\id LUK
\h SAN LUCAS
\mt2 Ni Ox Chivinti yu Tsʼoqlhi
\mt1 Lucas
\c 1
\s Ni Lucas tsʼoqnil yu Teófilo
\p
\v 1 Pumalhuu lapanakni tatsʼoqʼulata tacha tapasal
aniy taʼan tʼaunau kijnankʼan. Ixtatsʼoqʼulaputun yu
tapasal
\v 2 vachu va tacha kintajunin ni lapanakni yu talaqtsʼinʼol.
Yuʼuncha talhimasul ni ox chivinti yu lhichiviniy ni
Jesús.
\v 3 Xlhiyucha, Teófilo, ay lapanaki kʼatʼi, vachuʼ kilhipaʼinil
kaktsʼoqnin kitʼin tachun yu tacha tapasal. Va klaniʼojota
tachun mas va yu xapʼunaj.
\v 4 Va chuncha kakʼatsʼatʼi ni chivinti yu masunikʼantʼa
laqsaval val.
\s Laqputeʼekal ni katsukuyaʼ ni Juan yu jamaqchajʼavanaʼ
\p
\v 5 Tejkan Herodes ixlhichimoʼoy xalakatʼun Judea, ex
ixʼalin qayntaun xakura israelitas yu ixjunkan Zacarías.
Yucha va lhiyal ni kuras yu ixlapanakni Abías ixtajunita.
Ixlhitʼajun ixanati yu ixjunkan Elisabet. Yucha va ixpapanti
ixjunita yu pʼunaj xaʼay kuraj yu ixjunkan Aarón.
\v 6 Ixlaʼatʼuykʼan va la ox ixtatiʼukxuyanal kun Dios,
ixtamakay tachun yu ixnajun la ixlhachimoʼonkʼan ali
ixlhachimoʼon ni Dios, jantu katamakal tuʼuchun laqtaqal.
\v 7 Pero jantu tʼujuʼ ixjunita sasʼatʼakʼan, va jantu
lay ixlhitsukuy jasʼatʼa ni Elisabet. Vachuʼ ayaj lhuvajcha
ixjachʼitinkʼan ixtalhitʼajun yuʼuncha.
\p
\v 8 Taval taun julchan ixtʼajun tapatsan ni Zacarías
va tacha kura. Va tapaxtoqnil ixlapanakni katatapatsanil
ni Dios.
\v 9 Ex va tamakal taun suerte yu ixtamakay xakuras
israelitas, va paxtoqnil ni Zacarías. Ex va yucha tanuchal
yu la ay lakatajtan, va aqtaylcha jamapuvanaʼ taʼan ixvil
ni Dios.
\v 10 Yu tachun ixtalhavaxtu lapanakni yuʼuncha va maqspaʼ
ixtatamoʼoy ixkiltalakxtuti ni ay lakatajtan taʼan ixmapuvanan
ni Zacarías.
\p
\v 11 Ex va tasunil ixmayul ni Jalhachimoʼonu Dios, va
la ixlhijakanaj ni altar.
\v 12 Ex ni Zacarías tejkan chuncha laqtsʼil taʼan ixtʼajun
mapuvan, va ayaj talhanal.
\v 13 Pero ni ixmayul Dios va najun:
\p —Jantu katʼalhan, Zacarías. Ni Dios yu skʼinin, yucha
qalasmatʼan. Chavay mixanati Elisabet kalhitsukuyacha
qayntaun jasʼatʼa, kʼaʼuneʼe ixtaqaʼuti va Juan.
\v 14 Va ayaj lhuvaj achati kalhitsʼukʼuyeʼe y vachuʼ
ni lapanakni ayaj kataʼachaxʼiyaʼ.
\v 15 Ni anchanu jasʼatʼa, yucha la ay kunaʼ kun Dios.
Jantu kaʼotʼaʼ xaxkan uva nisin lhiʼotʼati. Tejkan jantukaʼ
tsukuy, yucha kalaqtanuyaʼ ni Espíritu Santo.
\v 16 Kaxaqalayaʼ ni lapanakni yu aniy machaqan Israel
ex pumalhuu katalhakapuʼanchoqoyaʼ ni Dios ixJalhachimoʼonukʼan.
\v 17 Yucha kapʼulayaʼ ex astan kaminaʼ ni Jalhachimoʼonuʼ.
Vachuʼ kunaʼ tacha ixjunita Elías yu ixlhichiviniy Dios,
va chuncha kunaʼ ixjatsukunti kun ixtapʼasta. Kamakayaʼ
ni chʼantaun kataval ixjalhanutkʼan ni xapaynin ali
sasʼatʼankʼan para katalapaxkal. Kalaqxtaqniyaʼ jatapastakʼati
yu chavay jantu taqalasmaknan para vas katatiʼukxuntayal.
Ex chuncha kalaʼoxiyacha ni lapanakni para katalaqaʼil
ni Jalhachimoʼonuʼ.
\p
\v 18 Ex va naul ni Zacarías, va junkal ixmayul Dios:
\p —¿Tas kakpukʼatsayaʼ licha laqsaval yu kiʼuniy? Yu
kitʼin va ayaj xapaycha, vachu kixanati la lhuvajcha
ixjachʼitin.
\p
\v 19 Ex qaltayl ni mayul:
\p —Kitʼin va Gabriel yu kmakay ixlhitapatsa ni Dios.
Va kmalaqachakal para kaktʼachivinin ni uxintʼi, va para
kunin ni aniy ox chivinti.
\v 20 Chavaycha jantu kalhakʼapʼupʼi kinchivinti, mas
laqsaval chuncha katapasayaʼ tejkan kalaqchaanaʼ ni
julchan. Xlhiyucha janunucha kʼaʼuneʼe. Jantucha lay
kʼachʼivinineʼe tus kaʼalinaʼ yu tacha xajkunan, ex kʼachʼivininchʼoʼoyeʼe.
\p
\v 21 Tachun ni lapanakni va maqspaʼ ixtapakxanta ni
Zacarías, va la ixtapastakʼutacha, va maqtoqoxatanul lakatajtan
ni Zacarías.
\v 22 Ex tejkan taxtuchoqol va jantucha lay chiviniy.
Ni lapanakni tapastaklhi ni va laqtsʼil taun tuʼuchun
ni lakatajtan. Ex vamuncha ixlakmajkuniy, va chuncha
janunucha tiʼukxuntayal.
\p
\v 23 Ex mamaktalcha ixlhitapatsa lakatajtan ni Zacarías,
va anchoqolcha la ixchaqaʼ.
\v 24 Ex astan va jaʼaynaʼ val ixanati Elisabet. Jantu
katataʼaxtul tus laqchaʼal laqakis malkuyuʼ, va naul:
\p
\v 25 “Chuncha kimakanil ni Jalhachimoʼonu Dios para
jantucha apalay kintalaktuʼul ni lapanakni.”
\s Ni María junkal ni kalhitsukuyaʼ ni Jesús
\p
\v 26 Tejkan laqchaʼal laqachaxan malkuyuʼ, ni Dios va
malaqachal ixmayul yu junkan Gabriel laka estado Galilea,
lakataun putaulan yu junkan Nazaret.
\v 27 Va laqkilachil qayntaun jatsiʼi yu ixjunkan María.
Ni yucha iskʼininti ixjunita qayntaun tsʼal yu ixjunkan
José. Yu José minchal kun ixlapanakni David yu maqancha
ay jalhachimoʼonuʼ ixjunita.
\v 28 Tejkan laqchinchal ni mayul Gabriel, va mastakʼal
ni María, va junil:
\p —Dios mapayniyan, va alinta kun uxintʼi. Apalay ox kaxajtachal
mijatsukunti xajantu matichun xanati.
\p
\v 29 Ex ni María va pastakʼul, aqtayl pastakʼa tisuncha
naunputuncha ni anchanu chivinti yu pumastakʼakal.
\p
\v 30 Ex va najun ni mayul:
\p —Jantu katʼalhan, María. Dios kaxtaqniyan taun ay japaxkanti.
\v 31 Uxintʼi aynacha kʼaʼuneʼe, kʼalhitsʼukʼuyeʼe qayntaun
tsʼal, kʼaʼuneʼe ixtaqaʼuti va Jesús.
\v 32 Yucha vamun yuʼ pʼas kunaʼ, kunkanaʼ Sasʼatʼa Dios.
Ni Dios kaxtaqniyaʼ ixpalhachimoʼon tacha ixlhachimoʼon
ixpapaʼ David yu ay jalhachimoʼonuʼ ixjunita maqancha.
\v 33 Mas va tavanancha yucha miJalhachimoʼonukʼan kunaʼ
mintachunkʼan yu israelitas untʼatʼik. Ixlhachimoʼon
jantu aqtaun kamiʼoyaʼ.
\p
\v 34 Ex ni María va najun:
\p —¿Tas va kunacha? Yu kitʼin va keʼemankaʼ, jantukaʼ
klhitsukuy kixapay.
\p
\v 35 Ex qaltayl ni mayul, va junil:
\p —Ni Espíritu Santo kachinaʼ la milakatunaj, ixtapʼasta
ni Dios chuncha kamakayaʼ. Xlhiyucha ni tsʼal yu katsukuyaʼ,
yucha ox kunaʼ kun Dios, va kunkanacha Sasʼatʼa Dios.
\v 36 Vachuʼ mintʼalapanaki Elisabet kalhitsukuyaʼ qayntaun
jasʼatʼa mas ayaj xanaticha. Ixtanajun jantu aqtaun
lay kalhitsukul jasʼatʼa pero chavay laqachaxancha malkuyuʼ
tiʼukxuyal aynaʼ.
\v 37 Yu Dios xoqta lay makay, jantu kaʼalil yu jantu
lay makay.
\p
\v 38 Ex ni María va naul:
\p —Chavaycha kitʼin kunita ixʼoqxtamati ni Jalhachimoʼonu
Dios. Kimakalcha va yu kimakaputuncha, yu tacha uxintʼicha
naʼun.
\p Ex va anchoqolcha ni mayul.
\s Ni María laqʼal ni Elisabet
\p
\v 39 Ex taxtul ni María, va soqol tus chaʼal taun putaulan
laka xaʼaspajunuxnan xaʼestado Judea.
\v 40 Tanuchal la ixchaqaʼ Zacarías, va mastakʼal ni
Elisabet.
\v 41 Tejkan qasmaklhi Elisabet ni jamastakʼanti, ex
ni jasʼatʼa va laklal la ixpajan. Ni Elisabet laqtanuʼol
ni Espíritu Santo.
\v 42 Va la pʼas naul:
\p —Apalay ox kaxajtachal mijatsukunti xajantu matichun
xanati. Vachuʼ ni jasʼatʼa la mimpajan.
\v 43 ¿Valiʼiycha kimpaxtoqniy ni kilaqminta ixnati
kiJalhachimoʼonuʼ?
\v 44 Tejkan xkʼili ijqasmaklhi mimastakʼanti, va laklal
kun achati ni jasʼatʼa la kimpajan.
\v 45 Va lhakʼapʼupʼi ni laqsaval kunaʼ yu naul ni Jalhachimoʼonu
Dios, xlhiyucha ox kaxajtachal mijatsukunti.
\p
\v 46 Ex va naul ni María:
\q La kelhanuti, kitʼin la ay kmakay ni Dios.
\q
\v 47 La ketsukunti va klhiʼachantajuy ni Dios yu kimalaqtaxtuta.
\q
\v 48 Kimapaynil mas va klakatʼuniy ni kitʼin yu ixʼoqxtamati
kunita.
\q Chavaycha tachun ni lapanakni mas va tavanancha va
si kintajunaʼ ni ox xajachal kijatsukunti.
\q
\v 49 Dios lhitʼajun tapʼasta, va yucha kimakanita yu lajʼay.
\q Yucha va si ox junita.
\q
\v 50 Mas va tavanancha lakmapayniy tachun ni lapanakni
yu tatoʼoyay.
\q
\v 51 Tachun yu makay yucha va masuy ixtapʼasta.
\q Ni lapanakni yu lajʼay takʼatsʼan la ixjatapastakʼatkʼan,
va lakstʼuniy lakmakatacha.
\q
\v 52 Va lakmaxtunil ixtapʼastakʼan ni lajʼay lapanakni,
\q va lajʼay lakmakal yu lakstʼuniy takʼatsan.
\q
\v 53 Yu tachavaniy va ox lakmaʼotsanil.
\q Yu maqalinin va lakmaxtuniʼol yu ixtalhitʼajun, valiʼiy
jalakmakaul.
\q
\v 54 Yucha kintaʼaqtayjuyan yu israelitas juntau, yu ixʼoqxtamatin
juntau.
\q Jantu aqtaun kʼapʼa, va si kintamapayniyancha.
\q
\v 55 Vachu va tacha lakjunil ni kepayankʼan yu maqancha
ixtatʼajun.
\q Vachu va tacha junkal ni Abraham, kalakmapaynikanaʼ
mas va tavanancha tachun sasʼatʼan.
\p
\v 56 Ex chuncha ni María va tʼataulal ni Elisabet va
tacha laʼatʼutu malkuyuʼ. Taval anchoqolcha la ixchaqaʼ.
\s Tacha putsukul ni Juan yu jamaqchajʼavanaʼ
\p
\v 57 Taval laqchaʼal ni julchan, va maqlaqavanalcha
ni Elisabet, lhitsukul va tsʼal.
\v 58 Ex ixlapanakni kun yu ancha ixtʼataulnin va takʼatsal
ni Dios xtaqnil taun ay jamapayninti. Tachun talhiʼachantajuʼol.
\v 59 Tejkan laqchaʼal paqtsajin julchan, va taʼal xvililichukʼuninin
ni jasʼatʼa. Ex chuncha ni lapanakni va ixtajunputun
Zacarías yu ixtaqaʼuti ixpay.
\v 60 Pero ixnati qaltayanal, va najun:
\p —Jantu yuʼ kajunkanaʼ, kajunkanaʼ va Juan.
\p
\v 61 Ex tanaul:
\p —¿Valiʼiycha? Jantu matichun katsukul milapanaki yu
chuncha kajunkal.
\p
\v 62 Ex talhisakmil yu ixpay yu janunuʼ y aqatapa, va
tamajkunil:
\p —¿Tisuncha taqaʼuti kʼaʼuneʼe ni mintsʼal?
\p
\v 63 Ex yu xapay skʼil aqxtaun tabla, ancha tsʼoqmukʼal:
“Kintsʼal kajunkanaʼ va Juan.” Ex ni lapanakni va
tus tachun saq tatayal.
\v 64 Ex taʼoxichoqolcha ixkil ni Zacarías, laycha malaklanichoqoy
isimaʼati, chivinchoqolcha, va ay makal ni Dios.
\v 65 Ex chuncha tatalhanal tachun ixtʼataulnin. Talajunil
yu tapasal tus takʼatsaʼol tachun ni lapanakni laka
aspajunuxnan xaʼestado Judea.
\v 66 Tachun yu taqasmaklhi taʼaqtayl tapastakʼa, va
tanajun:
\p —¿Tis va suncha kunacha ni anu jasʼatʼa?
\p Ni Jalhachimoʼonu Dios ixʼaqtayjuy ni jasʼatʼa.
\s Ni Zacarías ay makal ni Dios
\p
\v 67 Ex ni xapay Zacarías laqtanuʼol ni Espíritu Santo,
laqputeʼel ixchivinti Dios, va naul:
\q
\v 68 Ay kamakakal ni Dios kiJalhachimoʼonukʼan yu israelitas
juntau.
\q Kintalaqminan y kintamalaqtaxtuyan kijnan yu ixlapanakni
juntau.
\q
\v 69 Kintamalaqachaniyan qayntaun Jamalaqtaxtunuʼ yu
lhitʼajun tapʼasta.
\q Yucha ixpapanti kunaʼ ni David yu maqancha ixʼoqxtamati
Dios ixjunita.
\q
\v 70 Tejkan talhichivinil ni ixlapanakni yu maqancha
ixtalaqputeʼey ixchivinti Dios, va inchine tanaul.
\q
\v 71 Kintamalaqtaxtuyan la ixtamakakʼan yu kintʼalaxkayninkʼan
y tachun yu jantu ox kintalaqtsʼinan.
\q
\v 72 Lakmapaynil ni kepayankʼan yu maqancha ixtatʼajun.
\q Vachu pastakʼa yu maqancha naul ni kamakayaʼ.
\q
\v 73 Dios xtaqnil ixchivinti ni Abraham yu kimpaykʼan
yu maqancha ixtʼajun, naul laqsaval katapasayaʼ.
\q
\v 74 Naul ni kintamalaqtaxtuyan la ixtamakakʼan yu kintʼalakxkayninkʼan,
\q ex lay katapatsaniu ni yucha sin talhanti.
\q
\v 75 Najun jantucha kaʼalil kintalaqalhinkʼan,
\q vas katiʼukxuntayau, mas va tavanancha.
\q
\v 76 Chavaycha uxintʼi kesʼatʼa kʼatʼi, kalhimispʼakʼaneʼe
tacha qayntaun lapanaki yu laqputeʼey ixchivinti Dios
yu vilchal laktʼiyan.
\q Pʼunaj kʼapʼulpʼiniyeʼe ni Jalhachimoʼonuʼ taʼan kapuʼanaʼ,
kʼalaklaʼoxiniyeʼe ixjatapastakʼatkʼan ni lapanakni.
\q
\v 77 Kʼalakmakʼatsʼaniyeʼe ni lapanakni ni lay katapulaqtaxtul
\q y kalaqmalaqmixinikal ixtalaqalhinkʼan.
\q
\v 78 Ni Dios ayaj kintamapayniyan,
\q xlhiyucha kintaxtaqniyan xamaklku laktʼiyan.
\q
\v 79 Va tacha katunkul para jantucha kaputsʼislhi la
ixjatapastakʼatkʼan ni lapanakni
\q para kapuʼau la ixtin Dios y laqalajʼox kajuu kun yucha.
\p
\v 80 Ex ni tsʼal va aynlhi, va ixtʼajun mispanaʼ Dios.
Va ixtiʼukxuyal taʼan jantu alin chaqan tus laktasunil
xalapanakni Israel.
\c 2
\s Tacha putsukul ni Jesús
\r (Mt. 1:18-25)
\p
\v 1 Ex chuncha ni jalhachimoʼonuʼ Augusto va lhinaul
ni kaʼalil latsʼoqʼulanti tachun ni lapanakni ni anchanuʼ
lakamunukpaʼ.
\v 2 Ni anchanu latsʼoqʼulanti va yu pʼunaj ixtamakay
tejkan Cirenio xagobernador Siria ixjunita.
\v 3 Ex chuncha tachun ni lapanakni talhiʼalcha istsʼoqʼulakʼan
lakatamin por lakatamin taʼan ixputaulankʼan ixtajunita.
\p
\v 4 Ex va chuncha ni José vachu taxtulcha ni laka putaulan
Nazaret ni laka estado Galilea. Va al laka putaulan
Belén taʼan ixputaulan David ixjunita. Ni José minchal
kun ixlapanakni David yu maqancha ay jalhachimoʼonuʼ
ixjunita,
\v 5 xlhiyucha ancha al istsʼoqʼulakʼan. Tʼaʼal ni María
ni yu iskʼininti. Yucha aynacha ixjunita.
\p
\v 6 Ex chuncha tachaʼal ni Belén. Tejkan laqchaʼal
julchan, va maqlaqavanalcha ni María.
\v 7 Lhitsukulcha istsʼal yu saʼoqsni, pamilil kun laqchʼiti
ex va mamal taʼan tavajin ni jukin. Jantu kaʼalil chaqaʼ
taʼan lay kataloqojlhi.
\s Ixmayul Dios laktasunil yu xalhistaknan borregos
\p
\v 8 Ni anchanu putsʼista ixtavilanal lapanakni yu ixtalhistakʼa
ixborregoskʼan la ixlhimaqspaʼ ni putaulan Belén.
\v 9 Ex va laktasunil ixmayul ni Dios, va tus tʼoqx jamaputunkunil
ixmaklku ni Dios, va la pʼaysni ixjunita. Ex chuncha
yuʼuncha va la tatalhanal.
\v 10 Pero lakjunil ni ixmayul Dios:
\p —Jantu katʼalhanantʼik. Kitʼin klajunputunau taun chivinti
yu va ayaj ox yu kalakmaʼachajuyaʼ tachun ni lapanakni.
\v 11 Chavaycha la ixputaulan David va tsukuchal qayntaun
yu katamalaqtaxtuyan ni uxiknankʼan. Yucha ni Cristo
yu laksakta ni Dios para kamil lhachimoʼon ni lakamunukpaʼ.
\v 12 Katʼemayapitik ni jasʼatʼa pamilkanta, mamakanta
taʼan tavajin jukin. Tejkan chuncha katʼemayapitik ex
chuncha kʼapʼukʼatsʼayapitik ni laqsaval yu klajunau.
\p
\v 13 Ex nimancha tatasul lhuvaj ixmayulnin Dios, ay
tamakal ni Dios, va tanajun:
\q
\v 14 Ay kamakakal ni Dios laktʼiyan.
\q Aniy lakamunukpaʼ oxamaktaun katataulal ni lapanakni
yu tamakay yu lhinajun ni Dios.
\p
\v 15 Ex chuncha tejkan taʼanchoqolcha laktʼiyan ixmayulnin
Dios, ex yu jalhistaknan va talajunil:
\p —Kaʼaucha ni laka putaulan Belén, kaʼaucha laqtsʼinin
tacha tapasal yu kintamasunin Dios.
\p
\v 16 Ex tatakyauʼalcha lakpuxkaunan, tatemachal ni María
ali José kun ni jasʼatʼa, va mamakanta taʼan tavajin
jukin.
\v 17 Ni jalhistaknan tejkan talaqtsʼil ni jasʼatʼa
talaqputeʼenichoqol ni lapanakni yu ancha tayanal. Tajuniʼol
yu naul ni ixmayul Dios tejkan lhichivinil ni jasʼatʼa.
\v 18 Ex va tus saq tatayal tachun yu taqasmaktayl yu
talaqputeʼel ni jalhistʼaknan.
\v 19 Pero ni María, yucha va maʼaʼol la ixjalhanuti
tachun ni anchanu chivinti para kapastaklhi.
\v 20 Ex taminchoqochalcha aaqtaun ni jalhistaknan, talhiʼaylcha,
va ay tamakal ni Dios por tachun yu ixtalaqtsʼinta kun
yu ixtaqasmakta. Va laqsaval tapasal tacha jalakjunil
ni ixmayul Dios.
\s Tamaqxtaqnil ni Dios yu jasʼatʼa Jesús
\p
\v 21 Ex va chuncha tejkan tapasal laqatsajin julchan
va xvililichukʼunikal ni tsʼal. Ex tamukʼanilcha ixtaqaʼuti,
va tajunil Jesús, tacha naul ixmayul Dios tejkan jantukaʼ
ixlhitsukuy la ixpulakna ni ixnati.
\p
\v 22 Ex astan vachuʼ tamakal tachun yu ixtapaxtoqniy
katamakal la ixlhachimoʼon ni Moisés para oxicha kataval.
Ex chuncha talhaʼalcha ni jasʼatʼa yu ay lakatajtan,
laka putaulan Jerusalén para katamaqxtaqnil ni Dios.
\v 23 Va chuncha tsʼoqkanta la ixlhachimoʼon ni Dios:
“Tachun tsʼal yu saʼoqsni yucha ixnavin Dios kunaʼ.”
\v 24 Xlhiyucha ancha taʼal maqxtaqniniʼ ixlapaxkankʼan
yu tacha najun ixlhachimoʼon Dios: laʼatʼuy laqaxqavan
u laʼatʼuy palumax.
\p
\v 25 Qayntaun lapanaki yu junkan Simeón va ancha ixvil
Jerusalén. Ni anchanu lapanaki la ox ixtiʼukxuyal, va
ixtoʼoyay Dios. Ixpakxan para kaʼalil qayntaun yu kamalakaʼulal
xalapanakni Israel. Ni Espíritu Santo va ixtʼatiʼukxuyal
ni yucha.
\v 26 Va ixmasunita ni Espíritu Santo ni jantu kaniyaʼ
tus kalaqtsʼinaʼ ni Cristo yu kamalaqachayaʼ Dios.
\v 27 Ex chuncha ni Espíritu Santo va makʼatsanil ni
Simeón para katanul lakatajtan. Ex vachuʼ ixpayan ni
Jesús ancha tatanuchal para katamakal tacha najun ixlhachimoʼon
Moisés.
\v 28 Ex ni Simeón chʼapal ni jasʼatʼa, chʼixlhi, ay makal
ni Dios va naul:
\q
\v 29 Chavaycha, Dios kiJalhachimoʼonuʼ kʼatʼi, ni kitʼin
yu miʼoqxtamati kunita
\q va oxamaktauncha kaknil vachu va tacha yu kʼiʼun.
\q
\v 30 Chavay va klaqtsʼilcha la kintalakavanti yu Jamalaqtaxtunuʼ.
\q
\v 31 Yucha malaʼachʼatʼa para katalaqtsʼil tachun ni
lapanakni.
\q
\v 32 Yucha va tacha taun maklku yu kalakmaputunkuviniyaʼ
ixjatapastakʼatkʼan ni lapanakni yu jantu israelitas
kataval.
\q Ni kijnankʼan yu israelitas kuntau va por yucha kintatoʼoyayan
ni lapanakni.
\p
\v 33 Ex chuncha yu ixpay ali ixnati va tus saq tatayal
por ixchivinti yu lhichivinil ni jasʼatʼa.
\v 34 Ex ni Simeón va skʼinil Dios ni kalaqʼaqtayjul.
Naul, va junkal ni María yu ixnati ni jasʼatʼa:
\p —Ni aniy jasʼatʼa va por yucha pumalhuu xalapanakni
Israel katataqtayaʼ, vachu pumalhuu kataʼostaulchoqoyaʼ.
Kamasuyaʼ yu ox tin pero jantu ox katalaqtsʼinaʼ.
\v 35 Chuncha ox katasuyaʼ ixjatapastakʼatkʼan lhuvaj
lapanakni. Xlhiyucha kaxkaniyan melhanuti tus va tacha
espada yu kaltʼoʼonikʼa mintankilakna.
\p
\v 36 Vachu ancha ixvil qayntaun xanati yu ixlaqputeʼey
ixchivinti Dios. Yucha ixjunkan Ana, va istsiʼi Fanuel
ixjunita yu ixmaqlaqapʼu Aser. Ni Ana la lhuvaj ixjachʼitin
ixjunita. Yu ixapay va laqatujun jachʼitin ixtʼatʼajun
tejkan nil.
\v 37 Ex ni Ana yucha va ochenta y cuatro jachʼitin
tiyau ixtiʼukxuyal. Va lhilhiy ixtapatsay laka ay lakatajtan,
jantu ixtaxtuy, va iskʼin Dios, ixtaskʼajay. Va chuncha
ixtamoʼoniy ni Dios.
\v 38 Ex chuncha tejkan ancha tachaʼal José ali María,
vachucha chaʼal ni Ana. Va lhipaxkajlaqtsʼil Dios por
yu jasʼatʼa. Ex chuncha jalhixaqalal tachun ni lapanakni
yu ixtapakxanʼita para kalaqtaxtul ni laka putaulan
Jerusalén.
\s Ni jasʼatʼa Jesús lhaʼanchoqokal laka putaulan Nazaret
\p
\v 39 Ex chuncha tejkan ni María ali José tamakaʼolcha
tachun yu ixnajun ixlhachimoʼon ni Dios, va taʼanchoqolcha
xaʼestado Galilea la ixputaulankʼan yu junkan Nazaret.
\v 40 Ancha aynchal ni jasʼatʼa, va ancha laqapʼaysninchal.
Va lhuvaj jatapastakʼati lhitsukul, vachu la mapaynil
ni Dios.
\s Tejkan tsʼal ixjunita ni Jesús laktʼachivinil yu lajʼay lapanakni yu ay lakatajtan Jerusalén
\p
\v 41 Ixpayan ni Jesús ixtaʼan laka Jerusalén taun taun
jachʼitin tejkan ixʼalin ni Paxku yu ay ixkʼatankʼan
ni israelitas.
\v 42 Tejkan laqchaʼal laqakautʼuy ixjachʼitin ni Jesús,
va jalaktʼaʼal laka kʼatan.
\v 43 Tejkan paʼanchal ni anchanu kʼatan, ni ixpayan
ni Jesús ixtaʼanchoqota la ixchaqakʼan. Jantu katakʼatsal
ni Jesús vananaj taulal laka putaulan Jerusalén.
\v 44 Ixtalhilay kalaktʼamil alati lapanakni y chuncha
va taun julchancha lakatin ixtaʼanta. Tejkan tapuxkaul
la ixlapanaknikʼan kun ixʼamigoskʼan,
\v 45 jantu katatemal. Ex ixtaminchoqota lakxkaunan
laka putaulan Jerusalén.
