\id COL
\h Colosenses
\toc1 Colosenses
\mt Colosenses
\c 1
\s Pablo cātzoꞌknuniꞌlh xalanīꞌn nac Colosas tī ixtaꞌaꞌkaꞌīꞌ
\p
\v 1 Quit Pablo tī cāmacaminiꞌyān huāꞌmāꞌ carta ē quit ixapóstol Jesucristo chī ixtalacasquiꞌnīn Dios. Nā huīꞌlh huāꞌtzāꞌ quintāꞌtincaꞌn Timoteo.
\v 2 Quinchāꞌtuꞌcaꞌn iccāmacāꞌniꞌyāchāꞌn saludos milīpōꞌktucaꞌn xalanīꞌn nac Colosas tī tāꞌtapaꞌksīyāꞌtit Dios ē jā taxtutāyaꞌnīꞌtaꞌntit na ixtej Cristo. QuinTātaꞌcaꞌn Dios cacālakalhuꞌmaniꞌ ē tzej calatapāꞌtit.
\s Pablo orarlīniꞌlh Dios ixpālacata tāꞌtimīn
\p
\v 3 Aꞌcxniꞌ icorarlīniꞌyāuj Dios tī ixTātaꞌ Jesucristo quiMāpaꞌksīniꞌ, icorarlīyāuj mimpālacatacaꞌn. Pōꞌktu quilhtamacuj icmaxquīꞌyāuj tapāxcatcaꞌtzīn
\v 4 ixpālacata quincātamācaꞌtzīnīn chī aꞌkaꞌīꞌniꞌyāꞌtit Jesucristo ē chī cāpāxquīꞌyāꞌtit ixlīpōꞌktucaꞌn ixtachiꞌxcuhuīꞌt Dios.
\v 5 Chuntzaꞌ aꞌkaꞌīꞌyāꞌtit ē cāpāxquīꞌyāꞌtit ixpālacata kaꞌlhīpāꞌnaꞌntit tū māquīꞌcanīꞌt mimpālacatacaꞌn nac aꞌkapūn. Ūꞌtzaꞌ huiꞌxinaꞌn scaꞌttittzaꞌ aꞌcxniꞌ pūla kexpaꞌttit xatze tachihuīn tū ixlīcānaꞌ.
\v 6 Chuntzaꞌ chī cātalīmāsuꞌyuniꞌnīꞌtaꞌn huiꞌxinaꞌn, calhāxcuhuālh nac cāꞌquilhtamacuj nā cāmāsuꞌyuniꞌmāꞌca. Talhūhuaꞌmāꞌnalh tachiꞌxcuhuīꞌt tī taꞌaꞌkaꞌīꞌmāꞌnalh. Nā chuntzaꞌ lanīꞌt na milacpuꞌnaꞌiꞌtātcaꞌn aꞌcxniꞌ kexpaꞌttit ē caꞌtzītit chī Dios ixlīcānaꞌ quincālakalhuꞌmanān. Huiꞌxinaꞌn caꞌtzīyāꞌtit ixlīcānaꞌ tū cātamāsuꞌyuniꞌn.
\v 7 Ē chuntzaꞌ cāmāsuꞌyuniꞌn Epafras tī quincātāꞌscujniꞌ ē tī icpāxquīꞌyāuj. Xlaꞌ quilakxokocaꞌn quit ē Timoteo ē līlacatejtin scuja chuntzaꞌ chī īꞌscujniꞌ Cristo.
\v 8 Quincātamācaꞌtzīnīn xlaꞌ chī lālīpāxquīꞌyāꞌtit ixpālacata Espíritu Santo.
\p
\v 9 Aꞌcxniꞌ ickexmatui chī aꞌkaꞌīꞌtit, quinaꞌn jā icmakxtekui icorarlīniꞌyāuj Dios mimpālacatacaꞌn. Icsquiꞌniꞌyāuj huiꞌxinaꞌn tzej cacaꞌtzītit tū ixtalacasquiꞌnīn Dios. Chuntzaꞌ Dios tzej nacāmācaꞌtzīnīyān tū xlaꞌ lacasquiꞌn natlahuaꞌyāꞌtit. Cālīmāsuꞌyuniꞌyān ixEspíritu ē tzē natlahuaꞌyāꞌtit.
\v 10 Chuntzaꞌ nacaꞌtzīyāꞌtit chī nalīlatāꞌkchokoyāꞌtit chī Dios lacasquiꞌn ē catūxcuhuālh tū natlahuaꞌyāꞌtit namakapāxuī Dios. Xatze tū tlahuaꞌyāꞌtit, ē ūꞌtzaꞌ lītasuꞌyu tlahuaꞌpāꞌnaꞌntit ixtascujūt Dios. Āꞌchulāꞌ nacaꞌtzīyāꞌtit chī ixlīDios.
\v 11 Cacālīmātliꞌhuiꞌclhīn xakaꞌtlaꞌ ixlītliꞌhuiꞌqui Dios chuntzaꞌ chī xlaꞌ māstāꞌ ē ūꞌtzaꞌ nalītāyaniꞌyāꞌtit tū nacāꞌaꞌkspulayān ē jā nalījiclhuaꞌyāꞌtit. Napāxuhuaꞌyāꞌtit.
