\id 2PE
\h 2 Pedro
\toc1 2 San Pedro
\mt 2 San Pedro
\c 1
\s Cāmacāꞌniꞌca saludos tī ixtaꞌaꞌkaꞌīꞌ
\p
\v 1 Quit Simón Pedro. Ictzoꞌkmāꞌlh huāꞌmāꞌ carta. Quit chāꞌtin ixapóstol Jesucristo ē ūꞌtzaꞌ ictāꞌscuja. Quit iccātzoꞌknuniꞌyān huiꞌxinaꞌn tī aꞌkaꞌīꞌyāꞌtit nā chuntzaꞌ chī quinaꞌn. Quinaꞌn tzē nalīpāxuayāuj tū quincātlahuaniꞌnīꞌtaꞌn Dios. Dios kēxtim cālaktzīꞌn tachiꞌxcuhuīꞌt, ē chuntzaꞌ quincālaktzīꞌnān kēxtim ixpālacata aꞌkaꞌīꞌniꞌyāuj Jesucristo.
\v 2 Dios cacāsicuaꞌlanātlahuan huiꞌxinaꞌn ē tzej calatapāꞌtit, ixpālacata huiꞌxinaꞌn lakapasāꞌtit Dios ē quiMāpaꞌksīniꞌcaꞌn Jesucristo.
\s Chī tahuanīꞌt tī tatapaꞌksīniꞌ Dios
\p
\v 3 Dios, kaꞌlhī lhūhuaꞌ lītliꞌhuiꞌqui ē quincāmaxquīꞌnīꞌtaꞌn ixlīpōꞌktu tū maclacasquiꞌnāuj natahuiꞌlayāuj chuntzaꞌ chī xlaꞌ lacasquiꞌn, ixpālacata lakapasāuj Dios. Nā quincāmātaꞌsatīnīn ixpālacata natāꞌtahuiꞌlayāuj nac aꞌkapūn jā xlaꞌ māpaꞌksīniꞌn ē jā xkakanaꞌn.
\v 4 Chuntzaꞌ Dios naquincātlahuaniꞌyān lhūhuaꞌ tū tze chuntzaꞌ chī xlaꞌ huanīꞌt. Dios quincāmaxquīꞌnīꞌtaꞌn chī nalīsāstīꞌlatāꞌkchokoyāuj. Quincāmaxquīꞌyān xasāstiꞌ quintalacapāstacniꞌcaꞌn tū xatze chī ixtalacapāstacniꞌ Dios. Chuntzaꞌ tzē namakxtekāuj tū jā tze tū tlahuacan nac cāꞌquilhtamacuj.
\v 5 Huiꞌxinaꞌn aꞌkaꞌīꞌyāꞌtittzaꞌ xatze tachihuīn ixlaꞌ Jesucristo, ē chuntzaꞌ ixlacasquiꞌnca nalīhuiꞌlīyāꞌtit natlahuaꞌyāꞌtit tū tze. Ē jā xmān huāꞌmāꞌ. Nā ixlacasquiꞌnca āꞌchulāꞌ nascaꞌtāꞌtit tū ixlaꞌ Dios.
\v 6 Nā ixlacasquiꞌnca minaꞌcstucaꞌn natatapaꞌksīyāꞌtit. Nā ixlacasquiꞌnca līlacatzucu napātīniꞌnāꞌtit. Nā ixlacasquiꞌnca līlacatejtin nalatāꞌkchokoyāꞌtit chuntzaꞌ chī Dios lacasquiꞌn.
\v 7 Nā ixlacasquiꞌnca nacāpāxquīꞌyāꞌtit tāꞌtimīn. Ē jā xmān tāꞌtimīn. Nā ixlacasquiꞌnca nacāpāxquīꞌyāꞌtit ixlīpōꞌktucaꞌn tachiꞌxcuhuīꞌt.
\p
\v 8 Ixlīpōꞌktu huāꞌmāꞌ ūꞌtzaꞌ natlahuakōꞌyāꞌtit. Palh ixlīcānaꞌ natlahuaꞌyāꞌtit, chuntzaꞌ tasuꞌyu palh tzej latlāꞌhuaꞌnāꞌtit na ixtej Dios. Nā tasuꞌyu palh jā chu tlakaj lakapasāꞌtit quiMāpaꞌksīniꞌcaꞌn Jesucristo.