\v 46 Tejkan paqtʼutunuʼ, tatemal ni Jesús yu ay lakatajtan.
Va ixlaktʼavil yu ixtamasuy ixlhachimoʼonkʼan ni israelitas.
Ixlajqasmatʼa y vachuʼ ixlaklhisakmiy chivinti.
\v 47 La ox ixmalaqasiy y la ox ixlajqaltajiy tus va
saq tataulal tachun yu ixtaqasmatʼa.
\v 48 Tejkan tatemal ni Jesús, ni ixpayan va saq tatayal.
Va naul ni ixnati:
\p —Kesʼatʼa, ¿valiʼiycha chuncha laycha? Mimpay ali kitʼin
klapuxkauyau, jantu klatemayau, xakmaqaninintau.
\p
\v 49 Ex lakjunil ni Jesús:
\p —¿Valiʼiycha kilapuxkauyau? ¿Jantu kʼatsʼayatʼik ni
va maqskʼiniy kakmakal ixlhitapatsa kimpay?
\p
\v 50 Pero yuʼuncha jantu katamalaqasil yu lakjunil.
\p
\v 51 Ex laktʼaʼanchoqol ni Jesús laka putaulan Nazaret.
Va ixlajqalasmatʼa. Ni ixnati va ixmaʼay la ixjalhanuti
tachun yu tapasal.
\v 52 Ex ni Jesús va ixʼajin y vachu ixʼayʼan ixjatapastakʼati.
Vachu ni Dios kun ni lapanakni ixtalhiʼachantajuy ni
Jesús.
\c 3
\s Ni Juan yu jamaqchajʼavanaʼ jalaqxaqalay ni lapanakni para katamapaxal ixjatapastakʼatkʼan
\r (Mt. 3:1-12; Mr. 1:1-8; Jn. 1:19-28)
\p
\v 1 Laqakaukisicha jachʼitin ixlhachimoʼonunta yu ay jalhachimoʼonuʼ yu Tiberio ixjunkan. Ni Poncio Pilato xagobernador Judea ixjunita. Yu xagobernador Galilea yucha va Herodes ixjunita. Ixlaqaj Herodes va Felipe ixjunkan, yucha xagobernador Iturea ali Trakonite ixjunita. Yu Lisanias va xagobernador Abilinia ixjunita.
\v 2 Yu Anás ali Caifás, yuʼuncha ixʼukxtinkʼan xakuras israelitas ixtajunita.
\p Ex chuncha lakakʼavinan ni Dios va xaqalal ni Juan yu istsʼal Zacarías.
\v 3 Ex chuncha ni Juan tapasaʼol talakachux taʼan ukstsʼuniy ni xalaʼaxkan Jordán. Va jaxaqalal ni lapanakni para kataʼaqchajʼaul va chuncha katasul ni tapaxalcha ixjatapastakʼatkʼan, ex ni Dios kalaqmalaqmixinil ixtalaqalhinkʼan.
\v 4 Yu ixmakay ni Juan va tacha yu istsʼoqta ni Isaías yu ixlaqputeʼey ixchivinti Dios la maqancha, va naul:
\q Qayntaun tʼasay ni lakakʼavin, va najun:
\q “Kalaʼoximanitʼikcha ixlakatin ni Jalhachimoʼonuʼ.
\q Vas kʼamakʼatʼikcha para tsʼalti katapasal.”
\q
\v 5 Tachun yu lakpuʼuyan kalaqtsamaʼokal.
\q Tachun yu aspajunuxnan kalakpujkal.
\q Taʼan jalkʼavil, va kalasavalakal,
\q taʼan lakapulkalau, va lakaputaun kaval.
\q
\v 6 Va chuncha katatapaxalcha ixjatsukuntikʼan tachun ni lapanakni. Katalaqtsʼinaʼ ni Dios tejkan kalaqmalaqtaxtuyaʼ ni ixlapanakni —va chuncha naul ni Isaías.
\p
\v 7 Tejkan qaynlhuu lapanakni talaqchinchal ni Juan para kalaqmaʼaqchajʼaval, ex va lakjunil ni Juan:
\p —Laktuʼunuʼ tsapulin untʼatʼik. ¿Taʼayucha xatajunancha ni uxiknan para kaʼostʼik ni jamaqanlqajnati yu lakamintacha?
\v 8 Kʼamakʼatʼikcha yu lajʼox para ex chuncha katasulcha ni mapʼaxatʼatʼikcha mimputsukkʼan. Jantu kanauntʼik meʼemankʼan: “Ni Abraham yucha kimpaykʼan”. Kitʼin klajunau yu Dios lay kalakmapaxal ni aniy chiyux para kataval sasʼatʼan Abraham.
\v 9 Chavaycha va tacha taun hacha yu va laycha kachaqxtal ni kʼiu la ixtitakxiyati. Yu jantu makay yu lajʼox, yucha kachaqxtakal, va kamapʼukalcha ni laka jikmi.
\p
\v 10 Ex tanajun pumalhuu lapanakni:
\p —¿Tas kakmakayaucha?
\p
\v 11 Ex qaltayanal ni Juan, va najun:
\p —Yu lhitʼajun aqxtʼuy chamarra, va kaxtaqnil yu jantu kalhitsukul. Vachu yu lhitʼajun ixlhiʼuti, va katʼaʼul yu tsʼanqaniy.
\p
\v 12 Ex chuncha tachinchal yu tachʼinin impuestos para kamaqchajʼavakal, va tanajun:
\p —Jamalaniniʼ, yu kijnan ¿tas kakmakayaucha?
\p
\v 13 Ex lakjunil ni Juan:
\p —Jantu kʼalhitʼoqslaskʼinitʼik tumin yu jantu tapaxtoqniyan.
\p
\v 14 Ex yu tropas vachu talhisakmil:
\p —Yu kijnan ¿tas kakmakayaucha?
\p Ex lakjunil:
\p —Jantu kʼalakʼalhaunitʼik alati lapanakni kun miʼayajnatkʼan y jantu kʼalakmakʼanutʼik. Kʼatʼaʼoxamaktʼamitʼikcha kun yu milhilhajatkʼan.
\p
\v 15 Tachun ni lapanakni ixtapakxanʼita yu ixtanajun kamalaqachayaʼ ni Dios. Taval va ixtapastakʼa la ixjalhanutkʼan ni Juan kaval ni Cristo yu ixtanajun kaminaʼ.
\v 16 Pero ni Juan va jalakjunil tachun ni lapanakni:
\p —Ni kitʼin va xkan klapumaʼaqchajʼavayau. Pero kaminaʼ aqayntaun yu apalay ay xajantu kitʼin. Yu kitʼin tus jantu kimpaxtoqniy kaklakmusxʼoqnil xamusni ni ixvarachi. Yucha katapumaʼaqchajʼavayan kun ni Espíritu Santo ali jikmi.
\v 17 Va tacha kalhitsukul la ixmakaʼ ixpatankʼalhan para kalaktankʼalhal ni lapanakni tacha trigo. Yu lajʼoxi kalakmaʼayaʼ la ixpakʼatsa pero yu tacha pʼoqxni kalaqxavayaʼ laka jikmi yu jantu aqtaun kamixaʼ.
\p
\v 18 Va lhuu jatapastakʼati jaxtaqnil ni lapanakni. Jalaqputeʼenil ni ox chivinti yu masuy tacha lay katapulaqtaxtul.
\v 19 Ni gobernador Herodes ixtʼatʼajun Herodías yu ixanati ixpʼisaqa, vachu makal alati axtoqnuʼ yu jantu ox kaval, xlhiyucha laqʼaymal ni Juan.
\v 20 Ex chuncha ni Herodes makachoqol yu apalay jantu ox, va manul laka pachʼin ni Juan.
\s Aqchajʼaul ni Jesús
\r (Mt. 3:13-17; Mr. 1:9-11)
\p
\v 21 Ex chuncha tejkan taʼaqchajʼauʼol tachun ni lapanakni, ni Jesús vachu aqchajʼaul. Va aqtayl tamoʼoy ex talaqltiʼal ni laktʼiyan.
\v 22 Va taʼeltujunil ni Espíritu Santo va tacha taun palumax. Vachuʼ chivinkal ni laktʼiyan, va junkal ni Jesús:
\p —Uxintʼi, kesʼatʼa kʼatʼi, ayaj ikpaxkayan. Va ayaj klhiʼachantajuy por uxintʼi.
\s Yu maqancha ixjapayan ni Jesús
\r (Mt. 1:1-17)
\p
\v 23 Ex chuncha ni Jesús tejkan aqtayl tapatsaniy ni Dios va pʼuxaunkau ixjachʼitin. Ni lapanakni va ixtapastakʼa ni Jesús va istsʼal José. Ni José va istsʼal Elí
\v 24 yu istsʼal Matat yu istsʼal Leví yu istsʼal Melki yu istsʼal Jana yu istsʼal José
\v 25 yu istsʼal Matatías yu istsʼal Amós yu istsʼal Nahúm yu istsʼal Esli yu istsʼal Nagai
\v 26 yu istsʼal Maat yu istsʼal Matatías yu istsʼal Semei yu istsʼal José yu istsʼal Judá
\v 27 yu istsʼal Joana yu istsʼal Resa yu istsʼal Zorobabel yu istsʼal Salatiel yu istsʼal Neri
\v 28 yu istsʼal Melki yu istsʼal Adi yu istsʼal Kosam yu istsʼal Elmodam yu istsʼal Er
\v 29 yu istsʼal Josué yu istsʼal Eliezer yu istsʼal Jorim yu istsʼal Matat yu istsʼal Leví
\v 30 yu istsʼal Simeón yu istsʼal Judá yu istsʼal José yu istsʼal Jonán yu istsʼal Eliaquim
\v 31 yu istsʼal Melea yu istsʼal Mainán yu istsʼal Matata yu istsʼal Natán yu istsʼal David
\v 32 yu istsʼal Isaí yu istsʼal Obed yu istsʼal Booz yu istsʼal Salmón yu istsʼal Naasón
\v 33 yu istsʼal Aminadab yu istsʼal Aram yu istsʼal Esrom yu istsʼal Fares yu istsʼal Judá
\v 34 yu istsʼal Jacob yu istsʼal Isaac yu istsʼal Abraham yu istsʼal Taré yu istsʼal Nakor
\v 35 yu istsʼal Serug yu istsʼal Ragau yu istsʼal Peleg yu istsʼal Heber yu istsʼal Sala
\v 36 yu istsʼal Kainán yu istsʼal Arfaxad yu istsʼal Sem yu istsʼal Noé yu istsʼal Lamek
\v 37 yu istsʼal Matusalén yu istsʼal Enoc yu istsʼal Jared yu istsʼal Mahalaleel yu istsʼal Kainán
\v 38 yu istsʼal Enós yu istsʼal Set yu istsʼal Adán yu istsʼal Dios.
\c 4
\s Laqtsʼintanukan ni Jesús
\r (Mt. 4:1-11; Mr. 1:12-13)
\p
\v 1 Ni Jesús ixlaqtanuʼojota ni Espíritu Santo. Ex
chuncha va minchoqochalcha ni laʼaxkan Jordán. Ni Espíritu
Santo va lhaʼal Jesús lakakʼavinan.
\v 2 Ancha ixvilchal aqtʼuy pʼuxaun julchan. Ni xaʼukxtin
aqmoqxnuʼ ixlaqtsʼintanuy incha lay kamaqtaqalhinil
ni Jesús. Ni Jesús jantu kavayl ni anchanu tʼuy pʼuxaun
julchan, ex astan va chavanilcha.
\p
\v 3 Ex ni xaʼukxtin aqmoqxnuʼ va junil:
\p —Incha laqsaval Sasʼatʼa Dios kʼatʼi, ex ni aniy chiyux
kʼamakʼatʼi pan.
\p
\v 4 Ni Jesús va qaltayl, va junil:
\p —Yu tsʼoqkanta la ixchivinti Dios va najun: “Qayntaun
lapanaki, jantu vamun ixvayti kaputsukul. [Va maqskʼiniy
kaputsukul tachun ni chivinti yu najun ni Dios.]”
\p
\v 5 Ex chuncha ni xaʼukxtin aqmoqxnuʼ va lhaʼal la
ixʼukxni taun ay aspajun. Ex taun panchʼix ni Jesús
va masunikal tachun ni lakamunukpaʼ taʼan talhachimoʼonun
lapanakni.
\v 6 Ni xaʼukxtin aqmoqxnuʼ va junil:
\p —Kakxtaqniʼoyan ni uxintʼi tachun ni palhachimoʼon
ni aniy lakamunukpaʼ kun tachun ixtoʼoxixtu. Va kitʼin
ikxtaqnikanta tachun yu aniy y lay ikxtaqnichoqoy va
taʼayucha kitʼincha ikxtaqniputuncha.
\v 7 Incha kʼintʼaʼaqtsʼoʼoqtʼaniyeʼe y kʼintʼamoʼoniyeʼe
ex tachun minavin kunaʼ.
\p
\v 8 Ex ni Jesús qaltayl:
\p —[Uxintʼi Satanás, va kapiticha.] La ixchivinti Dios
najun: “Katʼoʼoyatʼi vamun miJalhachimoʼonu Dios yu
alintachal laktʼiyan, y vamun yuʼ kʼatʼapʼatsʼanin.”
\p
\v 9 Ex chuncha ni xaʼukxtin aqmoqxnuʼ lhaʼal ni Jesús
laka putaulan Jerusalén. Tataukʼal la ixʼaqstiʼ yu ay
lakatajtan, va junil:
\p —Incha laqsaval Sasʼatʼa Dios kʼatʼi, va kʼaltʼujnu
ni aniy.
\v 10 Va tsʼoqkanta la ixchivinti Dios:
\q Ni Dios kalaklhijunaʼ ni ixmayulnin para katalhistakni.
\q
\v 11 Yuʼuncha katatsʼapʼastʼukʼan la ixmakakʼan,
\q va para jantu kʼatʼaʼalhitʼi la minchʼajaʼ laka chiyux.
\p
\v 12 Ex ni Jesús qaltayl:
\p —Vachuʼ najun la ixchivinti Dios: “Jantu aqtaun kalaqtsʼintʼanutʼi
ni Dios miJalhachimoʼonuʼ incha laqsaval kamakayaʼ yu
najun.”
\p
\v 13 Ex chuncha ni xaʼukxtin aqmoqxnuʼ tejkan laqtsʼintanuʼol
ni Jesús incha kamaqtaqalhinil, va makaul ni Jesús tus
ataun julchan.
\s Ni Jesús aqtayl laqputeʼey yu ox chivinti xaʼestado Galilea
\r (Mt. 4:12-17; Mr. 1:14-15)
\p
\v 14 Ni Jesús anchoqopal ni xaʼestado Galilea la ixtapʼasta
ni Espíritu Santo. Ex talakachux anchanu lakatʼun ni
lapanakni va si ixtalhichiviniy ni Jesús.
\v 15 Ni Jesús ixjamalaninin lakalhuu chaqan taʼan ixtataqxtoʼa
ni israelitas y tachun tatoʼoyal.
\s Ni Jesús jantu kalaqaʼikal la ixputaulan Nazaret
\r (Mt. 13:53-58; Mr. 6:1-6)
\p
\v 16 Ex ni Jesús al laka Nazaret yu putaulan taʼan
aynchal. Taun xajulchan jastaknati yucha tanupalchal
taʼan ixtataqxtoʼa ni israelitas, va chuncha ixputsuku
ixjunita. Ancha tayal, aqtaypalcha puteʼey ixchivinti
Dios.
\v 17 Taxtaqnil ni libro yu istsʼoqta Isaías yu maqancha
ixlaqputeʼey ixchivinti Dios. Tejkan puxʼoqlhi ni libro,
va temal taʼan istsʼoqkanta yu najun:
\q
\v 18 IxʼEspíritu ni Jalhachimoʼonu Dios yucha alinta
kun kitʼin.
\q Va kilakʼulal taun lhitapatsa, ni kaklakjunil ni kilpatanin
yu ox chivinti.
\q [Kimalaqachata para kaklakmaʼayajnil yu tamaqaninin
la ixjalhanutikʼan.]
\q Kimalaqachata para kaklaqlaqputeʼenil ni tachʼinin
tacha lay oxamaktaun kataputaxtul.
\q Kimalaqachata para kakmalakavanil yu laʼachʼixin para
katataxʼoqlhicha.
\q
\v 19 Kimalaqachata para kaklaqputeʼenil ni lapanakni
ni chilcha ni julchan tejkan Dios kalakmapayniyaʼ.
\p
\v 20 Ex ni Jesús mapuxtoqchoqolcha ni libro, xtaqnil
yu xaʼaqtayjunuʼ ni chaqaʼ taʼan tataqxtoʼa, ex taulalcha.
Tachun yu ixtaʼalinta ni laqa chaqaʼ, va tus sniy talaqtsʼil
ni Jesús.
\v 21 Ex yucha aqtayl jalaktʼachiviniy, va lakjunil:
\p —Chavaycha laqsaval taqayntsal la mintalakaʼukxpukʼan
anchanuʼ chivinti yu tsʼoqkanta la ixchivinti Dios yu
xaʼasmakyatʼikcha.
\p
\v 22 Ex tachun ox talhichivinil ni Jesús, va tus saq
tataulal ni va ayaj lajʼoxi ni chivinti yu naul. Pero
astan ixtalalhisakmiy siya yuʼuncha:
\p —¿Jantu yuʼ istsʼal ni José?
\p
\v 23 Ex ni Jesús lakjunil:
\p —Ni uxiknankʼan laqsaval kilajunputunau ni chivinti
yu najun: “Jakʼuchʼunuʼ, kakʼuchʼuchʼoʼokʼa meʼeman.”
Vachuʼ laqsaval kilajunputunau: “Ijqasmakvi yu lajʼay
axtoqnuʼ yu makʼatʼi laka putaulan Kapernaum. Chavay
vachu va chun kʼamakʼatʼi aniy la mimputaulan.” Va
chuncha kilajunputunau.
\p
\v 24 Ex taylhaʼal ixchivinti ni Jesús, va naul:
\p —Laqsaval klajunau matichun lapanaki yu laqputeʼey
ixchivinti Dios, jantu talaqaʼiy la ixputaulan.
\v 25 Laqsaval klajunau ayaj ixtaʼalin lhuvaj tiyaunin
ni xalakatʼun Israel tejkan maqancha ixtʼajun Elías
yu ixlaqputeʼey ixchivinti Dios. Jantu katamal xkan
por laʼatʼutu jachʼitin apakltaun, ex alil ay chavan
talakapuchux ni anchanu lakamunukpaʼ.
\v 26 Pero ni Elías jantu kalhimalaqachakal kalaqʼaqtayjul
ni anchanuʼ tiyaunin yu ixtavilanal xalakatʼun Israel.
Malaqachakal kaʼaqtayjul va qayntaun tiyau yu ixvil
laka putaulan Sarepta taʼan ukstsʼuniy ni laka putaulan
Sidón.
\v 27 Vachuʼ xalakatʼun Israel ayaj ixtaʼalin lhuvaj
taqanʼanin yu ixlakapuchʼita tejkan maqancha ixtʼajun
ni Eliseo yu ixlaqputeʼey ixchivinti Dios. Pero jantu
matichun yuʼuncha kalajkʼuchʼukal. Va kʼuchʼukal vamun
ni Naamán yu machaqaʼ Siria yu jantu israelita kaval.
\p
\v 28 Tejkan chuncha taqasmaklhi, ex tachun ni lapanakni
laqa chaqaʼ ayaj tatalqamal.
\v 29 Tamaʼostaulnil ni Jesús va talhaʼal la ixlhimaqspaʼ
ni anchanu putaulan Nazaret. Talhaʼal la ixkuktan ni
aspajun taʼan vil ni putaulan. Ixtanajun ni ancha katanqalhukal.
\v 30 Pero ni Jesús pulaqpuslhi taʼan ixtayanal ni yuʼuncha,
ex anchoqolcha.
\s Ni Jesús maxtunil aqmoqxnuʼ qayntaun lapanaki
\r (Mr. 1:21-28)
\p
\v 31 Ex chuncha ni Jesús anchoqol Kapernaum, va taun
putaulan laka estado Galilea. Ancha aqtaynichoqol jalakmalaniy
ni lapanakni taun xajulchan jastaknati.
\v 32 Tus vak takʼatsal ni lapanakni por ixchivinti.
Va ixchiviniy tacha qayntaun jalhachimoʼonuʼ.
\p
\v 33 Ni laqa chaqaʼ taʼan ixtataqxtoʼa, ancha ixvil
qayntaun joʼati yu ixlhitʼajun taun aqmoqxnuʼ. Va pʼas
tʼasal, naul:
\p
\v 34 —Kilamakajuucha. ¿Valiʼiycha kilaʼakxkauyaucha
ni kijnan, Jesús, machaqaʼ Nazaret kʼatʼi? ¿Va tʼantʼa
para kilalaktʼilhiu? Yu kitʼin ikmispayan, ni uxintʼi
va yu ixnavin Dios kʼatʼi.
\p
\v 35 Ex ni Jesús laqʼaymal ni aqmoqxnuʼ, va junil:
\p —Saqcha kʼuntʼi, kamakʼaucha ni aniy lapanaki.
\p Ex chuncha ni aqmoqxnuʼ chʼapachoqol ni lapanaki tus
maqtal lakatʼun taʼan tayanal ni lapanakni, ex taxtunichoqolcha,
jantucha tuʼuchun kamakanil.
\v 36 Ex tus tachun tatalhanal y taʼaqtayl talajuniy:
\p —¿Suncha lhichiviniy ni aniy lapanaki? Lhitʼajun tapʼasta
para kalaklhijunil ni jantu ox espíritus ni katataxtul
y yuʼuncha tataxtuʼojoy.
\p
\v 37 Ex chuncha mas va toʼoxtaycha putaulan kaval ni
anchanu lakatʼun si ixtalhichiviniy ni Jesús.
\s Ni Jesús palay makachoqol ixʼatinaʼ ni Simón Pedro
\r (Mt. 8:14-15; Mr. 1:29-31)
\p
\v 38 Ex ni Jesús taxtuchal ni laqa chaqaʼ taʼan ixtataqxtoʼa,
va al la ixchaqa ni Simón Pedro. Ixʼatinaʼ ni Pedro
ixtaqanʼay, va ixchʼapata pʼas skakati. Ex tatapayninil
kaʼaqtayjul ni Jesús.
\v 39 Ex chuncha ni Jesús tayal taʼan mal ni taqanʼan,
va laqʼaymal ni skakati, ex ni skakati va niman makaunchoqol.
Ni ixʼatinaʼ Pedro nimancha ostaulchoqol, aqtaylcha jalakvavay.
\s Ni Jesús palay jalakmakachoqol pumalhuu lapanakni
\r (Mt. 8:16-17; Mr. 1:32-34)
\p
\v 40 Ex tejkan va laycha kaʼanchal ni julchan, ixtaʼalin
taqanʼanin yu xoqtacha taqanʼati ixtalhitʼajun, va laklhiminikal
ni Jesús. Yucha va qayntamin laqmoqslanil ixmakaʼ. Chuncha
va lakmaʼayajniʼochoqol ni taqanʼanin.
\v 41 La lhuvaj aqmoqxnun tataxtul la ixlakatunajkʼan
ni lapanakni, talaktʼasal, va tanajun:
\p —Uxintʼicha ni Sasʼatʼa Dios kʼatʼi.
\p Pero ni Jesús, yucha jalaqʼaymal ni aqmoqxnun para
jantucha katachivinil. Ixtakʼatsay ni Jesús va yu laksakta
Dios.
\s Ni Jesús ixʼanta laqputeʼeniʼ laka alati putaulanin xaʼestado Galilea
\r (Mr. 1:35-39)
\p
\v 42 Tejkan tunkumintacha, ni Jesús taxtul ni laka putaulan,
al taʼan jantu tʼujuʼ chaqan pero yu lapanakni talakxkaul
tus tatemachal taʼan ixvilchal. Tatapayninil ni Jesús
para jantu kalakmakaul.
\v 43 Pero ni Jesús va lakjunil:
\p —Kitʼin ikmaqskʼiniy kajkʼal alati putaulanaxna, kaklaqputeʼel
ni ox chivinti tacha lhachimoʼonun ni Dios. Va yucha
klhimalaqachakanta.
\p
\v 44 Ex chuncha ixtiʼukxuyal ni Jesús xaʼestado Galilea,
ixlaqputeʼey ixchivinti Dios laqa chaqan taʼan ixtataqxtoʼa
ni israelitas.
\c 5
\s Ni Jesús makal para lhuu jatanti katachʼapal
\r (Mt. 4:18-22; Mr. 1:16-20)
\p
\v 1 Taun julchan ni Jesús ixyachal la ixkilpaʼ yu ay
lakxkan yu junkan Genesaret. Va tachinchal lhuvaj lapanakni
tus lapatsʼiuksni ixtajunita, taqasmakputuncha ixchivinti
Dios.
\v 2 Ni Jesús laqtsʼil laʼatʼuy barcos laqpoqapaj ixtavilanal
lakxkan taʼan va ukstsʼuniycha ni ixkilpaʼ. Ni xachʼapanan
jatanti yuʼuncha ixtalaqtaxtutacha, ixtatʼajunchoqoycha
chaʼanan ixchʼoqxkʼan.
\v 3 Ex ni Jesús tajul laqataun barco yu ixnavin Simón
Pedro ixjunita, tapayninil para stal kalhaʼal tsʼuniy.
Ex ni Jesús taulalcha ni laka barco, aqtaylcha lakmalaniy
ni lapanakni.
\p
\v 4 Tejkan chivinʼol, junil ni Simón:
\p —Kʼamuuchʼoʼo ni mibarco, kalhipʼinchiy tus taʼan pulman
ni lakxkan. Ancha kʼamutʼi ni minchʼoqxni para kachʼapʼa
ni jatanti.
\p
\v 5 Yu Simón qaltayl:
\p —Jamalaniniʼ, chavay taun tatsʼis xaktapatsayau, jantu
tuʼuchun kakchʼapau, pero incha uxintʼi lhinaʼun, ex kakmujuchoqoyaʼ
ni kinchʼoqxni.
\p
\v 6 Ex tejkan laqsaval chuncha tamakal yu laklhijunil
ni Jesús, tachʼapal lhuvaj jatanti tus taʼexlhi ni ixchʼoqxkʼan.
\v 7 Ex chuncha aqtaylcha talamaqnaqaʼiy yu ixtʼaltanankʼan
yu ixtatajumanal alakataun barco, va para katamil aqtayjunun.
Ex ni yuʼuncha tamil, va tus tamaʼaqtsamal ni laʼatʼuy
barco, va laycha kataʼanchal ni barcos por istsʼinkʼixtu
ni jatanti.
\v 8 Tejkan chuncha laqtsʼil ni Simón Pedro tus taʼaqtsoqoqtanil
la ixtalakaʼukxpuʼ ni Jesús, va junil:
\p —Kʼimakʼaucha, Jalhachimoʼonuʼ, ni kitʼin va qayntaun
maqtaqalhiniʼ joʼati kunita.
\p
\v 9 Ni Simón kun yu ixtatʼaʼalinta va tus saq taval
por tachʼapal lhuvaj jatanti.
\v 10 Vachuʼ Jacobo ali Juan yu sasʼatʼan ni Zebedeo
yu ixtʼaltanan ni Simón, yuʼuncha vachu va tus saq taval.
Pero ni Jesús junil ni Simón:
\p —Jantu katʼalhan. Va ixtʼemay jatanti pero chavaycha
kalaktʼemayeʼe lapanakni.
\p
\v 11 Ex tejkan talhimilcha ixkilpaʼ lakatʼun ni barcos,
va tus talakmakaulaʼol tachun ixʼaxtoqnukʼan, va tatʼaʼal
ni Jesús.
\s Ni Jesús palay makachoqol qayntaun yu lakapuchʼita
\r (Mt. 8:1-4; Mr. 1:40-45)
\p
\v 12 Tejkan Jesús ixvil lakataun putaulan, chinchal
qayntaun lapanaki yu ixlakapuchʼita. Va laqtsʼil Jesús
ex taʼaqtsoqoqtal y talakaputatamal tus lakatʼun, tapayninil,
va junil:
\p —Jalhachimoʼonuʼ, incha uxintʼi kʼanau, lay kinkʼuchʼunin
kintaqanʼati.
\p
\v 13 Ex ni Jesús moqslanil ixmakaʼ, va junil:
\p —Chun, kitʼin knajun palaycha kʼaʼunchʼoʼo.
\p Tejkan chuncha naul ni Jesús, va niman palay junchoqol
ni lapanaki.
\v 14 Ex ni Jesús junil:
\p —Jantu matichun kalaqputeʼenin. Vamun kalaqpʼinchiy
yu kura y kalhipʼinin milapaxkan yu tacha lhinajun ixlhachimoʼon
ni Moisés, para katakʼatsaʼol ni lapanakni ni palaycha
unchʼoʼotʼa mintaqanʼati.
