\id JAS
\h Santiago
\toc1 Santiago
\mt Santiago
\c 1
\s Lītzucuca carta
\p
\v 1 Quit, Santiago, ictzoꞌka huāꞌmāꞌ carta. Quit ictāꞌscuja Dios ē Māpaꞌksīniꞌ Jesucristo. Quit iccāmacāꞌniꞌyān saludos milīpōꞌktucaꞌn israelitas tī tapaꞌksīniꞌyāꞌtit Dios, tī taꞌaꞌkahuaniꞌnīꞌtaꞌntit.
\s Talacapāstacniꞌ tū Dios māstāꞌ
\p
\v 2 Tāꞌtimīn, catahuiꞌlaꞌtit cāꞌtapāxuān masqui cāꞌaꞌkspulayān lhūhuaꞌ catūhuālh ixpālacata aꞌkaꞌīꞌyāꞌtit Jesucristo.
\v 3 Caꞌtzīyāꞌtittzaꞌ aꞌcxniꞌ cāꞌaꞌkspulayān huāꞌmāꞌ ē palh jā makxtekāꞌtit chī aꞌkaꞌīꞌyāꞌtit, chuntzaꞌ nalīscaꞌtāꞌtit chī natāyaniꞌyāꞌtit.
\v 4 Pōꞌktu quilhtamacuj natāyaniꞌyāꞌtit, ē chuntzaꞌ nalīscaꞌtāꞌtit chī tzej nalatāꞌkchokoyāꞌtit ē chī nalīmākentaxtūkōꞌyāꞌtit ixlīpōꞌktu tū ixtalacasquiꞌnīn Dios.
\p
\v 5 Palh huiꞌxinaꞌn jā caꞌtzīyāꞌtit chī nalīlatāꞌkchokoyāꞌtit tzej, casquiꞌniꞌtit Dios ē xlaꞌ nacāmāsuꞌyuniꞌyān. Xlaꞌ jā cāꞌtasītziꞌ māstāꞌ tū nasquiꞌniꞌyāuj ē jā lacaquilhnīniꞌn.
\v 6 Aꞌcxniꞌ huiꞌxinaꞌn nasquiꞌniꞌyāꞌtit Dios catūhuālh, napuhuaꞌnāꞌtit Dios ixlīcānaꞌ nacāmaxquīꞌyān. Jā maktin tipuhuaꞌnāꞌtit Dios jā caticāmaxquīꞌn. Tī lacpuhuan Dios jā catimāstāꞌlh, xlaꞌ jā xmān aꞌktin ixtalacapāstacniꞌ kaꞌlhī. Xlaꞌ huaꞌchi xcān aꞌcxniꞌ ūꞌnun ē calhāxcuhuālh māꞌaꞌkchoko xaxiyālh xcān.
\v 7 Tī lacpuhuan chuntzaꞌ, Dios jā catimaxquīꞌlh tū squiꞌniꞌ.
\v 8 Tī jā xmān aꞌktin talacapāstacniꞌ takaꞌlhī, xlacaꞌn jā maktin tacaꞌtzī tū natatlahua.
\p
\v 9 Huiꞌxinaꞌn, tāꞌtimīn, tī catīhuālh tachiꞌxcuhuīꞌt, calīpāxuhuaꞌtit ixpālacata Dios cālaktzīꞌnān jā chī catīhuālh tachiꞌxcuhuīꞌt.
\v 10 Huiꞌxinaꞌn, tāꞌtimīn, tī lacricujnuꞌ, calīpāxuhuaꞌtit ixpālacata caꞌtzīyāꞌtit Dios laktzīꞌn mintumīncaꞌn huaꞌchi jā tū ixtapalh. Lacricujnuꞌ natasputa chī aꞌktin xaꞌnat.
\v 11 Aꞌcxniꞌ chiꞌchiniꞌn, xapaꞌlhmaꞌ xneka, ē xaꞌnat yuja. Ixlītzēhuanīꞌt sputa. Nā chuntzaꞌ talīsputa lacricujnuꞌ līhuan tatlahua ixnegociocaꞌn.
\s Chī napātīniꞌncan ē natāyaniꞌcan
\p
\v 12 Līpāxuhua tahuiꞌlānaꞌlh xlacaꞌn tī līlacatejtin tapātī tū cāꞌaꞌkspula. Palh xlacaꞌn natatāyaniꞌ, natakaꞌlhī xasāstiꞌ ixlatamatcaꞌn. Xasāstiꞌ quilatamatcaꞌn xlaꞌ chī talakalhuꞌmān tū Dios cāmālacnūniꞌ tī tapāxquīꞌ.
\v 13 Palh chāꞌtin chiꞌxcuꞌ lacpuhuan natlahua tū jā tze, jā capuhuanli Dios mālacpuhuanīlh tū jā tze. Dios jā maktin lacpuhuan natlahua tū jā tze. Xlaꞌ jā cāmālacpuhuanī tachiꞌxcuhuīꞌt catatlahualh tū jā tze.
\v 14 Aꞌcxniꞌ chāꞌtin chiꞌxcuꞌ lacpuhuan natlahua tū jā tze, xlaꞌ ixlīꞌaꞌcstu ixtalacapāstacniꞌ mātlahuī chuntzaꞌ.
\v 15 Palh xlaꞌ tlahua chuntzaꞌ tū jā tze ixtalacapāstacniꞌ, chuntzaꞌ kaꞌlhī ixcuenta. Āꞌchulāꞌ natlahuatēlha tū jā tze. Ūꞌtzaꞌ nalīnī.
