\id 1PE
\h 1 PEDRO
\toc1 1 PEDRO
\mt Huan Xapūꞌla Carta aꞌntūn Tzoꞌkli San Pedro
\c 1
\s Pedro cātzoꞌknuniꞌlh aꞌntī ixtakalhlakaꞌīꞌ
\p
\v 1 Quit Pedro, ixapóstol Jesucristo. Quit ictzoꞌka huāꞌmāꞌ carta. Iccātzoꞌknuniꞌmāꞌniꞌ huiꞌxinaꞌn aꞌntī ixtachiꞌxcuhuīꞌt Dios aꞌntīn cātamāꞌaꞌkahuanīniꞌ lā latlāꞌhuaꞌnāꞌtit huaꞌchi makatiyātīꞌn nac cāꞌxcānsipejniꞌ aꞌnlhā huanican Ponto lāꞌ Galacia lāꞌ Capadocia lāꞌ Asia lāꞌ Bitinia.
\v 2 Dios quinTātaꞌcaꞌn cālacsacnīꞌtaꞌniꞌ makāntzaꞌ chu aꞌnchī puhualh. Lāꞌ xlaꞌ puhualh que huan Espíritu Santo lactzey nacātlahuayāniꞌ. Lāꞌ xlaꞌ lacasquiꞌlh que huiꞌxinaꞌn naꞌaꞌkahuānaꞌniꞌyāꞌtit Jesucristo. Lāꞌ lacasquiꞌlh que ixkaꞌlhniꞌ Jesucristo nacāxapaniꞌyāniꞌ ixlīhuāk mintalaclēꞌiꞌcaꞌn. Dios lej cacāsicuaꞌlanālīniꞌ lāꞌ cacāmātzaꞌlaꞌnkēꞌniꞌn miꞌaꞌclhcunuccaꞌn.
\s Caꞌtzīyāuj que Dios naquincāsicuaꞌlanālīyāniꞌ 
\p
\v 3 Namaxquīꞌyāuj pāxcatcaꞌtzī Dios. Xlaꞌ ūꞌtzaꞌ ixTātaꞌ quiMāpaꞌksīniꞌcaꞌn Jesucristo. Lāꞌ como Dios mālakahuanīchokolh Jesucristo, nā chuntzaꞌ quincāmaxquīꞌniꞌ xasāstiꞌ quinquilhtamacujcaꞌn. Lāꞌ chuhuaꞌj caꞌtzīyāuj que xlaꞌ naquincāmaxquīꞌyāniꞌ āꞌchulāꞌ.
\v 4 Aꞌntū Dios naquincāmaxquīꞌyāniꞌ, xlaꞌ māquīꞌcanīꞌt nac aꞌkapūn. Aꞌntzaꞌ tuntūꞌ catipātleꞌkeniꞌlh. Tūꞌ huaꞌchi catūhuā aꞌntū masa lāꞌ aꞌntū lakuan lāꞌ aꞌntū xneka.
\v 5 Lāꞌ como huiꞌxinaꞌn līpāhuaꞌnāꞌtit Dios, xlaꞌ cāmaktakaꞌlhāniꞌ como xlaꞌ kaꞌlhī līmāpaꞌksīn. Xlaꞌ nacāmaktakaꞌlhāniꞌ hasta āꞌxmān huan chiꞌchiniꞌ. Lāꞌ huan āꞌxmān chiꞌchiniꞌ natasuꞌyukōꞌ ixlīhuāk aꞌntū Dios nacāmaxquīꞌyāniꞌ aꞌxniꞌcaꞌ naquincāmāpūtaxtūkōꞌyāniꞌ.
\p
\v 6 Uꞌtzaꞌ huiꞌxinaꞌn līpāxuhuaꞌyāꞌtit aꞌyuj tūꞌ lej makān lakaputzayāꞌtit como lej pātīpāꞌnaꞌntit lhūhuaꞌ catūhuā.
\v 7 Lāꞌ como huiꞌxinaꞌn līlacatzucu pātīyāꞌtit aꞌntū pātīpāꞌnaꞌntit, chuntzaꞌ tasuꞌyu palh lej stuꞌncuaꞌ kalhlakaꞌīꞌyāꞌtit. Huan oro māchiꞌchīcan para namaklhtīcan aꞌntūn tūꞌ tzey. Lāꞌ chuntzaꞌ tachoko huāk oro. Lāꞌ nā chuntzaꞌ huiꞌxinaꞌn. Aꞌxniꞌcaꞌ pātīniꞌnāꞌtit huiꞌxinaꞌn namakxtekāꞌtit aꞌntūn tūꞌ tzey. Lāꞌ chuntzaꞌ más lacuan nalaꞌyāꞌtit. Huan oro lej tapala aꞌyuj tzē mālakuanīcan. Lāꞌ más xatapala na ixlacapūn Dios palh huiꞌxinaꞌn xaꞌnca kalhlakaꞌīꞌyāꞌtit. Lāꞌ palh xaꞌnca kalhlakaꞌīꞌyāꞌtit aꞌyuj pātīniꞌnāꞌtit, chuntzaꞌ nacātamākaꞌtlīꞌyāniꞌ lāꞌ nacātaꞌaꞌcnīniꞌniꞌyāniꞌ aꞌxniꞌcaꞌ Jesucristo namimpala.
\p
\v 8 Huiꞌxinaꞌn pāxquīꞌyāꞌtit Jesucristo aꞌyuj tūꞌ laktzīꞌnīꞌtaꞌntit. Huiꞌxinaꞌn kalhlakaꞌīꞌyāꞌtit aꞌyuj chuhuaꞌj tūꞌ laktzīꞌnāꞌtit. Lāꞌ ūꞌtzaꞌ lej līpāxuhuaꞌyāꞌtit. Lāꞌ lej lhūhuaꞌ mintapāxuhuāncaꞌn que tūla xaꞌnca huaꞌnāꞌtit aꞌnchī līpāxuhuaꞌyāꞌtit.
\v 9 Pāxuhuaꞌyāꞌtit como pūtaxtunīꞌtaꞌntittzaꞌ como līpāhuaꞌnāꞌtit Jesucristo.
\p
\v 10 Huan aꞌctaꞌsanaꞌnīꞌn xalaꞌnīꞌn makān xapūꞌla ixtahuan aꞌnchī ixquincālīsicuaꞌlanālīniꞌ Dios. Lāꞌ xlacaꞌn lej ixtaputza aꞌnchī natalīcaꞌtzī aꞌnchī līpūtaxtucan como ixtacaꞌtzīcuꞌtunkōꞌ.
\v 11 Huan Espíritu Santo cāmācaꞌtzīnīlh palh Cristo ixpātīniꞌlh lāꞌ āꞌcalīstān ixaꞌcnīniꞌniꞌca. Lāꞌ xlacaꞌn ixtacaꞌtzīcuꞌtun lhānīn ixpātleꞌkelh huāꞌmāꞌ lāꞌ ixlīhuāk ixpālacata huāꞌmāꞌ.
\v 12 Dios cāmācaꞌtzīnīlh que huāꞌmāꞌ tūꞌ ixpātleꞌkelh līhuan xlacaꞌn ixtalahuiꞌlānaꞌcus. Lāꞌ chuhuaꞌj pātleꞌkemāꞌ līhuan lahuiꞌlānaꞌuj quinaꞌn. Huāꞌmāꞌ ūꞌtzaꞌ aꞌntū cātahuaniniꞌ xlacaꞌn aꞌntī cātamāsuꞌniꞌniꞌ huan xatzey tachihuīn ixpālacata Jesucristo. Xlacaꞌn ixcātamāsuꞌniꞌyāniꞌ huiꞌxinaꞌn por ixlīmāpaꞌksīn huan Espíritu Santo aꞌntī macamincanchaꞌ nac aꞌkapūn. Lāꞌ ixlīhuāk huāꞌmāꞌ huan ángeles tamāchekxīcuꞌtun.
