\id 1PE
\h 1 Pedro
\toc1 1 San Pedro
\mt 1 San Pedro
\c 1
\s Pedro cātzoꞌknuniꞌlh tī ixtaꞌaꞌkaꞌīꞌ
\p
\v 1 Quit Pedro, ixapóstol Jesucristo. Quit ictzoꞌka huāꞌmāꞌ carta. Iccātzoꞌknuniꞌmāꞌn huiꞌxinaꞌn tī ixtachiꞌxcuhuīꞌt Dios tī cātamāꞌaꞌkahuanīn ē latlāꞌhuaꞌnāꞌtit chī makatiyātīꞌn nac aꞌkatunuꞌ cāꞌlacchicniꞌ jā huanican Ponto ē Galacia ē Capadocia ē Asia ē Bitinia.
\v 2 Dios quinTātaꞌcaꞌn cālacsacnīꞌtaꞌn makāstzaꞌ chuntzaꞌ chī puhuanli. Xlaꞌ puhuanli Espíritu Santo lactze nacātlahuayān. Xlaꞌ ixlacasquiꞌn huiꞌxinaꞌn nakexpaꞌtniꞌyāꞌtit Jesucristo. Lacasquiꞌnli ixkaꞌlhniꞌ Jesucristo nacāxapaniꞌyān ixlīpōꞌktu mincuentacaꞌn. Dios cacāsicuaꞌlanātlahuan ē tzej calatapāꞌtit.
\s Caꞌtzīyāuj Dios naquincāsicuaꞌlanātlahuayān
\p
\v 3 Namaxquīꞌyāuj tapāxcatcaꞌtzīn Dios ixpālacata xlaꞌ lakalhuꞌmanīniꞌn. Ūꞌtzaꞌ ixTātaꞌ quiMāpaꞌksīniꞌcaꞌn Jesucristo. Dios mālacastālancuanīlh Jesucristo, nā chuntzaꞌ quincāmaxquīꞌn xasāstiꞌ quilatamatcaꞌn. Chuhuaꞌj caꞌtzīyāuj xlaꞌ naquincāmaxquīꞌyān āꞌchulāꞌ.
\v 4 Tū Dios naquincāmaxquīꞌyān, xlaꞌ māquīꞌcanīꞌt nac aꞌkapūn. Aꞌntzaꞌ jā tū catiꞌaꞌnaniꞌlh. Jā chī catūhuālh tū masa ē tū lakuan ē tū xneka.
\v 5 Huiꞌxinaꞌn līpāhuaꞌnāꞌtit Dios, ē xlaꞌ cāmaktakaꞌlhān ixpālacata xlaꞌ kaꞌlhī līmāpaꞌksīn. Xlaꞌ nacāmaktakaꞌlhān hasta āꞌxmān quilhtamacuj. Āꞌxmān quilhtamacuj natasuꞌyukōꞌ ixlīpōꞌktu tū Dios nacāmaxquīꞌyān aꞌcxniꞌ naquincāmakapūtaxtūkōꞌyān.
\p
\v 6 Ūꞌtzaꞌ huiꞌxinaꞌn līpāxuhuaꞌyāꞌtit masqui jā makās līpuhuanāꞌtit ixpālacata lhūhuaꞌ tū pātīpāꞌnaꞌntit.
\v 7 Huiꞌxinaꞌn līlacatzucu tāyaniꞌyāꞌtit tū pātīpāꞌnaꞌntit. Chuntzaꞌ tasuꞌyu palh ixlīcānaꞌ aꞌkaꞌīꞌyāꞌtit. Oro māchiꞌchīcan namaktīcan tū jā tze. Chuntzaꞌ tachoko pōꞌktu oro. Nā chuntzaꞌ huiꞌxinaꞌn. Aꞌcxniꞌ pātīniꞌnāꞌtit huiꞌxinaꞌn namakxtekāꞌtit tū jā tze. Chuntzaꞌ āꞌchulāꞌ lactze nalītaxtuyāꞌtit. Āꞌchulāꞌ xatapalaxlaꞌ chī aꞌkaꞌīꞌyāꞌtit na ixlacatīn Dios ē jā oro. Palh tzej aꞌkaꞌīꞌyāꞌtit masqui pātīniꞌnāꞌtit, chuntzaꞌ nacātamākaꞌtlīꞌyān ē nacātalakachiꞌxcuhuīꞌyān aꞌcxniꞌ Jesucristo namimpala.
\p
\v 8 Huiꞌxinaꞌn pāxquīꞌyāꞌtit Jesucristo masqui jā laktzīꞌnīꞌtaꞌntit. Huiꞌxinaꞌn aꞌkaꞌīꞌyāꞌtit masqui chuhuaꞌj jā laktzīꞌnāꞌtit. Ūꞌtzaꞌ līpāxuhuaꞌyāꞌtit. Lhūhuaꞌ mintapāxuāncaꞌn; jāla chī huanican chī līpāxuhuaꞌyāꞌtit.
\v 9 Pāxuhuaꞌyāꞌtit ixpālacata aꞌkapūtaxtunīꞌtaꞌntittzaꞌ ixpālacata aꞌkaꞌīꞌyāꞌtit Jesucristo.
\p
\v 10 Aꞌkchihuīnaꞌnīꞌn xalanīꞌn makās xapūla ixtahuan chī ixquincālīsicuaꞌlanātlahuan Dios. Xlacaꞌn ixtaputza chī natalīcaꞌtzī chī līꞌaꞌkapūtaxtucan ixpālacata ixtacaꞌtzīcuꞌtunkōꞌ.
\v 11 IxEspíritu Cristo cāmācaꞌtzīnīlh palh Cristo ixpātīniꞌlh ē āꞌlīstān ixlakachiꞌxcuhuīꞌca. Xlacaꞌn ixtacaꞌtzīcuꞌtun jāꞌcxniꞌ ixaꞌkspulalh huāꞌmāꞌ ē tū naꞌaꞌkspula āꞌlīstān.
\v 12 Dios cāmācaꞌtzīnīlh jānaꞌj naꞌaꞌkspula xlīmacua xlacaꞌn ixtalahuiꞌlānaꞌlhcus. Chuhuaꞌj aꞌkspulamāꞌlh xlīmacua huiꞌlānaꞌuj quinaꞌn. Huāꞌmāꞌ ūꞌtzaꞌ tū cātahuanin xlacaꞌn tī cātamāsuꞌyuniꞌn xatze tachihuīn ixlaꞌ Jesucristo. Xlacaꞌn ixcātalīmāsuꞌyuniꞌyān huiꞌxinaꞌn ixlīmāpaꞌksīn Espíritu Santo tī macamincanchaꞌ nac aꞌkapūn. Ixlīpōꞌktu huāꞌmāꞌ ángeles tacaꞌtzīcuꞌtun.
