\id 2TH
\h 2 Tesalonicenses
\toc1 2 Tesalonicenses
\mt 2 Tesalonicenses
\c 1
\s Pablo ē tī ixtatāꞌscuja tatzoꞌkli aꞌktin carta
\p
\v 1 Ictzoꞌknunāuj quinaꞌn, Pablo ē Silvano ē Timoteo. Iccātzoꞌknuniꞌyān huiꞌxinaꞌn xalanīꞌn nac Tesalónica tī aꞌkaꞌīꞌyāꞌtit ē tapaꞌksīniꞌyāꞌtit Dios quinTātaꞌcaꞌn ē nā Māpaꞌksīniꞌ Jesucristo.
\v 2 Cacāsicuaꞌlanātlahuan Dios quinTātaꞌcaꞌn ē Māpaꞌksīniꞌ Jesucristo ē cacāmakapāxuīn.
\s Dios nacāmakapātīnīn tī talaclēꞌn
\p
\v 3 Quinaꞌn iccaꞌtzīyāuj huiꞌxinaꞌn aꞌkaꞌīꞌpāꞌnaꞌntit āꞌchulāꞌ ē milīpōꞌktucaꞌn lāpāxquīꞌpāꞌnaꞌntit āꞌchulāꞌ. Ūꞌtzaꞌ ixlacasquiꞌnca nalīmaxquīꞌyāuj pōꞌktu quilhtamacuj tapāxcatcaꞌtzīn Dios. Chuntzaꞌ minīꞌniꞌ.
\v 4 Ūꞌtzaꞌ quinaꞌn iclīkaꞌlhīyāuj tapāxuhuān aꞌcxniꞌ iccāhuaniyāuj xlacaꞌn tī tatapaꞌksīniꞌ Dios, chī huiꞌxinaꞌn latlāꞌhuaꞌnāꞌtit. Iccāhuaniyāuj chī huiꞌxinaꞌn tzej aꞌkaꞌīꞌyāꞌtitcus ē jā tamakchuyīnīꞌtaꞌntit masqui cātalīputzastālaniꞌyān huiꞌxinaꞌn ē pātīyāꞌtit lhūhuaꞌ catūhuālh.
\v 5 Chuntzaꞌ lītasuꞌyu Dios tzej caꞌtzī chī nalīputzānaꞌnīkōꞌ. Chuntzaꞌ lītasuꞌyu Dios nacālaktzīꞌnān lactze ē chuntzaꞌ tzē natanūꞌyāꞌtit jā xlaꞌ māpaꞌksīniꞌn. Huiꞌxinaꞌn tapaꞌksīniꞌyāꞌtit Dios. Ūꞌtzaꞌ līpātīniꞌmpāꞌnaꞌntit.
\p
\v 6 Caꞌtzīyāuj chī tze nalīputzānaꞌnī Dios. Tī cātaputzastālaniꞌyān huiꞌxinaꞌn xlacaꞌn nataxoko na ixlacatīn Dios ē xlaꞌ nacāmakapātīnīn.
\v 7 Dios namājaxī chī līpātīniꞌnāuj hasta aꞌcxniꞌ natasuꞌyu Māpaꞌksīniꞌ Jesús. Namināchaꞌ nac aꞌkapūn. Natatāꞌmin ixángeles tī takaꞌlhī lītliꞌhuiꞌqui.
\v 8 Jesucristo namin ē nacāmakapātīnīnkōꞌ tī jā talakapascuꞌtunli Dios ē jā takexmatniꞌcuꞌtunli xatze tachihuīn ixlaꞌ quiMāpaꞌksīniꞌcaꞌn Jesucristo.
\v 9 Xlacaꞌn nacāmakapātīnīn Dios pōꞌktu quilhtamacuj. Nacāmāxtumlīcan pōꞌktu quilhtamacuj na ixlacatīn Dios ē na ixtaxkaket tū māsuꞌyu ixlītliꞌhuiꞌqui Dios.
