\id 1TI
\h 1 TIMOTEO
\toc1 1 TIMOTEO
\mt Huan Xapūꞌla Carta aꞌntū Macāꞌniꞌca Timoteo
\c 1
\s Pablo tzoꞌknuniꞌlh Timoteo
\p
\v 1 Quit Pablo, ixapóstol Jesucristo por ixquilhtampāncaꞌn Dios aꞌntī māpūtaxtūnuꞌn lāꞌ Jesucristo aꞌntī kalhlakaꞌīꞌyāuj. 
\v 2 Timoteo, quit ictzoꞌknuniꞌmāꞌniꞌ. Huiꞌx huaꞌchi quiꞌoꞌkxaꞌ porque icmākalhlakaꞌīꞌnīniꞌ ixtachihuīn Dios. Dios camaktakaꞌlhniꞌ lāꞌ calakalhuꞌmaniꞌ. Lāꞌ xaꞌnca calatahuiꞌlaꞌ ixpālacata quinTātaꞌcaꞌn Dios lāꞌ Jesucristo quiMāpaꞌksīniꞌcaꞌn. 
\s Māpaꞌksīlh ixpālacata aꞌntīn tamāsuꞌyu aꞌntū tūꞌ stuꞌncuaꞌ
\p
\v 3 Aꞌxniꞌcaꞌ xaꞌicaꞌmāꞌ nac Macedonia, lej icuaniniꞌ ixtachoko nac Efeso para nacāmāpaꞌksīyaꞌ āꞌmakapitzīn que tūꞌtzaꞌ catamāsuꞌyulh aꞌntūn tūꞌ stuꞌncuaꞌ ixpālacata Cristo.
\v 4 Lāꞌ nacāhuaniyaꞌ que tūꞌ ixmacaꞌtzicaꞌn huan listas de ixtacuīniꞌcaꞌn ixnapapnaꞌcaꞌn lāꞌ aꞌntū xmān cuentos ixpālacata ixnapapnaꞌcaꞌn. Huāꞌ tamāꞌna tūꞌ tzey porque xmān talacapūchihuīnaꞌnīniꞌn. Lāꞌ chuntzaꞌ tūlalh catimāsuꞌyulh ixtapuhuān Dios. Aꞌntī xaꞌnca takalhlakaꞌīꞌ, xmān xlacaꞌn tzēn tacaꞌtzī ixtapuhuān Dios. Chuntzaꞌ icuanipalayāniꞌ.
\p
\v 5 Maclacasquiꞌn quinaꞌn nacāmāsuꞌniꞌyāuj aꞌnchī lāpāxquīꞌcan porque takalhlakaꞌīꞌlh ixtachihuīn Dios lāꞌ porque taxtāpalīlh ixtapāstacnaꞌcaꞌn lāꞌ chuntzaꞌ lej tzey talalh ixtapāstacnaꞌcaꞌn.
\v 6 Lāꞌ āꞌmakapitzīn tapātzaꞌnkānīꞌt lāꞌ ūꞌtzaꞌ lītasuꞌyu que xmān chu tlakaj talālīhuani.
\v 7 Lej tamāsuꞌyucuꞌtun huan ixley Moisés lāꞌ tūꞌ tamāchekxī aꞌntū tamāsuꞌyumāꞌna. Lāꞌ nīn tūꞌ tamāchekxī aꞌntū tahuan. Pero aꞌyuj, lej tachihuīnaꞌn.
\p
\v 8 Caꞌtzīyāuj que tzey huan ley aꞌntū tzoꞌkli Moisés palh aꞌcnīniꞌniꞌcan lāꞌ palh tūꞌ xtāpalīcan.
\v 9 Huan lacuan chiꞌxcuhuīꞌn tūꞌ tamaclacasquiꞌn huan ley. Maclacasquiꞌncan huan ley para nacāmāpaꞌksīcan aꞌntīn tūꞌ tzey lāꞌ aꞌntīn tūꞌ taꞌaꞌkahuānaꞌn. Nā chuntzaꞌ para aꞌntīn talaclēꞌn lāꞌ tūꞌ takalhlakaꞌīꞌ ixtachihuīn Dios. Nā maclacasquiꞌn huampala para aꞌntīn tūꞌ taꞌaꞌcnīniꞌniꞌ nīn tuntūꞌ. Nā huan ley para aꞌntīn tamaknī ixtātaꞌcaꞌn, o ixtzīꞌtcaꞌn, o āꞌchāꞌtin chiꞌxcuꞌ.
\v 10 Lāꞌ huan ley para aꞌntīn tamakpuscātīniꞌn lāꞌ aꞌntīn tāꞌlākaꞌlhī huan kalhatin chiꞌxcuꞌ huaꞌchi ixpuscāt lāꞌ aꞌntīn taꞌaꞌkxokonuꞌn lāꞌ aꞌntīn takaꞌlhan camanaꞌ lāꞌ aꞌntīn tahuan aꞌntūn tūꞌ stuꞌncuaꞌ na ixlacapūn juez. Lāꞌ huan ley para ixlīhuākcaꞌn aꞌntīn tatlahua catūhuā aꞌntū contra ixtachihuīn Dios.
\v 11 Uꞌtzaꞌ ixtachihuīn Dios aꞌntū quilīmāmacūꞌca para namāscaꞌtīniꞌn lāꞌ ūꞌtzaꞌ quincāhuaniyāniꞌ aꞌnchī lej xkaka Dios lāꞌ lej sicuaꞌlanālanīꞌt xlaꞌ. 
\s Maxquīꞌlh pāxcatcaꞌtzī por ixtalakalhuꞌmān Dios 
\p
\v 12 Icmaxquīꞌ pāxcatcaꞌtzī quiMāpaꞌksīniꞌ Cristo Jesús porque quilaktzīꞌnīꞌt tzey para naꞌictāꞌscuja lāꞌ para naꞌicmāsuꞌyu ixtachihuīn Dios. Lāꞌ quimāhuixcānīlh para quilītlōt.
\v 13 Xapūꞌla tūꞌ tzey aꞌnchī iccālīchihuīnaꞌlh aꞌntīn ixtakalhlakaꞌīꞌ lāꞌ xaꞌiccāmacaputza lāꞌ xaꞌiccālakapala xlacaꞌn. Pero Dios quilakalhuꞌmalh porque tūꞌ xaꞌiccaꞌtzī aꞌntū xaꞌictlahuamāꞌ lāꞌ tūnaꞌj xaꞌickalhlakaꞌīꞌnīꞌt. 
