\id 1JN
\h 1 JUAN
\toc1 1 JUAN
\mt Huan Xapūꞌla Carta aꞌntūn Tzoꞌkli San Juan
\c 1
\s Jesucristo quincāmaxquīꞌyāniꞌ xasāstiꞌ quinquilhtamacujcaꞌn 
\p
\v 1 Quit iccātzoꞌknuniꞌmāꞌniꞌ huāꞌmāꞌ carta ixpālacata Jesucristo. Uꞌtzaꞌ aꞌntī quincāmaxquīꞌyāniꞌ xasāstiꞌ quinquilhtamacujcaꞌn. Xlaꞌ ixuīꞌtzaꞌ aꞌxniꞌcaꞌ tūnaꞌj ixtzucu huan quilhtamacuj. Quinaꞌn ickaxmatnīꞌtauj aꞌntū ixuan xlaꞌ aꞌxniꞌcaꞌ ixlatlāꞌhuan nac quilhtamacuj. Iclaktzīꞌnīꞌtauj con quilakastapuncaꞌn. Iclaktzīꞌnīꞌtauj lāꞌ icxaꞌmanīꞌtauj con quimacancaꞌn.
\v 2 Aꞌntī māstāꞌ quinquilhtamacujcaꞌn, xlaꞌ tasuꞌyulh huāꞌtzāꞌ nac cāꞌquilhtamacuj. Lāꞌ quinaꞌn iclaktzīꞌuj. Lāꞌ icmālacstūꞌncāuj palh iclaktzīꞌnīꞌtauj. Lāꞌ iccātāꞌlīchihuīnaꞌnāniꞌ huiꞌxinaꞌn ixpālacata aꞌntī māstāꞌ quinquilhtamacujcaꞌn. Xlaꞌ pōꞌktu ixtāꞌhuīꞌ Dios quinTātaꞌcaꞌn. Lāꞌ xlaꞌ natahuiꞌla para pōꞌktu. Lāꞌ xlaꞌ milh lāꞌ quinaꞌn iclaktzīꞌuj.
\v 3 Iccāhuaniyāniꞌ huiꞌxinaꞌn aꞌntū iclaktzīꞌnīꞌtauj lāꞌ aꞌntū ickaxmatnīꞌtauj. Lāꞌ chuntzaꞌ huiꞌxinaꞌn tzē nacaꞌtzīyāꞌtit que chu lakatin huan tachihuīn aꞌntū kalhlakaꞌīꞌyāuj. Lāꞌ nā tzē chu lakatin nalaꞌyāꞌtit con Dios quinTātaꞌcaꞌn lāꞌ Jesucristo ixOꞌkxaꞌ. Lāꞌ nā tzē nacaꞌtzīyāꞌtit que quinTātaꞌcaꞌn Dios lāꞌ Jesucristo ixOꞌkxaꞌ cātāꞌlahuiꞌlaniꞌ huiꞌxinaꞌn chu aꞌcxtim como quincātāꞌlahuiꞌlaniꞌ quinaꞌn.
\v 4 Huāꞌmāꞌ iccātzoꞌknuniꞌyāniꞌ huiꞌxinaꞌn como chuntzaꞌ lej nakaꞌlhīyāuj tapāxuhuān.
\s Dios ūꞌtzaꞌ xkakanaꞌ
\p
\v 5 Aꞌntūn quincāmāsuꞌniꞌniꞌ Jesucristo, ūꞌtzaꞌ aꞌntū iccāmāsuniꞌyāniꞌ huiꞌxinaꞌn. Lāꞌ ūꞌtzaꞌ huāꞌmāꞌ: Dios ūꞌtzaꞌ xkakanaꞌ. Lāꞌ tūꞌ lhā cāꞌpucsuaꞌ aꞌnlhā huīꞌ xlaꞌ, como xlaꞌ lej tzey lāꞌ tūꞌ maktin tlahua aꞌntūn tūꞌ tzey.
\v 6 Palh huanāuj que chu lakatin quinaꞌn con Dios, līhuan tlahuatāꞌkchokoyāuj aꞌntūn tūꞌ tzey, chuntza tasuꞌyu palh tūꞌ stuꞌncuaꞌ. Tasuꞌyu que quinaꞌn tūꞌ tāꞌtlāꞌhuamāꞌnauj Dios.
\v 7 Palh tlahuayāuj aꞌntūn tzey huaꞌchilh ixtlāꞌhuáuj aꞌnlhā xkaka, chuntzaꞌ huaꞌchi Dios huīꞌ aꞌnlhā xkaka. Lāꞌ chuntzaꞌ stuꞌncuaꞌ palh chu lakatin quinaꞌn con Dios. Lāꞌ ixkaꞌlhniꞌ Jesucristo, ixOꞌkxaꞌ Dios, quincāxapaniꞌkōꞌyāniꞌ ixlīhuāk quintalaclēꞌiꞌcaꞌn.
\p
\v 8 Palh huanāuj palh tūꞌ tlahuanīꞌtaꞌuj talaclēꞌiꞌ, chuntzaꞌ taꞌaꞌkxokoyāuj queꞌcstucaꞌn. Lāꞌ tūꞌ stuꞌncuaꞌ aꞌntū huanāuj.
\v 9 Palh huaniyāuj Dios palh tlahuanīꞌtauj talaclēꞌiꞌ, xlaꞌ naquincāmāsputūnuꞌniꞌyāniꞌ lāꞌ naquincāxapaniꞌkōꞌyāniꞌ ixlīhuāk quintalaclēꞌiꞌcaꞌn. Huāꞌmāꞌ caꞌtzīyāuj como Dios lej tzey lāꞌ pōꞌktu tlōkentaxtū aꞌntū huan.
\v 10 Palh ixuáuj que tuntūꞌ tlahuanīꞌtauj aꞌntūn tūꞌ tzey, chuntzaꞌ ixuáuj que Dios aꞌksaꞌnīniꞌn. Lāꞌ chuntza ixtasuꞌyulh palh tūꞌ kalhlakaꞌīꞌyāuj que stuꞌncuaꞌ aꞌntū huan ixtachihuīn Dios.