\v 9 Tī jā tatlahua tzamāꞌ tachihuīn, xlacaꞌn huaꞌchi lakatzīꞌnīꞌn ixpālacata xlacaꞌn jā tacaꞌtzī. Huaꞌchi lakatzīꞌnīꞌn ixpālacata tapātzaꞌnkānīꞌt palh Dios cāxapaniꞌnīꞌttzaꞌ ixcuentacaꞌn.
\v 10 Chuntzaꞌ tāꞌtimīn, calīhuiꞌlīꞌtit natlahuaꞌyāꞌtit tzamāꞌ tachihuīn. Chuntzaꞌ natasuꞌyu Dios cātaꞌsatīnīꞌtaꞌn ē cālacsacnīꞌtaꞌn huiꞌxinaꞌn. Palh chuntzaꞌ tlahuaꞌyāꞌtit, jā catitamakahuastit.
\v 11 Chuntzaꞌ nacātamaxquīꞌyān talacasquiꞌnīn tzē natanūꞌyāꞌtit jā pōꞌktu quilhtamacuj māpaꞌksīniꞌn quiMāpaꞌksīniꞌcaꞌn Jesucristo tī quincāmakapūtaxtūyān.
\p
\v 12 Ūꞌtzaꞌ pōꞌktu quilhtamacuj iccālīmāpāstaquīyān tzamāꞌ tachihuīn, masqui huiꞌxinaꞌn lakapasāꞌtit, ē masqui tzej aꞌkaꞌīꞌyāꞌtit xatze tachihuīn tū ixlīcānaꞌ tū cātamāsuꞌyuniꞌnīꞌtaꞌn.
\v 13 Quit icpuhuan tze naꞌiccāmāpāstaquīyān tzamāꞌ tachihuīn chī ictihuīꞌlhcus.
\v 14 Quit iccaꞌtzī huaꞌchi palajtzaꞌ naꞌicnī. Chuntzaꞌ quimācaꞌtzīnīlh quiMāpaꞌksīniꞌcaꞌn Jesucristo.
\v 15 Quit iccāhuanicuꞌtunān huāꞌmāꞌ tachihuīn, ixpālacata chuntzaꞌ tzē nalīlacapāstacāꞌtit pōktu quilhtamacuj aꞌcxniꞌ xanīntzaꞌ naꞌicuan.
\s Laktzīꞌnca Jesucristo chī kaꞌlhī līmāpaꞌksīn
\p
\v 16 Quinaꞌn iccāmāsuꞌyuniꞌnīꞌtaꞌn huiꞌxinaꞌn chī kaꞌlhī līmāpaꞌksīn quiMāpaꞌksīniꞌcaꞌn Jesucristo ē chī xlaꞌ namimpala. Tū quinaꞌn iccāmāsuꞌyuniꞌyān, jātzaꞌ tachihuīn tū tamāsuꞌyunīꞌt chiꞌxcuhuīꞌn tī taꞌaꞌkskāhuīꞌnincuꞌtun. Quinaꞌn iclīlaktzīꞌuj quilakastapūncaꞌn Jesucristo ē nā iclaktzīꞌuj chī kaꞌlhī lītliꞌhuiꞌqui.
\v 17 Aꞌntzaꞌ xaꞌicyānaꞌuj aꞌcxniꞌ Dios quinTātaꞌcaꞌn mākaꞌtlīꞌlh Jesucristo. Minchaꞌ aꞌktin tachihuīn nac aꞌktin poklhnuꞌ xaslamama. Huanli: “Ūꞌtzaꞌ huāꞌmāꞌ quinKaꞌhuaꞌcha tī icpāxquīꞌ ē quimakapāxuī.”
\v 18 Māniꞌ quinaꞌn ickexmatui tzamāꞌ tachihuīn tū minchaꞌ nac aꞌkapūn. Aꞌntzaꞌ xaꞌictāꞌhuiꞌlānaꞌuj Jesucristo nac sipej. Aꞌntzaꞌ xtum tasuꞌyulh Jesucristo ixpālacata Dios māxkakēlh.