\p
\v 15 Pero takʼatsaʼolcha tachun ni lapanakni yu ixmakay
ni Jesús. Xlhiyucha lhuvaj lapanakni ixtataqxtoʼa para
kataqasmaklhi ixchivinti vachuʼ para kalajkʼuchʼukal.
\v 16 Pero ni Jesús, yucha ixʼan taʼan jantu tʼujuʼ lapanakni,
ancha ixtʼachiviniy ni Dios.
\s Ni Jesús palay makal qayntaun yu ixlakanita
\r (Mt. 9:1-8; Mr. 2:1-12)
\p
\v 17 Taun julchan ni Jesús ixtʼajun jamalaniniʼ. Ancha
ixtavilanal ni fariseos ali yu ixtamasuy ixlhachimoʼonkʼan
ni israelitas. Yuʼuncha taminchal talakachux putaulanaxna
xaʼestado Galilea, xaʼestado Judea y vachu laka putaulan
Jerusalén. Ni Dios ixtaqnita ni Jesús ixtapʼasta para
lay kalakmaʼayajnichoqol ni taqanʼanin.
\v 18 Ex tachinchal alati lapanakni, va talhiminta laka
putaman qayntaun taqanʼan yu ixlakanita. Ixtamanuputun
ixpulakna laqa chaqaʼ la ixtalakaʼukxpuʼ ni Jesús.
\v 19 Pero jantu katatemal toʼoxtaycha kataputanuchal,
va ixtaʼalinta lhuvaj lapanakni. Ex chuncha tataukʼal
ixʼukxni ni chaqaʼ y taʼaqtayl tamoqosuniy xalaseqen.
Ex ancha tapumaʼeltajul ni taqanʼan la ixputaman taʼan
ixtayanal ni lapanakni, la ixtalakaʼukxpuʼ ni Jesús.
\v 20 Tejkan ni Jesús jalaqtsʼil ni ox talhakapuʼalcha,
ex junil ni taqanʼan:
\p —Lapanaki, yu mintalaqalhin chavay malaqmixikalcha.
\p
\v 21 Ex yu ixtamasuy ixlhachimoʼonkʼan ni israelitas
ali yu fariseos taʼaqtayl tapastakʼa:
\p —¿Tas ayucha ni aniy lapanaki? Yucha tʼajuncha akchʼintamanaʼ
ni Dios kun ixchivinti. Jantu matichun lay malaqmixiy
ni talaqalhin, ni talaqalhin malaqmixiy vamun Dios.
\p
\v 22 Ni Jesús ixkʼatsaycha yu ixtatʼajun pastaknan,
va lakjunil:
\p —¿Valiʼiycha chuncha pʼastʼakʼatʼik ni uxiknankʼan?
\v 23 ¿Suncha jantu lhitaʼay kaval? ¿Kʼaʼun: “Yu mintalaqalhin
laqmixlhicha”, u va kʼaʼun: “Kʼaʼostʼaʼulcha, katʼiʼukxuntʼayachʼoʼocha”?
\v 24 Chavay klamasuniyau ni kitʼin yu kval Sasʼatʼa
Lapanaki klhitʼajun lhachimoʼon aniy lakamunukpaʼ para
kakmalaqmixil ni talaqalhin.
\p Ex va junil ni lapanaki yu ixlakanita:
\p —Chavay ijkunan, kaʼostʼaʼulcha, kalhipʼinchʼoʼocha mimputaman.
Kʼapʼinchʼoʼocha la minchaqaʼ.
\p
\v 25 Ex yu ixlakanita va niman ostaulchoqol la ixtalakaʼukxpukʼan
ni lapanakni, lhaʼal ixputaman, anchoqolcha la ixchaqaʼ,
va ay ixmakay ni Dios.
\v 26 Tachun ni lapanakni va tus saq taval, ay tamakalcha
ni Dios. Va ayaj tatalhanal, tanajun:
\p —Chavay laqtsʼiucha lajʼay axtoqnuʼ yu jantu aqtaun
laqtsʼinau.
\s Ni Jesús juntaʼil Leví yu vachuʼ junkan Mateo
\r (Mt. 9:9-13; Mr. 2:13-17)
\p
\v 27 Ex astan taxtul ni Jesús, va laqtsʼil qayntaun
yu chʼinin impuestos yu ixjunkan Leví. Va ixvil taʼan
mapalkan impuestos. Ni Jesús va junil:
\p —Kʼintʼatʼatʼicha.
\p
\v 28 Ex ni Leví ostaulal, lakmakaunʼol tachun ixʼaxtoqnuʼ,
va tʼaʼalcha ni Jesús.
\v 29 Ex chuncha ni Leví va makal taun ay lakvayti la
ixchaqaʼ para Jesús. Vachuʼ ancha ixtavilanal laka mesa
qaynlhuvaj yu xachʼinin impuestos kun alati lapanakni.
\v 30 Yu fariseos ali yu ixtamasuy ixlhachimoʼonkʼan
ni israelitas taʼaqtaynil talaktuʼuy ixtʼaltanan ni
Jesús, tanaul:
\p —¿Valiʼiycha vaynatʼik y oqnunatʼik kun yu tachʼinin
impuestos ali alati yu maqtaqalhinin?
\p
\v 31 Jesús lajqaltayl, lakjunil:
\p —Yu taʼayajnan jantu tamaqskʼiniy kalajkʼuchʼukal, yu
tamaqskʼiniy va yu taqanʼanin.
\v 32 Kitʼin jantu ikminta laktʼasaʼin yu lajʼoxi lapanakni,
va ikminta laktʼasaʼin yu maqtaqalhinin para katamapaxal
ixjatapastakʼatkʼan.
\s Ni Jesús lhisakmikal valiʼiycha jantu tataskʼajay ixtʼaltanan
\r (Mt. 9:14-17; Mr. 2:18-22)
\p
\v 33 Ex talhisakmil ni Jesús:
\p —¿Valiʼiycha ixtʼaltanan ni Juan y vachuʼ ixtʼaltanan
ni fariseos ayaj tatamoʼoy y tataskʼajay pero yu mintʼaltanan,
yuʼuncha si tavajin y taʼoqnun?
\p
\v 34 Jesús jaqaltayl:
\p —Tejkan alin lakxtuklati, jantu lay kʼalhinau ni jantu
katavayl yu jalakjuntaʼikanta tejkan vananaj tatʼavilanal
ni tsʼal yu lakxtuklay.
\v 35 Pero kaminaʼ julchan tejkan kamaxtukanaʼ ni anchanuʼ
tsʼal, ex ixtʼaltanan katataskʼajayaʼ.
\p
\v 36 Ex ni Jesús lakjunchoqol taun chivinti yu xtaʼa
jatapastakʼati, va naul:
\p —Jantu matichun exa aqxtaun laqchʼiti yu sastʼi para
kalhilaqpumpul taun laqchʼiti yu atʼalicha. Incha chuncha
makay, ex maqatsʼanqaycha yu sastʼi laqchʼiti. Yu sastʼi
laqchʼiti jantu lay ox junchoqoy kun ni laqchʼiti yu
atʼaliʼ.
\v 37 Vachu jantu lay kʼamuʼutʼi yu sastʼi xaxkan uva
laka jaxtaʼan yu atʼaliʼ. Yu xaxkan uva yu sastʼi va
matampaʼay yu atʼaliʼ jaxtaʼan. Ex chuncha yu xaxkan
uva ali yu jaxtaʼan va tatsʼanqaycha.
\v 38 Yu xaxkan uva yu sastʼi va kʼamuʼutʼi laka jaxtaʼan
yu sastʼi.
\v 39 Jantu matichun otʼa yu sastʼi xaxkan uva incha
oqtacha yu maqaniyaʼ. Tanajun: “Yu maqaniyaʼ apalay
ox.”
\c 6
\s Ixtʼaltanan Jesús taʼexʼil ni trigo mas va xajulchan jastaknati
\r (Mt. 12:1-8; Mr. 2:23-28)
\p
\v 1 Taun xajulchan jastaknati ni Jesús ali ixtʼaltanan
ixtapuʼanta taʼan alinta tachʼanati, yu ixtʼaltanan taʼaqtayl
talajʼexʼiy yu xataltsʼi ni trigo, va taxapʼiʼulhaʼalcha.
\v 2 Ex lati yu fariseos va talhisakmil:
\p —¿Valiʼiycha makʼayatʼik lhitapatsa chavay mas jantu
xtaqkan lakatin kʼatʼapʼatsʼatʼi ni xajulchan jastaknati?
\p
\v 3 Ex ni Jesús va jaqaltayanal:
\p —¿Jantu kʼapʼutʼeʼetʼik tacha tamakal ni David kun
ixtʼaltanan tejkan tachavanil?
\v 4 Tejkan tanul la ixchaqa ni Dios, chʼapal ni pan
yu ixmoqslanikan Dios, va ul, ex jalaqxtaqnil ixtʼaltanan.
Chuncha makal mas vamun ni kuras ixtalhitʼajun lakatin
para kataʼul ni anchanu pan.
\p
\v 5 Ex vachuʼ naul ni Jesús:
\p —Ni kitʼin yu Sasʼatʼa Lapanaki klhinajun tisuncha
lay makakan ni xajulchan jastaknati.
\s Palay junchoqol qayntaun yu jantu lay ixmapuʼay ixmakaʼ
\r (Mt. 12:9-14; Mr. 3:1-6)
\p
\v 6 Ex ataun xajulchan jastaknati val. Ni Jesús tanul
laqa chaqaʼ taʼan ixtataqxtoʼa ni israelitas, ancha masul
ixchivinti Dios. Ancha ixʼalinta qayntaun lapanaki yu
jantu lay ixmapuʼay ixlhijakanaj makaʼ.
\v 7 Yu ixtamasuy ixlhachimoʼonkʼan ni israelitas ali
yu fariseos ixtalaqtsʼintanuy ni Jesús. Incha kakʼuchʼul
mas va xajulchan jastaknati ex lay kataputislajmal.
\v 8 Pero ni Jesús ixkʼatsaycha yu ixtatʼajun pastaknan.
Ex junil ni lapanaki yu jantu lay ixmapuʼay ixmakaʼ:
\p —Kaʼostʼaycha, kʼatʼanʼajtʼaycha aniy.
\p Ex ni lapanaki ostayalcha, va ancha tayal.
\v 9 Ex ni Jesús lakjunil yu alati:
\p —Kaklalhisakmiyau taun tuʼuchun. ¿Ni xajulchan jastaknati
tas lhinajun kilhachimoʼonkʼan? ¿Lhinajun kʼamakʼatʼi
yu ox u va lhinajun kʼamakʼatʼi yu talaqalhin? ¿Lhinajun
kʼamalaqtʼaxtʼutʼi u va lhinajun kʼamaqnitʼi? ¿Tas lhinajun?
\p
\v 10 Ex ni Jesús jalaqtsʼil tachun yu ixtamalaqachoqoxnuta
ex junil ni lapanaki:
\p —Kʼaxnujtʼi mimakaʼ.
\p Ex ni lapanaki xnujlhi ixmakaʼ, oxicha junchoqol.
\v 11 Pero ni fariseos kun yu ixtamasuy ixlhachimoʼonkʼan
ni israelitas ayaj talukujlal. Aqtaylcha talaxaqalay,
va talalhisakmiy tisuncha lay katamakanil ni Jesús.
\s Ni Jesús jalaksaklhi pumakautʼuy ixtʼaltanan
\r (Mt. 10:1-4; Mr. 3:13-19)
\p
\v 12 Tejkan chuncha ixtiʼukxuntayay, ni Jesús al skʼiniʼ
Dios laqataun aspajun. Ancha taun tatsʼis tʼachivinil
Dios.
\v 13 Tejkan tunkunchoqol lakjuntaʼil ixtʼaltanan, jalaksaklhi
pumakautʼuy, va jalakʼulal ixtamalaqachan.
\v 14 Laksaklhi Simón, yu Jesús junil Pedro. Vachuʼ Andrés
yu ixtʼalaqajun ni Simón. Vachuʼ Jacobo ali Juan ali
Felipe ali Bartolomé
\v 15 ali Mateo ali Tomás ali Jacobo istsʼal ni Alfeo
ali Simón yu ixjunkan Zelote.
\v 16 Vachu Judas ixtʼalaqajun ni Jacobo y vachuʼ aputaun
yu ixjunkan Judas Iscariote yu astan maqxtaqlhi ni Jesús.
\s Ni Jesús lakmalaniy lhuvaj lapanakni
\r (Mt. 4:23-25)
\p
\v 17 Ni Jesús laktʼatajuminchal ixtʼaltanan ni laka
aspajun. Tachinchal taʼan akpujunan, ancha tatayal. Vachuʼ
ixtaʼalinta pumalhuu ixtʼaltanan kun pumalhuu yu machaqan
xaʼestado Judea, yu machaqan Jerusalén, vachuʼ yu machaqan
laka putaulan Tiro ali Sidón. Tachinchal para kataqalasmaklhi
ni Jesús y vachuʼ para kalajkʼuchʼukal ixtaqanʼatkʼan.
\v 18 Vachu ni Jesús palay jalakmakal ni lapanakni yu
jamamaqanlqajnivay ni jantu ox espíritus.
\v 19 Tachun ni lapanakni ixtachʼapaputun ni Jesús, ixtapʼasta
taxtuniy para kalajkʼuchʼul ni taqanʼanin tejkan lakpiklay.
\s Ni Jesús laklhichiviniy yu ox lhiʼachantajuy ali yu jantu
\r (Mt. 5:1-12)
\p
\v 20 Ex ni Jesús jalaqtsʼil ixtʼaltanan, va lakjunil:
\p —Lajʼox kaxajtachal mijatsukuntikʼan ni uxiknankʼan
kilpatanin, tapaxtoqniyan kʼatʼanutʼikcha taʼan lhachimoʼonun
ni Dios.
\p
\v 21 ’Lajʼox kaxajtachal mijatsukuntikʼan yu chavay
chʼavanitʼikcha, astan kʼaʼotsʼayapitik.
\p ’Lajʼox kaxajtachal mijatsukuntikʼan yu chavay alhunatʼik,
astan kʼalajʼachʼanapitik.
\p
\v 22 ’Lajʼox kaxajtachal mijatsukuntikʼan tejkan taxkayyan
ni lapanakni, tejkan jantucha tatʼaltananputunan, tejkan
talaktuʼuyan, vachuʼ tejkan tamanuniyan jalaklkanti por
kilapanakni untʼatʼik ni kitʼin yu kval Sasʼatʼa Lapanaki.
\v 23 Ayaj kalhiʼachʼantʼaʼutʼik kun lhuu achati ni
anchanu julchan tejkan chuncha katamakaniyan. Ay kunaʼ
milhilhajatkʼan ni laktʼiyan. La maqancha ixpayankʼan
vachuʼ jantu ixtalaqtsʼinputun yu ixtalaqputeʼey ixchivinti
ni Dios.
\p
\v 24 ’Pero payniʼincha yu uxiknankʼan maqalinin, vamun
chavay lhitʼaunatʼik achati.
\p
\v 25 ’Payniʼincha ni uxiknankʼan yu chavaycha tus ox
otsʼatʼatʼik, astan kʼachʼavanapitik.
\p ’Payniʼincha ni uxiknankʼan yu chavaycha achʼanatʼik,
astan kʼamaʼaninanapitik y kʼalajʼalhunapitik.
\p
\v 26 ’Incha tachun ni lapanakni tanajun lajʼoxi lapanakni
untʼatʼik, ex payniʼincha ni uxiknankʼan. Maqancha ixpayankʼan
vachuʼ talakjunil lajʼoxi lapanakni yu jamakanunun, yu
ixtanajun ixtalaqputeʼey ixchivinti Dios.
\s Ni Jesús naul kʼalakpʼaxkʼatʼik yu mintʼalaxkayninkʼan
\r (Mt. 5:38-48; 7:12)
\p
\v 27 ’Pero uxiknan yu kilaqalasmatʼau, klajunau kapʼaxkʼatʼik
mintʼalaxkayninkʼan. Kʼamakʼanitʼik lajʼoxi yu taxkayyan.
\v 28 Kʼalaklhitʼapʼaynitʼik yu ox yu tanajun jantu
ox kʼatʼapʼasatʼik. Kaskʼinitʼik Dios yu tamakaniyan
laqtaqal.
\v 29 Incha matichun palaqstisayan va kaxtʼaqnin aminpalaqxtitaun.
Incha matichun kamaxtunin minkutun, kamakʼaunincha vachuʼ
kalhaʼalcha mixkujuʼ.
\v 30 Incha matichun skʼiniyan taun tuʼuchun kaxtʼaqnin.
Incha tamaxtuniyan yu minavin, jantucha maqskʼiniy kaskʼinichʼoʼo.
\v 31 Kalakmakʼanitʼik yu alati vachu va tacha naunatʼik
katamakanin.
\v 32 Incha pʼaxkʼayatʼik vamun yu tapaxkayan, ¿ex tisuncha
xtapal kaval? Yu talaktuʼunun vachu va chuncha talapaxkay.
\v 33 Incha makʼaniyatʼik lajʼoxi vamun yu tamakaniyan
lajʼoxi, ¿ex tisuncha xtapal kaval? Yu maqtaqalhinin
vachu va chun talamakaniy.
\v 34 Incha machʼixtʼaqniyatʼik vamun yu lay katamapalnichoqoyan,
¿ex tisuncha xtapal kaval? Yu maqtaqalhinin vachu va
chun talamachʼixtaqniy para katalaqaʼichoqol.
\v 35 Kʼalakpʼaxkʼatʼik mintʼalaxkayninkʼan, kʼalakmakʼanitʼik
yu lajʼoxi, kʼaxtʼaqnitʼik yu taskʼiniyancha mas jantu
kataxtaqnichoqoyan. Ex ay kunaʼ milhilhajatkʼan, vachuʼ
kʼaʼunapitik sasʼatʼan Dios. Ni Dios lakmapayniy mas
yu jantu tapaxkajlaqtsʼin ali yu talaktuʼunun.
\v 36 Kamapʼayninitʼik vachu va tacha mimPay Dioskʼan
tamapayniyan.
\s Jantu kʼalakmukʼanitʼik laqtaqal yu alati
\r (Mt. 7:1-5)
\p
\v 37 ’Jantu kʼalakmukʼanitʼik laqtaqal yu alati lapanakni
ex ni uxiknan jantu katamukʼaniyan laqtaqal ni Dios.
Jantu kʼamukʼatʼik maqanlqajnati, ex jantu katamukʼaniyan
maqanlqajnati. Kʼalamalaqmixinitʼik, ex katamalaqmixiniyan.
\v 38 Kʼalaqxtʼaqnitʼik yu tamaqskʼiniy ex kaxtʼaqnikʼanapitik
yu maqskʼiniyatʼik. Kataxtaqniyan kun taun papulkan
yu ox jakʼalhamunti, ox jakʼauksmunti y ox jatsʼiuksmunti.
Katapuxtaqniyan ni uxiknankʼan vachu va tacha japʼuxtʼaqniyatʼik
yu alati.
\p
\v 39 Ex ni Jesús lakjunil taun chivinti yu xtaʼa jatapastakʼati,
va naul:
\p —Qayntaun laʼachʼix jantu lay kamapʼulal aqayntaun
laʼachʼix. Katataqalqosaʼ ixlaʼatʼuykʼan, va chʼantaun
katalaqpaʼaʼ laka pusanjan.
\v 40 Jantu matichun yu malanikanta apalay ay xajantu
yu jamalaniy. Tejkan kalaniʼoyaʼ, ex vachu va chun kunaʼ
tacha ixjamalaniniʼ.
\p
\v 41 ’¿Valiʼiycha makʼay kuenta yu lakatʼuniy laqtaqal
yu makay qayntaun milaqaj pero jantu makʼay kuenta yu
la ay laqtaqal yu makʼay uxintʼi? Va tacha laqtsʼiniy
xatalvayanti kʼiu yu lakputanun la ixlaqchul milaqaj,
pero jantu makʼay kuenta yu la milaqchul va lakputanun
maqaʼay kʼiu.
\v 42 Chavay incha lakputanun ni maqaʼay kʼiu la milaqchul,
¿ex valiʼiycha uniy milaqaj: “Kakmaxtuniyan yu xatalvayanti
kʼiu yu lakputanun la milaqchul”? Va tʼuy ukxpuʼ makʼay.
Maqskʼiniy pʼunaj kʼamaxtʼuʼel ni maqaʼay kʼiu yu lakputanun
la milaqchul, ex chuncha apalaycha ox kʼalakʼavananeʼe
para kʼamaxtʼunin xatalvayanti kʼiu yu lakputanun la
ixlaqchul milaqaj.
\s Yu kʼiu pumispakan ni xalhiʼuti
\r (Mt. 7:17-20; 12:34-35)
\p
\v 43 ’Jantu tʼujuʼ ox kʼiu yu xtaʼa xaʼunikan yu jantu
ox kaval. Nisin jantu kaʼalilcha kʼiu yu jantu ox kaval
yu xtaʼa xaʼunikan yu ox.
\v 44 Tachun kʼivinan pumispakan ni xaʼunikan yu xtaʼa.
Jantu lay kʼapʼuxtʼi higo laka jaltukun, vachuʼ jantu
lay kʼapʼuxtʼi uvas taʼan valiʼiy jakʼivinan.
\v 45 Yu ox lapanaki, la ixjalhanuti maʼata yu lajʼoxi,
ancha maxtuy yu lajʼoxi chivinti. Yu laktuʼunuʼ lapanaki
la ixjalhanuti maʼata yu jantu lajʼoxi kaval y ancha
maxtuy chivinti yu jantu lajʼox. Va kiltaxtuy ixchivinti
tacha najun ixjalhanuti.
\s Ni Jesús lhichiviniy qayntʼuy lapanakni yu tamakay ixchaqakʼan
\r (Mt. 7:24-27)
\p
\v 46 ’¿Valiʼiycha kilajunau ni uxiknankʼan, kiJalhachimoʼonu,
kiJalhachimoʼonu, pero jantu makʼayatʼik yu klalhijunau?
\v 47 Chavay klajunau tacha junita yu kinqalasmatʼa
y makay tacha yu kitʼin klhinajun.
\v 48 Yucha va tacha qayntaun lapanaki yu makal aqataun
chaqaʼ. La pulman maknunil ixputayan, va si kun chiyux.
Ex tejkan aynlhi ni laʼaxkan talakanunil kun tachun
ixtapʼasta para kamaqtal ni anchanuʼ chaqaʼ. Pero jantu
tsʼuniy kapiklal, va lhitʼajun ixputayan si chiyux.
\v 49 Pero yu qasmatʼa kinchivinti incha jantu makay
yu kitʼin klhinajun, yucha va tacha qayntaun lapanaki
yu makal ixchaqaʼ lakatʼun, jantu kun xaputayan. Ex tejkan
aynlhi ni laʼaxkan talakanunil kun tachun ixtapʼasta,
va tus tachun lakpujʼol, laqcheʼeʼol, va aqtaun lhaʼanʼol.
\c 7
\s Ni Jesús palay makachoqol ixʼoqxtamati qayntaun xaʼukxtin tropas
\r (Mt. 8:5-13)
\p
\v 1 Tejkan Jesús laqxaqalaʼol ni lapanakni va al Kapernaum.
\v 2 Ancha ixʼalin qayntaun yu machaqaʼ Roma, va xaʼukxtin
tropas. Ixlhitʼajun qayntaun ixʼoqxtamati yu va chapujcha
ixʼachaniy. Va ixtaqanʼay, va laycha kanil.
\v 3 Tejkan ni xaʼukxtin kʼatsal ni ancha tʼajun ni
Jesús, jalaqmalaqachal yu xalajʼaynin israelitas para
kataʼal tapayninin para kamil kʼuchʼuniniʼ ixʼoqxtamati.
\v 4 Ex yuʼuncha talaqchinchal ni Jesús, taʼaqtaynil
tatapayniniy, va tajuniy:
\p —Ni anuʼ xaʼukxtin tropas, yucha qalʼox, paxtoqniy kʼaʼaqtʼayʼutʼi.
\v 5 Ayaj kintapaxkayan ni kijnankʼan yu israelitas
juntau. Va yucha lhinaul ixmakaka ni chaqaʼ taʼan taqxtoʼau.
\p
\v 6 Ex ni Jesús laktʼaʼal pero tejkan va ukstsʼuniycha
para katachaʼal ni laqa chaqaʼ, ni xaʼukxtin tropas jamalaqachal
ixʼamigos para katalhaanil ni Jesús taun chivinti, najun:
\p —Jalhachimoʼonuʼ, kitʼin jantu ox kakval, jantu kimpaxtoqniy
para kʼintʼatʼanuchiy la kinchaqaʼ.
\v 7 Xlhiyucha jantu kʼanchaʼan lakxkaunan, va jantu
ox kakval. Incha uxintʼi naʼun, ex ni kiʼoqxtamati va
palaycha kajunchoqoyaʼ mas maqati yachiy.
\v 8 Kitʼin klhitʼajun kiʼukxtin, vachuʼ la kintamakaʼ
alin tropas yu kintaʼaqtayjuyan. Tejkan xaqayntaun ijkuniy
kaʼal avintʼi, ex ni yucha va niman an. Yu aqayntaun
tejkan ijkuniy kamil, va niman min. Yu kiʼoqxtamati tejkan
ijkuniy kamakal tuʼuchun, yucha va niman makay. Uxintʼi
vachu chun lay kalhinau palay kajunchoqol ni kiʼoqxtamati.
\p
\v 9 Tejkan qasmaklhi ni Jesús va tus saq tayal. Taspʼiklhi,
jalaqtsʼil ni ixtalhavaxtu lapanakni yu ixtatixkaulhaʼanta,
va lakjunil:
\p —Laqsaval jantu matichun kaktemal xalakatʼun Israel
yu chuncha lhakapuʼanan tacha yu aniy lapanaki.
\p
\v 10 Ex ni lapanakni yu ixjamalaqachakanta tachinchoqochal
laqa chaqaʼ. Ancha tatemal ni oqxtamati yu ixtaqanʼay,
va palay ixjunchoqotacha.
\s Ni Jesús majkujuchoqol istsʼal qayntaun tiyau
\p
\v 11 Ex astan ni Jesús al taun putaulan yu junkan Naín.
Vachuʼ ixtatʼaʼanta ixtʼaltanan kun lhuvaj lapanakni.
\v 12 Tejkan va ukstsʼuniycha kachaʼal ni laka putaulan,
va laqtsʼil ni lhaʼankanta qayntaun janiniʼ ixmaknuka.
Vamun yuʼ istsʼal ixjunita ni ixnati. Yucha va tiyau
ixjunita. Qaynlhuvaj lapanakni yu ancha machaqan va
ixtatʼaʼanta ni anchanu tiyau.
\v 13 Tejkan laqtsʼil ni Jalhachimoʼonu Jesús ex ayaj
mapaynil ni tiyau, va junil:
\p —Jantu kʼaʼalhu.
\p
\v 14 Ex ni Jesús talakanunil ni pʼaqlati, makasal. Yu
xalhaʼanan, yuʼuncha ancha saq tatayal. Ex ni Jesús junil
ni janiniʼ:
\p —Tsʼal, kitʼin kunan, kaʼostʼaʼulchʼoʼocha.
\p
\v 15 Ex ni janiniʼ va niman ostaulal, aqtaychoqolcha
jalaktʼachiviniy ni lapanakni. Ni Jesús maqxtaqnichoqolcha
ni ixnati.
\v 16 Tejkan chuncha talaqtsʼintayal ni lapanakni tus
tachun tatalhanal, ex chuncha taʼaqtaynilcha ay tamakay
ni Dios va tanajun:
\p —Taun ay lapanaki yu laqputeʼey ixchivinti Dios alin
kun kijnankʼan.
\p Vachu tanaul:
\p —Chavaycha Dios ixchin para kalaktʼatiʼukxuntayal ixlapanakni.
\p
\v 17 Talakachux ni xaʼestado Judea takʼatsaʼol tachun
yu ixmakaycha ni Jesús.
\s Ni Juan jamalaqachal qayntʼuy ixtʼaltanan kalaqʼal ni Jesús
\r (Mt. 11:2-19)
\p
\v 18 Vachuʼ ixtʼaltanan ni Juan takʼatsal tacha ixmakay
ni Jesús. Ex talaqputeʼenichoqolcha ni Juan. Ex chuncha
ni Juan lakjuntaʼil qayntʼuy ixtʼaltanan.
\v 19 Jamalaqachal lhasakminin ni Jesús incha laqsavalcha
yucha ni Cristo yu ixtanajun kaminaʼ u incha vananaj
katapakxanʼil aqayntaun.
\p
\v 20 Ex chuncha yu ixtamalaqachan ni Juan, anchanu pumatʼuy
lapanakni talakanunil ni Jesús, tajunil:
\p —Ni Juan yu jamaqchajʼavanaʼ, yucha kintamalaqachan
lhisakminin incha uxintʼi laqsavalcha ni Cristo kʼatʼi
yu ixtanajun kaminaʼ u incha kakpakxanau aqayntaun.
