\id 2TI
\h 2 Timoteo
\toc1 2 Timoteo
\mt 2 Timoteo
\c 1
\s Pablo tzoꞌknuniꞌlh Timoteo
\p
\v 1 Quit Pablo, ixapóstol Jesucristo chuntzaꞌ chī ixtalacasquiꞌnīn Dios. Quimacamilh naꞌiclīmāsuꞌyu chī natalīkaꞌlhī ixlatamatcaꞌn tū jā catilaksputli ixlīpōꞌktucaꞌn tī tatāꞌtapaꞌksī Jesús, chuntzaꞌ chī huanli Dios.
\v 2 Timoteo, ictzoꞌknuniꞌyān huiꞌx tī huaꞌchi quinkaꞌhuaꞌcha ē icpāxquīꞌyān. Casicuaꞌlanātlahuan Dios tī xaTātaꞌ ē Jesucristo tī Māpaꞌksīniꞌ. Tzej calatapāꞌtit.
\s Līchihuīnaꞌnca ixpālacata Cristo
\p
\v 3 Icmaxquīꞌ tapāxcatcaꞌtzīn Dios tī ictāꞌscuja huaꞌchi chī ixtatāꞌscuja quinapapanaꞌ ē icmakcaꞌtzī tze quintalacapāstacniꞌ. Lakalīyān aꞌcxniꞌ icorarlīniꞌ Dios, iclacapāstacān ē icmaxquīꞌ tapāxcatcaꞌtzīn Dios mimpālacata.
\v 4 Aꞌcxniꞌ iclacapāstaca chī calhuaꞌnti aꞌcxniꞌ icmakxtekniꞌ, iclaktzīꞌncuꞌtumpalayān ē naꞌicpāxuhua.
\v 5 Iclacapāstaca chī tzej aꞌkaꞌīꞌyaꞌ. Chuntzaꞌ chu kēxtim taꞌaꞌkaꞌīꞌnīꞌt minānaꞌ Loida ē mintzīꞌ Eunice. Quit iccaꞌtzī nā huiꞌx tzej aꞌkaꞌīꞌyaꞌ.
\p
\v 6 Ūꞌtzaꞌ iclīhuanipalayān jā tipātzaꞌnkāyaꞌ mintascujūt tū icmaxquīꞌnīꞌtaꞌn aꞌcxniꞌ icaꞌcpūhuiꞌlīn quimacan.
\v 7 Espíritu Santo tū Dios quincāmaxquīꞌnīꞌtaꞌn, ūꞌtzaꞌ quincāmaktāyayān ē jā catijicuaꞌnui. Quincāmaxquīꞌyān tahuixcān ē tapāxquīꞌn. Xlaꞌ quincāmāsuꞌyuniꞌyān chī tzē natāꞌlātlahuayāuj quintalacpuhuātcaꞌn tū jā tze ē chuntzaꞌ nakaꞌlhīyāuj tze quintalacapāstacniꞌcaꞌn.
\v 8 Jā tilīmāxanaꞌnaꞌ nalīchihuīnaꞌnaꞌ ixpālacata quiMāpaꞌksīniꞌcaꞌn Jesús ē jā quintilīmāxanaꞌnaꞌ quit chī quinchīꞌcanīꞌt ixpālacata Jesús. Chuntzaꞌ chī Dios namātliꞌhuiꞌclhān, naquintāꞌlīpātīniꞌnaꞌ quit ixpālacata xatze tachihuīn.
\v 9 Dios quincāmakapūtaxtūn ē quincālacsacniꞌ ē quincālacsacxtun quinaꞌn ixlaꞌ Dios nahuanāuj. Masqui ixpuhuanāuj palh tze tū tlahuanīꞌtauj, jā ūꞌtzaꞌ Dios quincālīlacsacniꞌ. Xlaꞌ quincālacsacniꞌ chuntzaꞌ chī ixtalacasquiꞌnīn ē quincālakalhuꞌmaniꞌ. Aꞌcxniꞌ jānaꞌj ixaꞌnan cāꞌquilhtamacuj, aꞌcxniꞌ Dios quincālakalhuꞌmaniꞌ ixpālacata Jesús.