\p
\v 19 Ūꞌtzaꞌ āꞌchulāꞌ iclīꞌaꞌkaꞌīꞌyāuj tū tatzoꞌkli profetasnaꞌ tī cāmātzoꞌknīlh Dios. Nā huiꞌxinaꞌn tzej nakelhtahuaꞌkaꞌyāꞌtit tū tatzoꞌkli profetasnaꞌ hasta tzej nakexpatāꞌtit. Huāꞌmāꞌ huaꞌchi lámpara tū māxkakēniꞌn jā cāꞌpucsuaꞌ hasta naxkaka ē namāxkakēniꞌn xakaꞌtlaꞌ staꞌcu.
\v 20 Ixlacasquiꞌnca nalacapāstacāꞌtit tū naꞌiccāhuaniyān. Na ixtachihuīn Dios aꞌntzaꞌ jā tatzoꞌkniꞌ tū tahuanli ixaꞌkchihuīnaꞌnīꞌn Dios, tzamāꞌ jā ixtalacapāstacniꞌcaꞌn aꞌkchihuīnaꞌnīꞌn.
\v 21 Tū ixtamāsuꞌyu aꞌkchihuīnaꞌnīꞌn jā xmān ixtalacapāstacniꞌcaꞌn tachiꞌxcuhuīꞌt. Tzamāꞌ lactze chiꞌxcuhuīꞌn tī ixtatāꞌscuja Dios, xlacaꞌn ixtahuan tū ixcāmāpāstaquī Espíritu Santo.
\c 2
\s Makapitzīn ixtamāsuꞌyu tū jā ixlīcānaꞌ
\r Judas 4‑13
\p
\v 1 Lakmajtzaꞌ ixtatanū na ixpuꞌnancaꞌn tachiꞌxcuhuīꞌt āꞌmakapitzīn aꞌkchihuīnaꞌnīꞌn tī ixtaꞌaꞌkskāhuīꞌnin. Nā natatanū na mimpuꞌnancaꞌn āꞌmakapitzīn tī natamāsuꞌyu tū jā ixlīcānaꞌ. Tū natamāsuꞌyu ūꞌtzaꞌ nalactlahua chī talīꞌaꞌkaꞌīꞌ makapitzīn. Tzamāꞌ aꞌkskāhuīꞌniꞌnīꞌn natamāsuꞌyu Jesucristo jā īꞌSkaꞌtaꞌ Dios masqui xlaꞌ ūꞌtzaꞌ tī xokolh ixcuentacaꞌn. Āꞌlīmaktin nacāmakapātīnīncan xlacaꞌn ixpālacata tū tatlahua.
\v 2 Chī xlacaꞌn natalatāꞌkchoko, huaꞌchi jā tū tū nacālīmāmāxanīcan. Lhūhuaꞌ tī nataꞌaꞌkaꞌīꞌcuꞌtun tū natamāsuꞌyu xlacaꞌn. Nā natatlahua tū jā tze chī natatlahua tzamāꞌ aꞌkskāhuīꞌniꞌnīꞌn. Chuntzaꞌ natatlahua ixpālacata jā tze nalīchihuīnaꞌncan xatze tachihuīn tū ixlīcānaꞌ.
\v 3 Tzamāꞌ aꞌkskāhuīꞌniꞌnīꞌn takaꞌlhīcuꞌtun tumīn. Ūꞌtzaꞌ nacātalīmāsuꞌyuniꞌyān tū jā ixlīcānaꞌ. Dios makāstzaꞌ līhuiꞌlīnīꞌt nacāmakapātīnīn xlacaꞌn tī tatlahua chuntzaꞌ. Tzamāꞌ aꞌkskāhuīꞌniꞌnīꞌn nā xlacaꞌn nataxoko na ixlacatīn Dios.
\p
\v 4 Dios jā cāmātzaꞌnkēnaꞌniꞌlh ángeles tī tatlahualh tū jā tze. Cāmāyujūlh nac pūpātīn. Aꞌntzaꞌ jā cāꞌpucsuaꞌ natatachoko chī xatachīꞌnīꞌn hasta tzamāꞌ quilhtamacuj aꞌcxniꞌ namakapātīnīniꞌn Dios.
\v 5 Dios cāmakapātīnīnli tachiꞌxcuhuīꞌt tī ixtahuiꞌlānaꞌlh makās. Macamilh lakuat. Ūꞌtzaꞌ talīnīkōꞌlh ixlīpōꞌktucaꞌn tachiꞌxcuhuīꞌt nac cāꞌquilhtamacuj ixpālacata jā tzeya tachiꞌxcuhuīꞌt ixtahuanīꞌt. Dios cāmakapūtaxtūlh xmān kelhatzeyan tachiꞌxcuhuīꞌt. Chāꞌtin ixuanican Noé. Xlaꞌ ixcāmāsuꞌyuniꞌ tachiꞌxcuhuīꞌt ixlacasquiꞌnca līlacatejtin ixtalatāꞌkchokolh.
