\id 3JN
\h 3 Juan
\toc1 3 San Juan
\mt 3 San Juan
\c 1
\s Tzej līchihuīnaꞌnca Gayo
\p
\v 1 Quit Juan, xakōluꞌtzaꞌ, ictzoꞌkmāꞌlh huāꞌmāꞌ carta. Ictzoꞌknuniꞌyān huiꞌx, Gayo. Icpāxquīꞌyān huiꞌx.
\p
\v 2 Tāꞌtin, quit iccaꞌtzī tzej latlāꞌhuaꞌnaꞌ na ixtej Dios. Icsquiꞌniꞌ Dios tzej caquītaxtuniꞌn ixlīpōꞌktu ē jā cataꞌjatatlaꞌ.
\v 3 Āꞌmakapitzīn tāꞌtimīn taminīꞌt. Quintahuaninīꞌt huiꞌx latlāꞌhuaꞌnaꞌ chuntzaꞌ chī ixlīcānaꞌ na ixlacatīn Dios. Huāꞌmāꞌ iclīpāxuhualh.
\v 4 Pōꞌktu quilhtamacuj icpāxuhua aꞌcxniꞌ quihuanican quincamanaꞌ talatlāꞌhuan chuntzaꞌ chī ixlīcānaꞌ na ixtej Dios.
\p
\v 5 Tāꞌtin, huiꞌx cāmaktāyanīꞌtaꞌ tāꞌtimīn tī tachāꞌnīꞌt aꞌntzaꞌ masqui jā ixcālakapasaꞌ. Chuntzaꞌ tlahuaꞌyaꞌ tū tze.
\v 6 Āꞌmakapitzīn tataspiꞌtnīꞌt. Xlacaꞌn talītāꞌchihuīnaꞌnli tāꞌtimīn huāꞌtzāꞌ tū mimpālacata. Cāhuanica chī huiꞌx cāpāxquīꞌyaꞌ āꞌmakapitzīn. Cacāmaktāyapalaꞌ aꞌcxniꞌ natachāꞌmpala aꞌntzaꞌ. Cacāmaꞌxquiꞌ tū natamaclacasquiꞌn na ixtejcaꞌn ixpālacata xlacaꞌn tatāꞌscujmāꞌnalh Dios. Cacāmaktāyaꞌ chuntzaꞌ chī Dios lacasquiꞌn.
\v 7 Xlacaꞌn tataxtunīꞌt tatāꞌscuja Jesucristo. Jā tū tamaktīniꞌnli aꞌktin tamaktay tī jā taꞌaꞌkaꞌīꞌ Jesucristo.
\v 8 Ūꞌtzaꞌ quinaꞌn nacālīmaktāyayāuj. Chuntzaꞌ huaꞌchi nacātāꞌmāsuꞌyuyāuj tū ixlīcānaꞌ ixtachihuīn Dios.
\s Jā tze ixtalacapāstacniꞌ Diótrefes
\p
\v 9 Quit iccāmacāꞌniꞌnīꞌt aꞌktin carta tī taꞌaꞌkaꞌīꞌ. Diótrefes, xlaꞌ tahuiꞌlacuꞌtun xalīpuxcuꞌ aꞌntzaꞌ. Ūꞌtzaꞌ jā ixquilīkexmatniꞌcuꞌtun.
\v 10 Chuntzaꞌ aꞌcxniꞌ naꞌicchāꞌn aꞌntzaꞌ naꞌiclīchihuīnaꞌn na milacatīncaꞌn ixpālacata tū tlahuamāꞌlh Diótrefes. Xlaꞌ quincālīꞌaꞌksaꞌnān tū jā ixlīcānaꞌ. Nā xlaꞌ jā cāmānū na ixchic tāꞌtimīn tī tachināchaꞌ. Ē jā cāmakxteka natatamaknūniꞌnin na ixchiccaꞌn āꞌmakapitzīn. Ē cālītamacxtu jā tatakēstoka.
\p
\v 11 Tāꞌtin, jā cacāmakscaꞌtti tī tatlahua tū jā tze. Cacāmakscaꞌtti tī tatlahua tū tze. Tī tatlahua tū tze, xlacaꞌn tatapaꞌksīniꞌ Dios. Tī tatlahua tū jā tze, xlacaꞌn jā talakapasa Dios.
\s Tzeya chiꞌxcuꞌ ixuanīꞌt Demetrio
\p
\v 12 Lhūhuaꞌ tī tahuan Demetrio tzeya chiꞌxcuꞌ. Tasuꞌyu xlaꞌ latlāꞌhuan chuntzaꞌ chī ixlīcānaꞌ. Nā quit icuan līlacatejtin latlāꞌhuan. Huiꞌx caꞌtzīyaꞌ quit icuan xmān tū ixlīcānaꞌ.
\s Macāꞌnca saludos
\p
\v 13 Quit lhūhuaꞌcus icuanicuꞌtunān. Jā ictzoꞌkcuꞌtun tzamāꞌ nac carta.
\v 14 Palaj icaꞌncuꞌtunāchaꞌ naꞌiclaktzīꞌnān. Chuntzaꞌ nachihuīnaꞌnāuj cāꞌlacan.
\p
\v 15 Tzej calatapa. Ixlīpōꞌktucaꞌn miꞌamigos tamacāꞌniꞌyān saludos. Nacātāꞌchihuīnaꞌnaꞌ ixlīpōꞌktucaꞌn amigo xalanīꞌn aꞌntzaꞌ.