\v 10 Chuhuaꞌj Dios quincāmāsuꞌyuniꞌn ixtalakalhuꞌmān ē ūꞌtzaꞌ līmacamilhtzaꞌ quiMakapūtaxtūnuꞌcaꞌn Jesucristo. Xlaꞌ skāhuīꞌkōꞌlh ixlītliꞌhuiꞌqui līnīn. Quincāmāsuꞌyuniꞌn chī nalīkaꞌlhīyāuj xasāstiꞌ quilatamatcaꞌn tū jā catilaksputli chuntzaꞌ chī quincāmāsuꞌyuniꞌn xatze tachihuīn ixlaꞌ Jesucristo.
\p
\v 11 Dios quilacsacuiꞌlīlh quilīꞌapóstol ē quilīꞌaꞌkchihuīnaꞌ ē quilīmākelhtahuaꞌkēꞌniꞌ naꞌiccāmāsuꞌyuniꞌ xatze tachihuīn tī jā israelitas.
\v 12 Dios quilacsacuiꞌlīnīꞌt, ē ūꞌtzaꞌ iclīpātīmāꞌlh tū quinaꞌkspula. Masqui quit ictachīꞌnīꞌt, jā iclīmāxanaꞌn chī icaꞌkaꞌīꞌniꞌ Dios ē iclīpāhuan Dios. Quit ictamacamāstāꞌniꞌlh Dios ē iccaꞌtzī xlaꞌ namaktakaꞌlha tū icmacamaxquīꞌlh hasta aꞌcxniꞌ naputzānaꞌnīkōꞌ.
\p
\v 13 Tzamāꞌ tū quit icmāsuꞌyuniꞌyān, tzej nastālaniꞌyaꞌ. Jā nataxtutāyaꞌyaꞌ tū aꞌkaꞌīꞌnīꞌtaꞌ. Napāxquīꞌniꞌnaꞌ chī Jesucristo quincāmāsuꞌyuniꞌyān.
\v 14 Tū macamaxquīꞌcaꞌnīꞌtaꞌ, ūꞌtzaꞌ tzej nalīmaktakaꞌlha ixlītliꞌhuiꞌqui Espíritu Santo tī quincātāꞌlahuīꞌlan.
\p
\v 15 Huiꞌx caꞌtzīyaꞌ ixlīpōꞌktucaꞌn xalanīꞌn nac estado Asia quintamakxtekli ē chāꞌtuꞌ xlacaꞌn cāhuanican Figelo ē Hermógenes.
\v 16 Dios cacālakalhuꞌmanli Onesíforo ē tī xalanīꞌn na ixchic. Maklhūhuaꞌ quilakmilh nac pūlāchīꞌn ē quimakapāxuīlh. Masqui quit tachīꞌn xlaꞌ jā quilīmāxanaꞌlh.
\v 17 Xmān chāꞌlh nac Roma ē xlaꞌ tzuculh quimputza hasta aꞌcxniꞌ quimaclalh.
\v 18 ¡Dios calakalhuꞌmanli aꞌcxniꞌ naputzānaꞌnīkōꞌ! Huiꞌx tzej caꞌtzīyaꞌ chī ixquincāmaktāyayān nac Efeso.
\c 2
\s Xatze īꞌsoldado Jesucristo
\p
\v 1 Huiꞌx huaꞌchi quinkaꞌhuaꞌcha, tliꞌhuiꞌqui cahuaꞌnti chuntzaꞌ chī Jesucristo quincālakalhuꞌmanān ē quinaꞌn tāꞌtapaꞌksīyāuj xlaꞌ.
\v 2 Quintachihuīn tū iccāhuanin na ixlacatīncaꞌn lhūhuaꞌ tachiꞌxcuhuīꞌt ē tū huiꞌx kexpaꞌtti, pōꞌktu huāꞌmāꞌ nacāmacamaxquīꞌyaꞌ āꞌmakapitzīn chiꞌxcuhuīꞌn tī lactze. Chuntzaꞌ xlacaꞌn tzē nā natamāsuꞌyuniꞌ āꞌmakapitzīn huampala.
\p
\v 3 Huaꞌchi xatze soldado jā lakcaꞌtzan ixmacniꞌ, chuntzaꞌ huiꞌx ixlacasquiꞌnca natāyaniꞌyaꞌ tū naꞌaꞌkspulayān ixpālacata Jesucristo.