\p
\v 16 Ixlīcānaꞌ tū iccāhuanimāꞌn. Jā cataꞌaꞌkskāhuīꞌtit, tāꞌtimīn.
\v 17 Pōꞌktu xatze catūhuālh tū quincātamaxquīꞌnīꞌtaꞌn, pōꞌktu Dios macamin. Tī quincāmaxquīꞌn pōꞌktu tū tze xlaꞌ ūꞌtzaꞌ Dios. Xlaꞌ cātlahualh tū tamāxkakēniꞌn nac aꞌkapūn. Dios xlaꞌ chu ūꞌtzaꞌtzaꞌ. Jā maktin talakpalī nūn macstiꞌnaꞌj.
\v 18 Dios quincāmaxquīꞌn xasāstiꞌ quilatamatcaꞌn chī xlaꞌ ixtalacasquiꞌnīn. Quincāmaxquīꞌn quilatamatcaꞌn xasāstiꞌ ixpālacata ixtachihuīn Dios tū ixlīcānaꞌ. Chuntzaꞌ quinaꞌn xapūla aꞌkaꞌīꞌnīꞌtauj. Āꞌlīstān lhūhuaꞌ āꞌmakapitzīn nataꞌaꞌkaꞌīꞌ. Chuntzaꞌ quinaꞌn xalacpūla.
\s Tū Dios lacasquiꞌn natlahuayāuj
\p
\v 19 Calacapāstactit huāꞌmāꞌ, tāꞌtimīn. Milīpōꞌktucaꞌn tzej cakexpaꞌttit ixtachihuīn Dios. Calacapāstacnaꞌntit pūla chī nachihuīnaꞌnāꞌtit, ē jā nasītzīꞌyāꞌtit.
\v 20 Tasītziꞌ quincāmāmakchuyīyān. Chuntzaꞌ jāla tlahuayāuj ixtalacasquiꞌnīn Dios.
\v 21 Camāpānūkōꞌtit ixlīpōꞌktu tū jā tze ē ixlīpōꞌktu tū jā līmacuan. Calīhuiꞌlīꞌtit natlahuaꞌyāꞌtit ixtalacasquiꞌnīn Dios. Cuenta catlahuaꞌtit tū ixtachihuīn Dios tū maktīniꞌnīꞌtaꞌntit. Ūꞌtzaꞌ tū cāmācaꞌtzīnīn chī nacālīmakapūtaxtūyān.
\p
\v 22 Cakexpaꞌtniꞌtit ixtachihuīn Dios, ē jā xmān cakexpaꞌtmakaꞌntit. Palh puhuaꞌnāꞌtit xmān nakexpaꞌtmakaꞌnāꞌtit, minaꞌcstucaꞌn taꞌaꞌkskāhuīꞌyāꞌtit.
\v 23 Tī xmān takexmata ixtachihuīn Dios ē jā tatlahua, xlacaꞌn chī chāꞌtin chiꞌxcuꞌ tī laktzīꞌn nac espejo.
\v 24 Ixlīmān laktzīꞌncan chī lanīꞌt ixlacan ē aꞌn ē palaj tunca pātzaꞌnkā chī lanīꞌt.
\v 25 Jā chuntzaꞌ xlacaꞌn tī cuenta tatlahua xatze ixtachihuīn Dios tū quincāmācaꞌtzīnīyān chī nalītaxtuyāuj. Palh xlacaꞌn jā tamakxteka takexmatniꞌ, ē palh jā tapātzaꞌnkā tū huan, chuntzaꞌ Dios nacāsicuaꞌlanātlahua ixlīpōꞌktu tū tatlahua.
\p
\v 26 Palh chāꞌtin chiꞌxcuꞌ huan kexmatniꞌ Dios, ē jāla māpaꞌksī ixquilhniꞌ, xlaꞌ ixlīmān taꞌaꞌkskāhuīꞌ. Xlaꞌ jā ixlīcānaꞌ kexmatniꞌ Dios.
\v 27 Tū Dios lacasquiꞌn natlahuayāuj quinaꞌn tī ixlīcānaꞌ aꞌkaꞌīꞌyāuj, ūꞌtzaꞌ huāꞌmāꞌ: cacāmaktāyauj lacstīn tī xcamanīn ē tī cānīmakaꞌncanīꞌt tī tapātīniꞌn. Ē ixlacasquiꞌnca pōꞌktu quilhtamacuj namāpānūyāuj ixlīpōꞌktu tū jā tze xalaꞌ nac cāꞌquilhtamacuj.
\c 2
\s Ixlacasquiꞌnca nacālaktzīꞌnāuj tachiꞌxcuhuīꞌt lacxtim
\p
\v 1 Tāꞌtimīn, calālaktzīꞌntit lacxtim milīpōꞌktucaꞌn huiꞌxinaꞌn tī aꞌkaꞌīꞌniꞌyāꞌtit quiMāpaꞌksīniꞌcaꞌn Jesucristo tī xakaꞌtlaꞌ.
\v 2 Naꞌiccāhuaniyān aꞌktin tachihuīn. Chāꞌtuꞌ chiꞌxcuhuīꞌn tatanū na mintemplocaꞌn. Chāꞌtin xlaꞌ rico ē kaꞌlhī ixmakatzātzāt ixlaꞌ oro ē ixluꞌxuꞌ xatze. Āꞌchāꞌtin xlaꞌ xcamanīn ē xlaꞌ kaꞌlhī masnā luꞌxuꞌ.