\p
\v 21 Ni anchanu panchʼix tejkan tachaʼal, ni Jesús palay
makal lhuvaj taqanʼanin ali yu ixtalhitʼajun jantu ox
espíritus. Vachu jalakmalakavanichoqol lhuvaj lapanakni
yu laʼachʼixin ixtajunita.
\v 22 Ex ni Jesús va lakjunil:
\p —Kʼapʼinchʼoʼotʼikcha, kʼaʼunapitik ni Juan yu xalaqtsʼinatʼikcha
kun yu xaʼasmaktʼatʼikcha. Talakavananchoqoycha yu laʼachʼixin,
yu lakchʼanltʼul taltananchoqoycha, yu lakapuchʼinin
palaycha tajunchoqoy, yu aqatapan taqasmaknanchoqoycha,
yu janinin takujchoqoycha. Vachuʼ yu kilpatanin jatʼaunkancha
jalaqputeʼenika ni ox chivinti yu masuy tacha lay katapulaqtaxtul.
\v 23 Ox kaxajtachal ixjatsukunti ni lapanaki yu jantu
aqtaun kimakajun.
\p
\v 24 Tejkan taʼanchoqolcha ixtamalaqachan ni Juan, ex
ni Jesús aqtaylcha lhichiviniy ni Juan, va lakjunil ni
lapanakni:
\p —Tejkan kʼilaqtsʼintʼik ni Juan lakakʼavin, ¿tisuncha
ixpʼintʼatʼik laqtsʼinin? ¿Va qaltaun akltiyati yu lajkʼalhata
ni un?
\v 25 ¿Suncha kʼilaqtsʼintʼik? ¿Va qayntaun lapanaki
yu ayaj kʼusi lakatayal? Pero yu talakatayay kun lajkʼus
laqchʼiti va tavilanal la ixchaqakʼan maqalinin.
\v 26 ¿Ex suncha ixpʼintʼatʼik laqtsʼinin? ¿Va qayntaun
yu laqputeʼey ixchivinti Dios? Laqsaval klajunau chuncha
junita pero apalay ay junita xajantu yu alati yu ixtalaqputeʼey
ixchivinti Dios.
\v 27 Ni Juan va yu lhitsʼoqkanta la ixchivinti Dios
taʼan najun:
\q Kitʼin kakmalaqachayaʼ qayntaun yu kapʼulaniyan,
\q kalaʼoximanin ni lakatin taʼan kʼapʼupʼineʼe.
\p
\v 28 ’Klajunau ni tachun lapanaki yu maqlaqavanal xanati
jantu matichun kaʼalil yu laqputeʼey ixchivinti Dios
yu apalay ay kaval. Vamun yuʼ ay ni Juan. Pero yu apalay
lakatʼuniy lapanaki yu Dios lhichimoʼoy yucha apalay
ay xajantu ni Juan.
\p
\v 29 Tejkan chuncha taqasmaklhi tachun ni lapanakni
ali yu tachʼinin impuestos, va tanaul ni Dios vas makay.
Yuʼuncha va ixlaqmaqchajʼavatacha ni Juan.
\v 30 Pero ni fariseos kun yu ixtamasuy ixlhachimoʼonkʼan
ni israelitas taʼakchʼintamal yu ox jatsukunti yu Dios
ixlaqxtaqniputun. Xlhiyucha jantu katanaul ni Juan kamaʼaqchajʼaval.
\v 31 Ex naul ni Jesús:
\p —¿Tas tajunitacha ni lapanakni yu chavay tatʼajun?
¿Tas tatasuycha?
\v 32 Yuʼuncha va tacha sʼatʼan yu taqamanan laklhitamau
yu talatʼasaniy, talajuniy: “Klasqolniu yu maʼachajunuʼ
jasanti, pero jantu kʼatʼininatʼik. Klamilpaniu milpati
yu mamaqanixvanan pero jantu kʼaʼalhuntʼik.”
\p
\v 33 ’Va kilachil ni Juan yu jamaqchajʼavanaʼ. Yucha
jantu ixʼuy pan vachuʼ jantu ixʼotʼa xaxkan uva. Xlhiyucha
naunatʼik va lhitʼajun taun aqmoqxnuʼ.
\v 34 Ex chuncha kminta kitʼin yu Sasʼatʼa Lapanaki,
kvajin, kʼoqnun. Chavaycha naunatʼik ni kitʼin javaynʼoj
y puqalʼoqnuʼ. Naunatʼik va klaktʼatiʼukxuntayay yu
tachʼinin impuestos ali alati yu tamaqtaqalhinin.
\v 35 Pero tachun yu lhixajyachal la ixjatapastakʼati
ni Dios yucha masuy ni va ox ixjatapastakʼati.
\s Ni Jesús vayl la ixchaqaʼ qayntaun fariseo yu ixjunkan Simón
\p
\v 36 Ex qayntaun fariseo lhijunil ni Jesús ni katʼavayl.
Ex chuncha ni Jesús al la ixchaqaʼ. Ancha tanuchal, va
taulal laka mesa.
\v 37 Ex chuncha ni anchanuʼ putaulan ixʼalin qayntaun
maqtaqalhiniʼ xanati. Yucha kʼatsal ni mil vayaʼ ni
Jesús la ixchaqaʼ ni fariseo. Ex yucha vachuʼ chinchal,
va lhiminta taun lameta, tajun yu ox sʼejenʼe.
\v 38 Aqtayl qalhun y ancha talakanunil ixchʼajaʼ ni
Jesús. Aqtaynil chʼanchaʼay kun ixlaqpuqalhuti. Ex aqtayl
xakanichoqoy kun ixʼaji para kaxixchoqol ixchʼajaʼ ni
Jesús. Tejkan maxixinichoqol ex kiltastuknil ixchʼaja
ni Jesús y mukʼanil yu sʼejenʼe yu ixlhiminta laka lameta.
\v 39 Tejkan laqtsʼil ni fariseo yu lhijunil ni Jesús
lakvayti, va pastaklhi xʼaman: “Incha laqsaval ni aniy
lapanaki kaval yu laqputeʼey ixchivinti Dios, ka kamispal
suncha xanati junita. Va qayntaun xanati yu maqtaqalhiniʼ.”
\p
\v 40 Ex ni Jesús junil:
\p —Simón, kitʼin kunputunan taun chivinti.
\p Ex ni fariseo naul:
\p —Chun, jamalaniniʼ, kʼiʼuncha.
\p
\v 41 Ex najun ni Jesús:
\p —Qayntʼuy lapanakni ixtalhaaniy tumin aqayntaun. Qayntaun
ixlhaaniy laqakis ciento xatumin plata, yu aqayntaun
ixlhaaniy pakltaun ciento xatumin plata.
\v 42 Ixlaʼatʼuykʼan jantucha lay ixtamapalchoqoy ni
tumin. Ex ni lapanaki yu machʼixtaqlhi va laqmaqantaulnilcha
yu ixlhaanintikʼan. Chavaycha klhisakmiyancha, ¿tas ayucha
apalay lhipaxkajlaqtsʼil ni lapanaki yu machʼixtaqlhi?
\p
\v 43 Ex yu Simón qaltayanal:
\p —Kitʼin knajun ni lapanaki yu apalay laqlhuu maqantaulnikal
va yu apalay paxkajlaqtsʼil.
\p Ex ni Jesús naul:
\p —Chun, laqsaval yu nau.
\p
\v 44 Ex ni Jesús laqtsʼil ni xanati, va najun, va junkan
ni Simón:
\p —¿Laqtsʼin ni aniy xanati? Kitʼin tejkan iktanuchil
la minchaqaʼ jantu kʼixtʼaqnin xkan para kaklhichaʼal
kinchʼajaʼ. Pero yu aniy xanati kinchaʼanil kinchʼajaʼ
kun ixlaqpuqalhuti y maxixichoqol kun ixʼaji.
\v 45 Uxintʼi tejkan iktanuchil la minchaqaʼ jantu kʼimastʼakʼatʼi
kun taun lakiltastukni pero ni yucha tejkan chilcha
tus chavaycha jantu makajun kiltastukʼa kinchʼajaʼ.
\v 46 Jantu kʼilhilakpʼaxapʼa ni aceite la kiʼaqtsul.
Pero ni yucha kilhixapanil yu ox sʼejenʼe la kinchʼajaʼ.
\v 47 Xlhiyucha laqsaval kunan yu lhuvaj ixtalaqalhin
malaqmixiniʼokal, yucha va ayaj lhipaxkajlaqtsʼin pero
yu tsʼuniy ixtalaqalhin malaqmixiniʼokal, yucha va tsʼuniy
lhipaxkajlaqtsʼin.
\p
\v 48 Ex naul, va junkal ni xanati:
\p —Va ikmalaqmixiniʼojon mintalaqalhin.
\p
\v 49 Ex yu alati lapanakni yu chʼantaun ixtatʼavilanal
laka mesa, aqtaylcha talalhisakmiy, talajuniy:
\p —¿Tas ayucha ni aniy lapanaki yu malaqmixiy talaqalhin?
\p
\v 50 Ex ni Jesús junil ni xanati:
\p —Chavay kʼilhakʼapʼupʼicha, xlhiyucha mintalaqalhin
laqtʼaxtʼucha. Kʼapʼinchʼoʼocha oxamaktaun.
\c 8
\s Xanatin yu taʼaqtayjul ni Jesús
\p
\v 1 Taval ni Jesús ixtiʼukxuyachal tachun ni lajʼay
putaulanaxna kun ni lakstʼuniy putaulanaxna. Ixjalaqputeʼeniy
ni lapanakni tacha lhachimoʼonun ni Dios. Yu ixpumakautʼuykʼan
yu ixtatʼaltanan, yuʼuncha vachu ancha ixtatʼatiʼukxuyanal.
\v 2 Vachu ixtatʼatiʼukxuyanal xanatin yu palay tajunchoqol
ixtaqanʼatikʼan vachuʼ yu lakmaxtunikal aqmoqxnun. Qayntaun
ixjunkan María yu machaqaʼ Maqdala, yu maxtunikal laqatujun
aqmoqxnun.
\v 3 Vachuʼ ixtʼaʼanta Juana yu ixanati Chuza yu xaʼukxtin
ixʼoqxtamatin Herodes. Vachu Susana ali qaynlhuu xanatin
yu ixtaʼaqtayjuy kun ixlhitapatskʼan ni Jesús ali ixtʼaltanan.
\s Ni tʼin yu xtaʼa la ox jaxqanti
\r (Mt. 13:1-9; Mr. 4:1-9)
\p
\v 4 Ixtataxtuy lhuvaj lapanakni taun taun putaulan,
ixtalaqmin ni Jesús. Tejkan tataqxtoqlhicha lakjunil
taun chivinti yu xtaʼa jatapastakʼati, va naul:
\p
\v 5 —Qayntaun lapanaki al maman ni ixtʼin. Tejkan tʼajun
maman, lati xatʼin taʼeltajul lakatin. Ancha vamun akchʼintamakal
y yu xatsʼoʼon laktʼiyan va tataʼeltajul unan.
\v 6 Alati xatʼin tamal laka chiyux. Ancha pʼul ni tʼin
pero yu tʼun jantu jachʼamal kaval, ex niman lakxixʼol.
\v 7 Alati xatʼin tamachal laka jaltukunan. Ancha vachu
pʼul pero chʼantaun tʼapʼul ni jaltukun, va maqatanul,
talakxixtanulcha yu xatʼin.
\v 8 Alati tamal taʼan ox tʼun. Ancha pʼul, ox aynlhi,
va xtaqlhi ox jaxqanti, taun ciento por laqatamin.
\p Tejkan chuncha naul ni Jesús ex pʼas naul:
\p —Incha alin mimpaqasmakkʼan, ex kaʼasmaktʼikcha.
\s Yu naunputunta ni anuʼ chivinti
\r (Mt. 13:10-17; Mr. 4:10-12)
\p
\v 9 Ex ixtʼaltanan ni Jesús talhisakmil sunchacha naunputunta
ni anu chivinti.
\p
\v 10 Ni Jesús lakjunil:
\p —Uxiknankʼan Dios tamasuniyan tacha lhachimoʼonun yu
jantu takʼatsay alati lapanakni. Pero yu alati lapanakni
klakpumalaniy chivinti yu xtaʼa jatapastakʼati. Ex chuncha
mas talaqtsʼin yu kmakay, va tacha jantu katamispal, mas
taqasmatʼacha kinchivinti, jantu tamalaqasiy.
\s Yu naunputun ni chivinti yu lhichiviniy ni tʼin
\r (Mt. 13:18-23; Mr. 4:13-20)
\p
\v 11 ’Yu aniy chivinti yu xtaʼa jatapastakʼati va inchine
naunputun. Yu xatʼin yucha va ixchivinti Dios.
\v 12 Ni tʼin yu tatamal lakatin, yucha va tacha ni lapanakni
yu taqasmatʼacha ixchivinti ni Dios pero yu aqmoqxnuʼ
va niman chinachil para kalakmaxtunichoqol. Va najun
jantu katalhakapuʼal va para jantu katalaqtaxtul.
\v 13 Ni tʼin yu tatamal laka chiyux, yucha va tacha
lapanakni yu taqasmatʼacha ixchivinti Dios, ex talhakapuʼancha
kun achati. Pero ni chivinti jantu tanuy ox la ixjalhanutkʼan.
Ex tejkan tatapasay tsʼuniy maqanlqajnati va tataʼosuspʼikchoqoycha.
\v 14 Ni tʼin yu tatamal laka jaltukunan yucha va tacha
ni lapanakni yu taqasmatʼacha ixchivinti Dios pero astan
tamakauntijlay. Ayaj alin yu tapastakʼuy, vachu tamaqamay
ixmaqalitkʼan kun xaʼachati aniy lakamunukpaʼ. Ex jantucha
ox lhixajyachal ixjatsukuntikʼan.
\v 15 Ni tʼin yu tamal ox lakatʼun yucha va tacha ni
lapanakni yu taqasmaktayl ixchivinti Dios y tamaʼay
la ixjalhanutkʼan kun ox jatapastakʼati. Vas tataylhaʼan
kun ni chivinti yu taqasmatʼacha. Chuncha tamaqantaulay
y ox lhixajyachal ixjatsukuntikʼan.
\s Yu chavay jantu mispakan ox katasuyaʼ tacha taun maklku yu maqtajiy
\r (Mr. 4:21-25)
\p
\v 16 ’Jantu matichun mamaqtayay taun maklku para kamaqatanul
laqa aqchoq u para kamanul ixtaʼapuʼ ni saqati. Va mukʼay
talman para lay katalaqtsʼil maklku yu tatanuy ni laqa
chaqaʼ.
\v 17 Vachu mas alin tuʼuchun yu jantu ox malaqasikan
chavay, astan la ox kamalaqasikanaʼ. Mas vamun lati takʼatsay
chavay, astan tachun katakʼatsayaʼ.
\p
\v 18 ’Chavaycha la ox kilaqasmakniu. Klajunau yu lhitʼajuncha
jatapastakʼati yucha apalay lhuu kaxtaqnikanaʼ. Yu jantu
kalhitsukul, mas va yu lakatsʼuniy yu lhilay lhitʼajun,
yucha kamaxtunichoqokanaʼ.
\s Talaqʼal ixnati kun ixtʼalaqaunin ni Jesús
\r (Mt. 12:46-50; Mr. 3:31-35)
\p
\v 19 Ex chuncha ni ixnati ali ixtʼalaqaunin ni Jesús
tachinchal taʼan ixvil. Ixtalaqtsʼinputun pero jantu
lay katalakanunil, va lhuvaj lapanakni ixtaʼalinta.
\v 20 Ex va junkal ni Jesús:
\p —Minati kun mintʼalaqaunin tayanal maqspaʼ, tatʼachivinputunan.
\p
\v 21 Pero ni Jesús va naul:
\p —Yu laqsaval kinati ali yu laqsaval ketʼalaqaunin tajunita
va yu taqasmatʼa ixchivinti Dios y tamakay tacha najun.
\s Ni Jesús lhichimoʼol ni un kun lakxkan
\r (Mt. 8:23-27; Mr. 4:35-41)
\p
\v 22 Taun julchan ni Jesús tatajul laka barco kun ixtʼaltanan,
va lakjunil:
\p —Kaʼaucha tus yu alakataun ixkilpaʼ lakxkan.
\p Ex taʼal.
\v 23 Tejkan tatʼajuncha tapasanan ni lakxkan, va ltatal
ni Jesús. Taval aqtaylcha pʼas unilay, ex ni barco aqtaylcha
tajuyachal ni xkan. Taval va laycha kaʼaqtsamal. Va
tatalhanancha katalaqtsʼanqal ni barco.
\v 24 Ex taʼal maqloʼonun ni Jesús, va tajunil:
\p —Jamalaniniʼ, jamalaniniʼ, aniy tʼaunaucha talaqtsʼanqanin.
\p Ex ni Jesús ostaulal, aqtayl laqʼaymay ni un kun xaʼoqxpuputi
yu ixʼukxlaklata ni xkan. Ex chuncha va tus tachun talakataulʼochoqol,
tacha aqtsʼiyaj ox junchoqol.
\v 25 Ex ni Jesús lakjunil ixtʼaltanan:
\p —¿Valiʼiycha jantu kilalhakapuʼau?
\p Pero yuʼuncha ayaj tatalhanancha por yu makal ni Jesús.
Vamuncha saq tataulal, va talalhisakmiy siya yuʼuncha:
\p —¿Tas ayucha ni aniy lapanaki? Lhichimoʼoy ni xkan
kun ni un y taqalasmatʼa.
\s Qayntaun yu machaqaʼ Gadara ixlhitʼajun yu jantu ox espíritu
\r (Mt. 8:28-34; Mr. 5:1-20)
\p
\v 26 Ex chuncha tachaʼal ni lakatʼun Gadara yu ixlhitukuktachal
ni lakxkan Galilea.
\v 27 Tejkan taxtul ni Jesús ni anchanu lakatʼun, talakanunil
qayntaun lapanaki yu machaqaʼ ni anchanu putaulan. Ni
anchanu lapanaki ayaj maqancha ixchʼapata taun aqmoqxnuʼ.
Jantucha ixʼulay ixlaqchʼiti. Vachu jantucha ixtʼajun
laqa chaqaʼ, vamuncha ni kampusantu ixtʼajun.
\v 28 Tejkan laqtsʼil ni Jesús, va taʼaqtsoqoqtanil la
ixtalakaʼukxpuʼ. Va la pʼas tʼasal, va junil:
\p —¿Suncha kʼatsʼaycha kun kitʼin? Jesús Sasʼatʼa kʼatʼi
ni Dios yu vilchal laktʼiyan. Iktapayniniyan jantucha
apalay kʼilhimaqchʼapʼu.
\p
\v 29 Ni Jesús ixtʼajuncha tʼachivin ni aqmoqxnuʼ para
kamakaunchoqolcha ni anchanu lapanaki. Ni aqmoqxnuʼ
aqlhuvaj ixchʼapay. Yu ixtalhistakʼa anchanuʼ lapanaki,
yuʼuncha ixtamaqchʼiy, ixtachʼanchʼiy kun cadenas pero
va niman ixlajʼexʼojoy. Ex ni aqmoqxnuʼ ixlhaʼanchoqoycha
aaqtaun lakakʼavinan.
\p
\v 30 Ex ni Jesús lhisakmil:
\p —¿Tisuncha unkʼancha?
\p Ex va junil:
\p —Kitʼin ijkunkan Pumalhuu.
\p Lhuvaj aqmoqxnun ixtachʼapata anchanuʼ lapanaki, xlhiyucha
chuncha naul.
\v 31 Ex ni aqmoqxnun tatapayninil ni Jesús para jantu
kalaqmalaqachal taʼan pulman.
\v 32 Ni anchanu aspajun ixtatʼajun exvaynin lhuvaj
pʼaxnin. Ni anchanu aqmoqxnun tatapayninil katalaqtanul
ni anchanu pʼaxnin. Ex jaxtaqnil lakatin.
\v 33 Ex ni aqmoqxnun tamakaulcha ni anchanu lapanaki.
Va talaqtanulcha ni pʼaxnin. Ex ni pʼaxnin va taputakyaulcha
taʼan qaltalman, va tatajuchal yu lakxkan, va taʼakskajʼuʼol.
\p
\v 34 Ex tejkan chuncha talaqtsʼil yu xalhistaknan pʼaxnin,
ayaj tatalhanal. Tatakyaul laqputeʼenin yu ay laka putaulan
y vachu ixlhimaqspaʼ ni putaulan.
\v 35 Ex ni lapanakni taʼal laqtsʼinin yu tapasal. Tejkan
tachaʼal taʼan vil ni Jesús ancha vachuʼ vil ni lapanaki
yu tamakaunchoqol ni aqmoqxnun. Yucha vilnil la ixchʼajaʼ
ni Jesús, ulachoqotacha ixlaqchʼiti, va ox jalakpastaknan.
Tejkan chuncha talaqtsʼil, va tatalhanal ni lapanakni.
\v 36 Yu ixtalaqtsʼinta yu tapasalcha, yuʼuncha talaqputeʼel
tacha val tejkan palay junchoqol ni lapanaki yu ixlhitʼajun
aqmoqxnun.
\v 37 Ex chuncha tachun ni lapanakni yu ancha lakatʼun
Gadara tatapayninil ni Jesús para kaʼanchoqolcha. Va
ayaj tatalhaunil. Ex ni Jesús tanuchoqolcha laka barco,
va minchoqochalcha.
\p
\v 38 Ni lapanaki yu tamakaunchoqol ni aqmoqxnun, va
tapayninil ni Jesús para vachu katʼaʼal, pero ni Jesús
va junil:
\p
\v 39 —Kʼapʼinchʼoʼochiycha la minchaqaʼ, ancha kʼalaqpʼutʼeʼeyeʼe
milapanakni tachun yu makanin ni Dios.
\p Ex ni lapanaki anchoqolcha, aqtaylcha jalaqputeʼeniy
ni lapanakni talakachux la ixputaulan yu makanil ni
Jesús.
\s Qayntaun jatsiʼi yu ixnitacha ali qayntaun xanati yu ixtaqanʼay
\r (Mt. 9:18-26; Mr. 5:21-43)
\p
\v 40 Tejkan ni Jesús takukchoqochil ixlhiʼaniy laka
xkan, tachun ni lapanakni la ox talaqaʼil, va ixtapakxanʼita.
\v 41 Ex chinchal qayntaun lapanaki yu ixjunkan Jairo,
ixlhachimoʼonun laqa chaqaʼ taʼan ixtataqxtoʼa ni israelitas.
Talakaputatamal laka tʼun taʼan ixyal ni Jesús, va tapayninil
kaʼal la ixchaqaʼ.
\v 42 Ixlhitʼajun vamun qayntaun istsiʼi, va laqakautʼuycha
ixjachʼitin ixlhitʼajun. Ixchʼapata taun taqanʼati, va
laycha kanil.
\p Ex tejkan ixʼanta ni Jesús, ixtatʼaʼanta lhuvaj lapanakni
va tus lapatsʼiuksni ixtajunita.
\v 43 Ancha ixʼalin qayntaun xanati jantu ixlakaxixta
ni jakʼalnan y va laqakautʼuycha jachʼitin ixtʼajun
maqanlqajnaʼ. Va jalaqkilaʼol ni jakʼuchʼunun tus va
mamiʼonil yu ixlhitʼajun ixlhitapatsa y va nisin palay
kaval.
\v 44 Ex ni yucha talakanunil ni Jesús la ixlhistapuʼ,
va piklanil ixkiltuʼ ixlaqchʼiti. Ex tejkan chuncha
makal va niman tayajval ni jakʼalnan.
\p
\v 45 Ex ni Jesús lhasakminil:
\p —¿Tas ayucha ixkimpiklaycha?
\p Jantu matichun kalhitaulnil. Ni Pedro kun ixtʼaltanankʼan
tanaul:
\p —Jamalaniniʼ, ni lapanakni tus talapatsʼiuksta y talasamaʼan
va toʼoxtaycha lata. ¿Valiʼiycha lhasakminin taʼayucha
piklayancha?
\p
\v 46 Pero ni Jesús va naul:
\p —Alin taʼayucha ni ixkimpiklay, ni kitʼin kʼukskʼatsal
ni kmaʼayajnichoqol qayntaun ixtaqanʼati la kintapʼasta.
\p
\v 47 Ni xanati tejkan kʼatsal jantu lay vak ixjun, va
talhanal tus xkapʼikninta, talakanunil ni Jesús, talakaputatamanil.
Va junil la ixtalakaʼukxpukʼan tachun ni lapanakni valiʼiycha
piklal ni Jesús y tacha pupalaycha junchoqol.
\v 48 Ex ni Jesús junil:
\p —Kintsiʼi kʼatʼi, va kʼilhakʼapʼupʼin xlhiyucha palaycha
xaʼunchʼoʼoy. Kʼapʼinchʼoʼocha oxamaktaun.
\p
\v 49 Ni Jesús vananaj ixtaylhaʼanta ixchivinti tejkan
chinchal qayntaun yu minchal la ixchaqaʼ Jairo. Va naul,
va junkal ni Jairo:
\p —Mintsiʼi va nilcha. Jantucha apalay kʼamaʼanchʼapʼu
ni jamalaniniʼ.
\p
\v 50 Pero tejkan qasmaklhi ni Jesús, va junil ni Jairo:
\p —Jantu katʼalhan. Vamun kʼalhakʼapʼupʼi, ex mintsiʼi
palay kunchoqoyaʼ.
\p
\v 51 Tejkan chaʼal laqa chaqaʼ, ni Jesús jantu kaxtaqlhi
lakatin matichun katatanuchal, vamun ni Pedro ali Jacobo
ali Juan kun ixpay ali ixnati ni jatsiʼi.
\v 52 Tachun yu alati lapanakni ixtatʼajun laqalhunin
ixtalhimaqatsʼanqananta ni jatsiʼi. Pero ni Jesús lakjunil:
\p —Jantu kʼalajʼalhuntʼik. Ni jatsiʼi jantu kanil, va
ltatay.
\p
\v 53 Vamun talhiʼachan tejkan chuncha naul ni Jesús,
ixtakʼatsay ni ixnitacha.
\p
\v 54 Ex ni Jesús chʼapanil ixmakaʼ ni jatsiʼi, la pʼas
xaqalal, va junil:
\p —Jatsiʼi, kitʼin kunan kaʼostʼaʼulcha.
\p
\v 55 Ex chuncha ni jatsiʼi kujchoqolcha mas ixnitacha,
va niman ostaulchoqol. Ni Jesús laklhijunil ixpayan
katavavachoqolcha.
\v 56 Ixpayan va tus saq taval. Ex ni Jesús lakjunil
jantu matichun katalaqputeʼenil tacha yu tapasal.
\c 9
\s Ni Jesús jamalaqachal ixpumakautʼuykʼan ni kataʼal laqputeʼenin tacha lhachimoʼonun ni Dios
\r (Mt. 10:5-15; Mr. 6:7-13)
\p
\v 1 Ni Jesús jamaqxtoqlhi ixpumakautʼuykʼan ixtʼaltanan. Jalaqxtaqnil lhachimoʼon kun tapʼasta para lay katalakmaxtunil tachun aqmoqxnun yu tachʼapay ni lapanakni. Vachuʼ katakʼuchʼul tachun yu taqanʼanin.
\v 2 Jamalaqachal para katalaqputeʼenil ni lapanakni tacha lhachimoʼonun ni Dios, vachu para katalajkʼuchʼul taqanʼanin.
\v 3 Va jalakjunil:
\p —Jantu tuʼuchun kalhipʼintʼik para milakatinkʼan, jantu palik, jantu bolsa, jantu tiyuti, jantu tumin, jantu aqxtaun laqchʼiti para milamapaxankʼan.
\v 4 Mas va taʼayucha chaqaʼ kachʼipʼintʼik ancha katʼaulapitikcha tus katʼaxtʼuchʼoʼoyapitik ni anchanu putaulan.
\v 5 Taʼan jantu kʼalaʼaʼikʼanapitik, niman katʼaxtʼuchʼoʼoyapitik ni anchanu putaulan. Ancha kachʼankʼalhakʼanapitik ni pʼoqxni la minchʼajakʼan. Chuncha katapukʼatsayaʼ ni jantu ox yu tamakanin.
\p
\v 6 Ex chuncha taʼalcha laka putaulanin, ixtalaqputeʼey tacha lay katapulaqtaxtul. Talakachux ixtalajkʼuchʼulhaʼanta ni taqanʼanin.
\s Ni Herodes maqnil ni Juan yu jamaqchajʼavanaʼ
\r (Mt. 14:1-12; Mr. 6:14-29)
\p
\v 7 Ni gobernador Herodes kʼatsal tachun ni lhitapatsa yu ixmakay ni Jesús, ex ayaj pastakʼul. Lati ixtanajun ni Jesús va Juan yu jamaqchajʼavanaʼ, ixtanajun va kujchoqol.
