\id ROM
\h ROMANOS
\toc1 ROMANOS
\mt Huan Carta aꞌntū Cāmacāꞌniꞌca Xalanīꞌn nac Roma
\c 1
\s Pablo cāmacāꞌniꞌlh saludos xalanīꞌn nac Roma
\p
\v 1 Quit, Pablo, ictzoꞌkmāꞌ huāꞌmāꞌ carta. Quit ictāꞌscuja Jesucristo. Dios quilīmānūlh quilīꞌapóstol. Quilīmāmacūꞌlh para naꞌicmāsuꞌyu huan xatzey tachihuīn aꞌntū Dios mācaꞌtzīnīniꞌlh.
\p
\v 2 Tatzoꞌkniꞌ na ixtachihuīn Dios, aꞌnlhā huanican profetas, aꞌnchī Dios hualh aꞌntū napātleꞌke.
\v 3 Tatzoꞌkniꞌ ixpālacata quiMāpaꞌksīniꞌcaꞌn Jesucristo aꞌntī ixOꞌkxaꞌ Dios. Jesucristo xlaꞌ īꞌxūꞌyātāꞌnat huan rey David.
\v 4 Lāꞌ nā Jesucristo, nā xlaꞌ ixOꞌkxaꞌ Dios. Como Jesucristo lakahuanchokolh chuntzaꞌ līmāsuꞌyu palh xlaꞌ ixOꞌkxaꞌ Dios lāꞌ palh lej kaꞌlhī līmāpaꞌksīn. Lāꞌ xlaꞌ xatzey huaꞌchi Dios.
\v 5 Cristo quilakalhuꞌmalh lāꞌ quimānūlh quilīꞌapóstol como ūꞌtzaꞌ ixquilhtampān Dios. Lāꞌ xlaꞌ lacasquiꞌn que naꞌiccāmāsuꞌniꞌ huan tachiꞌxcuhuīꞌt xalanīꞌn lakachu nac quilhtamacuj. Lāꞌ chuntzaꞌ xlacaꞌn tzē natakalhlakaꞌīꞌ Jesucristo lāꞌ tzē nataꞌaꞌkahuānaꞌniꞌ Dios. Lāꞌ chuntzaꞌ Jesucristo naꞌaꞌcnīniꞌniꞌcan.
\v 6 Lāꞌ nā chuntzaꞌ huiꞌxinaꞌn xalanīꞌn nac Roma. Dios cātaꞌsaniꞌnīꞌtaꞌniꞌ lāꞌ chuntzaꞌ tapaꞌksīyāꞌtittzaꞌ con Jesucristo.
\p
\v 7 Quit iccātzoꞌknuniꞌyāniꞌ milīhuākcaꞌn xalanīꞌn nac Roma aꞌntī Dios cāpāxquīꞌyāniꞌ lāꞌ cātaꞌsaniꞌnīꞌtaꞌniꞌ lāꞌ ūꞌtzaꞌ līlaꞌyāꞌtit ixtachiꞌxcuhuīꞌt Dios. Cacāsicuaꞌlanālīniꞌ huiꞌxinaꞌn Dios aꞌntī quinTātaꞌcaꞌn lāꞌ quiMāpaꞌksīniꞌcaꞌn Jesucristo. Lāꞌ cacātamātzaꞌtaꞌtīꞌniꞌniꞌ miꞌaꞌclhcunuccaꞌn. 
\s Pablo ixaꞌncuꞌtun nac Roma
\p
\v 8 Pūꞌla icmaxquīꞌ pāxcatcaꞌtzī Dios por ixpālacata Jesucristo, como huiꞌxinaꞌn xaꞌnca kalhlakaꞌīꞌyāꞌtit. Lakachu līchihuīnaꞌncan de huiꞌxinaꞌn por aꞌnchī xaꞌnca kalhlakaꞌīꞌyāꞌtit.
\v 9 Dios caꞌtzī palh stuꞌncuaꞌ aꞌntū naꞌiccāhuaniyāniꞌ. Lāꞌ xlaꞌ ūꞌtzaꞌ aꞌntī ictāꞌscuja con ixlīhuāk quintapuhuān, como quit icmāsuꞌyu huan xatzey tachihuīn aꞌntū ixpālacata ixOꞌkxaꞌ Dios. Dios caꞌtzī palh pōꞌktu iccāpāstacāniꞌ huiꞌxinaꞌn aꞌxniꞌcaꞌ ickalhtōꞌkaꞌ. 
\v 10 Lāꞌ quit icsquiꞌniꞌ Dios nalacāxtlahua ixlīhuāk para que chuntzaꞌ tzē naꞌiccālakaꞌnāchāniꞌ huiꞌxinaꞌn palh chuntzaꞌ ixtapuhuān Dios.
\v 11 Quit lej iccālaktzīꞌncuꞌtunāniꞌ huiꞌxinaꞌn como iccāmāsuꞌniꞌcuꞌtunāniꞌ aꞌntū quimācaꞌtzīnīlh huan Espíritu Santo. Lāꞌ chuntzaꞌ huiꞌxinaꞌn tzē nakalhlakaꞌīꞌyāꞌtit más xaꞌnca.
\v 12 Lāꞌ chuntzaꞌ tzē nalāmaktāyayāuj chāꞌtunuꞌ aꞌnchī kalhlakaꞌīꞌyāuj.
\p
\v 13 Quit iclacasquiꞌn que cacaꞌtzītit huiꞌxinaꞌn, tāꞌtimīn, que lej maklhūhuaꞌ xaꞌiccālakaꞌncuꞌtunāchāniꞌ. Pero tūꞌ icaꞌnīꞌtaꞌnchaꞌ como tūlanaꞌj tzē naꞌicaꞌn. Quit iccāmaktāyacuꞌtunāniꞌ para que āꞌchulāꞌ nakalhlakaꞌīꞌyāꞌtit. Chuntzaꞌ pātleꞌkenīꞌt āꞌlacatin aꞌnlhā iccāmāsuꞌniꞌnīꞌt ixtachihuīn Dios aꞌntīn tūꞌ israelitas.
\v 14 Tasquiꞌnī naꞌiccāmāsuꞌniꞌ ixlīhuākcaꞌn huan tachiꞌxcuhuīꞌt. Tasquiꞌnī naꞌiccāmāsuꞌniꞌ aꞌntī chu catīhuāya tachiꞌxcuhuīꞌt lāꞌ nā aꞌntīn tūꞌ chu catīhuāya tachiꞌxcuhuīꞌt, lāꞌ aꞌntī lej tacaꞌtzī lāꞌ nā aꞌntīn tūꞌ tacaꞌtzī.
\v 15 Lāꞌ chuntzaꞌ icmāsuꞌyucuꞌtun huan xatzey tachihuīn nac Roma, aꞌnlhā huiꞌlānaꞌntit huiꞌxinaꞌn.
\s Līpūtaxtucan aꞌxniꞌcaꞌ kalhlakaꞌīꞌcan huan xatzey tachihuīn
\p
\v 16 Tūꞌ iclīmāxanaꞌn icmāsuꞌyu huan xatzey tachihuīn ixpālacata Jesucristo. Aꞌxniꞌcaꞌ māsuꞌyucan huan xatzey tachihuīn, Dios cāmāpūtaxtukōꞌ ixlīhuākcaꞌn aꞌntīn talīpāhuan Dios, como xlaꞌ lej kaꞌlhī līmāpaꞌksīn. Pūꞌla cāmāsuꞌniꞌca aꞌntī israelitas lāꞌ āꞌcalīstān aꞌntīn tūꞌ israelitas.
\v 17 Ixtachihuīn Dios quincāmāsuꞌniꞌyāniꞌ aꞌnchī Dios cāmāpānūniꞌ ixtalaclēꞌiꞌcaꞌn ixlīhuākcaꞌn aꞌntīn talīpāhuan Dios. Tatzoꞌkniꞌ na ixtachihuīn Dios: “Ixlīhuākcaꞌn aꞌntī Dios cāmāpānūniꞌ ixtalaclēꞌiꞌcaꞌn como talīpāhuan Dios, xlacaꞌn para pōꞌktu natakaꞌlhī xasāstiꞌ ixquilhtamacujcaꞌn”. 
\s Ixlīhuākcaꞌn huan tachiꞌxcuhuīꞌt talaclēꞌn
\p
\v 18 Caꞌtzīyāuj que Dios huiꞌlachaꞌ nac aꞌkapūn lāꞌ xlaꞌ nacāmāpātīnī aꞌntīn tatlahua aꞌntūn koꞌhuaꞌjuaꞌ. Lāꞌ como xlacaꞌn tatlahua aꞌntūn tūꞌ tzey, tūꞌ tapāstaccuꞌtun aꞌntū xastuꞌncuaꞌ ixlaꞌ Dios.
\v 19 Xlacaꞌn tzē natacaꞌtzī macstiꞌnaꞌj aꞌnchī huanīꞌt Dios, chuntzaꞌ huaꞌchi quilīhuākcaꞌn nā tzē caꞌtzīyāuj. Māniꞌ Dios cāmāsuꞌniꞌnīꞌt.
\v 20 Desde aꞌxniꞌcaꞌ tzuculh huan quilhtamacuj huan tachiꞌxcuhuīꞌt talaktzīꞌn aꞌntūn tlahuanīꞌt Dios. Lāꞌ chuntzaꞌ tzē natalīmāchekxī aꞌnchī huanīꞌt Dios. Lāꞌ aꞌyuj tūla talaktzīꞌn Dios, xlacaꞌn tzēn tamāchekxī que Dios lej kaꞌlhī ixlīmāpaꞌksīn aꞌntūn tūꞌ maktin sputa. Lāꞌ nā tzēn tamāchekxī que xlaꞌ lej stuꞌncuaꞌ Dios. Uꞌtzaꞌ talīlēꞌn cuenta xlacaꞌn palh tūꞌ talakapasa Dios.
\v 21 Aꞌyuj xlacaꞌn tacaꞌtzī que Dios huīꞌ, xlacaꞌn tūꞌ tataquilhpūtaniꞌ huaꞌchi tasquiꞌnī nataquilhpūtaniꞌcan. Lāꞌ tūꞌ tamaxquīꞌ pāxcatcaꞌtzī. Lāꞌ āꞌchulāꞌ tapāstaca aꞌntū nīn tuntūꞌ lītasquiꞌnī. Lāꞌ como tūꞌ tamāchekxī, ixtapāstacnaꞌcaꞌn huaꞌchilh tūꞌ xaꞌnca scujmāꞌ.
\v 22 Māniꞌ xlacaꞌn tahuan que lej lakskalalhnaꞌ. Tūꞌ stuꞌncuaꞌ. Lactontosnuꞌ.
\v 23 Lāꞌ tūꞌ tamācāꞌtaniꞌcuꞌtun Dios aꞌntī huīꞌ para pōꞌktu. Tataquilhpūtaniꞌ huan ídolos aꞌntūn tatasuꞌyu huaꞌchi chiꞌxcuhuīꞌn. Lāꞌ huan chiꞌxcuhuīꞌn, xlacaꞌn natanīkōꞌ. Lāꞌ nā xlacaꞌn tataquilhpūtaniꞌ āꞌtāpātin ídolos aꞌntū māniꞌ xlacaꞌn tamacanīꞌtlahua aꞌntūn tatasuꞌyu huaꞌchi spūnnuꞌ lāꞌ lūhuaꞌ lāꞌ animalhnaꞌ. 
\p
\v 24 Uꞌtzaꞌ Dios cālītaxtunquīniꞌlh lāꞌ cālīmakxtekli natatlahua aꞌntū lej koꞌhuaꞌjuaꞌ. Lāꞌ chuntzaꞌ talātlahuaniꞌ aꞌntū xakoꞌhuaꞌjuaꞌ chu aꞌnchī ixtalacasquiꞌn.
\v 25 Xlacaꞌn tūꞌ takalhlakaꞌīꞌcuꞌtun aꞌntī xastuꞌncuaꞌ Dios; xmān takalhlakaꞌīꞌcuꞌtun aꞌntū huaꞌchi lakatin tāꞌksaꞌnīn. Tamācāꞌtaniꞌ lāꞌ tataquilhpūtaniꞌ aꞌntū māꞌaꞌnanīlh Dios. Lāꞌ tūꞌ tamācāꞌtanī aꞌntī xastuꞌncuaꞌ Dios. Lāꞌ ūꞌtzaꞌ aꞌntīn tlahuakōꞌnīꞌt ixlīhuāk aꞌntūn taꞌaꞌnan nac cāꞌquilhtamacuj. Lāꞌ xlaꞌ, tasquiꞌnī que ūꞌtzaꞌ namācāꞌtanīyāuj quilīhuākcaꞌn para pōꞌktu. Amén.
\p
\v 26 Lāꞌ ūꞌtzaꞌ Dios cālīmakxtekli natatlahua aꞌntū lej līmāxanaꞌ chuntzaꞌ huaꞌchi tatlahuacuꞌtun. Lāꞌ chuntzaꞌ huan puscan tūꞌtzaꞌ takaꞌlhīcuꞌtun ixkōluꞌcaꞌn huaꞌchi tasquiꞌnī. Lāꞌ talātāꞌtahuiꞌla entre puscan. Lāꞌ chuntzaꞌ tatlahua entre puscan aꞌntū lej līmāxanaꞌ. 
\v 27 Lāꞌ nā chuntzaꞌ huan chiꞌxcuhuīꞌn. Tūꞌ tamaclacasquiꞌn huan puscan huaꞌchi tasquiꞌnī. Lāꞌ talātāꞌtahuiꞌla entre chiꞌxcuhuīꞌn. Lāꞌ chuntzaꞌ tatlahua entre chiꞌxcuhuīꞌn aꞌntū lej līmāxanaꞌ. Lāꞌ ūꞌtzaꞌ talīlaclatāyalh. 
\p
\v 28 Lāꞌ como tūꞌ tapāstaccuꞌtun aꞌntū ixlaꞌ Dios, chuntzaꞌ Dios cātaxtunquīniꞌlh lāꞌ cāmakxtekli natapāstaca aꞌntū lej xakoꞌhuaꞌjuaꞌ. Lāꞌ ūꞌtzaꞌ talītlahua aꞌntūn tūꞌ līmakuan.
\v 29 Lāꞌ lej tatlahua tāpālhūhuaꞌ aꞌntūn tūꞌ tzey. Lāꞌ tamakpuscātīniꞌn. Lāꞌ lej tatlahua aꞌntūn koꞌhuaꞌjuaꞌ. Lāꞌ xlacaꞌn talālakcaꞌtzaniꞌ aꞌntūn takaꞌlhī āꞌmakapitzīn. Lāꞌ tūꞌ talaktzīꞌncuꞌtun āꞌmakapitzīn. Lāꞌ talālakcaꞌtzan. Lāꞌ tamaknīniꞌn. Lāꞌ talāstaꞌla. Lāꞌ taꞌaꞌkxokonuꞌn. Lāꞌ tapuhuaniꞌ aꞌntūn tūꞌ tzey de āꞌmakapitzīn. Lāꞌ taꞌaꞌksaꞌnīniꞌn.
\v 30 Lāꞌ talīchihuīnaꞌn āꞌmakapitzīn de aꞌntūn tūꞌ tzey, lāꞌ taꞌaꞌkchāꞌniꞌ Dios. Lāꞌ talacatāquīꞌnin. Lāꞌ takaꞌtlaꞌjcaꞌtzī. Lāꞌ tahuan palh xlacaꞌn lakaꞌtlaꞌn. Lāꞌ tapuhuan aꞌnchī natalītlahua āꞌchulāꞌ antūn koꞌhuaꞌjuaꞌ. Lāꞌ tūꞌ taꞌaꞌkahuānaꞌniꞌ ixtātaꞌcaꞌn lāꞌ ixtzīꞌtcaꞌn.
\v 31 Lāꞌ tūꞌ tamāchekxī aꞌntū xatzey. Lāꞌ tūꞌ tatlōkentaxtū aꞌntūn tahuan. Lāꞌ tūꞌ tapāxquīꞌ āꞌmakapitzīn. Lāꞌ tūꞌ tamāsputūnuꞌniꞌ āꞌmakapitzīn. Lāꞌ nīn talakalhuꞌmanīniꞌn.
\v 32 Lāꞌ ixlīhuākcaꞌn aꞌntīn tatlahua huan tamāꞌna catūhuā, xlacaꞌn nacāmāpātīnīcan, como chuntzaꞌ huan Dios. Lāꞌ aꞌyuj xlacaꞌn tacaꞌtzī huāꞌmāꞌ, tūꞌ tapājaxa de tatlahua aꞌntūn tūꞌ tzey. Lāꞌ āꞌchulāꞌ tapuhuan palh lej tzey palh āꞌmakapitzīn nā natatlahua aꞌntūn koꞌhuaꞌjuaꞌ.
\c 2
\s Lej tzey aꞌnchī Dios nacālīlacāxtlahua huan tachiꞌxcuhuīꞌt 
\p
\v 1 Palh kalhatin ixualh que āꞌmakapitzīn talaclēꞌn, chuntzaꞌ huaꞌchilh xlaꞌ huan que māniꞌ ūꞌtzaꞌ laclēꞌn como nā xlaꞌ tlahua aꞌntūn tūꞌ tzey.
\v 2 Caꞌtzīyāuj que lej tzey aꞌnchī Dios nacāmālaclēꞌnī xlacaꞌn antīn tatlahua huāꞌ tamāꞌna catūhuā aꞌntūn koꞌhuaꞌjuaꞌ.
\v 3 Aꞌntī natahuan que Dios nacāmālaclēꞌnī huan āꞌmakapitzīn como talaclēꞌn, nā xlacaꞌn nā nacāmālaclēꞌnīcan como xlacaꞌn nā takaꞌlhī ixtalaclēꞌiꞌcaꞌn.
\v 4 Lāꞌ aꞌyuj Dios lej quincālakalhuꞌmanāniꞌ, lāꞌ aꞌyuj tūꞌ palaj quincāmāpātīnīyāniꞌ, xlacaꞌn tūꞌ tamāchekxī huāꞌmāꞌ. Huaꞌchilh talakmakaꞌn aꞌnchī Dios cāpātīniꞌmāꞌ. Dios lej lakalhuꞌmānīniꞌn como xlaꞌ lacasquiꞌn que nataxtāpalī ixtapāstacnaꞌcaꞌn. 
\v 5 Lāꞌ xlacaꞌn lej lacxumpi. Tūꞌ taxtāpalīcuꞌtun ixtapāstacnaꞌcaꞌn. Uꞌtzaꞌ āꞌchulāꞌ natalīmāpala con Dios aꞌxniꞌcaꞌ Dios nacāmālaclēꞌnī xlacaꞌn aꞌntīn talaclēꞌn.
\v 6 Dios nacālacāxtlahua aꞌntīn tatlahuanīꞌt aꞌntūn tzey lāꞌ aꞌntīn tatlahuanīꞌt aꞌntū xakoꞌhuaꞌjuaꞌ. Nalacāxtlahua chāꞌtunuꞌ chu aꞌnchī tlāꞌhuanīꞌt. 
\v 7 Nacāmaxquīꞌ ixquilhtamacujcaꞌn para pōꞌktu aꞌntīn tatlahua aꞌntūn tzey. Tatlahua aꞌntūn tzey como xlacaꞌn taꞌaꞌncuꞌtun nac aꞌkapūn, lāꞌ talacasquiꞌn que Dios nacālaktzīꞌn xalacuan, lāꞌ takaꞌlhīcuꞌtun xasāstiꞌ ixquilhtamacujcaꞌn aꞌntū para pōꞌktu.
\v 8 Lāꞌ Dios lej aꞌkchāꞌn con xlacaꞌn aꞌntī lacxumpi lāꞌ tūꞌ tatlahuacuꞌtun ixtapuhuān Dios, lāꞌ xmān tatlahuacuꞌtun aꞌntūn tūꞌ tzey. Lāꞌ Dios nacāmāpātīnī. 
\v 9 Lēj natapātīniꞌn ixlīhuākcaꞌn aꞌntīn tatlahua aꞌntūn tūꞌ tzey. Natapātīniꞌn huan israelitas xapūꞌla lāꞌ nā natapātīniꞌn aꞌntīn tūꞌ israelitas.
\v 10 Lāꞌ ixlīhuākcaꞌn aꞌntīn tatlahua aꞌntūn tzey, Dios nacālaktzīꞌn xalacuan. Lāꞌ Dios nacāmātzaꞌtaꞌtīꞌniꞌ ixaꞌclhcunuccaꞌn. Lāꞌ nataꞌaꞌn nac aꞌkapūn. Lāꞌ nā chuntzaꞌ xapūꞌla nacāpātleꞌkeniꞌ aꞌntī israelitas lāꞌ nā chuntzaꞌ nacāpātleꞌkeniꞌ aꞌntīn tūꞌ israelitas. 
\p
\v 11 Chuntzaꞌ nacāpātleꞌkeniꞌ aꞌntī israelitas lāꞌ nā aꞌntīn tūꞌ israelitas, como Dios cālaktzīꞌn chu lakatin huan tachiꞌxcuhuīꞌt.
\v 12 Ixlīhuākcaꞌn huan tachiꞌxcuhuīꞌt takaꞌlhī ixtalaclēꞌiꞌcaꞌn. Lāꞌ makapitzīn de xlacaꞌn tūꞌ talakapasa huan ley aꞌntū Dios cāmaxquīꞌlh huan israelitas. Lāꞌ xlacaꞌn nacāmālaclēꞌnīcan chu aꞌnchī tacaꞌtzī aꞌntūn tzey lāꞌ aꞌntūn tūꞌ tzey. Aꞌmakapitzīn talakapasa huan ley. Lāꞌ xlacaꞌn nacāmālaclēꞌnīcan chu aꞌnchī huan nac ley.
\v 13 Dios lactzey cālaktzīꞌn xlacaꞌn aꞌntīn taꞌaꞌkahuānaꞌniꞌ huāꞌmāꞌ ley. Lāꞌ aꞌntīn tūꞌ taꞌaꞌkahuānaꞌniꞌ huāꞌmāꞌ ley, lāꞌ chu xmān takaxmata, xlacaꞌn tūꞌ xatzey cālaktzīꞌncan.
\v 14 Lāꞌ xlacaꞌn aꞌntīn tūꞌ talakapasa ixley Dios, lāꞌ palh xlacaꞌn lacatejtin tahuiꞌlānaꞌ chu aꞌnchī māniꞌ ixtapāstacnaꞌcaꞌn, chuntzaꞌ tatlahua aꞌnchī huan huāꞌmāꞌ ley aꞌyuj tūꞌ talakapasa. Chuntzaꞌ lītasuꞌyu palh xlacaꞌn tacaꞌtzī aꞌntūn tzey lāꞌ aꞌntūn tūꞌ tzey.
\v 15 Huaꞌchilh ixtalakapasli ixley Dios, como ixaꞌcstucaꞌn tacaꞌtzī palh tzey o palh tūꞌ tzey aꞌntūn tatlahuamāꞌna. 
\v 16 Namin huan chiꞌchiniꞌ aꞌxniꞌcaꞌ Jesucristo namālaclēꞌnīniꞌn por ixquilhtampān Dios. Jesucristo nacāmālaclēꞌnī huan tachiꞌxcuhuīꞌt por ixpālacata ixtalaclēꞌiꞌcaꞌn lāꞌ ixtapāstacnaꞌcaꞌn xakoꞌhuaꞌjuaꞌ aꞌntū lakatzēꞌk tacaꞌtzī. Uꞌtzaꞌ icmāsuꞌyu aꞌxniꞌcaꞌ icmāsuꞌyu huan xatzey tachihuīn ixpālacata Jesucristo.
\s Huan israelitas ixtalīpāhuan ixley Moisés
\p
\v 17 Lāꞌ xlacaꞌn aꞌntī israelitas, xlacaꞌn talīkaꞌtlaꞌjcaꞌtzī como israelitas xlacaꞌn. Lāꞌ talīpāhuan huan ley aꞌntū Dios cāmaxquīꞌlh. Lāꞌ talīkaꞌtlaꞌjcaꞌtzī como ixtachiꞌxcuhuīꞌt Dios xlacaꞌn.
\v 18 Lāꞌ xlacaꞌn talakapasa ixtapuhuān Dios. Lāꞌ como cāmāsuꞌniꞌcanīꞌt huāꞌmāꞌ ley chuntzaꞌ tzētzaꞌ tacaꞌtzī aꞌnchī līlacatejtin natalatāꞌkchoko.
\v 19 Lāꞌ xlacaꞌn tapuhuan que lej tzē natamāsuꞌniꞌ aꞌntīn tuntūꞌ talakapasa. Lāꞌ nā tapuhuan que xlacaꞌn huaꞌchilh tamakskomāꞌna aꞌntīn talatlāꞌhuan aꞌnlhā cāꞌpucsuaꞌ.
