\id TIT
\h Tito
\toc1 Tito
\mt Tito
\c 1
\s Pablo tzoꞌknuniꞌlh Tito
\p
\v 1 Quit Pablo ē quit ixtasācuaꞌ Dios ē quit ixapóstol Jesucristo. Quilīhuiꞌlīca quilīꞌapóstol naꞌiccāmāsuꞌyuniꞌ tī Dios cālacsacli ē naꞌiccāmācaꞌtzīnī tū ixlīcānaꞌ. Ē ūꞌtzaꞌ nacāmaktāya natatahuiꞌla chī Dios lacasquiꞌn.
\v 2 Ē ūꞌtzaꞌ cāmācaꞌtzīnī chī natalīkaꞌlhī xasāstiꞌ ixlatamatcaꞌn tū jā catilaksputli. Aꞌcxniꞌ jānaꞌj tū ixaꞌnan huāꞌmāꞌ cāꞌquilhtamacuj, Dios huanli tzē nakaꞌlhīyāuj quilatamatcaꞌn tū jā catilaksputli. Dios jā makstin aꞌkskāhuīꞌnin.
\v 3 Aꞌcxniꞌ chilh quilhtamacuj tū Dios līlhcānalh, aꞌcxniꞌ quincāmāsuꞌyuniꞌn chī nalīkaꞌlhīyāuj quilatamatcaꞌn tū jā catilaksputli. Ūꞌtzaꞌ quimacamaxquīꞌlh ē naꞌiccāmācaꞌtzīnī āꞌmakapitzīn chuntzaꞌ chī ixtalacasquiꞌnīn Dios quiMakapūtaxtūnuꞌcaꞌn.
\v 4 Ictzoꞌknuniꞌyān huiꞌx, Tito. Huiꞌx huaꞌchi quinkaꞌhuaꞌcha ixpālacata quit icmāꞌaꞌkaꞌīꞌnīn. Catalakalhuꞌmān ē catasicuaꞌlanātlahuan Dios xaTātaꞌ ē Jesucristo quiMakapūtaxtūnuꞌcaꞌn.
\s Ixtascujūt Tito nac Creta
\p
\v 5 Icmakxtekniꞌ nac Creta natlahuakōꞌyaꞌ tū quit jāla ictlahuakōꞌlh ē nacāxtlahuaꞌyaꞌ tū sputacus. Nac aꞌkatunuꞌ cāꞌlacchicniꞌ nacāputzayaꞌ ixmaktakaꞌlhnaꞌnīꞌncaꞌn tī taꞌaꞌkaꞌīꞌ, chuntzaꞌ chī icuanin.
\v 6 Chiꞌxcuꞌ tī natanū līmaktakaꞌlhnaꞌ jā tū catitlahualh tū nalīꞌaꞌksaꞌncan. Xmān chāꞌtin ixpuscāt cakaꞌlhīlh. Ixcamanaꞌ cataꞌaꞌkaꞌīꞌniꞌlh ixtachihuīn Dios ē tzej catalatāꞌkchokolh ē jā lacxumpīn catahuanli.
\v 7 Chāꞌtin maktakaꞌlhnaꞌ ūꞌtzaꞌ īꞌscujniꞌ Dios ē xapuxcuꞌ tī taꞌaꞌkaꞌīꞌ. Jā tū līmacuan palh aꞌnan tū nalīꞌaꞌksaꞌncan. Xapuxcuꞌ jā kaꞌtlaꞌ camakcaꞌtzīlh ē jā palaj casītzīꞌlh. Jā cakaꞌchīlh ē jā cacātucsli āꞌmakapitzīn. Jā calacapāstacli xmān chī nalītlaja tumīn.