\v 14 Lāꞌ lej lhūhuaꞌ quilakalhuꞌmalh quiMāpaꞌksīniꞌcaꞌn lāꞌ quimākalhlakaꞌīꞌnīlh. Chuntzaꞌ quimāsuꞌniꞌlh aꞌnchī naꞌicpāxquīꞌnin huaꞌchi Jesucristo pāxquīꞌnin porque ictapaꞌksītzaꞌ con xlaꞌ.
\p
\v 15 Tasquiꞌnī nakalhlakaꞌīꞌcan huāꞌmāꞌ tachihuīn como lej stuꞌncuaꞌ: Cristo Jesús milh nac quilhtamacuj para nacāmāpūtaxtū aꞌntī talaclēꞌn. Lāꞌ icpuhuan que quit más xaꞌiclaclēꞌn de ixlīhuākcaꞌn tachiꞌxcuhuīꞌt. 
\v 16 Lāꞌ aꞌyuj quit más xaꞌiclaclēꞌn, pero Jesucristo quilakalhuꞌmalh para namāsuꞌyu que xlaꞌ lej līlacatzucu nakaꞌlhī hasta que nakalhlakaꞌīꞌcan. Lāꞌ como quilakalhuꞌmalh quit, nā nacālakalhuꞌman ixlīhuākcaꞌn aꞌntīn natakalhlakaꞌīꞌ para que natakaꞌlhī xasāstiꞌ ixquilhtamacujcaꞌn para pōꞌktu.
\v 17 Caꞌaꞌcnīniꞌniꞌca huan Rey aꞌntī Rey para pōꞌktu. Xlaꞌ tūꞌ maktin catisputli lāꞌ tūla tapūlaktzīꞌn con ixlakastapuncaꞌn tachiꞌxcuhuīꞌt. Lāꞌ xmān xlaꞌ Dios. Camācāꞌtanīca lāꞌ caꞌaꞌcnīniꞌniꞌca pōꞌktu. Amén.
\p
\v 18 Timoteo, huāꞌmāꞌ līmāpaꞌksīn iclīmāmacūꞌyāniꞌ porque icpāstacmāꞌ aꞌntū huancanīꞌt por mimpālacata aꞌxniꞌcaꞌ Dios māsuꞌyulh aꞌntū nala milītlōt. Nā huiꞌx capāstacti huāꞌ tamāꞌna tachihuīn para que nakaꞌlhīyaꞌ tahuixcān lāꞌ xaꞌnca namālacstūꞌncaꞌ ixtachihuīn Dios.
\v 19 Lāꞌ tūꞌ tipātzaꞌnkāyaꞌ aꞌntū kalhlakaꞌīꞌnīꞌtaꞌ. Tūꞌ catlahuaꞌ aꞌntū huiꞌx caꞌtzīyaꞌ que tūꞌ tzey. Aꞌmakapitzīn tatlahuanīꞌt aꞌntūn tūꞌ tzey aꞌyuj ixtaꞌuꞌcxcaꞌtzī que tūꞌ tzey aꞌntū ixtatlahuamāꞌna. Lāꞌ chuntzaꞌ talītaxtutāyalh na ixtej Dios.
\v 20 Kalhatuꞌ de xlacaꞌn cāhuanican Himeneo lāꞌ Alejandro. Iccātlakaxtulh xlacaꞌn para que Satanás nacāmāpātīnī lāꞌ chuntzaꞌ tūꞌtzaꞌ catitaꞌaꞌksaꞌnli Dios.
\c 2
\s Aꞌnchī natakalhtōꞌkaꞌ
\p
\v 1 Lej icuaniyāniꞌ huāꞌmāꞌ. Cacāmāsuꞌniꞌ tachiꞌxcuhuīꞌt aꞌnchī lakalīyān natasquiꞌniꞌ Dios por aꞌntūn tamaclacasquiꞌn lāꞌ por ixpālacatacaꞌn āꞌmakapitzīn tachiꞌxcuhuīꞌt. Lāꞌ nā natamaxquīꞌ pāxcatcaꞌtzī Dios por ixlīhuāk aꞌntū cāmaxquīꞌnīꞌt.
\v 2 Lāꞌ cacāmāsuꞌniꞌ aꞌnchī natasquiꞌniꞌ Dios que nacāmaktāya huan rey lāꞌ āꞌmakapitzīn pūchihuīnaꞌnīꞌn lāꞌ ixlīhuākcaꞌn tachiꞌxcuhuīꞌt para que chuntzaꞌ tzēꞌk natahuiꞌlayāuj lāꞌ natlahuayāuj ixtapuhuān Dios lāꞌ para que tūꞌ natlahuayāuj aꞌntūn tūꞌ līmakuan. 
\p
\v 3 Aꞌntī lakaliyān nasquiꞌniꞌ Dios chuntzaꞌ, xlaꞌ tlahuamāꞌ aꞌntūn tzey lāꞌ aꞌntū nalīpāxuhua Dios huan Māpūtaxtūnuꞌ. 
\v 4 Lāꞌ Dios lacasquiꞌn que ixlīhuākcaꞌn tachiꞌxcuhuīꞌt catapūtaxtulh lāꞌ ixlīhuākcaꞌn catalakapasli aꞌntū stuꞌncuaꞌ.
\v 5 Xmān kalhatin Dios huīꞌ. Lāꞌ xmān kalhatin aꞌntī cāmākoꞌxamixī Dios lāꞌ tachiꞌxcuhuīꞌt lāꞌ ūꞌtzaꞌ aꞌntī huanican Jesucristo. Xlaꞌ Dios lāꞌ nā lalh chiꞌxcuꞌ. 
\v 6 Xlaꞌ ixaꞌcstu tamacamāstāꞌlh para nanī. Chuntzaꞌ līmāpalakōꞌlh ixlīhuāk aꞌntūn tachiꞌxcuhuīꞌt ixtalaclēꞌniꞌ Dios lāꞌ cāmāpūtaxtūlh. Aꞌxniꞌcaꞌ Dios lacasquiꞌlh aꞌxniꞌcaꞌ pātleꞌkelh.