\v 12 Camaxquīꞌtit tapāxcatcaꞌtzīn xaTātaꞌ Dios. Xlaꞌ quincācāxtlahuanīꞌtaꞌn ē chuntzaꞌ tzē namaktīniꞌnāuj tū cāxtlahuacanīꞌt ixpālacata aꞌkaꞌīꞌyāuj Dios. Ē ūꞌtzaꞌ huāꞌmāꞌ jā Dios māpaꞌksīniꞌnkōꞌ ē aꞌntzaꞌ pōꞌktu quilhtamacuj xkaka.
\v 13 Dios quincāmakapūtaxtūn jā cāꞌpucsuaꞌ ē jā māpaꞌksīniꞌn skāhuīꞌniꞌ. Quincālēꞌn jā māpaꞌksīniꞌn īꞌSkaꞌtaꞌ tī laktzaꞌ pāxquīꞌ.
\v 14 Jesús quincālakmāxtun ē quincāmātzaꞌnkēnaꞌniꞌkōꞌn quincuentacaꞌn.
\s Dios ē tachiꞌxcuhuīꞌt takoꞌxamixli ixpālacata Cristo
\p
\v 15 Masqui jāla laktzīꞌncan Dios, Jesús māsuꞌyulh chī ixlīDios. Xlaꞌ Dios lacsacli namāpaꞌksī ixlīpōꞌktu tū huīꞌlh.
\v 16 Cristo tlahualh ixlīpōꞌktu tū aꞌnan nac aꞌkapūn ē nac cāꞌtiꞌyaꞌtnaꞌ tū laktzīꞌncan ē tū jāla laktzīꞌncan. Cristo cāxtlahualh chī namāpaꞌksīniꞌncan nac aꞌkapūn ē cāhuiꞌlīlh xanapuxcuꞌnuꞌ ángeles. Nā cāmātzuculh tī cāmāpaꞌksī espíritus. Tlahualh ixlīpōꞌktu tū aꞌnan ixpālacata nalīmakapāxuī xlaꞌ.
\v 17 Xlaꞌ xapūla ixuanīꞌt ē jā ixlīpōꞌktu tū aꞌnan ē ixpālacata xlaꞌ ixlīpōꞌktucus huīꞌlh ē tzej lamāꞌlh.
\v 18 Ixlīpōꞌktucaꞌn tī taꞌaꞌkaꞌīꞌniꞌ Jesús, xlacaꞌn talītaxtunīꞌt huaꞌchi ixmacniꞌ. Xlaꞌ huaꞌchi ixaꞌkxāk tzamāꞌ macniꞌ. Xlaꞌ xalītzucuniꞌ ē xlaꞌ xapuxcuꞌ ixlīpōꞌktucaꞌn tī natalacastālancuanaꞌn. Chuntzaꞌ xlaꞌ xapūla ē nacāmāpaꞌksīkōꞌ ixlīpōꞌktu.
\v 19 Chuntzaꞌ pōꞌktu tū Dios kaꞌlhī, nā kaꞌlhī Cristo. Chī Dios, chu chuntzaꞌ Cristo. Chuntzaꞌ ixtalacasquiꞌnīn Dios.
\v 20 Takoꞌxamixkōꞌlh Dios ē tachiꞌxcuhuīꞌt ixpālacata Jesús. Catīxcuhuālh nac cāꞌtiꞌyaꞌtnaꞌ ē catīxcuhuālh nac aꞌkapūn, ixlīpōꞌktucaꞌn ē Dios cāmākoꞌxamixīkōꞌca. Ūꞌtza tlahualh aꞌcxniꞌ xtokohuaꞌcaꞌca Jesús ē taxtulh ixkaꞌlhniꞌ.
\p
\v 21 Huiꞌxinaꞌn ixtāꞌlāquiclhlaktziꞌ Dios ixuanīꞌtaꞌntit. Jā ixlaktzīꞌncuꞌtunāꞌtit Dios ē jā ixcaꞌtzīcuꞌtunāꞌtit tū xlaꞌ lacasquiꞌn. Huiꞌxinaꞌn ixtlahuaꞌyāꞌtit tū jā tze.
\v 22 Chuhuaꞌj ixamigos Dios huaꞌnīꞌtaꞌntit ixpālacata Cristo cāmākoꞌxamixīn aꞌcxniꞌ māstāꞌlh ixmacniꞌ nanī. Chuntzaꞌ tlahualh ixpālacata tzē nacāmāsuꞌyukōꞌyān lactze na ixlacatīn Dios ē ixpālacata jā tū nalaclīꞌpināꞌtit ē jā naꞌaꞌnan tū nacātalīputzānaꞌnīꞌyān.
\v 23 Chuntzaꞌ ixlacasquiꞌnca naꞌaꞌkaꞌīꞌtēlhayāꞌtit ē jā cataxtutāyaꞌtit na ixtej Dios. Jā calakpalīꞌtit chī aꞌkaꞌīꞌyāꞌtit. Xatze tachihuīn tū cātamāsuꞌyuniꞌn huiꞌxinaꞌn ē tū līꞌaꞌkchihuīnaꞌnca calhāxcuhuālh nac cāꞌquilhtamacuj, ūꞌtzaꞌ caꞌaꞌkaꞌīꞌtit. Huāꞌmāꞌ xatze tachihuīn ixlaꞌ Jesucristo ē ūꞌtzaꞌ tū quit icmāsuꞌyu.