\c 2
\s Cristo tāꞌchihuīnaꞌn Dios por quinaꞌn
\p
\v 1 Quit iccātzoꞌknuniꞌyāniꞌ huiꞌxinaꞌn, quilakskaꞌtāꞌn. Lāꞌ iccāhuaniyāniꞌ que tūꞌ catlahuaꞌtit talaclēꞌiꞌ. Lāꞌ palh catīhuā tlahua talaclēꞌiꞌ, kaꞌlhīyāuj aꞌntīn tāꞌchihuīnaꞌn Dios por quinaꞌn. Xlaꞌ ūꞌtzaꞌ Jesucristo. Lāꞌ xlaꞌ tūꞌ tlahuanīꞌt nīn tuntūꞌ aꞌntūn tūꞌ tzey.
\v 2 Jesucristo nīlh huan nac cruz. Lāꞌ chuntzaꞌ xlaꞌ līmāpalalh quintalaclēꞌiꞌcaꞌn. Lāꞌ tūꞌ xmān quintalaclēꞌiꞌcaꞌn. Xlaꞌ māpalakōꞌlh ixtalaclēꞌiꞌcaꞌn ixlīhuākcaꞌn xalanīꞌn nac cāꞌquilhtamacuj.
\p
\v 3 Palh tlōkentaxtūyāuj aꞌntū līmāpaꞌksīniꞌn Dios, chuntzaꞌ caꞌtzīyāuj palh lakapasāuj xlaꞌ.
\v 4 Palh catīhuā nahuan que xlaꞌ lakapasa Dios, lāꞌ palh xlaꞌ tūꞌ tlahua aꞌntū Dios līmāpaꞌksīniꞌn, xlaꞌ aꞌksaꞌnīniꞌn lāꞌ tūꞌ kalhlakaꞌīꞌ ixtachihuīn Dios.
\v 5 Lāꞌ aꞌntīn tatlōkentaxtū aꞌntū Dios līmāpaꞌksīniꞌn, xlacaꞌn xaꞌnca tapāxquīꞌ Dios. Lāꞌ chuntzaꞌ tzē līcaꞌtzīyāuj palh quinaꞌn chu lakatin con Dios.
\v 6 Lāꞌ aꞌntīn tahuan palh chu lakatin con Dios, tasquiꞌnī que xlacaꞌn natalatāꞌkchoko chu aꞌnchī Jesucristo ixlatlāꞌhuan.
\s Huan xasāstiꞌ līmāpaꞌksīn
\p
\v 7 Tāꞌtimīn, iccātzoꞌknuniꞌmāꞌniꞌ huiꞌxinaꞌn ixpālacata lakatin līmāpaꞌksīn aꞌntūn tūꞌ xasāstiꞌ. Chu ūꞌtzaꞌ aꞌntū cātamāsuꞌniꞌniꞌ aꞌxniꞌcaꞌ chūꞌcus kalhlakaꞌīꞌtit huiꞌxinaꞌn.
\v 8 Huaꞌchilh xasāstiꞌ līmāpaꞌksīn aꞌntū iccātzoꞌknuniꞌmāꞌniꞌ. Cristo ixtlōkentaxtū huāꞌmāꞌ līmāpaꞌksīn lāꞌ nā huiꞌxinaꞌn tlōkentaxtūyāꞌtit. Lāꞌ como huiꞌxinaꞌn tlōkentaxtūyāꞌtit huāꞌmāꞌ līmāpaꞌksīn, huaꞌchilh aꞌksputmāꞌtzaꞌ aꞌnlhā cāꞌpucsuaꞌ lāꞌ huaꞌchilh xkakamāꞌtzaꞌ huan xatzey māxkakēniꞌ aꞌntū Cristo māstāꞌ.
\p
\v 9 Aꞌntīn tahuan palh tatlāꞌhuan aꞌnlhā xkaka lāꞌ palh tūꞌ talaktzīꞌncuꞌtun ixtāꞌtincaꞌn, xlacaꞌn talatlāꞌhuancus aꞌnlhā cāꞌpucsuaꞌ.
\v 10 Aꞌntīn tapāxquīꞌ ixtāꞌtincaꞌn, xlacaꞌn talatlāꞌhuan aꞌnlhā xkaka. Lāꞌ chuntzaꞌ tūꞌ tamātonkopū āꞌkalhatin. 
\v 11 Aꞌntīn tūꞌ talaktzīꞌncuꞌtun ixtāꞌtincaꞌn, xlacaꞌn talatlāꞌhuan aꞌnlhā cāꞌpucsuaꞌ. Lāꞌ tūꞌ tacaꞌtzī aꞌnlhā talatlāꞌhuan, como aꞌnlhā cāꞌpucsuaꞌ tūla talacahuānaꞌn.
\p
\v 12 Quit iccātzoꞌknuniꞌyāniꞌ huiꞌxinaꞌn, quilakskaꞌtāꞌn, como Dios cāmāsputūnuꞌniꞌnīꞌtaꞌniꞌ mintalaclēꞌiꞌcaꞌn por ixpālacata Jesucristo.
\v 13 Lāꞌ nā iccātzoꞌknuniꞌyāniꞌ huiꞌxinaꞌn, xanatātanaꞌ, como huiꞌxinaꞌn lakapasāꞌtittzaꞌ Dios. Xlaꞌ lanāntzaꞌ ixuīꞌ aꞌxniꞌcaꞌ tzuculh huan quilhtamacuj. Lāꞌ nā iccātzoꞌknuniꞌyāniꞌ huiꞌxinaꞌn, oꞌkxaꞌn, como huiꞌxinaꞌn tlajanīꞌtaꞌntit huan koꞌtiꞌtiꞌ. Lāꞌ nā iccātzoꞌknuniꞌyāniꞌ huiꞌxinaꞌn, camanaꞌ, como lakapasāꞌtit Dios quinTātaꞌcaꞌn. 
\v 14 Lāꞌ nā iccātzoꞌknuniꞌyāniꞌ huiꞌxinaꞌn, xanatātanaꞌ, como lakapasāꞌtittzaꞌ Dios. Xlaꞌ lanāntzaꞌ ixuīꞌ aꞌxniꞌcaꞌ tzuculh huan quilhtamacuj. Lāꞌ nā iccātzoꞌknuniꞌyāniꞌ huiꞌxinaꞌn, oꞌkxaꞌn, como huiꞌxinaꞌn lactliꞌhuiꞌqui. Lāꞌ huiꞌxinaꞌn kalhlakaꞌīꞌnīꞌtaꞌntit ixtachihuīn Dios. Lāꞌ tlaꞌjanīꞌtaꞌntit huan koꞌtiꞌtiꞌ.
