namin. Iclacasquiꞌn jā tū naꞌiclītamāxanīꞌ. Āꞌchulāꞌ naꞌictahuixcāni chuhuaꞌj huaꞌchi pōꞌktu quilhtamacuj xaꞌictahuixcāni naꞌicmāsuꞌyu ixpālacata Cristo. Chuntzaꞌ nalaktzīꞌncan chī ixlīkaꞌtlaꞌ Cristo ixpālacata quilatamat, masqui ixquimaknīca ē masqui icuīꞌlhcus.
\v 21 Quit, palh āꞌlakmaꞌj naꞌictahuiꞌla, pōꞌktu quilatamat ixlaꞌ Cristo nahuan. Masqui caꞌicnīlh, naꞌickaꞌlhī quilatamat tū jā catilaksputli.
\v 22 Līhuan icuīꞌlh, tzē naꞌicscuja ixpālacata Māpaꞌksīniꞌ. Chuntzaꞌ quit jā iccaꞌtzī tū naꞌiclacsaca.
\v 23 Quimāmakchuyī ixpālacata aꞌktuꞌ quintalacapāstacniꞌ. Palh naꞌicnī, naꞌictāꞌtahuiꞌla Cristo nac aꞌkapūn ē ūꞌtzaꞌ tze quimpālacata.
\v 24 Ē huiꞌxinaꞌn, tū āꞌchulāꞌ xatze mimpālacatacaꞌn, ūꞌtzaꞌ naꞌiclītahuiꞌlacus ē naꞌiccāmaktāyayān.
\v 25 Chuntzaꞌ iclīcaꞌtzī naꞌiccātāꞌtachokoyān ē naꞌiccātāꞌscujān ixpālacata āꞌchulāꞌ naꞌaꞌkaꞌīꞌyāꞌtit ē nalīpāxuhuaꞌyāꞌtit tū aꞌkaꞌīꞌyāꞌtit.
\v 26 Chuntzaꞌ aꞌcxniꞌ naꞌicaꞌmpalayāchaꞌ, nakaꞌlhīꞌyāꞌtit lhūhuaꞌ tū nalīpāxuhuaꞌyāꞌtit ixpālacata tū Jesucristo cātlahuaniꞌn huiꞌxinaꞌn, ē chī quimāspiꞌtlitzaꞌ.
\p
\v 27 Masqui iclahuīꞌlhcus ē masqui naꞌicnī, tū āꞌchulāꞌ ixlacasquiꞌnca mimpālacatacaꞌn, ūꞌtzaꞌ huāꞌmāꞌ. Natahuiꞌlayāꞌtit chuntzaꞌ chī cāminīꞌniꞌ tī taꞌaꞌkaꞌīꞌniꞌ xatze tachihuīn tū ixlaꞌ Cristo. Chuntzaꞌ palh quit iccālakaꞌnān o palh jāla naꞌicaꞌnāchaꞌ, naquimācaꞌtzīnīcan huiꞌxinaꞌn jā lakpalīꞌnīꞌtaꞌntit tū aꞌkaꞌīꞌnīꞌtaꞌntit. Lacxtim calalh mintalacapāstacniꞌcaꞌn ē mintalacasquiꞌnīncaꞌn. Calātāꞌscujtit lacxtim ixpālacata xatze tachihuīn tū aꞌkaꞌīꞌyāꞌtit.
\v 28 Jā caticājicuaꞌniꞌtit mintāꞌlāquiclhlaktziꞌcaꞌn nūn macstiꞌnaꞌj. Palh jā lakpalīꞌnīꞌtaꞌntit tū aꞌkaꞌīꞌtit ē jā cātijicuaꞌniꞌtit mintāꞌlāquiclhlaktziꞌcaꞌn, chuntzaꞌ tzej nacālīmāsuꞌyuniꞌ mintāꞌlāquiclhlaktziꞌcaꞌn nacāmālaksputūcan xlacaꞌn nac pūpātīn ē huiꞌxinaꞌn nakaꞌlhīꞌyāꞌtit milatamatcaꞌn tū jā catilaksputli.
\v 29 Huiꞌxinaꞌn aꞌkaꞌīꞌniꞌyāꞌtit Cristo ē ūꞌtzaꞌ nacālīmakapūtaxtūyān. Nā caꞌtzīyāꞌtit ixlacasquiꞌnca nalīpātīniꞌnāꞌtit chuntzaꞌ chī ixtalacasquiꞌnīn Dios.
