\id 1JN
\h 1 Juan
\toc1 1 San Juan
\mt 1 San Juan
\c 1
\s Jesucristo quincāmaxquīꞌyān xasāstiꞌ quilatamatcaꞌn
\p
\v 1 Quit iccātzoꞌkniꞌmāꞌn huāꞌmāꞌ carta ixpālacata Jesucristo. Ūꞌtzaꞌ tī quincāmaxquīꞌyān xasāstiꞌ quilatamatcaꞌn. Xlaꞌ ixuīꞌlhtzaꞌ aꞌcxniꞌ jānaꞌj ixtzucu cāꞌquilhtamacuj. Quinaꞌn ickexmatnīꞌtauj tū ixuan xlaꞌ aꞌcxniꞌ ixlatlāꞌhuan nac cāꞌquilhtamacuj. Iclīlaktzīꞌnīꞌtauj quilakastapuncaꞌn. Iclaktzīꞌnīꞌtauj ē iclīxaꞌmanīꞌtauj quimacancaꞌn.
\v 2 Tī māstāꞌ quilatamatcaꞌn, xlaꞌ tasuꞌyulh huāꞌtzāꞌ nac cāꞌquilhtamacuj. Quinaꞌn iclaktzīꞌuj. Ē iclīchihuīnaꞌnāuj chī iclaktzīꞌnīꞌtauj. Iccālītāꞌchihuīnaꞌnān huiꞌxinaꞌn ixpālacata tī māstāꞌ quilatamatcaꞌn. Xlaꞌ pōꞌktu quilhtamacuj ixtāꞌhuīꞌlh Dios quinTātaꞌcaꞌn. Xlaꞌ natahuiꞌla pōꞌktu quilhtamacuj. Xlaꞌ milh ē nā quinaꞌn iclaktzīꞌuj.
\v 3 Iccāhuaniyān tū iclaktzīꞌnīꞌtauj ē tū ickexmatnīꞌtauj. Chuntzaꞌ huiꞌxinaꞌn tzē nacaꞌtzīyāꞌtit chu chāꞌtin nalītaxtuyāuj tū aꞌkaꞌīꞌyāuj. Nā tzē nacaꞌtzīyāꞌtit quinTātaꞌcaꞌn Dios ē Jesucristo īꞌSkaꞌtaꞌ quincātāꞌhuiꞌlan.
\v 4 Huāꞌmāꞌ iccātzoꞌknuniꞌyān huiꞌxinaꞌn ixpālacata chuntzaꞌ nakaꞌlhīyāuj tapāxuhuān.
\s Dios ūꞌtzaꞌ taxkaket
\p
\v 5 Tū quincāmāsuꞌyuniꞌn Jesucristo, ūꞌtzaꞌ tū iccāmāsuꞌyuniꞌyān huiꞌxinaꞌn. Ūꞌtzaꞌ huāꞌmāꞌ: Dios ūꞌtzaꞌ taxkaket. Jā cāꞌpucsuaꞌ aꞌntzaꞌ jā huīꞌlh xlaꞌ, ixpālacata xlaꞌ tze ē jā maktin tlahua tū jā tze.
\v 6 Palh huanāuj chu chāꞌtin quinaꞌn ē Dios, ē palh tlahuatlāꞌhuanāuj tū jā tze, chuntzaꞌ tasuꞌyu palh aꞌksaꞌnīniꞌnāuj. Tasuꞌyu palh jā tāꞌtlāꞌhuamāꞌnauj Dios.
\v 7 Palh tlahuayāuj tū tze, tlāꞌhuanāuj nac cāꞌtaxkaket, chuntzaꞌ chī Dios huīꞌlh nac cāꞌtaxkaket. Chuntzaꞌ ixlīcānaꞌ palh chu chāꞌtin quinaꞌn ē Dios. Ixkaꞌlhniꞌ Jesucristo, īꞌSkaꞌtaꞌ Dios, quincāxapaniꞌkōꞌyān ixlīpōꞌktu quincuentacaꞌn.
\p
\v 8 Palh huanāuj palh jā tlahuanīꞌtauj tū jā tze, chuntzaꞌ taꞌaꞌkskāhuīꞌyāuj quinaꞌcstucaꞌn. Jā ixlīcānaꞌ tū huanāuj.
\v 9 Palh huaniyāuj Dios palh tlahuanīꞌtauj tū jā tze, xlaꞌ naquincāmātzaꞌnkēnaꞌniꞌyān ē naquincāxapaniꞌkōꞌyān ixlīpōꞌktu quincuentacaꞌn. Huāꞌmāꞌ caꞌtzīyāuj ixpālacata Dios tze ē pōꞌktu quilhtamacuj mākentaxtū tū huan.
\v 10 Palh ixuáuj jā tū tlahuanīꞌtauj tū jā tze, chuntzaꞌ Dios aꞌksaꞌnīniꞌ līmāxtuyāuj. Chuntzaꞌ ixlītasuꞌyulh jā aꞌkaꞌīꞌyāuj ixlīcānaꞌ tū ixtachihuīn Dios.
\c 2
\s Cristo tāꞌchihuīnaꞌn Dios quimpālacatacaꞌn
\p
\v 1 Quit iccātzoꞌknuniꞌyān huiꞌxinaꞌn, quilacstīn. Iccāhuaniyān jā catlahuaꞌtit tū jā tze. Palh catīhuālh tlahua tū jā tze, kaꞌlhīyāuj tī tāꞌchihuīnaꞌn Dios quimpālacatacaꞌn. Xlaꞌ ūꞌtzaꞌ Jesucristo. Xlaꞌ jā tlahuanīꞌt tū jā tze.