\v 8 Alati ixtanajun ni Jesús va Elías yu maqancha ixlaqputeʼey ixchivinti Dios. Alati ixtanajun va aqayntaun yu ixlaqputeʼey ixchivinti Dios maqancha yu kujchoqotacha.
\v 9 Pero ni Herodes va naul:
\p —Ni Juan kitʼin klhinaul ixchaqxpʼuxnika ixʼaqtsul. ¿Ex taʼayucha kavalcha aniy lapanaki yu ayaj talhichiviniy lhuu axtoqnuʼ?
\p Ex ayaj ixlaqtsʼinputuntacha ni Jesús.
\s Ni Jesús lakvaval laqakis mil lapanakni
\r (Mt. 14:13-21; Mr. 6:30-44; Jn. 6:1-14)
\p
\v 10 Yu ixjamalaqachata ni Jesús taminchoqol, va talaqputeʼenil yu tamakalcha. Ex ni Jesús laklhaʼanchoqol ixlaqʼamankʼan laka putaulan Betsaida.
\v 11 Pero tejkan takʼatsal ni lapanakni, yuʼuncha va tatixkaulhaʼal. Ex ni Jesús jalaqaʼil kun achati. Va jalhixaqalal tacha lhachimoʼonun ni Dios y jalajkʼuchʼul yu taqanʼanin.
\p
\v 12 Tejkan va laycha katoqoxal, yu ixpumakautʼuykʼan ixtʼaltanan talaqʼal ni Jesús, va tajunil:
\p —Kʼalakmastʼakʼachʼoʼocha ni lapanakni para kataʼal jastaknan y katalakxkaul ixvaytkʼan laka putaulanin taʼan ukstsʼuniy kaval. Aniy taʼan alintau va lakakʼavinan. Jantu tuʼuchun alin.
\p
\v 13 Ex ni Jesús va jalakjunil:
\p —Uxiknankʼan kʼalaqxtʼaqnitʼik ixvaytkʼan.
\p Ex tanaul:
\p —Jantu kaklhitsukuu ni vayti. Klhitʼaunau vamun aqskis pan kun aqxtʼuy jatanti. ¿Va naʼun kajkʼau inin vayti para katalaqchaʼanʼol ixvaytkʼan tachun ni aniy lapanakni?
\p
\v 14 Ni joʼakna por tachun ixtaʼalinta va laqakis mil. Ex ni Jesús lakjunil ixtʼaltanan:
\p —Kalakʼunitʼik ni lapanakni katataulal por pakltamin ciento lakatamin.
\p
\v 15 Chuncha tamakal, ni lapanakni tus tachun tataulʼol.
\v 16 Ex ni Jesús chʼapal ni aqskis pan kun ni aqxtʼuy jatanti. Talaqstʼal laktʼiyan, va xtaqnil lhimalaqpuchuncha ni Dios. Aqtaylcha laqcheʼey ex jaxtaqlhaʼanilcha ixtʼaltanan. Yu ixtʼaltanan taʼaqtaylcha talakmapitsiniy ni lapanakni.
\v 17 Chuncha tachun ni lapanakni tavaynʼol, tus ox taʼotsal. Ex yu ixtʼaltanan ni Jesús tapusakchoqol yu xajchal. Va laqakautʼuy canasta yu xajchal.
\s Ni Pedro naul ni Jesús va yu Cristo yu ixtanajun kaminaʼ
\r (Mt. 16:13-19; Mr. 8:27-29)
\p
\v 18 Taun julchan ni Jesús va ixtʼajun skʼiniʼ Dios xʼaman. Yu ixtʼaltanan vachu ancha ixtatʼaʼalinta. Ex ni Jesús va laklhisakmil:
\p —¿Tas tanajuncha ni lapanakni? ¿Taʼayucha kintalhilaycha ni kitʼin?
\p
\v 19 Ex yuʼuncha taqaltayl:
\p —Lati tanajun va Juan kʼatʼi yu jamaqchajʼavanaʼ. Alati tanajun va Elías kʼatʼi. Alati tanajun ni uxintʼi va aqayntaun yu kujchoqotacha yu maqancha ixlaqputeʼey ixchivinti Dios.
\p
\v 20 Ex naul ni Jesús:
\p —Chavay klalhisakmiyau yu uxiknankʼan, ¿tas ayucha kilalhilayaucha ni kitʼin?
\p Ex yu Pedro va junil:
\p —Uxintʼi ni Cristo kʼatʼi yu ixtanajun kamalaqachayaʼ ni Dios.
\s Ni Jesús naul kamaqnikanaʼ y kakujchoqoyaʼ
\r (Mt. 16:20-28; Mr. 8:30–9:1)
\p
\v 21 Pero Jesús jalakachivitijlal ixtʼaltanan para jantu matichun katajunil ni va yu Cristo junita.
\p
\v 22 Ex lakjunil ni Jesús:
\p —Ni kitʼin yu kval Sasʼatʼa Lapanaki va ayaj kakmaqanlqajnanaʼ. Ni lajʼay lapanakni ali yu xaʼukxtinin kuras ali yu tamasuy kilhachimoʼonkʼan, yuʼuncha kintalaktanchaniyaʼ. Va kintamaqniyaʼ pero yu laʼatʼutunuʼ julchan kajkujchoqoyaʼ.
\p
\v 23 Ex ni Jesús lakjunil tachun ni lapanakni:
\p —Incha matichun kintʼatiʼukxuntayaputun, yucha jantucha lay makay yu makaputun. Kaval tacha lhilhiy kalhaʼal ixkurus, ex chuncha lay kintʼatiʼukxuntayalcha.
\v 24 Chavay ni lapanaki yu ayaj lhitsukuputun ixjatsukunti va kamaqatsʼanqayaʼ. Yu kamaqatsʼanqayaʼ ixjatsukunti por kitʼin, yucha kalhitsukuchoqoyaʼ.
\v 25 ¿Tisuncha lhajaycha qayntaun lapanaki incha kalhitsukuʼol tachun yu alin lakamunukpaʼ pero va maqatsʼanqay ixjatsukunti?
\v 26 Incha matichun kilhimaxaniy ni kitʼin kun kinchivinti, ex kitʼin yu kval Sasʼatʼa Lapanaki, vachuʼ kaklhimaxaniyaʼ ni yucha, tejkan kakminchoqoyaʼ kun kintapʼasta vachu kun ixtapʼasta ni kimPay kun ixmayulnin.
\v 27 Laqsaval klajunau ni alin lati yu chavay aniy tatʼajun yu jantu kataniyaʼ tus katalaqtsʼinʼelayaʼ ni Dios lhachimoʼonun.
\s Tapaxal tacha ixtasuta ni Jesús
\r (Mt. 17:1-8; Mr. 9:2-8)
\p
\v 28 Tejkan paqtsajin val, ni Jesús al skʼiniʼ Dios laka aspajun. Yu Pedro ali Juan ali Jacobo vachu jalaklhaankal.
\v 29 Tejkan Jesús ixtʼajun skʼiniʼ Dios va tapaxal ixʼukxpu, vachu ixlaqchʼiti tus ayaj yaqaq val, tus kʼuliksnaʼ val.
\v 30 Ex tatʼatasul pumatʼuy xapaynin, ixtatʼachiviniy ni Jesús. Ni yuʼuncha va Moisés ali Elías yu la maqancha ixtalaqputeʼey ixchivinti Dios.
\v 31 Yuʼuncha tus ixlaqmalaqachoqoxnukanta kun yu kʼuliksnaʼ jatunkunaʼ. Ixtatʼajun lhichivinin tejkan kaniyaʼ ni Jesús, yu katapasayaʼ laka putaulan Jerusalén.
\v 32 Ni Pedro kun ixtʼaltanan va ayaj ixtachʼapata ltatati. Talaqtsʼinil tacha ixjunita ixʼoxixtu ni Jesús y talaqtsʼil ni pumatʼuy lapanakni yu ixlaktʼatayal.
\v 33 Tejkan ni Moisés ali Elías ixtatʼaunchoqoycha makaunan ni Jesús, ex ni Pedro va junil ni Jesús:
\p —Jamalaniniʼ, la ox kʼalintau aniy. Ka la ox kakmakau aqatʼutu moqltaʼ. Aqataun para uxintʼi, aqataun para Moisés vachuʼ aqataun para Elías.
\p
\v 34 Tejkan chuncha ixchiviniy, chil laqataun taputsʼi, va laqʼoqxtʼaqyaukal. Va ayaj tatalhanal tejkan ixtayanal ixpulaknacha laka taputsʼi.
\v 35 Va chivinkal laka taputsʼi:
\p —Yucha aniy kesʼatʼa yu kʼachaniy. Ox kʼaʼalasmaktʼik.
\p
\v 36 Tejkan miʼol ni chivinti, ni Jesús tasuchoqolcha, va xʼamancha. Yuʼuncha tus saq taval y paqlhuucha val jantu matichun katajunil yu ixtalaqtsʼinta.
\s Ni Jesús maxtunil taun jantu ox espíritu qayntaun tsʼal
\r (Mt. 17:14-21; Mr. 9:14-29)
\p
\v 37 Ataun julchan val, va tataʼeltajul ni aspajun. Ancha qaynlhuvaj lapanakni tapaxtoqlhi ni Jesús.
\v 38 Ixʼalinta qayntaun lapanaki yu tʼasal, va junil:
\p —Jamalaniniʼ, ktapayniniyan kaʼaqtʼayʼutʼi kintsʼal, vamun yuʼ klhitʼajun.
\v 39 Va chʼapay taun jantu ox espíritu, niman maqantʼasay, maxkapʼikniy tus maqalpupuy, va ayaj malakaxkayay y jantu makaunputun.
\v 40 Klaktapayninitacha katamaxtul ni jantu ox espíritu ni mintʼaltanan pero jantu kalal.
\p
\v 41 Ex ni Jesús qaltayanal, va naul:
\p —¡Yu uxiknan jantu lay lhakʼapʼupʼinatʼik, va jalaktuʼunun untʼatʼik! ¿Tus tavanancha kaktamakaunaʼ kun uxiknan? ¿Tus tavanancha kaklatayaniyaucha? Kʼalhitʼantʼikcha aniy ni mintsʼal.
\p
\v 42 Tejkan ni tsʼal talakanunil ni Jesús ni aqmoqxnuʼ va niman tanqalhul, va maxkapʼiknil. Ex ni Jesús laqʼaymal ni aqmoqxnuʼ, va palay makal ni tsʼal, va maqxtaqnichoqol ni ixpay.
\v 43 Ex tus vak takʼatsal tachun ni lapanakni por ixʼayaxtu Dios.
\s Ni Jesús naunchoqol ni katamaqniyaʼ
\r (Mt. 17:22-23; Mr. 9:30-32)
\p Tejkan chuncha tus vak ixtakʼatsan ni lapanakni por yu makal ni Jesús, va lakjunil ixtʼaltanan:
\p
\v 44 —Oxi kaʼasmaktʼikcha ni inchine, jantu aqtaun kakʼauktʼik. Kitʼin yu kval Sasʼatʼa Lapanaki va laycha kakmaqxtaqkal la ixtamakakʼan ni lapanakni.
\p
\v 45 Pero ixtʼaltanan jantu katamalaqasil, jantu kalaqxtaqnikal lakatin para katamalaqasil. Va tatalhanal xlhiyucha jantu katalhisakmil.
\s Taʼayucha yu apalay ay
\r (Mt. 18:1-5; Mr. 9:33-37)
\p
\v 46 Ixtʼaltanan ixtalhilakchiviniy taʼayucha yu apalay ay ixjunita siya yuʼuncha.
\v 47 Ni Jesús kʼatsal yu ixtapastakʼa. Ex chʼapal qayntaun jasʼatʼa va tamaqayaul,
\v 48 jalakjunil:
\p —Yu laqaʼiy ni aniy jasʼatʼa por chuncha klhinajun ni kitʼin, yucha vachu kilaqaʼiy ni kitʼin. Yu kilaqaʼiy ni kitʼin vachu laqaʼiy yu kimalaqachata. Yu lakatʼuniy kʼatsʼan yucha va yu apalay ay.
\s Yu makay kilhitapatsakʼan, yucha kintaʼaqtayjuyan
\r (Mr. 9:38-40)
\p
\v 49 Ex chuncha ni Juan va naul:
\p —Jamalaniniʼ, klaqtsʼiu qayntaun lapanaki yu maxtuy aqmoqxnun tejkan mapaqaʼuy mintaqaʼuti. Pero jantu kintʼaltanan kaval, xlhiyucha klaktanchaniu.
\p
\v 50 Pero ni Jesús lakjunil:
\p —Jantu kʼalaktʼanchʼanitʼik. Yu jantu kintaxkayyan, va kintaʼaqtayjuyan.
\s Ni Jesús jalaqʼaymal ni Jacobo ali Juan
\p
\v 51 Ixlakamintacha julchan tejkan kalaqaʼikanaʼ ni Jesús laktʼiyan. Ex naul mas va tichichun katapasal ni kaʼanacha laka putaulan Jerusalén.
\v 52 Ex jamalaqachal lapanakni katapʼulʼal. Yuʼuncha tatanuchal taun putaulan taʼan ixtavilanal yu samaritanos para katapuxkaul taʼan kataloqojlhi.
\v 53 Pero yu ancha machaqan jantu katalaqaʼil tejkan takʼatsal ni Jesús ixʼuxaʼan Jerusalén.
\v 54 Tejkan chuncha takʼatsal ni Jacobo ali Juan, va talhisakmil ni Jesús:
\p —Jalhachimoʼonu, ¿tas naʼuncha? ¿Kaskʼiu ni kataʼeltajul jikmi laktʼiyan para katalaqxauʼol, [chuncha tacha skʼil ni Elías]?
\p
\v 55 Ex taspʼiklhi ni Jesús, va jalaqʼaymal, [va lakjunil:
\p —Jantu kʼatsʼayatʼik tisuncha espíritu lhitʼaunatʼik.
\v 56 Kitʼin yu Sasʼatʼa Lapanaki jantu kakmil para kakmaʼakxal ixjatsukuntikʼan ni lapanakni, va kminta para klaqmalaqtaxtul.]
\p Ex taʼanchoqol ataun putaulan.
\s Yu ixtatʼaʼuxaʼan ni Jesús
\r (Mt. 8:19-22)
\p
\v 57 Tejkan ixtaʼanta lakatin, qayntaun lapanaki naul, va junkal ni Jesús:
\p —Kitʼin kaktʼaʼanan mas va toʼoxtaychacha kapʼineʼe.
\p
\v 58 Ex ni Jesús junil:
\p —Yu xanixʼoyun, yuʼuncha tamaqalin ixchaqakʼan taʼan poqapaj laktalpa. Yu tsʼoʼon, yuʼuncha tamaqalin ixpaqtamankʼan. Pero ni kitʼin yu kval Sasʼatʼa Lapanaki, jantu kakmaqalil toʼoxtaycha kakmastaknil kiʼaqtsul.
\p
\v 59 Ex ni Jesús junil aqayntaun:
\p —Kʼintʼatʼatʼicha.
\p Pero ni lapanaki va naul:
\p —Jalhachimoʼonuʼ, kʼimakʼaunʼel kajkʼanʼelayaʼ maknunuʼ kimpay.
\p
\v 60 Ex va junil ni Jesús:
\p —Kʼalakmakʼaucha ni janinin katalamaknulcha siya yuʼuncha ni janinin. Pero uxintʼi kapiti jalaqputeʼeniʼ tacha lhachimoʼonun ni Dios.
\p
\v 61 Ex naul aqayntaun, va junkal ni Jesús:
\p —Vachu ktʼaʼuxanan, Jalhachimoʼonuʼ. Pero kʼimakʼaunʼel klakmastakʼaʼelayaʼ kilapanakni la kinchaqaʼ.
\p
\v 62 Ni Jesús junil:
\p —Chuncha va tacha qayntaun yu chʼapay ixpuchʼa pero tejkan chʼan si laqtsʼilhaʼan ixpulakan. Yucha jantu paxtoqniy katanul taʼan lhachimoʼonun ni Dios.
\c 10
\s Ni Jesús jamalaqachal setenta ixtʼaltanan
\p
\v 1 Taval ni Jesús jalaksaklhi setenta alati lapanakni
y jamalaqachal pumatʼiyun katapʼulʼal talakachux putaulanin
va toʼoxtaycha kaval taʼan yucha astan kaʼanaʼ.
\v 2 Pʼunaj lakjunil:
\p —Va tacha taun ay jaxqanti tajunita ni lapanakni yu
talakapuʼuxaʼan ni Dios, pero tsʼanqay oqxtamatin yu
kataxqanal. Xlhiyucha kʼatʼapʼayninitʼik ni Dios para
kajamalaqachal oqxtamatin la ixlhijaxqanati.
\v 3 Ex kapʼintʼik. Klamalaqachayau taʼan kʼaʼunapitik
tacha sasʼatʼan borregos taʼan alin maqtalin.
\v 4 Jantucha kalhipʼintʼik ixpupachʼikan mintuminkʼan,
nisin mintiyutkʼan, nisin mivarachikʼan. Jantucha matichun
katamataqmaqanin kʼamastʼakʼatʼik lakatin.
\v 5 Tejkan kachʼipʼinapitik laqa chaqaʼ, kʼamastʼakʼananapitik,
kʼanaunapitik: “Oxamaktauncha katsʼukʼutʼik yu vilanantʼik
laqa chaqaʼ.”
\v 6 Va chuncha incha alin lapanaki yu oxamaktaun tsukuputun
ex oxamaktaun kunaʼ. Incha jantu, ex jantu paxtoqniy.
\v 7 Va ancha katʼaulapitik laqa chaqaʼ. Kaʼuyapitik
y kaʼotʼapitik yu kataxtaqniyan. Paxtoqniy kaxtaqnikal
ixlhilhajati yu tapatsan.
\v 8 Tejkan kachʼipʼinapitik taun putaulan taʼan katalaqaʼiyan,
kʼaʼuyapitik yu kataxtaqniyan.
\v 9 Palay kalakmakʼachʼoʼotʼik yu taqanʼanin yu ancha
taʼalinta. Kʼalakʼunapitik: “Va laycha kachil tejkan
Dios katalhichimoʼoyan.”
\v 10 Pero incha kachʼipʼinapitik taun putaulan taʼan
jantu katalaqaʼiyan ex kapʼinapitik lakatin, kʼanaunapitik:
\v 11 “Ni pʼoqxni yu tsʼantsʼaunau kakchʼankʼalhakanau
la kinchʼajakʼan para kakʼatsʼatʼik ni jantu ox yu ixkilamakaniyau.
Pero kakʼatsʼatʼik ni va ukstsʼuniycha chil ixlhachimoʼon
Dios.” Chuncha kʼanaunapitik.
\v 12 Va klajunau kaminaʼ julchan tejkan apalay pʼas
kunaʼ ixmaqanlqajnatkʼan ni lapanakni yu machaqan ni
anchanu putaulan taʼan jantu katalaqaʼin xajantu yu
machaqan laka putaulan Sodoma.
\s Payniʼincha yu jantu katalaqaʼil ni Jesús
\r (Mt. 11:20-24)
\p
\v 13 ’Payniʼincha ni uxiknan yu machaqan laka putaulan
Corazín. Payniʼincha uxiknan yu machaqan laka putaulan
Betsaida yu jantu mapʼaxapʼutʼunatʼik mijatapastakʼatkʼan.
La mimputaulankʼan klamakaniu yu lajʼay axtoqnuʼ. Ni
lapanakni yu machaqan laka putaulanin Tiro kun Sidón
yu maqancha ixtatʼajun, jantu katalaqtsʼil yu chavay
klamasuniu. Va ixtalaqtsʼil ex va niman ixtamapaxal
ixjatapastakʼatkʼan. Va ixtaʼulal puchʼiniʼ laqchʼiti
y va ixtataulal laka lkʼakʼan para katasul ni talhimaqaninin.
\v 14 Xlhiyucha tejkan kamukʼanikanaʼ ixtalaqalhinkʼan
ni lapanakni yu machaqan xaputaulan Tiro ali yu machaqan
xaputaulan Sidón, ex va apalay pʼas kunaʼ mimaqanlqajnatkʼan.
\v 15 Uxiknan, xalapanakni Kapernaum, ¿lhakʼapʼupʼinatʼikcha
ni kapʼinapitik laktʼiyan? Yu uxiknan kʼatʼanʼalhukʼanapitik
laqnin.
\p
\v 16 Ex lakjunil ixtʼaltanan:
\p —Yu taqalasmatʼan uxiknankʼan kintaqalasmatʼa ni kitʼin.
Yu jantu talaqaʼiyan, jantu kintalaqaʼiy ni kitʼin. Yu
jantu kintalaqaʼiy ni kitʼin jantu talaqaʼiy yu kimalaqachata.
\s Taminchoqol yu setenta ixtʼaltanan Jesús
\p
\v 17 Tejkan taminchoqol ni setenta yu ixjamalaqachata
ni Jesús, va ayaj talajʼachal. Tajunil ni Jesús:
\p —Jalhachimoʼonuʼ, mas ni aqmoqxnun kintaqalasmatʼan
tejkan ikmapaqaʼuyau mintaqaʼuti.
\p
\v 18 Ex ni Jesús lakjunil:
\p —Klaqtsʼil ni Satanás va tsʼalaj patajul laktʼiyan
tacha taun makaliukniti.
\v 19 Kitʼin klaxtaqnitau tapʼasta para lay kaltʼanantʼik
taʼan alin tsapulin kun statsuku y para lay kalhaʼatʼik
ni aqmoqxnuʼ kun tachun ixtapʼasta y jantu tuʼuchun
kʼalhitʼapʼasatʼik.
\v 20 Mas taqalasmatʼan ni jantu ox espíritus jantu
va yucha kʼalhiʼachʼantʼaʼutʼik. Kalhiʼachʼantʼaʼutʼik
ni tsʼoqmulakantachalcha mintaqaʼutikʼan laktʼiyan.
\s Lhiʼachantajuy ni Jesús
\r (Mt. 11:25-27; 13:16-17)
\p
\v 21 Ex ni Jesús va niman lhiʼachantajul ni Espíritu
Santo, va naul:
\p —KimPay kʼatʼi, xaJalhachimoʼonuʼ kʼatʼi laktʼiyan kun
lakamunukpaʼ, kitʼin ktoʼoyayan. Va lakmalanitʼa minchivinti
ni lakstʼuniy lapanakni y jamaqsaqnitʼa yu talakpastaknan,
yu lhuu ixtalanitkʼan. Ay mijamapayninti xlhiyucha chuncha
lhinaʼun kaval.
\p
\v 22 Ex lakjunil ni lapanakni:
\p —Ni kimPay va tachun kimaqxtaqnita. Jantu matichun
kimispay taʼayucha ni kitʼin yu Sasʼatʼa, vamun kimPay
kimispay. Vachu va chun jantu matichun mispay taʼayucha
ni kimPay, vamun ni kitʼin vachu ni lapanakni yu klakmamispaniputun.
\p
\v 23 Ex talaqaspʼiklaqtsʼil ixtʼaltanan, va lakjunil
ixʼamankʼan:
\p —Kʼalhiʼachʼantʼaʼutʼik ni laqtsʼinatʼik yu chavay
tʼajun tapasanaʼ.
\v 24 Laqsaval klajunau la maqancha qaynlhuvaj ixlapanakni
ni Dios yu ixtalaqputeʼey ixchivinti kun yu lhachimoʼonun
va ixtalaqtsʼinputun yu chavay laqtsʼinatʼik, pero jantu
kalal katalaqtsʼil. Va ixtaqasmakputun yu chavay asmatʼatʼik
pero jantu kalal kataqasmaklhi.
\s Qayntaun lapanaki yu ox paxkal aqayntaun
\p
\v 25 Ex chuncha va tayal qayntaun yu ixmasuy ixlhachimoʼonkʼan
ni israelitas, va ixlaqtsʼintanuputun ni Jesús. Junkal
ni Jesús:
\p —Jamalaniniʼ, ¿tisuncha kakmakalcha para kaklhitsukul
jatsukunti yu jantu aqtaun kamiʼoyaʼ?
\p
\v 26 Ex naul ni Jesús:
\p —¿Tisuncha jatsʼoqnucha la kilhachimoʼonkʼan? ¿Tisuncha
pʼuʼteʼecha ancha?
\p
\v 27 Ex yu ixmasuy ixlhachimoʼonkʼan va naul:
\p —Ni kilhachimoʼonkʼan najun: “Kaʼachʼanin ni Dios
miJalhachimoʼonuʼ kun tachun melhanuti ali tachun metsukunti
ali tachun mintapʼasta ali tachun mijatapastakʼati.”
Vachu najun: “Kapʼaxkʼatʼi mintʼamachaqaʼ tacha pʼaxkʼakʼan
meʼeman.”
\p
\v 28 Ex va naul ni Jesús:
\p —La ox yu altʼiyanan. Va chuncha kʼamakʼatʼi ex jantu
aqtaun kamiʼol ni metsukunti.
\p
\v 29 Pero ni anchanu lapanaki ixmakaputun para jantu
lay kamukʼanikal ixlaqtaqal. Va lhisakmil ni Jesús:
\p —¿Ex tas ayucha kintʼamachaqaʼ?
\p
\v 30 Ex naul ni Jesús:
\p —Qayntaun lapanaki ixtaxtuta Jerusalén, va ixʼuxaʼan
tus Jericó pero tachʼapayaul alhavanan. Maqaʼasas tamakal
y talaqanaqmal. Ex taʼalcha, tamakaumalcha, va laycha
ixnil.
\v 31 Ex chuncha qayntaun xakura Jerusalén tapasal ancha
lakatin, va laqtsʼil ni kilpataniʼ pero yucha va maqachoqol
ni lakatin.
\v 32 Vachu va chun qayntaun Levita yu ixtapatsay xalakatajtan
Jerusalén tapasal ni ancha lakatin, va laqtsʼil y vachu
vamun maqachoqol ni lakatin.
\v 33 Ex qayntaun yu machaqaʼ Samaria taʼan talaxkajiy
yu machaqan Jerusalén ixʼukxuntayay ancha lakatin va
chaʼal taʼan ixmal. Tejkan laqtsʼil va ayaj mapaynil.
\v 34 Ex chuncha niman taʼukstsʼuninil, lhikʼuchʼul aceite
kun vino taʼan talaqalhil, va lhichʼinil laqchʼiti. Ex
mukʼalcha la ixjuki, va lhaʼalcha taʼan loqojkan, ex va
lhistaklhi.
\v 35 Ex ataun julchan val, yu machaqaʼ Samaria va xtaqnil
aqxtʼuy tumin ni manavin yu taʼan loqojkan. Va junil:
“Kʼalhistʼaktʼi ni aniy lapanaki y tachun yu kamaʼakxayeʼe
mintumin, kitʼin kakxtaqnichoqoyan tejkan kakminchoqoyaʼ.”
\p
\v 36 Ex naul ni Jesús, va junkal ni yu masuy ixlhachimoʼonkʼan:
\p —¿Tas naʼuncha? ¿Taʼayucha ixpumatʼutukʼan yu ixtʼamachaqaʼ
ni kilpatani ni yu tachʼapayaul alhavanan?
\p
\v 37 Ex yu masuy ixlhachimoʼonkʼan va naul:
\p —Va yu mapaynil, yucha ixtʼamachaqaʼ.
\p Ex junil ni Jesús:
\p —Kʼapʼinchʼiycha, vachu va chuncha kamakʼatʼi.
\s Ni Jesús la ixchaqakʼan Marta ali María
\p
\v 38 Ex chuncha ni Jesús anchoqol lakatin va chaʼal
taun putaulan. Qayntaun xanati yu junkan Marta va yucha
lhijunil ni Jesús kamil la ixchaqaʼ.
\v 39 Marta ixlhitʼajun qayntaun ixtʼalapanaki va ixjunkan
María. Yucha taulnil taʼan taulal ni Jesús va ixqasmakputun
yu ixnajun.
\v 40 Yu Marta vamun pastakʼuy tas kapulaqlaʼoxil ixvayti.
Ex laqʼal ni Jesús va naul:
\p —Jalhachimoʼonuʼ, ka jantu kʼilhipʼastʼakʼa. Ni yu kintʼalapanaki
va kimakaunil ni lhitapatsa. Kʼaʼun kiʼaqtayjul.
\p
\v 41 Pero ni Jesús qaltayanal:
\p —Marta, Marta. La alin milhitapatsa yu makʼapʼutʼun,
va pastakʼuyan milhilati.
\v 42 Pero vamun taun tuʼuchun yu maqskʼiniy kʼamakʼatʼi.
Va yu la ox yu laksakta ni María. Jantu matichun kamaxtuniyaʼ.