\s Dios lacasquiꞌn tzej nalatāꞌkchokoyāuj
\p
\v 13 Calacapāstactit tzamāꞌ ē skalalh catahuiꞌlaꞌtit. Tzej calacapāstactit. Calacapāstactāꞌkchokotit chī Dios nacālīsicuaꞌlanātlahuayān aꞌcxniꞌ namin Jesucristo.
\v 14 Cakexpaꞌtniꞌtit Dios ixpālacata huiꞌxinaꞌn ixlacstīn. Jātzaꞌ calatāꞌkchokotit chī ixlatlāꞌhuaꞌnāꞌtit aꞌcxniꞌ jānaꞌj ixaꞌkaꞌīꞌtit ixtachihuīn Dios ē aꞌcxniꞌ ixtlahuaꞌyāꞌtit tū jā tze talanān.
\v 15 Lactze cahuankōꞌtit pōꞌktu quilhtamacuj. Calacapāstactit Dios cālītaꞌsatīn ixtachiꞌxcuhuīꞌt nahuanāꞌtit. Xlaꞌ tze. Ūꞌtzaꞌ pōꞌktu quilhtamacuj xalīlacatejtin nalīlatahuiꞌlaꞌyāꞌtit.
\v 16 Tatzoꞌkniꞌ na ixtachihuīn Dios jā huan Dios: “Lactze cahuantit huiꞌxinaꞌn, ixpālacata quit tze.”
\p
\v 17 Huiꞌxinaꞌn aꞌcxniꞌ orarlīniꞌyāꞌtit Dios, huaꞌnāꞌtit: “Dios quinTātaꞌcaꞌn.” Ūꞌtzaꞌ kēxtim quincālaktzīꞌnān. Xlaꞌ nacāputzānaꞌniꞌ chāꞌtunuꞌ chuntzaꞌ chī talatāꞌkchokonīꞌt. Ūꞌtzaꞌ nalījicuaꞌniꞌyāꞌtit Dios līhuan latlāꞌhuaꞌnāꞌtitcus nac cāꞌquilhtamacuj.
\v 18 Xapūla huiꞌxinaꞌn ixlatlāꞌhuaꞌnāꞌtit chī ixtalatlāꞌhuan minapapanaꞌcaꞌn. Jā tū ixtapalh chī ixlatlāꞌhuaꞌnāꞌtit xapūla. Dios cāmakapūtaxtūniꞌ ixlīpōꞌktu huāꞌmāꞌ. Tū xlaꞌ xokolh ixpālacata naquincāmakapūtaxtūyān, huāꞌmāꞌ jā chī oro ē jā chī plata tū talaksputa. Huiꞌxinaꞌn caꞌtzīyāꞌtit huāꞌmāꞌ.
\v 19 Līxokolh ixkaꞌlhniꞌ Cristo aꞌcxniꞌ nīlh. Ixkaꞌlhniꞌ Cristo tapalaxlaꞌ. Cristo huaꞌchi lakatin purecuꞌ ixuanīꞌt tū xatze ē tū maknīcan ixpālacata namālacnūniꞌcan Dios.
\v 20 Aꞌcxniꞌ jānaꞌj ixtlahuacan cāꞌquilhtamacuj, Dios puhuanli ixlacasquiꞌnca Cristo nanī ixpālacata naquincāmakapūtaxtūyān. Chuhuaꞌj, tzamāꞌ quilhtamacuj, Cristo nīnīꞌttzaꞌ quimpālacatacaꞌn.
\v 21 Ixpālacata Jesucristo, huiꞌxinaꞌn līpāhuaꞌnāꞌtit Dios, ixpālacata Dios mālacastālancuanīlh Jesucristo ē lakachiꞌxcuhuīꞌlh. Chuntzaꞌ huiꞌxinaꞌn līpāhuaꞌnāꞌtit Dios ē kaꞌlhīpāꞌnaꞌntit aꞌktin quilhtamacuj aꞌcxniꞌ nacāsicuaꞌlanātlahuakōꞌyān.
\p
\v 22 Huiꞌxinaꞌn kexpaꞌtniꞌnīꞌtaꞌntit tachihuīn tū ixlīcānaꞌ. Ūꞌtzaꞌ huiꞌxinaꞌn lactzetzaꞌ lītaxtutit. Chuhuaꞌj ixlīcānaꞌ cāpāxquīꞌyāꞌtit tī taꞌaꞌkaꞌīꞌ. Chuhuaꞌj tzej calālīpāxquīꞌtit ixlīpōꞌktu milīstacnaꞌcaꞌn.
\v 23 Huiꞌxinaꞌn kaꞌlhīꞌyāꞌtittzaꞌ xasāstiꞌ milatamatcaꞌn ixpālacata aꞌkaꞌīꞌnīꞌtaꞌntit ixtachihuīn Dios tū jā maktin catisputli. Chuntzaꞌ xasāstiꞌ milatamatcaꞌn jā maktin catisputli. Natāyaniꞌ pōꞌktu quilhtamacuj.
\v 24 Chuntzaꞌ huan na ixtachihuīn Dios jā tatzoꞌkniꞌ huāꞌmāꞌ:
\q Ixlīpōꞌktucaꞌn tachiꞌxcuhuīꞌt huaꞌchi paꞌlhmaꞌ.
\q Ixlīpōꞌktu tū tzēhuanīꞌt tū takaꞌlhī tachiꞌxcuhuīꞌt, ūꞌtzaꞌ huaꞌchi xaxaꞌnat paꞌlhmaꞌ.
\q Paꞌlhmaꞌ scāca ē yuja xaxaꞌnat.
\q 	
\v 25 	 Jā chuntzaꞌ ixtachihuīn Dios.
\q Xlaꞌ jā maktin catisputli.
\m Ixtachihuīn Dios, ūꞌtzaꞌ xatze tachihuīn tū cātamāsuꞌyuniꞌnīꞌtaꞌn huiꞌxinaꞌn.
