\id 1TH
\h 1 Tesalonicenses
\toc1 1 Tesalonicenses
\mt 1 Tesalonicenses
\c 1
\s Pablo ē tī ixtatāꞌscuja tatzoꞌkli aꞌktin carta
\p
\v 1 Ictzoꞌknumāꞌnauj quinaꞌn, Pablo ē Silvano ē Timoteo. Iccātzoꞌknuniꞌmāꞌn huiꞌxinaꞌn xalanīꞌn nac Tesalónica tī aꞌkaꞌīꞌyāꞌtit ē tapaꞌksīniꞌyāꞌtit Dios quinTātaꞌcaꞌn ē nā Māpaꞌksīniꞌ Jesucristo. Dios cacāsicuaꞌlanātlahuan huiꞌxinaꞌn ē tzej calatapāꞌtit.
\s Tasuꞌyulh chī taꞌaꞌkaꞌīꞌlh xalanīꞌn nac Tesalónica
\p
\v 2 Pōꞌktu quilhtamacuj icmaxquīꞌyāuj tapāxcatcaꞌtzīn Dios mimpālacatacaꞌn ē icorarlīyāuj mimpālacatacaꞌn.
\v 3 Iccālīlacapāstacān pōꞌktu quilhtamacuj na ixlacatīn Dios quinTātaꞌcaꞌn tū tlahuaꞌtit huiꞌxinaꞌn. Ūꞌtzaꞌ lītasuꞌyu chī aꞌkaꞌīꞌyāꞌtit. Iccālīlacapāstacān chī scujtit. Ūꞌtzaꞌ lītasuꞌyu chī pāxquīꞌyāꞌtit Dios. Iccālīlacapāstacān huiꞌxinaꞌn chī jā makxtekāꞌtit aꞌkaꞌīꞌniꞌyāꞌtit quiMāpaꞌksīniꞌcaꞌn Jesucristo.
\v 4 Dios cāpāxquīꞌyān huiꞌxinaꞌn, tāꞌtimīn. Quinaꞌn iccaꞌtzīyāuj Dios cālacsacnīꞌtaꞌn huiꞌxinaꞌn.
\v 5 Xatze tachihuīn tū iccāquīmāsuꞌyuniꞌn huiꞌxinaꞌn, ūꞌtzaꞌ jā xmān quintachihuīncaꞌn. Xaꞌiclīmāsuꞌyuyāuj ixlīmāpaꞌksīn Espíritu Santo. Tzej xaꞌiccaꞌtzīyāuj ixlīcānaꞌ xatze tachihuīn tū xaꞌicmāsuꞌyuyāuj. Huiꞌxinaꞌn caꞌtzīyāꞌtit chī lacatejtin xaꞌiclatlāꞌhuanāuj aꞌcxniꞌ xaꞌiccātāꞌhuiꞌlachāꞌn. Xaꞌiclatlāꞌhuanāuj chuntzaꞌ mimpālacatacaꞌn.
\p
\v 6 Huiꞌxinaꞌn quilāmakscaꞌtui ē chuntzaꞌ makscaꞌtxtutit Māpaꞌksīniꞌ. Masqui līpātīniꞌntit aꞌcxniꞌ aꞌkaꞌīꞌtit xatze tachihuīn, ixkaꞌlhīꞌyāꞌtit tapāxuhuān ixpālacata Espíritu Santo cāmaxquīꞌn tapāxuhuān.
\v 7 Tacaꞌtzīlh chī huiꞌxinaꞌn līlatāꞌkchokoyāꞌtit, nā chuntzaꞌ talīlatāꞌkchoko ixlīpōꞌktucaꞌn tī taꞌaꞌkaꞌīꞌnīꞌt nac Macedonia ē nac Acaya.
\v 8 Chuntzaꞌ lītaꞌaꞌkahuaniꞌnīꞌt ixtachihuīn Māpaꞌksīniꞌ mimpālacatacaꞌn. Jā xmān nac Macedonia ē nac Acaya, calhāxcuhuālh caꞌtzīcan chī huiꞌxinaꞌn aꞌkaꞌīꞌniꞌyāꞌtit Dios. Ūꞌtzaꞌ jā ixlacasquiꞌnca iclīhuanāuj nūn aꞌktin tachihuīn.
\v 9 Ixlīpōꞌktucaꞌn quincātahuaniyān chī huiꞌxinaꞌn aꞌkaꞌīꞌtit quintachihuīncaꞌn aꞌcxniꞌ iccāquīlaklan. Huancan chī huiꞌxinaꞌn lītalakaspiꞌtniꞌtit ídolos ē stālaniꞌtit Dios, ē chuhuaꞌj tāꞌscujāꞌtittzaꞌ Dios tī xalakahuan ē ixlīcānaꞌ.
