\id HEB
\h HEBREOS
\toc1 HEBREOS
\mt Huan Carta aꞌntū Cāmacāꞌniꞌca huan Hebreos
\c 1
\s Dios quincālakmacaminīꞌtaꞌniꞌ ixOꞌkxaꞌ
\p
\v 1 Makāntzaꞌ Dios lej tāpālhūhuaꞌ cāmācaꞌtzīnīlh ixaꞌctasanaꞌnīꞌn lāꞌ cāmāchihuīnīlh ixtachihuīn. Lāꞌ xlacaꞌn maklhūhuaꞌ tatāꞌchihuīnaꞌlh aꞌntī quinapapanaꞌcaꞌn. 
\v 2 Lāꞌ chuhuaꞌj huāꞌ tamāꞌna quilhtamacuj aꞌntū āꞌxmān, Dios quincālakmacaminīꞌtaꞌniꞌ ixOꞌkxaꞌ. Lāꞌ ixOꞌkxaꞌ quincāmācāꞌtzīnīnīꞌtaꞌniꞌ aꞌntū Dios lacasquiꞌn que nacaꞌtzīyāuj. Dios tlahuanīꞌt ixOꞌkxaꞌ ixtēcuꞌ xlaꞌ ixlīhuāk aꞌntū aꞌnan. IxOꞌkxaꞌ Dios cāxuiꞌlīlh huan quilhtamacuj lāꞌ aꞌntū aꞌnan nac aꞌkapūn. Cāxuiꞌlīlh huāꞌmāꞌ por ixquilhtampān Dios.
\v 3 IxOꞌkxaꞌ Dios, xlaꞌ aꞌcxtim con Dios, como lej kaꞌtlaꞌ. Xlaꞌ ūꞌtzaꞌ māpaꞌksīkōꞌ aꞌntū aꞌnan nac cāꞌquilhtamacuj lāꞌ aꞌntū tahuiꞌlānaꞌ tālhmāꞌn nac aꞌkapūn, como xlaꞌ lej kaꞌlhī līmāpaꞌksīn. Lāꞌ māniꞌ ūꞌtzaꞌ cāxapakōꞌlh quintalaclēꞌiꞌcaꞌn. Lāꞌ xlaꞌ tahuīꞌlh na ixpāxtūcānaꞌj Dios. Lāꞌ aꞌntzaꞌ tamāpaꞌksīniꞌn. 
\s IxOꞌkxaꞌ Dios lej kaꞌlhī līmāpaꞌksīn
\p
\v 4 IxOꞌkxaꞌ maxquīꞌca lej kaꞌtlaꞌ līmāpaꞌksīn. Lāꞌ tūꞌ chuntzaꞌ huan ángeles takaꞌlhī līmāpaꞌksīn. Dios maxquīꞌlh ixlītlōt aꞌntū más xakaꞌtlaꞌ. Lāꞌ tūꞌ chuntzaꞌ huan ángeles cāmaxquīꞌca ixlītlōtcaꞌn. 
\v 5 Lāꞌ Dios tūꞌ maktin cāhuaninīꞌt nīn kalhatin ixángeles, aꞌnchī huanilh ixOꞌkxaꞌ:
\q Huiꞌx quiꞌOꞌkxaꞌ.
\q Chuhuaꞌj tasuꞌyu que quit minTātaꞌ.
\m Lāꞌ nā Dios tūꞌ maktin cāhuaninīꞌt kalhatin de ixángeles:
\q Quit minTātaꞌ para pōꞌktu.
\q Lāꞌ huiꞌx quiꞌOꞌkxaꞌ para pōꞌktu.
\m
\v 6 Lāꞌ aꞌxniꞌcaꞌ namacamin nac quilhtamacuj ixOꞌkxaꞌ aꞌntī ixlacsacnīꞌt Dios hualh:
\q Uꞌtzaꞌ catamācāꞌtanīlh ixlīhuākcaꞌn ixángeles Dios.
\m
\v 7 Lāꞌ Dios chihuīnaꞌlh ixpālacatacaꞌn huan ángeles lāꞌ hualh:
\q Huan ángeles ixlacscujnīꞌn Dios.
\q Taꞌaꞌn aꞌnlhā Dios cāmacāꞌn.
\q Lej līlacapalh taꞌaꞌn huaꞌchi ūꞌniꞌ lāꞌ huaꞌchi huan makliꞌpniꞌnīꞌn.
\m
\v 8 Lāꞌ nā Dios chihuīnaꞌlh ixpālacata ixOꞌkxaꞌ, lāꞌ hualh:
\q Huiꞌx Dios lāꞌ huiꞌx namāpaꞌksīniꞌnaꞌ para pōꞌktu. 
\q Lej tzey aꞌnchī huiꞌx māpaꞌksīniꞌnaꞌ.
\q
\v 9 Huiꞌx lakatīyaꞌ aꞌntū xatzey.
\q Lāꞌ tūꞌ laktzīꞌncuꞌtunaꞌ aꞌntū koꞌhuaꞌjuaꞌ.
\q Lāꞌ ūꞌtzaꞌ līlacsacnīꞌtaꞌniꞌ minDios.
\q Lāꞌ lej māpāxuhuīniꞌ como lej maxquīꞌniꞌ lhūhuaꞌ līmāpaꞌksīn.
\q Lāꞌ huan āꞌmakapitzīn tūꞌ chuntzaꞌ cāmaxquīꞌca. 
\m
\v 10 Lāꞌ nā Dios huampā:
\q Huiꞌx, Māpaꞌksīniꞌ, tlaꞌhuaꞌ ixlīhuāk quilhtamacuj xapūꞌla.
\q Lāꞌ huiꞌx tlaꞌhuaꞌ ixlīhuāk aꞌntūn tatasuꞌyunuꞌn nac aꞌkapūn.
\q
\v 11 Lāꞌ huāk huāꞌmāꞌ natalaksputa.
\q Lāꞌ huiꞌx tūꞌ chuntzaꞌ.
\q Huiꞌx natahuiꞌlaꞌyaꞌ para pōꞌktu.
\q Huāk huāꞌmāꞌ xakōlūhuaꞌ natala huaꞌchi xamasniꞌ luꞌxuꞌ.
\q
\v 12 Tūꞌtzaꞌ caticāmaclacasquiꞌnca, como huiꞌx huāk xasāstiꞌ nacātlahuaꞌyaꞌ.
\q Chuntzaꞌ huaꞌchi kalhatin aꞌxniꞌcaꞌ tamakxtu xakōlūhuaꞌ ixluꞌxuꞌ lāꞌ lhakāꞌ xasāstiꞌ.
\q Lāꞌ huiꞌx, tūꞌ maktin catitaxtāpaliꞌ lāꞌ natahuiꞌlaꞌyaꞌ para pōꞌktu.
\m
\v 13 Lāꞌ Dios tūꞌ maktin cāhuaninīꞌt nīn kalhatin ixángeles chuntzaꞌ huaꞌchi huanilh ixOꞌkxaꞌ:
\q Catahuiꞌlaꞌ nā quimpāxtūcānaꞌj hasta que quit naꞌiccātlaja mintāꞌcaꞌtzanīꞌn.
\m
\v 14 Huan ángeles xalakahuan aꞌyuj tūla laktzīꞌncan. Lāꞌ xlacaꞌn tascuja chu aꞌnchī Dios cāmāpaꞌksī. Dios cālakmacamin para natamaktāya aꞌntī cāmāpūtaxtūca lāꞌ takaꞌlhīmāꞌna aꞌntū Dios nacāmaxquīꞌ aꞌntū lej tzey.
\c 2
\s Tasquiꞌnī naꞌaꞌkahuānaꞌniꞌyāuj aꞌntū Dios huan
\p
\v 1 Jesús xlaꞌ lej kaꞌtlaꞌ. Lāꞌ ūꞌtzaꞌ xaꞌnca nalīpāstacāuj huan xatzey tachihuīn aꞌntū quincātamācaꞌtzīnīnīꞌtaꞌniꞌ. Lāꞌ chuntzaꞌ tūꞌ catitaxtutāyauj na ixtej Dios.
\v 2 Aꞌntū Dios cāmāhuanīlh huan ángeles, ūꞌtzaꞌ lej xastuꞌncuaꞌ. Lāꞌ ixlīhuākcaꞌn aꞌntīn tūꞌ taꞌaꞌkahuānaꞌniꞌlh, xlacaꞌn cāmāpātīnīca.
\v 3 Lāꞌ nā chuntzaꞌ quinaꞌn naquincātamāpātīnīyāniꞌ palh tūꞌ namakxtekāuj que Dios naquincāmāpūtaxtūyāniꞌ. QuiMāpaꞌksīniꞌcaꞌn Jesucristo, ūꞌtzaꞌ aꞌntī xapūꞌla chihuīnaꞌlh aꞌnchī nalīpūtaxtucan. Lāꞌ aꞌntīn takaxmatli xlacaꞌn quincātamācaꞌtzīnīniꞌ lāꞌ quincātahuaniniꞌ que ūꞌtzaꞌ stuꞌncuaꞌ.
\v 4 Lāꞌ nā chuntzaꞌ Dios mālacsuꞌyulh que stuꞌncuaꞌ aꞌntū cāhuanica, como cāmacamaxquīꞌlh līmapaꞌksīn para natatlahua tāpālhūhuaꞌ lej xalakaꞌtlaꞌ lēꞌcnīn. Lāꞌ nā cāmaxquīꞌca ixlīmāpaꞌksīn Espíritu Santo chāꞌtunuꞌ chu aꞌnchī Dios ixlacasquiꞌn que natlahua chāꞌtunuꞌ.
\s Jesucristo puꞌnli huaꞌchi kalhatin chiꞌxcuꞌ para namāpūtaxtūnuꞌn 
\p
\v 5 Lāꞌ huan ángeles, tūꞌ xlacaꞌn aꞌntī Dios nacālīmāmacūꞌ huan quilhtamacuj aꞌntū līchihuīnaꞌnāuj, lāꞌ aꞌntū xasāstiꞌ nala.
\v 6 Tūꞌ ángeles caticālīmāmacūꞌlh huan quilhtamacuj. Nacālīmāmacūꞌcan tachiꞌxcuhuīꞌt. Tatzoꞌkniꞌ na ixtachihuīn Dios aꞌnlhā huancan:
\q Lāꞌ huiꞌx Dios cāpāstacaꞌ de huan tachiꞌxcuhuīꞌt aꞌyuj tūꞌ lej ixtapalhcaꞌn.
\q Lāꞌ cātlahuaniꞌyaꞌ xlacaꞌn aꞌntū lej tzey.
\q
\v 7 Huiꞌx cālīmākaꞌtliꞌ huan tachiꞌxcuhuīꞌt aꞌyuj tūꞌ huaꞌchi huan ángeles.
\q Lāꞌ cātlaꞌhuaꞌ que cacāꞌaꞌcnīniꞌniꞌca.
\q
\v 8 Lāꞌ huan tachiꞌxcuhuīꞌt tamāpaꞌksīniꞌnkōꞌ por minquilhtampān.
\m Lāꞌ aꞌxniꞌcaꞌ huancan que tamāpaꞌksīniꞌnkōꞌ, chuntzaꞌ huanicuꞌtun que huan tachiꞌxcuhuīꞌt tamāpaꞌksīkōꞌ ixlīhuāk, aꞌyuj tūnaꞌj tatasuꞌyu palh tamāpaꞌksīniꞌnkōꞌ. 
\v 9 Cristo ūꞌtzaꞌ aꞌntī māpaꞌksīniꞌn. Caꞌtzīyāuj aꞌnchī pātīniꞌlh Jesús. Tiꞌnaꞌjalh más que huan ángeles, aꞌyuj tūꞌ lej makān. Chuntzaꞌ lalh como Dios lacasquiꞌlh que xlaꞌ nanī para ixlīhuākcaꞌn tachiꞌxcuhuīꞌt como Dios lej lakalhuꞌmanaꞌn. Lāꞌ como Jesús nīlh, ūꞌtzaꞌ lej līꞌaꞌcnīniꞌniꞌcan.
\p
\v 10 Dios tlahuakōꞌnīꞌt. Xlaꞌ cāmāꞌaꞌnanīkōꞌlh ixlīhuāk aꞌntū aꞌnan, chu aꞌnchī ixtapuhuān. Lāꞌ chuntzaꞌ līmakuan que Dios macamilh ixOꞌkxaꞌ nac quilhtamacuj para nanī, como Dios ixlacasquiꞌn que lhūhuaꞌ natala ixcamanaꞌ lāꞌ nataꞌaꞌn nac aꞌkapūn. Lāꞌ como Jesucristo pātīniꞌlh por quimpālacatacaꞌn, chuntzaꞌ tzē naquincāmāpūtaxtūyāniꞌ. 
\v 11 Aꞌntī Jesús cāxapaniꞌnīꞌt ixtalaclēꞌiꞌcaꞌn, huāk ixcamanaꞌ Dios. Lāꞌ como ixcamanaꞌ Dios, chu kalhatin aꞌntī ixTātaꞌcaꞌn huaꞌchi Jesucristo. Lāꞌ ūꞌtzaꞌ tūꞌ līmāxanaꞌn Jesucristo aꞌxniꞌcaꞌ huan que xlacaꞌn ixtāꞌtimīn. 
\v 12 Tatzoꞌkniꞌ na ixtachihuīn Dios aꞌnchī Jesús huanilh Dios:
\q Quit naꞌiccālītāꞌchihuīnaꞌn de huiꞌx huan quintāꞌtimīn. 
\q Lāꞌ aꞌnlhā xlacaꞌn tatakēxtimī naꞌicmākaꞌtlīꞌyāniꞌ. 
\m
\v 13 Lāꞌ nā Jesús hualh:
\q Quit naꞌiclīpāhuan Dios.
\m Lāꞌ nā huampā:
\q Aꞌ icuīꞌ quit con ixcamanaꞌ Dios aꞌntī Dios quilīmāmacūꞌlh. 
\p
\v 14 Lāꞌ huāꞌ tamāꞌna camanaꞌ takaꞌlhī ixquinītcaꞌn lāꞌ ixkaꞌlhniꞌcaꞌn. Lāꞌ nā chuntzaꞌ Cristo lalh chu aꞌcxtim, como ixkaꞌlhī ixquinīt lāꞌ ixkaꞌlhniꞌ. Lāꞌ puꞌnli huaꞌchi kalhatin chiꞌxcuꞌ como xlaꞌ nīcuꞌtulh como chuntzaꞌ tzē natlaja huan koꞌtiꞌtiꞌ aꞌntī por ixpālacata līnīcan.
\v 15 Lāꞌ chuntzaꞌ Cristo tzē cālīmaktāyalh xlacaꞌn aꞌntī pōꞌktu ixtajicuaꞌn natanī. Lāꞌ xlaꞌ tzē cāmaklhtīlh huan ixtajicuāꞌtcaꞌn.
\v 16 Lāꞌ tūꞌ ángeles aꞌntī cāmaktāyalh Cristo. Xlaꞌ cāmaktāyalh huan tachiꞌxcuhuīꞌt aꞌntīn takalhlakaꞌīꞌ huaꞌchi Abraham.
\v 17 Ixtasquiꞌnī que Cristo ixlalh aꞌcxtim con ixtachiꞌxcuhuīꞌt Dios aꞌntī huaꞌchi māniꞌ ixtāꞌtimīn Cristo. Lāꞌ chuntzaꞌ xlaꞌ lej quincālakalhuꞌmanāniꞌ. Lāꞌ nā chuntzaꞌ tzē nala xapuxcuꞌ ixlīsacerdote na ixlacapūn Dios. Lāꞌ māniꞌ ūꞌtzaꞌ talacnūniꞌlh huaꞌchi lēꞌksajnaꞌ. Lāꞌ chuntzaꞌ tzē quincātamāpānūniꞌyāniꞌ quintalaclēꞌiꞌcaꞌn. 
\v 18 Lāꞌ chuhuaꞌj como Jesucristo māniꞌ xlaꞌ pātīniꞌlh, xlaꞌ tzē nacāmaktāya xlacaꞌn aꞌntīn tapātīniꞌmāꞌna lāꞌ aꞌntī huan koꞌtiꞌtiꞌ cāmātonkopūcuꞌtun.
\c 3
\s Jesucristo lej aꞌcnīniꞌniꞌcan
\p
\v 1 Lāꞌ huiꞌxinaꞌn, tāꞌtimīn, Dios cālacsacnīꞌtaꞌniꞌ lāꞌ ūꞌtzaꞌ līlaꞌtit huiꞌxinaꞌn ixtachiꞌxcuhuīꞌt Dios. Lāꞌ chuhuaꞌj capāstactit Jesucristo. Dios macamilh huan Jesucristo. Lāꞌ mānūlh xapuxcuꞌ ixlīsacerdote na ixlacapūn Dios. Lāꞌ Jesucristo chuntzaꞌ tzē nacāmaktāya xlacaꞌn aꞌntīn takalhlakaꞌīꞌ.
\v 2 Lāꞌ Jesucristo tlōkentaxtūkōꞌlh huāꞌmāꞌ aꞌntū Dios ixlīmāmacūꞌnīꞌt. Lāꞌ nā chuntzaꞌ Moisés tlōkentaxtūkōꞌlh nā xlaꞌ ixlīhuāk aꞌntū Dios ixlīmāmacūꞌnīꞌt por ixpālacatacaꞌn ixtachiꞌxcuhuīꞌt Dios.
\v 3 Lāꞌ minīꞌniꞌ lej caꞌaꞌcnīniꞌniꞌca Jesucristo; lāꞌ Moisés tūꞌ chuntzaꞌ caꞌaꞌcnīniꞌniꞌca. Lāꞌ nā chuntzaꞌ aꞌntī māpaꞌksī nac lakatin chic, xlaꞌ aꞌcnīniꞌniꞌcan. Lāꞌ huan āꞌmakapitzīn nac chic tūꞌ lej cāꞌaꞌcnīniꞌniꞌcan. 
\v 4 Huan chiꞌxcuhuīn tzēn tatlahua chic. Lāꞌ Dios, xlaꞌ tlahuakōꞌnīꞌt ixlīhuāk aꞌntū aꞌnan.
\v 5 Lāꞌ Moisés xaꞌnca tlahualh aꞌntū ixlīmāmacūꞌcanīꞌt por ixpālacata ixtachiꞌxcuhuīꞌt Dios. Lāꞌ xlaꞌ īꞌscuja na ixlaclhniꞌcaꞌn ixtachiꞌxcuhuīꞌt Dios. Lāꞌ xlaꞌ ixcāhuani huan tachiꞌxcuhuīꞌt aꞌntū napātleꞌke.
