\id HEB
\h Hebreos
\toc1 Hebreos
\mt Hebreos
\c 1
\s Dios quincālakmacaminīꞌtaꞌn īꞌSkaꞌtaꞌ
\p
\v 1 Lakmajtzaꞌ Dios pūlaclhūhuaꞌ cāmācaꞌtzīnīlh ixaꞌkchihuīnaꞌnīꞌn ē cāmāchihuīnīlh ixtachihuīn. Xlacaꞌn maklhūhuaꞌ tatāꞌchihuīnaꞌnli tī lakmakānīꞌn.
\v 2 Chuhuaꞌj tzamāꞌ quilhtamacuj tū āꞌxmān, Dios quincālakmacaminīꞌtaꞌn īꞌSkaꞌtaꞌ. Ūꞌtzaꞌ tī quincāmācāꞌtzīnīnīꞌtaꞌn tū Dios lacasquiꞌn nacaꞌtzīyāuj. Dios līhuiꞌlīlh īꞌSkaꞌtaꞌ ixtēcuꞌ nahuan ixlīpōꞌktu tū aꞌnan. ĪꞌSkaꞌtaꞌ Dios cāxuiꞌlīlh cāꞌquilhtamacuj ē tū aꞌnan nac aꞌkapūn. Cāxuiꞌlīlh chī ixtalacasquiꞌnīn Dios.
\v 3 ĪꞌSkaꞌtaꞌ Dios, xlaꞌ lacxtim chī Dios, lacxtim ixlīkaꞌtlaꞌ. Xlaꞌ ūꞌtzaꞌ māpaꞌksīkōꞌ tū aꞌnan nac cāꞌquilhtamacuj ē tū tahuiꞌlānaꞌlh tālhmāꞌn nac aꞌkapūn, ixpālacata xlaꞌ kaꞌlhī lītliꞌhuiꞌqui. Ūꞌtzaꞌ cāxapakōꞌlh quincuentacaꞌn. Xlaꞌ tahuīꞌlh na ixpekxtūcānaꞌj Dios nac aꞌkapūn.
\s ĪꞌSkaꞌtaꞌ Dios kaꞌlhī lītliꞌhuiꞌqui
\p
\v 4 ĪꞌSkaꞌtaꞌ maxquīꞌca kaꞌtlaꞌ lītliꞌhuiꞌqui. Xlaꞌ āꞌchulāꞌ kaꞌlhī lītliꞌhuiꞌqui ē jā ángeles. Dios maxquīꞌlh ixlītlahuat tū āꞌchulāꞌ xakaꞌtlaꞌ. Ángeles jā chuntzaꞌ cāmaxquīꞌca ixlītlahuatcaꞌn.
\v 5 Dios jā maktin cāhuaninīꞌt nūn chāꞌtin tī ixángeles chī huanilh īꞌSkaꞌtaꞌ:
\q Huiꞌx quiSkaꞌtaꞌ.
\q Chuhuaꞌj quit minTātaꞌ.
\m Nā Dios jā maktin cāhuaninīꞌt nūn chāꞌtin tī ixángeles:
\q Quit minTātaꞌ pōꞌktu quilhtamacuj.
\q Huiꞌx quiSkaꞌtaꞌ pōꞌktu quilhtamacuj.
\m
\v 6 Aꞌcxniꞌ namacamin nac cāꞌquilhtamacuj īꞌSkaꞌtaꞌ tī ixlacsacnīꞌt Dios huanli:
\q Ūꞌtzaꞌ catalaktaquilhpūtalh ixlīpōꞌktucaꞌn ixángeles Dios.
\m
\v 7 Dios līchihuīnaꞌnli ángeles ē huanli:
\q Ángeles ixlacscujnīꞌn Dios.
\q Taꞌaꞌn jā Dios cāmacāꞌn.
\q Palaj taꞌaꞌn huaꞌchi ūꞌniꞌ ē huaꞌchi makliꞌpit.
\m
\v 8 Nā Dios līchihuīnaꞌnli īꞌSkaꞌtaꞌ, ē huanli:
\q Huiꞌx Dios ē huiꞌx namāpaꞌksīniꞌnaꞌ pōꞌktu quilhtamacuj.
\q Tze chī huiꞌx nalīmāpaꞌksīniꞌnaꞌ.
\q 	
\v 9 	 Huiꞌx lakatīyaꞌ tū xatze.
\q Jā laktzīꞌncuꞌtunaꞌ tū jā tze.
\q Ūꞌtzaꞌ līlacsacnīꞌtaꞌn minDios.
\q Dios cāꞌtapāxuhuān maxquīꞌn lhūhuaꞌ lītliꞌhuiꞌqui.
\q Āꞌmakapitzīn jā chuntzaꞌ cāmaxquīꞌca.
\m
\v 10 Nā Dios chihuīnaꞌmpālh:
\q Huiꞌx, Māpaꞌksīniꞌ, tlaꞌhuaꞌnīꞌtaꞌ ixlīpōꞌktu cāꞌquilhtamacuj xapūla.
\q Huiꞌx tlaꞌhuaꞌnīꞌtaꞌ ixlīpōꞌktu tū aꞌnan nac aꞌkapūn.
\q 	
\v 11 	 Pōꞌktu huāꞌmāꞌ natalaksputa.
\q Huiꞌx jā chuntzaꞌ.
\q Huiꞌx natahuiꞌlaꞌyaꞌ tihuaꞌnaꞌ.
\q Pōꞌktu huāꞌmāꞌ natala huaꞌchi xamasniꞌ luꞌxuꞌ.
\q 	
\v 12 	 Jātzaꞌ caticāmaclacasquiꞌnca, ixpālacata huiꞌx pōꞌktu xasāstiꞌ nacātlahuaꞌyaꞌ.
\q Chuntzaꞌ chī chāꞌtin aꞌcxniꞌ tamakxtu xamasniꞌ ixluꞌxuꞌ ē lhakāꞌ xasāstiꞌ.
\q Huiꞌx, jā maktin catitalakpaliꞌ ē natahuiꞌlaꞌyaꞌ tihuaꞌnaꞌ.
\m
\v 13 Dios jā maktin cāhuaninīꞌt nūn chāꞌtin tī ixángeles chuntzaꞌ chī huanilh īꞌSkaꞌtaꞌ:
\q Catahuiꞌlaꞌ nā quimpekxtūcānaꞌj hasta quit naꞌiccātlaja mintāꞌlāquiclhlaktziꞌnīꞌn.
\m
\v 14 Ángeles xalakahuan masqui jāla laktzīꞌncan. Xlacaꞌn tascuja chuntzaꞌ chī Dios cāmāpaꞌksī. Dios cālakmacamin natamaktāya tī nacāmakapūtaxtūcan.
\c 2
\s Ixlacasquiꞌnca nakexmatniꞌyāuj tū Dios huan
\p
\v 1 Jesús xlaꞌ kaꞌtlaꞌ. Ūꞌtzaꞌ tzej nalīlacapāstacāuj xatze tachihuīn tū quincātamācaꞌtzīnīnīꞌtaꞌn. Chuntzaꞌ jā catitaxtutāyauj na ixtej Dios.
\v 2 Tū Dios cāmāhuanīlh ángeles, ūꞌtzaꞌ ixlīcānaꞌ. Ixlīpōꞌktucaꞌn tī jā takexmatniꞌlh, xlacaꞌn cāmakapātīnīnca.
\v 3 Nā chuntzaꞌ quinaꞌn naquincātamakapātīnīnān palh namakxtekāuj Dios tī quincāmāpūtaxtūyān. QuiMāpaꞌksīniꞌcaꞌn Jesucristo, ūꞌtzaꞌ tī xapūla chihuīnaꞌnli chī nalīꞌaꞌkapūtaxtucan. Tī takexmatli xlacaꞌn quincātamācaꞌtzīnīn ē quincātahuanin ūꞌtzaꞌ tū ixlīcānaꞌ.
\v 4 Nā chuntzaꞌ Dios māsuꞌyukōꞌlh ixlīcānaꞌ tū cāhuanica, ixpālacata cāmaxquīꞌlh līmāpaꞌksīn natatlahua kempālhūhuaꞌ xalakaꞌtlaꞌ līꞌaꞌcnīn. Nā cāmaxquīꞌca ixlītliꞌhuiꞌqui Espíritu Santo chāꞌtunuꞌ chuntzaꞌ chī Dios ixtalacasquiꞌnīn.
\s Jesucristo makapūtaxtūnuꞌn
\p
\v 5 Dios jā cāmacamaxquīꞌnīꞌt ángeles cāꞌquilhtamacuj tū līchihuīnaꞌnāuj, ē tū xasāstiꞌ nahuan.
\v 6 Jā ángeles caticāmacamaxquīꞌlh cāꞌquilhtamacuj. Nacāmacamaxquīꞌcan tachiꞌxcuhuīꞌt. Tatzoꞌkniꞌ na ixtachihuīn Dios jā huancan:
\q Huiꞌx Dios cāpāstacaꞌ tachiꞌxcuhuīꞌt masqui jā tū ixtapalhcaꞌn.
\q Cātlahuaniꞌyaꞌ xlacaꞌn tū tze.
\q 	
\v 7 	 Huiꞌx cālīmākaꞌtliꞌ tachiꞌxcuhuīꞌt masqui jā huaꞌchi ángeles.
\q Cātlaꞌhuaꞌ cacālakachiꞌxcuhuīꞌca.
\q Cāmacamaxquīꞌlh natamāpaꞌksī tū huiꞌx tlahuanīꞌt.
\q 	
\v 8 	 Tachiꞌxcuhuīꞌt cāmacamaxquīꞌlh natamāpaꞌksīkōꞌ.
\m Aꞌcxniꞌ huancan natamāpaꞌksīkōꞌ, chuntzaꞌ huanicuꞌtun tachiꞌxcuhuīꞌt natamāpaꞌksīkōꞌ ixlīpōꞌktu, masqui jānaꞌj tī laktzīꞌn chī tamāpaꞌksīniꞌn.
\v 9 Jesús ūꞌtzaꞌ tī māpaꞌksīniꞌn. Caꞌtzīyāuj chī pātīniꞌlh Jesús. Timacstiꞌnaꞌjuanli chī ángeles, masqui jā makās. Chuntzaꞌ lalh ixpālacata Dios lacasquiꞌnli xlaꞌ nanī ixpālacatacaꞌn ixlīpōꞌktucaꞌn tachiꞌxcuhuīꞌt. Dios lakalhuꞌmanīniꞌn ē ūꞌtzaꞌ Jesús līnīlh, ē ūꞌtzaꞌ līlakachiꞌxcuhuīꞌcan.
\p
\v 10 Dios tlahuakōꞌnīꞌt. Xlaꞌ cāmālacatzucukōꞌlh ixlīpōꞌktu tū aꞌnan, chuntzaꞌ chī ixtalacasquiꞌnīn. Chuntzaꞌ minīꞌniꞌ Dios macamilh īꞌSkaꞌtaꞌ nac cāꞌquilhtamacuj napātīniꞌn, ixpālacata Dios ixlacasquiꞌn lhūhuaꞌ ixlacstīn natalīpūtaxtu ē nataꞌaꞌn nac aꞌkapūn. Jesucristo pātīniꞌlh quimpālacatacaꞌn, ē chuntzaꞌ tzē naquincāmāpūtaxtūyān.
\v 11 Tī Jesús cāxapaniꞌnīꞌt ixcuentacaꞌn, pōꞌktu ixlacstīn Dios. Ixlacstīn Dios chu chāꞌtin tī ixTātaꞌcaꞌn chī Jesucristo. Ē ūꞌtzaꞌ Jesucristo jā līmāxanaꞌn aꞌcxniꞌ huan: “Xlacaꞌn quintāꞌtimīn.”
\v 12 Tatzoꞌkniꞌ na ixtachihuīn Dios chī Jesús huanilh Dios:
\q Quit naꞌiclītāꞌchihuīnaꞌnān quintāꞌtimīn.
\q Naꞌicpixtlīꞌniꞌyān jā takēstokcan.
\m
\v 13 Nā Jesús huanli:
\q Quit naꞌiclīpāhuan Dios.
\m Nā chihuīnaꞌmpālh:
\q Huāꞌtzāꞌ iccātāꞌlahuīꞌlh ixlacstīn tī Dios quimaxquīꞌlh.
\p
\v 14 Tzamāꞌ lacstīn takaꞌlhī ixquinītcaꞌn ē ixkaꞌlhniꞌcaꞌn. Nā chuntzaꞌ Jesús lītaxtulh kēxtim. Ixkaꞌlhī ixquinīt ē ixkaꞌlhniꞌ. Lacatuncuhuīꞌlh chī chāꞌtin skaꞌtaꞌ, ixpālacata xlaꞌ nīcuꞌtunli ixpālacata chuntzaꞌ tzē nalīskāhuīꞌ skāhuīꞌniꞌ tī kaꞌlhī lītliꞌhuiꞌqui namaknīniꞌn.
\v 15 Chuntzaꞌ tzē cālīmakapūtaxtūlh xlacaꞌn tī pōꞌktu quilhtamacuj ixtajicuaꞌniꞌ līnīn. Xlaꞌ tzē cāmaktīlh ixtajicuāꞌtcaꞌn.
\v 16 Jā ángeles tī cāmaktāya Jesús. Xlaꞌ cāmaktāya tachiꞌxcuhuīꞌt tī ixtalakapasniꞌ Abraham.
\v 17 Ixtasquiꞌnī Jesús ixlītaxtulh kēxtim tī ixtachiꞌxcuhuīꞌt Dios tī ixtāꞌtimīn Jesús. Chuntzaꞌ xlaꞌ quincālakalhuꞌmanān. Nā chuntzaꞌ tzē nalītaxtu xapuxcuꞌ pālej na ixlacatīn Dios. Ūꞌtzaꞌ talacnūniꞌlh huaꞌchi talakalhuꞌmān. Chuntzaꞌ tzē quincātamāpānūniꞌyān quincuentacaꞌn.
\v 18 Jesús pātīniꞌlh, ē chuntzaꞌ xlaꞌ tzē nacāmaktāya xlacaꞌn tī tapātīniꞌmāꞌnalh ē tī cāmāmakahuasīcuꞌtun skāhuīꞌniꞌ.
\c 3
\s Jesús lakachiꞌxcuhuīꞌcan
\p
\v 1 Huiꞌxinaꞌn, tāꞌtimīn, Dios cālacsacnīꞌtaꞌn ē ūꞌtzaꞌ huiꞌxinaꞌn ixlacstīn Dios līhuantit. Chuhuaꞌj cacuentatlahuaꞌtit Cristo Jesús. Dios macamilh Cristo Jesús ē mānūlh xapuxcuꞌ pālej na ixlacatīn Dios. Chuntzaꞌ tzē nacāmaktāya xlacaꞌn tī taꞌaꞌkaꞌīꞌ.
\v 2 Jesús mākentaxtūkōꞌlh huāꞌmāꞌ tū Dios ixmacamaxquīꞌnīꞌt. Nā chuntzaꞌ Moisés mākentaxtūlh na ixchic Dios tū ixmacamaxquīꞌnīꞌt.
\v 3 Minīꞌniꞌ āꞌchulāꞌ calakachiꞌxcuhuīꞌca Jesús ē jā Moisés. Āꞌchulāꞌ lakachiꞌxcuhuīꞌcan tī tlahua aꞌktin chic, ē jā tzamāꞌ chic.
\v 4 Chiꞌxcuhuīꞌn tzē tatlahua chic. Dios, xlaꞌ tlahuakōꞌnīꞌt ixlīpōꞌktu tū aꞌnan.
\v 5 Moisés mākentaxtūkōꞌlh tū ixmacamaxquīꞌcanīꞌt na ixchic Dios. Xlaꞌ īꞌscuja na ixpuꞌnancaꞌn ixtachiꞌxcuhuīꞌt Dios. Xlaꞌ ixcāhuani tachiꞌxcuhuīꞌt tū naꞌaꞌkspula.