\v 2 Jesucristo nīlh nac cruz. Chuntzaꞌ xlaꞌ līxokolh quincuentacaꞌn. Jā xmān quincuentacaꞌn. Xlaꞌ nīlh naxoko ixcuentacaꞌn ixlīpōꞌktucaꞌn xalanīꞌn nac cāꞌquilhtamacuj.
\p
\v 3 Palh mākentaxtūyāuj ixlīmāpaꞌksīn Dios, chuntzaꞌ caꞌtzīyāuj palh lakapasāuj Dios.
\v 4 Palh chāꞌtin nahuan xlaꞌ lakapasa Dios, ē palh xlaꞌ jā tlahua ixlīmāpaꞌksīn Dios, xlaꞌ aꞌksaꞌnīniꞌn ē jā aꞌkaꞌīꞌ ixtachihuīn Dios.
\v 5 Tī tamākentaxtū ixlīmāpaꞌksīn Dios, xlacaꞌn tzej tapāxquīꞌ Dios. Chuntzaꞌ tzē līcaꞌtzīyāuj palh quinaꞌn chu chāꞌtin chī Dios.
\v 6 Palh tī huan: “Quit ictāꞌlamāꞌlh Dios”, ixlacasquiꞌnca xlaꞌ nalatāꞌkchoko chuntzaꞌ chī Jesucristo ixlatlāꞌhuan.
\s Xasāstiꞌ līmāpaꞌksīn
\p
\v 7 Tāꞌtimīn, iccātzoꞌknuniꞌmāꞌn huiꞌxinaꞌn ixpālacata aꞌktin līmāpaꞌksīn tū jā xasāstiꞌ. Ūꞌtzaꞌ tū cātamāsuꞌyuniꞌnīꞌtaꞌn aꞌcxniꞌ chūꞌcus aꞌkaꞌīꞌtit huiꞌxinaꞌn.
\v 8 Chuhuaꞌj xasāstiꞌ līmāpaꞌksīn tū iccātzoꞌknuniꞌmāꞌn. Cristo mākentaxtūnīꞌttzaꞌ huāꞌmāꞌ līmāpaꞌksīn ē nā huiꞌxinaꞌn mākentaxtūpāꞌnaꞌntit. Chuntzaꞌ huaꞌchi laksputmāꞌlhtzaꞌ cāꞌpucsuaꞌ ē huaꞌchi māxkakēniꞌmāꞌlhtzaꞌ Cristo.
\p
\v 9 Tī tahuan tatlāꞌhuan nac taxkaket ē palh jā talaktzīꞌncuꞌtun ixtāꞌtincaꞌn, xlacaꞌn talatlāꞌhuancus jā cāꞌpucsuaꞌ.
\v 10 Tī tapāxquīꞌ ixtāꞌtincaꞌn, xlacaꞌn talatlāꞌhuan nac taxkaket. Chuntzaꞌ jā tamāmakahuasī āꞌchāꞌtin.
\v 11 Tī jā talaktzīꞌncuꞌtun ixtāꞌtincaꞌn, xlacaꞌn talatlāꞌhuan nac cāꞌpucsuaꞌ. Jā tacaꞌtzī jā talatlāꞌhuan, ixpālacata aꞌntzaꞌ jā cāꞌpucsuaꞌ jāla talacahuānaꞌn.
\p
\v 12 Quit iccātzoꞌknuniꞌyān huiꞌxinaꞌn, quilacstīn, ixpālacata Dios cāmātzaꞌnkēnaꞌniꞌnīꞌtaꞌn mincuentacaꞌn ixpālacata Jesucristo.
\v 13 Nā iccātzoꞌknuniꞌyān huiꞌxinaꞌn, xanatātanaꞌ, ixpālacata huiꞌxinaꞌn lakapasāꞌtittzaꞌ Dios. Xlaꞌ ixuīꞌlakelhtzaꞌ aꞌcxniꞌ tzuculh cāꞌquilhtamacuj. Nā iccātzoꞌknuniꞌyān huiꞌxinaꞌn, kaꞌhuaꞌchan, ixpālacata huiꞌxinaꞌn tlajaꞌnīꞌtaꞌntit skāhuīꞌniꞌ. Nā iccātzoꞌknuniꞌyān huiꞌxinaꞌn, lacstīn, ixpālacata lakapasāꞌtit Dios quinTātaꞌcaꞌn.
\v 14 Nā iccātzoꞌknuniꞌyān huiꞌxinaꞌn, xanatātanaꞌ, ixpālacata lakapasāꞌtittzaꞌ Dios. Xlaꞌ ixuīꞌlakelhtzaꞌ aꞌcxniꞌ tzuculh cāꞌquilhtamacuj. Nā iccātzoꞌknuniꞌyān huiꞌxinaꞌn, kaꞌhuaꞌchan, ixpālacata huiꞌxinaꞌn lactliꞌhuiꞌquin. Huiꞌxinaꞌn aꞌkaꞌīꞌnīꞌtaꞌntit ixtachihuīn Dios. Tlajaꞌnīꞌtaꞌntit skāhuīꞌniꞌ.
\p
\v 15 Jā calakatītit tū xalaꞌ nac cāꞌquilhtamacuj. Jā calakatītit tū jā xatze tū tatlahua tī xalanīꞌn nac cāꞌquilhtamacuj. Tī talakatī tū xalaꞌ nac cāꞌquilhtamacuj, xlacaꞌn jā tapāxquīꞌ Dios quinTātaꞌcaꞌn.