\v 6 Lāꞌ Cristo, xlaꞌ ixOꞌkxaꞌ Dios. Lāꞌ xlaꞌ huāk tzey aꞌntūn tlahua. Lāꞌ ūꞌtzaꞌ līmāmacūꞌcanīꞌt ixlīhuākcaꞌn aꞌntī ixtachiꞌxcuhuīꞌt Dios. Lāꞌ nā quinaꞌn ixtachiꞌxcuhuīꞌt Dios, palh quinaꞌn chu ūꞌtzaꞌ nalīpāhuanāuj līhuan lahuiꞌlānaꞌuj, lāꞌ palh līpāxuhuayāuj aꞌntū Dios naquincāmaxquīꞌyāniꞌ.
\s Ixtachiꞌxcuhuīꞌt Dios natalīpāxuhua aꞌntū Dios tlahuakōꞌlh 
\p
\v 7 Chuntzaꞌ tatzoꞌkniꞌ na ixtachihuīn Dios aꞌnchī hualh huan Espíritu Santo:
\q Chuhuaꞌj palh huiꞌxinaꞌn kaxpaꞌtāꞌtit aꞌnchī Dios huan, tūꞌ lacxumpi calaꞌtit.
\q
\v 8 Tūꞌ lacxumpi calaꞌtit huaꞌchi aꞌntīn tatāꞌlāstaꞌlalh Dios makāntzaꞌ aꞌnlhā nac cāꞌlhpiꞌmpiꞌliꞌ tiꞌyaꞌt. 
\q Dios lej cāpātīniꞌlh xlacaꞌn.
\q Lāꞌ Dios hualh:
\v 9 “Minapapanaꞌcaꞌn huaꞌchilh xlacaꞌn ixtacaꞌtzīcuꞌtun hasta lhānchulaꞌ xaꞌiccāpātīniꞌlh xlacaꞌn”.
\q Lāꞌ xlacaꞌn lej lacxumpi ixtahuanīꞌt, lāꞌ aꞌyuj talaktzīꞌlh xlacaꞌn huan lēꞌcnīn aꞌntū xaꞌictlahua quit por tuꞌpuꞌxam cāꞌta.
\q
\v 10 Lāꞌ ūꞌtzaꞌ iclīꞌaꞌkchāꞌlh con xlacaꞌn lāꞌ icualh: “Xlacaꞌn tūꞌ maktin xaꞌnca tapāstacnaꞌn. Lāꞌ tūꞌ tamāchekxī xlacaꞌn aꞌntū iclacasquiꞌn quit”.
\q
\v 11 Lāꞌ ūꞌtzaꞌ iclīꞌaꞌkchāꞌlh con xlacaꞌn lāꞌ ūꞌtzaꞌ iclīhualh que stuꞌncuaꞌ xlacaꞌn tūꞌ catitachāꞌlh huan nac tiꞌyaꞌt aꞌnlhā najaxcan con quit.
\p
\v 12 Lāꞌ chuhuaꞌj, tāꞌtimīn, xaꞌnca calatāꞌkchokotit. Lāꞌ tūꞌ caxumpīniꞌniꞌtit Dios nīn kalhatin de huiꞌxinaꞌn. Tūꞌ tzey palh tūꞌ kalhlakaꞌīꞌyāꞌtit Dios. Lāꞌ por ixpālacata huāꞌmāꞌ tzē nataxtunquīyāꞌtit con Dios xalakahuan.
\v 13 Xatzey cālāmaktāyaꞌtit macaxtim chuhuaꞌj pōꞌktu līhuān lahuiꞌlānaꞌntit nac huāꞌmāꞌ quilhtamacuj. Lāꞌ chuntzaꞌ nīn kalhatin napuhuan palh tzē natlahua aꞌntun tūꞌ tzey. Palh chuntzaꞌ napuhuan kalhatin, māniꞌ ūꞌtzaꞌ taꞌaꞌkxokomāꞌ, lāꞌ āꞌchulāꞌ tūꞌ aꞌkahuānaꞌniꞌcuꞌtun Dios.
\v 14 Palh quinaꞌn tūꞌ namakxtekāuj nalīpāhuanāuj Cristo aꞌcxtim huaꞌchi xapūꞌla ixlīpāhuanāuj, chuntzaꞌ nā quilaꞌcaꞌn nala huāk aꞌntū ixlaꞌ Cristo.
\p
\v 15 Chuntzaꞌ tatzoꞌkniꞌ na ixtachihuīn Dios:
\q Palh huiꞌxinaꞌn kaxpaꞌtāꞌtit ixtachihuīn Dios, caꞌaꞌkahuānaꞌniꞌtit. 
\q Lāꞌ tūꞌ caxumpīniꞌntit huaꞌchi xlacaꞌn xalanīꞌn makāntzaꞌ aꞌntīn tūꞌ ixtaꞌaꞌkahuānaꞌniꞌcuꞌtun Dios huan nac cāꞌlhpiꞌmpiꞌliꞌ tiꞌyaꞌt.
\m
\v 16 ¿Chā caꞌtzīyāꞌtit huiꞌxinaꞌn tichū takaxmatli ixtachihuīn Dios lāꞌ tūꞌ taꞌaꞌkahuānaꞌniꞌlh? Xlacaꞌn ūꞌtunuꞌn aꞌntī cāmāxtulh Moisés de nac Egipto.
\v 17 ¿Chā caꞌtzīyāꞌtit huiꞌxinaꞌn aꞌntī ixtamakāꞌkchāꞌnīꞌt Dios? Dios lej ixaꞌkchāꞌnīꞌt con xlacaꞌn aꞌntī ixtatlahua talaclēꞌiꞌ tuꞌpuꞌxam cāꞌta, lāꞌ ūꞌtzaꞌ talīnīlh xlacaꞌn huan nac cāꞌlhpiꞌmpiꞌliꞌ tiꞌyaꞌt.
\v 18 ¿Chā caꞌtzīyāꞌtit huiꞌxinaꞌn aꞌntī cālīchihuīnaꞌlh Dios aꞌxniꞌcaꞌ hualh que tūꞌ catitachāꞌlh nac tiꞌyaꞌt aꞌnlhā najaxcan con Dios? Dios cālīchihuīnaꞌlh xlacaꞌn aꞌntīn taxumpīniꞌniꞌlh Dios.
\v 19 Lāꞌ chuntzaꞌ tzē līmāchekxīcan que xlacaꞌn tūlalh tachāꞌlh huan nac tiꞌyaꞌt, como xlacaꞌn tūꞌ takalhlakaꞌīꞌlh que stuꞌncuaꞌ aꞌntū cāhuanilh Dios.

\c 4
\p
\v 1 Lāꞌ quinaꞌn, Dios quincāhuaninīꞌtaꞌniꞌ que tzē nachāꞌnāuj aꞌnlhā xlaꞌ huiꞌlachaꞌ lāꞌ aꞌntzaꞌ najaxāuj quinaꞌn con Dios. Lāꞌ lej tasquiꞌnī napāstacāuj aꞌnchī nalīlatāꞌkchokoyāuj, como lej lījicuaꞌ palh tūꞌ cachāꞌlh kalhatin de huiꞌxinaꞌn.
\v 2 Quinaꞌn kaxmatnīꞌtaꞌuj huan xatzey tachihuīn ixpālacata aꞌnchī līpūtaxtucan. Lāꞌ nā xlacaꞌn takaxmatli huāꞌmāꞌ tachihuīn. Lāꞌ xlacaꞌn xmān chu tlakaj takaxmatli como tūꞌ takalhlakaꞌīꞌlh palh stuꞌncuaꞌ huāꞌmāꞌ tachihuīn.
\v 3 Lāꞌ quinaꞌn, como kalhlakaꞌīꞌyāuj, nachāꞌnāuj aꞌnlhā huiꞌlachaꞌ Dios lāꞌ najaxāuj con Dios. Lāꞌ Dios cālīchihuīnaꞌlh xlacaꞌn aꞌntīn tūꞌ takalhlakaꞌīꞌlh lāꞌ hualh:
\q Quit icaꞌkchāꞌlh con xlacaꞌn lāꞌ ūꞌtzaꞌ iclīhualh que stuꞌncuaꞌ xlacaꞌn tūꞌ catitachāꞌlh huan nac tiꞌyaꞌt aꞌnlhā najaxcan con quit.
\m Lāꞌ chuntzaꞌ hualh Dios aꞌyuj ūꞌtzaꞌ ixtlahuanīꞌttzaꞌ aꞌnlhā najaxcan lāꞌ como ixtlahuakōꞌnīꞌttzaꞌ ixlīhuāk aꞌntū aꞌnan.
\v 4 Tatzoꞌkniꞌ na ixtachihuīn Dios ixpālacata huan lakatojon chiꞌchiniꞌ. Lāꞌ chuntzaꞌ huan:
\q Dios pūjaxli huan ixlīlakatojon chiꞌchiniꞌ lāꞌ tūꞌ scujli.
\m
\v 5 Lāꞌ nā aꞌntzaꞌ tatzoꞌkniꞌ:
\q Xlacaꞌn tūꞌ catitachāꞌlh aꞌnlhā najaxcan con quit. 
\m
\v 6 Aꞌntīn takaxmatli xapūꞌla huan xatzey tachihuīn ixpālacata aꞌnchī nalīpūtaxtucan, xlacaꞌn tūꞌ takalhlakaꞌīꞌlh. Lāꞌ ūꞌtzaꞌ tūꞌ talīchāꞌlh xlacaꞌn aꞌnlhā najaxcan con Dios. Lāꞌ chuntzaꞌ āꞌmakapitzīn natachāꞌn lāꞌ natatāꞌjaxa Dios.
\v 7 Lāꞌ como xlacaꞌn tūꞌ tachāꞌlh, chuntzaꞌ Dios laclhcāhuiꞌlīlh āꞌlakatin chiꞌchiniꞌ aꞌntū māpācuhuīlh chuhuaꞌj. Ixlīlhūhuaꞌ cāꞌta Dios māchihuīnīlh David aꞌntī rey ixuanīꞌt. Tatzoꞌkniꞌ na ixtachihuīn Dios aꞌnchī David hualh:
\q Chuhuaꞌj palh huiꞌxinaꞌn kaxpaꞌtāꞌtit aꞌntū Dios huan, tūꞌ lacxumpi calaꞌtit.
\m Lāꞌ caꞌtzīyāuj que pōꞌktu Dios cātaꞌsaniꞌmāꞌ ixlīhuāk huan tachiꞌxcuhuīꞌt lāꞌ hasta chuhuaꞌj.
\v 8 Lāꞌ aꞌxniꞌcaꞌ Dios chuntzaꞌ huanilh David, Josué ixchinīꞌttzaꞌ con huan tachiꞌxcuhuīꞌt huan nac tiꞌyaꞌt aꞌnlhā Dios ixcāmālacnūniꞌnīꞌt. Lāꞌ ūꞌtzaꞌ līcaꞌtzīyāuj quinaꞌn que Dios ixtāꞌchihuīnaꞌmāꞌ David por ixpālacata āꞌlacatin aꞌnlhā najaxcan.
\v 9 Lāꞌ ūꞌtzaꞌ līcaꞌtzīyāuj que quinaꞌn aꞌntī ixtachiꞌxcuhuīꞌt Dios nachāꞌnāuj aꞌnlhā cāxuiꞌlīnīꞌt para napūjaxāuj chuntzaꞌ huaꞌchi Dios jaxli ixlīlakatojon chiꞌchiniꞌ aꞌxniꞌcaꞌ cāxuiꞌlīkōꞌlh huan quilhtamacuj.
\v 10 Lāꞌ aꞌntīn tachāꞌn aꞌntzaꞌ, xlacaꞌn aꞌntīn tatlahuakōꞌnīꞌt ixlītlōtcaꞌn lāꞌ aꞌntzaꞌ natajaxa chuntzaꞌ huaꞌchi Dios jaxli aꞌxniꞌcaꞌ cāxuiꞌlīkōꞌlh huan quilhtamacuj. 
\v 11 Lāꞌ quinaꞌn lej calīhuiꞌlīuj para nachāꞌnāuj lāꞌ aꞌntzaꞌ najaxāujtit con Dios. Lāꞌ tūꞌ calauj huaꞌchi xalaꞌnīꞌn makāntzaꞌ. Xlacaꞌn tūlalh tachāꞌlh como tūꞌ takalhlakaꞌīꞌlh palh stuꞌncuaꞌ aꞌntū hualh Dios.
\p
\v 12 Lāꞌ ixtachihuīn Dios xlaꞌ huaꞌchilh xalakahuan lāꞌ lej kaꞌlhī līmāpaꞌksīn como ūꞌtzaꞌ scuja na quiꞌaꞌclhcunuccaꞌn. Ixtachihuīn Dios huaꞌchi kantin espada aꞌntū kēstītuꞌ lāꞌ tzej staꞌyaꞌncaꞌ, aꞌntū tzē lakchāꞌnkōꞌ quiꞌaꞌclhcunuccaꞌn. Lāꞌ ūꞌtzaꞌ nalīcaꞌtzīyāuj palh tūꞌ tzey quiꞌaꞌclhcunuccaꞌn lāꞌ quintapāstacnaꞌcaꞌn.
\v 13 Lāꞌ Dios huāk laktzīꞌhuīꞌ. Nīn tuntūꞌ tzē natatzēꞌkniꞌ na ixlacapūn Dios. Xlaꞌ lakapaskōꞌ quiꞌaꞌclhcunuccaꞌn. Lāꞌ quinaꞌn kaꞌlhī nakalhtīniꞌnāuj na ixlacapūn Dios por ixpālacata aꞌntū tlahuayāuj chāꞌtunuꞌ de quinaꞌn.
\s Dios līmānūlh Jesucristo xapuxcuꞌ ixlīsacerdote 
\p
\v 14 Lāꞌ Jesucristo, ixOꞌkxaꞌ Dios, chāꞌnīꞌttzaꞌ xlaꞌ aꞌnlhā huiꞌlachaꞌ Dios. Xlaꞌ ūꞌtzaꞌ huaꞌchi kalhatin xapuxcuꞌ sacerdote aꞌntī quincālacapūtāyamāꞌniꞌ lāꞌ chihuīnaꞌn por quinaꞌn. Lāꞌ chuntzaꞌ quinaꞌn tūꞌ catimakxtekui kalhlakaꞌīꞌyāuj Jesucristo nīn macstiꞌnaꞌj.
\v 15 Lāꞌ Jesucristo huaꞌchi quisacerdotecaꞌn. Xlaꞌ quincālakalhuꞌmanāniꞌ quinaꞌn, como nā xlaꞌ xapūꞌla chuntzaꞌ ixtalīlaktzīꞌncuꞌtun aꞌxniꞌcaꞌ ixlatlāꞌhuan nac quilhtamacuj, chuntzaꞌ huaꞌchi quinaꞌn quincāpātleꞌkeniꞌmāꞌniꞌ. Pero xlaꞌ nīn tuntūꞌ tlahualh aꞌntūn tūꞌ tzey.
\v 16 Lāꞌ ūꞌtzaꞌ calītapajtzūj na ixlacapūn Dios. Lāꞌ tūꞌ calacapuhuanui. Xlaꞌ lej lakalhuꞌmanaꞌn. Lāꞌ naquincāmaktāyayāniꞌ aꞌxniꞌcaꞌ maclacasquiꞌnāuj.

\c 5
\p
\v 1 Lāꞌ huan chiꞌxcuhuīꞌn israelitas aꞌntīn cālīmānūcan xanapuxcuꞌnuꞌ ixlīsacerdotecaꞌn, chāꞌtunuꞌ tascuja na ixlacapūn Dios por ixpālacatacaꞌn huan tachiꞌxcuhuīꞌt. Lāꞌ kalhatin chiꞌxcuꞌ aꞌntī xapuxcuꞌ sacerdote, xlaꞌ mālacnūniꞌ lēꞌksajnaꞌ huan Dios para nacāmāpānūniꞌcan ixtalaclēꞌiꞌcaꞌn huan tachiꞌxcuhuīꞌt.
\v 2 Lāꞌ huāꞌmāꞌ sacerdote, como xlaꞌ chiꞌxcuꞌ, aꞌkatunuꞌ tlahua aꞌntūn tūꞌ tzey. Lāꞌ ūꞌtzaꞌ līlacatzucu cālīpātīniꞌ xlacaꞌn aꞌntīn tūnaꞌj xaꞌnca tacaꞌtzī lāꞌ xlacaꞌn aꞌntīn tatatonkopūnīꞌt.
\v 3 Lāꞌ como xlaꞌ aꞌkatunuꞌ tlahua aꞌntūn tūꞌ tzey, tasquiꞌnī que xlaꞌ naꞌaꞌksajuīꞌnin xapūꞌla para namāpānūniꞌcan ixtalaclēꞌiꞌ māniꞌ ūꞌtzaꞌ. Lāꞌ āꞌcalīstān xlaꞌ aꞌksajuīꞌnin para nacāmāpānūniꞌcan ixtalaclēꞌiꞌcaꞌn tachiꞌxcuhuīꞌt.
\p
\v 4 Lāꞌ nīn tintīꞌ ixaꞌcstu tzē natanūniꞌ xapuxcuꞌ ixlīsacerdote. Xmān Dios aꞌntī tzē namānū xapuxcuꞌ ixlīsacerdote, chuntzaꞌ huaꞌchi Dios mānūlh Aarón. 
\v 5 Lāꞌ Cristo nā tūꞌ ixaꞌcstu tanūniꞌlh xapuxcuꞌ sacerdote. Xlaꞌ mānūlh Dios lāꞌ huanilh:
\q Huiꞌx quiꞌOꞌkxaꞌ lāꞌ chuhuaꞌj tasuꞌyu que quit minTātaꞌ. 
\m
\v 6 Lāꞌ nā tatzoꞌkniꞌ na ixtachihuīn Dios aꞌnchī Dios hualh:
\q Huiꞌx nalaꞌyaꞌ milīsacerdote para pōꞌktu.
\q Lāꞌ chuntzaꞌ huaꞌchi mānūca Melquisedec ixlīsacerdote lāꞌ nā chuntzaꞌ huiꞌx namānūcaꞌnaꞌ.