\s Pablo huanli Cristo cātāꞌlahuīꞌlh tī taꞌaꞌkaꞌīꞌ
\p
\v 24 Chuhuaꞌj masqui icpātīniꞌmāꞌlh mimpālacatacaꞌn, iclīpāxuhua. Tū pātī quimacniꞌ, ūꞌtzaꞌ maktāya namākentaxtūkōꞌ tū ixlacasquiꞌnca napātīniꞌncan ixpālacata tī taꞌaꞌkaꞌīꞌ. Quinaꞌn huaꞌchi ixmacniꞌ Jesucristo.
\v 25 Ē quit chuntzaꞌ chī Dios quimacamaxquīꞌlh quintascujūt mimpālacatacaꞌn, chuntzaꞌ icmāsuꞌyukōꞌ ixtachihuīn Dios.
\v 26 Huāꞌmāꞌ tū ixcāmātzēꞌkniꞌcanīꞌt tachiꞌxcuhuīꞌt hasta aꞌcxniꞌ tzuculh cāꞌquilhtamacuj, ūꞌtzaꞌ chuhuaꞌj cāmāsuꞌyuniꞌcan xlacaꞌn tī taꞌaꞌkaꞌīꞌ.
\v 27 Dios lacasquiꞌn xlacaꞌn natacaꞌtzī chī xakaꞌtlaꞌ ē tzēhuanīꞌt ūꞌtzaꞌ tū ixtatzēꞌknīꞌt. Ūꞌtzaꞌ huāꞌmāꞌ: Cristo lacxtim cātāꞌhuiꞌla israelitas ē nā tī jā israelitas. Ūꞌtzaꞌ līkaꞌlhīpāꞌnaꞌntit tū milacaꞌn nahuan nac aꞌkapūn.
\p
\v 28 Huāꞌmāꞌ Cristo quinaꞌn iccāmāsuꞌyuniꞌyāuj ixlīpōꞌktucaꞌn tachiꞌxcuhuīꞌt ē iccāhuaniyāuj tū nacāꞌaꞌkspula palh jā nataꞌaꞌkaꞌīꞌ. Iccāmālacapāstaquīyāuj ixlīpōꞌktucaꞌn ē iccālīmāsuꞌyuniꞌyāuj talacapāstacniꞌ tū Cristo quincāmācaꞌtzīnīn. Chuntzaꞌ tzē naꞌiccāmaktāyayāuj natalītaxtu chī Cristo lacasquiꞌn.
\v 29 Ūꞌtzaꞌ quit iclīscujmāꞌlh. Ixlīpōꞌktu quilītliꞌhuiꞌqui tū xlaꞌ quimāhuixcānī, ūꞌtzaꞌ iclīscuja.
\c 2
\p
\v 1 Quit iclacasquiꞌn nacaꞌtzīyāꞌtit chī icscujmāꞌlh mimpālacatacaꞌn huiꞌxinaꞌn xalanīꞌn nac Colosas ē nā xlacaꞌn xalanīꞌn nac Laodicea ē chī ixlīpōꞌktucaꞌn xalanīꞌn jā jā tī quilakapasa.
\v 2 Icscujmāꞌlh naꞌiccāmāhuixcānī ixlīpōꞌktucaꞌn ixpālacata chī talāpāxquīꞌ. Iclacasquiꞌn natalāpāxquīꞌ ē lacxtim natalītaxtu. Iclacasquiꞌn natacaꞌtzī tzej natakexmata xaxlīcānaꞌ ē natacaꞌtzī tū xmān ixcaꞌtzī Dios hasta chuhuaꞌj. Ūꞌtzaꞌ tū jā ixcaꞌtzīcan ixpālacata Cristo.
\v 3 Jā maclacasquiꞌnāuj xtum tamāsuꞌyun. Xmān Cristo caꞌtzīkōꞌ ixlīpōꞌktu ē tzē naquincāmāscaꞌtīyān ē tzē naquincāmākexmatīyān tū quincāmāsuꞌyuniꞌn.
\v 4 Ūꞌtzaꞌ huāꞌmāꞌ iccāhuaniyān ē chuntzaꞌ jā tī chāꞌtin nacālīꞌaꞌkskāhuīꞌyān xatzēhuanīꞌt tachihuīn.
\v 5 Masqui jā cātāꞌhuiꞌlachaꞌ quimacniꞌ, quintalacapāstacniꞌ cātāꞌhuiꞌlachaꞌ. Līpāxuhua iclaktzīꞌmāꞌlh chī tzej latāꞌkchokoyāꞌtit ē jā taxtutāyayāꞌtit na ixtej Dios. Ūꞌtzaꞌ iclīpāxuhua.
\p
\v 6 Aꞌkaꞌīꞌniꞌnīꞌtaꞌntit Cristo huaꞌchi miMāpaꞌksīniꞌcaꞌn, nā chuntzaꞌ nalatāꞌkchokoyāꞌtit huaꞌchi huiꞌxinaꞌn ē Cristo chu lacxtim.