\v 10 Tzamāꞌ quilhtamacuj aꞌcxniꞌ namin Māpaꞌksīniꞌ, natalakachiꞌxcuhuīꞌ ixtachiꞌxcuhuīꞌt, ē natalēꞌcnīniꞌn ixlīpōꞌktucaꞌn tī taꞌaꞌkaꞌīꞌ. Nā chuntzaꞌ natlahuaꞌyāꞌtit nā huiꞌxinaꞌn ixpālacata aꞌkaꞌīꞌnīꞌtaꞌntit tū iccāhuanin.
\p
\v 11 Ūꞌtzaꞌ iclīꞌorarlīyāuj pōꞌktu quilhtamacuj mimpālacatacaꞌn. Icsquiꞌniꞌyāuj Dios tzej nalatāꞌkchokoyāꞌtit huiꞌxinaꞌn, chuntzaꞌ chī ixlacasquiꞌnca natalatāꞌkchoko xlacaꞌn tī cālacsacnīꞌt Dios, ixpālacata Dios nacālaktzīꞌnān lactze huiꞌxinaꞌn. Icsquiꞌniꞌyāuj Dios cacāmaktāyan namākentaxtūyāꞌtit ixlīpōꞌktu xatze mintalacapāstacniꞌcaꞌn, ē pōꞌktu tze tū tlahuaꞌcuꞌtunāꞌtit ixpālacata aꞌkaꞌīꞌnīꞌtaꞌntittzaꞌ. Ixlīpōꞌktu huāꞌmāꞌ Dios tzē natlahua ixpālacata kaꞌlhī līmāpaꞌksīn.
\v 12 Chuntzaꞌ nalakachiꞌxcuhuīꞌcan quiMāpaꞌksīniꞌcaꞌn Jesucristo mimpālacatacaꞌn, ē huiꞌxinaꞌn nacātalakachiꞌxcuhuīꞌyān, ixpālacata kaꞌlhī talakalhuꞌmān quinDioscaꞌn ē quiMāpaꞌksīniꞌcaꞌn Jesucristo.
\c 2
\s Chiꞌxcuꞌ tī āꞌchulāꞌ jā tze
\p
\v 1 Chuhuaꞌj naꞌiccāhuaniyān, tāꞌtimīn, tū naꞌaꞌkspula aꞌcxniꞌ namin quiMāpaꞌksīniꞌcaꞌn Jesucristo, ē chī quinaꞌn nalatalacxtimīyāuj na ixlacatīn. Ixpālacata huāꞌmāꞌ, iccāhuanicuꞌtunān catūhuālh.
\v 2 Jā catamakxtektit nacātamāmakchuyīyān mintalacapāstacniꞌcaꞌn. Jā catamakchuyīꞌtit aꞌcxniꞌ huancan chinīꞌttzaꞌ quilhtamacuj tū napūmin Māpaꞌksīniꞌ. Palhāsāꞌ chuntzaꞌ cāhuanin chāꞌtin ixaꞌkchihuīnaꞌ Dios o chāꞌtin tī māsuꞌyu ixtachihuīn Dios. Palhāsāꞌ catīhuālh cāhuanin iccāmacāꞌniꞌnīꞌtaꞌnchaꞌn aꞌktin carta jā xaꞌictzoꞌknīꞌtauj chinīꞌttzaꞌ quilhtamacuj tū napūmin Māpaꞌksīniꞌ. Jā ixlīcānaꞌ. Jā chuntzaꞌ ictzoꞌknunīꞌt.
\v 3 Jā cacātaꞌaꞌkskāhuīꞌn nūn maktin. Tzamāꞌ quilhtamacuj jānaꞌj catilalh. Pūla lhūhuaꞌ natalakaspiꞌtniꞌ Dios, ē natasuꞌyu chāꞌtin chiꞌxcuꞌ tī āꞌchulāꞌ jā tzeya chiꞌxcuꞌ. Xlaꞌ līhuiꞌlīcanīꞌt naꞌaꞌn nac pūpātīn.
