\id 1TI
\h 1 Timoteo
\toc1 1 Timoteo
\mt 1 Timoteo
\c 1
\s Pablo tzoꞌknuniꞌlh Timoteo
\p
\v 1 Quit Pablo, ixapóstol Jesucristo chī ixtalīmāpaꞌksīn Dios tī makapūtaxtūnuꞌn ē Jesucristo tī aꞌkaꞌīꞌniꞌyāuj.
\v 2 Timoteo, quit ictzoꞌknuniꞌmāꞌn. Icmāꞌaꞌkaꞌīꞌnīn ixtachihuīn Dios ē chuntzaꞌ huiꞌx huaꞌchi quinkaꞌhuaꞌcha. Dios camaktakaꞌlhniꞌ ē calakalhuꞌmaniꞌ. Tzej calatahuiꞌlaꞌ ixpālacata quinTātaꞌcaꞌn Dios ē Jesucristo quiMāpaꞌksīniꞌcaꞌn.
\s Māpaꞌksīlh ixpālacata tī tamāsuꞌyu tū jā ixlīcānaꞌ
\p
\v 3 Aꞌcxniꞌ xaꞌicaꞌmāꞌlh nac Macedonia, icuanin ixtachoko nac Efeso nacāmāpaꞌksīyaꞌ āꞌmakapitzīn jātzaꞌ catamāsuꞌyulh tū jā ixlīcānaꞌ ixpālacata Cristo.
\v 4 Nā icuanin nacāhuaniyaꞌ jā ixcuentacaꞌn tzamāꞌ listas ixtacuhuīniꞌcaꞌn ixnapapanaꞌcaꞌn ē tū xmān cuentos ixpālacata ixnapapanaꞌcaꞌn. Tzamāꞌ jā tze; xmān talālītāꞌchihuīnaꞌn ē jātzaꞌ tascaꞌta tū ixtalacasquiꞌnīn Dios.
\p
\v 5 Quinaꞌn cāmāsuꞌyuniꞌyāuj chī ixlacasquiꞌnca natalakpalī ixtalacapāstacniꞌcaꞌn. Ūꞌtzaꞌ līlāpāxquīꞌcan.
\v 6 Āꞌmakapitzīn tapātzaꞌnkānīꞌt ē ūꞌtzaꞌ lītasuꞌyu chu tlakaj talālīhuani.
\v 7 Xlacaꞌn tamāsuꞌyucuꞌtun ixlīmāpaꞌksīn Moisés ē jā tzej tacaꞌtzī tū huanicuꞌtun. Ē jā tacaꞌtzī tū tahuan. Talīchihuīnaꞌn masqui jā tacaꞌtzī.
\p
\v 8 Caꞌtzīyāuj tze līmāpaꞌksīn tū tzoꞌkli Moisés palh lakachiꞌxcuhuīꞌcan ē palh jā lakpalīcan.
\v 9 Xalactze chiꞌxcuhuīꞌn jā tamaclacasquiꞌn līmāpaꞌksīn. Tamaclacasquiꞌn līmāpaꞌksīn tī jā tze ē tī jā takexmatcuꞌtun ē tī talaclēꞌn ē jā taꞌaꞌkaꞌīꞌniꞌ ixtachihuīn Dios. Nā tamaclacasquiꞌn xlacaꞌn tī jā tū talakachiꞌxcuhuīꞌ ē tī tamaknī ixtātaꞌcaꞌn, o ixtzīꞌcaꞌn, o āꞌchāꞌtin chiꞌxcuꞌ.
\v 10 Tamaclacasquiꞌn līmāpaꞌksīn tī takaꞌlhī ixtāꞌlāpāxquīꞌncaꞌn ē tī takaꞌlhī chāꞌtin chiꞌxcuꞌ huaꞌchi ixpuscāt ē tī taꞌaꞌkskāhuīꞌniꞌn ē tī takaꞌlhan lacstīn ē tī tahuan tū jā ixlīcānaꞌ na ixlacatīn juez. Tamaclacasquiꞌn līmāpaꞌksīn ixlīpōꞌktucaꞌn tī tatlahua catūhuālh tū jā ixtāꞌchuntzaꞌ chī ixtachihuīn Dios.
\v 11 Ūꞌtzaꞌ ixtachihuīn Dios tū quimacamaxquīꞌca namāscaꞌtīniꞌn ē ūꞌtzaꞌ quincāhuaniyān chī xkaka Dios ē sicuaꞌlanātlahuanīꞌt xlaꞌ.
\s Maxquīꞌlh tapāxcatcaꞌtzīn Dios
\p
\v 12 Icmaxquīꞌ tapāxcatcaꞌtzīn quiMāpaꞌksīniꞌ Cristo Jesús. Quilaktzīꞌnīꞌt tze ē chuntzaꞌ naꞌictāꞌscuja ē naꞌicmāsuꞌyu ixtachihuīn Dios. Quimāhuixcānīlh chī tzej naꞌicscuja.
\v 13 Xapūla jā tze chī iccālīchihuīnaꞌnli tī ixtaꞌaꞌkaꞌīꞌ ē xaꞌiccāputzatokoke ē xaꞌiccālakapala xlacaꞌn. Jā xaꞌiccaꞌtzī tū xaꞌictlahuamāꞌlh ē jānaꞌj xaꞌicaꞌkaꞌīꞌnīꞌt. Ūꞌtzaꞌ Dios quilīlakalhuꞌmanli.
\v 14 Lhūhuaꞌ quilakalhuꞌmanli quiMāpaꞌksīniꞌcaꞌn ē quimāꞌaꞌkaꞌīꞌnīlh. Chuntzaꞌ quimāsuꞌyuniꞌlh chī naꞌicpāxquīꞌnin chuntzaꞌ chī Jesucristo pāxquīꞌnin ixpālacata ictapaꞌksīniꞌtzaꞌ xlaꞌ.