\v 6 Cristo, xlaꞌ īꞌSkaꞌtaꞌ Dios. Xlaꞌ pōꞌktu tze tū tlahua. Ūꞌtzaꞌ cāmacamaxquīꞌcanīꞌt ixlīpōꞌktucaꞌn tī ixlacstīn Dios. Nā quinaꞌn ixlacstīn Dios, palh ūꞌtzaꞌ nalīpāhuanāuj tihuiꞌlānaꞌujcus, ē līpāxuayāuj tū mimāꞌchaꞌ.
\s Ixlacstīn Dios natalīpāxuhua tū Dios tlahuakōꞌlh
\p
\v 7 Chuntzaꞌ tatzoꞌkniꞌ na ixtachihuīn Dios chī huanli Espíritu Santo:
\q Chuhuaꞌj palh huiꞌxinaꞌn kexpaꞌtāꞌtit chī Dios huan, jā lacxumpin calītaxtutit.
\q 	
\v 8 	 Jā lacxumpin calītaxtutit chī tī jā takexmatniꞌcuꞌtunli Dios makāstzaꞌ nac cāꞌtzayaꞌnca tiꞌyaꞌt.
\q 	
\v 9 	 Mintātaꞌcaꞌn xalaꞌ pūla quintalīlaktzīꞌncuꞌtunli palh xaꞌiccālīpātīlh xlacaꞌn.
\q Chī xalacxumpin ixtahuanīꞌt, ē masqui talaktzīꞌlh līꞌaꞌcnīn tū xaꞌictlahua quit tuꞌpuꞌxam cāꞌta.
\q 	
\v 10 	 Ūꞌtzaꞌ iccālīsītzīꞌniꞌlh aꞌcxniꞌ icualh: “Xlacaꞌn jā maktin tzej talacapāstacnaꞌn. Jā maktin takexmatli tū iclacasquiꞌn quit.”
\q 	
\v 11 	 Ūꞌtzaꞌ iccālīsītzīꞌniꞌlh ē ūꞌtzaꞌ iclīhuanli ixlīcānaꞌ xlacaꞌn jā catitachāꞌlh jā quit iccāhuanilh nataꞌaꞌn natajaxa.
\p
\v 12 Chuhuaꞌj, tāꞌtimīn, tzej calatāꞌkchokotit. Jā caxumpīniꞌniꞌtit Dios nūn chāꞌtin chī huiꞌxinaꞌn. Jā tze palh jā aꞌkaꞌīꞌyāꞌtit Dios ē palh natapānūniꞌyāꞌtit Dios xalakahuan.
\v 13 Xatze calāhuaniꞌtit lacxtim chuhuaꞌj pōꞌktu quilhtamacuj tihuiꞌlāꞌnaꞌntitcus nac cāꞌquilhtamacuj. Chuntzaꞌ nūn chāꞌtin tzē naxumpīniꞌn. Palh napuhuan chāꞌtin natlahua tū jā tze, chu ūꞌtzaꞌ taꞌaꞌkskāhuīꞌmāꞌlh, ē āꞌchulāꞌ jā kexmatniꞌcuꞌtun Dios.
\v 14 Palh quinaꞌn jā namakxtekāuj nalīpāhuanāuj Cristo chu kēxtim chī xapūla ixlīpāhuanāuj, chuntzaꞌ nā quilaꞌcaꞌn nahuan tū ixlaꞌ Cristo.
\v 15 Chuntzaꞌ tatzoꞌkniꞌ na ixtachihuīn Dios:
\q Palh huiꞌxinaꞌn kexpaꞌtāꞌtit ixtachihuīn Dios, cakexpaꞌtniꞌtit.
\q Jā caxumpīniꞌntit chī xlacaꞌn xalanīꞌn makāstzaꞌ tī jā ixtakexmatniꞌcuꞌtun Dios nac cāꞌtzayaꞌnca tiꞌyaꞌt.
\m
\v 16 ¿Ē caꞌtzīyāꞌtit tīchu takexmatli ixtachihuīn Dios ē jā takexmatniꞌlh? Xlacaꞌn ūꞌtunuꞌn tī cāmāxtulh Moisés nac Egipto.
\v 17 ¿Ē caꞌtzīyāꞌtit tī ixtamakasītzīꞌnīꞌt Dios? Dios ixcāsītzīꞌniꞌnīꞌt xlacaꞌn tī ixtatlahua tū jā tze tuꞌpuꞌxam cāꞌta, ē ūꞌtzaꞌ talīnīlh xlacaꞌn nac cāꞌtzayaꞌnca tiꞌyaꞌt.
\v 18 ¿Ē caꞌtzīyāꞌtit tīchu cālīchihuīnaꞌnli Dios aꞌcxniꞌ huanli jā catitachāꞌlh nac tiꞌyaꞌt jā natajaxa? Dios cālīchihuīnaꞌnli xlacaꞌn tī taxumpīniꞌniꞌlh Dios.
\v 19 Chuntzaꞌ tzē līcaꞌtzīyāuj jāla tachāꞌlh jā ixtachāꞌncuꞌtumāꞌnalh, ixpālacata jā taꞌaꞌkaꞌīꞌlh ixlīcānaꞌ tū cāhuanilh Dios.
\c 4
\p
\v 1 Quinaꞌn, Dios quincāhuaninīꞌtaꞌn tzē nachāꞌnāuj jā xlaꞌ huiꞌlachaꞌ ē aꞌntzaꞌ jā natāꞌjaxāuj Dios. Ixlacasquiꞌnca nalacapāstacāuj chī nalīlatāꞌkchokoyāuj, ixpālacata lījicuaꞌ palh jā nachāꞌn chāꞌtin chī huiꞌxinaꞌn.
\v 2 Quinaꞌn kexmatnīꞌtaꞌuj xatze tachihuīn chī līꞌaꞌkapūtaxtucan. Nā xlacaꞌn takexmatli huāꞌmāꞌ tachihuīn. Xlacaꞌn chu tlakaj takexmatli. Jā taꞌaꞌkaꞌīꞌlh palh ixlīcānaꞌ huāꞌmāꞌ tachihuīn.
\v 3 Quinaꞌn aꞌkaꞌīꞌyāuj, ē chuntzaꞌ nachāꞌnāuj jā huiꞌlachaꞌ Dios ē natāꞌjaxāuj Dios. Dios cālīchihuīnaꞌnli xlacaꞌn tī jā taꞌaꞌkaꞌīꞌlh ē huanli:
\q Quit iccāsītzīꞌniꞌlh xlacaꞌn ē ūꞌtzaꞌ iclīhualh ixlīcānaꞌ xlacaꞌn jā catitachāꞌlh nac tiꞌyaꞌt jā naquintāꞌjaxcan quit.
\m Chuntzaꞌ huanli Dios masqui ūꞌtzaꞌ ixcāxtlahuanīꞌttzaꞌ jā najaxcan aꞌcxniꞌ tlahuakōꞌlh cāꞌquilhtamacuj.
\v 4 Tatzoꞌkniꞌ na ixtachihuīn Dios ixpālacata ixlīꞌaꞌktojon quilhtamacuj. Chuntzaꞌ huan:
\q Dios pūjaxli ixlīꞌaꞌktojon quilhtamacuj ē jā scujli.
\m
\v 5 Nā aꞌntzaꞌ tatzoꞌkniꞌ:
\q Xlacaꞌn jā catitachāꞌlh jā naquintāꞌjaxcan quit.
\m
\v 6 Tī takexmatli xapūla xatze tachihuīn ixpālacata chī nalīꞌaꞌkapūtaxtucan, xlacaꞌn jā taꞌaꞌkaꞌīꞌlh. Ūꞌtzaꞌ jā talīchāꞌlh xlacaꞌn jā natāꞌjaxcan Dios. Chuntzaꞌ āꞌmakapitzīn natachāꞌn ē natatāꞌjaxa Dios.
\v 7 Xlacaꞌn jā tachāꞌlh, ē chuntzaꞌ Dios līlacsacli aꞌktin quilhtamacuj tū māpācuhuīlh chuhuaꞌj. Ixlīlhūhuaꞌ cāꞌta Dios māchihuīnīlh David tī puxcuꞌ ixuanīꞌt. Tatzoꞌkniꞌ na ixtachihuīn Dios chī David huanli:
\q Chuhuaꞌj palh huiꞌxinaꞌn kexpaꞌtāꞌtit tū Dios huan, jā lacxumpin cahuantit.
\m Caꞌtzīyāuj pōꞌktu quilhtamacuj Dios cātaꞌsaniꞌmāꞌlh ixlīpōꞌktu tachiꞌxcuhuīꞌt ē hasta chuhuaꞌj.
\v 8 Palh Josué ixcāmaxquīꞌlhtzaꞌ jā natajaxa, Dios jā ixtilīchihuīnaꞌnli āꞌaꞌktin pūjaxniꞌ.
\v 9 Ūꞌtzaꞌ līcaꞌtzīyāuj quinaꞌn tī ixtachiꞌxcuhuīꞌt Dios nachāꞌnāuj jā cāxuiꞌlīnīꞌt napūjaxāuj chuntzaꞌ chī Dios jaxli ixlīꞌaꞌktojon quilhtamacuj aꞌcxniꞌ cāxuiꞌlīkōꞌlh cāꞌquilhtamacuj.
\v 10 Tī natachāꞌn aꞌntzaꞌ, xlacaꞌn tī tatlahuakōꞌnīꞌt ixlītlahuatcaꞌn ē aꞌntzaꞌ natajaxa chuntzaꞌ chī Dios jaxli aꞌcxniꞌ cāxuiꞌlīkōꞌlh cāꞌquilhtamacuj.
\v 11 Quinaꞌn calīhuiꞌlīuj nachāꞌnāuj ē aꞌntzaꞌ natāꞌjaxāuj Dios. Jā calauj chī xalanīꞌn makāstzaꞌ. Xlacaꞌn jāla tachāꞌlh ixpālacata jā taꞌaꞌkaꞌīꞌlh palh ixlīcānaꞌ tū huanli Dios.
\p
\v 12 Ixtachihuīn Dios huaꞌchi xalakahuan ē kaꞌlhī lītliꞌhuiꞌqui ixpālacata ūꞌtzaꞌ scuja na quilīstacnaꞌcaꞌn. Ixtachihuīn Dios huaꞌchi kentin espada tū kēstītuꞌ ē tzej staꞌyaꞌncaꞌ, ē tū tzē lakchāꞌnkōꞌ quilīstacnaꞌcaꞌn. Ūꞌtzaꞌ nalīcaꞌtzīyāuj palh jā tze quilīstacnaꞌcaꞌn ē quintalacapāstacniꞌcaꞌn.
\v 13 Dios pōꞌktu laktzīꞌhuīꞌlh. Jāla catitatzēꞌkniꞌuj Dios. Xlaꞌ lakapaskōꞌ quilīstacnaꞌcaꞌn. Quinaꞌn nalīkelhtīniꞌnāuj na ixlacatīn Dios tū tlahuayāuj chī chāꞌtunuꞌ quinaꞌn.
\s Dios līhuiꞌlīlh Jesucristo xapuxcuꞌ pālej
\p
\v 14 Jesucristo, īꞌSkaꞌtaꞌ Dios, chāꞌnīꞌttzaꞌ xlaꞌ jā huiꞌlachaꞌ Dios. Xlaꞌ ūꞌtzaꞌ chāꞌtin xapuxcuꞌ pālej tī chihuīnaꞌn quimpālacatacaꞌn. Chuntzaꞌ quinaꞌn jā catimakxtekui aꞌkaꞌīꞌniꞌyāuj Jesucristo nūn macstiꞌnaꞌj.
\v 15 Jesucristo ūꞌtzaꞌ quimpālejcaꞌn. Xlaꞌ quincālakalhuꞌmanān quinaꞌn, ixpālacata nā xlaꞌ xapūla chuntzaꞌ ixtalīlaktzīꞌncuꞌtun aꞌcxniꞌ ixlatlāꞌhuan nac cāꞌquilhtamacuj, chuntzaꞌ chī quinaꞌn quincāꞌaꞌkspulamāꞌn. Xlaꞌ jā tū tlahualh tū jā tze.
\v 16 Ūꞌtzaꞌ calītalacatzunaꞌjīuj na ixlacatīn Dios. Jā cajicuaꞌnui. Xlaꞌ lakalhuꞌmanīniꞌn. Naquincāmaktāyayān aꞌcxniꞌ maclacasquiꞌnāuj.
\c 5
\p
\v 1 Chiꞌxcuhuīꞌn israelitas cālīhuiꞌlīcan xanapuxcuꞌnuꞌ pālejniꞌ. Chāꞌtunuꞌ tascuja na ixlacatīn Dios ixpālacatacaꞌn tachiꞌxcuhuīꞌt. Chāꞌtin chiꞌxcuꞌ tī xapuxcuꞌ pālej, xlaꞌ mālacnūniꞌ talakalhuꞌmān Dios ixpālacata nacāmāpānūniꞌcan ixcuentacaꞌn tachiꞌxcuhuīꞌt.
\v 2 Huāꞌmāꞌ pālej chu chiꞌxcuꞌ, ē chuntzaꞌ makatunuꞌ tlahua tū jā tze. Ē ūꞌtzaꞌ līlacatzucu cālīpātī xlacaꞌn tī jānaꞌj tzej tacaꞌtzī ē xlacaꞌn tī tatamakahuasnīꞌt.
\v 3 Xlaꞌ makatunuꞌ tlahua tū jā tze, ē chuntzaꞌ ixlacasquiꞌnca xapūla tlahua aꞌktin tamacamāstāꞌn nalīxapacan ixcuenta. Āꞌlīstān natlahua tamacamāstāꞌn nacāmāpānūniꞌcan ixcuentacaꞌn tachiꞌxcuhuīꞌt.
\p
\v 4 Nūn chāꞌtin tī tzē natanū ixlīmān xapuxcuꞌ pālej. Xmān Dios ūꞌtzaꞌ tzē nahuiꞌlī xapuxcuꞌ chī ixlīpālej, chuntzaꞌ chī Dios huiꞌlīlh Aarón.
\v 5 Cristo nā jā ixlīmān tanūlh līpuxcuꞌ pālej. Dios huiꞌlīlh ē huanilh:
\q Huiꞌx quiSkaꞌtaꞌ ē chuhuaꞌj tasuꞌyu quit minTātaꞌ.
\m
\v 6 Nā tatzoꞌkniꞌ na ixtachihuīn Dios chī Dios huanli:
\q Huiꞌx nalītahuiꞌlaꞌyaꞌ līpālej chī tihuaꞌnaꞌ.
\q Chuntzaꞌ chī mānūca Melquisedec līpālej ē nā chuntzaꞌ huiꞌx namānūcaꞌnaꞌ.
\m
\v 7 Jesucristo aꞌcxniꞌ ixlatlāꞌhuan nac cāꞌquilhtamacuj, xlaꞌ ixlīꞌorarlī ixlīpōꞌktu ixlīstacnaꞌ ē īꞌsquiꞌniꞌ Dios hasta ixcalhuan. Dios ūꞌtzaꞌ tī tzē nalakmātaxtū nac līnīn. Dios kexmatniꞌlh ixoración, ixpālacata Jesucristo xmān ixtlahuacuꞌtun tū ixtalacasquiꞌnīn Dios.
\v 8 Jesucristo masqui īꞌSkaꞌtaꞌ Dios, xlaꞌ ixkexmatniꞌ ē ūꞌtzaꞌ līpātīniꞌlh. Ūꞌtzaꞌ xlaꞌ līcaꞌtzī chī tapātīniꞌn tī takexmatniꞌ Dios.