\m
\v 7 Lāꞌ Jesucristo aꞌxniꞌcaꞌ ixlatlāꞌhuan nac quilhtamacuj, xlaꞌ lej ixkalhtōꞌkaꞌ con ixlīhuāk ixaꞌclhcunuc lāꞌ lej īꞌsquiꞌniꞌ Dios hasta ixcalhuaniꞌ. Lāꞌ Dios ūꞌtzaꞌ aꞌntī tzē ixmāpūtaxtūlh de huan līnīn. Lāꞌ Dios kaxmatniꞌlh huan ixoración, como Jesucristo xmān ixtlahuacuꞌtun aꞌntū ixtapuhuān Dios.
\v 8 Lāꞌ Jesucristo aꞌyuj ixOꞌkxaꞌ Dios, xlaꞌ ixaꞌkahuānaꞌniꞌ lāꞌ ūꞌtzaꞌ līpātīniꞌlh xlaꞌ. Lāꞌ ūꞌtzaꞌ xlaꞌ līmāchekxī aꞌnchī tapātīniꞌn aꞌntīn taꞌaꞌkahuānaꞌniꞌ Dios.
\v 9 Lāꞌ Jesucristo lej xaꞌnca aꞌkahuānaꞌniꞌlh Dios hasta nīlh chu aꞌnchī ixtapuhuān Dios. Lāꞌ ūꞌtzaꞌ xlaꞌ tzē nacālīmāpūtaxtū para pōꞌktu xlacaꞌn aꞌntīn taꞌaꞌkahuānaꞌniꞌ.
\v 10 Lāꞌ Dios līmānūlh xapuxcuꞌ ixlīsacerdote chuntzaꞌ huaꞌchi Melquisedec.
\s Lījicuaꞌ palh taspiꞌtāyacan na ixtej Dios
\p
\v 11 Quit iccāhuanicuꞌtunāniꞌ huiꞌxinaꞌn ixpālacata aꞌnchī Jesucristo huaꞌchi Melquisedec. Pero lej jicslīhuaꞌ como huiꞌxinaꞌn tūnaꞌj xaꞌnca māchekxīꞌyāꞌtit. 
\v 12 Lāꞌ maclacasquiꞌnāꞌtitcus aꞌntī nacātamāsuꞌniꞌyāniꞌ huiꞌxinaꞌn aꞌntūn tūꞌ xajicslīhuaꞌ ixtachihuīn Dios. Lāꞌ como huiꞌxinaꞌn makāntzaꞌ kalhlakaꞌīꞌnīꞌtaꞌntittzaꞌ, huiꞌxinaꞌn tzētzaꞌ ixcāmāsuꞌniꞌtit huan āꞌmakapitzīn. Huiꞌxinaꞌn huaꞌchi kalhatincus skaꞌtaꞌ aꞌntī xmāncus leche tahuaꞌ lāꞌ tūlanaꞌj tahuāꞌyan.
\v 13 Huan lakskaꞌtāꞌn aꞌntī xmāncus leche tahuaꞌ, xlacaꞌn tūnaꞌj tacaꞌtzī aꞌntūn tzey lāꞌ aꞌntūn tūꞌ tzey. 
\v 14 Lāꞌ aꞌntī xastacniꞌtzaꞌ, xlacaꞌn tacaꞌtzītzaꞌ aꞌntūn tzey lāꞌ aꞌntūn tūꞌ tzey.

\c 6
\p
\v 1 Lāꞌ chuhuaꞌj como huiꞌxinaꞌn kalhlakaꞌīꞌnīꞌtaꞌntittzaꞌ, tūꞌtzaꞌ icticāhuaniniꞌ aꞌntū cātamāsuꞌniꞌniꞌ ixtachihuīn xapūꞌla. Tūꞌtzaꞌ icticāhuaniniꞌ aꞌnchī lītzucucan kalhlakaꞌīꞌcan Cristo lāꞌ aꞌnchī līxtāpalīcan quintapāstacnaꞌcaꞌn lāꞌ aꞌnchī līmakxtekcan tlahuacan aꞌntūn tūꞌ tzey, lāꞌ aꞌnchī līkalhlakaꞌīꞌcan Dios. Chuhuaꞌj naꞌiccāhuaniyāniꞌ aꞌntū lej jicslīhuaꞌ māchekxīcan aꞌntū ixlaꞌ Dios.
\v 2 Lāꞌ tūꞌtzaꞌ icticāhuaniniꞌ aꞌnchī līꞌaꞌkpaxcan, lāꞌ aꞌnchī cālīmāꞌcaꞌniꞌcan macan, lāꞌ aꞌnchī nalīlakahuanchokocan, lāꞌ aꞌnchī Dios nalījuzgarlī. 
\v 3 Chuhuaꞌj, palh Dios lacasquiꞌn, naꞌiccāmāsuꞌniꞌyāniꞌ aꞌntū más xajicslīhuaꞌ ixpālacata ixtachihuīn Dios. 
\p
\v 4 Aꞌntīn tataspiꞌtāyanīꞌt na ixtej Dios, lejtzaꞌ jicslīhuaꞌ natalītaspiꞌtpala xlacaꞌn. Xlacaꞌn tamāchekxīnīꞌttzaꞌ aꞌnchī nalīpūtaxtucan lāꞌ aꞌnchī Dios cālīsicuaꞌlanālī ixtachiꞌxcuhuīꞌt lāꞌ aꞌnchī kaꞌlhī līmāpaꞌksīn huan Espíritu Santo.
\v 5 Lāꞌ xlacaꞌn tacaꞌtzī que lej tzey aꞌntūn takalhlakaꞌīꞌnīꞌt ixpālacata aꞌntū huanīꞌt Dios, lāꞌ talaktzīꞌnīꞌt huan lēꞌcnīꞌn aꞌntū tlahuacan por ixlīmāpaꞌksīn Jesucristo. Lāꞌ por huāꞌmāꞌ līmāpaꞌksīn namāpaꞌksīkōꞌcan aꞌxniꞌcaꞌ namin huan xasāstiꞌ quilhtamacuj.
\v 6 Lāꞌ como xlacaꞌn tataxtutāyanīꞌt na ixtej Dios, tūlatzaꞌ cāmāxtapālīnīpalacan huaꞌchi tatlahualh xapūꞌla. Tūlatzaꞌ como huaꞌchilh talakapalanīꞌt Jesús aꞌnchī nīlh nac cruz. Lāꞌ huaꞌchilh ixtaxtokohuaꞌcaꞌpā ixOꞌkxaꞌ Dios.
\v 7 Chuhuaꞌj quit iccāhuanicuꞌtunāniꞌ aꞌntū huaꞌchi lītalacastuca. Nac cāꞌtacuxtu maklhūhuaꞌ la huan xcān. Lāꞌ huan xcān chūꞌhuaꞌ nac huan tiꞌyaꞌt. Lāꞌ chuntzaꞌ līlanaꞌn lāꞌ chuntzaꞌ talīhuāꞌyan aꞌntīn tascuja nac huāꞌmāꞌ tiꞌyaꞌt. Chuntzaꞌ līla chu aꞌnchī ixtapuhuān Dios.
\v 8 Lāꞌ nac tiꞌyaꞌt aꞌnlhā staca xmān lhtucūꞌn lāꞌ chiꞌtin, huanmāꞌ tuntūꞌ ixtapalh. Natahuan que tūꞌ tzey. Lāꞌ natalhcuyu. Huāꞌmāꞌ tiꞌyaꞌt huaꞌchi aꞌntīn tataspiꞌtchokonīꞌt na ixtej Dios.
\s Dios natlōkentaxtū aꞌntū huan
\p
\v 9 Aꞌyuj chuntzaꞌ ictzoꞌka quit, quit iccaꞌtzī que huiꞌxinaꞌn tūꞌ taspiꞌtchokonīꞌtaꞌntit huan nac tej. Xaꞌnca tasuꞌyu que huiꞌxinaꞌn kalhlakaꞌīꞌyāꞌtit.
\v 10 Huāk aꞌntū Dios tlahua, xlaꞌ huāk tzey. Xlaꞌ tūꞌ catipātzaꞌnkālh aꞌnchī scujnīꞌtaꞌntit huiꞌxinaꞌn lāꞌ aꞌnchī māsuꞌyunīꞌtaꞌntit que pāxquīꞌyāꞌtit Dios. Chuntzaꞌ tasuꞌyu como huiꞌxinaꞌn cāmaktāyaꞌnīꞌtaꞌntit āꞌmakapitzīn aꞌntīn takalhlakaꞌīꞌ lāꞌ ticāmaktāyapāꞌnaꞌntitcus. 
\v 11 Quit lej iclacasquiꞌn que milīhuākcaꞌn huiꞌxinaꞌn cascujtit chuntzaꞌ līhuan lahuiꞌlāꞌnaꞌntitcus nac quilhtamacuj. Lāꞌ chuntzaꞌ napātleꞌke ixlīhuāk aꞌntū huiꞌxinaꞌn kaꞌlhīꞌpāꞌnaꞌntit.
\v 12 Tūꞌ iclacasquiꞌn que laclhquititniꞌ nalaꞌyāꞌtit. Iclacasquiꞌn que nacāmakscaꞌtāꞌtit āꞌmakapitzīn aꞌntīn takalhlakaꞌīꞌ lāꞌ tapātīniꞌn. Xlacaꞌn tamaklhtīniꞌmāꞌna aꞌntū cāhuaninīꞌt Dios que nacāmaxquīꞌ.
\p
\v 13 Aꞌxniꞌcaꞌ Dios huanilh Abraham aꞌntū natlahuaniꞌ, Dios tapācuhuīlh māniꞌ ūꞌtzaꞌ, como tintīꞌ āꞌkalhatin más xakaꞌtlaꞌ.
\v 14 Lāꞌ Dios hualh:
\q Lej ixlīstuꞌncuaꞌ naꞌicsicuaꞌlanālīyāniꞌ quit. 
\q Lāꞌ stuꞌncuaꞌ naꞌicmaxquīꞌyāniꞌ lej lhūhuaꞌ minatāꞌnaꞌtnaꞌ. 
\m
\v 15 Lāꞌ Abraham pōꞌktu kaꞌlhīlh lāꞌ tūꞌ jiclhuaꞌlh. Lāꞌ chuntzaꞌ maklhtīniꞌlh aꞌntū Dios ixuaninīꞌt. 
\v 16 Aꞌxniꞌcaꞌ kalhatin chiꞌxcuꞌ huan que lej stuꞌncuaꞌ aꞌntū xlaꞌ chihuīnaꞌn, xlaꞌ māpācuhuī āꞌkalhatin aꞌntī más xakaꞌtlaꞌ lāꞌ tzē namāpātīnī palh tūꞌ natlōkentaxtū. Lāꞌ chuntzaꞌ talīkoꞌxamixa aꞌntī ixtalāquilhnī como tacaꞌtzī que huan chiꞌxcuꞌ kaꞌlhī que natlōkentaxtū.
\v 17 Lāꞌ nā Dios tapācuhuīlh māniꞌ ūꞌtzaꞌ. Chuntzaꞌ tlahualh como ixlacasquiꞌn que natacaꞌtzī huan tachiꞌxcuhuīꞌt que huanmāꞌ lej stuꞌncuaꞌ lāꞌ xlaꞌ natlōkentaxtū aꞌntū hualh.
\v 18 Quinaꞌn caꞌtzīyāuj que lej stuꞌncuaꞌ aꞌntū Dios hualh, como tapācuhuīlh māniꞌ ūꞌtzaꞌ lāꞌ xlaꞌ tūꞌ maktin aꞌkxokonuꞌn. Lāꞌ ūꞌtzaꞌ līpāxuhuayāuj como huaꞌchilh tzāꞌlaniꞌnīꞌtaꞌuj aꞌntū lījicuaꞌ lāꞌ lakminīꞌtaꞌuj Dios. Lāꞌ Dios hualh que quincāmāpūtaxtūnīꞌtaꞌniꞌ. Lāꞌ chuhuaꞌj caꞌtzīyāuj xaꞌnca que kaꞌlhīyāuj xasāstiꞌ quinquilhtamacujcaꞌn para pōꞌktu.
\v 19 Lāꞌ como caꞌtzīyāuj que nakaꞌlhīyāuj quinquilhtamacujcaꞌn para pōꞌktu, chuntzaꞌ tūꞌ tamakchuyīnīꞌtaꞌuj. Lāꞌ chuntzaꞌ quinaꞌn huaꞌchi aꞌntū tzancstāya. Caꞌtzīyāuj que natanūyāuj nac aꞌkapūn aꞌnlhā sicuaꞌlanālanīꞌt. 
\v 20 Lāꞌ aꞌntzaꞌ xapūꞌla tanūnīꞌt Jesús aꞌnlhā natanūyāuj. Lāꞌ xlaꞌ tāꞌchihuīnaꞌn Dios por quimpālacatacaꞌn, como xlaꞌ lalh xapuxcuꞌ sacerdote para pōꞌktu huaꞌchi Melquisedec.
\c 7
\s Jesucristo līmānūcanīꞌt ixlīsacerdote chuntzaꞌ huaꞌchi līmānūca Melquisedec
\p
\v 1 Huāꞌ Melquisedec xlaꞌ rey ixuanīꞌt nac Salem lāꞌ nā ixsacerdote Dios xalaꞌ nac aꞌkapūn. Melquisedec tāꞌlāpāxtokli Abraham aꞌxniꞌcaꞌ xlaꞌ ixtaspiꞌtmāꞌ de huan nac guerra aꞌnlhā ixcāmaknīnīꞌt huan reyes. Lāꞌ Melquisedec sicuaꞌlanālīlh.
\v 2 Lāꞌ Abraham maxquīꞌlh huan ixlītāpācāuj de ixlīhuāk catūhuā aꞌntū ixlīminīꞌt de huan nac guerra. Huan tacuīniꞌ Melquisedec huanicuꞌtun “rey aꞌntī lej tzey”. Lāꞌ xlaꞌ rey ixuanīꞌt nac Salem. Lāꞌ Salem huanicuꞌtun “caꞌcs huīꞌ”. Lāꞌ chuntzaꞌ ixtacuīniꞌ huanicuꞌtun “huan rey aꞌntī cāmākoꞌxamixī huan tachiꞌxcuhuīꞌt”.
\v 3 Tūꞌ tatzoꞌkniꞌ ixtacuīniꞌ ixtātaꞌ nīn ixtzīꞌt Melquisedec. Lāꞌ tūꞌ tatzoꞌkniꞌ nīn kalhatin de ixpap. Lāꞌ tūꞌ tatzoꞌkniꞌ aꞌxniꞌcaꞌ Melquisedec lacatuncuīlh lāꞌ nīn aꞌxniꞌcaꞌ nīlh. Lāꞌ chuntzaꞌ xlaꞌ kalhatin sacerdote ixuanīꞌt līhuan ixlahuīꞌ. Lāꞌ huāꞌmāꞌ huaꞌchi ixOꞌkxaꞌ Dios.
\p
\v 4 Māchekxīcan que Melquisedec, xlaꞌ kalhatin chiꞌxcuꞌ ixuanīꞌt aꞌntī lej ixtasquiꞌnī. Chuntzaꞌ māchekxīcan aꞌnchī Abraham, xlaꞌ quimpapcaꞌn quinaꞌn israelitas lāꞌ xlaꞌ maxquīꞌlh Melquisedec ixlītāpācāuj de ixlīhuāk aꞌntū tlajalh nac guerra.
\v 5 Lāꞌ īꞌxūꞌyātāꞌnatnaꞌ Leví aꞌntī sacerdotes ixtahuanīꞌt, xlacaꞌn tamaklhtīniꞌlh huan ixlītāpācāuj aꞌntū ixtatlaja ixtāꞌisraelitascaꞌn. Chuntzaꞌ ixuanīꞌt huan ley. Tamaklhtīniꞌlh de ixtāꞌisraelitascaꞌn, aꞌyuj xlacaꞌn nā īꞌxūꞌyātāꞌnatnaꞌ Abraham ixtahuanīꞌt, como Abraham ūꞌtzaꞌ ixpapcaꞌn ixlīhuākcaꞌn huan israelitas. 
\v 6 Lāꞌ Melquisedec, aꞌyuj tūꞌ iꞌxtalakapasniꞌ Leví ixuanīꞌt, xlaꞌ maklhtīniꞌlh ixlītāpācāuj aꞌntū ixtlajanīꞌt Abraham lāꞌ ūꞌtzaꞌ sicuaꞌlanālīlh Abraham. Lāꞌ Abraham ūꞌtzaꞌ aꞌntī Dios huanilh que lej namaxquīꞌ lhūhuaꞌ ixnatāꞌnaꞌtnaꞌ lāꞌ ixtatlahualh lakatin kaꞌtlaꞌ nación. 
\v 7 Chuntzaꞌ māchekxīcan que Abraham, xlaꞌ macstiꞌnaꞌj kaꞌtlaꞌ ixuanīꞌt lāꞌ Melquisedec más xakaꞌtlaꞌ ixuanīꞌt. Chuntzaꞌ māchekxīcan como caꞌtzīkōꞌcan que más xakaꞌtlaꞌ aꞌntī sicuaꞌlanālīniꞌn lāꞌ tūꞌ lej kaꞌtlaꞌ aꞌntī sicuaꞌlanālīcan.
\v 8 Huan īꞌxūꞌyātāꞌnatnaꞌ Leví aꞌntī ixtamaklhtīniꞌn ixlītāpācāuj aꞌntū ixtatlaja huan israelitas, lāꞌ xlacaꞌn tanīlh chuntza huaꞌchi ixlīhuākcaꞌn tachiꞌxcuhuīꞌt. Lāꞌ Melquisedec huaꞌchilh xalakahuancus, como tūꞌ tatzoꞌkniꞌ na ixtachihuīn Dios palh nīlh. 
\v 9 Huan īꞌxūꞌyātāꞌnatnaꞌ Leví ixtamaklhtīniꞌn huan ixlītāpācāuj de ixtatlajcaꞌn israelitas. Lāꞌ tzē nahuanāuj que Leví māpalanaꞌlh aꞌxniꞌcaꞌ Abraham māpalalh Melquisedec.
\v 10 Chuntzaꞌ tzē nahuanāuj como Leví īꞌxūꞌyātāꞌnat Abraham ixuanīꞌt, lāꞌ aꞌyuj tūnaꞌj ixlacatuncuī aꞌxniꞌcaꞌ Melquisedec tāꞌlāpāxtokli Abraham.