\v 3 Huiꞌxinaꞌn āꞌchulāꞌ lakachiꞌxcuhuīꞌyāꞌtit tī kaꞌlhī xatze ixluꞌxuꞌ ē huaniꞌyāꞌtit: “Huiꞌx catahuiꞌlaꞌ huāꞌtzāꞌ nac xatze silla.” Ē xcamanīn huaniꞌyāꞌtit: “Huiꞌx catāyachi o catahuiꞌlaꞌ nac piso ixlacatzunaꞌj na quintujan.”
\v 4 Palh chuntzaꞌ tlahuaꞌyāꞌtit huiꞌxinaꞌn, chuntzaꞌ tasuꞌyu puhuaꞌnāꞌtit āꞌmakapitzīn chiꞌxcuhuīꞌn āꞌchulāꞌ lactze. Palh chuntzaꞌ tlahuaꞌyāꞌtit huiꞌxinaꞌn, jā tze mintalacapāstacniꞌcaꞌn.
\p
\v 5 Tāꞌtimīn, iccāpāxquīꞌyān ē iccāhuanicuꞌtunān huāꞌmāꞌ. Dios cālacsacnīꞌt tī lacxcamanīnīꞌn. Masqui xcamanīn xlacaꞌn, Dios cālaktzīꞌn chī lacricujnuꞌ, ixpālacata talīpāhuan Dios ē chuntzaꞌ natatanū jā xlaꞌ māpaꞌksīniꞌn. Nā ixlīpōꞌktucaꞌn tī tapāxquīꞌ Dios ixlīpōꞌktucaꞌn natatanū jā xlaꞌ māpaꞌksīniꞌn.
\v 6 Huiꞌxinaꞌn cālakmakaꞌnāꞌtit tī lacxcamanīnīꞌn. Cālakachiꞌxcuhuīꞌyāꞌtit lacricujnuꞌ. Ūꞌtunuꞌn tī cātamakapātīnīnān. Xlacaꞌn cātamālacapūꞌyān huiꞌxinaꞌn.
\v 7 Ūꞌtunuꞌn lacricujnuꞌ tī jā tze talīchihuīnaꞌn Jesucristo quiMāpaꞌksīniꞌcaꞌn. Ūꞌtzaꞌ tī huiꞌxinaꞌn tapaꞌksīniꞌyāꞌtit.
\p
\v 8 Ixlīmāpaꞌksīn Dios tū tatzoꞌkniꞌ na ixtachihuīn Dios chuntzaꞌ huan: “Nacāpāxquīꞌyaꞌ āꞌmakapitzīn chuntzaꞌ chī pāxquīꞌcaꞌnaꞌ milīmān.” Palh huiꞌxinaꞌn kexpaꞌtniꞌyāꞌtit huāꞌmāꞌ līmāpaꞌksīn, chuntzaꞌ tzej tlāꞌhuaꞌmpāꞌnaꞌntit.
\v 9 Palh huiꞌxinaꞌn lakachiꞌxcuhuīꞌyāꞌtit makapitzīn, ē āꞌmakapitzīn huampala cālakmakaꞌnāꞌtit, chuntzaꞌ tlahuaꞌyāꞌtit tū jā tze, ē chuntzaꞌ huiꞌxinaꞌn laclīꞌpināꞌtit. Chuntzaꞌ huan ixlīmāpaꞌksīn Dios.
\v 10 Palh chāꞌtin chiꞌxcuꞌ nakexmatniꞌ ixlīpōꞌktu ixlīmāpaꞌksīn Dios ē xmān aꞌktin līmāpaꞌksīn tū jā kexmatniꞌ, huāꞌmāꞌ chiꞌxcuꞌ laclēꞌn ixpālacata jā kexmatniꞌkōꞌlh līmāpaꞌksīn, ē masqui xmān aꞌktin līmāpaꞌksīn tū jā kexmatniꞌlh.
\v 11 Dios huanli: “Jā tikaꞌlhīꞌyaꞌ mintāꞌlāpāxquīꞌn.” Nā chuntzaꞌ huanli: “Jā timaknīniꞌnaꞌ.” Palh chāꞌtin tī maknīniꞌn, xlaꞌ laclēꞌn ē masqui jā kaꞌlhī ixtāꞌlāpāxquīꞌn.
\v 12 Dios quincāmaktāyayān ē chuntzaꞌ jā quincāmāpaꞌksīyān tū jā tze. Chuntzaꞌ palh tlahuayāuj tū jā tze, Dios naquincāputzānaꞌniꞌyān. Ūꞌtzaꞌ calīchihuīnaꞌntit ē calītlahuaꞌtit tū tze.
\v 13 Dios, aꞌcxniꞌ naputzānaꞌn, jā caticālakalhuꞌmanli tī jā talakalhuꞌmanli āꞌmakapitzīn. Xlaꞌ xmān nacālakalhuꞌman tī talakalhuꞌmanli āꞌmakapitzīn. Tī talakalhuꞌmanīꞌt āꞌmakapitzīn, xlacaꞌn jā catitajicuaꞌnli aꞌcxniꞌ nacāputzānaꞌniꞌ Dios.
\s Chī tzej aꞌkaꞌīꞌcan
\p
\v 14 Tāꞌtimīn, palh chāꞌtin chiꞌxcuꞌ huan līpāhuan Dios ē xlaꞌ jā tlahua tū tze, chu tlakaj līpāhuan.