\p
\v 15 Ixlacasquiꞌnca naꞌaꞌkaꞌīꞌniꞌcan huāꞌmāꞌ tachihuīn tū ixlīcānaꞌ: Cristo Jesús milh nac cāꞌquilhtamacuj nacāmakapūtaxtū tī talaclēꞌn. Icpuhuan quit āꞌchulāꞌ xaꞌiclaclēꞌn ē jā ixlīpōꞌktucaꞌn tachiꞌxcuhuīꞌt.
\v 16 Masqui quit āꞌchulāꞌ xaꞌiclaclēꞌn, Jesucristo quilakalhuꞌmanli ē ūꞌtzaꞌ līmāsuꞌyu chī līlacatzucu nakaꞌlhī hasta aꞌcxniꞌ naꞌaꞌkaꞌīꞌcan. Quilakalhuꞌmanli quit, nā nacālakalhuꞌman ixlīpōꞌktucaꞌn tī nataꞌaꞌkaꞌīꞌ ē chuntzaꞌ natalīkaꞌlhī xasāstiꞌ ixlatamatcaꞌn tū jā catilaksputli.
\v 17 Calakachiꞌxcuhuīꞌca Xapuxcuꞌ tī Xapuxcuꞌ pōꞌktu quilhtamacuj. Xlaꞌ jā maktin catisputli ē jāla laktzīꞌncan. Xmān xlaꞌ Dios. Calaktaquilhpūtaca ē calakachiꞌxcuhuīꞌca pōꞌktu quilhtamacuj. Amén.
\p
\v 18 Timoteo, huāꞌmāꞌ līmāpaꞌksīn icmacamaxquīꞌyān. Iclacapāstacmāꞌlh tū huancanīꞌt mimpālacata aꞌcxniꞌ Dios māsuꞌyulh tū mintascujūt nahuan. Nā huiꞌx calacapāstacti tzamāꞌ tachihuīn ē chuntzaꞌ nakaꞌlhīꞌyaꞌ lītliꞌhuiꞌqui ē tzej nalīmāsuꞌyu ixtachihuīn Dios.
\v 19 Jā tipātzaꞌnkāyaꞌ tū aꞌkaꞌīꞌnīꞌtaꞌ. Jā catlahuaꞌ tū huiꞌx caꞌtzīyaꞌ tū jā tze. Āꞌmakapitzīn tatlahuanīꞌt tū jā tze masqui ixtamakcaꞌtzī jā tze tū ixtatlahuamāꞌnalh. Chuntzaꞌ talītaxtutāyalh na ixtej Dios.
\v 20 Chāꞌtuꞌ xlacaꞌn cāhuanican Himeneo ē Alejandro. Iccāmacamāstāꞌlh xlacaꞌn na ixmacan skāhuīꞌniꞌ ē xlaꞌ nacāmakapātīnīn ē chuntzaꞌ jātzaꞌ catitaꞌaꞌksaꞌnli Dios.
\c 2
\s Chī nataꞌorarlī
\p
\v 1 Icuaniyān huāꞌmāꞌ. Cacāmāsuꞌyuniꞌ tachiꞌxcuhuīꞌt chī xlīlakalīyān natasquiꞌniꞌ Dios tū tamaclacasquiꞌn ē natasquiꞌniꞌ ixpālacatacaꞌn āꞌmakapitzīn tachiꞌxcuhuīꞌt. Nā natamaxquīꞌ tapāxcatcaꞌtzīn Dios ixlīpōꞌktu tū cāmaxquīꞌnīꞌt.
\v 2 Cacāmāsuꞌyuniꞌ chī natasquiꞌniꞌ Dios nacāmaktāya rey ē āꞌmakapitzīn scujnīꞌn ē ixlīpōꞌktucaꞌn tachiꞌxcuhuīꞌt. Chuntzaꞌ caꞌcs natahuiꞌlayāuj ē natlahuayāuj ixtalacasquiꞌnīn Dios ē jā natlahuayāuj tū jā tū līmacuan.
\p
\v 3 Tī lakalīyān nasquiꞌniꞌ Dios chuntzaꞌ, xlaꞌ tlahuamāꞌlh tū tze ē tū nalīpāxuhua Dios Makapūtaxtūnuꞌ.
\v 4 Dios lacasquiꞌn ixlīpōꞌktucaꞌn tachiꞌxcuhuīꞌt cataꞌaꞌkapūtaxtulh ē ixlīpōꞌktucaꞌn catalakapasli tū ixlīcānaꞌ.
\v 5 Xmān chāꞌtin Dios huīꞌlh. Xmān chāꞌtin tī cāmākoꞌxamixī Dios ē tachiꞌxcuhuīꞌt ē ūꞌtzaꞌ tī huanican Jesucristo. Xlaꞌ Dios ē nā xlaꞌ chiꞌxcuꞌ ixuanīꞌt.
\v 6 Xlaꞌ ixlīmān tamacamāstāꞌlh nanī. Chuntzaꞌ līxokokōꞌlh ixlīpōꞌktu tū tachiꞌxcuhuīꞌt ixtamaklaclēꞌn Dios ē cāmakapūtaxtūlh. Aꞌcxniꞌ Dios lacasquiꞌnli aꞌcxniꞌ aꞌkspulalh.
\v 7 Quilacsacli chī ixaꞌkchihuīnaꞌ ē quilīhuiꞌlīlh chī apóstol naꞌiccāmāsuꞌyuniꞌ tū ixlīcānaꞌ tī jā israelitas. Nā iccāmāsuꞌyuniꞌ chī nalīꞌaꞌkapūtaxtucan. Ixlīcānaꞌ tū icuaniyān. Jā icaꞌkskāhuīꞌyān.