\p
\v 11 Iꞌxūꞌyātāꞌnatnaꞌ Leví, aꞌntī sacerdotes ixtahuanīꞌt, xlacaꞌn ixtascuja chu aꞌnchī huan ley aꞌntū Dios mātzoꞌknīlh Moisés. Lāꞌ como huāꞌmāꞌ ley tūla cātlahua lactzey huan tachiꞌxcuhuīꞌt chu aꞌnchī Dios lacasquiꞌn, chuntzaꞌ ixtasquiꞌnī āꞌkalhatin sacerdote huaꞌchi Melquisedec lāꞌ tūꞌ huaꞌchi Aarón.
\v 12 Lāꞌ aꞌxniꞌcaꞌ natatanū huan xalacxtuncnuꞌ sacerdotes, tasquiꞌnī que naxtāpalīcan huan ley.
\v 13 Lāꞌ huan xasāstiꞌ sacerdote, ūꞌtzaꞌ huan Māpaꞌksīniꞌ Jesucristo. Xlaꞌ tūꞌ īꞌxūꞌyātāꞌnat Leví. Xlaꞌ īꞌxūꞌyātāꞌnat Judá. Lāꞌ huan īꞌxūꞌyātāꞌnatnaꞌ Judá, tūꞌ ixaꞌnan āꞌkalhatin sacerdote.
\v 14 Caꞌtzīkōꞌcan que quiMāpaꞌksīniꞌcaꞌn Jesucristo, xlaꞌ īꞌxūꞌyātāꞌnat Judá ixuanīꞌt. Lāꞌ Moisés, aꞌxniꞌcaꞌ līchihuīnaꞌlh sacerdotes, tuntūꞌ hualh de Judá lāꞌ īꞌxūꞌyātāꞌnatnaꞌ.
\p
\v 15 Lāꞌ chuhuaꞌj xaꞌnca māchekxīcan que tanūnīꞌt āꞌtāpātin sacerdote. Lāꞌ ūꞌtzaꞌ huāꞌmāꞌ aꞌntī Jesucristo. Lāꞌ xlaꞌ huaꞌchi Melquisedec.
\v 16 Melquisedec tūꞌ tanūlh ixlīsacerdote chu aꞌnchī ixtalanāncaꞌn tachiꞌxcuhuīꞌt. Lāꞌ nā chuntzaꞌ Jesucristo. Xlaꞌ tanūlh ixlīsacerdote como xlaꞌ kaꞌlhī līmapaꞌksīn aꞌntūn tūꞌ maktin catisputli, como xlaꞌ natahuiꞌla para pōꞌktu.
\v 17 Tatzoꞌkniꞌ na ixtachihuīn Dios ixpālacata Cristo: 
\q Huiꞌx kalhatin sacerdote para pōꞌktu.
\q Huiꞌx huaꞌchi Melquisedec.
\m
\v 18 Huan ley aꞌntū Dios mātzoꞌknīlh Moisés tuntūꞌtzaꞌ ixtapalh, como tūla quincātlahuayāniꞌ lactzey chu aꞌnchī Dios lacasquiꞌn.
\v 19 Huāꞌmāꞌ ley tūla quincātlahuayāniꞌ lactzey. Pero chuhuaꞌj quinaꞌn kaꞌlhīyāuj aꞌntū más xatzey. Tzētzaꞌ nalaktapajtzūyāuj Dios.
\p
\v 20 Dios hualh que lej stuꞌncuaꞌ ixmānūlh Jesucristo ixlīsacerdote.
\v 21 Lāꞌ tūꞌ chuntzaꞌ hualh aꞌxniꞌcaꞌ tatanūlh huan āꞌmakapitzīn sacerdotes. Chuntzaꞌ huan ixtachihuīn Dios aꞌnlhā huan:
\q Huan Māpaꞌksīniꞌ Dios mālacstūꞌncli lāꞌ xlaꞌ natlōkentaxtū aꞌntū huan: “Huiꞌx kalhatin sacerdote para pōꞌktu. Huix huaꞌchi Melquisedec”.
\m
\v 22 Lāꞌ huan convenio aꞌntū Jesús lacāxtlahualh, ūꞌtzaꞌ más xatzey. Lāꞌ aꞌntū xalaꞌ pūꞌla, xlaꞌ tūꞌ lej tzey.
\v 23 Huan āꞌmakapitzīn sacerdotes lej lhūhuaꞌ ixtahuanīꞌt como ixtanītēlha lāꞌ ixtatanūtēlha āꞌmakapitzīn ixlaktapalhcaꞌn.
\v 24 Lāꞌ Jesucristo xlaꞌ huīꞌ para pōꞌktu lāꞌ tūꞌ makxteka de ixlīsacerdote. Lāꞌ tūꞌ catitanūlh āꞌkalhatin ixlaktapalh.
\v 25 Lāꞌ ūꞌtzaꞌ Jesucristo tzē nacālīmāpūtaxtūkōꞌ xlacaꞌn aꞌntīn tatapaꞌksī con Dios por ixpālacata Jesucristo. Huāꞌmāꞌ tzē natlahua como xlaꞌ huīꞌ para pōꞌktu lāꞌ pōꞌktu squiꞌniꞌmāꞌ Dios por aꞌntīn takalhlakaꞌīꞌ xlaꞌ.
\p
\v 26 Jesucristo xlaꞌ kalhatin xapuxcuꞌ sacerdote chuntzaꞌ huaꞌchi tasquiꞌnī. Ixlīhuāk aꞌntū tlahua, huāk tzey. Lāꞌ tūꞌ tlahuaniꞌ aꞌntūn tūꞌ tzey āꞌkalhatin. Lāꞌ nīn tuntūꞌ tlahuanīꞌt aꞌntūn tūꞌ tzey. Xlaꞌ tūꞌ huaꞌchi xlacaꞌn aꞌntīn tatlahua aꞌntūn tūꞌ tzey. Lāꞌ xlaꞌ huiꞌlachaꞌ nac aꞌkapūn aꞌnlhā lej aꞌcnīniꞌniꞌcan.
\v 27 Xlaꞌ tūꞌ huaꞌchi āꞌmakapitzīn xanapuxcuꞌnuꞌ sacerdotes. Xlacaꞌn lakalīyān taꞌaꞌksajuīꞌ Dios. Xapūꞌla tatlahua para ixtalaclēꞌiꞌcaꞌn māniꞌ ūꞌtunuꞌn lāꞌ āꞌcalīstān tatlahua para āꞌmakapitzīn. Jesucristo tūꞌ chuntzaꞌ tlahua. Xlaꞌ mālacnūlh xmān lakatin lēꞌksajnaꞌ. Xmān maktin mālacnūlh aꞌxniꞌcaꞌ tamacamāstāꞌlh ixaꞌcstu nac cruz. Lāꞌ huāꞌmāꞌ lēꞌksajnaꞌ tāyaniꞌ para pōꞌktu.
\v 28 Chu aꞌnchī huan ley aꞌntū Dios mātzoꞌknīlh Moisés, ixcāmānūcan chiꞌxcuhuīꞌn huaꞌchi xanapuxcuꞌnuꞌ sacerdotes. Lāꞌ como chiꞌxcuhuīꞌn ixtahuanīꞌt, ixtatlahua talaclēꞌiꞌ. Lāꞌ aꞌxniꞌcaꞌ maxquīꞌcanīꞌttzaꞌ huāꞌmāꞌ ley, Dios hualh que stuꞌncuaꞌ namānū ixOꞌkxaꞌ ixlīsacerdote. Lāꞌ mānūlh ixlīsacerdote para pōꞌktu. Lāꞌ chuntzaꞌ lalh sacerdote chuntzaꞌ huaꞌchi Dios ixlacasquiꞌn.
\c 8
\s Jesús lacāxtlahualh huan xasāstiꞌ convenio
\p
\v 1 Aꞌntū iccāhuanimāꞌniꞌ, ūꞌtzaꞌ huāꞌmāꞌ: Jesucristo, xlaꞌ xapuxcuꞌ sacerdote chu aꞌnchī tasquiꞌnī. Lāꞌ xlaꞌ tāꞌchihuīnaꞌn Dios por quimpālacatacaꞌn. Xlaꞌ huiꞌlachaꞌ na ixpāxtūcānaꞌj Dios nac aꞌkapūn.
\v 2 Xlaꞌ ūꞌtzaꞌ xapuxcuꞌ sacerdote nac lītokpān aꞌntū huiꞌlachaꞌ nac aꞌkapūn. Lāꞌ huanmāꞌ lītokpān tlahualh Dios lāꞌ tūꞌ tachiꞌxcuhuīꞌt.
\v 3 Huan ixlītlōt kalhatin xapuxcuꞌ sacerdote, xlaꞌ xmān mālacnūniꞌ lēꞌksajnaꞌ huan Dios. Lāꞌ ixtasquiꞌnī que Jesucristo ixmālacnūniꞌlh lēꞌksajnaꞌ Dios.
\v 4 Palh Jesucristo latlāꞌhuancus cahuā nac quilhtamacuj, xlaꞌ tūꞌ ixlalh ixlīsacerdote, como huan sacerdotes huāꞌtzāꞌ tamālacnūniꞌ Dios lēꞌksajnaꞌ chu aꞌnchī huan ley aꞌntū Dios mātzoꞌknīlh Moisés.
\v 5 Aꞌntū huan sacerdotes huāꞌtzāꞌ tatlahua, xlaꞌ huaꞌchi xmān tatlōlakamakxtu aꞌntū tlahuacan nac aꞌkapūn. Lāꞌ nā chuntzaꞌ Moisés. Aꞌxniꞌcaꞌ xlaꞌ ixtlahuamāꞌ huan lītokpān de koꞌxkaꞌ, Dios huanilh:
\q Catlaꞌhuaꞌkōꞌj chu aꞌnchī māsuꞌniꞌcaꞌ huan nac kēstīn aꞌntū huanican Sinaí.
\m
\v 6 Más xatzey aꞌntū tlahua huan xapuxcuꞌ sacerdote aꞌntī Jesucristo. Más xatzey huan convenio aꞌntū Jesucristo lacāxtlahualh entre Dios lāꞌ huan tachiꞌxcuhuīꞌt. Por ixpālacata takoꞌxamixa Dios lāꞌ tachiꞌxcuhuīꞌt. Huāꞌmāꞌ más xatzey como, chu aꞌnchī huāꞌmāꞌ convenio, Dios nacātlahuaniꞌ huan tachiꞌxcuhuīꞌt aꞌntū más xatzey.
\p
\v 7 Huan xapūꞌla convenio tūꞌ aꞌcchāꞌlh para aꞌntū ixtasquiꞌnī. Uꞌtzaꞌ lītlahuaca ixlītāpātuꞌ convenio. 
\v 8 Lāꞌ Dios ixcaꞌtzī que huan tachiꞌxcuhuīꞌt tūꞌ tatlōkentaxtūlh. Tatzoꞌkniꞌ na ixtachihuīn Dios chu aꞌnchī Dios hualh: 
\q Namin lakatin chiꞌchiniꞌ aꞌxniꞌcaꞌ quit naꞌictlahua lakatin xasāstiꞌ convenio con huan tachiꞌxcuhuīꞌt israelitas lāꞌ īꞌxūꞌyātāꞌnatnaꞌ Judá.
\q
\v 9 Tūꞌ huaꞌchi huan convenio aꞌntū ictlahualh con īꞌxūꞌyāpapnaꞌcaꞌn aꞌxniꞌcaꞌ iccāmāxtulh de huan nac tiꞌyaꞌt aꞌnlhā huanican Egipto.
\q Xlacaꞌn tūꞌ tatlōkentaxtūlh huan convenio aꞌntū ictlahualh con xlacaꞌn.
\q Uꞌtzaꞌ iclītaxtunquīlh quit de xlacaꞌn.
\q
\v 10 Lāꞌ aꞌxniꞌcaꞌ namin huanmāꞌ chiꞌchiniꞌ, naꞌictlahuapala āꞌlakatin convenio con huan tachiꞌxcuhuīꞌt israelitas. 
\q Lāꞌ huan convenio chuntzaꞌ nala: Quit naꞌiccāmācaꞌtzīnī quilīmāpaꞌksīn.
\q Lāꞌ xlacaꞌn natakalhlakaꞌīꞌcuꞌtun.
\q Quit naꞌicla ixDioscaꞌn.
\q Lāꞌ xlacaꞌn quintachiꞌxcuhuīꞌt natala.
\q
\v 11 Nīn tintīꞌ catihuanilh ixtāꞌtin nīn ixtāꞌchic: “Tasquiꞌnī que huiꞌx nalakapasaꞌ Dios”.
\q Tūꞌ chuntzaꞌ catitalāmāsuꞌniꞌlh como ixlīhuākcaꞌn naquintalakapasa aꞌntī xalakaꞌtlaꞌn lāꞌ xalactiꞌnaꞌj. 
\q
\v 12 Quit naꞌiccālakalhuꞌman xlacaꞌn lāꞌ naꞌiccāxapaniꞌ ixtalaclēꞌiꞌcaꞌn.
\q Lāꞌ tūꞌtzaꞌ maktin ictipāstacli ixtalaclēꞌiꞌcaꞌn. 
\m
\v 13 Lāꞌ como Dios līchihuīnaꞌlh āꞌlakatin xasāstiꞌ convenio, huāꞌmāꞌ māsuꞌyu que huan xapūꞌla convenio tuntūꞌtzaꞌ ixtapalh lāꞌ huan xakōlūhuaꞌ tūꞌtzaꞌ catimaclacasquiꞌnca.
\c 9
\s Xtunc aꞌnchī mācāꞌtanīcan Dios chu aꞌnchī huan xasāstiꞌ convenio
\p
\v 1 Huan xapūꞌla convenio māpaꞌksīniꞌlh aꞌnchī līmācāꞌtanīcan Dios. Lāꞌ aꞌnlhā ixtamācāꞌtanī Dios, xlaꞌ ixtatlahuanīꞌt tachiꞌxcuhuīꞌt.
\v 2 Tatlahualh lakatin lītokpān de koꞌxkaꞌ. Lāꞌ ixkaꞌlhī lakatin cortina aꞌntū ixmāpitzi lakatuꞌ cuarto. Lāꞌ huan nac xapūꞌla cuarto ixuīꞌ huan aꞌntū ixpūyāhuacan ceras. Lāꞌ nā ixyā lakatin mesa aꞌntzaꞌ lāꞌ pāntzi aꞌntū ixlēꞌksajuīꞌcan Dios. Huāꞌmāꞌ cuarto ixuanican Tasicuaꞌlanālīn.
\v 3 Lāꞌ na ixkēn huan cortina ixuīꞌ āꞌlakatin cuarto aꞌnlhā ixuanican Lej Tasicuaꞌlanālīn.
\v 4 Lāꞌ nac huāꞌmāꞌ cuarto ixyā lakatin pūmacamāstāꞌn de oro aꞌnlhā īꞌlhcuyucan pūm. Lāꞌ nā aꞌntzaꞌ ixuīꞌ lakatin caja ixlīmactlahuacanīꞌt oro. Lāꞌ na ixchakān huanmāꞌ caja ixtojōmaꞌ lakatin xālu de oro aꞌntū ixpūtojōmaꞌ huan līhuaꞌt aꞌntū ixuanican maná. Lāꞌ nā huan nac caja ixtojōmaꞌ huan ixpālaꞌc Aarón aꞌntū ixlakapuꞌnīꞌt lāꞌ nā huan lakatuꞌ chihuix aꞌnlhā ixcātzoꞌkcanīꞌt huan lakacāuj līmāpaꞌksīn. 
\v 5 Lāꞌ na ixkalhniꞌ huan caja ixtayānaꞌ kalhatuꞌ ángeles de oro. Ixpekencaꞌn ixtalakxtaꞌnkaꞌnīꞌt na ixkalhniꞌ huan caja. Lāꞌ aꞌntzaꞌ na ixkalhniꞌ huan caja, aꞌntzaꞌ ixtasquiꞌnī ixmālacnūcan huan lēꞌksajuīꞌn para que Dios ixcāmāpānūniꞌlh ixtalaclēꞌiꞌcaꞌn. Chuhuaꞌj tūꞌtzaꞌ ictilīchihuīnaꞌlh huāꞌmāꞌ.
\p
\v 6 Chuntzaꞌ ixlacāxlakōꞌnīꞌt ixlīhuāk. Huan sacerdotes lakalīyān ixtatanū huan nac xapūꞌla cuarto lāꞌ ixtatlahua aꞌntū ixtascujūtcaꞌn.
\v 7 Lāꞌ xmān huan xapuxcuꞌ sacerdote tzē ixtanū nac āꞌlakatin cuarto. Lāꞌ xmān maktin ixtanū lakatin cāꞌta. Lāꞌ aꞌxniꞌcaꞌ ixtanū, ixmānū huan kaꞌlhniꞌ aꞌntū ixmālacnūniꞌ Dios. Huāꞌmāꞌ ixmālacnū por ixtalaclēꞌiꞌ māniꞌ ūꞌtzaꞌ lāꞌ nā ixtalaclēꞌiꞌcaꞌn huan tachiꞌxcuhuīꞌt.
\v 8 Chuntzaꞌ huan Espíritu Santo quincāmāsuꞌniꞌyāniꞌ que līhuan xmān huan xapuxcuꞌ sacerdote tzē ixtanū na ixlīlakatuꞌ cuarto, tūnaꞌj ixcāmāsuꞌniꞌ Dios aꞌnchī nalītanūcan nac aꞌkapūn. Lāꞌ aꞌntzaꞌ aꞌnlhā más tasicuaꞌlanālīn.
\v 9 Huan lītokpān de koꞌxkaꞌ huaꞌchi lakatin tatlōlakamakxtu huaꞌchi aꞌntū aꞌnan chuhuaꞌj. Aꞌyuj xlacaꞌn ixtamālacnū lēꞌksajnaꞌ lāꞌ animalhnaꞌ aꞌntū xatamaknīn, xlacaꞌn tūla ixtacaꞌtzī palh lej stuꞌncuaꞌ ixcāmāpānūniꞌca ixtalaclēꞌiꞌcaꞌn.
\v 10 Huan talanān aꞌntū ixtatlōkentaxtū, ūꞌtzaꞌ aꞌntū ixtahuaꞌ lāꞌ ūꞌtzaꞌ aꞌnchī ixtalīpaxa lāꞌ aꞌnchī ixtalīlakcheꞌkēꞌ ixpulātucaꞌn chu aꞌnchī ixleycan. Huāꞌ tamāꞌna reglas ixtatlōkentaxtū līhuan Dios tūnaꞌj ixtlahua huan xasāstiꞌ convenio.