\v 15 Palh chāꞌtin quintāꞌtin spuꞌtniꞌ ixluꞌxuꞌ ē jā kaꞌlhī tū nahuaꞌ
\v 16 ē makapitzīn chī huiꞌxinaꞌn tahuanī: “Dios casicuaꞌlanātlahuan ē camaxquīꞌcaꞌ miluꞌxuꞌ ē camāhuīꞌcaꞌ”, ē tī tahuani chuntzaꞌ jā tū tamaxquīꞌ, chuntzaꞌ jā tū līmacuan talīpāhuan Dios.
\v 17 Palh chāꞌtin chiꞌxcuꞌ huan līpāhuan Dios, ē jā maktāya āꞌchāꞌtin, xlaꞌ chu tlakaj huan līpāhuan Dios. Xlaꞌ huaꞌchi chāꞌtin xanīn ixpālacata jā tū tlahua tū tze.
\p
\v 18 Palh chāꞌtin nahuan: “Quit icaꞌkaꞌīꞌniꞌ Dios, ē masqui jā ictlahua tū tze.” Quit naꞌicuampala: ¿Chī nalītasuꞌyuꞌyaꞌ palh līpāhuaꞌnaꞌ Dios palh jā tlahuaꞌyaꞌ tū tze? Quit ictlahua xatze. Chuntzaꞌ lītasuꞌyu quit iclīpāhuan Dios.
\v 19 Huiꞌx puhuaꞌnaꞌ xmān chāꞌtin Dios. Chuntzaꞌ tze. Nā chuntzaꞌ tapuhuan jā tzeya ūꞌnīꞌn tī tatāꞌscuja skāhuīꞌniꞌ. Xlacaꞌn taxpipi ixpālacata tajicuaꞌniꞌ Dios.
\v 20 Huiꞌx jā caꞌtzīyaꞌ. Naꞌicmāsuꞌyuniꞌyān chu tlakaj palh chāꞌtin huan līpāhuan Dios ē palh jā tlahua tū lactze.
\v 21 Quixūꞌnāpapcaꞌn Abraham mālacnūniꞌlh, chī talakalhuꞌmān Dios, ixkaꞌhuaꞌcha tī ixuanican Isaac. Ūꞌtzaꞌ Dios līlaktzīꞌlh Abraham tze chiꞌxcuꞌ ixpālacata tū tlahualh.
\v 22 Chuntzaꞌ caꞌtzīcan Abraham ixlīpāhuan Dios ē ūꞌtzaꞌ xlaꞌ lītlahualh tū lactze. Aꞌcxniꞌ Abraham tlahualh huāꞌmāꞌ tū tze, ūꞌtzaꞌ lītasuꞌyulh Abraham ixlīpāhuan Dios.
\v 23 Chuntzaꞌ mākentaxtūca chī ixtatzoꞌkniꞌ na ixtachihuīn Dios jā huan: “Abraham ixlīpāhuan Dios. Ūꞌtzaꞌ Dios xatze līlaktzīꞌlh Abraham.” Ē Dios huanli Abraham ixamigo.
\p
\v 24 Chuntzaꞌ huiꞌxinaꞌn caꞌtzīyāꞌtittzaꞌ Dios lactze cālaktzīꞌn tachiꞌxcuhuīꞌt jā xmān ixpālacata talīpāhuan Dios. Nā ixlacasquiꞌnca xlacaꞌn natatlahua tū lactze. Chuntzaꞌ natasuꞌyu palh ixlīcānaꞌ talīpāhuan Dios.
\v 25 Ē nā chuntzaꞌ Rahab tī maklaniꞌ ixuanīꞌt. Xlaꞌ cāmakxtekli tatachokolh na ixchic chiꞌxcuhuīꞌn tī Josué cāmacamilh. Cāmātzēꞌkli ē cāmaktāyalh natataxtu nac cāꞌlacchicniꞌ nac āꞌkentin tej. Ūꞌtzaꞌ Dios līlaktzīꞌlh tzeya puscāt Rahab.
\v 26 Quinaꞌn huiꞌlānaꞌuj ixpālacata kaꞌlhīyāuj quimacniꞌcaꞌn ē quilīstacnaꞌcaꞌn. Nā chuntzaꞌ quinaꞌn kaꞌlhīyāuj xasāstiꞌ quilatamatcaꞌn, ixpālacata līpāhuanāuj Dios ē chuntzaꞌ tlahuayāuj tū lactze.
\c 3
\s Quinquilhniꞌcaꞌn
\p
\v 1 Tāꞌtimīn, jā calaꞌtit līmākelhtahuaꞌkēꞌnīꞌn lhūhuaꞌ huiꞌxinaꞌn. Caꞌtzīyāꞌtit huiꞌxinaꞌn tī tamāsuꞌyu āꞌchulāꞌ palhaꞌ nacāputzānaꞌniꞌcan.
\v 2 Quinaꞌn quilīpōꞌktucaꞌn makatunuꞌ tlahuayāuj tū jā tze. Palh chāꞌtin chiꞌxcuꞌ tzē māpaꞌksī ixquilhniꞌ, chuntzaꞌ tzē māpaꞌksī ixlīpōꞌktu ixmacniꞌ. Xlaꞌ tzeya chiꞌxcuꞌ.
