\id JAS
\h SANTIAGO
\toc1 SANTIAGO
\mt Huan Carta aꞌntūn Tzoꞌkli Santiago
\c 1
\s Lītzucuca huan carta
\p
\v 1 Quit, Santiago, ictzoꞌka huāꞌmāꞌ carta. Quit ictāꞌscuja Dios lāꞌ huan Māpaꞌksīniꞌ Jesucristo. Quit iccāmacāꞌniꞌyāniꞌ saludos milīhuākcaꞌn israelitas aꞌntīn tapaꞌksīyāꞌtit con Dios, aꞌntī aꞌkahuaꞌnīꞌtaꞌntit.
\s Huan tapāstacnaꞌ aꞌntū Dios māstāꞌ
\p
\v 2 Tāꞌtimīn, catahuiꞌlaꞌtit con tapāxuhuān aꞌyuj cāpātleꞌkeniꞌyāniꞌ lej lhūhuaꞌ catūhuā por ixpālacata kalhlakaꞌīꞌyāꞌtit Jesucristo.
\v 3 Caꞌtzīꞌyāꞌtittzaꞌ aꞌxniꞌcaꞌ cāpātleꞌkeniꞌyāniꞌ huāꞌmāꞌ lāꞌ palh tūꞌ makxtekāꞌtit aꞌnchī kalhlakaꞌīꞌyāꞌtit, chuntzaꞌ nalīscaꞌtāꞌtit aꞌnchī natāyaniꞌyāꞌtit. 
\v 4 Lāꞌ pōꞌktu natāyaniꞌyāꞌtit, lāꞌ chuntzaꞌ nalīscaꞌtāꞌtit aꞌnchī xaꞌnca nalatāꞌkchokoyāꞌtit lāꞌ aꞌnchī nalītlōkentaxtūkōꞌyāꞌtit ixlīhuāk aꞌntū ixtapuhuān Dios.
\p
\v 5 Palh huiꞌxinaꞌn tūꞌ māchekxīyāꞌtit aꞌnchī nalīlatāꞌkchokoyāꞌtit xaꞌnca, casquiꞌniꞌtit Dios lāꞌ xlaꞌ nacāmāmāchekxīnīyāniꞌ. Xlaꞌ lej cāmaktāya ixlīhuāk huan tachiꞌxcuhuīꞌt chu aꞌnchī tasquiꞌnī lāꞌ tūꞌ cālacatāꞌquīꞌ. 
\v 6 Aꞌxniꞌcaꞌ huiꞌxinaꞌn nasquiꞌniꞌyāꞌtit catūhuā Dios, napuhuaꞌnāꞌtit que Dios stuꞌncuaꞌ nacātamaxquīꞌyāniꞌ. Lāꞌ tūꞌ maktin tipuhuaꞌnāꞌtit que Dios tūꞌ caticāmaxquīꞌniꞌ. Lāꞌ aꞌntī puhuan que Dios tūꞌ catimāstāꞌlh, xlaꞌ tūꞌ xmān tāpātin ixtapāstacnaꞌ kaꞌlhī. Xlaꞌ huaꞌchi aꞌxniꞌcaꞌ huan ūꞌniꞌ lakaxtim māꞌkchoko huan xasipej mar.
\v 7 Aꞌntī puhuan chuntzaꞌ, Dios tūꞌ catimaxquīꞌlh aꞌntū nasquiꞌniꞌ.
\v 8 Aꞌntīn tūꞌ xmān tāpātin tapāstacnaꞌ takaꞌlhī, xlacaꞌn tūꞌ maktin tacaꞌtzī aꞌntū natatlahua.
\p
\v 9 Lāꞌ huiꞌxinaꞌn, tāꞌtimīn, aꞌntī chu catīhuāya tachiꞌxcuhuīꞌt, calīpāxuhuaꞌtit como Dios cālaktzīꞌnāniꞌ tūꞌ huaꞌchi chu catīhuāya tachiꞌxcuhuīꞌt.
\v 10 Lāꞌ huiꞌxinaꞌn, tāꞌtimīn, aꞌntī lacricos, calīpāxuhuaꞌtit como māchekxīyāꞌtit que Dios laktzīꞌn mintumīncaꞌn huaꞌchilh nīn tuntūꞌ ixtapalh. Huan ricosnuꞌ natasputa huaꞌchi lakatin xaꞌnat.
\v 11 Aꞌxniꞌcaꞌ lej chiꞌchiniꞌn huan chiꞌtin scōhuan, lāꞌ huan xaꞌnat yuja. Lāꞌ huan ixlītzēhuanīꞌt xlaꞌ sputa. Lāꞌ nā chuntzaꞌ talīsputa huan ricosnuꞌ līhuan tatlahua ixnegociocaꞌn.
\s Aꞌnchī napātīniꞌncan lāꞌ natāyaniꞌcan
\p
\v 12 Līpāxūj tahuiꞌlānaꞌ xlacaꞌn aꞌntī lej līlacatejtin tapātī aꞌntū cāpātleꞌkeniꞌ. Palh xlacaꞌn natatāyaniꞌ, natakaꞌlhī xasāstiꞌ ixquilhtamacujcaꞌn. Lāꞌ xasāstiꞌ quinquilhtamacujcaꞌn xlaꞌ huaꞌchi lēꞌksajnaꞌ aꞌntū Dios cāmālacnūniꞌ aꞌntīn tapāxquīꞌ.
\v 13 Lāꞌ palh kalhatin chiꞌxcuꞌ puhuan que natlahua aꞌntūn tūꞌ tzey, tūꞌ cahualh que Dios māpuhuanīlh aꞌntūn tūꞌ tzey. Dios tūꞌ maktin puhuan natlahua aꞌntūn tūꞌ līmakuan. Lāꞌ xlaꞌ tūꞌ cāmāpuhuanī huan tachiꞌxcuhuīꞌt que catatlahualh aꞌntūn tūꞌ līmakuan.
\v 14 Aꞌxniꞌcaꞌ kalhatin chiꞌxcuꞌ puhuan natlahua aꞌntūn tūꞌ līmakuan, xlaꞌ māniꞌ ixtapāstacnaꞌ mātlahuī chuntzaꞌ.
\v 15 Lāꞌ palh xlaꞌ tlahua chu aꞌnchī koꞌhuaꞌjuaꞌ ixtapāstacnaꞌ, chuntzaꞌ kaꞌlhī ixtalaclēꞌiꞌ. Lāꞌ āꞌchulāꞌ tlahuatēlha aꞌntūn tūꞌ tzey. Lāꞌ ūꞌtzaꞌ nalīnī.