\c 2
\p
\v 1 Ūꞌtzaꞌ calīmakxtektit ixlīpōꞌktu tū jā tze. Jātzaꞌ caꞌaꞌkskāhuīꞌnintit. Jā chuntzaꞌ cahuantit chī xlacaꞌn tī tatasuꞌyu lactze ē xmān taꞌaꞌkskāhuīꞌnin ixpālacata xlacaꞌn jā lactze. Jātzaꞌ quiclh calālaktzīꞌntit. Jātzaꞌ cacālīchihuīnaꞌntit āꞌmakapitzīn.
\v 2 Chāꞌtin skaꞌtaꞌ pōꞌktu quilhtamacuj huaꞌcuꞌtun ixleche. Chuntzaꞌ līstaca. Huiꞌxinaꞌn nā chuntzaꞌ ixlacasquiꞌnca nacaꞌtzīcuꞌtunāꞌtit ixtachihuīn Dios tū ixlīhuaꞌt milīstacnaꞌcaꞌn. Chuntzaꞌ āꞌchulāꞌ naꞌaꞌkaꞌīꞌyāꞌtit.
\v 3 Caꞌtzīyāꞌtittzaꞌ palh Dios pāxquīꞌnin.
\s Cristo huaꞌchi aꞌktin chihuix tū Dios lacsacli
\p
\v 4 Pōꞌktu quilhtamacuj catāꞌlatāꞌkchokotit Jesucristo. Ūꞌtzaꞌ tī quincāmaxquīꞌyān quilatamatcaꞌn. Xlaꞌ huaꞌchi xastacnaꞌ chihuix. Dios lacsacli ixpālacata laktzīꞌlh huaꞌchi aꞌktin chihuix tū tapalaxlaꞌ, masqui tachiꞌxcuhuīꞌt tapuhuan jā tū ixtapalh.
\v 5 Huiꞌxinaꞌn huaꞌchi aꞌktin templo tū jā xalaꞌ nac cāꞌquilhtamacuj. Huiꞌxinaꞌn huaꞌchi chihuixniꞌ nac huāꞌmāꞌ templo tū Dios tlahuamāꞌlh. Huiꞌxinaꞌn huaꞌchi pālejniꞌ ixpālacata aꞌkaꞌīꞌyāꞌtit Jesucristo ē chuntzaꞌ tāꞌscujāꞌtit Dios. Huaꞌchi ixmālacnūniꞌtit talakalhuꞌmān Dios ixpālacata kexpaꞌtniꞌpāꞌnaꞌntit xlaꞌ. Chuntzaꞌ līpāxuhua Dios.
\v 6 Tatzoꞌkniꞌ na ixtachihuīn Dios:
\q Quit iclacsacli aꞌktin chihuix tū xatapalaxlaꞌ.
\q Chuhuaꞌj quit icuiꞌlī chāꞌtin tī huaꞌchi aꞌktin chihuix xalaꞌ tzāstūn jā nayāhuacan templo nac Sión.
\q Xlacaꞌn tī talīpāhuan xlaꞌ, jā chu tlakaj catitalīpāhuanli.
\m
\v 7 Huāꞌmāꞌ chihuix huanicuꞌtun Cristo. Huiꞌxinaꞌn aꞌkaꞌīꞌnīꞌtaꞌntittzaꞌ ē ūꞌtzaꞌ līcaꞌtzīyāꞌtit Cristo xatapalaxlaꞌ. Tī jā taꞌaꞌkaꞌīꞌcuꞌtun, xlacaꞌn cālīchihuīnaꞌn ixtachihuīn Dios jā tatzoꞌkniꞌ huāꞌmāꞌ:
\q Chihuix tū talakmakaꞌlh tapācnaꞌnīꞌn,
\q huāꞌmāꞌ chihuix ūꞌtzaꞌ lītaxtulh tū āꞌchulāꞌ ixlacasquiꞌnca.
\m
\v 8 Nā tatzoꞌkniꞌ na ixtachihuīn Dios:
\q Huāꞌmāꞌ chihuix nacāmāꞌaꞌkcheꞌkxlanī tachiꞌxcuhuīꞌt;
\q huāꞌmāꞌ chihuix nacāmāmakahuasī xlacaꞌn.
\m Xlacaꞌn taꞌaꞌkcheꞌkxla ixpālacata jā taꞌaꞌkaꞌīꞌcuꞌtun tī Dios macamilh ixpālacata nacāmakapūtaxtūcan. Dios xapūla ixcaꞌtzī tū nacāꞌaꞌnaniꞌ tī jā taꞌaꞌkaꞌīꞌcuꞌtun ixtachihuīn Dios.
\s Quinaꞌn ixtachiꞌxcuhuīꞌt Dios
\p
\v 9 Tāꞌtimīn, huiꞌxinaꞌn jā chī xlacaꞌn tī jā taꞌaꞌkaꞌīꞌ. Huiꞌxinaꞌn tachiꞌxcuhuīꞌt tī cālacsacnīꞌt Dios. Nā huiꞌxinaꞌn ixpālejniꞌ quiMāpaꞌksīniꞌcaꞌn Dios. Nā huiꞌxinaꞌn tapaꞌksīniꞌyāꞌtit Dios. Nā huiꞌxinaꞌn ixtachiꞌxcuhuīꞌt Dios. Dios lacasquiꞌn huiꞌxinaꞌn nacāmācaꞌtzīnīyāꞌtit āꞌmakapitzīn līꞌaꞌcnīn tū xlaꞌ tlahuanīꞌt. Dios ūꞌtzaꞌ tī cātaꞌsaniꞌnīꞌtaꞌn ē cāmāxtunīꞌtaꞌn jā cāꞌpucsua ē cālīminīꞌtaꞌn jā tzēhuanīꞌt xkakanaꞌn.
\v 10 Xapūla huiꞌxinaꞌn jā ixtachiꞌxcuhuīꞌt Dios ixuanīꞌtaꞌntit. Chuhuaꞌj huiꞌxinaꞌn ixtachiꞌxcuhuīꞌttzaꞌ Dios. Xapūla jā ixcaꞌtzīyāꞌtit palh Dios lakalhuꞌmanīniꞌn. Chuhuaꞌj caꞌtzīyāꞌtittzaꞌ, ixpālacata Dios cālakalhuꞌmanīꞌtaꞌntzaꞌ.