\p
\v 15 Tūꞌ calakatītit aꞌntū xalaꞌ nac quilhtamacuj. Lāꞌ tūꞌ calakatītit huan tūn tūꞌ tzey aꞌntūn tatlahua aꞌntī xalanīꞌn nac quilhtamacuj. Aꞌntīn talakatī aꞌntū xalaꞌ nac quilhtamacuj, xlacaꞌn tūꞌ tapāxquīꞌ Dios quinTātaꞌcaꞌn.
\v 16 Ixlīhuāk aꞌntū xalaꞌ nac cāꞌquilhtamacuj, huāꞌmāꞌ tūꞌ ixlaꞌ Dios quinTātaꞌcaꞌn. Aꞌntī xalanīꞌn nac quilhtamacuj tatlahua aꞌntūn tūꞌ tzey aꞌntū squiꞌn ixmacniꞌcaꞌn. Lāꞌ lej talaktzīꞌncuꞌtun aꞌntūn tūꞌ tzey. Lāꞌ talīkaꞌtlaꞌjcaꞌtzī aꞌntūn takaꞌlhī. Ixlīhuāk huāꞌ tamāꞌna huāk xalaꞌ nac quilhtamacuj.
\v 17 Sputmāꞌ huan quilhtamacuj lāꞌ ixlīhuāk xalaꞌ nac quilhtamacuj aꞌntūn talacasquiꞌn huan tachiꞌxcuhuīꞌt. Pero aꞌntīn tatlahua ixtapuhuān Dios, xlacaꞌn natalatahuiꞌla para pōꞌktu.
\s Namin aꞌntī lej naꞌaꞌkxokonuꞌn
\p
\v 18 Quilakskaꞌtāꞌn, tasputmāꞌna huāꞌ tamāꞌna chiꞌchiniꞌ. Huiꞌxinaꞌn cātahuaninīꞌtaꞌniꞌ que namin huan ixtāꞌcaꞌtza Cristo. Lāꞌ chuhuaꞌj tatasuꞌyunīꞌt lhūhuaꞌ ixtāꞌcaꞌtza Cristo. Lāꞌ ūꞌtzaꞌ līcaꞌtzīyāuj palh tasputmāꞌnatzaꞌ huāꞌ tamāꞌna chiꞌchiniꞌ.
\v 19 Aꞌntī ixtāꞌcaꞌtzanīꞌn Cristo, xlacaꞌn tūꞌ lej stuꞌncuaꞌ palh takalhlakaꞌīꞌ chuntzaꞌ huaꞌchi quinaꞌn. Lāꞌ ūꞌtzaꞌ talītaxtunquīnīꞌt de quinaꞌn. Palh ixtakalhlakaꞌīꞌlh cahuā huaꞌchi quinaꞌn, ixtatachokolh con quinaꞌn. Lāꞌ como tataxtunquīlh de quinaꞌn, chuntzaꞌ tasuꞌyu que xlacaꞌn tūꞌ takalhlakaꞌīꞌ huaꞌchi quinaꞌn.
\p
\v 20 Lāꞌ huiꞌxinaꞌn, Cristo cāmaxquīꞌnīꞌtaꞌniꞌ huan Espíritu Santo. Lāꞌ ūꞌtzaꞌ līcaꞌtzīyāꞌtit milīhuākcaꞌn huan xatzey tachihuīn aꞌntū xastuꞌncuaꞌ.
\v 21 Quit iccātzoꞌknuniꞌmāꞌniꞌ huāꞌmāꞌ como huiꞌxinaꞌn caꞌtzīyāꞌtit aꞌntū xastuꞌncuaꞌ. Tūꞌ iccāhuanimāꞌniꞌ que huiꞌxinaꞌn tūꞌ caꞌtzīyāꞌtit aꞌntū xastuꞌncuaꞌ. Caꞌtzīyāuj que xtunc aꞌntū stuꞌncuaꞌ lāꞌ nā xtunc aꞌntūn tūꞌ stuꞌncuaꞌ.
\p
\v 22 Aꞌntī lej taꞌaꞌkxokonuꞌn, xlacaꞌn tahuan que Jesús tūꞌ ūꞌtzaꞌ Cristo aꞌntī Dios līmānūlh ixlīmāpaꞌksīniꞌ. Aꞌntīn tahuan chuntzaꞌ, xlacaꞌn ixtāꞌcaꞌtzanīꞌn Cristo. Xlacaꞌn talakmakaꞌn Dios quinTātaꞌcaꞌn lāꞌ nā ixOꞌkxaꞌ. 
\v 23 Aꞌntīn talakmakaꞌn ixOꞌkxaꞌ Dios, quinTātaꞌcaꞌn Dios tūꞌ cātāꞌlahuīꞌ. Lāꞌ aꞌntīn tahuan que Jesús ūꞌtzaꞌ Cristo, ixOꞌkxaꞌ Dios, Dios cātāꞌlahuīꞌ xlacaꞌn.
\p
\v 24 Lāꞌ huiꞌxinaꞌn tūꞌ capātzaꞌnkāꞌtit aꞌntū cātamāsuꞌniꞌnīꞌtaꞌniꞌ xapūꞌla ixpālacata ixtachihuīn Dios. Palh tūꞌ napātzaꞌnkāꞌyāꞌtit aꞌntūn cātamāsuꞌniꞌnīꞌtaꞌniꞌ xapūꞌla, chuntzaꞌ nacātāꞌlatahuiꞌlayāniꞌ ixOꞌkxaꞌ Dios lāꞌ Dios quinTātaꞌcaꞌn. 
\v 25 Lāꞌ Cristo huanīꞌt que xlaꞌ naquincāmaxquīꞌyāniꞌ xasāstiꞌ quinquilhtamacujcaꞌn para pōꞌktu.
\p
\v 26 Quit iccātzoꞌknuniꞌyāniꞌ huāꞌmāꞌ como taꞌaꞌnan āꞌmakapitzīn aꞌntīn cāꞌaꞌkxokocuꞌtunāniꞌ huiꞌxinaꞌn. 