\p
\v 16 Lej stuꞌncuaꞌ aꞌntū iccāhuanimāꞌniꞌ. Lāꞌ tūꞌ cataꞌaꞌkxokotit, tāꞌtimīn.
\v 17 Huāk xatzey catūhuā aꞌntū quincātamaxquīꞌnīꞌtāꞌniꞌ, huāk macamīn Dios. Aꞌntī quincāmaxquīꞌniꞌ huāk aꞌntūn tzey xlaꞌ ūꞌtzaꞌ Dios. Xlaꞌ cātlahualh aꞌntūn tamāxkakēniꞌn nac aꞌkapūn. Dios xlaꞌ chu ūꞌtzaꞌtzaꞌ. Tūꞌ maktin taxtāpalī nīn macstiꞌnaꞌj.
\v 18 Dios quincātamaxquīꞌniꞌ xasāstiꞌ quinquilhtamacujcaꞌn chu aꞌnchī xlaꞌ ixtapuhuān. Quincātamaxquīꞌniꞌ quinquilhtamacujcaꞌn xasāstiꞌ por ixpālacata ixtachihuīn Dios aꞌntū ixlīstuꞌncuaꞌ. Lāꞌ chuntzaꞌ quinaꞌn xapūꞌlaꞌ kalhlakaꞌīꞌnīꞌtaꞌuj. Lāꞌ āꞌcalīstān lhūhuaꞌ āꞌmakapitzīn natakalhlakaꞌīꞌ. 
\s Aꞌntū Dios lacasquiꞌn que natlahuayāuj
\p
\v 19 Lāꞌ capāstactit huāꞌmāꞌ, tāꞌtimīn. Lāꞌ milīhuākcaꞌn xaꞌnca cakaxpaꞌttit ixtachihuīn Dios. Lāꞌ capāstacnaꞌntit pūꞌla para nachihuīnaꞌnāꞌtit, lāꞌ tūꞌ naꞌaꞌkchipināꞌtit. 
\v 20 Huan tāꞌkcha quincāmāmakchuyīyāniꞌ. Lāꞌ chuntzaꞌ tūla tlahuayāuj ixtapuhuān Dios.
\v 21 Camāpānūkōꞌtit ixlīhuāk aꞌntūn tūꞌ tzey lāꞌ ixlīhuāk aꞌntū koꞌhuaꞌjuaꞌ. Calīhuiꞌlīꞌtit que natlahuaꞌyāꞌtit ixtapuhuān Dios. Lāꞌ catlahuaꞌtit cuenta aꞌntū huan ixtachihuīn Dios aꞌntū maklhtīniꞌnīꞌtaꞌntit. Uꞌtzaꞌ aꞌntū cāmācaꞌtzīnīniꞌ aꞌnchī nacālīmāpūtaxtūyāniꞌ. 
\p
\v 22 Caꞌaꞌkahuānaꞌniꞌtit huan ixtachihuīn Dios, lāꞌ tūꞌ xmān cakaxpaꞌttit. Palh puhuaꞌnāꞌtit que xmān tasquiꞌnī nakaxpaꞌtāꞌtit, mēꞌcstucaꞌn taꞌaꞌkxokoyāꞌtit. 
\v 23 Aꞌntī xmān takaxmata ixtachihuīn Dios lāꞌ tūꞌ taꞌaꞌkahuānaꞌniꞌ, xlacaꞌn huaꞌchi kalhatin chiꞌxcuꞌ aꞌntī talakjū nac espejo.
\v 24 Lāꞌ xmān ixaꞌcstu laktzīꞌncan aꞌnchī huanīꞌt ixlacan lāꞌ aꞌn lāꞌ chu tuncan pātzaꞌnkā aꞌnchī ixuanīꞌt.
\v 25 Lāꞌ tūꞌ chuntzaꞌ xlacaꞌn aꞌntīn cuenta tatlahua huan xatzey ixtachihuīn Dios aꞌntūn quincāmācaꞌtzīnīyāniꞌ aꞌnchī nalīpūtaxtuyāuj. Lāꞌ palh xlacaꞌn tūꞌ tamakxteka taꞌaꞌkahuānaꞌniꞌ, lāꞌ palh tūꞌ tapātzaꞌnkā aꞌntū huan, chuntzaꞌ Dios nacāsicuaꞌlanālī ixlīhuāk aꞌntūn tatlahua.
\p
\v 26 Lāꞌ palh chāꞌtin chiꞌxcuꞌ huan que aꞌkahuānaꞌniꞌ Dios, lāꞌ tūla māpaꞌksī ixquilhniꞌ xlaꞌ ixaꞌcstu taꞌaꞌkxoko. Xlaꞌ tūꞌ stuꞌncuaꞌ aꞌkahuānaꞌniꞌ Dios. 
\v 27 Aꞌntū Dios lacasquiꞌn que natlahuayāuj quinaꞌn aꞌntī stuꞌncuaꞌ kalhlakaꞌīꞌyāuj xlaꞌ chuntzaꞌ: cacāmaktāyauj huan lacxcamanīn lāꞌ huan lakapūtnuꞌ aꞌntīn tapātīniꞌn lāꞌ pōꞌktu cataxtunquīuj de ixlīhuāk xakoꞌhuaꞌjuaꞌ aꞌntū xalaꞌ nac quilhtamacuj.
\c 2
\s Tasquiꞌnī nacālaktzīꞌnāuj huan tachiꞌxcuhuīꞌt chu aꞌcxtim
\p
\v 1 Tāꞌtimīn, calālaktzīꞌntit aꞌcxtim milīhuākcaꞌn huiꞌxinaꞌn aꞌntīn kalhlakaꞌīꞌyāꞌtit quiMāpaꞌksīniꞌcaꞌn Jesucristo aꞌntī lej xakaꞌtlaꞌ.
\v 2 Naꞌiccāhuaniyāniꞌ lakatin tamālacastuc. Kalhatuꞌ chiꞌxcuhuīꞌn tatanū na milītokpāncaꞌn. Kalhatin xlaꞌ rico lāꞌ kaꞌlhī ixmacatzātzāt de oro lāꞌ ixluꞌxuꞌ lej xafino. Lāꞌ huan āꞌkalhatin xlaꞌ pobre lāꞌ xlaꞌ kaꞌlhī masnā luꞌxuꞌ.