\v 4 Xlaꞌ nala ixtāꞌlāquiclhlaktziꞌcaꞌn ixlīpōꞌktu tī cāhuanican dioses ē ixlīpōꞌktu tū cālaktaquilhpūtacan. Xlaꞌ natahuiꞌla na ixtemplo Dios ē nahuan: “Quit Dios.”
\p
\v 5 ¿Chu jā lacapāstacāꞌtit chī xaꞌiccāhuaniyān pōꞌktu huāꞌmāꞌ aꞌcxniꞌ xaꞌiccātāꞌhuiꞌlan huiꞌxinaꞌn?
\v 6 Huiꞌxinaꞌn caꞌtzīyāꞌtit tū jā makxteka natasuꞌyu chuhuaꞌj tzamāꞌ chiꞌxcuꞌ tī jā tzeya chiꞌxcuꞌ. Hasta aꞌcxniꞌ līlacsacniꞌ aꞌktin quilhtamacuj, hasta aꞌcxniꞌ natasuꞌyu.
\v 7 Chuhuaꞌj tzēꞌk līscujmāꞌlh ixlīmāpaꞌksīn skāhuīꞌniꞌ. Chuntzaꞌ tzēꞌk scujmāꞌlh hasta namāpānūcan tī jā makxteka tasuꞌyu tzamāꞌ chiꞌxcuꞌ tī jā tze.
\v 8 Palaj tunca natasuꞌyu. Āꞌlīstān natasuꞌyu Māpaꞌksīniꞌ Jesucristo. Xlaꞌ xmān nasuꞌnu ē chuntzaꞌ nalīmaknī tzamāꞌ chiꞌxcuꞌ tī jā tzeya chiꞌxcuꞌ. Jesucristo kaꞌlhī līmāpaꞌksīn. Xmān natasuꞌyu, ē xmān chuntzaꞌ nalīmālaksputū ixlīmāpaꞌksīn tzamāꞌ chiꞌxcuꞌ tī jā tzeya chiꞌxcuꞌ.
\v 9 Aꞌcxniꞌ namin chiꞌxcuꞌ tī jā tzeya chiꞌxcuꞌ, xlaꞌ nakaꞌlhī ixlīmāpaꞌksīn skāhuīꞌniꞌ ē natlahua kempālhūhuaꞌ līꞌaꞌcnīn tū nalīꞌaꞌkskāhuīꞌnin.
\v 10 Xlaꞌ quiclhcaꞌtzan, ē nacāꞌaꞌkskāhuīꞌ xlacaꞌn tī natapātīniꞌn nac pūpātīn. Natapātīniꞌn aꞌntzaꞌ ixpālacata jā tamaktīniꞌncuꞌtunli ixtachihuīn Dios tū ixlīcānaꞌ ē tū māsuꞌyu chī līꞌaꞌkapūtaxtucan.
\v 11 Jā tamaktīniꞌncuꞌtunli tū ixlīcānaꞌ, ē ūꞌtzaꞌ Dios cālīmakxteka nacāꞌaꞌkskāhuīꞌcan. Ūꞌtzaꞌ talīꞌaꞌkaꞌīꞌ tū jā ixlīcānaꞌ.
\v 12 Chuntzaꞌ Dios nacāputzānaꞌnīkōꞌ ē nacāmakapātīnīnkōꞌ ixlīpōꞌktucaꞌn tī jā taꞌaꞌkaꞌīꞌlh tū ixlīcānaꞌ ē xmān ixtalakatī natatlahua tū jā tze.
\s Dios cāmakapūtaxtūcuꞌtun tachiꞌxcuhuīꞌt
\p
\v 13 Chuhuaꞌj, tāꞌtimīn, caꞌtzīyāuj cāpāxquīꞌyān Māpaꞌksīniꞌ. Chuhuaꞌj ixlacasquiꞌnca naꞌicmaxquīꞌyāuj pāxcatcaꞌtzīn Dios pōꞌktu quilhtamacuj ixpālacata Dios cālacsacniꞌ huiꞌxinaꞌn aꞌcxniꞌ jānaꞌj ixaꞌnan cāꞌquilhtamacuj, ixpālacata naꞌaꞌkapūtaxtuyāꞌtit. Huiꞌxinaꞌn aꞌkaꞌīꞌyāꞌtit tū ixlīcānaꞌ ē Espíritu Santo lactze cātlahuan huiꞌxinaꞌn, ē chuntzaꞌ Dios cālīmakapūtaxtūyān huiꞌxinaꞌn.