\v 4 Tī lītanūnīꞌt ixlīsoldado jā nakaꞌlhī xtum ixnegocio tū namāmakchuyī ē nalīsītzīꞌ ixcomandante.
\v 5 Tī natanū aꞌktin nac tatuꞌjnuꞌ jāla catitlajalh ixpremio palh jā nakexmatniꞌ tū līmāpaꞌksīcanīꞌt.
\v 6 Tī huaꞌcuꞌtun tzaꞌktzaꞌ, ixlacasquiꞌnca pūla tzej nascuja nac cāꞌtacuxtu.
\v 7 Calacapāstacti tū icuaniyān ē Māpaꞌksīniꞌ namaktāyayān ē chuntzaꞌ nakexpaꞌtkōꞌyaꞌ.
\p
\v 8 Pōꞌktu quilhtamacuj calacapāstacti Jesucristo tī lacastālancuanaꞌnli ē tī īꞌxūꞌnātāꞌnat David chuntzaꞌ chī xatze tachihuīn tū iclīꞌaꞌkchihuīnaꞌn.
\v 9 Iclīꞌaꞌkchihuīnaꞌn xatze tachihuīn ixlaꞌ Jesucristo, ē ūꞌtzaꞌ quilīmakapātīnīmāꞌlh ē quilīchīꞌcanīꞌt līcāꞌn huaꞌchi chāꞌtin maknīniꞌ. Ixtachihuīn Dios jāla catimāmakchuyīnīca; pōꞌktu quilhtamacuj naꞌaꞌkchihuīnaꞌncan.
\v 10 Ūꞌtzaꞌ iclīpātī ixlīpōꞌktu tū quinaꞌkspula. Iccāpāxquīꞌ ixlīpōꞌktucaꞌn tī Dios cālacsacli ē quit iclacasquiꞌn xlacaꞌn catalīꞌaꞌkapūtaxtulh ixpālacata Jesús ē catatāꞌtahuīꞌlh Jesús jā pōꞌktu quilhtamacuj xkakanaꞌn.
\q 	
\v 11 	 Ixlīcānaꞌ huāꞌmāꞌ tachihuīn:
\q Palh natāꞌnīyāuj Cristo, nā natāꞌtahuiꞌlayāuj.
\q 	
\v 12 	 Masqui pātīniꞌnāuj nac cāꞌquilhtamacuj natāꞌmāpaꞌksīniꞌnāuj nac aꞌkapūn.
\q Palh nahuanāuj jā lakapasāuj Cristo, xlaꞌ nahuan jā quincālakapasān.
\q 	
\v 13 	 Masqui quinaꞌn jā mākentaxtūyāuj tū huanīuj, xlaꞌ mākentaxtū ixlīpōꞌktu tū quincāhuanin.
\q Xlaꞌ jāla aꞌkskāhuīꞌnin.
\s Tī tzej scuja
\p
\v 14 Huāꞌmāꞌ tū icuanin cacāmāpāstaqui tachiꞌxcuhuīꞌt ē na ixlacatīn quinDioscaꞌn līlacatejtin cacāhuaꞌniꞌ catamakxtekli talālīhuani ixpālacata tachihuīn. Ūꞌtzaꞌ xmān cāmāmakchuyī āꞌmakapitzīn tī takexmata. Jā tū līmacuan.
\v 15 Huiꞌx catanūniꞌ tzej nataxtu mintascujūt na ixlacatīn Dios huaꞌchi xatze tasācuaꞌ tī jā līmāxanaꞌn ixtascujūt. Tzej namāsuꞌyuꞌyaꞌ tū ixlīcānaꞌ ixlaꞌ Dios.
\v 16 Cacātapānuꞌniꞌ xlacaꞌn tī xmān talīchihuīnaꞌn tū jā ixlacasquiꞌnca. Āꞌchulāꞌ natamāmakchuyī tī tastālaniꞌ Dios.
\v 17 Tū tamāsuꞌyu xlacaꞌn huaꞌchi aꞌktin tziꞌtziꞌ tū jā catitzeyalh ē āꞌchulāꞌ namasa. Chāꞌtuꞌ xlacaꞌn cāhuanican Himeneo ē Fileto.