\s Dios lacasquiꞌn que xaꞌnca nalatāꞌkchokoyāuj
\p
\v 13 Capāstactit huāꞌ tamāꞌna lāꞌ skalalh catahuiꞌlaꞌtit. Lāꞌ xaꞌnca capāstactit. Capāstactāꞌkchokotit aꞌnchī Dios nacālīsicuaꞌlanālīyāniꞌ aꞌxniꞌcaꞌ namin Jesucristo. 
\v 14 Caꞌaꞌkahuāꞌnaꞌniꞌtit Dios como huiꞌxinaꞌn ixcamanaꞌ. Tūꞌtzaꞌ calatāꞌkchokotit aꞌnchī ixlatlāꞌhuaꞌnāꞌtit aꞌxniꞌcaꞌ tūnaꞌj ixcaꞌtzīyāꞌtit ixtachihuīn Dios lāꞌ aꞌxniꞌcaꞌ ixlatlāꞌhuaꞌnāꞌtit chu aꞌnchī xakoꞌhuaꞌjuaꞌ mintapāstacnaꞌcaꞌn.
\v 15 Lactzey calakōꞌtit huiꞌxinaꞌn pōꞌktu. Lāꞌ capāstactit que Dios cāmātaꞌsīniꞌ para nalaꞌyāꞌtit ixtachiꞌxcuhuīꞌt. Xlaꞌ pōꞌktu tzey. Uꞌtzaꞌ pōꞌktu līlacatejtin nalīlatahuiꞌlaꞌyāꞌtit chu aꞌnchī tasquiꞌnī natalatahuiꞌla ixcamanaꞌ Dios. 
\v 16 Tatzoꞌkniꞌ na ixtachihuīn Dios aꞌnlhā huan Dios: “Lactzey calaꞌtit huiꞌxinaꞌn, como quit tzey”.
\p
\v 17 Lāꞌ huiꞌxinaꞌn aꞌxniꞌcaꞌ kalhtōꞌkaꞌniꞌyāꞌtit Dios, chuntzaꞌ nahuaꞌnāꞌtit: “Dios quinTātaꞌcaꞌn”. Uꞌtzaꞌ aꞌntī quincālaktzīꞌnāniꞌ chu lakatin. Lāꞌ xlaꞌ nacāmāpala chāꞌtunuꞌ chu aꞌnchī talatāꞌkchokonīꞌt. Lāꞌ ūꞌtzaꞌ nalījicuaꞌniꞌyāꞌtit Dios līhuan latlāꞌhuaꞌnāꞌtitcus nac huāꞌmāꞌ quilhtamacuj.
\v 18 Xapūꞌla huiꞌxinaꞌn ixlatlāꞌhuaꞌnāꞌtit huaꞌchi ixtalatlāꞌhuan minapapnaꞌcaꞌn. Lāꞌ tuntūꞌ ixtapalh aꞌnchī ixlatlāꞌhuaꞌnāꞌtit xapūꞌla. Dios cāmāpūtaxtūniꞌ de ixlīhuāk huāꞌmāꞌ. Aꞌntū xlaꞌ māpalalh para naquincāmāpūtaxtūyāniꞌ, huāꞌmāꞌ tūꞌ huaꞌchi oro lāꞌ tūꞌ huaꞌchi plata aꞌntū maclacasquiꞌncan xmān nac huāꞌmāꞌ quilhtamacuj. Huiꞌxinaꞌn caꞌtzīyāꞌtit huāꞌmāꞌ.
\v 19 Līmāpalalh con huan ixkaꞌlhniꞌ Cristo aꞌxniꞌcaꞌ nīlh. Lāꞌ ixkaꞌlhniꞌ Cristo lej tapala. Cristo huaꞌchi lakatin borrego ixuanīꞌt aꞌntū lej xatzey lāꞌ tūꞌ aꞌchīꞌ ixuanīꞌt lāꞌ aꞌntū maknīcan para namālacnūniꞌcan Dios.
\v 20 Aꞌxniꞌcaꞌ tūnaꞌj ixtlahuacan huan quilhtamacuj, Dios puhualh que Cristo tasquiꞌnī nanī para naquincāmāpūtaxtūyāniꞌ. Lāꞌ chuhuaꞌj, huāꞌ tamāꞌna chiꞌchiniꞌ, Cristo nīnīꞌttzaꞌ para quinaꞌn.
\v 21 Por ixpālacata Jesucristo, huiꞌxinaꞌn līpāhuaꞌnāꞌtit Dios, como Dios mālakahuanīchokolh Jesucristo lāꞌ līmāꞌcaꞌlh para naꞌaꞌcnīniꞌniꞌcan. Lāꞌ chuntzaꞌ huiꞌxinaꞌn līpāhuaꞌnāꞌtit Dios lāꞌ kaꞌlhīpāꞌnaꞌntit lakatin chiꞌchiniꞌ aꞌxniꞌcaꞌ nacāsicuaꞌlanālīkōꞌyāniꞌ.
\p
\v 22 Huiꞌxinaꞌn aꞌkahuānaꞌniꞌnīꞌtaꞌntit huan tachihuīn aꞌntū lej xastuꞌncuaꞌ. Lāꞌ ūꞌtzaꞌ huiꞌxinaꞌn lactzeytzaꞌ līlaꞌtit. Lāꞌ chuhuaꞌj lej ixlīstuꞌncuaꞌ cāpāxquīꞌyāꞌtit aꞌntīn takalhlakaꞌīꞌ. Chuhuaꞌj xaꞌnca calāpāxquīꞌtit con ixlīhuāk miꞌaꞌclhcunuccaꞌn.
\v 23 Huiꞌxinaꞌn kaꞌlhīꞌyāꞌtittzaꞌ xasāstiꞌ minquilhtamacujcaꞌn como kalhlakaꞌīꞌnīꞌtaꞌntit ixtachihuīn Dios aꞌntūn tūꞌ maktin catisputli. Lāꞌ chuntzaꞌ huan xasāstiꞌ minquilhtamacujcaꞌn tūꞌ maktin catisputli. Nala para pōꞌktu.
\v 24 Chuntzaꞌ huan na ixtachihuīn Dios aꞌnlhān tatzoꞌkniꞌ huāꞌmāꞌ:
\q Ixlīhuākcaꞌn huan tachiꞌxcuhuīꞌt xlacaꞌn huaꞌchi huan chiꞌtin.
\q Lāꞌ ixlīhuāk aꞌntū tzēhuanīꞌt aꞌntūn takaꞌlhī huan tachiꞌxcuhuīꞌt, ūꞌtzaꞌ huaꞌchi huan xaxaꞌnat chiꞌtin.
\q Huan chiꞌtin scōhuan lāꞌ yuja huan xaxaꞌnat.
\q
\v 25 Ixtachihuīn Dios tūꞌ chuntzaꞌ; huāꞌmāꞌ tūꞌ maktin catisputli.
\m Lāꞌ ixtachihuīn Dios, chu ūꞌtzaꞌ huaꞌchi huan xatzey tachihuīn aꞌntū cātamāsuꞌniꞌnīꞌtaꞌniꞌ huiꞌxinaꞌn. 