\v 27 Cristo cāmaxquīꞌnīꞌtaꞌniꞌ huan Espíritu Santo. Lāꞌ como huan Espíritu Santo cātāꞌlahuiꞌlaniꞌ huiꞌxinaꞌn, tūꞌ maclacasquiꞌnāꞌtit huiꞌxinaꞌn que nacātamāsuꞌniꞌyāniꞌ āꞌcatīhuā huāꞌ aꞌntū iccāhuanimāꞌniꞌ, como huan Espíritu Santo cāmāsuꞌniꞌyāniꞌ ixlīhuāk. Lāꞌ aꞌntū xlaꞌ māsuꞌyu, ūꞌtzaꞌ xastuꞌncuaꞌ. Xlaꞌ tūꞌ māsuꞌyu catūhuā aꞌntūn tūꞌ stuꞌncuaꞌ. Lāꞌ chuntzaꞌ, como huan Espíritu Santo cāmāsuꞌniꞌnīꞌtaꞌniꞌ huiꞌxinaꞌn, chuntzaꞌ tūꞌ cataxtunquītit de Cristo.
\p
\v 28 Lāꞌ chuhuaꞌj quilakskaꞌtāꞌn, tūꞌ cataxtunquītit de Cristo. Lāꞌ chuntzaꞌ tūꞌ catijicuaꞌnui aꞌxniꞌcaꞌ xlaꞌ namimpala. Lāꞌ tūꞌ catimāxanaꞌuj na ixlacapūn. 
\v 29 Como huiꞌxinaꞌn caꞌtzīyāꞌtit que Jesucristo xmān tlahua aꞌntū lactzey, nā chuntzaꞌ nacaꞌtzīyāꞌtit que aꞌntīn tatlahua aꞌntūn tzey, ixlīhuākcaꞌn xlacaꞌn ixcamanaꞌ Dios.
\c 3
\s Quinaꞌn ixcamanaꞌ Dios
\p
\v 1 Cacaꞌtzītit aꞌnchī Dios lej quincāpāxquīꞌyāniꞌ como hualh que quinaꞌn ixcamanaꞌ Dios. Lāꞌ stuꞌncuaꞌ quinaꞌn ixcamanaꞌ Dios. Aꞌntī xalanīꞌn nac quilhtamacuj, xlacaꞌn tūꞌ ixcamanaꞌ Dios lāꞌ tūꞌ talakapasa Dios quinTātaꞌcaꞌn. Lāꞌ ūꞌtzaꞌ xlacaꞌn tūꞌ talīmāchekxī palh quinaꞌn ixcamanaꞌ Dios lāꞌ xlacaꞌn tūꞌ ixcamanaꞌ Dios.
\v 2 Tāꞌtimīn, chuhuaꞌj quinaꞌn ixcamanaꞌ Dios. Tūnaꞌj caꞌtzīcan aꞌnchī nalayāuj. Aꞌntū caꞌtzīyāuj, ūꞌtzaꞌ huāꞌmāꞌ: Aꞌxniꞌcaꞌ Cristo natasuꞌyu, quinaꞌn nalayāuj huaꞌchi xlaꞌ, como nalaktzīꞌnāuj chu aꞌnchī huanīꞌt xlaꞌ.
\v 3 Lāꞌ aꞌntīn takaꞌlhīmāꞌna natalaktzīꞌn Cristo, ixlīhuākcaꞌn xlacaꞌn tataxtunquī de aꞌntūn tūꞌ tzey. Lāꞌ tatlahua aꞌntūn tzey huaꞌchi Cristo.
\p
\v 4 Ixlīhuākcaꞌn aꞌntīn tatlahua talaclēꞌiꞌ, xlacaꞌn tūꞌ taꞌaꞌkahuānaꞌniꞌ huan ixley Dios. Palh catīhuā tūꞌ aꞌkahuānaꞌniꞌ Dios, ūꞌtzaꞌ huāꞌmāꞌ talaclēꞌiꞌ. 
\v 5 Lāꞌ huiꞌxinaꞌn caꞌtzīyāꞌtit que Cristo milh nac quilhtamacuj para naxapa quintalaclēꞌiꞌcaꞌn. Lāꞌ xlaꞌ tūꞌ tlahuanīꞌt nīn lakatin talaclēꞌiꞌ.
\v 6 Ixlīhuākcaꞌn aꞌntīn chu lakatin con Cristo, xlacaꞌn tūꞌ tatlahuatāꞌkchoko talaclēꞌiꞌ. Lāꞌ ixlīhuākcaꞌn aꞌntīn tatlahuatāꞌkchoko talaclēꞌiꞌ, xlacaꞌn tūꞌ tacaꞌtzī aꞌnchī huanīꞌt huan Cristo lāꞌ tūꞌ talakapasnīꞌt. 
\v 7 Quilakskaꞌtāꞌn, tūꞌ catamakxtektit que nacātaꞌaꞌkxokoyāniꞌ āꞌmakapitzīn aꞌntīn cātahuaniyāniꞌ que tzē natlahuayāꞌtit aꞌntūn tūꞌ tzey. Aꞌntīn tatlahuatāꞌkchoko aꞌntūn tzey, xlacaꞌn lactzey huaꞌchi ixlītzey Cristo.
\v 8 Aꞌntīn tatlahuatāꞌkchoko talaclēꞌiꞌ, xlacaꞌn tatāꞌtapaꞌksī huan koꞌtiꞌtiꞌ, como huan koꞌtiꞌtiꞌ pōꞌktu tlahuanīꞌt talaclēꞌiꞌ desde aꞌxniꞌcaꞌ māꞌaꞌnanīlh huan talaclēꞌiꞌ. IxOꞌkxaꞌ Dios milh nac quilhtamacuj para namālakuanī aꞌntūn tlahua huan koꞌtiꞌtiꞌ.
\p
\v 9 Aꞌntī ixcamanaꞌ Dios, xlacaꞌn tūꞌtzaꞌ tatlahuatāꞌkchoko talaclēꞌiꞌ, como Dios cāmaxquīꞌnīꞌt xasāstiꞌ ixquilhtamacujcaꞌn, lāꞌ chuntzaꞌ talīsāstīꞌlatāꞌkchoko. Tūlatzaꞌ tatlahuatāꞌkchoko talaclēꞌiꞌ, como ixcamanaꞌtzaꞌ Dios.
\v 10 Chuntzaꞌ tasuꞌyu aꞌntī ixcamanaꞌ Dios lāꞌ aꞌntī ixcamanaꞌ huan koꞌtiꞌtiꞌ. Aꞌntīn tūꞌ tatlahuacuꞌtun aꞌntūn tzey lāꞌ tūꞌ tapāxquīꞌ huan tāꞌtimīn, xlacaꞌn tūꞌ ixcamanaꞌ Dios.
