\id 1TH
\h 1 TESALONICENSES
\toc1 1 TESALONICENSES
\mt Huan Xapūꞌla Carta aꞌntū Cāmacāꞌniꞌca Xalanīꞌn nac Tesalónica
\c 1
\s Pablo lāꞌ aꞌntī ixtatāꞌscuja tatzoꞌkli lakatin carta 
\p
\v 1 Ictzoꞌknumāꞌnauj quinaꞌn, Pablo lāꞌ Silvano lāꞌ Timoteo. Iccātzoꞌknuniꞌmāꞌniꞌ huiꞌxinaꞌn xalanīꞌn nac Tesalónica aꞌntī kalhlakaꞌīꞌyāꞌtit lāꞌ tapaꞌksīyāꞌtit con Dios quinTātaꞌcaꞌn lāꞌ nā huan Māpaꞌksīniꞌ Jesucristo. Dios cacāsicuaꞌlanālīniꞌ huiꞌxinaꞌn lāꞌ xaꞌnca cacāꞌaꞌnīꞌniꞌniꞌ. 
\s Tasuꞌyulh aꞌnchī lej takalhlakaꞌīꞌlh xalanīꞌn nac Tesalónica
\p
\v 2 Pōꞌktu icmaxquīꞌyāuj pāxcatcaꞌtzī Dios por mimpālacatacaꞌn lāꞌ pōꞌktu icorarlīyāuj por huiꞌxinaꞌn.
\v 3 Iccālīpāstacāniꞌ huiꞌxinaꞌn na ixlacapūn Dios quinTātaꞌcaꞌn aꞌntū tlahuaꞌtit huiꞌxinaꞌn como ūꞌtzaꞌ lītasuꞌyu aꞌnchī lej kalhlakaꞌīꞌyāꞌtit. Lāꞌ iccālīpāstacāniꞌ aꞌnchī lej scujtit como ūꞌtzaꞌ lītasuꞌyu aꞌnchī pāxquīꞌyāꞌtit Dios. Lāꞌ iccālīpāstacāniꞌ huiꞌxinaꞌn aꞌnchī tūꞌ makxtekāꞌtit kalhlakaꞌīꞌyāꞌtit quiMāpaꞌksīniꞌcaꞌn Jesucristo.
\v 4 Dios lej cāpāxquīꞌyāniꞌ huiꞌxinaꞌn, tāꞌtimīn. Lāꞌ quinaꞌn iccaꞌtzīyāuj que Dios cālacsacnīꞌtaꞌniꞌ huiꞌxinaꞌn.
\v 5 Huan xatzey tachihuīn aꞌntū iccāquīmāsuꞌniꞌniꞌ huiꞌxinaꞌn, ūꞌtzaꞌ tūꞌ xmān quintachihuīncaꞌn. Xaꞌicmāsuꞌyuyāuj por ixlīmāpaꞌksīn huan Espíritu Santo. Lāꞌ xaꞌnca xaꞌiccaꞌtzīyāuj que lej stuꞌncuaꞌ huan xatzey tachihuīn aꞌntū xaꞌicmāsuꞌyuyāuj. Huiꞌxinaꞌn caꞌtzīyāꞌtit aꞌnchī lacatejtin xaꞌiclatlāꞌhuanāuj aꞌxniꞌcaꞌ xaꞌiccātāꞌlahuiꞌlachāniꞌ. Lāꞌ xaꞌiclatlāꞌhuanāuj chuntzaꞌ por mimpālacatacaꞌn.
\p
\v 6 Lāꞌ huiꞌxinaꞌn quilāmakscaꞌtui lāꞌ chuntzaꞌ makscaꞌtxtutit huan Māpaꞌksīniꞌ. Aꞌyuj lej līpātīniꞌntit aꞌxniꞌcaꞌ kalhlakaꞌīꞌtit huan xatzey tachihuīn, pero lej ixkaꞌlhīyāꞌtit tapāxuhuān como huan Espíritu Santo cāmaxquīꞌniꞌ tapāxuhuān.
\v 7 Lāꞌ como tacaꞌtzīlh aꞌnchī huiꞌxinaꞌn līlatāꞌkchokoyāꞌtit, nā chuntzaꞌ talīlatāꞌkchoko ixlīhuākcaꞌn aꞌntīn takalhlakaꞌīꞌnīꞌt aꞌntī xalanīꞌn nac Macedonia lāꞌ nac Acaya.
\v 8 Chuntzaꞌ līꞌaꞌkahuanīꞌt ixtachihuīn huan Māpaꞌksīniꞌ por mimpālacatacaꞌn. Lāꞌ tūꞌ xmān nac Macedonia lāꞌ nac Acaya, chu calhāhuā caꞌtzīcan aꞌnchī huiꞌxinaꞌn kalhlakaꞌīꞌyāꞌtit Dios. Lāꞌ ūꞌtzaꞌ tūꞌ lītasquiꞌnī naꞌicuanāuj nīn lakatin tachihuīn.
\v 9 Ixlīhuākcaꞌn quincātahuaniyāniꞌ aꞌnchī huiꞌxinaꞌn kalhlakaꞌīꞌtit quintachihuīncaꞌn aꞌxniꞌcaꞌ iccāquīlaklaniꞌ. Lāꞌ huancan aꞌnchī huiꞌxinaꞌn lītalakspiꞌttit huan ídolos lāꞌ stālaniꞌtit Dios, lāꞌ chuhuaꞌj tāꞌscujāꞌtittzaꞌ Dios aꞌntī xalakahuan lāꞌ scanaꞌnca.