\v 7 Lāꞌ quilacsacli para ixaꞌctaꞌsanaꞌ lāꞌ quilīmānūlh quilīꞌapóstol para que naꞌiccāmāsuꞌniꞌ xalīstuꞌncuaꞌ huan aꞌntīn tūꞌ israelitas. Lāꞌ nā iccāmāsuꞌniꞌ aꞌnchī nalīpūtaxtucan. Stuꞌncuaꞌ aꞌntū icuaniyāniꞌ. Lāꞌ tūꞌ icaꞌkxokoyāniꞌ.
\p
\v 8 Lāꞌ iclacasquiꞌn que ixlīhuākcaꞌn huan tachiꞌxcuhuīꞌt chu xalhā nac cāꞌquilhtamacuj natatāꞌchihuīnaꞌn Dios. Lāꞌ aꞌxniꞌcaꞌ tachaꞌxa ixmacancaꞌn para natatāꞌchihuīnaꞌn Dios, cuenta catatlahualh que tzey ixaꞌclhcunuccaꞌn, que tūꞌ nataꞌaꞌkchāꞌntāya lāꞌ que tūꞌ natapuhuan aꞌntūn tūꞌ tzey ixpālacata āꞌkalhatin.
\v 9 Maclacasquiꞌn huan tzuꞌmaꞌjan lāꞌ huan puscan natalhakāꞌ ixluꞌxuꞌcaꞌn aꞌntū natatāꞌlīmakuan lāꞌ aꞌntū minīꞌniꞌ puscan. Tūꞌ maclacasquiꞌn natahuiꞌlī lhūhuaꞌ cintaj o xaꞌnat na ixyaꞌjcaꞌn; xmān xaꞌnca nataxquiꞌta. Lāꞌ tūꞌ natalīkaꞌtlaꞌjcaꞌtzī ixpālacatacaꞌn ixtapixnuꞌcaꞌn de oro nīn de perla. Lāꞌ nīn tūꞌ natalīkaꞌtlaꞌjcaꞌtzī ixluꞌxuꞌcaꞌn aꞌntū lej xatapala.
\v 10 Maclacasquiꞌn natatlahua aꞌntū tzey. Uꞌtzaꞌ minīꞌniꞌ lāꞌ chuntzaꞌ natalītasuꞌyu que takalhlakaꞌīꞌ ixtachihuīn Dios.
\v 11 Aꞌnlhā takēstokcan para nataꞌaꞌcnīniꞌniꞌ Dios, huan puscan tzēꞌk catatahuīꞌlh para natascaꞌta lāꞌ nataꞌaꞌkahuānaꞌn.
\v 12 Quit tūꞌ icmakxteka que kalhatin puscāt camāsuꞌyulh nīn cacāmāpaꞌksīlh huan chiꞌxcuhuīꞌn. Xlaꞌ tzēꞌk catahuiꞌlalh
\v 13 porque pūꞌla Dios lhtaꞌmalh Adán lāꞌ āꞌcalīstān tlahualh Eva.
\v 14 Lāꞌ tūꞌ aꞌkxokoca Adán pero Satanás aꞌkxokolh huan puscāt. Lāꞌ chuntzaꞌ lītzuculh huan talaclēꞌiꞌ. 
\v 15 Ixlītlōt huan puscāt, ūꞌtzaꞌ cāmāsuꞌniꞌ ixcamanaꞌ. Lāꞌ palh nakalhlakaꞌīꞌ ixtachihuīn Dios lāꞌ kaꞌlhī tapāxquīꞌn lāꞌ palh tzey ixtapāstacnaꞌ lāꞌ tūꞌ natlahua aꞌntū tūꞌ līmakuan lāꞌ palh xaꞌnca latlāꞌhuan, namāpūtaxtūcan.
\c 3
\s Aꞌnchī natalīla huan maktakaꞌlhnaꞌnīꞌn
\p
\v 1 Stuꞌncuaꞌ huāꞌmāꞌ tachihuīn: Palh kalhatin lacuꞌtun ixmaktakaꞌlhnaꞌcaꞌn aꞌntīn takalhlakaꞌī ixtachihuīn Dios, huāꞌmāꞌ chiꞌxcuꞌ lacasquiꞌn huan lītlōt aꞌntūn tzey.
\v 2 Maclacasquiꞌn huan maktakaꞌlhnaꞌ tūꞌ maktin catlahualh aꞌntūn tzē nalīꞌaꞌksaꞌncan. Xmān kalhatin ixpuscāt cakaꞌlhīlh. Līlacatejtin catahuiꞌlalh. Xlaꞌ nalīhuiꞌlī tūꞌ natlahua aꞌntūn tūꞌ tzey. Tzeyā chiꞌxcuꞌ calalh xlaꞌ lāꞌ tzey calalh ixtapāstacnaꞌ. Cacāmānūlh āꞌmakapitzīn na ixchic. Xaꞌnca camāsuꞌyulh.
\v 3 Tūꞌ cakoꞌtli. Tūꞌ cacātucsli āꞌmakapitzīn pero pōꞌktu cacāpāxquīꞌlh. Tūꞌ palaj caꞌaꞌkchāꞌlh. Tūꞌ calīpāhuanli ixtumīn.
\v 4 Xaꞌnca camāpaꞌksīniꞌlh na ixchic. Lāꞌ ixcamanaꞌ cataꞌaꞌkahuānaꞌniꞌlh lāꞌ cataꞌaꞌcnīniꞌniꞌlh.
\v 5 Palh huan chiꞌxcuꞌ tūla māpaꞌksīniꞌn na ixchic, ¿chichū nacālīmaktakaꞌlha aꞌntīn takalhlakaꞌī ixtachihuīn Dios?
\v 6 Aꞌntīn tzucumāꞌcus kalhlakaꞌīꞌ tūla catilalh maktakaꞌlhnaꞌ porque nakaꞌtlaꞌjcaꞌtzī lāꞌ chuntzaꞌ napātleꞌkeniꞌ xlaꞌ huaꞌchi pātleꞌkeniꞌlh huan koꞌtiꞌtiꞌ.
\v 7 Lāꞌ huan maktakaꞌlhnaꞌ calalh kalhatin chiꞌxcuꞌ aꞌntīn taꞌaꞌcnīniꞌniꞌ huan tachiꞌxcuhuīꞌt aꞌntīn tūꞌ takalhlakaꞌīꞌ como xlaꞌ tzeyā chiꞌxcuꞌ. Palh tūꞌ, tzē naꞌaꞌksaꞌncan lāꞌ chuntzaꞌ natlaja huan koꞌtiꞌtiꞌ.