\s Tasquiꞌnī nalāpāxquīꞌyāuj
\p
\v 11 Huan līmāpaꞌksīn aꞌntū cātamāsuꞌniꞌniꞌ xapūꞌla ūꞌtzaꞌ huāꞌmāꞌ: que nalāpāxquīꞌyāuj.
\v 12 Tūꞌ calauj huaꞌchi Caín aꞌntīn tāꞌtapaꞌksīlh huan koꞌtiꞌtiꞌ. Xlaꞌ maknīlh ixtāꞌtin. Lāꞌ ¿aꞌchīꞌ maknīlh? Maknīlh como Caín tlahualh aꞌntūn tūꞌ tzey lāꞌ ixlaktampilhīniꞌniꞌ ixtāꞌtin como xlaꞌ ixtlahua aꞌntūn tzey.
\p
\v 13 Tāꞌtimīn, palh xalanīꞌn nac quilhtamacuj tūꞌ cātalaktzīꞌncuꞌtunāniꞌ, tūꞌ capuhuaꞌntit que tūꞌ maktin la huāꞌmāꞌ.
\v 14 Quinaꞌn caꞌtzīyāuj que aꞌyuj huaꞌchi xanīn ixuanīꞌtauj, chuhuaꞌj kaꞌlhīyāuj xasāstiꞌ quinquilhtamacujcaꞌn. Huāꞌmāꞌ caꞌtzīyāuj como cāpāxquīꞌyāuj huan tāꞌtimīn. Lāꞌ aꞌntīn tūꞌ tapāxquīꞌnin, xlacaꞌn huaꞌchi xanīnīꞌncus lāꞌ tūꞌ takaꞌlhī xasāstiꞌ ixquilhtamacujcaꞌn.
\v 15 Aꞌntīn tacaꞌtzalaktzīꞌn ixtāꞌtincaꞌn xlacaꞌn huaꞌchi maknīniꞌnīꞌn na ixlacapūn Dios. Lāꞌ huiꞌxinaꞌn caꞌtzīyāꞌtit que huan maknīniꞌnīꞌn tūꞌ takaꞌlhī xasāstiꞌ ixquilhtamacujcaꞌn para pōꞌktu.
\v 16 Cristo quincāpāxquīꞌyāniꞌ lāꞌ hasta macamāstāꞌlh ixquilhtamacuj por quinaꞌn. Lāꞌ chuntzaꞌ quincāmāsuꞌniꞌniꞌ aꞌnchī līpāxquīꞌnincan. Lāꞌ chuntzaꞌ quinaꞌn tzē natamacamāstāꞌyāuj lāꞌ hasta nalīnīyāuj por quintāꞌtimīncaꞌn palh tasquiꞌnī.
\v 17 Palh kalhatin kaꞌlhī aꞌntū maclacasquiꞌn lāꞌ palh laktzīꞌn que ixtāꞌtin makasputa catūhuā, lāꞌ palh xlaꞌ tūꞌ lakalhuꞌman, chuntzaꞌ tasuꞌyu palh tūꞌ pāxquīꞌ Dios.
\v 18 Quilakskaꞌtāꞌn, tūꞌ xmān nahuanāuj palh cāpāxquīꞌyāuj āꞌmakapitzīn. Nacāmaktāyayāuj āꞌmakapitzīn. Chuntzaꞌ natasuꞌyu palh ixlīstuꞌncuaꞌ cāpāxquīꞌyāuj, lāꞌ tūꞌ xmān huanāuj.
\s Tūꞌ catilacapuhuanui na ixlacapūn Dios
\p
\v 19 Palh chuntzaꞌ cāpāxquīꞌyāuj āꞌmakapitzīn, chuntzaꞌ caꞌtzīyāuj palh lej stuꞌncuaꞌ tāꞌtapaꞌksīyāuj Dios. Lāꞌ chuntzaꞌ tūꞌ tamakchuyīyāuj na ixlacapūn Dios.
\v 20 Aꞌxniꞌcaꞌ uꞌcxcaꞌtzīyāuj na quiꞌaꞌclhcunuccaꞌn que tlahuanīꞌtaꞌuj aꞌntūn tūꞌ tzey, pāstacāuj que Dios más xakaꞌtlaꞌ que quiꞌaꞌclhcunuccaꞌn. Lāꞌ xlaꞌ caꞌtzīkōꞌ ixlīhuāk aꞌntū tlahuanīꞌtaꞌuj.
\v 21 Tāꞌtimīn, palh tūꞌ uꞌcxcaꞌtzīyāuj na quiꞌaꞌclhcunuccaꞌn que tlahuanīꞌtaꞌuj aꞌntūn tūꞌ tzey, chuntzaꞌ tūꞌ catilacapuhuanui na ixlacapūn Dios.
\v 22 Dios naquincāmaxquīꞌyāniꞌ aꞌntū nasquiꞌnāuj como aꞌkahuānaꞌniꞌyāuj ixlīmāpaꞌksīn lāꞌ tlahuayāuj aꞌntū līpāxuhua Dios.
\v 23 Ixlīmāpaꞌksīn ūꞌtzaꞌ huāꞌmāꞌ: Nalīpāhuanāuj Jesucristo ixOꞌkxaꞌ lāꞌ nalāpāxquīꞌyāuj chuntzaꞌ huaꞌchi xlaꞌ quincāmāpaꞌksīniꞌ.
\v 24 Aꞌntīn tatlōkentaxtū ixlīmāpaꞌksīn Dios, Dios cātāꞌlahuīꞌ xlacaꞌn. Xlaꞌ quincāmaxquīꞌnīꞌtaꞌniꞌ huan Espíritu Santo lāꞌ ūꞌtzaꞌ līcaꞌtzīyāuj que Dios quincātāꞌlahuiꞌlaniꞌ.
\c 4
\s Aꞌmakapitzīn tūꞌ tamāsuꞌyu por ixlīmāpaꞌksīn huan Espíritu Santo
\p
\v 1 Tāꞌtimīn, tūꞌ cacākalhlakaꞌīꞌtit ixlīhuākcaꞌn aꞌntīn tahuan que tamāsuꞌyu por ixlīmāpaꞌksīn Espíritu Santo. Cuenta catlahuaꞌtit lāꞌ capuhuaꞌntit palh chu aꞌcxtim huaꞌchi huan xastuꞌncuaꞌ tachihuīn aꞌntūn kalhlakaꞌīꞌnīꞌtaꞌntittzaꞌ. Lāꞌ chuntzaꞌ nacaꞌtzīyāꞌtit palh tamāsuꞌyumāꞌna ixtachihuīn Dios. Lakachu taꞌaꞌnīꞌt aꞌntīn tahuan que tachihuīnaꞌn por ixquilhtampān Dios. Lāꞌ xmān taꞌaꞌkxokonuꞌn.