\v 20 Lāꞌ tapuhuan que lej tzē tamāsuꞌniꞌ aꞌntī lactontos lāꞌ aꞌntī huaꞌchi camanaꞌ como tuntūꞌnaꞌj tacaꞌtzī. Lāꞌ como talakapasa ixley Dios xlacaꞌn tapuhuan palh tacaꞌtzītzaꞌ ixlīhuāk aꞌntū stuꞌncuaꞌ lāꞌ ixlīhuāk aꞌntūn caꞌtzīcan.
\v 21 Xlacaꞌn tamāscaꞌtī āꞌmakapitzīn. Lāꞌ tūꞌ tatlōkentaxtū aꞌntūn tamāsuꞌyu. Tahuani āꞌmakapitzīn que tūꞌ tzey palh kaꞌlhānaꞌncan. Lāꞌ xlacaꞌn takaꞌlhānaꞌn. 
\v 22 Lāꞌ xlacaꞌn tahuani āꞌmakapitzīn que tūꞌ tzey palh makpuscātīniꞌncan. Lāꞌ xlacaꞌn tamakpuscātīniꞌn. Xlacaꞌn talakmakaꞌn huan ídolos. Lāꞌ xlacaꞌn takaꞌlhānaꞌn nac lītokpānnaꞌ aꞌnlhā taꞌaꞌnan ídolos.
\v 23 Lāꞌ xlacaꞌn talīkaꞌtlaꞌjcaꞌtzī como cāmaxquīꞌcanīꞌt ixley Dios. Lāꞌ xlacaꞌn tūꞌ taꞌaꞌkahuānaꞌniꞌ huāꞌmāꞌ ley. Lāꞌ ūꞌtzaꞌ talīlakmakaꞌn Dios huan āꞌmakapitzīn. 
\v 24 Chuntzaꞌ tatzoꞌkniꞌ na ixtachihuīn Dios:
\q Huiꞌxinaꞌn israelitas āꞌlīhuaꞌcaꞌ līpināꞌtit cuenta por ixpālacata talakmakaꞌn Dios huan āꞌmakapitzīn aꞌntīn tūꞌ israelitas.
\p
\v 25 Lej tzey lacan līꞌisraelita xmān palh xlacaꞌn natatlōkentaxtū ixley Dios. Lāꞌ palh tūꞌ tatlōkentaxtū, chuntzaꞌ nīn tuntūꞌ ixtapalh lacan līꞌisraelita.
\v 26 Lāꞌ xlacaꞌn aꞌntīn tūꞌ israelitas, palh xlacaꞌn tatlōkentaxtū ixley Dios, chuntzaꞌ Dios cālaktzīꞌn huaꞌchilh israelitas.
\v 27 Palh xlacaꞌn aꞌntīn tūꞌ israelitas tatlōkentaxtū ixley Dios, chuntzaꞌ lītasuꞌyu que huiꞌxinaꞌn kaꞌlhīꞌyāꞌtit mintalaclēꞌiꞌcaꞌn, como huiꞌxinaꞌn tūꞌ tlōkentaxtūyāꞌtit huāꞌmāꞌ ley, aꞌyuj kaꞌlhīyāꞌtit aꞌnlhā tatzoꞌkniꞌ. 
\v 28 Kalhatin tūꞌ catilalh ixcaman Dios xmān por ixpālacata circuncidarlīcanīꞌt chu aꞌnchī ixtalanāncaꞌn israelitas. 
\v 29 Aꞌntī lej stuꞌncuaꞌ ixtachiꞌxcuhuīꞌt Dios, ūꞌtunuꞌn aꞌntīn taxtāpalīnīꞌt ixtapāstacnaꞌcaꞌn. Lāꞌ chuntzaꞌ taxtāpalīnīꞌt nā ixchakāncaꞌn lāꞌ tūꞌ xmān na ixmacniꞌcaꞌn. Lāꞌ xlacaꞌn aꞌntīn taxtāpalīnīꞌt ixtapāstacnaꞌcaꞌn, Dios cālaktzīꞌn lactzey aꞌyuj cālakmakaꞌncan na ixlacapūncaꞌn tachiꞌxcuhuīꞌt. 

\c 3
\p
\v 1 Chōꞌla huiꞌxinaꞌn puhuaꞌnāꞌtit palh tuntūꞌ ixtapalh lacan līꞌisraelita lāꞌ palh tuntūꞌ ixtapalh circuncidarlacan. 
\v 2 Quit icuan que tūꞌ stuꞌncuaꞌ. Huan israelitas lhūhuaꞌ takaꞌlhī aꞌntūn tūꞌ takaꞌlhī huan āꞌmakpitzīn. Aꞌxniꞌcaꞌ Dios cāmaxquīꞌlh huan tachiꞌxcuhuīꞌt ixtachihuīn aꞌntūn tatzoꞌkniꞌ, huan israelitas ūꞌtunuꞌn aꞌntī Dios cālīmāmacūꞌlh ixtachihuīn.
\v 3 Lāꞌ aꞌyuj āꞌmakapitzīn tūꞌ takalhlakāꞌiꞌcuꞌtun palh stuꞌncuaꞌ aꞌntū Dios huan, pero Dios natlōkentaxtū aꞌntū huan.
\v 4 Lāꞌ aꞌyuj ixlīhuākcaꞌn huan tachiꞌxcuhuīꞌt ixtaꞌaꞌkxokonuꞌlh, Dios natlōkentaxtū aꞌntū hualh. Chuntzaꞌ tatzoꞌkniꞌ na ixtachihuīn Dios:
\q Chuntzaꞌ lītasuꞌyu que huiꞌx pōꞌktu huaꞌnaꞌ aꞌntū stuꞌncuaꞌ.
\q Lāꞌ nīn tintīꞌ tzē nahuan que tūꞌ tzey aꞌntū huaꞌnaꞌ.
\m Chuntzaꞌ huanica Dios.
\p
\v 5 Palh quinaꞌn natlahuayāuj aꞌntūn tūꞌ tzey, chuntzaꞌ āꞌchulāꞌ lītasuꞌyu palh Dios pōꞌktu tlahua aꞌntūn tzey. Chōꞌla catīhuā nakalhasquiꞌnīniꞌn: “¿Aꞌchīꞌ naquincātamāpātīnīyāniꞌ? Por ixpālacata quintalaclēꞌiꞌcaꞌn, āꞌchulāꞌ nacaꞌtzīcan palh Dios más xatzey. Lāꞌ ¿aꞌchīꞌ naquincātamāpātīnīyāniꞌ ixpālacata aꞌntū māsuꞌyu que Dios lej tzey?” Chuntzaꞌ tapuhuan huan tachiꞌxcuhuīꞌt. 
\v 6 Tūꞌ xaꞌnca tapāstacnaꞌn. Palh tūꞌ tzey cahuā que Dios nacāmāpātīnī xlacaꞌn aꞌntīn talaclēꞌn, xlaꞌ tūlalh ixcājuzgarlīlh huan tachiꞌxcuhuīꞌt xalanīꞌn nac quilhtamacuj.
\p
\v 7 Tzēlasāꞌ catīhuā nahuan: “Palh quit icaꞌkxokonuꞌn, chuntzaꞌ Dios lītasuꞌyu que lej tzey, como tūꞌ maktin aꞌkxokonuꞌn. Lāꞌ ¿aꞌchīꞌ naquimāpātīnīcan? Por ixpālacata quintalaclēꞌiꞌ āꞌchulāꞌ naꞌaꞌcnīniꞌniꞌcan Dios”.
\v 8 Palh tzey cahuā huāꞌmāꞌ tapāstacnaꞌ, chuntzaꞌ tzē ixuáuj: “Aꞌchulāꞌ catlahuáuj talaclēꞌiꞌ para que chuntzaꞌ āꞌchulāꞌ naꞌaꞌcnīniꞌniꞌcan Dios”. Lāꞌ tūla huancan huāꞌmāꞌ tachihuīn. Makapitzīn tahuan que chuntzaꞌ icmāsuꞌyu. Tūꞌ stuꞌncuaꞌ. Dios nacāmāpātīnī aꞌntīn tahuan chuntzaꞌ.
\s Nīn kalhatin aꞌntīn tūꞌ laclēꞌn
\p
\v 9 Tūla huanāuj que huan israelitas más xalacuan. Icuanīꞌttzaꞌ que aꞌcxtim tūla tamakxteka aꞌntūn tūꞌ tzey, xlacaꞌn aꞌntī israelitas lāꞌ nā aꞌntīn tūꞌ israelitas. 
\v 10 Lāꞌ nā huāꞌmāꞌ tatzoꞌkniꞌ na ixtachihuīn Dios aꞌnlhā huan chuntzaꞌ:
\q Tintīꞌ nīn kalhatin aꞌntī tzey.
\q
\v 11 Lāꞌ nīn tintīꞌ aꞌntī māchekxī aꞌntū ixlaꞌ Dios.
\q Lāꞌ nīn tintīꞌ aꞌntīn pāstaca Dios.
\q
\v 12 Ixlīhuākcaꞌn tataxtunquīniꞌlh de Dios.
\q Talaclakōꞌlh ixlīhuākcaꞌn.
\q Nīn tintīꞌ tlahua aꞌntūn tzey, nīn kalhatin.
\q
\v 13 Lāꞌ aꞌxniꞌcaꞌ tatakalhpitzi huaꞌchilh mālaquīꞌcan lakatin taponkniꞌ aꞌnlhā tojōmaꞌ huan nīn, como lej koꞌhuaꞌjuaꞌ aꞌnchī tachihuīnaꞌn.
\q Taꞌaꞌkxokonuꞌn lāꞌ taꞌaꞌksaꞌnīniꞌn.
\q Huan tachihuīn aꞌntū taxtu de na ixquilhniꞌcaꞌn huaꞌchi huan līlaknīn aꞌntū kaꞌlhī na ixquilhniꞌ huan lūhuaꞌ. 
\q
\v 14 Lāꞌ tamacapūlhca āꞌmakapitzīn.
\q
\v 15 Lāꞌ aꞌyuj nīn tuntūꞌ ixpālacata, tuncan tamaknīniꞌn. 
\q
\v 16 Chu aꞌnlhā talatāꞌkchoko xlacaꞌn tamālaksputūnuꞌn lāꞌ tamālakaputzī āꞌmakapitzīn.
\q
\v 17 Lāꞌ tūꞌ tacaꞌtzī aꞌnchī caꞌcs natalītahuiꞌla. 
\q
\v 18 Lāꞌ nīn tapāstaca para nataꞌaꞌcnīniꞌniꞌ Dios. 
\p
\v 19 Lāꞌ ūꞌtzaꞌ huāꞌmāꞌ aꞌntūn tatzoꞌkniꞌ na ixtachihuīn Dios aꞌnlhā tatzoꞌkniꞌ huan ley, ūꞌtzaꞌ cālīchihuīnaꞌn xlacaꞌn aꞌntīn cāmaxquīꞌcanīꞌt huan ley. Chuntzaꞌ ixlīhuākcaꞌn talaclēꞌn na ixlacapūn Dios. Lāꞌ nīn tintīꞌ tzē nahuan palh tūꞌ laclēꞌn.
\v 20 Nīn tintīꞌ tlōkentaxtūkōꞌnīꞌt aꞌntū līmāpaꞌksīniꞌn huan ixley Dios. Uꞌtzaꞌ nīn tintīꞌ lītasuꞌyu palh tzey na ixlacapūn Dios. Huan ley xmān tzē naquincāmāsuꞌniꞌyāniꞌ palh quinaꞌn kaꞌlhīyāuj quintalaclēꞌiꞌcaꞌn.
\s Tapūtaxtu xlacaꞌn aꞌntīn takalhlakaꞌīꞌ que Jesucristo māpūtaxtūnuꞌn
\p
\v 21 Lāꞌ chuhuaꞌj tasuꞌyunīꞌt que Dios tūꞌ catimāpānūniꞌlh ixtalaclēꞌiꞌ kalhatin chiꞌxcuꞌ aꞌntī xmān tlōkentaxtūcuꞌtun huan ley. Xtunc aꞌnchī Dios cālīmāpānūniꞌ ixtalaclēꞌiꞌcaꞌn tachiꞌxcuhuīꞌt. Chuntzaꞌ tatzoꞌkniꞌ na ixtachihuīn Dios aꞌnlhā tatzoꞌkniꞌ huan ley lāꞌ aꞌnlhā huanican profetas.
\v 22 Dios cāmāpānūniꞌ ixtalaclēꞌiꞌcaꞌn ixlīhuākcaꞌn aꞌntīn takalhlakaꞌīꞌ que Jesucristo tzē namāpūtaxtūnuꞌn. Lāꞌ chuxatī aꞌntīn kalhlakaꞌīꞌ huāꞌmāꞌ, ūꞌtzaꞌ Dios namāpūtaxtū palh xlaꞌ israelita lāꞌ palh tūꞌ israelita.
\v 23 Quīlīhuākcaꞌn tlahuanīꞌtaꞌuj quintalaclēꞌiꞌcaꞌn. Nīn tintīꞌ aꞌntī līlacatejtin latāꞌkchoko chuntzaꞌ huaꞌchi Dios lacasquiꞌn.
\v 24 Pero Dios lej lakalhumaꞌnīniꞌn. Cristo Jesús māpalalh por quintalaclēꞌiꞌcaꞌn. Lāꞌ chuntzaꞌ Dios quincāmāpānūniꞌnīꞌtaꞌniꞌ quintalaclēꞌiꞌcaꞌn.
\v 25 Chu aꞌnchī ixtapuhuān Dios, Jesucristo xtokohuaꞌcaꞌca. Xlaꞌ nīlh lāꞌ chuntzaꞌ xlaꞌ xapakōꞌlh ixtalaclēꞌiꞌcaꞌn ixlīhuākcaꞌn aꞌntīn takalhlakaꞌīꞌ palh stuꞌncuaꞌ Jesucristo xapakōꞌlh ixtalaclēꞌiꞌcaꞌn. Chuntzaꞌ tasuꞌyu que Dios huāk tzey aꞌntū tlahua. Aꞌxniꞌcaꞌ tūnaꞌj ixnī Cristo, Dios ixpātī aꞌnchī ixtlahuacan aꞌntūn tūꞌ tzey.
\v 26 Lāꞌ chuhuaꞌj Cristo nīnīꞌt lāꞌ cāmāpānūniꞌnīꞌt huan ixtalaclēꞌiꞌcaꞌn ixlīhuākcaꞌn aꞌntīn takalhlakaꞌīꞌ palh stuꞌncuaꞌ Jesucristo māpalakōꞌlh ixtalaclēꞌiꞌcaꞌn. Lāꞌ chuntzaꞌ tasuꞌyu palh Dios tlahua xmān aꞌntūn tzey.
\p
\v 27 Tintīꞌ aꞌntīn tzē nakaꞌtlaꞌjcaꞌtzī na ixlacapūn Dios. Palh kalhatin cahuā ixtlōkentaxtūkōꞌlh ixley Dios, chuntzaꞌ tzē ixlīkaꞌtlaꞌjcaꞌtzīlh. Tūla kaꞌtlaꞌjcaꞌtzīyāuj, como Cristo ūꞌtzaꞌ aꞌntīn quincāmāpūtaxtūnīꞌtaꞌniꞌ como līpāhuanāuj xlaꞌ.
\v 28 Dios quincāmāpānūniꞌnīꞌtaꞌniꞌ quintalaclēꞌiꞌcaꞌn por ixpālacata kalhlakaꞌīꞌyāuj que Jesucristo quincāmāpūtaxtūyāniꞌ, lāꞌ aꞌyuj quinaꞌn tūꞌ tlōkentaxtūnīꞌtaꞌuj huan ley.
\p
\v 29 Ixtachiꞌxcuhuīꞌt Dios, xlacaꞌn tūꞌ xmān israelitas. Lāꞌ nā xlacaꞌn aꞌntīn tūꞌ israelitas nā ixtachiꞌxcuhuīꞌt Dios.
\v 30 Dios xmān kalhatin. Xlaꞌ cāmāpānūniꞌ ixtalaclēꞌiꞌcaꞌn ixlīhuākcaꞌn aꞌntīn takalhlakaꞌīꞌ que Jesucristo māpūtaxtūnuꞌn lāꞌ aꞌyuj xlacaꞌn israelitas lāꞌ aꞌyuj tūꞌ.
\v 31 Huāꞌmāꞌ tūꞌ huanicuꞌtun que mākēnūmāꞌnauj huan ley. Como kalhlakaꞌīꞌyāujtzaꞌ que Jesucristo quincāmāpūtaxtūyāniꞌ, más xaꞌnca natlahuayāuj aꞌntū lej tzey chu aꞌnchī huan huan ley.
\c 4
\s Abraham ixlīpāhuan Dios
\p
\v 1 Chuhuaꞌj naꞌicchihuīnaꞌn ixpālacata Abraham, quimpapcaꞌn quinaꞌn israelitas. ¿Chichū līmāsputūnuꞌniꞌca ixtalaclēꞌiꞌ? 
\v 2 Palh Abraham tzē ixtlōkentaxtūkōꞌlh cahuā aꞌntū Dios ixuanī lāꞌ palh chuntzaꞌ Dios ixlīmāpānūniꞌlh ixtalaclēꞌiꞌ, chuntzaꞌ tzē ixlīkaꞌtlaꞌjcaꞌtzīlh Abraham. Lāꞌ como tūꞌ chuntzaꞌ lalh, tūlalh līkaꞌtlaꞌjcaꞌtzīlh. 
\v 3 Ixtachihuīn Dios huan que Abraham ixlīpāhuan Dios. Lāꞌ ūꞌtzaꞌ Dios līlaktzīꞌlh que lej tzey Abraham. 
\v 4 Aꞌxniꞌcaꞌ kalhatin chiꞌxcuꞌ makscuja, xlaꞌ maxquīꞌcan ixtatlaj. Lāꞌ ixtatlaj xlaꞌ tūꞌ huaꞌchi lēꞌksajnaꞌ. Māpalacan como makscuja. Lāꞌ ūꞌtzaꞌ lītāꞌmālacastuccan huāꞌmāꞌ.
\v 5 Dios cāmāpānūniꞌ ixtalaclēꞌiꞌcaꞌn xlacaꞌn aꞌntīn talīpāhuan Dios, lāꞌ aꞌyuj nīn tuntūꞌ tatlahuanīꞌt aꞌntū xatzey na ixlacapūn Dios. Huāꞌmāꞌ huaꞌchi lakatin lēꞌksajnaꞌ aꞌntū Dios māstāꞌ. Lāꞌ tūꞌ huaꞌchi ixtatlajcaꞌn aꞌntū tatlajanīꞌt.
\v 6 Lāꞌ nā David līchihuīnaꞌlh huāꞌmāꞌ. Līchihuīnaꞌlh aꞌnchī talīpāxuhua aꞌntī Dios cāmāpānūniꞌlh ixtalaclēꞌiꞌcaꞌn xmān huaꞌchi talakalhuꞌmān lāꞌ tūꞌ por tatlahuanīꞌt catūhuā aꞌntūn tzey.
\v 7 Tatzoꞌkniꞌ na ixtachihuīn Dios aꞌntū hualh David: 
\q Lej tapāxuhua xlacaꞌn aꞌntīn Dios cāmāsputūnuꞌniꞌnīꞌt lāꞌ cāxapaniꞌnīꞌt ixtalaclēꞌiꞌcaꞌn.
\q
\v 8 Lej tapāxuhua xlacaꞌn aꞌntī Dios tūꞌ caticāmāmāpalanīlh aꞌntūn talaclēꞌn.
\p
\v 9 Naꞌiccākalhasquiꞌniꞌyāniꞌ catūhuā. ¿Chā huiꞌxinaꞌn puhuaꞌnāꞌtit que Dios cāmāsputūnuꞌniꞌ xmān aꞌntī cācircuncidarlīcanīꞌt chu aꞌnchī ixtalanāncaꞌn israelitas? Tūꞌ chuntzaꞌ. Nā Dios cāmāsputūnuꞌniꞌ aꞌntīn tūꞌ cācircuncidarlīcanīꞌt. Iccāhuaninīꞌtaꞌntzaꞌ que Abraham ixlīpāhuan Dios, lāꞌ ūꞌtzaꞌ Dios līlaktzīꞌlh que lej tzey Abraham.
\v 10 Lāꞌ aꞌxniꞌcaꞌ pātleꞌkelh huāꞌmāꞌ, Abraham tūnaꞌj ixcircuncidarlīcanīꞌt.
\v 11 Aꞌcalīstān circuncidarlīca. Lāꞌ huāꞌmāꞌ līlakapascan que Abraham tzey na ixlacapūn Dios por ixpālacata ixlīpāhuan Dios, aꞌyuj tūnaꞌj ixcircuncidarlīcan. Lāꞌ chuntzaꞌ Abraham huaꞌchilh xatātaꞌ de ixlīhuākcaꞌn aꞌntī Dios cāmāpānūniꞌlh ixtalaclēꞌiꞌcaꞌn por ixpālacata talīpāhuan Dios, aꞌyuj tūꞌ cācircuncidarlīcanīꞌt. 
\v 12 Lāꞌ nā huaꞌchilh xatātaꞌ de aꞌntī cācircuncidarlīcanīꞌt. Lāꞌ tūꞌ por ixpālacata cācircuncidarlīcanīꞌt. Huaꞌchilh ixtātaꞌcaꞌn como chuntzaꞌ takalhlakaꞌīꞌ xlacaꞌn chuntzaꞌ huaꞌchi quimpapcaꞌn Abraham kalhlakaꞌīꞌlh aꞌxniꞌcaꞌ tūnaꞌj ixcircuncidarlīcanīꞌt.
\s Dios tlōkentaxtūlh aꞌntū ixuanīꞌt
\p
\v 13 Dios huanilh Abraham que namaxquīꞌ huan quilhtamacuj, xlaꞌ lāꞌ nā īꞌxūꞌyātāꞌnatnaꞌ. Huanilh huāꞌmāꞌ tūꞌ por ixpālacata Abraham aꞌkahuānaꞌniꞌlh huan ley. Tūꞌ chuntzaꞌ. Dios huanilh huāꞌmāꞌ como Abraham ixkalhlakaꞌīꞌnīꞌt que stuꞌncuaꞌ aꞌntū Dios ixuaninīꞌt lāꞌ ūꞌtzaꞌ līlaktzīꞌlh palh tzey.
\v 14 Dios hualh que nacāsicuaꞌlanālī huan tachiꞌxcuhuīꞌt. Lāꞌ tūꞌ por ixpālacata tatlōkentaxtū huan ley. Tūꞌ ūꞌtzaꞌ cālīsicuaꞌlanālīcan. Palh chuntzaꞌ cahuā, palh Dios ixcāsicuaꞌlanālīlh xmān xlacaꞌn aꞌntīn tatlōkentaxtū huan ley, chuntzaꞌ nīn tintīꞌ ixsicuaꞌlanālīca, como tintīꞌ tzē tlōkentaxtū huan ley. Lāꞌ nā tūꞌ ixcāsicuaꞌlanālīca nīn xlacaꞌn aꞌntīn takalhlakaꞌīꞌ. 
\v 15 Huan ley quincāmāsuꞌniꞌyāniꞌ palh laclēꞌnāuj lāꞌ ūꞌtzaꞌ lītasquiꞌnī que napātīniꞌnāuj. Palh tūꞌ cahuā ixaꞌnalh huan ley, tūꞌ ixcaꞌtzīuj palh laclēꞌnāuj.
\p
\v 16 Aꞌntī Dios cāsicuaꞌlanālī, ūꞌtunuꞌn aꞌntīn takalhlakaꞌīꞌ. Dios cātlahuaniꞌ huāꞌmāꞌ talakalhuꞌmān ixlīhuākcaꞌn aꞌntīn takalhlakaꞌīꞌ chuntzaꞌ huaꞌchi Abraham aꞌyuj xlacaꞌn israelitas lāꞌ aꞌyuj tūꞌ, pero takalhlakaꞌīꞌlh que stuꞌncuaꞌ aꞌntū huan Dios. Chuntzaꞌ Abraham huaꞌchilh xatātaꞌ de quilīhuākcaꞌn aꞌntīn kalhlakaꞌīꞌyāuj. 
\v 17 Tatzoꞌkniꞌ na ixtachihuīn Dios aꞌnchī Dios huanilh huan Abraham:
\q Quit iclacsacnīꞌtaꞌniꞌ lāꞌ chuntzaꞌ nalaꞌyaꞌ huaꞌchi xatātaꞌ de huan tachiꞌxcuhuīꞌt de ixlīhuāk xalanīꞌn nac quilhtamacuj.
\m Lāꞌ Abraham kalhlakaꞌīꞌlh aꞌntū Dios hualh que ixtlōkentaxtūlh. Dios ūꞌtzaꞌ aꞌntīn tzē nacāmālakahuanīchoko huan nīnīꞌn lāꞌ xlaꞌ nā cāmaxquīꞌ ixquilhtamacujcaꞌn aꞌntīn tūnaꞌj tahuiꞌlānaꞌ.