\s Aꞌnchī nala huan diácono
\p
\v 8 Lāꞌ huan diácono, ūꞌtzaꞌ aꞌntī namaktāyanaꞌn nac lītokpān. Lāꞌ nā maclacasquiꞌn que huan diácono lacatejtin catahuiꞌlalh. Huan diácono tūꞌ catlahualh lakatuꞌ ixlacan lāꞌ tūꞌ cakaꞌchīlh. Lāꞌ tūꞌ capuhuanli nakaꞌlhī tumīn aꞌntūn tūꞌ tlajanīꞌt.
\v 9 Lāꞌ tzey calalh ixtapāstacnaꞌ xlaꞌ lāꞌ xaꞌnca camāchekxīlh ixlīhuāk aꞌntū Dios quincāmāsuꞌniꞌniꞌ para que nakalhlakaꞌīꞌyāuj.
\v 10 Maclacasquiꞌn pūꞌla nacaꞌtzīcan aꞌnchī latlāꞌhuan. Lāꞌ palh nīn tintīꞌ nalīꞌaꞌksaꞌn de catūhuā, aꞌxniꞌcaꞌ tzē natanū ixlīdiácono.
\v 11 Lāꞌ huan puscan, nā maclacasquiꞌn lacatejtin catalatāꞌkchokolh. Tūꞌ cataꞌaꞌksaꞌnli āꞌchāꞌtin. Tūꞌ catakaꞌchīlh. Lāꞌ pōꞌktu catatlōkentaxtūlh ixlītlōtcaꞌn.
\v 12 Huan chiꞌxcuꞌ aꞌntī diácono cakaꞌlhīlh xmān kalhatin ixpuscāt. Lāꞌ xaꞌnca camāpaꞌksīniꞌlh na ixchic lāꞌ cataꞌaꞌkahuānaꞌniꞌlh ixcamanaꞌ.
\v 13 Aꞌntī xaꞌnca tlōkentaxtū ixlīdiácono, ūꞌtzaꞌ ixlīhuākcaꞌn taꞌaꞌcnīniꞌniꞌ. Lāꞌ xlaꞌ tūꞌ catijicuaꞌnli nahuan que tapaꞌksī con Jesucristo.
\s Aꞌntū kalhlakaꞌīꞌyāuj
\p
\v 14 Chuntzaꞌ iclītzoꞌknuniꞌmāꞌniꞌ aꞌyuj icpuhuan que palaj naꞌicaꞌnāchaꞌ.
\v 15 Lāꞌ aꞌyuj naꞌictakoxī, pero chuhuaꞌj caꞌtzīyaꞌ aꞌnchī maclacasquiꞌn nalītahuiꞌlayāuj quilīhuākcaꞌn aꞌntī kalhlakaꞌīꞌyāuj ixtachihuīn Dios. Quinaꞌn huaꞌchi ixlītokpān Dios aꞌntī pōꞌktu huīꞌ. Lāꞌ quinaꞌn maktāyayāuj aꞌntū ixlīstuꞌncuaꞌ ixpālacata Jesucristo. 
\v 16 Lej tasquiꞌnī aꞌntū kalhlakaꞌīꞌyāuj. Pūꞌla tūꞌ ixcaꞌtzīcan pero chuhuaꞌj Dios quincāmāsuꞌniꞌn aꞌnchī nalīpūtaxtucan. Uꞌtzaꞌ huāꞌmāꞌ aꞌntū kalhlakaꞌīꞌyāuj: 
\q Dios tasuꞌyunīꞌt huaꞌchi chiꞌxcuꞌ aꞌntī huanican Jesús.
\q Lacuan mālacstūꞌnca por huan Espíritu Santo.
\q Huan ángeles talaktzīꞌlh.
\q Līꞌaꞌctaꞌsanaꞌnca lakachu nac makatnaꞌ cāꞌlacchicniꞌ. 
\q Aꞌntī xalanīꞌn cāꞌquilhtamacuj takalhlakaꞌīꞌlh. 
\q Lāꞌ lēꞌnca nac aꞌkapūn.
\c 4
\s Aꞌntī natataxtutāya na ixtej Dios
\p
\v 1 Huan Espíritu Santo xaꞌnca huan que namin lakatin chiꞌchiniꞌ aꞌxniꞌcaꞌ āꞌmakapitzīn natamakxteka aꞌntū takalhlakaꞌīꞌlh. Lāꞌ natastālaniꞌ aꞌntīn taꞌaꞌkxokonuꞌn lāꞌ natakaxmata aꞌntū tamāsuꞌyumāꞌna ixlacscujnīꞌn koꞌtiꞌtiꞌ.
\v 2 Huan chiꞌxcuhuīꞌn aꞌntīn tamāsuꞌyu chuntzaꞌ tatlahua lakatuꞌ ixlacancaꞌn lāꞌ tūꞌ tahuan aꞌntū stuꞌncuaꞌ. Tūꞌtzaꞌ taꞌuꞌcxcaꞌtzī palh tūꞌ tzey aꞌntūn tatlahuamāꞌna. Xlacaꞌn huaꞌchilh tanīhuaꞌnanīꞌt aꞌntūn talīꞌuꞌcxcaꞌtzīniꞌn. 
\v 3 Xlacaꞌn tamāsuꞌyu que tūꞌ tzey natatapūchahua lāꞌ tūꞌ tzey natahuaꞌ āꞌtāpātin līhuaꞌt. Lāꞌ Dios quincāmaxquīꞌniꞌ tāpāspit līhuaꞌtnaꞌ para nahuaꞌyāuj. Xmān pūꞌla namāstāꞌyāuj pāxcatcaꞌtzī quinaꞌn aꞌntī kalhlakaꞌīꞌyāuj ixtachihuīn Dios.
\v 4 Ixlīhuāk aꞌntū Dios tlahualh, ūꞌtzaꞌ tzey lāꞌ quinaꞌn tūla catihuáuj palh tūꞌ tzey. Namaklhtīniꞌnāuj lāꞌ namaxquīꞌyāuj pāxcatcaꞌtzī Dios.