\v 2 Naꞌiccāhuaniyāniꞌ huiꞌxinaꞌn aꞌnchī nalīcaꞌtzīyāꞌtit palh stuꞌncuaꞌ huan Espíritu Santo cāmāchihuīnī. Takaꞌlhī huan Espíritu Santo aꞌntīn tahuan palh Jesús ūꞌtzaꞌ huan Cristo aꞌntī Dios līmānūlh ixlīmāpaꞌksīniꞌ lāꞌ nā lacatuncuīlh lāꞌ chuntzaꞌ lītachiꞌxcuhuīꞌlh. Ixlīhuākcaꞌn aꞌntīn chuntzaꞌ tahuan, xlacaꞌn takaꞌlhī huan Espíritu Santo aꞌntī Dios macamilh.
\v 3 Lāꞌ aꞌntīn tahuan que tūꞌ stuꞌncua palh Jesús ūꞌtzaꞌ huan Cristo aꞌntī Dios līmānūlh ixlīmāpaꞌksīniꞌ lāꞌ nā lacatuncuīlh lāꞌ chuntzaꞌ lītachiꞌxcuhuīꞌlh, xlacaꞌn tūꞌ takaꞌlhī huan Espíritu Santo. Xlacaꞌn xmān cātahuaniyāniꞌ ixtachihuīn ixtāꞌcaꞌtza Cristo. Huiꞌxinaꞌn kaxpaꞌtnīꞌtaꞌntit que ixmilh ixtāꞌcaꞌtza Cristo. Lāꞌ chuhuaꞌj huīꞌ nac cāꞌquilhtamacuj.
\p
\v 4 Quilakskaꞌtāꞌn, huiꞌxinaꞌn tāꞌtapaꞌksīyāꞌtit Dios. Huiꞌxinaꞌn cātlajanīꞌtaꞌntit huāꞌ tamāꞌna aꞌkxokonuꞌnīꞌn por ixlīmāpaꞌksīn huan Espíritu Santo. Huan Espíritu Santo cātāꞌlahuiꞌlaniꞌ huiꞌxinaꞌn. Lāꞌ xlaꞌ āꞌlīhuaꞌcaꞌ kaꞌlhī līmāpaꞌksīn que huan koꞌtiꞌtiꞌ aꞌntī cāmāpaꞌksī xalanīꞌn nac quilhtamacuj.
\v 5 Huāꞌ tamāꞌna aꞌkxokonuꞌnīꞌn xlacaꞌn xalanīꞌn nac quilhtamacuj. Lāꞌ aꞌntūn tamāsuꞌyu nā xalaꞌ nac quilhtamacuj. Lāꞌ ūꞌtzaꞌ talīkaxmatniꞌ huan tachiꞌxcuhuīꞌt xalanīꞌn nac quilhtamacuj.
\v 6 Quinaꞌn tāꞌtapaꞌksīyāuj Dios. Lāꞌ aꞌntīn talakapasa Dios, xlacaꞌn takaxmata aꞌntū iccāmāsuꞌniꞌyāuj. Lāꞌ aꞌntīn tūꞌ talakapasa Dios, xlacaꞌn tūꞌ takaxmatcuꞌtun aꞌntū icmāsuꞌyuyāuj. Chuntzaꞌ tzē nalīcaꞌtzīyāuj tuchūyā līmāscaꞌtīn xastuꞌncuaꞌ lāꞌ nā tuchūyā līmāscaꞌtīn tūꞌ stuꞌncuaꞌ.
\s Dios cāpāxquīꞌ ixlīhuākcaꞌn tachiꞌxcuhuīꞌt
\p
\v 7 Tāꞌtimīn, tasquiꞌnī nalāpāxquīꞌyāuj. Dios ūꞌtzaꞌ aꞌntīn quincālāmāpāxquīꞌnīyāniꞌ. Aꞌntīn tapāxquīꞌnin, xlacaꞌn ixcamanaꞌ Dios lāꞌ talakapasa Dios.
\v 8 Aꞌntīn tūꞌ tapāxquīꞌnin xlacaꞌn tūꞌ talakapasa Dios, como Dios lej cāpāxquīꞌ ixlīhuāk tachiꞌxcuhuīꞌt. 
\v 9 Dios lej quincāpāxquīꞌyāniꞌ. Huāꞌmāꞌ līmāsuꞌyulh aꞌxniꞌcaꞌ macamilh nac quilhtamacuj ixOꞌkxaꞌ aꞌntī xmān kalhatin. Lāꞌ por xlaꞌ līkaꞌlhīyāuj xasāstiꞌ quinquilhtamacujcaꞌn.
\v 10 Aꞌnchī quinaꞌn pāxquīꞌyāuj Dios tūꞌ talacastuca aꞌnchī Dios quincāpāxquīꞌyāniꞌ. Xlaꞌ māsuꞌyulh aꞌnchī quincāpāxquīꞌyāniꞌ aꞌxniꞌcaꞌ macamilh ixOꞌkxaꞌ lāꞌ ūꞌtzaꞌ ixOꞌkxaꞌ aꞌntī māpalalh quintalaclēꞌiꞌcaꞌn. 
\p
\v 11 Tāꞌtimīn, como chuntzaꞌ Dios quincālīpāxquīꞌyāniꞌ, nā chuntzaꞌ quinaꞌn nalāpāxquīꞌyāuj.
\v 12 Dios nīn tintīꞌ laktzīꞌnīꞌt nīn maktin. Palh lāpāxquīꞌyāuj, chuntzaꞌ Dios quincātāꞌlahuiꞌlaniꞌ. Lāꞌ Dios quincāmaktāyayāniꞌ nalāpāxquīꞌyāuj con ixlīhuāk quiꞌaꞌclhcunuccaꞌn.
\v 13 Quinaꞌn caꞌtzīyāuj palh Dios quincātāꞌlahuiꞌlaniꞌ. Huāꞌmāꞌ caꞌtzīyāuj como quincāmaxquīꞌnīꞌtaꞌniꞌ huan Espíritu Santo.