\v 10 Lāꞌ huancan aꞌnchī huiꞌxinaꞌn kaꞌlhīpāꞌnaꞌntittzaꞌ ixOꞌkxaꞌ Dios aꞌntī namināchaꞌ nac aꞌkapūn. Huāꞌmāꞌ Dios mālakahuanīchokolh. Huāꞌmāꞌ ūꞌtzaꞌ Jesús aꞌntī quincāmāpūtaxtūyāniꞌ, lāꞌ chuntzaꞌ, aꞌxniꞌcaꞌ Dios nalacāxtlahuakōꞌ, tūꞌ caquinticāmāpātīnīniꞌ por quintalaclēꞌiꞌcaꞌn.
\c 2
\s Aꞌnchī Pablo scujli nac Tesalónica
\p
\v 1 Tāꞌtimīn, huiꞌxinaꞌn caꞌtzīyāꞌtit que tūꞌ chu tlakaj iccāquīlaklaniꞌ.
\v 2 Huiꞌxinaꞌn caꞌtzīyāꞌtit aꞌnchī quincātamāpātīnīniꞌ lāꞌ quincātalakapalaniꞌ nac Filipos aꞌxniꞌcaꞌ tūnaꞌj xaꞌicchāꞌnāuj nac Tesalónica. Lāꞌ aꞌyuj quincāpātleꞌkeniꞌniꞌ huāꞌmāꞌ, pero Dios quincāmaktāyaniꞌ lāꞌ chuntzaꞌ iccāhuaniniꞌ huan xatzey tachihuīn aꞌntū Dios mācaꞌtzīnīniꞌlh lāꞌ tūꞌ iclacapuhuáuj, aꞌyuj quincātamāmakchuyīcuꞌtuniꞌ. 
\v 3 Quinaꞌn iccāmaxquīꞌniꞌ tapāstacnaꞌ. Lāꞌ aꞌntū iccāhuaniniꞌ huiꞌxinaꞌn ūꞌtzaꞌ xastuꞌncuaꞌ. Tuntūꞌ icpāstacuiꞌ. Xaꞌiccāhuanicuꞌtunāniꞌ ixtachihuīn Dios, lāꞌ xmān ūꞌtzaꞌ iccāquīlīlaklaniꞌ. Tūꞌ iccāquīꞌaꞌkxokoniꞌ. 
\v 4 Dios quincālaktzīꞌniꞌ xalactzey lāꞌ quincālīmāmacūꞌniꞌ naꞌicmāsuꞌyuyāuj xatzey tachihuīn. Lāꞌ ūꞌtzaꞌ iclīmāsuꞌyuyāuj chu aꞌnchī Dios lacasquiꞌn. Quinaꞌn más ictlahuacuꞌtunāuj ixtapuhuān Dios lāꞌ tūꞌ ixtapuhuāncaꞌn tachiꞌxcuhuīꞌt. Dios ūꞌtzaꞌ laktzīꞌn quiꞌaꞌclhcunuccaꞌn.
\v 5 Huiꞌxinaꞌn caꞌtzīyāꞌtit que quinaꞌn tūꞌ iccāquīlīmākaꞌtlīꞌniꞌ. Lāꞌ nīn tuntūꞌ iccāquīꞌaꞌkxokomaklhtīcuꞌtuniꞌ. Huāꞌmāꞌ Dios caꞌtzī.
\v 6 Tūꞌ xaꞌiclacasquiꞌnāuj que huan tachiꞌxcuhuīꞌt naquincātaꞌaꞌcnīniꞌniꞌyāniꞌ, nīn huiꞌxinaꞌn, nīn āꞌmakapitzīn, aꞌyuj quinaꞌn ixapóstoles Cristo lāꞌ ūꞌtzaꞌ līminīꞌniꞌ caquilāꞌaꞌcnīniꞌniꞌuj.
\v 7 Lacatzucu xaꞌiccātāꞌchihuīnaꞌnāniꞌ huaꞌchi kalhatin puscāt aꞌntī cāmaktakaꞌlha ixcamanaꞌ.
\v 8 Xaꞌiccāpāxquīꞌyāniꞌ huiꞌxinaꞌn. Lāꞌ ūꞌtzaꞌ xaꞌiccālīmaxquīꞌcuꞌtunāniꞌ tūꞌ xmān huan xatzey tachihuīn; xaꞌiccāmaxquīꞌcuꞌtunāniꞌ nā quinquilhtamacujcaꞌn, tanto xaꞌiccāpāxquīꞌyāniꞌ. 
\v 9 Tāꞌtimīn, huiꞌxinaꞌn pāstacāꞌtit aꞌnchī xaꞌicscujāuj lāꞌ aꞌnchī xaꞌicpātīyāuj para naꞌiclītapātleꞌkeniꞌyāuj. Quinaꞌn tūꞌ xaꞌiccāmāmakasputūcuꞌtunāniꞌ. Lāꞌ ūꞌtzaꞌ xaꞌiclīscujāuj tuncuj lāꞌ tzīꞌsa aꞌxniꞌcaꞌ xaꞌiccāmāsuꞌniꞌyāniꞌ huiꞌxinaꞌn ixtachihuīn Dios.