\v 5 Chuntzaꞌ tzey porque ixtachihuīn Dios quincāmāsuꞌniꞌyāniꞌ que huāk tzey aꞌxniꞌcaꞌ maxquīꞌyāuj pāxcatcaꞌtzī Dios.
\s Aꞌnchī nala aꞌntī natāꞌscuja Jesucristo
\p
\v 6 Palh chuntzaꞌ nacāmāsuꞌniꞌyaꞌ mintāꞌtimīn aꞌntīn takalhlakaꞌīꞌ ixtachihuīn Dios, nalaꞌyaꞌ xatzey ixtasācuaꞌ Jesucristo. Lāꞌ āꞌchulāꞌ nakalhlakaꞌīꞌyaꞌ ixpālacata aꞌntū māsuꞌyupāꞌt lāꞌ aꞌntū stālaniꞌpāꞌt.
\v 7 Tūꞌ cuenta catlahuaꞌ huan cuentos aꞌntū xmān xalaꞌ nac cāꞌquilhtamacuj lāꞌ tuntūꞌ ixtapalh. Cuenta catlahuaꞌ aꞌntū Dios lacasquiꞌn.
\v 8 Aꞌxniꞌcaꞌ natlahuayaꞌ ejercicio, ūꞌtzaꞌ tzey para mimacniꞌ pero más tasquiꞌnī natlahuayaꞌ ixtapuhuān Dios. Uꞌtzaꞌ tzey nac huāꞌmāꞌ quilhtamacuj lāꞌ nā tzey para quinquilhtamacujcaꞌn aꞌntū nala para pōꞌktu. 
\v 9 Stuꞌncuaꞌ huāꞌmāꞌ tachihuīn lāꞌ maclacasquiꞌn ixlīhuākcaꞌn natakalhlakaꞌīꞌ.
\v 10 Quinaꞌn palhaꞌ līscujāuj lāꞌ cālīpātīniꞌyāuj aꞌntī quincātalakapalayāniꞌ porque kalhlakaꞌīꞌyāuj Dios aꞌntī pōꞌktū huīꞌ. Xlaꞌ lalh ixMāpūtaxtūnuꞌcaꞌn ixlīhuākcaꞌn tachiꞌxcuhuīꞌt pero xmān nacāmāpūtaxtūcan aꞌntī takalhlakaꞌīꞌ.
\p
\v 11 Chuntzaꞌ namāpaꞌksīyaꞌ lāꞌ namāsuꞌyuꞌyaꞌ aꞌntū iclīmāmacūꞌyāniꞌ.
\v 12 Tūꞌ catimakxtekti nalakmakaꞌncaꞌnaꞌ ixpālacata milīꞌoꞌkxaꞌ. Xaꞌnca calatahuiꞌlaꞌ para que ixlīhuākcaꞌn aꞌntī takalhlakaꞌīꞌ natamakscaꞌtāniꞌ. Cahuaꞌnti xmān aꞌntūn tzey lāꞌ catlahuaꞌ xmān aꞌntūn tzey. Cacāpāxquiꞌ ixlīhuākcaꞌn tachiꞌxcuhuīꞌt. Lāꞌ xaꞌnca cakalhlakaꞌiꞌ lāꞌ tzey calalh mintapāstacnaꞌ.
\v 13 Līhuan tūnaꞌj icaꞌnāchaꞌ natanūniꞌyaꞌ lakapūtleꞌkeyaꞌ ixtachihuīn Dios aꞌnlhā takēstokcan. Lāꞌ calīꞌaꞌctaꞌsaꞌnaꞌ ixtachihuīn Dios lāꞌ camāꞌsuꞌyuꞌ.
\v 14 Tūꞌ tipātzaꞌnkāyaꞌ huāꞌ talakalhuꞌmān aꞌntū maxquīꞌcanīꞌtaꞌ aꞌxniꞌcaꞌ tāꞌcpūmāꞌcaꞌniꞌ ixmacancaꞌn huan maktakaꞌlhnaꞌnīꞌn aꞌxniꞌcaꞌ huanicaꞌ aꞌntū milītlōt. 
\p
\v 15 Pōꞌktu cuenta catlahuaꞌ huāꞌmāꞌ aꞌntū ictzoꞌknuniꞌnīꞌtaꞌniꞌ lāꞌ pōꞌktu catanūniꞌ tlōkentaxtūkōꞌyaꞌ para que ixlīhuākcaꞌn tachiꞌxcuhuīꞌt tzē natalaktzīꞌn que lakalīyān más xaꞌnca tlahuapāꞌt ixtapuhuān Dios. 
\v 16 Cuenta catlahuaꞌ aꞌntūn tlahuaꞌyaꞌ lāꞌ aꞌntū māsuꞌyuꞌyaꞌ. Chuntzaꞌ napūtaxtuyaꞌ lāꞌ nā natapūtaxtu aꞌntīn takaxmata.
\c 5
\s Aꞌnchī natalīlatāꞌkchoko huan tī takalhlakaꞌīꞌ 
\p
\v 1 Tūꞌ tilacaquilhnīyaꞌ kalhatin papatzīn pero camaxquiꞌ tapāstacnaꞌ huaꞌchilh xlaꞌ mintātaꞌ. Aꞌntī oꞌkxaꞌcus camaxquiꞌ tapāstacnaꞌ huaꞌchilh mintāꞌtin.
\v 2 Lāꞌ chuntzaꞌ kalhatin toꞌkotzīn camaxquiꞌ tapāstacnaꞌ huaꞌchilh mintzīꞌt, lāꞌ aꞌntī tzuꞌmaꞌjātcus huaꞌchilh mintāꞌtin, lāꞌ tūꞌ ticātlahuaniꞌyaꞌ aꞌntūn tūꞌ līmakuan con xlacaꞌn.
\p
\v 3 Naꞌaꞌcnīniꞌniꞌyaꞌ huan lakapūt aꞌntīn tūꞌ kaꞌlhī nīn kalhatin aꞌntī namaktakaꞌlha.
\v 4 Palh kaꞌlhīcus ixcaman o ixtāꞌnat, maclacasquiꞌn xlacaꞌn natamaktakaꞌlha huan lakapūt para natascaꞌta ixlītlōtcaꞌn ixpālacata ixfamiliacaꞌn. Chuntzaꞌ tasuꞌyu que taꞌaꞌkahuānaꞌniꞌ ixtachihuīn Dios. Lāꞌ chuntzaꞌ nacālīmāpala aꞌntīn tamakastacli. Uꞌtzaꞌ nalīpāxuhua Dios.