\p
\v 11 Chuhuaꞌj lacāxtlahuacanīꞌt huan xasāstiꞌ convenio. Cristo lītanūnīꞌt xapuxcuꞌ ixlīsacerdote. Xlaꞌ tlahua huan ixtascujūt xapuxcuꞌ sacerdote nac lakatin lītokpān aꞌnlhā más kaꞌtlaꞌ lāꞌ más tzey. Lāꞌ huāꞌmāꞌ lītokpān tūꞌ tatlahualh chiꞌxcuhuīꞌn, como tūꞌ xalaꞌ nac quilhtamacuj.
\v 12 Huan āꞌmakapitzīnniꞌ xapuxcuꞌ sacerdotes ixtatanū huan na ixlīlakatuꞌ cuarto lāꞌ ixtamānū ixkaꞌlhniꞌcaꞌn huan chivo lāꞌ huācax. Lāꞌ huanmāꞌ kaꞌlhniꞌ ixtamālacnūniꞌ Dios. Lāꞌ Cristo, huan kaꞌlhniꞌ aꞌntū xlaꞌ mālacnūlh, xlaꞌ ūꞌtzaꞌ māniꞌ ixkaꞌlhniꞌ. Lāꞌ xmān maktin mālacnūlh. Lāꞌ chuhuaꞌj tanūnīꞌttzaꞌ nac aꞌkapūn, aꞌnlhā más tasicuaꞌlanālīn. Lāꞌ ūꞌtzaꞌ tzē nalīmāpala quintalaclēꞌiꞌcaꞌn para pōꞌktu.
\v 13 Huan sacerdotes, xlacaꞌn ixtalīpaꞌlha huan tachiꞌxcuhuīꞌt con ixkaꞌlhniꞌcaꞌn chivos lāꞌ huācax lāꞌ con xalhcaꞌcaꞌn huan xalhcuniꞌ huācax.
\v 14 Lāꞌ ixkaꞌlhniꞌ Cristo tzē natlahua aꞌntū más tzey. Huan Espíritu Santo maktāyalh. Lāꞌ huan Espíritu Santo huīꞌ para pōꞌktu. Lāꞌ chuntzaꞌ Cristo tamacamāstāꞌlh lāꞌ lalh lakatin lēꞌksajnaꞌ para Dios. Lāꞌ huanmāꞌ lēꞌksajnaꞌ ixlīstuꞌncuaꞌ lej xatzey. Ixkaꞌlhniꞌ Cristo māpānū quintalaclēꞌiꞌcaꞌn. Lāꞌ xlaꞌ lactzey cātlahuanīꞌt quintapāstacnaꞌcaꞌn. Lāꞌ chuntzaꞌ tūꞌtzaꞌ quincāmāmakchuyīyāniꞌ aꞌnchī xapūꞌla ixtlahuayāuj aꞌntūn tūꞌ tzey lāꞌ aꞌntū quincāmāxtunquīniꞌ Dios. Lāꞌ chuntzaꞌ tzē tāꞌscujāuj Dios xalakahuan.
\p
\v 15 Chuntzaꞌ ūꞌtzaꞌ Cristo aꞌntī cāxtlahualh huan xasāstiꞌ convenio. Lāꞌ por huanmāꞌ convenio, Dios nacāsicuaꞌlanālī para pōꞌktu xlacaꞌn aꞌntī cātaꞌsaniꞌnīꞌt, chuntzaꞌ huaꞌchi Dios hualh xapūꞌla. Como Cristo nīnīꞌttzaꞌ por quimpālacatacaꞌn, chuntzaꞌ tzē nacāxapaniꞌ ixtalaclēꞌiꞌcaꞌn aꞌntīn tatlahuanīꞌt aꞌntūn tūꞌ tzey, chu aꞌnchī huan xapūꞌla convenio.
\v 16 Aꞌxniꞌcaꞌ kalhatin chiꞌxcuꞌ tzoꞌka kalhtin caꞌpsnat para namāstāꞌ ixherencia, līhuan tūnaꞌj nī huan chiꞌxcuꞌ huan caꞌpsnat tuntūꞌnaꞌj ixtapalh.
\v 17 Huan caꞌpsnat tuntūꞌ ixtapalh līhuan lahuīꞌcus huan chiꞌxcuꞌ. Aꞌxniꞌcaꞌ huan chiꞌxcuꞌ nanī, huan xacamanaꞌ natamaktlhtīniꞌn huan herencia.
\v 18 Nā chuntzaꞌ Dios aꞌxniꞌcaꞌ tlahualh huan xapūꞌla convenio con huan tachiꞌxcuhuīꞌt, ixtasquiꞌnī que nanī lakatin animal.
\v 19 Moisés xapūꞌla cāhuanilh huan tachiꞌxcuhuīꞌt ixlīhuāk huan līmāpaꞌksīn chu aꞌnchī huan huan ley. Aꞌcalīstān māꞌcaꞌlh lana aꞌntū xaspiꞌnenkeꞌ na ixpeken hisopo lāꞌ līmācaꞌhuīꞌlh con huan ixkaꞌlhniꞌ huan huācax aꞌntū ixtāꞌmālacxtuccanīꞌt xcān. Lāꞌ līlaxmaniꞌlh huan libro aꞌnlhā ixtatzoꞌkniꞌ huan ley. Lāꞌ cālītlahualh huan kaꞌlhniꞌ na ixaꞌkxākcaꞌn tachiꞌxcuhuīꞌt.
\v 20 Lāꞌ hualh Moisés: “Huāꞌmāꞌ kaꞌlhniꞌ māsuꞌyu que tzucunīꞌttzaꞌ huan convenio aꞌntū huiꞌxinaꞌn natlōkentaxtūyāꞌtit como chuntzaꞌ māpaꞌksīnīꞌt Dios”.
\v 21 Nā chuntzaꞌ Moisés lītlahualh macstiꞌnaꞌj kaꞌlhniꞌ nac lītokpān de koꞌxkaꞌ lāꞌ na ixlīhuāk aꞌntū ixtatanūmāꞌna na ixchakān aꞌntū ixtamaclacasquiꞌn aꞌxniꞌcaꞌ ixtamācāꞌtanī Dios.
\v 22 Lāꞌ chu aꞌnchī huan huāꞌmāꞌ ley, huāk līxapacan con kaꞌlhniꞌ. Lāꞌ palh tūꞌ tamālacnūniꞌ Dios ixkaꞌlhniꞌ aꞌntū xatamaknīn, Dios tūꞌ cāmāsputūnuꞌniꞌ ixtalaclēꞌiꞌcaꞌn huan tachiꞌxcuhuīꞌt.
\s Cristo cāmāpānūniꞌlh ixtalaclēꞌiꞌcaꞌn huan tachiꞌxcuhuīꞌt 
\p
\v 23 Chuntzaꞌ ixcālīpaꞌlhcan ixkaꞌlhniꞌ huan huācax ixlīhuāk aꞌntū ixuīꞌ nac lītokpān de koꞌxkaꞌ. Lāꞌ huāꞌ tamāꞌna catūhuā xmān huaꞌchilh tlōlakamakxtucan aꞌntū huiꞌlachaꞌ nac aꞌkapūn. Lāꞌ aꞌntzaꞌ nac aꞌkapūn tasquiꞌnī namālacnūniꞌcan Dios lakatin lēꞌksajnaꞌ aꞌntū más xatzey. Cristo huiꞌlachaꞌ nac aꞌkapūn. Xlaꞌ mālacnūniꞌlh Dios lakatin lēꞌksajnaꞌ aꞌntū māniꞌ ūꞌtzaꞌ. Lāꞌ huāꞌmāꞌ lēꞌksajnaꞌ ūꞌtzaꞌ más xatzey. 
\v 24 Cristo tūꞌ huīꞌ nac lītokpān aꞌnlhān tatlahuanīꞌt tachiꞌxcuhuīꞌt. Huan lītokpān aꞌntū yā nac quilhtamacuj xmān huaꞌchilh tlōlakamakxtucan aꞌntū huiꞌlachaꞌ nac aꞌkapūn. Cristo tanūnīꞌt nac aꞌkapūn. Lāꞌ aꞌntzaꞌ huīꞌ na ixlacapūn Dios. Lāꞌ aꞌntzaꞌ squiꞌniꞌ Dios por quinaꞌn.
\v 25 Huan xapuxcuꞌ sacerdote xalaꞌ nac quilhtamacuj, xlaꞌ tanū xmān maktin nac lakatin cāꞌta huan nac lītokpān aꞌnlhā huanican Lej Tasicuaꞌlanālīn. Lāꞌ aꞌxniꞌcaꞌ tanū, lēꞌn lakatin lēꞌksajnaꞌ aꞌntū ixkaꞌlhniꞌ animal aꞌntū xatamaknīn. Cristo tūꞌ chuntzaꞌ tlahualh. Tūꞌ maklhūhuaꞌ talacnūlh.
\v 26 Palh xlaꞌ ixtalacnūlh maklhūhuaꞌ, lej maklhūhuaꞌ ixnīlh desde aꞌxniꞌcaꞌ tzuculh huan quilhtamacuj. Xlaꞌ tūꞌ maklhūhuaꞌ nīnīꞌt. Xmān maktin milh nac quilhtamacuj huan tamāꞌna āꞌxmān chiꞌchiniꞌ. Lāꞌ nīlh lāꞌ chuntzaꞌ cālīmāpānūniꞌlh ixtalaclēꞌiꞌcaꞌn huan tachiꞌxcuhuīꞌt.
\v 27 Quilīhuākcaꞌn nanīyāuj xmān maktin. Lāꞌ āꞌcalīstān Dios naquincājuzgarlīyāniꞌ.
\v 28 Lāꞌ nā chuntzaꞌ Cristo, xmān maktin talacnūlh huaꞌchi lēꞌksajnaꞌ lāꞌ chuntzaꞌ līmāpalalh ixtalaclēꞌiꞌcaꞌn tachiꞌxcuhuīꞌt. Tūꞌtzaꞌ āꞌmaktin catimilh para namāpala. Aꞌxniꞌcaꞌ namin ixlīmaktuꞌ, nacāmāpūtaxtūkōꞌ aꞌntīn takaꞌlhīmāꞌna xlaꞌ.

\c 10
\p
\v 1 Dios mātzoꞌknīlh Moisés huan ley. Lāꞌ huāꞌmāꞌ ley tūla quincātlahuaniꞌyāniꞌ aꞌntū Cristo quincātlahuaniꞌyāniꞌ. Huan ley huaꞌchilh tlōlakamakxtucanīꞌt aꞌntū más xatzey. Chu aꞌnchī huan huāꞌmāꞌ ley, pōꞌktu lakatunuꞌ cāꞌta tamālacnūniꞌ Dios chūntzaꞌ huan tamāꞌna lēꞌksajnaꞌ. Huan lēꞌksajnaꞌ aꞌntū mālacnūcan chu aꞌnchī huan ley, huāꞌ tamāꞌna tūla cātlahua xalacuan xlacaꞌn aꞌntī chuntzaꞌ talīmācāꞌtanī Dios.
\v 2 Palh huan ley ixcāmāpānūniꞌlh cahuā ixtalaclēꞌiꞌcaꞌn, xlacaꞌn tūꞌtzaꞌ iꞌxtaꞌuꞌcxcaꞌtzīlh palh talaclēꞌncus cahuā, lāꞌ chuntzaꞌ ixtamakxtekli de tamālacnū lēꞌksajnaꞌ.
\v 3 Huan ley tūla cāmāpānūniꞌ ixtalaclēꞌiꞌcaꞌn. Huan lēꞌksajnaꞌ aꞌntū mālacnūniꞌcan Dios, xlaꞌ xmān cāmāpāstaquī ixtalaclēꞌiꞌcaꞌn lakatunuꞌ cāꞌta. 
\v 4 Huāꞌ tamāꞌna lēꞌksajnaꞌ tū cāmāpānūniꞌ ixtalaclēꞌiꞌcaꞌn, como ixkaꞌlhniꞌcaꞌn huan toros lāꞌ chivos tūla xapa huan talaclēꞌiꞌ.
\p
\v 5 Uꞌtzaꞌ līhualh Cristo aꞌxniꞌcaꞌ ixmimāꞌtzaꞌ nac quilhtamacuj, huanilh Dios:
\q Huiꞌx tūꞌ lacasquiꞌnaꞌ namālacnūniꞌcaꞌnaꞌ xatamaknīn animalhnaꞌ lāꞌ huan lēꞌksajuīꞌn.
\q Huiꞌx quilacāxtlahuaniꞌnīꞌtaꞌ lakatin macniꞌ, lāꞌ chuntzaꞌ tzē naꞌictalacnū quēꞌcstu.
\q
\v 6 Tūꞌ lakatīyaꞌ aꞌnchī aꞌksajuīꞌcaꞌnaꞌ lakatimīꞌ animal aꞌntū lhcuyucan nac pūmacamāstāꞌn.
\q Lāꞌ tūꞌ lakatīyaꞌ aꞌntū tamālacnū para nacāxapaniꞌcan ixtalaclēꞌiꞌcaꞌn.
\q
\v 7 Lāꞌ ūꞌtzaꞌ iclīhualh: “Aꞌ icuīꞌ, Dios. Icmin ictlahua aꞌntū huiꞌx lacasquiꞌnaꞌ. Chuntzaꞌ tatzoꞌkniꞌ na ixtachihuīn Dios”.
\m
\v 8 Xapūꞌla hualh Cristo aꞌnchī Dios tūꞌ lakatī aꞌnchī mālacnūniꞌcan xatamaknīn animalhnaꞌ lāꞌ lēꞌksajuīꞌn lāꞌ lakatimīꞌ animal aꞌntū lhcuyucan nac pūmacamāstāꞌn, lāꞌ tūꞌ lakatī aꞌntū tamālacnū para nacāxapaniꞌcan ixtalaclēꞌiꞌcaꞌn. Huāꞌ tamāꞌna tūꞌ līpāxuhua Dios aꞌyuj tamālacnū huan lēꞌksajnaꞌ chu aꞌnchī huan ley.
\v 9 Lāꞌ āꞌcalīstān Cristo hualh: “Aꞌ icuīꞌ, Dios. Icmin ictlahua aꞌntū huiꞌx lacasquiꞌnaꞌ”. Chuntzaꞌ māchekxīcan que Dios māpānūlh aꞌnchī ixmālacnūniꞌcan huan lēꞌksajnaꞌ makāntzaꞌ. Chuhuaꞌj xmān tasquiꞌnī aꞌnchī talacnūlh Cristo ixaꞌcstu.
\v 10 Jesucristo tlahualh chu aꞌnchī ixtapuhuān Dios. Xmān maktin mālacnūniꞌlh Dios ixmacniꞌ. Lāꞌ chuntzaꞌ cālītlahualh xalacuan huan tachiꞌxcuhuīꞌt para pōꞌktu. 
\p
\v 11 Ixlīhuākcaꞌn sacerdotes israelitas tatāya tatlahua ixtascujūtcaꞌn lakalīyān. Lāꞌ maklhūhuaꞌ tamālacnū xmān tāpātin lēꞌksajnaꞌ. Lāꞌ huāꞌ tamāꞌna lēꞌksajnaꞌ tūꞌ maktin caticāmāpānūniꞌlh ixtalaclēꞌiꞌcaꞌn tachixcuhuīꞌt.
\v 12 Lāꞌ Cristo xmān maktin nīlh. Lāꞌ chuntzaꞌ līmālacnūlh lakatin lēꞌksajnaꞌ aꞌntū tāyaniꞌ para pōꞌktu. Lāꞌ tuncan tahuiꞌlalh na ixpāxtūcānaꞌj Dios, como Cristo nā xlaꞌ māpaꞌksīniꞌn.
\v 13 Aꞌntzaꞌ kaꞌlhīmāꞌ hasta aꞌxniꞌcaꞌ Dios nacātlaja ixtāꞌcaꞌtza lāꞌ nacāmātlōkentaxtūnī aꞌntū lacasquiꞌn Cristo.
\v 14 Cristo mālacnūniꞌnīꞌt Dios xmān lakatin lēꞌksajnaꞌ. Lāꞌ ūꞌtzaꞌ cālītlahualh lacuan para pōꞌktu na ixlacapūn Dios ixlīhuākcaꞌn aꞌntī cāxapaniꞌnīꞌt ixtalaclēꞌiꞌcaꞌn. 
\v 15 Lāꞌ huan Espíritu Santo māsuꞌyu que huāꞌmāꞌ xastuꞌncuaꞌ. Tatzoꞌkniꞌ na ixtachihuīn Dios aꞌnchī hualh xapūꞌla: 
\q
\v 16 Aꞌcalīstān naꞌictlahua lakatin convenio con xlacaꞌn, hualh Dios.
\q Chuntzaꞌ nala: Quit naꞌiccāmāmāchekxīnī quilīmāpaꞌksīn. 
\q Lāꞌ quit naꞌictlahua que natatlōkentaxtūcuꞌtun. 
\m
\v 17 Lāꞌ āꞌcalīstān hualh:
\q Tūꞌtzaꞌ ictipāstacli ixtalaclēꞌiꞌcaꞌn.
\q Tūꞌtzaꞌ ictipāstacli huan aꞌntūn tūꞌ tzey aꞌntūn tatlahualh.
\m
\v 18 Lāꞌ chuntzaꞌ Dios quincāmāsputūnuꞌniꞌnīꞌtaꞌniꞌ. Lāꞌ tūꞌtzaꞌ tasquiꞌnī namālacnūniꞌyāuj Dios āꞌlakatin lēꞌksajnaꞌ aꞌntū naquincāmāpānūniꞌyāniꞌ quintalaclēꞌiꞌcaꞌn. 
\s Tasquiꞌnī nalaktapajtzūyāuj Dios
\p
\v 19 Chuhuaꞌj, tāꞌtimīn, como Cristo nīlh por quinaꞌn, chuhuaꞌj tūꞌ tijicuaꞌnāuj natāꞌchihuīnaꞌnāuj Dios. Xlaꞌ huiꞌlachaꞌ nac aꞌkapūn aꞌnlhā lej sicuaꞌlanālānīꞌt. 
\v 20 Huan sacerdotes xalanīꞌn nac quilhtamacuj, xlacaꞌn natamālaquīꞌ huan cortina aꞌxniꞌcaꞌ natatanū huan nac cuarto aꞌnlhā lej tasicuaꞌlanālīn. Lāꞌ ixmacniꞌ Cristo huaꞌchi huan cortina aꞌnlhā talactanū nac cuarto aꞌntū lej tasicuaꞌlanālīn. Lāꞌ como Cristo nīnīꞌttzaꞌ por quinaꞌn, quincāmālaquīꞌniꞌnīꞌtaꞌniꞌ para pōꞌktu aꞌnlhā lactanūcan nac aꞌkapūn. Lāꞌ chuntzaꞌ tzē nalaktapajtzūyāuj Dios.