\s Ixlacasquiꞌnca nakexmatniꞌyāuj Dios
\p
\v 11 Tāꞌtimīn, huiꞌxinaꞌn latlāꞌhuaꞌnāꞌtit chī makatiyātīꞌn nac cāꞌquilhtamacuj, ixpālacata tapaꞌksīyāꞌtit nac aꞌkapūn. Chuhuaꞌj iccāsquiꞌniꞌyān jā titlahuaꞌyāꞌtit jā tze mintalacapāstacniꞌcaꞌn. Camakxtektit tzamāꞌ talacapāstacniꞌ tū nalactlahua chī aꞌkaꞌīꞌniꞌyāꞌtit Cristo.
\v 12 Tzej calatāꞌkchokotit na ixlacatīncaꞌn tī jā taꞌaꞌkaꞌīꞌ. Chuntzaꞌ, masqui cacātalīmālacsuꞌyun palh tlahuaꞌyāꞌtit catūhuālh tū jā tze, xlacaꞌn natacaꞌtzī palh jā ixlīcānaꞌ. Natalaktzīꞌn huiꞌxinaꞌn tlahuaꞌyāꞌtit tū tze. Chuntzaꞌ xlacaꞌn natamākaꞌtlīꞌ Dios aꞌcxniꞌ xlaꞌ naputzānaꞌnī.
\p
\v 13 Cacākexpaꞌtniꞌtit ixlīpōꞌktucaꞌn scujnīꞌn ixpālacata chuntzaꞌ Dios lacasquiꞌn. Cakexpaꞌtniꞌtit xapuxcuꞌ cāꞌlacchicniꞌ.
\v 14 Cacākexpaꞌtniꞌtit gobernadores. Xlacaꞌn Dios cāhuiꞌlīnīꞌt natamakapātīnīn tī tatlahua tū jā tze. Nā cāhuiꞌlīnīꞌt ixpālacata xlacaꞌn natamākaꞌtlīꞌ tī tatlahua tū tze.
\v 15 Chuntzaꞌ huāꞌmāꞌ ixtalacasquiꞌnīn Dios. Xlaꞌ lacasquiꞌn huiꞌxinaꞌn līlacatejtin nalatāꞌkchokoyāꞌtit. Chuntzaꞌ jāla catitahualh catūhuālh chiꞌxcuhuīꞌn tī jā tzej talacapāstaca ē jā tacaꞌtzī.
\p
\v 16 Huiꞌxinaꞌn xalaꞌ cāꞌlacuan ē jā ixlacasquiꞌnca namākentaxtūyāꞌtit ixlīmāpaꞌksīn Moisés. Masqui kaꞌlhīꞌyāꞌtit talacasquiꞌn, jā capuhuaꞌntit tzē natlahuaꞌyāꞌtit tū jā tze. Ē catlahuaꞌtit tū Dios māpaꞌksīniꞌn.
\v 17 Cacālakachiꞌxcuhuīꞌtit ixlīpōꞌktucaꞌn tachiꞌxcuhuīꞌt. Cacāpāxquīꞌtit tāꞌtimīn. Cajicuaꞌniꞌtit Dios. Calakachiꞌxcuhuīꞌtit tī āꞌchulāꞌ kaꞌlhī līmāpaꞌksīn nac cāꞌlacchicniꞌ.
\s Cristo pātīniꞌlh ē nā quinaꞌn napātīniꞌnāuj
\p
\v 18 Huiꞌxinaꞌn tī kaꞌlhīꞌyāꞌtit mimpatroncaꞌn, cacākexpaꞌtniꞌtit mimāpaꞌksīniꞌcaꞌn. Nacākexpaꞌtniꞌyāꞌtit palh tapāxquīꞌnin ē talakalhuꞌmanīniꞌn ē nā palh quiclh tacaꞌtzan.
\v 19 Palh pātīniꞌnāꞌtit masqui jā tū tlahuanīꞌtaꞌntit, ē palh līpātīyāꞌtit ixpālacata tlahuacuꞌtunāꞌtit ixtalacasquiꞌnīn Dios, ūꞌtzaꞌ tze na ixlacatīn Dios.
\v 20 Palh tlahuaꞌyāꞌtit tū jā tze, ē ūꞌtzaꞌ cātalītucsān, ē masqui līlacatzucu tāyaniꞌyāꞌtit, huāꞌmāꞌ jā tū ixtapalh na ixlacatīn Dios. Palh līlacatzucu tāyaniꞌyāꞌtit chī cātatucsān, masqui tlahuanīꞌtaꞌntit xmān tū tze, chuntzaꞌ Dios nacāsicuaꞌlanātlahuayān.
\v 21 Tī cālacsacnīꞌt Dios, xlacaꞌn natapātīniꞌn. Cristo ūꞌtzaꞌ pātīniꞌlh quimpālacatacaꞌn. Quincāmāsuꞌyuniꞌn chī nalīmakscaꞌtāuj xlaꞌ.
\v 22 Cristo jā tū tlahualh tū jā tze. Jā maktin kexmatca nahuan tū jā ixlīcānaꞌ.
\v 23 Xlaꞌ jā ixcālakapala tī ixtalakapala xlaꞌ. Jā maktin huanli namālakxokonī xlacaꞌn tī tamakapātīnīnli. Cristo ixcaꞌtzī namin quilhtamacuj nataxokonuꞌn. Dios nacāputzānaꞌniꞌ chuntzaꞌ chī ixlacasquiꞌnca.
\v 24 Cristo ūꞌtzaꞌ xokolh quincuentacaꞌn aꞌcxniꞌ nīlh nac cruz. Xlaꞌ lacasquiꞌn namakxtekāuj tū jā tze, ē natlahuayāuj tū ixtalacasquiꞌnīn Dios. Cristo pātīniꞌlh quimpālacatacaꞌn. Chuntzaꞌ quincālīmātzeyīyān.
\v 25 Xapūla huiꞌxinaꞌn ixlatlāꞌhuaꞌnāꞌtit huaꞌchi borregos tū ixtatzaꞌnkānīꞌt. Chuhuaꞌj taspiꞌtnīꞌtaꞌntit. Laktaꞌnīꞌtaꞌntit Jesucristo. Xlaꞌ nacāmaktakaꞌlhān huiꞌxinaꞌn.