\v 30 Quinaꞌn lacxtim kaꞌlhīyāuj quintāꞌlāquiclhlaktziꞌcaꞌn. Laktzīꞌntittzaꞌ chī icpātīniꞌlh ē chuhuaꞌj kexpaꞌtnīꞌtaꞌntit chī icpātīniꞌmāꞌlhcus.
\c 2
\s Chī jā kaꞌtlaꞌ ixmakcaꞌtzī Cristo ē āꞌlīstān laktaquilhpūtaca
\p
\v 1 Ixlītze palh makcaꞌtzīyāꞌtit Cristo cāmāhuixcānīyān ē cāmākoꞌxamakaꞌtlīyān ixpālacata xlaꞌ cāpāxquīꞌyān. Nā tze palh makcaꞌtzīyāꞌtit Espíritu Santo cātāꞌhuiꞌlān. Tze palh lakapasāꞌtit ixtapāxquīꞌn ē ixtalakalhuꞌmān Cristo.
\v 2 Palh chuntzaꞌ makcaꞌtzīyāꞌtit, naquilāmaxquīꞌyāuj lhūhuaꞌ tapāxuhuān ixpālacata tzej nalatāꞌkchokoyāꞌtit. Chu lacxtim chī nalacapāstacnaꞌnāꞌtit ē chu lacxtim nalāpāxquīꞌyāꞌtit ē aꞌktin nahuan mintalacapāstacniꞌcaꞌn. Lacxtim chī nalatapāyāꞌtit ē chuntzaꞌ naquilāmaxquīꞌyāuj lhūhuaꞌ tapāxuhuān.
\v 3 Jā tū catlahuaꞌtit xmān mimpālacatacaꞌn nūn ixpālacata nacātalakachiꞌxcuhuīꞌyān māniꞌ huiꞌxinaꞌn. Jā kaꞌtlaꞌ camakcaꞌtzītit. Xatze chāꞌtunuꞌ calacapāstactit āꞌmakapitzīn āꞌchulāꞌ xatze ē jā xlaꞌ.
\v 4 Chāꞌtunuꞌ cuenta catlahualh tū ixlacaꞌn āꞌmakapitzīn ē catalāmaktakaꞌlhli. Jā xmān namaktakaꞌlha tū ixlaꞌ.
\p
\v 5 Cakaꞌlhīꞌtit huāꞌmāꞌ talacapāstacniꞌ tū ixkaꞌlhī Cristo Jesús.
\v 6 Xlaꞌ masqui lacxtim chī Dios, jā puhuanli ixtāꞌchuntzaꞌ Dios jā maktin catimakxtekli.
\v 7 Mākēnūlh ixtāꞌchuntzaꞌ Dios nalītaxtu huaꞌchi tasācuaꞌ ē nalacatuncuhuī chī chiꞌxcuhuīꞌn talacatuncuhuī.
\v 8 Aꞌcxniꞌ ixlatlāꞌhuan nac cāꞌtiꞌyaꞌtnaꞌ chī chiꞌxcuꞌ, āꞌchulāꞌ macstiꞌnaꞌj līhuanli ē kexmatniꞌlh Dios hasta tamacamāstāꞌlh nanī. Māmāxanīꞌca ixpālacata chī xtokohuaꞌcaꞌca nac cruz.
\v 9 Ūꞌtzaꞌ Dios līlakachiꞌxcuhuīꞌlh ē nā līmaxquīꞌlh ixtacuhuīniꞌ līhuaꞌcaꞌlh xatze ē jā ixtacuhuīniꞌ āꞌmakapitzīn. Jā tū aꞌnan ixtāꞌchuntzaꞌ xatze chī huāꞌmāꞌ tacuhuīniꞌ.
\v 10 Chuntzaꞌ tlahuaca ixpālacata ixlīpōꞌktucaꞌn natamakapāxuī Jesús ē natatatzokostaniꞌ. Ixlīpōꞌktucaꞌn calhāxcuhuālh nac aꞌkapūn ē nac cāꞌtiꞌyaꞌtnaꞌ ē na ixtampīn tiꞌyaꞌt, xlacaꞌn natamakapāxuī Jesús.