\v 21 Cristo, ūꞌtzaꞌ xapuxcuꞌ sacerdote. Xlaꞌ squiꞌniꞌ Dios por quinaꞌn aꞌntīn tapaꞌksīyāuj con Dios.
\v 22 Uꞌtzaꞌ nalīlaktapajtzūyāuj Dios lāꞌ namācāꞌtanīyāuj como līpāhuanāuj Dios lāꞌ tlahuacuꞌtunāuj aꞌntū xlaꞌ lacasquiꞌn, lāꞌ como caꞌtzīyāuj que quintalaclēꞌiꞌcaꞌn quincātamāsputūnuꞌniꞌnīꞌtaꞌniꞌtzaꞌ. Huaꞌchilh cācheꞌkēꞌcanīꞌttzaꞌ quimacniꞌcaꞌn con xastalaꞌnkaꞌ xcān.
\v 23 Quinaꞌn huanāuj que kaꞌlhīmāꞌnauj aꞌntū Dios naquincāmaxquīꞌyāniꞌ. Tūꞌ tijiclhuaꞌyāuj nīn macstiꞌnaꞌj aꞌnchī kaꞌlhīmāꞌnauj. Dios pōꞌktu tlōkentaxtū aꞌntū huan.
\v 24 Nalāpāstacāuj kalhatunuꞌ de quinaꞌn. Lāꞌ nalāmaktāyayāuj chāꞌtunuꞌ de quinaꞌn. Lāꞌ chuntzaꞌ āꞌchulāꞌ nalāpāxquīꞌyāuj lāꞌ āꞌchulāꞌ natlahuayāuj aꞌntūn tzey.
\v 25 Makapitzīn tūꞌtzaꞌ tatāꞌtakēxtimī aꞌntīn takalhlakaꞌīꞌ. Xatzey natakēxtimīyāuj. Chuntzaꞌ nalāmāhuixcānīyāuj. Huāꞌmāꞌ ūꞌtzaꞌ lej tasquiꞌnī como caꞌtzīyāꞌtit huiꞌxinaꞌn que tapajtzūmāꞌtzaꞌ huan chiꞌchiniꞌ aꞌxniꞌcaꞌ Cristo namimpala.
\p
\v 26 Palh kalhatin mācaꞌtzīnīcanīꞌt aꞌntū xastuꞌncuaꞌ lāꞌ palh lakmakaꞌn Jesucristo, chuntzaꞌ tintīꞌ āꞌcatūhuā aꞌntū namāpānū ixtalaclēꞌiꞌ.
\v 27 Xmān najicuaꞌn de aꞌntū napātleꞌkeniꞌ aꞌxniꞌcaꞌ Dios najuzgarlī. Dios namāpātīnī nac macscut aꞌnlhā nacālhcuyu ixtāꞌcaꞌtza.
\v 28 Chu aꞌnchī huan ley aꞌntū Dios mātzoꞌknīlh Moisés, palh kalhatuꞌ o kalhatuꞌtun testigos ixtahuan palh kalhatin chiꞌxcuꞌ tūꞌ ixtlōkentaxtūnīꞌt huan ley, chuntzaꞌ ixtalīmaknī. Lāꞌ tūꞌ ixtalakalhuꞌman.
\v 29 Chuntzaꞌ ixcāmāpātīnīcan aꞌntīn tūꞌ ixtatlōkentaxtū huan ley xalaꞌ makāntzaꞌ. Lāꞌ āꞌchulāꞌ namāpātīnīcan palh kalhatin lakmakaꞌnīꞌt Cristo lāꞌ palh puhuanīꞌt que tuntūꞌ ixtapalh huan ixkaꞌlhniꞌ Jesucristo. Jesucristo, ūꞌtzaꞌ aꞌntī nīlh lāꞌ chuntzaꞌ līxapalh ixkaꞌlhniꞌ quintalaclēꞌiꞌcaꞌn chu aꞌnchī huan xasāstiꞌ convenio. Lāꞌ chuxatī aꞌntī lakmakaꞌn Jesucristo lej namāpātīnīcan como chuntzaꞌ lakmakaꞌn huan Espíritu Santo. Lāꞌ xlaꞌ lej quincālakalhuꞌmanāniꞌ.
\v 30 Caꞌtzīyāuj que Dios huanīꞌt: “Xmān quit tzē naꞌiccāmāpātīnī aꞌntīn tatlahua aꞌntūn tūꞌ tzey. Natamāpala con quit. Quit huan Māpaꞌksīniꞌ lāꞌ quit naꞌiccājuzgarlī quintachiꞌxcuhuīꞌt”.
\v 31 Lej lījicuaꞌ palh namāpātīnī kalhatin huan Dios xalakahuan.
\p
\v 32 Capāstactit huiꞌxinaꞌn aꞌnchīn cāpātleꞌkeniꞌniꞌ xapūꞌla aꞌxniꞌcaꞌ chūꞌcus cātamāsuꞌniꞌniꞌ ixtachihuīn Dios. Huiꞌxinaꞌn ixpātīyāꞌtit aꞌnchī ixcātamacaputzayāniꞌ. 
\v 33 Aꞌkatunuꞌ ixcātalakapalayāniꞌ lāꞌ ixcātatucsāniꞌ nac cāꞌlacapūlhūhuaꞌ. Lāꞌ aꞌxniꞌcaꞌ āꞌmakapitzīn ixtapātīniꞌn chuntzaꞌ, huiꞌxinaꞌn tūꞌ kalhtatzēꞌktit chu lakatin.
\v 34 Lāꞌ lakalhumaꞌntit huiꞌxinaꞌn aꞌxniꞌcaꞌ cātachīꞌniꞌ makapitzīn de huiꞌxinaꞌn. Lāꞌ aꞌxniꞌcaꞌ cālēꞌnca aꞌntū ixkaꞌlhīꞌyāꞌtit, huiꞌxinaꞌn tūꞌ līlakaputzatit como caꞌtzīyāꞌtit que kaꞌlhīꞌyāꞌtit nac aꞌkapūn aꞌntū más xatzey lāꞌ aꞌntūn tūꞌ maktin catisputli. 
\v 35 Lāꞌ chuhuaꞌj, tūꞌ catitamakchuyīꞌtit. Capāstactit que namaklhtīniꞌnāꞌtit aꞌntū xatzey nac aꞌkapūn. 
\v 36 Capātītit. Lāꞌ tūꞌ timakxtekāꞌtit de natlahuaꞌyāꞌtit aꞌntū Dios lacasquiꞌn. Chuntzaꞌ namaklhtīniꞌnāꞌtit aꞌntū Dios huan que naquincāmaxquīꞌyāniꞌ.
\v 37 Tatzoꞌkniꞌ na ixtachihuīn Dios aꞌnchī Dios hualh: 
\q Tūꞌtzaꞌ lej makān sputa, namin aꞌntī ixlīminat lāꞌ tūꞌ catitakoxīlh.
\q
\v 38 Ixlīhuākcaꞌn aꞌntī Dios cāmāpānūniꞌ ixtalaclēꞌiꞌcaꞌn como talīpāhuan Dios, xlacaꞌn para pōꞌktu natakaꞌlhī xasāstiꞌ ixquilhtamacujcaꞌn.
\q Lāꞌ palh catīhuā nataxtutāya na ixtej Dios, xlaꞌ tūꞌ iclīpāxuhua.
\m
\v 39 Quinaꞌn tūꞌ huaꞌchi āꞌmakapitzīn aꞌntīn tataxtutāya na ixtej Dios lāꞌ tatzaꞌnkā. Quinaꞌn līpāhuanāuj Dios lāꞌ pūtaxtunīꞌtaujtzaꞌ.
\c 11
\s Xaꞌnca talatāꞌkchokolh xlacaꞌn aꞌntīn takalhlakaꞌīꞌlh 
\p
\v 1 Lāꞌ como līpāhuanāuj Dios, chuntzaꞌ namaklhtīniꞌnāuj aꞌntū kaꞌlhīmāꞌnauj. Lāꞌ nā caꞌtzīyāuj que aꞌnan aꞌntūn tūnaꞌj maktin laktzīꞌnāuj.
\v 2 Huan tachiꞌxcuhuīꞌt xalanīꞌn makān, xlacaꞌn ixtamāpāxuhuī Dios, como xlacaꞌn ixtalīpāhuan Dios.
\p
\v 3 Lāꞌ nā quinaꞌn, como līpāhuanāuj Dios lāꞌ chuntzaꞌ caꞌtzīyāuj que Dios tlahualh huan quilhtamacuj lāꞌ huan chiꞌchiniꞌ lāꞌ mālhcuyuꞌ lāꞌ ixlīhuāk aꞌntū aꞌnan nac aꞌkapūn. Dios hualh lāꞌ xmān chuntzaꞌ tlahuakōꞌlh. Dios cātlahualh aꞌntūn tatasuꞌyunuꞌn, aꞌyuj xapūꞌla tuntūꞌ ixaꞌnan aꞌntū tzē ixlaktzīꞌncan.
\p
\v 4 Lāꞌ Abel, como ixlīpāhuan Dios, xlaꞌ mālacnūniꞌlh Dios lakatin lēꞌksajnaꞌ aꞌntū lej xatzey lāꞌ tūꞌ huaꞌchi mālacnūlh Caín. Lāꞌ como Abel ixlīpāhuan Dios, chuntzaꞌ Dios laktzīꞌlh que tzey. Lāꞌ Dios maklhtīniꞌlh huan lēꞌksajnaꞌ aꞌntū Abel mālacnūniꞌlh. Chuntzaꞌ Abel, aꞌyuj nīnīꞌttzaꞌ, quinticāmāsuꞌniꞌyāniꞌ que tasquiꞌnī nalīpāhuanāuj Dios.
\p
\v 5 Lāꞌ nā Enoc ixlīpāhuan Dios lāꞌ ūꞌtzaꞌ tūꞌ līnīlh. Dios lēꞌlh nac aꞌkapūn. Lāꞌ tūlalh kaksca, como Dios ixlēꞌnīꞌt. Ixtachihuīn Dios huan que aꞌxniꞌcaꞌ Enoc ixlatlāꞌhuancus nac quilhtamacuj, xlaꞌ ixmāpāxuhuī Dios.
\v 6 Nīn tintīꞌ tzē māpāxuhuī Dios palh tūꞌ līpāhuan Dios. Aꞌntīn tamin tamācāꞌtanī Dios, tasquiꞌnī que xlacaꞌn natakalhlakaꞌīꞌ que Dios huīꞌ lāꞌ cāmaktāya aꞌntī nataputza Dios con ixlīhuāk ixaꞌclhcunuccaꞌn. 
\p
\v 7 Lāꞌ nā Noé ixlīpāhuan Dios lāꞌ kalhlakaꞌīꞌlh que stuꞌncuaꞌ aꞌnchī Dios ixuaninīꞌt que namin lakatin lakuat. Lāꞌ como ixjicuaꞌn, tlahualh lakatin barco. Lāꞌ chuntzaꞌ tapūtaxtulh xalanīꞌn na ixchic. Lāꞌ como Noé tlōkentaxtūlh aꞌntū Dios ixuaninīꞌt, chuntzaꞌ ixtasuꞌyu que huan āꞌmakapitzīn tūꞌ lactzey ixtahuanīꞌt como xlacaꞌn ixtapuhuan palh tūꞌ stuꞌncuaꞌ aꞌntū ixuanīꞌt Dios. Lāꞌ como Noé ixlīpāhuan Dios, chuntzaꞌ Dios māpānūniꞌlh ixtalaclēꞌiꞌ.
\p
\v 8 Lāꞌ nā Abraham ixlīpāhuan Dios. Lāꞌ aꞌkahuānaꞌlh aꞌxniꞌcaꞌ Dios huanilh que naꞌaꞌn nac lakatin tiꞌyaꞌt aꞌntū Dios namaxquīꞌ. Lāꞌ Abraham taxtulh de ixāꞌlacchicniꞌ, aꞌyuj tūꞌ ixcaꞌtzī aꞌnlhā nachāꞌn.
\v 9 Lāꞌ como Abraham ixlīpāhuan Dios, xlaꞌ chāꞌlh huan nac tiꞌyaꞌt aꞌnlhā namaxquīꞌcan, chu aꞌnchī Dios ixuaninīꞌt. Aꞌntzaꞌ ixuīꞌ huaꞌchi kalhatin makatiyātiꞌ. Ixlahuīꞌ nac lakatin chic de koꞌxkaꞌ. Lāꞌ nā chuntzaꞌ ixlahuīꞌ ixoꞌkxaꞌ aꞌntī ixuanican Isaac lāꞌ nā ixtāꞌnat aꞌntī ixuanican Jacob. Xlacaꞌn nā Dios cāmaxquīꞌlh huan tiꞌyaꞌt.
\v 10 Chuntzaꞌ ixlīlahuīꞌ Abraham como ixkaꞌlhīmāꞌ que ixchāꞌlh nac huan cāꞌlacchicniꞌ aꞌntū Dios ixtlahuanīꞌt chu aꞌnchī ixtapuhuān. Lāꞌ huāꞌmāꞌ cāꞌlacchicniꞌ tūꞌ maktin catisputli.
\p
\v 11 Lāꞌ nā Sara ixlīpāhuan Dios. Lāꞌ ūꞌtzaꞌ tzē līkaꞌlhīlh kalhatin ixcaman, aꞌyuj toꞌkotzīntzaꞌ ixuanīꞌt. Lāꞌ aꞌyuj ixpātleꞌkenīꞌttzaꞌ para nakaꞌlhī ixcaman, Sara kalhlakaꞌīꞌlh palh Dios namaxquīꞌ huan skaꞌtaꞌ chu aꞌnchī Dios ixuanīꞌt.
\v 12 Chuntzaꞌ Dios maxquīꞌlh kalhatin ixoꞌkxaꞌ Abraham aꞌyuj lejtzaꞌ papatzīn ixuanīꞌt para nakaꞌlhī ixcaman. Lāꞌ īꞌxūꞌyātāꞌnatnaꞌ Abraham lej talhūhuaꞌlh huaꞌchi huan staꞌcu lāꞌ huaꞌchi huan cucujnuꞌ aꞌntū tahuiꞌlānaꞌ na ixquilhtūn mar. Lāꞌ lej talhūhuaꞌlh lāꞌ tūla cāpūtleꞌkekōꞌcan.
\p
\v 13 Abraham lāꞌ Isaac lāꞌ Jacob tanīlh. Lāꞌ aꞌxniꞌcaꞌ tanīlh, tūnaꞌj ixtamaklhtīniꞌn aꞌntū Dios hualh que ixcāmaxquīꞌlh. Xmān huaꞌchilh ixtalaktzīꞌn de makat. Lāꞌ tapāxuhualh como ixtacaꞌtzī que Dios ixtlōkentaxtūlh aꞌntū ixcāhuaninīꞌt. Xlacaꞌn lej xaꞌnca tahualh que ixtalatlāꞌhuan nac quilhtamacuj huaꞌchi makatiyātīꞌn. 
\v 14 Como chuntzaꞌ ixtachihuīnaꞌn xlacaꞌn, chuntzaꞌ māchekxīcan que ixtaputzamāꞌna aꞌnlhā natalatahuiꞌla.
\v 15 Xlacaꞌn tūꞌ ixtapāstacmāꞌna huan xcānsipej aꞌnlhā ixtataxtunīꞌtaꞌnchaꞌ. Palh chuntzaꞌ ixtapuhualh, ixtataspiꞌtli nac huanmāꞌ xcānsipej.
\v 16 Xlacaꞌn tūꞌ ixtapāstaca huan xcānsipej aꞌnlhā ixtataxtunīꞌtaꞌnchaꞌ. Ixtapāstaca āꞌlakatin xcānsipej aꞌnlhā más xatzey lāꞌ aꞌntū huiꞌlachaꞌ nac aꞌkapūn. Uꞌtzaꞌ Dios tūꞌ līmāxanaꞌn aꞌxniꞌcaꞌ xlacaꞌn tahuan que ūꞌtzaꞌ ixDioscaꞌn. Lāꞌ Dios cāxuiꞌlīnīꞌt lakatin xcānsipej nac aꞌkapūn aꞌnlhā xlacaꞌn natalatahuiꞌla. 
\p
\v 17 Lāꞌ nā Abraham ixlīpāhuan Dios. Uꞌtzaꞌ ixaꞌmāꞌ līmaknī huan Isaac aꞌntī xmān kalhatin ixcaman. Lāꞌ ixmaxquīꞌcuꞌtun huaꞌchi lakatin lēꞌksajnaꞌ Dios. Chuntzaꞌ Dios ixmāpaꞌksīnīꞌt como ixlacasquiꞌn que Abraham namāsuꞌyu palh stuꞌncuaꞌ ixkalhlakaꞌīꞌ.
\v 18 Abraham ixaꞌkahuānaꞌniꞌcuꞌtun Dios, aꞌyuj Dios ixuaninīꞌt que por ixpālacata Isaac, Abraham nacākaꞌlhī lhūhuaꞌ īꞌxūꞌyātāꞌnatnaꞌ.
\v 19 Abraham ixaꞌmāꞌ maknī huan Isaac chu aꞌnchī Dios ixuaninīꞌt, como ixcaꞌtzī que Dios namaxquīꞌpala ixquilhtamacuj. Lāꞌ como tūꞌ lej makān īꞌsputa para ixmaknīca Isaac, huaꞌchīlh Dios mālakahuanīchokolh. 
\p
\v 20 Lā nā Isaac ixlīpāhuan Dios. Lāꞌ ūꞌtzaꞌ cālīhuanilh ixoꞌkxaꞌn aꞌnchī Dios ixcāsicuaꞌlanālīlh. Lāꞌ ixoꞌkxaꞌn ixcāhuanican Jacob lāꞌ Esaú.
\v 21 Lāꞌ nā Jacob ixlīpāhuan Dios. Lāꞌ ūꞌtzaꞌ cālīhuanilh ixnatāꞌnatnaꞌ, aꞌntī ixoꞌkxaꞌn José, aꞌnchī Dios ixcāsicuaꞌlanālīlh. Chuntzaꞌ cāhuanilh aꞌxniꞌcaꞌ ixaꞌmāꞌtzaꞌ nī. Pūtaquilhpūtalh ixpālaꞌc lāꞌ mācāꞌtanīlh Dios.