\p
\v 18 Dios ixuaninīꞌt Abraham que nakaꞌlhī kalhatin ixcaman. Lāꞌ Abraham kalhlakaꞌīꞌlh aꞌntū ixuaninīꞌt Dios. Lāꞌ puhualh que stuꞌncuaꞌ, lāꞌ aꞌyuj ixtasuꞌyu palh tūlalh ixlalh xatātaꞌ de lhūhuaꞌ tachiꞌxcuhuīꞌt. Abraham kalhlakaꞌīꞌlh aꞌnchī ixuanicanīꞌt:
\q Mixūꞌyātāꞌnatnaꞌ lej lhūhuaꞌ natala.
\m
\v 19 Lāꞌ Abraham papatzīntzaꞌ ixuanīꞌt. Ixkaꞌlhī huaꞌchi cien cāꞌta. Lāꞌ Sara, aꞌntī ixpuscāt, toꞌkotzīntzaꞌ ixuanīꞌt para nakaꞌlhī ixcaman. Lāꞌ aꞌyuj lej papatzīntzaꞌ ixtahuanīꞌt, Abraham tūꞌ pātzaꞌnkālh de nakalhlakaꞌīꞌ que Dios nacāmaxquīꞌ kalhatin skaꞌtaꞌ.
\v 20 Tūꞌ puhualh palh Dios tūꞌ ixmaxquīꞌlh aꞌntū huanilh. Xlaꞌ āꞌchulāꞌ ixkalhlakaꞌīꞌ lāꞌ ixmākaꞌtlīꞌ Dios. 
\v 21 Xlaꞌ ixcaꞌtzī palh Dios tzē natlahua aꞌntū ixuaninīꞌt. 
\v 22 Abraham kalhlakaꞌīꞌlh que napātleꞌke aꞌnchī Dios ixuaninīꞌt lāꞌ ūꞌtzaꞌ Dios līmāpānūniꞌlh ixtalaclēꞌiꞌ. 
\p
\v 23 Huanmāꞌ tūꞌ tzoꞌkca xmān para que naꞌaꞌcnīniꞌniꞌcan Abraham.
\v 24 Lāꞌ nā tatzoꞌkniꞌ para que quinaꞌn tzē nacaꞌtzīyāuj que Dios nā quincāmāpānūniꞌyāniꞌ quintalaclēꞌiꞌcaꞌn quinaꞌn antī līpāhuanāuj Dios. Xlaꞌ ūꞌtzaꞌ aꞌntī mālakahuanīchokolh quiMāpaꞌksīniꞌcaꞌn Jesucristo. 
\v 25 Dios macamilh Jesucristo para nanī por ixpālacata quintalaclēꞌiꞌcaꞌn. Lāꞌ āꞌcalīstān mālakahuanīchokolh. Lāꞌ ūꞌtzaꞌ Dios quincālīmāpānūniꞌyāniꞌ quintalaclēꞌiꞌcaꞌn. 
\c 5
\s Tūꞌ caticāmāpātīnīca xlacaꞌn aꞌntī Dios cāmāpānūniꞌnīꞌt ixtalaclēꞌiꞌcaꞌn
\p
\v 1 Como quinaꞌn kalhlakaꞌīꞌnīꞌtaꞌuj que Jesucristo tzē māpūtaxtūnuꞌn, Dios quincāmāpānūniꞌnīꞌtaꞌniꞌ quintalaclēꞌiꞌcaꞌn. Lāꞌ chuntzaꞌ tūꞌtzaꞌ ixtāꞌcaꞌtza Dios quinaꞌn, como Dios quincāmāsputūnuꞌniꞌniꞌ por ixpālacata quiMāpaꞌksīniꞌcaꞌn Jesucristo.
\v 2 Lāꞌ como kalhlakaꞌīꞌyāuj que Jesucristo quincāmāpūtaxtūyāniꞌ, Dios quincālakalhuꞌmanāniꞌ. Lāꞌ chuhuaꞌj pāxuhuayāuj como caꞌtzīyāuj palh naꞌaꞌnāuj nac aꞌkapūn aꞌnlhā huiꞌlachaꞌ Dios.
\v 3 Lāꞌ nā līpāxūj huiꞌlānaꞌuj aꞌyuj pātīniꞌmāꞌnauj, como caꞌtzīyāuj que chuntzaꞌ nascaꞌtāuj līlacatzucu napātīniꞌnāuj.
\v 4 Lāꞌ palh līlacatzucu napātīniꞌnāuj, chuntzaꞌ Dios nalīpāxuhua. Lāꞌ chuntzaꞌ caꞌtzīyāuj palh nalakaꞌnāuj Dios.
\v 5 Tūꞌ catitaꞌaꞌkxokouj. Ixlīstuꞌncuaꞌ nalakaꞌnāuj xlaꞌ. Huāꞌmāꞌ xaꞌnca caꞌtzīyāuj, como uꞌcxcaꞌtzīyāuj na quiꞌaꞌclhcunuccaꞌn aꞌnchī Dios lej quincāpāxquīꞌyāniꞌ. Huāꞌmāꞌ quincāmāꞌuꞌcxcaꞌtzīnīyāniꞌ huan Espíritu Santo. Lāꞌ ūꞌtzaꞌ aꞌntī Dios quincālakmacaminīꞌtaꞌniꞌ. 
\p
\v 6 Quinaꞌn tūla catipūtaxtūj māniꞌ quēꞌcstuꞌcaꞌn. Lāꞌ chuntzaꞌ aꞌxniꞌcaꞌ chilh huan chiꞌchiniꞌ aꞌntū Dios īꞌlhcāꞌnīꞌt, Cristo nīlh por ixpālacata quintalaclēꞌiꞌcaꞌn. 
\v 7 Nīn tintīꞌ nīcuꞌtun por āꞌkalhatin aꞌyuj xlaꞌ kalhatin chiꞌxcuꞌ aꞌntī nīn tuntūꞌ tlahuanīꞌt. Chōꞌla nanī āꞌkalhatin por aꞌntī lej tzeyā chiꞌxcuꞌ. 
\v 8 Lāꞌ Cristo nīlh por quimpālacatacaꞌn quinaꞌn aꞌyuj lej malo ixuanīꞌtaꞌuj. Chuntzaꞌ Dios līmāsuꞌyulh palh lej quincāpāxquīꞌyāniꞌ.
\v 9 Lāꞌ chuhuaꞌj como Cristo nīlh por quimpālacatacaꞌn, chuntzaꞌ Dios quincāmāpānūniꞌnīꞌtaꞌniꞌ quintalaclēꞌiꞌcaꞌn. Lāꞌ ūꞌtzaꞌ līcaꞌtzīyāuj palh tūꞌ quinticāmālaclēꞌnīniꞌ aꞌxniꞌcaꞌ nachin huan āꞌxmān chiꞌchiniꞌ.
\v 10 Quinaꞌn ixtāꞌcaꞌtza Dios ixuanīꞌtaꞌuj. Lāꞌ Dios quincātlahuaniꞌ ixamigo, como Cristo, ixOꞌkxaꞌ Dios, nīlh por quinaꞌn. Lāꞌ como quinaꞌn ixamigo Dios lāꞌ como Cristo lakahuanchokopā, āꞌchulāꞌ caꞌtzīyāuj que Cristo quincāmaktāyayāniꞌ lāꞌ chuntzaꞌ tūꞌ quinticāmālaclēꞌnīniꞌ.
\v 11 Lāꞌ ūꞌtzaꞌ līpāxuhuayāuj como tūꞌtzaꞌ Dios quinticāmālaclēꞌnīniꞌ. Lāꞌ nā līpāxuhuayāuj como Dios quincātlahuanīꞌtaꞌniꞌ ixamigo por ixpālacata quiMāpaꞌksīniꞌcaꞌn Jesucristo. 
\s Por ixpālacata Adán laclēꞌncan lāꞌ por ixpālacata Cristo tzē nalīpūtaxtucan
\p
\v 12 Xapūꞌla ixuīꞌ kalhatin chiꞌxcuꞌ aꞌntī ixuanican Adán. Uꞌtzaꞌ aꞌntī xapūꞌla lāꞌ chūꞌcus tlahualh talaclēꞌiꞌ. Lāꞌ por ixtalaclēꞌiꞌ ūꞌtzaꞌ līnīlh. Lāꞌ chuhuaꞌj ūꞌtzaꞌ talīnīkōꞌ huan tachiꞌxcuhuīꞌt como ixlīhuākcaꞌn tatlahuanīꞌt ixtalaclēꞌiꞌcaꞌn.
\v 13 Aꞌxniꞌcaꞌ Moisés tūnaꞌj ixmaxquīꞌ Dios huan ley, huan tachiꞌxcuhuīꞌt ixtatlahuamāꞌna aꞌntūn tūꞌ tzey. Lāꞌ aꞌyuj tūla ixuancan que xlacaꞌn ixtaꞌaꞌkapālhkānīꞌt huan ley, como tūnaꞌj ixcāmaxquīꞌcanīꞌt huan ley, xlacaꞌn ixtalaclēꞌncus na ixlacapūn Dios.
\v 14 Lāꞌ chuntzaꞌ talīnīlh aꞌyuj xlacaꞌn tūꞌ tatlahualh chu aꞌcxtim aꞌntūn tlahualh Adán, aꞌxniꞌcaꞌ tūꞌ aꞌkahuānaꞌniꞌlh Dios. Por ixpālacata Adán talaclalh ixlīhuākcaꞌn huan tachiꞌxcuhuīꞌt. Lāꞌ Cristo tūꞌ chuntzaꞌ ixuanīꞌt. Lej tzey aꞌntū cātlahuaniꞌlh ixlīhuāk huan tachiꞌxcuhuīꞌt. 
\p
\v 15 Ixtuꞌcaꞌn lej xtuncnuꞌ; tūꞌ chu lakatin. Adán tlahualh talaclēꞌiꞌ. Lāꞌ ūꞌtzaꞌ ixlīhuākcaꞌn tachiꞌxcuhuīꞌt talīnī. Dios ixcālakalhuꞌmankōꞌ huan tachiꞌxcuhuīꞌt. Lāꞌ chuhuaꞌj tzē natapūtaxtu por ixpālacata Jesucristo. Lāꞌ ūꞌtzaꞌ huaꞌchi lēꞌksajnaꞌ aꞌntū Dios māstāꞌ. 
\v 16 Xtunc aꞌntūn tlahualh Adán. Lāꞌ xtunc aꞌntūn tlahualh Dios. Ixpālacata Adán, como tlahualh talaclēꞌiꞌ, lāꞌ ūꞌtzaꞌ ixtasquiꞌnī nacālīmālaclēꞌnīkōꞌcan ixlīhuākcaꞌn tachiꞌxcuhuīꞌt. Lāꞌ como Dios ixcālakalhuꞌman, lhūhuaꞌ aꞌntīn cāmāpānūniꞌcanīꞌttzaꞌ ixtalaclēꞌiꞌcaꞌn. 
\v 17 Kalhatin aꞌntī xapūꞌla lāꞌ chūꞌcus tlahualh talaclēꞌiꞌ. Lāꞌ ūꞌtzaꞌ Adán. Lāꞌ ūꞌtzaꞌ talīnīkōꞌ ixlīhuākcaꞌn tachiꞌxcuhuīꞌt. Lāꞌ xtunc aꞌntū tlahualh āꞌchāꞌtin chiꞌxcuꞌ aꞌntī huanican Jesucristo. Por ixpālacata Jesucristo, Dios cālakalhuꞌmalh huan tachiꞌxcuhuīꞌt lāꞌ Dios cāmāpānūniꞌ ixtalaclēꞌiꞌcaꞌn lāꞌ nā cāmaxquīꞌ xasāstiꞌ ixquilhtamacujcaꞌn.
\p
\v 18 Chuntzaꞌ ixlīhuākcaꞌn nacāmālaclēꞌnīkōꞌcan por ixpālacata lakatin talaclēꞌiꞌ aꞌntūn tlahualh Adán. Lāꞌ nā chuntzaꞌ por ixpālacata tlahuaca catūhuā aꞌntūn tzey, chuntzaꞌ ixlīhuākcaꞌn tzē nacāmāpānūniꞌcan ixtalaclēꞌiꞌcaꞌn lāꞌ tzē natakaꞌlhī xasāstiꞌ ixquilhtamacujcaꞌn. 
\v 19 Adán tūꞌ aꞌkahuānaꞌniꞌlh Dios lāꞌ ūꞌtzaꞌ talīlaclēꞌn ixlīhuāk tachiꞌxcuhuīꞌt. Lāꞌ Jesucristo, xlaꞌ aꞌkahuānaꞌniꞌlh Dios lāꞌ ūꞌtzaꞌ ixlīhuākcaꞌn tzē nacālīmāpānūniꞌkōꞌcan ixtalaclēꞌiꞌcaꞌn.
\p
\v 20 Dios māstāꞌlh huan ley. Lāꞌ huāꞌmāꞌ ley āꞌchulāꞌ māsuꞌyulh palh quinaꞌn ixtlahuayāuj aꞌntūn tūꞌ tzey. Lāꞌ aꞌyuj āꞌchulāꞌ ixtlahuayāuj aꞌntūn tūꞌ tzey, āꞌchulāꞌ Dios quincālakalhuꞌmanāniꞌ.
\v 21 Xapūꞌla quilīhuākcaꞌn ixtlahuayāuj aꞌntūn tūꞌ tzey. Lāꞌ ūꞌtzaꞌ lītasquiꞌnī que nanīkōꞌyāuj. Lāꞌ chuhuaꞌj como Dios lej lakalhuꞌmanaꞌn, tzē nakaꞌlhīyāuj xasāstiꞌ quinquilhtamacujcaꞌn para pōꞌktu. Lāꞌ Dios naquincāmāpānūniꞌyāniꞌ quintalaclēꞌiꞌcaꞌn por ixpālacata quiMāpaꞌksīniꞌcaꞌn Jesucristo.
\c 6
\s Aꞌntīn tatāꞌtapaꞌksī Cristo, xlacaꞌn tūꞌtzaꞌ cāmāpaꞌksī aꞌntū xakoꞌhuaꞌjuaꞌ
\p
\v 1 Lasāꞌ kalhatin nahuan que mejor natlahuayāuj āꞌchulāꞌ aꞌntūn tūꞌ tzey lāꞌ chuntzaꞌ āꞌchulāꞌ Dios nalakalhuꞌmanaꞌn. 
\v 2 Huāꞌmāꞌ quinaꞌn tūla catihuáuj chuntzaꞌ. Quinaꞌn makxteknīꞌtaꞌujtzaꞌ natlahuayāuj aꞌntūn tūꞌ tzey. Tūlatzaꞌ natlahuatāꞌkchokoyāuj aꞌntūn tūꞌ tzey. 
\v 3 Lāꞌ huiꞌxinaꞌn caꞌtzīyāꞌtit que quilīhuākcaꞌn aꞌntīn tapaꞌksīyāuj con Cristo, chu lakatin lauj con xlaꞌ. Huaꞌchilh ixtāꞌnīnīꞌtaꞌuj Cristo.
\v 4 Lāꞌ aꞌxniꞌcaꞌ aꞌkpaxāuj, huaꞌchilh tāꞌtāꞌcnūyāuj Cristo. Lāꞌ huaꞌchilh tāꞌlakahuanchokonīꞌtaꞌujtzaꞌ con Cristo por ixlīmāpaꞌksīn Dios quinTātaꞌcaꞌn. Lāꞌ chuhuaꞌj kaꞌlhīyāuj xasāstiꞌ quinquilhtamacujcaꞌn. 
\p
\v 5 Lāꞌ como chu lakatin tāꞌlanīꞌtaꞌuj con Cristo chuntzaꞌ huaꞌchilh ixtāꞌnīnīꞌtaꞌuj. Lāꞌ como Cristo lakahuanchokolh, quinaꞌn nā kaꞌlhīyāuj xasāstiꞌ quinquilhtamacujcaꞌn. 
\v 6 Caꞌtzīyāuj que taxtāpalīnīꞌtaꞌujtzaꞌ. Xapūꞌla ixtlahuatlāꞌhuanāuj aꞌntūn tūꞌ tzey. Lāꞌ chuhuaꞌj huaꞌchilh ixquincātāꞌtaxtokohuaꞌcaꞌnīꞌtaꞌniꞌ con Cristo. Lāꞌ chuntzaꞌ tzē nalatāꞌkchokoyāujtzaꞌ xtunc. Tūꞌtzaꞌ quincāmāpaꞌksīyāniꞌ aꞌntū xakoꞌhuaꞌjuaꞌ. 
\v 7 Kalhatin aꞌntī xanīntzaꞌ tūꞌtzaꞌ tlahua aꞌntūn tūꞌ tzey. Lāꞌ nā quinaꞌn tūꞌtzaꞌ quincāmāpaꞌksīyāniꞌ aꞌntūn tūꞌ tzey.
\v 8 Huaꞌchilh ixtāꞌnīnīꞌtaꞌuj Cristo, lāꞌ huaꞌchilh ixtāꞌlakahuanchokonīꞌtaꞌujtzaꞌ Cristo.
\v 9 Caꞌtzīyāuj que Cristo lakahuanchokolh. Lāꞌ tūꞌtzaꞌ maktin catinīlh. Xlaꞌ natahuiꞌla para pōꞌktu.
\v 10 Cristo xmān maktin nīlh por ixtalaclēꞌiꞌcaꞌn huan tachiꞌxcuhuīꞌt. Lāꞌ chuhuaꞌj Cristo huīꞌ. Lāꞌ xlaꞌ tlahuamāꞌ ixtapuhuān Dios.
\v 11 Calīhuiꞌlīꞌtit de que tūꞌtzaꞌ natlahuaꞌyāꞌtit aꞌntūn tūꞌ tzey. Kaꞌlhīꞌyāꞌtittzaꞌ xasāstiꞌ minquilhtamacujcaꞌn por ixpālacata quiMāpaꞌksīniꞌcaꞌn Jesucristo. Lāꞌ chuhuaꞌj calatāꞌkchokotit chu aꞌnchī ixtapuhuān Dios.
\p
\v 12 Tūꞌtzaꞌ catamakxtektit nacātamāpaꞌksīyāniꞌ aꞌntū koꞌhuaꞌjuaꞌ. Tūꞌtzaꞌ catlahuaꞌtit aꞌntū ixtapuhuān mimacniꞌcaꞌn aꞌntūn tūꞌ tzey.
\v 13 Tūꞌ catamakxtektit que mintapāstacnaꞌcaꞌn nacāmātlahuīyāniꞌ aꞌntūn tūꞌ tzey. Camakxtektit que Dios nacāmāpaꞌksīyāniꞌ. Lāꞌ como kaꞌlhīꞌyāꞌtittzaꞌ xasāstiꞌ minquilhtamacujcaꞌn, catlahuaꞌtit ixtapuhuān Dios.
\v 14 Tūꞌtzaꞌ nacāmāpaꞌksīyāniꞌ aꞌntūn tūꞌ tzey. Tūꞌtzaꞌ līpāhuanāuj huan ley. Līpāhuanāuj xmān ixtalakalhuꞌmān Dios.
\s Aꞌntū lītalacastuca aꞌntīn tamakscuja
\p
\v 15 Aꞌyuj tūꞌtzaꞌ līpāhuanāuj huan ley, quinaꞌn tūla tlahuayāuj aꞌntūn tūꞌ tzey.
\v 16 Huiꞌxinaꞌn caꞌtzīyāꞌtit que palh kaꞌlhīꞌyāꞌtit kalhatin jefe, kaꞌlhī natlahuaꞌyāꞌtit aꞌntū nahuan xlaꞌ. Lāꞌ nā chuntzaꞌ xlacaꞌn aꞌntīn tatamakxteka nacāmāpaꞌksī aꞌntū koꞌhuaꞌjuaꞌ, xlacaꞌn kaꞌlhī natatlahua aꞌntūn tūꞌ tzey. Lāꞌ aꞌntīn tatlahua aꞌntūn tūꞌ tzey kaꞌlhī que natanī. Lāꞌ xlacaꞌn aꞌntīn tatamakxteka nacāmāpaꞌksī Dios, xlacaꞌn natatlahua aꞌntū Dios lacasquiꞌn.
\v 17 Lāꞌ quit icmaxquīꞌ pāxcatcaꞌtzī Dios por mimpālacatacaꞌn. Chuhuaꞌj huiꞌxinaꞌn tlahuaꞌpāꞌnaꞌntit aꞌntūn cātamāsuꞌniꞌniꞌ lāꞌ aꞌntū maklhtīniꞌntit. Lāꞌ tūꞌtzaꞌ cāmāpaꞌksīyāniꞌ aꞌntūn koꞌhuaꞌjuaꞌ.
\v 18 Lāꞌ como makxteknīꞌtaꞌntittzaꞌ aꞌntūn koꞌhuaꞌjuaꞌ, chuhuaꞌj tlahuaꞌcuꞌtunāꞌtit aꞌntū xatzey.
\v 19 Chuntzaꞌ icchihuīnaꞌn quit para que huiꞌxinaꞌn namāchekxīyāꞌtit. Xapūꞌla huiꞌxinaꞌn tamakxtektit que nacāmāpaꞌksīyāniꞌ aꞌntū koꞌhuaꞌjuaꞌ. Lāꞌ āꞌchulāꞌ ixtlahuaꞌpāꞌnaꞌntit aꞌntū koꞌhuaꞌjuaꞌ. Lāꞌ chuhuaꞌj catamakxtektit que Dios nacāmāpaꞌksīyāniꞌ. Lāꞌ āꞌchulāꞌ natlahuatēlhaꞌyāꞌtit aꞌntū lej tzey.
\p
\v 20 Xapūꞌla aꞌxniꞌcaꞌ ixcāmāpaꞌksīyāniꞌ aꞌntū xakoꞌhuaꞌjuaꞌ, huiꞌxinaꞌn tūla ixtlahuayāꞌtit aꞌntūn tzey.
\v 21 Chuhuaꞌj līmāxanaꞌnāꞌtit aꞌntū ixtlahuaꞌyāꞌtit xapūꞌla. Lāꞌ aꞌntū ixtlahuaꞌyāꞌtit xapūꞌla, nīn tuntūꞌ ixlīmaclacasquiꞌnāꞌtit. Lāꞌ aꞌntī tatlahua huāꞌmāꞌ, xlacaꞌn natanī.
\v 22 Lāꞌ chuhuaꞌj como Dios cāmāpaꞌksīyāniꞌ huiꞌxinaꞌn, chuntzaꞌ taxtunquīnīꞌtaꞌntit de aꞌntū koꞌhuaꞌjuaꞌ. Lāꞌ chuhuaꞌj tzētzaꞌ natlahuaꞌyāꞌtit aꞌntūn tzey. Lāꞌ kaꞌlhīꞌyāꞌtittzaꞌ xasāstiꞌ minquilhtamacujcaꞌn aꞌntū para pōꞌktu.
\v 23 Xlacaꞌn aꞌntī cāmāpaꞌksī aꞌntū koꞌhuaꞌjuaꞌ, xlacaꞌn natamaklhtīniꞌn aꞌntū huaꞌchi ixtatlajcaꞌn, lāꞌ ūꞌtzaꞌ huan līnīn. Dios quincāmaxquīꞌyāniꞌ aꞌntū huaꞌchi lēꞌksajnaꞌ, lāꞌ ūꞌtzaꞌ xasāstiꞌ quinquilhtamacujcaꞌn aꞌntū para pōꞌktu. Ixlīhuākcaꞌn aꞌntīn takalhlakaꞌīꞌ que quiMāpaꞌksīniꞌcaꞌn Jesucristo tzē māpūtaxtūnuꞌn, xlacaꞌn cāmaxquīꞌcan xasāstiꞌ ixquilhtamacujcaꞌn para pōꞌktu.
\c 7
\s Aꞌntū lītalacastuca huan puscāt aꞌntīn tapūchahualhtzaꞌ 
\p
\v 1 Huiꞌxinaꞌn tāꞌtimīn, lakapasāꞌtit huan ley. Caꞌtzīyāꞌtit que kalhatin chiꞌxcuꞌ natlahua aꞌntū huan huan ley, līhuan lahuīꞌ nac quilhtamacuj. Lāꞌ aꞌxniꞌcaꞌ xlaꞌ nīnīꞌttzaꞌ, huan ley tūꞌtzaꞌ māpaꞌksī.
\v 2 Lāꞌ kalhatin puscāt aꞌntīn tapūchahuanīꞌttzaꞌ, xlaꞌ kaꞌlhī ixkōluꞌ līhuan huan chiꞌxcuꞌ lahuīꞌ nac quilhtamacuj. Chuntzaꞌ huan huan ley. Lāꞌ palh huan chiꞌxcuꞌ nī, lāꞌ chuntzaꞌ huan puscāt tūꞌtzaꞌ kaꞌlhī ixkōluꞌ. Chuntzaꞌ huan huan ley.