\v 3 Cāmākalhnūyāuj freno na ixquilhniꞌcaꞌn cahuāyuj. Chuntzaꞌ tzē nacāmāpaꞌksīyāuj. Nataꞌaꞌn jā quinaꞌn lacasquiꞌnāuj.
\v 4 Nā barcos tū lakaꞌtlaꞌ, macstiꞌnaꞌj tū līsakalīcan. Masqui ūꞌniꞌ xatliꞌhuiꞌqui tantaꞌncslēꞌn barco, piloto tzē nalēꞌn jā xlaꞌ lacasquiꞌn, masqui macstiꞌnaꞌj tū līsakalīcan barco.
\v 5 Chuntzaꞌ quinquilhniꞌcaꞌn. Masqui macstiꞌnaꞌj quinquilhniꞌcaꞌn, lhūhuaꞌ tū tlahua. Masqui macstiꞌnaꞌj macscut, tzē namāquilhtī aꞌktin kaꞌtlaꞌ cāꞌquiꞌhuīꞌn.
\v 6 Quinquilhniꞌcaꞌn huaꞌchi macscut, ixpālacata cālactlahua āꞌmakapitzīn. Quinquilhniꞌcaꞌn līchihuīnaꞌnāuj ixlīpōꞌktu tū jā tze. Ūꞌtzaꞌ āꞌchulāꞌ jā tze lītaxtuyāuj. Ixpālacata quinquilhniꞌcaꞌn, lāmāpasī ixlīpōꞌktucaꞌn tachiꞌxcuhuīꞌt nac cāꞌquilhtamacuj. Skāhuīꞌniꞌ ūꞌtzaꞌ tī quincāmāhuanīyān tū jā tze.
\v 7 Chiꞌxcuhuīꞌn xlacaꞌn tzē natamāmānsujlī catūhuālh animalh ē catūhuālh spūnīꞌn ē catūhuālh lūhuaꞌ ē catūhuālh animalh xalaꞌ nac mar. Ixlīpōꞌktucaꞌn tzē cāmāmānsujlīcan.
\v 8 Quinquilhniꞌcaꞌn jā tī tī tzē namāpaꞌksī. Quinquilhniꞌcaꞌn pōꞌktu quilhtamacuj huan tū jā tze. Huaꞌchi kaꞌlhī veneno ixpālacata quinquilhniꞌcaꞌn cālīlactlahuayāuj āꞌmakapitzīn.
\v 9 Quinquilhniꞌcaꞌn līmakapāxuīyāuj Dios quinTātaꞌcaꞌn, ē nā cālīꞌaꞌksaꞌnāuj āꞌmakapitzīn tachiꞌxcuhuīꞌt tī Dios tlahuanīꞌt huaꞌchi chī xlaꞌ.
\v 10 Na quinquilhniꞌcaꞌn taxtu tachihuīn tū xatze ē tachihuīn tū jā tze. Tāꞌtimīn, ūꞌtzaꞌ huāꞌmāꞌ jā tze.
\v 11 ¿Ē xmān nac aꞌktin muꞌsniꞌ taxtu xcān xaseꞌksiꞌ ē xcān xaxūꞌniꞌ?
\v 12 Tāꞌtimīn, aꞌktin xaquiꞌhuiꞌ aꞌkalhpōj jāla catitahuaꞌcaꞌlh ixtahuaꞌcaꞌt xīpa. Xaquiꞌhuiꞌ uvas jāla catitahuaꞌcaꞌlh ixtahuaꞌcaꞌt aꞌkalhpōj. Nā chuntzaꞌ aꞌktin muꞌsniꞌ jā taxtuhuīꞌlh xaxūꞌniꞌ xcān aꞌntzaꞌ jāla catitaxtulh xaseꞌksiꞌ xcān.
\s Tī takaꞌlhī ixtalacapāstacniꞌ Dios
\p
\v 13 Palhāsāꞌ chātin chī huiꞌxinaꞌn skalalh ē lhūhuaꞌ caꞌtzī ē chuntzaꞌ tzē namāsuꞌyu. Calatāꞌkchokotit līlacatejtin ē chuntzaꞌ nalītasuꞌyu palh lakskalalhnaꞌ huiꞌxinaꞌn. Jā kaꞌtlaꞌ timakcaꞌtzīyāꞌtit.
\v 14 Palh huiꞌxinaꞌn xmān lacasquiꞌnāꞌtit napuhuancan huiꞌxinaꞌn skalalhnaꞌ chuntzaꞌ lītasuꞌyu jā skalalhnaꞌ huiꞌxinaꞌn.
\v 15 Palh chuntzaꞌ lacpuhuan chāꞌtin, aꞌntzaꞌ lītasuꞌyu palh ixtalacapāstacniꞌ xlaꞌ jā ixlaꞌ Dios. Xmān lacapāstaca chī ixtalacapāstacniꞌ skāhuīꞌniꞌ ē ixtalacapāstacniꞌcaꞌn chiꞌxcuhuīꞌn ixpālacata tlahuamāꞌlh tū lacasquiꞌn ixmacniꞌ.
\v 16 Aꞌcxniꞌ tachiꞌxcuhuīꞌt talālakcaꞌtzaniꞌ ē xmān talacasquiꞌn napuhuancan xlacaꞌn lakskalalhnaꞌ, ūꞌtzaꞌ talālīmāpasī ē tatlahua ixlīpōꞌktu catūhuālh tū jā tze.