\v 8 Cacāmānūlh na ixchic tī taꞌaꞌkaꞌīꞌniꞌ Dios. Calakatīlh tū xatze ē tzej calacapāstacnaꞌnli. Ē tzeya chiꞌxcuꞌ cahuanli ē catlahualh ixtalacasquiꞌnīn Dios. Calīhuiꞌlīlh jā natlahua tū jā tze.
\v 9 Calacapāstacli tū māsuꞌyuniꞌca ē tū aꞌkaꞌīꞌyāuj. Chuntzaꞌ tzē nacāmāsuꞌyuniꞌ tū ixlīcānaꞌ tī tatāꞌlālīhuani tū aꞌkaꞌīꞌyāuj.
\p
\v 10 Līlhūhuaꞌ aꞌnan tī jā takexmatcuꞌtun tū iccāmāsuꞌyuniꞌlh. Na ixpuꞌnancaꞌn tī jā takexmatcuꞌtun lhūhuaꞌ aꞌnan israelitas ē jā lhūhuaꞌ tī jā israelitas. Xlacaꞌn tamāsuꞌyu tū jā ixlīcānaꞌ ē xmān talīchihuīnaꞌn.
\v 11 Ixlacasquiꞌnca nacāquilhchiꞌpacan ixpālacata lhūhuaꞌ tamāmakchuyīnīn hasta ixlīpōꞌktucaꞌn chī aꞌkatunuꞌ nac chic. Tamāsuꞌyu tū jā tze ē xmān tumīn tatlajacuꞌtun.
\p
\v 12 Chāꞌtin xalaꞌ nac Creta tī huaꞌchi ixaꞌkchihuīnaꞌcaꞌn huanli: “Tī xalanīꞌn nac Creta pōꞌktu quilhtamacuj taꞌaꞌkskāhuīꞌnin. Xlacaꞌn huaꞌchi animalhnaꞌ. Laktzaꞌ ixlīlhquititcaꞌn ē laktzaꞌ tahuāꞌyan.”
\v 13 Ixlīcānaꞌ chī huanli. Ūꞌtzaꞌ ixlacasquiꞌnca palhaꞌ nacāquilhnīꞌyaꞌ tī taꞌaꞌkaꞌīꞌ xalanīꞌn nac Creta. Cacāhuaꞌniꞌ jā nataꞌaꞌkaꞌīꞌ tī taꞌaꞌkskāhuīꞌnin, ē chuntzaꞌ natacāxtlahua ixtalacapāstacniꞌcaꞌn.
\v 14 Chuntzaꞌ tzej nataꞌaꞌkaꞌīꞌ tū ixlīcānaꞌ ē jā cuenta natatlahua tū xmān cāhuani israelitas. Jā cuenta natatlahua ixtamāsuꞌyuncaꞌn xlacaꞌn tī tatalakaspiꞌttāyaniꞌ tū ixlīcānaꞌ.
\p
\v 15 Na ixlacatīncaꞌn tī taꞌaꞌkaꞌīꞌ ē tze ixtalacapāstacniꞌcaꞌn, pōꞌktu tze masqui jā chuntzaꞌ chī ixtahuiꞌlatcaꞌn israelitas. Na ixlacatīncaꞌn tī jā taꞌaꞌkaꞌīꞌ, jā tū tū tze ixpālacata jā tze ixtalacapāstacniꞌcaꞌn. Jāla tacaꞌtzī chī natalacsaca tū xatze.
\v 16 Xlacaꞌn tahuan taꞌaꞌkaꞌīꞌniꞌ Dios, ē talatlāꞌhuan chī xlacaꞌn tī jā taꞌaꞌkaꞌīꞌ. Lacxumpīn xlacaꞌn ē jā takexmata. Jāla tatlahua tū tze.
\c 2
\s Tamāsuꞌyun tū ixlīcānaꞌ
\p
\v 1 Huiꞌx, tzej cacāmāsuꞌyuniꞌ tū ixlīcānaꞌ lacxtim chī māsuꞌyuniꞌcaꞌ.