\v 7 Tzej caꞌaꞌkaꞌīꞌniꞌtit tū cātamāsuꞌyuniꞌn. Ūꞌtzaꞌ huaꞌchi pūlactin quiꞌhuiꞌ tū pūlhmāꞌn māꞌcnūlh ixtankēxēꞌk. Āꞌchulāꞌ nalīscaꞌttēlhayāꞌtit chī māsuꞌyulh Cristo ē natasuꞌyu huaꞌchi stacpāꞌnaꞌntit chuntzaꞌ chī tasuꞌyu stacmāꞌlh quiꞌhuiꞌ. Lhūhuaꞌ tapāxcatcaꞌtzīn namaxquīꞌyāꞌtit ixpālacata Jesús.
\s Cristo quincāmaxquīꞌyān xasāstiꞌ quilatamatcaꞌn
\p
\v 8 Cuenta catlahuaꞌtit ē jā catamakxtektit āꞌchāꞌtin nacālīꞌaꞌkskāhuīꞌyān tū māsuꞌyu tū jā ixlīcānaꞌ ē jā tū ixtapalh. Huāꞌmāꞌ tamāsuꞌyun nacāmāpātzaꞌnkēnīyān tū aꞌkaꞌīꞌyāꞌtit. Xmān cāmāsuꞌyuniꞌyān ixtachihuīncaꞌn chiꞌxcuhuīꞌn tī tahuan palh ixlacasquiꞌnca natlahuaꞌyāꞌtit lhūhuaꞌ catūhuālh ē ūꞌtzaꞌ Dios nacālīlaktzīꞌnān lactze. Tahuan palh xmān aꞌkaꞌīꞌniꞌyāꞌtit Cristo, tisputacus. Huāꞌmāꞌ tamāsuꞌyun ixtapuhuāncaꞌn chiꞌxcuhuīꞌn ē jā ixlaꞌ Cristo.
\p
\v 9 Cuenta catlahuaꞌtit jā cātitamāsuꞌyuniꞌyān tū jā ixlīcānaꞌ ixpālacata Cristo ē chī Cristo chu chāꞌtin chī Dios.
\v 10 Huiꞌxinaꞌn tapaꞌksīniꞌyāꞌtit Cristo ē ūꞌtzaꞌ lītzumaꞌyāꞌtit ixlītliꞌhuiꞌqui. Xlaꞌ ūꞌtzaꞌ xapuxcuꞌ ixlīpōꞌktu līmāpaꞌksīn ē ixlīpōꞌktucaꞌn tī tamāpaꞌksīniꞌn.
\v 11 Aꞌcxniꞌ tamacamāstāꞌniꞌtit Cristo, cātaxapaniꞌn mincuentacaꞌn ē ūꞌtzaꞌ huiꞌxinaꞌn xtumtzaꞌ cālīhuiꞌlīn Dios. Chiꞌxcuhuīꞌn cāchuꞌcuniꞌcan ixmacniꞌcaꞌn natatlahua circuncisión ē ūꞌtzaꞌ līcaꞌtzīcan xtum cāhuiꞌlīcan. Xtum chī Cristo quincāmāxtumlīyān. Huaꞌchi ūꞌtzaꞌ quincātalīchuꞌcumakaꞌniꞌn quincuentacaꞌn ē quincāmaxquīꞌn xasāstiꞌ quilīstacnaꞌcaꞌn. Huāꞌmāꞌ circuncisión jā ixlaꞌ quimacniꞌcaꞌn.
\v 12 Xasāstiꞌ milatamatcaꞌn chuhuaꞌj ixpālacata aꞌkaꞌīꞌniꞌyāꞌtit Dios. Aꞌcxniꞌ aꞌkpaxtit, ūꞌtzaꞌ līmāsuꞌyulh huaꞌchi cātatāꞌmāꞌcnūyān Cristo ē tāꞌlacastālancuanaꞌntit ixpālacata Dios mālacastālancuanīlh Cristo.
\v 13 Huiꞌxinaꞌn huaꞌchi xanīn ixuanīꞌtaꞌntit ixpālacata mincuentacaꞌn ē jā tze chī ixlīlatlāꞌhuanāꞌtit. Aꞌcxniꞌ Dios quincāmātzaꞌnkēnaꞌniꞌkōꞌn quincuentacaꞌn, xlaꞌ quincāmālacastālancuanīn chu lacxtim chī Cristo.
\v 14 Huaꞌchi ixtzoꞌkcanīꞌt aꞌktin tatzoꞌknuꞌ tū quincātalīmālacsuꞌyuyān. Dios mālaksputūkōꞌlh ē cāmālaksputūkōꞌlh ixlīpōꞌktu tū ixlaclēꞌnāuj. Dios māpānūkōꞌlh aꞌcxniꞌ xtokohuaꞌcaꞌca Cristo nac cruz ē huaꞌchi tāꞌxtokohuaꞌcaꞌca tatzoꞌknuꞌ nac cruz.
