\id 2PE
\h 2 PEDRO
\toc1 2 PEDRO
\mt Ixlīkalhtuꞌ Carta aꞌntūn Tzoꞌkli San Pedro
\c 1
\s Cāmacāꞌniꞌca saludos aꞌntī ixtakalhlakaꞌīꞌ
\p
\v 1 Quit Simón Pedro. Lāꞌ ictzoꞌkmāꞌ huāꞌmāꞌ carta. Quit kalhatin ixapóstol Jesucristo lāꞌ ūꞌtzaꞌ ictāꞌscuja. Quit iccātzoꞌknuniꞌyāniꞌ huiꞌxinaꞌn aꞌntīn kalhlakaꞌīꞌyāꞌtit huaꞌchi quinaꞌn. Quinaꞌn tzē nalīpāxuhuayāuj por aꞌntū quincātlahuaniꞌnīꞌtaꞌniꞌ Dios. Como Dios chu aꞌcxtim cālaktzīꞌn tachiꞌxcuhuīꞌt, chuntzaꞌ quincālaktzīꞌnāniꞌ chu lakatin como kalhlakaꞌīꞌyāuj Jesucristo.
\v 2 Lāꞌ Dios lej cacāsicuaꞌlanālīniꞌ huiꞌxinaꞌn lāꞌ cacāmātzaꞌtaꞌtīꞌniꞌniꞌ miꞌaꞌclhcunuccaꞌn, como huiꞌxinaꞌn lakapasāꞌtit Dios lāꞌ quiMāpaꞌksīniꞌcaꞌn Jesucristo. 
\s Aꞌnchī tahuanīꞌt aꞌntīn tatāꞌtapaꞌksī Dios
\p
\v 3 Dios, como lej kaꞌlhī lhūhuaꞌ līmāpaꞌksīn, quincāmaxquīꞌnīꞌtaꞌniꞌ ixlīhuāk aꞌntū maclacasquiꞌnāuj para nalatahuiꞌlayāuj chu aꞌnchī xlaꞌ lacasquiꞌn. Lāꞌ quincāmācaꞌtzīnīniꞌ aꞌnchī huanīꞌt xlaꞌ. Lāꞌ nā quincāmātaꞌsīniꞌ para natāꞌlatahuiꞌlayāuj nac aꞌkapūn aꞌnlhā xlaꞌ māpaꞌksīniꞌn lāꞌ aꞌnlhā lej xkaka.
\v 4 Lāꞌ chuntzaꞌ Dios naquincātlahuaniꞌyāniꞌ lhūhuaꞌ aꞌntūn tzey chuntzaꞌ huaꞌchi xlaꞌ huanīꞌt. Dios quincāmaxquīꞌnīꞌtaꞌniꞌ aꞌnchī nalīsāstīꞌlatāꞌkchokoyāuj. Lāꞌ quincāmaxquīꞌyāniꞌ xasāstiꞌ quintapāstacnaꞌcaꞌn aꞌntū xatzey huaꞌchi ixtapāstacnaꞌ Dios. Lāꞌ chuntzaꞌ tzē namakxtekāuj aꞌntū xakoꞌhuaꞌjuaꞌ tlahuacan nac quilhtamacuj.
\v 5 Lāꞌ como huiꞌxinaꞌn kalhlakaꞌīꞌyāꞌtittzaꞌ huan xatzey tachihuīn ixpālacata Jesucristo, chuntzaꞌ tasquiꞌnī que nalēꞌcapināꞌtit natlahuaꞌyāꞌtit aꞌntūn tzey. Lāꞌ tūꞌ xmān natlahuaꞌyāꞌtit aꞌntūn tzey. Nā tasquiꞌnī que āꞌchulāꞌ nascaꞌtāꞌtit aꞌntū ixlaꞌ Dios.
\v 6 Lāꞌ tūꞌ xmān nascaꞌtāꞌtit aꞌntū ixlaꞌ Dios. Nā tasquiꞌnī que tūꞌ natamakxtekāꞌtit natlahuaꞌyāꞌtit mintapāstacnaꞌcaꞌn aꞌntūn tūꞌ tzey. Lāꞌ tūꞌ xmān huāꞌmāꞌ. Nā tasquiꞌnī que līlacatzucu napātīyāꞌtit. Lāꞌ tūꞌ xmān līlacatzucu napātīyāꞌtit. Nā tasquiꞌnī que līlacatejtin nalatāꞌkchokoyāꞌtit chuntzaꞌ huaꞌchi Dios lacasquiꞌn.
