\id 2JN
\h 2 JUAN
\toc1 2 JUAN
\mt Ixlīkalhtuꞌ Carta aꞌntūn Tzoꞌkli San Juan
\c 1
\s Ixtakalhlakaꞌīꞌ huan xastuꞌncuaꞌ tachihuīn lāꞌ ixtapāxquīꞌnin 
\p
\v 1 Quit Juan, huan xapuxcuꞌ de huan aꞌntīn takalhlakaꞌīꞌ. Lāꞌ quit ictzoꞌkmāꞌ huanmāꞌ carta. Ictzoꞌknuniꞌyāniꞌ huiꞌx, huan tāꞌtin xapuscāt aꞌntī Dios lacsacli, lāꞌ nā mincamanaꞌ. Quit lej iccāpāxquīꞌyāniꞌ huiꞌxinaꞌn. Lāꞌ tūꞌ xmān quit. Nā cāpāxquīꞌyāniꞌ huiꞌxinaꞌn ixlīhuākcaꞌn aꞌntīn talakapasa huan xastuꞌncuaꞌ tachihuīn.
\v 2 Lāpāxquīꞌyāuj como quilīhuākcaꞌn kalhlakaꞌīꞌyāuj huan xastuꞌncuaꞌ tachihuīn, aꞌntūn tūꞌ maktin catisputli. 
\v 3 Caquincāsicuaꞌlanālīniꞌ Dios quinTātaꞌcaꞌn lāꞌ Jesucristo ixOꞌkxaꞌ Dios. Lāꞌ caquincātalakalhuꞌmaniꞌ. Lāꞌ caquincātamātzaꞌtaꞌtīꞌniꞌniꞌ quiꞌaꞌclhunuccaꞌn. Lāꞌ chuntzaꞌ quinaꞌn xaꞌnca nakalhlakaꞌīꞌyāuj huan xastuꞌncuaꞌ tachihuīn, lāꞌ lej nalāpāxquīꞌyāuj. 
\p
\v 4 Lej iclīpāxuhualh aꞌxniꞌcaꞌ iccaꞌtzīlh que āꞌmakapitzīn mincamanaꞌ talahuiꞌlānaꞌ chu aꞌnchī huan xastuꞌncuaꞌ tachihuīn, chuntzaꞌ huaꞌchi māpaꞌksīniꞌlh Dios quinTātaꞌcaꞌn. 
\v 5 Lāꞌ chuhuaꞌj tāꞌtin, icuaniyāniꞌ que nalāpāxquīꞌyāuj quilīhuākcaꞌn quinaꞌn. Huāꞌmāꞌ tūꞌ xasāstiꞌ līmāpaꞌksīn. Chu ūꞌtzaꞌ aꞌntū quincātamācaꞌtzīnīniꞌ aꞌxniꞌcaꞌ chūꞌcus kalhlakaꞌīꞌuj.
\v 6 Palh pāxquīꞌyāuj Dios, natlahuayāuj aꞌntū Dios quincālīmāpaꞌksīyāniꞌ. Xlaꞌ māpaꞌksīniꞌlh que nacāpāxquīꞌyāuj āꞌmakapitzīn. Uꞌtzaꞌ huāꞌmāꞌ cātahuaninīꞌtaꞌniꞌ aꞌxniꞌcaꞌ chūꞌcus kalhlakaꞌīꞌtit. 
\s Makapitzīn ixtaꞌaꞌkxokonuꞌn
\p
\v 7 Chuhuaꞌj lhūhuaꞌ aꞌkxokonuꞌnīꞌn talatlāꞌhuan nac cāꞌquilhtamacuj. Xlacaꞌn tahuan que tūꞌ stuꞌncuaꞌ palh lacatuncuīlh nac huāꞌmāꞌ quilhtamacuj huan Jesucristo aꞌntī Dios līmānūlh ixlīmāpaꞌksīniꞌ. Aꞌntīn tahuan huāꞌmāꞌ, xlacaꞌn aꞌkxokonuꞌnīꞌn lāꞌ ixtāꞌcaꞌtzanīꞌn Cristo.
\v 8 Cuenta catlaꞌhuaꞌtit que tūꞌ chu nasputa aꞌntū līscujpāꞌnaꞌntit. Cuenta catlaꞌhuaꞌtit como maklhtīniꞌncuꞌtunāꞌtit ixlīhuāk aꞌntū Dios nacāmaxquīꞌyāniꞌ huaꞌchi mintatlajcaꞌn. 
\p
\v 9 Aꞌntūn takalhlakaꞌīꞌ āꞌmakapitzīn tūꞌ xmān aꞌntū Cristo māsuꞌyulh. Nā xlacaꞌn tamāsuꞌyucuꞌtun āꞌlakatin līmāscaꞌtīn. Xlacaꞌn tūꞌ lej stuꞌncuaꞌ tatāꞌlatlāꞌhuan Dios. Aꞌntīn takalhlakaꞌīꞌ xmān aꞌntū Cristo māsuꞌyulh, ixlīstuꞌncuaꞌ xlacaꞌn tatāꞌlatlāꞌhuan Dios quinTātaꞌcaꞌn lāꞌ ixOꞌkxaꞌ Dios.
\v 10 Palh cālakmināniꞌ huiꞌxinaꞌn āꞌcatīhuā aꞌntīn tamāsuꞌyu aꞌntūn tūꞌ chu lakatin con aꞌntū māsuꞌyulh Cristo, tūꞌ nacāmānūꞌyāꞌtit na minchiccaꞌn. Lāꞌ tūꞌ nacāhuaniꞌyāꞌtit: “Dios caꞌcāꞌoꞌkskaꞌlhīniꞌ”. 
\v 11 Palh huiꞌxinaꞌn nacāhuaniꞌyāꞌtit: “Dios caꞌcāꞌoꞌkskaꞌlhīniꞌ”, lāꞌ chuntzaꞌ cātāꞌtlahuapāꞌnaꞌntit aꞌntūn tūꞌ tzey.
\s Macāꞌnca saludos
\p
\v 12 Lhūhuaꞌcus tiꞌaꞌnan aꞌntū iccāhuanicuꞌtunāniꞌ. Pero tūꞌ ictzoꞌkcuꞌtun nac lakatin carta. Iccālakaꞌncuꞌtunāni huiꞌxinaꞌn lāꞌ iccātāꞌchihuīnaꞌncuꞌtunāniꞌ calacan. Chuntzaꞌ lej nalīpāxuhuayāuj.
\p
\v 13 Tamacāꞌniꞌyāniꞌ saludos ixcamanaꞌ mintāꞌtin xapuscāt aꞌntī Dios lacsacnīꞌt.