\v 9 Jesucristo tzej kexmatniꞌlh Dios hasta jā nīlh chuntzaꞌ chī ixtalacasquiꞌnīn Dios. Ūꞌtzaꞌ xlaꞌ tzē nacālīmakapūtaxtū pōꞌktu quilhtamacuj xlacaꞌn tī takexmatniꞌ.
\v 10 Dios līhuiꞌlīlh xapuxcuꞌ pālej chuntzaꞌ chī Melquisedec.
\s Lījicuaꞌ palh taspiꞌttāyacan na ixtej Dios
\p
\v 11 Quit lhūhuaꞌ iccāhuanicuꞌtunān ixpālacata Jesucristo. Jicslīhuaꞌ ixpālacata huiꞌxinaꞌn jānaꞌj lacacaꞌtzīyāꞌtit.
\v 12 Maclacasquiꞌnāꞌtitcus tī nacātamāsuꞌyuniꞌyān huiꞌxinaꞌn ixtachihuīn Dios tū jā xajicslīhuaꞌ. Huiꞌxinaꞌn makāstzaꞌ aꞌkaꞌīꞌnīꞌtaꞌntittzaꞌ, ē chuntzaꞌ huiꞌxinaꞌn tzētzaꞌ ixcāmāsuꞌyuniꞌtit āꞌmakapitzīn. Huiꞌxinaꞌn chī chāꞌtin skaꞌtaꞌ tī xmāncus leche huaꞌ ē jānaꞌj la tahuāꞌyan.
\v 13 Lacstīn tī xmāncus leche tahuaꞌ, xlacaꞌn jānaꞌj tacaꞌtzī tū tze ē tū jā tze.
\v 14 Tī xastacniꞌtzaꞌ, xlacaꞌn tacaꞌtzītzaꞌ tū tze ē tū jā tze.
\c 6
\p
\v 1 Chuhuaꞌj ixpālacata huiꞌxinaꞌn aꞌkaꞌīꞌnīꞌtaꞌntittzaꞌ, jātzaꞌ icticāhuanin tū cātamāsuꞌyuniꞌn xapūla. Jātzaꞌ icticāhuanin chī lītzucucan aꞌkaꞌīꞌcan Cristo ē chī līlakpalīcan quintalacapāstacniꞌcaꞌn ē chī līmakxtekcan tlahuacan tū jā tze, ē chī līꞌaꞌkaꞌīꞌcan Dios. Chuhuaꞌj jātzaꞌ icticāmāsuꞌyuniꞌn tū xalītzucuniꞌ tū ixlaꞌ Dios.
\v 2 Jātzaꞌ icticāhuanin chī līꞌaꞌkpaxcan, ē chī cālīmāhuaꞌcaꞌniꞌcan macan, ē chī nalīlacastālancuanaꞌncan, ē chī Dios nalīputzānaꞌn.
\v 3 Chuhuaꞌj, palh Dios lacasquiꞌn, chuntzaꞌ natlahuayāuj.
\p
\v 4 Tī tataspiꞌttāyanīꞌt na ixtej Dios, jātzaꞌ la natalītaspiꞌtpala xlacaꞌn. Tacaꞌtzīnīꞌttzaꞌ chī nalīꞌaꞌkapūtaxtucan ē chī Dios cālīsicuaꞌlanātlahua ē ixcāmaxquīꞌnīꞌt ixlītliꞌhuiꞌqui Espíritu Santo.
\v 5 Xlacaꞌn tacaꞌtzī tze ixtachihuīn Dios tū taꞌaꞌkaꞌīꞌnīꞌt, ē talaktzīꞌnīꞌt līꞌaꞌcnīn tū lītlahuacan ixlīmāpaꞌksīn Jesucristo. Huāꞌmāꞌ līmāpaꞌksīn nalīmāpaꞌksīkōꞌcan aꞌcxniꞌ namin xasāstiꞌ cāꞌquilhtamacuj.
\v 6 Xlacaꞌn tataxtutāyanīꞌt na ixtej Dios, ē chuntzaꞌ jātzaꞌ la cālakpālīpalacan chī tatlahualh xapūla. Jātzaꞌ la ixpālacata huaꞌchi talakmakaꞌnīꞌt Jesús tī nīlh nac cruz. Huaꞌchi āꞌmaktin ixtaxtokohuaꞌcaꞌpālh īꞌSkaꞌtaꞌ Dios.
\v 7 Chuhuaꞌj quit iccāhuanicuꞌtunān tū lītalacastuꞌnccan. Nac cāꞌtacuxtu maklhūhuaꞌ la xcān. Xcān chūꞌhuaꞌ tiꞌyaꞌt. Chuntzaꞌ līlanānaꞌn ē chuntzaꞌ talīhuāꞌyan tī tascuja nac cāꞌtacuxtu. Chuntzaꞌ līla chī ixtalacasquiꞌnīn Dios.
\v 8 Nac tiꞌyaꞌt jā staca xmān lhtucuꞌ ē paꞌlhmaꞌ, tzamāꞌ jā tū ixtapalh. Ē nalhcuyucan. Huāꞌmāꞌ tiꞌyaꞌt huaꞌchi tī tataspiꞌttāyanīꞌt na ixtej Dios.
\s Dios namākentaxtū tū huan
\p
\v 9 Masqui chuntzaꞌ ictzoꞌka quit, quit iccaꞌtzī huiꞌxinaꞌn jā taspiꞌttāyanīꞌtaꞌntit na ixtej Dios. Tzej tasuꞌyu huiꞌxinaꞌn aꞌkaꞌīꞌyāꞌtit.
\v 10 Pōꞌktu tū Dios tlahua, pōꞌktu tze. Xlaꞌ jā catipātzaꞌnkālh chī scujnīꞌtaꞌntit ē chī pāxquīꞌyāꞌtit Dios. Chuntzaꞌ tasuꞌyu ixpālacata huiꞌxinaꞌn cāmaktāyaꞌnīꞌtaꞌntit āꞌmakapitzīn tī taꞌaꞌkaꞌīꞌ ē ticāmaktāyapāꞌnaꞌntitcus.
\v 11 Quit iclacasquiꞌn milīpōꞌktucaꞌn huiꞌxinaꞌn cascujtit chuntzaꞌ tihuiꞌlāꞌnaꞌntitcus nac cāꞌquilhtamacuj. Chuntzaꞌ nalīmaktīniꞌnāꞌtit ixlīpōꞌktu tū huiꞌxinaꞌn kaꞌlhīꞌpāꞌnaꞌntit.
\v 12 Jā iclacasquiꞌn laclhquititniꞌ nalītaxtuyāꞌtit. Iclacasquiꞌn nacāmakscaꞌtāꞌtit āꞌmakapitzīn tī taꞌaꞌkaꞌīꞌ tī tatāyaniꞌmāꞌnalh. Xlacaꞌn tamaktīniꞌmāꞌnalh tū Dios cāmālacnūniꞌlh.
\p
\v 13 Aꞌcxniꞌ Dios huanilh Abraham tū natlahuaniꞌ, Dios tapācuhuīlh ixaꞌcstu, ixpālacata jā tī āꞌchāꞌtin āꞌchulāꞌ xakaꞌtlaꞌ.
\v 14 Dios huanli:
\q Ixlīcānaꞌ naꞌicsicuaꞌlanātlahuayān.
\q Ixlīcānaꞌ naꞌicmaxquīꞌyān lhūhuaꞌ minatāꞌnatnaꞌ.
\m
\v 15 Abraham pōꞌktu quilhtamacuj kaꞌlhītīlh ē jā lakachāꞌniꞌlh. Chuntzaꞌ maktīniꞌlh tū Dios ixuaninīꞌt.
\v 16 Aꞌcxniꞌ chāꞌtin chiꞌxcuꞌ huan ixlīcānaꞌ tū xlaꞌ chihuīnaꞌn, xlaꞌ māpācuhuī āꞌchāꞌtin tī āꞌchulāꞌ xakaꞌtlaꞌ ē tzē namakapātīnīn palh jā namākentaxtū. Chuntzaꞌ talīkoꞌxamixa tī ixtatāꞌlāquilhnī ixpālacata tacaꞌtzī tzamāꞌ chiꞌxcuꞌ namākentaxtū.
\v 17 Nā Dios tapācuhuīlh ixaꞌcstu. Chuntzaꞌ tlahualh ixpālacata ixlacasquiꞌn natacaꞌtzī tachiꞌxcuhuīꞌt tzamāꞌ ixlīcānaꞌ ē xlaꞌ namākentaxtū tū huanli.
\v 18 Quinaꞌn caꞌtzīyāuj ixlīcānaꞌ tū Dios huanli, ixpālacata tapācuhuīlh ixaꞌcstu ē xlaꞌ jā maktin aꞌkskāhuīꞌnin. Ūꞌtzaꞌ līpāxuayāuj ixpālacata Dios quincālakapāxtokniꞌyān tū jā tze. Dios huanli quincāmakapūtaxtūnīꞌtaꞌn. Chuhuaꞌj caꞌtzīyāuj kaꞌlhīyāuj xasāstiꞌ quilatamatcaꞌn tū jā catilaksputli.
\v 19 Caꞌtzīyāuj nakaꞌlhīyāuj quilatamatcaꞌn tū jā catilaksputli, ē chuntzaꞌ jā tamakchuyīnīꞌtaꞌuj. Chuntzaꞌ kaꞌlhīyāuj quinaꞌn huaꞌchi tū tzancstāya. Caꞌtzīyāuj natanūyāuj nac aꞌkapūn.
\v 20 Aꞌntzaꞌ xapūla tanūnīꞌt Jesús jā natanūyāuj. Xlaꞌ tāꞌchihuīnaꞌn Dios quimpālacatacaꞌn, ixpālacata xlaꞌ lītaxtulh xapuxcuꞌ pālej pōꞌktu quilhtamacuj chī Melquisedec.
\c 7
\s Jesucristo līhuiꞌlīcanīꞌt līpālej chuntzaꞌ chī ixuīꞌlh Melquisedec
\p
\v 1 Tzamāꞌ Melquisedec xlaꞌ puxcuꞌ ixuanīꞌt nac Salem ē nā ixpālej Dios xalaꞌ nac aꞌkapūn. Melquisedec tāꞌlāpāxtokli Abraham aꞌcxniꞌ xlaꞌ ixtaspiꞌtmāꞌlh nac lāmaknīn jā ixcāmaknīnīꞌt xanapuxcuꞌnuꞌ. Melquisedec sicuaꞌlanātlahualh.
\v 2 Abraham maxquīꞌlh tū ixlīꞌaꞌkcāuj ixlīpōꞌktu tū ixlīminīꞌt nac lāmaknīn. Ixtacuhuīniꞌ Melquisedec huanicuꞌtun “tī xapūla xatze puxcuꞌ.” Xlaꞌ puxcuꞌ ixuanīꞌt nac Salem. Chuntzaꞌ ixtacuhuīniꞌ huanicuꞌtun “puxcuꞌ tī cāmākoꞌxamixī tachiꞌxcuhuīꞌt.”
\v 3 Jā tatzoꞌkniꞌ ixtacuhuīniꞌ ixtātaꞌ nūn ixtzīꞌ Melquisedec. Jā tatzoꞌkniꞌ nūn chāꞌtin ixpap. Jā tatzoꞌkniꞌ aꞌcxniꞌ Melquisedec lacatuncuhuīꞌlh ē nūn aꞌcxniꞌ nīlh. Chuntzaꞌ chī chāꞌtin pālej ixuanīꞌt chī tihuaꞌnaꞌ, chuntzaꞌ chī īꞌSkaꞌtaꞌ Dios.
\p
\v 4 Caꞌtzīcan Melquisedec, xlaꞌ chāꞌtin chiꞌxcuꞌ xakaꞌtlaꞌ. Chuntzaꞌ caꞌtzīcan chī Abraham, xlaꞌ quimpapcaꞌn quinaꞌn israelitas ē xlaꞌ maxquīꞌlh Melquisedec tū ixlīꞌaꞌkcāuj ixlīpōꞌktu tū tlajalh nac lāmaknīn.
\v 5 Īꞌxūꞌnātāꞌnatnaꞌ Leví tī pālejniꞌ ixtahuanīꞌt, xlacaꞌn tamaktīniꞌlh tū ixlīꞌaꞌkcāuj tū ixtatlajcaꞌn ixtāꞌisraelitascaꞌn. Chuntzaꞌ ixuīꞌlh līmāpaꞌksīn. Tamaktīniꞌlh ixtāꞌisraelitascaꞌn, masqui xlacaꞌn nā īꞌxūꞌnātāꞌnatnaꞌ Abraham ixtahuanīꞌt, ixpālacata Abraham ūꞌtzaꞌ ixpapcaꞌn ixlīpōꞌktucaꞌn israelitas.
\v 6 Melquisedec, masqui jā ixtalakapasniꞌ Leví ixuanīꞌt, xlaꞌ maktīniꞌlh tū ixlīꞌaꞌkcāuj tū ixtatlaj Abraham ē ūꞌtzaꞌ sicuaꞌlanātlahualh Abraham. Abraham ūꞌtzaꞌ tī Dios huanilh namaxquīꞌ lhūhuaꞌ ixnatāꞌnatnaꞌ.
\v 7 Chuntzaꞌ caꞌtzīcan Melquisedec āꞌchulāꞌ xakaꞌtlaꞌ ē jā Abraham. Ūꞌtzaꞌ caꞌtzīcan āꞌchulāꞌ xakaꞌtlaꞌ tī sicuaꞌlanātlahuanaꞌn ē jā tī sicuaꞌlanātlahuacan.
\v 8 Īꞌxūꞌnātāꞌnatnaꞌ Leví tī ixtamaktīniꞌn tū ixlīꞌaꞌkcāuj tū ixtatlajcaꞌn israelitas, ē xlacaꞌn tanīlh chuntzaꞌ chī ixlīpōꞌktucaꞌn tachiꞌxcuhuīꞌt. Melquisedec huaꞌchi xalakahuancus, ixpālacata jā tatzoꞌkniꞌ na ixtachihuīn Dios palh nīlh.
\v 9 Īꞌxūꞌnātāꞌnatnaꞌ Leví ixtamaktīniꞌn tū ixlīꞌaꞌkcāuj ixtatlajcaꞌn israelitas. Tzē nahuanāuj Leví xokolh aꞌcxniꞌ Abraham xokoniꞌlh Melquisedec.
\v 10 Chuntzaꞌ tzē nahuanāuj ixpālacata Leví īꞌxūꞌnātāꞌnat Abraham ixuanīꞌt, ē masqui jānaꞌj ixlacatuncuhuīꞌnīꞌt aꞌcxniꞌ Melquisedec tāꞌlāpāxtokli Abraham.
\p
\v 11 Īꞌxūꞌnātāꞌnatnaꞌ Leví, tī pālejniꞌ ixtahuanīꞌt, xlacaꞌn ixtascuja chuntzaꞌ chī līmāpaꞌksīn tū Dios maxquīꞌlh Moisés. Huāꞌmāꞌ līmāpaꞌksīn jāla lactze cātlahua tachiꞌxcuhuīꞌt chuntzaꞌ chī Dios lacasquiꞌn. Chuntzaꞌ ixlacasquiꞌnca āꞌchāꞌtin pālej chī Melquisedec ē jā chī Aarón.
\v 12 Aꞌcxniꞌ natatanū xalacxtuncnuꞌ pālejniꞌ, ixlacasquiꞌnca nalakpalīcan līmāpaꞌksīn.
\v 13 Xasāstiꞌ pālej, ūꞌtzaꞌ Māpaꞌksīniꞌ Jesucristo. Xlaꞌ jā īꞌxūꞌnātāꞌnat Leví. Xlaꞌ īꞌxūꞌnātāꞌnat Judá. Īꞌxūꞌnātāꞌnatnaꞌ Judá, jā ixaꞌnan āꞌchāꞌtin pālej.