\c 11
\s Ni Jesús masul iskʼinka Dios
\r (Mt. 6:9-15; 7:7-11)
\p
\v 1 Taun julchan ni Jesús va lakataun ixtʼajun skʼiniʼ
ni Dios. Tejkan skʼinʼol ex qayntaun ixtʼaltanaʼ va
junil:
\p —Jalhachimoʼonuʼ, kilamasuniu tacha skʼinkan ni Dios
vachu chun tacha Juan lakmasunil ixtʼaltanan.
\p
\v 2 Ex ni Jesús lakjunil:
\p —Tejkan kaskʼintʼik ni Dios kanauntʼik:
\q KimPay Dioskʼatʼi yu alintʼachiy laktʼiyan,
\q katatoʼoyan ni lapanakni mintaqaʼuti.
\q Kʼalhachʼimoʼon aniy,
\q [chuncha kamakakal yu lhinaʼun aniy lakamunukpaʼ vachu
va tacha makakan yu lhinaʼun laktʼiyan].
\q
\v 3 Lhilhiy kilaxtaqniu yu vayti yu kmaqskʼiniyau.
\q
\v 4 Kilamalaqmixiniu kintalaqalhinkʼan
\q tacha kijnankʼan klamalaqmixiniyau yu kintamakaniyan
yu jantu lajʼoxi.
\q Jantu kilalhilhaʼau taʼan kakmapastaknikau yu talaqalhin,
va kilamalaqtaxtuu laqa talaqalhin.
\p
\v 5 Ex taylhaʼal ixchivinti, jalakjunil:
\p —Tas kavalcha incha xaqayntaun uxiknankʼan va kapiti
la ixchaqa milaqaj mas pakltaun tsʼis kaval y kʼaʼun:
“Laqaj, kimachʼixtaqnin aqxtʼutu pan.
\v 6 Qayntaun kilaqaj va aniykaʼ xachin. La maqati ixminachal
pero kitʼin jantu klhitsukul yu kakxtaqnil.”
\v 7 Ex yu milaqaj yu ixpulakna ixchaqaʼ tanun, kunan:
“Jantu kʼimaʼanchʼapʼu. Va lakchajuy kimatiʼ y klaktʼamal
kesʼatʼan. Jantu lay kaʼostaulay para kakxtaqnin tuʼuchun.”
\v 8 Kitʼin klajunau mas milaqaj kaval jantu kaʼostaulaʼ
para kaxtaqnin tuʼuchun. Pero incha jantu kʼamakʼau,
ex kaʼostaulaʼ, kaxtaqniyan yu uxintʼi maqskʼiniy.
\p
\v 9 ’Laqsaval klajunau, kaskʼinitʼik Dios yu maqskʼiniyatʼik,
yucha kataxtaqniyan. Kʼalakxkʼautʼik ex katʼemayapitik.
Katʼaylhipʼi makasanaʼ laka matiʼ, ex katalaqltiʼayaʼ.
\v 10 Yu skʼin tuʼuchun, va laqaʼiy. Yu puxkajuy, va temay.
Yu makasay laka matiʼ, ni yucha malaqltiʼanikan.
\p
\v 11 ’¿Xaqayntaun ni uxiknan incha kataskʼinin ni pan
mesʼatʼakʼan, va kʼaxtʼaqnitʼik chiyux? ¿Incha kataskʼinin
jatanti, kʼaxtʼaqnitʼik tsapul?
\v 12 ¿Incha kataskʼinin axvati, kaxtʼaqnitʼik statsuku?
Jantu matichun siya uxiknankʼan chuncha layatʼik.
\v 13 Chuncha ni uxiknankʼan mas va jalaktuʼunun untʼatʼik
lay xtʼaqniyatʼik laqxoqta yu lajʼox ni mesʼatʼankʼan.
Ex laqsaval mimPaykʼan yu vilchal laktʼiyan kalaqxtaqniyaʼ
yu apalay ox yu taskʼin, va kalaqxtaqniyaʼ ni Espíritu
Santo.
\s Tanajun ni Jesús lhitʼajun ixtapʼasta ni xaʼukxtin aqmoqxnun
\r (Mt. 12:22-30; Mr. 3:19-27)
\p
\v 14 Ancha ixvil qayntaun lapanaki yu ixchʼapata aqmoqxnuʼ
yu ixmakata janunuʼ. Taval tejkan tisaxtul ni Jesús
ni aqmoqxnuʼ, ex ni lapanaki chivinchoqol. Yu alati lapanakni
va tus vak takʼatsal.
\v 15 Pero lati tanaul:
\p —Va Beelzebú, yu xaʼukxtin aqmoqxnuʼ, xtaqniy ixtapʼasta
para lay kalakmaxtul ni aqmoqxnun.
\p
\v 16 Lati ixtalaqtsʼintanuy ni Jesús, taskʼinil para
kalakmasunil taun ay axtoqnuʼ yu minachal laktʼiyan.
\p
\v 17 Pero ni Jesús ixkʼatsaycha yu ixtapastakʼa. Lakjunil:
\p —Mas va tisuncha lhachimoʼon incha va tatalaqlvaʼa
y talaxkajiy ni lapanakni, ex ixʼamankʼan tatalaktʼilhiy.
Vachu va chun aqataun chaqaʼ incha tatalaqlvaʼa y talaxkajiy
ni lapanakni ex ixʼamankʼan tatalaktʼilhiy.
\v 18 Vachu chun incha xʼaman lay maxtuchoqokal ni Satanás
yu xaʼukxtin ni aqmoqxnu, ¿ex tas kaputaqnilcha ixtapʼasta?
Ex chuncha kʼatsʼayatʼikcha ni jantu la ixtapʼasta Beelzebú
yu klakmaxtuy aqmoqxnun, mas chuncha naunatʼik, va klakmaxtuy
la ixtapʼasta Dios.
\v 19 Incha kilajunau klakmaxtuy aqmoqxnun kun ixtapʼasta
ni Beelzebú ex vachu va chuncha tamaxtuy aqmoqxnun mintʼaltanankʼan
yu tamalaniyan. Pero yuʼuncha katajunan va jantu kun
ixtapʼasta ni aqmoqxnu tamaxtuy aqmoqxnun.
\v 20 Kitʼin kmaxtuy aqmoqxnuʼ la ixtapʼasta Dios chuncha
kʼatsʼayatʼik chavay ni Dios lhachimoʼonun taʼan ukxuyanantʼik.
\v 21 Tejkan qayntaun pʼas lapanaki chʼapata ixpatʼalan
y va lhistakta ixchaqaʼ, ex chuncha jantu matichun lay
kamaxtunichoqol yu ixnavin yu maʼata.
\v 22 Pero incha kachinaʼ aqayntaun yu apalay pʼas, ex
yucha kalhajayaʼ, kamaxtuniyaʼ ixpatʼalan yu ixlhiʼajin
kun tachun yu ixnavin y kalaqlvaqniyaʼ.
\v 23 Yu jantu kintʼaʼan ni kitʼin yucha va kixkajiy.
Yu jantu jalaqmaqxtoʼa lapanakni para kintatʼaʼal, yucha
va lakmaputaukʼay.
\s Minchoqoy yu jantu ox espíritu
\r (Mt. 12:43-45)
\p
\v 24 ’Tejkan taxtuy taun jantu ox espíritu la ixlakatunaj
qayntaun lapanaki, ex va an ukxuntayan taʼan jaxixninta.
Lakxkajuy taʼan kataulal pero jantu temay. Ex va pastakchoqoy:
“Ka va kajkʼanchoqoyacha la kinchaqaʼ taʼan kmintachal.”
\v 25 Tejkan chinchoqoy la ixlakatunaj ni lapanaki va
tus ox japʼalnankanta y ox jalaʼoxikanta.
\v 26 Ex anchoqoy laqmaqxtoqnuʼ pumatujun ixtʼaʼespíritus
yu apalay talaktuʼunun. Tus tachun chʼantaun tatanuy
la ixlakatunaj ni anchanu lapanaki. Ex chuncha apalay
lhitaʼay jun ixjatsukunti ni lapanaki xajantu tacha
ixjunita pʼunaj.
\s Yu laqsaval achan
\p
\v 27 Ex tejkan ixtʼajun chivin ni Jesús, va tʼasal qayntaun
xanati, va junil:
\p —Ka la achancha ni xanati yu memaqlaqavanaʼ, yu matsʼikʼin
ni uxintʼi.
\p
\v 28 Pero ni Jesús junil ni anu xanati:
\p —Yu laqsaval achan va yu qasmatʼa ixchivinti Dios y
makay tacha lhinajun.
\s Yu talaktuʼunun lapanakni taskʼiniy Jesús kamakal ay axtoqnuʼ yu lay katapumispal
\r (Mt. 12:38-42; Mr. 8:12)
\p
\v 29 Ex chuncha ixtalhavaxtu lapanakni taylhaʼal maqxtoqnun
ni Jesús. Va naul ni Jesús:
\p —Yu chavay tatʼajun lapanakni ayaj talaktuʼunun. Kintaskʼiniy
kaklakmasunil ay axtoqnuʼ yu lay kintapumispal. Pero
jantu tuʼuchun kaklakmasuniyaʼ ni lapanakni, vamun yu
tapasal ni Jonás yu maqancha ixlaqputeʼey ixchivinti
Dios.
\v 30 Va por yu tapasal ni Jonás va ixtapukʼatsaniy
yu machaqan Nínive va ixmalaqachata ni Dios. Vachu va
chun yu kaktapasayaʼ va chuncha kintapukʼatsaniyaʼ ni
kitʼin yu kval Sasʼatʼa Lapanaki.
\v 31 Taun julchan kalakmukʼanikanaʼ ixlaqtaqalkʼan
ni lapanakni, ex chuncha ni xanati yu ixlhichimoʼoy maqancha
ixlhisur ni lakamunukpaʼ, va ancha katayayaʼ y kalaktislajmayaʼ
ni lapanakni yu chavay tatʼajun. Yucha la maqati minchal
para kaqasmaknil ixchivinti Salomón yu ayaj lhuu ixjatapastakʼati.
Pero chavay alin qayntaun aniy yu apalay lhuu jatapastakʼati
lhitʼajun xajantu Salomón.
\v 32 Vachu ni anchanu julchan katatayayaʼ ni lapanakni
yu maqancha machaqan Nínive. Vachu katalakmukʼaniyaʼ
ixlaqtaqalkʼan yu chavay tatʼajun lapanakni. Yuʼuncha
yu machaqan Nínive va tamapaxal ixjatapastakʼatkʼan
tejkan taqasmaknil ixchivinti Jonás. Pero uxiknan maʼalinatʼik
qayntaun aniy yu apalay pʼas xajantu ni Jonás.
\s Yu ox laqtsʼin ni Jesús yucha ox kunaʼ la ixjatsukunti
\r (Mt. 5:15; 6:22-23)
\p
\v 33 ’Jantu matichun mamaqtayay ixmaklku para kamaʼal
taʼan jantu tasuy, vachuʼ jantu maqanuy ixtaʼapuʼ kajun.
Va mukʼay talman para lay katalaqtsʼil maklku yu tatanuy
ni laqa chaqaʼ.
\v 34 Yu milaqchulkʼan va tacha xamaklku milakatunajkʼan.
Incha lajʼox milaqchul, ex alin maklku para taʼakchun
milakatunaj. Chavay incha jantu ox milaqchul ex va putsʼista
la metsukunti.
\v 35 Ex kʼalhistʼajkʼantʼik incha laqsaval alin maklku
la metsukuntikʼan u incha va putsʼista.
\v 36 Incha tus ox maqtajita ni maklku, ex jantu intachun
kaputsʼislhi la metsukuntikʼan. Vachu va tacha la ox
lakʼavananatʼik taʼan alin maklku yu ox maqtajita.
\s Ni Jesús lakmukʼaniy laqtaqal yu xalajʼaynin ni israelitas
\r (Mt. 23:1-36; Mr. 12:38-40; Lc. 20:45-47)
\p
\v 37 Ex tejkan chivinʼol ni Jesús, qayntaun fariseo
juntalhaʼal vayaʼ la ixchaqaʼ. Ex tanuchal ni Jesús,
va taulal laka mesa.
\v 38 Ni fariseo va laqtsʼil ni jantu kamaqchaʼaʼelal
ni Jesús tacha ixnajun ixlhachimoʼonkʼan. Ex yucha jantu
ox kalhilal.
\v 39 Ex junil ni Jesús, junkal yu fariseo:
\p —Laqsaval ni uxiknankʼan yu fariseos va tacha yu tasa
ali plato yu ox chaʼakanta pero vamun ixlhimaqspakʼan.
Va chuncha ni uxiknankʼan. Jantu makʼayatʼik kuenta
la ixpulakna metsukuntikʼan. Ancha alin taʼaqspukniti
kun jaxkayanti.
\v 40 Va tontos untʼatʼik. Ni Dios yu makal yu ixlhimaqspaʼ
vachu makal yu ixlhipulakna.
\v 41 Kaʼaqtʼayʼutʼik ni kilpatanin ex la lhiʼacha kunaʼ
mejalhanutkʼan.
\v 42 Payniʼincha uxiknankʼan fariseos. Laqsaval xtʼaqniyatʼik
ni lakatajtan tsʼuniy mimuviskʼan ali tsʼuniy jalaʼoxinti
ali tsʼuniy mijaxqantikʼan tacha najun kilhachimoʼonkʼan.
Pero jantu makʼayatʼik kuenta para kaʼaqtʼayʼutʼik yu
alati y jantu tʼoʼoyayatʼik Dios. Va yucha yu maqskʼiniy
kʼamakʼatʼik pero vachu jantu kʼamakʼau yu alati.
\v 43 Payniʼincha uxiknankʼan fariseos. Taʼan tataqxtoʼa
ni lapanakni tʼaulpʼutʼunatʼik taʼan katoʼoyakʼantʼik.
Vachuʼ lakatin va naunatʼik kamastʼakʼakʼantʼik tacha
lajʼay lapanakni.
\v 44 Payniʼincha uxiknankʼan. Lhichʼivinanatʼik yu
lajʼoxi pero makʼayatʼik yu jantu ox taʼan jantu talaqtsʼinan
ni lapanakni, tacha putaknun untʼatʼik yu jantu tasuy,
taʼan tatapasay lapanakni sin katakʼatsal.
\p
\v 45 Ex va junil qayntaun yu ixmasuy ixlhachimoʼonkʼan
ni israelitas:
\p —Jamalaniniʼ, tejkan chuncha naʼun uxintʼi, kilalaqʼaymayau
kijnankʼan vachuʼ.
\p
\v 46 Ex qaltayl ni Jesús:
\p —Vachu payniʼincha ni uxiknankʼan yu masuyatʼik ixlhachimoʼonkʼan
ni lapanakni. Laklhijunatʼik ni lapanakni yu ayaj lhitaʼay
tus jantu lay tatayaniy. Chuncha lakmatʼikʼukʼayatʼik
yu alati lapanakni pero jantu aqtʼayʼuyatʼik mas va
kun yu maktaun yu lakatʼuniy mimakakʼan.
\v 47 Payniʼincha uxiknankʼan. Yu mimpayankʼan tamaqnil
yu maqancha ixtalaqputeʼey ixchivinti Dios. Chavay yu
uxiknankʼan makʼayatʼik ixpupastakʼankʼan.
\v 48 Ex chuncha tʼalhipʼiniyan yu tamakal mimpayankʼan.
Yuʼuncha talaqmaqnil yu ixtalaqputeʼey ixchivinti Dios
y uxiknankʼan makʼayatʼik ixpupastakʼankʼan mas jantu
laqsaval laktʼoʼoyayatʼik.
\v 49 Ni Dios yu ayaj pastaknan va naul: “Klaqmalaqachaniyaʼ
lapanakni yu talaqputeʼey kinchivinti kun yu alati kintamalaqachan.
Lati kalaqmaqnikanaʼ, lati kalakxkaykanaʼ.”
\v 50 Ex chuncha yu chavay tatʼajun lapanakni kalakmukʼanikanaʼ
laqtaqal por tachun yu laqmaqnikanta lapanakni yu ixtalaqputeʼey
ixchivinti Dios. Mas yu ixtalaqputeʼey ixchivinti Dios
tejkan aqtaynil ni lakamunukpaʼ tus chavaycha.
\v 51 Mas va Abel yu la maqancha maqnikal tus Zacarías
yu maqnikal la kilakatajtankʼan la ixtanʼajna taʼan
toʼoyakan Dios kun laka altar. Laqsaval klajunau, ni
chavay tatʼajun lapanakni kalakmukʼanikanaʼ laqtaqal
por tachun yu laqmaqnikanta yu ixtalaqputeʼey ixchivinti
Dios.
\p
\v 52 ’Payniʼincha uxiknankʼan yu masuyatʼik ixlhachimoʼonkʼan
ni lapanakni. Chavay ni uxiknankʼan va tacha kachʼapʼatʼikcha
xapumalaqltiʼakan xachaqaʼ jatapastakʼati. Pero jantu
tʼanuyatʼik y vachu laktanchʼaniyatʼik yu alati lapanaki
para jantu lay katalhitsukul jatapastakʼati.
\p
\v 53 Va chuncha chivinʼol ni Jesús. Ex ni fariseos
kun yu ixtamasuy ixlhachimoʼonkʼan ni israelitas, taʼaqtaynilcha
talaqtsʼintanuy, talhisakmiy axtoqnu yu lhitaʼay.
\v 54 Chuncha ixtamakay para kanaul ni Jesús taun chivinti
yu jantu lhinajun ixlhachimoʼonkʼan para ex chuncha
lay kataputislajmal.
\c 12
\s Yu jantu ox jatapastakʼati va tacha levadura
\p
\v 1 Ex tataqxtoqnil ixtalhavaxtu lapanakni por miles
tus ixtalapatsʼiuksta. Ni Jesús va jalakjunʼelal ixtʼaltanan,
va naul:
\p —Kʼalhistʼajkʼantʼik para jantu kalhakʼapʼupʼintʼik
ixchivintikʼan ni fariseos yu tʼuy ukxpuʼ tamakay, va
tacha levadura.
\v 2 Tachun yu chavay aqxtaqmanti kamispakanaʼ y tachun
yu makakan laqatamaqsaq, kamispakanaʼ.
\v 3 Yu naunatʼik laka putsʼista para jantu kaqasmajkal,
va kaqasmajkanaʼ laka tunkunaʼ. Tachun yu chʼivinanatʼik
laksniy la minchaqakʼan para jantu kamispakal, va kamispakanaʼ
tacha katʼasakal talman.
\s Jantu kalaktʼalhaunitʼik lapanakni, katʼalhaunitʼik Dios
\r (Mt. 10:28-31)
\p
\v 4 ’Kintʼalaqaunin, jantu kʼatʼalhaunitʼik ni lapanakni
yu lay katamaqniyan. Yuʼuncha astan tejkan kaniyapitik
jantucha lay tuʼuchun katamakaniyan.
\v 5 Pero klajunau taʼayucha kʼatʼalhaunitʼik. Kʼatʼalhaunitʼik
ni Dios yu lay tamaqniyan y vachuʼ astan lay tamalaqachayan
laqnin. Yucha kʼatʼalhaunitʼik.
\p
\v 6 ’Laqakis tsʼoʼon lhistʼakan aqxtʼuy pero mas va
tsʼuniy ixtapalkʼan, Dios jantu lajkʼapʼa ni yuʼuncha.
\v 7 Mas miʼajikʼan yu alin la miʼaqtsulkʼan tus taputeʼeniʼotan
ni maqatamin por maqatamin. Xlhiyucha jantu maqskʼiniy
katʼalhanantʼik. Uxiknankʼan apalay xtapal untʼatʼik
xajantu lhuvajcha tsʼoʼon.
\s Yu jantu talhimaxanan ni talhakapuʼan Jesucristo
\r (Mt. 10:32-33; 12:32; 10:19-20)
\p
\v 8 ’Incha qayntaun najun la ixtalakaʼukxpukʼan ni
lapanakni ni va kilapanaki junita, ex kitʼin yu kval
Sasʼatʼa Lapanaki vachuʼ kaknaunaʼ la ixtalakaʼukxpukʼan
ixmayulnin Dios, ni va kilapanaki junita.
\v 9 Pero incha najun la ixtalakaʼukxpukʼan ni lapanakni
ni jantu kilapanaki junita, ex kitʼin vachuʼ kaknaunaʼ
la ixtalakaʼukxpukʼan ixmayulnin Dios, ni jantu kilapanaki
kaval.
\v 10 Yu kinkiltaukʼaniy ni kitʼin yu Sasʼatʼa Lapanaki,
yucha ni Dios kamalaqmixiniyaʼ. Pero yu jantu ox lhichiviniy
ni Espíritu Santo yucha jantu kamalaqmixinikanaʼ.
\p
\v 11 ’Tejkan kalhipʼinkʼanapitik laqa chaqaʼ taʼan
tataqxtoʼa y la ixtalakaʼukxpukʼan ni lhachimoʼonun,
jantu kapastakʼun tas kʼalhaʼaltʼayananapitik u tisuncha
kʼanaunapitik.
\v 12 Ni Espíritu Santo katamalakpastakʼaniyan tas kanaunapitʼik.
\s Qayntaun maqaliʼ yu akchaʼan
\p
\v 13 Ex chuncha qayntaun yu ancha ixyal va naul, va
junkal ni Jesús:
\p —Jamalaniniʼ, kʼaʼun keeyaʼ kixtaqnil pakltaun ixlhitapatsa
kimPaykʼan yu kimpaxtoqniycha ni kitʼin.
\p
\v 14 Ex va najun ni Jesús:
\p —Lapanaki, kitʼin jantu kimpaxtoqniy kaklaʼoxil.
\p
\v 15 Ex chuncha ni Jesús va lakjunil ni lapanakni:
\p —Kʼalhistajkʼantʼikcha, jantucha aqtaun kaʼakchʼipʼintʼik.
Jantu vamun mimaqalitkʼan kʼapʼutsʼukʼuyapitik.
\p
\v 16 Ex va chuncha jalaqputeʼenil taun chivinti yu
xtaʼa jatapastakʼati. Va lakjunil:
\p —Qayntaun maqaliʼ va la ox ixlhitʼajun ixtʼun, va lhuvaj
lhiʼuti xqal.
\v 17 Ex va pastaklhi: “¿Tas kakmakayacha ni kijaxqanti?
Kimpakʼatsa aqtsamalcha, jantucha lhijun.”
\v 18 Ex va pastakchoqol ni maqaliʼ: “Kakmaqtayacha
ni kimpakʼatsa. Ataun kakmakachoqoyaʼ sastʼi yu apalay
ay kaval ex ancha kakmaʼaʼoyaʼ tachun kilaqxoqta, ex
chuncha la ox kunaʼ para kalaqchaanacha lhuvaj jachʼitin.
\v 19 Ex kakstaknanacha, vamuncha kakvaynaʼ, kajqoqnunaʼ,
jantucha kaktapatsayaʼ, oxamaktauncha kajkʼalinaʼ”, va
naul ni anchanu lapanaki.
\v 20 Pero yu Dios va junil ni maqaliʼ: “¡Tontoj! Jantu
pʼastʼakʼa yu makʼay chavaycha. Apanchʼix putsʼista
kalaqmixacha metsukunti. ¿Ex yu milaqxoqta tas kʼapʼulhitsʼukʼuyeʼecha?”
\p
\v 21 Ex tejkan ni Jesús lakjunil ni anchanu chivinti
yu xtaʼa jatapastakʼati, va naul:
\p —Va chuncha kaniyaʼ yu vamun pastakʼa para kalalhaval
ixmaqaliti, pero jantu pastakʼa tacha kapulaqaʼil ixlhilhajati
kun Dios.
\s Jantu katapastakʼun, Dios kataxtaqniyan yu maqskʼiniyatʼik
\r (Mt. 6:25-34)
\p
\v 22 Ex va lakjunil Jesús ixtʼaltanan:
\p —Xlhiyucha kitʼin klajunau jantu katapastakʼun la metsukuntikʼan
suncha kʼaʼuyapitik, vachu jantu katapastakʼun la milakatunajkʼan
suncha kʼaʼulayapitik.
\v 23 Apalay ixtapal ni metsukuntikʼan xajantu ni vayti
y apalay ixtapal ni milakatunajkʼan xajantu ni laqchʼiti.
\v 24 Kalaqtsʼintʼik ni laʼa. Mas yuʼuncha jantu tachʼan,
mas jantu taxqanan, mas jantu tʼujuʼ ixmoqltakʼan, mas
jantu tʼujuʼ ixpakʼatsakʼan, va lakvavay ni Dios. Yu
uxiknankʼan apalay ixtapal metsukuntikʼan xajantu yu
tsʼoʼon.
\v 25 ¿Taʼayucha siya uxiknankʼan lay apalay putanʼay
kʼaʼunaʼ vamun por pastakʼuy?
\v 26 Ex incha jantu chuncha lay makʼayatʼik mas va
tsʼuniy, ¿ex valiʼiycha tapastakʼuyan kʼamakʼatʼik yu
apalay lhitaʼay?
\v 27 Kalaqtsʼintʼik tacha taʼajin ni xanti. Jantu tatapatsay,
jantu tamakay isijuntikʼan. Pero kitʼin klajunau ixlaqchʼiti
yu ay lhachimoʼonuʼ Salomón mas ayaj ox ixlakatayay,
jantu kalaqchaʼal tacha ixʼoxixtu laqataun xanti.
\v 28 Ni javan yu chavay alinta lakakʼavin, lhiy kalaqxauyacha
laka horno pero ni Dios ayaj kʼus jamalaqchʼiniy. Ex
apalay ox katamalaqchʼiniyan ni uxiknan mas va lakatsʼuniy
milhakapuʼatkʼan.
\v 29 Jantu kʼapʼuxkʼautʼik vamun yu kʼaʼuyapitik kun
yu kʼaʼotʼapitik. Jantu tuʼuchun katapastakʼun.
\v 30 Yu valiʼiy lapanakni aniy lakamunukpaʼ, yuʼuncha
ayaj tapastakʼuy yu aniy axtoqnuʼ. Pero mimPaykʼan Dios,
yucha kʼatsay ni maqskʼiniyatʼik tachun ni anchanu axtoqnuʼ.
\v 31 Va kʼalhipʼuxkʼauyapitik ni kalhachimoʼonul Dios,
ex kaʼalinaʼ tachun yu maqskʼiniyatʼik.
\s Xamaqaliti laktʼiyan
\r (Mt. 6:19-21)
\p
\v 32 ’Jantu katʼalhanantʼik. Ni uxiknankʼan yu ixnavin
Dios va tacha kiborregos untʼatʼik. Mas jantu qaynlhuu
kʼaʼuntʼik, ni Dios va maqamay kataxtaqnin palhachimoʼon.
\v 33 Kastʼatʼik yu lhitʼaunatʼik y kʼaxtʼaqnitʼik ni
tumin yu tamaqskʼiniy. Chuncha va tacha kamaʼatʼik milhilhajatikʼan
laka bolsas yu jantu aqtaun tapuchʼiy. Chuncha kalalhavatʼik
laktʼiyan mimaqalitikʼan yu jantu aqtaun kamiʼoyaʼ.
Ancha laktʼiyan jantu tanuyachal alhavanan, vachuʼ jantu
laqlvajiy ni matapil.
\v 34 Taʼan maʼalinatʼik mimaqalitkʼan, va ancha pʼastʼakʼatʼik
la mejalhanutikʼan.
\s Va lhistujcha kʼaʼuntʼik para kaminchoqol ni jalhachimoʼonuʼ
\p
\v 35 ’Kakʼujtʼikcha. Va kamaqtaylcha mimaklkukʼan.
Va listujcha kʼaʼuntʼik kun mimaklkukʼan maqtajitacha.
\v 36 Kʼaʼuntʼik tacha oqxtamatin yu tapakxan kachinchoqol
ixʼukxtinkʼan yu al taʼan lakxtuklakan. Va chuncha kʼapʼakxantʼik
ni Dios miJalhachimoʼonukʼan. Tejkan kachinaʼ ni ukxtin
va kamakasayaʼ ni matiʼ y va niman katamalaqltiʼal.
\v 37 Ox kaxajtachal para ni anchanu oqxtamatin yu kalaktemakanaʼ
takujtacha tejkan kachinaʼ ixʼukxtinkʼan. Laqsaval klajunau,
yu ukxtin kamakakanaʼ ixʼaman tacha oqxtamati kaval.
Yucha kalakmulayaʼ ixʼoqxtamatin laka mesa y ancha kalakmulaniyaʼ
ixvaytikʼan.
\v 38 Mas kachil pakltaun tsʼis, mas kachil katunkumil,
incha kalaktemakanaʼ takujtacha ni oqxtamatin, ex ox
kaxajtachal ixjatsukuntikʼan.
\v 39 Laqsaval klajunau, va kakʼatsal ni machaqaʼ tavanan
kachil ni alhavanaʼ ex va kakujtaulal, ex jantu kaxtaqlhi
lakatin kaʼalhavanankal ixchaqaʼ.