\c 2
\p
\v 1 Lāꞌ ūꞌtzaꞌ calīmakxtektit ixlīhuāk aꞌntūn tūꞌ tzey. Tūꞌtzaꞌ caꞌaꞌkxokonuꞌntit. Tūꞌ calaꞌtit huaꞌchi xlacaꞌn aꞌntīn tatasuꞌyu que lactzey lāꞌ xmān taꞌakxokonuꞌn como xlacaꞌn tūꞌ lactzey. Tūꞌtzaꞌ calātampiꞌlhīniꞌniꞌtit. Tūꞌtzaꞌ cacālīchihuīnaꞌntit āꞌmakapitzīn.
\v 2 Huan lakskaꞌtāꞌn pōꞌktu tahuaꞌcutun ixlechecaꞌn. Lāꞌ chuntzaꞌ talīstaca. Lāꞌ huiꞌxinaꞌn nā chuntzaꞌ tasquiꞌnī nacaꞌtzīcuꞌtunāꞌtit ixtachihuīn Dios aꞌntū huaꞌchi ixlīhuaꞌt milīcaꞌtzīncaꞌn. Lāꞌ chuntzaꞌ āꞌchulāꞌ nakalhlakaꞌīꞌyāꞌtit,
\v 3 como huiꞌxinaꞌn caꞌtzīyāꞌtittzaꞌ palh Dios lej pāxquīꞌnin. 
\s Cristo huaꞌchi lakatin chihuix aꞌntū Dios lacsacli 
\p
\v 4 Pōꞌktu catāꞌlatāꞌkchokotit Jesucristo. Uꞌtzaꞌ aꞌntī quincāmaxquīꞌyāniꞌ quinquilhtamacujcaꞌn. Lāꞌ xlaꞌ huaꞌchi huan xapūꞌlh chihuix aꞌntū māꞌcnūcan para xacimiento de ixchic Dios. Dios lacsacli como laktzīꞌlh huaꞌchi lakatin chihuix aꞌntū lej ixtapalh aꞌyuj huan tachiꞌxcuhuīꞌt ixtapuhuan palh tuntūꞌ ixtapalh ixuanīꞌt. 
\v 5 Huiꞌxinaꞌn huaꞌchi lakatin lītokpān aꞌntūn tūꞌ tlahuacanīꞌt huaꞌchi xalaꞌ nac quilhtamacuj. Huiꞌxinaꞌn huaꞌchi chihuixniꞌ nac huāꞌmāꞌ lītokpān aꞌntū Dios tlahuamāꞌ. Lāꞌ huiꞌxinaꞌn huaꞌchi sacerdotes lanīꞌtaꞌntit como kalhlakaꞌīꞌyāꞌtit Jesucristo lāꞌ chuntzaꞌ tāꞌscujāꞌtit Dios. Lāꞌ huaꞌchilh ixmālacnūniꞌtit lēꞌksajnaꞌ huan Dios como aꞌkahuānaꞌniꞌpāꞌnaꞌntit xlaꞌ. Lāꞌ chuntzaꞌ līpāxuhua Dios.
\v 6 Tatzoꞌkniꞌ na ixtachihuīn Dios:
\q Quit iclacsacli lakatin chihuix aꞌntū lej ixtapalh. 
\q Lāꞌ chuhuaꞌj quit icuiꞌlī kalhatin aꞌntī huaꞌchi lakatin chihuix xalaꞌ aꞌkatzāstūn aꞌnlhā nayāhuacan templo nac Sión.
\q Lāꞌ xlacaꞌn aꞌntīn talīpāhuan xlaꞌ, tūꞌ chu tlakaj catitalīpāhuanli.
\m
\v 7 Lāꞌ huāꞌmāꞌ chihuix huanicuꞌtun Cristo. Lāꞌ como huiꞌxinaꞌn kalhlakaꞌīꞌnīꞌtaꞌntittzaꞌ lāꞌ ūꞌtzaꞌ līcaꞌtzīyāꞌtit que Cristo lej ixtapalh. Lāꞌ aꞌntīn tūꞌ takalhlakaꞌīꞌcuꞌtun, xlacaꞌn cālīchihuīnaꞌn ixtachihuīn Dios aꞌnlhā tatzoꞌkniꞌ huāꞌmāꞌ:
\q Huan chihuix aꞌntū talakmakaꞌlh huan xakanaꞌnīꞌn, huāꞌmāꞌ chihuix ūꞌtzaꞌ lalh aꞌntū más tasquiꞌnī. 
\m
\v 8 Lāꞌ nā tatzoꞌkniꞌ na ixtachihuīn Dios:
\q Huāꞌmāꞌ chihuix nacāmāꞌaꞌkcheꞌkxlanī huan tachiꞌxcuhuīꞌt; huāꞌmāꞌ chihuix nacāmāmakōsī.
\m Xlacaꞌn taꞌaꞌkcheꞌkxla como tūꞌ takalhlakaꞌīꞌcuꞌtun huan aꞌntī Dios macamilh para nacāmāpūtaxtūcan. Dios xapūꞌla ixcaꞌtzī aꞌntū nacāpātleꞌkeniꞌ aꞌntīn tūꞌ takalhlakaꞌīꞌ ixtachihuīn Dios.
\s Quinaꞌn ixtachiꞌxcuhuīꞌt Dios
\p
\v 9 Pero huiꞌxinaꞌn tūꞌ huaꞌchi xlacaꞌn. Huiꞌxinaꞌn lakatin tachiꞌxcuhuīꞌt aꞌntū cālacsacnīꞌt Dios para natala huaꞌchi xlaꞌ. Lāꞌ nā huiꞌxinaꞌn ixsacerdotes quiMāpaꞌksīniꞌcaꞌn Dios. Lāꞌ nā huiꞌxinaꞌn tāꞌtapaꞌksīyāꞌtit Dios. Lāꞌ nā huiꞌxinaꞌn ixtachiꞌxcuhuīꞌt Dios. Lāꞌ Dios lacasquiꞌn que huiꞌxinaꞌn nacāmācaꞌtzīnīyāꞌtit āꞌmakapitzīn huan lēꞌcnīn aꞌntū xlaꞌ tlahuanīꞌt. Dios ūꞌtzaꞌ aꞌntī cātaꞌsaniꞌnīꞌtaꞌni lāꞌ cāmāxtunīꞌtaꞌniꞌ aꞌnlhā cāꞌpucsua lāꞌ cālīminīꞌtaꞌniꞌ aꞌnlhā tzēhuanīꞌt xkaka.
\v 10 Xapūꞌla huiꞌxinaꞌn tūꞌ ixtachiꞌxcuhuīꞌt Dios ixuanīꞌtaꞌntit. Lāꞌ chuhuaꞌj huiꞌxinaꞌn ixtachiꞌxcuhuīꞌttzaꞌ Dios. Xapūꞌla tūꞌ ixcaꞌtzīyāꞌtit palh Dios lakalhuꞌmanīniꞌn. Lāꞌ chuhuaꞌj caꞌtzīyāꞌtittzaꞌ, como Dios cālakalhuꞌmanīꞌtaꞌniꞌtzaꞌ. 