\v 7 Lāꞌ tūꞌ xmān līlacatejtin nalatāꞌkchokoyāꞌtit. Nā tasquiꞌnī que nacāpāxquīꞌyāꞌtit huan tāꞌtimīn. Lāꞌ tūꞌ xmān huan tāꞌtimīn. Nā tasquiꞌnī que nacāpāxquīꞌyāꞌtit ixlīhuākcaꞌn tachiꞌxcuhuīꞌt.
\p
\v 8 Ixlīhuāk huāꞌmāꞌ ūꞌtzaꞌ natlahuakōꞌyāꞌtit. Lāꞌ palh lej stuꞌncuaꞌ natlahuaꞌyāꞌtit, chuntzaꞌ tasuꞌyu palh xaꞌnca latlāꞌhuaꞌnāꞌtit na ixtej Dios. Lāꞌ nā tasuꞌyu palh tūꞌ chu tlakaj lakapasāꞌtit huan quiMāpaꞌksīniꞌcaꞌn Jesucristo.
\v 9 Aꞌntīn tūꞌ tatlahua huāꞌ tamāꞌna catūhuā, xlacaꞌn huaꞌchi lakatzīꞌnīꞌn como xlacaꞌn tūꞌ xaꞌnca tamāchekxī. Xlacaꞌn huaꞌchi lakatzīꞌnīꞌn como tapātzaꞌnkānīꞌt palh Dios cāxapaniꞌnīꞌttzaꞌ ixtalalēꞌiꞌcaꞌn lāꞌ xlaꞌ lacasquīꞌn que xlacaꞌn līlacatejtin natalatāꞌkchoko. 
\v 10 Chuntzaꞌ tāꞌtimīn, calīhuiꞌlīꞌtit natlahuaꞌyāꞌtit huāꞌ tamāꞌna catūhuā. Lāꞌ chuntzaꞌ natasuꞌyu que Dios cātaꞌsatīnīꞌtaꞌniꞌ lāꞌ cālacsacnīꞌtaꞌniꞌ huiꞌxinaꞌn. Palh chuntzaꞌ tlahuaꞌyāꞌtit, tūꞌ catitatonkopūtit. 
\v 11 Lāꞌ chuntzaꞌ tzē nacaꞌtzīyāꞌtit palh natanūꞌyāꞌtit aꞌnlhā para pōꞌktu māpaꞌksīniꞌn quiMāpaꞌksīniꞌcaꞌn Jesucristo. Lāꞌ xlaꞌ ūꞌtzaꞌ aꞌntīn quincāmāpūtaxtūyāniꞌ. 
\p
\v 12 Uꞌtzaꞌ pōꞌktu iccālīmāpāstaquīyāniꞌ quit huāꞌ tamāꞌna catūhuā, aꞌyuj huiꞌxinaꞌn lakapasāꞌtit, lāꞌ aꞌyuj xaꞌnca kalhlakaꞌīꞌyāꞌtit huan xatzey tachihuīn aꞌntū xastuꞌncuaꞌ aꞌntū cātamāsuꞌniꞌnīꞌtaꞌniꞌ. 
\v 13 Quit icpuhuan palh tzey naꞌiccāmāpāstaquīyāniꞌ huāꞌ tamāꞌna catūhuā līhuan iclahuīꞌcus.
\v 14 Quit iccaꞌtzī palh palajtzaꞌ naꞌicnī. Chuntzaꞌ quimācaꞌtzīnīlh quiMāpaꞌksīniꞌcaꞌn Jesucristo.
\v 15 Lāꞌ quit naꞌictlahua aꞌntū maclacasquiꞌn para naꞌiccāmāsuꞌniꞌyāniꞌ lāꞌ chuntzaꞌ tzē nalīpāstacāꞌtit huan tachihuīn ixpālacata Jesucristo chōꞌnlhānīn lacasquiꞌnāꞌtit aꞌxniꞌcaꞌ xanīntzaꞌ quit.
\s Laktzīꞌnca Jesucristo aꞌnchī lej kaꞌlhī līmāpaꞌksīn 
\p
\v 16 Quinaꞌn iccāmāsuꞌniꞌnīꞌtaꞌniꞌ huiꞌxinaꞌn aꞌnchī lej kaꞌlhī līmāpaꞌksīn quiMāpaꞌksīniꞌcaꞌn Jesucristo lāꞌ aꞌnchī xlaꞌ namimpala. Aꞌntū quinaꞌn iccāmāsuꞌniꞌyāniꞌ, huāꞌmāꞌ tūꞌ cuentos aꞌntūn tamāꞌaꞌnanīlh chiꞌxcuhuīꞌn aꞌntīn taꞌaꞌkxokonuꞌncuꞌtun. Lāꞌ quinaꞌn iclaktzīꞌuj con quilakastapūncaꞌn huan Jesucristo lāꞌ nā iclaktzīꞌuj aꞌnchī lej kaꞌlhī līmāpaꞌksīn.