\v 17 Naꞌiccāhuaniyān chī talīhuan xlacaꞌn tī takaꞌlhī ixtalacapāstacniꞌ Dios. Xlacaꞌn xmān talacapāstaca tū lactze. Ūꞌtzaꞌ tū āꞌchulāꞌ ixlacasquiꞌnca. Jā talālīsītzīꞌniꞌ. Līlacatzucu natalātāꞌchihuīnaꞌn. Natakexmata ē natamaktāya āꞌmakapitzīn. Talaktzīꞌn lacxtim ixlīpōꞌktu. Tatlahua tū tze, ixpālacata xlacaꞌn lactze.
\v 18 Tī jā talālīsītzīꞌniꞌcuꞌtun āꞌmakapitzīn, chuntzaꞌ xlacaꞌn tatlahua tū xatze, ē chuntzaꞌ jātzaꞌ catitatāꞌlāhuanicuꞌtunli āꞌmakapitzīn.
\c 4
\s Jā tze palh lakatīyāuj tū xalaꞌ nac cāꞌquilhtamacuj
\p
\v 1 ¿Tū ixpālacata tāꞌlāhuaniꞌyāꞌtit huiꞌxinaꞌn? Ixpālacata kaꞌlhīꞌyāꞌtit mintalacapāstacniꞌcaꞌn tū tze, ē mintalacapāstacniꞌcaꞌn tū jā tze.
\v 2 Huiꞌxinaꞌn kaꞌlhīcuꞌtunāꞌtit catūhuālh ē palh jāla kaꞌlhīꞌyāꞌtit, ūꞌtzaꞌ lālīmaknīcuꞌtunāꞌtit huiꞌxinaꞌn. Huiꞌxinaꞌn lālakcaꞌtzaniꞌyāꞌtit tī kaꞌlhī catūhuālh, ē palh jāla kaꞌlhīꞌyāꞌtit, lālīlacatāꞌquīꞌyāꞌtit ē lālītucsāꞌtit. Jāla kaꞌlhīꞌyāꞌtit tū lacasquiꞌnāꞌtit huiꞌxinaꞌn, ixpālacata jā squiꞌniꞌyāꞌtit Dios.
\v 3 Aꞌcxniꞌ squiꞌniꞌyāꞌtit Dios jā cāmaxquīꞌyān, ixpālacata jā tzej squiꞌniꞌyāꞌtit. Squiꞌniꞌyāꞌtit xmān ixpālacata pāxcat līlaꞌyāꞌtit tū huiꞌxinaꞌn lacasquiꞌnāꞌtit.
\v 4 Huiꞌxinaꞌn chī chāꞌtin tī kaꞌlhī ixtāꞌlāpāxquīꞌn, ixpālacata jātzaꞌ kexpatniꞌcuꞌtunāꞌtit Dios ē xmān tlahuacuꞌtunāꞌtit tū lacasquiꞌnāꞌtit. ¿Ē jā caꞌtzīyāꞌtit tī talakatī lhūhuaꞌ catūhuālh xalaꞌ nac cāꞌquilhtamacuj, xlacaꞌn talītaxtu ixtāꞌlāquiclhlaktziꞌ Dios? Tī tatlahuacuꞌtun lacxtim chī xalanīꞌn nac cāꞌquilhtamacuj, xlacaꞌn talītaxtu ixtāꞌlāquiclhlaktziꞌ Dios.
\v 5 Palhāsāꞌ huiꞌxinaꞌn puhuaꞌnāꞌtit xmān chu tlakaj tatzoꞌkniꞌ na ixtachihuīn Dios jā huan Dios quincāmaxquīꞌnīꞌtaꞌn Espíritu Santo ē xlaꞌ lacasquiꞌn xmān xlaꞌ naquincāmāpaꞌksīyān ē jā lacasquiꞌn naquincāmāpaꞌksīyān āꞌchāꞌtin.
\v 6 Ūꞌtzaꞌ lacasquiꞌn Dios. Xlaꞌ quincāmaktāyayān, ē chuntzaꞌ tzē nakexmatniꞌyāuj xmān Dios. Chuntzaꞌ huan ixtachihuīn Dios:
\q Dios jā cāmaktāya tī kaꞌtlaꞌ tamakcaꞌtzī.
\q Xlaꞌ cāmaktāya tī jā kaꞌtlaꞌ tamakcaꞌtzī.
\m
\v 7 Huiꞌxinaꞌn catamakxtektit Dios nacāmāpaꞌksīyān. Jā catamakxtektit nacāmāpaꞌksīyān skāhuīꞌniꞌ. Chuntzaꞌ skāhuīꞌniꞌ nacātzāꞌlaniꞌyān.
\v 8 Calātalacatzunaꞌjītit Dios ē xlaꞌ nā nacālātalacatzunaꞌjīyān. Huiꞌxinaꞌn tī tlahuaꞌyāꞌtit tū jā tze, jātzaꞌ catlahuaꞌtit. Huiꞌxinaꞌn tī pāxquīꞌyāꞌtit Dios ē nā tū xalaꞌ nac cāꞌquilhtamacuj, camāpānūniꞌtit tū jā tze na milīstacnaꞌcaꞌn.
\v 9 Calīpuhuantit ē cacalhuaꞌntit. Jātzaꞌ calītzīꞌntit ē jātzaꞌ calīpāxuaꞌtit tū jā tze. Calīmāxanaꞌntit mincuentacaꞌn.
