\id EPH
\h EFESIOS 
\toc1 EFESIOS 
\mt Huan Carta aꞌntū Cāmacāꞌniꞌca Xalanīꞌn nac Efeso
\c 1
\s Pablo cāmacāꞌniꞌlh saludos huan aꞌntī ixtakalhlakaꞌīꞌ 
\p
\v 1 Quit, Pablo, ictzoꞌka huāꞌmāꞌ carta. Quit ixapóstol Jesucristo, como ūꞌtzaꞌ huāꞌmāꞌ ixtapuhuān Dios. Quit iccātzoꞌknuniꞌmāꞌniꞌ huiꞌxinaꞌn aꞌntī xalanīꞌn nac Efeso aꞌntīn tāꞌtapaꞌksīyāꞌtit Dios lāꞌ kalhlakaꞌīꞌyāꞌtit Cristo Jesús.
\v 2 Cacātasicuaꞌlanālīniꞌ Dios quinTātaꞌcaꞌn lāꞌ huan Māpaꞌksīniꞌ Jesucristo. Lāꞌ cacātamātzaꞌtaꞌtīꞌniꞌniꞌ miꞌaꞌclhcunuccaꞌn.
\s Dios quincāsicuaꞌlanālīyāniꞌ por ixpālacata Jesucristo 
\p
\v 3 Camaxquīꞌuj pāxcatcaꞌtzī Dios, ixTātaꞌ quiMāpaꞌksīniꞌcaꞌn Jesucristo. Xlaꞌ quincāsicuaꞌlanālīnīꞌtaꞌniꞌ. Lāꞌ quincāmaxquīꞌnīꞌtaꞌniꞌ tāpālhūhuaꞌ tasicuaꞌlanālīn aꞌntū xalaꞌ nac aꞌkapūn. Quincātlahuaniꞌnīꞌtaꞌniꞌ huāꞌmāꞌ como tāꞌtapaꞌksīyāuj Cristo.
\v 4 Lāꞌ aꞌxniꞌcaꞌ tūnaꞌj ixtzucu huan quilhtamacuj, Dios quincālacsacniꞌ quinaꞌn aꞌntīn tāꞌtapaꞌksīyāuj Cristo. Quincālacsacniꞌ como quincātlahuacuꞌtuniꞌ xalactzey, como xlaꞌ tūꞌ ixlacasquiꞌn que aꞌnan catūhuā aꞌntūn tzē naquincātalēꞌksaꞌnīniꞌnāniꞌ na ixlacapūn Dios.
\v 5 Lāꞌ Dios, como quincāpāxquīꞌyāniꞌ, chuntzaꞌ xapūꞌla puhualh de naquincātlahuayāniꞌ ixcamanaꞌ por ixpālacata Jesucristo. Huāꞌmāꞌ aꞌntū ixtapuhuān.
\v 6 Lāꞌ ūꞌtzaꞌ nalīmākaꞌtlīꞌyāuj Dios como xlaꞌ lej pāxquīꞌnin. Quincātlahuaniꞌnīꞌtaꞌniꞌ huāꞌ tamāꞌnaꞌ talakalhuꞌmān por ixpālacata Jesucristo ixOꞌkxaꞌ. Lāꞌ xlaꞌ, Dios lej pāxquīꞌ.
\v 7 Cristo nīlh lāꞌ chuntzaꞌ quincālīmāpūtaxtūniꞌ. Lāꞌ nā Dios quincāmāsputūnuꞌniꞌntzaꞌ quintalaclēꞌiꞌcaꞌn. Huāꞌmāꞌ Dios quincātlahuaniꞌniꞌ como xlaꞌ lej lakalhuꞌmanīniꞌn. 
\v 8 Lāꞌ como Dios lej lakalhuꞌmanīniꞌn, xlaꞌ quincāmāmāchekxīnīniꞌ ixtachihuīn Dios lāꞌ lej xaꞌnca quincāmāpāstaquīyāniꞌ. 
\v 9 Xapūꞌla xmān Dios tzēꞌk ixcaꞌtzī aꞌntū ixpuhuan naquincātlahuaniꞌyāniꞌ. Lāꞌ chuhuaꞌj quincāmācaꞌtzīnīnīꞌtaꞌniꞌ. 
\v 10 Lāꞌ huāꞌmāꞌ aꞌntū Dios puhualh, ūꞌtzaꞌ huāꞌmāꞌ: Aꞌxniꞌcaꞌ namin huan chiꞌchiniꞌ aꞌntū Dios lhcānīꞌt, xlaꞌ nalīmāmacūꞌ Cristo ixlīhuāk aꞌntū aꞌnan nac aꞌkapūn lāꞌ ixlīhuāk aꞌntū aꞌnan nac quilhtamacuj. Lāꞌ Cristo nacāmāpaꞌksīkōꞌ ixlīhuāk.
\p
\v 11 Dios tlahuakōꞌ ixlīhuāk chu aꞌnchī ixtapuhuān. Xlaꞌ quincālacsacniꞌ como ixtachiꞌxcuhuīꞌt quincātlahuacuꞌtuniꞌ por ixpālacata Cristo.
\v 12 Lāꞌ chuntzaꞌ mākaꞌtlīꞌcan por quimpālacatacaꞌn quinaꞌn aꞌntī israelitas lāꞌ aꞌntī xapūꞌla ickalhlakaꞌīꞌuj que Cristo ūꞌtzaꞌ aꞌntī māpūtaxtūnuꞌn.
\v 13 Lāꞌ nā huiꞌxinaꞌn aꞌntīn tūꞌ israelitas nā kalhlakaꞌīꞌtit Cristo aꞌxniꞌcaꞌ kaxpaꞌttit huan xatzey tachihuīn aꞌntū xastuꞌncuaꞌ. Lāꞌ por ixpālacata huāꞌmāꞌ xatzey tachihuīn, huiꞌxinaꞌn cātalīmāpūtaxtūniꞌ. Lāꞌ aꞌxniꞌcaꞌ huiꞌxinaꞌn kalhlakaꞌīꞌtit, Dios cāmāxquīꞌniꞌ huan Espíritu Santo, chuntzaꞌ huaꞌchi aꞌnchī xlaꞌ ixuanīꞌt. Lāꞌ huāꞌmāꞌ māsuꞌyu que Dios nacāmāpūtaxtūkōꞌyāniꞌ.
\v 14 Como kaꞌlhīyāujtzaꞌ huan Espíritu Santo, caꞌtzīyāuj que namaklhtīniꞌnāuj aꞌntū Dios nacāmaxquīꞌ ixtachiꞌxcuhuīꞌt, chuntzaꞌ huaꞌchi xlaꞌ huanīꞌt. Lāꞌ nā ixpālacata huan Espíritu Santo caꞌtzīyāuj que ixlīstuꞌncuaꞌ Dios quincāmāpūtaxtūkōꞌyāniꞌ quinaꞌn aꞌntīn tāꞌtapaꞌksīyāuj xlaꞌ. Lāꞌ chuntzaꞌ namākaꞌtlīꞌcan Dios.
\s Pablo squiꞌniꞌlh Dios por ixpālacatacaꞌn aꞌntī ixtakalhlakaꞌīꞌ 
\p
\v 15 Quihuanicanīꞌttzaꞌ aꞌnchī kalhlakaꞌīꞌyāꞌtit quiMāpaꞌksīniꞌcaꞌn Jesús lāꞌ aꞌnchī cāpāxquīꞌyāꞌtit ixlīhuākcaꞌn aꞌntīn tatāꞌtapaꞌksī Dios.
\v 16 Lāꞌ ūꞌtzaꞌ pōꞌktu iclīmaxquīꞌ pāxcatcaꞌtzī Dios por huiꞌxinaꞌn, lāꞌ ickalhtōꞌkaꞌ por huiꞌxinaꞌn. 
\v 17 Icsquiꞌniꞌ Dios por huiꞌxinaꞌn. Xlaꞌ ūꞌtzaꞌ quinTātaꞌcaꞌn lāꞌ lej kaꞌlhī līmāpaꞌksīn. Lāꞌ nā xlaꞌ ixDios quiMāpaꞌksīniꞌcaꞌn Jesucristo. Icsquiꞌniꞌ que cacāmāmāchekxīnīniꞌ aꞌntū ixlaꞌ Dios lāꞌ aꞌnchī huanīꞌt Dios.
\v 18 Lāꞌ nā icsquiꞌniꞌ Dios que cacāmāmāchekxīnīniꞌ huan xatzey aꞌntū Dios naquincātlahuaniꞌyāniꞌ quinaꞌn aꞌntī quincālacsacnīꞌtaꞌniꞌ Dios. Lej lhūhuaꞌ aꞌntū naquincāmaxquīꞌyāniꞌ Dios para aꞌntīn tāꞌtapaꞌksīyāuj con xlaꞌ.