\v 14 Quinaꞌn iccālēꞌniꞌchaꞌn xatze tachihuīn ixlaꞌ Jesucristo. Chuntzaꞌ cālītaꞌsaniꞌn Dios. Xlaꞌ cātaꞌsaniꞌn huiꞌxinaꞌn ē chuntzaꞌ huiꞌxinaꞌn nalakchipināꞌtit quiMāpaꞌksīniꞌcaꞌn Jesucristo nac aꞌkapūn jā cāꞌtzēhuanīꞌt.
\p
\v 15 Ūꞌtzaꞌ xaꞌncaꞌ calītāyaꞌtit, tāꞌtimīn, ē jā camakxtektit tamāsuꞌyun tū iccāhuanin ē tū ictzoꞌkui nac carta.
\v 16 Dios quinTātaꞌcaꞌn, xlaꞌ quincāpāxquīꞌyān ē quincāmāhuixcānīyān pōꞌktu quilhtamacuj. Xlaꞌ quincāmaxquīꞌyān tū ixlīcānaꞌ ixpālacata xlaꞌ lakalhuꞌmanīniꞌn.
\v 17 Icsquiꞌniꞌyāuj Māpaꞌksīniꞌ Jesucristo ē Dios quinTātaꞌcaꞌn cacātamaxquīꞌn takoꞌxamākaꞌtlīꞌn ē cacātamāhuixcānīn ē chuntzaꞌ natlahuaꞌyāꞌtit ē nahuanāꞌtit pōꞌktu tū tze.
\c 3
\s Pablo cāsquiꞌniꞌlh tāꞌtimīn catalīꞌorarlīlh ixpālacata
\p
\v 1 Chuhuaꞌj, tāꞌtimīn, caꞌorarlīꞌtit quimpālacatacaꞌn. Casquiꞌntit calēꞌnca ixtachihuīn Dios calhāxcuhuālh ē calakachiꞌxcuhuīꞌca chuntzaꞌ chī lakachiꞌxcuhuīꞌtit huiꞌxinaꞌn.
\v 2 Nā casquiꞌniꞌtit Dios caquincāmakapūtaxtūn na ixlīmāpaꞌksīncaꞌn tī quiclh tacaꞌtzan chiꞌxcuhuīꞌn tī tatlahua tū jā tze. Āꞌmakapitzīn tachiꞌxcuhuīꞌt jā taꞌaꞌkaꞌīꞌ ē ūꞌtzaꞌ līꞌaꞌnan tachiꞌxcuhuīꞌt tī quiclh tacaꞌtzan.
\v 3 Māpaꞌksīniꞌ pōꞌktu quilhtamacuj mākentaxtūkōꞌ. Xlaꞌ nacāmātliꞌhuiꞌclhān ē nacāmaktakaꞌlhān ē chuntzaꞌ jā caticāꞌaꞌkskāhuīꞌn skāhuīꞌniꞌ.
\v 4 Quinaꞌn iclīpāhuanāuj Māpaꞌksīniꞌ. Ūꞌtzaꞌ tī cāmaktāyayān. Ūꞌtzaꞌ iclīcaꞌtzīyāuj palh tlahuaꞌpāꞌnaꞌntit tū iccāhuanin ē āꞌchulāꞌ natlahuaꞌyāꞌtit.
\v 5 Cacāmaktāyan huiꞌxinaꞌn Māpaꞌksīniꞌ Jesucristo āꞌchulāꞌ nacaꞌtzīyāꞌtit chī Dios cāpāxquīꞌyān. Cacāmaktāyan natāyaniꞌyāꞌtit tū cāꞌaꞌnaniꞌyān, chuntzaꞌ chī Cristo tāyaniꞌkōꞌlh.