\v 16 Ixlīpōꞌktu tū xalaꞌ nac cāꞌquilhtamacuj, huāꞌmāꞌ jā ixlaꞌ Dios quinTātaꞌcaꞌn. Tī xalanīꞌn nac cāꞌquilhtamacuj tatlahua tū jā tze tū lacasquiꞌn ixmacniꞌcaꞌn. Talaktzīꞌncuꞌtun tū jā tze. Kaꞌtlaꞌ talīmakcaꞌtzī tū takaꞌlhī. Ixlīpōꞌktu tzamāꞌ pōꞌktu xalaꞌ nac cāꞌquilhtamacuj.
\v 17 Sputmāꞌlh cāꞌquilhtamacuj ē ixlīpōꞌktu xalaꞌ nac cāꞌquilhtamacuj tū talacasquiꞌn tachiꞌxcuhuīꞌt. Tī tatlahua ixtalacasquiꞌnīn Dios, xlacaꞌn natatahuiꞌla ixlīpōꞌktu quilhtamacuj.
\s Namin tī naꞌaꞌkskāhuīꞌnin
\p
\v 18 Quilacstīn, sputmāꞌlh tzamāꞌ quilhtamacuj. Huiꞌxinaꞌn cātahuaninīꞌtaꞌn namin ixtāꞌlāquiclhlaktziꞌ Cristo. Chuhuaꞌj tatasuꞌyunīꞌt lhūhuaꞌ ixtāꞌlāquiclhlaktziꞌ Cristo. Ūꞌtzaꞌ līcaꞌtzīyāuj ixlīsputniꞌtzaꞌ tzamāꞌ quilhtamacuj.
\v 19 Tī ixtāꞌlāquiclhlaktziꞌ Cristo, xlacaꞌn jā ixlīcānaꞌ taꞌaꞌkaꞌīꞌ chuntzaꞌ chī quinaꞌn. Ūꞌtzaꞌ quincātalītaxtumlīnīꞌtaꞌn quinaꞌn. Palh ixtaꞌaꞌkaꞌīꞌlh cahuālh chuntzaꞌ chī quinaꞌn, ixquincātatāꞌlatachokon quinaꞌn. Tataxtumlīlh. Chuntzaꞌ talītasuꞌyu xlacaꞌn jā taꞌaꞌkaꞌīꞌ chuntzaꞌ chī quinaꞌn.
\p
\v 20 Huiꞌxinaꞌn, Cristo cāmaxquīꞌnīꞌtaꞌn Espíritu Santo. Ūꞌtzaꞌ līcaꞌtzīyāꞌtit milīpōꞌktucaꞌn xatze tachihuīn tū ixlīcānaꞌ.
\v 21 Quit iccātzoꞌkniꞌmāꞌn huāꞌmāꞌ ixpālacata huiꞌxinaꞌn caꞌtzīyāꞌtit tū ixlīcānaꞌ. Jā iccāhuanimāꞌn huiꞌxinaꞌn jā caꞌtzīyāꞌtit tū ixlīcānaꞌ. Caꞌtzīyāuj xtum tū ixlīcānaꞌ ē nā xtum tū jā ixlīcānaꞌ.
\p
\v 22 Tī taꞌaꞌkskāhuīꞌnin, xlacaꞌn tahuan Jesús jā ūꞌtzaꞌ Cristo tī Dios līhuiꞌlīlh ixlīmāpaꞌksīniꞌ. Tī tahuan chuntzaꞌ, xlacaꞌn ixtāꞌlāquiclhlaktziꞌ Cristo. Xlacaꞌn talakmakaꞌn Dios quinTātaꞌcaꞌn ē nā īꞌSkaꞌtaꞌ talakmakaꞌn.
\v 23 Tī talakmakaꞌn īꞌSkaꞌtaꞌ Dios, quinTātaꞌcaꞌn Dios jā cātāꞌlahuīꞌlh. Tī tahuan Jesús ūꞌtzaꞌ Cristo, īꞌSkaꞌtaꞌ Dios, Dios cātāꞌlahuīꞌlh xlacaꞌn.
\p
\v 24 Huiꞌxinaꞌn jā capātzaꞌnkātit tū cātamāsuꞌyuniꞌnīꞌtaꞌn xapūla ixpālacata ixtachihuīn Dios. Palh jā napātzaꞌnkāyāꞌtit tū cātamāsuꞌyuniꞌnīꞌtaꞌn xapūla, chuntzaꞌ nacātāꞌtahuiꞌlayān īꞌSkaꞌtaꞌ Dios ē Dios quinTātaꞌcaꞌn.
\v 25 Cristo huanīꞌt xlaꞌ naquincāmaxquīꞌyān xasāstiꞌ quilatamatcaꞌn tū jā catilaksputli.
\p
\v 26 Quit iccātzoꞌknuniꞌyān huāꞌmāꞌ ixpālacata taꞌaꞌnan āꞌmakapitzīn tī cāꞌaꞌkskāhuīꞌcuꞌtunān huiꞌxinaꞌn.