\v 19 Lāꞌ icsquiꞌniꞌ Dios que cacāmāmāchekxīnīniꞌ huiꞌxinaꞌn palh xlaꞌ kaꞌlhī lhūhuaꞌ līmāpaꞌksīn. Lāꞌ chuntzaꞌ tzē natlahua lhūhuaꞌ catūhuā por quinaꞌn aꞌntī līpāhuanāuj Dios.
\v 20 Dios māsuꞌyulh ixlīmāpaꞌksīn aꞌxniꞌcaꞌ mālakahuanīchokolh Cristo lāꞌ lēꞌlh nac aꞌkapūn lāꞌ huiꞌlīlh na ixpāxtūcānaꞌj Dios.
\v 21 Lāꞌ Dios maxquīꞌlh lhūhuaꞌ līmāpaꞌksīn huan Cristo. Lāꞌ Cristo cāmāpaꞌksīkōꞌ ixlīhuākcaꞌn huan pūchihuīnaꞌnīꞌn lāꞌ ixlīhuākcaꞌn huan āꞌmakapitzīn aꞌntīn takaꞌlhī līmāpaꞌksīn na ixlīhuāk quilhtamacuj lāꞌ nac aꞌkapūn. Huāꞌtzāꞌ nac cāꞌquilhtamacuj tintīꞌ aꞌntīn kaꞌlhī līmāpaꞌksīn huaꞌchi xlaꞌ. Lāꞌ tūꞌ catiꞌaꞌnalh aꞌntī nakaꞌlhī līmāpaꞌksīn huaꞌchi xlaꞌ.
\v 22 Dios huiꞌlīlh huaꞌchi ixlīmāpaꞌksīniꞌ de ixlīhuāk aꞌntū aꞌnan. Lāꞌ huiꞌlīlh xapuxcuꞌ de ixlīhuākcaꞌn aꞌntīn takalhlakaꞌīꞌ Cristo.
\v 23 Aꞌntīn takalhlakaꞌīꞌ, xlacaꞌn huaꞌchi ixmacniꞌ Cristo. Xlaꞌ cātāꞌlahuīꞌ xlacaꞌn. Lāꞌ xlaꞌ huīꞌ na ixlīhuāk quilhtamacuj lāꞌ nac aꞌkapūn.
\c 2
\s Dios quincāmāpūtaxtūyāniꞌ como xlaꞌ lej pāxquīꞌnin 
\p
\v 1 Lāꞌ xapūꞌla huiꞌxinaꞌn huaꞌchi nīnīꞌn ixuaꞌnīꞌtaꞌntit, como tūꞌ ixaꞌkahuānaꞌniꞌyāꞌtit Dios lāꞌ como lej ixtlahuaꞌyāꞌtit talaclēꞌiꞌ.
\v 2 Xapūꞌla huiꞌxinaꞌn ixlatlāꞌhuaꞌnāꞌtit huaꞌchi aꞌntīn xalanīꞌn nac quilhtamacuj. Ixaꞌkahuānaꞌniꞌyāꞌtit huan koꞌtiꞌtiꞌ. Xlaꞌ ūꞌtzaꞌ huan xamāpaꞌksīniꞌ huan līcaꞌtzīnniꞌ aꞌntūn tūꞌ xatzey. Lāꞌ xlaꞌ ūꞌtzaꞌ huan tūn tūꞌ tzey līcaꞌtzīn aꞌntū cāmātlahuī aꞌntūn tūꞌ tzey xlacaꞌn aꞌntīn tūꞌ taꞌaꞌkahuānaꞌniꞌcuꞌtun Dios.
\v 3 Lāꞌ nā chuntzaꞌ quinaꞌn xapūꞌla ixtlahuayāuj huaꞌchi xlacaꞌn aꞌntīn tūꞌ taꞌaꞌkahuānaꞌniꞌcuꞌtun Dios. Lāꞌ ixtlahuayāuj aꞌntūn tūꞌ tzey xmān aꞌntū ixlacasquiꞌnāuj. Ixtlahuayāuj chu aꞌnchī huan xakoꞌhuaꞌjuaꞌ quintapāstacnaꞌcaꞌn lāꞌ chu aꞌnchī ixlacasquiꞌn quimacniꞌcaꞌn aꞌntūn tūꞌ tzey. Lāꞌ como Dios nacāmāpātīnīkōꞌ ixlīhuākcaꞌn aꞌntīn tatlahua chuntzaꞌ, nā chuntzaꞌ ixquincāpātleꞌkeniꞌniꞌ quinaꞌn.
\v 4 Lāꞌ aꞌyuj līmakuan ixuanīꞌt palh ixquincātamāpātīnīniꞌ, Dios lej quincālakalhuꞌmaniꞌ como lej quincāpāxquīꞌyāniꞌ. 
\v 5 Lāꞌ aꞌyuj huaꞌchi xanīn ixuanīꞌtaꞌuj por ixpālacata quintalaclēꞌiꞌcaꞌn, Dios quincāmaxquīꞌniꞌ xasāstiꞌ quinquilhtamacujcaꞌn huaꞌchi aꞌxniꞌcaꞌ maxquīꞌlh ixquilhtamacuj Cristo aꞌxniꞌcaꞌ mālakahuanīchokolh. Lāꞌ Dios quincāmāpūtaxtūniꞌ quinaꞌn xmān como quincātlahuaniꞌcuꞌtuniꞌ talakalhuꞌmān. 
\v 6 Lāꞌ como Dios mālakahuanīchokolh Cristo, nā quinaꞌn naquincāmālakahuanīchokopalayāniꞌ. Lāꞌ namāpaꞌksīniꞌnāuj con Cristo nac aꞌkapūn.
\v 7 Lāꞌ ūꞌtzaꞌ huāꞌmāꞌ tlahualh Dios como māsuꞌyucuꞌtulh para pōꞌktu que xlaꞌ lej pāxquīꞌnin. Uꞌtzaꞌ huāꞌmāꞌ māsuꞌyulh aꞌxniꞌcaꞌ macamilh Cristo Jesús para nanī por quinaꞌn.
\v 8 Lāꞌ como huiꞌxinaꞌn līpāhuaꞌnāꞌtit Jesucristo, Dios cāmāpūtaxtūniꞌ huiꞌxinaꞌn xmān como cālakalhuꞌmaniꞌ. Lāꞌ tūꞌ por aꞌntū tlahuaꞌtit huiꞌxinaꞌn. Xmān Dios aꞌntī cāmāpūtaxtūniꞌ. Huaꞌchi lakatin lēꞌksajnaꞌ aꞌntū Dios cāmaxquīꞌniꞌ.
\v 9 Lāꞌ aꞌntū līpūtaxtucan, xlaꞌ huaꞌchi lakatin lēꞌksajnaꞌ. Tūla tlahuacan nīn tuntūꞌ para natlajacan. Lāꞌ chuntzaꞌ tintīꞌ aꞌntī tzē nalīkaꞌtlaꞌjcaꞌtzī por aꞌntū līpūtaxtu.
\v 10 Lāꞌ Dios como quincātlahuanīꞌtaꞌniꞌ chu lakatin con Cristo, quincāmaxquīꞌnīꞌtaꞌniꞌ xasāstiꞌ quinquilhtamacujcaꞌn, como lacasquiꞌn natlahuayāuj aꞌntūn tzey. Dios xapūꞌla līhuiꞌlīlh naquincātlahuayāniꞌ xalactzey lāꞌ chuntzaꞌ tzē latāꞌkchokoyāuj līlacatejtin.
\s Cristo cāmākoꞌxamixīlh Dios lāꞌ huan tachiꞌxcuhuīꞌt 
\p
\v 11 Capāstactit, huiꞌxinaꞌn aꞌntīn tūꞌ israelitas, aꞌnchī ixuanīꞌtaꞌntit xapūꞌla. Huan israelitas cātamāpācuhuīniꞌ huiꞌxinaꞌn huan tachiꞌxcuhuīꞌt aꞌntīn tūꞌ circuncidarlīcanīꞌt. Xlacaꞌn tacircuncidarlī na ixmacniꞌcaꞌn huan chiꞌxcuhuīꞌn para natamāsuꞌyu que tatāꞌtapaꞌksī con Dios. Lāꞌ ixaꞌcstucaꞌn cāhuanican huan tachiꞌxcuhuīꞌt aꞌntīn tatāꞌtapaꞌksī con Dios.
\v 12 Xapūꞌla huiꞌxinaꞌn tūꞌ ixtāꞌtapaꞌksīꞌyāꞌtit Cristo. Xmān aꞌntī israelitas ixtachiꞌxcuhuīꞌt Dios ixtahuanīꞌt. Lāꞌ xmān con xlacaꞌn Dios ixtlahuanīꞌt lakatin convenio. Lāꞌ xmān xlacaꞌn ixcāmācaꞌtzīnī Dios huan xatzey aꞌntū ixcātlahuaniꞌ. Lāꞌ huiꞌxinaꞌn, como tūꞌ israelitas, tūꞌ maklhtīniꞌntit huāꞌmāꞌ. Huiꞌxinaꞌn ixlatlāꞌhuaꞌnāꞌtit nac quilhtamacuj. Lāꞌ tūꞌ ixcaꞌtzīyāꞌtit palh Dios tzē ixcāmāpūtaxtūniꞌ. Lāꞌ tūꞌ ixlakapasāꞌtit Dios.