\p
\v 10 Huiꞌxinaꞌn laktzīꞌntit lāꞌ Dios nā laktzīꞌlh aꞌnchī xaꞌiccātāꞌlahuiꞌlaniꞌ huiꞌxinaꞌn aꞌntī kalhlakaꞌīꞌyāꞌtit. Quinaꞌn tzeyā chiꞌxcuhuīꞌn xaꞌicuanīꞌtauj. Līlacatejtin xaꞌiclatāꞌkchokoyāuj. Nīn tuntūꞌ xaꞌictlahuayāuj aꞌntūn tūꞌ līmakuan. Lāꞌ chuntzaꞌ nīn tintīꞌ tzē naquincālēꞌksaꞌnīniꞌnāniꞌ.
\v 11 Nā huiꞌxinaꞌn caꞌtzīyāꞌtit aꞌnchī huaꞌchi kalhatin xatātaꞌ cāmaxquīꞌ tapāstacnaꞌ ixcamanaꞌ, chuntzaꞌ quinaꞌn xaꞌiccāmaxquīꞌyāniꞌ tapāstacnaꞌ milīhuākcaꞌn lāꞌ xaꞌiccāmākōꞌxakaꞌtlīꞌyāniꞌ.
\v 12 Lāꞌ lej xaꞌiccāhuaniyāniꞌ que tasquiꞌnī līlacatejtin nalatāꞌkchokoyāꞌtit aꞌnchī Dios lacasquiꞌn. Dios ūꞌtzaꞌ aꞌntī cātaꞌsaniꞌnīꞌtaꞌniꞌ aꞌnlhā xlaꞌ māpaꞌksīniꞌn lāꞌ aꞌnlhā lej cāꞌtzēhuanīꞌt.
\p
\v 13 Lāꞌ nā pōꞌktu icmaxquīꞌyāuj pāxcatcaꞌtzī Dios aꞌnchī huiꞌxinaꞌn kalhlakaꞌīꞌtit ixtachihuīn Dios aꞌxniꞌcaꞌ xaꞌiccāhuaniyāniꞌ. Huiꞌxinaꞌn caꞌtzītit lāꞌ kalhlakaꞌīꞌtit que aꞌntū iccāmāsuꞌniꞌniꞌ, ūꞌtzaꞌ ixtachihuīn Dios lāꞌ tūꞌ ixtachihuīncaꞌn tachiꞌxcuhuīꞌt. Lāꞌ stuꞌncuaꞌ ixtachihuīn Dios. Lāꞌ Dios ūꞌtzaꞌ aꞌntī scuja na miꞌaꞌclhcunuccaꞌn huiꞌxinaꞌn aꞌntī kalhlakaꞌīꞌyāꞌtit.
\v 14 Huiꞌxinaꞌn, tāꞌtimīn, cāpātleꞌkeniꞌniꞌ aꞌcxtim huaꞌchi cāpātleꞌkeniꞌlh xalanīꞌn nac Judea aꞌntīn tatapaꞌksī con Dios lāꞌ takalhlakaꞌīꞌ Jesucristo. Mintāꞌmacchicniꞌcaꞌn cātamacaputzaniꞌ huiꞌxinaꞌn. Lāꞌ huan israelitas tamacaputzalh ixtāꞌisraelitascaꞌn xalanīꞌn nac Judea aꞌntīn takalhlakaꞌīꞌ.
\v 15 Huan israelitas tamaknīlh huan ixaꞌctaꞌsanaꞌnīꞌn Dios. Lāꞌ tamaknīlh huan Māpaꞌksīniꞌ Jesús. Lāꞌ quinaꞌn quincātamacaputzaniꞌ. Dios tūꞌ lakatī aꞌntūn tatlahua xlacaꞌn. Xlacaꞌn tatāꞌlāstaꞌla ixlīhuākcaꞌn tachiꞌxcuhuīꞌt. 
\v 16 Xlacaꞌn tūꞌ quincātamakxtekāniꞌ naꞌiccātāꞌchihuīnaꞌnāuj aꞌntīn tūꞌ israelitas. Quinaꞌn iccātāꞌchihuīnaꞌncuꞌtunāuj para que natapūtaxtu. Lāꞌ chuntzaꞌ huan israelitas āꞌchulāꞌ takaꞌlhī ixtalaclēꞌiꞌcaꞌn. Lāꞌ ūꞌtzaꞌ nacālīmāpātīnī Dios.
\s Pablo ixcālakaꞌmpalacuꞌtun xalanīꞌn nac Tesalónica 
\p
\v 17 Aꞌxniꞌcaꞌ iccāmakxtekniꞌ lāꞌ lātmaꞌj tūꞌ xaꞌiccālaktzīꞌnāniꞌ, pōꞌktu xaꞌiccāpāstacāniꞌ huiꞌxinaꞌn lāꞌ lej xaꞌiccālaktzīꞌncuꞌtunāniꞌ. 
\v 18 Quinaꞌn xaꞌiccālakaꞌncuꞌtunāchāniꞌ huiꞌxinaꞌn. Lāꞌ quit, Pablo, xaꞌiccālakaꞌncuꞌtunāchāniꞌ maklhūhuaꞌ pero huan koꞌtiꞌtiꞌ tūꞌ quincāmakxtekniꞌ naꞌicaꞌnāchāuj. 