\v 3 Lāꞌ huiꞌxinaꞌn más aꞌcnīniꞌniꞌyāꞌtit aꞌntīn kaꞌlhī xatzey ixluꞌxuꞌ lāꞌ huaniꞌyāꞌtit: “Huiꞌx catahuiꞌlaꞌ huāꞌtzāꞌ nac xatzey silla”. Lāꞌ huan pobre huaniꞌyāꞌtit: “Huiꞌx catāyachī aꞌjnanuꞌ o catahuiꞌlaꞌ nac piso pajtzu na quintojon”.
\v 4 Palh chuntzaꞌ tlahuaꞌyāꞌtit huiꞌxinaꞌn, chuntzaꞌ tasuꞌyu que puhuaꞌnāꞌtit que āꞌmakapitzīn chiꞌxcuhuīꞌn más xalacuan. Palh chuntzaꞌ tlahuaꞌyāꞌtit huiꞌxinaꞌn, tūꞌ tzey mintapāstacnaꞌcaꞌn.
\p
\v 5 Tāꞌtimīn, lej iccāpāxquīꞌyāniꞌ lāꞌ iccāhuanicuꞌtunāniꞌ huāꞌmāꞌ. Dios cālacsacnīꞌt aꞌntī lacpobresniꞌ. Lāꞌ aꞌyuj pobres xlacaꞌn, Dios cālaktzīꞌn huaꞌchi ricosnuꞌ, como talīpāhuan Dios lāꞌ chuntzaꞌ natatanū aꞌnlhā xlaꞌ māpaꞌksīniꞌn. Lāꞌ nā ixlīhuāk aꞌntīn tapāxquīꞌ Dios ixlīhuākcaꞌn natatanū aꞌnlhā xlaꞌ māpaꞌksīniꞌn.
\v 6 Lāꞌ huiꞌxinaꞌn cālakmakaꞌnāꞌtit huan tī lacpobres. Lāꞌ cāꞌaꞌcnīꞌniꞌniꞌyāꞌtit huan ricos. Lāꞌ huan ricos ūꞌtunuꞌn aꞌntīn cātamāpātīnīyāniꞌ. Lāꞌ xlacaꞌn cātamālacapūꞌyāniꞌ huiꞌxinaꞌn.
\v 7 Uꞌtunuꞌn huan ricos aꞌntī koꞌhuaꞌjuaꞌ talīchihuīnaꞌn Jesucristo quiMāpaꞌksīniꞌcaꞌn. Uꞌtzaꞌ aꞌntī huiꞌxinaꞌn tāꞌtapaꞌksīꞌyāꞌtit.
\p
\v 8 Ixlīmāpaꞌksīn Dios aꞌntūn tatzoꞌkniꞌ na ixtachihuīn Dios chuntzaꞌ huan: “Nacāpāxquīꞌyaꞌ huan āꞌmakapitzīn chu aꞌnchī pāxquīꞌcaꞌnaꞌ mēꞌcstu”. Palh huiꞌxinaꞌn aꞌkahuānaꞌniꞌyāꞌtit huāꞌmāꞌ līmāpaꞌksīn, chuntzaꞌ xaꞌnca tlāꞌhuaꞌmpāꞌnaꞌntit.
\v 9 Palh huiꞌxinaꞌn aꞌcnīniꞌniꞌyāꞌtit makapitzīn lāꞌ āꞌmakapitzīn huampala cālakmakaꞌnāꞌtit, chuntzaꞌ tlahuaꞌyāꞌtit aꞌntūn tūꞌ līmakuan, lāꞌ chuntzaꞌ huiꞌxinaꞌn laclīꞌpināꞌtit chu aꞌnchī huan huan ixlīmāpaꞌksīn Dios.
\v 10 Palh kalhatin chiꞌxcuꞌ nakalhlakaꞌīꞌ ixlīhuāk huan ixley Dios lāꞌ xmān lakatin līmāpaꞌksīn aꞌntūn tūꞌ aꞌkahuānaꞌniꞌ, huāꞌmāꞌ chiꞌxcuꞌ laclēꞌn como tūꞌ aꞌkahuānaꞌniꞌkōꞌlh huan ley, lāꞌ aꞌyuj xmān lakatin līmāpaꞌksīn aꞌntūn tūꞌ aꞌkahuānaꞌniꞌlh. 
\v 11 Dios hualh: “Tūꞌ timakpuscātīniꞌnaꞌ”. Lāꞌ nā chuntzaꞌ hualh xlaꞌ: “Tūꞌ timaknīniꞌnaꞌ”. Palh kalhatin aꞌntī namaknīniꞌn, xlaꞌ nalaclēꞌn lāꞌ aꞌyuj tūꞌ makpuscatīniꞌnīꞌt. 
\v 12 Dios quincāmaktāyayāniꞌ lāꞌ chuntzaꞌ tūꞌ naquincāmāpaꞌksīyāniꞌ huan aꞌntū koꞌhuaꞌjuaꞌ. Lāꞌ chuntzaꞌ palh tlahuayāuj aꞌntūn tūꞌ tzey, Dios naquincājuzgarlīyāniꞌ. Lāꞌ ūꞌtzaꞌ calīchihuīnaꞌntit lāꞌ catlahuaꞌtit aꞌntūn tzey.
\v 13 Dios, aꞌxniꞌcaꞌ najuzgarlī, tūꞌ caticālakalhuꞌmalh aꞌntīn tūꞌ talakalhuꞌmalh āꞌmakapitzīn. Lāꞌ xlaꞌ xmān nacālakalhuꞌman aꞌntīn talakalhuꞌmalh āꞌmakapitzīn. Lāꞌ aꞌntīn talakalhuꞌmanīꞌt āꞌmakapitzīn, xlacaꞌn tūꞌ catitajicuaꞌlh aꞌxniꞌcaꞌ najuzgarlī Dios.
\s Aꞌnchī xaꞌnca kalhlakaꞌīꞌcan
\p
\v 14 Tāꞌtimīn, palh kalhatin chiꞌxcuꞌ huan que līpāhuan Dios lāꞌ xlaꞌ tūꞌ tlahua aꞌntūn tzey, chu tlakaj huan palh līpāhuan.