\v 13 Xapūꞌla makat ixlatlāꞌhuaꞌnāꞌtit de Dios. Lāꞌ chuhuaꞌj laktapajtzūnīꞌtaꞌntit Dios por ixpālacata Cristo Jesús, como Cristo nīnīꞌt por quinaꞌn.
\v 14 Lāꞌ nā Cristo cāmākoꞌxamixīnīꞌt huan israelitas lāꞌ nā aꞌntīn tūꞌ israelitas. Lāꞌ chu lakatin tachiꞌxcuhuīꞌt cātlahualh como Cristo cāmāpānūniꞌlh aꞌntū lītāꞌcaꞌtza ixcātlahua lāꞌ cātlahualh ixtachiꞌxcuhuīꞌt Dios. 
\v 15 Lāꞌ como Cristo nīlh por quinaꞌn, chuntzaꞌ cālīmāsputūlh huan ixtalanāncaꞌn israelitas como tūꞌ chuntzaꞌ līpūtaxtucan. Xmān Cristo tzē māpūtaxtūnuꞌn. Lāꞌ chuntzaꞌ tūꞌtzaꞌ lītāꞌcaꞌtza talalh huan israelitas con aꞌntīn tūꞌ israelitas. Huan tāpātuꞌ tachiꞌxcuhuīꞌt lanīꞌt ixtachiꞌxcuhuīꞌt Cristo. Xlaꞌ chu lakatin cātlahuanīꞌt.
\v 16 Lāꞌ como Cristo nīlh nac cruz, lāꞌ chuntzaꞌ cālīmākoꞌxamixīlh Dios lāꞌ huan tachiꞌxcuhuīꞌt aꞌntī israelitas lāꞌ aꞌntīn tūꞌ israelitas. Lāꞌ chuntzaꞌ chu lakatin cātlahualh huan israelitas lāꞌ aꞌntīn tūꞌ israelitas. Lāꞌ māpānūlh aꞌntū ixtalālīcaꞌtzalaktzīꞌn.
\p
\v 17 Cristo milh lāꞌ mācaꞌtzīnīniꞌlhtzaꞌ palh cāmākoꞌxamixīcatzaꞌ Dios lāꞌ huan tachiꞌxcuhuīꞌt. Lāꞌ ūꞌtzaꞌ cāmācaꞌtzīnīlh huan israelitas aꞌntī ixtalakapasatzaꞌ Dios. Lāꞌ nā cāmācaꞌtzīnīlh xlacaꞌn aꞌntīn tūꞌ israelitas, aꞌntīn tūꞌ talakapasa Dios.
\v 18 Por ixpālacata aꞌntū tlahualh Cristo quilīhuākcaꞌn quinaꞌn, aꞌntī israelitas lāꞌ aꞌntīn tūꞌ, quilīhuākcaꞌn tzē nalaktapajtzūyāuj Dios quinTātaꞌcaꞌn, como huan Espíritu Santo quincāmaktāyayāniꞌ.
\v 19 Huiꞌxinaꞌn aꞌntīn tūꞌ israelitas, huaꞌchi makatiyātīꞌn ixuanīꞌtaꞌntit lāꞌ huaꞌchi tejetlāꞌhuanīꞌn. Lāꞌ chuhuaꞌj tāꞌtapaꞌksīꞌyāꞌtit con Dios chu aꞌcxtim huaꞌchi huan āꞌmakapitzīn aꞌntī israelitas aꞌntīn takalhlakaꞌīꞌ. Lāꞌ nā huiꞌxinaꞌn ixtachiꞌxcuhuīꞌttzaꞌ Dios.
\v 20 Huaꞌchilh Dios ixtlahualh lakatin lītokpān. Huiꞌxinaꞌn huaꞌchi huan chihuixniꞌ aꞌntū lītapācnaꞌncan. Huan apóstoles lāꞌ huan ixaꞌctaꞌsanaꞌnīꞌn Dios, xlacaꞌn huaꞌchi huan cimiento. Lāꞌ māniꞌ Jesucristo huaꞌchi huan xapūꞌla chihuix aꞌntū māꞌcnūcan para huan cimiento.
\v 21 Lāꞌ por ixpālacata Cristo, huan lītokpān stactēlha. Lāꞌ ixlīhuāk huan chihuix xaꞌnca cāhuiꞌlīcanīꞌt. Lāꞌ nala lakatin lītokpān aꞌntū ixlaꞌ huan Māpaꞌksīniꞌ Dios lāꞌ huāk tzey.
\v 22 Huiꞌxinaꞌn lāꞌ quilīhuākcaꞌn aꞌntīn tapaꞌksīyāuj con Cristo, quilīhuākcaꞌn quinaꞌn huaꞌchi ixlītokpān Dios, como huan Espíritu Santo quincātāꞌlahuiꞌlaniꞌ quinaꞌn.
\c 3
\s Pablo līmāmacūꞌca nacāmāsuꞌniꞌ huan aꞌntīn tūꞌ israelitas
\p
\v 1 Quit, Pablo, lāꞌ como ictāꞌscuja Cristo Jesús, lāꞌ ictachīꞌnīꞌt por ixpālacata iccāmāsuꞌniꞌyāniꞌ ixtachihuīn Dios huiꞌxinaꞌn aꞌntīn tūꞌ israelitas. 
\v 2 Huiꞌxinaꞌn caꞌtzīyāꞌtit que Dios lej pāxquīꞌnin lāꞌ chuntzaꞌ quilīmāmacūꞌnīꞌt naꞌiccāmāsuꞌniꞌyāniꞌ huan xatzey tachihuīn huiꞌxinaꞌn aꞌntīn tūꞌ israelitas. 
\v 3 Huāꞌmāꞌ quimācaꞌtzīnīlh Dios aꞌyuj xapūꞌla tūꞌ ixcaꞌtzīcan huāꞌmāꞌ. Macstiꞌnaꞌj de huāꞌmāꞌ iccātzoꞌknuniꞌnīꞌtaꞌniꞌtzaꞌ huiꞌxinaꞌn.
\v 4 Lāꞌ huiꞌxinaꞌn, aꞌxniꞌcaꞌ nalakapūtleꞌkeyāꞌtit aꞌntū iccātzoꞌknuniꞌmāꞌniꞌ, nacaꞌtzīyāꞌtit aꞌntūn tūꞌ ixcaꞌtzīcan xapūꞌla ixpālacata Cristo. Lāꞌ nacaꞌtzīyāꞌtit palh Dios stuꞌncuaꞌ quimācaꞌtzīnīlh.
\v 5 Huan tachiꞌxcuhuīꞌt aꞌntī ixtahuiꞌlānaꞌ xapūꞌla, xlacaꞌn tūꞌ ixtacaꞌtzī huāꞌmāꞌ aꞌntū ixcātlahuaniꞌlh aꞌntīn tūꞌ israelitas. Chuhuaꞌj huan Espíritu Santo cāmācaꞌtzīnīnīꞌt huan apóstoles lāꞌ ixaꞌctaꞌsanaꞌnīꞌn Dios.
\v 6 Cāmācaꞌtzīnīnīꞌt que chu lakatin aꞌntīn takalhlakaꞌīꞌ palh israelitas lāꞌ palh tūꞌ. Lāꞌ ixlīhuākcaꞌn chu lakatin aꞌntī ixtachiꞌxcuhuīꞌt Dios. Chu aꞌcxtim Dios nacāsicuaꞌlanālī. Chu aꞌcxtim natamaklhtīniꞌn aꞌntū Dios huanīꞌt que nacāmaxquīꞌ por ixpālacata Cristo Jesús.
\p
\v 7 Lāꞌ como Dios lej quincālakalhuꞌmanāniꞌ, lāꞌ como lej kaꞌlhī līmāpaꞌksīn, quilīmāmacūꞌlh naꞌicmāsuꞌyu huāꞌmāꞌ xatzey tachihuīn.
\v 8 Chuntzaꞌ Dios quilīmāmacūꞌlh, aꞌyuj quit huaꞌchi xatiꞌnaꞌj de āꞌmakapitzīnniꞌ aꞌntīn tapaꞌksīyāuj con Dios. Dios quilīmāmacūꞌlh naꞌiccāmāsuꞌniꞌ aꞌntīn tūꞌ israelitas aꞌnchī Cristo tzē tlahua ixlīhuāk aꞌntū quinaꞌn māchekxīyāuj lāꞌ āꞌchulāꞌ huampala. 