\v 17 Lāꞌ aꞌntzaꞌ xaꞌicyānaꞌuj aꞌxniꞌcaꞌ Dios quinTātaꞌcaꞌn mākaꞌtlīꞌlh Jesucristo. Lāꞌ minchaꞌ lakatin tachihuīn nac lakatin poklhnuꞌ xaslamama. Lāꞌ hualh: “Uꞌtzaꞌ huāꞌmāꞌ quiꞌOꞌkxaꞌ. Lej icpāxquīꞌ lāꞌ lej quimakapāxuhua”. 
\v 18 Māniꞌ quinaꞌn ickaxmatui huanmāꞌ tachihuīn aꞌntū minchaꞌ nac aꞌkapūn. Aꞌntzaꞌ xaꞌictāꞌhuiꞌlānaꞌuj Jesucristo huan nac kēstīn. Lāꞌ aꞌntzaꞌ xtunc tasuꞌyulh Jesucristo como Dios māxkakēlh.
\p
\v 19 Lāꞌ ūꞌtzaꞌ āꞌchulāꞌ iclīkalhlakaꞌīꞌyāuj aꞌntū tatzoꞌkli huan profetasnaꞌ aꞌntī cāmātzoꞌknīlh Dios. Lāꞌ nā huiꞌxinaꞌn xaꞌnca nalakapūtleꞌkeyāꞌtit aꞌntūn tatzoꞌkli huan profetasnaꞌ hasta que xaꞌnca namāchekxīꞌyāꞌtit. Huāꞌmāꞌ huaꞌchi huan lámpara aꞌntū maksko aꞌnlhā cāꞌpucsuaꞌ hasta que natuncuī lāꞌ hasta que natasuꞌyu huan mātuncuīnīꞌ staꞌcu. 
\v 20 Lāꞌ lej tasquiꞌnī napāstacāꞌtit aꞌntū naꞌiccāhuaniyāniꞌ. Na ixtachihuīn Dios aꞌnlhā tatzoꞌkniꞌ aꞌntūn tahualh huan ixaꞌctaꞌsanaꞌnīꞌn Dios, huanmāꞌ tūꞌ ixtapāstacnaꞌcaꞌn huan aꞌctaꞌsanaꞌnīꞌn.
\v 21 Aꞌntū ixtamāsuꞌyu huan aꞌctaꞌsanaꞌnīꞌn tūꞌ xmān ixtapāstacnaꞌcaꞌn tachiꞌxcuhuīꞌt. Huan tamāꞌna lactzey chiꞌxcuhuīꞌn aꞌntī ixtatāꞌscuja Dios, xlacaꞌn ixtahuan aꞌntū ixcāmāpāstaquī huan Espíritu Santo.
\c 2
\s Makapitzīn ixtamāsuꞌyu aꞌntūn tūꞌ stuꞌncuaꞌ
\r Judas 4‑13
\p
\v 1 Makāntzaꞌ ixtatanū na ixlaclhniꞌcaꞌn tachiꞌxcuhuīꞌt āꞌmakapitzīn aꞌctaꞌsanaꞌnīꞌn aꞌntī ixtaꞌaꞌkxokonuꞌn. Lāꞌ nā natatanū na milaclhniꞌcaꞌn āꞌmakapitzīn aꞌntī natamāsuꞌyu aꞌntūn tūꞌ stuꞌncuaꞌ. Lāꞌ aꞌntū natamāsuꞌyu ūꞌtzaꞌ nalactlahua aꞌnchīn talīkalhlakaꞌīꞌ makapitzīn. Huan tamāꞌna aꞌkxokonuꞌnīꞌn natamāsuꞌyu palh Jesucristo tūꞌ ixOꞌkxaꞌ Dios aꞌyuj xlaꞌ ūꞌtzaꞌ aꞌntī māpalalh por ixtalaclēꞌiꞌcaꞌn. Chu līmaktin nacāmāpātīnīcan xlacaꞌn por ixpālacata aꞌntūn tatlahua.
\v 2 Lāꞌ aꞌnchī xlacaꞌn natalatāꞌkchoko, huaꞌchilh tuntūꞌ aꞌntū nacālīmāmāxanīcan. Lāꞌ lhūhuaꞌ aꞌntī natakalhlakaꞌīꞌcuꞌtun aꞌntū natamāsuꞌyu xlacaꞌn. Lāꞌ nā natatlahua aꞌntūn tūꞌ tzey huaꞌchi xlacaꞌn. Lāꞌ por ixpālacatacaꞌn xlacaꞌn koꞌhuaꞌjuaꞌ nalīchihuīnaꞌncan huan xatzey tachihuīn aꞌntū xastuꞌncuaꞌ.