\v 11 Ixlīpōꞌktucaꞌn tachiꞌxcuhuīꞌt natahuan Jesucristo ūꞌtzaꞌ Māpaꞌksīniꞌ ē ūꞌtzaꞌ nalīlaktaquilhpūtacan Dios xaTātaꞌ ē nalakachiꞌxcuhuīꞌcan.
\s Tī taꞌaꞌkaꞌīꞌ huaꞌchi pūmaksko nac cāꞌquilhtamacuj
\p
\v 12 Tāꞌtimīn, chuntzaꞌ chī pōꞌktu quilhtamacuj quilākexmatniꞌnīꞌtaꞌuj aꞌcxniꞌ xaꞌiccātāꞌlatlāꞌhuanān, āꞌchulāꞌ catlahuaꞌtit chuhuaꞌj līhuan quit jā iccātāꞌlatlāꞌhuanān. Chāꞌtunuꞌ calīhuiꞌlītit minaꞌcstucaꞌn namākentaxtūkōꞌyāꞌtit tū cāminīꞌniꞌ tī taꞌaꞌkaꞌīꞌ. Catamaktakaꞌlhtit ē cuenta catlahuaꞌtit ixpālacata jā natlahuaꞌyāꞌtit tū jā tze.
\v 13 Dios ūꞌtzaꞌ tī cāmālacapāstaquīyān xatze ē cāmaktāyayān natlahuaꞌyāꞌtit ixtalacasquiꞌnīn.
\p
\v 14 Catūhuālh tū natlahuaꞌyāꞌtit, līpāxuj catlahuaꞌtit ē jā titāꞌlāhuaniyāꞌtit ē jā nalāquilhnīyāꞌtit.
\v 15 Chuntzaꞌ catlahuaꞌtit ixpālacata jā tū tū nacātalīꞌaꞌksaꞌnān ē lactze nalītaxtuyāꞌtit chuntzaꞌ chī cāminīꞌniꞌ ixlacstīn Dios. Masqui huiꞌlāꞌnaꞌntit na ixlacpuꞌnaꞌiꞌtātcaꞌn tī jā tzeya chiꞌxcuhuīꞌn ē tī jā tze ixtalacapāstacniꞌcaꞌn, jā caticāmakscaꞌtxtutit xlacaꞌn. Na ixlacpuꞌnaꞌiꞌtātcaꞌn huiꞌxinaꞌn naxkakayāꞌtit huaꞌchi pūmaksko jā cāꞌpucsuaꞌ.
\v 16 Chuntzaꞌ huiꞌxinaꞌn cāmāsuꞌyuniꞌpāꞌnaꞌntit chī natalīkaꞌlhī xasāstiꞌ ixlatamatcaꞌn. Ūꞌtzaꞌ kaꞌtlaꞌ naꞌiccālīmakcaꞌtzīyān aꞌcxniꞌ nachin ixquilhtamacuj Cristo ē naꞌiccaꞌtzī līmacuanli quintascujūt. Jā pāxcat huanli tū iccāmāsuꞌyuniꞌn.
\v 17 Huiꞌxinaꞌn aꞌkaꞌīꞌtit tū iccāmāsuꞌyuniꞌn. Ūꞌtzaꞌ huaꞌchi tū mālacnūniꞌtit Dios nac pūmacamāstāꞌn. Palh ixlacasquiꞌnca naquimaknīcan ē chuntzaꞌ naꞌiclītaxtu huaꞌchi tamālacnūn na mimpūmacamāstāꞌncaꞌn, quit naꞌiccātāꞌpāxuhuayān.
\v 18 Nā ūꞌtzaꞌ naquilālītāꞌpāxuhuayāuj.
\s Timoteo ē Epafrodito
\p
\v 19 Palh Māpaꞌksīniꞌ Jesús naquimakxteka, palaj quit naꞌiccāmacāꞌniꞌyāchāꞌn Timoteo naquihuani chī huiꞌlāꞌnaꞌnchipitit aꞌcxniꞌ naquītaspiꞌta. Chuntzaꞌ quit naꞌickaꞌlhī tapāxuhuān.
\v 20 Naꞌiccāmacāꞌniꞌyāchāꞌn Timoteo ixpālacata jā tī aꞌnan āꞌchāꞌtin chī xlaꞌ tī cālacapāstacān huiꞌxinaꞌn huaꞌchi chī quit. Xlaꞌ ixlīcānaꞌ līꞌaꞌktuyun mimpālacatacaꞌn.