\v 6 Dios cāmakapātīnīnli xalanīꞌn nac cāꞌlacchicniꞌ jā ixuanican Sodoma ē nā jā ixuanican Gomorra. Dios cālhcuyukōꞌlh tzamāꞌ aꞌktuꞌ cāꞌlacchicniꞌ. Chuntzaꞌ Dios līmāsuꞌyulh xlaꞌ cāmakapātīnīn tī jā takexmatniꞌcuꞌtun.
\v 7 Dios māxtulh nac Sodoma chāꞌtin chiꞌxcuꞌ tī ixuanican Lot. Chuntzaꞌ līꞌaꞌkapūtaxtulh. Lot tzeya chiꞌxcuꞌ ixuanīꞌt ē ixlītamakchuyī āꞌmakapitzīn xalanīꞌn nac Sodoma jā tzeya chiꞌxcuhuīꞌn.
\v 8 Lot tzeya chiꞌxcuꞌ ixuanīꞌt. Ē ixcātāꞌlahuīꞌlh ē ixcālaktzīꞌn ē ixcākexmata lakalī lakalī, ē ūꞌtzaꞌ līlīpuhuanli tū ixtatlahua tū jā tze.
\v 9 Māpaꞌksīniꞌ Dios namakapūtaxtū chāꞌtin chiꞌxcuꞌ tī pātīniꞌmāꞌlh palh aꞌkaꞌīꞌniꞌ Dios. Dios, masqui jānaꞌj cāmakapātīnīn tī jā tzeya chiꞌxcuhuīꞌn, nacāmakapātīnīn tzamāꞌ quilhtamacuj aꞌcxniꞌ Dios nacāputzānaꞌnī.
\v 10 Āꞌchulāꞌ nacāmakapātīnīn tī talakmakaꞌn ixlīmāpaꞌksīn Dios ē tatlahua tū jā tze chī ixtalacapāstacniꞌcaꞌn. Xlacaꞌn jā tajicuaꞌn natatlahua tū jā tze. Tatlahua xmān tū xlacaꞌn talacasquiꞌn. Jā tajicuaꞌn talakapala tī takaꞌlhī līmāpaꞌksīn.
\v 11 Jā chuntzaꞌ tatlahua ángeles masqui xlacaꞌn āꞌchulāꞌ takaꞌlhī līmāpaꞌksīn. Ángeles jā talakapala āꞌchāꞌtin ē jā tamālacsuꞌyu na ixlacatīn Dios.
\p
\v 12 Tzamāꞌ chiꞌxcuhuīꞌn jā takexmata. Tatlahua tū ūꞌtunuꞌn talacasquiꞌn. Talakapala tū jā takexmata. Xlacaꞌn huaꞌchi animalh xalaꞌ nac cāꞌquiꞌhuīꞌn tū tayuja nac aꞌksuj ē jāla catitaꞌaꞌkapūtaxtulh. Nacāmaknīcan. Nā chuntzaꞌ tzamāꞌ chiꞌxcuhuīꞌn nā natasputa huaꞌchi animalh. Dios nacāmakapātīnīn.
\v 13 Chuntzaꞌ xlacaꞌn natalīxoko tū talīmakapātīnīnli āꞌmakapitzīn. Xlacaꞌn cāꞌcuhuīniꞌ talakatī takoꞌta ē tatlahua āꞌcatūhuālh tū jā tze. Līmāxanaꞌ chī xlacaꞌn cātāꞌhuāꞌyanān huiꞌxinaꞌn jā takēstoknīꞌtaꞌntit, līhuan xlacaꞌn tapuhuan nacātaꞌaꞌkskāhuīꞌyān huiꞌxinaꞌn.
\p
\v 14 Aꞌcxniꞌ xlacaꞌn talaktzīꞌn chāꞌtin puscāt, tapuhuan tū jā tze. Ixlīpōꞌktu ixtalacapāstacniꞌcaꞌn jā tze. Taꞌaꞌkskāhuīꞌ tī jānaꞌj tzej taꞌaꞌkaꞌīꞌ. Talacapāstaca chī natalīkaꞌlhī lhūhuaꞌ tumīn. Dios nacāmakapātīnīn.