\v 15 Ixlīpōꞌktu āꞌmakapitzīn līmāpaꞌksīn tū aꞌnan huāꞌtzāꞌ nac cāꞌquilhtamacuj ē nac ūꞌniꞌ, Dios cāmaktīkōꞌlh ixlīmāpaꞌksīncaꞌn ē cāmāmaxanīꞌlh cāꞌlhūhuaꞌlacatīn. Dios cātlajalh ixpālacata Cristo aꞌcxniꞌ nīlh nac cruz.
\s Caputzatit tū xalaꞌ nac aꞌkapūn
\p
\v 16 Chuntzaꞌ jā catitamakxtektit āꞌchāꞌtin nacāꞌaꞌksaꞌnān ixpālacata tū huaꞌyāꞌtit ē nūn ixpālacata jā tlahuaꞌyāꞌtit cuenta cāꞌtaniꞌ nūn sábado.
\v 17 Tzamāꞌ tamāsuꞌyun xmān huaꞌchi ixmāstilēꞌk chī Dios māpaꞌksī. Cristo ūꞌtzaꞌ tī tlahualh huāꞌmāꞌ māstilēꞌk ē xlaꞌ māsuꞌyu chī līmāpaꞌksīniꞌn Dios.
\v 18 Jā catamakxtektit āꞌchāꞌtin nacāꞌaꞌkskāhuīꞌyān aꞌcxniꞌ nahuan jā minīꞌniꞌ chāꞌtin chiꞌxcuꞌ naꞌorarlīniꞌ Dios. Makapitzīn tahuan ixlacasquiꞌnca pūla nacāꞌorarlīniꞌ ángeles. Tī huan chuntzaꞌ lacasquiꞌn napuhuaꞌnāꞌtit xlaꞌ jā kaꞌtlaꞌ makcaꞌtzī masqui jā ixlīcānaꞌ. Kaꞌtlaꞌ līmakcaꞌtzī ixpālacata tū līlakachuyalh. Ixtapuhuān jā ixlaꞌ Espíritu Santo.
\v 19 Chuntzaꞌ tlahua ē jā tzej stālaniꞌ Cristo tī huaꞌchi ixaꞌkxāk macniꞌ. Huāꞌmāꞌ macniꞌ, ūꞌtzaꞌ tī taꞌaꞌkaꞌīꞌ. Quimacniꞌcaꞌn cākaꞌlhī ixtatāꞌstucut ē īꞌxnoꞌjot tū līmaktāya ē tū lālīchiꞌpanīꞌt. Quinaꞌkxākcaꞌn, ūꞌtzaꞌ tū māpaꞌksī quimacniꞌcaꞌn. Chuntzaꞌ Cristo tī ixaꞌkxākcaꞌn tī taꞌaꞌkaꞌīꞌ līmāstaquī ixmacniꞌ ixlīmāpaꞌksīn Dios. Ixmacniꞌ Cristo, ūꞌtzaꞌ xlacaꞌn tī taꞌaꞌkaꞌīꞌ. Ixmacniꞌ Cristo aꞌktin huanīꞌt ixpālacata tī taꞌaꞌkaꞌīꞌ talīpāhuan xlaꞌ.
\p
\v 20 Tī jā taꞌaꞌkaꞌīꞌniꞌ Cristo tahuan ixlacasquiꞌnca nacālakachiꞌxcuhuīꞌyāꞌtit lhūhuaꞌ tahuiꞌlat tū jā ixlaꞌ Cristo. Huiꞌxinaꞌn huaꞌchi tāꞌnīꞌtit Cristo ē chuntzaꞌ jā ixlacasquiꞌnca nacālakachiꞌxcuhuīꞌyāꞌtit ixtahuiꞌlatcaꞌn tachiꞌxcuhuīꞌt. ¿Tū ixpālacata tlahuaꞌyāꞌtit tahuiꞌlat chī tahuan?
\v 21 Huancan: “Jā tixaꞌmaꞌyaꞌ huāꞌmāꞌ. Jā tihuaꞌyaꞌ huāꞌmāꞌ. Jā tichiꞌpayaꞌ huāꞌmāꞌ.”
\v 22 Ixlīpōꞌktu tū tzē chiꞌpacan o huaꞌcan o xaꞌmacan, jā catitatāyaniꞌlh; pōꞌktu natasputkōꞌ. Tzamāꞌ tahuiꞌlat xmān tū tamāpaꞌksī chiꞌxcuhuīꞌn ē tamāsuꞌyu xlacaꞌn.
\v 23 Tī chuntzaꞌ tamāsuꞌyu, tapuhuan huaꞌchi tzej lacacaꞌtzī chī talaktaquilhpūta ángeles. Masqui tamakapātīnī ixmacniꞌcaꞌn, xmān āꞌchulāꞌ kaꞌtlaꞌ natalīmakcaꞌtzī.
\c 3
\p
\v 1 Huiꞌxinaꞌn tāꞌlacastālancuanaꞌntit Cristo ē kaꞌlhīꞌyāꞌtit xasāstiꞌ milatamatcaꞌn, ē chuntzaꞌ calīhuiꞌlīꞌtit nakaꞌlhīꞌyāꞌtit tū nacālakpalīniꞌyān ixpālacata nalītaxtuyāꞌtit chī Cristo. Xlaꞌ pāxtūtahuīꞌlh Dios ē tāꞌmāpaꞌksīniꞌmāꞌlh.