\v 15 Palh kalhatin quintāꞌtin spuꞌtniꞌ ixluꞌxuꞌ lāꞌ tūꞌ kaꞌlhī aꞌntū nahuaꞌ
\v 16 lāꞌ makapitzīn de huiꞌxinaꞌn tahuanī: “Dios casicuaꞌlanālīniꞌ lāꞌ camaxquīꞌcaꞌ miluꞌxuꞌ lāꞌ camāhuīꞌcaꞌ”, lāꞌ aꞌntī tahuani chuntzaꞌ nīn tuntūꞌ tamaxquīꞌ, chuntzaꞌ nīn tuntūꞌ ixpālacata palh tahuan que talīpāhuan Dios.
\v 17 Palh kalhatin chiꞌxcuꞌ huan palh līpāhuan Dios, lāꞌ tūꞌ maktāya āꞌchāꞌtin, xlaꞌ chu tlakaj huan que līpāhuan Dios. Xlaꞌ huaꞌchi kalhatin xanīn como huan xanīn tuntūꞌtzaꞌ tlahua.
\p
\v 18 Chōꞌla kalhatin nahuan: “Makapitzīn xmān talīpāhuan Dios, lāꞌ taꞌaꞌnan āꞌmakapitzīn aꞌntīn tatlahua aꞌntūn tzey”. Palh chuntzaꞌ ixquihuanica quit xaꞌicualh: “¿Chichū nalītasuꞌyuꞌyaꞌ palh līpāhuaꞌnaꞌ Dios palh tūꞌ tlahuaꞌyaꞌ aꞌntūn tzey? Pero quit ictlahua lej xatzey. Lāꞌ chuntzaꞌ lītasuꞌyu palh quit iclīpāhuan Dios”.
\v 19 Huiꞌx puhuaꞌnaꞌ que xmān kalhatin Dios. Lāꞌ chuntzaꞌ tzey. Lāꞌ nā chuntzaꞌ tapuhuan huan xakoꞌhuaꞌjuaꞌ espíritus aꞌntīn tatāꞌscuja huan koꞌtiꞌtiꞌ. Lāꞌ xlacaꞌn taxpipi porque lej tajicuaꞌniꞌ Dios.
\v 20 Huiꞌx tūꞌ māchekxīꞌyaꞌ. Naꞌicmāsuꞌniꞌyāniꞌ que chu tlakaj aꞌntī huan palh līpāhuan Dios lāꞌ palh tūꞌ tlahua aꞌntū xalacuan.
\v 21 Quixūꞌyāpapcaꞌn Abraham mālacnūniꞌlh, como huaꞌchi lēꞌksajnaꞌ Dios, huan ixoꞌkxaꞌ aꞌntī ixtacuīniꞌ Isaac. Lāꞌ ūꞌtzaꞌ Dios līlaktzīꞌlh que Abraham lej tzeya chiꞌxcuꞌ por ixpālacata aꞌntūn tlahualh.
\v 22 Chuntzaꞌ māchekxīcan que Abraham ixlīpāhuan Dios lāꞌ ūꞌtzaꞌ xlaꞌ lītlahualh aꞌntū xalacuan. Lāꞌ aꞌxniꞌcaꞌ Abraham tlahualh huāꞌmāꞌ aꞌntū lej tzey, ūꞌtzaꞌ lītasuꞌyulh que Abraham ixlīpāhuan Dios.
\v 23 Lāꞌ chuntzaꞌ tlōkentaxtūca chu aꞌnchī ixtatzoꞌkniꞌ na ixtachihuīn Dios aꞌnlhā huan: “Abraham ixlīpāhuan Dios. Lāꞌ ūꞌtzaꞌ Dios lej xatzey līlaktzīꞌlh Abraham”. Lāꞌ Dios hualh que Abraham ixamigo.
\p
\v 24 Lāꞌ chuntzaꞌ huiꞌxinaꞌn caꞌtzīyāꞌtittzaꞌ que Dios xalacuan cālaktzīꞌn tachiꞌxcuhuīꞌt tūꞌ xmān por ixpālacata talīpāhuan Dios. Nā tasquiꞌnī que xlacaꞌn natatlahua aꞌntū xalacuan. Lāꞌ chuntzaꞌ natasuꞌyu palh talīpāhuan Dios.
\v 25 Lāꞌ nā chuntzaꞌ pātlekeniꞌlh Rahab aꞌntī lej ixkaꞌlhī lhūhuaꞌ ixmakchiꞌxcuꞌ. Xlaꞌ cāmakxtekli tatachokolh na ixchic huan chiꞌxcuhuīꞌn aꞌntī Josué cāmacamilh. Lāꞌ cāmātzēꞌkli lāꞌ cāmaktāyalh para natataxtu de huan nac cāꞌlacchicniꞌ nac āꞌkantīn tej. Lāꞌ ūꞌtzaꞌ Dios līlaktzīꞌlh lej tzeya puscāt huan Rahab. 
\v 26 Quinaꞌn huiꞌlānaꞌuj como kaꞌlhīyāuj quimacniꞌcaꞌn lāꞌ quilīcaꞌtzīncaꞌn. Lāꞌ nā chuntzaꞌ quinaꞌn kaꞌlhīyāuj xasāstiꞌ quinquilhtamacujcaꞌn, como līpāhuanāuj Dios lāꞌ nā tlahuayāuj aꞌntū xalacuan.
\c 3
\s Quinquilhniꞌcaꞌn
\p
\v 1 Tāꞌtimīn, más xatzey palh tūꞌ lhūhuaꞌ de huiꞌxinaꞌn nalaꞌyāꞌtit milīmākalhtōꞌkēꞌniꞌnīꞌncaꞌn na milītokpāncaꞌn. Caꞌtzīyāꞌtit huiꞌxinaꞌn que xlacaꞌn aꞌntī tamāsuꞌyu más līpalhaꞌ nacājuzgarlīcan.
\v 2 Quinaꞌn quilīhuākcaꞌn aꞌkatunuꞌ tlahuayāuj aꞌntūn tūꞌ tzey. Lāꞌ palh kalhatin chiꞌxcuꞌ tzē māpaꞌksī ixquilhniꞌ lāꞌ chuntzaꞌ tzē māpaꞌksī ixlīhuāk ixmacniꞌ. Lāꞌ xlaꞌ tzeyā chiꞌxcuꞌ.
\v 3 Huaꞌchi huan cahuāyuj, cāmākalhnūyāuj freno na ixquilhniꞌcaꞌn. Lāꞌ chuntzaꞌ tzē nacāmāpaꞌksīyāuj. Lāꞌ nataꞌaꞌn chu aꞌnlhā quinaꞌn lacasquiꞌnāuj.