\v 5 Huan lakapūt aꞌntī ixaꞌcstu huīꞌ lāꞌ aꞌntīn tūꞌ kaꞌlhī nīn kalhatin aꞌntī namaktakaꞌlha, xlaꞌ kaꞌlhīmāꞌ aꞌntū Dios namaxquīꞌ. Tzīꞌsa lāꞌ tuncuj tūꞌ namakxteka de tāꞌchihuīnaꞌn Dios na ixchic lāꞌ aꞌnlhā takēstokcan. 
\v 6 Huan lakapūt aꞌntī xmān paxialhnaꞌn lāꞌ tlahua chu aꞌntū lacasquiꞌn, ūꞌtzaꞌ aꞌcxtim huaꞌchilh xanīn na ixlacapūn Dios, aꞌyuj lakahuancus.
\v 7 Huāk huāꞌ tamāꞌna nā nacāmāsuꞌniꞌyaꞌ para que huan lakapūtnuꞌ tūꞌ catatlahualh nīn tuntūꞌ aꞌntū nacālīꞌaꞌksaꞌncan.
\v 8 Palh aꞌnan aꞌntīn tūꞌ cāmaktakaꞌlha ixtalakapasnīꞌn lāꞌ palh tūꞌ āꞌchulāꞌ cāmaktakaꞌlha aꞌntīn tahuiꞌlānaꞌ na ixchic, ūꞌtzaꞌ kalhtatzēꞌka aꞌntū kalhlakaꞌīꞌnīꞌt. Aꞌchulāꞌ tasuꞌyu que āꞌchāꞌtin aꞌntīn tūꞌ kalhlakaꞌīꞌ. 
\p
\v 9 Xmān catzoꞌkti nac lista huan lakapūt palh kaꞌlhītzaꞌ tuꞌtumpuꞌxam cāꞌta lāꞌ xmān kalhatin ixkōluꞌ ixkaꞌlhīnīꞌt. 
\v 10 Lāꞌ nā maclacasquiꞌn que nalakapascan palh tzeyā puscāt xlaꞌ porque tlahuanīꞌt aꞌntūn tzey. Palh xaꞌnca cacāmakastacli ixcamanaꞌ lāꞌ palh ixcāmāhuīꞌ na ixchic aꞌntīn tatapaꞌksī con Jesús, tzē natzoꞌkcan ixtacuīniꞌ. Lāꞌ palh tlōkentaxtūlh chu xatūyā lītlōt aꞌyuj tūꞌ lej tasquiꞌnī lāꞌ palh ixcāmaktāya aꞌntī ixtapātīniꞌn, tzē natzoꞌkcan. Lāꞌ palh huan lakapūt pōꞌktu putza aꞌnchī natlahua aꞌntūn tzey, catzoꞌkuiꞌlīca.
\p
\v 11 Huan lakapūtnuꞌ aꞌntīn tūnaꞌj lej toꞌkotzīnīꞌn tūꞌ caticātzoꞌkca porque āꞌcalīstān nacātlaja ixtapuhuāncaꞌn. Lāꞌ natataxtutāya de na ixtej Dios lāꞌ chuntzaꞌ natalītapūchahuacuꞌtumpala.
\v 12 Chuntzaꞌ nacāmālaclēꞌnīcan porque tūꞌ tatlōkentaxtū aꞌnchī tatzuculh.
\v 13 Huan lakapūtnuꞌ aꞌntīn tūnaꞌj toꞌkotzīnīꞌn nā natascaꞌta natalatāꞌkchoko pūtunuꞌ chic lāꞌ natalhquititniꞌn. Lāꞌ āꞌchulāꞌ natala porque lej nataꞌaꞌksaꞌnan lāꞌ natatanū aꞌnlhā tūꞌ ixmacaꞌtzicaꞌn. Lāꞌ nā natahuan aꞌntūn tūꞌ līmakuan.
\v 14 Uꞌtzaꞌ iclīhuaniyāniꞌ catatapūchahuapā huan lakapūtnuꞌ aꞌntīn tūnaꞌj lej laktoꞌkotzīnīꞌn. Catakaꞌlhīpā ixcamanaꞌcaꞌn lāꞌ catamaktakaꞌlhli huan na ixchiccaꞌn. Chuntzaꞌ tūꞌ caticāmaxquīꞌca quintāꞌcaꞌtzacaꞌn aꞌntū natalīꞌaꞌksaꞌn.
\v 15 Aꞌmakapitzīn lakapūtnuꞌ tataxtutāyalhtzaꞌ de na ixtej Dios para natastālaniꞌ huan koꞌtiꞌtiꞌ.
\p
\v 16 Palh kalhatin kalhlakaꞌīꞌ lāꞌ palh huīꞌ ixtalakapasniꞌ xalakapūt, camaktāyalh. Chuntzaꞌ aꞌntīn tatakēstoka nac lītokpān xmān nacāmaktāya huan lakapūtnuꞌ aꞌntīn tūꞌ takaꞌlhī nīn kalhatin aꞌntī nacāmaktakaꞌlha. 
\p
\v 17 Lej nacāꞌaꞌcnīniꞌniꞌcan huan aꞌntīn takaꞌlhī līmāpaꞌksīn nac lītokpān lāꞌ xaꞌnca tamāpaꞌksīniꞌn. Aꞌchulāꞌ cacāꞌaꞌcnīniꞌniꞌca xlacaꞌn que āꞌchāꞌtin. Lāꞌ āꞌchulāꞌ nacāꞌaꞌcnīniꞌniꞌcan xlacaꞌn palh tamāsuꞌyu ixtachihuīn Dios lāꞌ tamāstūꞌnca.
\v 18 Chuntzaꞌ tatzoꞌkniꞌ na ixtachihuīn Dios: “Tūꞌ catimāꞌkalhnuꞌ ixbozal huan huācax aꞌxniꞌcaꞌ lacchiꞌntamāꞌ trigo aꞌntū lītlahuacan harina. Namakxtekaꞌ nahuaꞌ”. Lāꞌ nā chuntzaꞌ tatzoꞌkniꞌ: “Huan tasācuaꞌ natlaja ixchiꞌchiniꞌ”. 