\c 3
\s Chī natalīlātahuiꞌla tī tatamakaxtoknīꞌttzaꞌ
\p
\v 1 Nā huiꞌxinaꞌn puscan, cakexpaꞌtniꞌtit minkōluꞌcaꞌn. Chuntzaꞌ, palh minkōluꞌcaꞌn jā taꞌaꞌkaꞌīꞌ ixtachihuīn Dios, xlacaꞌn nataꞌaꞌkaꞌīꞌcuꞌtun aꞌcxniꞌ natalaktzīꞌn huiꞌxinaꞌn tzej latlāꞌhuaꞌnāꞌtit. Chuntzaꞌ jā ixlacasquiꞌnca nacāhuanican catūhuālh.
\v 2 Chiꞌxcuhuīꞌn natalaktzīꞌn chī ixpuscātcaꞌn tatlahua tū tze ē talakachiꞌxcuhuīꞌ Dios. Ūꞌtzaꞌ natalīꞌaꞌkaꞌīꞌcuꞌtun.
\v 3 Makapitzīn puscan, ixpālacata tzēhuanīꞌt tahuancuꞌtun, tzēhuanīꞌt tacāxtlahua ixyaꞌjcaꞌn. Tataꞌaꞌkanū ixaꞌkaslihuitcaꞌn xaꞌoro ē tamacatahuiꞌla ixmacatzātzātcaꞌn xaꞌoro. Talhakāꞌ tzēhuanīꞌt ixluꞌxuꞌcaꞌn. Tzamāꞌ catūhuālh jā ūꞌtzaꞌ tū tlahua tzēhuanīꞌt chāꞌtin puscāt na ixlacatīn Dios.
\v 4 Palh lactzēhuanīꞌt huancuꞌtunāꞌtit, ixlacasquiꞌnca nakaꞌlhīꞌyāꞌtit xatze mintalacapāstacniꞌcaꞌn ē līpāxuhua natahuiꞌlaꞌyāꞌtit. Huāꞌmāꞌ tze na ixlacatīn Dios. Ūꞌtzaꞌ tū lacuan nacāmāxtuyān; ūꞌtzaꞌ tū natāyaniꞌ.
\v 5 Chuntzaꞌ lactzēhuanīꞌt talīlalh puscan xamakās tī ixtalīpāhuan Dios ē ixtakexmatniꞌ Dios. Xlacaꞌn nā ixtakexmatniꞌ ixkōluꞌcaꞌn.
\v 6 Chuntzaꞌ ixtlahua Sara makāstzaꞌ. Xlaꞌ ixkexmatniꞌ ixkōluꞌ Abraham ē ixlaktzīꞌn chī māpaꞌksīniꞌ. Huiꞌxinaꞌn huaꞌchi ixtzuꞌmaꞌjan Sara, palh tlahuaꞌyāꞌtit tū tze ē palh jā jicuaꞌnāꞌtit.
\p
\v 7 Chuhuaꞌj huiꞌxinaꞌn chiꞌxcuhuīꞌn tī kaꞌlhīꞌyāꞌtit mimpuscātcaꞌn, cacaꞌtzītit chī nacātāꞌtahuiꞌlaꞌyāꞌtit chuntzaꞌ chī ixtalacasquiꞌnīn Dios. Puscan, xlacaꞌn jā lactliꞌhuiꞌquin chī huiꞌxinaꞌn. Ūꞌtzaꞌ nacālīlakachiꞌxcuhuīꞌyāꞌtit. Nacālakachiꞌxcuhuīꞌyāꞌtit ixpālacata xlacaꞌn chuntzaꞌ chī huiꞌxinaꞌn maktīniꞌnīꞌtaꞌntit talakalhuꞌmān tū Dios māstāꞌ. Ūꞌtzaꞌ huāꞌmāꞌ xasāstiꞌ milatamatcaꞌn tū tāyaniꞌ pōꞌktu quilhtamacuj. Palh chuntzaꞌ natlahuaꞌyāꞌtit huiꞌxinaꞌn nacaꞌtzīyāꞌtit Dios nakexmata aꞌcxniꞌ naꞌorarlīꞌyāꞌtit.
\s Makapitzīn tapātīniꞌn ixpālacata tatlahua tū tze
\p
\v 8 Chuhuaꞌj xmān huāꞌmāꞌ iccāhuanicuꞌtunān: Kempātin calacapāstactit. Calālakalhuꞌmaꞌntit. Calāpāxquīꞌtit chī lītāꞌtimīn. Calātlahuaniꞌtit tū tze. Jā kaꞌtlaꞌ camakcaꞌtzītit.
\v 9 Palh catīhuālh cātlahuaniꞌyān tū jā tze, jā titlahuaniꞌyāꞌtit chuntzaꞌ huiꞌxinaꞌn. Palh catīhuālh cālakapalayān, jā tilakapalaꞌyāꞌtit. Xatze casquiꞌniꞌtit Dios xlaꞌ casicuaꞌlanātlahualh. Ūꞌtzaꞌ huāꞌmāꞌ tū Dios lacasquiꞌn. Palh chuntzaꞌ tlahuaꞌyāꞌtit, Dios nacāsicuaꞌlanātlahuayān huiꞌxinaꞌn.
\v 10 Tatzoꞌkniꞌ na ixtachihuīn Dios:
\q Tī līpāxuhua talatahuiꞌlacuꞌtun, jātzaꞌ cachīhuālh catahuanli.
\q Jātzaꞌ cataꞌaꞌkskāhuīꞌnilh.
\q 	
\v 11 	 Catamakxtekkōꞌlh tū jā tze ē catatlahualh tū tze.
\q Catalīhuiꞌlīlh caꞌcs natalatahuiꞌla pōꞌktu quilhtamacuj.
\q 	
\v 12 	 Dios cāmaktakaꞌlha tī lactze chiꞌxcuhuīꞌn.
\q Cākexmatniꞌ ixoracioncaꞌn.
\q Dios jā cāmaktāya tī tatlahua tū jā tze.
\p
\v 13 Nūn chāꞌtin caticātlahuaniꞌn tū jā tze palh huiꞌxinaꞌn xmān tlahuacuꞌtunāꞌtit tū tze.
\v 14 Palh huiꞌxinaꞌn pātīniꞌnāꞌtit xmān ixpālacata tlahuaꞌyāꞌtit tū tze, chuntzaꞌ Dios nacāsicuaꞌlanātlahuayān. Jā cacājicuaꞌniꞌtit chiꞌxcuhuīꞌn. Jā catamakchuyīꞌtit.