\s Tasquiꞌnī naꞌaꞌkahuānaꞌniꞌyāuj Dios lāꞌ huan pūchihuīnaꞌnīꞌn 
\p
\v 11 Huiꞌxinaꞌn tlāꞌhuaꞌnāꞌtit huaꞌchi makatiyātīꞌn nac huāꞌmāꞌ quilhtamacuj, como tapaꞌksīyāꞌtit nac aꞌkapūn. Chuhuaꞌj iccāsquiꞌniꞌyāniꞌ que tūꞌ titlahuaꞌyāꞌtit xakoꞌhuaꞌjuaꞌ mintapāstacnaꞌcaꞌn. Camakxtektit huāꞌ tamāꞌna tapāstacnaꞌ aꞌntū nalactlahua aꞌnchī kalhlakaꞌīꞌyāꞌtit Cristo.
\v 12 Xaꞌnca calatāꞌkchokotit na ixlacapūncaꞌn aꞌntīn tūꞌ takalhlakaꞌīꞌ. Lāꞌ chuntzaꞌ, aꞌyuj cacātalēꞌksaꞌnīniꞌniꞌ palh tlahuaꞌyāꞌtit catūhuā aꞌntūn tūꞌ tzey, xlacaꞌn natacaꞌtzī palh tūꞌ stuꞌncuaꞌ. Lāꞌ natalaktzīꞌn que huiꞌxinaꞌn tlahuaꞌyāꞌtit aꞌntūn tzey. Lāꞌ chuntzaꞌ xlacaꞌn natamākaꞌtlīꞌ Dios aꞌxniꞌcaꞌ xlaꞌ najuzgarlī. 
\p
\v 13 Cacāꞌaꞌkahuānaꞌniꞌtit ixlīhuākcaꞌn huan pūchihuīnaꞌnīꞌn como chuntzaꞌ Dios lacasquiꞌn. Caꞌaꞌkahuānaꞌniꞌtit huan xamāpaꞌksīniꞌ xcānsipejniꞌ.
\v 14 Lāꞌ cacāꞌaꞌkahuānaꞌniꞌtit huan gobernadores. Lāꞌ xlacaꞌn cāhuiꞌlīcanīꞌt para natamāpātīnī aꞌntīn tatlahua aꞌntūn tūꞌ tzey. Lāꞌ nā cāhuiꞌlīcanīꞌt para que xlacaꞌn natamākaꞌtlīꞌ aꞌntīn tatlahua aꞌntūn tzey.
\v 15 Chuntzaꞌ huāꞌmāꞌ ixtapuhuān Dios. Xlaꞌ lacasquiꞌn que huiꞌxinaꞌn līlacatejtin nalatāꞌkchokoyāꞌtit. Lāꞌ chuntzaꞌ tūlalh catitahualh catūhuā huan chiꞌxcuhuīꞌn aꞌntīn tūꞌ xaꞌnca tapāstacnaꞌn lāꞌ tūꞌ tamāchekxī ixtachihuīn Dios.
\p
\v 16 Huiꞌxinaꞌn libres lāꞌ tūꞌ tasquiꞌnī natlōkentaxtūyāꞌtit ixley Moisés. Lāꞌ aꞌyuj libres huiꞌxinaꞌn tūꞌ capuhuaꞌntit que tzē natlahuaꞌyāꞌtit aꞌntūn tūꞌ līmakuan. Catlahuaꞌtit aꞌntū Dios māpaꞌksīniꞌn.
\v 17 Cacāꞌaꞌcnīniꞌniꞌtit ixlīhuākcaꞌn tachiꞌxcuhuīꞌt. Lāꞌ cacāpāxquīꞌtit huan tāꞌtimīn. Lāꞌ cajicuaꞌniꞌtit Dios. Lāꞌ caꞌaꞌcnīniꞌniꞌtit aꞌntī līhuaꞌcaꞌ kaꞌlhī līmāpaꞌksīn nac país.
\s Cristo pātīniꞌlh lāꞌ nā līmakuan que napātīniꞌnāuj nā quinaꞌn
\p
\v 18 Huiꞌxinaꞌn aꞌntīn tasācuaꞌnīꞌn lāꞌ nā huiꞌxinaꞌn puscan aꞌntīn tamaksquiti, nacāꞌaꞌkahuānaꞌniꞌyāꞌtit aꞌntīn cātamāpaꞌksīyāniꞌ. Nacāꞌaꞌkahuānaꞌniꞌyāꞌtit palh tapāxquīꞌnin lāꞌ talakalhuꞌmanīniꞌn lāꞌ nā palh tacaꞌtzancaꞌtzī.
\v 19 Palh pātīniꞌnāꞌtit aꞌyuj tūꞌ tlahuanīꞌtaꞌntit nīn tuntūꞌ, lāꞌ palh līlacatzucu pātīyāꞌtit como tlahuacuꞌtunāꞌtit ixtapuhuān Dios, chuntzaꞌ Dios nacāsicuaꞌlanālīyāniꞌ.
\v 20 Pero palh tlahuaꞌyāꞌtit aꞌntūn tūꞌ tzey, lāꞌ ūꞌtzaꞌ cātalītucsāniꞌ, lāꞌ aꞌyuj pātīyāꞌtit, huāꞌmāꞌ tuntūꞌ ixtapalh na ixlacapūn Dios como ūꞌtzaꞌ xmān aꞌntū cātaminīꞌniꞌyāniꞌ. Pero palh pātīyāꞌtit aꞌnchī cātatucsāniꞌ aꞌyuj tlahuanīꞌtaꞌntit xmān aꞌntūn tzey, chuntzaꞌ Dios nacāsicuaꞌlanālīyāniꞌ. 
\v 21 Aꞌntīn cālacsacnīꞌt Dios, xlacaꞌn kaꞌlhī natapātīniꞌn. Cristo māniꞌ ūꞌtzaꞌ pātīniꞌlh por quimpālacatacaꞌn. Lāꞌ quincāmāsuꞌniꞌniꞌ aꞌnchī nalīmakscaꞌtāuj xlaꞌ. 
\v 22 Lāꞌ Cristo nīn tuntūꞌ tlahualh aꞌntūn tūꞌ tzey. Tūꞌ maktin kaxmatca nahuan aꞌntūn tūꞌ stuꞌncuaꞌ. 
\v 23 Xlaꞌ tūꞌ ixcālakapala aꞌntī ixtalakapala xlaꞌ. Tūꞌ maktin hualh que natapalānaꞌniꞌ de xlacaꞌn aꞌntīn tamāpātīnīlh. Cristo ixcaꞌtzī que xlacaꞌn natamāpala con Dios. Lāꞌ Dios juzgarlī chu aꞌnchī tasquiꞌnī. 
\v 24 Cristo māniꞌ ūꞌtzaꞌ māpalalh por quintalaclēꞌiꞌcaꞌn aꞌxniꞌcaꞌ nīlh nac cruz. Xlaꞌ lacasquiꞌlh que namakxtekāuj huan talaclēꞌiꞌ, lāꞌ natlahuatāꞌkchokoyāuj ixtapuhuān Dios. Lāꞌ como Cristo pātīniꞌlh por quinaꞌn, chuntzaꞌ līxapalh quintalaclēꞌiꞌcaꞌn.
\v 25 Xapūꞌla huiꞌxinaꞌn ixlatlāꞌhuaꞌnāꞌtit huaꞌchi borregos aꞌntū ixtatzaꞌnkānīꞌt. Lāꞌ chuhuaꞌj taspiꞌtchokonīꞌtaꞌntit. Laktaꞌnīꞌtaꞌntit Jesucristo. Lāꞌ xlaꞌ nacāmaktakaꞌlhāniꞌ huiꞌxinaꞌn.