\v 19 Aꞌxniꞌcaꞌ huan Māpaꞌksīniꞌ Jesucristo namin lāꞌ natahuiꞌlayāuj na ixlacapūn, naꞌiccālīpāxuhuayāniꞌ como kalhlakaꞌīꞌyāꞌtit. Lāꞌ por mimpālacatacaꞌn nacaꞌtzīcan aꞌnchī xaꞌictāꞌscujāuj Dios.
\v 20 Chuntzaꞌ huiꞌxinaꞌn quilāmaxquīꞌyāuj tapāxuhuān lāꞌ iclīkaꞌtlaꞌjcaꞌtzīyāuj por huiꞌxinaꞌn.

\c 3
\p
\v 1 Como tūꞌ xaꞌiccaꞌtzīyāuj aꞌnchī ixlīlatlāꞌhuaꞌnāꞌtit, tūꞌtzaꞌ xaꞌictāyaniꞌyāuj. Ictipuhuáuj xaꞌictachokouj quiꞌaꞌcstucaꞌn, quit lāꞌ Silas, nac Atenas,
\v 2 lāꞌ xaꞌiccālakmacāꞌnchāniꞌ Timoteo, quintāꞌtincaꞌn. Xlaꞌ tāꞌscuja Dios lāꞌ māsuꞌyu xatzey tachihuīn aꞌntū ixpālacata Cristo. Iccālakmacāꞌnchāniꞌ para que nacāmaxquīꞌyāniꞌ tapāstacnaꞌ lāꞌ nacāmaktāyayāniꞌ para que más xaꞌnca nakalhlakaꞌīꞌyāꞌtit.
\v 3 Huāꞌmāꞌ ictlahuáuj para que tūꞌ nataxtutāyaꞌyāꞌtit por ixpālacata aꞌntū līpātīniꞌmpāꞌnaꞌntit. Huiꞌxinaꞌn caꞌtzīyāꞌtittzaꞌ que tasquiꞌnī que napātīniꞌnāuj huāꞌtzāꞌ.
\v 4 Aꞌxniꞌcaꞌ xaꞌiccātāꞌlahuiꞌlachāniꞌ iccāhuaniniꞌ aꞌnchī nalīpātīniꞌnāuj. Lāꞌ chuntzaꞌ pātleꞌkelh. Uꞌtzaꞌ huāꞌmāꞌ caꞌtzīyāꞌtit.
\v 5 Lāꞌ ūꞌtzaꞌ iclīmacāꞌnchaꞌ Timoteo. Como tūꞌ xaꞌiccaꞌtzī aꞌnchī ixlīlatlāꞌhuaꞌnāꞌtit, tūꞌtzaꞌ xaꞌictāyaniꞌ. Xaꞌiccaꞌtzīcuꞌtun palh ixkalhlakaꞌīꞌyāꞌtitcus xaꞌnca. Quit xaꞌiccaꞌtzīcuꞌtun palh huan koꞌtiꞌtiꞌ xmān ixcālīlaktzīꞌnīꞌtaꞌniꞌ. Chuntzaꞌ chu xmān xaꞌicscujtamakaꞌuj.
\p
\v 6 Chuhuaꞌj Timoteo ixcālakanīꞌtaꞌnchāniꞌ lāꞌ chimpātzaꞌ. Quincāhuaniyāniꞌ aꞌnchī lej xaꞌnca kalhlakaꞌīꞌyāꞌtit lāꞌ aꞌnchī lāpāxquīꞌyāꞌtit. Lāꞌ nā quincāhuaniyāniꞌ aꞌnchī quilāpāstacmāꞌnanchāuj pōꞌktu lāꞌ quilāpāxquīꞌyāuj. Lāꞌ xlaꞌ quincāhuaniniꞌ que huiꞌxinaꞌn quilālaktzīꞌncuꞌtunāuj chuntzaꞌ huaꞌchi iccālaktzīꞌncuꞌtunāniꞌ nā quinaꞌn. 
\v 7 Lāꞌ como iccaꞌtzīuj que huiꞌxinaꞌn nā xaꞌnca kalhlakaꞌīꞌyāꞌtit, ūꞌtzaꞌ xaꞌiclītakoꞌxakaꞌtlīꞌyāuj, aꞌyuj xaꞌicpātīniꞌmāꞌnauj lāꞌ aꞌyuj lej ixquincāpātleꞌkeniꞌmāꞌniꞌ aꞌntūn tūꞌ tzey.
\v 8 Chuhuaꞌj iclīpāxuhuayāuj como iccaꞌtzīujtzaꞌ que huiꞌxinaꞌn nā xaꞌnca kalhlakaꞌīꞌyāꞌtit quiMāpaꞌksīniꞌcaꞌn. 
\v 9 Lāꞌ chuhuaꞌj tzē naꞌicmaxquīꞌyāuj pāxcatcaꞌtzī Dios por mimpālacatacaꞌn. Icmaxquīꞌyāuj lhūhuaꞌ pāxcatcaꞌtzī Dios porque lej iclīpāxuhuayāuj na ixlacapūn Dios por mimpālacatacaꞌn.