\v 10 Huancan chī huiꞌxinaꞌn kaꞌlhīpāꞌnaꞌntittzaꞌ īꞌSkaꞌtaꞌ Dios tī namināchaꞌ nac aꞌkapūn. Huāꞌmāꞌ Dios mālacastālancuanīlh. Huāꞌmāꞌ ūꞌtzaꞌ Jesús tī quincāmakapūtaxtūyān, ē chuntzaꞌ, aꞌcxniꞌ Dios naputzānaꞌnīkōꞌ, jā caquinticāmakapātīnīn quincuentacaꞌn.
\c 2
\s Chī Pablo scujli nac Tesalónica
\p
\v 1 Tāꞌtimīn, huiꞌxinaꞌn caꞌtzīyāꞌtit jā chu tlakaj iccāquīlaklan.
\v 2 Huiꞌxinaꞌn caꞌtzīyāꞌtit chī quincātamakapātīnīn ē quincātalakapalan nac Filipos aꞌcxniꞌ jānaꞌj xaꞌicchāꞌnāuj nac Tesalónica. Masqui quincāꞌaꞌkspulan huāꞌmāꞌ, Dios quincāmaktāyan ē chuntzaꞌ iccāhuanin xatze tachihuīn tū Dios mācaꞌtzīnīniꞌlh ē jā iclacapuhuanui, masqui quincātamāmakchuyīcuꞌtunniꞌ.
\v 3 Quinaꞌn iccāmaxquīꞌn talacapāstacniꞌ. Tū iccāhuanin huiꞌxinaꞌn ūꞌtzaꞌ ixlīcānaꞌ. Jā tū iclacapāstacuiꞌ. Xaꞌiccāhuanicuꞌtunān ixtachihuīn Dios, ē xmān ūꞌtzaꞌ iccāquīlīlaklan. Jā iccāquīꞌaꞌkskāhuīꞌn.
\v 4 Dios quincālaktzīꞌn xalactze ē quincāmacamaxquīꞌn naꞌicmāsuꞌyuyāuj xatze tachihuīn. Ūꞌtzaꞌ iclīmāsuꞌyuyāuj chuntzaꞌ chī Dios lacasquiꞌn. Quinaꞌn āꞌchulāꞌ ictlahuacuꞌtunāuj ixtalacasquiꞌnīn Dios ē jā ixtalacapāstacniꞌcaꞌn tachiꞌxcuhuīꞌt. Dios ūꞌtzaꞌ laktzīꞌn quilīstacnaꞌcaꞌn.
\v 5 Huiꞌxinaꞌn caꞌtzīyāꞌtit quinaꞌn jā maktin iccāquīlīmākaꞌtlīꞌn. Nūn tū iccāquīꞌaꞌkskāhuīꞌmaktīcuꞌtunniꞌ mintumīncaꞌn. Huāꞌmāꞌ Dios caꞌtzī.
\v 6 Jā xaꞌiclacasquiꞌnāuj caquincātalakachiꞌxcuhuīꞌn tachiꞌxcuhuīꞌt, nūn huiꞌxinaꞌn, nūn āꞌmakapitzīn, masqui quinaꞌn ixapóstoles Cristo ē ūꞌtzaꞌ iclīminīꞌniꞌnīꞌtauj caquilālakachiꞌxcuhuīꞌuj.
\v 7 Līlacatzucu xaꞌiccātāꞌchihuīnaꞌnān huaꞌchi chāꞌtin puscāt tī cāmaktakaꞌlha ixlacstīn.
\v 8 Xaꞌiccāpāxquīꞌyān huiꞌxinaꞌn. Ūꞌtzaꞌ xaꞌiccālīmaxquīꞌcuꞌtunān jā xmān xatze tachihuīn; xaꞌiccāmaxquīꞌcuꞌtunān nā quilatamatcaꞌn, chī xaꞌiccāpāxquīꞌyān.
\v 9 Tāꞌtimīn, huiꞌxinaꞌn lacapāstacāꞌtit chī xaꞌicscujāuj ē chī xaꞌicpātīyāuj chī naꞌiclīhuāꞌyanāuj. Quinaꞌn jā xaꞌiccāmāmakasputūcuꞌtunān. Ūꞌtzaꞌ xaꞌiclīscujāuj cāꞌcuhuīniꞌ ē tzīꞌsa aꞌcxniꞌ xaꞌiccāmāsuꞌyuniꞌyān huiꞌxinaꞌn ixtachihuīn Dios.