\v 14 Caꞌtzīkōꞌcan quiMāpaꞌksīniꞌcaꞌn Jesucristo, xlaꞌ īꞌxūꞌnātāꞌnat Judá ixuanīꞌt. Moisés, aꞌcxniꞌ līchihuīnaꞌnli pālejniꞌ, jā līchihuīnaꞌnli Judá ē īꞌxūꞌnātāꞌnatnaꞌ.
\p
\v 15 Chuhuaꞌj tzej caꞌtzīcan tanūnīꞌt xtum pālej. Ūꞌtzaꞌ huāꞌmāꞌ Jesucristo. Xlaꞌ chī Melquisedec.
\v 16 Melquisedec jā tanūlh līpālej chuntzaꞌ chī ixtahuiꞌlatcaꞌn tachiꞌxcuhuīꞌt. Nā chuntzaꞌ Jesucristo. Xlaꞌ tanūlh līpālej ixpālacata xlaꞌ kaꞌlhī līmāpaꞌksīn tū jā maktin catisputli, ixpālacata xlaꞌ natahuiꞌla pōꞌktu quilhtamacuj.
\v 17 Tatzoꞌkniꞌ na ixtachihuīn Dios ixpālacata Cristo:
\q Huiꞌx chāꞌtin pālej pōꞌktu quilhtamacuj.
\q Huiꞌx chī Melquisedec.
\m
\v 18 Chuhuaꞌj līmāpaꞌksīn tū Dios maxquīꞌlh Moisés jātzaꞌ tū ixtapalh, ixpālacata jāla lactze quincātlahuayān chī Dios lacasquiꞌn.
\v 19 Huāꞌmāꞌ līmāpaꞌksīn jāla quincātlahuayān lactze. Cristo xalactze quincātlahuan ē chuntzaꞌ tzē nalīlaktalacatzunaꞌjīyāuj Dios.
\p
\v 20 Dios huanli ixlīcānaꞌ nalīhuiꞌlī Jesucristo līpālej.
\v 21 Jā chuntzaꞌ huanli aꞌcxniꞌ tatanūlh āꞌmakapitzīn pālejniꞌ. Chuntzaꞌ huan ixtachihuīn Dios jā huan:
\q Māpaꞌksīniꞌ Dios mālactzeyīlh
\q ē xlaꞌ namākentaxtū tū huan:
\q “Huiꞌx chāꞌtin pālej pōꞌktu quilhtamacuj.
\q Huiꞌx chī Melquisedec.”
\m
\v 22 Ixtalacāxtlahuan Jesús ūꞌtzaꞌ āꞌchulāꞌ xatze ē jā tū xapūla.
\v 23 Āꞌmakapitzīn pālejniꞌ lhūhuaꞌ ixtahuanīꞌt ixpālacata ixtanītēlha ē ixtatanūtēlha āꞌmakapitzīn.
\v 24 Jesucristo xlaꞌ huīꞌlh pōꞌktu quilhtamacuj ē jā makxteka līpālej. Jā catitanūlh āꞌchāꞌtin ixlakxoko.
\v 25 Ūꞌtzaꞌ Jesucristo tzē nacālīmakapūtaxtūkōꞌ ixlīpōꞌktucaꞌn tī tatapaꞌksīniꞌ Dios ixpālacata Jesucristo. Huāꞌmāꞌ tzē natlahua ixpālacata xlaꞌ huīꞌlh pōꞌktu quilhtamacuj ē pōꞌktu quilhtamacuj squiꞌniꞌmāꞌlh Dios ixpālacatacaꞌn tī taꞌaꞌkaꞌīꞌ.
\p
\v 26 Jesucristo xlaꞌ xapuxcuꞌ pālej chuntzaꞌ chī ixlacasquiꞌnca. Ixlīpōꞌktu tū tlahua, pōꞌktu tze. Jā tlahuaniꞌ tū jā tze āꞌchāꞌtin. Jā tū tlahuanīꞌt tū jā tze. Xlaꞌ jā chī xlacaꞌn tī tatlahua tū jā tze. Xlaꞌ huiꞌlachaꞌ nac aꞌkapūn jā lakachiꞌxcuhuīꞌcan.
\v 27 Xlaꞌ jā chī āꞌmakapitzīn xanapuxcuꞌnuꞌ pālejniꞌ. Xlacaꞌn lakalī lakalī talīlakatāya pūla tū ixpālacata ixcuentacaꞌn ūꞌtunuꞌn ē āꞌlīstān ixpālacata āꞌmakapitzīn. Jesucristo jā chuntzaꞌ tlahua. Xlaꞌ mālacnūlh xmān aꞌktin talakalhuꞌmān. Xmān maktin mālacnūlh aꞌcxniꞌ tamacamāstāꞌlh ixlīmān nac cruz. Huāꞌmāꞌ talakalhuꞌmān natāyaniꞌ ixlīpōꞌktu quilhtamacuj.
\v 28 Chuntzaꞌ chī līmāpaꞌksīn tū Dios maxquīꞌlh Moisés, ixcālīhuiꞌlīcan chiꞌxcuhuīꞌn chī xanapuxcuꞌnuꞌ pālejniꞌ. Chiꞌxcuhuīꞌn ixtahuanīꞌt, ē chuntzaꞌ ixtatlahua tū jā tze. Aꞌcxniꞌ maxquīꞌcanīꞌttzaꞌ huāꞌmāꞌ līmāpaꞌksīn, Dios huanli ixlīcānaꞌ nalīhuiꞌlī īꞌSkaꞌtaꞌ līpālej. Līhuiꞌlīlh līpālej ixlīpōꞌktu quilhtamacuj. Chuntzaꞌ pālej lītahuīꞌlh chī Dios ixlacasquiꞌn.
\c 8
\s Jesús tlahualh xasāstiꞌ talacāxtlahuan
\p
\v 1 Tū iccāhuanimāꞌn, ūꞌtzaꞌ huāꞌmāꞌ: Jesucristo, xlaꞌ xapuxcuꞌ pālej chuntzaꞌ chī ixlacasquiꞌnca. Xlaꞌ tāꞌchihuīnaꞌn Dios quimpālacatacaꞌn. Xlaꞌ huiꞌlachaꞌ na ixpekxtūcānaꞌj Dios nac aꞌkapūn.
\v 2 Xlaꞌ ūꞌtzaꞌ xapuxcuꞌ pālej nac templo tū huiꞌlachaꞌ nac aꞌkapūn. Tzamāꞌ templo tlahualh Dios ē jā tachiꞌxcuhuīꞌt.
\v 3 Ixlītlahuat chāꞌtin xapuxcuꞌ pālej, xlaꞌ mālacnūniꞌ Dios talakalhuꞌmān. Nā ixtasquiꞌnī Jesucristo namālacnūniꞌ Dios talakalhuꞌmān.
\v 4 Palh Jesucristo latlāꞌhuancus cahuālh nac cāꞌquilhtamacuj, xlaꞌ jā ixlalh līpālej, ixpālacata pālejniꞌ huāꞌtzāꞌ tamālacnūniꞌ Dios talakalhuꞌmān chuntzaꞌ chī līmāpaꞌksīn tū Dios maxquīꞌlh Moisés.
\v 5 Tū pālejniꞌ huāꞌtzāꞌ tatlahua, xlaꞌ chī xmān tatlahualakamakxtu tū tlahuacan nac aꞌkapūn. Nā chuntzaꞌ Moisés. Aꞌcxniꞌ xlaꞌ ixtlahuamāꞌlh xakoꞌxkaꞌ templo, Dios huanilh:
\q Catlaꞌhuaꞌkōꞌj chuntzaꞌ chī māsuꞌyuniꞌcaꞌ nac sipej tū huanican Sinaí.
\m
\v 6 Āꞌchulāꞌ xatze tū tlahua xapuxcuꞌ pālej tī Jesucristo. Āꞌchulāꞌ xatze talacāxtlahuan tū Jesucristo tlahualh, ixpālacata nalīkoꞌxamixa Dios. Huāꞌmāꞌ āꞌchulāꞌ xatze, ixpālacata chuntzaꞌ chī huāꞌmāꞌ talacāxtlahuan, Dios nacātlahuaniꞌ tachiꞌxcuhuīꞌt tū āꞌchulāꞌ xatze tamālacnūn.
\p
\v 7 Xapūla talacāxtlahuan jā aꞌcchāꞌlh tū ixtasquiꞌnī. Ūꞌtzaꞌ lītlahuaca ixlīꞌaꞌktuꞌ talacāxtlahuan.
\v 8 Dios ixcaꞌtzī tachiꞌxcuhuīꞌt jā tamākentaxtūlh. Tatzoꞌkniꞌ na ixtachihuīn Dios chuntzaꞌ chī Dios huanli:
\q Namin aꞌktin quilhtamacuj aꞌcxniꞌ quit naꞌictlahua aꞌktin xasāstiꞌ talacāxtlahuan.
\q Naꞌiccātāꞌcāxtlahua tachiꞌxcuhuīꞌt israelitas ē īꞌxūꞌnātāꞌnatnaꞌ Judá.
\q 	
\v 9 	 Jā chī talacāxtlahuan tū iccātāꞌtlahualh īꞌxūꞌnāpapnaꞌcaꞌn aꞌcxniꞌ iccāmāxtulh nac tiꞌyaꞌt jā huanican nac Egipto.
\q Xlacaꞌn jā tamākentaxtūlh talacāxtlahuan tū iccātāꞌtlahualh xlacaꞌn.
\q Ūꞌtzaꞌ iccālīmāpānūniꞌlh quit.
\q 	
\v 10 	 Aꞌcxniꞌ namin tzamāꞌ quilhtamacuj, naꞌiccātāꞌtlahua āꞌaꞌktin talacāxtlahuan tachiꞌxcuhuīꞌt israelitas.
\q Tzamāꞌ talacāxtlahuan chuntzaꞌ nala: Quit naꞌiccāmācaꞌtzīnī quilīmāpaꞌksīn.
\q Xlacaꞌn natakexmatniꞌcuꞌtun.
\q Quit ixDioscaꞌn naꞌicuan.
\q Xlacaꞌn quintachiꞌxcuhuīꞌt natahuan.
\q 	
\v 11 	 Jā tī chāꞌtin catihuanilh ixtāꞌtin nūn ixtāꞌchic: “Ixlacasquiꞌnca huiꞌx nalakapasaꞌ Dios.”
\q Jā chuntzaꞌ catitalāmāsuꞌyuniꞌlh, ixpālacata ixlīpōꞌktucaꞌn naquintalakapasa tī xalakaꞌtlaꞌ ē xalacstīn.
\q 	
\v 12 	 Quit naꞌiccālakalhuꞌman xlacaꞌn ē naꞌiccāxapaniꞌ ixcuentacaꞌn.
\q Jātzaꞌ maktin ictilacapāstacli ixcuentacaꞌn.
\m
\v 13 Dios līchihuīnaꞌnli āꞌaꞌktin xasāstiꞌ talacāxtlahuan. Chuntzaꞌ caꞌtzīcan xapūla talacāxtlahuan jātzaꞌ tū ixtapalh ē xamasniꞌtzaꞌ jātzaꞌ catimaclacasquiꞌnca.
\c 9
\s Chī makapāxuīcan Dios chuntzaꞌ chī xasāstiꞌ talacāxtlahuan
\p
\v 1 Xapūla talacāxtlahuan māsuꞌyuꞌlh chī līlaktaquilhpūtacan Dios. Aꞌntzaꞌ jā ixtakēstokcan nalaktaquilhpūtacan Dios, xlaꞌ ūꞌtzaꞌ ixtatlahuatcaꞌn tachiꞌxcuhuīꞌt.
\v 2 Tatlahualh aꞌktin templo tū xamakoꞌxkaꞌ. Ixkaꞌlhī aꞌktin luꞌxuꞌ tū ixmāpitzi aꞌktuꞌ cuarto. Xapūla cuarto ixuīꞌlh tū ixpūyāhuacan cera. Ixyālh aꞌktin mesa jā ixuīꞌlh pāntzīn tū ixlīlakatāyacan Dios. Huāꞌmāꞌ cuarto ixuanican Xatasicuaꞌlanātlahuan.
\v 3 Na ixchakēn luꞌxuꞌ ixuīꞌlh āꞌaꞌktin cuarto jā ixuanican Āꞌchulāꞌ Xatasicuaꞌlanātlahuan.
\v 4 Huāꞌmāꞌ cuarto ixyālh aꞌktin pūmacamāstāꞌn xaꞌoro jā īꞌlhcuyucan siyensu. Nā aꞌntzaꞌ ixuīꞌlh aꞌktin caja ixlīmactlahuacanīꞌt oro. Na ixpūlacniꞌ tzamāꞌ caja ixtojōmāꞌlh aꞌktin tlaꞌmaꞌnc xaꞌoro tū ixpūtojōmāꞌlh maná. Nā nac caja ixtojōmāꞌlh ixpālaꞌc Aarón tū ixaꞌkpuꞌnīꞌt ē nā aꞌktuꞌ chihuix jā ixtzoꞌkcanīꞌt aꞌkcāuj līmāpaꞌksīn.
\v 5 Na ixkelhniꞌ caja ixtayānaꞌlh chāꞌtuꞌ ángeles xaꞌoro. Ixpekencaꞌn ixtalakstaꞌnkaꞌnīꞌt na ixkelhniꞌ caja. Aꞌntzaꞌ jā ixmacamāstāꞌcan cuenta na ixlacatīn Dios. Chuhuaꞌj jātzaꞌ la ictilīchihuīnaꞌnli āꞌchulāꞌ.
\p
\v 6 Chuntzaꞌ ixlacāxlakōꞌnīꞌt ixlīpōꞌktu. Pālejniꞌ lakalī lakalī ixtatanū nac xapūla cuarto ē ixtatlahua tū ixtascujūtcaꞌn.
\v 7 Xmān xapuxcuꞌ pālej tzē ixtanū nac āꞌaꞌktin cuarto. Xmān maktin ixtanū aꞌktin cāꞌta. Aꞌcxniꞌ ixtanū, ixmānū kaꞌlhniꞌ tū ixmālacnūniꞌ Dios. Huāꞌmāꞌ tū ixmālacnū ixpālacata chu ūꞌtzaꞌ ē nā tū ixpālacatacaꞌn tachiꞌxcuhuīꞌt.
\v 8 Chuntzaꞌ Espíritu Santo quincāmāsuꞌyuniꞌyān līhuan ixlīmān xapuxcuꞌ pālej tzē ixtanū na ixlīꞌaꞌktuꞌ cuarto, jānaꞌj ixcāmāsuꞌyuniꞌ Dios chī nalītanūcan nac aꞌkapūn. Aꞌntzaꞌ nac aꞌkapūn jā āꞌchulāꞌ tasicuaꞌlanātlahuan.
\v 9 Huāꞌmāꞌ templo xakoꞌxkaꞌ huaꞌchi aꞌktin tatlahualakamakxtu chuntzaꞌ chī aꞌnan chuhuaꞌj. Masqui xlacaꞌn ixtamālacnū talakalhuꞌmān ē xatamaknīn animalh, xlacaꞌn jāla ixtacaꞌtzī palh ixlīcānaꞌ ixcāmāpānūniꞌlh ixcuentacaꞌn.
\v 10 Tahuiꞌlat tū ixtamākentaxtū, ixpālacata ūꞌtzaꞌ tū ixtahuaꞌ ē chu ūꞌtzaꞌ tū ixtalīpaxa ē chu ūꞌtzaꞌ tū ixtalīlakcheꞌkēꞌ ixpulātucaꞌn chuntzaꞌ chī ixtahuiꞌlatcaꞌn. Tzamāꞌ tahuiꞌlat ixtamākentaxtū aꞌcxniꞌ Dios jānaꞌj ixtlahua xasāstiꞌ talacāxtlahuan.