\c 3
\s Aꞌnchī tasquiꞌnī natalatāꞌkchoko xlacaꞌn aꞌntīn tatapūchahualhtzaꞌ
\p
\v 1 Lāꞌ nā huiꞌxinaꞌn puscan, caꞌaꞌkahuānaꞌniꞌtit minkōluꞌcaꞌn. Lāꞌ chuntzaꞌ palh āꞌmakapitzīn minkōluꞌcaꞌn tūꞌ takalhlakaꞌīꞌ ixtachihuīn Dios, xlacaꞌn natakalhlakaꞌīꞌcuꞌtun aꞌxniꞌcaꞌ natalaktzīꞌn que huiꞌxinaꞌn xaꞌnca latlāꞌhuaꞌnāꞌtit. Lāꞌ chuntzaꞌ tūꞌ tasquiꞌnī nacāhuanican catūhuā. 
\v 2 Huan chiꞌxcuhuīꞌn natalaktzīꞌn aꞌnchī ixpuscancaꞌn tatlahua aꞌntūn tzey lāꞌ taꞌaꞌcnīniꞌniꞌ Dios. Lāꞌ ūꞌtzaꞌ natalīkalhlakaꞌīꞌcuꞌtun.
\v 3 Aꞌmakapitzīn puscan, como tzēhuanīꞌt talacuꞌtun, tzēhuanīꞌt tacāxtlahua ixyaꞌjcaꞌn. Lāꞌ tataꞌaꞌkanū ixaꞌkaslihuitcaꞌn de oro lāꞌ tamacatahuiꞌla ixmacatzātzātcaꞌn de oro. Lāꞌ talhakāꞌ tzēhuanīꞌt ixluꞌxuꞌcaꞌn. Huāꞌ tamāꞌna catūhuā tūꞌ ūꞌtzaꞌ aꞌntū tlahua tzēhuanīꞌt kalhatin puscāt na ixlacapūn Dios.
\v 4 Palh lactzēhuanīꞌt lacuꞌtunāꞌtit, tasquiꞌnī que nakaꞌlhīyāꞌtit xatzey mintapāstacnaꞌcaꞌn lāꞌ caꞌcs natahuiꞌlaꞌyāꞌtit. Huāꞌmāꞌ lej tzey na ixlacapūn Dios. Lāꞌ chuntzaꞌ lactzēhuanīꞌt līlaꞌyāꞌtit aꞌntū tāyaniꞌ.
\v 5 Lāꞌ chuntzaꞌ lactzēhuanīꞌt talīlalh huan puscan xalanīꞌn makān aꞌntī ixtalīpāhuan Dios lāꞌ ixtaꞌaꞌkahuānaꞌniꞌ Dios. Lāꞌ xlacaꞌn nā ixtaꞌaꞌkahuānaꞌniꞌ ixkōluꞌcaꞌn. 
\v 6 Chuntzaꞌ ixtlahua Sara makāntzaꞌ. Xlaꞌ ixaꞌkahuānaꞌniꞌ ixkōluꞌ Abraham lāꞌ ixlaktzīꞌn huaꞌchi māpaꞌksīniꞌ. Huiꞌxinaꞌn huaꞌchilh ixtzuꞌmaꞌjan Sara, palh tlahuayāꞌtit aꞌntūn tzey lāꞌ palh tūꞌ jicuaꞌnāꞌtit aꞌntū nacātatlahuaniꞌyāni tachiꞌxcuhuīꞌt.
\p
\v 7 Lāꞌ chuhuaꞌj huiꞌxinaꞌn chiꞌxcuhuīꞌn aꞌntīn kaꞌlhīyāꞌtit mimpuscancaꞌn, cacaꞌtzītit aꞌnchī nacātāꞌlatahuiꞌlaꞌyāꞌtit chu aꞌnchī ixtapuhuān Dios. Huan puscan, xlacaꞌn tūꞌ lactliꞌhuiꞌqui huaꞌchi huiꞌxinaꞌn. Lāꞌ ūꞌtzaꞌ nacālīꞌaꞌcnīniꞌniꞌyāꞌtit. Nacāꞌaꞌcnīniꞌniꞌyāꞌtit como xlacaꞌn chuntzaꞌ huaꞌchi huiꞌxinaꞌn maklhtīniꞌnīꞌtaꞌntit huan lēꞌksajnaꞌ aꞌntū Dios māstāꞌ. Lāꞌ ūꞌtzaꞌ huāꞌmāꞌ xasāstiꞌ minquilhtamacujcaꞌn aꞌntū tāyaniꞌ para pōꞌktu. Palh chuntzaꞌ natlahuaꞌyāꞌtit huiꞌxinaꞌn nacaꞌtzīyāꞌtit que Dios nakaxmata aꞌxniꞌcaꞌ nakalhtōꞌkaꞌyāꞌtit.
\s Makapitzīn tapātīniꞌn por ixpālacata tatlahua aꞌntūn tzey
\p
\v 8 Lāꞌ chuhuaꞌj xmān huāꞌmāꞌ: Chu lakatin capāstacnaꞌntit. Calālakalhuꞌmaꞌntit. Calāpāxquīꞌtit huaꞌchi lītāꞌtimīn. Calātlahuaniꞌtit aꞌntūn tzey. Lāꞌ tūꞌ capuhualh kalhatin que más xatzey que huan āꞌmakapitzīn.
\v 9 Palh catīhuā cātlahuaniꞌyāniꞌ aꞌntūn tūꞌ līmakuan, tūꞌ titlahuaniꞌyāꞌtit chu aꞌcxtim. Palh āꞌcatīhuā cālakapalayāniꞌ, tūꞌ tilakapalaꞌyāꞌtit. Xatzey casquiꞌniꞌtit Dios que xlaꞌ casicuaꞌlanālīlh. Uꞌtzaꞌ huāꞌmāꞌ aꞌntū Dios lacasquiꞌn. Palh chuntzaꞌ tlahuaꞌyāꞌtit, Dios nacāsicuaꞌlanālīyāniꞌ huiꞌxinaꞌn.
\v 10 Tatzoꞌkniꞌ na ixtachihuīn Dios:
\q Aꞌntī līpāxūj talatahuiꞌlacuꞌtun, tūꞌtzaꞌ catachihuīnaꞌlh con lakkoꞌhuaꞌjuaꞌ tachihuīn.
\q Lāꞌ tūꞌtzaꞌ cataꞌaꞌkxokonuꞌlh.
\q
\v 11 Catamakxtekkōꞌlh aꞌntūn tūꞌ tzey lāꞌ catatlahualh aꞌntūn tzey.
\q Lāꞌ catalīhuiꞌlīlh caꞌcs natalatahuiꞌla pōꞌktu. 
\q
\v 12 Dios cāmaktakaꞌlha aꞌntī lactzeya chiꞌxcuhuīꞌn. 
\q Lāꞌ cākaxmatniꞌ aꞌnchīn takalhtōꞌkaꞌ.
\q Pero Dios tūꞌ cāmaktāya aꞌntīn tatlahua aꞌntūn tūꞌ tzey.
\p
\v 13 Nīn tintīꞌ caticātlahuaniꞌni aꞌntūn tūꞌ tzey palh huiꞌxinaꞌn xmān tlahuacuꞌtunāꞌtit aꞌntūn tzey. 