\v 21 Āꞌmakapitzīn ixlīpōꞌktucaꞌn cuenta tatlahua tū xmān ixlacaꞌn ē jā cuenta tatlahua tū Cristo lacasquiꞌn.
\v 22 Huiꞌxinaꞌn tzej lakapasāꞌtit ixlatamat Timoteo ē caꞌtzīyāꞌtit chī huaꞌchi quinkaꞌhuaꞌcha xlaꞌ quintāꞌscujli aꞌcxniꞌ xaꞌicmāsuꞌyutlāꞌhuan xatze tachihuīn tū ixlaꞌ Dios.
\v 23 Xmān naꞌiccaꞌtzī chī naquintaxtuniꞌkōꞌ, icpuhuan naꞌiccālakmacāꞌnāchāꞌn Timoteo.
\v 24 Nā quit icaꞌkaꞌīꞌniꞌ Māpaꞌksīniꞌ naquimāxtu nac pūlāchīꞌn ē chuntzaꞌ palaj naꞌiccālakaꞌnāchāꞌn.
\p
\v 25 Quit icpuhuan ixlacasquiꞌnca naꞌiccāmacāꞌniꞌyāchāꞌn quintāꞌtin Epafrodito. Xlaꞌ ixquintāꞌlatlāꞌhuan ixpālacata Jesús ē ixquintāꞌscuja. Nā xlaꞌ milacscujniꞌcaꞌn ē milakxokocaꞌn chī quimaktāyalh aꞌcxniꞌ xaꞌicmaclacasquiꞌn.
\v 26 Xlaꞌ ixcālaktzīꞌncuꞌtunān ē līlīpuhuanli ixpālacata huiꞌxinaꞌn ixkexpaꞌtnīꞌtaꞌntit chī ixtaꞌjatatla.
\v 27 Ixlīcānaꞌ snūn ixlamāꞌlh ē ixnīcuꞌtumāꞌlhtzaꞌ. Dios lakalhuꞌmanli ē xlaꞌ tzeyanli. Nā quit quilakalhuꞌmanli ixpālacata jā āꞌchulāꞌ xaꞌiclīlīpuhuanli palh ixnīlh.
\v 28 Nā palaj iccālakmacāꞌncuꞌtunāchāꞌn ē chuntzaꞌ nalīpāxuhuaꞌyāꞌtit aꞌcxniꞌ nalaktzīꞌmpalaꞌyāꞌtit. Chuntzaꞌ quit jā naꞌickaꞌlhī tū naꞌiclīꞌaꞌktuyun.
\v 29 Aꞌcxniꞌ natāꞌlāpāxtokāꞌtit, camaxquīꞌtit tapāxcatcaꞌtzīn Dios. Calakachiꞌxcuhuīꞌtit Epafrodito ē nā āꞌmakapitzīn huaꞌchi xlaꞌ tī jā tajicuaꞌn natanī ixpālacata Cristo.
\v 30 Ixnīmāꞌlhtzaꞌ Epafrodito ixpālacata ixtascujūt Cristo. Jā līlakaputzalh ixlatamat aꞌcxniꞌ quimaktāyalh ē tlahuakōꞌlh tū huiꞌxinaꞌn jāla catitlahuaꞌtit ixpālacata makat ixlatlāꞌhuaꞌnāꞌtit.
\c 3
\s Tū līlacatejtin ē ixlīcānaꞌ
\p
\v 1 Chuhuaꞌj, tāꞌtimīn, calīpāxuhuaꞌtit ixpālacata quiMāpaꞌksīniꞌcaꞌn Jesucristo. Jā iclījicsuaꞌ masqui chu ūꞌtzaꞌ naꞌiccātzoꞌknuniꞌpalayān ē ūꞌtzaꞌ xatze mimpālacatacaꞌn.
\v 2 Cacātapānūꞌniꞌtit tī jā tze ixtalacapāstacniꞌcaꞌn, tī tatlahua tū jā tze. Cacātapānūꞌniꞌtit tī tahuan ixlacasquiꞌnca ixlīpōꞌktucaꞌn tī taꞌaꞌkaꞌīꞌniꞌ Cristo cāchuꞌcuniꞌcan ixmacniꞌcaꞌn. Ūꞌtzaꞌ ixtahuiꞌlatcaꞌn israelitas tū huanican circuncisión. Xlacaꞌn tamālaksputūcuꞌtun tū aꞌkaꞌīꞌnīꞌtaꞌntit.
