\id 2JN
\h 2 Juan
\toc1 2 San Juan
\mt 2 San Juan
\c 1
\s Tapāxquīꞌn ē tū ixlīcānaꞌ
\p
\v 1 Quit Juan, xakōluꞌtzaꞌ, ictzoꞌkniꞌmāꞌn huāꞌmāꞌ carta. Ictzoꞌknuniꞌyān huiꞌx, tāꞌtin xapuscāt tī Dios lacsacnīꞌtaꞌn, ē nā mincamanaꞌ. Quit iccāpāxquīꞌyān huiꞌxinaꞌn. Jā xmān quit. Nā cāpāxquīꞌyān huiꞌxinaꞌn ixlīpōꞌktucaꞌn tī talakapasa tū ixlīcānaꞌ.
\v 2 Lāpāxquīꞌyāuj ixpālacata quilīpōꞌktucaꞌn aꞌkaꞌīꞌyāuj tū ixlīcānaꞌ, tū jā maktin catilaksputli.
\v 3 Caquincāsicuaꞌlanātlahuan Dios quinTātaꞌcaꞌn ē Jesucristo īꞌSkaꞌtaꞌ Dios ē caquincātalakalhuꞌman ē caquincāmakapāxuīn. Chuntzaꞌ quinaꞌn tzej naꞌaꞌkaꞌīꞌyāuj tū ixlīcānaꞌ tachihuīn, ē nalāpāxquīꞌyāuj.
\p
\v 4 Iclīpāxualh aꞌcxniꞌ iccaꞌtzīlh makapitzīn mincamanaꞌ takexmatmāꞌnaꞌlh tū ixlīcānaꞌ, chuntzaꞌ chī quincāmāpaꞌksīn Dios quinTātaꞌcaꞌn.
\v 5 Chuhuaꞌj tāꞌtin, icuaniyān nalāpāxquīꞌyāuj quilīpōꞌktucaꞌn quinaꞌn. Huāꞌmāꞌ jā xasāstiꞌ līmāpaꞌksīn. Ūꞌtzaꞌ tū quincātamāsuꞌyuniꞌnīꞌtaꞌn aꞌcxniꞌ ixlītzucuniꞌ aꞌkaꞌīꞌuj.
\v 6 Palh pāxquīꞌyāuj Dios, natlahuayāuj tū Dios quincālīmāpaꞌksīyān. Xlaꞌ māpaꞌksīniꞌlh nacāpāxquīꞌyāuj āꞌmakapitzīn. Ūꞌtzaꞌ huāꞌmāꞌ cātahuaninīꞌtaꞌn aꞌcxniꞌ ixlītzucuniꞌ aꞌkaꞌīꞌtit.
\s Makapitzīn ixtaꞌaꞌkskāhuīꞌnin
\p
\v 7 Chuhuaꞌj lhūhuaꞌ aꞌkskāhuīꞌniꞌnīꞌn talatlāꞌhuan nac cāꞌquilhtamacuj. Xlacaꞌn tahuan jā ixlīcānaꞌ palh lacatuncuhuīꞌlh nac cāꞌquilhtamacuj Jesucristo tī Dios macamaxquīꞌlh ixlīmāpaꞌksīniꞌ. Tī tahuan huāꞌmāꞌ, xlacaꞌn aꞌkskāhuīꞌniꞌnīꞌn ē ixtāꞌlāquiclhlaktziꞌ Cristo.
\v 8 Cuenta catlaꞌhuaꞌtit jā nalaksputa tū līscujpāꞌnaꞌntit. Cuenta catlaꞌhuaꞌtit namaktīniꞌnāꞌtit ixlīpōꞌktu tū Dios nacāmaxquīꞌyān chī mintatlajcaꞌn.
\p
\v 9 Tū taꞌaꞌkaꞌīꞌ āꞌmakapitzīn jā xmān tū Cristo māsuꞌyulh. Nā xlacaꞌn tamāsuꞌyucuꞌtun āꞌaꞌktin tamāsuꞌyun. Xlacaꞌn jā ixlīcānaꞌ tatāꞌlatlāꞌhuan Dios. Tī taꞌaꞌkaꞌīꞌ xmān tū Cristo māsuꞌyulh, ixlīcānaꞌ xlacaꞌn tatāꞌlatlāꞌhuan Dios quinTātaꞌcaꞌn ē īꞌSkaꞌtaꞌ Dios.
\v 10 Palh cālakminān huiꞌxinaꞌn āꞌmakapitzīn tī tamāsuꞌyu tū jā māsuꞌyulh Cristo, jā cacāmānūꞌtit na minchiccaꞌn. Jā cacāhuaniꞌtit: “Dios cacālēꞌnchaꞌn.”
\v 11 Palh huiꞌxinaꞌn nacāhuaniꞌyāꞌtit: “Dios cacālēꞌnchaꞌn”, chuntzaꞌ cātāꞌtlahuapāꞌnaꞌntit tū jā tze.
\s Macāꞌnca saludos
\p
\v 12 Lhūhuaꞌcus tū iccāhuanicuꞌtunān. Jā ictzoꞌkcuꞌtun aꞌktin nac carta. Iccālakaꞌncuꞌtunān huiꞌxinaꞌn ē iccātāꞌchihuīnaꞌncuꞌtunān cāꞌlacan. Chuntzaꞌ nalīpāxuayāuj.
\p
\v 13 Tamacāꞌniꞌyān saludos ixlacstīn mintāꞌtin xapuscāt tī Dios lacsacnīꞌt.