\v 27 Cristo cāmaxquīꞌnīꞌtaꞌn Espíritu Santo. Espíritu Santo cātāꞌhuiꞌlan huiꞌxinaꞌn. Chuntzaꞌ jā maclacasquiꞌnāꞌtit huiꞌxinaꞌn āꞌchulāꞌ nacātamāsuꞌyuniꞌyān tū iccāhuanimāꞌn. Espíritu Santo cāmāsuꞌyuniꞌyān ixlīpōꞌktu. Tū xlaꞌ māsuꞌyu, ūꞌtzaꞌ ixlīcānaꞌ. Xlaꞌ jā māsuꞌyu catūhuālh tū jā ixlīcānaꞌ. Jā catalakaspiꞌtniꞌtit Cristo. Ūꞌtzaꞌ Espíritu Santo cāmāsuꞌyuniꞌyān huiꞌxinaꞌn.
\p
\v 28 Chuhuaꞌj quilacstīn, jā catalakaspiꞌtniꞌtit Cristo. Chuntzaꞌ jā catijicuaꞌnui aꞌcxniꞌ xlaꞌ namimpala. Jā catimāxanaꞌnui na ixlacatīn.
\v 29 Huiꞌxinaꞌn caꞌtzīyāꞌtit Jesucristo xmān tlahua tū tze. Nā chuntzaꞌ nacaꞌtzīyāꞌtit tī tatlahua tū tze, ixlīpōꞌktucaꞌn xlacaꞌn ixlacstīn Dios.
\c 3
\s Quinaꞌn ixlacstīn Dios
\p
\v 1 Cacaꞌtzītit chī Dios quincāpāxquīꞌyān ixpālacata huanli quinaꞌn ixlacstīn Dios. Ixlīcānaꞌ quinaꞌn ixlacstīn Dios. Tī xalanīꞌn nac cāꞌquilhtamacuj, xlacaꞌn jā ixlacstīn Dios ē jā talakapasa Dios quinTātaꞌcaꞌn. Ūꞌtzaꞌ xlacaꞌn jā talīkexmata palh quinaꞌn ixlacstīn Dios.
\v 2 Tāꞌtimīn, chuhuaꞌj quinaꞌn ixlacstīn Dios. Jānaꞌj caꞌtzīcan chī nalītaxtuyāuj. Tū caꞌtzīyāuj, ūꞌtzaꞌ huāꞌmāꞌ: Aꞌcxniꞌ Cristo natasuꞌyu, quinaꞌn nalītaxtuyāuj chī xlaꞌ, ē nalaktzīꞌnāuj Cristo chī xlaꞌ.
\v 3 Tī takaꞌlhīmāꞌnalh natalaktzīꞌn Cristo, ixlīpōꞌktucaꞌn xlacaꞌn natamāpānū tū jā tze. Natatlahua tū tze chī Cristo.
\p
\v 4 Ixlīpōꞌktucaꞌn tī tatlahua tū jā tze, xlacaꞌn jā takexmatniꞌ ixlīmāpaꞌksīn Dios. Palh chāꞌtin jā kexmatniꞌ Dios, ūꞌtzaꞌ huāꞌmāꞌ tū jā līmacuan.
\v 5 Huiꞌxinaꞌn caꞌtzīyāꞌtit Cristo milh nac cāꞌquilhtamacuj naxapa quincuentacaꞌn. Xlaꞌ jā tlahuanīꞌt nūn aꞌktin tū jā tze.
\v 6 Ixlīpōꞌktucaꞌn tī cātāꞌlahuīꞌlh Cristo, xlacaꞌn jā tatlahuatāꞌkchoko tū jā tze. Ixlīpōꞌktucaꞌn tī tatlahuatāꞌkchoko tū jā tze, xlacaꞌn jā talaktzīꞌnīꞌt Cristo ē jā talakapasnīꞌt.
\v 7 Quilacstīn, jā catamakxtektit nacātaꞌaꞌkskāhuīꞌyān āꞌmakapitzīn tī cātahuaniyān tzē natlahuaꞌyāꞌtit tū jā tze. Tī tatlahuatāꞌkchoko tū tze, xlacaꞌn tze chuntzaꞌ chī Cristo.
\v 8 Tī tatlahuatāꞌkchoko tū jā tze, xlacaꞌn tatapaꞌksīniꞌ skāhuīꞌniꞌ, ixpālacata skāhuīꞌniꞌ pōꞌktu quilhtamacuj tlahuanīꞌt tū jā tze aꞌcxniꞌ mālacatzuculh tū jā tze. ĪꞌSkaꞌtaꞌ Dios milh nac cāꞌquilhtamacuj namālaksputū tū tlahua skāhuīꞌniꞌ.
\p
\v 9 Tī ixlacstīn Dios, xlacaꞌn jātzaꞌ tatlahuatāꞌkchoko tū jā tze, ixpālacata Dios cāmaxquīꞌnīꞌt xasāstiꞌ ixlatamatcaꞌn. Jātzaꞌ la tatlahuatāꞌkchoko tū jā tze, ixpālacata ixlacstīntzaꞌ Dios.
\v 10 Chuntzaꞌ tasuꞌyu tī ixlacstīn Dios ē tī ixlacstīn skāhuīꞌniꞌ. Tī jā tatlahuacuꞌtun tū tze ē jā tapāxquīꞌ ixtāꞌtimīncaꞌn, xlacaꞌn jā ixlacstīn Dios.
\s Ixlacasquiꞌnca nalāpāxquīꞌyāuj
\p
\v 11 Huāꞌmāꞌ līmāpaꞌksīn tū cātamāsuꞌyuniꞌn xapūla ūꞌtzaꞌ huāꞌmāꞌ: nalāpāxquīꞌyāuj.