\v 15 Xlacaꞌn tamakxteknīꞌt xalacatzajuaꞌ tej ē taꞌaꞌktzaꞌnkānīꞌt. Talatlāꞌhuan chī Balaam tī ixkaꞌhuaꞌcha Beor. Xlaꞌ aꞌkchihuīnaꞌ tī ixaꞌkskāhuīꞌnin. Ixlakatī tumīn. Tlahualh tū jā tze nalītlaja tumīn.
\v 16 Balaam lacaquilhnīca. Masqui burros jā tachihuīnaꞌn, xlaꞌ chihuīnaꞌnli ixburro huaꞌchi chāꞌtin chiꞌxcuꞌ. Quilhnīlh tū ixtlahuacuꞌtun. Xmān chuntzaꞌ Balaam jā makxtekca natlahua tū jā tze tū ixtlahuacuꞌtun.
\p
\v 17 Tzamāꞌ chiꞌxcuhuīꞌn tī tamāsuꞌyu tū jā ixlīcānaꞌ, xmān taꞌaꞌkskāhuīꞌnin. Jā tū ixtapalhcaꞌn. Xlacaꞌn huaꞌchi muꞌsniꞌ tū pūtīnīꞌt. Xlacaꞌn huaꞌchi poklhnuꞌ tū cāmākosū ūꞌniꞌ ē jā talēꞌn xcān. Dios cāxuiꞌlīnīꞌt jā nacāmacāꞌn tzamāꞌ chiꞌxcuhuīꞌn aꞌntzaꞌ jā natatahuiꞌla pōꞌktu quilhtamacuj jā cāꞌpucsuaꞌ.
\v 18 Xlacaꞌn kaꞌtlaꞌ tamakcaꞌtzī aꞌcxniꞌ tachihuīnaꞌn. Tū tahuan, jā tū ixtapalh. Xlacaꞌn tamāsuꞌyu tze palh chāꞌtin tlahua tū lacasquiꞌn quimacniꞌcaꞌn tū jā tze. Chuntzaꞌ talīꞌaꞌkskāhuīꞌ xlacaꞌn tī tamakxtekmāꞌnalhcus tū ixtatlahua aꞌcxniꞌ jānaꞌj ixtalakapasa ixtachihuīn Dios.
\v 19 Tahuan xlacaꞌn tzē natatlahua catūxcuhuālh tū talacasquiꞌn. Jā ixlīcānaꞌ. Xlacaꞌn chī tachīꞌnīꞌn ixpālacata jāla tamakxteka tatlahua tū jā tze. Palh chāꞌtin chiꞌxcuꞌ jāla makxteka catūhuālh, chuntzaꞌ xlaꞌ huaꞌchi tachīꞌn.
\v 20 Tī talakapasnīꞌt Makapūtaxtūnuꞌ tī quiMāpaꞌksīniꞌcaꞌn Jesucristo ē chuntzaꞌ talīmakxteknīꞌt tū jā tze xalaꞌ nac cāꞌquilhtamacuj, ē palh xlacaꞌn natatlahuapala tū jā tze ē jātzaꞌ la tamakxteka, chuntzaꞌ āꞌchulāꞌ natala chī ixtahuanīꞌt xapūla.
\v 21 Āꞌchulāꞌ tze palh jā ixtacaꞌtzīlh chī līlacatejtin latāꞌkchokocan. Masqui ixtacaꞌtzī, tamakxtekli ixlīmāpaꞌksīn Dios tū ixcāmāsuꞌyuniꞌcanīꞌt.
\v 22 Chuntzaꞌ xlacaꞌn huaꞌchi lakatin chichiꞌ. Huancan:
\q Chichiꞌ huaꞌpala ixpaꞌtlāꞌnat.
\q Paꞌxniꞌ aꞌcxniꞌ paxnīꞌttzaꞌ, taspiꞌtpala natapiꞌliꞌ nac cāꞌpūtlūꞌn.