\p
\v 8 Iclacasquiꞌn ixlīpōꞌktucaꞌn tachiꞌxcuhuīꞌt calhāxcuhuālh nac cāꞌquilhtamacuj natatlahua ixoracioncaꞌn. Aꞌcxniꞌ tamakyāhua ixmacancaꞌn nataꞌorarlīniꞌ Dios, cuenta catatlahualh tze ixlīstacnaꞌcaꞌn, ē jā natasītzīꞌtāya ē jā natapuhuan tū jā tze ixpālacata āꞌchāꞌtin.
\v 9 Ixlacasquiꞌnca tzuꞌmaꞌjan ē puscan natalhakāꞌ ixluꞌxuꞌcaꞌn tū minīꞌniꞌ ē jā catilīmāxanaꞌlh. Jā ixlacasquiꞌnca natahuiꞌlī lhūhuaꞌ cintaj o xaꞌnat na ixyaꞌjcaꞌn; xmān tzej natakoꞌnkxnun. Jā kaꞌtlaꞌ natalīmakcaꞌtzī ixtapixnuꞌcaꞌn oro nūn perla. Ē jā kaꞌtlaꞌ natalīmakcaꞌtzī ixluꞌxuꞌcaꞌn tū xatapala xlaꞌ.
\v 10 Ixlacasquiꞌnca natatlahua tū tze. Ūꞌtzaꞌ minīꞌniꞌ ē chuntzaꞌ natalītasuꞌyu taꞌaꞌkaꞌīꞌniꞌ ixtachihuīn Dios.
\v 11 Aꞌntzaꞌ jā takēstokcan natalakachiꞌxcuhuīꞌ Dios, puscan caꞌcs catatahuīꞌlh natascaꞌta ē natakexmata.
\v 12 Quit jā icmakxteka chāꞌtin puscāt camāsuꞌyulh nūn cacāmāpaꞌksīlh chiꞌxcuhuīꞌn. Xlaꞌ caꞌcs catahuiꞌlalh
\v 13 ixpālacata pūla Dios cāxtlahualh Adán ē āꞌlīstān tlahualh Eva.
\v 14 Jā aꞌkskāhuīꞌca Adán; skāhuīꞌniꞌ āꞌkskāhuīꞌlh puscāt. Chuntzaꞌ lītzuculh tū jā tze.
\v 15 Ixtascujūt puscāt, ūꞌtzaꞌ cāmāsuꞌyuniꞌ ixlacstīn. Palh naꞌaꞌkaꞌīꞌniꞌ ixtachihuīn Dios ē kaꞌlhī tapāxquīꞌn ē palh tze ixtalacapāstacniꞌ ē jā natlahua tū jā minīꞌniꞌ ē palh tzej latlāꞌhuan, namakapūtaxtūcan.
\c 3
\s Chī natalītaxtu maktakaꞌlhnaꞌnīꞌn
\p
\v 1 Ixlīcānaꞌ huāꞌmāꞌ tachihuīn: Palh chāꞌtin lītaxtucuꞌtun ixmaktakaꞌlhnaꞌcaꞌn tī taꞌaꞌkaꞌīꞌ, huāꞌmāꞌ chiꞌxcuꞌ lacasquiꞌn tascujūt tū tze.
\v 2 Ixlacasquiꞌnca tī maktakaꞌlhnaꞌn jā maktin catlahualh tū tzē nalīꞌaꞌksaꞌncan. Xmān chāꞌtin ixpuscāt cakaꞌlhīlh. Līlacatejtin catahuiꞌlalh. Xlaꞌ nalīhuiꞌlī jā natlahua tū jā tze. Tzeya chiꞌxcuꞌ cahuanli xlaꞌ ē tze cahuanli ixtalacapāstacniꞌ. Tzej cacāmānūlh āꞌmakapitzīn na ixchic. Tzej camāsuꞌyulh.
\v 3 Jā cakoꞌtli. Jā cacātucsli āꞌmakapitzīn. Pōꞌktu quilhtamacuj cacāpāxquīꞌlh. Jā palaj casītzīꞌlh. Jā calīpāhuanli ixtumīn.
\v 4 Tzej camāpaꞌksīniꞌlh na ixchic. Ixcamanaꞌ catakexmatniꞌlh ē catalakachiꞌxcuhuīꞌlh.
\v 5 Palh chiꞌxcuꞌ jāla māpaꞌksīniꞌn na ixchic, ¿chī nacālīmaktakaꞌlha tī taꞌaꞌkaꞌīꞌniꞌ ixtachihuīn Dios?
\v 6 Jāla catihuiꞌlīca namaktakaꞌlhnaꞌn tī āꞌcus aꞌkaꞌīꞌlh. Kaꞌtlaꞌ nalīmakcaꞌtzī ē chuntzaꞌ naꞌaꞌkspula xlaꞌ chī aꞌkspulanīꞌt skāhuīꞌniꞌ.
\v 7 Ixlacasquiꞌnca maktakaꞌlhnaꞌ tzeya chiꞌxcuꞌ cahuanli ē hasta tī jā taꞌaꞌkaꞌīꞌ natalakachiꞌxcuhuīꞌ. Chuntzaꞌ jā tū catilīꞌaꞌksaꞌnca ē jā catitlajalh skāhuīꞌniꞌ.
\s Chī nala diácono
\p
\v 8 Diácono, ūꞌtzaꞌ tī namaktāyanaꞌn nac templo. Nā ixlacasquiꞌnca diácono lacatejtin catahuīꞌlh. Diácono jā catlahualh aꞌktuꞌ ixlacan ē jā cakaꞌchīlh. Jā capuhuanli nakaꞌlhī tumīn tū jā ixlaꞌ.