\v 9 Lāꞌ quilīmāmacūꞌlh naꞌiccāmācaꞌtzīnī ixlīhuākcaꞌn aꞌntū Dios puhuanīꞌt. Xapūꞌla xmān Dios ixaꞌcstu ixcaꞌtzī huāꞌmāꞌ aꞌxniꞌca tūnaꞌj ixtzucu huan quilhtamacuj. Dios, xlaꞌ aꞌntī cātlahuakōꞌlh ixlīhuāk.
\v 10 Chuhuaꞌj huan ángeles aꞌntīn takaꞌlhī līmāpaꞌksīn nac aꞌkapūn, xlacaꞌn natacaꞌtzī aꞌnchī Dios cāmāpūtaxtū huan tāpālhūhuaꞌ tachiꞌxcuhuīꞌt lāꞌ cātlahualh ixtachiꞌxcuhuīꞌt. Lāꞌ chuntzaꞌ natalīcaꞌtzī que Dios kaꞌlhī lhūhuaꞌ tapāstacnaꞌ.
\v 11 Dios pōꞌktu ixcaꞌtzī aꞌnchī ixcālīmāpūtaxtūlh huan tachiꞌxcuhuīꞌt. Lāꞌ tlahualh por ixpālacata quiMāpaꞌksīniꞌcaꞌn Jesucristo.
\v 12 Lāꞌ quinaꞌn, como līpāhuanāuj Jesucristo, chuntzaꞌ tzē nalaktapajtzūyāuj Dios lāꞌ tūꞌ nalacapuhuanāuj. 
\v 13 Lāꞌ chuntzaꞌ quit iclacasquiꞌn que tūꞌ nalakachipiniꞌyāꞌtit huiꞌxinaꞌn aꞌyuj icpātīniꞌmāꞌ por mimpālacatacaꞌn. Lāꞌ aꞌyuj icpātīniꞌn līhuan iccāmācaꞌtzīnīyāniꞌ aꞌnchī nalīpūtaxtucan, xaꞌnca nataxtu para huiꞌxinaꞌn como chuntzaꞌ kalhlakaꞌīꞌnīꞌtaꞌntit.
\s Cristo lej quincāpāxquīꞌyāniꞌ
\p
\v 14 Lāꞌ chuntzaꞌ quit ictatzokosta, lāꞌ ickalhtōꞌkaꞌniꞌ Dios quinTātaꞌcaꞌn.
\v 15 Xlaꞌ ūꞌtzaꞌ xaTātaꞌ de ixlīhuākcaꞌn aꞌntīn tahuiꞌlānaꞌ nac quilhtamacuj lāꞌ nac aꞌkapūn.
\v 16 Icsquiꞌniꞌ Dios que huan Espíritu Santo nacāmākalhlakaꞌīꞌnīyāniꞌ xaꞌnca huiꞌxinaꞌn. Huāꞌmāꞌ Dios tzē natlahua como xlaꞌ lej kaꞌlhī līmāpaꞌksīn.
\v 17 Lāꞌ nā icsquiꞌniꞌ Dios que Cristo cacātāꞌlatāꞌkchokoniꞌ, como huiꞌxinaꞌn līpāhuaꞌnāꞌtit xlaꞌ. Lāꞌ nā icsquiꞌniꞌ Dios que cacāmaktāyaniꞌ para nacāpāxquīꞌyāꞌtit āꞌmakapitzīn.
\v 18 Lāꞌ nā icsquiꞌniꞌ Dios para que huiꞌxinaꞌn namāchekxīyāꞌtit palh Cristo lej quincāpāxquīꞌyāniꞌ. Lāꞌ catamāchekxīlh huāꞌmāꞌ ixlīhuākcaꞌn aꞌntīn tatapaꞌksī con Dios. 
\v 19 Lāꞌ icsquiꞌn que huiꞌxinaꞌn namāchekxīꞌkōꞌyāꞌtit palh Cristo lej quincāpāxquīꞌyāniꞌ, aꞌyuj nīn tintīꞌ tzē namāchekxī xaꞌnca. Lāꞌ chuntzaꞌ lactzey nalaꞌyāꞌtit chuntzaꞌ huaꞌchi Dios lacasquiꞌn.
\p
\v 20 Dios lej tzē natlahua lhūhuaꞌ por quinaꞌn. Lāꞌ tūꞌ caꞌtzīyāuj squiꞌnāuj ixlīhuāk aꞌntū Dios tzē naquincātlahuaniꞌyāniꞌ lāꞌ tūla pāstacāuj ixlīhuāk aꞌntū Dios tzē naquincātlahuaniꞌyāniꞌ, como xlaꞌ lej kaꞌlhī līmāpaꞌksīn. Lāꞌ huāꞌmāꞌ līmāpaꞌksīn scuja na quiꞌaꞌclhcunuccaꞌn.
\v 21 Lāꞌ tūꞌ maktin catisputli aꞌnchī namācāꞌtanīcan Dios ixpālacata Jesucristo lāꞌ quimpālacatacaꞌn quilīhuākcaꞌn aꞌntīn tāꞌtapaꞌksīyāuj con Cristo Jesús. Amén.
\c 4
\s Huan Espíritu Santo chu lakatin quincātlahuanīꞌtaꞌniꞌ 
\p
\v 1 Quit, Pablo, ictachīꞌn como ictāꞌscuja Dios quiMāpaꞌksīniꞌcaꞌn. Iccāsquiꞌniꞌyāniꞌ que calatāꞌkchokotit chu aꞌnchī tasquiꞌnī natalatāꞌkchoko xlacaꞌn aꞌntī Dios cātaꞌsaniꞌnīꞌt. 
\v 2 Tūꞌ cakaꞌtlaꞌjcaꞌtzītit. Lāꞌ līlacatzucu cachihuīnaꞌntit. Lāꞌ cacāpātīniꞌtit aꞌntū cātatlahuaniꞌyāniꞌ āꞌmakapitzīn. Lāꞌ calāmaktāyaꞌtit lāꞌ chuntzaꞌ natasuꞌyu palh lāpāxquīꞌyāꞌtit.
\v 3 Como huan Espíritu Santo chu lakatin cātlahuanīꞌtaꞌniꞌ, calīhuiꞌlīꞌtit caꞌcs nalatahuiꞌlaꞌyāꞌtit. Lāꞌ tūꞌ titalacpitziyāꞌtit.
\v 4 Quinaꞌn aꞌntīn tāꞌtapaꞌksīyāuj Dios chu lakatin quinaꞌn con xlaꞌ. Aꞌnan xmān lakatin Espíritu Santo. Chu aꞌcxtim kaꞌlhīyāuj nachāꞌnāuj nac aꞌkapūn quilīhuākcaꞌn aꞌntī Dios quincātaꞌsatīnīꞌtaꞌniꞌ.
\v 5 Aꞌnan xmān kalhatin Māpaꞌksīniꞌ Jesucristo. Lāꞌ chu lakatin aꞌntū kalhlakaꞌīꞌyāuj. Lāꞌ aꞌxniꞌcaꞌ aꞌkpaxāuj chu aꞌcxtim māsuꞌyuyāuj palh kalhlakaꞌīꞌyāuj.
\v 6 Aꞌnan xmān kalhatin Dios. Xlaꞌ ūꞌtzaꞌ xaTātaꞌ de ixlīhuākcaꞌn tachiꞌxcuhuīꞌt aꞌntīn takalhlakaꞌīꞌ. Lāꞌ xlaꞌ cāmāpaꞌksīkōꞌ ixlīhuāk. Lāꞌ xlaꞌ huīꞌ chu calhāhuā. Lāꞌ xlaꞌ lahuīꞌ con quilīhuākcaꞌn.
\p
\v 7 Dios quincāmaktāyayāniꞌ para natlōkentaxtūyāuj quintascujūtcaꞌn aꞌntū quincālīmāmacūꞌnīꞌtaꞌniꞌ Cristo.
\v 8 Tatzoꞌkniꞌ na ixtachihuīn Dios ixpālacata Cristo: 
\q Aꞌxniꞌcaꞌ aꞌlh nac aꞌkapūn, cālēꞌlh lhūhuaꞌ tachīꞌnīꞌn. 
\q Lāꞌ cāmaxquīꞌlh huan tachiꞌxcuhuīꞌt aꞌntūn tasquiꞌnī para natatāꞌscuja xlaꞌ.
\p
\v 9 Aꞌntī aꞌlh nac aꞌkapūn, ūꞌtzaꞌ Cristo. Xlaꞌ xapūꞌla ixyujnīꞌtaꞌnchi nac quilhtamacuj.
\v 10 Cristo yujchi nac cāꞌtiꞌyaꞌtnaꞌ lāꞌ nā xlaꞌ tahuaꞌcaꞌlh aꞌnlhā más tālhmāꞌn de nac aꞌkapūn. Tahuaꞌcaꞌlh como chuntzaꞌ tzē namāpaꞌksīniꞌnkōꞌ ixlīhuāk. 