\v 12 Jā calauj chī Caín tī tapaꞌksīniꞌlh skāhuīꞌniꞌ. Xlaꞌ maknīlh ixtāꞌtin. ¿Chī līmaknīlh? Maknīlh ixpālacata Caín tlahualh tū jā tze ē quiclhlaktzīꞌlh ixtāꞌtin ixpālacata xlaꞌ ixtlahua tū tze.
\p
\v 13 Tāꞌtimīn, palh xalanīꞌn nac cāꞌquilhtamacuj jā cātalaktzīꞌncuꞌtunān, jā capuhuaꞌntit palh jā maktin catiꞌaꞌkspulalh huāꞌmāꞌ.
\v 14 Quinaꞌn caꞌtzīyāuj masqui huaꞌchi xanīn ixuanīꞌtauj, chuhuaꞌj kaꞌlhīyāuj xasāstiꞌ quilatamatcaꞌn. Huāꞌmāꞌ caꞌtzīyāuj ixpālacata cāpāxquīꞌyāuj quintāꞌtimīncaꞌn. Tī jā tapāxquīꞌ āꞌmakapitzīn, xlacaꞌn huaꞌchi xanīnīꞌncus ē jā takaꞌlhī xasāstiꞌ ixlatamatcaꞌn.
\v 15 Tī taquiclhlaktzīꞌn ixtāꞌtincaꞌn xlacaꞌn huaꞌchi maknīniꞌnīꞌn na ixlacatīn Dios. Huiꞌxinaꞌn caꞌtzīyāꞌtit maknīniꞌnīꞌn jā takaꞌlhī xasāstiꞌ ixlatamatcaꞌn tū jā catilaksputli.
\v 16 Cristo quincāpāxquīꞌyān ē māstāꞌlh ixlatamat quimpālacatacaꞌn. Chuntzaꞌ quincāmāsuꞌyuniꞌn chī nalīpāxquīꞌnināuj. Chuntzaꞌ quinaꞌn tzē natamacamāstāꞌyāuj ē nalīnīyāuj ixpālacatacaꞌn quintāꞌtimīncaꞌn palh ixlacasquiꞌnca.
\v 17 Palh chāꞌtin kaꞌlhī tū maclacasquiꞌn ē palh laktzīꞌn ixtāꞌtin jā tū kaꞌlhī, ē palh xlaꞌ jā lakalhuꞌman, chuntzaꞌ tasuꞌyu jā pāxquīꞌ Dios.
\v 18 Quilacstīn, jā xmān nahuanāuj cāpāxquīꞌyāuj āꞌmakapitzīn. Nacāmaktāyayāuj āꞌmakapitzīn. Chuntzaꞌ natasuꞌyu palh ixlīcānaꞌ cāpāxquīꞌyāuj, ē jā xmān huanāuj.
\s Jā catimāxanaꞌnui na ixlacatīn Dios
\p
\v 19 Palh cāpāxquīꞌyāuj āꞌmakapitzīn, chuntzaꞌ caꞌtzīyāuj ixlīcānaꞌ tapaꞌksīniꞌyāuj Dios. Chuntzaꞌ jā tamakchuyīyāuj na ixlacatīn Dios.
\v 20 Aꞌcxniꞌ makcaꞌtzīyāuj na quilīstacnaꞌcaꞌn tlahuanīꞌtauj tū jā tze, lacapāstacāuj chī Dios āꞌchulāꞌ xakaꞌtlaꞌ ē jā quilīstacnaꞌcaꞌn. Xlaꞌ caꞌtzīkōꞌ ixlīpōꞌktu tū tlahuanīꞌtauj.
\v 21 Tāꞌtimīn, palh jā makcaꞌtzīyāuj na quilīstacnaꞌcaꞌn tlahuanīꞌtauj tū jā tze, chuntzaꞌ jā tū catimāxanaꞌnui na ixlacatīn Dios.
\v 22 Dios naquincāmaxquīꞌyān tū nasquiꞌnāuj ixpālacata kexmatniꞌyāuj ixlīmāpaꞌksīn ē tlahuayāuj tū Dios lacasquiꞌn.
\v 23 Ixlīmāpaꞌksīn ūꞌtzaꞌ huāꞌmāꞌ: Nalīpāhuanāuj Jesucristo īꞌSkaꞌtaꞌ ē nalāpāxquīꞌyāuj chuntzaꞌ chī xlaꞌ quincāmāpaꞌksīyān.
\v 24 Tī tamākentaxtū ixlīmāpaꞌksīn Dios, cātāꞌlahuīꞌlh Dios. Xlaꞌ quincāmaxquīꞌnīꞌtaꞌn Espíritu Santo ē ūꞌtzaꞌ līcaꞌtzīyāuj Dios quincātāꞌhuiꞌlan.
\c 4
\s Āꞌmakapitzīn jā talīmāsuꞌyu ixlīmāpaꞌksīn Espíritu Santo
\p
\v 1 Tāꞌtimīn, jā cacāꞌaꞌkaꞌīꞌtit ixlīpōꞌktucaꞌn tī tahuan talīmāsuꞌyu ixlīmāpaꞌksīn Espíritu Santo. Skalalh catahuiꞌlaꞌtit ē calacapāstactit palh lacxtim tū aꞌkaꞌīꞌnīꞌtaꞌntittzaꞌ. Chuntzaꞌ nacaꞌtzīyāꞌtit palh tamāsuꞌyumāꞌnalh ixtachihuīn Dios. Lhūhuaꞌ aꞌnan aꞌkskāhuīꞌniꞌnīꞌn tī tahuan talīchihuīnaꞌn ixtachihuīn Dios.