\v 15 Calacapāstactit Cristo ūꞌtzaꞌ miMāpaꞌksīniꞌcaꞌn. Cakexpaꞌtniꞌtit xmān xlaꞌ. Skalalh natahuiꞌlaꞌyāꞌtit tzej nakelhtīniꞌnāꞌtit aꞌcxniꞌ nacātakelhasquiꞌniꞌyān chī aꞌkaꞌīꞌyāꞌtit Cristo. Līlacatzucu nakelhtīniꞌnāꞌtit huiꞌxinaꞌn. Calacapāstactit Dios cākexmatmāꞌn.
\v 16 Jā titlahuaꞌyāꞌtit tū jā tze. Chuntzaꞌ nacāmāmaxanīꞌyāꞌtit tī cātalakapalayān huiꞌxinaꞌn ē tī cātalīchihuīnaꞌnān tū jā tze ixpālacata aꞌkaꞌīꞌniꞌyāꞌtit Cristo.
\v 17 Tī tatlahua tū jā tze, xlacaꞌn nacāmakapātīnīncan. Huiꞌxinaꞌn jā chuntzaꞌ cahuantit chī xlacaꞌn. Āꞌchulāꞌ tze palh napātīniꞌnāꞌtit, palh chuntzaꞌ ixtalacasquiꞌnīn Dios, masqui jā tlahuanīꞌtaꞌntit tū jā tze.
\p
\v 18 Cristo xmān maktin nīlh quimpālacatacaꞌn. Chuntzaꞌ līxokolh quincuentacaꞌn. Masqui Cristo tze, xlaꞌ pātīniꞌlh ixpālacatacaꞌn tachiꞌxcuhuīꞌt tī jā tze. Nīlh quimpālacatacaꞌn, ixpālacata quincāmāsuꞌyucuꞌtunniꞌ na ixlacatīn Dios. Masqui maknīca Jesucristo, huīꞌlhcus.
\v 19 Aꞌcxniꞌ jānaꞌj ixlacastālancuanaꞌn Cristo, xlaꞌ aꞌlh jā ixcāchīꞌcanīꞌt ixlīstacnaꞌcaꞌn nīnīꞌn. Cātasuꞌyuniꞌlh ē cāhuanilh palh ūꞌtzaꞌ Cristo.
\v 20 Xlacaꞌn aꞌcxniꞌ ixtalahuiꞌlānaꞌlhcus jā taꞌaꞌkaꞌīꞌniꞌcuꞌtunli Dios. Dios līlacatzucu ixcākaꞌlhīmāꞌlh xlīmacua Noé ixtlahuamāꞌlh barco. Aꞌcxniꞌ lalh lakuat, xmān kelhatzeyan tachiꞌxcuhuīꞌt taꞌaꞌkapūtaxtulh nac barco na ixkelhniꞌ xcān.
\v 21 Chuntzaꞌ quinaꞌn tī quincātamakapūtaxtūnīꞌtaꞌntzaꞌ, quinaꞌn līꞌaꞌkpaxui xcān. Aꞌcxniꞌ aꞌkpaxāuj, jā xmān quimactiꞌyaꞌtcaꞌn nalīmāyujūyāuj. Aꞌcxniꞌ aꞌkpaxāuj, chuntzaꞌ līmāsuꞌyuyāuj Dios xapanīꞌttzaꞌ quincuentacaꞌn, ixpālacata Jesucristo lacastālancuanaꞌnīꞌttza, ē chuntzaꞌ aꞌkapūtaxtunīꞌtaujtzaꞌ.
\v 22 Jesucristo tanūnīꞌttzaꞌ nac aꞌkapūn ē huīꞌlh na ixpekxtūcānaꞌj Dios. Chuhuaꞌj xlaꞌ cāmāpaꞌksīkōꞌ ángeles ē ixlīpōꞌktucaꞌn tī takaꞌlhī līmāpaꞌksīn.
\c 4
\s Dios cāmaxquīꞌ catūhuālh chāꞌtunuꞌ ixtachiꞌxcuhuīꞌt
\p
\v 1 Cristo pātīniꞌlh aꞌcxniꞌ ixlatlāꞌhuan nac cāꞌquilhtamacuj. Cacaꞌtzītit huiꞌxinaꞌn tzē nacāꞌaꞌkspulayān chuntzaꞌ. Jā cajicuaꞌntit. Tī tapātīniꞌmāꞌnalh, xlacaꞌn tamakxteknīꞌttzaꞌ tatlahua tū jā tze.
\v 2 Chuhuaꞌj jātzaꞌ catlahuaꞌtit tū jā tze chī tachiꞌxcuhuīꞌt tī tatlahua xmān tū xlacaꞌn talacasquiꞌn. Calatahuiꞌlaꞌtittzaꞌ chuntzaꞌ chī ixtalacasquiꞌnīn Dios.
\v 3 Xapūla huiꞌxinaꞌn makās ixtlahuapāꞌnaꞌntit tū tatlahuacuꞌtun tī jā taꞌaꞌkaꞌīꞌ. Ixtlahuaꞌyāꞌtit tū jā tze mintalacapāstacniꞌcaꞌn. Ixkaꞌchīyāꞌtit. Ixtlahuaꞌyāꞌtit cāꞌtaniꞌ ē aꞌntzaꞌ ixtlahuaꞌyāꞌtit tū jā tze. Ixtakēstokāꞌtit nakoꞌtāꞌtit. Ixcātatzokostaniꞌyāꞌtit ídolos. Dios jā lakatī huāꞌmāꞌ.
\v 4 Chuhuaꞌj tī jā taꞌaꞌkaꞌīꞌ, xlacaꞌn talīꞌaꞌcnī chī huiꞌxinaꞌn jātzaꞌ cātāꞌtakēstokāꞌtit xlacaꞌn palh nacātāꞌtlahuaꞌyāꞌtit tū jā tze. Ūꞌtzaꞌ cātalīlakapalayān huiꞌxinaꞌn.
\v 5 Xlacaꞌn nacāputzānaꞌniꞌ Dios. Ixlīcānaꞌ xlaꞌ nacāputzānaꞌniꞌ tī talahuiꞌlānaꞌlhcus ē tī xanīntzaꞌ.