\v 4 Lāꞌ nā huaꞌchi huan barcos aꞌntū lej lakkaꞌtlaꞌn. Lāꞌ aꞌntū pūxuiꞌtican lej tiꞌnaꞌj. Lāꞌ aꞌyuj huan ūꞌniꞌ lej xatliꞌhuiꞌqui tampiꞌtalēꞌn huan barco, huan piloto tzē nalēꞌn chu aꞌnlhā lacasquiꞌn, aꞌyuj tiꞌnaꞌj aꞌntū pūxuiꞌtican huan barco.
\v 5 Lāꞌ chuntza quinquilhniꞌcaꞌn. Lāꞌ aꞌyuj tiꞌnaꞌj quinquilhniꞌcaꞌn lītasuꞌyu que līkaꞌtlaꞌjcaꞌtzīyāuj. Lāꞌ huan skoyāt aꞌyuj mactzinaꞌj macscut pero tzē namāquilhtī lakatin kaꞌtlaꞌ cāꞌquiꞌhuīꞌn.
\v 6 Lāꞌ quinquilhniꞌcaꞌn huaꞌchi skoyāt como cālactlahua āꞌmakapitzīn. Quinquilhniꞌcaꞌn pūchihuīnaꞌnāuj ixlīhuāk aꞌntū lej koꞌhuaꞌjuaꞌ. Lāꞌ ūꞌtzaꞌ āꞌchulāꞌ tūꞌ tzey līlayāuj. Por ixpālacata quinquilhniꞌcaꞌn, talālīstaꞌla ixlīhuākcaꞌn tachiꞌxcuhuīꞌt nac cāꞌquilhtamacuj. Lāꞌ huan koꞌtiꞌtiꞌ ūꞌtzaꞌ aꞌntī quincāmāhuanīyāniꞌ aꞌntū koꞌhuaꞌjuaꞌ.
\v 7 Lāꞌ chiꞌxcuhuīꞌn xlacaꞌn tzē natamāmānsujlī chuxatūyā animalhnaꞌ lāꞌ chuxatūyā spūnnuꞌ lāꞌ chuxatūyā lūhuaꞌ lāꞌ chuxatūyā animalhnaꞌ xalaꞌ nac mar. Lāꞌ ixlīhuākcaꞌn cāmāmānsujlīca.
\v 8 Pero quinquilhniꞌcaꞌn tintīꞌ aꞌntī tzē namāpaꞌksī. Quinquilhniꞌcaꞌn pōꞌktu huan aꞌntū koꞌhuaꞌjuaꞌ. Huaꞌchilh kaꞌlhī līlaknīn como quinquilhniꞌcaꞌn cāpūlactlahuayāuj āꞌmakapitzīn.
\v 9 Lāꞌ con quinquilhniꞌcaꞌn pūmācāꞌtanīyāuj Dios quinTātaꞌcaꞌn, lāꞌ nā cāpūꞌaꞌksaꞌnāuj huan āꞌmakapitzīn tachiꞌxcuhuīꞌt aꞌntū Dios tlahuanīꞌt huaꞌchi xlaꞌ. 
\v 10 Lāꞌ māniꞌ na quinquilhniꞌcaꞌn taxtu huan tachihuīn aꞌntū xatzey lāꞌ huan tachihuīn aꞌntū koꞌhuaꞌjuaꞌ. Tāꞌtimīn, ūꞌtzaꞌ huāꞌmāꞌ tūꞌ līmakuan.
\v 11 ¿Chu xmān nac lakatin muꞌsniꞌ taxtu huan xcān xaseꞌksiꞌ lāꞌ huan xcān chaꞌchāꞌklhuaꞌ?
\v 12 Tāꞌtimīn, aꞌkatin quiꞌhuiꞌ de aꞌkalhpauj tūla catitōꞌcaꞌlh ixtōꞌcat xīpa. Lāꞌ xaquiꞌhuiꞌ uvas tūla catitōꞌcaꞌlh ixtōꞌcaꞌt aꞌkalhpauj. Lāꞌ nā chuntzaꞌ huan lakatin muꞌsniꞌ aꞌnlhā taxtuhuīꞌ chaꞌchāꞌklhuaꞌ xcān aꞌntzaꞌ tūla catitaxtulh huan xaseꞌksiꞌ xcān. 
\s Aꞌntīn takaꞌlhī ixtapāstacnaꞌ Dios
\p
\v 13 Chōꞌla makapitzīn de huiꞌxinaꞌn huīꞌ aꞌntī lakskalalhnaꞌ lāꞌ lhūhuaꞌ tamāchekxī lāꞌ chuntzaꞌ tzē namāsuꞌyuꞌyātit. Calatāꞌkchokotit līlacatejtin lāꞌ chuntzaꞌ nalītalacsuꞌyu palh lakskalalhnaꞌ huiꞌxinaꞌn. Lāꞌ tūꞌ tikaꞌtlaꞌjcaꞌtzīyāꞌtit. 
\v 14 Lāꞌ palh huiꞌxinaꞌn xmān lacasquiꞌnāꞌtit que napuhuancan que huiꞌxinaꞌn lej skalalhnaꞌ chuntzaꞌ lītasuꞌyu que tūꞌ lej skalalhnaꞌ huiꞌxinaꞌn.
\v 15 Palh chuntzaꞌ puhuan kalhatin, aꞌntzaꞌ lītalacsuꞌyu palh ixtapāstacnaꞌ xlaꞌ tūꞌ ixlaꞌ Dios. Xmān pāstacnaꞌn huaꞌchi ixtapāstacnaꞌ huan koꞌtiꞌtiꞌ lāꞌ ixtapāstacnaꞌcaꞌn chiꞌxcuhuīꞌn como tlahuamāꞌ aꞌntū lacasquiꞌn ixmacniꞌ. 
\v 16 Aꞌxniꞌcaꞌ huan tachiꞌxcuhuīꞌt xmān talacasquiꞌn que napuhuancan que xlacaꞌn lej lakskalalhnaꞌ por ūꞌtzaꞌ talālīstaꞌla lāꞌ tatlahua ixlīhuāk catūhuā aꞌntū lej koꞌhuaꞌjuaꞌ.