\v 3 Quinaꞌn tī ixlīcānaꞌ ixtachiꞌxcuhuīꞌt Dios ē līmakapāxuīyāuj Espíritu Santo. Ē cāꞌtapāxuhuān līpāhuanāuj Cristo Jesús. Jā quincātalīpāhuanān quinaꞌcstucaꞌn nūn līpāhuanāuj catūhuālh tū tatlahua chiꞌxcuhuīꞌn.
\v 4 Quit quinaꞌcstu nā ickaꞌlhī tū xaꞌiclīpāhuanlī. Palh catīhuālh napuhuan xlaꞌ tze nahuan ixpālacata mākentaxtū ixlīmāpaꞌksīn Moisés, quit naꞌicpuhuan āꞌchulāꞌ tze quit.
\v 5 Circuncisión quintlahuaniꞌca aꞌcxniꞌ ictlahualh aꞌktzayan quilhtamacuj aꞌcxniꞌ xaꞌictahuiꞌlanīꞌtcus. Quit, quixūꞌnāpapnaꞌ israelitas ixtahuanīꞌt. Quilītalakapasniꞌ hasta ixquilhtzucuniꞌ Benjamín ixuanīꞌt. Quit hebreo ē nā quintātaꞌ ē quintzīꞌ nā hebreo ixtahuanīꞌt. Fariseo xaꞌicuanīꞌt ē ūꞌtzaꞌ quit līlacatejtin icmākentaxtūkōꞌlh līmāpaꞌksīn.
\v 6 Xaꞌiclīmaktāyacuꞌtun quireligión. Xasāstiꞌ ixuanīꞌtcus ixtamāsuꞌyun Jesús. Ūꞌtzaꞌ xaꞌiccālīputzastālaniꞌtāꞌkchoko tī taꞌaꞌkaꞌīꞌlh. Jā tū tū quintilīꞌaꞌksaꞌnca chī iclīmākentaxtūlh līmāpaꞌksīn.
\v 7 Ixlīpōꞌktu tzamāꞌ catūhuālh tū kaꞌtlaꞌ xaꞌiclīmakcaꞌtzī, ūꞌtzaꞌ chuhuaꞌj iclaktzīꞌn huaꞌchi jā tū ixtapalh ixpālacata Cristo.
\v 8 Iccāhuaniyān ixlīpōꞌktu tzamāꞌ tū ickaꞌlhī huaꞌchi jā tū ixtapalh. Āꞌchulāꞌ ixtapalh lakapascan Cristo Jesús quiMāpaꞌksīniꞌ ē jā naꞌickaꞌlhī tū kaꞌtlaꞌ naꞌiclīmakcaꞌtzī. Chuhuaꞌj icaꞌkaꞌīꞌnīꞌt Cristo ē icmakxtekli ixlīpōꞌktu tū kaꞌtlaꞌ xaꞌiclīmakcaꞌtzī. Quit iclaktzīꞌn huaꞌchi aꞌktin paꞌlhxtum. Āꞌchulāꞌ tze xmān iclīpāhuan Cristo.
\v 9 Chuntzaꞌ quit ictapaꞌksīniꞌ xlaꞌ ē xatze quit na ixlacatīn Dios ixpālacata iclīpāhuan Cristo ē ictapaꞌksīniꞌ xlaꞌ. Jātzaꞌ iclīpāhuan līmāpaꞌksīn; ūꞌtzaꞌ jāla quimaktāya chī tze naꞌiclīhuan na ixlacatīn Dios.
\v 10 Tzej iclakapascuꞌtun Cristo ē ickaꞌlhīcuꞌtun līmāpaꞌksīn tū xlaꞌ līlacastālancuanaꞌnli. Quit iclītaxtucuꞌtun chuntzaꞌ chī Cristo masqui naquimakapātīnīncan ixpālacata.
\v 11 Chuntzaꞌ quit ickaꞌlhīmāꞌlh aꞌcxniꞌ naꞌiclacastālancuanaꞌn ē aꞌcxniꞌ ixlīcānaꞌ naꞌiclītaxtu chuntzaꞌ chī Cristo.