\v 14 Lāꞌ palh huiꞌxinaꞌn pātīniꞌnāꞌtit xmān por ixpālacata tlahuaꞌyāꞌtit aꞌntūn tzey, chuntzaꞌ Dios nacāsicuaꞌlanālīyāniꞌ. Tūꞌ cacājicuaꞌniꞌtit huan chiꞌxcuhuīꞌn. Tūꞌ catamakchuyīꞌtit. 
\v 15 Capāstactit que Cristo ūꞌtzaꞌ miMāpaꞌksīniꞌcaꞌn. Lāꞌ caꞌaꞌkahuānaꞌniꞌtit xmān xla. Skalalh natahuiꞌlayāꞌtit para nakalhtīniꞌnāꞌtit aꞌxniꞌcaꞌ nacātakalhasquiꞌniꞌyāniꞌ aꞌchīꞌn kalhlakaꞌīꞌyāꞌtit Cristo. Lāꞌ līlacatzucu nakalhtīniꞌnāꞌtit huiꞌxinaꞌn. Lāꞌ capāstactit que Dios cākaxmatmāꞌniꞌ.
\v 16 Tūꞌ titlahuaꞌyāꞌtit aꞌntū nalīmāxanaꞌnāꞌtit aꞌxniꞌcaꞌ napāstacāꞌtit aꞌntū tlahuaꞌnīꞌtaꞌntit. Chuntzaꞌ nacāmāmaxaꞌnīꞌyāꞌtit aꞌntīn cātalakapalayāniꞌ huiꞌxinaꞌn lāꞌ aꞌntīn cātalīchihuīnaꞌnāniꞌ aꞌntūn tūꞌ tzey por ixpālacata kalhlakaꞌīꞌyāꞌtit Cristo. 
\v 17 Aꞌntīn tatlahua aꞌntūn tūꞌ tzey, xlacaꞌn nacāmāpātīnīcan. Huiꞌxinaꞌn tūꞌ calaꞌtit huaꞌchi xlacaꞌn. Xatzey napātīniꞌnāꞌtit, palh chuntzaꞌ ixtapuhuān Dios, aꞌyuj tūꞌ tlahuanīꞌtaꞌntit aꞌntūn tūꞌ tzey.
\p
\v 18 Cristo xmān maktin nīlh por quinaꞌn. Lāꞌ chuntzaꞌ līmāpānūlh quintalaclēꞌiꞌcaꞌn. Lāꞌ aꞌyuj Cristo lej tzey, xlaꞌ pātīniꞌlh por huan tachiꞌxcuhuīꞌt. Lāꞌ nīlh por quimpālacatacaꞌn, como quincāmāsuꞌyucuꞌtuniꞌ na ixlacapūn Dios. Lāꞌ aꞌyuj maknīca Jesucristo, pero ixlīcaꞌtzīn huīꞌcus.
\v 19 Lāꞌ aꞌxniꞌcaꞌ tūnaꞌj ixlakahuanchoko Cristo, ixlīcaꞌtzīn aꞌlh aꞌnlhā ixcāchīꞌcanīꞌt ixlīcaꞌtzīncaꞌn nīnīꞌn. Cātasuꞌyuniꞌlh lāꞌ cāhuanilh palh ūꞌtzaꞌ Cristo. 
\v 20 Xlacaꞌn aꞌxniꞌcaꞌ ixtalahuiꞌlānaꞌcus tūꞌ takalhlakaꞌīꞌcuꞌtulh Dios. Lāꞌ Dios lacatzucu ixcākaꞌlhīmāꞌ līhuan Noé ixtlahuamāꞌ huan barco. Lāꞌ aꞌxniꞌcaꞌ lalh huan lakuat, xmān kalhatzeyan tachiꞌxcuhuīꞌt tapūtaxtulh huan nac barco na ixkalhniꞌ huan xcān.
\v 21 Lāꞌ chuntzaꞌ quinaꞌn aꞌntīn quincātamāpūtaxtūnīꞌtaꞌntzaꞌ, quinaꞌn līꞌaꞌkpaxui xcān. Aꞌxniꞌcaꞌ aꞌkpaxāuj tūꞌ tlahuayāuj para nalīmāyujūyāuj quimactiꞌyaꞌtcaꞌn. Aꞌxniꞌcaꞌ aꞌkpaxāuj, chuntzaꞌ līmāsuꞌyuyāuj que Dios xapanīꞌttzaꞌ quintalaclēꞌiꞌcaꞌn, como Jesucristo lakahuanchokonīꞌttza, lāꞌ chuntzaꞌ pūtaxtunīꞌtaujtzaꞌ. 
\v 22 Jesucristo tanūnīꞌttzaꞌ nac aꞌkapūn lāꞌ huīꞌ na ixpāxtūcānaꞌj Dios. Lāꞌ chuhuaꞌj xlaꞌ cāmāpaꞌksīkōꞌ huan ángeles lāꞌ ixlīhuākcaꞌn huan aꞌntīn takaꞌlhī līmāpaꞌksīn.
\c 4
\s Dios cālīmāmacūꞌ catūhuā chāꞌtunuꞌ de ixtachiꞌxcuhuīꞌt 
\p
\v 1 Como Cristo pātīniꞌlh aꞌxniꞌcaꞌ ixlatlāꞌhuan nac huāꞌmāꞌ quilhtamacuj, cacaꞌtzītit huiꞌxinaꞌn que tzē nacāpātleꞌkeniꞌyāniꞌ chuntzaꞌ. Lāꞌ tūꞌ cajicuaꞌntit. Aꞌntīn tapātīniꞌmāꞌna, xlacaꞌn tamakxteknīꞌttzaꞌ de tatlahua aꞌntūn tūꞌ tzey.
\v 2 Lāꞌ chuhuaꞌj tūꞌtzaꞌ catlahuaꞌtit aꞌntūn tūꞌ tzey huaꞌchi huan tachiꞌxcuhuīꞌt aꞌntīn tatlahua xmān aꞌntū xlacaꞌn talacasquiꞌn. Calatahuiꞌlaꞌtittzaꞌ chu aꞌnchī ixtapuhuān Dios.
\v 3 Xapūꞌla huiꞌxinaꞌn makān ixtlahuapāꞌnaꞌntit aꞌntūn tatlahuacuꞌtun aꞌntīn tūꞌ takalhlakaꞌīꞌ. Xapūꞌla ixlēꞌcapināꞌtit ixtlahuaꞌyāꞌtit aꞌntūn tūꞌ tzey. Ixtlahuaꞌyāꞌtit xakoꞌhuaꞌjuaꞌ mintapāstacnaꞌcaꞌn. Ixkaꞌchīyāꞌtit. Lāꞌ ixtlahuaꞌyāꞌtit cāꞌtaniꞌ aꞌnlhā ixtlahuaꞌyāꞌtit aꞌntūn tūꞌ tzey. Ixtakēstokāꞌtit para nakoꞌtāꞌtit. Lāꞌ ixcātatzokostaniꞌyāꞌtit huan ídolos. Lāꞌ Dios tūꞌ lakatī huāꞌmāꞌ.
\v 4 Lāꞌ chuhuaꞌj aꞌntīn tūꞌ takalhlakaꞌīꞌ, xlacaꞌn tūꞌ tamāchekxī como huiꞌxinaꞌn tūꞌ cātāꞌtakēstokāꞌtit xlacaꞌn para natlahuaꞌyāꞌtit aꞌntūn tūꞌ tzey aꞌntūn tatlahuacuꞌtun xlacaꞌn. Lāꞌ ūꞌtzaꞌ cātalīlakapalayāniꞌ huiꞌxinaꞌn.