\v 17 Lāꞌ naꞌiccāhuaniyāniꞌ aꞌnchī talīhuanīꞌt xlacaꞌn aꞌntīn takaꞌlhī ixtapāstacnaꞌ Dios. Xlacaꞌn xmān tapāstaca aꞌntū lacuan. Uꞌtzaꞌ aꞌntū más tasquiꞌnī. Lāꞌ tūꞌ talāstaꞌla. Lāꞌ lacatzucu talātāꞌchihuīnaꞌn. Lāꞌ lej taꞌaꞌkahuānaꞌn. Lāꞌ tamaktāya āꞌmakapitzīn. Lāꞌ talaktzīꞌn aꞌcxtim ixlīhuāk. Lāꞌ tatlahua aꞌntūn tzey, lāꞌ tūꞌ huaꞌchi aꞌntīn tatasuꞌyuꞌ palh tzeyā chiꞌxcuhuīꞌn lāꞌ xmān talīꞌaꞌkxokonuꞌn.
\v 18 Lāꞌ aꞌntīn tūꞌ talāstaꞌlacuꞌtun con āꞌmakapitzīn, chuntzaꞌ xlacaꞌn tatlahua aꞌntū xatzey, lāꞌ chuntzaꞌ tūꞌtzaꞌ catitatāꞌlāstaꞌlacuꞌtulh huan āꞌmakapitzīn. 
\c 4
\s Tūꞌ tzey palh lakatīyāuj aꞌntū xalaꞌ nac quilhtamacuj 
\p
\v 1 Lāꞌ ¿aꞌchīꞌ lej lāstaꞌlayāꞌtit? Huiꞌxinaꞌn tlahuaꞌyāꞌtit chuntzaꞌ como lej kaꞌlhīcuꞌtunāꞌtit aꞌntū lej ixtapalh tumīn. Lāꞌ huāꞌmāꞌ tapāstacnaꞌ aꞌntū kaꞌlhīꞌyāꞌtit tāꞌlāstaꞌlatanūmaꞌ na miꞌaꞌclhcunuccaꞌn con huan xatzey mintapāstacnaꞌcaꞌn aꞌntū cātamaxquīꞌnīꞌtaꞌniꞌ Dios.
\v 2 Huiꞌxinaꞌn lej kaꞌlhīcuꞌtunāꞌtit catūhuā lāꞌ como tūla kaꞌlhīꞌyāꞌtit, lāꞌ ūꞌtzaꞌ lālīmaknīcuꞌtunāꞌtit huiꞌxinaꞌn. Huiꞌxinaꞌn lej lālakcaꞌtzaniꞌyāꞌtit aꞌntī kaꞌlhī catūhuā, lāꞌ como tūla kaꞌlhīꞌyāꞌtit, lej lālīlacatāꞌquīꞌyāꞌtit lāꞌ lālītucsāꞌtit. Lāꞌ tūla kaꞌlhīꞌyāꞌtit aꞌntū lacasquiꞌnāꞌtit huiꞌxinaꞌn, como tūꞌ squiꞌniꞌyāꞌtit Dios.
\v 3 Lāꞌ aꞌxniꞌcaꞌ squiꞌniꞌyāꞌtit Dios tūꞌ cāmaxquīꞌyāniꞌ, porque tūꞌ xaꞌnca squiꞌniꞌyāꞌtit. Squiꞌniꞌyāꞌtit huiꞌxinaꞌn con xakoꞌhuaꞌjuaꞌ mintapāstacnaꞌcaꞌn. Squiꞌniꞌyāꞌtit xmān para pāxcat līlaꞌyāꞌtit, xmān para aꞌntū huiꞌxinaꞌn lacasquiꞌnāꞌtit.
\v 4 Huiꞌxinaꞌn huaꞌchi kalhatin puscāt aꞌntīn tūꞌ lakspit, como tūꞌtzaꞌ aꞌkahuānaꞌniꞌcuꞌtunāꞌtit Dios lāꞌ xmān tlahuaꞌcuꞌtunāꞌtit aꞌntū lacasquiꞌnāꞌtit. ¿Chu tūꞌ caꞌtzīyāꞌtit que aꞌntī lej talakatī lhūhuaꞌ catūhuā xalaꞌ nac quilhtamacuj, xlacaꞌn tala huaꞌchi ixtāꞌcaꞌtza Dios? Aꞌntīn tatlahua chu aꞌcxtim huaꞌchi xalanīꞌn nac quilhtamacuj, xlacaꞌn tala huaꞌchi ixtāꞌcaꞌtza Dios.
\v 5 Chōꞌla huiꞌxinaꞌn puhuaꞌnāꞌtit que xmān chu tlakaj tatzoꞌkniꞌ huan na ixtachihuīn Dios aꞌnlhā huan que Dios quincāmaxquīꞌnīꞌtaꞌniꞌ huan Espíritu Santo lāꞌ xlaꞌ lacasquiꞌn que xmān xlaꞌ naquincāmāpaꞌksīyāniꞌ lāꞌ tūꞌ lacasquiꞌn que naquincāmāpaꞌksīyāniꞌ āꞌkalhatin.
\v 6 Lāꞌ como ūꞌtzaꞌ lacasquiꞌn Dios, xlaꞌ quincāmaktāyayāniꞌ, lāꞌ chuntzaꞌ tzē naꞌaꞌkahuānaꞌniꞌyāuj xmān Dios. Chuntzaꞌ huan ixtachihuīn Dios:
\q Dios tūꞌ cāmaktāya aꞌntīn takaꞌtlaꞌjcaꞌtzī.
\q Xlaꞌ cāmaktāya aꞌntīn tūꞌ takaꞌtlaꞌjcaꞌtzī.
\m
\v 7 Lāꞌ huiꞌxinaꞌn catamakxtektit que Dios nacāmāpaꞌksīyāniꞌ. Lāꞌ tūꞌ catamakxtektit que huan koꞌtiꞌtiꞌ nacāmāpaꞌksīyāniꞌ. Lāꞌ chuntzaꞌ xlaꞌ nacātatzāꞌlaniꞌyāniꞌ.
\v 8 Catapajtzūtit con Dios lāꞌ xlaꞌ nā nacātāꞌlatahuiꞌlayāniꞌ huiꞌxinaꞌn. Lāꞌ huiꞌxinaꞌn aꞌntīn tlahuaꞌyāꞌtit aꞌntū xakoꞌhuaꞌjuaꞌ, tūꞌtzaꞌ catlahuaꞌtit. Lāꞌ huiꞌxinaꞌn aꞌntī pāxquīꞌyāꞌtit Dios lāꞌ nā aꞌntū ixlaꞌ huan quilhtamacuj, camakxtektit huanmāꞌ xakoꞌhuaꞌjuaꞌ mintapāstacnaꞌcaꞌn. 