\v 11 Cristo chāꞌtunuꞌ cāmaxquīꞌlh ixtascujūtcaꞌn. Aꞌmakapitzīn cālīmānūlh ixlīꞌapóstoles. Lāꞌ āꞌmakapitzīn cālīmānūlh ixlīꞌaꞌctaꞌsanaꞌnīꞌncaꞌn. Lāꞌ āꞌmakapitzīn cālīmāmacūꞌlh para natamācaꞌtzīnīniꞌn huan xatzey tachihuīn. Lāꞌ āꞌmakapitzīn cālīmānūlh xanapuxcuꞌnuꞌ nac lītokpānnaꞌ. Lāꞌ āꞌmakapitzīn cālīmāmacūꞌlh para natamāsuꞌyu ixtachihuīn Dios.
\v 12 Huāꞌmāꞌ tlahualh como xlaꞌ lacasquiꞌlh que xaꞌnca natatāꞌscuja aꞌntīn tatapaꞌksī con Dios. Lāꞌ chuntzaꞌ āꞌchulāꞌ natakalhlakaꞌīꞌ Cristo.
\v 13 Lāꞌ chuntzaꞌ āꞌchulāꞌ xaꞌnca nakalhlakaꞌīꞌyāuj hasta quinaꞌn chu aꞌcxtim xaꞌnca nakalhlakaꞌīꞌyāuj. Lāꞌ chu aꞌcxtim nalakapasāuj ixOꞌkxaꞌ Dios. Dios lacasquiꞌn que āꞌchulāꞌ natlahuayāuj ixtapuhuān hasta lhā nalayāuj huaꞌchi Cristo.
\v 14 Tūꞌtzaꞌ catilauj huaꞌchi camanaꞌ. Huan camanaꞌ huāk takalhlakaꞌīꞌ aꞌntūn cāhuanican aꞌyuj cacāꞌaꞌkxokoca. Chuhuaꞌj taꞌaꞌnan āꞌmakapitzīn aꞌntī lej tacaꞌtzī taꞌaꞌkxokonuꞌn. Lāꞌ quincātamāsuꞌniꞌcuꞌtunāniꞌ aꞌntūn tūꞌ stuꞌncuaꞌ.
\v 15 Lāꞌ quinaꞌn xmān tzē nahuanāuj aꞌntū stuꞌncuaꞌ. Lāꞌ aꞌxniꞌcaꞌ nahuanāuj aꞌntū stuꞌncuaꞌ, namāsuꞌyūyāuj aꞌnchī cāpāxquīꞌyāuj xlacaꞌn aꞌntīn cātāꞌchihuīnaꞌmāꞌnauj. Lāꞌ āꞌchulāꞌ nalayāuj huaꞌchi Cristo. Xlaꞌ huaꞌchi lakatin aꞌkxāk como xlaꞌ māpaꞌksīniꞌn.
\v 16 Lāꞌ quinaꞌn huaꞌchi lakatin macniꞌ. Lāꞌ como huan macniꞌ tlahua aꞌntū pāstaca huan aꞌkxāk, nā chuntzaꞌ quinaꞌn aꞌkahuānaꞌniꞌyāuj Cristo. Huan tāstucat cāmāquilhtāstuca ixlīhuāk huan macniꞌ. Lāꞌ chuntzaꞌ la chu lakatin macniꞌ. Lāꞌ palh ixlīhuāk huan macniꞌ xaꞌnca tascuja, chuntzaꞌ huan macniꞌ stactēlha lāꞌ tliꞌhuiꞌquintēlha. Lāꞌ nā chuntzaꞌ quinaꞌn aꞌntīn kalhlakaꞌīꞌyāuj Dios. Huaꞌchi lakatin macniꞌ lanīꞌtaꞌuj. Chu lakatin quinaꞌn como lāpāxquīꞌyāuj. Lāꞌ chuntzaꞌ āꞌchulāꞌ kalhlakaꞌīꞌtēlhayāuj.
\s Cristo cāmaxquīꞌ xasāstiꞌ ixquilhtamacujcaꞌn huan tachiꞌxcuhuīꞌt
\p
\v 17 Aꞌntū naꞌiccāhuaniyāniꞌ, icuan por ixquilhtampān quiMāpaꞌksīniꞌcaꞌn Jesucristo. Tūꞌtzaꞌ calatāꞌkchokotit huiꞌxinaꞌn aꞌnchī talatlāꞌhuan āꞌmakapitzīn aꞌntīn tūꞌ takalhlakaꞌīꞌ. Ixtapāstacnaꞌcaꞌn xlacaꞌn tuntūꞌ ixtapalhcaꞌn.
\v 18 Xlacaꞌn tūla xaꞌnca tapāstacnaꞌn. Tūꞌ takaꞌlhī xasāstiꞌ ixquilhtamacujcaꞌn aꞌntū Dios māstāꞌ. Tūꞌ takaꞌlhī, como lej lacxumpi lāꞌ tūꞌ tamāchekxī. 
\v 19 Lāꞌ tūꞌtzaꞌ tamāxanaꞌn. Talīhuiꞌlīnīꞌt tatlahua aꞌntūn tūꞌ tzey. Līpāxuj tatlahua ixlīhuāk aꞌntūn tūꞌ tzey lāꞌ aꞌntūn talacasquiꞌn ixmacniꞌcaꞌn.
\v 20 Tūꞌ chuntzaꞌ scaꞌtnīꞌtaꞌntit huiꞌxinaꞌn. Cristo, xlaꞌ tūꞌ chuntzaꞌ māsuꞌyulh.
\v 21 Huiꞌxinaꞌn cātahuaninīꞌtaꞌniꞌ ixpālacata Cristo. Lāꞌ cātamāsuꞌniꞌnīꞌtaꞌniꞌ aꞌntū Cristo māsuꞌyulh. Lāꞌ huāꞌmāꞌ ūꞌtzaꞌ aꞌntū xastuꞌncuaꞌ.
\v 22 Lāꞌ chuhuaꞌj tūꞌtzaꞌ calatāꞌkchokotit huiꞌxinaꞌn huaꞌchi ixlatāꞌkchokoyāꞌtit xapūꞌla aꞌxniꞌcaꞌ tūnaꞌj ixlakapasāꞌtit Cristo. Xapūꞌla huiꞌxinaꞌn ixtlahuaꞌyāꞌtit huan tūn tūꞌ tzeyā mintapāstacnaꞌcaꞌn. Lāꞌ chuntzaꞌ xmān taꞌaꞌkxokotit.
\v 23 Chuhuaꞌj cakaꞌlhīꞌtit xasāstiꞌ mintapāstacnaꞌcaꞌn. 
\v 24 Lāꞌ calatāꞌkchokotit chu aꞌnchī xasāstiꞌ mintapāstacnaꞌcaꞌn aꞌntū Dios cāmaxquīꞌniꞌ lāꞌ aꞌntū huaꞌchi ixlaꞌ. Lāꞌ catlahuaꞌtit aꞌntūn tzey.
\p
\v 25 Lāꞌ tūꞌtzaꞌ cahuaꞌntit tāꞌksaꞌnīn. Calāhuaꞌniꞌtit aꞌntū stuꞌncuaꞌ, como chu lakatin quinaꞌn aꞌntīn tāꞌtapaꞌksīyāuj Cristo.
\p
\v 26 Palh aꞌkchipināꞌtit huiꞌxinaꞌn, tūꞌ catlahuaꞌtit talaclēꞌiꞌ ixpālacata mintāꞌkchacaꞌn. Tūꞌ tiꞌaꞌkchipināꞌtit tintacuj. Capāxuhuaꞌtit aꞌxniꞌcaꞌ tūnaꞌj tāꞌcnū huan chiꞌchiniꞌ.
\v 27 Lāꞌ tūꞌ catamakxtektit nacātlajayāniꞌ huan koꞌtiꞌtiꞌ. Tūꞌ catamakxtektit nacāmātlahuanīyāniꞌ aꞌntūn tūꞌ tzey.
\p
\v 28 Tūꞌtzaꞌ cakaꞌlhāꞌnaꞌntit huiꞌxinaꞌn aꞌntī ixkaꞌlhāꞌnaꞌnāꞌtit. Cascujtit para nahuāꞌyanāꞌtit. Lāꞌ chuntzaꞌ tzē namaktāyayāꞌtit āꞌmakapitzīn aꞌntīn cāmakasputa aꞌntū tasquiꞌnī. 
\p
\v 29 Tūꞌ cachīhuā tihuaꞌnāꞌtit huiꞌxinaꞌn. Cahuaꞌntit xmān aꞌntūn tzey lāꞌ aꞌntū nacāmaktāya āꞌmakapitzīn. Lāꞌ chuntzaꞌ nacātlahuaniꞌyāꞌtit aꞌntūn tzey aꞌntīn cātakaxmatāniꞌ huiꞌxinaꞌn.