\v 2 Naꞌiccāhuaniyān huiꞌxinaꞌn chī nalīcaꞌtzīyāꞌtit palh ixlīcānaꞌ Espíritu Santo cāmāchihuīnī. Takaꞌlhī Espíritu Santo tī tahuan palh Jesús ūꞌtzaꞌ Cristo tī Dios līhuiꞌlīlh ixlīmāpaꞌksīniꞌ ē nā quīlacatuncuhuīꞌchi ē chuntzaꞌ lītachiꞌxcuhuīꞌlīlh. Ixlīpōꞌktucaꞌn tī chuntzaꞌ tahuan, xlacaꞌn takaꞌlhī Espíritu Santo tī Dios macamilh.
\v 3 Tī tahuan jā ixlīcānaꞌ palh Jesús ūꞌtzaꞌ Cristo tī Dios līhuiꞌlīlh ixlīmāpaꞌksīniꞌ ē nā tahuan jā quīlacatuncuhuīꞌchi ē jā tachiꞌxcuhuīꞌlīlh, xlacaꞌn jā takaꞌlhī Espíritu Santo. Xlacaꞌn xmān cātahuaniyān ixtachihuīn ixtāꞌlāquiclhlaktziꞌ Cristo. Huiꞌxinaꞌn kexpaꞌtnīꞌtaꞌntit namin ixtāꞌlāquiclhlaktziꞌ Cristo. Chuhuaꞌj huīꞌlh nac cāꞌquilhtamacuj.
\p
\v 4 Quilacstīn, huiꞌxinaꞌn tapaꞌksīniꞌyāꞌtit Dios. Huiꞌxinaꞌn cālītlajaꞌnīꞌtaꞌntit ixlīmāpaꞌksīn Espíritu Santo tzamāꞌ aꞌkskāhuīꞌniꞌnīꞌn. Espíritu Santo cātāꞌhuiꞌlan huiꞌxinaꞌn. Xlaꞌ āꞌchulāꞌ kaꞌlhī lītliꞌhuiꞌqui ē jā skāhuīꞌniꞌ tī cāmāpaꞌksī xalanīꞌn nac cāꞌquilhtamacuj.
\v 5 Tzamāꞌ aꞌkskāhuīꞌniꞌnīꞌn xlacaꞌn xalanīꞌn nac quilhtamacuj. Tū tamāsuꞌyu nā xalaꞌ nac cāꞌquilhtamacuj. Ūꞌtzaꞌ talīkexmatniꞌ tachiꞌxcuhuīꞌt xalanīꞌn nac cāꞌquilhtamacuj.
\v 6 Quinaꞌn tapaꞌksīniꞌyāuj Dios. Tī talakapasa Dios, xlacaꞌn takexmata tū cāmāsuꞌyuniꞌyāuj. Tī jā talakapasa Dios, xlacaꞌn jā takexmatcuꞌtun tū māsuꞌyuyāuj. Chuntzaꞌ tzē nalīcaꞌtzīyāuj tī tamāsuꞌyu tū ixlīcānaꞌ ē nā tī tamāsuꞌyu tū jā ixlīcānaꞌ.
\s Dios cāpāxquīꞌ ixlīpōꞌktucaꞌn tachiꞌxcuhuīꞌt
\p
\v 7 Tāꞌtimīn, ixlacasquiꞌnca nalāpāxquīꞌyāuj. Dios quincāmaktāyayān nalāpāxquīꞌyāuj. Tī tapāxquīꞌnin, xlacaꞌn ixlacstīn Dios ē talakapasa Dios.
\v 8 Tī jā tapāxquīꞌnin xlacaꞌn jā talakapasa Dios. Ūꞌtzaꞌ caꞌtzīyāuj ixpālacata Dios cāpāxquīꞌkōꞌ ixlīpōꞌktucaꞌn tachiꞌxcuhuīꞌt.
\v 9 Dios quincāpāxquīꞌyān. Huāꞌmāꞌ līmāsuꞌyulh aꞌcxniꞌ macamilh nac cāꞌquilhtamacuj īꞌSkaꞌtaꞌ tī xmān chāꞌtin ixuanīꞌt. Macamilh ixpālacata nalīkaꞌlhīyāuj xasāstiꞌ quilatamatcaꞌn.
\v 10 Chī quinaꞌn pāxquīꞌyāuj Dios jā chī Dios quincāpāxquīꞌyān. Xlaꞌ māsuꞌyulh chī quincāpāxquīꞌyān aꞌcxniꞌ macamilh īꞌSkaꞌtaꞌ ē ūꞌtzaꞌ tī xokolh quincuentacaꞌn.
\p
\v 11 Tāꞌtimīn, Dios lhūhuaꞌ quincāpāxquīꞌyān. Ūꞌtzaꞌ ixlīlacasquiꞌnca quinaꞌn nalāpāxquīꞌyāuj.
\v 12 Dios jā tī chāꞌtin laktzīꞌnīꞌt. Palh lāpāxquīꞌyāuj, chuntzaꞌ Dios quincātāꞌhuiꞌlan. Dios quincāmaktāyayān nalāpāxquīꞌyāuj.
\v 13 Quinaꞌn caꞌtzīyāuj Dios quincātāꞌhuiꞌlan. Huāꞌmāꞌ caꞌtzīyāuj ixpālacata quincāmaxquīꞌnīꞌtaꞌn Espíritu Santo.