\s Ixlacasquiꞌnca natascuja ixlīpōꞌktucaꞌn
\p
\v 6 Chuhuaꞌj, tāꞌtimīn, iccālīmāpaꞌksīyān ixtacuhuīniꞌ quiMāpaꞌksīniꞌcaꞌn Jesucristo. Cacātapekpānūniꞌtit ixlīpōꞌktucaꞌn tāꞌtimīn tī xmān talatlāꞌhuan ē jā takexmatniꞌ tamāsuꞌyun tū iccāhuaninīꞌtaꞌn huiꞌxinaꞌn.
\v 7 Huiꞌxinaꞌn caꞌtzīyāꞌtittzaꞌ ixlacasquiꞌnca naquilāmakscaꞌtxtuyāuj chī xaꞌicscujāuj. Quinaꞌn jā līlhquititniꞌ xaꞌicuanīꞌtauj aꞌcxniꞌ xaꞌiccātāꞌhuiꞌlachāꞌn huiꞌxinaꞌn.
\v 8 Iccāxokouj tī ixquincāmāhuīꞌyān. Xaꞌictatzihuīcsāuj xaꞌicscujāuj cāꞌcuhuīniꞌ ē tzīꞌsa ixpālacata quinaꞌn jā xaꞌiccāmāmakasputūcuꞌtunān.
\v 9 Masqui xaꞌickaꞌlhīyāuj līmāpaꞌksīn ixquilāmāhuīꞌuj, quinaꞌn xaꞌicscujāuj ixpālacata xaꞌiclacasquiꞌnāuj huiꞌxinaꞌn naquilāmakscaꞌtāuj.
\v 10 Aꞌcxniꞌ xaꞌiccātāꞌhuiꞌlachāꞌn huiꞌxinaꞌn, iccāhuanin chuntzaꞌ: Palh aꞌnan tī jā scujcuꞌtun, jā cahuāꞌyalh.
\v 11 Quincātahuaniyān makapitzīn chī huiꞌxinaꞌn līlhquititniꞌ ē talīmaktanū tū jā ixcuentacaꞌn ē nūn tū tatlahua tascujūt.
\v 12 Xlacaꞌn iccāmāpaꞌksīyāuj ē iccālīmaxquīꞌyāuj talacapāstacniꞌ ixlīmāpaꞌksīn Jesucristo: Caꞌcs catatahuiꞌlalh ē catascujli ē chuntzaꞌ natahuāꞌyan.
\p
\v 13 Tāꞌtimīn, jā calakachipiniꞌtit natlahuaꞌyāꞌtit tū xatze.
\v 14 Palh catīhuālh jā kexmatniꞌcuꞌtun tū ictzoꞌknīꞌtauj nac huāꞌmāꞌ carta, caxaꞌncalaktzīꞌntit tīchu. Jā catāꞌtalakxtimīꞌtit xlaꞌ. Chuntzaꞌ nalīmāxanaꞌn xlaꞌ.
\v 15 Jā caquiclhlaktzīꞌntit. Calīmāpaꞌksīꞌtit huaꞌchi mintāꞌtincaꞌn.
\s Āꞌxmān tasicuaꞌlanālaniꞌ
\p
\v 16 Māpaꞌksīniꞌ Jesucristo ūꞌtzaꞌ tī quincāmakapāxuīyān. Cacāmakapāxuīn huiꞌxinaꞌn pōꞌktu quilhtamacuj catūxcuhuālh nacāꞌaꞌkspulayān. Māpaꞌksīniꞌ pōꞌktu quilhtamacuj cacātāꞌtahuiꞌlan milīpōꞌktucaꞌn.
\p
\v 17 Quit Pablo iclītzoꞌka quimacan huāꞌmāꞌ saludos. Ūꞌtzaꞌ huāꞌmāꞌ ixlīlakapascan ixlīpōꞌktu quincartas. Chuntzaꞌ iccātzoꞌka.
\v 18 QuiMāpaꞌksīniꞌcaꞌn Jesucristo cacāsicuaꞌlanātlahuan milīpōꞌktucaꞌn huiꞌxinaꞌn. Amén.