\v 9 Lāꞌ lej calakaputzatit lāꞌ cacalhuaꞌntit. Lāꞌ tūꞌtzaꞌ calītzīꞌntit lāꞌ tūꞌtzaꞌ capāxuhuaꞌtit por ixpālacata aꞌntūn tūꞌ tzey. Camāxanaꞌntit por ixpālacata mintalaclēꞌiꞌcaꞌn. 
\v 10 Lāꞌ cahuaꞌniꞌtit Dios palh huiꞌxinaꞌn tlahuaꞌnīꞌtaꞌntit aꞌntūn tūꞌ tzey lāꞌ Dios nacālakalhuꞌmanāniꞌ.
\s Tūꞌ tzey palh aꞌksaꞌnanāuj
\p
\v 11 Tāꞌtimīn, tūꞌ tilālīchihuīnaꞌnāꞌtit aꞌntūn tūꞌ tzey. Palh kalhatin līchihuīnaꞌn āꞌkalhatin aꞌntūn tūꞌ līmakuan, chuntzaꞌ līlakmakaꞌmāꞌ huan ley aꞌntū huan: Calāpāxquīꞌtit. Xlaꞌ puhuan que tzē nahuan palh āꞌchāꞌtin laclēꞌn. Lāꞌ xlaꞌ huaꞌchi juez. Lāꞌ tūꞌ puhuan palh nā xlaꞌ laclēꞌn como lakmakaꞌmāꞌ huan ley.
\v 12 Xmān kalhatin Juez aꞌnan. Xlaꞌ ūꞌtzaꞌ māniꞌ Dios. Lāꞌ xlaꞌ ūꞌtzaꞌ quincāmaxquīꞌniꞌ huan ley que ūꞌtzaꞌ naꞌaꞌkahuānaꞌniꞌyāuj. Xlaꞌ tzē naquincāmāpūtaxtūyāniꞌ lāꞌ nā tzē naquincāmacāꞌnāniꞌ nac pūpātīn. Lāꞌ ¿aꞌchīꞌ puhuaꞌnāꞌtit palh huiꞌxinaꞌn tzē naꞌaꞌksaꞌnāꞌtit āꞌkalhatin?
\s Tūꞌ caꞌtzīyāuj aꞌntū napātleꞌke lakalī
\p
\v 13 Naꞌiccāhuaniyāniꞌ huiꞌxinaꞌn macstiꞌnaꞌj mimpālacatacaꞌn huiꞌxinaꞌn aꞌntī lāhuaniꞌyāꞌtit: “Chuhuaꞌj o lakalī naꞌaꞌnāuj nac lakatīn xcānsipej. Lāꞌ aꞌntzaꞌ natachokoyāuj lakatin cāꞌta. Lāꞌ natamāhuanaꞌnāuj lāꞌ nastāꞌnanāuj. Lāꞌ natlajayāuj lhūhuaꞌ tumīn”.
\v 14 Huāꞌmāꞌ iccāhuaniyāniꞌ: Huiꞌxinaꞌn tūꞌ caꞌtzīyāꞌtit palh nalatāꞌkchokoyāꞌtit lakalī. Quinaꞌn huaꞌchi jintaꞌlh como huan jintaꞌlh chuhuaꞌj tasuꞌyu lāꞌ ixlīꞌāꞌkaꞌtlāꞌtus laksputpala.
\v 15 Chuntzaꞌ ixuantit: “Palh Dios lacasquiꞌn que quinaꞌn natahuiꞌlāyāuj āꞌmacstiꞌnaꞌj, ūꞌtzaꞌ huāꞌmāꞌ natlahuayāuj”.
\v 16 Lāꞌ huiꞌxinaꞌn, tūꞌ kalhasquiꞌnīꞌyāꞌtit Dios tuchū ixtapuhuān. Xmān tlahuaꞌyāꞌtit aꞌntūn tlahuacuꞌtunāꞌtit. Huiꞌxinaꞌn lej kaꞌtlaꞌjcaꞌtzīꞌyāꞌtit. Lāꞌ tūꞌ līmakuan chuntzaꞌ tlahuaꞌyāꞌtit.
\v 17 Palh kalhatin caꞌtzī que tzē natlahua catūhuā aꞌntū līmakuan, lāꞌ palh tūꞌ tlahua huāꞌmāꞌ, chuntzaꞌ xlaꞌ kaꞌlhī ixtalaclēꞌiꞌ.
\c 5
\s Aꞌntū nacāpātleꞌkeniꞌ huan ricosnuꞌ
\p
\v 1 Lāꞌ chuhuaꞌj naꞌiccāhuaniyāniꞌ huiꞌxinaꞌn macstiꞌnaꞌj ixpālacata huan ricosnuꞌ. Catatzuculh tacalhuan lāꞌ catalakaputzalh huan ricosnuꞌ como lej natapātīniꞌn. 
\v 2 Huan ixtumīncaꞌn huaꞌchilh xamasniꞌ. Lāꞌ huan ixluꞌxuꞌcaꞌn huāk huaꞌchilh xatahuāꞌlaniꞌ.
\v 3 Lāꞌ ixorocaꞌn lāꞌ ixplatacaꞌn huaꞌchilh huāk xaskoꞌluniꞌ. Xaskoꞌluniꞌ como xlacaꞌn lactampiꞌlhniꞌ lāꞌ tūꞌ tamaktāyacuꞌtun āꞌmakapitzīn. Xlacaꞌn lej tamākēxtiminīꞌt lhūhuaꞌ tumīn lāꞌ pajtzutzaꞌ huan chiꞌchiniꞌ aꞌxniꞌcaꞌ natapātīniꞌn nac pūpātīn.
\v 4 Xlacaꞌn tūꞌ tamāpalanīꞌt aꞌntīn tatāꞌscujli na ixāꞌtacuxtucaꞌn. Pero Dios lacahuānaꞌhuīꞌ. Lāꞌ xlaꞌ ūꞌtzaꞌ aꞌntī māpaꞌksīniꞌnkōꞌ ixlīhuāk nac aꞌkapūn lāꞌ ixlīhuāk nac cāꞌquilhtamacuj. Xlaꞌ cālaktzīꞌmāꞌ aꞌnchī taꞌaꞌkxoko huan ixtasācuaꞌcan por tūꞌ natamāpala. 