\v 9 Tze cahuanli ixtalacapāstacniꞌ ē tzej cakexmatli ixlīpōꞌktu tū Dios quincāmāsuꞌyuniꞌn naꞌaꞌkaꞌīꞌyāuj.
\v 10 Ixlacasquiꞌnca pūla nacaꞌtzīcan chī latlāꞌhuan. Palh jā tū tū nalīꞌaꞌksaꞌncan catūhuālh, aꞌcxniꞌ tzē natahuiꞌla ixlīdiácono.
\v 11 Puscan, nā ixlacasquiꞌnca lacatejtin catalatāꞌkchokolh. Jā cataꞌaꞌksaꞌnli āꞌchāꞌtin. Jā catakaꞌchīlh. Pōꞌktu quilhtamacuj catamākentaxtūlh ixtascujūtcaꞌn.
\v 12 Chiꞌxcuꞌ tī diácono cakaꞌlhīlh xmān chāꞌtin ixpuscāt. Tzej camāpaꞌksīniꞌlh na ixchic ē catakexmatniꞌlh ixlacstīn.
\v 13 Tī tzej mākentaxtū ixlīdiácono, ūꞌtzaꞌ ixlīpōꞌktucaꞌn talakachiꞌxcuhuīꞌ. Xlaꞌ jā catijicuaꞌnli nahuan tapaꞌksīniꞌ Jesucristo.
\s Tū aꞌkaꞌīꞌyāuj
\p
\v 14 Chuntzaꞌ iclītzoꞌknuniꞌmāꞌn masqui icpuhuan palaj naꞌicaꞌnāchaꞌ.
\v 15 Masqui naꞌictamakapalī, chuhuaꞌj caꞌtzīyaꞌ chī ixlacasquiꞌnca nalītahuiꞌlayāuj quilīpōꞌktucaꞌn tī aꞌkaꞌīꞌniꞌyāuj ixtachihuīn Dios. Quinaꞌn huaꞌchi ixtemplo Dios tī pōꞌktu quilhtamacuj huīꞌlh. Quinaꞌn lītāyayāuj tū ixlīcānaꞌ ixpālacata Jesucristo.
\v 16 Caꞌtzīyāuj tū aꞌkaꞌīꞌyāuj, ūꞌtzaꞌ jāla caꞌtzīkōꞌcan. Ūꞌtzaꞌ huāꞌmāꞌ tū aꞌkaꞌīꞌyāuj:
\q Dios lītaxtulh chāꞌtin chiꞌxcuꞌ tī huanican Jesús.
\q Espíritu Santo tzej līmāsuꞌyulh tze xlaꞌ.
\q Ángeles talaktzīꞌlh.
\q Līꞌaꞌkchihuīnaꞌnca calhāxcuhuālh makatnaꞌ nac cāꞌlacchicniꞌ.
\q Tī xalanīꞌn cāꞌquilhtamacuj taꞌaꞌkaꞌīꞌlh.
\q Lēꞌnca nac aꞌkapūn.
\c 4
\s Tī natataxtutāya na ixtej Dios
\p
\v 1 Espíritu Santo tzej huan namin aꞌktin quilhtamacuj aꞌcxniꞌ āꞌmakapitzīn natamakxteka tū taꞌaꞌkaꞌīꞌlh. Natastālaniꞌ tī taꞌaꞌkskāhuīꞌniꞌn ē natakexmata tū tamāsuꞌyumāꞌnalh īꞌscujnuꞌnīꞌn skāhuīꞌniꞌ.
\v 2 Chiꞌxcuhuīꞌn tī tamāsuꞌyu chuntzaꞌ tatlahua aꞌktuꞌ ixlacancaꞌn ē jā tahuan tū ixlīcānaꞌ. Jātzaꞌ tamakcaꞌtzī palh jā tze tū tatlahuamāꞌnalh. Xlacaꞌn huaꞌchi tanīhuaꞌnanīꞌt tū talīmakcaꞌtzīniꞌn.
\v 3 Xlacaꞌn tamāsuꞌyu jā tze palh natatamakaxtoka ē jā tze palh natahuaꞌ xtum līhuaꞌ. Dios quincāmaxquīꞌn kempālhūhuaꞌ līhuaꞌ tū nahuaꞌyāuj. Xmān pūla namāstāꞌyāuj tapāxcatcaꞌtzīn quinaꞌn tī aꞌkaꞌīꞌniꞌyāuj ixtachihuīn Dios.
\v 4 Ixlīpōꞌktu tū Dios tlahualh, ūꞌtzaꞌ tze ē quinaꞌn jāla catihuanui palh jā tze. Namaktīniꞌnāuj ē namaxquīꞌyāuj tapāxcatcaꞌtzīn Dios.
\v 5 Chuntzaꞌ tze ixpālacata ixtachihuīn Dios quincāmāsuꞌyuniꞌyān pōꞌktu tze aꞌcxniꞌ maxquīꞌyāuj tapāxcatcaꞌtzīn Dios.
\s Chī nala tī natāꞌscuja Jesucristo
\p
\v 6 Palh chuntzaꞌ nacāmāsuꞌyuniꞌyaꞌ tāꞌtimīn tī taꞌaꞌkaꞌīꞌniꞌ ixtachihuīn Dios, nalītaxtuyaꞌ xatze īꞌscujniꞌ Jesucristo. Āꞌchulāꞌ naꞌaꞌkaꞌīꞌyaꞌ ixpālacata tū māsuꞌyupāꞌt ē tū stālaniꞌpāꞌt.