\p
\v 19 Xmān kalhatin ixaꞌcstu tūla catilīꞌaꞌksaꞌnīniꞌlh huan aꞌntī māpaꞌksīniꞌn nac lītokpān. Maclacasquiꞌn kalhatuꞌ o kalhatuꞌtun aꞌntīn tacaꞌtzī ixtalaclēꞌiꞌ para natalīꞌaꞌksaꞌnīniꞌn.
\v 20 Lāꞌ palh chuxatī de xlacaꞌn tūꞌ makxtekcuꞌtun ixtalaclēꞌiꞌ, calacaquilhnīca na ixlacapūncaꞌn ixlīhuākcaꞌn. Lāꞌ chuntzaꞌ āꞌmakapitzīn natajicuaꞌn.
\v 21 Iclīmāmacūꞌyāniꞌ na ixlacapūncaꞌn Dios lāꞌ Jesucristo lāꞌ na ixlacapūncaꞌn ángeles aꞌntī Dios cālacsacnīꞌt. Lej iclīmāmacūꞌyāniꞌ que natlōkentaxtūyaꞌ huāꞌmāꞌ aꞌntū ictzoꞌknīꞌt. Lāꞌ tūꞌ timakxteka que xtunc natlahua kalhatin xmān ixpālacata kalhatin miꞌamigo. Ixlīhuākcaꞌn aꞌcxtimni cataꞌaꞌkahuānaꞌniꞌlh.
\v 22 Tūꞌ lacapalh naꞌaꞌcpūmāꞌcaꞌyaꞌ mimacan āꞌkalhatin aꞌntī namāxtunquīyaꞌ para natāꞌscuja Dios. Pūꞌla napāstacaꞌ palh xaꞌnca natlōkentaxtū ixlītlōt porque huiꞌx nalīpinaꞌ cuenta. Huiꞌx calīhuiꞌliꞌ natlahuaꞌyaꞌ xmān aꞌntūn tzey.
\p
\v 23 Chuhuaꞌj tūꞌtzaꞌ xmān xcān nahuaꞌyaꞌ pero macstiꞌnaꞌj xavino uva nahuaꞌyaꞌ ixpālacata mimpān porque maklhūhuaꞌ īꞌtzaꞌcaꞌnaꞌ.
\p
\v 24 Capāstacti que ixtalaclēꞌiꞌcaꞌn makapitzīn tachiꞌxcuhuīꞌt xaꞌnca cācaꞌtzīcan aꞌyuj tintīꞌ cālīꞌaꞌksaꞌnīniꞌnīꞌt. Pero ixtalaclēꞌiꞌcaꞌn āꞌmakapitzīn tintīꞌ tacaꞌtzī hasta aꞌxniꞌcaꞌ nalacāxtlahuakōꞌcan.
\v 25 Nā chuntzaꞌ tatasuꞌyu ixlītzeycaꞌn tachiꞌxcuhuīꞌt. Lāꞌ aꞌyuj tūꞌ palaj talītasuꞌyu ixlītzeycaꞌn pero tūla tamātzēꞌka pōꞌktu.

\c 6
\p
\v 1 Ixlīhuākcaꞌn xatatamāuj tasācuaꞌ lej cataꞌaꞌcnīniꞌniꞌlh ixtēcuꞌcaꞌn para que nīn tintīꞌ nalīchihuīnaꞌn aꞌntūn tūꞌ tzey ixtacuīniꞌ Dios nīn aꞌntū māsuꞌyuyāuj. 
\v 2 Huan xatatamāuj tasācuaꞌ tūꞌ catilakmakaꞌlh ixtēcuꞌ aꞌntī kalhlakaꞌīꞌ porque ixtuꞌcaꞌn talalh lītāꞌtimīn ixpālacata aꞌntūn takalhlakaꞌīꞌ. Más xaꞌnca nascuja huan tasācuaꞌ porque cāmaktāyamāꞌ aꞌntī cāpāxquīꞌcan lāꞌ aꞌntīn takalhlakaꞌīꞌ ixtachihuīn Dios. Uꞌtzaꞌ huāꞌmāꞌ namāsuꞌyuꞌyaꞌ lāꞌ stuꞌtuꞌluꞌ nahuaꞌnaꞌ chuntzaꞌ.
\s Aꞌntū nalīkoꞌxamixa
\p
\v 3 Palh kalhatin xtunc namāsuꞌyu lāꞌ tūꞌ chu lakatin huaꞌchi māsuꞌyulh huan Māpaꞌksīniꞌ Jesucristo, lāꞌ palh tūꞌ māsuꞌyu que tasquiꞌnī stālaniꞌ Dios,
\v 4 huāꞌmāꞌ chiꞌxcuꞌ lej kaꞌtlaꞌjcaꞌtzī lāꞌ tuntūꞌ caꞌtzī. Xmān lītlajacuꞌtun ūꞌtzaꞌ ixtachihuīn lāꞌ cālacapūchihuīnaꞌn. Chuntzaꞌ tzucucan lālakcaꞌtzaniꞌcan lāꞌ lālīꞌaꞌkchāꞌniꞌcan. Lāꞌ tzucucan lālakapalacan lāꞌ puhuancan aꞌntūn tūꞌ tzey de āꞌmakapitzīn. 
\v 5 Lāꞌ lej talālacatāquīꞌ porque tūꞌ tzey ixtapāstacnaꞌcaꞌn lāꞌ tūꞌtzaꞌ talakapasa huan tū xastuꞌncuaꞌ. Xlacaꞌn tapuhuan que más rico natala palh natastālaniꞌ Dios. Cataxtunqui de xlacaꞌn.
\v 6 Pero aꞌntī stālaniꞌ Dios lāꞌ līpāxuhua, ūꞌtzaꞌ līricujlanīꞌttzaꞌ.
\v 7 Aꞌxniꞌcaꞌ lacatuncuīuj, tuntūꞌ līmiuj nac huāꞌmāꞌ quilhtamacuj lāꞌ tūla catilēꞌuj catūhuā aꞌxniꞌcaꞌ nanīyāuj.
\v 8 Palh cākaꞌlhīyāuj quilīhuaꞌtcaꞌn lāꞌ quiluꞌxuꞌcaꞌn, con huāꞌmāꞌ nalīpāxuhuayāuj.