\p
\v 10 Huiꞌxinaꞌn laktzīꞌntit, ē Dios nā laktzīꞌlh chī xaꞌiccātāꞌhuiꞌlan huiꞌxinaꞌn tī aꞌkaꞌīꞌyāꞌtit. Quinaꞌn tzeya chiꞌxcuhuīꞌn xaꞌicuanīꞌtauj. Līlacatejtin xaꞌiclatāꞌkchokoyāuj. Nūn tū xaꞌictlahuayāuj tū jā līmacuan. Chuntzaꞌ jā tī chāꞌtin tzē naquincālīmālacsuꞌyuyān.
\v 11 Nā huiꞌxinaꞌn caꞌtzīyāꞌtit chī chāꞌtin xatātaꞌ cāmaxquīꞌ talacapāstacniꞌ ixcamanaꞌ, chuntzaꞌ quinaꞌn xaꞌiccāmaxquīꞌyān talacapāstacniꞌ milīpōꞌktucaꞌn ē xaꞌiccāmākōꞌxamākaꞌtlīꞌyān.
\v 12 Xaꞌiccāhuaniyān ixlacasquiꞌnca līlacatejtin nalatāꞌkchokoyāꞌtit chī Dios lacasquiꞌn. Dios ūꞌtzaꞌ tī cātaꞌsaniꞌnīꞌtaꞌn jā xlaꞌ māpaꞌksīniꞌn ē jā cāꞌtzēhuanīꞌt.
\p
\v 13 Nā pōꞌktu quilhtamacuj icmaxquīꞌyāuj tapāxcatcaꞌtzīn Dios chī huiꞌxinaꞌn aꞌkaꞌīꞌtit ixtachihuīn Dios aꞌcxniꞌ xaꞌiccāhuaniyān. Huiꞌxinaꞌn caꞌtzītit ē aꞌkaꞌīꞌtit tū iccāmāsuꞌyuniꞌn, ūꞌtzaꞌ ixtachihuīn Dios ē jā ixtachihuīncaꞌn tachiꞌxcuhuīꞌt. Ixlīcānaꞌ ixtachihuīn Dios. Ūꞌtzaꞌ tū scuja na milīstacnaꞌcaꞌn huiꞌxinaꞌn tī aꞌkaꞌīꞌyāꞌtit.
\v 14 Huiꞌxinaꞌn, tāꞌtimīn, cāꞌaꞌnaniꞌn chu lacxtim chī cāꞌaꞌnaniꞌlh xalanīꞌn nac Judea tī tatapaꞌksīniꞌ Dios ē taꞌaꞌkaꞌīꞌniꞌ Jesucristo. Mintāꞌlīmacchiccaꞌn cātaputzastālaniꞌn huiꞌxinaꞌn. Israelitas taputzastālaniꞌlh ixtāꞌisraelitascaꞌn xalanīꞌn nac Judea tī taꞌaꞌkaꞌīꞌ.
\v 15 Israelitas tamaknīlh ixaꞌkchihuīnaꞌnīꞌn Dios. Tamaknīlh Māpaꞌksīniꞌ Jesús. Ē quinaꞌn quincātaputzastālaniꞌn. Dios jā lakatī tū tatlahua xlacaꞌn. Xlacaꞌn tatāꞌlātlahua ixlīpōꞌktucaꞌn tachiꞌxcuhuīꞌt.
\v 16 Xlacaꞌn jā quincātamakxtekān naꞌiccātāꞌchihuīnaꞌnāuj tī jā israelitas. Quinaꞌn iccātāꞌchihuīnaꞌncuꞌtunāuj ixpālacata nataꞌaꞌkapūtaxtu. Chuntzaꞌ israelitas āꞌchulāꞌ takaꞌlhī ixcuentacaꞌn. Ūꞌtzaꞌ nacālīmakapātīnīn Dios.
\s Pablo ixcālakaꞌmpalacuꞌtun xalanīꞌn nac Tesalónica
\p
\v 17 Aꞌcxniꞌ iccāmakxtekniꞌ ē aꞌklhūhuaꞌ quilhtamacuj jā xaꞌiccālaktzīꞌnān, pōꞌktu quilhtamacuj xaꞌiccālacapāstacān huiꞌxinaꞌn ē xaꞌiccālaktzīꞌncuꞌtunān.
\v 18 Quinaꞌn xaꞌiccālakaꞌncuꞌtunāchāꞌn huiꞌxinaꞌn. Quit, Pablo, xaꞌiccālakaꞌncuꞌtunāchāꞌn maklhūhuaꞌ. Skāhuīꞌniꞌ jā quincāmakxtekniꞌ naꞌicaꞌnāchāuj.