\v 22 Lāꞌ nā José ixlīpāhuan Dios. Lāꞌ chuntzaꞌ aꞌxniꞌcaꞌ tūꞌtzaꞌ makān īꞌsputa para nanī, xlaꞌ hualh que huan israelitas natataxtu de nac Egipto. Lāꞌ māpaꞌksīniꞌlh que nacālēꞌncan ixlucutnuꞌ aꞌxniꞌcaꞌ natataxtu de aꞌntzaꞌ.
\p
\v 23 Lāꞌ huan ixtātaꞌ lāꞌ ixtzīꞌt Moisés nā ixtālīpāhuan Dios. Lāꞌ aꞌnlhā ixtahuiꞌlānaꞌ xlacaꞌn, huan rey māpaꞌksīniꞌlh que nacāmaknīkōꞌcan ixlīhuāk huan lakskaꞌtāꞌn aꞌntī xalacchiꞌxcuhuīꞌn. Lāꞌ xlacaꞌn tūꞌ tajicuaꞌnli aꞌxniꞌcaꞌ tūꞌ taꞌaꞌkahuānaꞌniꞌlh huan rey. Lāꞌ Moisés mātzēꞌkca aꞌxniꞌcaꞌ ixtōꞌlanīꞌtcus. Xlacaꞌn talaktzīꞌlh que lej tzēhuanīꞌt ixuanīꞌt lāꞌ xlacaꞌn tamātzēꞌkli lakatuꞌtun mālhcuyuꞌ.
\v 24 Lāꞌ nā Moisés ixlīpāhuan Dios. Lāꞌ chuntzaꞌ, aꞌxniꞌcaꞌ chiꞌxcuꞌtzaꞌ ixuanīꞌt, tūꞌtzaꞌ ixtahuiꞌlacuꞌtun na ixchic huan rey xalaꞌ nac Egipto, aꞌnlhā ixmakastacnīꞌt huan iꞌxtzuꞌmaꞌjāt rey.
\v 25 Moisés tūꞌtzaꞌ tachokocuꞌtulh āꞌchulāꞌ na ixchic huan rey, como aꞌntzaꞌ ixlīpāxuhuacan aꞌntūn tūꞌ tzey. Xlaꞌ puhualh que más tzey nacātāꞌlatahuiꞌla ixtachiꞌxcuhuīꞌt Dios aꞌyuj capātīniꞌlh.
\v 26 Moisés puhualh que más xatzey aꞌkahuānaꞌniꞌcan Cristo aꞌyuj ixlakmakaꞌnca. Lāꞌ puhualh que tūꞌ lej kaꞌlhī ixtapalh huan aꞌnchī ixlīricocaꞌn xalanīꞌn nac Egipto. Xlaꞌ tūꞌ ixpuhuan aꞌntū ixmaklhtīniꞌlh nac quilhtamacuj. Xlaꞌ ixpuhuan aꞌntū ixmaklhtīniꞌlh nac aꞌkapūn.
\v 27 Lāꞌ como Moisés ixlīpāhuan Dios, lāꞌ xlaꞌ taxtulh de nac Egipto. Lāꞌ tūꞌ ixjicuaꞌniꞌ huan rey, aꞌyuj ixcaꞌtzī palh ixaꞌkchāꞌlh. Pōꞌktu aꞌkahuānaꞌniꞌlh Dios. Xlaꞌ huaꞌchilh ixlaktzīꞌnīꞌt Dios, aꞌyuj tūla laktzīꞌncan.
\p
\v 28 Moisés ixlīpāhuan Dios. Lāꞌ chuntzaꞌ cāmāpaꞌksīlh huan israelitas que ixtamaknīlh borregos lāꞌ ixtalītlahualh macstiꞌnaꞌj huan ixkaꞌlhniꞌ na ixmākalhchacaꞌn. Lāꞌ chuntzaꞌ huan ángel tūꞌ cāmaknīlh ixlīmaksāstiꞌcaꞌn huan israelitas aꞌxniꞌcaꞌ cāmaknīlh huan ixlīmaksāstiꞌcaꞌn xalanīꞌn nac Egipto.
\v 29 Lāꞌ huan israelitas ixtalīpāhuan Dios. Xlacaꞌn tapātacutli huan Mar Rojo, huaꞌchi nac cāꞌtiꞌyaꞌtnaꞌ aꞌnlhā cāꞌscōhua. Lāꞌ huan xalanīꞌn nac Egipto aꞌntī ixtastālaniꞌ, aꞌxniꞌcaꞌ tapātacutcuꞌtulh, xlacaꞌn tajicsuaꞌkōꞌlh. 
\p
\v 30 Lāꞌ huan israelitas, como ixtalīpāhuan Dios, xlacaꞌn lakatojon chiꞌchiniꞌ ixtatāꞌtamacxtiꞌliꞌtlāꞌhuan huan cāꞌlacchicniꞌ aꞌntū ixuanican Jericó. Lāꞌ chuntzaꞌ līꞌaꞌkāꞌlh huan taxaka de chihuix aꞌntū ixlītamacxtiꞌliꞌnīꞌt huan cāꞌlacchicniꞌ.
\v 31 Lāꞌ cāmaknīca aꞌntī xalanīꞌn nac Jericó aꞌntīn tūꞌ taꞌaꞌkahuānaꞌniꞌcuꞌtulh Dios. Lāꞌ Rahab, aꞌntī pūꞌla ixcākaꞌlhī ixtatāꞌchihuīnniꞌ, xlaꞌ tūꞌ maknīca. Rahab, como ixlīpāhuan Dios, xlaꞌ ixcāmānūnīꞌt na ixchic huan israelitas aꞌntī ixtaꞌaꞌnīꞌt tapūlaktziꞌhuiꞌlīniꞌn nac huanmāꞌ tiꞌyaꞌt. Lāꞌ ūꞌtzaꞌ tūꞌ talīmaknīlh huan Rahab.
\p
\v 32 Tūꞌ tasquiꞌnī que āꞌchulāꞌ naꞌiccālīhuaniyāniꞌ āꞌmakapitzīn antī ixtalīpāhuan Dios. Tūꞌ ickaꞌlhī quilhtamacuj para naꞌiccāhuaniyāniꞌ aꞌntūn tatlahualh Gedeón lāꞌ Barac lāꞌ Sansón lāꞌ Jefté lāꞌ David lāꞌ Samuel lāꞌ ixaꞌctaꞌsanaꞌnīꞌn Dios.
\v 33 Xlacaꞌn ixtalīpāhuan Dios. Lāꞌ ūꞌtzaꞌ talītlajalh āꞌmakapitzīn xcānsipejniꞌ, lāꞌ ixtamāpaꞌksī. Lāꞌ como ixtatlahua aꞌntūn tzey, Dios cāsicuaꞌlanālīlh chuntzaꞌ aꞌnchī ixcāhuaninīꞌt. Lāꞌ āꞌmakapitzīn ixcālakmānūcan huan leones. Lāꞌ Dios cāmaktāyalh lāꞌ chuntzaꞌ tūꞌ cāmaknīca.
\v 34 Lāꞌ āꞌmakapitzīn ixcāmāpūꞌcan nac cāꞌmacscutnuꞌ. Lāꞌ xlacaꞌn tūꞌ talhculh. Lāꞌ āꞌmakapitzīn ixcāmaknīcuꞌtuncan con espada. Lāꞌ xlacaꞌn tapūtaxtulh. Aꞌyuj xlacaꞌn tūꞌ lej lactliꞌhuiꞌqui ixtahuanīꞌt, Dios cāmātliꞌhuiꞌquīlh. Lāꞌ tūꞌ ixtajicuaꞌn. Ixtatlahua guerra lāꞌ ixtamakatzāꞌla ixtāꞌcaꞌtzacaꞌn.
\v 35 Lāꞌ makapitzīn puscan, Dios cāmālakahuanīniꞌchokolh ixcamanaꞌcaꞌn, aꞌntī ixtanīnīꞌtcus.
\p Lāꞌ āꞌmakapitzīn tachiꞌxcuhuīꞌt cāmāpātīnīca hasta lhān tanīlh. Palh xlacaꞌn ixtakalhtatzēꞌkli palh ixtakalhlakaꞌīꞌ, tūꞌ ixcāmāpātīnīca. Pero xlacaꞌn tūꞌ takalhtatzēꞌkli, como ixtacaꞌtzī que ixtakaꞌlhīlh ixquilhtamacujcaꞌn aꞌntū xatzey aꞌxniꞌcaꞌ Dios nacāmālakahuanīchoko huan nīnīꞌn.
\v 36 Lāꞌ āꞌmakapitzīn lej cālakapalaca lāꞌ cākēsnoꞌkca. Lāꞌ āꞌmakapitzīn cāmānūca nac pūlāchīꞌn lāꞌ cātūpixuiꞌlīca cadenas.
\v 37 Lāꞌ āꞌmakapitzīn cāmūtaꞌlamaknīca. Lāꞌ āꞌmakapitzīn cālīxuaꞌtaꞌpitzica līxuaꞌtaꞌn. Lāꞌ āꞌmakapitzīn cālīmaknīca espada. Lāꞌ āꞌmakapitzīn chū ixtatejeniꞌntlāꞌhuan lāꞌ ixtalhakāꞌ ixkoꞌxkaꞌ borrego lāꞌ chivos. Lāꞌ lacpobres ixtahuanīꞌt. Lāꞌ ixcālakmakaꞌncan lāꞌ ixcāmāpātīnīcan.
\v 38 Lāꞌ ixtatzāꞌlatlāꞌhuan nac cāꞌlhpiꞌmpiꞌliꞌ tiꞌyaꞌt lāꞌ nac cāꞌkēstīnniꞌ. Lāꞌ ixtahuiꞌlānaꞌ nac lhuꞌcuꞌ lāꞌ na ixtampīn chihuix. Xalanīꞌn nac quilhtamacuj lej ixtacaꞌtzancaꞌtzī, lāꞌ tūꞌ līmakuan ixtatāꞌlahuiꞌlānaꞌ con xlacaꞌn, huāꞌ tamāꞌna lactzey tachiꞌxcuhuīꞌt. 
\v 39 Huāꞌ tamāꞌna tachiꞌxcuhuīꞌt lej ixtalīpāhuan Dios lāꞌ ixtamāpāxuhuī Dios. Lāꞌ aꞌyuj ixtalīpāhuan Dios, xlacaꞌn tūꞌ tamaklhtīniꞌnkōꞌlh ixlīhuāk aꞌntū Dios cāhuanilh que ixcāmaxquīꞌlh.
\v 40 Dios, xlaꞌ ixlacasquiꞌn que xlacaꞌn ixquincātakaꞌlhīniꞌ, como Dios quincācāxuiꞌlīniꞌnīꞌtaꞌniꞌ aꞌntū más xatzey. Lāꞌ xlaꞌ naquincātlahuayāniꞌ xalacuan quinaꞌn aꞌcxtim con xlacaꞌn.
\c 12
\s Tasquiꞌnī namakscaꞌtāuj Cristo
\p
\v 1 Quinaꞌn caꞌtzīyāuj aꞌnchī huan tamāꞌna chiꞌxcuhuīꞌn ixtalīpāhuan Dios. Lāꞌ aꞌyuj tapātīniꞌlh, xlacaꞌn tūꞌ tataspiꞌtchokolh na ixtej Dios. Lāꞌ quinaꞌn cacāmakscaꞌtui xlacaꞌn. Lāꞌ chuntzaꞌ camakxtekkōꞌuj aꞌntū quincāmāmakchuyīyāniꞌ na ixtej Dios. Lāꞌ tūꞌtzaꞌ catlahuáuj aꞌntūn tūꞌ tzey, aꞌyuj jicslīhuaꞌ makxtekāuj. Lāꞌ tūꞌ cajiclhuáꞌuj natlahuayāuj ixtapuhuān Dios.
\v 2 Lāꞌ chuhuaꞌj capāstacui Jesucristo. Quinaꞌn kalhlakaꞌīꞌyāuj que Jesucristo quincāmāpūtaxtūnīꞌtaꞌniꞌtzaꞌ. Lāꞌ xlaꞌ naquincāmaktāyayāniꞌ nakalhlakaꞌīꞌyāuj āꞌchulāꞌ līhuan lahuiꞌlānaꞌujcus. Xlaꞌ lej pātīniꞌlh aꞌxniꞌcaꞌ nīlh nac cruz. Lāꞌ aꞌyuj lej lakmakaꞌnca lāꞌ aꞌyuj lej pātīniꞌlh, xlaꞌ pātīkōꞌlh como ixcaꞌtzī que āꞌcalīstān lej napāxuhua. Lāꞌ chuhuaꞌj huīꞌ na ixpāxtūcānaꞌj Dios nac aꞌkapūn aꞌnlhā tāꞌmāpaꞌksīniꞌn Dios.
\p
\v 3 Capāstactit aꞌnchī pātīniꞌlh Jesucristo lāꞌ aꞌnchī ixtatāꞌlāstaꞌla huan chiꞌxcuhuīꞌn aꞌntī ixtacaꞌtzancaꞌtzī. Chuntzaꞌ tūꞌ cajiclhuaꞌtit aꞌyuj pātīniꞌmpāꞌnaꞌntit. Lāꞌ tūꞌ camakxtektit natlahuaꞌyāꞌtit ixtapuhuān Dios.
\v 4 Aꞌyuj aꞌkatunuꞌ huiꞌxinaꞌn tlahuaꞌcuꞌtunāꞌtit aꞌntūn tūꞌ tzey, lej lītanūniꞌnīꞌtaꞌntit natlahuaꞌyāꞌtit xmān aꞌntūn tzey. Lāꞌ aꞌyuj jicslīhuaꞌ pero ūꞌtza tūꞌ cātalīmaknīnīꞌtaꞌniꞌ.
\v 5 Chōꞌla pātzaꞌnkānīꞌtaꞌntit ixtachihuīn Dios aꞌnlhā Dios quincāchihuīnaꞌmaxquīꞌyāniꞌ lāꞌ quincālaktzīꞌnāniꞌ huaꞌchilh ixcamanaꞌ. Chuntzaꞌ huan:
\q Xaꞌnca capāstacti aꞌxniꞌcaꞌ māꞌaꞌkahuānīyāniꞌ Dios.
\q Tūꞌ cajiꞌclhuaꞌ aꞌxniꞌcaꞌ xlaꞌ quilhnīyāniꞌ.
\q
\v 6 Dios cāmāꞌaꞌkahuānī ixlīhuākcaꞌn aꞌntī cāpāxquīꞌ. 
\q Lāꞌ cāmāpātīnī ixlīhuākcaꞌn aꞌntī cālaktzīꞌn huaꞌchi ixcamanaꞌ.
\m
\v 7 Capātītit aꞌxniꞌcaꞌ cātamāpātīnīyāniꞌ. Palh Dios cāmāꞌaꞌkahuānīyāniꞌ, chuntzaꞌ tasuꞌyu que cālaktzīꞌnāniꞌ huaꞌchi ixcamanaꞌ. Lej tasquiꞌnī que kalhatin xatātaꞌ namāꞌaꞌkahuānī ixcaman.
\v 8 Dios cāmāꞌaꞌkahuānī ixlīhuākcaꞌn ixcamanaꞌ. Lāꞌ palh tūꞌ cahuā ixcāmāꞌaꞌkahuānīniꞌ chuntzaꞌ ixtasuꞌyulh que huiꞌxinaꞌn tūꞌ stuꞌncuaꞌ ixcamanaꞌ. 
\v 9 Aꞌxniꞌcaꞌ quincātamakastacniꞌ quintātaꞌcaꞌn, ixquincātamāpātīnīyāniꞌ. Lāꞌ quinaꞌn ixcāꞌaꞌcnīniꞌniꞌyāuj. Lāꞌ āꞌchulāꞌ tasquiꞌnī quinaꞌn naꞌaꞌkahuānaꞌniꞌyāuj Dios aꞌntī cāmāꞌaꞌnanī quilīcaꞌtzīncaꞌn, lāꞌ chuntzaꞌ nakaꞌlhīyāuj quinquilhtamacujcaꞌn para pōꞌktu.
\v 10 Quintātaꞌcaꞌn aꞌntī xalanīꞌn nac quilhtamacuj, xlacaꞌn ixquincātamāpātīnīyāniꞌ chu aꞌnchī ixtapuhuān. Xlacaꞌn ixtalacasquiꞌn que līlacatejtin ixlatāꞌkchokouj nac huāꞌmāꞌ quilhtamacuj. Lāꞌ nā Dios quincāmāpātīnīyāniꞌ, como quincāpāstacāniꞌ. Xlaꞌ lacasquiꞌn que quinaꞌn lactzey nalayāuj huaꞌchi xlaꞌ.
\v 11 Aꞌxniꞌcaꞌ quincātamāpātīnīyāniꞌ, tūꞌ līpāxuhuayāuj. Lāꞌ aꞌyuj quincātamālakaputzīyāniꞌ, āꞌcalīstān quincātlahuayāniꞌ lactzey lāꞌ līpāxuj, palh chuntzaꞌ līscaꞌtāuj.
\s Lījicuaꞌ palh tūꞌ naꞌaꞌkahuānaꞌniꞌyāuj Dios
\p
\v 12 Lāꞌ chuhuaꞌj calāmāhuixcānīꞌtit lāꞌ tūꞌ catalactlajītāyaꞌtit. 
\v 13 Xaꞌnca catlāꞌhuaꞌntit na ixtej Dios. Lāꞌ chuntzaꞌ nacāmaktāyaꞌyāꞌtit xlacaꞌn aꞌntīn tūnaꞌj xaꞌnca takalhlakaꞌīꞌ. Lāꞌ chuntzaꞌ xlacaꞌn tūꞌ catitatonkopūlh. 
\p
\v 14 Caꞌcs catahuiꞌlaꞌtit con ixlīhuākcaꞌn tachiꞌxcuhuīꞌt. Catlahuaꞌtit xmān aꞌntū līmakuan. Palh kalhatin tūꞌ makxtekcuꞌtun de tlahua talaclēꞌiꞌ, xlaꞌ tūꞌ catitāꞌlatahuiꞌlh Dios.
\v 15 Dios lej lakalhuꞌmanīniꞌn. Camakxtektit que xlaꞌ nacāmaktāyayāniꞌ milīhuākcaꞌn. Tūꞌ cataxtutāyaꞌtit na ixtej Dios nīn kalhatin de huiꞌxinaꞌn. Palh kalhatin taxtutāya, chuntzaꞌ cāmāmakchuyī āꞌmakapitzīn aꞌnchīn takalhlakaꞌīꞌ.