\v 3 Lāꞌ palh huan puscāt kaꞌlhī ixmakchiꞌxcuꞌ lāꞌ palh kaꞌlhīcus ixkōluꞌ, chuntzaꞌ xlaꞌ tlahua talākalhīꞌn. Lāꞌ palh nī ixkōluꞌ, huan ley namakxteka natapūchahuapala. Lāꞌ xlaꞌ aꞌyuj tapūchahuapala, chuntzaꞌ tūꞌ tlahua talākalhīꞌn.
\p
\v 4 Lāꞌ huiꞌxinaꞌn tāꞌtimīn, huaꞌchilh ixnīnīꞌtaꞌntit con Cristo. Lāꞌ ūꞌtzaꞌ lītapalalhtzaꞌ aꞌntū ixlaclīpināꞌtit chu aꞌnchī huan ley. Lāꞌ chuhuaꞌj huan ley tūꞌtzaꞌ cāmāpaꞌksīyāniꞌ. Chuhuaꞌj tapaꞌksīyāꞌtit con Cristo. Lāꞌ xlaꞌ lakahuanchokonīꞌttzaꞌ. Lāꞌ tzētzaꞌ nalatahuiꞌlaꞌyāꞌtit chu aꞌnchī Dios lacasquiꞌn.
\v 5 Aꞌxniꞌcaꞌ tūnaꞌj tapaꞌksīyāuj con Dios, quinaꞌn ixlatlāꞌhuanāuj chu aꞌnchī xakoꞌhuaꞌjuaꞌ quintapāstacnaꞌcaꞌn. Lāꞌ aꞌxniꞌcaꞌ lakapasui ixley Dios, āꞌchulāꞌ ixtlahuayāuj talaclēꞌiꞌ. Lāꞌ aꞌntīn tatlahua huāꞌ tamāꞌna catūhuā, xlacaꞌn natanī.
\v 6 Lāꞌ chuhuaꞌj huan ley tūꞌtzaꞌ quincāmāpaꞌksīyāniꞌ, como huaꞌchilh tāꞌnīnīꞌtaꞌujtzaꞌ Cristo. Xapūꞌla ixquincātasāmākalhlakaꞌīꞌnīyāniꞌ huan ley. Chuhuaꞌj aꞌkahuānaꞌniꞌyāuj Dios como kaꞌlhīyāuj xasāstiꞌ quinquilhtamacujcaꞌn. Lāꞌ ūꞌtzaꞌ lītlahuacuꞌtunāuj ixtapuhuān Dios.
\s Huan tachiꞌxcuhuīꞌt ixaꞌcstucaꞌn tūla tamakxteka antūn tūꞌ tzey
\p
\v 7 Tzēlasāꞌ huiꞌxinaꞌn nahuaꞌnāꞌtit que tūꞌ tzey huan ley. Chuntzaꞌ tūꞌ stuꞌncuaꞌ. Huan ley quincāmāsuꞌniꞌyāniꞌ aꞌnchī huanīꞌt huan talaclēꞌiꞌ. Huan ley huan:
\q Tūꞌ tilakcaꞌtzanaꞌ aꞌntū ixlaꞌ āꞌchāꞌtin.
\m Lāꞌ ūꞌtzaꞌ līcaꞌtzīyāuj que ūꞌtzaꞌ huāꞌmāꞌ talaclēꞌiꞌ.
\v 8 Lāꞌ aꞌxniꞌcaꞌ iccaꞌtzīlh huāꞌmāꞌ līmāpaꞌksīn, āꞌchulāꞌ xaꞌiclakcaꞌtzan aꞌntū ixlaꞌ āꞌchāꞌtin. Aꞌxniꞌcaꞌ tūnaꞌj ixlakapascan huan ley, tūꞌ ixcaꞌtzīcan aꞌnchī huanīꞌt huan talaclēꞌiꞌ.
\v 9 Aꞌxniꞌcaꞌ tūnaꞌj xaꞌicmāchekxī huan ixley Dios, quit xaꞌicpuhuan palh xaꞌnca xaꞌiclatlāꞌhuan. Lāꞌ aꞌxniꞌcaꞌ icmāchekxīlh huāꞌmāꞌ līmāpaꞌksīn, iccaꞌtzīlh palh xaꞌiclaclēꞌn na ixlacapūn Dios. Lāꞌ chuntzaꞌ Dios naquimāpātīnī.
\v 10 Huan ley quincāmāsuniꞌnīꞌtaꞌniꞌ para que līlacatejtin natahuiꞌlayāuj. Lāꞌ quit quimāsuꞌniꞌlh huan ley que xaꞌiclaclēꞌn lāꞌ ūꞌtzaꞌ Dios ixquilīmālaclēꞌnīlh. 
\v 11 Quiꞌaꞌkxokoca por ixpālacata talaclēꞌiꞌ. Uꞌtzaꞌ iclīpuhualh quit que tzē ictlōkentaxtūkōꞌ ixley Dios. Huan ley quimāsuꞌniꞌlh que Dios naquimālaclēꞌnī por ixpālacata quintalaclēꞌiꞌ, como tūlalh ictlōkentaxtūkōꞌlh huan ley.
\p
\v 12 Ixley Dios lej tzey. Lāꞌ tzey huāk aꞌntū huan ley māpaꞌksī.
\v 13 Aꞌyuj ixley Dios lej tzey, ūꞌtzaꞌ huāꞌmāꞌ aꞌntū quimāsuꞌniꞌlh palh xaꞌiclaclēꞌn. Lāꞌ nā quimāsuꞌniꞌlh palh lej koꞌhuaꞌjuaꞌ aꞌntū xaꞌictlahuamāꞌ lāꞌ ūꞌtzaꞌ ixquilīmāpātīnīlh Dios.
\p
\v 14 Caꞌtzīyāuj que huan ley ixlaꞌ Dios lāꞌ lej tzey. Lāꞌ quit tūꞌ tzey xaꞌicuanīꞌt como xaꞌictlahua aꞌntūn tūꞌ tzey, chuntzaꞌ huaꞌchi ixlīhuāk huan tachiꞌxcuhuīꞌt. 
\v 15 Quit tūꞌ xaꞌicmāchekxī aꞌntū xaꞌictlahua. Aꞌyuj quit tūꞌ xaꞌictlahuacuꞌtun aꞌntūn tūꞌ tzey, ūꞌtzaꞌ xaꞌictlahua. Lāꞌ aꞌyuj quit xaꞌictlahuacuꞌtun aꞌntūn tzey, lāꞌ tūꞌ xaꞌictlahua.
\v 16 Lāꞌ como quit tūꞌ xaꞌictlahuacuꞌtun aꞌntūn tūꞌ tzey, ūꞌtzaꞌ lītasuꞌyu palh quit xaꞌicpuhuan lej xatzey huan ley.
\v 17 Lāꞌ aꞌyuj quit tūꞌ xaꞌictlahuacuꞌtun aꞌntūn tūꞌ tzey, huan xakoꞌhuaꞌjuaꞌ quintapāstacnaꞌ ūꞌtzaꞌ ixquimātlahuī aꞌntūn tūꞌ tzey.
\v 18 Xaꞌiccaꞌtzī que quit quēꞌcstu tūla xaꞌictlahua aꞌntūn tzey. Lāꞌ ūꞌtzaꞌ tūla xaꞌictlahua aꞌntūn tzey, aꞌyuj chuntzaꞌ xaꞌictlahuacuꞌtun aꞌntū xatzey. 
\v 19 Lāꞌ aꞌyuj xaꞌictlahuacuꞌtun aꞌntūn tzey, chuntzaꞌ tūꞌ xaꞌictlahua. Lāꞌ aꞌyuj tūꞌ xaꞌictlahuacuꞌtun aꞌntūn koꞌhuaꞌjuaꞌ, chuntzaꞌ xaꞌictlahua.
\v 20 Huaꞌchilh quintapāstacnaꞌ xakoꞌhuaꞌjuaꞌ aꞌntū ixtlahuamāꞌ aꞌntūn tūꞌ tzey, lāꞌ huaꞌchilh tūꞌ quit, como quit tūꞌ xaꞌictlahuacuꞌtun aꞌntū koꞌhuaꞌjuaꞌ.
\p
\v 21 Pōꞌktu chuntzaꞌ ixuanīꞌt. Aꞌxniꞌcaꞌ quit xaꞌictlahuacuꞌtun aꞌntūn tzey, xmān tzē xaꞌictlahua aꞌntūn tūꞌ tzey. 
\v 22 Quit xaꞌnca xaꞌiccaꞌtzī que lej tzey ixley Dios. Lāꞌ xaꞌiclīpāxuhua aꞌxniꞌcaꞌ icpāstacli huāꞌmāꞌ ley.
\v 23 Lāꞌ aꞌyuj xaꞌictlahuacuꞌtun aꞌntū huan ixley Dios, huaꞌchi āꞌlakatin līmāpaꞌksīn ixmāpaꞌksīmāꞌ quimacniꞌ. Huāꞌmāꞌ līmāpaꞌksīn ixtāꞌcaꞌtza ixley Dios. Quit huaꞌchilh xatachīꞌn xaꞌicuanīꞌt, como tūla xaꞌicmakxteka de ictlahua aꞌntūn tūꞌ tzey.
\p
\v 24 Icxantila quit. Tūla xaꞌicpūtaxtu de ixlīmāpaꞌksīn aꞌntūn tūꞌ tzey. Lāꞌ ¿tichū tzē namāpūtaxtū kalhatin de huan līmāpaꞌksīn aꞌntū koꞌhuaꞌjuaꞌ? 
\v 25 Dios ūꞌtzaꞌ aꞌntīn tzē namāpūtaxtūnuꞌn por ixpālacata quiMāpaꞌksīniꞌcaꞌn Jesucristo. Xapūꞌla quimacniꞌ ixtlahuacuꞌtun aꞌntū ixlacasquiꞌn huan xakoꞌhuaꞌjuaꞌ līmāpaꞌksīn, aꞌyuj quit xaꞌictlōkentaxtūcuꞌtun ixley Dios. Lāꞌ chuhuaꞌj Dios quimāpūtaxtūnīꞌt de huāꞌmāꞌ līmāpaꞌksīn. Lāꞌ ūꞌtzaꞌ iclīmaxquīꞌ Dios pāxcatcaꞌtzī.
\c 8
\s Huan Espíritu Santo cāmaxquīꞌ xasāstiꞌ ixquilhtamacujcaꞌn aꞌntīn takalhlakaꞌīꞌ
\p
\v 1 Lāꞌ chuhuaꞌj tūꞌtzaꞌ caticāmālaclēꞌnīlh Dios xlacaꞌn aꞌntīn talīpāhuan Cristo lāꞌ talatlāꞌhuan chu aꞌnchī ixtapuhuān huan Espíritu Santo lāꞌ tūꞌtzaꞌ talatlāꞌhuan chu aꞌnchī ixtapāstacnaꞌcaꞌn koꞌhuaꞌjuaꞌ. 
\v 2 Lāꞌ huan Espíritu Santo kaꞌlhī līmāpaꞌksīn. Lāꞌ ūꞌtzaꞌ tzē cālīmaxquīꞌ xasāstiꞌ ixquilhtamacujcaꞌn aꞌntīn takalhlakaꞌīꞌ que Cristo Jesús māpūtaxtūnuꞌn. Lāꞌ quilakmāxtulh de huan xakoꞌhuaꞌjuaꞌ līmāpaꞌksīn aꞌntū ixquimātlahuī aꞌntūn tūꞌ tzey. Lāꞌ chuntzaꞌ Dios tūꞌtzaꞌ quintimālaclēꞌnīlh.
\v 3 Ixley Dios tūla catimāpūtaxtūlh catīhuā, como tintīꞌ aꞌntīn tzēn tlōkentaxtūkōꞌ huanmāꞌ ley. Dios tlahualh aꞌntū tūla tlahua huan ley. IxOꞌkxaꞌ macamilh para namāpānū huan talaclēꞌiꞌ. Lāꞌ aꞌxniꞌcaꞌ milh, ixtasuꞌyu huaꞌchi kalhatin de quinaꞌn. Xmān xlaꞌ tūꞌ tlahualh aꞌntūn tūꞌ tzey huaꞌchi quinaꞌn. Xlaꞌ māpalalh aꞌntū quinaꞌn ixlaclēꞌnāuj. Lāꞌ chuntzaꞌ quincālīmāpūtaxtūniꞌ de huan xakoꞌhuaꞌjuaꞌ līmāpaꞌksīn aꞌntū ixquincāmātlahuīyāniꞌ aꞌntūn tūꞌ tzey.
\v 4 Lāꞌ chuntzaꞌ līlatlāꞌhuanāujtzaꞌ chu aꞌnchī ixley Dios como tlahuayāuj aꞌntūn quincāmācaꞌtzīnīyāniꞌ huan Espíritu Santo. Lāꞌ tūꞌtzaꞌ latlāꞌhuanāuj chu aꞌnchī xakoꞌhuaꞌjuaꞌ quintapāstacnaꞌcaꞌn.
\p
\v 5 Aꞌntīn tatlahuacuꞌtun chu aꞌnchī xakoꞌhuaꞌjuaꞌ ixtapāstacnaꞌcaꞌn, xlacaꞌn talēꞌcaꞌaꞌn tatlahua aꞌntūn tūꞌ tzey. Lāꞌ aꞌntīn tatlahuacuꞌtun aꞌntū cāmāpuhuanī huan Espíritu Santo, xlacaꞌn talēꞌcaꞌaꞌn tatlahua aꞌntū lacasquiꞌn Dios.
\v 6 Aꞌntīn talatlāꞌhuan chu aꞌnchī xakoꞌhuaꞌjuaꞌ ixtapāstacnaꞌcaꞌn, xlacaꞌn nacāmālaclēꞌnī Dios. Lāꞌ aꞌntīn talatlāꞌhuan chu aꞌnchī ixtapuhuān Dios, xlacaꞌn takaꞌlhī xasāstiꞌ ixquilhtamacujcaꞌn lāꞌ tzaꞌtaꞌtaꞌ ixaꞌclhcunuccaꞌn. 
\v 7 Huāk ixtāꞌcaꞌtza Dios aꞌntīn talatlāꞌhuan chu aꞌnchī xakoꞌhuaꞌjuaꞌ ixtapāstacnaꞌcaꞌn. Tūꞌ tatlahua aꞌntū huan ixley Dios. Lāꞌ aꞌyuj ixtatlahuacuꞌtulh, tūlalh ixtitatlahualh.
\v 8 Lāꞌ aꞌntīn talatlāꞌhuan chu aꞌnchī xakoꞌhuaꞌjuaꞌ ixtapāstacnaꞌcaꞌn, xlacaꞌn tūla tamāpāxuhuī Dios. 
\p
\v 9 Huiꞌxinaꞌn tūꞌtzaꞌ latlāꞌhuaꞌnāꞌtit chuntzaꞌ. Huiꞌxinaꞌn latlāꞌhuaꞌnāꞌtittzaꞌ chu aꞌnchī ixtapuhuān huan Espíritu Santo, como huan Espíritu Santo cātāꞌlahuiꞌlāniꞌ huiꞌxinaꞌn. Lāꞌ aꞌntīn tūꞌ takaꞌlhī huan Espíritu Santo, xlacaꞌn tūꞌ tatapaꞌksī con Cristo.
\v 10 Lāꞌ quinaꞌn, Cristo quincātāꞌlahuiꞌlāniꞌ. Quimacniꞌcaꞌn natanī, como quilīhuākcaꞌn tlahuanīꞌtaꞌuj talaclēꞌiꞌ. Lāꞌ aꞌyuj quimacniꞌcaꞌn natanī, quinaꞌn kaꞌlhīyāuj xasāstiꞌ quinquilhtamacujcaꞌn, como Dios quincāmāpānūniꞌnīꞌtaꞌniꞌ quintalaclēꞌiꞌcaꞌn.
\v 11 Dios mālakahuanīchokonīꞌt Jesús. Lāꞌ aꞌyuj nanīyāuj, Dios naquincāmālakahuanīchokoyāniꞌ quinaꞌn como huan Espíritu Santo quincātāꞌlahuiꞌlāniꞌ.
\p
\v 12 Lāꞌ chuhuaꞌj tāꞌtimīn, tūꞌtzaꞌ catlahuáuj huaꞌchi xapūꞌla aꞌntū xakoꞌhuaꞌjuaꞌ quintapāstacnaꞌcaꞌn. 
\v 13 Aꞌntīn talatlāꞌhuan chu aꞌnchī xakoꞌhuaꞌjuaꞌ ixtapāstacnaꞌcaꞌn, Dios nacāmālaclēꞌnī. Lāꞌ aꞌntīn tamakxteknīꞌttzaꞌ natatlahua chu aꞌnchī xakoꞌhuaꞌjuaꞌ ixtapāstacnaꞌcaꞌn, como huan Espíritu Santo cāmaktāya, xlacaꞌn para pōꞌktu natalatahuiꞌla.
\p
\v 14 Ixlīhuākcaꞌn aꞌntīn tatlahua aꞌntū cāmāpuhuanī huan Espíritu Santo, xlacaꞌn huāk ixcamanaꞌ Dios.
\v 15 Chuhuaꞌj kaꞌlhīyāuj huan Espíritu Santo. Lāꞌ tūꞌtzaꞌ jicuaꞌniꞌyāuj Dios, huaꞌchi kalhatin mozo aꞌntī caꞌtzancaꞌtzī ixjefe. Caꞌtzīyāuj que quinaꞌn ixcamanaꞌ Dios. Lāꞌ ūꞌtzaꞌ tzē nalīhuaniyāuj: “Dios quinTātaꞌcaꞌn”.
\v 16 Huan Espíritu Santo quincāmācaꞌtzīnīyāniꞌ palh quinaꞌn ixcamanaꞌ Dios.
\v 17 Lāꞌ como quinaꞌn ixcamanaꞌ Dios, chuntzaꞌ quinaꞌn namaklhtīniꞌnāuj aꞌntū Dios nacāmaxquīꞌ ixcamanaꞌ. Lāꞌ aꞌntū maxquīꞌcan Cristo nā quinaꞌn quilacaꞌn nala. Cristo lej pātīniꞌlh. Lāꞌ nā chuntzaꞌ quinaꞌn kaꞌlhī que napātīniꞌnāuj. Lāꞌ chuntzaꞌ aꞌntū namaxquīꞌcan Cristo, lāꞌ nā ūꞌtzaꞌ naquincātamaxquīꞌyāniꞌ. 
\p
\v 18 Chuhuaꞌj lej pātīniꞌmāꞌnauj. Lāꞌ āꞌcalīstān aꞌxniꞌcaꞌ napāxuhuayāuj nac aꞌkapūn nahuanāuj que tūꞌ lej pātīniꞌuj. Chuntzaꞌ icpuhuan quit.
\v 19 Ixlīhuāk aꞌntū aꞌnan nac quilhtamacuj lej takaꞌlhīmāꞌna hasta que Dios namāsuꞌyu aꞌntī ixcamanaꞌ.
\v 20 Ixlīhuāk aꞌntū aꞌnan nac quilhtamacuj kaꞌlhī que natamasa. Chuntzaꞌ Dios māpaꞌksīniꞌlh. Lāꞌ Dios puhuanīꞌt que nalacāxtlahuapala.
\v 21 Dios namāsāstīꞌkōꞌ ixlīhuāk aꞌntū aꞌnan nac quilhtamacuj aꞌxniꞌcaꞌ nacāmaxquīꞌ ixcamanaꞌ aꞌntū lej xalactzey.
\v 22 Caꞌtzīyāuj que ixlīhuāk huan quilhtamacuj huaꞌchilh ixuaꞌntliꞌjli huaꞌchi kalhatin puscāt aꞌxniꞌcaꞌ nalacatuncuītzaꞌ ixcaman.
\v 23 Lāꞌ aꞌyuj quinaꞌn kaꞌlhīyāujtzaꞌ huan Espíritu Santo, huaꞌchilh nā ixuaꞌntliꞌjui como kaꞌlhīmāꞌnauj hasta que aꞌxniꞌcaꞌ Dios naquincāmāsāstīꞌniꞌyāniꞌ quimacniꞌcaꞌn lāꞌ nā namāsuꞌyu que quinaꞌn ixcamanaꞌ Dios. Lāꞌ kaꞌlhīmāꞌnauj hasta que aꞌxniꞌcaꞌ Dios nacāmaxquīꞌ ixcamanaꞌ aꞌntū lej xalactzey.
\v 24 Como quinaꞌn quincātamāpūtaxtūnīꞌtaꞌniꞌtzaꞌ, kaꞌlhīmāꞌnaujcus aꞌntū Dios naquincāmaxquīꞌpalayāniꞌ aꞌntū lactzey. Palh kalhatin kaꞌlhītzaꞌ catūhuā, xlaꞌ tūꞌtzaꞌ kaꞌlhīmāꞌ huāꞌmāꞌ. Lāꞌ como sputacus aꞌntū Dios naquincāmaxquīꞌyāniꞌ, lāꞌ ūꞌtzaꞌ kaꞌlhīmāꞌnauj. 
\v 25 Lāꞌ como caꞌtzīyāuj que Dios naquincāmaxquīꞌyāniꞌ aꞌntūn tūnaꞌj kaꞌlhīyāuj, chuntzaꞌ līlacatzucu kaꞌlhīmāꞌnauj.
\p
\v 26 Lāꞌ huan Espíritu Santo quincāmaktāyayāniꞌ aꞌxniꞌcaꞌ tūla tlahuayāuj aꞌntū tasquiꞌnī natlahuayāuj. Aꞌxniꞌcaꞌ kalhtōꞌkaꞌyāuj, quinaꞌn tūꞌ caꞌtzīyāuj aꞌntūn tasquiꞌnī nasquiꞌniꞌyāuj Dios. Lāꞌ huan Espíritu Santo quincāmācaꞌtzīnīyāniꞌ aꞌntū tasquiꞌnī nasquiꞌniꞌyāuj. Lāꞌ nā quincāmāꞌuꞌcxcaꞌtzīnīyāniꞌ aꞌntūn tūla līchihuīnaꞌnāuj.
\v 27 Lāꞌ Dios cālaktzīꞌn quiꞌaꞌclhcunuccaꞌn. Lāꞌ xlaꞌ māchekxī aꞌntū quincāmāꞌuꞌcxcaꞌtzīnīyāniꞌ huan Espíritu Santo, como huan Espíritu Santo squiꞌn chu aꞌnchī ixtapuhuān Dios. Lāꞌ huan Espíritu Santo squiꞌniꞌ Dios por quinaꞌn, como quinaꞌn tapaꞌksīyāuj con Dios.
\s Ixlīhuāk nalītaxtuyāchaꞌ para ixtachiꞌxcuhuīꞌt Dios
\p
\v 28 Quinaꞌn caꞌtzīyāuj que ixlīhuāk aꞌntū quincāpātleꞌkeniꞌyāniꞌ, ixlīhuāk nalītaxtuyāchaꞌ aꞌntū lej tzey para quilīhuākcaꞌn aꞌntī pāxquīꞌyāuj Dios. Dios quincātaꞌsaniꞌniꞌ chu aꞌnchī ixpātuncaꞌtzi como lacasquiꞌn que nalayāuj lej lactzey chu aꞌnchī ixtapuhuān.
\v 29 Xapūꞌla Dios ixquincālakapasāniꞌ quinaꞌn aꞌntī ixcamanaꞌ. Lāꞌ ixquincātlahuacuꞌtunāniꞌ xalacuan huaꞌchi Jesucristo, ixOꞌkxaꞌ Dios. Lāꞌ chuntzaꞌ Jesucristo xlaꞌ huaꞌchi quimpuxcuꞌcaꞌn quilīhuākcaꞌn tāꞌtimīn. 
\v 30 Dios quincātaꞌsaniꞌniꞌ como ixpuhuanīꞌt pūꞌla de quinaꞌn. Lāꞌ quincāmāpānūniꞌniꞌ quintalaclēꞌiꞌcaꞌn. Lāꞌ xlaꞌ natāꞌlatahuiꞌlayāuj nac aꞌkapūn.
\p
\v 31 Lāꞌ chuhuaꞌj como Dios quincātlahuaniꞌnīꞌtaꞌniꞌ ixlīhuāk huāꞌmāꞌ, caꞌtzīyāuj que tūlalh quinticātatlajaniꞌ aꞌntī quincātatāꞌlāstaꞌlayāniꞌ como Dios pōꞌktu quincāmaktāyamāꞌniꞌ.