\s Tanūniꞌcan chī nalītlajacan premio
\p
\v 12 Jā iccāhuanimāꞌn jā tū quisputniꞌ ē ictaxtunīꞌttzaꞌ chī Cristo. Cristo Jesús quimakapūtaxtūlh ē ictapaꞌksīniꞌ. Ūꞌtzaꞌ iclīmākentaxtūcuꞌtun ixtalacasquiꞌnīn.
\v 13 Tāꞌtimīn, quit jā icpuhuan palh icmākentaxtūkōꞌlhtzaꞌ. Tū ictlahuamāꞌlh ūꞌtzaꞌ huāꞌmāꞌ. Icpātzaꞌnkāmāꞌlh tū huīꞌlh nac quinchakēn chī nac tatuꞌjnuꞌ ē tzej ictuꞌjnumāꞌlh hasta jā naꞌicchāꞌn.
\v 14 Lacatzaꞌj icaꞌmāꞌlh hasta jā naꞌaꞌksputa tatuꞌjnuꞌ ē naꞌicmaktīniꞌn premio. Dios ūꞌtzaꞌ tī naquimaxquīꞌ ē ūꞌtzaꞌ quintaꞌsaniꞌyāchaꞌ tālhmāꞌn ixpālacata ictapaꞌksīniꞌ Cristo Jesús.
\p
\v 15 Quinaꞌn tī tzej aꞌkaꞌīꞌyāuj, napuhuanāuj jānaꞌj lactze quinaꞌn chī ixlacasquiꞌnca. Palh xtum lacapāstacnaꞌnāꞌtit, ūꞌtzaꞌ Dios nacāmāsuꞌyuniꞌyān.
\v 16 Chuntzaꞌ chī scaꞌttittzaꞌ, chuntzaꞌ calīlatlāꞌhuantit.
\p
\v 17 Tāꞌtimīn, catlahuaꞌtit chuntzaꞌ chī quit ictlahua ē cuenta catlahuaꞌtit tī talatlāꞌhuan chī iccāmāsuꞌyuniꞌn.
\v 18 Lhūhuaꞌ aꞌnan tī jā lacatejtin talatāꞌkchoko. Tasuꞌyu jā taꞌaꞌkaꞌīꞌ palh Cristo nīlh nac cruz quimpālacatacaꞌn. Maklhūhuaꞌtzaꞌ iccāhuanin ē chuhuaꞌj iccalhuamāꞌlh aꞌcxniꞌ iccātzoꞌknuniꞌmāꞌn. Iclīlīpuhuan ixpālacata jā taꞌaꞌkaꞌīꞌ.
\v 19 Xlacaꞌn nataꞌaꞌn nac pūpātīn. Tū xlacaꞌn talacasquiꞌn, huaꞌchi ūꞌtzaꞌ ixdioscaꞌn. Kaꞌtlaꞌ talīmakcaꞌtzī masqui tatlahua tū līmāxanaꞌ ē xmān talacapāstaca tū xalaꞌ huāꞌtzāꞌ nac cāꞌquilhtamacuj.
\v 20 Quinaꞌn tapaꞌksīniꞌyāuj nac aꞌkapūn ē kaꞌlhīmāꞌnauj camilh quiMakapūtaxtūnuꞌcaꞌn ē ūꞌtzaꞌ Jesucristo.
\v 21 Xlaꞌ naquincālakpalīniꞌyān quimacniꞌcaꞌn tū namasa ē chuntzaꞌ quimacniꞌcaꞌn natasuꞌyu chī ixuanīꞌt ixmacniꞌ Cristo aꞌcxniꞌ lacastālancuanaꞌnli. Naquincālīlakpalīniꞌyān quimacniꞌcaꞌn ixlītliꞌhuiꞌqui tū tzē nacālīmāpaꞌksīkōꞌ ixlīpōꞌktu tū aꞌnan.
\c 4
\s Calīpāxuhuaꞌtit Māpaꞌksīniꞌ pōꞌktu quilhtamacuj
\p
\v 1 Chuntzaꞌ, tāꞌtimīn, jā cataxtutāyaꞌtit na ixtej Māpaꞌksīniꞌ. Iccāpāxquīꞌyān ē iccālaktzīꞌncuꞌtunān. Huiꞌxinaꞌn quilāmaxquīꞌyāuj tapāxuhuān. Chī aꞌkaꞌīꞌyāꞌtit, ūꞌtzaꞌ huaꞌchi quintatlaj. Laktzaꞌ iccāpāxquīꞌyān.