\p
\v 11 Chuhuaꞌj tlahuacanīꞌt xasāstiꞌ talacāxtlahuan. Cristo lītanūnīꞌt xapuxcuꞌ pālej. Xlaꞌ tlahua ixtascujūt xapuxcuꞌ pālej nac aꞌktin templo jā āꞌchulāꞌ kaꞌtlaꞌ ē āꞌchulāꞌ tze. Huāꞌmāꞌ templo jā ixtatlahuatcaꞌn chiꞌxcuhuīꞌn, ixpālacata jā xalaꞌ nac cāꞌquilhtamacuj.
\v 12 Āꞌmakapitzīn xapuxcuꞌ pālejniꞌ ixtatanū na ixlīꞌaꞌktuꞌ cuarto ē ixtamānū ixkaꞌlhniꞌcaꞌn chivo ē huācax. Tzamāꞌ kaꞌlhniꞌ ixtamālacnūniꞌ Dios. Kaꞌlhniꞌ tū Cristo mālacnūlh, xlaꞌ ūꞌtzaꞌ tū ixkaꞌlhniꞌ. Xmān maktin mālacnūlh. Chuhuaꞌj tanūnīꞌttzaꞌ nac aꞌkapūn jā āꞌchulāꞌ xatze. Ūꞌtzaꞌ tzē nalīxoko quincuentacaꞌn pōꞌktu quilhtamacuj.
\v 13 Pālejniꞌ xlacaꞌn ixtalīlacapaꞌlhnīniꞌn ixkaꞌlhniꞌcaꞌn chivos ē huācax ē xalhcaꞌcaꞌn huācax tū ixtalhcuyu.
\v 14 Ixkaꞌlhniꞌ Cristo tzē natlahua tū āꞌchulāꞌ xatze ē jā ixlaꞌ animalh. Maktāyalh Espíritu Santo tī huīꞌlh pōꞌktu quilhtamacuj. Chuntzaꞌ Cristo tamacamāstāꞌlh ē lītaxtulh aꞌktin talakalhuꞌmān na ixlacatīn Dios. Tzamāꞌ talakalhuꞌmān ixlīcānaꞌ xatze. Ixkaꞌlhniꞌ Cristo māpānū quincuentacaꞌn, ē chuntzaꞌ lakpalīlh quintalacapāstacniꞌcaꞌn. Chuhuaꞌj jātzaꞌ tū tū quincāmāmakchuyīyān chī xapūla ixtlahuayāuj tū jā tze. Chuntzaꞌ tzē tāꞌscujāuj Dios xalakahuan.
\p
\v 15 Cristo ūꞌtzaꞌ tī cāxtlahualh xasāstiꞌ talacāxtlahuan. Chuntzaꞌ Dios nacāsicuaꞌlanātlahua pōꞌktu quilhtamacuj xlacaꞌn tī cātaꞌsaniꞌnīꞌt, chuntzaꞌ chī Dios huanli xapūla. Cristo nīnīꞌttzaꞌ quimpālacatacaꞌn, ē chuntzaꞌ tzē nacāxapaniꞌ ixcuentacaꞌn tī tatlahuanīꞌt tū jā tze chuntzaꞌ chī huan līmāpaꞌksīn tū xapūla talacāxtlahuan.
\v 16 Aꞌcxniꞌ chāꞌtin chiꞌxcuꞌ tzoꞌka aꞌktin caꞌpsnap ixpālacata namāstāꞌ ixtalakalhuꞌmān, jānaꞌj tū ixtapalh aꞌcxniꞌ jānaꞌj laksputa tzamāꞌ chiꞌxcuꞌ.
\v 17 Aꞌcxniꞌ laksputa tī tlahuanīꞌt tzamāꞌ caꞌpsnap, aꞌcxniꞌcus quīlīmacuan tū ixtzoꞌknīꞌt.
\v 18 Nā chuntzaꞌ Dios aꞌcxniꞌ cātāꞌtlahualh xapūla talacāxtlahuan tachiꞌxcuhuīꞌt, ixtasquiꞌnī nanī lakatin animalh.
\v 19 Moisés xapūla cāhuanilh tachiꞌxcuhuīꞌt ixlīpōꞌktu chuntzaꞌ chī huanli līmāpaꞌksīn. Āꞌlīstān māꞌcaꞌlh ixmakchiꞌxit borrego tū xatzuꞌtzoꞌko na ixpekniꞌ hisopo ē līlakmojōlh ixkaꞌlhniꞌ huācax ē chivo tū ixtāꞌmālacxtuccanīꞌt xcān. Līlaxmaniꞌlh caꞌpsnap jā ixtatzoꞌkniꞌ līmāpaꞌksīn. Cālītlahualh kaꞌlhniꞌ na ixaꞌkxākcaꞌn tachiꞌxcuhuīꞌt.
\v 20 Huanli Moisés: “Huāꞌmāꞌ kaꞌlhniꞌ māsuꞌyu tzucunīꞌttzaꞌ talacāxtlahuan tū huiꞌxinaꞌn namākentaxtūyāꞌtit chuntzaꞌ chī māpaꞌksīniꞌnīꞌt Dios.”
\v 21 Nā chuntzaꞌ Moisés lītlahualh macstiꞌnaꞌj kaꞌlhniꞌ nac templo xakoꞌxkaꞌ ē nā ixlīpōꞌktu tū ixuīꞌlh aꞌntzaꞌ tū ixmaclacasquiꞌncan na ixlacatīn Dios.
\v 22 Chuntzaꞌ chī huan huāꞌmāꞌ līmāpaꞌksīn, kaꞌlhniꞌ pōꞌktu līxapacan cuenta. Palh jā tamālacnūniꞌ Dios kaꞌlhniꞌ, Dios jā cāmāsputūnuꞌniꞌ ixcuentacaꞌn tachiꞌxcuhuīꞌt.
\s Cristo cāmāpānūniꞌlh ixcuentacaꞌn tachiꞌxcuhuīꞌt
\p
\v 23 Chuntzaꞌ ixcālīcheꞌkēꞌcan ixkaꞌlhniꞌ huācax ixlīpōꞌktu tū ixuīꞌlh nac templo xakoꞌxkaꞌ. Tzamāꞌ xmān huaꞌchi tlahualakamakxtucan tū huiꞌlachaꞌ nac aꞌkapūn. Aꞌntzaꞌ nac aꞌkapūn ixlacasquiꞌnca namālacnūniꞌcan Dios aꞌktin talakalhuꞌmān tū āꞌchulāꞌ xatze. Cristo huiꞌlachaꞌ nac aꞌkapūn. Xlaꞌ ūꞌtzaꞌ mālacnūniꞌlh Dios aꞌktin talakalhuꞌmān. Huāꞌmāꞌ talakalhuꞌmān ūꞌtzaꞌ āꞌchulāꞌ xatze.
\v 24 Cristo jā aꞌntzaꞌ huīꞌlh nac templo tū tatlahuanīꞌt tachiꞌxcuhuīꞌt. Tzamāꞌ templo tū yālh nac cāꞌquilhtamacuj xmān huaꞌchi tlahualakamakxtucan tū huiꞌlachaꞌ nac aꞌkapūn. Cristo tanūnīꞌt nac aꞌkapūn. Aꞌntzaꞌ huīꞌlh na ixlacatīn Dios. Aꞌntzaꞌ squiꞌniꞌ Dios quimpālacatacaꞌn.
\v 25 Xapuxcuꞌ pālej xalaꞌ nac cāꞌquilhtamacuj, xlaꞌ tanū xmān maktin aꞌktin cāꞌta nac templo jā huanican Āꞌchulāꞌ Xatasicuaꞌlanātlahuan. Aꞌcxniꞌ tanū, lēꞌn aꞌktin talakalhuꞌmān tū ixkaꞌlhniꞌ animalh. Cristo jā chuntzaꞌ tlahualh. Jā maklhūhuaꞌ talacnūlh.
\v 26 Palh xlaꞌ ixtalacnūlh maklhūhuaꞌ, maklhūhuaꞌ ixnīlh aꞌcxniꞌ tzuculh cāꞌquilhtamacuj. Xlaꞌ jā maklhūhuaꞌ nīnīꞌt. Xmān maktin milh nac cāꞌquilhtamacuj aꞌcxniꞌ laksputli xapūla talacāxtlahuan. Nīlh ē chuntzaꞌ cālīmāpānūniꞌlh ixcuentacaꞌn tachiꞌxcuhuīꞌt.
\v 27 Quilīpōꞌktucaꞌn nanīyāuj xmān maktin. Āꞌlīstān Dios naquincākelhasquiꞌnīyān.
\v 28 Nā chuntzaꞌ Cristo, xmān maktin tlahualh talakalhuꞌmān ē chuntzaꞌ līxokolh ixcuentacaꞌn tachiꞌxcuhuīꞌt. Jātzaꞌ āꞌmaktin catimilh pātīniꞌn. Aꞌcxniꞌ namin ixlīmaktuꞌ, nacāmakapūtaxtūkōꞌ tī takaꞌlhīmāꞌnalh.
\c 10
\p
\v 1 Dios maxquīꞌlh Moisés līmāpaꞌksīn. Huāꞌmāꞌ līmāpaꞌksīn jāla quincātlahuaniꞌyān tū Cristo quincātlahuaniꞌyān. Tzamāꞌ līmāpaꞌksīn huaꞌchi tlahualakamakxtucanīꞌt tū āꞌchulāꞌ xatze. Chuntzaꞌ chī huan huāꞌmāꞌ līmāpaꞌksīn, cāꞌta cāꞌta chu ūꞌtzaꞌtzaꞌ tū tamālacnūniꞌ Dios talakalhuꞌmān. Tzamāꞌ talakalhuꞌmān tū mālacnūcan chuntzaꞌ chī huan tzamāꞌ līmāpaꞌksīn jāla cātlahua lactze xlacaꞌn tī chuntzaꞌ talīlaktaquilhpūta Dios.
\v 2 Palh tzamāꞌ līmāpaꞌksīn ixcāmāpānūniꞌlh cahuālh ixcuentacaꞌn, xlacaꞌn jātzaꞌ ixtitamakcaꞌtzīlh palh talaclēꞌncus, ē chuntzaꞌ ixtamakxtekli tamālacnū talakalhuꞌmān.
\v 3 Tzamāꞌ līmāpaꞌksīn jāla cāmāpānūniꞌ ixcuentacaꞌn. Tzamāꞌ talakalhuꞌmān tū mālacnūniꞌcan Dios, xlaꞌ xmān cāmāpāstaquī ixcuentacaꞌn cāꞌta cāꞌta.
\v 4 Tzamāꞌ talakalhuꞌmān jā cāmāpānūniꞌ ixcuentacaꞌn, ixpālacata ixkaꞌlhniꞌcaꞌn toros ē chivos jā tū līmacuan.
\p
\v 5 Ūꞌtzaꞌ līhuanli Cristo aꞌcxniꞌ ixmimāꞌlhtzaꞌ nac cāꞌquilhtamacuj, huanilh Dios:
\q Huiꞌx jā lacasquiꞌnaꞌ namālacnūniꞌcaꞌnaꞌ ixkaꞌlhniꞌ animalh ē nūn tū līlakatāyacaꞌnaꞌ.
\q Huiꞌx quincāxtlahuaniꞌnīꞌtaꞌ aꞌktin macniꞌ, ē chuntzaꞌ tzē naꞌictalacnū quinaꞌcstu.
\q 	
\v 6 	 Jā lakatīyaꞌ chī lakahuiꞌlīcaꞌnaꞌ animalh tū lhcuyucan nac pūmacamāstāꞌn.
\q Jā lakatīyaꞌ tū tamālacnū ixpālacata ixcuentacaꞌn.
\q 	
\v 7 	 Ūꞌtzaꞌ iclīhuanli: “Ē icmimāꞌlh ictlahua tū huiꞌx lacasquiꞌnaꞌ, Dios.”
\m
\v 8 Xapūla huanli Cristo chī Dios jā lakatī chī mālacnūniꞌcan xatamaknīn animalh ē tū līlakatāyacan ē xalakatin animalh tū lhcuyucan nac pūmacamāstāꞌn, ē jā lakatī tū tamālacnū ixpālacata nacāxapaniꞌcan ixcuentacaꞌn. Tzamāꞌ jā līpāxuhua Dios masqui tamālacnū talakalhuꞌmān chuntzaꞌ chī huan līmāpaꞌksīn.
\v 9 Āꞌlīstān Cristo huanli: “Ūꞌtzaꞌ iclīminīꞌt ictlahua tū huiꞌx lacasquiꞌnaꞌ, Dios.” Dios māpānūlh talacāxtlahuan xalaꞌ makāstzaꞌ ē huiꞌlīlh tū āꞌxmān xasāstiꞌ.
\v 10 Jesucristo tlahualh chuntzaꞌ chī ixtalacasquiꞌnīn Dios. Xmān maktin mālacnūniꞌlh Dios ixmacniꞌ. Chuntzaꞌ cālītlahualh lactze tachiꞌxcuhuīꞌt pōꞌktu quilhtamacuj.
\p
\v 11 Ixlīpōꞌktucaꞌn pālejniꞌ tī israelitas tatlahua ixtascujūtcaꞌn lakalī lakalī. Maklhūhuaꞌ tamālacnū chu ūꞌtzaꞌtzaꞌ talakalhuꞌmān. Tzamāꞌ talakalhuꞌmān jā maktin caticāmāpānūniꞌlh ixcuentacaꞌn tachiꞌxcuhuīꞌt.
\v 12 Cristo xmān maktin nīlh. Chuntzaꞌ līmālacnūlh aꞌktin talakalhuꞌmān tū tāyaniꞌ pōꞌktu quilhtamacuj. Palaj tunca tahuīꞌlh na ixpekxtūcānaꞌj Dios, ixpālacata Cristo nā xlaꞌ māpaꞌksīniꞌn.
\v 13 Aꞌntzaꞌ kaꞌlhīmāꞌlh hasta aꞌcxniꞌ Dios nacātlaja ixtāꞌlāquiclhlaktziꞌ ē nacāmāmākentaxtūnī tū lacasquiꞌn Cristo.
\v 14 Cristo mālacnūniꞌnīꞌt Dios xmān aꞌktin talakalhuꞌmān. Ūꞌtzaꞌ cālītlahualh lactze pōꞌktu quilhtamacuj na ixlacatīn Dios ixlīpōꞌktucaꞌn tī cāxapaniꞌnīꞌt ixcuentacaꞌn.
\v 15 Espíritu Santo nā chuntzaꞌ huan. Tatzoꞌkniꞌ na ixtachihuīn Dios chī huanli xapūla:
\q 	
\v 16 	 Āꞌlīstān naꞌiccātāꞌtlahua xlacaꞌn aꞌktin talacāxtlahuan, huanli Dios.
\q Chuntzaꞌ nala: Quit naꞌiccāmākexmatī quilīmāpaꞌksīn.
\q Quit naꞌiccālakpalīniꞌ ixlīstacnaꞌcaꞌn ē ūꞌtzaꞌ natalīmākentaxtūcuꞌtun.
\m
\v 17 Āꞌlīstān huanli:
\q Jātzaꞌ icticālacapāstacniꞌlh ixcuentacaꞌn.
\q Jātzaꞌ icticālacapāstacniꞌlh tū jā tze tū tatlahualh.
\m
\v 18 Chuntzaꞌ Dios quincāmātzaꞌnkēnaꞌniꞌnīꞌtaꞌn. Jātzaꞌ ixlacasquiꞌnca namālacnūniꞌyāuj Dios āꞌaꞌktin talakalhuꞌmān tū naquincāmāpānūniꞌyān quincuentacaꞌn.
\s Ixlacasquiꞌnca nalaktalacatzunaꞌjīyāuj Dios
\p
\v 19 Chuhuaꞌj, tāꞌtimīn, Cristo nīlh quimpālacatacaꞌn, ē chuntzaꞌ chuhuaꞌj jā tijicuaꞌnāuj natāꞌchihuīnaꞌnāuj Dios. Xlaꞌ huiꞌlachaꞌ nac aꞌkapūn jā sicuaꞌlanālanīꞌt.