\v 10 Tuncuj lāꞌ tzīꞌsa lej icsquiꞌniꞌyāuj Dios que caꞌiccālakaꞌnchāniꞌ huiꞌxinaꞌn porque iccāmāsuꞌniꞌcuꞌtunāniꞌ āꞌmacstiꞌnaꞌj aꞌntū ticāsputniꞌyāniꞌ huiꞌxinaꞌn aꞌnchī kalhlakaꞌīꞌyāꞌtit. 
\p
\v 11 Māniꞌ Dios, quinTātaꞌcaꞌn, lāꞌ quiMāpaꞌksīniꞌcaꞌn Jesucristo caquincātamakxtekniꞌ para que tzē naꞌiccālakaꞌnāchāniꞌ huiꞌxinaꞌn.
\v 12 Cacāmaktāyaniꞌ huan Māpaꞌksīniꞌ para que āꞌchulāꞌ nalāpāxquīꞌyāꞌtit, lāꞌ āꞌchulāꞌ nacāpāxquīꞌyāꞌtit ixlīhuākcaꞌn tachiꞌxcuhuīꞌt, chuntzaꞌ huaꞌchi quinaꞌn iccāpāxquīꞌyāniꞌ huiꞌxinaꞌn.
\v 13 Dios cacāmāhuixcānīniꞌ lāꞌ cacāmāpānūniꞌkōꞌniꞌ ixlīhuāk aꞌntū koꞌhuaꞌjuaꞌ na miꞌaꞌclhcunuccaꞌn para que chuntzaꞌ nīn tintīꞌ tzē caticālēꞌksaꞌnīniꞌniꞌ aꞌxniꞌcaꞌ natāyayāchipitit na ixlacapūn quinTātaꞌcaꞌn Dios aꞌxniꞌcaꞌ namimpala quiMāpaꞌksīniꞌcaꞌn Jesús con ixlīhuākcaꞌn aꞌntī ixlaꞌ.
\c 4
\s Aꞌnchīn tzē nalīlatahuiꞌlacan chu aꞌnchī Dios lacasquiꞌn 
\p
\v 1 Aꞌxmān iccāhuanicuꞌtunāniꞌ huiꞌxinaꞌn, tāꞌtimīn. Quinaꞌn iccāmāsuꞌniꞌniꞌ aꞌnchī nalīlatāꞌkchokoyāꞌtit chu aꞌnchī Dios lacasquiꞌn. Lāꞌ chuntzaꞌ latāꞌkchokopāꞌnaꞌntit. Lāꞌ chuhuaꞌj quinaꞌn iccāsquiꞌniꞌyāniꞌ huiꞌxinaꞌn lāꞌ iccāmaxquīꞌyāniꞌ tapāstacnaꞌ por ixquilhtampān Jesús: āꞌchulāꞌ chuntzaꞌ calatāꞌkchokotit.
\p
\v 2 Huiꞌxinaꞌn pāstacāꞌtit aꞌntū iccāmāsuꞌniꞌniꞌ por ixquilhtampān Māpaꞌksīniꞌ Jesús.
\v 3 Dios lacasquiꞌn que līlacatejtin nalatahuiꞌlayāꞌtit. Tūꞌ namakpuscātiniꞌnāꞌtit.
\v 4 Cacaꞌtzīꞌtit milīhuākcaꞌn aꞌnchī naputzayāꞌtit mimpuscātcaꞌn chu aꞌnchī minīꞌniꞌ na ixlacapūn Dios lāꞌ nā na ixlacapūncaꞌn tachiꞌxcuhuīꞌt.
\v 5 Tūꞌ caputzatit mimpuscātcaꞌn con xakoꞌhuaꞌjuaꞌ tapāstacnaꞌ huaꞌchi tatlahua huan chiꞌxcuhuīꞌn aꞌntīn tūꞌ talakapasa Dios.
\v 6 Tūꞌ timakpuscātīniꞌnāꞌtit. Tūꞌ tilālakatlajayāꞌtit chuntzaꞌ, porque chuntzaꞌ tū tzey tlahuaniꞌyāꞌtit āꞌchāꞌtin chiꞌxcuꞌ. QuiMāpaꞌksīniꞌcaꞌn nacāmāpātīnī aꞌntī chuntzaꞌ natatlahua. Lāꞌ ūꞌtzaꞌ huāꞌmāꞌ xaꞌnca iccāhuaninīꞌtaꞌniꞌ huiꞌxinaꞌn xapūꞌla.
\v 7 Dios quincālacsacnīꞌtaꞌniꞌ lāꞌ xlaꞌ tūꞌ lacasquiꞌn natlahuayāuj aꞌntūn koꞌhuaꞌjuaꞌ. Quincālacsacnīꞌtaꞌniꞌ para natlahuayāuj aꞌntū xatzey na ixlacapūn Dios. 
\v 8 Aꞌntīn tūꞌ natatlōkentaxtū huāꞌmāꞌ līmāscaꞌtīn, xlacaꞌn tūꞌ talakmakaꞌn chiꞌxcuhuīꞌn; xlacaꞌn talakmakaꞌn Dios. Lāꞌ Dios ūꞌtzaꞌ aꞌntī quincāmaxquīꞌyāniꞌ huan Espíritu Santo.