\p
\v 2 Iccāsquiꞌniꞌ Evodia ē Síntique chu aꞌktin catalacapāstaclī ē jātzaꞌ catalāquilhnīlh. Lītāꞌtimīn tatapaꞌksīniꞌ Cristo.
\v 3 Huiꞌx tī tzej quintāꞌscujaꞌ cacāmākoꞌxamixiꞌ tzamāꞌ puscan; xlacaꞌn quintamaktāyalh aꞌcxniꞌ xaꞌicmāsuꞌyumāꞌlh xatze tachihuīn tū ixlaꞌ Dios. Xlacaꞌn tatāꞌscujli Clemente ē āꞌmakapitzīn tī quintatāꞌscujli. Cātzoꞌkcanīꞌt ixtacuhuīniꞌcaꞌn na ixlibro Dios tī takaꞌlhī xasāstiꞌ ixlatamatcaꞌn.
\p
\v 4 Pōꞌktu quilhtamacuj calīpāxuhuaꞌtit ixpālacata Māpaꞌksīniꞌ ē naꞌiccāhuanipalayān, capāxuhuaꞌtit.
\v 5 Ixlīpōꞌktucaꞌn tachiꞌxcuhuīꞌt cacātalakapasniꞌ palh tzeya chiꞌxcuhuīꞌn huiꞌxinaꞌn. Palaj namimpala Māpaꞌksīniꞌ.
\p
\v 6 Jātzaꞌ tū catilītamakchuyīꞌtit ē pōꞌktu quilhtamacuj caꞌorarlītit ē casquiꞌniꞌtit Dios nacāmaktāyayān. Camaxquīꞌtit tapāxcatcaꞌtzīn ē cahuaꞌniꞌtit Dios ixlīpōꞌktu tū maclacasquiꞌnāꞌtit.
\v 7 Chuntzaꞌ Dios nacāmājaxīyān ē āꞌmakapitzīn jāla catitalacacaꞌtzīlh chī jā tū cāmāmakchuyīyān. Dios nacāmaktakaꞌlha mintalacapāstacniꞌcaꞌn ē mintalacasquiꞌnīncaꞌn ixpālacata tāꞌtapaꞌksīyāꞌtit Jesucristo.
\s Calacapāstactit tū tze
\p
\v 8 Chuhuaꞌj āꞌxmān, tāꞌtimīn. Catūxcuhuālh tū ixlīcānaꞌ ē tū līlacatejtin, ūꞌtzaꞌ calīlacapāstactit. Nā tū lactze ē catūxcuhuālh tū lakachiꞌxcuhuīꞌcan, ūꞌtzaꞌ calīlacapāstactit. Nā tū tzēhuanīꞌt ē tū minīꞌniꞌ, ūꞌtzaꞌ calīlacapāstactit. Palh huīꞌlh catūhuālh tū tze ē palh huīꞌlh tū tzē lakachiꞌxcuhuīꞌcan, huiꞌxinaꞌn cuenta catlahuaꞌtit tzamāꞌ. Calacapāstactit tzamāꞌ ē tzej nalatāꞌkchokoyāꞌtit.
\p
\v 9 Tamāsuꞌyun tū quilāmakscaꞌtxtunīꞌtauj, chuntzaꞌ catlahuaꞌtit. Chī iccāhuaninīꞌtaꞌn ē chī laktzīꞌnīꞌtaꞌntit tū ictlahuanīꞌt, nā chuntzaꞌ catlahuaꞌtit ē Dios nacātāꞌtahuiꞌlayān huiꞌxinaꞌn ē tzej nalatapāyāꞌtit.
\s Pablo cāmaxquīꞌlh tapāxcatcaꞌtzīn xalanīꞌn nac Filipos
\p
\v 10 Iclīpāxuhua Māpaꞌksīniꞌ ē chī chuhuaꞌj quilālacapāstacpalayāuj huiꞌxinaꞌn. Masqui pōꞌktu quilhtamacuj ixquilālacapāstacāuj, jāla quilāmaktāyauj ixpālacata makat xaꞌiclamāꞌchaꞌ.
\v 11 Jā iccāhuaniyān quisputniꞌ catūhuālh; quit icscaꞌtnīꞌttzaꞌ chuntzaꞌ chī icuīꞌlh, ūꞌtzaꞌ ixtalacasquiꞌnīn Dios quimpālacata.