\v 19 Aꞌcxniꞌ Māpaꞌksīniꞌ Jesucristo namin ē natahuiꞌlayāuj na ixlacatīn, naꞌiccālīpāxuhuayān ixpālacata aꞌkaꞌīꞌyāꞌtit. Mimpālacatacaꞌn nacaꞌtzīcan chī xaꞌictāꞌscujāuj Dios.
\v 20 Chuntzaꞌ huiꞌxinaꞌn quilāmaxquīꞌyāuj tapāxuhuān ē kaꞌtlaꞌ iclīmakcaꞌtzīyāuj mimpālacatacaꞌn.
\c 3
\p
\v 1 Jā xaꞌiccaꞌtzīyāuj chī ixlīlatlāꞌhuaꞌnāꞌtit, ē jātzaꞌ xaꞌictāyaniꞌyāuj. Ictipuhuanui xaꞌiclatachokouj quilīmāncaꞌn nac Atenas,
\v 2 ē xaꞌiccālakmacāꞌnchaꞌn Timoteo, quintāꞌtincaꞌn. Xlaꞌ īꞌscujniꞌ Dios ē māsuꞌyu xatze tachihuīn tū ixlaꞌ Cristo. Iccālakmacāꞌnchaꞌn nacāmaxquīꞌyān talacapāstacniꞌ ē nacāmaktāyayān ixpālacata āꞌchulāꞌ naꞌaꞌkaꞌīꞌyāꞌtit.
\v 3 Huāꞌmāꞌ ictlahuáuj ixpālacata jā nataxtutāyaꞌyāꞌtit ixpālacata tū līpātīniꞌmpāꞌnaꞌntit. Huiꞌxinaꞌn caꞌtzīyāꞌtittzaꞌ ixlacasquiꞌnca napātīniꞌnāuj huāꞌtzāꞌ.
\v 4 Aꞌcxniꞌ xaꞌiccātāꞌhuiꞌlachāꞌn iccāhuanin chī nalīpātīniꞌnāuj. Chuntzaꞌ aꞌkspulalh. Ūꞌtzaꞌ huāꞌmāꞌ caꞌtzīyāꞌtit.
\v 5 Ūꞌtzaꞌ iclīmacāꞌnchaꞌ Timoteo. Jā xaꞌiccaꞌtzī chī ixlīlatlāꞌhuaꞌnāꞌtit, ē jātzaꞌ xaꞌictāyaniꞌ. Xaꞌiccaꞌtzīcuꞌtun palh ixaꞌkaꞌīꞌyāꞌtitcus. Quit xaꞌiccaꞌtzīcuꞌtun palh skāhuīꞌniꞌ xmān ixcālīlaktzīꞌnīꞌtaꞌn. Chuntzaꞌ xmān xaꞌicscujtamakaꞌuj.
\p
\v 6 Chuhuaꞌj Timoteo cālakaꞌnīꞌtaꞌnchaꞌn ē chimpālhtzaꞌ. Quincāhuaniyān chī tzej aꞌkaꞌīꞌyāꞌtit ē chī lāpāxquīꞌyāꞌtit. Nā quincāhuaniyān chī quilālacapāstacmāꞌnanchāuj pōꞌktu quilhtamacuj ē quilāpāxquīꞌyāuj. Xlaꞌ quincāhuanin huiꞌxinaꞌn quilālaktzīꞌncuꞌtunāuj chuntzaꞌ chī iccālaktzīꞌncuꞌtunān nā quinaꞌn.
\v 7 Iccaꞌtzīuj huiꞌxinaꞌn nā tzej aꞌkaꞌīꞌyāꞌtit. Ūꞌtzaꞌ xaꞌiclīpāxuhuayāuj, masqui xaꞌicpātīniꞌmāꞌnauj ē masqui ixquincāꞌaꞌkspulamāꞌn tū jā tze.
\v 8 Chuhuaꞌj iclīpāxuhuayāuj ixpālacata iccaꞌtzīujtzaꞌ huiꞌxinaꞌn nā tzej aꞌkaꞌīꞌniꞌyāꞌtit quiMāpaꞌksīniꞌcaꞌn.
\v 9 Chuhuaꞌj tzē naꞌicmaxquīꞌyāuj tapāxcatcaꞌtzīn Dios mimpālacatacaꞌn. Icmaxquīꞌyāuj lhūhuaꞌ tapāxcatcaꞌtzīn Dios ixpālacata iclīpāxuhuayāuj na ixlacatīn Dios mimpālacatacaꞌn.