\v 18 Xlacaꞌn tataxtutāyalh na ixtej Dios ē tamāmakchuyīmāꞌnalh āꞌmakapitzīn tī taꞌaꞌkaꞌīꞌ. Tahuan talacastālancuanaꞌnlitzaꞌ nīnīꞌn ē jātzaꞌ āꞌmaktin catitalacastālancuanaꞌmpālh.
\v 19 Masqui chuntzaꞌ tamāsuꞌyu, Dios huanli nalacastālancuanaꞌncan ē ūꞌtzaꞌ jāla lakpalīcan. Chuntzaꞌ tatzoꞌkniꞌ: “Māpaꞌksīniꞌ cālakapasa tī tatāꞌtapaꞌksī xlaꞌ.” Tatzoꞌkniꞌ huampala: “Ixlīpōꞌktucaꞌn tī tahuan tatāꞌtapaꞌksī Māpaꞌksīniꞌ Jesús, ixlacasquiꞌnca natalakmakaꞌn tū jā tze.”
\p
\v 20 Aꞌktin nac kaꞌtlaꞌ chic jā xmān aꞌktin pulātu aꞌnan. Aꞌnan pulātu tū ixlaꞌ oro ē aꞌnan pulātu tū ixlaꞌ plata ē aꞌnan tiꞌyaꞌt pulātu. Āꞌmakapitzīn cāmaclacasquiꞌncan xmān aꞌcxniꞌ tlahuacan cāꞌtaniꞌ ē tiꞌyaꞌt pulātu, xlaꞌ pōꞌktu quilhtamacuj maclacasquiꞌncan.
\v 21 Tī tamakxteka tū jā tze, xlacaꞌn huaꞌchi pulātu tū āꞌchulāꞌ xatzēhuanīꞌt ē maclacasquiꞌncan xmān aꞌcxniꞌ nacālakachiꞌxcuhuīꞌ tī tamin. Makapūtaxtūnuꞌ xtum nacāhuiꞌlī xlacaꞌn ē chuntzaꞌ natala ixlaꞌ Dios ē natatāꞌscuja. Chuntzaꞌ pōꞌktu quilhtamacuj cāxniꞌj natatahuiꞌla natalakachiꞌxcuhuīꞌ Māpaꞌksīniꞌ.
\p
\v 22 Jā calaꞌt huiꞌx huaꞌchi kaꞌhuaꞌchan tī talacasquiꞌn tū jā tze. Nastālaniꞌyaꞌ tū tze. Āꞌchulāꞌ naꞌaꞌkaꞌīꞌyaꞌ ē napāxquīꞌniꞌnaꞌ huaꞌchi āꞌmakapitzīn tī tze ixtalacapāstacniꞌcaꞌn ē tī tasquiꞌniꞌ Dios cacāmaktāyalh. Līpāxuhua nacātāꞌtahuiꞌlaꞌyaꞌ xlacaꞌn.
\v 23 Jā nacākelhtīyaꞌ tī xmān talālīhuanicuꞌtun. Tī tatlahua chuntzaꞌ natatzucu talālīquilhnī.
\v 24 Tī tāꞌscujmāꞌlh Māpaꞌksīniꞌ jā camaktanūlh. Xlaꞌ cacālakalhuꞌmankōꞌlh ē camāsuꞌyulh tzej ē līlacatzucu.
\v 25 Jā calīsītzīꞌlh tī talālīhuani. Līlacatzucu cacāmāsuꞌyuniꞌlh palh jā tze tū tatlahuamāꞌnalh. Chuntzaꞌ palhāsāꞌ natatalakpalī ixtalacapāstacniꞌcaꞌn ē Dios nacāmācaꞌtzīnī tū ixlīcānaꞌ.
\v 26 Aꞌcxniꞌ natalakpalī ixtalacapāstacniꞌcaꞌn, aꞌcxniꞌ tzē nataꞌaꞌkapūtaxtu na ixaꞌksuꞌj skāhuīꞌniꞌ tī huaꞌchi ixcāchiꞌpanīꞌt ē chuntzaꞌ nacāmāpaꞌksī.
\c 3
\s Tū nala aꞌcxniꞌ nasputkōꞌ cāꞌquilhtamacuj
\p
\v 1 Icuaniyān aꞌcxniꞌ lacatzunaꞌjtzaꞌ mimāꞌlh lakuat tū namālaksputūkōꞌ tzamāꞌ cāꞌquilhtamacuj, aꞌcxniꞌ namin quilhtamacuj tū napūpātīniꞌncan.