\v 6 Ūꞌtzaꞌ cālīmācaꞌtzīnīca xatze tachihuīn tī xanīntzaꞌ chuhuaꞌj. Chuntzaꞌ masqui tanīlh chuntzaꞌ chī ixlīpōꞌktucaꞌn tachiꞌxcuhuīꞌt, ixlīstacnaꞌcaꞌn tzē natatahuiꞌla pōꞌktu quilhtamacuj chuntzaꞌ chī Dios huīꞌlh pōꞌktu quilhtamacuj.
\p
\v 7 Palaꞌj nasputkōꞌ ixlīpōꞌktu. Ūꞌtzaꞌ tzej calīlacapāstacnaꞌntit. Skalalh catahuiꞌlaꞌtit ē pōꞌktu naꞌorarlīꞌyāꞌtit.
\v 8 Tū ixlacasquiꞌnca ūꞌtzaꞌ huāꞌmāꞌ: calāpāxquīꞌtit. Palh pāxquīꞌyāuj āꞌchāꞌtin, mātzaꞌnkēnaꞌniꞌyāuj tū quincātlahuaniꞌnīꞌtaꞌn.
\v 9 Līpāxuhua nalāmānūyāꞌtit na minchiccaꞌn.
\v 10 Dios xtum cāmaxquīꞌnīꞌtaꞌn chāꞌtunuꞌ huiꞌxinaꞌn chī tzē nalītlahuaꞌyāꞌtit tū cāmacamaxquīꞌnīꞌtaꞌn Dios. Chuntzaꞌ tzē namākentaxtūyāꞌtit tū Dios cāmacamaxquīꞌnīꞌtaꞌn. Ē chuntzaꞌ nalāmaktāyaꞌyāꞌtit.
\v 11 Tī taꞌaꞌkchihuīnaꞌn, catamāsuꞌyulh ixtachihuīn Dios. Tī tamaktāya āꞌmakapitzīn, chuntzaꞌ catamaktāyalh chuntzaꞌ chī Dios cāmaxquīꞌnīꞌt. Palh huiꞌxinaꞌn chuntzaꞌ tlahuaꞌyāꞌtit, chuntzaꞌ nalakachiꞌxcuhuīꞌcan Dios ixpālacata Jesucristo. Pōꞌktu quilhtamacuj calakachiꞌxcuhuīꞌca Dios. Xlaꞌ pōꞌktu quilhtamacuj kaꞌlhī līmāpaꞌksīn. Amén.
\s Tapātīniꞌn tī taꞌaꞌkaꞌīꞌ
\p
\v 12 Chuhuaꞌj tāꞌtimīn, jā tipuhuaꞌnāꞌtit jā maktin catipātīniꞌntit huiꞌxinaꞌn. Cacaꞌtzītit chuntzaꞌ cāꞌaꞌkspula tī taꞌaꞌkaꞌīꞌ, ē jā xmān huiꞌxinaꞌn pātīniꞌnāꞌtit. Chuntzaꞌ lītasuꞌyu palh ixlīcānaꞌ huiꞌxinaꞌn aꞌkaꞌīꞌyāꞌtit.
\v 13 Capāxuhuaꞌtit chī pātīniꞌmpāꞌnaꞌntit chuntzaꞌ chī Cristo pātīniꞌlh. Chuntzaꞌ huiꞌxinaꞌn napāxuhuaꞌyāꞌtit aꞌcxniꞌ Cristo namimpala ē nalaktzīꞌncan chī xlaꞌ kaꞌlhī lhūhuaꞌ līmāpaꞌksīn.
\v 14 Aꞌcxniꞌ cātalakapalayān huiꞌxinaꞌn ixpālacata Cristo, napāxuhuaꞌyāꞌtit ixpālacata Espíritu Santo nacāmaktāyayān. Natasuꞌyu xlaꞌ cātāꞌhuiꞌlan huiꞌxinaꞌn. Natasuꞌyu xlaꞌ kaꞌlhī līmāpaꞌksīn. Āꞌmakapitzīn jā tze talīchihuīnaꞌn Cristo. Huiꞌxinaꞌn lakachiꞌxcuhuīꞌyāꞌtit xlaꞌ.
\v 15 Āꞌmakapitzīn tapātīniꞌn ixpālacata xlacaꞌn tamaknīniꞌnīꞌt. Āꞌmakapitzīn tapātīniꞌn ixpālacata takaꞌlhānaꞌnīꞌt. Āꞌmakapitzīn tapātīniꞌn ixpālacata tatlahuanīꞌt āꞌcatūhuālh tū jā tze. Āꞌmakapitzīn tapātīniꞌn ixpālacata tatanūnīꞌt jā jā ixlītanūtcaꞌn. Jā titlahuaꞌyāꞌtit chuntzaꞌ.
\v 16 Palh huiꞌxinaꞌn pātīniꞌnāꞌtit ixpālacata Cristo, jā tilīmāxanaꞌnāꞌtit. Camaxquīꞌtit tapāxcatcaꞌtzīn Dios ixpālacata tapaꞌksīniꞌyāꞌtit Cristo.
\p
\v 17 Chilhtzaꞌ quilhtamacuj tū napūputzānaꞌnī Dios. Xapūla nacāmakapātīnīncan ixtachiꞌxcuhuīꞌt Dios. Palh quinaꞌn naquincāmakapātīnīnān xapūla, āꞌchulāꞌ nacāmakapātīnīncan xlacaꞌn tī jā taꞌaꞌkaꞌīꞌ xatze tachihuīn tū ixlaꞌ Dios.
\v 18 Chuntzaꞌ tatzoꞌkniꞌ na ixtachihuīn Dios:
\q Palh jicslihuaꞌ taꞌaꞌkapūtaxtu xalactze chiꞌxcuhuīꞌn,
\q ¿tū nacāꞌaꞌkspula chiꞌxcuhuīꞌn tī jā tze ē tī talakmakaꞌn Dios?
\m
\v 19 Palh ixtalacasquiꞌnīn Dios natapātīniꞌn makapitzīn ixpālacata tatlahua tū tze, catatlahualhcus tū tze. Catalīpāhuanli xmān Dios. Xlaꞌ tlahuakōꞌnīꞌt ixlīpōꞌktu tū aꞌnan ē pōꞌktu quilhtamacuj cāmaktakaꞌlha. Xlaꞌ pōꞌktu quilhtamacuj mākentaxtū tū huan.