\v 7 Jā cuenta catlahuaꞌ cuentos tū xmān xalaꞌ nac cāꞌquilhtamacuj tū jā tū ixtapalh. Cuenta catlahuaꞌ tū Dios lacasquiꞌn.
\v 8 Aꞌcxniꞌ natlahuayaꞌ ejercicio, ūꞌtzaꞌ namaktāya mimacniꞌ. Āꞌchulāꞌ xatze natlahuayaꞌ ixtalacasquiꞌnīn Dios. Ūꞌtzaꞌ maktāya milīstacnaꞌcaꞌn tzamāꞌ nac cāꞌquilhtamacuj ē nā maktāya milatamatcaꞌn tū jā catilaksputli.
\v 9 Ixlīcānaꞌ huāꞌmāꞌ tachihuīn ē ixlacasquiꞌnca ixlīpōꞌktucaꞌn nataꞌaꞌkaꞌīꞌ.
\v 10 Quinaꞌn aꞌkaꞌīꞌniꞌyāuj Dios tī pōꞌktu huīꞌlh ē ūꞌtzaꞌ palhaꞌ līscujāuj ē cālīpātīniꞌnāuj tī quincātalakapalayān. Xlaꞌ ūꞌtzaꞌ ixMakapūtaxtūnuꞌcaꞌn ixlīpōꞌktucaꞌn tachiꞌxcuhuīꞌt masqui tzē nacāmakapūtaxtūcan xmān tī taꞌaꞌkaꞌīꞌ.
\p
\v 11 Chuntzaꞌ namāpaꞌksīyaꞌ ē namāsuꞌyuꞌyaꞌ tū icmacamaxquīꞌyān.
\v 12 Jā catitamakxtekti nalīlakmakaꞌncaꞌnaꞌ milīkaꞌhuaꞌcha. Tzej calatāꞌkchoko ē chuntzaꞌ ixlīpōꞌktucaꞌn tī taꞌaꞌkaꞌīꞌ natamakscaꞌtxtuyān. Cahuaꞌnti xmān tū tze ē catlahuaꞌ xmān tū tze. Cacāpāxquiꞌ ixlīpōꞌktucaꞌn tachiꞌxcuhuīꞌt. Tzej caꞌaꞌkaꞌiꞌ ē tze calalh mintalacapāstacniꞌ.
\v 13 Līhuan jānaꞌj icaꞌnāchaꞌ natanūniꞌyaꞌ nalīkelhtahuaꞌkayaꞌ ixtachihuīn Dios jā takēstokcan. Calīꞌaꞌkchihuīnaꞌ ixtachihuīn Dios ē camāꞌsuꞌyuꞌ.
\v 14 Jā tipātzaꞌnkāyaꞌ tzamāꞌ talakalhuꞌmān tū maxquīꞌcanīꞌtaꞌ aꞌcxniꞌ tāꞌcpūhuiꞌlīn ixmacancaꞌn maktakaꞌlhnaꞌnīꞌn aꞌcxniꞌ huanicaꞌ tū mintascujūt nahuan.
\p
\v 15 Pōꞌktu quilhtamacuj cuenta catlahuaꞌ huāꞌmāꞌ tū ictzoꞌknuniꞌnīꞌtaꞌn ē pōꞌktu quilhtamacuj catanūniꞌ mākentaxtūkōꞌyaꞌ. Chuntzaꞌ ixlīpōꞌktucaꞌn tachiꞌxcuhuīꞌt tzē natalaktzīꞌn lakalīyān āꞌchulāꞌ tzej tlahuapāꞌt ixtalacasquiꞌnīn Dios.
\v 16 Cuenta catlahuaꞌ tū tlahuaꞌyaꞌ ē tū māsuꞌyuꞌyaꞌ. Chuntzaꞌ naꞌaꞌkapūtaxtuyaꞌ ē nā nataꞌaꞌkapūtaxtu tī takexmatniꞌyān.
\c 5
\s Chī natalīlatāꞌkchoko tī taꞌaꞌkaꞌīꞌ
\p
\v 1 Jā tilacaquilhnīyaꞌ chāꞌtin kōluꞌ. Xmān camaxquiꞌ talacapāstacniꞌ huaꞌchi xlaꞌ mintātaꞌ. Tī kaꞌhuaꞌchacus camaxquiꞌ talacapāstacniꞌ huaꞌchi mintāꞌtin.
\v 2 Chuntzaꞌ chāꞌtin puscāt tī lēꞌn quilhtamacuj camaxquiꞌ talacapāstacniꞌ huaꞌchi mintzīꞌ, ē tī tzuꞌmaꞌjātcus huaꞌchi mintāꞌtin, ē jā ticātlahuaniꞌyaꞌ tū jā tze xlacaꞌn.
\p
\v 3 Nalakachiꞌxcuhuīꞌyaꞌ tī nīmakaꞌncanīꞌttzaꞌ tī jā kaꞌlhī tī namaktakaꞌlha.
\v 4 Palh kaꞌlhīcus ixkaꞌhuaꞌcha o ixtāꞌnat, ixlacasquiꞌnca xlacaꞌn natamaktakaꞌlha tī nīmakaꞌncanīꞌttzaꞌ. Chuntzaꞌ natalīscaꞌta ixtascujūtcaꞌn ixpālacata ixtalakapasniꞌcaꞌn. Chuntzaꞌ lītasuꞌyu takexmatniꞌ ixtachihuīn Dios. Chuntzaꞌ nacālīxoko tī tamakastacli. Ūꞌtzaꞌ nalīpāxuhua Dios.