\v 10 Macstiꞌnaꞌj cahuantit na ixlacatīn Dios, ē xlaꞌ nacāmākaꞌtlīꞌyān.
\s Jā tze palh aꞌksaꞌnāuj quintāꞌtincaꞌn
\p
\v 11 Tāꞌtimīn, jā tilālīchihuīnaꞌnāꞌtit tū jā tze. Palh chāꞌtin līchihuīnaꞌn āꞌchāꞌtin tū jā tze, chuntzaꞌ līlakmakaꞌmāꞌlh līmāpaꞌksīn tū huan: Calāpāxquīꞌtit. Palh chāꞌtin lacpuhuan tzē nahuan palh āꞌchāꞌtin laclēꞌn, xlaꞌ lītaxtu chī juez. Jā lacapāstaca palh ūꞌtzaꞌ laclēꞌn, ixpālacata lakmakaꞌmāꞌlh līmāpaꞌksīn.
\v 12 Xmān chāꞌtin Juez aꞌnan. Ūꞌtzaꞌ Dios. Xlaꞌ ūꞌtzaꞌ quincāmaxquīꞌn līmāpaꞌksīn ē ūꞌtzaꞌ nakexmatniꞌyāuj. Xlaꞌ tzē naquincāmakapūtaxtūyān ē nā tzē naquincāmacāꞌnān nac pūpātīn. ¿Tū ixpālacata puhuaꞌnāꞌtit palh huiꞌxinaꞌn tzē naꞌaꞌksaꞌnāꞌtit āꞌchāꞌtin?
\s Jā caꞌtzīyāuj tū naꞌaꞌkspula lakalī
\p
\v 13 Naꞌiccāhuaniyān huiꞌxinaꞌn macstiꞌnaꞌj mimpālacatacaꞌn huiꞌxinaꞌn tī lāhuaniꞌyāꞌtit: “Chuhuaꞌj o lakalī naꞌaꞌnāuj nac aꞌktin cāꞌlacchicniꞌ. Aꞌntzaꞌ natachokoyāuj aꞌktin cāꞌta. Natamāhuanaꞌnāuj ē nastāꞌnanāuj. Natlajayāuj lhūhuaꞌ tumīn.”
\v 14 Huāꞌmāꞌ naꞌiccāhuaniyān: Huiꞌxinaꞌn jā caꞌtzīyāꞌtit tū naꞌaꞌkspula lakalī. Quinaꞌn huaꞌchi poklhnuꞌ ixpālacata poklhnuꞌ chuhuaꞌj tasuꞌyu ē ixlītzāꞌla laksputa.
\v 15 Chuntzaꞌ ixuantit: “Palh Dios lacasquiꞌn quinaꞌn natahuiꞌlāyāuj āꞌtzāꞌla ē ūꞌtzaꞌ huāꞌmāꞌ natlahuayāuj.”
\v 16 Huiꞌxinaꞌn jā kelhasquiꞌnīꞌyāꞌtit Dios tūchu ixtalacasquiꞌnīn. Xmān tlahuaꞌyāꞌtit tū tlahuacuꞌtunāꞌtit. Huiꞌxinaꞌn kaꞌtlaꞌ makcaꞌtzīyāꞌtit. Jā tze chuntzaꞌ tlahuaꞌyāꞌtit.
\v 17 Palh chāꞌtin caꞌtzī tlahua tū tze, ē palh jā tlahua, chuntzaꞌ xlaꞌ līkaꞌlhī ixcuenta.
\c 5
\s Tū nacāꞌaꞌkspula lacricujnuꞌ
\p
\v 1 Chuhuaꞌj huiꞌxinaꞌn lacricujnuꞌ cacalhuantit ē cataꞌsaꞌtit ixpālacata lījicuaꞌ tū mimāꞌlh.
\v 2 Mintumīncaꞌn huaꞌchi xamasniꞌ. Miluꞌxuꞌcaꞌn xatzēhuanīꞌt pōꞌktu huaꞌchi xatalacuaꞌ.
\v 3 Minorocaꞌn ē mimplatacaꞌn huaꞌchi pōꞌktu xaskoꞌluniꞌ. Xaskoꞌluniꞌ ixpālacata huiꞌxinaꞌn lactampiꞌlhīꞌn ē jā maktāyacuꞌtunāꞌtit āꞌmakapitzīn. Huiꞌxinaꞌn mākēxtimīꞌtit lhūhuaꞌ tumīn ē lacatzunaꞌjtzaꞌ huīꞌlh quilhtamacuj aꞌcxniꞌ napātīniꞌnāꞌtit nac pūpātīn.
\v 4 Huiꞌxinaꞌn jā xokonīꞌtaꞌntit tī cātāꞌscujnīꞌtaꞌntit na mincāꞌtacuxtucaꞌn. Dios lacahuānaꞌhuīꞌlh. Xlaꞌ ūꞌtzaꞌ tī māpaꞌksīniꞌnkōꞌ ixlīpōꞌktu nac aꞌkapūn ē ixlīpōꞌktu nac cāꞌquilhtamacuj. Xlaꞌ cālaktzīꞌmāꞌn chī aꞌkskāhuīꞌtit mintasācuaꞌcaꞌn ē jā xokotit.
\v 5 Huāꞌtzāꞌ nac cāꞌquilhtamacuj huiꞌxinaꞌn lacricujnuꞌ kaꞌlhīꞌyāꞌtit ixlīpōꞌktu. Līpāxūj līlatlāꞌhuanāꞌtit. Huiꞌxinaꞌn huaꞌchi lakatin paꞌxniꞌ tū makakoꞌntīcan ē namaknīcan.