\v 2 Tachiꞌxcuhuīꞌt jā catitalacapāstacli āꞌchāꞌtin. Natatampiꞌlhīniꞌn ē kaꞌtlaꞌ natamakcaꞌtzī. Natalakmakaꞌn āꞌmakapitzīn. Jā tze natalīchihuīnaꞌn Dios ē jā natakexmatniꞌ ixtātaꞌcaꞌn ē nūn ixtzīꞌcaꞌn. Jā natahuan tapāxcatcaꞌtzīn ē jā catitalacapāstacli Dios.
\v 3 Xlacaꞌn jā catitalakalhuꞌmanli āꞌmakapitzīn. Jā tī chāꞌtin catitamātzaꞌnkēnaꞌniꞌlh. Natalīchihuīnaꞌn tū jā ixlīcānaꞌ. Jāla catitamakxtekli ixtalacpuhuātcaꞌn ē palaj natatlahua catūxcuhuālh tū talacasquiꞌn. Jā catitalaktzīꞌncuꞌtunli tū tze.
\v 4 Nataꞌaꞌkskāhuīꞌnin ē jā cuenta catitatlahualh tū tatlahuamāꞌnalh. Jā catitamakxtekli āꞌchāꞌtin nacāmaxquīꞌ talacapāstacniꞌ. Xmān nataputza ixtalacpuhuātcaꞌn xlacaꞌn ē jā ixtalacasquiꞌnīn Dios.
\v 5 Nacālaktzīꞌncan huaꞌchi taꞌaꞌkaꞌīꞌ masqui jā catitakaꞌlhīlh lītliꞌhuiꞌqui tū Dios māstāꞌ.
\p Cacātapānuꞌniꞌ tzamāꞌ tachiꞌxcuhuīꞌt.
\v 6 Āꞌmakapitzīn tzamāꞌ tatanū nac chic ē taꞌaꞌkskāhuīꞌ puscan tī jā cuenta tatlahua. Tzamāꞌ puscan takaꞌlhī ixcuentacaꞌn ē jā tzej talacapāstacnaꞌn.
\v 7 Chu tlakaj tascaꞌtcuꞌtunkōꞌ. Jāla catitascaꞌtli tū ixlīcānaꞌ ē chī natalīꞌaꞌkapūtaxtu.
\v 8 Huaꞌchi xantilhniꞌ Janes ē Jambres tatāꞌlātlahualh Moisés, chuntzaꞌ tzamāꞌ chiꞌxcuhuīꞌn tatāꞌlātlahua tū ixlīcānaꞌ. Jā tze ixtalacapāstacniꞌcaꞌn ē jā xlīcānaꞌ taꞌaꞌkaꞌīꞌ.
\v 9 Xlacaꞌn jātzaꞌ catitalhūhuaꞌnli tī nacāstālaniꞌ ixpālacata ixlīpōꞌktucaꞌn tachiꞌxcuhuīꞌt cuenta natatlahua jā tze ixtalacapāstacniꞌcaꞌn. Chuntzaꞌ cāꞌaꞌkspulalh Janes ē Jambres.
\s Pablo macamaxquīꞌlh Timoteo tū āꞌxmān
\p
\v 10 Huiꞌx quimakscaꞌtnīꞌtaꞌ tū namāꞌsuꞌyuꞌyaꞌ ē chī nalīlatapayaꞌ. Caꞌtzīyaꞌ tū ixuīꞌlh quilītlahuat ē tū icaꞌkaꞌīꞌ. Huiꞌx laꞌktziꞌ chī līlacatzucu icmāsuꞌyulh ē chī iccāpāxquīꞌkōꞌ tachiꞌxcuhuīꞌt ē chī ictāyaniꞌnīꞌt tū quintlahuaniꞌca.
\v 11 Caꞌtzīyaꞌ chī quimātakāhuīꞌcanīꞌt ē quimakapātīnīncanīꞌt. Huiꞌx caꞌtzīyaꞌ ixlīpōꞌktu tū quinaꞌkspulalh nac cāꞌlacchicniꞌ jā cāhuanican Antioquía ē Iconio ē Listra ē chī palhaꞌ icpātīnīꞌlh. Māpaꞌksīniꞌ Dios quimakapūtaxtūkōꞌlh huāꞌmāꞌ.