\v 32 Dios, aꞌyuj lej caꞌtzaniꞌlh, macamilh ixOꞌkxaꞌ para nanī por quimpālacatacaꞌn. Lāꞌ como chuntzaꞌ Dios māstāꞌlh ixOꞌkxaꞌ, chuntzaꞌ caꞌtzīyāuj que Dios naquincāmaxquīꞌyāniꞌ ixlīhuāk chu aꞌntū namaclacasquiꞌnāuj.
\v 33 Dios quincātaꞌsaniꞌnīꞌtaꞌniꞌ lāꞌ xapakōꞌnīꞌttzaꞌ quintalaclēꞌiꞌcaꞌn. Lāꞌ chuntzaꞌ nīn tintīꞌ aꞌntī tzē naquincālēꞌksaꞌnīniꞌnāniꞌ.
\v 34 Nīn tintīꞌ tzē naquincāmālaclēꞌnīyāniꞌ, como Cristo māpalakōꞌlh quintalaclēꞌiꞌcaꞌn aꞌxniꞌcaꞌ nīlh. Lāꞌ nā xlaꞌ lakahuanchokolh. Lāꞌ huiꞌlachaꞌ na ixpāxtūcānaꞌj Dios. Lāꞌ squiꞌniꞌmāꞌ Dios por quinaꞌn.
\v 35 Cristo pōꞌktu quincāpāxquīꞌyāniꞌ. Lāꞌ aꞌyuj pātīniꞌnāuj, lāꞌ aꞌyuj tamakchuyīnīꞌtaꞌuj, lāꞌ aꞌyuj quincātamacaputzayāniꞌ lāꞌ aꞌyuj tūꞌ kaꞌlhīyāuj aꞌntū nahuaꞌyāuj, lāꞌ aꞌyuj tūꞌ kaꞌlhīyāuj quiluꞌxuꞌcaꞌn, lāꞌ aꞌyuj scalanaꞌj huiꞌlānaꞌuj, lāꞌ aꞌyuj quincātamaknīcuꞌtunāniꞌ, Cristo pōꞌktu quincāpāxquīꞌyāniꞌ.
\v 36 Tatzoꞌkniꞌ na ixtachihuīn Dios:
\q Como ictapaꞌksīyāuj con huiꞌx quincātamaknīcuꞌtunāniꞌ. 
\q Quinaꞌn huaꞌchi borregos aꞌntū nacāmaknīcan.
\m
\v 37 Lāꞌ aꞌyuj quincātapātleꞌkeniꞌkōꞌmāꞌniꞌ ixlīhuāk huāꞌmāꞌ, ixlīhuāk nalītaxtuyāchaꞌ aꞌntū lej tzey para quinaꞌn. Lāꞌ chuntzaꞌ huaꞌchilh quinaꞌn natlajanaꞌnāuj, como Cristo quincāpāxquīꞌyāniꞌ lāꞌ quincāmaktāyayāniꞌ. 
\v 38 Quit iccaꞌtzī que Dios pōꞌktu quincāpāxquīꞌyāniꞌ aꞌyuj nanīyāuj lāꞌ aꞌyuj huiꞌlānaꞌuj. Lāꞌ nīn tintīꞌ tzē naquincāmāmakxtekēyāniꞌ Dios, nīn ángeles, lāꞌ nīn aꞌntīn takaꞌlhī līmāpaꞌksīn, lāꞌ nīn tuntūꞌ aꞌntū aꞌnan, lāꞌ nīn tuntūꞌ aꞌntū naꞌaꞌnampala.
\v 39 Tuntūꞌ tzē naquincāmāmakxtekēyāniꞌ Dios nīn tuntūꞌ aꞌntū huiꞌlachaꞌ nac aꞌkapūn, lāꞌ nīn tuntūꞌ aꞌntū huīꞌ nac quilhtamacuj. Caꞌtzīyāuj que Dios pōꞌktu quincāpāxquīꞌyāniꞌ como ūꞌtzaꞌ huāꞌmāꞌ aꞌntū quincāmāsuꞌniꞌniꞌ quiMāpaꞌksīniꞌcaꞌn Jesucristo. 
\c 9
\s Dios cālacsacli huan israelitas para natala ixtachiꞌxcuhuīꞌt Dios
\p
\v 1 Stuꞌncuaꞌ aꞌntū naꞌiccāhuaniyāniꞌ. Lāꞌ tūꞌ iccāꞌaꞌkxokomāꞌniꞌ como quit ictapaꞌksī con Cristo. Lāꞌ huan Espíritu Santo laktzīꞌn quiꞌaꞌclhcunuc lāꞌ caꞌtzī que stuꞌncuaꞌ aꞌntū naꞌicuan.
\v 2 Quit iccālīlakaputza quintāꞌisraelitas hasta quincaꞌtzaniꞌ quiꞌaꞌclhcunuc, como xlacaꞌn tūꞌ takalhlakaꞌīꞌ Jesucristo. 
\v 3 Quit xaꞌicpātīniꞌlh por ixpālacatacaꞌn quintāꞌisraelitas lāꞌ xaꞌictaxtunquīniꞌlh de Cristo palh chuntzaꞌ cahuā tzē ixtalīpūtaxtulh quintāꞌisraelitas.
\v 4 Huan israelitas xlacaꞌn īꞌxūꞌyātāꞌnatnaꞌ Israel. Dios cālacsacli para nacātlahua ixtachiꞌxcuhuīꞌt. Lāꞌ Dios cāmāsuꞌniꞌlh ixlīmāpaꞌksīn. Lāꞌ Dios chuntzaꞌ līlacāxuiꞌlīlh lakatin convenio. Lāꞌ cāmaxquīꞌlh huan ley. Lāꞌ cāmāsuꞌniꞌlh aꞌnchī natalīmācāꞌtanī. Lāꞌ cāhuanilh catūhuā aꞌntū lej tzey aꞌntū nacātlahuaniꞌ xlacaꞌn.
\v 5 Lāꞌ xlacaꞌn ixnapapanaꞌcaꞌn huan israelitas aꞌntīn tahuiꞌlānaꞌ chuhuaꞌj. Lāꞌ Cristo, aꞌxniꞌcaꞌ milh nac quilhtamacuj, puꞌnli huaꞌchi israelita. Lāꞌ Cristo māniꞌ ūꞌtzaꞌ Dios aꞌntī māpaꞌksīniꞌnkōꞌ. Lāꞌ ūꞌtzaꞌ mākaꞌtlīꞌcan para pōꞌktu. Amén.
\p
\v 6 Tūla huancan que Dios tūꞌ tlōkentaxtūlh aꞌntū cāhuanilh huan israelitas makāntzaꞌ. Dios tūꞌ cālacsacli ixlīhuākcaꞌn huan israelitas. Lāꞌ nā tūꞌ ixlīhuākcaꞌn takalhlakaꞌīꞌnīꞌt Cristo. Lāꞌ chuntzaꞌ tūꞌ ixlīhuākcaꞌn israelitas ixtachiꞌxcuhuīꞌt Dios.
\v 7 Lāꞌ tūꞌ ixlīhuākcaꞌn huan īꞌxūꞌyātāꞌnatnaꞌ Abraham, tūꞌ huāk ixcamanaꞌ Dios. Lej makāntzaꞌ Dios huanilh Abraham:
\q Ixcamanaꞌ Dios natala aꞌntī ixcamanaꞌ miꞌoꞌkxaꞌ Isaac, lāꞌ nā īꞌxūꞌyātāꞌnatnaꞌ Isaac.
\m
\v 8 Aꞌntū iccāhuanimāꞌniꞌ ūꞌtzaꞌ huāꞌmā: Huan israelitas tūꞌ huāk ixcamanaꞌ Dios, xmān aꞌntīn takaꞌlhī ixquilhtamacujcaꞌn chu aꞌnchī hualh Dios.
\v 9 Lāꞌ ūꞌtzaꞌ aꞌntū Dios huanilh Abraham makāntzaꞌ: 
\q Huan chiꞌchiniꞌ aꞌntū talhcān, quit naꞌictlōkentaxtū aꞌntū icuaniyāniꞌ.
\q Mimpuscāt, Sara, nakaꞌlhī kalhatin ixcaman xachiꞌxcuꞌ. 
\p
\v 10 Lāꞌ chuhuaꞌj āꞌtāpātin huampala. Jacob lāꞌ Esaú aꞌntī ixcamanaꞌ Rebeca xmān kalhatin ixtātaꞌcaꞌn. Lāꞌ ūꞌtzaꞌ aꞌntī Isaac, quimpapcaꞌn.
\v 11 Lāꞌ aꞌxniꞌcaꞌ tūnaꞌj ixtalacatuncuī huan camanaꞌ, Dios lacsacli kalhatin chu aꞌnchī ixtapuhuān māniꞌ xlaꞌ. Tūꞌ lacsacli por aꞌntūn tatlahualh huan camanaꞌ, como tuntūꞌnaꞌj ixtatlahua aꞌntū koꞌhuaꞌjuaꞌ nīn aꞌntūn tzey.
\v 12 Lāꞌ Dios huanilh Rebeca:
\q Huan xastancu namāpaꞌksī ixpuxcuꞌ.
\m
\v 13 Lāꞌ nā tatzoꞌkniꞌ na ixtachihuīn Dios:
\q Quit lej xaꞌicpāxquīꞌ Jacob.
\q Lāꞌ Esaú tūꞌ lej xaꞌicpāxquīꞌ.
\p
\v 14 Chōꞌla catīhuā nahuan que tūꞌ tzey aꞌnchī līlacsacnaꞌn Dios, como xmān kalhatin lacsaca lāꞌ āꞌkalhtin tūꞌ. Iccāhuaniyāniꞌ que aꞌntū tlahua Dios xlaꞌ huāk tzey. 
\v 15 Dios huanilh Moisés:
\q Naꞌiccālakalhuꞌman chu aꞌntī naꞌiccālakalhuꞌmancuꞌtun. 
\m
\v 16 Aꞌmakapatzīn tapuhuan que Dios nacālakalhuꞌman xlacaꞌn xmān por ixpālacata xlacaꞌn talacasquiꞌn. Aꞌmakapitzīn tapuhuan que Dios nacālakalhuꞌman como xlacaꞌn lej tzey aꞌntūn tatlahua. Tūꞌ chuntzaꞌ. Dios cālakalhuꞌman aꞌntī cālakalhuꞌmancuꞌtun.
\v 17 Lāꞌ nā tatzoꞌkniꞌ na ixtachihuīn Dios aꞌnchī huanica huan rey xalaꞌ nac Egipto. Dios huanilh:
\q Quit iclīmānūniꞌ milīrey, como quit xaꞌicmāsuꞌyucuꞌtun quilīmāpaꞌksīn aꞌxniꞌcaꞌ huiꞌx quintāꞌlātlahuaꞌyaꞌ. 
\q Lāꞌ chuntzaꞌ huan tachiꞌxcuhuīꞌt xalanīꞌn na ixlīhuāk huan quilhtamacuj, xlacaꞌn natacaꞌtzī aꞌntū quit tzē naꞌictlahua.
\m
\v 18 Chuntzaꞌ tasuꞌyu que Dios cālakalhuꞌman aꞌntīn cālakalhuꞌmancuꞌtun. Lāꞌ makapitzīn aꞌntīn tūꞌ taꞌaꞌkahuānaꞌniꞌcuꞌtun Dios, xlacaꞌn Dios cāmakxteka que xlacaꞌn más lacxumpi catalalh.
\p
\v 19 Tzēlasāꞌ kalhatin nahuan: “Palh Dios chuntzaꞌ tlahua, ¿aꞌchīꞌ quincālīyāhuayāniꞌ? Palh Dios huan aꞌnchī nala kalhatin chiꞌxcuꞌ, chuntzaꞌ natachoko. Lāꞌ tūlalh catitaxtāpalīlh”.
\v 20 Palh kalhatin chuntzaꞌ ixquihuanilh, quit xaꞌicuanilh: “Huiꞌx xmān kalhatin chiꞌxcuꞌ. Lāꞌ ¿chichū puhuaꞌnaꞌ palh tzē natāꞌlāhuaniꞌyaꞌ Dios?” Huan xālu de tiꞌyaꞌt tūꞌ chuntzaꞌ kalhasquiꞌnī huan lhtaꞌmanaꞌ aꞌntī tlahualh: “¿Aꞌchīꞌ quintlaꞌhuaꞌ chuntzaꞌ?”
\v 21 Huan lhtaꞌmanaꞌ tzē natlahua de tiꞌyaꞌt chu aꞌntū xlaꞌ lacasquiꞌn. Chu ūꞌtzaꞌ con huan pūtlūꞌn tzē natlahua lakatin xālu aꞌntū lej tzēhuanīꞌt lāꞌ lakatin xālu aꞌntūn tūꞌ tzēhuanīꞌt.
\p
\v 22 Lāꞌ nā chuntzaꞌ Dios lej līlacatzucu ixcāpātīniꞌ xlacaꞌn aꞌntī ixtatlahuamāꞌna aꞌntūn tūꞌ tzey. Lāꞌ aꞌyuj Dios ixmāsuꞌyucuꞌtun palh ixaꞌkchāꞌn por ixpālacata huan talaclēꞌiꞌ, lāꞌ aꞌyuj ixmāsuꞌyucuꞌtun palh ixkaꞌlhī līmāpaꞌksīn para nacāmāpātīnī, lāꞌ aꞌyuj ixtasquiꞌnī que natapātīniꞌn, Dios ixcāpātīniꞌ xlacaꞌn.
\v 23 Lāꞌ nā Dios ixmāsuꞌyucuꞌtun palh xlaꞌ lej tzey. Chuntza tasuꞌyu como Dios quincālakalhuꞌmaniꞌ lāꞌ quincālacāxtlahuanīꞌtaꞌniꞌ para nachāꞌnāuj nac aꞌkapūn.
\v 24 Dios quincātaꞌsaniꞌnīꞌtaꞌniꞌ quinaꞌn aꞌntī israelitas lāꞌ nā xlacaꞌn aꞌntīn tūꞌ israelitas.
\v 25 Tatzoꞌkniꞌ na ixtachihuīn Dios aꞌnlhā tzoꞌkli Oseas aꞌntū hualh Dios:
\q Aꞌntīn tūꞌ quintachiꞌxcuhuīꞌt ixtahuanīꞌt, naꞌiccāmāpācuhuī quintachiꞌxcuhuīꞌt.
\q Lāꞌ huan tachiꞌxcuhuīꞌt aꞌntīn tūꞌ ixcāpāxquīꞌcan quit naꞌiccāpāxquīꞌ xlacaꞌn.
\q
\v 26 Lāꞌ aꞌnlhā cāhuanica: “Huiꞌxinaꞌn tūꞌ quintachiꞌxcuhuīꞌt”, xlacaꞌn nacāmāpācuhuīcan ixcamanaꞌ Dios aꞌntī xalakahuan. 
\m
\v 27 Tatzoꞌkniꞌ na ixtachihuīn Dios aꞌntū hualh Isaías ixpālacatacaꞌn huan israelitas. Xlaꞌ hualh:
\q Aꞌyuj huan israelitas xlacaꞌn laclhūhuaꞌ huaꞌchi huan cucuj aꞌntū huīꞌ nac mar, pero tūꞌ ixlīhuākcaꞌn catitapūtaxtulh, xmān macstiꞌnaꞌj.
\q
\v 28 Lhūhuaꞌ tachiꞌxcuhuīꞌt nacāmāpātīnīcan aꞌxniꞌcaꞌ Dios nacāmālaclēꞌnī huan āꞌxmān chiꞌchiniꞌ.
\q Lāꞌ tūꞌ catitakoxīlh.
\m
\v 29 Lāꞌ nā Isaías chuntzaꞌ huampā:
\q Dios kaꞌlhī ixlīhuāk līmāpaꞌksīn.
\q Palh xlaꞌ tūꞌ ixcāmakxtekli natalatahuiꞌla makapitzīn, quilīhuākcaꞌn quinaꞌn ixnīkōꞌuj chuntzaꞌ huaꞌchi tanīkōꞌlh xalanīꞌn nac Sodoma lāꞌ Gomorra.
\s Huan israelitas tūꞌ ixtakalhlakaꞌīꞌcuꞌtun huan xatzey tachihuīn
\p
\v 30 Lāꞌ nā chuntzaꞌ xlacaꞌn aꞌntīn tūꞌ israelitas. Aꞌyuj xapūꞌla tūꞌ ixtaputza aꞌnchī lactzey natalīla na ixlacapūn Dios, chuhuaꞌj Dios cāmāpānūniꞌnīꞌt ixtalaclēꞌiꞌcaꞌn como xlacaꞌn takalhlakaꞌīꞌlh que Jesucristo cāmāpūtaxtū.
\v 31 Lāꞌ huan israelitas talīhuiꞌlīlh takalhlakaꞌīꞌ huan ley como tapuhualh que chuntzaꞌ Dios nacālaktzīꞌn xalacuan. Lāꞌ xlacaꞌn tūlalh tatlahualh para que tzey natala na ixlacapūn Dios.
\v 32 Lāꞌ ¿aꞌchīꞌ? Como xlacaꞌn talacuꞌtulh lactzey na ixlacapūn Dios por ixpālacata aꞌntū māniꞌ xlacaꞌn ixtatlahua. Pero chuntzaꞌ tūla. Xlacaꞌn tūꞌ takalhlakaꞌīꞌcuꞌtulh que Jesucristo tzē māpūtaxtūnuꞌn. Lāꞌ xmān ūꞌtzaꞌ aꞌntīn tzē māpūtaxtūnuꞌn. Huaꞌchilh taꞌaꞌkcheꞌkxlalh con lakatin chihuix, como Jesucristo huaꞌchi lakatin chihuix aꞌntū pūꞌaꞌkcheꞌkxlacan.
\v 33 Chuntzaꞌ tatzoꞌkniꞌ na ixtachihuīn Dios aꞌnlhā Dios huan:
\q Quit icuiꞌlī nac Sión kalhatin aꞌntī huaꞌchi chihuix aꞌntū pūꞌaꞌkcheꞌkxlacan lāꞌ huaꞌchi chihuix aꞌntū pūmakahuascan.
\q Lāꞌ xlacaꞌn aꞌntīn talīpāhuan xlaꞌ, tūꞌ xmān chu tlakaj catitalīpāhuanli.

\c 10
\p
\v 1 Tāꞌtimīn, quit lej iclacasquiꞌn que catapūtaxtulh quintāꞌisraelitas. Lāꞌ ūꞌtzaꞌ iclīsquiꞌniꞌ Dios huāꞌmāꞌ. 
\v 2 Quit iccaꞌtzī que xlacaꞌn lej tamāpāxuhuīcuꞌtun Dios. Pero xlacaꞌn tūꞌ tamāchekxī aꞌnchī līmāpāxuhuīcan Dios.
\v 3 Xlacaꞌn tūꞌ tacaꞌtzī aꞌnchī Dios cālīmāpānūniꞌ ixtalaclēꞌiꞌcaꞌn huan tachiꞌxcuhuīꞌt. Lāꞌ chuntzaꞌ ixaꞌcstucaꞌn xlacaꞌn taputza āꞌtāpātin aꞌnchī nacālīmāpānūniꞌcan ixtalaclēꞌiꞌcaꞌn. Lāꞌ ūꞌtzaꞌ tūꞌ talīmaklhtīniꞌncuꞌtun aꞌnchī Dios cālīmāpānūniꞌ ixtalaclēꞌiꞌcaꞌn huan tachiꞌxcuhuīꞌt.
\v 4 Dios nacāmāpānūniꞌ ixtalaclēꞌiꞌcaꞌn ixlīhuākcaꞌn aꞌntīn takalhlakaꞌīꞌ que Cristo māpūtaxtūnuꞌn, como Cristo xlaꞌ, tlōkentaxtūkōꞌlh ixlīhuāk huan ley aꞌntū ixlaꞌ Dios.
\p
\v 5 Aꞌmakapitzīn tatlōkentaxtūcuꞌtun huan ley como chuntzaꞌ tapuhuan que nacālīmāpānūniꞌcan ixtalaclēꞌiꞌcaꞌn. Makāntzaꞌ Moisés līchihuīnaꞌlh de xlacaꞌn. Xlaꞌ hualh: 
\q Palh kalhatin tlōkentaxtūkōꞌ ixlīhuāk huan ley, xlaꞌ napūtaxtu.
\m
\v 6 Lāꞌ aꞌyuj Moisés hualh chuntzaꞌ, quinaꞌn Dios quincāmāpānūniꞌnīꞌtaꞌniꞌ quintalaclēꞌiꞌcaꞌn como kalhlakaꞌīꞌyāuj que Cristo quincāmāpūtaxtūyāniꞌ. Lāꞌ ūꞌtzaꞌ māsuꞌyucan na ixtachihuīn Dios aꞌnlhā tatzoꞌkniꞌ que tūꞌ tasquiꞌnī naꞌaꞌn catīhuā nac aꞌkapūn para nalīmin Cristo. 
\v 7 Lāꞌ tūꞌ tasquiꞌnī catīhuā naꞌaꞌn aꞌnlhā tahuiꞌlānaꞌnchaꞌ huan nīnīꞌn lāꞌ nalīmin Cristo, como xlaꞌ lakahuanchokonīꞌttzaꞌ. 
\v 8 Ixtachihuīn Dios huan:
\q Tūꞌ jicslīhuaꞌ nacaꞌtzīcan aꞌntū ixlīstuꞌncuaꞌ aꞌnchī cālīmāpānūniꞌcan ixtalaclēꞌiꞌcaꞌn tachiꞌxcuhuīꞌt. 
\q Huiꞌxinaꞌn pāstacnīꞌtaꞌntit lāꞌ līchihuīnaꞌnīꞌtaꞌntit de huāꞌmā.
\m Lāꞌ ūꞌtzaꞌ huāꞌmāꞌ huan tachihuīn aꞌntū icmāsuꞌyu lāꞌ aꞌntūn tasquiꞌnī nakalhlakaꞌīꞌcan palh stuꞌncuaꞌ. 
\v 9 Lāꞌ chuntzaꞌ palh huanāuj que Jesús ūꞌtzaꞌ quiMāpaꞌksīniꞌcaꞌn lāꞌ palh kalhlakaꞌīꞌyāuj que stuꞌncuaꞌ Dios mālakahuanīchokolh, chuntzaꞌ Dios naquincāmāpūtaxtūyāniꞌ.
\v 10 Palh kalhlakaꞌīꞌyāuj que Jesucristo māpūtaxtūnuꞌn lāꞌ palh cāhuaniyāuj āꞌmakapitzīn palh kalhlakaꞌīꞌyāuj, chuntzaꞌ Dios quincāmāpūtaxtūyāniꞌ lāꞌ Dios quincāmāpānūniꞌyāniꞌ quintalaclēꞌiꞌcaꞌn.
\p
\v 11 Chuntzaꞌ ixlīstuꞌncuaꞌ. Ixtachihuīn Dios huan:
\q Xlacaꞌn aꞌntīn talīpāhuan xlaꞌ, tūꞌ xmān chu tlakaj catitalīpāhuanli.
\m
\v 12 Aꞌcxtim aꞌnchī natalīpūtaxtu xlacaꞌn aꞌntī israelitas lāꞌ nā xlacaꞌn aꞌntīn tūꞌ israelitas. Dios xmān kalhatin. Lāꞌ xlaꞌ lej cālakalhuꞌman ixlīhuākcaꞌn aꞌntīn tasquiꞌniꞌ Dios que nacāmaktāya.
\v 13 Tatzoꞌkniꞌ na ixtachihuīn Dios:
\q Ixlīhuākcaꞌn aꞌntī natasquiꞌniꞌ huan Māpaꞌksīniꞌ Cristo que nacāmāpūtaxtū, xlacaꞌn ixlīhuākcaꞌn natapūtaxtukōꞌ.
\m
\v 14 Nīn tintīꞌ tzē nasquiꞌniꞌ Dios que namāpūtaxtū palh xlaꞌ tūꞌ līpāhuan Cristo. Lāꞌ nīn tintīꞌ tzē līpāhuan xlaꞌ palh tūnaꞌj caꞌtzī nīn tuntūꞌ de Cristo. Lāꞌ nīn tintīꞌ tzē nacaꞌtzī huāꞌmāꞌ palh tintīꞌ catimāsuꞌniꞌlh.
\v 15 Lāꞌ nīn tintīꞌ tzē naꞌaꞌnāchaꞌ namāsuꞌyu palh tūꞌ Dios namacāꞌnāchaꞌ. Tatzoꞌkniꞌ na ixtachihuīn Dios:
\q Lej tzey aꞌxniꞌcaꞌ min kalhatin aꞌntī namāsuꞌyu huan xatzey tachihuīn aꞌntū ixlaꞌ Dios.