\v 3 Huāꞌ tamāꞌna aꞌkxokonuꞌnīꞌn lej takaꞌlhīcuꞌtun tumīn. Lāꞌ ūꞌtzaꞌ nacātalīmāsuꞌniꞌyāniꞌ huiꞌxinaꞌn aꞌntūn tūꞌ stuꞌncuaꞌ. Dios makāntzaꞌ līhuiꞌlīnīꞌt que nacāmāpātīnī xlacaꞌn aꞌntīn tatlahua chuntzaꞌ. Lāꞌ huāꞌ tamāꞌna aꞌkxokonuꞌnīꞌn nā xlacaꞌn natamāpala con Dios.
\p
\v 4 Dios tūꞌ cāmāsputūnuꞌniꞌlh huan ángeles aꞌntīn tatlahualh aꞌntūn tūꞌ tzey. Cāmāyujūlh hasta nac pūpātīn. Lāꞌ aꞌntzaꞌ natatachoko huaꞌchi xatachīꞌnīꞌn hasta huan chiꞌchiniꞌ aꞌxniꞌcaꞌ namālaclēꞌnīniꞌn Dios.
\v 5 Lāꞌ Dios tūꞌ cāmāsputūnuꞌniꞌlh huan tachiꞌxcuhuīꞌt aꞌntī ixtahuiꞌlānaꞌ makān. Macamilh huan lakuat. Lāꞌ ūꞌtzaꞌ talīnīkōꞌlh ixlīhuākcaꞌn huan tachiꞌxcuhuīꞌt nac quilhtamacuj como tūꞌ tzeyā tachiꞌxcuhuīꞌt ixtahuanīꞌt. Dios cāmāpūtaxtūlh xmān kalhatzeyan tachiꞌxcuhuīꞌt. Kalhatin de xlacaꞌn, ūꞌtzaꞌ aꞌntī Noé. Xlaꞌ ixcāmāsuꞌniꞌ huan tachiꞌxcuhuīꞌt que tasquiꞌnī que līlacatejtin ixtalatāꞌkchokolh.
\v 6 Lāꞌ Dios cāmāpātīnīlh xalanīꞌn huan nac cāꞌlacchicniꞌ aꞌnlhā ixuanican Sodoma lāꞌ nā aꞌnlhā ixuanican Gomorra. Dios cālhcuyukōꞌlh huan tamāꞌna lakatuꞌ cāꞌlacchicniꞌ. Lāꞌ chuntzaꞌ Dios līmāsuꞌyulh que xlaꞌ cāmāpātīnī aꞌntīn tūꞌ taꞌaꞌkahuānaꞌniꞌcuꞌtun.
\v 7 Dios māxtulh de nac Sodoma huan chiꞌxcuꞌ aꞌntī ixuanican Lot. Lāꞌ chuntzaꞌ līpūtaxtulh. Lot tzeyā chiꞌxcuꞌ ixuanīꞌt lāꞌ ixtamakchuyī como huan āꞌmakapitzīn xalanīꞌn nac Sodoma tūꞌ tzeyā chiꞌxcuhuīꞌn ixtahuanīꞌt lāꞌ ixtatlahua aꞌntūn koꞌhuaꞌjuaꞌ.
\v 8 Lāꞌ Lot tzeyā chiꞌxcuꞌ ixuanīꞌt, lāꞌ como ixcātāꞌlahuīꞌ lāꞌ ixcālaktzīꞌn lāꞌ ixcākaxmata lakalīyān, chuntzaꞌ līpuhualh por ixpālacata aꞌntū ixtatlahua aꞌntū koꞌhuaꞌjuaꞌ.
\v 9 Chuntzaꞌ tasuꞌyu que huan Māpaꞌksīniꞌ Dios namāpūtaxtū kalhatin chiꞌxcuꞌ aꞌntī pātīniꞌmāꞌ aꞌntī kalhlakaꞌīꞌ Dios. Lāꞌ nā tasuꞌyu palh Dios, aꞌyuj tūnaꞌj cāmāpātīnī aꞌntīn tūꞌ tzeyā chiꞌxcuhuīꞌn, nacāmāpātīnī huan chiꞌchiniꞌ aꞌxniꞌcaꞌ Dios namālaclēꞌnīniꞌn. 