\v 2 Cacāhuaꞌniꞌ lakkōluꞌn līlacatejtin natalatāꞌkchoko ē tzej natalacapāstaca tū natatlahua. Lacatejtin natalatahuiꞌla ē tzej nataꞌaꞌkaꞌīꞌ. Nacāpāxquīꞌ tachiꞌxcuhuīꞌt ē natatāyaniꞌ chī natapātīniꞌn.
\v 3 Nā cacāhuaꞌniꞌ puscan tī lēꞌn quilhtamacuj tzej natalatāꞌkchoko. Jā catitalīchihuīnaꞌnli āꞌchāꞌtin ē jā catitakaꞌchīlh. Natamāsuꞌyu tū tze.
\v 4 Chuntzaꞌ puscan tī jānaꞌj lēꞌn quilhtamacuj natamakscaꞌtxtunuꞌn chī natapāxquīꞌ ixkōluꞌcaꞌn ē ixcamanaꞌcaꞌn.
\v 5 Natamakscaꞌtxtunuꞌn chī lacatejtin natalatahuiꞌla. Tzeya puscan natahuan. Tzej natatlahua ixtascujūtcaꞌn na ixchiccaꞌn. Natalakalhuꞌman āꞌmakapitzīn. Natalakachiꞌxcuhuīꞌ ixkōluꞌcaꞌn. Palh chuntzaꞌ natatlahua, jā tī chāꞌtin nalakapala ixtachihuīn Dios.
\p
\v 6 Tzej nacāmālacapāstaquīyaꞌ camanaꞌ natascaꞌta chī jā catitatlahualh tū jā tze.
\v 7 Tzej nalatāꞌkchokoyaꞌ ē chuntzaꞌ camanaꞌ natamakscaꞌtxtuyān. Tzej camāsuꞌyuꞌ tū ixlīcānaꞌ ē jā nakelhkamānaꞌnaꞌ.
\v 8 Aꞌcxniꞌ māsuꞌyupāꞌt, cuenta natlahuaꞌyaꞌ ē jā nahuaꞌnaꞌ catūhuālh tū jā minīꞌniꞌ. Chuntzaꞌ minquiclhlaktziꞌcaꞌn namāxanaꞌn ē jāla catimaclalh tū nacālīꞌaꞌksaꞌnān.
\p
\v 9 Huiꞌxinaꞌn tī xatastāꞌmaka tasācuaꞌ cacākexpaꞌtniꞌtit ē cacālakachiꞌxcuhuīꞌtit mimpatroncaꞌn. Jā cakelhtaxtoktīniꞌntit.
\v 10 Jā catitayaꞌtit tū ixlaꞌ mimpatroncaꞌn. Līlacatejtin calatāꞌkchokotit ē jā catlahuaꞌtit tū jā tze. Chuntzaꞌ āꞌmakapitzīn natalaktzīꞌn tze chī māsuꞌyucan ixpālacata Dios tī quiMakapūtaxtūnuꞌcaꞌn.
\p
\v 11 Līmāsuꞌyulh ixtalakalhuꞌmān Dios chī macamilh Jesucristo naquincāmakapūtaxtūyān quilīpōꞌktucaꞌn tachiꞌxcuhuīꞌt.
\v 12 Huāꞌmāꞌ Jesucristo quincāmāsuꞌyuniꞌyān chī namakxtekāuj ixlīpōꞌktu tū Dios jā lakatī. Tū talacasquiꞌn tī xalanīꞌn nac cāꞌquilhtamacuj, ūꞌtzaꞌ jā tze ē Dios jā lakatī. Ūꞌtzaꞌ namakxtekāuj. Nā Jesucristo quincāmāsuꞌyuniꞌyān chī līlacatejtin natahuiꞌlayāuj ē chī tzej nalacapāstacāuj ē chī namākentaxtūyāuj ixtalacasquiꞌnīn Dios nac cāꞌquilhtamacuj.