\v 16 Tūꞌ catlahuaꞌtit talākalhīꞌn. Tūꞌ calakmakaꞌntit aꞌntū ixlaꞌ Dios, huaꞌchi Esaú. Xlaꞌ como ixuāꞌyancuꞌtun, stāꞌlh ixherencia aꞌntū ixlaꞌ ixlalh como xlaꞌ līmaksāstiꞌ ixuanīꞌt.
\v 17 Lāꞌ huiꞌxinaꞌn caꞌtzīyāꞌtit que āꞌcalīstān xlaꞌ ixlacasquiꞌn que ixmaxquīꞌpalaca huan herencia. Lāꞌ tūꞌ maxquīꞌca. Xlaꞌ ixcalhuan como xtāpalīcuꞌtulh aꞌntū ixtlahuanīꞌt. Lāꞌ tulalh xtāpalīlh.
\p
\v 18 Huiꞌxinaꞌn tūꞌ ixuiꞌlānaꞌntit aꞌntzaꞌ aꞌxniꞌcaꞌ Dios māstāꞌlh huan ley nac kēstīn aꞌnlhā huanican Sinaí. Huan israelitas xalanīꞌn makāntzaꞌ tatapajtzūlh huan nac Sinaí. Talaktzīꞌlh huan lamanaꞌ lāꞌ huan cāꞌpucsuaꞌ lāꞌ huan maklipniꞌ.
\v 19 Takaxmatli lakatin trompeta lāꞌ lakatin tachihuīn. Lāꞌ aꞌxniꞌcaꞌ takaxmatli ixtachihuīn Dios, xlacaꞌn tasquiꞌnli que tūꞌtzaꞌ ixtakaxmatli.
\v 20 Lāꞌ lej tajicuaꞌlh aꞌxniꞌcaꞌ Dios hualh que nīn tintīꞌ īꞌxaꞌmalh huan ixtūtzāꞌn huan kēstīn. Lāꞌ nā hualh que palh lakatin animal natāya aꞌntzaꞌ kaꞌlhī nalīlacataꞌlamaknīcan chihuix.
\v 21 Lāꞌ aꞌntīn talaktzīꞌlh huāꞌmāꞌ, lej tajicuaꞌlh. Lāꞌ nā Moisés hualh: “Icxpipimāꞌ como lej icjicuaꞌn”. 
\p
\v 22 Huiꞌxinaꞌn tūꞌ chuntzaꞌ taꞌnīꞌtaꞌntit nac Sinaí. Huiꞌxinaꞌn pimpāꞌnaꞌntit nac āꞌlakatin kēstīn aꞌnlhā huanican Sión lāꞌ nac cāꞌlacchicniꞌ aꞌnlhā huīꞌ Dios xalakahuan. Huāꞌmāꞌ cāꞌlacchicniꞌ huiꞌlachaꞌ nac aꞌkapūn lāꞌ huanican Jerusalén. Lāꞌ aꞌntzaꞌ lej taꞌaꞌnan lhūhuaꞌ ángeles.
\v 23 Lāꞌ aꞌntzaꞌ nā huiꞌxinaꞌn pimpāꞌnaꞌntit nac aꞌkapūn aꞌnlhā tatakēxtimīnīꞌt lāꞌ tamācāꞌtanīmāꞌna Dios aꞌntī xapūꞌla ixcamanaꞌ Dios, aꞌntīn tatzoꞌkniꞌ ixtacuīniꞌcaꞌn nac aꞌkapūn. Aꞌntzaꞌ huīꞌ Dios. Uꞌtzaꞌ aꞌntī nacājuzgarlīkōꞌ ixlīhuākcaꞌn huan tachiꞌxcuhuīꞌt. Lāꞌ nā aꞌntzaꞌ tahuiꞌlānaꞌnchaꞌ ixlīcaꞌtzīncaꞌn aꞌntīn tanīnīꞌttzaꞌ lāꞌ Dios cātlahuanīꞌt xalacuan. 
\v 24 Huiꞌxinaꞌn kalhlakaꞌīꞌnīꞌtaꞌntit que Jesucristo ūꞌtzaꞌ aꞌntī māpūtaxtūnuꞌn. Xlaꞌ lacāxtlahuanīꞌt huan xasāstiꞌ convenio. Lāꞌ ixkaꞌlhniꞌ Jesucristo cācheꞌkēꞌniꞌ ixaꞌclhcunuccaꞌn huan tachiꞌxcuhuīꞌt. Lāꞌ chuntzaꞌ huan lēꞌksajnaꞌ aꞌntū ixkaꞌlhniꞌ Jesucristo, ūꞌtzaꞌ más xatzey lāꞌ tūꞌ huaꞌchi aꞌntū mālacnūlh Abel. 
\p
\v 25 Cakaxpaꞌttit aꞌntū huan Dios. Cāmāpātīnīca aꞌntīn tūꞌ taꞌaꞌkahuānaꞌniꞌlh Moisés aꞌntīn Dios māchihuīnīlh. Lāꞌ āꞌchulāꞌ naquincātamāpātīnīyāniꞌ palh tūꞌ kaxmatcuꞌtunāuj Dios aꞌnchī chihuīnaꞌnāchaꞌ nac aꞌkapūn.
\v 26 Makāntzaꞌ Dios chihuīnaꞌlh aꞌxniꞌcaꞌ ixtatakēstoknīꞌt huan israelitas pajtzu nac Sinaí. Lāꞌ huan tiꞌyaꞌt tachiquilh. Lāꞌ chuhuaꞌj Dios huanīꞌt: “Quit naꞌicchiquipala huan tiꞌyaꞌt. Lāꞌ tūꞌ xmān huan tiꞌyaꞌt. Nā naꞌicchiqui huan aꞌkapūn”.
\v 27 Lāꞌ huāꞌmāꞌ huanicuꞌtun que natasputkōꞌ ixlīhuāk aꞌntū cāmāꞌaꞌnanīnīꞌt. Lāꞌ natachoko xmān aꞌntūn tūla xakāꞌlīcan.
\v 28 Quinaꞌn natāꞌlatahuiꞌlayāuj Dios aꞌnlhā xlaꞌ māpaꞌksīniꞌn aꞌnlhā tāyaniꞌ para pōꞌktu. Chuhuaꞌj namaxquīꞌyāuj pāxcatcaꞌtzī Dios lāꞌ naꞌaꞌcnīniꞌniꞌyāuj lāꞌ namācāꞌtanīyāuj chu aꞌnchī huaꞌchi xlaꞌ lacasquiꞌn.
\v 29 Ixlīstuꞌncuaꞌ que Dios huaꞌchi lakatin kaꞌtlaꞌ lamanaꞌ como xlaꞌ nacāmāpātīnī xlacaꞌn aꞌntīn tūꞌ taꞌaꞌkahuānaꞌniꞌ. 
\c 13
\s Palh xaꞌnca nalatāꞌkchokoyāuj, chuntzaꞌ nalīmāpāxuhuīyāuj Dios
\p
\v 1 Calāpāxquīꞌtit milīhuākcaꞌn como huiꞌxinaꞌn lītāꞌtimīn. 
\v 2 Camānūꞌtit na minchiccaꞌn aꞌntīn tamināchaꞌ de makat. Aꞌmakapitzīn aꞌntīn chuntzaꞌ tatlahuanīꞌt, xlacaꞌn tamānūnīꞌt ángeles na ixchiccaꞌn, aꞌyuj xapūꞌla tūꞌ ixtacaꞌtzī palh xlacaꞌn ángeles ixtahuanīꞌt. 
\p
\v 3 Tūꞌ cacāpātzaꞌnkātit aꞌntī cāchīꞌcanīꞌt. Cacālakalhuꞌmaꞌntit de xlacaꞌn huaꞌchilh nā huiꞌxinaꞌn xatachīꞌnīꞌn con xlacaꞌn. Lāꞌ tūꞌ cacāpātzaꞌnkātit aꞌntīn tapātīniꞌmāꞌna. Cacālakalhuꞌmaꞌntit xlacaꞌn huaꞌchilh nā huiꞌxinaꞌn ixpātīniꞌntit huaꞌchi xlacaꞌn.
\p
\v 4 Lej tzey tapūchahuacan. Tūꞌ līmakuan tlahuacan talākalhīꞌn. Dios nacāmāpātīnī xlacaꞌn aꞌntīn tatlahua talākalhīꞌn lāꞌ āꞌcatūhuā huaꞌchi huāꞌmāꞌ.
\p
\v 5 Tūꞌ xmān capāstactit aꞌnchī nalīkaꞌlhīꞌyāꞌtit tumīn. Līpāxuj catahuiꞌlaꞌtit palh kaꞌlhīꞌyāꞌtit lhūhuaꞌ tumīn o palh tūꞌ lhūhuaꞌ. Dios huanīꞌt: “Pōꞌktu naꞌictāꞌlatahuiꞌlayāniꞌ. Tūꞌ maktin ictimakxtekniꞌ”. 
\v 6 Lāꞌ ūꞌtzaꞌ tūꞌ catilījicuaꞌuj. Tzē nahuanāuj: 
\q Huan Māpaꞌksīniꞌ Dios quimaktāya.
\q Tūꞌ ictijicuaꞌniꞌlh aꞌntū naquintatlahuaniꞌ tachiꞌxcuhuīꞌt. 
\p
\v 7 Cacāpāstactit xlacaꞌn aꞌntīn pūꞌla cātamāsuꞌniꞌniꞌ ixtachihuīn Dios. Capāstactit aꞌnchī xlacaꞌn ixtalīlatlāꞌhuan. Lāꞌ cacāmakscaꞌttit xlacaꞌn.
\p
\v 8 Jesucristo tūꞌ taxtāpālī. Xlaꞌ pōꞌktu chūꞌtzaꞌ aꞌnchī ixuanīꞌt xapūꞌla lāꞌ hasta chuhuaꞌj lāꞌ para pōꞌktu.
\v 9 Tūꞌ catamakxtektit que nacātamāsuꞌniꞌyāniꞌ āꞌtāpātin līmāscaꞌtīn aꞌntūn tūꞌ huaꞌchi kalhlakaꞌīꞌyāꞌtit chuhuaꞌj. Dios ūꞌtzaꞌ aꞌntī quincāmaktāyayāniꞌ aꞌnchī nalatāꞌkchokoyāuj chu aꞌnchī xlaꞌ lacasquiꞌn. Huan līmāscaꞌtīn ixpālacata aꞌntū huaꞌcan, huāꞌmāꞌ tūꞌ quincāmaktāyayāniꞌ. Aꞌyuj āꞌmakapitzīn taꞌaꞌkahuānaꞌniꞌ huan tamāꞌna līmāscaꞌtīn, huāꞌmāꞌ tūꞌ cāmaktāya xlacaꞌn.
\p
\v 10 Huan sacerdotes aꞌntīn tascuja na ixlītokpāncaꞌn israelitas, xlacaꞌn tzē natahuaꞌ macstiꞌnaꞌj de huan ixquinītcaꞌn animalhnaꞌ aꞌntū mālacnūniꞌcan Dios. Xtunc huan lēꞌksajnaꞌ aꞌntū mālacnūniꞌcanīꞌt Dios aꞌntū quincāmāpānūniꞌyāniꞌ quintalaclēꞌiꞌcaꞌn. Huāꞌmāꞌ lēꞌksajnaꞌ, ūꞌtzaꞌ Jesucristo.
\v 11 Huan chiꞌxcuꞌ aꞌntī xapuxcuꞌ sacerdote, xlaꞌ lēꞌn ixkaꞌlhniꞌ animalhnaꞌ xatamaknīn hasta huan nac lītokpān aꞌnlhā huanican Lej Tasicuaꞌlanālīn aꞌnlhā ixlīlakatuꞌ cuarto. Lāꞌ aꞌntzaꞌ mālacnūniꞌcan Dios huan kaꞌlhniꞌ para nacāmāpānūniꞌ ixtalaclēꞌiꞌcaꞌn huan tachiꞌxcuhuīꞌt. Lāꞌ ixmacniꞌcaꞌn huan animalhnaꞌ aꞌntū xatamaknīn, huan tamāꞌna cāmāxtucan de huan kaꞌtlaꞌ cāꞌlacchicniꞌ. Lāꞌ aꞌntzaꞌ cālhcuyucan.
\v 12 Lāꞌ nā Jesús nā māxtuca de huan xakaꞌtlaꞌ cāꞌlacchicniꞌ. Lā aꞌntzaꞌ nīlh. Chuntzaꞌ pātīniꞌlh como ixkaꞌlhniꞌ ixcālīmāpānūniꞌcuꞌtun ixtalaclēꞌiꞌcaꞌn huan tachiꞌxcuhuīꞌt. 
\v 13 Lej lakmakaꞌnca Jesucristo aꞌxniꞌcaꞌ māxtuca de huan xakaꞌtlaꞌ cāꞌlacchicniꞌ lāꞌ xtokohuaꞌcaꞌca huan nac cruz. Lāꞌ quinaꞌn como kalhlakaꞌīꞌyāuj, kaꞌlhī nā napātīyāuj aꞌxniꞌcaꞌ quincātalakmakaꞌnāniꞌ por ixpālacata Jesucristo.
\v 14 Huāꞌtzāꞌ nac quilhtamacuj tintīꞌ huan cāꞌlacchicniꞌ aꞌntū natahuiꞌla para pōꞌktu. Quinaꞌn kaꞌlhīmāꞌnauj āꞌlakatin cāꞌlacchicniꞌ aꞌntū nalaktzīꞌnāuj āꞌcalīstān. 
\v 15 Tūꞌtzaꞌ mālacnūniꞌyāuj Dios huan xatamaknīn animalhnaꞌ. Līmakuan namaxquīꞌyāuj pāxcatcaꞌtzī Dios. Lāꞌ ūꞌtzaꞌ huaꞌchi lēꞌksajnaꞌ. Lāꞌ tasquiꞌnī namākaꞌtlīꞌyāuj Dios ixpālacata Jesucristo.
\v 16 Tūꞌ capātzaꞌnkātit natlahuaꞌyāꞌtit aꞌntūn tzey. Lāꞌ tūꞌ capātzaꞌnkātit nalāmaktāyaꞌyāꞌtit. Uꞌtzaꞌ huāꞌmāꞌ aꞌntū līpāxuhua Dios.
\p
\v 17 Cacāꞌaꞌkahuānaꞌniꞌtit huan xanapuxcuꞌnuꞌ nac huan lītokpānnaꞌ. Lāꞌ catlahuaꞌtit aꞌntū xlacaꞌn cātahuaniyāniꞌ. Xlacaꞌn cāmaktakaꞌlhāniꞌ huiꞌxinaꞌn como talacasquiꞌn que xaꞌnca nakalhlakaꞌīꞌyāꞌtit. Xlacaꞌn natamaxquīꞌ cuenta Dios aꞌnchīn tascuja. Xlacaꞌn con tapāxuhuān natascuja palh natlahuaꞌyāꞌtit aꞌntū nacātalīmāpaꞌksīyāniꞌ. Lāꞌ palh tūꞌ nacāꞌaꞌkahuānaꞌniꞌyāꞌtit, xlacaꞌn natalīlakaputza. Lāꞌ huāꞌmāꞌ tuntūꞌ caticātlahuaniꞌniꞌ huiꞌxinaꞌn.
\p
\v 18 Cakalhtōꞌkaꞌtit por quit. Lāꞌ quit iccaꞌtzī que ictlōkentaxtūlh aꞌntū Dios quilīmāmacūꞌlh como pōꞌktu ictlahuacuꞌtun aꞌntūn tzēy.
\v 19 Iccāsquiꞌniꞌyāniꞌ que lej caquilālīkalhtōꞌkaꞌuj huiꞌxinaꞌn que Dios palaj naquimacāꞌnāchaꞌ aꞌnlhā huiꞌlānaꞌntit.
\s Huan līsicuaꞌlanālīn
\p
\v 20 Dios ūꞌtzaꞌ aꞌntī cāmātzaꞌtaꞌtīꞌ quiꞌaꞌclhcunuccaꞌn. Xlaꞌ mālakahuanīchokolh Jesucristo. Lāꞌ Jesucristo nīlh lāꞌ chuntzaꞌ līxapalh ixkaꞌlhniꞌ quintalaclēꞌiꞌcaꞌn. Lāꞌ chuntzaꞌ līlacāxtlahualh huan convenio aꞌntū lej tzey lāꞌ aꞌntū natāyaniꞌ para pōꞌktu. Lāꞌ chuhuaꞌj xlaꞌ pōꞌktu quincāmaktakaꞌlhāniꞌ.
\v 21 Lāꞌ Dios cacāmaxquīꞌniꞌ ixlīhuāk aꞌntū nacāmaktāyayāniꞌ natlahuaꞌyāꞌtit ixtapuhuān. Lāꞌ nā quinaꞌn caquincātlahuaniꞌ Dios chu aꞌnchī xlaꞌ lacasquiꞌn por ixlīmāpaꞌksīn Jesucristo. Caꞌaꞌcnīniꞌniꞌca Jesucristo para pōꞌktu. Amén.
\p
\v 22 Tāꞌtimīn, lej iccāsquiꞌniꞌyāniꞌ que līlacatzucu nalakapūtleꞌkeyāꞌtit aꞌntū iccātzoꞌknuniꞌmāꞌniꞌ nac huāꞌmāꞌ carta. Tūꞌ lej lhmāꞌn huanmāꞌ carta aꞌntū iꞌccātzoꞌknuniꞌnīꞌtaꞌniꞌ.
\v 23 Iccāmācaꞌtzīnīcuꞌtunāniꞌ que makxtekcanīꞌttzaꞌ Timoteo. Lāꞌ chuntzaꞌ tūꞌtzaꞌ tachīꞌn. Lāꞌ palh xlaꞌ namin palaj, naquintāꞌaꞌn aꞌxniꞌcaꞌ naꞌiccālakaꞌnāchāniꞌ huiꞌxinaꞌn.
\p
\v 24 Cacāsaludarlīꞌtit ixlīhuākcaꞌn huan xanapuxcuꞌnuꞌ de huan lītokpān. Lāꞌ cacāsaludarlīꞌtit ixlīhuākcaꞌn āꞌmakapitzīn aꞌntīn takalhlakaꞌīꞌ. Huan tāꞌtimīn xalanīꞌn nac Italia cāmacāꞌniꞌyāniꞌ saludos.
\p
\v 25 Lāꞌ Dios cacāsicuaꞌlanālīkōꞌniꞌ milīhuākcaꞌn huiꞌxinaꞌn. Amén.