\v 30 Tūꞌ catlahuaꞌtit aꞌntū nalīlakaputza huan Espíritu Santo. Como huan Espíritu Santo quincātāꞌlahuiꞌlaniꞌ, chuntzaꞌ caꞌtzīyāuj palh tāꞌtapaꞌksīyāuj Dios. Lāꞌ nā caꞌtzīyāuj que Dios naquincāmāpūtaxtūkōꞌyāniꞌ como kaꞌlhīyāuj huan Espíritu Santo.
\p
\v 31 Tūꞌtzaꞌ capāstactit aꞌntū cātatlahuaniꞌnīꞌtaꞌniꞌ āꞌmakapitzīn. Tūꞌtzaꞌ caꞌaꞌkchipintit. Tūꞌtzaꞌ cacālakapalaꞌtit āꞌmakapitzīn. Tūꞌtzaꞌ caꞌaꞌksaꞌnīniꞌntit. Tūꞌtzaꞌ ticaꞌtzalaktzīꞌnāꞌtit āꞌcatīhuā.
\v 32 Xatzey calāpāxquīꞌtit. Lāꞌ calālakalhuꞌmaꞌntit. Lāꞌ nā calāmāsputūnuꞌniꞌtit chuntzaꞌ huaꞌchi Dios cāmāsputūnuꞌniꞌnīꞌtaꞌniꞌ huiꞌxinaꞌn por ixpālacata līnīlh Cristo.
\c 5
\s Tasquiꞌnī que lacatejtin natalatāꞌkchoko ixcamanaꞌ Dios
\p
\v 1 Como huiꞌxinaꞌn ixcamanaꞌtzaꞌ Dios, lāꞌ xlaꞌ cāpāxquīꞌyāniꞌ, huiꞌxinaꞌn natlahuaꞌyāꞌtit aꞌntū xlaꞌ lacasquiꞌn. 
\v 2 Lāꞌ nalāpāxquīꞌyāꞌtit huiꞌxinaꞌn chuntzaꞌ huaꞌchi Cristo cāpāxquīꞌyāniꞌ huiꞌxinaꞌn. Xlaꞌ lej quincāpāxquīꞌyāniꞌ hasta nīlh por quimpālacatacaꞌn. Tamacamāstāꞌlh huaꞌchi lakatin lēꞌksajnaꞌ para Dios. Lāꞌ huāꞌmāꞌ lej līpāxuhualh Dios.
\p
\v 3 Como huiꞌxinaꞌn ixtachiꞌxcuhuīꞌt Dios, nīn macstiꞌnaꞌj tūꞌ titlahuaꞌyāꞌtit aꞌntūn tūꞌ tzey. Tūꞌ catlahuaꞌtit talākalhīꞌn. Lāꞌ tūꞌ titlahuaꞌyāꞌtit aꞌntūn tūꞌ līmakuan. Lāꞌ tūꞌ tilaktampiꞌlhīniꞌnāꞌtit.
\v 4 Lāꞌ tūꞌ tihuaꞌnāꞌtit xakoꞌhuaꞌjuaꞌ tachihuīn. Lāꞌ tūꞌ tihuaꞌnāꞌtit aꞌntūn tuntūꞌ ixtapalh. Lāꞌ tūꞌ tilīkalhkamānaꞌnāꞌtit aꞌntūn koꞌhuaꞌjuaꞌ tachihuīn. Huāk huāꞌ tamāꞌna tūꞌ līmakuan. Xatzey camaxquīꞌtit pāxcatcaꞌtzī Dios.
\v 5 Huiꞌxinaꞌn caꞌtzīyāꞌtittzaꞌ que aꞌntīn tatlahuatlāꞌhuan aꞌntūn tūꞌ tzey, xlacaꞌn tūꞌ catitatanūlh aꞌnlhā māpaꞌksīniꞌn Cristo lāꞌ Dios. Tūꞌ catitatanūlh aꞌntī lej tatlahua talākalhīꞌn lāꞌ aꞌntī lej tatlahua aꞌntū lej xakoꞌhuaꞌjuaꞌ lāꞌ aꞌntī lej talaktampiꞌlhīniꞌn de ixlīhuāk catūhuā lāꞌ tūꞌ tapāstaca Dios.
\v 6 Lāꞌ como caꞌtzīyāꞌtit huāꞌmāꞌ, tūꞌ catamakxtektit nacātaꞌaꞌkxokoyāniꞌ huiꞌxinaꞌn, aꞌyuj makapitzīn tahuan que tzē tlahuacan huāꞌ tamāꞌna catūhuā. Aꞌntīn tatlahua huāꞌ tamāꞌna catūhuā, xlacaꞌn tūꞌ taꞌaꞌkahuānaꞌniꞌmāꞌna Dios. Lāꞌ Dios nacāmāpātīnī. 
\v 7 Lāꞌ huiꞌxinaꞌn tūꞌ cacātāꞌtalacxtuctit xlacaꞌn. 
\p
\v 8 Xapūꞌla huiꞌxinaꞌn huaꞌchilh ixtlāꞌhuaꞌnāꞌtit aꞌnlhā cāꞌpucsuaꞌ. Lāꞌ chuhuaꞌj como tāꞌtapaꞌksīyāꞌtit Dios, huaꞌchilh tlāꞌhuaꞌmpāꞌnaꞌntittzaꞌ aꞌnlhā xkaka. Chuntzaꞌ līlacatejtin calatāꞌkchokotit chuntzaꞌ huaꞌchi aꞌntī xalanīꞌn aꞌnlhā xkaka.
\v 9 Palh tlāꞌhuanāuj aꞌnlhā xkaka, nalatāꞌkchokoyāuj chu aꞌnchī Dios lacasquiꞌn. Lāꞌ natlahuayāuj aꞌntūn tzey. Lāꞌ nā nahuanāuj aꞌntū xastuꞌncuaꞌ.
\v 10 Cacaꞌtzītit aꞌntū nalīpāxuhua Dios. Lāꞌ ūꞌtzaꞌ huāꞌmāꞌ catlahuaꞌtit.
\v 11 Tūꞌ catlahuaꞌtit aꞌntū koꞌhuaꞌjuaꞌ huaꞌchi aꞌntī xalanīꞌn nac cāꞌpucsuaꞌ. Tuntūꞌ ixtapalh aꞌntūn tatlahua xlacaꞌn. Xatzey cacāmāsuꞌniꞌtit que tūꞌ tzey aꞌntūn tatlahua.
\v 12 Līmāxanaꞌ līchihuīnaꞌncan aꞌntū xlacaꞌn tatlahua lakatzēꞌk.
\v 13 Por huan xkakanaꞌ tzē cālaktzīꞌnāuj catūhuā aꞌnchīn tahuanīꞌt palh tzey o tūꞌ tzey.
\v 14 Lāꞌ chuntzaꞌ huanican huan aꞌntīn tūꞌ kalhlakaꞌīꞌ: 
\q Huiꞌx, huaꞌchilh lhtatapāꞌt lāꞌ huaꞌchilh xanīn huiꞌx.
\q Calakahuaꞌ lāꞌ catāꞌkaquiꞌ lāꞌ Cristo namāxkakēyāniꞌ. 
\p
\v 15 Calīhuiꞌlīꞌtit līlacatejtin nalatāꞌkchokoyāꞌtit. Tūꞌ calatāꞌkchokotit huaꞌchi aꞌntīn tūꞌ tamāchekxī ixtachihuīn Dios. Līlacatejtin calatāꞌkchokotit como huiꞌxinaꞌn caꞌtzīyāꞌtittzaꞌ.
\v 16 Calīhuiꞌlīꞌtit natlahuaꞌyāꞌtit catūhuā aꞌntūn tzey pōꞌktu aꞌxniꞌcaꞌ tzē natlahuaꞌyāꞌtit. Chuhuaꞌj lej tlahuacan aꞌntūn tūꞌ līmakuan.
\v 17 Lāꞌ xaꞌnca capāstacnaꞌntit. Camāchekxītit aꞌntū ixtapuhuān Dios. Lāꞌ ūꞌtzaꞌ huāꞌmāꞌ catlahuaꞌtit. 
\v 18 Tūꞌ cakaꞌchīꞌtit. Aꞌntīn takaꞌchī, xlacaꞌn tatlahua aꞌntūn tūꞌ līmakuan. Xatzey catamakxtektit que huan Espíritu Santo nacāmāpaꞌksīyāniꞌ.