\v 9 Aꞌntī lej putza aꞌnchī nalīricujla, xlaꞌ nalīlaktzīncuꞌtuncan lāꞌ tūla catitlajalh. Lāꞌ huan lhūhuaꞌ catūhuā aꞌntū cālacasquiꞌn natala huaꞌchi aꞌksuꞌj aꞌntū nachiꞌpa lāꞌ tūꞌ catipūtaxtulh. Aꞌchulāꞌ natlahua aꞌntū xmān ixtapuhuān hasta que napāxcatlakōꞌ lāꞌ nasputa.
\v 10 Ixlītzucuniꞌ ixlīhuāk aꞌntūn tūꞌ tzey, ūꞌtzaꞌ lej kaꞌlhīcuꞌtuncan tumīn. Aꞌmakapitzīn tanto talacasquiꞌlh ixtumīncaꞌn lāꞌ tataxtutāyalh de na ixtej Dios. Lāꞌ chuntzaꞌ lej talīpātīniꞌlh.
\s Calīmaktāyaꞌ aꞌntū kalhlakaꞌīꞌyaꞌ
\p
\v 11 Lāꞌ huiꞌx, como tapaꞌksīyaꞌ con Dios, catapānuꞌ de ixlīhuāk huāꞌmāꞌ aꞌntūn tūꞌ tzey. Calīhuiꞌliꞌ lacuan namāstūꞌncniꞌcaꞌnaꞌ. Castālaniꞌ Dios. Caputza aꞌnchī āꞌchulāꞌ nalīkalhlakaꞌīꞌyaꞌ lāꞌ napāxquīꞌniꞌnaꞌ. Catāyaniꞌ aꞌntū napātleꞌkeniꞌyāniꞌ lāꞌ nalakalhuꞌmanaꞌnaꞌ. 
\v 12 Catanūniꞌ līmaktāyayaꞌ aꞌntū kalhlakaꞌīꞌyāuj. Camaklhtīniꞌ xasāstiꞌ minquilhtamacuj aꞌntū para pōꞌktu porque Dios lacsacniꞌ lāꞌ huiꞌx huaꞌnīꞌtaꞌ na ixlacapūncaꞌn tachiꞌxcuhuīꞌt que kalhlakaꞌīꞌnīꞌtaꞌ ixtachihuīn Dios.
\v 13 Icmāpaꞌksīyāniꞌ na ixlacapūn Dios aꞌntī cāmāꞌaꞌnanīlh ixlīhuāk aꞌntū aꞌnan lāꞌ na ixlacapūn Jesucristo aꞌntī māstūꞌncli ixtapuhuān Dios na ixlacapūn Poncio Pilato.
\v 14 Icmāpaꞌksīyāniꞌ que caꞌaꞌkahuānaꞌniꞌ xaꞌnca aꞌntū icmāsuꞌniꞌyāniꞌ hasta aꞌxniꞌcaꞌ namimpala quiMāpaꞌksīniꞌcaꞌn Jesucristo. Lāꞌ tūꞌ camakxtekti naxtāpalīcan nīn macstiꞌnaꞌj aꞌntū iclīmāpaꞌksīnīꞌtaꞌniꞌ. Tūꞌ catlahuaꞌ nīn tuntūꞌ aꞌntūn tzē nalīꞌaꞌksaꞌncaꞌnaꞌ.
\v 15 Aꞌxniꞌcaꞌ Dios nahuan, aꞌxniꞌcaꞌ namimpala Jesucristo. Sicuaꞌlanālanīꞌt Dios. Lāꞌ xlaꞌ lej māpaꞌksīniꞌn. Xlaꞌ huan Rey aꞌntī cāmāpaꞌksī ixlīhuākcaꞌn reyes lāꞌ xlaꞌ cāmāpaꞌksī ixlīhuākcaꞌn aꞌntīn tamāpaꞌksīniꞌn nac cāꞌquilhtamacuj.
\v 16 Xmān Dios tūꞌ catisputli. Lāꞌ tanto xkaka aꞌnlhā huiꞌlachaꞌ que nīn tintīꞌ tzē catilaktapajtzūlh. Lāꞌ tintīꞌ laktzīꞌnīꞌt porque tūla laktzīꞌncan. Ixlīhuākcaꞌn cataꞌaꞌcnīniꞌniꞌlh. Lāꞌ cacāmāpaꞌksīkōꞌlh pōꞌktu. Amén.
\p
\v 17 Huan ricosnuꞌ nac huāꞌmāꞌ quilhtamacuj nacāmāpaꞌksīyaꞌ que tūꞌ catakaꞌtlaꞌjcaꞌtzīlh lāꞌ nīn tūꞌ catalīpāhuanli ixtumīncaꞌn aꞌntū nasputa. Natalīpāhuan Dios porque xlaꞌ quincāmaxquīꞌyāniꞌ ixlīhuāk aꞌntū maclacasquiꞌnāuj para que nalīpāxuhuayāuj.
\v 18 Nacāmāpaꞌksīyaꞌ huan ricosnuꞌ que natatlahua aꞌntūn tzey. Huan lhūhuaꞌ xatzey aꞌntū natatlahua porque talakalhuꞌman āꞌmakapītzin, ūꞌtzaꞌ huaꞌchilh nalīricujla aꞌyuj tūꞌ takaꞌlhī tumīn. Catamaxquīꞌlh āꞌmakapitzīn aꞌntūn takaꞌlhī lāꞌ tūꞌ catatampiꞌlhīniꞌlh.
\v 19 Chuntzaꞌ natakaꞌlhī ixlīricujcaꞌn huan nac quilhtamacuj aꞌntū namin lāꞌ natakaꞌlhī xasāstiꞌ ixquilhtamacujcaꞌn para pōꞌktū.
\s Ixtalīmāmacūꞌn Timoteo
\p
\v 20 Timoteo, xaꞌnca cuenta catlahuaꞌ aꞌntū līmāmacūꞌcaꞌnīꞌtaꞌ. Tūꞌ tikaxpaꞌtaꞌ aꞌntī xmān chihuīnaꞌn lāꞌ tuntūꞌ huan. Lāꞌ tūꞌ cuenta titlahuaꞌyaꞌ aꞌnchī talālacatāquīꞌ aꞌntīn tapuhuan que más tacaꞌtzī.
\v 21 Aꞌmakapitzīn chuntzaꞌ tatlahualh lāꞌ ūꞌtzaꞌ talītaxtutāyalh de na ixtej Dios. Dios casicuaꞌlanālīniꞌ. Amén.