\v 2 Pōꞌktu quilhtamacuj nalacapāstacāꞌtit tū ixlaꞌ Cristo ē jā catilīꞌaꞌktuyunāꞌtit tū xalaꞌ nac cāꞌquilhtamacuj.
\v 3 Tzamāꞌ ūꞌtzaꞌ jātzaꞌ la cātalīmāpaꞌksīyān ixpālacata milatamatcaꞌn tatāꞌtzēꞌknīꞌt Cristo. Dios ūꞌtzaꞌ tī cāmātzēꞌkli. Huaꞌchi nīnīꞌtaꞌntittzaꞌ ē jātzaꞌ la māpaꞌksīcan tī xanīntzaꞌ.
\v 4 Aꞌcxniꞌ namimpala Cristo ē naxkaka, nā huiꞌxinaꞌn natāꞌtasuꞌyuyāꞌtit ixpālacata milatamatcaꞌn chu lacxtim chī xlaꞌ.
\s Pablo māsuꞌyulh chī tatalakpalīlh tī ixlaꞌ Cristo
\p
\v 5 Chuntzaꞌ calīhuiꞌlīꞌtit nacāmāxtukōꞌyāꞌtit mintalacapāstacniꞌcaꞌn tū jā tze. Tū jā tze, ūꞌtzaꞌ huāꞌmāꞌ: kaꞌlhīcan ixtāꞌlāpāxquīꞌncaꞌn; kaꞌlhīcan jā tze talacapāstacniꞌ; tamakxtekcan cāmāpaꞌksī ixmacniꞌcaꞌn; lakatīcan tū jā tze; ē tampiꞌlhīniꞌncan. Tī chuntzaꞌ tatlahua, ixtāꞌchuntzaꞌ tī tatzokostaniꞌ aꞌktin ídolo.
\v 6 Līsītzīꞌ Dios tzamāꞌ tū jā tze. Namin aꞌktin quilhtamacuj ē tī jā takexmatniꞌ Dios xlacaꞌn natacaꞌtzī ixtasītziꞌ Dios.
\v 7 Nā huiꞌxinaꞌn chuntzaꞌ ixlatlāꞌhuaꞌnāꞌtit aꞌcxniꞌ jānaꞌj ixaꞌkaꞌīꞌyāꞌtit.
\v 8 Chuhuaꞌj cacāmāxtumlīꞌtit ixlīpōꞌktu tzamāꞌ: tasītziꞌ ē tāꞌksaꞌnīn. Jātzaꞌ catiquiclhlaktzīꞌnīꞌniꞌntit. Tū jā tze tachihuīn jātzaꞌ catiquilhtaxtutit.
\v 9 Jā catiꞌaꞌkskāhuīꞌtit āꞌchāꞌtin. Makxtektittzaꞌ mintalacapāstacniꞌcaꞌn tū jā tze
\v 10 ē lakpalīꞌtit mintalacapāstacniꞌcaꞌn. Xasāstiꞌ scaꞌtpāꞌnaꞌntit ixpālacata āꞌchulāꞌ nalītaxtuyāꞌtit chī Dios tī cāmaxquīꞌn xasāstiꞌ milatamatcaꞌn. Chuntzaꞌ nacaꞌtzīyāꞌtit chī ixlīDios.
\v 11 Ixlīpōꞌktucaꞌn tī taꞌaꞌkaꞌīꞌ chu aꞌktin tahuanīꞌt. Griego tī aꞌkaꞌīꞌ chu lacxtim chī israelita tī lakapasa ixlīmāpaꞌksīn Moisés ē tī aꞌkaꞌīꞌ. Nā tī tlahuaniꞌcanīꞌt circuncisión chu lacxtim chī tī jā tlahuaniꞌcanīꞌt circuncisión. Tī xaminiꞌ ē tī jā tū caꞌtzī ē xatastāꞌmaka tasācuaꞌ ē tī xalaktaxtuniꞌ, ixlīpōꞌktucaꞌn aꞌktin tahuanīꞌt ixpālacata Cristo. Xmān Cristo talīpāhuan. Cristo quincātāꞌhuiꞌlan quilīpōꞌktucaꞌn tī aꞌkaꞌīꞌyāuj ē xmān xlaꞌ quincāmātlahuīyān chuntzaꞌ chī Dios lacasquiꞌn.
\p
\v 12 Dios cālacsacnīꞌtaꞌn huiꞌxinaꞌn ē cāpāxquīꞌyān ē xtum cāhuiꞌlīn ixpālacata ixlaꞌ nalītaxtuyāꞌtit. Ūꞌtzaꞌ calīhuiꞌlīꞌtit nalakalhuꞌmaꞌnāꞌtit ē nacāmaktāyayāꞌtit āꞌmakapitzīn. Jā kaꞌtlaꞌ catimakcaꞌtzītit ē jā palhaꞌ catisquiꞌntit tū mimpālacatacaꞌn. Pūla calacapāstactit āꞌchāꞌtin. Jā palaj casītzīꞌtit.
\v 13 Catāyaniꞌtit tū cātlahuaniꞌyān tū jā tze āꞌchāꞌtin ē calāmātzaꞌnkēnaꞌniꞌtit tī puhuaꞌnāꞌtit cāmaklaclēꞌnān. Calāmātzaꞌnkēnaꞌniꞌtit lacxtim chī Cristo cāmātzaꞌnkēnaꞌniꞌn.