\v 10 Cāꞌcuhuīniꞌ ē tzīꞌsa icsquiꞌniꞌyāuj Dios caꞌiccālakaꞌnchaꞌn huiꞌxinaꞌn ixpālacata iccāmāsuꞌyuniꞌcuꞌtunān āꞌmacstiꞌnaꞌj tū cāsputniꞌyāncus huiꞌxinaꞌn chī aꞌkaꞌīꞌyāꞌtit.
\p
\v 11 Dios, quinTātaꞌcaꞌn, ē quiMāpaꞌksīniꞌcaꞌn Jesucristo caquincātamakxtekniꞌn naꞌiccālakaꞌnāchāꞌn huiꞌxinaꞌn.
\v 12 Cacāmaktāyan Māpaꞌksīniꞌ āꞌchulāꞌ nalāpāxquīꞌyāꞌtit, ē āꞌchulāꞌ nacāpāxquīꞌyāꞌtit ixlīpōꞌktucaꞌn tachiꞌxcuhuīꞌt, chuntzaꞌ chī quinaꞌn iccāpāxquīꞌyān huiꞌxinaꞌn.
\v 13 Dios cacāmāhuixcānīn ē cacāmāpānūniꞌkōꞌn ixlīpōꞌktu tū jā tze na milīstacnaꞌcaꞌn ē chuntzaꞌ jā tī chāꞌtin tzē caticālīmālacsuꞌyun aꞌcxniꞌ natāyaꞌyāꞌtit na ixlacatīn quinTātaꞌcaꞌn Dios aꞌcxniꞌ namimpala quiMāpaꞌksīniꞌcaꞌn Jesús ē ixlīpōꞌktucaꞌn tī ixlaꞌ.
\c 4
\s Aꞌktin latamat tū Dios lacasquiꞌn
\p
\v 1 Āꞌxmān iccāhuanicuꞌtunān huiꞌxinaꞌn, tāꞌtimīn. Quinaꞌn iccāmāsuꞌyuniꞌn chī nalīlatāꞌkchokoyāꞌtit chuntzaꞌ chī Dios lacasquiꞌn. Chuntzaꞌ tlahuaꞌpāꞌnaꞌntit. Chuhuaꞌj quinaꞌn iccāsquiꞌniꞌyān huiꞌxinaꞌn ē iccālīmaxquīꞌyān talacapāstacniꞌ ixlīmāpaꞌksīn Jesús: āꞌchulāꞌ chuntzaꞌ calatāꞌkchokotit.
\p
\v 2 Huiꞌxinaꞌn lacapāstacāꞌtit tū iccālīmāsuꞌyuniꞌn ixlīmāpaꞌksīn Māpaꞌksīniꞌ Jesús.
\v 3 Dios lacasquiꞌn līlacatejtin nalatahuiꞌlaꞌyāꞌtit. Jā tikaꞌlhīꞌyāꞌtit mintāꞌlāpāxquīꞌncaꞌn.
\v 4 Cacaꞌtzītit milīpōꞌktucaꞌn chī naputzayāꞌtit mimpuscātcaꞌn chuntzaꞌ chī minīꞌniꞌ na ixlacatīn Dios ē nā na ixlacatīncaꞌn tachiꞌxcuhuīꞌt.
\v 5 Jā caputzatit mimpuscātcaꞌn chī jā tze talacapāstacniꞌ huaꞌchi tatlahua chiꞌxcuhuīꞌn tī jā talakapasa Dios.
\v 6 Jā tikaꞌlhīꞌyāꞌtit mintāꞌlāpāxquīꞌncaꞌn. Jā tilāꞌaꞌkskāhuīꞌyāꞌtit chuntzaꞌ, ixpālacata chuntzaꞌ tū tze tlahuaniꞌyāꞌtit āꞌchāꞌtin chiꞌxcuꞌ. QuiMāpaꞌksīniꞌcaꞌn nacāmakapātīnīn tī chuntzaꞌ tatlahua. Ūꞌtzaꞌ huāꞌmāꞌ iccāhuaninīꞌtaꞌn huiꞌxinaꞌn xapūla.
\v 7 Dios quincālacsacnīꞌtaꞌn ē xlaꞌ jā lacasquiꞌn natlahuayāuj tū jā tze. Quincālacsacnīꞌtaꞌn natlahuayāuj tū xatze na ixlacatīn Dios.
\v 8 Tī jā natamākentaxtū huāꞌmāꞌ tamāsuꞌyun, xlacaꞌn jā talakmakaꞌn chiꞌxcuhuīꞌn; xlacaꞌn talakmakaꞌn Dios. Dios ūꞌtzaꞌ tī quincāmaxquīꞌyān Espíritu Santo.