\v 20 Cristo nīnīꞌttzaꞌ quimpālacatacaꞌn, ē quincāmālaquīꞌniꞌnīꞌtaꞌn pōꞌktu quilhtamacuj jā lactanūcan nac aꞌkapūn. Chuntzaꞌ tzē nalaktalacatzunaꞌjīyāuj Dios.
\v 21 Cristo, ūꞌtzaꞌ xapuxcuꞌ pālej. Xlaꞌ squiꞌniꞌ Dios quimpālacatacaꞌn quinaꞌn tī tapaꞌksīniꞌyāuj Dios.
\v 22 Ūꞌtzaꞌ nalīlaktalacatzunaꞌjīyāuj Dios ē ūꞌtzaꞌ nalīmakapāxuīyāuj ixpālacata līpāhuanāuj Dios ē tlahuacuꞌtunāuj tū xlaꞌ lacasquiꞌn, ē ixpālacata caꞌtzīyāuj quincuentacaꞌn quincāmātzaꞌnkēnaꞌniꞌnīꞌtaꞌntzaꞌ. Huaꞌchi cālīmakcheꞌkēꞌcanīꞌttzaꞌ quimacniꞌcaꞌn xastalaꞌnkaꞌ xcān.
\v 23 Jā tilakachāꞌniꞌyāuj nūn macstiꞌnaꞌj chī kaꞌlhīmāꞌnauj. Dios pōꞌktu quilhtamacuj mākentaxtū tū huan.
\v 24 Nalālacapāstacāuj chāꞌtunuꞌ quinaꞌn. Nalāmaktāyayāuj. Chuntzaꞌ āꞌchulāꞌ nalāpāxquīꞌyāuj ē āꞌchulāꞌ natlahuayāuj tū tze.
\v 25 Makapitzīn jātzaꞌ tatāꞌtalacxtimī tī taꞌaꞌkaꞌīꞌniꞌ Dios. Xatze natalacxtimīyāuj. Chuntzaꞌ nalāmāhuixcānīyāuj. Huāꞌmāꞌ ūꞌtzaꞌ ixlacasquiꞌnca ixpālacata caꞌtzīyāꞌtit huiꞌxinaꞌn talacatzunaꞌjīmāꞌlhtzaꞌ quilhtamacuj aꞌcxniꞌ namimpala Cristo.
\p
\v 26 Palh chāꞌtin mācaꞌtzīnīcanīꞌt tū ixlīcānaꞌ ē palh lakmakaꞌn Jesucristo, chuntzaꞌ jā tū aꞌnampala tū namāpānū ixcuenta.
\v 27 Najicuaꞌn tū naꞌaꞌkspula aꞌcxniꞌ Dios naputzānaꞌnī. Dios namakapātīnīn nac macscut jā nacālhcuyu ixtāꞌlāquiclhlaktziꞌ.
\v 28 Chuntzaꞌ chī huan līmāpaꞌksīn tū Dios maxquīꞌlh Moisés, palh chāꞌtuꞌ o kelhatuꞌtun testigos ixtahuan palh chāꞌtin chiꞌxcuꞌ jā ixmākentaxtū līmāpaꞌksīn, ūꞌtzaꞌ ixtalīmaknī. Jā ixtalakalhuꞌman.
\v 29 Chuntzaꞌ ixcāmakapātīnīncan tī jā ixtamākentaxtū līmāpaꞌksīn xalaꞌ makāstzaꞌ. Āꞌchulāꞌ namakapātīnīncan palh chāꞌtin lakmakaꞌnīꞌt Cristo ē palh puhuanīꞌt jā tū ixtapalh ixkaꞌlhniꞌ Jesucristo. Jesucristo, ūꞌtzaꞌ tī nīlh ē līxapalh ixkaꞌlhniꞌ quincuentacaꞌn chuntzaꞌ chī xasāstiꞌ talacāxtlahuan. Catīxcuhuālh tī lakmakaꞌn Jesucristo namakapātīnīncan ixpālacata lakmakaꞌn ixEspíritu Dios tī quincālakalhuꞌmanān.
\v 30 Caꞌtzīyāuj Dios huanli: “Xmān quit tzē naꞌiccāmakapātīnīn tī tatlahua tū jā tze. Quit naquintaxokoniꞌ. Quit Māpaꞌksīniꞌ ē quit naꞌiccāputzānaꞌnī quintachiꞌxcuhuīꞌt.”
\v 31 Lījicuaꞌ palh ixpātīniꞌuj na ixmacan Dios xalakahuan.
\p
\v 32 Calacapāstactit huiꞌxinaꞌn chī cāꞌaꞌkspulan xapūla aꞌcxniꞌ chūꞌcus cātamāsuꞌyuniꞌn ixtachihuīn Dios. Huiꞌxinaꞌn ixpātīniꞌnāꞌtit aꞌcxniꞌ ixcātaputzastālaniꞌyān.
\v 33 Makatunuꞌ ixcātalakapalayān ē ixcātatucsān nac cāꞌlhūhuaꞌlacatīn. Chuntzaꞌ chī tapātīniꞌlh āꞌmakapitzīn chuntzaꞌ pātīniꞌntit huiꞌxinaꞌn.
\v 34 Ixcālakalhumaꞌnāꞌtit huiꞌxinaꞌn aꞌcxniꞌ ixcāmānūcan makapitzīn nac pūlāchīꞌn. Aꞌcxniꞌ lēꞌnca tū ixkaꞌlhīꞌyāꞌtit, huiꞌxinaꞌn jā līlīpuhuantit ixpālacata caꞌtzīyāꞌtit kaꞌlhīꞌyāꞌtit nac aꞌkapūn tū āꞌchulāꞌ xatze ē tū jā maktin catisputli.
\v 35 Chuhuaꞌj, jā catamakchuyīꞌtit. Calacapāstactit namaktīniꞌnāꞌtit mintatlajcaꞌn xalaꞌ nac aꞌkapūn.
\v 36 Catāyaniꞌtit. Jā timakxtekāꞌtit natlahuaꞌyāꞌtit tū Dios lacasquiꞌn. Chuntzaꞌ namaktīniꞌnāꞌtit tū Dios quincāmālacnūniꞌnīꞌtaꞌn.
\v 37 Tatzoꞌkniꞌ na ixtachihuīn Dios chī Dios huanli:
\q Jātzaꞌ āꞌmakās sputa, namin tī ixlīminit ē jātzaꞌ catitanajīlh.
\q 	
\v 38 	 Ixlīpōꞌktucaꞌn tī Dios cāmāpānūniꞌ ixcuentacaꞌn ixpālacata talīpāhuan Dios, xlacaꞌn pōꞌktu quilhtamacuj natakaꞌlhī xasāstiꞌ ixlatamatcaꞌn.
\q Palh tī nataxtutāya na quintej, jā tze caꞌictimakcaꞌtzīlh.
\m
\v 39 Quinaꞌn jā huaꞌchi āꞌmakapitzīn tī tataxtutāya na ixtej Dios ē tatzaꞌnkā. Quinaꞌn līpāhuanāuj Dios ē aꞌkapūtaxtunīꞌtaujtzaꞌ.
\c 11
\s Tzej talatlāꞌhuan xlacaꞌn tī taꞌaꞌkaꞌīꞌ
\p
\v 1 Līpāhuanāuj Dios, ē chuntzaꞌ caꞌtzīyāuj namaktīniꞌnāuj tū kaꞌlhīmāꞌnauj. Nā caꞌtzīyāuj aꞌnan tū jānaꞌj maktin laktzīꞌnāuj.
\v 2 Tachiꞌxcuhuīꞌt xalakmakās, xlacaꞌn ixtamakapāxuī Dios, ixpālacata xlacaꞌn ixtalīpāhuan Dios.
\p
\v 3 Nā quinaꞌn līpāhuanāuj Dios ē chuntzaꞌ caꞌtzīyāuj Dios tlahualh cāꞌquilhtamacuj ē chiꞌchiniꞌ ē mālhcuyuꞌ ē ixlīpōꞌktu tū aꞌnan nac aꞌkapūn. Dios chihuīnaꞌnli ē chuntzaꞌ tlahuakōꞌlh. Dios cātlahualh pōꞌktu tū tasuꞌyu, masqui xapūla jā tū ixaꞌnan tū tzē ixlaktzīꞌncan.
\p
\v 4 Abel ixlīpāhuan Dios, ē chuntzaꞌ xlaꞌ mālacnūniꞌlh Dios aꞌktin talakalhuꞌmān tū xatze ē jā chī mālacnūlh Caín. Abel ixlīpāhuan Dios, ē chuntzaꞌ Dios laktzīꞌlh tze. Dios maktīniꞌlh talakalhuꞌmān tū Abel mālacnūniꞌlh. Chuntzaꞌ Abel, masqui nīnīꞌttzaꞌ, quincāmāsuꞌyuniꞌyān chī nalīpāhuanāuj Dios.
\p
\v 5 Nā Enoc ixlīpāhuan Dios ē ūꞌtzaꞌ jā līnīlh. Dios lēꞌlh nac aꞌkapūn. Jāla maclaca, ixpālacata Dios ixlēꞌnīꞌt. Ixtachihuīn Dios huan aꞌcxniꞌ Enoc ixlatlāꞌhuancus nac cāꞌquilhtamacuj, xlaꞌ ixmakapāxuī Dios.
\v 6 Nūn chāꞌtin tzē namakapāxuī Dios palh jā līpāhuan Dios. Tī tamin talaktaquilhpūta Dios, ixlacasquiꞌnca tzej nataꞌaꞌkaꞌīꞌ Dios huīꞌlh ē cāmaktāya tī natalīputza ixlīpōꞌktu ixlīstacnaꞌcaꞌn.
\p
\v 7 Nā Noé ixlīpāhuan Dios ē aꞌkaꞌīꞌlh ixlīcānaꞌ chī Dios ixuaninīꞌt namin aꞌktin lakuat. Ixjicuaꞌn, ē ūꞌtzaꞌ lītlahualh aꞌktin barco. Chuntzaꞌ taꞌaꞌkapūtaxtulh xalanīꞌn na ixchic. Noé mākentaxtūlh tū Dios ixuaninīꞌt, ē chuntzaꞌ ixlītasuꞌyu āꞌmakapitzīn jā lactze ixtahuanīꞌt ixpālacata xlacaꞌn jā ixtaꞌaꞌkaꞌīꞌ tū ixuanīꞌt Dios. Noé ixlīpāhuan Dios, ē ūꞌtzaꞌ Dios līmāpānūniꞌlh ixcuenta.
\p
\v 8 Nā Abraham ixlīpāhuan Dios. Kexmatniꞌlh aꞌcxniꞌ Dios huanilh naꞌaꞌn nac aꞌktin tiꞌyaꞌt tū Dios namaxquīꞌ. Abraham taxtulh na ixcāꞌlacchicniꞌ, masqui jā ixcaꞌtzī jā nachāꞌn.
\v 9 Abraham ixlīpāhuan Dios, ē chuntzaꞌ xlaꞌ chāꞌlh jā namaxquīꞌcan tiꞌyaꞌt, chuntzaꞌ chī Dios ixuaninīꞌt. Ixtlahuanīꞌt ixaꞌcchic jā ixuīꞌlh huaꞌchi chāꞌtin xaminiꞌ. Nā chuntzaꞌ ixuīꞌlh ixkaꞌhuaꞌcha tī ixuanican Isaac ē nā ixtāꞌnat tī ixuanican Jacob. Xlacaꞌn nā Dios cāmaxquīꞌlh tiꞌyaꞌt.
\v 10 Chuntzaꞌ ixlīhuīꞌlh Abraham ixpālacata ixkaꞌlhīmāꞌlh ixchāꞌlh nac cāꞌlacchicniꞌ tū Dios ixtlahuanīꞌt chuntzaꞌ chī ixtalacasquiꞌnīn. Huāꞌmāꞌ cāꞌlacchicniꞌ jā maktin catisputli.
\p
\v 11 Āꞌnā Sara ixlīpāhuan Dios. Ūꞌtzaꞌ tzē līkaꞌlhīlh chāꞌtin īꞌskaꞌtaꞌ masqui chāꞌlūhuaꞌtzaꞌ ixuanīꞌt. Masqui ixtēlakatzāꞌlanīꞌttzaꞌ ixquilhtamacuj, Sara aꞌkaꞌīꞌlh Dios namākentaxtū tū ixuanīꞌt.
\v 12 Chuntzaꞌ Dios maxquīꞌlh chāꞌtin īꞌskaꞌtaꞌ Abraham masqui kōluꞌtzaꞌ ixuanīꞌt. Īꞌxūꞌnātāꞌnatnaꞌ Abraham talhūhuaꞌnli huaꞌchi staꞌcu ē cucujnuꞌ tū tahuiꞌlānaꞌlh na ixquilhtūn mar. Talhūhuaꞌnli ē jāla cāpūtleꞌkekōꞌcan.
\p
\v 13 Abraham ē Isaac ē Jacob tanīlh. Aꞌcxniꞌ tanīlh, jānaꞌj ixtamaktīniꞌn tū Dios ixmālacnūnīꞌt. Xmān ixtalaktzīꞌn makat. Tapāxuhualh ixpālacata ixtacaꞌtzī Dios nacāmākentaxtūniꞌ tū ixcāhuaninīꞌt. Xlacaꞌn tzej ixtacaꞌtzī ixtalatlāꞌhuan huaꞌchi tejetlāꞌhuaꞌniꞌ nac cāꞌquilhtamacuj.
\v 14 Chuntzaꞌ ixtalīchihuīnaꞌn xlacaꞌn, ē chuntzaꞌ ixtasuꞌyu ixtaputzamāꞌnalh cāꞌlacchicniꞌ.
\v 15 Xlacaꞌn jā ixtalacapāstacmāꞌnalh ixcāꞌlacchicniꞌcaꞌn jā ixtataxtunīꞌtaꞌnchaꞌ. Palh chuntzaꞌ ixtapuhuanli, ixtataspiꞌtli tzamāꞌ nac cāꞌlacchicniꞌ.
\v 16 Xlacaꞌn jā ixtalacapāstaca ixcāꞌlacchicniꞌcaꞌn jā ixtataxtunīꞌtaꞌnchaꞌ. Ixtalacapāstaca āꞌlacatin cāꞌlacchicniꞌ jā āꞌchulāꞌ xatze ē tū huiꞌlachaꞌ nac aꞌkapūn. Ūꞌtzaꞌ Dios jā cālīmāxanaꞌn aꞌcxniꞌ xlacaꞌn tahuan ūꞌtzaꞌ ixDioscaꞌn. Dios cāxuiꞌlīnīꞌt aꞌktin cāꞌlacchicniꞌ nac aꞌkapūn jā xlacaꞌn natatahuiꞌla.
\p
\v 17 Nā Abraham ixlīpāhuan Dios. Ūꞌtzaꞌ ixaꞌmāꞌlh līmaknī Isaac tī xmān chāꞌtin ixkaꞌhuaꞌcha ixuanīꞌt. Ixmaxquīꞌcuꞌtun huaꞌchi aꞌktin talakalhuꞌmān Dios. Chuntzaꞌ Dios ixmāpaꞌksīnīꞌt ixpālacata ixlacasquiꞌn Abraham namāsuꞌyu palh ixlīcānaꞌ ixpāxquīꞌ Dios.
\v 18 Abraham ixkexmatniꞌcuꞌtun Dios, masqui Dios ixuaninīꞌt ixpālacata Isaac, Abraham nacākaꞌlhī lhūhuaꞌ īꞌxūꞌnātāꞌnatnaꞌ.
\v 19 Abraham ixaꞌmāꞌlh maknī Isaac chuntzaꞌ chī Dios ixuaninīꞌt, ixpālacata ixcaꞌtzī Dios namaxquīꞌpala ixlatamat. Jā makās īꞌsputa ixmaknīca Isaac. Dios maxquīꞌpālh ixlatamat.