\v 10 Lāꞌ āꞌchulāꞌ nacāmāpātīnī aꞌntīn talakmakaꞌn ixlīmāpaꞌksīn Dios lāꞌ tatlahua aꞌntūn tūꞌ tzey ixtapāstacnaꞌcaꞌn. Xlacaꞌn tūꞌ tajicuaꞌn de natatlahua catūhuā. Tatlahua xmān aꞌntū xlacaꞌn talacasquiꞌn. Lāꞌ tūꞌ tajicuaꞌn talakapala huan aꞌntī lej takaꞌlhī līmāpaꞌksīn.
\v 11 Tūꞌ chuntzaꞌ tatlahua huan ángeles aꞌyuj xlacaꞌn más takaꞌlhī līmāpaꞌksīn. Huan ángeles, xlacaꞌn tūꞌ talakapala āꞌkalhatin lāꞌ tūꞌ talēꞌksaꞌnīniꞌn na ixlacapūn Dios.
\p
\v 12 Huāꞌ tamāꞌna chiꞌxcuhuīꞌn tūꞌ tamāchekxī. Tatlahua aꞌntūn talacasquiꞌn. Talakapala aꞌntūn tūꞌ tamāchekxī. Xlacaꞌn huaꞌchi huan animalhnaꞌ xalaꞌ nac cāꞌquiꞌhuīꞌn aꞌntūn tayuja nac aꞌksuj lāꞌ tūlalh catitapūtaxtulh lāꞌ nacāmaknīcan. Lāꞌ nā chuntzaꞌ huāꞌ tamāꞌna chiꞌxcuhuīꞌn nā natasputa huaꞌchi huan animalhnaꞌ. Lāꞌ Dios nacāmālaclēꞌnī.
\v 13 Lāꞌ chuntzaꞌ xlacaꞌn natalīmāpala por aꞌntūn talīmāpātīnīlh āꞌmakapitzīn. Xlacaꞌn de tuncuj talakatī lej takoꞌta lāꞌ tatlahua āꞌcatūhuā aꞌntūn tūꞌ tzey. Lej līmāxanaꞌ aꞌnchī xlacaꞌn cātāꞌhuāꞌyanāniꞌ huiꞌxinaꞌn aꞌnlhā huiꞌxinaꞌn takēstoknīꞌtaꞌntit, līhuan xlacaꞌn tapuhuan que nacātaꞌaꞌkxokoyāniꞌ huiꞌxinaꞌn.
\p
\v 14 Lāꞌ aꞌxniꞌcaꞌ xlacaꞌn talaktzīꞌn kalhatin puscāt, tapuhuan aꞌntūn tūꞌ tzey. Ixlīhuāk ixtapāstacnaꞌcaꞌn koꞌhuaꞌjuaꞌ. Lāꞌ taꞌaꞌkxoko aꞌntīn tūnaꞌj xaꞌnca takalhlakaꞌīꞌ. Lāꞌ lej tapāstaca aꞌnchī natalīkaꞌlhī lhūhuaꞌ tumīn.
\v 15 Huaꞌchilh xlacaꞌn ixtamakxtekli huan xaslituaꞌ tej lāꞌ taꞌaꞌktzaꞌnkānīꞌt. Talatlāꞌhuan huaꞌchi Balaam ixoꞌkxaꞌ Beor. Xlaꞌ aꞌctaꞌsanaꞌ aꞌntī ixaꞌkxokonuꞌn. Lej ixlakatī huan tumīn. Lāꞌ tlahualh talaclēꞌiꞌ para natlaja tumīn.
\v 16 Balaam lacaquilhnīca por ixtalaclēꞌiꞌ. Lāꞌ aꞌyuj huan burrosnuꞌ tūꞌ tachihuīnaꞌn, xlaꞌ chihuīnaꞌlh ixburro huaꞌchi kalhatin chiꞌxcuꞌ. Lāꞌ quilhnīlh por aꞌntū ixtlahuacuꞌtun. Lāꞌ xmān chuntzaꞌ Balaam tūꞌ makxtekca natlahua huan talaclēꞌiꞌ aꞌntū ixtlahuacuꞌtun. 
\p
\v 17 Huāꞌ tamāꞌna chiꞌxcuhuīꞌn aꞌntīn tamāsuꞌyu aꞌntūn tūꞌ stuꞌncuaꞌ, xmān taꞌaꞌkxokonuꞌn. Lāꞌ tuntūꞌ ixtapalhcaꞌn. Xlacaꞌn huaꞌchi muꞌsniꞌ aꞌntūn tascōhuanīꞌt. Lāꞌ xlacaꞌn huaꞌchi huan poklhnuꞌnīꞌn aꞌntū cāmākosū huan ūꞌniꞌ lāꞌ tūꞌ talēꞌn xcān. Dios cāxuiꞌlīnīꞌt aꞌnlhā nacāmacāꞌn huāꞌ tamāꞌna chiꞌxcuhuīꞌn aꞌnlhā natatachoko para pōꞌktu lāꞌ aꞌnlhā lej cāꞌpucsuaꞌ. 