\v 13 Chuntzaꞌ ixlacasquiꞌnca nalatāꞌkchokoyāuj līhuan kaꞌlhīmāꞌnauj quiMakapūtaxtūnuꞌcaꞌn Jesucristo. Aꞌcxniꞌ namin ixquilhtamacuj Jesucristo, kaꞌtlaꞌ quilhtamacuj nahuan ē tzēhuanīꞌt ē natasuꞌyu īꞌxkakanaꞌ Dios.
\v 14 Huāꞌmāꞌ Jesucristo, ūꞌtzaꞌ tī ixaꞌcstu tamacamāstāꞌlh nanī ē chuntzaꞌ naquincālīmakapūtaxtūyān. Chuntzaꞌ xatze nahuanāuj na ixlacatīn Dios ē natapaꞌksīniꞌyāuj Dios. Chuntzaꞌ naputzayāuj chī nalīmakapāxuīyāuj Dios.
\p
\v 15 Pōꞌktu huāꞌmāꞌ, Tito, nacāmāsuꞌyuniꞌyaꞌ xalanīꞌn nac Creta. Huiꞌx huaꞌchi xapuxcuꞌ, ē ūꞌtzaꞌ nacālīmaktāyaꞌyaꞌ tī taꞌaꞌkaꞌīꞌ ē nā nacāquilhnīꞌyaꞌ tī jā tamākentaxtū. Jā namakxtekaꞌ nalakmakaꞌncan mintachihuīn.
\c 3
\s Ixtascujūtcaꞌn tī taꞌaꞌkaꞌīꞌ
\p
\v 1 Xlacaꞌn tī taꞌaꞌkaꞌīꞌ, cacāmālacapāstaquiꞌ chī ixlacasquiꞌnca natalakachiꞌxcuhuīꞌ gobierno ē āꞌmakapitzīn tī tamāpaꞌksīniꞌn. Natakexmatniꞌ ē natalīhuiꞌlī nacāmaktāya aꞌcxniꞌ tatlahuamāꞌnalh tū tze.
\v 2 Cacāhuaꞌniꞌ jā nataꞌaꞌksaꞌn āꞌchāꞌtin. Jā natalālīsītzīꞌniꞌ. Natalakalhuꞌman ē nacālakachiꞌxcuhuīꞌ ixlīpōꞌktucaꞌn tachiꞌxcuhuīꞌt masqui jā taꞌaꞌkaꞌīꞌ.
\p
\v 3 Nalacapāstacāuj chī quinaꞌn xapūla ixuanīꞌtauj. Jā tzej ixlacapāstacnaꞌnāuj ē lacxumpīn ixuanīꞌtauj. Ixquincātaꞌaꞌkskāhuīꞌyān. Xmān ixtlahuacuꞌtunāuj tū quimacnicaꞌn īꞌsquiꞌn. Ixtlahuatēlhayāuj tū jā tze ē ixlakcaꞌtzalacanāuj. Jā ixcālaktzīncuꞌtunāuj āꞌmakapitzīn ē nūn chāꞌtin ixquincātalaktzīꞌncuꞌtunān.
\v 4 Dios māsuꞌyulh chī cālakalhuꞌman ē cāpāxquīꞌ ixlīpōꞌktucaꞌn tachiꞌxcuhuīꞌt aꞌcxniꞌ macamilh Jesucristo naquincāmakapūtaxtūyān.
\v 5 Masqui ixtlahuayāuj tū tze, jā ūꞌtzaꞌ quinticālīmakapūtaxtūn Dios. Xlaꞌ quincāmakapūtaxtūyān ixpālacata quincāpāxquīꞌyān ē quincālakalhuꞌmanān. Espíritu Santo quincāmaxquīꞌyān xasāstiꞌ talacapāstacniꞌ. Chuntzaꞌ lītasuꞌyu huaꞌchi lakcheꞌkēꞌlh quintalacapāstacniꞌcaꞌn. Chuntzaꞌ huaꞌchi sāstiꞌ tzucunīꞌtauj ē xasāstiꞌ quilatamatcaꞌn.