\v 40 Uxiknankʼan vachu kʼakʼujtʼikcha. Jantu kʼatsʼayatʼik
tavanancha kakminchoqoyaʼ kitʼin yu kval Sasʼatʼa Lapanaki.
\s Yu ox oqxtamati ali yu jantu ox
\r (Mt. 24:45-51)
\p
\v 41 Ex ni Pedro va lhisakmil:
\p —Jalhachimoʼonuʼ, ¿vamun ni kijnan kilajuniu ni aniy
chivinti yu xtaʼa jatapastakʼati u va lakʼunʼoj tachun
ni aniy lapanakni?
\p
\v 42 Ex va junil ni Jesús:
\p —¿Taʼayucha ni xalhistaknaʼ oqxtamati yu lhiʼaynkan
y mispay lhitapatsa? Va yucha ni ixʼukxtin kamakaunaʼ
para kalaklhistaklhi oqxtamatin y para kalakvaval tejkan
tachavaniy.
\v 43 Ayaj lhiʼachantajuycha yu oqxtamati yu tʼajuncha
makaʼonaʼ yu ixlhijunkanta tejkan chinchoqoy ixʼukxtin.
\v 44 Laqsaval klajunau ni ixʼukxtin kamakauniyaʼ kalaklhistaklhi
tachun ixmaqaliti.
\v 45 Pero incha ni xalhistaknaʼ oqxtamatin pastakʼa
ixʼaman kataqmaqayaʼ ixʼukxtin y aqtaylcha jalakasamay
ixtʼaʼoqxtamatin ali yu maqtsukunin y vamun vajin, oqnun,
taʼapʼay,
\v 46 ex chuncha va kaminchoqoyaʼ ixʼukxtin taun julchan
tejkan jantu pakxanʼiy y taun hora tejkan jantu kʼatsay.
Kamaxtunikanaʼ ixlhitapatsa y kamakakanaʼ tacha yu lapanakni
yu jantu talhakapuʼan.
\v 47 Qayntaun oqxtamati yu mispay tacha najun ixʼukxtin
pero jantu listuj kaval y jantu makay yu lhijunkan yucha
ox kalaqanaqmakanaʼ.
\v 48 Pero qayntaun oqxtamati yu jantu mispay tacha
najun ixʼukxtin y jantu listuj kaval yucha tsʼuniy lamaqanaqni
kalaqaʼiyaʼ. Yu apalay lhuu ixtaqnikan, yucha apalay
lhuu kaskʼinichoqokanaʼ. Yu apalay ox lhiʼaynkan para
lhuu kalhistaklhi, yucha apalay lhuu kaskʼinichoqokanaʼ.
\s Laqlvaqkan ni lapanakni por ixchivinti Jesús
\r (Mt. 10:34-36)
\p
\v 49 ’Va chuncha kmil va tacha kakmamaqtiyal jikmi
ni lakamunukpaʼ. Va knajun kamaqtaylcha.
\v 50 Kitʼin ayaj kakmaqanlqajnanaʼ y ayaj kmaqaninin
tus katamaktal ni maqanlqajnati.
\v 51 ¿Lhakʼapʼupʼinatʼik ni kminta para chʼantaun kaval
ni lapanakni ni aniy lakamunukpaʼ? Jantu laqsaval kaval.
Va kminta para kaʼalil laʼatʼuy ixjatapastakʼatkʼan
ni lapanakni.
\v 52 Chavaycha aqataun chaqaʼ taʼan tavilanal pumakis
lapanakni ancha kaʼalinaʼ laʼatʼuy jatapastakʼati. Qayntʼuy
yuʼuncha ataun jatapastakʼati katalhitsukuyaʼ y yu qayntʼutu
ataun jatapastakʼati katalhitsukuyaʼ.
\v 53 Yu japay kaxkayyaʼ istsʼal, yu jatsʼal kaxkayyaʼ
ixpay. Yu janati kaxkayyaʼ istsiʼi, ni jatsiʼi kaxkayyaʼ
ixnati. Ni xaʼatinaʼ kaxkayyaʼ ixpʼuti, ni ixpʼuti kaxkayyaʼ
ixʼatinaʼ.
\s Ni lapanakni jantu talaksakʼa yu lajʼoxi para ixjatsukuntikʼan
\r (Mt. 16:1-4; Mr. 8:11-13)
\p
\v 54 Ex ni Jesús lakjunil ni lapanakni:
\p —Tejkan laqtsʼinatʼik ni ostaulay taputsʼi ixlhitoʼanta,
naunatʼik katamayaʼ xkan y chuncha jun.
\v 55 Tejkan laqpaqnan, laktʼasakan paxtoʼanta, naunatʼik
kataylhaanaʼ skunuʼ y chuncha jun.
\v 56 Tʼuy ukxpuʼ makʼayatʼik. Uxiknankʼan kʼatsʼayatʼik
tas katapasayaʼ lakamunukpaʼ kun laktʼiyan. ¿Valiʼiycha
jantu malaʼasiyatʼik yu tapasay chavaycha aniy taʼan
tʼaunatʼik?
\s Kʼalaqlaʼoxitʼi kun yu mintʼalaxkayaʼ
\r (Mt. 5:25-26)
\p
\v 57 ’¿Valiʼiycha jantu laksakʼatʼik meʼemankʼan yu
lajʼoxi para metsukuntikʼan?
\v 58 Chavay incha matichun chivintanuputun laka machʼalkʼati
por makʼanin laqtaqal, ex tejkan tʼapʼin lakatin kʼalaʼoxitʼi,
para jantu kamaqxtaqnin kun machʼalkʼati. Incha jantu,
ex yu machʼalkʼati kamaqxtaqniyan ixpolisia ex yu polisia
kamanuyan laka pachʼin.
\v 59 Kitʼin ijkunan ni jantu katʼaxtʼuyeʼe incha jantu
kʼamapʼalʼoyeʼe tachun mijalhaaninti.
\c 13
\s Tsʼanqay kʼamapʼaxa mimputsuku
\p
\v 1 Tejkan chuncha naul ni Jesús ancha tayanal lati
lapanakni yu taputeʼenil yu tapasal Galilea. Va taputeʼenil
tacha laqpumaqnil ni Pilato lati yu machaqan Galilea
tejkan ixtatʼajun moqslanan ixlapaxkankʼan ni Dios y
va lakmalhiyaul ixjakʼalnankʼan kun ixjakʼalnankʼan
ni talhitsukukna yu ixlapaxkankʼan.
\v 2 Ex ni Jesús lakjunil:
\p —Ni uxiknan pʼastʼakʼatʼik va tanil ni anchanu lapanakni
va por apalay ixtalhitʼajun ixtalaqalhinkʼan xajantu
yu alati yu machaqan Galilea.
\v 3 Pero kitʼin klajunau jantu laqsaval kaval. Va klajunau
incha jantu kamapʼaxayapitik mijatapastakʼatkʼan ex
katsʼanʼayapitik vachu va tacha ni anchanuʼ lapanakni
yu machaqan Galilea.
\v 4 Vachu va taniʼol pumakautsajin lapanakni tejkan
taqtal ni torre laka Siloé. ¿Ex va lhilayatʼik va apalay
lhuu ixtalaqalhinkʼan xajantu yu alati lapanakni yu
ixtavilanal Jerusalén?
\v 5 Jantu laqsaval kaval. Va klajunau incha jantu kʼamapʼaxayapitik
mijatapastakʼatkʼan ex katsʼanʼayapitik vachu va tacha
ni anchanu lapanakni.
\s Jesús lhichiviniy xakʼiu higo
\p
\v 6 Ex va lakjunil ni Jesús yu aniy chivinti yu xtaʼa
jatapastakʼati:
\p —Qayntaun lapanaki va ixchʼanta taun kʼiu yu junkan
higuera taʼan ixchʼanta ixʼuvas. Astan puxkaul xaʼunikan
ni higuera pero jantu katemal.
\v 7 Ex junil yu xalhistaknaʼ lakatʼun: “Va laʼatʼutu
jachʼitin iktiʼukxuyal puxkaunaʼ xaʼunikan, jantu aqtaun
kaktemal. Kʼamaqtʼatʼicha. Vamun valiʼiy mapatsay ni
lakatʼun.”
\v 8 Ex naul yu xalhistaknaʼ lakatʼun: “Kiʼukxtin kʼatʼi,
kʼamakʼau ataun jachʼitin. Kitʼin kaklajʼajniyaʼ lakatʼun,
kakmamaniyaʼ abono.
\v 9 Chuncha ka va lay kaʼalil xaʼunikan ataun jachʼitin.
Pero incha jantu ex kakmaqtayacha.”
\s Ni Jesús palay makal qayntaun xanati xajulchan jastaknati
\p
\v 10 Taun xajulchan jastaknati ni Jesús ixmalaninin
laqa chaqaʼ taʼan ixtaqxtoʼa ni israelitas.
\v 11 Ancha ixtanun qayntaun xanati ixlaqtanun yu jantu
ox espíritu. Xlhiyucha va ixtaqanʼay. Va laqakautsajin
jachʼitin ixtamakataltanan.
\v 12 Tejkan ni Jesús laqtsʼil ni xanati, juntaʼil, va
naul:
\p —Xanati kʼatʼi, palaycha kʼaʼunchʼoʼo mintaqanʼati.
\p
\v 13 Ex moqslanikal ixmakaʼ ni xanati, va nimancha vas
tayal, aqtaylcha ay makay ni Dios.
\v 14 Ex ni xaʼukxtin ni anchanuʼ chaqaʼ taʼan ixtataqxtoʼa
ni israelitas lhitalqamal va por kʼuchʼunul ni Jesús
tejkan xajulchan jastaknati. Va lakjunil ni lapanakni:
\p —Alin paqchaxan putapatsa laka semana. Yu ixkʼuchʼuka
lapanaki va lhitapatsa. Kʼatʼantʼik laka semana para
kʼakʼuchʼukʼantʼik, pero jantu kʼatʼantʼik yu xajulchan
jastaknati.
\p
\v 15 Ex va naul ni Jalhachimoʼonu Jesús:
\p —Va tʼuy ukxpuʼ makʼayatʼik. Mas va xataʼayuʼ uxiknankʼan
va xʼotʼatʼik mivakaxkʼan u mimburrokʼan, lhipʼinatʼik
moʼotʼunun xkan mas va xajulchan jastaknati.
\v 16 Chavay yu aniy xanati yu ixpapanti Abraham, va
laqakautsajin jachʼitin ixtaqanʼay, va ixlaqtanuy ni
Satanás. Yucha vachu chun maqskʼiniy kaxʼoqnikal ixtaqanʼati
para palay kaval mas va xajulchan jastaknati.
\p
\v 17 Tejkan chuncha naul ni Jesús va tatamaxaniʼol
tachun ixtʼalaxkaynin. Pero tachun yu alati lapanakni
taʼaqtayl talhiʼachantajuy por tachun yu ay axtoqnuʼ
yu lakmakal ni Jesús.
\s Tejkan lhachimoʼonun ni Dios va tacha xatʼin mostasa
\r (Mt. 13:31-32; Mr. 4:30-32)
\p
\v 18 Ex chuncha naul ni Jesús:
\p —Chavay klamasuniyau tacha junita tejkan lhachimoʼonun
ni Dios.
\v 19 Va tacha ni lakatʼuniy xatʼin yu junkan mostasa.
Qayntaun lapanaki chʼal ni lakatʼuniy tʼin la ixtʼun.
Ancha aynlhi tus ay kʼiu val. Ancha tamakal ixpaqtamankʼan
ni tsʼoʼon la ixmaqlaqapʼu.
\s Tejkan lhachimoʼonun ni Dios va tacha levadura
\r (Mt. 13:33)
\p
\v 20 Ex chuncha vachu naul ni Jesús:
\p —Klamasunichoqoyau tacha junita tejkan lhachimoʼonun
ni Dios.
\v 21 Va tacha levadura yu qayntaun xanati lhiyajuy
kun laʼatʼutu kualtil harina, va tus kalhitayaʼol tachun
ni skititi.
\s Yu putʼuniy matiʼ taʼan putanukan laktʼiyan
\r (Mt. 7:13-14, 21-23)
\p
\v 22 Ex ixʼanchoqota lakatin ni Jesús ni Jerusalén,
va ixtapasaʼanta taun taun putaulan yu lajʼay kun yu
lakstʼuniy. Va ixmalaniniʼanta.
\p
\v 23 Qayntaun lapanaki va lhisakmil:
\p —Jalhachimoʼonuʼ, ¿vamun tsʼuniy yu kalaqmalaqtaxtukanaʼ?
\p Ex ni Jesús va naul:
\p
\v 24 —Kamakʼatʼik tachun la mintapʼastakʼan para kalal
kʼatʼanutʼik taʼan putʼuniy matiʼ. Klajunau astan katatanuputunaʼ
lhuvaj lapanakni ex jantucha kalayaʼ.
\v 25 Incha jantu chuncha makʼayatʼik, ex va kaʼostaulaʼ
yu machaqaʼ, kamalakchauyaʼ ni matiʼ. Ex kʼatʼayayapitik
maqspaʼ, kʼamakʼasayapitik ni matiʼ, kʼaʼunapitik: “Jalhachimoʼonuʼ,
kilamalaqltiʼaniu.” Ex yucha katajunan: “Jantu klamispayau.
Jantu kʼatsay toʼoxtaycha machaqan untʼatʼik.”
\v 26 Ex kʼaʼunapitik: “Klatʼavajiu uxintʼi y klatʼaʼoqnuu
y la kinputaulankʼan kilamasuniu.” Chuncha kʼanaunapitik.
\v 27 Ex katajunchoqoyan: “Jantu klamispayau. Jantu
kʼatsay toʼoxtay machaqan untʼatʼik. Kapʼintʼikcha.
Kilamakajuucha uxiknankʼan yu laktʼuʼununatʼik”, chuncha
katajunan.
\v 28 Ex ancha kaʼalhunapitik y kʼalaktsʼakʼalhitsʼukʼuyapitik
mintatsalatikʼan. Kʼalaqtsʼinapitik ni Abraham ali Isaac
ali Jacob ali tachun yu ixtalaqputeʼey ixchivinti Dios
taʼan lhachimoʼonun Dios. Pero ni uxiknankʼan va kʼatʼanʼalhumaxtʼukʼanapitik.
\v 29 Pero lapanakni yu machaqan talakachux ni lakamunukpaʼ,
taʼan putakʼutʼa ni julchan y vachu taʼan puʼanachal,
yu machaqan ixlhitoʼanta, ixpaxtoʼanta, va kataminaʼ, katataulaʼ,
katavaynʼoyaʼ taʼan lhachimoʼonun ni Dios.
\v 30 Ex chuncha yu jantu ay kʼatsan chavay, ex anchanu
julchan va ay lapanaki kunaʼ. Yu la ay kʼatsan chavay,
va jantu ay kunaʼ.
\s Ni Jesús lhiqalhun ni putaulan Jerusalén
\r (Mt. 23:37-39)
\p
\v 31 Ex tejkan chuncha naul ni Jesús, va talaqchil lati
ni fariseos, va tajunil:
\p —Katʼaxtʼucha aniy. Kapiticha. Ni jalhachimoʼonuʼ Herodes
va maqniputunan.
\p
\v 32 Ex ni Jesús va lakjunil:
\p —Kalaqpʼinchipitik ni anchanuʼ jamakanunu xanixʼoy.
Kʼaʼunapitik va chavaycha kun lhiy kaklakmaxtuyaʼ aqmoqxnun
y kajkʼuchʼununaʼ. Ex yu paqtʼutunuʼ kakmajkaniʼoyaʼ
kilhitapatsa.
\v 33 Pero chavaycha kun lhiy kun tʼuxaun maqskʼiniy
kaktaylhaʼal kilakatin. Qayntaun yu laqputeʼey ixchivinti
Dios maqskʼiniy kanil laka putaulan Jerusalén.
\v 34 Jerusalén, xalapanakni Jerusalén. Jamaqniyatʼik
yu talaqputeʼey ixchivinti Dios y laktʼalmaqniyatʼik
yu tamalaqachaniyan Dios. Tacha ni piyuʼ jamaqxtoʼa
sasʼatʼan la ixpaqachuj, va chuncha ni kitʼin aqlhuvaj
xaklalhistakputunau pero jantu aqtaun kʼaʼuyujnauntʼik.
\v 35 Kʼalaqtsʼintʼikcha, minchaqakʼan kamakaunkanacha.
Chavay klajunau, jantucha aqtaun kilalaqtsʼinchoqoyau
tus tejkan inchine kʼanaunapitik: “Ay kamakakal yu
mintacha la ixtaqaʼuti ni Jalhachimoʼonu Dios.”
\c 14
\s Ni Jesús palay makal qayntaun taqanʼan yu ixlakakʼunta
\p
\v 1 Taun xajulchan jastaknati al vayaʼ ni Jesús la
ixchaqaʼ qayntaun xaʼukxtin fariseos. Lati ni fariseos
va ixtalaqtsʼin ni Jesús incha kamakal tuʼuchun yu jantu
kapaxtoqnil ixlhachimoʼonkʼan.
\v 2 Ex ancha la ixtalakaʼukxpuʼ ni Jesús ixyal qayntaun
lapanaki va ixlakakʼunta.
\v 3 Ex ni Jesús jalaqxaqalal ni fariseos kun yu ixtamasuy
ixlhachimoʼonkʼan ni israelitas. Va laklhisakmil:
\p —¿Tis va sun najun kilhachimoʼonkʼan? ¿Va lhinaunkan
jakʼuchʼunti xajulchan jastaknati u jantu?
\p Pero yuʼuncha va saq taval.
\v 4 Ex ni Jesús chʼapal ni taqanʼan, va palay makal,
va malaqachachoqol.
\v 5 Ex lakjunil ni alati lapanakni:
\p —Uxiknankʼan va katajqajul mimburrokʼan u mivakaxkʼan
lakxkan va niman kʼamakʼutʼutʼik mas va xajulchan jastaknati.
\p
\v 6 Ex yuʼuncha jantu lay tuʼuchun katanaunchoqol.
\s Ni Jesús lakjunil yu xalajʼaynin para jantu ay katakʼatsal
\p
\v 7 Ex tejkan taʼaqtayl tataulay laka mesa, jalaqtsʼil
ni Jesús tachun yu ixlaklhijunkan vayti, va tataulputun
taʼan tataulay yu lajʼay lapanakni. Ex va lakjunil ni
aniy chivinti yu xtaʼa jatapastakʼati:
\p
\v 8 —Tejkan lhiʼunkʼanatʼik kapʼintʼik xalakvayti lakxtuklati
jantu kʼalaksaktʼik taʼan tataulay ni lajʼay lapanakni.
Ka va lay kachil ataun lapanaki yu apalay ay xajantu
uxintʼi.
\v 9 Ex yu xalhinaunaʼ kalaqminan y kajunan: “Kʼaxtaqnin
ni mimputaulan yu ataun lapanaki.” Ex katʼamaxaniyeʼe,
katʼauleʼe alakataun putaulan taʼan tataulay yu xalakstʼuniy.
\v 10 Xlhiyucha tejkan kalhiʼunkʼaneʼe kapiti vayaʼ,
ex kataʼul taʼan tataulay yu jantu lajʼay lapanakni.
Ex chuncha yu xalhinaunaʼ kalaqminan va kajunan: “Laqaj,
kʼatʼapʼas taʼan tataulay yu lajʼay lapanakni.” Ex
chuncha jantu katʼamaxaniyeʼe la ixtalakaʼukxpukʼan
tachun ni lapanakni.
\v 11 Tachun yu lajʼay takʼatsan va lakstʼuniy kalakmakakanaʼ
pero tachun yu lakstʼuniy takʼatsan va lajʼay kalakmakakanaʼ.
\p
\v 12 Ex chuncha ni Jesús junil ni xalhinaunaʼ:
\p —Tejkan makʼay lakvayti jantu vamun kʼalaklhiʼun miʼamigos
ali mintʼalaqaunin ali milapanakni ali mintʼataulnin
yu maqalinin. Jantu chuncha kʼamakʼatʼi. Va katalhijunchoqoyan
la ixchaqakʼan ex chuncha va tapaxanti jun.
\v 13 Pero tejkan makʼay lakvayti kʼalaklhiʼun ni kilpatanin
ali ni lakmaknin ali ni talaknin ali ni laʼachʼixin.
\v 14 Ex chuncha kalhitsʼukʼuyeʼe achati, va por jantu
lay katamapalchoqoyan. Pero kʼamapʼalchʼoʼonikʼaneʼe
tejkan katakujchoqoyaʼ tachun yu tanitacha yu jamalaqtaxtukantacha.
\s Yu katavaynaʼ taʼan kalhachimoʼonunaʼ Dios
\p
\v 15 Ex chuncha tejkan qasmaklhi qayntaun yu ancha
ixvil laka mesa, va naul:
\p —Ayaj kataʼachanaʼ tachun yu katavaynaʼ taʼan kalhachimoʼonunaʼ
ni Dios.
\p
\v 16 Ex ni Jesús va junil:
\p —Taun julchan qayntaun lapanaki ixmakay taun ay lakvayti
va ixlaklhijunita lhuvaj lapanakni.
\v 17 Ex tejkan lakachilcha xahora lakvayti va malaqachal
ixʼoqxtamati para kalakjunil yu laklhijunkanta: “Kapʼintʼikcha,
alinʼojoycha tachun ni vayti.”
\v 18 Ex tachun ixlaklhijunkanta taʼaqtaynil naunan
ni jantu lay kataʼanaʼ. Pʼunaj va junil qayntaun: “Va
kʼilkaʼ aqxtaun tʼun. Ikmaqskʼiniy kteʼen laqtsʼiniʼ.
Kʼaʼuneʼe miʼukxtin va kimalaqmixinil.”
\v 19 Ex yu aqayntaun naul: “Va aniykaʼ kʼil laqakis
par vakaxna yu tatapatsay laka kuxtu. Va klaqlaqtsʼinputun
incha lay katatapatsal u jantu. Kʼaʼuneʼe miʼukxtin
va kimalaqmixinil.”
\v 20 Ex aqayntaun naul: “Va aniykaʼ klakxtuklata, xlhiyucha
jantu lay kʼanachal.”
\v 21 Ex ni oqxtamati laqchaanchoqol ixʼukxtin va puteʼeniʼol
yu tanaul. Ex ni ukxtin aqtaylcha lukujlay. Va junchoqol
ni oqxtamati: “Kʼapʼinchʼiy lakatinixnan laka putaulan.
Kʼalaklhitʼanchiy ni kilpatanin ali ni lakmaknin ali
ni talaknin ali ni laʼachʼixin.”
\v 22 Ex chuncha chinchoqol ni oqxtamati, junchoqol ixʼukxtin:
“Ikmakalcha yu naʼun pero vananaj xajyachal taʼan katataulal
laka mesa.”
\v 23 Ex va naunchoqol ni ukxtin: “Kʼapʼinchʼoʼochiy
lakatinixnan maqspaʼ ni putaulan kalaklhiʼun laqatapʼasta
katamil vaynin. Kitʼin knajun kataʼaqtsamal vaynin la
kinchaqaʼ.”
\v 24 Klajunau ni lapanakni yu ixlaklhijunkanta yu jantu
katamil vaynin, yuʼuncha jantu katakilkʼatsayaʼ ni lakvayti.
\s Yu maqskʼiniy kalhitapasal yu junputun ixlapanaki Jesús
\p
\v 25 Ex chuncha ixtalhavaxtu ni lapanakni ixtatʼaʼan
ni Jesús. Ex ni yucha talaqaspʼiklhi, va lakjunil:
\p
\v 26 —Mas va taʼayucha yu apalay toʼoyay ixpay, ixnati,
ixanati, yu sasʼatʼan, yu ixtʼalaqaunin, yu ixtʼalapanakni
xajantu kitʼin, ex ni yucha jantu lay jun kintʼaltanaʼ.
Vachu yu apalay toʼoyay ixjatsukunti xajantu kitʼin,
jantu lay jun kintʼaltanaʼ.
\v 27 Yu jantu laqaʼiputun maqanlqajnati tacha kitʼin,
yucha jantu lay jun kintʼaltanaʼ.
\v 28 Xataʼayuʼ uxiknankʼan incha kamakʼapʼutʼu putanʼay
chaqaʼ, pʼunaj katʼaʼul, kʼapʼastʼaktʼi tachuncha ixtapal
kunaʼ para kakʼatsʼatʼi incha kalaqchaʼaniyan yu lhitʼaʼun.
\v 29 Incha jantu kapastakʼel, ex tejkan kʼamakʼaʼoj
ni xaputayan chaqaʼ, jantu kalaqchaanaʼ mintumin para
kamajkʼanitʼi. Ex tejkan katalaqtsʼinaʼ ni lapanakni
kataʼaqtayniyancha laktuʼunun.
\v 30 Katanaunaʼ: “Aniy lapanaki ixʼaqtajitacha makan
ixchaqaʼ pero jantu kamajkanil.”
\v 31 Vachuʼ incha qayntaun la ay lhachimoʼonuʼ yu lhitʼajun
laqakau mil tropas, talachʼapaputun ixtʼalhachimoʼonuʼ
yu lhitʼajun pʼuxaun mil ex pʼunaj kapastakʼelal incha
lay katalhajal.
\v 32 Ex incha najun jantu lay kalhajal, ex malaqachay
lapanaki para kalhisakmil tas katamakal para jantu katalachʼapal.
Chuncha kamakayaʼ tejkan vananaj la maqati mintachal
ixtʼalhachimoʼonuʼ.
\v 33 Ex vachu va chuncha uxiknankʼan. Incha jantu makaʼun
tachun yu lhitʼaʼun ex jantu lay un kintʼaltanaʼ.
\s Yu makauntijlay ni Jesús va tacha matsati yu jantucha kasʼoʼo
\r (Mt. 5:13; Mr. 9:50)
\p
\v 34 ’Ni matsati la ox pero tejkan jantucha sʼoʼo jun
ex jantucha lay sʼoʼo junchoqoy.
\v 35 Chuncha mas va para ni lakatʼun, mas va para laka
abono, jantu ox kaval. Valiʼiy majʼankan. Incha alin
mimpaqasmakkʼan, ex kaʼasmaktʼikcha.
\c 15
\s Ni borrego yu istsʼanqata
\r (Mt. 18:10-14)
\p
\v 1 Ancha tachaʼal lhuvaj jachʼinin impuestos kun alati
laktuʼunun lapanakni para kataqasmaklhi ni Jesús.
\v 2 Ex chuncha ixtapastaklhitʼajun ni fariseos kun
yu ixtamasuy ixlhachimoʼonkʼan ni israelitas. Va siya
yuʼuncha talajunil:
\p —Aniy lapanaki jalaqaʼiy yu maqtaqalhinin y va laktʼavajin.
\p
\v 3 Ex ni Jesús lakjunil taun chivinti yu xtaʼa jatapastakʼati,
va naul:
\p
\v 4 —Xataʼayu uxiknankʼan yu kalhitsukul taun ciento
borrego y va kamaqatsʼanqal laqataun, ex yucha kalakmakaul
yu noventa y nueve, y va kapuxkaul yu tsʼanqay tus katemal.
\v 5 Tejkan katemachoqol va kaʼaqxoʼol kun achati.
\v 6 Ex tejkan kachil laqa chaqaʼ, va kalaqmaqxtoqlhi
ixʼamigos kun ixtʼataulnin, va kalakjunil: “Kilatʼaʼachanchoqoocha.
Ni borrego yu istsʼanqata chavay ktemachoqolcha.”
\v 7 Vachu va chun klajunau, mas kaʼalil noventa y nueve
lapanakni yu jantu katalhitsukul ixtalaqalhinkʼan, pero
va apalay talhiʼachantajuy yu tavilanachal laktʼiyan
tejkan mapaxay ixjatapastakʼati qayntaun maqtaqalhiniʼ
lapanaki.
\s Ni tumin yu tsʼanqal
\p
\v 8 ’Vachu va chun incha kaʼalil qayntaun xanati yu
kalhitsukul aqxkau tumin pero kamaqatsʼanqal aqxtaun,
ex kamamaqtiyal ixmaklku, va kapalnal ixchaqaʼ, va kapuxkauʼol
laksniy laksniy tus katemachoqol ixtumin.
\v 9 Ex chuncha tejkan katemachoqol va kalakjuntaʼil
ixʼamigas kun ixtʼataulnin, kalakjunil: “Kilatʼaʼachanchoqoocha.
Va iktemachoqol ni tumin yu xakmaqatsʼanqata.”
\v 10 Va chuncha klajunau va ayaj talhiʼachantajuy ixmayulnin
Dios tejkan makajun ixtalaqalhin mas va qayntaun lapanaki.
\s Ni jalaktuʼunuʼ tsʼal yu mapaxal ixjatapastakʼati
\p
\v 11 Ex naunchoqol ni Jesús:
\p —Qayntaun lapanaki ixlhitʼajun qayntʼuy istsʼalan.
\v 12 Ex yu xapʼisaqa junil ixpay, va naul: “Kimpay
kʼatʼi, kʼixtʼaqnin ni milhitapatsa yu kimpaxtoqniy kitʼin.”