\p
\v 9 Como huiꞌxinaꞌn lāpāxquīꞌyāꞌtit lītāꞌtimīn, chuntzaꞌ tūꞌ tasquiꞌnī naꞌiccāhuaniyāniꞌ nīn tuntūꞌ ixpālacata huāꞌmāꞌ. Dios cāmāsuꞌniꞌnīꞌtaꞌniꞌtzaꞌ aꞌnchī nalāpāxquīꞌyāꞌtit huiꞌxinaꞌn.
\v 10 Lāꞌ chuntzaꞌ tūꞌ xmān lāpāxquīꞌyāꞌtit, huiꞌxinaꞌn nā cāpāxquīꞌyāꞌtit ixlīhuākcaꞌn huan tāꞌtimīn xalanīꞌn na ixlīhuāk huan estado de Macedonia. Lāꞌ iccāsquiꞌniꞌyāniꞌ que āꞌchulāꞌ cacāpāxquīꞌtit. 
\v 11 Nalīhuiꞌlīyāꞌtit caꞌcs natahuiꞌlaꞌyāꞌtit. Lāꞌ tūꞌ calīmaktanūꞌtit aꞌntūn tūꞌ mimacaꞌtzicaꞌn. Lāꞌ cascujtit. Uꞌtzaꞌ huāꞌmāꞌ iccāhuaninīꞌtaꞌniꞌ pūꞌla.
\v 12 Lāꞌ chuntzaꞌ nacātaꞌaꞌcnīniꞌniꞌyāniꞌ xlacaꞌn aꞌntīn tūꞌ takalhlakaꞌīꞌ ixtachihuīn Dios. Lāꞌ chuntzaꞌ tzē nalītapātleꞌkeniꞌyāꞌtit.
\s Aꞌxniꞌcaꞌ namimpala huan Māpaꞌksīniꞌ
\p
\v 13 Iclacasquiꞌnāuj que cacaꞌtzītit aꞌntū ixlīstuꞌncuaꞌ ixpālacata aꞌntīn tanīnīꞌttzaꞌ. Chuntzaꞌ tūꞌ catilakaputzatit huaꞌchi talakaputza xlacaꞌn aꞌntīn tūꞌ takaꞌlhīmāꞌna para natalakchāꞌn Cristo.
\v 14 Quinaꞌn kalhlakaꞌīꞌyāuj que Jesús nīlh lāꞌ nā lakahuanchokolh. Lāꞌ nā chuntzaꞌ kalhlakaꞌīꞌyāuj que ixlīhuākcaꞌn aꞌntī ixtakalhlakaꞌīꞌ Jesús aꞌxniꞌcaꞌ tanīlh, nā xlacaꞌn nacāmālakahuanīchoko Dios aꞌxniꞌcaꞌ namimpala Jesús.
\p
\v 15 Lāꞌ chuhuaꞌj naꞌiccāhuaniyāniꞌ aꞌntū hualh quiMāpaꞌksīniꞌcaꞌn. Aꞌxniꞌcaꞌ namimpala huan Māpaꞌksīniꞌ, quinaꞌn aꞌntī xalakahuancus tūꞌ caticāmakxtekui xlacaꞌn aꞌntī tanīnīꞌttzaꞌ.
\v 16 Lāꞌ huanmāꞌ chiꞌchiniꞌ huan Māpaꞌksīniꞌ nayujāchi de nac aꞌkapūn lāꞌ lej paꞌlha nahuan lakatin līmāpaꞌksīn. Lāꞌ huan xapuxcuꞌ ángeles nataꞌsa. Lāꞌ namakataꞌsacan ixlīskoliꞌ Dios para nacāmācaꞌtzīnīcan que mimāꞌtzaꞌ huan Māpaꞌksīniꞌ. Xapūꞌla natalakahuanchoko xlacaꞌn aꞌntī ixtakalhlakaꞌīꞌ Cristo aꞌxniꞌcaꞌ tanīlh.
\v 17 Lāꞌ chu tuncan xlacaꞌn lāꞌ nā quinaꞌn aꞌntī xalakahuancus, quilīhuākcaꞌn naquincātamāꞌkayāhuaꞌyāniꞌ nac poklhnuꞌ. Lāꞌ nalakchāꞌnāuj huan Māpaꞌksīniꞌ nac cāꞌūꞌnīꞌn tālhmāꞌn. Lāꞌ para pōꞌktu chuntzaꞌ natāꞌtahuiꞌlayāchāuj quiMāpaꞌksīniꞌcaꞌn.
\v 18 Lāꞌ huāꞌmāꞌ tachihuīn nalālīmāpāstaquīyāꞌtit. Lāꞌ chuntzaꞌ nalālīmākōꞌxamākaꞌtlīꞌyāꞌtit.

\c 5
\p
\v 1 Tāꞌtimīn, tūꞌ tasquiꞌnī naꞌiccāhuaniyāniꞌ huiꞌxinaꞌn lhānīn napātleꞌke huāꞌmāꞌ lāꞌ lhānīn namin huan Māpaꞌksīniꞌ.
\v 2 Huiꞌxinaꞌn xaꞌnca caꞌtzīyāꞌtit que nīn tintīꞌ caꞌtzī lhānīn namin huan Māpaꞌksīniꞌ. Chu līmaktin namin huaꞌchi chu līmaktin min huan kaꞌlhānaꞌ de tzīꞌsa.