\p
\v 16 Lāꞌ aꞌyuj cāmāsuꞌniꞌcanīꞌt huan xatzey tachihuīn ixpālacata Jesucristo, āꞌmakapitzīn tūꞌ takalhlakaꞌīꞌ. Tatzoꞌkniꞌ na ixtachihuīn Dios aꞌnlhā Isaías huanilh Dios:
\q Quimāpaꞌksīniꞌ, nīn tintīꞌ kalhlakaꞌīꞌcuꞌtun aꞌntū icmāsuꞌyu.
\m
\v 17 Lāꞌ makapitzīn takalhlakaꞌīꞌlh palh stuꞌncuaꞌ, como ixtakaxmatnīꞌt huan xatzey tachihuīn. Lāꞌ ūꞌtzaꞌ aꞌntū līchihuīnaꞌn Cristo.
\p
\v 18 Quit iccākalhasquiꞌnīyāniꞌ: ¿Chu stuꞌncuaꞌ que huan israelitas tūꞌ takaxmatnīꞌt huan xatzey tachihuīn? Ixlīstuꞌncuaꞌ takaxmatnīꞌt. Tatzoꞌkniꞌ na ixtachihuīn Dios:
\q Lakachu cākaxmatcan ixtachihuīncaꞌn aꞌntī Dios cāmacāꞌnīꞌt. 
\q Aꞌkahuankōꞌnīꞌt na ixlīhuāk quilhtamacuj aꞌntūn tamāsuꞌyu.
\m
\v 19 Huan israelitas tūla tahuan que tūꞌ tamāchekxī huan xatzey tachihuīn, como xlacaꞌn aꞌntīn tūꞌ israelitas, xlacaꞌn tamāchekxī. Lāꞌ ūꞌtzaꞌ huāꞌmāꞌ lītzoꞌkli Moisés aꞌnlhā xlaꞌ tzoꞌkli aꞌntū Dios cāhuanilh huan israelitas:
\q Naꞌiccāsicuaꞌlanālī aꞌntīn tūꞌ israelitas.
\q Lāꞌ ūꞌtzaꞌ nacālīlakcaꞌtzaniꞌyāꞌtit huiꞌxinaꞌn israelitas.
\q Naꞌiccālīmakāꞌkchāꞌnāniꞌ huiꞌxinaꞌn ixpālacata lakatin tachiꞌxcuhuīꞌt aꞌntīn tūꞌ lej tacaꞌtzī. 
\m
\v 20 Lāꞌ nā Isaías xaꞌnca tzoꞌkli aꞌnchī Dios hualh: 
\q Xlacaꞌn chuhuaꞌj tacaꞌtzīlhtzaꞌ aꞌntīn tūꞌ ixquintaputza. 
\q Cāmāsuꞌniꞌca xlacaꞌn de quimpālacata xlacaꞌn aꞌntīn tūꞌ ixtakalhaꞌsquiꞌnīniꞌn por quimpālacata.
\m
\v 21 Lāꞌ Dios huampā ixpālacata huan israelitas:
\q Lakaliyān xaꞌiccātaꞌsaniꞌ pūlactin tachiꞌxcuhuīꞌt aꞌntī xalacxumpi lāꞌ tūꞌ ixquintaꞌaꞌkahuānaꞌniꞌcuꞌtun. 
\c 11
\s Makapitzīn israelitas cāmāpūtaxtūcanīꞌttzaꞌ
\p
\v 1 Tūꞌ capuhuaꞌntit que Dios cālakmakaꞌnkōꞌnīꞌt huan israelitas. Māniꞌ quit israelita. Abraham quimpap. Quit de ixtachiꞌxcuhuīꞌt Benjamín aꞌntī xalaꞌ makāntzaꞌ ixuanīꞌt.
\v 2 Dios tūꞌ cālakmakaꞌnīꞌt ixtachiꞌxcuhuīꞌt aꞌntīn cālacsacli makāntzaꞌ. Huiꞌxinaꞌn caꞌtzīyāꞌtit aꞌntūn tatzoꞌkniꞌ na ixtāchihuīn Dios aꞌnchī Elías cālēꞌksaꞌnīniꞌlh huan israelitas aꞌxniꞌcaꞌ ixkalhtōꞌkaꞌniꞌmāꞌ Dios. 
\v 3 Xlaꞌ hualh:
\q QuiMāpaꞌksīniꞌ Dios, cāmaknīkōꞌcanīꞌt ixlīhuākcaꞌn miꞌaꞌctaꞌsanaꞌnīꞌn.
\q Lāꞌ cāmāꞌkāꞌnīkōꞌcanīꞌt ixlīhuāk huan altares aꞌnlhā ixuiꞌlīniꞌcaꞌnaꞌ huan lēꞌksajuīꞌn.
\q Lāꞌ āꞌxmān quit ictachokonīꞌt.
\q Lāꞌ nā quimaknīcuꞌtuncan quit.
\m
\v 4 Lāꞌ Dios kalhtīlh lāꞌ huanilh:
\q Aꞌlakatojon mil de chiꞌxcuhuīꞌn quintitachokoniꞌ. 
\q Lāꞌ xlacaꞌn tūꞌ tataquilhpūtaniꞌnīꞌt huan ídolo aꞌntū huanican Baal.
\m
\v 5 Lāꞌ chuhuaꞌj pātleꞌkemāꞌ chu aꞌcxtim. Xmān makapitzīn israelitas takalhlakaꞌīꞌnīꞌt. Dios cālacsacnīꞌt como xlaꞌ lakalhuꞌmanīniꞌn.
\v 6 Dios cālacsacli lāꞌ tūꞌ por ixpālacata xlacaꞌn ixtatlahuanīꞌt catūhuā aꞌntūn tzey. Dios cātlahuaniꞌlh lakatin talakalhuꞌmān. Lakatin talakalhuꞌmān xlaꞌ tūꞌ huaꞌchi lakatin tatlaj. Dios ixcālakalhuꞌmanīꞌt lāꞌ ūꞌtzaꞌ cālīlacsacli.
\p
\v 7 Huan israelitas ixtaputza aꞌnchī ixcālīmāpānūniꞌca ixtalaclēꞌiꞌcaꞌn. Lāꞌ tūꞌ lej lhūhuaꞌ de xlacaꞌn aꞌntī Dios cāmāpānūniꞌlh ixtalaclēꞌiꞌcaꞌn. Lāꞌ xlacaꞌn ūꞌtunuꞌn aꞌntī Dios cālacsacnīꞌt. Aꞌmakapitzīn más lacxumpi talalh.
\v 8 Chuntzaꞌ tatzoꞌkniꞌ na ixtachihuīn Dios:
\q Huaꞌchilh Dios cāmālhtatīlh como xlacaꞌn tūꞌ tamāchekxī aꞌntū xastuꞌncuaꞌ.
\q Huaꞌchilh tūꞌ tzey ixlakastapuncaꞌn lāꞌ ixaꞌkaꞌxkoꞌlhcaꞌn como tūꞌ tamāchekxī aꞌntū cāhuanican lāꞌ nīn aꞌntūn talaktzīꞌn.
\q Lāꞌ nā chuntzaꞌ hasta chuhuaꞌj.
\m
\v 9 Lāꞌ nā tatzoꞌkniꞌ na ixtachihuīn Dios aꞌnlhā David hualh:
\q Aꞌntū talīpāhuan xlacaꞌn, ūꞌtzaꞌ nala huaꞌchi lakatin aꞌksuj aꞌntū nacāpūchiꞌpacan lāꞌ nala huaꞌchi lakatin chihuix aꞌntū natapūꞌaꞌkcheꞌkxla.
\q Lāꞌ Dios nacāmāpātīnī.
\q
\v 10 Lāꞌ natatalakatzīꞌ lāꞌ chuntzaꞌ tūꞌ catitalacahuānaꞌlh. 
\q Lāꞌ lej natapātīniꞌn huaꞌchi aꞌntīn talēꞌn lej tzinca ixtacuꞌcaꞌcaꞌn.
\s Aꞌntīn tūꞌ israelitas nā xlacaꞌn nā tzē nacāmāpūtaxtūcan 
\p
\v 11 Iccāhuaniyāniꞌ huiꞌxinaꞌn que Dios tūꞌ cālakmakaꞌlh huan israelitas para pōꞌktu. Como huan israelitas tūꞌ takalhlakaꞌīꞌcuꞌtulh, chuntzaꞌ Dios cāmāpūtaxtūlh aꞌntīn tūꞌ israelitas. Dios lacasquiꞌn que huan israelitas natalīlakcaꞌtzaniꞌ xlacaꞌn aꞌntīn tūꞌ israelitas como xlacaꞌn ixtachiꞌxcuhuīꞌttzaꞌ Dios. Lāꞌ chuntzaꞌ huan israelitas nā natakalhlakaꞌīꞌcuꞌtun.
\v 12 Lāꞌ aꞌxniꞌcaꞌ huan israelitas tūꞌ taꞌaꞌkahuānaꞌniꞌcuꞌtulh Dios, chuntzaꞌ Dios cāsicuaꞌlanālīlh xlacaꞌn aꞌntīn tūꞌ israelitas. Lāꞌ aꞌxniꞌcaꞌ huan israelitas nataꞌaꞌkahuānaꞌniꞌpala, Dios āꞌchulāꞌ nacāsicuaꞌlanālī ixlīhuākcaꞌn huan tachiꞌxcuhuīꞌt.
\p
\v 13 Chuhuaꞌj naꞌiccāhuaniyāniꞌ catūhuā huiꞌxinaꞌn aꞌntīn tūꞌ israelitas. Dios quilīmāmacūꞌnīꞌt naꞌiccāmāsuniꞌyāniꞌ huan xatzey tachihuīn. Lāꞌ quit ictlahuacuꞌtun aꞌntūn quilīmāmacūꞌlh.
\v 14 Quit iclacasquiꞌn que quintāꞌisraelitas natalaktzīꞌn aꞌnchī Dios cāsicuaꞌlanālīmāꞌ āꞌmakapitzīn lāꞌ ūꞌtzaꞌ natalīpūtaxtucuꞌtun nā xlacaꞌn.
\v 15 Aꞌxniꞌcaꞌ Dios cālakmakaꞌlh huan israelitas, ixamigos cātlahualh aꞌntīn tūꞌ israelitas. Lāꞌ aꞌxniꞌcaꞌ huan israelitas natatāꞌtapaꞌksīpala con Dios, huāꞌmāꞌ lej tzey nala, huaꞌchilh xlacaꞌn talakahuanchokopalanīꞌt. 
\v 16 Palh macstinaꞌj huan tasquit tzey lāꞌ chuntzaꞌ ixtalhūhuāꞌt nā tzey. Lāꞌ palh ixtankāxēꞌk kantin quiꞌhuiꞌ lactzey, nā ixpekenīꞌn tzey. Nā chuntzaꞌ huan israelitas. Quinapapanaꞌcaꞌn quinaꞌn israelitas ixtatāꞌtapaꞌksī Dios, lāꞌ nā chuntzaꞌ īꞌxūꞌyātāꞌnatnaꞌcaꞌn nā natatāꞌtapaꞌksī Dios.
\p
\v 17 Huan israelitas huaꞌchi ixpekenīꞌn kantīn quiꞌhuiꞌ. Lāꞌ huan ixpekenīꞌn aꞌntū cācāꞌtēcanīꞌt, xlacaꞌn huaꞌchi huan israelitas aꞌntī cālakmakaꞌlh Dios. Lāꞌ huiꞌxinaꞌn aꞌntīn tūꞌ israelitas, huiꞌxinaꞌn huaꞌchi ixpekenīꞌn kantin quiꞌhuiꞌ aꞌntū xacimarrón. Lāꞌ huaꞌchilh ixcāꞌinjertarlīcanīꞌt ixpekenīꞌn huan quiꞌhuiꞌ cimarrón aꞌnlhā cācāꞌtēcanīꞌt. Lāꞌ huan ixpekenīꞌn aꞌntū cāꞌinjertarlīcanīꞌt talīstaca por huan xaxcān aꞌntū kaꞌlhī huan xatankāxēꞌk. Lāꞌ nā chuntzaꞌ huiꞌxinaꞌn aꞌntīn tūꞌ israelitas. Dios cāsicuaꞌlanālīyāniꞌ huiꞌxinaꞌn aꞌcxtim con huan israelitas.
\v 18 Lāꞌ huiꞌxinaꞌn aꞌntīn tūꞌ israelitas, tūꞌ calīkaꞌtlaꞌjcaꞌtzītit por huan ixpekenīꞌn aꞌntū cācāꞌtēcanīꞌt. ¿Chu tūꞌ caꞌtzīyāꞌtit que ixtankāxēꞌk quiꞌhuiꞌ ūꞌtzaꞌ aꞌntū makastaca huan ixpekenīꞌn? Huan ixpekenīꞌn aꞌntū cālīꞌinjertarlīcanīꞌt tūla makastaca ixtankāxēꞌk huan quiꞌhuiꞌ.
\p
\v 19 Chōꞌla nahuanāꞌtit huiꞌxinaꞌn aꞌntīn tūꞌ israelitas: “Dios ixlacasquiꞌn palh natāꞌtapaꞌksīyāuj xlaꞌ. Lāꞌ ūꞌtzaꞌ cālīlakmakaꞌlh huan israelitas”. Huāꞌmāꞌ huaꞌchilh ixcācāꞌtēniꞌkōꞌlh ixpekenīꞌn huan quiꞌhuiꞌ, como cāꞌinjertarlīcuꞌtulh āꞌmakapitzīn.
\v 20 Tūꞌ chuntzaꞌ. Xlacaꞌn tūꞌ takalhlakaꞌīꞌlh lāꞌ ūꞌtzaꞌ cālīlakmakaꞌlh Dios. Huiꞌxinaꞌn kalhlakaꞌīꞌyāꞌtit lāꞌ ūꞌtzaꞌ Dios tūꞌ cālīlakmakaꞌnīꞌtaꞌniꞌ huiꞌxinaꞌn. Uꞌtzaꞌ tūꞌ tilīkaꞌtlaꞌjcaꞌtzīyāꞌtit. Xaꞌnca calatāꞌkchokotit. 
\v 21 Dios cālakmakaꞌlh huan israelitas aꞌntī huaꞌchi huan ixpekenīꞌn aꞌntū ixyā nac quiꞌhuiꞌ. Lāꞌ Dios nā tzē nacālakmakaꞌnāniꞌ huiꞌxinaꞌn aꞌntī huaꞌchi ixpekenīꞌn aꞌntūn cāꞌinjertarlīcanīꞌt.
\v 22 Chuntzaꞌ tasuꞌyu que Dios lej lakalhuꞌmanaꞌn lāꞌ nā nacāmāpātīnī xlacaꞌn aꞌntīn tatlahua talaclēꞌiꞌ. Cāmāpātīnīlh huan israelitas aꞌntīn tūꞌ takalhlakaꞌīꞌlh. Lāꞌ huiꞌxinaꞌn cālakalhuꞌmanāniꞌ līhuan kalhlakaꞌīꞌyāꞌtit. Lāꞌ palh makxtekāꞌtit de kalhlakaꞌīꞌyāꞌtit, Dios nacālakmakaꞌnāniꞌ chuntzaꞌ huaꞌchi kalhatin chiꞌxcuꞌ cāꞌmakaꞌn ixpeken quiꞌhuiꞌ.
\v 23 Lāꞌ huan israelitas, palh nā takalhlakaꞌīꞌcuꞌtuntzaꞌ, Dios nacālaktzīꞌn huaꞌchi ixtachiꞌxcuhuīꞌt huampala. Chuntzaꞌ huaꞌchilh Dios cāꞌinjertarlīpala aꞌnlhā ixtayānaꞌ xapūꞌla.
\v 24 Tūꞌ jicslīhuaꞌ cāꞌinjertarlīpalacan huan ixpekenīꞌn aꞌntū ixcācāꞌtēcanīꞌttzaꞌ. Más jicslīhuaꞌ cāꞌinjertarlīcan huan ixpekenīꞌn āꞌmakapitzīn quiꞌhuiꞌ. Lāꞌ huan israelitas, xlacaꞌn huaꞌchi ixpekenīꞌn quiꞌhuiꞌ aꞌntū lanān ixtayānaꞌ.
\s Huan israelitas natakalhlakaꞌīꞌ Cristo
\p
\v 25 Tāꞌtimīn iclacasquiꞌn que cacaꞌtzītit catūhuā aꞌntū tūnaꞌj lakapascan. Lāꞌ chuntzaꞌ aꞌxniꞌcaꞌ nacaꞌtzīyāꞌtit huāꞌmāꞌ, tūꞌ nakaꞌtlaꞌjcaꞌtzīyāꞌtit. Uꞌtzaꞌ huāꞌmāꞌ aꞌntū iccāhuanicuꞌtunāniꞌ: Aꞌmakapitzīn israelitas lacxumpi lāꞌ tūꞌ taꞌaꞌkahuānaꞌniꞌ Dios. Lāꞌ xlacaꞌn tūꞌ catitalalh chuntzaꞌ para pōꞌktu. Lāꞌ aꞌxniꞌcaꞌ natakalhlakaꞌīꞌ lhūhuaꞌ aꞌntīn tūꞌ israelitas, lāꞌ aꞌxniꞌcaꞌ huan israelitas nā natakalhlakaꞌīꞌ nā xlacaꞌn.
\v 26 Lāꞌ Dios nacāmāpūtaxtūkōꞌ ixlīhuākcaꞌn huan israelitas aꞌntī natakalhlakaꞌīꞌ. Tatzoꞌkniꞌ na ixtachihuīn Dios:
\q Huan Māpūtaxtūnuꞌ namināchaꞌ nac Sión.
\q Lāꞌ nacāxapaniꞌ ixtalaclēꞌiꞌcaꞌn huan israelitas, īꞌxūꞌyātāꞌnatnaꞌ Jacob.
\q
\v 27 Quit naꞌiccāmāsputūnuꞌniꞌ ixtalaclēꞌiꞌcaꞌn lāꞌ chuntzaꞌ naꞌictlōkentaxtū aꞌntū iccāhuanilh makāntzaꞌ. 
\m Chuntzaꞌ hualh Dios.
\p
\v 28 Como huan israelitas tūꞌ takalhlakaꞌīꞌcuꞌtulh huan xatzey tachihuīn ixpālacata Jesucristo, talalh ixtāꞌcaꞌtza Dios. Lāꞌ como xlacaꞌn tūꞌ takaxmatcuꞌtun ixpālacata Jesucristo, chuntzaꞌ cātamācaꞌtzīnīniꞌ huiꞌxinaꞌn aꞌntīn tūꞌ israelitas. Dios cāpāxquīꞌcus huan israelitas, como makāntzaꞌ cālacsacli īꞌxūꞌyāpapnaꞌcaꞌn para que natala ixtachiꞌxcuhuīꞌt.
\v 29 Lāꞌ Dios tūꞌ xtāpalī ixtapāstacnaꞌ. Ixlīhuākcaꞌn aꞌntī cālacsacnīꞌt xlaꞌ nacāsicuaꞌlanālī.
\v 30 Como huan israelitas tūꞌ takalhlakaꞌīꞌcuꞌtulh, chuntzaꞌ huiꞌxinaꞌn cātamāsuꞌniꞌniꞌ ixtachihuīn Dios. Lāꞌ aꞌyuj xapūꞌla huiꞌxinaꞌn tūꞌ kalhlakaꞌīꞌtit, chuhuaꞌj cālakalhuꞌmanāniꞌ Dios lāꞌ cāmāpūtaxtūnīꞌtaꞌniꞌ. 
\v 31 Lāꞌ chuntzaꞌ huaꞌchi Dios cālakalhuꞌmanāniꞌ huiꞌxinaꞌn, nā chuntzaꞌ nacālakalhuꞌman huan israelitas aꞌyuj chuhuaꞌj tūnaꞌj takalhlakaꞌīꞌ.
\v 32 Dios māsuꞌyunīꞌt que ixlīhuāk huan tachiꞌxcuhuīꞌt takaꞌlhī ixtalaclēꞌiꞌcaꞌn lāꞌ tūꞌ takalhlakaꞌīꞌnīꞌt. Chuntzaꞌ tlahualh, como ixlacasquiꞌn que xlacaꞌn ixtacaꞌtzīlh palh xlaꞌ cālakalhuꞌmankōꞌ ixlīhuākcaꞌn.
\p
\v 33 Dios caꞌtzīkōꞌ ixlīhuāk lāꞌ lej māchekxī ixlīhuāk. Quinaꞌn tūla māchekxīyāuj aꞌntū Dios līhuiꞌlī lāꞌ aꞌntū tlahua.
\v 34 Nīn tintīꞌ caꞌtzī aꞌnchī puhuan Dios. Lāꞌ nīn tintīꞌ tzē nahuanī aꞌntū natlahua Dios.
\v 35 Palh namaxquīꞌyāuj Dios catūhuā, tūla nahuanāuj que Dios quincālaclēꞌniꞌyāniꞌ.
\v 36 Dios tlahuakōꞌnīꞌt ixlīhuāk. Dios māꞌaꞌnanīkōꞌlh ixlīhuāk. Huāk ixlaꞌ. Para pōꞌktu camākaꞌtlīꞌca Dios.
\c 12
\s Tasquiꞌnī natamacamāstāꞌyāuj con Dios
\p
\v 1 Tāꞌtimīn, Dios lej quincālakalhuꞌmanīꞌtaꞌniꞌ. Uꞌtzaꞌ iccālīsquiꞌniꞌyāniꞌ que catamacamāstāꞌtit con Dios. Lāꞌ chuntzaꞌ huiꞌxinaꞌn nalaꞌyāꞌtit huaꞌchi lakatin lēꞌksajnaꞌ aꞌntū aꞌksajuīꞌcan Dios, aꞌyuj xalakahuancus huiꞌxinaꞌn. Uꞌtzaꞌ huāꞌmāꞌ lēꞌksajnaꞌ aꞌntū līpāxuhua Dios. Chuntzaꞌ nalīmācāꞌtanīꞌyāꞌtit Dios.
\v 2 Tūꞌ calatāꞌkchokotit huaꞌchi talatlāꞌhuan aꞌntī xalanīꞌn nac quilhtamacuj. Camakxtektit que Dios naxtāpalī mintapāstacnaꞌcaꞌn. Chuntzaꞌ tzē namāchekxīꞌyāꞌtit aꞌntū Dios lacasquiꞌn que natlahuaꞌyāꞌtit. Lāꞌ chuntzaꞌ tzē natlahuaꞌyāꞌtit aꞌntūn tzey lāꞌ aꞌntū nalīpāxuhua Dios.
\p
\v 3 Dios, como xlaꞌ lej lakalhuꞌmanaꞌn, quilīmāmacūꞌlh naꞌiccāmāsuꞌniꞌyāniꞌ huiꞌxinaꞌn. Lāꞌ ūꞌtzaꞌ tzē naꞌiccālīhuaniyāniꞌ huāꞌmāꞌ. Tūꞌ tikaꞌtlaꞌjcaꞌtzīyāꞌtit. Capāstactit aꞌnchī huaꞌnīꞌtaꞌntit chāꞌtunuꞌ de huiꞌxinaꞌn, chu aꞌnchī mintascujūtcaꞌn aꞌntū Dios cāmaxquīꞌnīꞌtaꞌniꞌ. 
\v 4 Quimacnicaꞌn lhūhuaꞌ tāstuca aꞌyuj xmān lakatin macniꞌ. Lāꞌ lakatunuꞌ de xlacaꞌn xtuncnuꞌ ixlītlōtcaꞌn. 
\v 5 Lāꞌ nā chuntzaꞌ quinaꞌn aꞌntī kalhlakaꞌīꞌyāuj Cristo. Quinaꞌn quilhūhuaꞌcaꞌn lāꞌ quinaꞌn chu lakatin tāꞌlanīꞌtaꞌuj con Cristo. Lāꞌ lāmaclacasquiꞌnāuj chāꞌtunuꞌ de quinaꞌn para nalāmaktāyayāuj.
\p
\v 6 Lāꞌ kalhatunuꞌ kaꞌlhī ixlītlōt chu aꞌnchī Dios quincāmaxquīꞌnīꞌtaꞌniꞌ chāꞌtunuꞌ. Lāꞌ xlacaꞌn aꞌntī ixaꞌctaꞌsanaꞌnīꞌn Dios, catamāsuꞌyulh xmān aꞌntū Dios cāhuanī.
\v 7 Lāꞌ aꞌntīn tamaktāya huan āꞌmakapitzīn aꞌntīn takalhlakaꞌīꞌ, xaꞌnca catatlahualh. Lāꞌ aꞌntīn tahuanilēꞌn āꞌmakapitzīn nā xaꞌnca catatlahualh.
\v 8 Lāꞌ aꞌntīn tamāsuꞌniꞌ āꞌmakapitzīn nā xaꞌnca catamāsuꞌniꞌlh. Lāꞌ aꞌntīn tamaxquīꞌ tumīn huan pobresniꞌ, tūꞌ catatampiꞌlhīniꞌlh. Lāꞌ aꞌntī xanapuxcuꞌnuꞌ de huan tāꞌtimīn, catatlōkentaxtūlh aꞌntū cālīmāmacūꞌcanīꞌt. Lāꞌ aꞌntīn tamaktāya āꞌmakapitzīn aꞌntīn talakaputza catatlahualh con tapāxuhuān.