\v 5 Huāꞌtzāꞌ nac quilhtamacuj huan ricosnuꞌ takaꞌlhī ixlīhuāk. Lāꞌ lej līpāxūj talīlatlāꞌhuan. Xlacaꞌn huaꞌchi lakatin paꞌxniꞌ aꞌntū makakoꞌntīcan lāꞌ namaknīcan.
\v 6 Lāꞌ huan ricosnuꞌ tamālacapūꞌ huan chiꞌxcuhuīꞌn aꞌntī xalacuan. Lāꞌ ūꞌtzaꞌ cālīmaknīca. Lāꞌ xlacaꞌn tūꞌ tatamaktāyalh.
\s Tasquiꞌnī nakaꞌlhīyāuj hasta que namimpala Jesucristo 
\p
\v 7 Lāꞌ chuhuaꞌj huiꞌxinaꞌn, tāꞌtimīn, līlacatzucu cakaꞌlhīꞌtit hasta aꞌxniꞌcaꞌ namin huan Māpāꞌksīniꞌ Jesucristo. Kalhatin chiꞌxcuꞌ aꞌntīn tlahua ixtacuxtu, xlaꞌ kaꞌlhī hasta que lhā nalanaꞌn. Xlaꞌ kaꞌlhī hasta nala xcān pūꞌla lāꞌ āꞌcalīstān huampala.
\v 8 Huiꞌxinaꞌn nā lacatzucu cakaꞌlhīꞌtit. Tūꞌ calakachipinīꞌtit. Palaj namimpala huan Māpaꞌksīniꞌ.
\v 9 Tūꞌ calālīyāhuaꞌtit. Palh chuntzaꞌ tlahuaꞌyāꞌtit Cristo nacājuzgarlīyāniꞌ. Xlaꞌ ūꞌtzaꞌ Juez. Lāꞌ palaj namimpala.
\v 10 Capāstactit huiꞌxinaꞌn aꞌnchī tapātīniꞌlh makāntzaꞌ ixaꞌctaꞌsanaꞌnīꞌn Dios. Lāꞌ tatāyaniꞌlh. Huiꞌxinaꞌn chu lakatin nalaꞌyāꞌtit.
\v 11 Huanāuj que lej ixtapāxuhua xlacaꞌn aꞌntīn tatāyaniꞌlh. Caꞌtzīyāꞌtittzaꞌ aꞌnchī lītāyaniꞌlh Job. Lāꞌ āꞌcalīstān Dios maxquīꞌlh lhūhuaꞌ, como lakalhuꞌmalh.
\p
\v 12 Lāꞌ chuhuaꞌj naꞌiccāhuaniyāniꞌ aꞌntū lej tasquiꞌnī. Tūꞌ tihuaꞌnāꞌtit “por Dios”. Aꞌxniꞌcaꞌ nahuaꞌnāꞌtit “stuꞌncuaꞌ”, xmān “stuꞌncuaꞌ” nahuaꞌnāꞌtit. Lāꞌ aꞌxniꞌcaꞌ nahuaꞌnāꞌtit “tūꞌ stuꞌncuaꞌ”, xmān “tūꞌ stuꞌncuaꞌ” nahuaꞌnāꞌtit. Palh tūꞌ chuntzaꞌ natlahuaꞌyāꞌtit, Dios nacāmāpātīnīyāniꞌ. 
\p
\v 13 Aꞌxniꞌcaꞌ nacāpātleꞌkeniꞌyāniꞌ catūhuā cakalhtōꞌkaꞌtit huiꞌxinaꞌn. Aꞌxniꞌcaꞌ līpāxūj lahuiꞌlānaꞌntit, catlīꞌtit aꞌntū nalīpāxuhua Dios.
\v 14 Aꞌxniꞌcaꞌ īꞌtzaꞌcaꞌnāꞌtit, cacāmātaꞌsīꞌtit huan xanapuxcuꞌnuꞌ aꞌntī xalanīꞌn nac lītokpān. Lāꞌ xlacaꞌn natamin lāꞌ natalīkalhtōꞌkaꞌ lāꞌ natalītlahua aceite huan īꞌtzaꞌcaꞌ por ixtacuīniꞌ huan Māpaꞌksīniꞌ Jesucristo.
\v 15 Palh xlacaꞌn natakalhtōꞌkaꞌ lāꞌ natakalhlakaꞌīꞌ que natzeyan, Dios namātzeyī. Lāꞌ palh xlaꞌ tlahuanīꞌt aꞌntūn tūꞌ līmakuan, Dios namāsputūnuꞌniꞌ.
\v 16 Calāhuaniꞌtit huiꞌxinaꞌn palh tūla makxtekāꞌtit catūhuā aꞌntūn tūꞌ tzey. Lāꞌ chuntzaꞌ nalālīkalhtōꞌkaꞌyāꞌtit. Lāꞌ Dios nacātamātzeyīyāniꞌ huiꞌxinaꞌn aꞌntī īꞌtzaꞌcaꞌnāꞌtit. Dios tlahua con ixlīmāpaꞌksīn aꞌntū squiꞌniꞌ kalhatin chiꞌxcuꞌ aꞌntīn tzey.
\v 17 Dios maxquīꞌlh aꞌntū squiꞌniꞌlh Elías aꞌntī ixaꞌctaꞌsanaꞌ Dios. Xlaꞌ kalhatin chiꞌxcuꞌ huaꞌchi quinaꞌn ixuanīꞌt. Lāꞌ xlaꞌ lej squiꞌniꞌlh Dios tūꞌ calalh xcān. Lāꞌ lakatuꞌtun cāꞌta āꞌiꞌtāt tūꞌ lalh xcān.
\v 18 Lāꞌ squiꞌniꞌpā āꞌmaktin Dios palh ixlapā xcān. Lāꞌ chuntzaꞌ lalh xcān. Lāꞌ chuntzaꞌ lanaꞌlh nac cāꞌtiyaꞌtnaꞌ. 
\p
\v 19 Tāꞌtimīn, palh kalhatin de huiꞌxinaꞌn tatonkopū lāꞌ palh āꞌkalhatin namaktāya para natlāꞌhuampala na ixtej Dios,
\v 20 cascaꞌttit que aꞌntī maktāya āꞌkalhatin para natlāꞌhuampala na ixtej Dios, chuntzaꞌ namāpūtaxtū āꞌkalhatin de huan līnīn lāꞌ chuntzaꞌ namāsputūnuꞌniꞌcan ixtalaclēꞌiꞌ.