\v 14 Tū āꞌchulāꞌ ixlacasquiꞌnca, ūꞌtzaꞌ huāꞌmāꞌ: talāpāxquīꞌn, ē ūꞌtzaꞌ huaꞌchi tū nacālīmāchiꞌpīkōꞌ ixlīpōꞌktu milīlactzeycaꞌn.
\v 15 Dios cacāmakapāxuīlh milīstacnaꞌcaꞌn ē cacāmakapāxuīlh ixlīstacnaꞌcaꞌn āꞌmakapitzīn tī taꞌaꞌkaꞌīꞌ. Ūꞌtzaꞌ chu aꞌktin līhuanāꞌtit milīpōꞌktucaꞌn. Nā ūꞌtzaꞌ tū nacālīmaktāyayān ē tzē nacaꞌtzīyāꞌtit tū tze ē tū jā tze. Chuntzaꞌ capāxuhuaꞌtit ē camāstāꞌtit tapāxcatcaꞌtzīn.
\p
\v 16 Lhūhuaꞌ calacapāstactēlhaꞌtit ixtachihuīn Cristo. Nalālīmāsuꞌyuniꞌyāꞌtit ē nalālīmaxquīꞌyāꞌtit talacapāstacniꞌ ixlītliꞌhuiꞌqui Dios. Cacālīpixtlīꞌtit ixlīpōꞌktu milīstacnaꞌcaꞌn salmos ē himnos ē cantos tū ixlaꞌ Dios. Camaxquīꞌtit tapāxcatcaꞌtzīn Dios aꞌcxniꞌ pixtlīꞌyāꞌtit.
\v 17 Palh nachihuīꞌnaꞌnāꞌtit, palh napixtlīꞌyāꞌtit, palh natlahuaꞌyāꞌtit catūhuālh, catūxcuhuālh calalh tū tlahuaꞌpāꞌnaꞌntit, calītlahuaꞌtit ixlītliꞌhuiꞌqui Māpaꞌksīniꞌ Jesús. Camaxquīꞌtit tapāxcatcaꞌtzīn Dios xaTātaꞌ ixpālacata Jesús.
\s Pablo huanli chī natalatāꞌkchoko tī taꞌaꞌkaꞌīꞌ
\p
\v 18 Puscan cacākexpaꞌtniꞌtit minkōluꞌcaꞌn chī cāminīꞌniꞌ tī taꞌaꞌkaꞌīꞌ.
\v 19 Chiꞌxcuhuīꞌn cacāpāxquīꞌtit mimpuscātcaꞌn ē līlacatejtin catāꞌchihuīnaꞌntit. Jā calāquilhniꞌtit.
\v 20 Lacstīn, pōꞌktu quilhtamacuj cacākexpaꞌtniꞌtit mintātaꞌcaꞌn ē mintzīꞌcaꞌn ixpālacata chuntzaꞌ namakapāxuīꞌyāꞌtit Dios.
\v 21 Xanatātanaꞌ jā ticāmakasītzīꞌyāꞌtit milacstīncaꞌn ē jā natamakchuya.
\v 22 Xatastāꞌmaka tasācuaꞌn tzej cacākexpaꞌtniꞌtit tī cāmāpaꞌksīyān. Jā xmān catiscujtit aꞌcxniꞌ cātalaktzīꞌnān. Nalīhuiꞌlīꞌyāꞌtit pōꞌktu nascujāꞌtit ē chuntzaꞌ lakachiꞌxcuhuīꞌyāꞌtit Māpaꞌksīniꞌ.
\v 23 Catūxcuhuālh calalh mintascujūtcaꞌn, ūꞌtzaꞌ nalīhuiꞌlīꞌyāꞌtit natlahuaꞌkōꞌyāꞌtit huaꞌchi Māpaꞌksīniꞌ Jesucristo mimpatroncaꞌn ē jā chāꞌtin chiꞌxcuꞌ.
\v 24 Huiꞌxinaꞌn caꞌtzīyāꞌtit Māpaꞌksīniꞌ nacāmaxquīꞌyān mintatlajcaꞌn xalaꞌ nac aꞌkapūn. Huiꞌxinaꞌn īꞌscujnuꞌnīꞌn Māpaꞌksīniꞌ Jesucristo.
\v 25 Catīxcuhuālh natlahua tū jā tze, xlaꞌ naxoko. Ixlīpōꞌktucaꞌn tī tatlahua tū jā tze, ixlīpōꞌktucaꞌn lacxtim na ixlacatīn Dios.
\c 4
\p
\v 1 Huiꞌxinaꞌn tī xapatrón, cacāmaxquīꞌtit mintasācuaꞌcaꞌn tū cāminīꞌniꞌ ē tū xlacaꞌn tatlajalh. Caꞌtzīyāꞌtit huiꞌlachaꞌ nac aꞌkapūn tī nā cāmāpaꞌksīyān.
\p
\v 2 Pōꞌktu quilhtamacuj caꞌorarlīꞌniꞌtit Dios ē skalalh catahuiꞌlatit aꞌcxniꞌ tlahuaꞌpāꞌnaꞌntit oración ē namaxquīꞌyāꞌtit tapāxcatcaꞌtzīn.