\v 12 Ixlīpōꞌktucaꞌn tī tatāꞌtapaꞌksīcuꞌtun Jesucristo ē natastālaniꞌ, xlacaꞌn nacāmakapātīnīncan.
\v 13 Tī tatlahua tū jā tze ē taꞌaꞌkskāhuīꞌnincuꞌtun, āꞌchulāꞌ tatlahua. Āꞌchulāꞌ nataꞌaꞌkskāhuīꞌnin ē xlacaꞌn nacāꞌaꞌkskāhuīꞌcan.
\p
\v 14 Huiꞌx cuenta natlahuaꞌyaꞌ tū quimakscaꞌtnīꞌtaꞌ ē tū caꞌtzīyaꞌ ixlīcānaꞌ ē ūꞌtzaꞌ nastālaniꞌyaꞌ. Caꞌtzīyaꞌ tī tamāsuꞌyuniꞌn.
\v 15 Hasta milīskaꞌtaꞌ māsuꞌyuniꞌcaꞌnīꞌtaꞌ ixtachihuīn Dios. Ixtachihuīn Dios māsuꞌyuniꞌyān chī nalīꞌaꞌkapūtaxtuyaꞌ ixpālacata līpāhuaꞌnaꞌ Jesucristo.
\v 16 Dios cāmāsuꞌyuniꞌlh tachiꞌxcuhuīꞌt ē chuntzaꞌ chī cāmāsuꞌyuniꞌlh, chuntzaꞌ tatzoꞌkniꞌ na ixtachihuīn. Ixtachihuīn Dios tzē namāsuꞌyu ē tzē nacālacaquilhnī tī jā tze. Nā ixtachihuīn Dios tzē nacāmaxquīꞌ talacapāstacniꞌ ē natascaꞌta chī natatlahua tū xatze.
\v 17 Chuntzaꞌ tī tāꞌscuja Dios cāxniꞌj natahuiꞌla natlahua catūxcuhuālh tū tze.
\c 4
\p
\v 1 Icmācuentalīniꞌyān na ixlacatīn Dios ē na ixlacatīn Māpaꞌksīniꞌ Jesucristo tī namin huaꞌchi rey ē nacāputzānaꞌnīkōꞌ tī xalakahuancus ē tī xanīntzaꞌ. Jesús namimpala ē nakaꞌlhī ixlīmāpaꞌksīn nac aꞌkapūn,
\v 2 ē ūꞌtzaꞌ iclīmācuentalīniꞌyān namāsuꞌyuꞌyaꞌ ixtachihuīn Dios pōꞌktu quilhtamacuj, palh kexmatcuꞌtuncan o jā kexmatcuꞌtuncan. Nacāmāsuꞌyuniꞌyaꞌ tachiꞌxcuhuīꞌt ē nacālacaquilhnīyaꞌ tī jā tze ē nacāmaxquīꞌyaꞌ talacapāstacniꞌ tī tze. Līlacatzucu namāsuꞌyuꞌyaꞌ.
\v 3 Namin aꞌktin quilhtamacuj aꞌcxniꞌ tachiꞌxcuhuīꞌt jā catitalakatīlh tū ixlīcānaꞌ. Natamākēstoka lhūhuaꞌ mākelhtahuaꞌkēꞌniꞌnīꞌn tī natamāsuꞌyu xmān tū xlacaꞌn natakexmatcuꞌtun. Chuntzaꞌ natatlahua ixtalacasquiꞌnīncaꞌn.
\v 4 Natalītalakaspiꞌta tū ixlīcānaꞌ ē natastālaniꞌ tū xmān līchihuīnaꞌncan.
\v 5 Jā camakxtekti tū namāmakchuyīyān. Natāyaniꞌyaꞌ tū napātīniꞌnaꞌ. Tzej namāsuꞌyuꞌyaꞌ ixtachihuīn Dios ē tzej namākentaxtūyaꞌ mintascujūt.
\p
\v 6 Quit, palaj naquimacamāstāꞌcan. Talacatzunaꞌjīmāꞌlhtzaꞌ quilīnīn.
\v 7 Tzej iclīmaktāyalh tū icaꞌkaꞌīꞌ. Huaꞌchi icmāsputūlh tzamāꞌ tatuꞌjnuꞌ. Jā ictaxtutāyalh na ixtej Dios.