\p
\v 20 Āꞌnā Isaac ixlīpāhuan Dios. Ūꞌtzaꞌ cālīhuanilh ixkaꞌhuaꞌchan chī Dios nacāsicuaꞌlanātlahua. Ixcamanaꞌ ixcāhuanican Jacob ē Esaú.
\v 21 Nā Jacob ixlīpāhuan Dios. Ūꞌtzaꞌ cālīhuanilh ixnatāꞌnatnaꞌ, tī ixkaꞌhuaꞌchan José, chī Dios nacāsicuaꞌlanātlahua. Chuntzaꞌ cāhuanilh aꞌcxniꞌ nanītzaꞌ. Lītaquilhpūtalh ixpālaꞌc ē makapāxuīlh Dios.
\v 22 Nā José ixlīpāhuan Dios. Chuntzaꞌ aꞌcxniꞌ jātzaꞌ makās īꞌsputa nanī, xlaꞌ huanli israelitas natataxtu nac Egipto. Nā huanilh José nacālēꞌncan ixlaclucutnuꞌ aꞌcxniꞌ natataxtu aꞌntzaꞌ.
\p
\v 23 Ixtātaꞌ ē ixtzīꞌ Moisés nā ixtalīpāhuan Dios. Puxcuꞌ māpaꞌksīniꞌlh nacāmaknīkōꞌcan ixlīpōꞌktu lacstīn xmān lakaꞌhuaꞌchan. Moisés mātzēꞌkca aꞌcxniꞌ ixlacatuncuhuīꞌnīꞌtcus. Xlacaꞌn talaktzīꞌlh tzēhuanīꞌt ixuanīꞌt ē tamātzēꞌkli aꞌktuꞌtun mālhcuyuꞌ. Jā tajicuaꞌniꞌlh ixlīmāpaꞌksīn puxcuꞌ.
\v 24 Nā Moisés ixlīpāhuan Dios. Aꞌcxniꞌ chiꞌxcuꞌtzaꞌ ixuanīꞌt, jātzaꞌ ixtahuiꞌlacuꞌtun na ixchic puxcuꞌ xalaꞌ nac Egipto, aꞌntzaꞌ jā ixmakastacnīꞌt ixtzuꞌmaꞌjāt puxcuꞌ.
\v 25 Moisés jātzaꞌ tahuiꞌlacuꞌtunli āꞌchulāꞌ na ixchic puxcuꞌ, ixpālacata aꞌntzaꞌ ixlīpāxuacan tū jā tze. Xlaꞌ puhuanli āꞌchulāꞌ tze nacātāꞌtahuiꞌla ixtachiꞌxcuhuīꞌt Dios masqui capātīniꞌlh.
\v 26 Moisés puhuanli āꞌchulāꞌ xatze kexmatniꞌcan Cristo masqui ixlīlakmakaꞌnca. Puhuanli jā kaꞌlhī ixtapalh ixlīricujcaꞌn xalaꞌ nac Egipto. Xlaꞌ jā lakpuhuanli tū xalaꞌ nac cāꞌquilhtamacuj. Xlaꞌ lakpuhuanli tū xalaꞌ nac aꞌkapūn.
\v 27 Moisés ixlīpāhuan Dios, ē xlaꞌ taxtulh nac Egipto. Jā ixjicuaꞌniꞌ puxcuꞌ, masqui ixcaꞌtzī palh ixsītzīꞌlh. Pōꞌktu quilhtamacuj kexmatniꞌlh Dios. Xlaꞌ huaꞌchi ixlaktzīꞌnīꞌt Dios, masqui jāla laktzīꞌncan.
\p
\v 28 Moisés ixlīpāhuan Dios. Chuntzaꞌ cāhuanilh israelitas natamaknī borregos ē natalītlahua macstiꞌnaꞌj ixkaꞌlhniꞌ na ixmākelhchacaꞌn. Chuntzaꞌ ángel jā cāmaknīlh ixlīmaksāstiꞌcaꞌn israelitas aꞌcxniꞌ cāmaknīlh ixlīmaksāstiꞌcaꞌn xalanīꞌn nac Egipto.
\v 29 Israelitas ixtalīpāhuan Dios. Xlacaꞌn tapātacutli Mar Xatzuꞌtzoꞌko huaꞌchi nac cāꞌtiꞌyaꞌtnaꞌ jā cāꞌscahuahua. Xalanīꞌn nac Egipto tī ixtastālaniꞌ, aꞌcxniꞌ titapātacutcuꞌtunli, xlacaꞌn tajicsuaꞌkōꞌlh.
\p
\v 30 Israelitas ixtalīpāhuan Dios, ē chuntzaꞌ xlacaꞌn aꞌktojon quilhtamacuj ixtatāꞌtamacxtiꞌliꞌtlāꞌhuan cāꞌlacchicniꞌ tū ixuanican Jericó. Chuntzaꞌ līꞌaꞌkāꞌlh talhtaꞌm xachihuix tū ixlītamacstiꞌliꞌnīꞌt cāꞌlacchicniꞌ.
\v 31 Cāmaknīca tī xalanīꞌn nac Jericó tī jā takexmatniꞌcuꞌtunli Dios. Rahab, tī pūla xamaklaniꞌ ixuanīꞌt, xlaꞌ jā maknīca. Rahab ixlīpāhuan Dios, ē xlaꞌ ixcāmānūnīꞌt na ixchic israelitas tī ixtaꞌaꞌnīꞌt talaktzīꞌhuiꞌlīniꞌn nac tzamāꞌ tiꞌyaꞌt. Ūꞌtzaꞌ jā talīmaknīlh Rahab.
\p
\v 32 Jā ixlacasquiꞌnca āꞌchulāꞌ naꞌiccālīhuaniyān āꞌmakapitzīn tī talīpāhuanli Dios. Jā ickaꞌlhī quilhtamacuj naꞌiccāhuaniyān tū tatlahualh Gedeón ē Barac ē Sansón ē Jefté ē David ē Samuel ē ixaꞌkchihuīnaꞌnīꞌn Dios.
\v 33 Xlacaꞌn ixtalīpāhuan Dios. Ūꞌtzaꞌ talīskāhuīꞌlh āꞌmakapitzīn cāꞌlacchicniꞌ, ē ixtamāpaꞌksī. Ixtatlahua tū tze, ē Dios cāsicuaꞌlanātlahualh chuntzaꞌ chī ixcāhuaninīꞌt. Āꞌmakapitzīn ixcālaktamaknūcan leones. Dios cāmaktāyalh ē chuntzaꞌ jā cāhuaꞌlh.
\v 34 Āꞌmakapitzīn ixcāmāpūꞌcan nac macscut. Xlacaꞌn jā talhculh. Āꞌmakapitzīn ixcālīmaknīcuꞌtuncan espada. Xlacaꞌn taꞌaꞌkapūtaxtulh. Masqui xlacaꞌn jā lactliꞌhuiꞌquin ixtahuanīꞌt, Dios cāmātliꞌhuiꞌclhli. Jā ixtajicuaꞌn. Ixtatlahua lāmaknīn ē ixtamakatzāꞌla ixtāꞌlāquiclhlaktziꞌcaꞌn.
\v 35 Makapitzīn puscan, Dios cāmālacastālancuanīniꞌlh ixcamanaꞌcaꞌn, tī ixtanīnīꞌtcus.
\p Āꞌmakapitzīn tachiꞌxcuhuīꞌt tzej cāmakapātīnīnca hasta jā tanīlh. Palh xlacaꞌn ixtakelhtatzēꞌkli tū ixtaꞌaꞌkaꞌīꞌ, jātzaꞌ ixticāmakapātīnīnca. Xlacaꞌn jā takelhtatzēꞌkli, ixpālacata ixtacaꞌtzī natakaꞌlhī ixlatamatcaꞌn tū xatze aꞌcxniꞌ Dios nacāmālacastālancuanī nīnīꞌn.
\v 36 Āꞌmakapitzīn cālakapalaca ē cāmaksnoꞌkca. Āꞌmakapitzīn cāmānūca nac pūlāchīꞌn ē cātūpixuiꞌlīca līcāꞌn.
\v 37 Āꞌmakapitzīn cācuctaꞌlamaknīca. Āꞌmakapitzīn cālacxuaꞌtaꞌhuiꞌlīca. Āꞌmakapitzīn cālīmaknīca espada. Āꞌmakapitzīn ixtaꞌaꞌcuantlāꞌhuan ē ixtalhakāꞌ ixkoꞌxkaꞌ purecuꞌ ē chivos. Lacxcamanīnīꞌn ixtahuanīꞌt. Ixcālakmakaꞌncan ē ixcāmakapātīnīncan.
\v 38 Ixtatzāꞌlatlāꞌhuan nac cāꞌtzayaꞌnca tiꞌyaꞌt ē nac cāꞌkēstīnīꞌn. Ixtahuiꞌlānaꞌlh nac lhuꞌcuꞌ ē na ixtampīn chihuix. Xalanīꞌn nac cāꞌquilhtamacuj ixtapuhuan jā tū ixtapalhcaꞌn tī ixtaꞌaꞌkaꞌīꞌ, ē masqui āꞌchulāꞌ ixtapalhcaꞌn.
\v 39 Tzamāꞌ tachiꞌxcuhuīꞌt ixtalīpāhuan Dios ē ixtamakapāxuī Dios. Masqui ixtalīpāhuan Dios, xlacaꞌn jā tamaktīniꞌnkōꞌlh ixlīpōꞌktu tū Dios ixcāmālacnūniꞌnīꞌt.
\v 40 Dios ixlacasquiꞌn aꞌcxtim ixquincātatāꞌlan, ixpālacata lactze ixtalītaxtulh chuntzaꞌ chī quinaꞌn.
\c 12
\s Calaktzīꞌlēuj Cristo
\p
\v 1 Quinaꞌn caꞌtzīyāuj chī tzamāꞌ chiꞌxcuhuīꞌn ixtalīpāhuan Dios. Masqui xlacaꞌn tapātīniꞌlh, jā tataspiꞌtli na ixtej Dios. Quinaꞌn cacāmakscaꞌtui xlacaꞌn. Chuntzaꞌ camakxtekkōꞌuj tū quincāmāmakchuyīyān na ixtej Dios. Jātzaꞌ catlahuáuj tū jā tze, masqui jicslīhuaꞌ makxtekcan. Jā calakachāꞌniꞌuj natlahuayāuj ixtalacasquiꞌnīn Dios.
\v 2 Chuhuaꞌj calaktzīꞌlēuj Jesucristo. Quinaꞌn tī aꞌkaꞌīꞌyāuj Jesucristo quincāmakapūtaxtūnīꞌtaꞌntzaꞌ. Xlaꞌ naquincāmaktāyayān naꞌaꞌkaꞌīꞌyāuj āꞌchulāꞌ tihuiꞌlānaꞌujcus. Xlaꞌ pātīniꞌlh aꞌcxniꞌ nīlh nac cruz. Masqui lakmakaꞌnca ē masqui pātīniꞌlh, xlaꞌ pātīkōꞌlh ixpālacata ixcaꞌtzī āꞌlīstān napāxuhua. Chuhuaꞌj huīꞌlh na ixpekxtūcānaꞌj Dios nac aꞌkapūn jā tāꞌmāpaꞌksīniꞌn Dios.
\p
\v 3 Capāstactit chī pātīniꞌlh Jesucristo ē chī ixtatāꞌlāhuani chiꞌxcuhuīꞌn tī ixtaquiclhlaktzīꞌn. Chuntzaꞌ jā calakachipiniꞌntit masqui pātīniꞌmpāꞌnaꞌntit. Jā camakxtektit natlahuaꞌyāꞌtit ixtalacasquiꞌnīn Dios.
\v 4 Masqui lhūhuaꞌtzaꞌ tū pātīnīꞌtaꞌntit, jā ixtāꞌchuntzaꞌ chī tapātīniꞌlh āꞌmakapitzīn tī cāmaknīca.
\v 5 Palhāsāꞌ pātzaꞌnkānīꞌtaꞌntit ixtachihuīn Dios jā Dios quincāmaxquīꞌyān talacapāstacniꞌ ē quincālaktzīꞌnān huaꞌchi ixlacstīn. Chuntzaꞌ huan:
\q Tzej calacapāstacti aꞌcxniꞌ Dios cāstacyāhuayān.
\q Jā calakachipiniꞌ aꞌcxniꞌ xlaꞌ lacaquilhnīyān.
\q 	
\v 6 	 Dios cālacaquilhnī ixlīpōꞌktucaꞌn tī cāpāxquīꞌ.
\q Cālacaquilhnī ixlīpōꞌktucaꞌn tī cātlahuanīꞌt ixlacstīn.
\m
\v 7 Catāyaniꞌtit aꞌcxniꞌ cālacaquilhnīyān. Palh Dios cālacaquilhnīyān, chuntzaꞌ lītasuꞌyuyāꞌtit ixlacstīn huiꞌxinaꞌn. Ixlacasquiꞌnca chāꞌtin xatātaꞌ nacālacaquilhnī ixlacstīn.
\v 8 Dios cālacaquilhnī ixlīpōꞌktucaꞌn ixlacstīn. Palh jā cahuālh ixcālacaquilhnīn chuntzaꞌ ixtasuꞌyulh huiꞌxinaꞌn jā ixlīcānaꞌ ixlacstīn Dios.
\v 9 Aꞌcxniꞌ quincāmakastacniꞌ quintātaꞌcaꞌn, ixquincālacaquilhnīyān ē quinaꞌn ixcālakachiꞌxcuhuīꞌyāuj. Āꞌchulāꞌ ixlacasquiꞌnca quinaꞌn nakexmatniꞌyāuj quinTātaꞌcaꞌn Dios tī quincāmaxquīꞌyān quilatamatcaꞌn tū jā catilaksputli.
\v 10 Quintātaꞌcaꞌn tī xalanīꞌn nac cāꞌquilhtamacuj, xlacaꞌn ixquincālacaquilhnīyān chuntzaꞌ chī ixtalacpuhuan. Xlacaꞌn ixtalacasquiꞌn līlacatejtin ixlatāꞌkchokouj nac cāꞌquilhtamacuj. Nā Dios quincālacaquilhnīyān, ixpālacata quincālacapāstacān. Xlaꞌ lacasquiꞌn quinaꞌn lactze nahuanāuj chī xlaꞌ.
\v 11 Aꞌcxniꞌ quincālacaquilhnīyān, līpuhuanāuj. Masqui quincātamālakaputzīyān, āꞌlīstān tze lītaxtuyāuj, ē chuntzaꞌ līscaꞌtāuj.
\s Lījicuaꞌ palh jā nakexmatniꞌyāuj Dios
\p
\v 12 Chuhuaꞌj calāmāhuixcānīꞌtit ē jā cataxlaꞌjuaniꞌtāyaꞌtit.
\v 13 Tzej catlāꞌhuaꞌntit na ixtej Dios. Chuntzaꞌ nacāmaktāyaꞌyāꞌtit xlacaꞌn tī jānaꞌj tzej taꞌaꞌkaꞌīꞌ. Chuntzaꞌ xlacaꞌn jā catitatamakahuasli.
\p
\v 14 Līpāxuhua cacātāꞌtahuiꞌlaꞌtit ixlīpōꞌktucaꞌn tachiꞌxcuhuīꞌt. Catlahuaꞌtit xmān tū tze. Palh chāꞌtin jā makxtekcuꞌtun tlahua tū jā tze, xlaꞌ jā catilakchāꞌlh Dios.
\v 15 Dios lakalhuꞌmanīniꞌn. Catamakxtekniꞌtit Dios nacāmaktāyayān milīpōꞌktucaꞌn. Jā cataxtutāyaꞌtit na ixtej Dios nūn chāꞌtin chī huiꞌxinaꞌn. Palh chāꞌtin taxtutāya, cāmāmakchuyī āꞌmakapitzīn tī taꞌaꞌkaꞌīꞌ.