\v 5 Tī nīmakaꞌncanīꞌttzaꞌ ē ixlīmān huīꞌlh ē tī jā kaꞌlhī tī namaktakaꞌlha, xlaꞌ kaꞌlhīmāꞌlh tū Dios namaxquīꞌ. Cāꞌtzīꞌsniꞌ ē cāꞌcuhuīniꞌ jā namakxteka naꞌorarlīniꞌ Dios na ixchic ē nā jā takēstokcan.
\v 6 Tī nīmakaꞌncanīꞌttzaꞌ ē xmān paxialhnaꞌn ē tlahua tū ūꞌtzaꞌ lacasquiꞌn, huāꞌmāꞌ huaꞌchi xanīn na ixlacatīn Dios, masqui lakahuancus.
\v 7 Pōꞌktu tzamāꞌ nā nacāmāsuꞌyuniꞌyaꞌ. Chuntzaꞌ tī ixcānīmakaꞌncanīꞌttzaꞌ jā catatlahualh tū nacālīꞌaꞌksaꞌncan.
\v 8 Ixlacasquiꞌnca nacāmaktakaꞌlha ixtalakapasnīꞌn ē āꞌchulāꞌ ixlacasquiꞌnca nacāmaktakaꞌlha tī tahuiꞌlānaꞌlh na ixchic. Palh jā nacāmaktakaꞌlha, ūꞌtzaꞌ kelhtatzēꞌka tū aꞌkaꞌīꞌnīꞌt. Āꞌchulāꞌ tze āꞌchāꞌtin tī jā aꞌkaꞌīꞌ.
\p
\v 9 Xmān catzoꞌkti nac lista tī nīmakaꞌncanīꞌttzaꞌ palh kaꞌlhītzaꞌ tuꞌtumpuꞌxam cāꞌta ē xmān chāꞌtin ixkōluꞌ ixkaꞌlhīnīꞌt.
\v 10 Nā ixlacasquiꞌnca nalakapascan palh tzeya puscāt xlaꞌ ixpālacata tlahuanīꞌt tū tze. Palh tzej cāmakastacli ixcamanaꞌ ē palh ixcāmāhuīꞌ na ixchic tī tatapaꞌksīniꞌ Jesús, tzē natzoꞌkcan ixtacuhuīniꞌ. Palh mākentaxtūlh catūxcuhuālh tascujūt masqui tū macstiꞌnaꞌj ē palh ixcāmaktāya tī tapātīniꞌn, tzē natzoꞌkcan. Palh tī nīmakaꞌncanīꞌttzaꞌ pōꞌktu quilhtamacuj putza chī natlahua tū tze, catzoꞌkuiꞌlīca.
\p
\v 11 Tī ixcānīmakaꞌncanīꞌt ē tī jānaꞌj lhūhuaꞌ lēꞌn ixcāꞌta, jā caticātzoꞌkca. Āꞌlīstān nacātlaja ixtalacapāstacniꞌcaꞌn. Natataxtutāya na ixtej Dios ē chuntzaꞌ natalītamakaxtokcuꞌtumpala.
\v 12 Chuntzaꞌ nacāmakapātīnīncan ixpālacata jā tamākentaxtū chī tatzuculh.
\v 13 Tī ixcānīmakaꞌncanīꞌt ē tī jānaꞌj lhūhuaꞌ lēꞌn ixcāꞌta natascaꞌta natalatāꞌkchoko aꞌkatunuꞌ chic ē natalhquititniꞌn. Āꞌchulāꞌ natala ē nataꞌaꞌksaꞌnanīniꞌn ē natatanū aꞌntzaꞌ jā jā ixcuentacaꞌn. Nā natahuan tū jā minīꞌniꞌ.
\v 14 Ūꞌtzaꞌ iclīhuaniyān catatamakaxtokpālh tī ixcānīmakaꞌncanīꞌt ē tī jānaꞌj lhūhuaꞌ lēꞌn ixcāꞌta. Catakaꞌlhīpālh ixcamanaꞌcaꞌn ē catamaktakaꞌlhli na ixchiccaꞌn. Chuntzaꞌ tī ixtāꞌlāquiclhlaktziꞌcaꞌn jā tacaꞌtzī tū nacātalīꞌaꞌksaꞌnan.
\v 15 Āꞌmakapitzīn tī ixcānīmakaꞌncanīꞌt tataxtutāyalhtzaꞌ na ixtej Dios ē tastālaniꞌlh skāhuīꞌniꞌ.
\p
\v 16 Palh chāꞌtin aꞌkaꞌīꞌ ē palh huīꞌlh ixtalakapasniꞌ tī nīmakaꞌncanīꞌttzaꞌ, camaktāyalh. Chuntzaꞌ tī tatakēstoka nac templo xmān nacāmaktāya tī ixcānīmakaꞌncanīꞌt ē tī jā takaꞌlhī nūn chāꞌtin tī nacāmaktakaꞌlha.
\p
\v 17 Cacālakachiꞌxcuhuīꞌca tī takaꞌlhī līmāpaꞌksīn nac templo ē tzej tamāpaꞌksīniꞌn. Āꞌchulāꞌ cacālakachiꞌxcuhuīꞌca xlacaꞌn ē jā āꞌchāꞌtin. Āꞌchulāꞌ cacālakachiꞌxcuhuīꞌca xlacaꞌn tī taꞌaꞌkchihuīnaꞌn ē tamāsuꞌyu ixtachihuīn Dios.
\v 18 Chuntzaꞌ tatzoꞌkniꞌ na ixtachihuīn Dios: “Jā catimākelhnuꞌ ixbozal huācax aꞌcxniꞌ lacchiꞌntamāꞌlh trigo tū tlahuacan harina. Namakxtekaꞌ nahuaꞌ.” Nā chuntzaꞌ tatzoꞌkniꞌ: “Tasācuaꞌ natlaja ixquilhtamacuj.”