\s Tasquiꞌnī que līlacatejtin natalatāꞌkchoko aꞌntīn takalhlakaꞌīꞌ
\p
\v 9 Lāꞌ milīhuākcaꞌn huiꞌxinaꞌn xaꞌnca nacāpāxquīꞌyāꞌtit āꞌmakapitzīn. Lāꞌ nataxtunquīyāꞌtit de aꞌntūn koꞌhuaꞌjuaꞌ. Lāꞌ natlahuaꞌyāꞌtit aꞌntūn tzey.
\v 10 Lāꞌ nalāpāxquīꞌyāꞌtit como huiꞌxinaꞌn lītāꞌtimīn como tapaꞌksīyāꞌtit con Cristo. Lāꞌ nacāꞌaꞌcnīniꞌniꞌyāꞌtit āꞌmakapitzīn lāꞌ tūꞌ nalaꞌyāꞌtit huaꞌchi xlacaꞌn aꞌntī xmān takaꞌlhīmāꞌna hasta que nacāꞌaꞌcnīniꞌniꞌcan. 
\p
\v 11 Lāꞌ xaꞌnca nascujāꞌtit lāꞌ tūꞌ tilhquititniꞌnāꞌtit. Lāꞌ natāꞌscujāꞌtit quiMāpaꞌksīniꞌcaꞌn Jesucristo con tapāxuhuān.
\p
\v 12 Lāꞌ napāxuhuaꞌyāꞌtit como caꞌtzīyāꞌtit que Dios nacāsicuaꞌlanālīyāniꞌ. Lāꞌ napātīniꞌnāꞌtit aꞌyuj nacāpātleꞌkeniꞌyāniꞌ aꞌntū jicslīhuaꞌ. Lāꞌ tūꞌ namakxtekāꞌtit de nakalhtōꞌkaꞌyāꞌtit.
\p
\v 13 Lāꞌ palh huan tāꞌtimīn cāsputniꞌ catūhuā, nacāmaktāyaꞌyāꞌtit. Lāꞌ nacāmānūꞌyāꞌtit na minchiccaꞌn aꞌntīn tamimāꞌnāꞌnchaꞌ de makat.
\p
\v 14 Lāꞌ nasquiꞌniꞌyāꞌtit Dios que nacāsicuaꞌlanālī xlacaꞌn aꞌntīn cātamacaputzayāniꞌ. Lāꞌ tūꞌ nasquiꞌnāꞌtit que nacāpātleꞌkeniꞌ aꞌntūn tūꞌ tzey.
\p
\v 15 Lāꞌ nacātāꞌpāxuhuaꞌyāꞌtit xlacaꞌn aꞌntīn tapāxuhua. Lāꞌ nacātāꞌcalhuaꞌnāꞌtit aꞌntīn tacalhuan.
\p
\v 16 Lāꞌ chu lakatin tapāstacnaꞌ nakaꞌlhīꞌyāꞌtit. Lāꞌ tūꞌ tikaꞌtlaꞌjcaꞌtzīyāꞌtit. Lāꞌ nacātāꞌlatāꞌkchokoyāꞌtit xlacaꞌn aꞌntīn catīhuāyā tachiꞌxcuhuīꞌt. Lāꞌ tūꞌ tipuhuaꞌnāꞌtit que huiꞌxinaꞌn lej caꞌtzīyāꞌtit. 
\p
\v 17 Lāꞌ palh kalhatin nacātlahuaniꞌyāniꞌ aꞌntūn tūꞌ tzey, huiꞌxinaꞌn tūꞌ titlahuaꞌniꞌyāꞌtit chuntzaꞌ. Calīhuiꞌlīꞌtit natlahuaꞌyāꞌtit aꞌntūn tzey na ixlacapūncaꞌn ixlīhuākcaꞌn huan tachiꞌxcuhuīꞌt.
\v 18 Lāꞌ lej xaꞌnca nalīputzayāꞌtit aꞌnchī nalīlaꞌyāꞌtit ixamigocaꞌn āꞌmakapitzīn.
\v 19 Tāꞌtimīn, tūꞌ ticātlahuaniꞌyāꞌtit aꞌntūn tūꞌ tzey palh chuntzaꞌ cātatlahuaniꞌyāniꞌ huiꞌxinaꞌn. Namakxtekāꞌtit que xmān Dios nacāmāpātīnī. Tatzoꞌkniꞌ na ixtachihuīn Dios:
\q Xmān quit tzē naꞌiccāmāpātīnī aꞌntīn tatlahua aꞌntūn tūꞌ tzey.
\q Natamāpala con quit, hualh quiMāpaꞌksīniꞌcaꞌn Dios. 
\m
\v 20 Lāꞌ nā tatzoꞌkniꞌ na ixtachihuīn Dios:
\q Palh mintāꞌcaꞌtza tzincsa, camāꞌhuiꞌ.
\q Lāꞌ palh kalhputī, camaꞌxquiꞌ xcān.
\q Lāꞌ chuntzaꞌ xlaꞌ nalīmāxanaꞌn aꞌntūn tlahuaniꞌnīꞌtaꞌniꞌ. 
\m
\v 21 Tūꞌ namakxtekāꞌtit que nacātlajayāniꞌ aꞌntūn tūꞌ tzey. Natlahuaꞌyāꞌtit xmān aꞌntūn tzey lāꞌ chuntzaꞌ nalītlajayāꞌtit antūn tūꞌ tzey.

\c 13
\p
\v 1 Tasquiꞌnī que milīhuākcaꞌn naꞌaꞌkahuānaꞌniꞌyāꞌtit huan pūchihuīnaꞌnīꞌn. Dios cāhuiꞌlīnīꞌt huaꞌchi pūchihuīnaꞌnīꞌn. Lāꞌ palh tūꞌ cahuā Dios ixcāmaxquīꞌlh līmāpaꞌksīn, xlacaꞌn tūlalh ixtamāpaꞌksīniꞌlh. 
\v 2 Aꞌntīn tatāꞌlāstaꞌla huan pūchihuīnaꞌnīꞌn, xlacaꞌn chuntzaꞌ tatāꞌlāstaꞌla Dios. Lāꞌ xlacaꞌn natamāpala con Dios.
\v 3 Lāꞌ aꞌntīn tatlahua aꞌntūn tzey, xlacaꞌn tūꞌ catitajicuaꞌniꞌlh huan pūchihuīnaꞌnīꞌn. Xmān xlacaꞌn aꞌntīn tatlahua aꞌntūn tūꞌ tzey, xlacaꞌn tajicuaꞌniꞌ huan pūchihuīnaꞌnīꞌn. Lāꞌ palh huiꞌxinaꞌn tūꞌ cājicuaꞌniꞌcuꞌtunāꞌtit huan pūchihuīnaꞌnīꞌn, līlacatejtin nalatāꞌkchokoyāꞌtit lāꞌ chuntzaꞌ natahuan que huiꞌxinaꞌn lactzey.
\v 4 Huan pūchihuīnaꞌnīꞌn takaꞌlhī līmāpaꞌksīn como Dios cālīmāmacūꞌnīꞌt para nacāmaktāyayāniꞌ huiꞌxinaꞌn. Palh huiꞌxinaꞌn tlahuaꞌyāꞌtit aꞌntūn tūꞌ tzey, najicuaꞌniꞌyāꞌtit como xlacaꞌn tzē nacātamāpātīnīyāniꞌ. Dios cāmaxquīꞌnīꞌt līmāpaꞌksīn para nacāmāpātīnī xlacaꞌn aꞌntīn tatlahua aꞌntūn tūꞌ tzey.
\v 5 Lāꞌ ūꞌtzaꞌ lītasquiꞌnī nacāꞌaꞌkahuānaꞌniꞌyāꞌtit huan pūchihuīnaꞌnīꞌn. Lāꞌ tūꞌ xmān por ixpālacata xlacaꞌn nacātamāpātīnīyāniꞌ. Tasquiꞌnī nacāꞌaꞌkahuānaꞌniꞌyāꞌtit como caꞌtzīyāꞌtit mēꞌcstucaꞌn que ūꞌtzaꞌ tasquiꞌnī natlahuaꞌyāꞌtit.
\v 6 Lāꞌ nā tasquiꞌnī namāpalaꞌyāꞌtit impuestos. Huan pūchihuīnaꞌnīꞌn aꞌntīn tatlōkentaxtū ixlītlōtcaꞌn, xlacaꞌn chuntzaꞌ tatlahua aꞌntū Dios lacasquiꞌn.
\p
\v 7 Lāꞌ chuntzaꞌ camāpalaꞌtit ixlīhuāk aꞌntū laclīpināꞌtit. Camāpalaꞌtit huan impuestos lāꞌ cuotas. Cacāꞌaꞌkahuānaꞌniꞌtit lāꞌ cacāꞌaꞌcnīniꞌniꞌtit aꞌntīn tamāpaꞌksīniꞌn. 
\v 8 Palh cālaclīpiniꞌyāꞌtit āꞌmakapitzīn, cacāmāpalaniꞌtit. Tūꞌ camakxtektit de lāpāxquīꞌyāꞌtit. Aꞌntīn tapāxquīꞌ āꞌmakapitzīn, chuntzaꞌ xlacaꞌn talītlōkentaxtū ixley Dios.
\v 9 Ixley Dios huan chuntzaꞌ:
\q Tūꞌ namakpuscātīniꞌnaꞌ.
\q Tūꞌ namaknīniꞌnaꞌ.
\q Tūꞌ nakaꞌlhānaꞌnaꞌ.
\q Tūꞌ nalīꞌaꞌksaꞌnaꞌ āꞌkalhatin aꞌntūn tūꞌ stuꞌncua. 
\q Tūꞌ nalakcaꞌtzaꞌnaꞌ aꞌntū ixlaꞌ āꞌchāꞌtin.
\m Lāꞌ aꞌnan āꞌlakatin līmāpaꞌksīn aꞌntū huan:
\q Lāꞌ chu aꞌnchī pāxquīꞌcaꞌnaꞌ mēꞌcstu, nā chuntzaꞌ cacāpāxquiꞌ huan āꞌmakapitzīn.
\m Lāꞌ kalhatin aꞌntīn tlahua huāꞌmāꞌ līmāpaꞌksīn, chuntzaꞌ tlōkentaxtū huāk huāꞌmāꞌ līmāpaꞌksīn lāꞌ nā āꞌmakapitzīn līmāpaꞌksīn aꞌntū aꞌnan. 
\v 10 Palh kalhatin chiꞌxcuꞌ pāxquīꞌ āꞌchāꞌtin, chuntzaꞌ tūla tlahuaniꞌ aꞌntūn tūꞌ tzey. Lāꞌ chuntzaꞌ aꞌntīn tapāxquīꞌ āꞌmakapitzīn, chuntzaꞌ talītlōkentaxtūkōꞌ ixlīhuāk ixley Dios.
\p
\v 11 Ixlīhuāk huāꞌmāꞌ natlahuaꞌyāꞌtit como caꞌtzīyāꞌtit que chuhuaꞌj āꞌchulāꞌ tasquiꞌnī naꞌaꞌkahuānaꞌniꞌyāꞌtit Dios. Lej skalalh natahuiꞌlaꞌyāꞌtit como namin huan chiꞌchiniꞌ aꞌxniꞌcaꞌ Cristo naquincālēꞌnāniꞌ nac aꞌkapūn. Lāꞌ tūꞌtzaꞌ makān huan chiꞌchiniꞌ huaꞌchi aꞌxniꞌcaꞌ pūꞌla kalhlakaꞌīꞌuj.
\v 12 Palaj namin huan chiꞌchiniꞌ aꞌxniꞌcaꞌ nalakaꞌnāuj Dios nac aꞌkapūn. Huaꞌchilh xkakamāꞌtzaꞌ como palaj namin huāꞌmāꞌ chiꞌchiniꞌ. Uꞌtzaꞌ calīmakxtekui natlahuayāuj aꞌntūn tūꞌ tzey. Lāꞌ tūꞌ catlahuáuj huaꞌchi tatlahua xlacaꞌn aꞌntīn talatlāꞌhuan de tzīꞌsa. Catlahuáuj aꞌntūn tzey chuntzaꞌ huaꞌchi xlacaꞌn aꞌntīn talatlāꞌhuan aꞌnlhā xkaka.
\v 13 Lāꞌ xaꞌnca nalatāꞌkchokoyāuj huaꞌchi tasquiꞌnī. Lāꞌ tuntūꞌ natlahuayāuj aꞌntū nalīmāxanaꞌnāuj palh naquincālaktzīꞌnāniꞌ catīhuā. Tūꞌ ticālīpāxuhuayāuj aꞌntīn tatlahua aꞌntūn tūꞌ tzey. Lāꞌ tūꞌ tikaꞌchīyāuj. Lāꞌ tūꞌ timakpuscātīniꞌnāuj. Lāꞌ tūꞌ titlahuayāuj aꞌntūn tūꞌ līmakuan. Lāꞌ tūꞌ tilāstaꞌlayāuj. Lāꞌ tūꞌ tilakcaꞌtzanāuj.
\v 14 Lāꞌ calīhuiꞌlīꞌtit makscaꞌtāꞌtit quiMāpaꞌksīniꞌcaꞌn Jesucristo. Lāꞌ tūꞌ catlahuaꞌtit mintapāstacnaꞌcaꞌn aꞌntū xakoꞌhuaꞌjuaꞌ.
\c 14
\s Tūꞌ tzey palh cālēꞌksaꞌnāuj āꞌmakapitzīn tāꞌtimīn 
\p
\v 1 Aꞌyuj makapitzīn tūnaꞌj xaꞌnca takalhlakaꞌīꞌ como tūnaꞌj xaꞌnca tamāchekxī, huiꞌxinaꞌn līpāxūj cacāmakxtektit natatanū aꞌnlhā takēxtimīꞌyāꞌtit huiꞌxinaꞌn. Lāꞌ tūꞌ ticātāꞌlāꞌhuaꞌniꞌyāꞌtit xlacaꞌn por ixpālacata aꞌntūn tūnaꞌj xaꞌnca tamāchekxī xlacaꞌn.
\v 2 Aꞌmakapitzīn tapuhuan que tzē natahuaꞌ ixlīhuāk catūhuā. Lāꞌ āꞌmakapitzīn aꞌntīn tūnaꞌj xaꞌnca takalhlakaꞌīꞌ, xlacaꞌn tapuhuan que tūꞌ tzey huaꞌcan quinīt.
\v 3 Huiꞌxinaꞌn aꞌntī huaꞌyāꞌtit ixlīhuāk catūhuā, tūꞌ cālakmakaꞌntit aꞌntīn tūꞌ tahuaꞌ quinīt. Lāꞌ huiꞌxinaꞌn aꞌntīn tūꞌ huaꞌyāꞌtit quinīt, tūꞌ ticālīchihuīnaꞌnāꞌtit xlacaꞌn aꞌntīn tahuaꞌ quinīt. Dios cālacaꞌīꞌyāniꞌ milīhuākcaꞌn.
\v 4 Tūꞌ quimacaꞌtzicaꞌn aꞌnchī scuja huan ixmozo āꞌkalhatin chiꞌxcuꞌ. Xmān aꞌntī māpaꞌksī tzē nahuan palh tzey o palh tūꞌ tzey aꞌnchī scuja ixmozo. Lāꞌ nā chuntzaꞌ aꞌntīn tatapaꞌksī con Dios, xmān Dios caꞌtzī aꞌnchī talīlatlāꞌhuan xlacaꞌn. Dios cāmaktāya, lāꞌ chuntzaꞌ xlacaꞌn tūꞌ caticāmālaclēꞌnīlh Dios.
\p
\v 5 Aꞌmakapitzīn tāꞌtimīn tamaclacāꞌniꞌ lakatin chiꞌchiniꞌ. Aꞌmakapitzīn tapuhuan que ixlīhuāk huan chiꞌchiniꞌ chu lakatin. Capāstactit chāꞌtunuꞌ de huiꞌxinaꞌn aꞌntū xatzey lāꞌ ūꞌtzaꞌ catlahuaꞌtit chāꞌtunuꞌ.
\v 6 Aꞌntīn tamaclacāꞌniꞌ lakatin chiꞌchiniꞌ, xlacaꞌn ūꞌtzaꞌ talīmaclacāꞌniꞌcuꞌtun Dios. Lāꞌ nā aꞌntīn tahuaꞌ quinīt, xlacaꞌn ūꞌtzaꞌ talīmaclacāꞌniꞌcuꞌtun Dios como tamaxquīꞌ pāxcatcaꞌtzī Dios por huan līhuaꞌt. Lāꞌ aꞌntīn tūꞌ tahuaꞌ quinīt, nā xlacaꞌn chuntzaꞌ tamaclacāꞌniꞌcuꞌtun Dios, lāꞌ nā tamaxquīꞌ pāxcatcaꞌtzī Dios.
\p
\v 7 Līhuan lahuiꞌlānaꞌuj nac quilhtamacuj, tūꞌ tlahuayāuj xmān aꞌntū quinaꞌn puhuanāuj. Lāꞌ tūꞌ nīyāuj aꞌxniꞌcaꞌ quinaꞌn lacasquiꞌnāuj.
\v 8 Līhuan lahuiꞌlānaꞌuj, tlahuayāuj ixtapuhuān quiMāpaꞌksīniꞌcaꞌn Jesucristo. Lāꞌ nīyāuj chu aꞌnchī ixtapuhuān. Quinaꞌn tapaꞌksīyāuj con Cristo, aꞌyuj lakahuancus quinaꞌn lāꞌ aꞌyuj xanīntzaꞌ quinaꞌn.
\v 9 Como Cristo nīlh lāꞌ nā lakahuanchokolh, chuntzaꞌ tzē nacāmāpaꞌksī xlacaꞌn aꞌntī xalakahuan lāꞌ xlacaꞌn aꞌntī tanīnīꞌttzaꞌ.
\p
\v 10 Lāꞌ chuntzaꞌ tūꞌ tzey palh kalhatin nacālīchihuīnaꞌn āꞌmakapitzīn tāꞌtimīn. Lāꞌ tūꞌ tzey palh kalhatin nacālakmakaꞌn āꞌmakapitzīn tāꞌtimīn. Quilīhuākcaꞌn quinaꞌn natāyakōꞌyāuj na ixlacapūn Cristo lāꞌ xlaꞌ ūꞌtzaꞌ aꞌntī naquincājuzgarlīyāniꞌ.
\v 11 Tatzoꞌkniꞌ na ixtachihuīn Dios:
\q QuiMāpaꞌksīniꞌcaꞌn huan: “Stuꞌncuaꞌ aꞌntū icuan. Stuꞌncuaꞌ ixlīhuāk naquintatatzokostaniꞌkōꞌ. Lāꞌ ixlīhuākcaꞌn natahuan palh quit Dios”.
\m
\v 12 Lāꞌ chuntzaꞌ quilīhuākcaꞌn nakalhtīyāuj Dios por ixlīhuāk aꞌntūn tlahuanīꞌtaꞌuj.
\s Tūꞌ tzey palh namātonkopūyāuj āꞌkalhatin quintāꞌtincaꞌn 
\p
\v 13 Lāꞌ chuntzaꞌ tūꞌtzaꞌ calālēꞌksaꞌntit. Xatzey calīhuiꞌlīꞌtit que tūꞌ natlahuaꞌyāꞌtit aꞌntū nalītatonkopū āꞌkalhatin. 
\v 14 Como quit ictapaꞌksī con Cristo, quit xaꞌnca iccaꞌtzī que ixlīhuāk huan līhuaꞌt huāk tzey. Lāꞌ aꞌyuj chuntzaꞌ icpuhuan, quit icuan que āꞌkalhatin tlahua aꞌntūn tūꞌ tzey palh huaꞌ catūhuā aꞌntū māniꞌ xlaꞌ puhuan que tūꞌ tzey na ixlacapūn Dios.
\v 15 Huiꞌxinaꞌn tūꞌ cahuaꞌtit quinīt palh ūꞌtzaꞌ nalītamakchuyī kalhatin de quintāꞌtincaꞌn, como xlaꞌ napuhuan que tūꞌ tzey aꞌntū tlahuaꞌyāꞌtit. Lāꞌ como pāxquīꞌyāꞌtit huan quintāꞌtincaꞌn, xatzey tūꞌ natlahuaꞌyāꞌtit aꞌntū xlaꞌ napuhuan que tūꞌ tzey. Cristo nīlh nā por xlaꞌ, lāꞌ tūꞌ xmān por huiꞌxinaꞌn. Uꞌtzaꞌ tuntūꞌ tilīhuaꞌyāꞌtit huiꞌxinaꞌn aꞌntū nalītaspiꞌtpala āꞌkalhatin na ixtej Dios.
\v 16 Aꞌyuj huiꞌxinaꞌn caꞌtzīyāꞌtit que huāk tzey aꞌntū tlahuaꞌyāꞌtit, tūꞌ catlahuaꞌtit aꞌntū āꞌmakapitzīn tapuhuan palh tūꞌ tzey.
\v 17 Quinaꞌn, como tapaꞌksīyāuj con Dios, tūꞌ lej tipāstacāuj aꞌntū huaꞌcan. Aꞌntū más tasquiꞌnī ūꞌtzaꞌ huāꞌmāꞌ: Līlacatejtin nalatāꞌkchokoyāujtit lāꞌ caꞌcs nalatahuiꞌlayāuj lāꞌ nakaꞌlhīyāuj tapāxuhuān como huan Espíritu Santo quincātāꞌlahuiꞌlāniꞌ.
\v 18 Aꞌntī chuntzaꞌ taꞌaꞌkahuānaꞌniꞌ Cristo, chuntzaꞌ talīmāpāxuhuī Dios. Lāꞌ nahuancan que xaꞌnca talatlāꞌhuan. 
\p
\v 19 Caꞌcs nalatahuiꞌlayāuj. Lāꞌ nalāmaktāyayāuj lāꞌ āꞌchulāꞌ naꞌaꞌkahuānaꞌniꞌyāuj Dios.
\v 20 Tūꞌ nalactlahuaꞌyāꞌtit aꞌntū Dios tlahualh. Tzēlasāꞌ chuntzaꞌ tlahuaꞌyāꞌtit aꞌxniꞌcaꞌ huaꞌyāꞌtit aꞌntūn tapuhuan āꞌmakapitzīn que tūꞌ līmakuan. Ixlīhuāk huan līhuaꞌt tzey na ixlacapūn Dios. Lāꞌ tzē nahuaꞌyāuj ixlīhuāk. Xmān tūla nahuaꞌyāuj āꞌtāpātin palh por ūꞌtzaꞌ nalītatonkopū kalhatin quintāꞌtincaꞌn. 
\v 21 Xatzey tūꞌ nahuaꞌyāuj quinīt lāꞌ tūꞌ nahuaꞌyāuj vino, lāꞌ nīn tuntūꞌ natlahuayāuj āꞌcatūhuā palh por ūꞌtzaꞌ nalītatonkopū kalhatin quintāꞌtincaꞌn. 
\v 22 Palh kalhatin de huiꞌxinaꞌn puhuan palh tzey na ixlacapūn Dios que nahuaꞌ ixlīhuāk catūhuā, xlaꞌ ixaꞌcstu tzēꞌk cacaꞌtzīlh. Lāꞌ tūꞌ tilāstaꞌlaꞌyāꞌtit por huanmāꞌ. Līpāxūj tahuiꞌlānaꞌ aꞌntīn tacaꞌtzī que xaꞌnca talatlāꞌhuan chu aꞌnchī ixtapuhuān Dios. 
\v 23 Lāꞌ aꞌntīn tahuaꞌ catūhuā, aꞌyuj māniꞌ xlacaꞌn tapuhuan que tūꞌ tzey huaꞌcan, chuntzaꞌ xlacaꞌn tatlahua ixtalaclēꞌiꞌcaꞌn. Palh kalhatin chiꞌxcuꞌ tlahua catūhuā aꞌntū māniꞌ xlaꞌ puhuan que tūꞌ tzey na ixlacapūn Dios, chuntzaꞌ tlahua ixtalaclēꞌiꞌ huanmāꞌ chiꞌxcuꞌ. 
\c 15
\s Tasquiꞌnī natlahuayāuj aꞌntū natalīpāxuhua āꞌmakapitzīn tāꞌtimīn
\p
\v 1 Quinaꞌn aꞌntī xaꞌncatzaꞌ kalhlakaꞌīꞌyāuj, nacāmaktāyayāuj xlacaꞌn aꞌntīn tūnaꞌj xaꞌnca takalhlakaꞌīꞌ como tūnaꞌj xaꞌnca tamāchekxī. Tūꞌ xmān napuhuanāuj aꞌntū lacasquiꞌnāuj quinaꞌn.