\v 16 Jā cakaꞌlhīꞌtit mintāꞌlāpāxquīꞌncaꞌn. Jā calakmakaꞌntit tū ixlaꞌ Dios, chī Esaú. Xlaꞌ ixuāꞌyancuꞌtun, ē ūꞌtzaꞌ līstāꞌlh tū ixmakxtekniꞌcanīꞌt tū ixpālacata līmaksāstiꞌ ixuanīꞌt.
\v 17 Huiꞌxinaꞌn caꞌtzīyāꞌtit āꞌlīstān xlaꞌ ixlacasquiꞌn ixmaxquīꞌpalaca ē jātzaꞌ la lakmāxtulh. Xlaꞌ ixcalhuan ixpālacata lakpalīcuꞌtunli tū ixtlahuanīꞌt.
\p
\v 18 Huiꞌxinaꞌn jā ixuiꞌlānaꞌntit aꞌntzaꞌ aꞌcxniꞌ Dios māstāꞌlh līmāpaꞌksīn nac sipej jā huanican Sinaí. Israelitas xalanīꞌn makāstzaꞌ tatalacatzunaꞌjīlh nac Sinaí. Talaktzīꞌlh lamanaꞌ ē jā cāꞌpucsuaꞌ ixuanīꞌt ē jā makliꞌpliꞌ.
\v 19 Takexmatli aꞌktin līskoliꞌ ē aꞌktin tachihuīn. Aꞌcxniꞌ takexmatli ixtachihuīn Dios, xlacaꞌn tahuanli jātzaꞌ āꞌchulāꞌ cachihuīnaꞌlh.
\v 20 Tajicuaꞌnli aꞌcxniꞌ Dios huanli nūn chāꞌtin īꞌxaꞌmalh sipej. Nā huanli palh lakatin animalh natāya aꞌntzaꞌ ixlacasquiꞌnca nalīlacataꞌlamaknīcan chihuix.
\v 21 Tī talaktzīꞌlh huāꞌmāꞌ, tajicuaꞌnli. Nā Moisés huanli: “Icxpipimāꞌlh ixpālacata icjicuaꞌn.”
\p
\v 22 Huiꞌxinaꞌn jā chuntzaꞌ taꞌnīꞌtaꞌntit nac Sinaí. Huiꞌxinaꞌn pimpāꞌnaꞌntit āꞌlacatin nac sipej jā huanican Sión ē nac cāꞌlacchicniꞌ jā huīꞌlh Dios xalakahuan. Huāꞌmāꞌ cāꞌlacchicniꞌ huiꞌlachaꞌ nac aꞌkapūn ē huanican Jerusalén. Aꞌntzaꞌ taꞌaꞌnan lhūhuaꞌ ángeles.
\v 23 Aꞌntzaꞌ nā huiꞌxinaꞌn pimpāꞌnaꞌntit nac aꞌkapūn jā tatalacxtimīnīꞌt ē tamakapāxuīmāꞌnalh Dios tī xapūla ixlacstīn Dios, tī tatzoꞌkniꞌ ixtacuhuīniꞌcaꞌn nac aꞌkapūn. Aꞌntzaꞌ jā huīꞌlh Dios. Ūꞌtzaꞌ tī nacāputzānaꞌnīkōꞌ ixlīpōꞌktucaꞌn tachiꞌxcuhuīꞌt. Nā aꞌntzaꞌ tahuiꞌlānaꞌnchaꞌ ixlīstacnaꞌcaꞌn tī tanīnīꞌttzaꞌ ē cātlahuacanīꞌt lactze.
\v 24 Huiꞌxinaꞌn aꞌkaꞌīꞌnīꞌtaꞌntit Jesucristo ūꞌtzaꞌ tī makapūtaxtūnuꞌn. Xlaꞌ tlahuanīꞌt xasāstiꞌ talacāxtlahuan. Ixkaꞌlhniꞌ Jesucristo cālīcheꞌkēꞌ ixlīstacnaꞌcaꞌn tachiꞌxcuhuīꞌt. Ē chuntzaꞌ talakalhuꞌmān ixkaꞌlhniꞌ Jesucristo. Ūꞌtzaꞌ āꞌchulāꞌ xatze ē jā ixkaꞌlhniꞌ Abel.
\p
\v 25 Cakexpaꞌttit tū huan Dios. Cāmakapātīnīnca tī jā takexmatniꞌlh Moisés tī Dios māchihuīnīlh. Āꞌchulāꞌ naquincātamakapātīnīnān palh jā kexmatniꞌcuꞌtunāuj Dios chī chihuīnaꞌnāchaꞌ nac aꞌkapūn.
\v 26 Lakmajtzaꞌ Dios chihuīnaꞌnli aꞌcxniꞌ ixtatakēstoknīꞌt israelitas lacatzunaꞌj nac Sinaí. Tiꞌyaꞌt tachiquilh. Chuhuaꞌj Dios huan: “Quit naꞌicchiquipala tiꞌyaꞌt ē jā xmān tiꞌyaꞌt. Nā naꞌicchiqui aꞌkapūn.”
\v 27 Huāꞌmāꞌ huanicuꞌtun natasputkōꞌ ixlīpōꞌktu tū cāmālacatzucunīꞌt. Āꞌxmān natahuiꞌla tū jāla lacachiquican.
\v 28 Quinaꞌn natāꞌtahuiꞌlayāuj Dios jā xlaꞌ māpaꞌksīniꞌn jā tāyaniꞌ pōꞌktu quilhtamacuj. Chuhuaꞌj namaxquīꞌyāuj tapāxcatcaꞌtzīn Dios ē nalakachiꞌxcuhuīꞌyāuj ē namakapāxuīyāuj chuntzaꞌ huaꞌchi chī xlaꞌ lacasquiꞌn.
\v 29 Ixlīcānaꞌ Dios huaꞌchi aꞌktin kaꞌtlaꞌ lamanaꞌ ixpālacata xlaꞌ nacāmakapātīnīn xlacaꞌn tī jā takexmatniꞌ.
\c 13
\s Palh tzej nalatāꞌkchokoyāuj, chuntzaꞌ nalīmakapāxuīyāuj Dios
\p
\v 1 Calāpāxquīꞌtēlhaꞌtit milīpōꞌktucaꞌn ixpālacata huiꞌxinaꞌn lītāꞌtimīn.
\v 2 Cacāmānūꞌtit na minchiccaꞌn tī tamināchaꞌ xalaꞌ makat. Āꞌmakapitzīn tī chuntzaꞌ tatlahuanīꞌt, xlacaꞌn tamānūnīꞌt ángeles na ixchiccaꞌn, masqui xapūla jā ixtacaꞌtzī palh xlacaꞌn ángeles ixtahuanīꞌt.
\p
\v 3 Jā cacāpātzaꞌnkātit tī cāchīꞌcanīꞌt. Cacālakalhuꞌmaꞌntit xlacaꞌn huaꞌchi cātatāꞌchīꞌnīꞌtaꞌntit. Jā cacāpātzaꞌnkātit tī tapātīniꞌmāꞌnalh. Cacālakalhuꞌmaꞌntit xlacaꞌn huaꞌchi nā huiꞌxinaꞌn cātāꞌpātīniꞌmpāꞌnaꞌntit.
\p
\v 4 Xatze tamakaxtokcan. Jā tze kaꞌlhīcan tāꞌlāpāxquīꞌn. Dios nacāmakapātīnīn xlacaꞌn tī chuntzaꞌ tala.
\p
\v 5 Jā xmān calacapāstactit chī nalīkaꞌlhīꞌyāꞌtit tumīn. Līpāxuhua catahuiꞌlaꞌtit palh kaꞌlhīꞌyāꞌtit lhūhuaꞌ tumīn o palh jā lhūhuaꞌ. Dios huanīꞌt: “Pōꞌktu quilhtamacuj naꞌictāꞌlatahuiꞌlayān. Jā maktin ictimakxtekniꞌ.”
\v 6 Ūꞌtzaꞌ jā catilījicuaꞌnui. Tzē nahuanāuj:
\q Māpaꞌksīniꞌ Dios quimaktāya.
\q Jā ictijicuaꞌniꞌlh tū naquintatlahuaniꞌ tachiꞌxcuhuīꞌt.
\p
\v 7 Cacālacapāstactit xlacaꞌn tī pūla cātamāsuꞌyuniꞌn ixtachihuīn Dios. Cacāpāstactit chī ixtalīlatlāꞌhuan xlacaꞌn, ē chuntzaꞌ catlāꞌhuaꞌntit.
\p
\v 8 Jesucristo chu ūꞌtzaꞌtzaꞌ chī tihuaꞌnaꞌ. Jā makstin talakpalī.
\v 9 Jā catamakxtektit nacātamāsuꞌyuniꞌyān xtum tamāsuꞌyun tū jā aꞌkaꞌīꞌnīꞌtaꞌntit. Dios ūꞌtzaꞌ tī quincāmaktāyayān chī nalatāꞌkchokoyāuj chuntzaꞌ chī xlaꞌ lacasquiꞌn. Tamāsuꞌyun ixpālacata tū huaꞌcan, huāꞌmāꞌ jā quincāmaktāyayān. Masqui āꞌmakapitzīn takexmatniꞌ tzamāꞌ tamāsuꞌyun, jā cāmaktāya xlacaꞌn.
\p
\v 10 Pālejniꞌ tī tascuja na ixtemplocaꞌn israelitas, xlacaꞌn tzē natahuaꞌ macstiꞌnaꞌj xaquinīt animalhnaꞌ tū mālacnūniꞌcanīꞌt Dios. Xtum talakalhuꞌmān tū mālacnūniꞌcanīꞌt Dios tū quincāmāpānūniꞌyān quincuentacaꞌn. Huāꞌmāꞌ talakalhuꞌmān, ūꞌtzaꞌ Jesucristo.
\v 11 Xapuxcuꞌ pālej, xlaꞌ lēꞌn ixkaꞌlhniꞌ animalh xatamaknīn hasta nac templo jā huanican Āꞌchulāꞌ Xatasicuaꞌlanātlahuan jā ixlīꞌaꞌktuꞌ nac cuarto. Aꞌntzaꞌ mālacnūniꞌcan Dios kaꞌlhniꞌ ixpālacata nacāmāpānūniꞌ ixcuentacaꞌn tachiꞌxcuhuīꞌt. Ixmacniꞌcaꞌn animalh, tzamāꞌ cāmāxtucan nac cāꞌlacchicniꞌ. Aꞌntzaꞌ cālhcuyucan.
\v 12 Nā Jesús nā māxtuca nac cāꞌlacchicniꞌ. Ē aꞌntzaꞌ nīlh. Chuntzaꞌ pātīniꞌlh ixpālacata ixcālīmāpānūniꞌcuꞌtun ixkaꞌlhniꞌ ixcuentacaꞌn tachiꞌxcuhuīꞌt.
\v 13 Lakmakaꞌnca Jesucristo aꞌcxniꞌ māxtuca nac cāꞌlacchicniꞌ ē xtokohuaꞌcaꞌca nac cruz. Quinaꞌn aꞌkaꞌīꞌyāuj, ē chuntzaꞌ ixlacasquiꞌnca napātīniꞌnāuj aꞌcxniꞌ quincātalakmakaꞌnān ixpālacata Jesucristo.
\v 14 Huāꞌtzāꞌ nac cāꞌquilhtamacuj jā tū cāꞌlacchicniꞌ tū natahuiꞌla pōꞌktu quilhtamacuj. Quinaꞌn kaꞌlhīmāꞌnauj āꞌaꞌktin cāꞌlacchicniꞌ tū nalaktzīꞌnāujcus.
\v 15 Jātzaꞌ mālacnūniꞌyāuj Dios xatamaknīn animalh. Xatze camaxquīꞌuj tapāxcatcaꞌtzīn Dios. Ūꞌtzaꞌ huaꞌchi talakalhuꞌmān. Ixlacasquiꞌnca namākaꞌtlīꞌyāuj Dios ixpālacata Jesucristo.
\v 16 Jā capātzaꞌnkātit natlahuaꞌyāꞌtit tū tze ē nalāmaktāyaꞌyāꞌtit. Ūꞌtzaꞌ huāꞌmāꞌ tū līpāxuhua Dios.
\p
\v 17 Cacākexpaꞌtniꞌtit xanapuxcuꞌnuꞌ xalanīꞌn nac templo. Catlahuaꞌtit tū cātahuaniyān. Xlacaꞌn cāmaktakaꞌlhān huiꞌxinaꞌn ixpālacata talacasquiꞌn xaꞌnca naꞌaꞌkaꞌīꞌyāꞌtit. Xlacaꞌn natamaxquīꞌ cuenta Dios chī tascuja. Xlacaꞌn cāꞌtapāxuhuān natascuja palh natlahuaꞌyāꞌtit tū nacātalīmāpaꞌksīyān. Palh jā nacākexpaꞌtniꞌyāꞌtit, natalīlīpuhuan. Ē huiꞌxinaꞌn jā tū caticālīmacuaniꞌn.
\p
\v 18 Calīꞌorarlīꞌtit quimpālacata. Quit iccaꞌtzī icmākentaxtūlh tū Dios quimacamaxquīꞌnīꞌt. Pōꞌktu quilhtamacuj ictlahuacuꞌtun tū tze.
\v 19 Iccāsquiꞌniꞌyān calīꞌorarlīꞌtit Dios palaj naquimacāꞌnāchaꞌ jā huiꞌlānaꞌntit.
\s Tasicuaꞌlanālīn
\p
\v 20 Dios ūꞌtzaꞌ tī quincāmakapāxuīyān. Xlaꞌ mālacastālancuanīlh quiMāpaꞌksīniꞌcaꞌn Jesucristo. Jesucristo nīlh ē līxapalh ixkaꞌlhniꞌ quincuentacaꞌn. Chuntzaꞌ līcāxtlahualh talacāxtlahuan tū natāyaniꞌ pōꞌktu quilhtamacuj. Chuhuaꞌj xlaꞌ tihuaꞌnaꞌ naquincāmaktakaꞌlhān.
\v 21 Dios cacāmaxquīꞌn talacapāstacniꞌ tū nacāmaktāyayān natlahuaꞌyāꞌtit ixtalacasquiꞌnīn. Nā quinaꞌn caquincātlahuan lactze chuntzaꞌ chī xlaꞌ lacasquiꞌn. Ūꞌtzaꞌ lītlahua ixlītliꞌhuiꞌqui Jesucristo. Calakachiꞌxcuhuīꞌca Jesucristo pōꞌktu quilhtamacuj. Amén.
\p
\v 22 Tāꞌtimīn, iccāsquiꞌniꞌyān līlacatzucu nakelhtahuaꞌkaꞌyāꞌtit tū iccātzoꞌknuniꞌmāꞌn nac huāꞌmāꞌ caꞌpsnap. Jā kaꞌtlaꞌ tzamāꞌ caꞌpsnap tū iccātzoꞌknuniꞌnīꞌtaꞌn.
\v 23 Iccāmācaꞌtzīnīcuꞌtunān makxtekcanīꞌttzaꞌ Timoteo. Chuhuaꞌj jātzaꞌ tachīꞌn. Palh xlaꞌ namin palaj, naquintāꞌaꞌn aꞌcxniꞌ naꞌiccālakaꞌnāchāꞌn.
\p
\v 24 Cacāsaludarlīꞌtit ixlīpōꞌktucaꞌn xanapuxcuꞌnuꞌ nac templo. Calāsaludarlīꞌtit milīpōꞌktucaꞌn. Tāꞌtimīn xalaꞌ nac Italia cātahuaniyān.
\p
\v 25 Dios cacāsicuaꞌlanātlahuakōꞌn. Amén.