\v 8 Chuhuaꞌj huiꞌlachaꞌ tzamāꞌ quimpremio tū naquimaxquīꞌ Māpaꞌksīniꞌ tī tzeya juez. Xlaꞌ naquimaxquīꞌ aꞌcxniꞌ nacāputzānaꞌnīkōꞌ. Jā xmān quit naꞌickaꞌlhī quimpremio. Nā natakaꞌlhī ixlīpōꞌktucaꞌn xlacaꞌn tī tapāxquīꞌ Māpaꞌksīniꞌ ē takaꞌlhīmāꞌnalh hasta aꞌcxniꞌ namimpala.
\s Pablo squiꞌniꞌlh talakalhuꞌmān Timoteo
\p
\v 9 Calīhuiꞌliꞌ palaj naquilaktaꞌnaꞌ.
\v 10 Demas quimakxtekli ixpālacata pāxquīꞌ tū xalaꞌ nac cāꞌquilhtamacuj ē aꞌlh nac Tesalónica. Crescente aꞌlh nac Galacia ē Tito aꞌlh nac Dalmacia.
\v 11 Xmān Lucas quintāꞌlahuīꞌlh. Naputzayaꞌ Marcos ē nalītaꞌnaꞌ. Xlaꞌ tzē naquintāꞌscuja.
\v 12 Tíquico icmacāꞌlh nac Efeso.
\v 13 Aꞌcxniꞌ nataꞌnaꞌ, calīꞌtaꞌ quincapote tū icmakxteknīꞌtaꞌnchaꞌ na ixchic Carpo xalaꞌ nac Troas. Cacālīꞌtaꞌ quilibros. Jā tipātzaꞌnkāyaꞌ tzamāꞌ quincaꞌpsnapnaꞌ.
\p
\v 14 Alejandro tī līscuja līcāꞌn quintlahuaniꞌnīꞌt tū jā tze. Māpaꞌksīniꞌ namakapātīnīn chī quintlahuaniꞌnīꞌt.
\v 15 Huiꞌx cuenta catlahuaꞌ xlaꞌ ixpālacata tāꞌlātlahua tū māsuꞌyuyāuj.
\p
\v 16 Aꞌcxniꞌ pūla quilīminca na ixlacatīncaꞌn scujnīꞌn, jā tī chāꞌtin quimaktāyalh; ixlīpōꞌktucaꞌn quintamakxtekli. ¡Dios jā catitlahuaniꞌlh cuenta!
\v 17 Māpaꞌksīniꞌ quimaktāyalh ē quimāhuixcāniꞌlh. Chuntzaꞌ tzē naꞌiclīmāsuꞌyu tzej chī nalīꞌaꞌkapūtaxtucan ē tzē natakexmata ixlīpōꞌktucaꞌn tī jā israelitas. Huaꞌchi quimakapūtaxtūlh na ixquilhniꞌ león chī quimakapūtaxtūlh ixlīmāpaꞌksīncaꞌn scujnīꞌn.
\v 18 Māpaꞌksīniꞌ naquimakapūtaxtū ixlīpōꞌktu tū jā tze ē naquilēꞌn jā māpaꞌksīniꞌn nac aꞌkapūn. ¡Calakachiꞌxcuhuīꞌca pōꞌktu quilhtamacuj! Amén.
\s Saludos ē āꞌxmān tasicuaꞌlanālīn
\p
\v 19 Iccāmacāꞌniꞌyāchaꞌ saludos Prisca ē Aquila ē xalanīꞌn na ixchic Onesíforo.
\v 20 Erasto tahuīꞌlh nac Corinto ē Trófimo icmakxtekli nac Mileto ixpālacata ixtaꞌjatatla.
\v 21 Nalīhuiꞌlīyaꞌ naquilaktaꞌnaꞌ aꞌcxniꞌ jānaꞌj tzucu lonkniꞌ. Tamacāꞌniꞌyāchāꞌn saludos Eubulo ē Pudente ē Lino ē Claudia ē ixlīpōꞌktucaꞌn āꞌmakapitzīn tāꞌtimīn.
\p
\v 22 Māpaꞌksīniꞌ Jesucristo cacātāꞌaꞌn ē Dios cacāsicuaꞌlanātlahuan milīpōꞌktucaꞌn. Amén.