\v 19 Aꞌxniꞌcaꞌ nalāꞌtāꞌchihuīnaꞌnāꞌtit, camākaꞌtlīꞌtit Dios chuntzaꞌ huaꞌchi tatzoꞌkniꞌ na ixtachihuīn Dios aꞌnlhā huanican salmos lāꞌ nā chuntzaꞌ huan himnos lāꞌ huan tatlīꞌn aꞌntū ixlaꞌ Dios. Catlīꞌniꞌtit huan Māpaꞌksīniꞌ Dios. Camākaꞌtlīꞌtit Dios con ixlīhuāk miꞌaꞌclhcunuccaꞌn.
\v 20 Lāꞌ pōꞌktu camaxquīꞌtit pāxcatcaꞌtzī Dios quinTātaꞌcaꞌn por ixlīhuāk por ixtacuīniꞌ quiMāpaꞌksīniꞌ Jesucristo. 
\s Aꞌnchī maclacasquiꞌn talīlatahuiꞌla huan chiꞌxcuꞌ lāꞌ ixpuscāt aꞌntīn tatapaꞌksī con Cristo
\p
\v 21 Lā como huiꞌxinaꞌn aꞌcnīniꞌniꞌyāꞌtit Dios, nā chuntzaꞌ calāmaktāyaꞌtit huiꞌxinaꞌn.
\p
\v 22 Lāꞌ huiꞌxinaꞌn aꞌntī puscan, caꞌaꞌkahuānaꞌniꞌtit minkōluꞌcaꞌn como chuntzaꞌ māpaꞌksīniꞌn huan quiMāpaꞌksīniꞌcaꞌn Jesucristo.
\v 23 Huan xakōluꞌ māpaꞌksī ixpuscāt chuntzaꞌ huaꞌchi Cristo cāmāpaꞌksī aꞌntīn tatāꞌtapaꞌksī xlaꞌ. Cristo cāmāpūtaxtūnīꞌt xlacaꞌn lāꞌ chuhuaꞌj xlaꞌ cāmāpaꞌksī. 
\v 24 Lāꞌ aꞌntīn tatāꞌtapaꞌksī Cristo, xlacaꞌn taꞌaꞌkahuānaꞌniꞌ Cristo. Lāꞌ nā chuntzaꞌ huan puscan pōꞌktu nataꞌaꞌkahuānaꞌniꞌ ixkōluꞌcaꞌn.
\p
\v 25 Lāꞌ huiꞌxinaꞌn aꞌntīn chiꞌxcuhuīꞌn, cacāpāxquīꞌtit mimpuscancaꞌn chuntzaꞌ huaꞌchi Cristo cāpāxquīꞌ aꞌntīn tatapaꞌksī con xlaꞌ. Xlaꞌ nīlh para nacāmāpūtaxtū. 
\v 26 Xlaꞌ nīlh como quincātlahuacuꞌtuniꞌ xalactzey ixpālacata kalhlakaꞌīꞌyāuj huan xatzey tachihuīn. Lāꞌ māpānūcuꞌtulh quintalaclēꞌiꞌcaꞌn. Lāꞌ chuhuaꞌj aꞌkpaxāuj como xapacanīꞌttzaꞌ quintalaclēꞌiꞌcaꞌn.
\v 27 Lāꞌ Cristo cāmācāxcuꞌtunli ixtachiꞌxcuhuīꞌt como chuntzaꞌ natachāꞌn lacuan na ixlacapūn. Lāꞌ lacasquiꞌlh que lactzey ixtalakōꞌlh huaꞌchi aꞌntū lej tzey lāꞌ lej tzēhuanīꞌt.
\v 28 Tasquiꞌnī que huan chiꞌxcuhuīꞌn natapāxquīꞌ ixpuscancaꞌn chuntzaꞌ huaꞌchi cāpāxquīꞌcan ixaꞌcstucaꞌn. Kalhatin chiꞌxcuꞌ aꞌntī pāxquīꞌ ixpuscāt, nā chuntzaꞌ pāxquīꞌcan ixaꞌcstu.
\v 29 Nīn tintīꞌ caꞌtzalaktzīꞌn ixmacniꞌ. Māhuīꞌcan lāꞌ maktakaꞌlhcan. Lāꞌ nā chuntzaꞌ Cristo cāmaktakaꞌlha aꞌntī ixtachiꞌxcuhuīꞌt.
\v 30 Cristo quincāmaktakaꞌlhāniꞌ como quinaꞌn huaꞌchilh ixmacniꞌ Cristo.
\v 31 Tatzoꞌkniꞌ na ixtachihuīn Dios: “Kalhatin chiꞌxcuꞌ namakxteka ixtātaꞌ lāꞌ ixtzīꞌt. Lāꞌ natāꞌtakēxtimī ixpuscāt. Lāꞌ chuntzaꞌ chu lakatin macniꞌ natala ixtuꞌcaꞌn”. 
\v 32 Huāꞌ tamāꞌna tachihuīn stuꞌncuaꞌ pero jicslīhuaꞌ māchekxīkōꞌcan. Quit icpuhuan que līchihuīnaꞌn de Cristo aꞌnchī cāꞌoꞌkskaꞌlhī ixtachiꞌxcuhuīꞌt. 
\v 33 Lāꞌ nā huanicuꞌtun que tasquiꞌnī que huan chiꞌxcuhuīꞌn natapāxquīꞌ ixpuscancaꞌn chuntzaꞌ huaꞌchi cāpāxquīꞌcan ixaꞌcstucaꞌn. Lāꞌ tasquiꞌnī que huan puscan nataꞌaꞌcnīniꞌniꞌ ixkōluꞌcaꞌn.

\c 6
\p
\v 1 Huiꞌxinaꞌn aꞌntīn camanaꞌ caꞌaꞌkahuānaꞌniꞌtit mintātaꞌcaꞌn lāꞌ mintzīꞌtcaꞌn. Chuntzaꞌ tasquiꞌnī como chuntzaꞌ ixtapuhuān Dios.
\v 2 Dios huan que nacāsicuaꞌlanālī aꞌntī natatlōkentaxtū huāꞌmāꞌ līmāpaꞌksīn. Huāꞌmāꞌ ūꞌtzaꞌ huan xapūꞌla līmāpaꞌksīn aꞌntū chuntzaꞌ līchihuīnaꞌn Dios. Huāꞌmāꞌ līmāpaꞌksīn chuntzaꞌ huan: “Caꞌaꞌcnīniꞌniꞌ mintātaꞌ lāꞌ mintzīꞌt.
\v 3 Chuntzaꞌ līpāxuj nalatahuiꞌlaꞌyaꞌ. Lāꞌ chuntzaꞌ makān nalatahuiꞌlaꞌyaꞌ nac quilhtamacuj”.
\p
\v 4 Lāꞌ huiꞌxinaꞌn aꞌntī xatātaꞌ lāꞌ xatzīꞌt, tūꞌ cacāmakāꞌkchipintit mincamanaꞌcaꞌn. Cacāmakastactit chu aꞌnchī Dios huan. Cacāmāsuꞌniꞌtit aꞌnchī nataꞌaꞌkahuānaꞌniꞌ Dios.
\p
\v 5 Lāꞌ huiꞌxinaꞌn aꞌntī makscujnīꞌn, caꞌaꞌkahuānaꞌniꞌtit aꞌntīn cātāꞌscujāꞌtit. Cacāꞌaꞌcnīniꞌniꞌtit lāꞌ cacājicuaꞌniꞌtit. Xaꞌnca cascujtit huaꞌchilh ixtāꞌscujtit māniꞌ Cristo.
\p
\v 6 Xaꞌnca cascujtit lāꞌ tūꞌ xmān aꞌxniꞌcaꞌ cātalaktzīꞌnāniꞌ aꞌntīn tāꞌscujāꞌtit. Tūꞌ xmān xlacaꞌn nacāmāpāxuhuīꞌcuꞌtunāꞌtit. Xaꞌnca cascujtit para namāpāxuhuīꞌyāꞌtit Dios como huaꞌchilh ixtāꞌscujtit māniꞌ Cristo.
\v 7 Līpāxuj cascujtit. Tūꞌ xmān scujpāꞌnaꞌntit para huan chiꞌxcuhuīꞌn. Nā scujpāꞌnaꞌntit para Dios.
\v 8 Huiꞌxinaꞌn caꞌtzīyāꞌtit que quiMāpaꞌksīniꞌcaꞌn Jesucristo nacāmāpalakōꞌ chāꞌtunuꞌ chu aꞌnchī tlahuanīꞌt aꞌntūn tzey aꞌyuj tasācuaꞌ lāꞌ aꞌyuj māpaꞌksīniꞌ. 
\p
\v 9 Lāꞌ huiꞌxinaꞌn aꞌntī māpaꞌksīniꞌnāꞌtit, lactzey calaꞌtit con aꞌntīn xatatamāuj mintasācuaꞌcaꞌn. Lāꞌ tūꞌ nalīmaclhcāyāꞌtit de catūhuā. Capāstactit que quiMāpaꞌksīniꞌcaꞌn huiꞌlachaꞌ nac aꞌkapūn. Xlaꞌ chu aꞌcxtim cāmāpaꞌksī huan tasācuaꞌ lāꞌ aꞌntīn tamāpaꞌksīniꞌn. Lāꞌ Dios chu lakatin cālaktzīꞌn. 