\v 18 Xlacaꞌn takaꞌtlaꞌjcaꞌtzī aꞌxniꞌcaꞌ tachihuīnaꞌn. Pero aꞌntūn tahuan, tuntūꞌ ixtapalh. Xlacaꞌn tamāsuꞌyu que lej tzey palh kalhatin tlahua aꞌntū lacasquiꞌn quimacniꞌcaꞌn aꞌntūn tūꞌ tzey. Chuntzaꞌ talīꞌaꞌkxoko xlacaꞌn aꞌntīn tamakxtekmāꞌnacus aꞌntū ixtatlahua aꞌxniꞌcaꞌ tūnaꞌj ixtalakapasa ixtachihuīn Dios.
\v 19 Tahuan que xlacaꞌn libres lāꞌ tzē natatlahua chuxatū aꞌntūn talacasquiꞌn. Pero tūꞌ stuꞌncuaꞌ. Xlacaꞌn tūꞌ libresniꞌ. Xlacaꞌn huaꞌchi tachīꞌnīꞌn como tūla tamakxteka de tatlahua talaclēꞌiꞌ. Palh kalhatin chiꞌxcuꞌ tūla makxteka catūhuā, chuntzaꞌ xlaꞌ huaꞌchilh tachīꞌn. 
\v 20 Lāꞌ aꞌntīn talakapasnīꞌt huan Māpūtaxtūnuꞌ aꞌntī quiMāpaꞌksīniꞌcaꞌn lāꞌ chuntzaꞌ talīmakxteknīꞌt huan talaclēꞌiꞌ xalaꞌ nac quilhtamacuj, lāꞌ palh xlacaꞌn natatlahuapala talaclēꞌiꞌ lāꞌ tūlatzaꞌ tamakxteka, chuntzaꞌ āꞌchulāꞌ natala que aꞌnchī ixtahuanīꞌt xapūꞌla.
\v 21 Más tzey palh tūꞌ ixtalakapasli xlacaꞌn aꞌnchī līlacatejtin latāꞌkchokocan. Pero xlacaꞌn, aꞌyuj ixtacaꞌtzī, xlacaꞌn tamakxtekli huan ixlīmāpaꞌksīnniꞌ Dios aꞌntū ixcāmāsuꞌniꞌcanīꞌt.
\v 22 Chuntzaꞌ xlacaꞌn huaꞌchi aꞌnchī huancan:
\q Huan chichiꞌ huaꞌchokopala ixpaꞌtlāꞌnat.
\q Lāꞌ huan paꞌxniꞌ aꞌxniꞌcaꞌ paxnīꞌttzaꞌ, taspiꞌtpala para natapiꞌliꞌ nac cāꞌpūlhtok.
\c 3
\s Namimpala quiMāpaꞌksīniꞌcaꞌn Jesucristo
\p
\v 1 Tāꞌtimīn, ūꞌtzaꞌ huāꞌmāꞌ ixlīkalhtuꞌ carta aꞌntū iccātzoꞌknuniꞌnīꞌtaꞌniꞌ. Aꞌxniꞌcaꞌ quit ictzoꞌkli huan kalhtuꞌ carta, quit iccāmāpāstaquīcuꞌtuniꞌ aꞌntū lej tzey lāꞌ iccāmāpāstaquīcuꞌtuniꞌ huampala aꞌntū caꞌtzīyāꞌtittzaꞌ huiꞌxinaꞌn.
\v 2 Iclacasquiꞌn que huiꞌxinaꞌn napāstacāꞌtit aꞌntū ixtahuan makāntzaꞌ ixaꞌctaꞌsanaꞌnīꞌn Dios. Lāꞌ iclacasquiꞌn que nacāpāstacāꞌtit huan līmāpaꞌksīnniꞌ aꞌntū ixlaꞌ huan Māpūtaxtūnuꞌ aꞌntī quiMāpaꞌksīniꞌcaꞌn Jesucristo. Huāꞌ tamāꞌna līmāpaꞌksīnniꞌ iccāmāsuꞌniꞌyāniꞌ quinaꞌn huan apóstoles.
\p
\v 3 Lej tasquiꞌnī que namāchekxīꞌyāꞌtit huiꞌxinaꞌn aꞌntū naꞌiccāhuaniyāniꞌ. Aꞌxniꞌcaꞌ namin huan tamāꞌna āꞌxmān chiꞌchiniꞌ, nataꞌaꞌnan chiꞌxcuhuīꞌn aꞌntī natatlahuatāꞌkchoko ixlīhuāk aꞌntūn tūꞌ tzey chu aꞌntū xlacaꞌn tatlahuacuꞌtun. Lāꞌ nacātalīlaktzīꞌnāniꞌ huiꞌxinaꞌn.