\v 14 Lāꞌ quinaꞌn iclaktzīꞌnīꞌtauj ixOꞌkxaꞌ Dios. Lāꞌ icmālacstūꞌncāuj que Dios quinTātaꞌcaꞌn macamilh ixOꞌkxaꞌ para nacāmāpūtaxtū ixlīhuāk tachiꞌxcuhuīꞌt. 
\v 15 Aꞌntīn takalhlakaꞌīꞌ lāꞌ tahuan que Jesús ūꞌtzaꞌ aꞌntī ixOꞌkxaꞌ Dios, Dios cātāꞌlahuīꞌ xlacaꞌn.
\p
\v 16 Lāꞌ quinaꞌn caꞌtzīyāuj lāꞌ kalhlakaꞌīꞌyāuj palh Dios quincāpāxquīꞌyāniꞌ. Dios lej cāpāxquīꞌ ixlīhuāk tachiꞌxcuhuīꞌt. Lāꞌ Dios cātāꞌlahuīꞌ aꞌntīn tapāxquīꞌ āꞌmakapitzīn.
\v 17 Tasquiꞌnī napāxquīꞌyāuj Dios con ixlīhuāk quiꞌaꞌclhcunuccaꞌn. Lāꞌ chuntzaꞌ, huāꞌtzāꞌ nac huāꞌmāꞌ quilhtamacuj quinaꞌn napāxquīꞌnināuj chuntzaꞌ huaꞌchi Cristo pāxquīꞌnin. Lāꞌ chuntzaꞌ tūꞌ catijicuaꞌnui huan chiꞌchiniꞌ aꞌxniꞌcaꞌ Dios nacāmālaclēꞌnī huan tachiꞌxcuhuīꞌt.
\v 18 Aꞌntīn tapāxquīꞌ Dios, xlacaꞌn tūꞌ tajicuaꞌniꞌ Dios palh nacāmāpātīnī. Palh kalhatin pāxquīꞌnin, xlaꞌ tūꞌtzaꞌ kaꞌlhī tajicuāt. Aꞌntīn tajicuaꞌn que Dios nacāmāpātīnī, xlacaꞌn tūnaꞌj xaꞌnca tapāxquīꞌ Dios.
\p
\v 19 Quinaꞌn pāxquīꞌyāuj Dios como xlaꞌ xapūꞌla quincāpāxquīꞌniꞌ. 
\v 20 Palh kalhatin huan que pāxquīꞌ Dios lāꞌ palh tūꞌ laktzīꞌncuꞌtun ixtāꞌtin, xlaꞌ tūꞌ stuꞌncuaꞌ aꞌntū huan. Palh xlaꞌ tūꞌ pāxquīꞌ ixtāꞌtin aꞌntī laktzīꞌn, xlaꞌ tūla pāxquīꞌ Dios, como tūla laktzīꞌn Dios. 
\v 21 Huan līmāpaꞌksīn aꞌntū Dios quincāmaxquīꞌniꞌ, ūꞌtzaꞌ huāꞌmāꞌ: Aꞌntīn tapāxquīꞌ Dios nā natapāxquīꞌ ixtāꞌtimīncaꞌn.
\c 5
\s Tzē nataxtunquīyāuj de aꞌntūn tūꞌ tzey
\p
\v 1 Aꞌntīn takalhlakaꞌīꞌ que Jesús ūꞌtzaꞌ huan Cristo aꞌntī Dios līmānūlh ixlīmāpaꞌksīniꞌ, xlacaꞌn ixcamanaꞌ Dios. Lāꞌ aꞌntīn tapāxquīꞌ Dios quinTātaꞌcaꞌn, xlacaꞌn nā tapāxquīꞌ ixcamanaꞌ Dios.
\v 2 Lāꞌ chuntzaꞌ palh pāxquīꞌyāuj Dios lāꞌ palh aꞌkahuānaꞌniꞌyāuj aꞌntū quincālīmāpaꞌksīyāniꞌ, nā cāpāxquīꞌyāuj ixcamanaꞌ Dios.
\v 3 Lāꞌ palh pāxquīꞌyāuj Dios, natlahuayāuj ixlīmāpaꞌksīn. Lāꞌ tūꞌ jicslīhuaꞌ natlōkentaxtūyāuj ixlīmāpaꞌksīn. 
\v 4 Ixlīhuākcaꞌn ixcamanaꞌ Dios tataxtunquī de aꞌntūn tūꞌ tzey aꞌntūn tlahuacan nac quilhtamacuj. Quinaꞌn tzē nataxtunquīyāuj de aꞌntūn tūꞌ tzey, como līpāhuanāuj Dios.
\v 5 Aꞌntīn takalhlakaꞌīꞌ que Jesús ūꞌtzaꞌ ixOꞌkxaꞌ Dios, xmān xlacaꞌn tzē natataxtunquī de aꞌntūn tūꞌ tzey aꞌntūn tlahuacan nac quilhtamacuj.
\s Aꞌnchīn caꞌtzīcan palh Jesucristo ūꞌtzaꞌ ixOꞌkxaꞌ Dios
\p
\v 6 Caꞌtzīyāuj palh Jesús stuꞌncuaꞌ ixOꞌkxaꞌ Dios. Chuntzaꞌ hualh Dios aꞌxniꞌcaꞌ aꞌkpaxli Jesús. Lāꞌ nā aꞌxniꞌcaꞌ Jesús nīlh, nā Dios māsuꞌyulh que xlaꞌ ixOꞌkxaꞌ ixuanīꞌt. Huan Cristo aꞌntī Dios līmānūlh ixlīmāpaꞌksīniꞌ, xlaꞌ ūꞌtzaꞌ Jesús aꞌntī aꞌkpaxli lāꞌ nā nīlh nac cruz. Lāꞌ nā huan Espíritu Santo māsuꞌyu que Jesús ūꞌtzaꞌ ixOꞌkxaꞌ Dios. Lāꞌ huan Espíritu Santo māsuꞌyu xmān aꞌntū stuꞌncuaꞌ.
\v 7 Aꞌnan kalhatuꞌtun aꞌntīn tamālacstūꞌnca que Jesucristo ūꞌtzaꞌ ixOꞌkxaꞌ Dios. Lāꞌ huan kalhatuꞌtun xlacaꞌn: Dios quinTātaꞌcaꞌn lāꞌ huan Espíritu Santo lāꞌ nā ūꞌtzaꞌ aꞌntī huanican Tachihuīn. Chu aꞌcxtim tahuan que Jesucristo ūꞌtzaꞌ ixOꞌkxaꞌ Dios.