\p
\v 9 Huiꞌxinaꞌn lāpāxquīꞌyāꞌtit lītāꞌtimīn, ē chuntzaꞌ jā ixlacasquiꞌnca naꞌiccāhuaniyān jā tū ixpālacata huāꞌmāꞌ. Dios cāmāsuꞌyuniꞌnīꞌtaꞌntzaꞌ chī nalāpāxquīꞌyāꞌtit huiꞌxinaꞌn.
\v 10 Chuntzaꞌ jā xmān lāpāxquīꞌyāꞌtit; huiꞌxinaꞌn nā cāpāxquīꞌyāꞌtit ixlīpōꞌktucaꞌn tāꞌtimīn xalanīꞌn na ixlīpōꞌktu estado Macedonia. Iccāsquiꞌniꞌyān āꞌchulāꞌ cacāpāxquīꞌtit.
\v 11 Nalīhuiꞌlīꞌyāꞌtit caꞌcs natahuiꞌlaꞌyāꞌtit. Jā calīmaktanūꞌtit tū jā mimpālacatacaꞌn. Calīscujtit mimacancaꞌn. Ūꞌtzaꞌ huāꞌmāꞌ iccāhuaninīꞌtaꞌn pūla.
\v 12 Chuntzaꞌ nacātalakachiꞌxcuhuīꞌyān xlacaꞌn tī jā taꞌaꞌkaꞌīꞌ ixtachihuīn Dios. Nā chuntzaꞌ jā tū caticāsputniꞌn.
\s Aꞌcxniꞌ namimpala Māpaꞌksīniꞌ
\p
\v 13 Iclacasquiꞌnāuj cacaꞌtzītit, tāꞌtimīn, tū ixlīcānaꞌ ixpālacata tī tanīnīꞌttzaꞌ. Chuntzaꞌ jā catilīpuhuantit chī talīpuhuan xlacaꞌn tī jā takaꞌlhīmāꞌnalh natalakchāꞌn Cristo.
\v 14 Quinaꞌn aꞌkaꞌīꞌyāuj Jesús nīlh ē nā lacastālancuanaꞌnli. Nā chuntzaꞌ aꞌkaꞌīꞌyāuj ixlīpōꞌktucaꞌn tī ixtaꞌaꞌkaꞌīꞌniꞌ Jesús aꞌcxniꞌ tanīlh, nā xlacaꞌn nacāmālacastālancuanī Dios aꞌcxniꞌ namimpala Jesús.
\p
\v 15 Chuhuaꞌj naꞌiccāhuaniyān tū huanli quiMāpaꞌksīniꞌcaꞌn. Aꞌcxniꞌ namimpala Māpaꞌksīniꞌ Jesús, quinaꞌn tī xalakahuancus jā caticāmakxtekui xlacaꞌn tī tanīnīꞌttzaꞌ.
\v 16 Tzamāꞌ quilhtamacuj Māpaꞌksīniꞌ nayujāchi nac aꞌkapūn ē palhaꞌ nalīchihuīnaꞌn līmāpaꞌksīn. Xapuxcuꞌ ángeles nataꞌsa. Namakataꞌsacan ixlīskoliꞌ Dios. Ūꞌtzaꞌ nacālīmācaꞌtzīnīcan mimāꞌlhtzaꞌ Māpaꞌksīniꞌ. Xapūla natalacastālancuanaꞌn xlacaꞌn tī ixtaꞌaꞌkaꞌīꞌniꞌ Cristo aꞌcxniꞌ tanīlh.
\v 17 Palaj tunca xlacaꞌn ē nā quinaꞌn tī xalakahuancus, quilīpōꞌktucaꞌn naquincātamakayāhuaꞌyān nac poklhnuꞌ. Nalakchāꞌnāuj Māpaꞌksīniꞌ nac cāꞌūꞌnīꞌn tālhmāꞌn. Chuntzaꞌ pōꞌktu quilhtamacuj natāꞌtahuiꞌlayāchāuj quiMāpaꞌksīniꞌcaꞌn.
\v 18 Huāꞌmāꞌ tachihuīn nalālīmāpāstaquīyāꞌtit. Chuntzaꞌ nalālīmākōꞌxamākaꞌtlīꞌyāꞌtit.
\c 5
\p
\v 1 Tāꞌtimīn, jā ixlacasquiꞌnca naꞌiccāhuaniyān huiꞌxinaꞌn jāꞌcxniꞌ naꞌaꞌkspula huāꞌmāꞌ ē jāꞌcxniꞌ namin Māpaꞌksīniꞌ.