\v 6 Huiꞌxinaꞌn lacricujnuꞌ cāmālacapūꞌyāꞌtit ē cāmaknīꞌyāꞌtit tī lactze. Xlacaꞌn jāla tatamaktāya.
\s Ixlacasquiꞌnca nakaꞌlhīyāuj hasta aꞌcxniꞌ namimpala Jesucristo
\p
\v 7 Chuhuaꞌj huiꞌxinaꞌn, tāꞌtimīn, līlacatzucu cakaꞌlhīꞌtit hasta aꞌcxniꞌ namin Māpaꞌksīniꞌ Jesucristo. Chāꞌtin chiꞌxcuꞌ tī tlahua ixpūxāhuat, xlaꞌ kaꞌlhī hasta aꞌcxniꞌ nala. Xlaꞌ kaꞌlhī hasta nala xcān pūla ē āꞌlīstān huampala.
\v 8 Huiꞌxinaꞌn nā līlacatzucu cakaꞌlhīꞌtit. Jā calakachipiniꞌtit. Palaj namimpala Māpaꞌksīniꞌ.
\v 9 Jā calāputzānaꞌniꞌtit. Palh tlahuaꞌyāꞌtit chuntzaꞌ, Cristo nacāputzānaꞌniꞌyān. Xlaꞌ ūꞌtzaꞌ Juez. Palaj namimpala.
\v 10 Calacapāstactit huiꞌxinaꞌn, tāꞌtimīn, chī tapātīniꞌlh makāstzaꞌ ixaꞌkchihuīnaꞌnīꞌn Dios. Xlacaꞌn tatāyaniꞌlh. Chuntzaꞌ calītaxtutit.
\v 11 Caꞌtzīyāuj ixtapāxuhua xlacaꞌn tī tatāyaniꞌlh. Caꞌtzīyāꞌtittzaꞌ chī lītāyaniꞌlh Job. Āꞌlīstān Dios maxquīꞌlh lhūhuaꞌ, ixpālacata lakalhuꞌmanīniꞌn.
\p
\v 12 Chuhuaꞌj naꞌiccāhuaniyān tū ixlacasquiꞌnca. Jā tihuaꞌnāꞌtit “por Dios”, aꞌcxniꞌ nahuaꞌnāꞌtit palh ixlīcānaꞌ. Xmān “ixlīcānaꞌ” nahuaꞌnāꞌtit. Aꞌcxniꞌ nahuaꞌnāꞌtit “jā ixlīcānaꞌ”, xmān “jā ixlīcānaꞌ” nahuaꞌnāꞌtit. Palh jā natlahuaꞌyāꞌtit chuntzaꞌ, Dios nacāmakapātīnīnān.
\p
\v 13 Aꞌcxniꞌ nacāꞌaꞌkspulayān catūhuālh, caꞌorarlaꞌtit huiꞌxinaꞌn. Aꞌcxniꞌ līpāxuhua lahuiꞌlānaꞌntit, capixtlīꞌtit tū nalīpāxuhua Dios.
\v 14 Aꞌcxniꞌ chāꞌtin chī huiꞌxinaꞌn taꞌjatatla, cacāmātaꞌsatīnīniꞌntit xanapuxcuꞌnuꞌ xalanīꞌn nac templo. Xlacaꞌn natamin ē natalīꞌorarla ē natalītlahua taꞌjatatlaniꞌ aceite na ixtacuhuīniꞌ Māpaꞌksīniꞌ Jesucristo.
\v 15 Palh xlacaꞌn nataꞌorarlī ē nataꞌaꞌkaꞌīꞌ, Dios namātzeyī. Palh xlaꞌ tlahuanīꞌt tū jā tze, Dios namāpānūniꞌ ixcuenta.
\v 16 Calāhuaniꞌtit huiꞌxinaꞌn palh jāla makxtekāꞌtit catūhuālh tū jā tze. Chuntzaꞌ nalālīꞌorarlīꞌyāꞌtit. Dios nacāmātzeyīyān huiꞌxinaꞌn tī taꞌjatatlaꞌyāꞌtit. Dios lītlahua ixlīmāpaꞌksīn tū squiꞌniꞌ chāꞌtin chiꞌxcuꞌ tī tze.
\v 17 Dios maxquīꞌlh tū squiꞌniꞌlh Elías tī ixaꞌkchihuīnaꞌ Dios. Xlaꞌ chāꞌtin chiꞌxcuꞌ chī quinaꞌn ixuanīꞌt. Xlaꞌ squiꞌniꞌlh Dios jā calalh xcān. Aꞌktuꞌtun cāꞌta āꞌiꞌtāt jā lalh xcān.
\v 18 Squiꞌniꞌpālh Dios camilh xcān. Chuntzaꞌ lalh xcān. Chuntzaꞌ lanānaꞌlh nac cāꞌtiꞌyaꞌtnaꞌ.
\p
\v 19 Tāꞌtimīn, palh chāꞌtin chī huiꞌxinaꞌn tamakahuasa ē palh āꞌchāꞌtin namaktāya natlāꞌhuampala na ixtej Dios,
\v 20 chuntzaꞌ namakapūtaxtū āꞌchāꞌtin nac līnīn ē chuntzaꞌ namātzaꞌnkēnaꞌniꞌcan ixcuenta.