\v 8 Lāꞌ nac quilhtamacuj aꞌnan tāpātuꞌtun catūhuā aꞌntūn tamāsuꞌyu que Jesucristo ūꞌtzaꞌ ixOꞌkxaꞌ Dios. Huan Espíritu Santo chuntzaꞌ quincāmāsuꞌniꞌyāniꞌ. Lāꞌ nā Dios chuntzaꞌ māsuꞌyulh aꞌxniꞌcaꞌ Jesús aꞌkpaxli lāꞌ aꞌxniꞌcaꞌ nīlh.
\v 9 Quinaꞌn kalhlakaꞌīꞌyāuj aꞌntūn tamālacstūꞌnca huan tachiꞌxcuhuīꞌt. Lāꞌ āꞌchulāꞌ nakalhlakaꞌīꞌyāuj aꞌntū huan Dios. Lāꞌ Dios mālacstūꞌnca que Jesús ūꞌtzaꞌ ixOꞌkxaꞌ.
\v 10 Lāꞌ aꞌntīn talīpāhuan ixOꞌkxaꞌ Dios, xlacaꞌn taꞌuꞌcxcaꞌtzī na ixaꞌclhcunuccaꞌn palh stuꞌncuaꞌ aꞌntūn takalhlakaꞌīꞌ. Lāꞌ makapitzīn tūꞌ takalhlakaꞌīꞌ aꞌnchī Dios hualh palh Jesús ixOꞌkxaꞌ. Xlacaꞌn huaꞌchilh ixtahuan que Dios aꞌksaꞌnīniꞌn como tūꞌ takalhlakaꞌīꞌnīꞌt aꞌntū Dios hualh ixpālacata ixOꞌkxaꞌ.
\v 11 Lāꞌ Dios mālacstūꞌnca palh ūꞌtzaꞌ quincāmaxquīꞌyāniꞌ xasāstiꞌ quinquilhtamacujcaꞌn aꞌntū para pōꞌktu, palh līpāhuanāuj ixOꞌkxaꞌ.
\v 12 Aꞌntīn talīpāhuan ixOꞌkxaꞌ Dios, xlacaꞌn takaꞌlhī xasāstiꞌ ixquilhtamacujcaꞌn. Lāꞌ aꞌntīn tūꞌ talīpāhuan ixOꞌkxaꞌ Dios, xlacaꞌn tūꞌ takaꞌlhī xasāstiꞌ ixquilhtamacujcaꞌn. 
\s Māstāꞌca tapāstacnaꞌ
\p
\v 13 Quit iccātzoꞌkniꞌmāꞌniꞌ huāꞌmāꞌ: Huiꞌxinaꞌn aꞌntī līpāhuaꞌmpāꞌnaꞌntit ixOꞌkxaꞌ Dios como quit, iclacasquiꞌn que huiꞌxinaꞌn nacaꞌtzīyāꞌtit palh kaꞌlhīꞌyāꞌtit xasāstiꞌ minquilhtamacujcaꞌn aꞌntū para pōꞌktu. 
\p
\v 14 Lāꞌ tūꞌ lacapuhuanāuj aꞌxniꞌcaꞌ kalhtōꞌkaꞌyāuj, como Dios quincākaxmatāniꞌ palh squiꞌniꞌyāuj chu aꞌnchī ixtapuhuān.
\v 15 Lāꞌ palh caꞌtzīyāuj palh xlaꞌ quincākaxmatāniꞌ, chuntzaꞌ caꞌtzīyāuj palh xlaꞌ naquincāmaxquīꞌyāniꞌ aꞌntū squiꞌniꞌyāuj.
\p
\v 16 Palh catīhuā laktzīꞌn āꞌkalhatin aꞌntī tlahuamāꞌ lakatin talaclēꞌiꞌ aꞌntū tzē namāsputūnuꞌniꞌcan, chuntzaꞌ nalīkalhtōꞌkaꞌ āꞌkalhatin lāꞌ xlaꞌ nakaꞌlhī xasāstiꞌ ixquilhtamacuj. Chuntzaꞌ nakalhtōꞌkaꞌ palh huāꞌmāꞌ talaclēꞌiꞌ tzē namāsputūnuꞌniꞌcan. Lāꞌ palh huāꞌmāꞌ talaclēꞌiꞌ tūla māsputūnuꞌniꞌcan, chuntzaꞌ tūꞌ iccahuanimāꞌni que nalīkalhtōꞌkaꞌyāꞌtit por aꞌntī chuntzaꞌ tlahua.
\v 17 Ixlīhuāk aꞌntū koꞌhuaꞌjuaꞌ, huāk talaclēꞌiꞌ. Pero nā aꞌnan talaclēꞌiꞌ aꞌntūn tzē namāsputūnuꞌniꞌcan. 
\p
\v 18 Caꞌtzīyāuj que aꞌntī ixcamanaꞌ Dios, xlacaꞌn tūꞌ tatlahuatāꞌkchoko talaclēꞌiꞌ. Xlacaꞌn cāmaktakaꞌlha ixOꞌkxaꞌ Dios, lāꞌ chuntzaꞌ huan koꞌtiꞌtiꞌ tūla nacātlahuaniꞌ catūhuā.
\p
\v 19 Quinaꞌn caꞌtzīyāuj que tāꞌtapaꞌksīyāuj Dios. Lāꞌ caꞌtzīyāuj que aꞌntīn xalanīꞌn nac quilhtamacuj, xlacaꞌn cāmāpaꞌksī huan koꞌtiꞌtiꞌ.
\p
\v 20 Caꞌtzīyāuj que ixOꞌkxaꞌ Dios minīꞌt. Lāꞌ quincāmaxquīꞌnīꞌtaꞌniꞌ aꞌnchī nalīlakapasāuj aꞌntī xastuꞌncuaꞌ Dios. Lāꞌ chuhuaꞌj tāꞌlahuiꞌlānaꞌuj Jesucristo aꞌntī ixOꞌkxaꞌ Dios. Xlaꞌ scanaꞌnca Dios lāꞌ quincāmaxquīꞌyāniꞌ xasāstiꞌ quinquilhtamacujcaꞌn aꞌntū para pōꞌktu.
\v 21 Quilakskaꞌtāꞌn, tūꞌ calīpāhuantit nīn tuntūꞌ. Xmān Dios nalīpāhuaꞌnāꞌtit. Amén.