\v 3 Aꞌxniꞌcaꞌ natahuan tachiꞌxcuhuīꞌt: “Caꞌcs huiꞌlānaꞌuj, tuntūꞌ catilalh”, chu līmaktin nala huan lakuat. Lacapalh nala huan lakuat huaꞌchi aꞌxniꞌcaꞌ nachiniꞌ ixtacaꞌtzāt kalhatin puscāt aꞌxniꞌcaꞌ nalacatuncuītzaꞌ ixcaman. Lāꞌ tūꞌ catitapūtaxtuniꞌlh huan lakuat.
\v 4 Xlacaꞌn tūꞌ talakapasa Dios lāꞌ tūꞌ tacaꞌtzī palh Jesucristo namimpala. Chu līmaktin natasuꞌyu huaꞌchi aꞌxniꞌcaꞌ namin kalhatin kaꞌlhānaꞌ de tzīꞌsa. Huiꞌxinaꞌn tūꞌ huaꞌchi xlacaꞌn como huiꞌxinaꞌn lakapasāꞌtit ixtachihuīn Dios lāꞌ kaꞌlhīpāꞌnaꞌntit Jesucristo hasta aꞌxniꞌcaꞌ namin.
\v 5 Huiꞌxinaꞌn xalanīꞌn nac cāꞌtuncuj lāꞌ latlāꞌhuaꞌnāꞌtit nac cāꞌxkakanaꞌ. Como tūꞌtzaꞌ tlahuacuꞌtunāꞌtit aꞌntūn tūꞌ tzey, huiꞌxinaꞌn tūꞌtzaꞌ xalanīꞌn nac cāꞌtzīꞌsa. Tūꞌtzaꞌ latlāꞌhuanāuj aꞌnlhā cāꞌpucsuaꞌ como Dios xtāpalīnīꞌttzaꞌ quintapāstacnaꞌcaꞌn.
\v 6 Huaꞌchilh ixtalhtatanīꞌt xlacaꞌn aꞌntīn tūꞌ talakapasa ixtachihuīn Dios. Tūꞌ calaujtit huaꞌchi xlacaꞌn. Skalalh calaujtit lāꞌ cuenta catlahuaujtit que tūꞌ natlahuayāuj aꞌntūn tūꞌ tzey.
\v 7 Cāꞌtzīꞌsa lhtatacan lāꞌ cāꞌtzīꞌsa kaꞌchīcan. Xalanīꞌn nac cāꞌtzīꞌsa huaꞌchilh ixtalhtatanīꞌt lāꞌ huaꞌchilh ixtakaꞌchīnīꞌt, como tūꞌ tapāstaca aꞌntū ixlaꞌ Dios lāꞌ tūꞌ tatlahua cuenta aꞌnchī lacatejtin natalatāꞌkchoko.
\v 8 Quinaꞌn tūꞌ huaꞌchi xlacaꞌn como quinaꞌn xalanīꞌn nac cāꞌtuncuj. Huan tropa kaꞌlhī ixluꞌxuꞌ de līcāꞌn aꞌntū napūtamaktāya ixaꞌclhcunuc. Lāꞌ quinaꞌn kaꞌlhīyāuj aꞌntū napūtamaktāyayāuj nac quiꞌaꞌclhcunuccaꞌn. Kalhlakaꞌīꞌyāuj Jesucristo lāꞌ pāxquīꞌniꞌnāuj chu aꞌnchī xlaꞌ quincāmāsuꞌniꞌniꞌ. Lāꞌ ūꞌtzaꞌ līpūtamaktāyayāuj quiꞌaꞌclhcunuccaꞌn. Lāꞌ ūꞌtzaꞌ tūꞌ makxteka natanū na quiꞌaꞌclhcunuccaꞌn aꞌntū koꞌhuaꞌjuaꞌ. Huan tropa kaꞌlhī ixtāꞌknuꞌ de līcāꞌn aꞌntū napūtamaktāya ixaꞌkxāk. Lāꞌ quinaꞌn kaꞌlhīyāuj aꞌntū napūtamaktāyayāuj quintapāstacnaꞌcaꞌn. Quinaꞌn kalhlakaꞌīꞌyāuj que napūtaxtuyāuj. Lāꞌ ūꞌtzaꞌ līpūtamaktāyayāuj. Lāꞌ ūꞌtzaꞌ tūꞌ makxteka natanū aꞌntūn tūꞌ tzeyā tapāstacnaꞌ.
\v 9 Dios quincālacsacnīꞌtaꞌniꞌ lāꞌ tūꞌ quincāmāpātīnīcuꞌtunāniꞌ aꞌxniꞌcaꞌ nalacāxtlahuakōꞌ. Quincālacsacniꞌ para que naquincāmāpūtaxtūyāniꞌ quiMāpaꞌksīniꞌcaꞌn Jesucristo.
\v 10 Lāꞌ Jesucristo, xlaꞌ līnīlh por quinaꞌn para que natāꞌlatahuiꞌlayāuj xlaꞌ, palh nīnīꞌtaujtzaꞌ o lakahuanāujcus aꞌxniꞌcaꞌ xlaꞌ namimpala.
\v 11 Lāꞌ por ixpālacata huāꞌmāꞌ calālīmaxquīꞌtit tapāstacnaꞌ lāꞌ calāmāhuixcānīꞌtit chuntzaꞌ aꞌnchī tlahuapāꞌnaꞌntit huiꞌxinaꞌn chuhuaꞌj.