\v 4 Lāꞌ xlacaꞌn natahuan: “Jesucristo hualh que xlaꞌ nataspiꞌtchokopala. Lāꞌ chuhuaꞌj, ¿lhachū huīꞌ? Tūꞌ minīꞌt. Quinapapanaꞌcaꞌn tanīnīꞌttzaꞌ. Lāꞌ chu aꞌcxtim lamāꞌ chuhuaꞌj desde aꞌxniꞌcaꞌ tzuculh huan quilhtamacuj”. Chuntzaꞌ natahuan xlacaꞌn.
\v 5 Lāꞌ quit iccāhuaniyāniꞌ huiꞌxinaꞌn que huāꞌmāꞌ tūꞌ stuꞌncuaꞌ. Aꞌnan lakatin catūhuā aꞌntū xlacaꞌn tacaꞌtzī lāꞌ aꞌntūn tūꞌ talīchihuīnaꞌncuꞌtun xlacaꞌn. Lāꞌ ūꞌtzaꞌ huāꞌmāꞌ: Lejtzaꞌ makān Dios chihuīnaꞌlh lāꞌ chuntzaꞌ talīlalh huan aꞌkapūn lāꞌ huan quilhtamacuj. Huan quilhtamacuj lītlahuaca xcān lāꞌ ixuīꞌ na ixpuꞌnan xcān.
\v 6 Lāꞌ huan quilhtamacuj, aꞌnchī ixuīꞌ xapūꞌla, līmālakuanīca huan xcān, aꞌxniꞌcaꞌ lalh huan lakuat.
\v 7 Lāꞌ Dios nā hualh que huan aꞌkapūn lāꞌ huan quilhtamacuj aꞌntūn tahuiꞌlānaꞌ chuhuaꞌj, natatachoko hasta huan chiꞌchiniꞌ aꞌntū Dios laclhcāhuiꞌlīnīꞌt. Lāꞌ huanmāꞌ chiꞌchiniꞌ natalhcukōꞌ. Lāꞌ huanmāꞌ chiꞌchiniꞌ Dios nacāmālaclēꞌnīꞌkōꞌ ixlīhuākcaꞌn huan tachiꞌxcuhuīꞌt aꞌntīn tūꞌ tzey. Lāꞌ nacāmāpātīnī.
\p
\v 8 Tāꞌtimīn, tūꞌ tipātzaꞌnkāyāꞌtit huāꞌmāꞌ: Huan Māpaꞌksīniꞌ Dios lakatin chiꞌchiniꞌ laktzīꞌn huaꞌchi lakatin mil cāꞌta. Lāꞌ nā lakatin mil cāꞌta laktzīꞌn huaꞌchi lakatin chiꞌchiniꞌ.
\v 9 Aꞌmakapitzīn tapuhuan que Dios takoxī para natlōkentaxtū aꞌntū huanīꞌt. Tūꞌ chuntzaꞌ. Xlaꞌ quincākaꞌlhīmāꞌniꞌ līlacatzucu como tūꞌ lacasquiꞌn que nīn chāꞌtin napātīniꞌn nac pūpātīn. Xlaꞌ lacasquiꞌn que ixlīhuākcaꞌn catamakxtekli ixtalaclēꞌiꞌcaꞌn.
\p
\v 10 Namin huan chiꞌchiniꞌ aꞌxniꞌcaꞌ namimpala huan Māpaꞌksīniꞌ Jesucristo. Xlaꞌ chu līmaktin namin aꞌxniꞌcaꞌ nīn tintīꞌ puhuan que namin. Chu līmaktin namin huaꞌchi kalhatin kaꞌlhānaꞌ chu līmaktin min. Huanmāꞌ chiꞌchiniꞌ huan aꞌkapūn nalaksputa. Lāꞌ palhaꞌ nakaxmatcan aꞌntū namacasāꞌnan. Lāꞌ natalakscuꞌpkōꞌ ixlīhuāk aꞌntūn tatasuꞌyu nac aꞌkapūn. Lāꞌ nalhcukōꞌ ixlīhuāk huan quilhtamacuj lāꞌ ixlīhuāk aꞌntū aꞌnan nac cāꞌquilhtamacuj. 
\p
\v 11 Lāꞌ chuhuaꞌj, como natalakuankōꞌ ixlīhuāk, xaꞌnca capāstactit huiꞌxinaꞌn aꞌnchī nalīlatahuiꞌlaꞌyāꞌtit. Huiꞌxinaꞌn natlahuaꞌyāꞌtit xmān ixtapuhuān Dios.