\v 2 Quinaꞌn natlahuayāuj aꞌntū natalīpāxuhua huan āꞌmakapitzīn quintāꞌtimīncaꞌn lāꞌ chuntzaꞌ nacāmaktāyayāuj lāꞌ chuntzaꞌ āꞌchulāꞌ natakalhlakaꞌīꞌ.
\v 3 Lāꞌ nīn Cristo tūꞌ ixtlahua xmān aꞌntū xlaꞌ ixlacasquiꞌn. Uꞌtzaꞌ līpātīniꞌlh xlaꞌ. Tatzoꞌkniꞌ na ixtachihuīn Dios aꞌntū Cristo huanilh Dios:
\q Aꞌntīn talakmakaꞌnāniꞌ, nā quit quintalakmakaꞌn. 
\m
\v 4 Ixlīhuāk aꞌntūn tzoꞌkca makāntzaꞌ na ixtachihuīn Dios, quincāmāsuꞌniꞌyāniꞌ aꞌntūn Dios lacasquiꞌn que nacaꞌtzīyāuj. Ixtachihuīn Dios quincāmākoꞌxakaꞌtlīꞌyāniꞌ. Lāꞌ quincāmaktāyayāniꞌ para napātīyāuj aꞌntū quincātapātleꞌkeniꞌyāniꞌ. Lāꞌ quincāmācaꞌtzīnīyāniꞌ que naꞌaꞌnāuj nac aꞌkapūn.
\v 5 Dios ūꞌtzaꞌ aꞌntīn quincāmākoꞌxakaꞌtlīꞌyāniꞌ lāꞌ quincāmaktāyayāniꞌ para natāyaniꞌyāuj. Dios cacāmaktāyaniꞌ huiꞌxinaꞌn para que chu lakatin nala mintapāstacnaꞌcaꞌn chu aꞌnchī ixtapuhuān Cristo Jesús. 
\v 6 Chuntzaꞌ milīhuākcaꞌn tzē aꞌcxtim namācāꞌtanīꞌyāꞌtit Dios, ixTātaꞌ quiMāpaꞌksīniꞌcaꞌn Jesucristo.
\s Huan xatzey tachihuīn cāmācaꞌtzīnīca nā xlacaꞌn aꞌntīn tūꞌ israelitas
\p
\v 7 Lāꞌ huixinaꞌn calālaktzīꞌntit huaꞌchi lītāꞌtimīn como tapaꞌksīyāꞌtit con Cristo. Lāꞌ chuntzaꞌ naꞌaꞌcnīniꞌniꞌcan Dios.
\v 8 Jesucristo aꞌxniꞌcaꞌ milh nac quilhtamacuj, ixcāmāsuꞌniꞌ huan israelitas que Dios tlōkentaxtū aꞌntū huan. Chuntzaꞌ māsuꞌyulh Cristo, como xlaꞌ tlōkentaxtūlh aꞌntū Dios ixcāhuaninīꞌt makāntzaꞌ quinapapanaꞌcaꞌn. Lāꞌ chuntzaꞌ lītasuꞌyu que Dios tlōkentaxtū aꞌntū huan.
\v 9 Lāꞌ nā Cristo lacasquiꞌlh que natatapaꞌksī con Dios nā xlacaꞌn aꞌntīn tūꞌ israelitas lāꞌ nā xlacaꞌn natamaxquīꞌ pāxcatcaꞌtzī Dios. Tatzoꞌkniꞌ na ixtachihuīn Dios aꞌnchī Cristo huanilh Dios:
\q Quit naꞌicmākaꞌtlīꞌyāniꞌ na ixlaclhniꞌcaꞌn xlacaꞌn aꞌntīn tūꞌ israelitas.
\q Lāꞌ naꞌictlīꞌ palh huiꞌx lej tzey.
\m
\v 10 Lāꞌ nā tatzoꞌkniꞌ na ixtachihuīn Dios:
\q Cacātāꞌpāxuhuaꞌtit con ixtachiꞌxcuhuīꞌt Dios, huiꞌxinaꞌn aꞌntīn tūꞌ israelitas.
\m
\v 11 Lāꞌ nā tatzoꞌkniꞌ na ixtachihuīn Dios:
\q Camākaꞌtlīꞌtit huan Māpaꞌksīniꞌ milīhuākcaꞌn aꞌntīn tūꞌ israelitas.
\q Catamākaꞌtlīꞌlh ixlīhuākcaꞌn tachiꞌxcuhuīꞌt.
\m
\v 12 Lāꞌ nā tatzoꞌkniꞌ aꞌnlhā huan Isaías:
\q Namin kalhatin īꞌxūꞌyātāꞌnat Isaí.
\q Lāꞌ xlaꞌ nacāmāpaꞌksī aꞌntīn tūꞌ israelitas. 
\q Lāꞌ xlacaꞌn natakalhlakaꞌīꞌ que xlaꞌ nacāmāpūtaxtū. 
\p
\v 13 Dios ūꞌtzaꞌ aꞌntī quincāmācaꞌtzīnīyāniꞌ que xlaꞌ naquincāmāpūtaxtūyāniꞌ. Lāꞌ como huiꞌxinaꞌn līpāhuaꞌnāꞌtit Dios, lāꞌ Dios āꞌchulāꞌ lej cacāmaxquīꞌniꞌ tapāxuhuān lāꞌ cacāmātzaꞌtaꞌtīꞌniꞌniꞌ miꞌaꞌclhcunuccaꞌn. Lāꞌ huan Espíritu Santo cacāmācaꞌtzīnīniꞌ que Dios natlōkentaxtū aꞌntū huanīꞌt.
\p
\v 14 Quit xaꞌnca iccaꞌtzī, tāꞌtimīn, que huiꞌxinaꞌn lej lactzēyā tachiꞌxcuhuīꞌt. Lāꞌ huiꞌxinaꞌn xaꞌncatzaꞌ caꞌtzīyāꞌtit ixtachihuīn Dios. Lāꞌ nā tzē nalāmāscaꞌtīyāꞌtit chāꞌtunuꞌ de huiꞌxinaꞌn.
\v 15 Xmān xaꞌiccāmāpāstaquīcuꞌtunāniꞌ huiꞌxinaꞌn huāꞌ tamāꞌna catūhuā aꞌntū ictzoꞌknīꞌt. Lāꞌ como Dios quilīmāmacūꞌlh huāꞌmāꞌ lītlōt, quit tūꞌ icjicuaꞌnīꞌt de naꞌiccātzoꞌknuniꞌyāniꞌ lacastunc. 
\v 16 Dios quilacsacli para naꞌictāꞌscuja Jesucristo. Quilīmāmacūꞌlh naꞌiccāmācaꞌtzīnī aꞌntīn tūꞌ israelitas huan xatzey tachihuīn aꞌntū Dios quincāmācaꞌtzīnīniꞌ. Aꞌmakapitzīn de xlacaꞌn takalhlakaꞌīꞌnīꞌt. Lāꞌ huan Espíritu Santo cātlahuanīꞌt ixtachiꞌxcuhuīꞌt Dios. Xlacaꞌn huaꞌchi lakatin lēꞌksajnaꞌ aꞌntū icmaxquīꞌ Dios. Lāꞌ Dios chuntzaꞌ lej cālīpāxuhua.
\p
\v 17 Quit icmaxquīꞌ pāxcatcaꞌtzī Cristo Jesús, como quimaktāyanīꞌt aꞌntū Dios quilīmāmacūꞌlh.
\v 18 Quit naꞌiccāhuaniyāniꞌ xmān aꞌntū Cristo quimaktāyalh para naꞌictlahua. Quit iccāmasuꞌniꞌlh aꞌntīn tūꞌ israelitas. Lāꞌ chuhuaꞌj xlacaꞌn tatlahua ixtapuhuān Dios.
\v 19 Por ixlīmāpaꞌksīn Espíritu Santo ixtlahuacan lēꞌcnīn. Lāꞌ chuhuaꞌj ictlōkentaxtūnīꞌt aꞌntū Dios quilīmāmacūꞌlh. Iccāmāsuꞌniꞌnīꞌt xalanīꞌn nac Jerusalén huan xatzey tachihuīn ixpālacata Cristo. Lāꞌ lakachu icmāsuꞌyunīꞌt hasta nac Ilírico.
\v 20 Quit xaꞌiccāmāsuꞌniꞌ huan xatzey tachihuīn aꞌntīn tūnaꞌj ixtacaꞌtzī nīn tuntūꞌ ixpālacata Cristo. Chuntzaꞌ xaꞌictlahua quit como tūꞌ xaꞌicmāsuꞌyucuꞌtun aꞌnlhā ixmāsuꞌyunīꞌttzaꞌ āꞌchāꞌtin.
\v 21 Lāꞌ chuntzaꞌ ictlahuamāꞌ chu aꞌnchī tatzoꞌkniꞌ na ixtachihuīn Dios:
\q Aꞌntīn tūnaꞌj cāhuanican de xlaꞌ, xlacaꞌn natacaꞌtzī. 
\q Lāꞌ aꞌntīn tūnaꞌj takaxmata, xlacaꞌn natamāchekxī. 
\s Pablo ixaꞌncuꞌtun nac Roma
\p
\v 22 Lāꞌ como quit xaꞌicmāsuꞌyutlāꞌhuan, tūla xaꞌiccālakaꞌnāchāniꞌ, aꞌyuj lej maklhūhuaꞌ xaꞌicaꞌncuꞌtunāchaꞌ.
\v 23 Lāꞌ chuhuaꞌj naꞌicaꞌnāchaꞌ, como quit tūꞌtzaꞌ ickaꞌlhī aꞌnlhā naꞌicmāsuꞌyu huāꞌtzāꞌ, lāꞌ como lhūhuaꞌtzaꞌ cāꞌta iccālakaꞌncuꞌtunīꞌtaꞌnchāniꞌ. 
\v 24 Aꞌxniꞌcaꞌ quit naꞌicaꞌn nac España naꞌiccātēlaktzīꞌnāniꞌ huiꞌxinaꞌn. Quit ickaꞌlhī tapāxuhuān ickalhachihuīnaꞌncuꞌtun macstiꞌnaꞌj con huiꞌxinaꞌn. Lāꞌ āꞌcalīstān quit naꞌicaꞌmpala.
\v 25 Pūꞌla naꞌicaꞌn nac Jerusalén. Naꞌiccālēꞌniꞌ macstiꞌnaꞌj tumīn huan tāꞌtimīn xalanīꞌn aꞌntzaꞌ.
\v 26 Huan tāꞌtimīn xalanīꞌn nac estado de Macedonia lāꞌ nac estado de Acaya, xlacaꞌn tamāstāꞌnīꞌt tumīn, lāꞌ tamacāꞌniꞌcuꞌtun huan tāꞌtimīn aꞌntī lacpobres aꞌntī xalanīꞌn nac Jerusalén.
\v 27 Huāꞌmāꞌ ūꞌtzaꞌ aꞌntūn tatlahuacuꞌtulh xlacaꞌn xalanīꞌn nac Macedonia lāꞌ nac Acaya. Aꞌntīn tūꞌ israelitas tamaktāyacuꞌtun aꞌntī israelitas. Chuntzaꞌ tzey como huan israelitas tamācaꞌtzīnīnīꞌt aꞌnchī natalīpūtaxtu. Lāꞌ chuhuaꞌj, aꞌntīn tūꞌ israelitas tzē natatāꞌīꞌ aꞌntūn takaꞌlhī.
\v 28 Lāꞌ quit, aꞌxniꞌcaꞌ naꞌictlahuakōꞌ huāꞌmāꞌ, aꞌxniꞌcaꞌ naꞌicmāstāꞌ huan tumīn, quit naꞌicaꞌn nac España. Lāꞌ naꞌiccātēlaktzīꞌnāniꞌ huiꞌxinaꞌn.
\v 29 Lāꞌ aꞌxniꞌcaꞌ naꞌiccālakchāꞌnāniꞌ huiꞌxinaꞌn, quit iccaꞌtzī que Cristo nacāsicuaꞌlanālīyāniꞌ huiꞌxinaꞌn por ixpālacata aꞌntū Cristo quilīmāmacūꞌ que naꞌiccāhuaniyāniꞌ.
\p
\v 30 Lāꞌ chuhuaꞌj tāꞌtimīn, como huiꞌxinaꞌn nā tāꞌtapaꞌksīyāꞌtit Cristo, lāꞌ como huan Espíritu Santo quincāmaktāyayāniꞌ nalāpāxquīꞌyāuj, chuhuaꞌj iccāsquiꞌniꞌyāniꞌ que naquilātāꞌkalhtōꞌkaꞌyāuj. Lāꞌ casquiꞌniꞌtit Dios por quit.
\v 31 Casquiꞌniꞌtit Dios que caquimaktakaꞌlhli para que tuntūꞌ naquintatlahuaniꞌ xalanīꞌn nac Judea aꞌntīn tūꞌ takalhlakaꞌīꞌ. Lāꞌ nā casquiꞌntit que huan tāꞌtimīn xalanīꞌn nac Jerusalén caquintamaklhtīlh huan tumīn aꞌntū naꞌiccālēꞌniꞌ.
\v 32 Lāꞌ chuntzaꞌ, palh Dios lacasquiꞌn, quit naꞌiccālakaꞌnāchāniꞌ huiꞌxinaꞌn. Chuntzaꞌ quit naꞌiclīpāxuhua. Lāꞌ chuntzaꞌ nalāmākoꞌxakaꞌtlīꞌyāuj.
\v 33 Lāꞌ chuhuaꞌj Dios cacāꞌoꞌkskaꞌlhīniꞌ milīhuākcaꞌn. Xlaꞌ ūꞌtzaꞌ aꞌntī cāmātzaꞌlaꞌnkēꞌ quiꞌaꞌclhunuccaꞌn. Amén.
\c 16
\s Pablo cāmacāꞌniꞌlh saludos xalanīꞌn nac Roma
\p
\v 1 Iccālakmacāꞌnāchāniꞌ huiꞌxinaꞌn quintāꞌtincaꞌn Febe. Huāꞌmāꞌ puscāt cātāꞌscuja xlacaꞌn aꞌntīn tatapaꞌksī con Cristo nac Cencrea.
\v 2 Aꞌxniꞌcaꞌ xlaꞌ nacālakchāꞌnāniꞌ, calaktzīꞌntit huaꞌchi mintāꞌtincaꞌn. Chuntzaꞌ natala aꞌntī ixtachiꞌxcuhuīꞌt Dios. Calīmaktāyaꞌtit chu aꞌntū xlaꞌ namaclacasquiꞌn. Xlaꞌ lej lhūhuaꞌ aꞌntī cāmaktāyanīꞌt. Lāꞌ nā quit quimaktāyanīꞌt.
\p
\v 3 Casaludarlīꞌtit Priscila lāꞌ Aquila aꞌntī ixkōluꞌ Priscila. Xlacaꞌn tamāsuꞌyu ixpālacata Cristo Jesús, chuntzaꞌ huaꞌchi quit.
\v 4 Lāꞌ xlacaꞌn cāpātleꞌkeniꞌlh aꞌntū lej līpājicuaꞌ aꞌxniꞌcaꞌ quintamāpūtaxtūlh. Uꞌtzaꞌ iccālīmaxquīꞌ pāxcatcaꞌtzī. Lāꞌ nā tamāstāꞌ pāxcatcaꞌtzī ixlīhuākcaꞌn aꞌntīn tūꞌ israelitas aꞌntīn tatapaꞌksī con Cristo. 
\v 5 Lāꞌ nā iccāmacāꞌniꞌ saludos huan tāꞌtimīn aꞌntīn tatakēstoka na ixchiccaꞌn Priscila lāꞌ Aquila. Lāꞌ nā icmacāꞌniꞌ saludos Epeneto. Xlaꞌ quiꞌamigo lāꞌ icpāxquīꞌ. Xlaꞌ ūꞌtzaꞌ aꞌntī xapūꞌla kalhlakaꞌīꞌlh Cristo nac Acaya.
\v 6 Lāꞌ nā icmacāꞌniꞌ saludos huan María. Xlaꞌ lej scujnīꞌt por mimpālacatacaꞌn.
\v 7 Lāꞌ nā iccāmacāꞌniꞌ saludos quintāꞌisraelitas aꞌntī Andrónico lāꞌ Junias. Lāꞌ ūꞌtunuꞌn ixquincātāꞌchīꞌcanīꞌt. Lāꞌ huan apóstoles nā xlacaꞌn taꞌaꞌcnīniꞌniꞌ. Lāꞌ nā xlacaꞌn ixtakalhlakaꞌīꞌnīꞌttzaꞌ Cristo xapūꞌla aꞌxniꞌcaꞌ quit tūnaꞌj xaꞌickalhlakaꞌīꞌ.
\p
\v 8 Lāꞌ nā icmacāꞌniꞌ saludos huan Amplias. Icpāxquīꞌ como xlaꞌ nā kalhlakaꞌīꞌ quiMāpaꞌksīniꞌcaꞌn.
\v 9 Lāꞌ nā icmacāꞌniꞌ saludos huan Urbano aꞌntī quincāmaktāyayāniꞌ quinaꞌn aꞌntīn tāꞌscujāuj con Cristo. Lāꞌ nā icmacāꞌniꞌ saludos huan Estaquis aꞌntī icpāxquīꞌ.
\v 10 Lāꞌ nā icmacāꞌniꞌ saludos huan Apeles. Tasuꞌyu que xlaꞌ xaꞌnca kaꞌlhlakaꞌīꞌ Cristo. Lāꞌ nā iccāmacāꞌniꞌ saludos aꞌntīn tahuiꞌlānaꞌnchaꞌ na ixchic Aristóbulo. 
\v 11 Lāꞌ nā icmacāꞌniꞌ saludos quintāꞌisraelita Herodión lāꞌ nā xalanīꞌn na ixchic Narciso aꞌntīn takalhlakaꞌīꞌ quiMāpaꞌksīniꞌcaꞌn.
\v 12 Lāꞌ nā iccāmacāꞌniꞌ saludos Trifena lāꞌ Trifosa. Xlacaꞌn lej tatāꞌscuja quiMāpaꞌksīniꞌcaꞌn. Lāꞌ nā icmacāꞌniꞌ saludos Pérsida aꞌntī pāxquīꞌcan. Huāꞌmāꞌ puscāt lej tāꞌscujnīꞌt quiMāpaꞌksīniꞌcaꞌn.
\v 13 Lāꞌ nā icmacāꞌniꞌ saludos huan Rufo. Tasuꞌyu que xlaꞌ xaꞌnca kalhlakaꞌīꞌ quiMāpaꞌksīniꞌcaꞌn. Lāꞌ nā icmacāꞌniꞌ saludos ixtzīꞌt Rufo, aꞌntī iclaktzīꞌn huaꞌchi quintzīꞌt.
\v 14 Lāꞌ nā iccāmacāꞌniꞌ saludos huan Asíncrito lāꞌ Flegonte lāꞌ Hermas lāꞌ Patrobas lāꞌ Hermes lāꞌ nā huan tāꞌtimīn aꞌntīn tatāꞌlahuiꞌlānaꞌ xlacaꞌn. 
\v 15 Lāꞌ nā iccāmacāꞌniꞌ saludos huan Filólogo lāꞌ Julia lāꞌ Nereo lāꞌ nā ixtāꞌtin xapuscāt lāꞌ Olimpas lāꞌ ixlīhuākcaꞌn ixtachiꞌxcuhuīꞌt Dios aꞌntīn tatāꞌlahuiꞌlānaꞌ xlacaꞌn.
\p
\v 16 Calāsaludarlīꞌtit como lāpāxquīꞌyāꞌtit. Xalanīꞌn lakachu aꞌntīn takalhlakaꞌīꞌ, xlacaꞌn cātamacāꞌniꞌyāniꞌ saludos.
\p
\v 17 Tāꞌtimīn, iccāsquiꞌniꞌyāniꞌ huiꞌxinaꞌn que nacaꞌtzīyāꞌtit aꞌntīn tatalacpitzi lāꞌ tamāsuꞌyu aꞌntūn tūꞌ tzey lāꞌ tūꞌ chu aꞌcxtim huaꞌchi aꞌntū cātamāsuꞌniꞌnīꞌtaꞌniꞌ xapūꞌla. Cataxtunquīꞌtit de xlacaꞌn.
\v 18 Xlacaꞌn tūꞌ tatāꞌscujmāꞌna quiMāpaꞌksīniꞌcaꞌn Jesucristo. Tatlahua xmān aꞌntū xlacaꞌn talacasquiꞌn. Tasuꞌyu palh tzey aꞌntūn tahuan lāꞌ huaꞌchilh tzēhuanīꞌt ixtachihuīncaꞌn. Lāꞌ xmān taꞌaꞌkxoko xlacaꞌn aꞌntīn takalhlakaꞌīꞌ ixlīhuāk aꞌntūn cāhuanican.
\v 19 Lakaxtim caꞌtzīcantzaꞌ aꞌnchī huiꞌxinaꞌn kalhlakaꞌīꞌyāꞌtit huan xatzey tachihuīn ixpālacata Cristo. Huāꞌmāꞌ lej iclīpāxuhua. Quit iclacasquiꞌn que huiꞌxinaꞌn xaꞌnca nacaꞌtzīyāꞌtit aꞌnchī natlahuaꞌyāꞌtit aꞌntūn tzey. Lāꞌ iclacasquiꞌn que tūꞌ tipuhuaꞌnāꞌtit natlahuaꞌyāꞌtit aꞌntūn tūꞌ tzey.
\v 20 Dios quincāmaktāyayāniꞌ aꞌnchī caꞌcs nalīlatahuiꞌlayāujtit. Dios palaj natlaja huan koꞌtiꞌtiꞌ aꞌnchī scujmāꞌ con huiꞌxinaꞌn. QuiMāpaꞌksīniꞌcaꞌn Jesucristo cacāsicuaꞌlanālīniꞌ huiꞌxinaꞌn.
\p
\v 21 Cāmacāꞌniꞌyāchāniꞌ saludos Timoteo aꞌntī quintāꞌscuja, lāꞌ nā quintāꞌisraelitas Lucio lāꞌ Jasón lāꞌ Sosípater. 
\p
\v 22 Lāꞌ quit, Tercio, quimātzoꞌknīca huāꞌmāꞌ carta. Lāꞌ iccāmacāꞌniꞌyāchāniꞌ saludos aꞌntīn kalhlakaꞌīꞌyāꞌtit huaꞌchi quit.
\p
\v 23 Lāꞌ cāmacāꞌniꞌyāchāniꞌ saludos huāꞌ Gayo. Quit Pablo icmaklahuīꞌ na ixchic. Lāꞌ nā āꞌtzāꞌ tatakēxtimī aꞌntīn takalhlakaꞌīꞌ. Lāꞌ nā cāmacāꞌniꞌyāchāniꞌ saludos Erasto aꞌntī tesorero de huāꞌmāꞌ xcānsipej. Lāꞌ nā cāmacāꞌniꞌyāchāniꞌ saludos quintāꞌtincaꞌn Cuarto.
\p
\v 24 Cacāsicuaꞌlanālīchāniꞌ milīhuākcaꞌn quiMāpaꞌksīniꞌcaꞌn. Amén.
\s Pablo lej ixmākaꞌtlīꞌ Dios
\p
\v 25 Lāꞌ chuhuaꞌj camākaꞌtlīꞌuj Dios. Xlaꞌ tzē cāmaktāyayāniꞌ que xaꞌnca nakalhlakaꞌīꞌyāꞌtit chu aꞌnchī huan xatzey tachihuīn aꞌntū icmāsuꞌyu, lāꞌ aꞌntū ixpālacata Jesucristo. Lāꞌ huan xatzey tachihuīn, xapūꞌla nīn tintīꞌ ixcaꞌtzī. Lāꞌ chuhuaꞌj Dios quincāmācaꞌtzīnīnīꞌtaꞌniꞌ. 
\v 26 Lāꞌ chuhuaꞌj māsuꞌyucan. Nā chuntzaꞌ māsuꞌyucan nā ixtachihuīn Dios aꞌnlhā huanican profetas. Dios māpaꞌksīniꞌlh que cacāmācaꞌtzīnīkōꞌca ixlīhuākcaꞌn huan tachiꞌxcuhuīꞌt como Dios lacasquiꞌn que ixlīhuākcaꞌn catakalhlakaꞌīꞌlh lāꞌ cataꞌaꞌkahuānaꞌniꞌlh Dios. Lāꞌ Dios ūꞌtzaꞌ aꞌntī huīꞌ para pōꞌktu.
\p
\v 27 Lāꞌ xmān Dios caꞌtzīkōꞌ ixlīhuāk. Caꞌaꞌcnīniꞌniꞌca Dios para pōꞌktu por ixpālacata Jesucristo. Amén.