\v 3 Nā nasquiꞌniꞌyāꞌtit Dios nacāxtlahua chī naꞌicmāsuꞌyuyāuj ixtachihuīn ē naꞌicmāsuꞌyuyāuj tū jānaꞌj ixcaꞌtzīcan tū ixlaꞌ Cristo. Ūꞌtzaꞌ ixpālacata iclītachīꞌnīꞌt quit.
\v 4 Casquiꞌniꞌtit Dios tzej naꞌicmāsuꞌyu tū ixlaꞌ Cristo chī ixlacasquiꞌnca.
\p
\v 5 Tzej calatāꞌkchokotit na ixlacatīncaꞌn tī jā taꞌaꞌkaꞌīꞌ ē tzej calacapāstactit tū natlahuaꞌyāꞌtit na ixlacatīncaꞌn līhuan aꞌnan quilhtamacuj.
\v 6 Matzat mojōcan nac līhuaꞌ namācanī ē tze nahuan. Nā chuntzaꞌ cuenta catlahuaꞌtit mintachihuīncaꞌn ē chuntzaꞌ nakelhtīniꞌnāꞌtit chī ixlacasquiꞌnca.
\s Āꞌxmān saludos
\p
\v 7 Tíquico nacāmācaꞌtzīnīyān chī iclīlahuīꞌlh ē tū ictlahuamāꞌlh. Xlaꞌ quintāꞌtincaꞌn ē pāxquīꞌcan. Līlacatejtin quimaktāya ē ixpālacata Māpaꞌksīniꞌ quintāꞌscuja.
\v 8 Ūꞌtzaꞌ iccālīmacāꞌniꞌyān nacaꞌtzīyāꞌtit chī iclahuiꞌlānaꞌuj ē jā caticālīꞌaꞌktuyuntit.
\v 9 Onésimo natāꞌaꞌn. Xlaꞌ quintāꞌtincaꞌn tī līlacatejtin latāꞌkchoko ē tī pāxquīꞌcan. Xlaꞌ xalaꞌ aꞌntzaꞌ. Xlacaꞌn nacātahuanikōꞌyān tū aꞌkspulanīꞌt huāꞌtzāꞌ.
\p
\v 10 Quintāꞌtachīꞌn Aristarco ē Marcos tī ixtāꞌpuxniꞌmit Bernabé cātamacāꞌniꞌyāchāꞌn saludos. Kaꞌlhīꞌyāꞌtittzaꞌ līmāpaꞌksīn ixpālacata Marcos. Palh xlaꞌ nacālakaꞌnāchāꞌn, camakamaktīniꞌchipitit.
\v 11 Jesús tī kaꞌlhī xtum ixtacuhuīniꞌ Justo cāmacāꞌniꞌyāchāꞌn saludos. Xmān ixkelhatuꞌtuncaꞌn israelitas tī quintatāꞌscujmāꞌnalh natamāsuꞌyu chī Dios cāmāpaꞌksīkōꞌ. Xlacaꞌn quintamāhuiꞌxcānīmāꞌnalh.
\v 12 Epafras cāmacāꞌniꞌyāchāꞌn saludos. Xlaꞌ xalaꞌ aꞌntzaꞌ ē ixtasācuaꞌ Jesucristo. Cālacapāstacān ē squiꞌniꞌ Dios tzej natlāꞌhuanāꞌtit na ixtej Dios ē namākentaxtūkōꞌyāꞌtit ixtalacasquiꞌnīn Dios.
\v 13 Iccāhuaniyān xlaꞌ scujli mimpālacatacaꞌn ē ixpālacatacaꞌn xalanīꞌn nac Laodicea ē nac Hierápolis.
\v 14 Doctor Lucas tī pāxquīꞌcan ē Demas cātamacāꞌniꞌyāchāꞌn saludos.
\p
\v 15 Cacālīꞌpiniꞌtit saludos quintāꞌtimīncaꞌn nac Laodicea ē Ninfas ē tāꞌtimīn tī taꞌaꞌkaꞌīꞌ ē tatakēstoka na ixchic.
\v 16 Aꞌcxniꞌ līkelhtahuaꞌkakōꞌnīꞌtaꞌntittzaꞌ huāꞌmāꞌ carta na milacpuꞌnaꞌiꞌtātcaꞌn, camacapintit nac templo nac Laodicea ē nalīkelhtahuaꞌkacan aꞌntzaꞌ. Nā huiꞌxinaꞌn nalīkelhtahuaꞌkayāꞌtit carta tū namināchaꞌ nac Laodicea.
\v 17 Nahuaniyāꞌtit Arquipo huāꞌmāꞌ: “Cuenta catlahuaꞌ ē tzej camākentaxtuꞌ tascujūt tū milaꞌ chī ixtalacasquiꞌnīn Māpaꞌksīniꞌ.”
\p
\v 18 Quit, Pablo, ictzoꞌkmāꞌlh quilīmān huāꞌmāꞌ saludo. Caquilālacapāstacui quit ictachīꞌnīꞌt. Dios cacāsicuaꞌlanātlahuan. Amén.