\v 12 Huiꞌxinaꞌn līpāxuj kaꞌlhīpāꞌnaꞌntit huanmāꞌ chiꞌchiniꞌ aꞌxniꞌcaꞌ Dios naxtāpalī huan quilhtamacuj. Huanmāꞌ chiꞌchiniꞌ huan aꞌkapūn nalhcukōꞌ. Lāꞌ natalakscuꞌpkōꞌ ixlīhuāk aꞌntū chuhuaꞌj tatasuꞌyunuꞌn nac aꞌkapūn. 
\v 13 Dios huanīꞌt que natlahua lakatin xasāstiꞌ aꞌkapūn lāꞌ lakatin xasāstiꞌ quilhtamacuj aꞌnlhā natlahuacan xmān aꞌntūn tzey. Uꞌtzaꞌ huāꞌmāꞌ kaꞌlhīmāꞌnauj, como chuntzaꞌ huanīꞌt Dios.
\p
\v 14 Chuntzaꞌ, tāꞌtimīn, līhuan kaꞌlhīpāꞌnaꞌntit huāꞌmāꞌ chiꞌchiniꞌ, calīhuiꞌlīꞌtit natlahuaꞌyāꞌtit aꞌntūn tzey na ixlacapūn Dios. Lāꞌ nīn tuntūꞌ catlahuaꞌtit aꞌntūn tzē nacātalīꞌaꞌksaꞌnīniꞌnāniꞌ. Lāꞌ nīn tuntūꞌ catlahuaꞌtit aꞌntūn tūꞌ tzey aꞌntū nacāmāxtunquīyāniꞌ de Dios.
\v 15 Cacaꞌtzītit huiꞌxinaꞌn que Dios līlacatzucu cākaꞌlhīmāꞌ āꞌmakapitzīn aꞌntī natapūtaxtu. Uꞌtzaꞌ tūnaꞌj līmimpala Jesucristo. Chuntzaꞌ cātzoꞌknuniꞌniꞌ huiꞌxinaꞌn quintāꞌtincaꞌn Pablo aꞌntī pāxquīꞌyāuj. Xlaꞌ tzoꞌkli chu aꞌnchī Dios māpuhuanīlh.
\v 16 Pablo cātzoꞌkli huāꞌ tamāꞌna catūhuā aꞌxniꞌcaꞌ cātzoꞌknuniꞌniꞌ huiꞌxinaꞌn. Lāꞌ huāk chuntzaꞌ cātzoꞌkli huan cartas aꞌntū cāmacāꞌnīꞌt. Lāꞌ nac āꞌmakapitzīn ixcartas aꞌntūn cātzoꞌknīꞌt, aꞌnan aꞌnlhā jicslīhuaꞌ māchekxīcan. Lāꞌ aꞌnlhā jicslīhuaꞌ, makapitzīn chiꞌxcuhuīꞌn tūꞌ xaꞌnca tamasuꞌyu. Xlacaꞌn ūꞌtunuꞌn aꞌntīn tūꞌ xaꞌnca tamāchekxī lāꞌ xtunc xtunc takalhlakaꞌīꞌ. Tūꞌ stuꞌncuaꞌ aꞌnchī xlacaꞌn tamāsuꞌyu ixtachihuīn Dios, lāꞌ tūꞌ xmān aꞌntūn tzoꞌkli Pablo. Lāꞌ ūꞌtzaꞌ nacālīmāpātīnī Dios.
\p
\v 17 Lāꞌ huiꞌxinaꞌn, tāꞌtimīn, caꞌtzīyāꞌtittzaꞌ aꞌnchīn taꞌaꞌkxokonuꞌncuꞌtun huan tamāꞌna aꞌntīn tūꞌ tzeyā chiꞌxcuhuīꞌn. Tūꞌ cacātaꞌaꞌkxokoniꞌ huiꞌxinaꞌn. Palh nacātaꞌaꞌkxokoyāniꞌ, chuntzaꞌ tzē namakxtekāꞌtit de nakalhlakaꞌīꞌyāꞌtit xaꞌnca.
\v 18 Lāꞌ chuhuaꞌj āꞌchulāꞌ catlahuaꞌtit aꞌntū līpāxuhua Dios. Lāꞌ āꞌchulāꞌ cascaꞌttit ixpālacata huan Māpūtaxtūnuꞌ aꞌntī quiMāpaꞌksīniꞌcaꞌn Jesucristo. Camākaꞌtlīꞌca chuhuaꞌj lāꞌ para pōꞌktu. Amén.