\v 5 Xlacaꞌn natamāpala con Dios. Ixlīstuꞌncuaꞌ xlaꞌ nacājuzgarlī aꞌntīn talahuiꞌlānaꞌcus lāꞌ aꞌntī xanīntzaꞌ.
\v 6 Lāꞌ ūꞌtzaꞌ nā cālīmācaꞌtzīnīca huan xatzey tachihuīn aꞌntīn xanīntzaꞌ chuhuaꞌj. Lāꞌ chuntzaꞌ aꞌyuj tanīlh chuntzaꞌ huaꞌchi ixlīhuākcaꞌn tachiꞌxcuhuīꞌt, pero ixlīcaꞌtzīncaꞌn tzē natatahuiꞌla para pōꞌktu chuntzaꞌ huaꞌchi Dios lahuīꞌ pōꞌktu.
\p
\v 7 Palaꞌj nasputkōꞌ ixlīhuāk. Uꞌtzaꞌ xaꞌnca calīpāstacnaꞌntit. Skalalh catahuiꞌlaꞌtit para que tzē nakalhtōꞌkaꞌyāꞌtit. 
\v 8 Lāꞌ aꞌntū lej tasquiꞌnī ūꞌtzaꞌ huāꞌmāꞌ: lej calāpāxquīꞌtit. Palh pāxquīꞌyāuj āꞌkalhatin, māsputūnuꞌniꞌyāuj aꞌntū quincātlahuaniꞌnīꞌtaꞌniꞌ. 
\v 9 Lāꞌ līpāxūj nalāmānūyāꞌtit na minchiccaꞌn. 
\v 10 Dios xtunc cāmaxquīꞌnīꞌtaꞌniꞌ chāꞌtunuꞌ de huiꞌxinaꞌn aꞌnchī tzē nalītlahuaꞌyāꞌtit aꞌntū cālīmāmacūꞌnīꞌtaꞌniꞌ Dios. Chuntzaꞌ tzē natlōkentaxtūyāꞌtit aꞌntū Dios cālīmāmacūꞌnīꞌtaꞌniꞌ. Lāꞌ chuntzaꞌ nalāmaktāyaꞌyāꞌtit. 
\v 11 Aꞌntīn taꞌaꞌctaꞌsanaꞌn, catamāsuꞌyulh ixtachihuīn Dios. Lāꞌ aꞌntīn tamaktāya āꞌmakapitzīn, catatlahualh chu aꞌnchī Dios cāmaxquīꞌnīꞌt. Lāꞌ palh huiꞌxinaꞌn chuntzaꞌ tlahuaꞌyāꞌtit, chuntzaꞌ naꞌaꞌcnīniꞌniꞌcan Dios por ixpālacata Jesucristo. Līmakuan que pōꞌktu caꞌaꞌcnīniꞌniꞌca Dios. Xlaꞌ para pōꞌktu kaꞌlhī līmāpaꞌksīn. Amén.
\s Tapātīniꞌn aꞌntīn takalhlakaꞌīꞌ
\p
\v 12 Lāꞌ chuhuaꞌj tāꞌtimīn, tūꞌ tipuhuaꞌnāꞌtit que tūꞌ maktin napātīniꞌnāꞌtit huiꞌxinaꞌn. Cacaꞌtzītit que chuntzaꞌ cāpātleꞌkeniꞌ aꞌntīn takalhlakaꞌīꞌ, lāꞌ tūꞌ xmān huiꞌxinaꞌn pātīniꞌnāꞌtit chuntzaꞌ. Lāꞌ chuntzaꞌ lītasuꞌyu palh lej stuꞌncuaꞌ huiꞌxinaꞌn kalhlakaꞌīꞌyāꞌtit.
\v 13 Capāxuhuaꞌtit aꞌnchī pātīniꞌmpāꞌnaꞌntit chuntzaꞌ huaꞌchi Cristo pātīniꞌlh. Lāꞌ chuntzaꞌ huiꞌxinaꞌn lej napāxuhuaꞌyāꞌtit aꞌxniꞌcaꞌ Cristo namimpala lāꞌ nalaktzīꞌncan aꞌnchī xlaꞌ kaꞌlhī lhūhuaꞌ līmāpaꞌksīn. 
\v 14 Aꞌxniꞌcaꞌ cātalakapalayāniꞌ huiꞌxinaꞌn por ixpālacata Cristo, huan Espíritu Santo nacāmaktāyayāniꞌ. Lāꞌ natasuꞌyu que xlaꞌ cātāꞌlahuiꞌlaniꞌ huiꞌxinaꞌn. Lāꞌ natasuꞌyu que xlaꞌ lej kaꞌlhī līmāpaꞌksīn. Aꞌmakapitzīn koꞌhuaꞌjuaꞌ talīchihuīnaꞌn Cristo, pero huiꞌxinaꞌn aꞌcnīniꞌniꞌyāꞌtit xlaꞌ.
\v 15 Aꞌmakapitzīn tapātīniꞌn como xlacaꞌn tamaknīniꞌnīꞌt. Lāꞌ āꞌmakapitzīn tapātīniꞌn como takaꞌlhānaꞌnīꞌt. Lāꞌ āꞌmakapitzīn tapātīniꞌn como tatlahuanīꞌt āꞌcatūhuā aꞌntūn tūꞌ tzey. Lāꞌ āꞌmakapitzīn tapātīniꞌn como tatanūnīꞌt aꞌnlhān tūꞌ ixmacaꞌtzicaꞌn. Tūꞌ titlahuaꞌyāꞌtit huāꞌ tamāꞌna.
\v 16 Palh huiꞌxinaꞌn pātīniꞌnāꞌtit por ixpālacata Cristo, tūꞌ tilīmāxanaꞌnāꞌtit. Camaxquīꞌtit pāxcatcaꞌtzī Dios como tapaꞌksīyāꞌtit con Cristo.
\p
\v 17 Chilhtzaꞌ huan chiꞌchiniꞌ aꞌntū napūjuzgarlīniꞌn Dios. Xapūꞌla nacāmāpātīnīcan ixtachiꞌxcuhuīꞌt Dios. Palh quinaꞌn naquincāmāpātīnīyāniꞌ xapūꞌla, āꞌchulāꞌ nacāmāpātīnīcan xlacaꞌn aꞌntīn tūꞌ takalhlakaꞌīꞌ huan xatzey tachihuīn aꞌntū ixlaꞌ Dios.
\v 18 Tatzoꞌkniꞌ na ixtachihuīn Dios:
\q Palh jicslihuaꞌ tapūtaxtu huan xalactzey chiꞌxcuhuīꞌn, ¿tuchū nacāpātleꞌkeniꞌ huan chiꞌxcuhuīꞌn aꞌntīn tūꞌ tzey lāꞌ aꞌntīn talakmakaꞌn Dios?
\m
\v 19 Palh ixtapuhuān Dios que natapātīniꞌn makapitzīn ixpālacata tatlahua aꞌntūn tzey, catatlahualhcus aꞌntūn tzey. Lāꞌ catalīpāhuanli xmān Dios. Xlaꞌ cāmāꞌaꞌnanīnīꞌt lāꞌ pōꞌktu cāmaktakaꞌlha. Lāꞌ xlaꞌ pōꞌktu tlōkentaxtū aꞌntū huan.