\c 3
\s Namimpala quiMāpaꞌksīniꞌcaꞌn Jesucristo
\p
\v 1 Tāꞌtimīn, ūꞌtzaꞌ huāꞌmāꞌ ixlīꞌaꞌktuꞌ carta tū iccātzoꞌkniꞌnīꞌtaꞌn. Aꞌcxniꞌ quit ictzoꞌkli aꞌktuꞌ carta, quit iccāmāpāstaquīcuꞌtunān tū tze ē tū caꞌtzīyāꞌtittzaꞌ huiꞌxinaꞌn.
\v 2 Iclacasquiꞌn huiꞌxinaꞌn nalacapāstacāꞌtit tū ixtahuan makāstzaꞌ ixaꞌkchihuīnaꞌnīꞌn Dios. Iclacasquiꞌn nacālacapāstacāꞌtit līmāpaꞌksīn tū ixlaꞌ Makapūtaxtūnuꞌ tī quiMāpaꞌksīniꞌcaꞌn Jesucristo. Tzamāꞌ līmāpaꞌksīn iccāmāsuꞌyuniꞌyān quinaꞌn apóstoles.
\p
\v 3 Ixlacasquiꞌnca nakexpatāꞌtit huiꞌxinaꞌn tū naꞌiccāhuaniyān. Aꞌcxniꞌ namin tzamāꞌ āꞌxmān quilhtamacuj, nataꞌaꞌnan chiꞌxcuhuīꞌn tī natatlahuatāꞌkchoko ixlīpōꞌktu tū jā tze tū xlacaꞌn tatlahuacuꞌtun. Ē natalakmakaꞌn Dios.
\v 4 Xlacaꞌn natahuan: “Jesucristo huanli xlaꞌ nataspiꞌtpala. Chuhuaꞌj, ¿jāchu huīꞌlh? Jā minīꞌt. Quinapapanaꞌcaꞌn tanīnīꞌttzaꞌ. Lacxtim lamāꞌlh chuhuaꞌj aꞌcxniꞌ titzuculh cāꞌquilhtamacuj.” Chuntzaꞌ natahuan xlacaꞌn.
\v 5 Huāꞌmāꞌ jā ixlīcānaꞌ. Aꞌnan kempātin tū xlacaꞌn tacaꞌtzī ē tū jā talīchihuīnaꞌncuꞌtun xlacaꞌn. Ūꞌtzaꞌ huāꞌmāꞌ: makās Dios chihuīnaꞌnli ē chuntzaꞌ talīlalh aꞌkapūn ē cāꞌquilhtamacuj. Cāꞌquilhtamacuj lītlahuaca xcān ē ixuīꞌlh na ixpuꞌnan xcān.
\v 6 Cāꞌquilhtamacuj chī ixuīꞌlh xapūla, līmālaksputūca xcān, aꞌcxniꞌ lalh lakuat.
\v 7 Aꞌkapūn ē cāꞌquilhtamacuj tū tahuiꞌlānaꞌlh chuhuaꞌj, natachoko hasta tzamāꞌ quilhtamacuj tū Dios līlacsacnīꞌt. Tzamāꞌ quilhtamacuj natalhcukōꞌ. Ē Dios nacāmakapātīnīnkōꞌ ixlīpōꞌktucaꞌn tachiꞌxcuhuīꞌt tī jā tze.
\p
\v 8 Tāꞌtimīn, jā tipātzaꞌnkāyāꞌtit huāꞌmāꞌ: Māpaꞌksīniꞌ Dios aꞌktin quilhtamacuj laktzīꞌn chī aꞌktin mil cāꞌta. Nā aꞌktin mil cāꞌta laktzīꞌn chī aꞌktin quilhtamacuj.
\v 9 Āꞌmakapitzīn tapuhuan Dios tamakapalī namākentaxtū tū huanīꞌt. Jā chuntzaꞌ. Xlaꞌ quincākaꞌlhīmāꞌn līlacatzucu ixpālacata jā lacasquiꞌn jā tī chāꞌtin napātīniꞌn nac pūpātīn. Xlaꞌ lacasquiꞌn ixlīpōꞌktucaꞌn catamakxtekli tū jā tze.
\p
\v 10 Namin quilhtamacuj aꞌcxniꞌ namimpala Māpaꞌksīniꞌ Jesucristo. Xlaꞌ xamaktin namin aꞌcxniꞌ jā tī chāꞌtin caꞌtzī namin. Xamaktin namin chī chāꞌtin kaꞌlhānaꞌ. Tzamāꞌ quilhtamacuj aꞌkapūn nalaksputa. Palhaꞌ nakexmatcan tū namacasāꞌnan. Natalīlakuankōꞌ macscut ixlīpōꞌktu tū tatasuꞌyu nac aꞌkapūn. Nalhcukōꞌ ixlīpōꞌktu cāꞌquilhtamacuj ē ixlīpōꞌktu tū aꞌnan nac cāꞌquilhtamacuj.