\v 12 Iccaꞌtzī chī naꞌiclatahuiꞌla aꞌcxniꞌ quisputniꞌ tū icmaclacasquiꞌn ē nā iccaꞌtzī chī naꞌiclatahuiꞌla aꞌcxniꞌ quinquītāxtūniꞌ tū icmaclacasquiꞌn. Chuntzaꞌ chī icuīꞌlh icscaꞌtlitzaꞌ chī tzē iclīpāxuhua masqui ictziꞌncsa ē masqui ickaꞌsa. Masqui jā tū tū icmaclacasquiꞌn ē masqui quisputniꞌ, quit icpāxuhua.
\v 13 Ictapaꞌksīniꞌ Cristo, ūꞌtzaꞌ tī quimātliꞌhuiꞌclhī ē chuntzaꞌ tzē naꞌictlahua ixlīpōꞌktu catūhuālh.
\v 14 Masqui Cristo quimātliꞌhuiꞌclhī, xatze huaꞌchi quilāmaktāyanīꞌtauj aꞌcxniꞌ xaꞌicpātīniꞌmāꞌlh.
\p
\v 15 Huiꞌxinaꞌn xalanīꞌn nac Filipos tzej caꞌtzīyāꞌtit huāꞌmāꞌ. Aꞌcxniꞌ ixtzucupāꞌnaꞌntitcus aꞌkaꞌīꞌniꞌyāꞌtit ixtachihuīn Dios ē aꞌcxniꞌ ictaxtulh nac estado Macedonia, xmān huiꞌxinaꞌn quilāmaktāyauj. Āꞌmakapitzīn tī taꞌaꞌkaꞌīꞌlh ē ixtatakēstokmāꞌnalh āꞌlacatin, jā tī chāꞌtin quimacaminiꞌlh tumīn masqui iccāmāsuꞌyuniꞌlh ixtachihuīn Dios.
\v 16 Xaꞌiclahuīꞌlhcus nac cāꞌlacchicniꞌ Tesalónica ē huiꞌxinaꞌn quilāmacaminiꞌuj tumīn ē jā xmān maktin.
\v 17 Jā icuanicuꞌtun icputzamāꞌlh talakalhuꞌmān. Quit iclacasquiꞌn tū tze mimpālacatacaꞌn. Dios cuenta natlahua chī tlahuaꞌnīꞌtaꞌntit ē nacāxokonuꞌniꞌyān.
\v 18 Huaꞌchi quilāxokokōꞌuj ē hasta quītāxtūlh. Jātzaꞌ icmaclacasquiꞌn catūhuālh ixpālacata Epafrodito quilīminiꞌlh talakalhuꞌmān tū quilāmacaminiꞌuj huiꞌxinaꞌn. Dios laktzīꞌn tū quilāmaxquīꞌuj ē huaꞌchi Dios līlakatāyāꞌtit. Xlaꞌ nalīpāxuhua.
\v 19 QuinDioscaꞌn nacāmaxquīꞌyān ixlīpōꞌktu tū maclacasquiꞌnāꞌtit. Ūꞌtzaꞌ natlahua ixpālacata tū tlahualh Jesús. Xlaꞌ huiꞌlachaꞌ nac aꞌkapūn jā huīꞌlh Dios ē kaꞌlhī ixlīpōꞌktu tū maclacasquiꞌncan. Ūꞌtzaꞌ Dios tzē nacālīmaxquīꞌyān.
\v 20 Calaktaquilhpūtaca Dios quinTātaꞌcaꞌn pōꞌktu quilhtamacuj. Amén.
\s Āꞌxmān saludos
\p
\v 21 Iccāmacāꞌniꞌyāchāꞌn saludos milīpōꞌktucaꞌn tī tapaꞌksīniꞌyāꞌtit Jesucristo. Tāꞌtimīn tī quintatāꞌlahuiꞌlānaꞌlh nā xlacaꞌn cātamacāꞌniꞌyāchāꞌn saludos.
\v 22 Ixlīpōꞌktucaꞌn tī taꞌaꞌkaꞌīꞌ cātamacāꞌniꞌyāchāꞌn saludos ē nā xlacaꞌn tī tascujmāꞌnalh na ixchic emperador cātamacāꞌniꞌyāchāꞌn saludos.
\p
\v 23 Ixtalakalhuꞌmān Māpaꞌksīniꞌ Jesucristo cacātāꞌtachokon milīpōꞌktucaꞌn. Amén.