\p
\v 19 Xmān chāꞌtin jāla catiꞌaꞌksaꞌnīniꞌlh tī māpaꞌksīniꞌn nac templo. Ixlacasquiꞌnca chāꞌtuꞌ o chātuꞌtun tī tacaꞌtzī ixcuenta ē tī natahuan.
\v 20 Palh catīxcuhuālh xlacaꞌn jā makxtekcuꞌtun tū jā tze, calacaquilhnīca na ixlacatīncaꞌn ixlīpōꞌktucaꞌn tī taꞌaꞌkaꞌīꞌ. Chuntzaꞌ āꞌmakapitzīn natajicuaꞌn.
\v 21 Icmācuentalīniꞌyān na ixlacatīncaꞌn Dios ē Jesucristo ē na ixlacatīncaꞌn ángeles tī Dios cālacsacnīꞌt. Icmācuentalīniꞌyān namākentaxtūyaꞌ huāꞌmāꞌ tū ictzoꞌknīꞌt. Jā timakxteka xtum natlahua chāꞌtin masqui minamigo. Ixlīpōꞌktucaꞌn lacxtim catakexmatniꞌlh.
\v 22 Jā palaj naꞌaꞌcpūhuiꞌlīyaꞌ mimacan āꞌchāꞌtin tī nalacsaca natāꞌscuja Dios. Pūla nalacapāstacaꞌ palh tzej namākentaxtū ixtascujūt ixpālacata huiꞌx nalīpinaꞌ cuenta. Huiꞌx calīhuiꞌliꞌ natlahuaꞌyaꞌ xmān tū tze.
\p
\v 23 Chuhuaꞌj jātzaꞌ xmān xcān catihuaꞌ. Macstiꞌnaꞌj vino ixlaꞌ uva nahuaꞌyaꞌ ixpālacata mimpān ē ixpālacata maklhūhuaꞌ taꞌjatatlaꞌyaꞌ.
\p
\v 24 Calacapāstacti chī ixcuentacaꞌn makapitzīn tachiꞌxcuhuīꞌt tzej cācaꞌtzīniꞌcan masqui jā tī cālīꞌaꞌksaꞌn. Ixcuentacaꞌn āꞌmakapitzīn jā tī tacaꞌtzī hasta aꞌcxniꞌ naputzānaꞌnīkōꞌcan.
\v 25 Nā chuntzaꞌ tatasuꞌyu ixlītzecaꞌn tachiꞌxcuhuīꞌt. Masqui jā palaj talītasuꞌyu ixlītzecaꞌn, jāla tamātzēꞌka pōꞌktu quilhtamacuj.
\c 6
\p
\v 1 Ixlīpōꞌktucaꞌn xatastāꞌmaka tasācuaꞌ catalakachiꞌxcuhuīꞌlh ixtēcuꞌcaꞌn ixpālacata jā tī chāꞌtin nalīchihuīnaꞌn tū jā tze ixtacuhuīniꞌ Dios ē tū māsuꞌyuyāuj.
\v 2 Xatastāꞌmaka tasācuaꞌ jā catilakmakaꞌlh ixtēcuꞌ tī aꞌkaꞌīꞌ. Ixchāꞌtuꞌcaꞌn tataxtulh lītāꞌtimīn. Ūꞌtzaꞌ āꞌchulāꞌ tzej nalīscuja tasācuaꞌ. Chuntzaꞌ cāmaktāyamāꞌlh tī Dios cāpāxquīꞌ ē taꞌaꞌkaꞌīꞌ ixtachihuīn. Ūꞌtzaꞌ huāꞌmāꞌ namāsuꞌyuꞌyaꞌ ē tliꞌhuiꞌqui nahuaꞌnaꞌ.
\s Tū nalīkoꞌxamixa
\p
\v 3 Palh chāꞌtin xtum namāsuꞌyu ē jā chuntzaꞌ chī māsuꞌyulh Māpaꞌksīniꞌ Jesucristo, ē palh jā māsuꞌyu ixlacasquiꞌnca stālaniꞌcan Dios,
\v 4 huāꞌmāꞌ chiꞌxcuꞌ kaꞌtlaꞌ makcaꞌtzī ē jā tū caꞌtzī. Xmān lītlajacuꞌtun ūꞌtzaꞌ ixtachihuīn ē cālītaꞌlāhuani. Chuntzaꞌ tzucucan lālīquiclhlaktzīꞌncan ē lālīsītzīꞌniꞌcan. Tzucucan lālakapalacan ē puhuancan lacxtim jā tze āꞌmakapitzīn.
\v 5 Talālītāꞌchihuīnaꞌn ixpālacata jā tze ixtalacapāstacniꞌcaꞌn ē jātzaꞌ talakapasa tū ixlīcānaꞌ. Xlacaꞌn tapuhuan āꞌchulāꞌ ricuj natalīhuan palh natastālaniꞌ Dios. Cacātapānuꞌniꞌ xlacaꞌn.
\v 6 Tī stālaniꞌ Dios ē līpāxuhua, ūꞌtzaꞌ ricujtzaꞌ līhuanīꞌt.
\v 7 Aꞌcxniꞌ lacatuncuhuīꞌuj, jā tū līmiuj nac cāꞌquilhtamacuj ē jā tū catilēꞌuj aꞌcxniꞌ nanīyāuj.
\v 8 Palh cākaꞌlhīyāuj quilīhuaꞌcaꞌn ē quiluꞌxuꞌcaꞌn, ē ūꞌtzaꞌ nalīpāxuhuayāuj.