\s Pablo cāchihuīnaꞌmaxquīꞌlh huan tāꞌtimīn
\p
\v 12 Iccāsquiꞌniꞌyāniꞌ, tāꞌtimīn, cacāꞌaꞌcnīniꞌniꞌtit huan xanapuxcuꞌnuꞌ aꞌntī tatāꞌscuja Māpaꞌksīniꞌ. Huan Māpaꞌksīniꞌ cālacsacnīꞌt xlacaꞌn para nacātamāsuꞌniꞌyāniꞌ lāꞌ nacātamaxquīꞌyāniꞌ tapāstacnaꞌ.
\v 13 Lej cacāꞌaꞌcnīniꞌniꞌtit lāꞌ cacāpāxquīꞌtit por ixpālacata ixtascujūtcaꞌn. Huiꞌxinaꞌn tūꞌ calāstaꞌlaꞌtit. 
\p
\v 14 Lāꞌ iccāmaxquīꞌyāni tapāstacnaꞌ, tāꞌtimīn. Cacāquilhnīꞌtit macstiꞌnaꞌj aꞌntī chu xmān talatlāꞌhuan. Cacāhuanilīꞌpintit aꞌntīn talakachāꞌniꞌnīꞌt. Cacāmaktāyaꞌtit aꞌntīn tūnaꞌj xaꞌnca takalhlakaꞌīꞌ. Cacātāyaniꞌtit ixlīhuākcaꞌn.
\p
\v 15 Calēꞌcapintit nalātlahuaniꞌyāꞌtit aꞌntū līmakuan. Lāꞌ nā chuntzaꞌ cacātlahuaniꞌtit ixlīhuākcaꞌn aꞌntū līmakuan. Lāꞌ tūꞌ titlahuaniꞌyāꞌtit āꞌchāꞌtin aꞌntūn tūꞌ tzey, aꞌyuj xlaꞌ cātlahuaniꞌnīꞌtaꞌniꞌ aꞌntūn tūꞌ tzey.
\p
\v 16 Pōꞌktu capāxuhuaꞌtit.
\v 17 Pōꞌktu cakalhtōꞌkaꞌtit.
\v 18 Camaxquīꞌtit pāxcatcaꞌtzī Dios chu aꞌntū cāpātleꞌkēniꞌyāniꞌ. Chuntzaꞌ Dios lacasquiꞌn natlahuaꞌyāꞌtit huiꞌxinaꞌn aꞌntīn tapaꞌksīyāꞌtit con Cristo.
\p
\v 19 Tūꞌ camāmakchuyīꞌtit huan Espíritu Santo aꞌnchī scuja.
\v 20 Tūꞌ calakmakaꞌntit aꞌntūn tahuan ixaꞌctaꞌsanaꞌnīꞌn Dios.
\v 21 Lāꞌ xaꞌnca napāstacāꞌtit palh tzey o tūꞌ tzey aꞌntūn tahuan lāꞌ camaklhtīniꞌntit aꞌntūn tzey. 
\v 22 Camakxtektit huāk aꞌntū xakoꞌhuaꞌjuaꞌ.
\p
\v 23 Māniꞌ Dios cacātlahuaniꞌ huiꞌxinaꞌn lej xalacuan. Dios ūꞌtzaꞌ aꞌntī tzaꞌtaꞌtaꞌ tlahua quiꞌaꞌclhcunuccaꞌn. Xlaꞌ cacāmāpānūniꞌniꞌ aꞌntūn tūꞌ tzey. Lāꞌ cacāmaktāyaniꞌ para que tūꞌ natlahuaꞌyāꞌtit aꞌntūn tūꞌ tzey. Lāꞌ cacāmaktāyaniꞌ para que tūꞌ natanū aꞌntū koꞌhuaꞌjuaꞌ na mintapāstacnaꞌcaꞌn lāꞌ na miꞌaꞌclhcunuccaꞌn hasta aꞌxniꞌcaꞌ namin quiMāpaꞌksīniꞌcaꞌn Jesucristo.
\v 24 Ixlīhuāk huāꞌmāꞌ Dios nacātlahuaniꞌyāniꞌ como ūꞌtzaꞌ aꞌntī cālacsacnīꞌtaꞌniꞌ lāꞌ ūꞌtzaꞌ tlōkentaxtū. 
\s Aꞌxmān līsicuaꞌlanālīn
\p
\v 25 Tāꞌtimīn, cakalhtōꞌkaꞌtit por quinaꞌn.
\p
\v 26 Cacāsaludarlītit lāꞌ cacāpūskoꞌkaꞌtit ixlīhuākcaꞌn huan tāꞌtimīn chu aꞌnchī minīꞌniꞌ entre lītāꞌtimīn aꞌntīn tatapaꞌksī con Dios.
\p
\v 27 Iccālīmāmacūꞌyāniꞌ por ixquilhtampān Māpaꞌksīniꞌ cacālakapūtleꞌkeniꞌkōꞌtit ixlīhuākcaꞌn huan tāꞌtimīn huāꞌmāꞌ carta aꞌntū ictzoꞌkmāꞌ.
\p
\v 28 Cacāsicuaꞌlanālīniꞌ quiMāpaꞌksīniꞌcaꞌn Jesucristo. Amén.