\v 2 Huiꞌxinaꞌn tzej caꞌtzīyāꞌtit jā tī chāꞌtin caꞌtzī jāꞌcxniꞌ namin Māpaꞌksīniꞌ. Xamaktin namin huaꞌchi chī min chāꞌtin kaꞌlhānaꞌ tzīꞌsa.
\v 3 Aꞌcxniꞌ natahuan xalanīꞌn nac cāꞌquilhtamacuj: “Caꞌcs huiꞌlānaꞌuj; jā tū catilalh”, xamaktin nala lakuat. Palaj nala lakuat huaꞌchi aꞌcxniꞌ nachiniꞌ ixtacaꞌtzāt chāꞌtin puscāt aꞌcxniꞌ namālacatuncuhuīꞌnī chāꞌtin skaꞌtaꞌ. Jā catitapūtaxtuniꞌlh lakuat.
\v 4 Xlacaꞌn jā talakapasa Dios ē jā tacaꞌtzī palh Jesucristo namimpala. Xamaktin natasuꞌyu huaꞌchi aꞌcxniꞌ namin chāꞌtin kaꞌlhānaꞌ tzīꞌsa. Huiꞌxinaꞌn jā chuntzaꞌ chī xlacaꞌn. Huiꞌxinaꞌn, tāꞌtimīn, lakapasāꞌtittzaꞌ ixtachihuīn Dios ē kaꞌlhīpāꞌnaꞌntit Jesucristo hasta aꞌcxniꞌ namin.
\v 5 Huiꞌxinaꞌn xalanīꞌn nac cāꞌcuhuīniꞌ ē latlāꞌhuaꞌnāꞌtit nac cāꞌxkaka. Quinaꞌn jātzaꞌ xalanīꞌn nac cāꞌtzīꞌsniꞌ. Jātzaꞌ latlāꞌhuanāuj jā cāꞌpucsuaꞌ.
\v 6 Huaꞌchi ixtalhtatanīꞌt xlacaꞌn tī jā talakapasa ixtachihuīn Dios. Jā calauj chī xlacaꞌn. Skalalh calauj ē cuenta catlahuáuj jā natlahuayāuj tū jā tze.
\v 7 Cāꞌtzīꞌsniꞌ lhtatacan ē cāꞌtzīꞌsniꞌ kaꞌchīcan. Xalanīꞌn nac cāꞌtzīꞌsniꞌ huaꞌchi ixtalhtatanīꞌt ē huaꞌchi ixtakaꞌchīnīꞌt, ixpālacata jā talacapāstaca tū ixlaꞌ Dios ē jā tatlahua cuenta chī lacatejtin natalatāꞌkchoko.
\v 8 Quinaꞌn jā chuntzaꞌ chī xlacaꞌn. Quinaꞌn xalanīꞌn nac cāꞌcuhuīniꞌ. Tropa kaꞌlhī ixluꞌxuꞌ xalīcāꞌn tū nalītamaktāya ixlīstacnaꞌ. Quinaꞌn kaꞌlhīyāuj tū nalītamaktāyayāuj nac quilīstacnaꞌcaꞌn. Aꞌkaꞌīꞌniꞌyāuj Jesucristo ē pāxquīꞌnināuj chuntzaꞌ chī xlaꞌ quincāmāsuꞌyuniꞌn. Ūꞌtzaꞌ līlītamaktāyayāuj na quilīstacnaꞌcaꞌn. Ūꞌtzaꞌ jā makxteka natanū na quilīstacnaꞌcaꞌn tū jā tze. Tropa kaꞌlhī ixtāꞌknuꞌ xalīcāꞌn tū nalītamaktāya ixaꞌkxāk. Quinaꞌn kaꞌlhīyāuj tū nalītamaktāyayāuj quintalacapāstacniꞌcaꞌn. Quinaꞌn aꞌkaꞌīꞌyāuj naꞌaꞌkapūtaxtuyāuj. Ūꞌtzaꞌ līlītamaktāyayāuj. Ūꞌtzaꞌ jā makxteka natanū tū jā tze talacapāstacniꞌ.
\v 9 Dios quincālacsacnīꞌtaꞌn ē jā quincāmakapātīnīncuꞌtunān aꞌcxniꞌ naputzānaꞌnīkōꞌ. Quincālacsacniꞌ naquincāmakapūtaxtūyān quiMāpaꞌksīniꞌcaꞌn Jesucristo.
\v 10 Jesucristo, xlaꞌ līnīlh ixpālacata quinaꞌn natāꞌtahuiꞌlayāuj xlaꞌ jā huiꞌlachaꞌ, palh nīnīꞌtaujtzaꞌ o lakahuanāujcus aꞌcxniꞌ xlaꞌ namimpala.