\v 6 Dios jā lakcaꞌtzanli aꞌcxniꞌ quincāmaxquīꞌn Espíritu Santo. Lhūhuaꞌ quincāmaxquīꞌn ixpālacata tū tlahualh quiMakapūtaxtūnuꞌcaꞌn Jesucristo.
\v 7 Dios quincālakalhuꞌmanān ē quincāmāpānūniꞌn quincuentacaꞌn. Chuntzaꞌ tzē naquincāmaxquīꞌyān tū quilaꞌ nahuan ē ūꞌtzaꞌ tū jā catilaksputli.
\p
\v 8 Ixlīcānaꞌ tū icuaniyān. Iclacasquiꞌn līlacatejtin nacāhuaniꞌyaꞌ xlacaꞌn tī taꞌaꞌkaꞌīꞌnīꞌt Dios natalīhuiꞌlī natatlahua tū tze. Tū icuaniyān xatze ē nacāmaktāya ixlīpōꞌktucaꞌn tachiꞌxcuhuīꞌt.
\v 9 Cacātapānūꞌniꞌ tī xmān talālīkelhasquiꞌnī tū jā tū ixtapalh ē tī quinapapanaꞌcaꞌn. Nā cacātapānūꞌniꞌ tī talālīsītzīꞌniꞌ ē talālīquilhnī tū huanicuꞌtun ixlīmāpaꞌksīn Moisés. Huāꞌmāꞌ jā tū līmacuaniyān. Jā tū ixtapalh.
\p
\v 10 Maktin maktuꞌ calacaquilhnīyān chāꞌtin chiꞌxcuꞌ tī cāmāpāpitzī xlacaꞌn tī taꞌaꞌkaꞌīꞌniꞌ Dios. Palh jā cuenta tlahua chī lacaquilhnīca, catantlakaxtuca.
\v 11 Caꞌtzīyaꞌ ixlakta jā tzeya chiꞌxcuꞌ xlaꞌ. Masqui caꞌtzī laclēꞌn, āꞌchulāꞌ tlahua tū jā tze.
\s Tū xmān ixlaꞌ Tito
\p
\v 12 Aꞌcxniꞌ naꞌicmacāꞌniꞌyāchāꞌn Artemas o Tíquico, nalīhuiꞌlīꞌyaꞌ naquilaktaꞌnaꞌ nac Nicópolis. Aꞌntzaꞌ naꞌictachoko aꞌcxniꞌ lonknuꞌn.
\v 13 Cacāmaktāyaꞌ Zenas tī abogado ē Apolos ixpālacata natakaꞌlhī ixlīpōꞌktu tū tamaclacasquiꞌn natataya ixtejcaꞌn.
\v 14 Ixlīpōꞌktucaꞌn tī taꞌaꞌkaꞌīꞌniꞌ Dios catascaꞌtli chī natatlahua tū tze ē chī natamaktāya āꞌmakapitzīn tī taꞌaꞌkaꞌīꞌ ē tī tamaclacasquiꞌn catūhuālh. Chuntzaꞌ jā xalhquitit catitahuanli.
\s Saludos ē tasicuaꞌlanālīn āꞌxmān
\p
\v 15 Ixlīpōꞌktucaꞌn tī tahuiꞌlānaꞌlh huāꞌtzāꞌ tamacāꞌniꞌyān saludos. Nacāsaludarlīyaꞌ ixlīpōꞌktucaꞌn quinamigoscaꞌn tī quincāpāxquīꞌyān ixpālacata aꞌkaꞌīꞌniꞌyāuj Dios. Dios cacāsicuaꞌlanālīn milīpōꞌktucaꞌn. Amén.