\s Dios quincāmaktāyayāniꞌ lāꞌ chuntzaꞌ tūꞌ naquincātlajayāniꞌ huan koꞌtiꞌtiꞌ
\p
\v 10 Chuhuaꞌj, tāꞌtimīn, āꞌxmān iccāhuanicuꞌtunāniꞌ catūhuā. Tūꞌ titalactlajīꞌyāꞌtit aꞌnchī kalhlakaꞌīꞌyāꞌtit huan Māpaꞌksīniꞌ Jesucristo. Xlaꞌ lej kaꞌlhī līmāpaꞌksīn lāꞌ tzē nacāmaktāyayāniꞌ.
\v 11 Catamakxtektit que Dios nacāmaktāyayāniꞌ lāꞌ chuntzaꞌ tūꞌ caticāꞌaꞌkxokoniꞌ huan koꞌtiꞌtiꞌ. Lāꞌ aꞌnchī Dios quincālīmaktāyayāniꞌ, ūꞌtzaꞌ huaꞌchi lakatin armadura aꞌntūn tamaclacasquiꞌn huan soldados aꞌxniꞌcaꞌ taꞌaꞌn nac guerra.
\v 12 Lāꞌ nā quinaꞌn huaꞌchilh ixaꞌuj nac guerra. Quintāꞌcaꞌtzacaꞌn tūꞌ chiꞌxcuhuīꞌn. Quintāꞌcaꞌtzacaꞌn ūꞌtzaꞌ huan xakoꞌhuaꞌjuaꞌ līcaꞌtzīnniꞌ aꞌntīn takaꞌlhī līmāpaꞌksīn lāꞌ tamāpaꞌksīniꞌn nac huāꞌmāꞌ quilhtamacuj aꞌnlhā tlahuacan talaclēꞌiꞌ lāꞌ talatlāꞌhuan nac cāꞌūꞌnīꞌn. 
\v 13 Lāꞌ ūꞌtzaꞌ calītamakxtektit que Dios nacāmaktāyayāniꞌ de ixlīhuāk catūhuā. Huāꞌmāꞌ huaꞌchi armadura aꞌntū Dios cāmaxquīꞌyāniꞌ. Chuntzaꞌ tūꞌ caticātatlajaniꞌ mintāꞌcaꞌtzacaꞌn. Lāꞌ aꞌyuj tlajanīꞌtaꞌntit mintāꞌcaꞌtzacaꞌn, pōꞌktu cāxniꞌj catahuiꞌlaꞌtit. Lāsāꞌ namimpala huan mintāꞌcaꞌtzacaꞌn. Lāꞌ palh cāxniꞌj tahuiꞌlaꞌyāꞌtit, tūꞌ caticātlajaniꞌ.
\v 14 Pōꞌktu cāxniꞌj catahuiꞌlaꞌtit. Camaklhtīniꞌntit aꞌntū Dios cāmaxquīꞌyāniꞌ aꞌntū huaꞌchi armadura. Kalhatin tropa chāꞌxpātahuiꞌla lakatin cinturón lāꞌ lēꞌn āꞌcatūhuā aꞌntū namaktāya ixcuꞌxan. Lāꞌ nā huiꞌxinaꞌn tasquiꞌnī que nalakapasāꞌtit aꞌntū xastuꞌncuaꞌ lāꞌ xmān natlahuaꞌyāꞌtit aꞌntūn tzey. 
\v 15 Huan tropa tatūnū botas aꞌxniꞌcaꞌ aꞌn calhāhuā. Lāꞌ huiꞌxinaꞌn namācaꞌtzīnīniꞌntāꞌkchokoyāꞌtit huan xatzey tachihuīn ixpālacata aꞌnchī koꞌxamixli Dios lāꞌ huan tachiꞌxcuhuīꞌt.
\v 16 Huan tropa lēꞌn aꞌntū pūlītamaktāya. Lāꞌ huanmāꞌ tūꞌ lakpusa huan flechas aꞌntū huaꞌchilh talama aꞌntū macāꞌn huan ixtāꞌcaꞌtza. Lāꞌ huiꞌxinaꞌn palh līpāhuaꞌnāꞌtit Dios, ūꞌtzaꞌ huaꞌchi aꞌntū pūtamaktāyaꞌyāꞌtit. Lāꞌ chuntzaꞌ huan koꞌtiꞌtiꞌ tūꞌ caticātlajaniꞌ.
\v 17 Huan tropa maclacasquiꞌn ixtāꞌknuꞌ de līcāꞌn. Lāꞌ huiꞌxinaꞌn tasquiꞌnī que xaꞌnca nacaꞌtzīyāꞌtit que Dios cāmāpūtaxtūnīꞌtaꞌniꞌtzaꞌ. Lāꞌ ūꞌtzaꞌ līcaꞌtzīyāꞌtit que natlajanaꞌnāꞌtit por ixlīmāpaꞌksīn Dios. Lāꞌ huanmāꞌ huaꞌchilh ūꞌtzaꞌ mintāꞌknuꞌcaꞌn de līcāꞌn. Lāꞌ ixtachihuīn Dios, ūꞌtzaꞌ huaꞌchi lakatin espada aꞌntū huan Espíritu Santo cāmaxquīꞌyāniꞌ. 
\v 18 Lāꞌ pōꞌktu cakalhtōꞌkaꞌniꞌtit Dios ixpālacata aꞌntū maclacasquiꞌnāꞌtit. Casquiꞌniꞌtit Dios que nacāmaktāyayāniꞌ. Lāꞌ catamakxtektit que huan Espíritu Santo nacāmaktāyayāniꞌ nakalhtōꞌkaꞌyāꞌtit. Skalalh catahuiꞌlaꞌtit. Lāꞌ tūꞌ tijiclhuaꞌyāꞌtit de nakalhtōꞌkaꞌyāꞌtit. Lāꞌ pōꞌktu cacālīkalhtōꞌkaꞌtit ixlīhuākcaꞌn ixtachiꞌxcuhuīꞌt Dios.
\v 19 Lāꞌ nā nakalhtōꞌkaꞌyāꞌtit por quit. Casquiꞌniꞌtit que Dios naquimāsuꞌniꞌ aꞌnchī naꞌicchihuīnaꞌn lāꞌ naquimaktāya para que tūꞌ naꞌicjicuaꞌn. Lāꞌ casquiꞌntit para que quit tzē naꞌicmācaꞌtzīnīniꞌn huan xatzey tachihuīn ixpālacata Jesucristo.
\v 20 Dios quimacaminīꞌt para naꞌicmāsuꞌyu huan xatzey tachihuīn. Lāꞌ ūꞌtzaꞌ iclītachīꞌnīꞌt chuhuaꞌj. Casquiꞌniꞌtit Dios para que tūꞌ naꞌicjicuaꞌn aꞌxniꞌcaꞌ naꞌicmāsuꞌyu, chuntzaꞌ huaꞌchi tasquiꞌnī.
\s Cāmacāꞌniꞌca saludos
\p
\v 21 Chōꞌla huiꞌxinaꞌn caꞌtzīcuꞌtunāꞌtit aꞌnchī iclīlahuīꞌ lāꞌ aꞌntū ictlahuamāꞌ. Huāk huāꞌmāꞌ nacāhuaniyāniꞌ quintāꞌtincaꞌn Tíquico. Xlaꞌ xaꞌnca tāꞌscuja Dios.
\v 22 Uꞌtzaꞌ iccālīlakmacāꞌnāchāniꞌ huiꞌxinaꞌn. Chuntzaꞌ xlaꞌ tzē nacāhuaniyāniꞌ aꞌnchī iclīlahuiꞌlānaꞌuj. Lāꞌ chuntzaꞌ nacāmākoꞌxamixīyāniꞌ huiꞌxinaꞌn.
\p
\v 23 Icsquiꞌniꞌ Dios, quinTātaꞌcaꞌn, lāꞌ huan Māpaꞌksīniꞌ Jesucristo que cacāmātzaꞌtaꞌtīꞌniꞌniꞌ miꞌaꞌclhcunuccaꞌn. Lāꞌ nā icsquiꞌniꞌ Dios que cacāmaktāyaniꞌ para que xaꞌnca nakalhlakaꞌīꞌyāꞌtit lāꞌ nalāpāxquīꞌyāꞌtit. 
\v 24 Dios cacāsicuaꞌlanālīkōꞌniꞌ milīhuākcaꞌn aꞌntī lej xaꞌnca pāxquīꞌyāꞌtit quiMāpaꞌksīniꞌcaꞌn Jesucristo con ixlīhuāk miꞌaꞌclhcunuccaꞌn. Amén.