\c 5
\s Cāmaxquīꞌca talacapāstacniꞌ tī ixtaꞌaꞌkaꞌīꞌ
\p
\v 1 Quit iccāmaxquīꞌcuꞌtunān talacapāstacniꞌ huiꞌxinaꞌn tī xanapuxcuꞌnuꞌ nac templo. Nā quit chāꞌtin xapuxcuꞌ. Quit iclaktzīꞌlh chī pātīniꞌlh Cristo. Nā quit naquilakachiꞌxcuhuīꞌcan aꞌcxniꞌ nalakachiꞌxcuhuīꞌcan Cristo aꞌcxniꞌ namimpala.
\v 2 Iccāsquiꞌniꞌyān nacāmaktakaꞌlhāꞌtit ixlacstīn Dios tī xlaꞌ cāmacamaxquīꞌn. Calītlahuaꞌtit ixlīpōꞌktu mintalacapāstacniꞌcaꞌn ē jā casātlahuaꞌtit. Jā xmān titlahuayāꞌtit ixpālacata tlajacuꞌtunāꞌtit tumīn. Cacāmaktakaꞌlhtit xmān ixpālacata tāꞌscujcuꞌtunāꞌtit Dios.
\v 3 Jā ixtēcuꞌnīꞌn huiꞌxinaꞌn tī cāmaktakaꞌlhāꞌtit. Catahuiꞌlaꞌtit chuntzaꞌ chī ixtalacasquiꞌnīn Dios. Chuntzaꞌ xlacaꞌn tzē nacātamakscaꞌtāniꞌ chī huiꞌxinaꞌn.
\v 4 Jesucristo ūꞌtzaꞌ tī xapuxcuꞌ milīpōꞌktucaꞌn huiꞌxinaꞌn tī xanapuxcuꞌnuꞌ nac templo. Xlaꞌ cāmaktakaꞌlhkōꞌ ixlacstīn ē cuenta tlahua chī scujnīꞌtaꞌntit huiꞌxinaꞌn. Aꞌcxniꞌ Jesucristo namimpala, Dios pōꞌktu quilhtamacuj nacāsicuaꞌlanātlahuayān huiꞌxinaꞌn.
\p
\v 5 Nā huiꞌxinaꞌn kaꞌhuaꞌchan, cacākexpaꞌtniꞌtit xanapuxcuꞌnuꞌ tī taꞌaꞌn nac templo. Milīpōꞌktucaꞌn huiꞌxinaꞌn nalālakachiꞌxcuhuīꞌyāꞌtit. Jā capuhuaꞌntit palh āꞌchulāꞌ xalactze huiꞌxinaꞌn ē jā āꞌmakapitzīn. Tatzoꞌkniꞌ na ixtachihuīn Dios:
\q Dios jā cāmaktāya tī kaꞌtlaꞌ tamakcaꞌtzī.
\q Xlaꞌ cāmaktāya tī jā kaꞌtlaꞌ tamakcaꞌtzī.
\m
\v 6 Jā kaꞌtlaꞌ camakcaꞌtzītit. Cakexpaꞌtniꞌtit Dios. Xlaꞌ ūꞌtzaꞌ tī kaꞌlhī lītliꞌhuiꞌqui. Aꞌktin quilhtamacuj aꞌcxniꞌ Dios nalacasquiꞌn, huiꞌxinaꞌn nacātalakachiꞌxcuhuīꞌyān chuntzaꞌ chī ixtalacasquiꞌnīn Dios.
\v 7 Pōꞌktu tū cāmāmakchuyīyān, catamakxtektit Dios nacāmaktāyayān. Xlaꞌ cāmaktakaꞌlhān.
\p
\v 8 Skalalh calatahuiꞌlaꞌtit ē jā catamakxtektit nacātatlajayān. Skāhuīꞌniꞌ tī mintāꞌlāquiclhlaktziꞌcaꞌn, xlaꞌ latlāꞌhuan huaꞌchi lakatin león tū taꞌsa ē putzatlāꞌhuan tī nahuaꞌ.
\v 9 Jā camakxtektit chī aꞌkaꞌīꞌyāꞌtit. Chuntzaꞌ calītlajaꞌtit skāhuīꞌniꞌ. Calacapāstactit calhāxcuhuālh nac cāꞌquilhtamacuj aꞌnan tāꞌtimīn tī nā tapātīniꞌmāꞌnalh.
\v 10 Dios pāxquīꞌnin. Quincālacsacnīꞌtaꞌn ixpālacata ixlacasquiꞌn natapaꞌksīniꞌyāuj Cristo. Chuntzaꞌ pōꞌktu quilhtamacuj natāꞌtahuiꞌlayāuj Dios nac aꞌkapūn. Aꞌcxniꞌ napātīniꞌnāꞌtitcus āꞌmacstiꞌnaꞌj, Dios nacātlahuayān lactze huiꞌxinaꞌn. Nacāmaktāyayān natāyaniꞌyāꞌtit. Nacāmaktāyayān tzej naꞌaꞌkaꞌīꞌyāꞌtit.
\v 11 Dios kaꞌlhīkōꞌ ixlīpōꞌktu lītliꞌhuiꞌqui pōꞌktu quilhtamacuj. Amén.
\s Macāꞌnca āꞌxmān saludos
\p
\v 12 Quit icmātzoꞌknīlh Silvano huāꞌmāꞌ carta tū jā laclhmāꞌn. Quit tzej iccaꞌtzī xlaꞌ chāꞌtin quintāꞌtincaꞌn ē tzej aꞌkaꞌīꞌ. Quit iccāmāsuꞌyuniꞌn xatze tachihuīn ixlaꞌ Dios. Huiꞌxinaꞌn aꞌkaꞌīꞌnīꞌtaꞌntit ūꞌtzaꞌ ixlīcānaꞌ. Chuhuaꞌj jā camakxtektit chī aꞌkaꞌīꞌyāꞌtit huāꞌmāꞌ xatze tachihuīn.
\p
\v 13 Cāmacāꞌniꞌyān saludos xlacaꞌn tī xalanīꞌn nac templo nac Babilonia. Nā xlacaꞌn Dios nā cālacsacnīꞌt. Marcos tī huaꞌchi quinkaꞌhuaꞌcha, nā xlaꞌ cāmacāꞌniꞌyān saludos.
\v 14 Calāskōkatit ixpālacata huiꞌxinaꞌn lāpāxquīꞌyāꞌtit.
\p Tzej calatapāꞌtit milīpōꞌktucaꞌn huiꞌxinaꞌn tī tapaꞌksīniꞌyāꞌtit Cristo. Amén.