\v 11 Ūꞌtzaꞌ huāꞌmāꞌ calālīmaxquīꞌtit talacapāstacniꞌ ē calāmāhuixcānīꞌtit chuntzaꞌ chī tlahuapāꞌnaꞌntit huiꞌxinaꞌn chuhuaꞌj.
\s Pablo cāmaxquīꞌlh talacapāstacniꞌ tāꞌtimīn
\p
\v 12 Tāꞌtimīn, iccālīsāhuaniyān cacālakachiꞌxcuhuīꞌtit tī tascuja na milacpuꞌnancaꞌn, tī cātamāsuꞌyuniꞌyān ē cātastacyāhuayān na ixlacatīn Dios.
\v 13 Cacālakachiꞌxcuhuīꞌtit ē cacāpāxquīꞌtit ixpālacata ixtascujūtcaꞌn. Huiꞌxinaꞌn calāpāxquīꞌtit.
\p
\v 14 Iccāmaxquīꞌyān talacapāstacniꞌ, tāꞌtimīn. Cacāquilhnīꞌtit macstiꞌnaꞌj tī xmān talatlāꞌhuan ē jā tascujcuꞌtun. Cacāhuanilīꞌpintit tī tataxlajuaniꞌnīꞌt. Cacāmaktāyaꞌtit tī jānaꞌj tzej taꞌaꞌkaꞌīꞌ. Cacātāyaniꞌtit ixlīpōꞌktucaꞌn.
\p
\v 15 Calīhuiꞌlīꞌtit nalātlahuaniꞌyāꞌtit tū tze. Nā chuntzaꞌ cacātlahuaniꞌtit ixlīpōꞌktucaꞌn tū tze. Jā titlahuaniꞌyāꞌtit āꞌchāꞌtin tū jā tze, masqui xlaꞌ cātlahuaniꞌnīꞌtaꞌn tū jā tze.
\p
\v 16 Pōꞌktu quilhtamacuj capāxuhuaꞌtit.
\v 17 Pōꞌktu quilhtamacuj caꞌorarlīꞌtit.
\v 18 Camaxquīꞌtit tapāxcatcaꞌtzīn Dios catūxcuhuālh tū nacāꞌaꞌkspulayān. Chuntzaꞌ Dios lacasquiꞌn natlahuaꞌyāꞌtit huiꞌxinaꞌn tī tapaꞌksīniꞌyāꞌtit Cristo Jesús.
\p
\v 19 Jā camāmixīniꞌtit ixtaxkaket Espíritu Santo.
\v 20 Jā calakmakaꞌntit tū tahuan ixaꞌkchihuīnaꞌnīꞌn Dios.
\v 21 Tzej nalacapāstacāꞌtit palh tze o jā tze tū tahuan ē camaktīniꞌntit tū tze.
\v 22 Camakxtektit pōꞌktu tū jā tze.
\p
\v 23 Chu ūꞌtzaꞌ Dios cacātlahuan huiꞌxinaꞌn lactze. Dios ūꞌtzaꞌ tī quincāmakapāxuīyān. Icsquiꞌniꞌ Dios cacāmaktāyan jā natlahuaꞌyāꞌtit tū jā tze. Cacāmaktāyan jā natanū tū jā tze na mintalacapāstacniꞌcaꞌn ē na milīstacnaꞌcaꞌn hasta aꞌcxniꞌ namin quiMāpaꞌksīniꞌcaꞌn Jesucristo.
\v 24 Ixlīpōꞌktu huāꞌmāꞌ Dios nacātlahuaniꞌyān ixpālacata ūꞌtzaꞌ tī cālacsacnīꞌtaꞌn ē ūꞌtzaꞌ pōꞌktu quilhtamacuj mākentaxtūkōꞌ.
\s Āꞌxmān tasicuaꞌlanālaniꞌ
\p
\v 25 Tāꞌtimīn, caꞌorarlīꞌtit quimpālacatacaꞌn.
\p
\v 26 Cacāsaludarlītit ē cacāskoꞌkaꞌtit ixlīpōꞌktucaꞌn tāꞌtimīn chuntzaꞌ chī minīꞌniꞌ chī lītāꞌtimīn tī tatapaꞌksīniꞌ Dios.
\p
\v 27 Iccālīmacamaxquīꞌyān ixlīmāpaꞌksīn Māpaꞌksīniꞌ cacālīkelhtahuaꞌkaꞌniꞌkōꞌtit ixlīpōꞌktucaꞌn tāꞌtimīn huāꞌmāꞌ carta tū ictzoꞌkmāꞌlh.
\p
\v 28 Cacāsicuaꞌlanātlahuan quiMāpaꞌksīniꞌcaꞌn Jesucristo. Amén.