\v 14 Quinaꞌn iclaktzīꞌnīꞌtauj īꞌSkaꞌtaꞌ Dios. Iclīchihuīnaꞌnāuj Dios quinTātaꞌcaꞌn macamilh īꞌSkaꞌtaꞌ nacāmakapūtaxtū ixlīpōꞌktucaꞌn tachiꞌxcuhuīꞌt.
\v 15 Tī taꞌaꞌkaꞌīꞌ ē tahuan Jesús ūꞌtzaꞌ īꞌSkaꞌtaꞌ Dios, cātāꞌhuīꞌlh Dios.
\p
\v 16 Quinaꞌn caꞌtzīyāuj ē aꞌkaꞌīꞌyāuj Dios quincāpāxquīꞌyān. Dios cāpāxquīꞌ ixlīpōꞌktu tachiꞌxcuhuīꞌt. Dios cātāꞌhuīꞌlh tī tapāxquīꞌ āꞌmakapitzīn.
\v 17 Ixlacasquiꞌnca nalīpāxquīꞌyāuj Dios ixlīpōꞌktu quilīstacnaꞌcaꞌn. Chuntzaꞌ, huāꞌtzāꞌ nac cāꞌquilhtamacuj, quinaꞌn napāxquīꞌnināuj chuntzaꞌ chī Cristo pāxquīꞌnin. Chuntzaꞌ jā catijicuaꞌnui tzamāꞌ quilhtamacuj aꞌcxniꞌ Dios nacāputzānaꞌniꞌ tachiꞌxcuhuīꞌt.
\v 18 Tī tapāxquīꞌ Dios, xlacaꞌn jā tajicuaꞌniꞌ Dios palh nacāmakapātīnīn. Palh chāꞌtin pāxquīꞌnin, xlaꞌ jātzaꞌ kaꞌlhī tajicuāt. Tī tajicuaꞌn Dios nacāmakapātīnīn, xlacaꞌn jānaꞌj tzej tapāxquīꞌ Dios.
\p
\v 19 Quinaꞌn pāxquīꞌyāuj Dios ixpālacata xlaꞌ xapūla quincāpāxquīꞌn.
\v 20 Palh chāꞌtin huan: “Quit icpāxquīꞌ Dios”, ē palh jā laktzīꞌncuꞌtun ixtāꞌtin, xlaꞌ jā ixlīcānaꞌ tū huan. Palh xlaꞌ jā pāxquīꞌ ixtāꞌtin tī laktzīꞌn, xlaꞌ jāla pāxquīꞌ Dios, ixpālacata jāla laktzīꞌn Dios.
\v 21 Tzamāꞌ līmāpaꞌksīn tū Dios quincāmaxquīꞌn, ūꞌtzaꞌ huāꞌmāꞌ: Tī tapāxquīꞌ Dios nā natapāxquīꞌ ixtāꞌtimīncaꞌn.
\c 5
\s Namāpānūyāuj tū jā tze
\p
\v 1 Tī taꞌaꞌkaꞌīꞌ Jesús ūꞌtzaꞌ Cristo tī Dios līhuiꞌlīlh ixlīmāpaꞌksīniꞌ, xlacaꞌn ixlacstīn Dios. Tī tapāxquīꞌ Dios quinTātaꞌcaꞌn, xlacaꞌn nā tapāxquīꞌ ixlacstīn Dios.
\v 2 Chuntzaꞌ palh pāxquīꞌyāuj Dios ē palh kexmatniꞌyāuj tū quincālīmāpaꞌksīyān, nā nacāpāxquīꞌyāuj nā ixlacstīn Dios.
\v 3 Palh pāxquīꞌyāuj Dios, natlahuayāuj ixlīmāpaꞌksīn. Jā jicslīhuaꞌ namākentaxtūyāuj ixlīmāpaꞌksīn.
\v 4 Ixlīpōꞌktucaꞌn ixlacstīn Dios tamāpānū tū jā tze tū tlahuacan nac cāꞌquilhtamacuj. Quinaꞌn tzē namāpānūyāuj tū jā tze, ixpālacata līpāhuanāuj Dios.
\v 5 Tī taꞌaꞌkaꞌīꞌ palh Jesús ūꞌtzaꞌ īꞌSkaꞌtaꞌ Dios, xmān xlacaꞌn tzē natamāpānū tū jā tze tū tlahuacan nac cāꞌquilhtamacuj.
\s Jesucristo ūꞌtzaꞌ īꞌSkaꞌtaꞌ Dios
\p
\v 6 Caꞌtzīyāuj Jesucristo ixlīcānaꞌ īꞌSkaꞌtaꞌ Dios. Chuntzaꞌ huanli Dios aꞌcxniꞌ aꞌkpaxli Jesús. Nā aꞌcxniꞌ Jesús nīlh, nā Dios māsuꞌyulh xlaꞌ īꞌSkaꞌtaꞌ ixuanīꞌt. Cristo tī Dios līhuiꞌlīlh ixlīmāpaꞌksīniꞌ, xlaꞌ ūꞌtzaꞌ Jesús tī aꞌkpaxli ē nā nīlh nac cruz. Nā Espíritu Santo māsuꞌyu Jesús ūꞌtzaꞌ īꞌSkaꞌtaꞌ Dios. Espíritu Santo māsuꞌyu xmān tū ixlīcānaꞌ.
\v 7 Aꞌnan kelhatuꞌtun nac aꞌkapūn tī tahuan Jesucristo ūꞌtzaꞌ īꞌSkaꞌtaꞌ Dios. Kelhatuꞌtun xlacaꞌn: Dios quinTātaꞌcaꞌn ē Espíritu Santo ē nā ūꞌtzaꞌ tī huanican Tachihuīn. Chu chāꞌtin talītaxtu.