\c 5
\s Cāmaxquīꞌca tapāstacnaꞌ aꞌntī ixtakalhlakaꞌīꞌ 
\p
\v 1 Quit iccāchihuīnaꞌmaxquīꞌcuꞌtunāniꞌ huiꞌxinaꞌn aꞌntī xanapuxcuꞌnuꞌ nac lītokpānnaꞌ. Nā quit kalhatin xapuxcuꞌ. Quit iclaktzīꞌlh aꞌnchī pātīniꞌlh Cristo. Lāꞌ nā quit naquiꞌaꞌcnīniꞌniꞌcan aꞌxniꞌcaꞌ naꞌaꞌcnīniꞌniꞌcan Cristo aꞌxniꞌca namimpala.
\v 2 Iccāsquiꞌniꞌyāniꞌ que nacāmaktakaꞌlhāꞌtit ixlakskaꞌtāꞌn Dios aꞌntī xlaꞌ cālīmāmacūꞌniꞌ. Catlahuaꞌtit con ixlīhuāk mintapuhuāncaꞌn lāꞌ tūꞌ nasātlahuayāꞌtit. Tūꞌ xmān titlahuayāꞌtit xmān por huan tumīn. Cacāmaktakaꞌlhtit xmān ixpālacata tāꞌscujcuꞌtunāꞌtit Dios.
\v 3 Lāꞌ tūꞌ ixtēcuꞌnīꞌn huiꞌxinaꞌn aꞌntī cāmaktakaꞌlhāꞌtit. Calatahuiꞌlaꞌtit chu aꞌnchī ixtapuhuān Dios. Lāꞌ chuntzaꞌ xlacaꞌn tzē nacātamakscaꞌtāniꞌ.
\v 4 Jesucristo ūꞌtzaꞌ aꞌntī xapuxcuꞌ de milīhuākcaꞌn huiꞌxinaꞌn aꞌntī xanapuxcuꞌnuꞌ nac lītokpānnaꞌ. Xlaꞌ cāmaktakaꞌlhkōꞌ ixlakskaꞌtāꞌn lāꞌ cuenta tlahua aꞌnchī scujnīꞌtaꞌntit huiꞌxinaꞌn. Lāꞌ aꞌxniꞌcaꞌ Jesucristo namimpala, Dios para pōꞌktu nacāsicuaꞌlanālīyāniꞌ huiꞌxinaꞌn.
\p
\v 5 Lāꞌ nā huiꞌxinaꞌn oꞌkxaꞌn, cacāꞌaꞌkahuānaꞌniꞌtit huan xanapuxcuꞌnuꞌ de huan lītokpānnaꞌ. Lāꞌ milīhuākcaꞌn huiꞌxinaꞌn nalāꞌaꞌcnīniꞌniꞌyāꞌtit. Tūꞌ capuhuaꞌntit palh más xalactzey huiꞌxinaꞌn que āꞌmakapitzīn. Tatzoꞌkniꞌ na ixtachihuīn Dios:
\q Dios tūꞌ cāmaktāya aꞌntīn takaꞌtlaꞌjcaꞌtzī.
\q Xlaꞌ cāmaktāya aꞌntīn tūꞌ takaꞌtlaꞌjcaꞌtzī.
\m
\v 6 Tūꞌ cakaꞌtlaꞌjcaꞌtzītit. Caꞌakahuānaꞌniꞌtit Dios. Xlaꞌ ūꞌtzaꞌ aꞌntī lej kaꞌlhī līmāpaꞌksīn. Lakatin chiꞌchiniꞌ aꞌxniꞌcaꞌ Dios nalacasquiꞌn, huiꞌxinaꞌn nacātaꞌaꞌcnīniꞌniꞌyāniꞌ chu aꞌnchī ixtapuhuān Dios.
\v 7 Pōꞌktu aꞌxniꞌcaꞌ tamakchuyīyāꞌtit, casquiꞌniꞌtit Dios que nacāmaktāyayāniꞌ. Xlaꞌ cālakalhuꞌmanāniꞌ aꞌxniꞌcaꞌ pātīniꞌmpāꞌnaꞌntit.
\p
\v 8 Lāꞌ skalalh calatahuiꞌlaꞌtit lāꞌ tūꞌ catamakxtektit nacātatlajayāniꞌ. Huan koꞌtiꞌtiꞌ aꞌntī mintāꞌcaꞌtzacaꞌn, xlaꞌ latlāꞌhuan huaꞌchi lakatin león aꞌntū lej taꞌsa lāꞌ putzatlāꞌhuan aꞌntī nahuaꞌ.
\v 9 Tūꞌ camakxtektit aꞌnchī kalhlakaꞌīꞌyāꞌtit. Lāꞌ chuntzaꞌ catāꞌlātlajaꞌtit huan koꞌtiꞌtiꞌ. Capāstactit que chuxalhā nac cāꞌquilhtamacuj aꞌnan huan tāꞌtimīn aꞌntī nā tapātīniꞌmāꞌna.
\v 10 Dios lej pāxquīꞌnin. Lāꞌ quincālacsacnīꞌtaꞌniꞌ como ixlacasquiꞌn natāꞌtapaꞌksīyāuj Cristo. Lāꞌ chuntzaꞌ para pōꞌktu natāꞌlatahuiꞌlayāuj Dios nac aꞌkapūn. Aꞌxniꞌcaꞌ pātīniꞌnīꞌtaꞌntittzaꞌ āꞌmacstiꞌnaꞌj, māniꞌ Dios nacātlahuayāniꞌ lactzey huiꞌxinaꞌn. Lāꞌ nacāmaktāyayāniꞌ para natāyaniꞌyāꞌtit. Lāꞌ nacāmaktāyayāniꞌ para que xaꞌnca nakalhlakaꞌīꞌyāꞌtit.
\v 11 Dios kaꞌlhīkōꞌ ixlīhuāk huan līmāpaꞌksīn para pōꞌktu. Amén.
\s Macāꞌnca huan āꞌxmān saludos
\p
\v 12 Quit icmātzoꞌknīlh Silvano huāꞌmāꞌ carta aꞌntūn tūꞌ laclhmāꞌn. Quit xaꞌnca iccaꞌtzī que xlaꞌ kalhatin quintāꞌtincaꞌn lāꞌ xaꞌnca kalhlakaꞌīꞌ. Quit iccāmāsuꞌniꞌniꞌ huan xatzey tachihuīn ixpālacata Jesucristo. Lāꞌ huiꞌxinaꞌn kalhlakaꞌīꞌnīꞌtaꞌntit que ūꞌtzaꞌ xastuꞌncuaꞌ. Chuhuaꞌj tūꞌ camakxtektit aꞌnchī kalhlakaꞌīꞌyāꞌtit huāꞌmāꞌ xatzey tachihuīn.
\p
\v 13 Cāmacāꞌniꞌyāniꞌ saludos xlacaꞌn aꞌntīn tatapaꞌksī huan nac lītokpān xalaꞌ nac Babilonia. Nā xlacaꞌn Dios nā cālacsacnīꞌt. Lāꞌ Marcos aꞌntī huaꞌchi quiꞌoꞌkxaꞌ, nā xlaꞌ cāmacāꞌniꞌyāniꞌ saludos.
\v 14 Calāꞌaꞌkxkoꞌkaꞌtit como huiꞌxinaꞌn lāpāxquīꞌyāꞌtit. 
\p Lāꞌ tzaꞌtaꞌtaꞌ calalh miꞌaꞌclhcunuccaꞌn milīhuākcaꞌn huiꞌxinaꞌn aꞌntīn tāꞌtapaꞌksīyāꞌtit Cristo. Amén.