\p
\v 11 Chuhuaꞌj, ixpālacata natalakuankōꞌ ixlīpōꞌktu, tzej calacapāstactit huiꞌxinaꞌn chī nalīlatahuiꞌlaꞌyāꞌtit. Huiꞌxinaꞌn natlahuaꞌyāꞌtit xmān ixtalacasquiꞌnīn Dios.
\v 12 Huiꞌxinaꞌn līpāxuhua calacapāstactit tzamāꞌ quilhtamacuj. Tzamāꞌ quilhtamacuj aꞌkapūn nalhcukōꞌ. Natalīlakuankōꞌ macscut ixlīpōꞌktu tū tatasuꞌyu chuhuaꞌj nac aꞌkapūn.
\v 13 Dios huanīꞌt natlahua aꞌktin xasāstiꞌ aꞌkapūn ē aꞌktin xasāstiꞌ cāꞌquilhtamacuj. Aꞌntzaꞌ natlahuacan xmān tū tze. Ūꞌtzaꞌ huāꞌmāꞌ kaꞌlhīmāꞌnauj, ixpālacata chuntzaꞌ huanīꞌt Dios.
\p
\v 14 Chuntzaꞌ, tāꞌtimīn, līhuan kaꞌlhīpāꞌnaꞌntit huāꞌmāꞌ quilhtamacuj, calīhuiꞌlīꞌtit natlahuaꞌyāꞌtit tū tze na ixlacatīn Dios. Nūn tū catlahuaꞌtit tū tzē nacātalīꞌaꞌksaꞌnān. Jā tū catlahuaꞌtit tū jā tze tū nacāmāxtumlīyān Dios.
\v 15 Cacaꞌtzītit huiꞌxinaꞌn Dios līlacatzucu cākaꞌlhīmāꞌlh āꞌmakapitzīn tī nataꞌaꞌkapūtaxtu. Ūꞌtzaꞌ jānaꞌj līmimpala Jesucristo. Chuntzaꞌ cātzoꞌknuniꞌn huiꞌxinaꞌn quintāꞌtincaꞌn Pablo tī pāxquīꞌyāuj. Xlaꞌ tzoꞌkli chuntzaꞌ chī Dios mālacpuhuanīlh.
\v 16 Pablo tzoꞌkli tzamāꞌ aꞌcxniꞌ cātzoꞌknuniꞌn huiꞌxinaꞌn. Nac āꞌmakapitzīn ixcarta aꞌnan jā jicslīhuaꞌ kexmatcan. Ē aꞌntzaꞌ jā jicslīhuaꞌ, makapitzīn chiꞌxcuhuīꞌn jā tzej tamāsuꞌyu. Xlacaꞌn ūꞌtunuꞌn tī jā tzej takexmata ē xtum xtum taꞌaꞌkaꞌīꞌ. Jā ixlīcānaꞌ chī xlacaꞌn tamāsuꞌyu ixtachihuīn Dios, ē jā xmān tū tzoꞌkli Pablo. Ūꞌtzaꞌ nacālīmakapātīnīn Dios.
\p
\v 17 Huiꞌxinaꞌn, tāꞌtimīn, caꞌtzīyāꞌtittzaꞌ chī taꞌaꞌkskāhuīꞌnincuꞌtun tzamāꞌ tī jā tzeya chiꞌxcuhuīꞌn. Jā cacātaꞌaꞌkskāhuīꞌn huiꞌxinaꞌn. Palh nacātaꞌaꞌkskāhuīꞌyān, chuntzaꞌ namakxtekāꞌtit naꞌaꞌkaꞌīꞌyāꞌtit.
\v 18 Chuhuaꞌj āꞌchulāꞌ catlahuaꞌtit tū līpāxuhua Dios. Āꞌchulāꞌ cascaꞌttit ixpālacata Makapūtaxtūnuꞌ tī quiMāpaꞌksīniꞌcaꞌn Jesucristo. Camākaꞌtlīꞌca chuhuaꞌj ē pōꞌktu quilhtamacuj. Amén.