\v 8 Nac cāꞌquilhtamacuj aꞌnan kelhatuꞌtun tī tamāsuꞌyu Jesucristo ūꞌtzaꞌ īꞌSkaꞌtaꞌ Dios. Espíritu Santo chuntzaꞌ quincāmāsuꞌyuniꞌyān. Nā Dios chuntzaꞌ māsuꞌyulh aꞌcxniꞌ Jesús aꞌkpaxli ē aꞌcxniꞌ nīlh.
\v 9 Quinaꞌn aꞌkaꞌīꞌyāuj tū tahuan tachiꞌxcuhuīꞌt. Āꞌchulāꞌ naꞌaꞌkaꞌīꞌyāuj tū huan Dios. Dios līchihuīnaꞌn Jesús ūꞌtzaꞌ īꞌSkaꞌtaꞌ.
\v 10 Tī talīpāhuan īꞌSkaꞌtaꞌ Dios, xlacaꞌn tamakcaꞌtzī na ixlīstacnaꞌcaꞌn ixlīcānaꞌ tū taꞌaꞌkaꞌīꞌ. Makapitzīn jā taꞌaꞌkaꞌīꞌ chī Dios huanli Jesús ūꞌtzaꞌ īꞌSkaꞌtaꞌ. Chuntzaꞌ xlacaꞌn ixtalīmāxtulh Dios aꞌksaꞌnīniꞌ ixpālacata jā taꞌaꞌkaꞌīꞌnīꞌt tū Dios huanli ixpālacata īꞌSkaꞌtaꞌ.
\v 11 Caꞌtzīcan ixlīcānaꞌ tū Dios huan, ixpālacata quincāmaxquīꞌyān xasāstiꞌ quilatamatcaꞌn tū jā catisputli, palh līpāhuanāuj īꞌSkaꞌtaꞌ.
\v 12 Tī talīpāhuan īꞌSkaꞌtaꞌ Dios, xlacaꞌn takaꞌlhī xasāstiꞌ ixlatamatcaꞌn. Tī jā talīpāhuan īꞌSkaꞌtaꞌ Dios, xlacaꞌn jā takaꞌlhī xasāstiꞌ ixlatamatcaꞌn.
\s Māstāꞌca talacapāstacniꞌ
\p
\v 13 Quit iccātzoꞌkniꞌmāꞌn huāꞌmāꞌ ixpālacata huiꞌxinaꞌn, tī līpāhuaꞌmpāꞌnaꞌntit īꞌSkaꞌtaꞌ Dios, nacaꞌtzīyāꞌtit palh kaꞌlhīꞌyāꞌtit xasāstiꞌ milatamatcaꞌn tū jā catisputli.
\p
\v 14 Caꞌtzīyāuj Dios quincākexmatān aꞌcxniꞌ orarlīyāuj, palh squiꞌniꞌyāuj chuntzaꞌ chī ixtalacasquiꞌnīn Dios.
\v 15 Palh caꞌtzīyāuj xlaꞌ quincākexmatān, chuntzaꞌ caꞌtzīyāuj xlaꞌ naquincāmaxquīꞌyān tū squiꞌniꞌyāuj.
\p
\v 16 Palh chāꞌtin laktzīꞌn āꞌchāꞌtin tī tlahuamāꞌlh aꞌktin tū jā tze ē huāꞌmāꞌ tū tzē namāsputūnuꞌniꞌcan, chuntzaꞌ nalīꞌorarlī āꞌchāꞌtin ē xlaꞌ nakaꞌlhī xasāstiꞌ ixlatamat. Palh huāꞌmāꞌ tū jā tze jāla māsputūnuꞌniꞌcan, chuntzaꞌ jā iccāhuanimāꞌn nalīꞌorarlīꞌyāꞌtit tī chuntzaꞌ tlahua.
\v 17 Ixlīpōꞌktu tū jā tze talanān māstāꞌ līnīn. Pero huīꞌlh talanān tū jā maktin lēꞌnīniꞌn nac cāꞌlīnīn.
\p
\v 18 Caꞌtzīyāuj tī ixlacstīn Dios, xlacaꞌn jā tatlahuatāꞌkchoko tū jā tze. Xlacaꞌn cāmaktakaꞌlha īꞌSkaꞌtaꞌ Dios, ē chuntzaꞌ skāhuīꞌniꞌ jāla tū cātlahuaniꞌ.
\p
\v 19 Quinaꞌn caꞌtzīyāuj tapaꞌksīniꞌyāuj Dios. Caꞌtzīyāuj tī xalanīꞌn nac cāꞌquilhtamacuj, xlacaꞌn cāmāpaꞌksī skāhuīꞌniꞌ.
\p
\v 20 Caꞌtzīyāuj īꞌSkaꞌtaꞌ Dios minīꞌt. Quincāmaxquīꞌnīꞌtaꞌn chī nalīlakapasāuj tī ixlīcānaꞌ Dios. Chuhuaꞌj quincātāꞌlahuiꞌlan Jesucristo tī īꞌSkaꞌtaꞌ Dios. Xlaꞌ ixlīcānaꞌ Dios ē quincāmaxquīꞌyān xasāstiꞌ quilatamatcaꞌn tū jā maktin catisputli.
\v 21 Quilacstīn, jā calīpāhuantit tū xalaꞌ nac cāꞌquilhtamacuj. Xmān Dios nalīpāhuaꞌnāꞌtit. Amén.