\v 9 Tī putza chī ricuj nalīhuan, xlaꞌ nalīlaktzīꞌncan ē jāla catitlajalh. Lhūhuaꞌ catūhuālh tū cālacasquiꞌn huaꞌchi ixaꞌksuꞌj nahuan tū nachiꞌpa ē jā catiꞌaꞌkapūtaxtulh. Āꞌchulāꞌ natlahua tū xmān ixtalacasquiꞌnīn hasta pāxcat nalīlakōꞌ ē nasputa.
\v 10 Ixlītzucuniꞌ ixlīpōꞌktu tū jā tze, ūꞌtzaꞌ kaꞌlhīcuꞌtuncan tumīn. Āꞌmakapitzīn āꞌchulāꞌ talacasquiꞌnli ixtumīncaꞌn ē tataxtutāyalh na ixtej Dios. Chuntzaꞌ talīpātīniꞌlh.
\s Calītāyaꞌ tū aꞌkaꞌīꞌyaꞌ
\p
\v 11 Huiꞌx tāꞌtapaꞌksīyaꞌ Dios. Ūꞌtzaꞌ calītapānuꞌniꞌ ixlīpōꞌktu huāꞌmāꞌ tū jā tze. Calīhuiꞌliꞌ chī tzē nalīmāsuꞌyuyaꞌ. Castālaniꞌ Dios. Caputza chī āꞌchulāꞌ nalīꞌaꞌkaꞌīꞌyaꞌ ē napāxquīꞌniꞌnaꞌ. Catāyaniꞌ tū naꞌaꞌkspulayān. Calakalhuꞌmanīniꞌnti.
\v 12 Catanūniꞌ līpalhaꞌ ē calītāyaꞌ tū aꞌkaꞌīꞌyāuj. Camaktīniꞌ xasāstiꞌ milatamat tū jā catilaksputli. Dios lacsacniꞌ ē huiꞌx huaꞌnīꞌtaꞌ na ixlacatīncaꞌn tachiꞌxcuhuīꞌt aꞌkaꞌīꞌniꞌnīꞌtaꞌ ixtachihuīn Dios.
\v 13 Na ixlacatīn Dios tī cāhuiꞌlīlh ixlīpōꞌktu tū aꞌnan, icmāpaꞌksīyān. Ē na ixlacatīn Jesucristo tī māsuꞌyulh tū ixlīcānaꞌ na ixlacatīn Poncio Pilato, icmāpaꞌksīyān.
\v 14 Icmāpaꞌksīyān cakexpaꞌtniꞌ tzej tū icmāsuꞌyuniꞌyān hasta aꞌcxniꞌ namimpala quiMāpaꞌksīniꞌcaꞌn Jesucristo. Jā camakxtekti nalakpalīcan nūn macstiꞌnaꞌj tū iclīmāpaꞌksīnīꞌtaꞌn. Jā tū catlahuaꞌ tū tzē nalīꞌaꞌksaꞌncaꞌnaꞌ.
\v 15 Aꞌcxniꞌ Dios nahuan, aꞌcxniꞌ namimpala Jesucristo. Xasicuaꞌlanālanīꞌt Dios. Xlaꞌ māpaꞌksīniꞌn. Xlaꞌ Xapuxcuꞌ Rey tī cāmāpaꞌksī ixlīpōꞌktucaꞌn xanapuxcuꞌnuꞌ ē xlaꞌ cāmāpaꞌksī ixlīpōꞌktucaꞌn tī tamāpaꞌksīniꞌn nac cāꞌquilhtamacuj.
\v 16 Xmān Dios jā catisputli. Palhaꞌ xkaka jā huiꞌlachaꞌ ē jā tī chāꞌtin tzē catilaktalacatzunaꞌjīlh. Jā tī laktzīꞌnīꞌt ixpālacata jāla laktzīꞌncan. Ixlīpōꞌktucaꞌn catalakachiꞌxcuhuīꞌlh. Cacāmāpaꞌksīkōꞌlh pōꞌktu quilhtamacuj. Amén.
\p
\v 17 Tī lacricujnuꞌ nac tzamāꞌ cāꞌquilhtamacuj nacāmāpaꞌksīyaꞌ jā kaꞌtlaꞌ catamakcaꞌtzīlh ē jā catalīpāhuanli ixtumīncaꞌn tū nasputa. Catalīpāhuanli Dios tī quincāmaxquīꞌyān ixlīpōꞌktu tū maclacasquiꞌnāuj nalīpāxuhuayāuj.
\v 18 Nacāmāpaꞌksīyaꞌ lacricujnuꞌ catatlahualh tū tze. Tī natatlahua lhūhuaꞌ tū xatze ē nacālakalhuꞌman āꞌmakapītzīn, ūꞌtzaꞌ rico nalīhuan masqui jā takaꞌlhī ixtumīncaꞌn. Cacāmaxquīꞌlh āꞌmakapitzīn tū takaꞌlhī ē jā catatampiꞌlhīniꞌlh.
\v 19 Chuntzaꞌ natakaꞌlhī ixlīricujcaꞌn nac cāꞌquilhtamacuj tū namin ē natakaꞌlhī xasāstiꞌ ixlatamatcaꞌn tū jā catilaksputli.
\s Pablo āꞌxmān līmacamaxquīꞌlh Timoteo
\p
\v 20 Timoteo, tzej cuenta catlahuaꞌ tū macamaxquīꞌcaꞌnīꞌtaꞌ. Jā tikexpaꞌtniꞌyaꞌ tī xmān chihuīnaꞌn ē jā tū huan. Jā cuenta titlahuaꞌyaꞌ chī talālītāꞌchihuīnaꞌn tī tapuhuan āꞌchulāꞌ tacaꞌtzī.
\v 21 Āꞌmakapitzīn chuntzaꞌ tatlahualh ē ūꞌtzaꞌ talītaxtutāyalh na ixtej Dios. Dios casicuaꞌlanātlahuaniꞌ. Amén.