Ex chuncha ni ixpay va xtaqnil.
\v 13 Taval ni xapʼisaqa lakstʼaʼol yu lvaqnikal maqaliti,
ex va maqati al, lhaʼanʼol yu ixtumin. Ancha ixpumaqtaqalhin
pulaqamananʼol ni ixtumin.
\v 14 Ex chuncha tejkan laqamananʼolcha, va alil ay chavan
ancha taʼan ixvil. Ex va aqtayl majkʼatsay ixchavan.
\v 15 Taval ni tsʼal va al kuxtutiyan kun qayntaun lapanaki
yu ancha machaqaʼ. Va xtaqnikal lhitapatsa va kalakvaval
pʼaxnin.
\v 16 Ex va ayaj ixchavaniy tus ixlhiʼotsaputun ni xataltsʼi
ni kʼiu yu ixtaʼuy ni pʼaxnin pero jantu matichun kaxtaqnil.
\v 17 Ex va pastakchoqol va naul: “Ni kimpay va qaynlhuvaj
ixʼoqxtamatin y la alin ixvaytikʼan, pero aniy kitʼin
iktiniycha kinchavan.
\v 18 Chavaycha kitʼin kʼanchoqoyaʼ la ixchaqaʼ kimpay,
kajkʼunaʼ: Kimpay kʼatʼi, ikmakanil laqtaqal ni Dios
y vachu uxintʼi.
\v 19 Chavaycha jantucha lay kakval mintsʼal. Va knajun
kʼimakʼatʼi tacha qayntaun miʼoqxtamati.”
\v 20 Ex chuncha ni tsʼal anchoqol la ixchaqaʼ ixpay.
\p ’Tejkan vananaj la maqati para ixlaqchaʼal, yu ixpay
va laqtsʼil istsʼal. Va ayaj mapaynil, va takyauʼal taʼan
ixpuminta ni istsʼal, va laqatanul, va kiltastuklhi.
\v 21 Ex naul ni tsʼal: “Kimpay kʼatʼi, ikmakanil laqtaqal
Dios y vachu uxintʼi. Jantucha lay kakval mintsʼal.”
\v 22 Pero ni ixpay va naul: “Oqxtamatin, kasoʼotʼik,
kʼalhitʼanchipitikcha yu mas apalay ox laqchʼiti y va
kʼamulanichipitik kintsʼal, vachu kʼamamaqtʼanutʼik ixmaqtanuti
y kʼamachʼantʼanutʼik isapato.
\v 23 Kalhitʼantʼik ni sasʼatʼa vakax yu apalay onta
y kʼamaqnitʼik. Kamakayau kʼatan y kaʼalinaʼ lakvayti.
\v 24 Yu aniy kintsʼal mas va tacha ixnitacha pero chavay
va kujchoqolcha. Mas va istsʼanqatacha pero chavay temachoqoocha.”
Ex aqtaynilcha ni kʼatan.
\p
\v 25 ’Ni xajayaʼ va ixtʼajun tapatsan laka kuxtu. Tejkan
chinchoqochal laqa chaqaʼ qasmaklhi ni jasanti kun jatʼinti.
\v 26 Ex juntaʼil qayntaun maqtsukuʼ va lhisakmil: “¿Sun
makʼayatʼikcha?”
\v 27 Ex naul ni maqtsukuʼ: “Va chinchoqol mimpʼisaqa
y mimpay lhinaul katamaqnil ni sasʼatʼa vakax yu apalay
onta va por ox xachinchoqoy mimpʼisaqa.”
\v 28 Ex ni xajayaʼ va lukujlal va jantu katanuputul.
Ex chuncha ixpay taxtul, va tapayninil para katanul.
\v 29 Pero va naul ni istsʼal yu xajayaʼ: “Kʼatsʼaycha
va maqancha iktapatsaniyan, jantu aqtaun kʼakchʼintaman,
pero uxintʼi jantu aqtaun kʼixtʼaqnin ni kitʼin mas
va laqataun chivo para kakmakal kʼatan kun kiʼamigos.
\v 30 Pero chavaycha chinchoqol yu aniy mintsʼal yu
laqamananʼol mimaqaliti kun maqtaqalhinin xanatin y
uxintʼi tus va lhimaqnitʼicha ni sasʼatʼa vakax yu apalay
onta.”
\v 31 Ex va naul ni ixpay: “Kesʼatʼa kʼatʼi, uxintʼi
va tacha kʼintʼaviltʼi y tachun yu klhitʼajun va si
minavin.
\v 32 Pero va maqskʼiniy kamakau kʼatan y kaʼachaxʼiu.
Yu aniy mimpʼisaqa ixnitacha y chavaycha va kujchoqotacha.
Va istsʼanqatacha y chavaycha temachoqoocha.”
\c 16
\s Maqskʼiniy ox kʼamapʼatsʼatʼi yu xamaqaliti aniy lakamunukpaʼ
\p
\v 1 Ex chuncha ni Jesús vachu lakjunil ixtʼaltanan:
\p —Qayntaun maqaliʼ ixlhitʼajun yu xaʼay ixʼoqxtamati
yu xatsʼoqmulanaʼ. Ex va tislajmakal ni anchanu xaʼay
oqxtamati va junkal ni ixʼukxtin tʼaunʼojoycha maqatsʼanqan
ixmaqaliti.
\v 2 Ni ixʼukxtin juntaʼil, va junil: “Va ijkʼatsaycha
yu makʼatʼa. Chavaycha kʼixtʼaqnin kuenta kilhitapatsa.
Kʼiʼuneʼe tachuncha kintalhaanin ni lapanakni. Jantucha
kʼaʼuneʼe yu xaʼay kiʼoqxtamati.”
\v 3 Ex va pastaklhi xʼaman ni xaʼay oqxtamati: “Kimamakaunilcha
lhitapatsa ni kiʼukxtin. ¿Chavay tas kaklayacha kaktapatsal?
Jantu kʼayajnan kaktapatsal, va jantu kaklhitsukul tapʼasta.
Jantu kpuskʼinputun, va ikmaxanan.
\v 4 ¡Ay! Kitʼin kʼatsaycha suncha kakmakayaʼ para kaʼalil
lapanakni yu kintalaqaʼiyaʼ la ixchaqakʼan tejkan jantucha
xaʼay oqxtamati kajkʼunaʼ.”
\v 5 Ex chuncha va laktʼasaʼil qayntaun por qayntaun
yu ixtalhaaniy ixʼukxtin. Yu pʼunaj va lhisakmil: “¿Tachuncha
lhipʼinin ni kiʼukxtin?”
\v 6 Ex va naul ni lapanaki: “Va taun ciento barriles
aceite.” Ex va junil: “Aniy minkuenta. Kʼasoʼo, katʼaulchiycha,
katsʼoqmulachiy vamun cincuenta.”
\v 7 Ex va lhisakmil aqayntaun: “¿Uxintʼi tachuncha
lhipʼinincha?” Ex va naul ni lapanaki: “Va klhaaniy
cien medidas trigo.” Ex ni xaʼay oqxtamati va junil:
“Aniy minkuenta, katsʼoqmulatʼi vamun ochenta.”
\v 8 Ex chuncha kʼatsalcha ni ixʼukxtin tacha makal
ni xaʼay ixʼoqxtamati y va naul: “Va mero listuj yu
xaʼay kiʼoqxtamati yu jantu ox, la lhuvaj jatapastakʼati
ixpumakanunun.” Vachu va chuncha yu taʼalin lakamunukpaʼ
yu jantu talhakapuʼanan, apalay tamakay kuenta tacha
katamakal. Yu tamispay ixchivinti Dios, apalay jantu
tamakay kuenta tacha maqskʼiniy katamakal.
\p
\v 9 ’Vachu klajunau kʼalaqʼaqtʼayʼutʼik ni kilpatanin
kun tachun yu lhitʼaunatʼik ni aniy lakamunukpaʼ, va
para kaʼalil miʼamigoskʼan. Kʼamakʼaunapitik yu lhitʼaunatʼik
tejkan kaniyapitik, pero kalaʼaʼikʼanapitik ancha xachaqan
laktʼiyan yu jantu aqtaun katamiʼoyaʼ.
\p
\v 10 ’Yu lapanaki yu ox makay kuenta yu lhitsukuy mas
va tsʼuniy, ex vachu ox kamakal kuenta incha la lhuu
kalhitsukul. Chavay yu jantu makay kuenta yu lhitsukuy
mas va tsʼuniy, ex vachu jantu lay kamakal kuenta incha
la lhuu kalhitsukul.
\v 11 Vachu va chun incha jantu makʼayatʼik kuenta mas
va tumin yu lay tamapastakniyan yu jantu ox, ex ni Dios
jantu kataxtaqniyan kamakʼatʼik kuenta yu laqsaval lajʼoxi.
\v 12 Vachu incha jantu makʼayatʼik kuenta yu machʼixtʼaqnikʼanatʼik,
ex jantu kaxtʼaqnikʼanapitik yu tapaxtoqniyan.
\p
\v 13 ’Jantu matichun lay oxi katapatsanil qayntʼuy
ukxtinin. Kaʼachaniyaʼ yu qayntaun y kaxkayyaʼ yu aqayntaun.
Va katʼaʼanaʼ yu qayntaun y jantu kamakayaʼ kuenta yu
lhinajun yu aqayntaun. Vachu va chuncha jantu lay tʼapʼatsʼaniy
ni Dios incha tʼoʼoyay yu maqaliti.
\s Ni Dios yucha mispaʼojoy tachun ixjalhanutkʼan ni lapanakni
\p
\v 14 Ni fariseos yu ixtatʼajun qasmaknan ni Jesús va
ayaj ixtalhiʼajin ixtuminkʼan. Ex vamun talaktuʼul ni
Jesús.
\v 15 Pero ni Jesús lakjunil:
\p —Uxiknankʼan va meʼemankʼan makʼakʼanatʼik para katalhilal
ni lapanakni va la ox metsukuntikʼan. Pero Dios tamispaniyan
yu melhanutikʼan. Ni Dios jantu pastakʼa tacha lapanakni.
Yu la lajʼoxi talhilay ni lapanakni va yucha ni Dios
lakxkajiy.
\p
\v 16 ’Tejkan jantukaʼ istsukuy ni Juan, yu ixlhachimoʼon
Moisés kun ixchivintikʼan yu maqancha ixtalaqputeʼey
ixchivinti Dios va yucha tapukʼatsal tisuncha katamakal
ni lapanakni. Pero tejkan mil ni Juan tus chavaycha
jalaqputeʼenikal ni lapanakni tacha lhachimoʼonun ni
Dios. Tachun tatapʼasniy kalaklhichimoʼol ni Dios la
ixjatsukuntikʼan.
\v 17 Apalay va tsʼayl kamiʼol ni laktʼiyan kun lakamunukpaʼ
xajantu yu lhinajun Dios, mas va laqatauncha chivinti.
\s Jantu ox kamakajun mixanati
\r (Mt. 19:1-12; Mr. 10:1-12)
\p
\v 18 ’Mas va taʼayucha yu makajun ixanati y tʼatsukuchoqoy
aqayntaun yucha makay talaqalhin. Vachuʼ makay talaqalhin
yu tʼatsukuy qayntaun xanati yu valiʼiy makaunkanta.
\s Qayntaun maqaliʼ ali qayntaun kilpataniʼ
\p
\v 19 Ex va naunchoqol ni Jesús:
\p —Taun julchan ixʼalin qayntaun maqaliʼ yu va si ixlakatayay
yu la kʼus ixlaqchʼiti, yu laqlhuu xtapal y lhilhiy ixmakay
yu ayaj kʼus kʼatan.
\v 20 Vachu ixʼalinta qayntaun kilpataniʼ ixjunkan Lázaro.
Taun taun julchan va ixmamakan la ixkiltalakxtuti ixchaqaʼ
ni anchanu maqaliʼ. Ni yucha va ixlakapuchʼiʼojota tachun
ixlakatunaj.
\v 21 Yucha ixʼuputun mas va yu ixpatajuy laka mesa
yu ixtacheʼe ni maqaliʼ. Vachuʼ ni xʼoyun ixtasnauniy
ixlakapuchʼiti.
\v 22 Ex chuncha taun julchan va nil ni kilpataniʼ, yu
ixmayulnin Dios va talhaʼal ixlhitsukunuʼ taʼan vilchal
Abraham. Taval vachuʼ nil ni maqaliʼ, va maknukal.
\v 23 Ex alcha laqnin ni maqaliʼ. Ancha ayaj majkʼatsal.
Ex va lakachaʼal la maqati, va laqtsʼil ni Abraham y
vachu laqtsʼil Lázaro va tʼavil ni Abraham.
\v 24 Ex va la pʼas tʼasanil, va naul: “Kimpay kʼatʼi
Abraham, iktapayniniyan kʼiʼaqtʼayʼutʼi. Kʼimalaʼachʼanin
Lázaro. Va kimil avaniniʼ kun xkan la kisimaʼati. Mas
va kun makatʼuniy ixmakaʼ para kimatsukʼunkʼulcha taʼan
iktʼajun maqanlqajnan laka jikmi.”
\v 25 Pero ni Abraham va naul: “Kintsʼal, kapʼastʼaktʼi
va ixlaʼaʼiy tachun yu lajʼoxi tejkan ixtʼaʼun ni lakamunukpaʼ.
Pero ni Lázaro tejkan ixtʼajun ni lakamunukpaʼ va ayaj
ixmajkʼatsay. Chavaycha yucha alin ixʼachati aniy, pero
uxintʼi majkʼatsaycha.
\v 26 Vachu ixpakltaun uxintʼi kun kijnankʼan ancha
japukutunti. Yu vilchil jantu lay takukyachal, mas kaʼuxaʼanchal,
y yu vilchal jantu lay takukyachil.”
\v 27 Ex va naul ni maqaliʼ: “Ex iktapayniniyan, kimpay
kʼatʼi, kʼamalaʼachʼatʼi Lázaro la ixchaqaʼ kimpay.
\v 28 Ancha alin pumakis kintʼalaqaunin, kalaqlaqputeʼenil
tacha tapasaycha para jantu katamil majkʼatsanan aniy
vachu.”
\v 29 Ex va naul ni Abraham: “Yuʼuncha talhitʼajun
ixchivinti Moisés kun yu ixtalaqputeʼey ixchivinti Dios.
Va kataqalasmaklhi ni yuʼuncha.”
\v 30 Ex va naunchoqol ni maqaliʼ: “Jantu chuncha, kimpay
kʼatʼi, Abraham. Jantu ox taqasmatʼa ixchivinti Dios.
Pero va kalaqlaqchaʼal qayntaun janiniʼ yu kujchoqotacha
ex katamapaxal ixjatapastakʼatkʼan.”
\v 31 Pero ni Abraham va junil: “Incha jantu talhakapuʼaniy
ni Moisés kun yu ixtalaqputeʼey ixchivinti Dios, ex nisin
jantu katamapaxal ixputsukukʼan mas va kakujchoqol qayntaun
janiniʼ.”
\c 17
\s La lhitaʼay kunaʼ para yu maqtaqalhinin
\r (Mt. 18:6-7, 21-22; Mr. 9:42)
\p
\v 1 Ex ni Jesús lakjunil ixtʼaltanan:
\p —Si kaʼalinaʼ yu maqtaqalhinin pero paynicha yu jamalaniy
lapanakni para katamakal yu jantu lajʼoxi.
\v 2 Apalay ox kaval kapixtuchʼimukʼakal xachiyux pachʼikni
y kamajʼankalcha lakamar. Apalay lhitaʼay kunaʼ incha
kamamaqtaqalhinil qayntaun lakatʼuniy tacha yu aniy
jasʼatʼa.
\v 3 La ox kʼalhistʼajkʼantʼik. Incha milaqaj makaniyan
yu jantu ox, ex kʼaxaʼalatʼi. Incha mapaxay ixjatapastakʼati,
ex kʼamalaqmixinin.
\v 4 Incha makaniyan yu jantu ox mas va aqtujun laka
julchan y aqtujun mapaxachoqoy ixjatapastakʼati ex kʼamalaqmixinin.
\s Lay la lhuu makakan tejkan lhakapuʼankan ni Dios
\p
\v 5 Ex yu ixtamalaqachan ni Jesús va tajunil:
\p —Kilaʼaqtayjuu para apalay ox kaval kilhakapuʼatkʼan.
\p
\v 6 Ex chuncha ni Jesús va lakjunil:
\p —Mas va tsʼuniy milhakapuʼatikʼan tacha yu lakatʼuniy
xataltsʼi mostasa, ex lay unatʼik ni aniy kʼiu katakuklhi,
kachʼankal ixʼaman lakamar y va chuncha kunaʼ yu unatʼik.
\s Jantu ay kʼamakʼakʼa por tʼapʼatsʼanin Dios
\p
\v 7 Xataʼayuʼ uxiknankʼan va kaʼalil miʼoqxtamatikʼan
va kaloqnul u va kalhistaklhi mimborregoskʼan. Ex tejkan
kaminchoqol laqa chaqaʼ jantu kʼaʼun: “Kasoʼo, katʼaulchiycha,
kavaynchiycha.”
\v 8 Va kʼaʼun: “Kʼalaʼoxitʼi kivayti, kʼamapʼaxa milaqchʼiti,
kimunincha kivayti, kitʼin pʼunaj kakvaynaʼ, uxintʼi astan.”
\v 9 Vachuʼ jantu paxtoqniyan kʼaʼun: “Malaqpuchuncha”
tejkan kamakaʼol ixlhitapatsa yu lhiʼun.
\v 10 Vachu va chuncha uxiknankʼan tejkan kʼamakʼaʼoyapitik
tachun yu talhijunan Dios va kʼaʼunitʼik: “Ka jantu
ox oqxtamatin kuntau. Vamun ikmakau yu kilalhijuniu.”
\s Ni Jesús palay lakmakachoqol pumakau lapanakni yu talakapuchʼita
\p
\v 11 Ex chuncha tejkan ixʼanta tus Jerusalén ni Jesús
va ixtiʼukxuyal taʼan paqxtoʼa ni xaʼestado Samaria
kun xaʼestado Galilea.
\v 12 Ex tejkan chaʼal taun lakatʼuniy putaulan ancha
talapaxtoqlhi pumakau lapanakni, va ayaj ixtalakapuchʼita.
Va amaqati tatʼasanil, va tajunil:
\p
\v 13 —Jesús jamalaniniʼ, kilamapayniu kijnankʼan.
\p
\v 14 Ex tejkan ni Jesús jalaqtsʼil va lakjunil:
\p —Kapʼintʼik tasuninin ni kuras.
\p Ex chuncha tejkan ixtaʼanta lakatin, va ancha palaycha
tajunʼol ixtaqanʼatikʼan.
\v 15 Ex chuncha qayntaun xataʼayuʼ makal kuenta ni
oxicha ixjunchoqota, va taspʼikchoqol, va la pʼas aqtayl
ay makay ni Dios.
\v 16 Va talakaputal taʼan ixyal ni Jesús, aqtayl skʼiniy
lhimalaqpuchuncha. Ni yucha va machaqaʼ Samaria.
\v 17 Ex naul ni Jesús:
\p —Va pumakau yu palay tajunchoqol. ¿Toʼoxtaycha ixtaʼan
yu pumanajatsi?
\v 18 ¿Vamun yu aniy yu jantu israelita kaval taspʼikchoqolcha
para ay kamakal ni Dios?
\p
\v 19 Ex ni Jesús va junil ni jachʼiniʼ:
\p —Kaʼostʼaʼulcha, kapʼinchʼoʼocha. Va kʼilhakʼapʼupʼicha,
xlhiyucha oxicha xaʼunchʼoʼoy.
\s Tas kunaʼ tejkan kaminchoqoyaʼ lhachimoʼon ni Jesús
\r (Mt. 24:23-28, 36-41)
\p
\v 20 Ex chuncha ni fariseos va talhisakmil ni Jesús
tavanancha kalhachimoʼonunaʼ ni Dios. Ex lakjunil ni
Jesús, va naul:
\p —Jantu katasuyaʼ tejkan kaʼaqtayaʼ kalhachimoʼonunaʼ
ni Dios.
\v 21 Nisin jantu lay katanaul: “Kalaqtsʼi. Va aniy
yal”, u “Avintʼi vilchal.” Jantu lay chuncha kanaunkal.
Ni Dios lhachimoʼonunta la ixjatsukuntikʼan ixlapanakni.
\p
\v 22 Ex lakjunil ixtʼaltanan ni Jesús:
\p —Kaminaʼ julchan kilalaqtsʼinputunchoqoyau kakminchoqol
ni kitʼin yu Sasʼatʼa Lapanaki para kaklhichimoʼol pero
jantukaʼ lay kilalaqtsʼinau.
\v 23 Va katajunan lapanakni: “Aniy yal”, u “Avintʼi
vilchal.” Pero jantu kʼapʼuxkʼautʼik, jantu kamakʼaʼuntʼik
milhitapatsakʼan.
\v 24 Ni makaliukniti va tasuʼojoy tachun ni laktʼiyan
y vachu va chun kunaʼ tejkan kakminchoqoyaʼ ni kitʼin
yu kval Sasʼatʼa Lapanaki.
\v 25 Pero maqskʼiniy kakmaqanlqajnanʼelal ni kitʼin
yu kval Sasʼatʼa Lapanaki y vachu kintaʼakchʼintamaʼelayaʼ
yu chavaycha tatʼajun lapanakni, jantu kintalaqaʼiyaʼ
para kaklaklhichimoʼol la ixjatsukuntikʼan.
\v 26 Tejkan kakminchoqoyaʼ ni kitʼin yu Sasʼatʼa Lapanaki
vachu va chun kajunchoqoyaʼ tacha ixjunita tejkan ixtʼajun
Noé.
\v 27 Ni anchanuʼ lapanakni ixtavajin, ixtaʼoqnun, ixtalakxtuklay,
ixtamalakxtuklhanan, y vamun yuʼ ixtapastakta tus tejkan
tanul Noé laka barco. Ex alil ay akskajʼuti y tamuxtuʼol
tachun ni lapanakni.
\v 28 Vachu va chuncha kajunchoqoyaʼ tacha ixjunita
tejkan ixtʼajun Lot. Va ixtavajin, ixtaʼoqnun, ixtastʼanan,
ixtaʼiy axtoqnuʼ, ixtamakay chaqan.
\v 29 Pero tejkan taxtul Lot ni putaulan Sodoma va taʼeltajul
laktʼiyan jikmi kun azufre y va laqmaqniʼol ni lapanakni.
\v 30 Vachu va chuncha kajunchoqoyaʼ tejkan kaktasuchoqoya
ni kitʼin yu Sasʼatʼa Lapanaki.
\p
\v 31 ’Tejkan kachinaʼ ni anchanu julchan ex yu yal
la ixʼukxna chaqaʼ jantu katanuchoqol iniʼ yu ixnavin
yu tanun la ixchaqaʼ. Yu yal laka kuxtu jantucha kaʼanchoqol
la ixchaqaʼ.
\v 32 Kapʼastʼaktʼik ni ixanati Lot val matsati tejkan
talaqaspʼiklhi.
\v 33 Ni lapanaki yu ixʼaman malaqtaxtuputun ixjatsukunti,
yucha kamaqatsʼanqayaʼ. Pero yu maqxtaʼa ixjatsukunti,
yucha kalhitsukuchoqoyaʼ.
\v 34 Klajunau tejkan kakminchoqoyaʼ katatamayaʼ qayntʼuy
aqataun putaman. Qayntaun kalhaʼankanaʼ y yu aqayntaun
katamakaunaʼ.
\v 35 Qayntʼuy xanatin katatsukuyaʼ skitinin. Qayntaun
kalhaʼankanaʼ y yu aqayntaun katamakaunaʼ. [
\v 36 Qayntʼuy lapanakni katatapatsayaʼ laka kuxtu.
Qayntaun kalhaʼankanaʼ y yu aqayntaun katamakaunaʼ.]
\p
\v 37 Ex talhisakmil yu ixtʼaltanan:
\p —Jalhachimoʼonuʼ, ¿toʼoxtaycha chuncha katapasayaʼ?
\p Ex ni Jesús va lakjunil:
\p —Va katasuyaʼ vachu va tacha tasuy taʼan alin yu janinin,
va ancha tataqxtoʼa ni lajʼay tsʼoʼon.
\c 18
\s Qayntaun tiyau ali qayntaun juez
\p
\v 1 Ex chuncha ni Jesús va lakmasunil taun chivinti
yu xtaʼa jatapastakʼati para katakʼatsal ni maqskʼiniy
si kataskʼinil ni Dios y jantu katamakauntijlal.
\v 2 Va naul:
\p —Qayntaun juez va ixvil taun putaulan. Ni yucha jantu
ixtoʼoyay Dios vachuʼ jantu ixlaktoʼoyay lapanakni.
\v 3 Vachuʼ ancha ixvil qayntaun tiyau va ixʼan chivintanun
para kaʼaqtayjukal. Va ixnajun, va junkan ni juez: “Kʼilaqlaʼoxinin
ni lhilukuj kun kintʼalaxkayaʼ.”
\v 4 Pero ni juez la maqan jantu ixlaqlaʼoxiputun. Pero
taval va naul la ixjatapastakʼati: “Kitʼin jantu iktoʼoyay
Dios vachuʼ jantu klaktoʼoyay lapanakni.
\v 5 Pero yu aniy tiyau va ayaj kimaqanchapuy, ka va
kaklaqlaʼoxiniyacha yu kiskʼiniy para chuncha jantucha
apalay kimaqanchapul.”
\p
\v 6 Ex va naul ni jalhachimoʼonuʼ Jesús:
\p —Kʼapʼastʼaktʼik yu makal ni jalaktuʼunuʼ juez.
\v 7 Ni Dios va ox, xlhiyucha apalay kalaqʼaqtayjuyaʼ
ixlapanakni yu jalaksakta, yu si taskʼiniy tunkuj y putsʼista.
¿Lhilay va la maqan kalaqlaʼoxiniyaʼ?
\v 8 Va klajunau ni jantu. Va niman kalaqʼaqtayjuyaʼ.
¿Pero lhilay ni kataʼalinaʼ yu chuncha talhakapuʼan
tejkan kakminchoqoyaʼ ni kitʼin yu kval Sasʼatʼa Lapanaki?
\s Yu la ay makakan ixʼaman ali yu lakatʼuniy makakan
\p
\v 9 Ex chuncha ni Jesús lakjunil ni aniy chivinti yu
xtaʼa jatapastakʼati. Va lakjunkal ni lapanakni yu ixtanajun
va lajʼoxi ixtajunita y ixtalakchʼintamay yu alati.
Va inchine naul:
\p
\v 10 —Qayntʼuy lapanakni taʼal skʼinin Dios laka ay
lakatajtan. Qayntaun va fariseo ixjunita, yu aqayntaun
va xachʼiniʼ impuestos ixjunita.
\v 11 Ex ni anchanu fariseo va tayal va iskʼin Dios,
va naul: “¡Ay Dios kʼatʼi! Kitʼin kxtaqniyan malaqpuchuncha
ni jantu chun kakval tacha yu alati lapanakni yu alhavanan,
yu makanunun, yu tatʼatamay yu jantu ixnavinkʼan kaval,
y vachu jantu chun kakval tacha yu aniy chʼinin impuestos.
\v 12 Ni kitʼin iktaskʼajay paqtʼuy laka semana. Vachu
ikxtaʼa tsʼuniy kilhitapatsa”, va chuncha naul ni fariseo.
\v 13 Pero ni jachʼiniʼ impuestos va la maqati ixyal,
jantu katalaqstʼal laktʼiyan. Va aqtayl tankilaksakan,
va junil ni Dios: “¡Ay Dios kʼatʼi! Kʼimapʼaynitʼicha
ni kitʼin klaktuʼunuʼ kunita”, va naul ni jachʼiniʼ
impuestos.
\p
\v 14 Ex vachu naul ni Jesús:
\p —Kitʼin klajunau ni jachʼiniʼ impuestos yucha anchoqol
la ixchaqaʼ, va malaqmixinikal ixlaqtaqal, pero yu fariseo
jantu kamalaqmixinikal. Yu xʼaman makakan la ay, yucha
ni Dios kamakayaʼ lakatʼuniy. Pero yu xʼaman makakan
lakatʼuniy yucha ni Dios ay kamakayaʼ.
\s Ni Jesús laktʼasaʼil ni jasʼatʼan
\r (Mt. 19:13-15; Mr. 10:13-16)
\p
\v 15 Ex chuncha lati ni lapanakni va talaklhiminil
sasʼatʼankʼan ni Jesús para kalaqmoqslanil ixmakaʼ.
Tejkan talaqtsʼil ixtʼaltanan ni Jesús, yuʼuncha taʼaqtayl
jalaqʼaymay para jantu katamaqanchapul.
\v 16 Pero ni Jesús lakjuntaʼil ni jasʼatʼan, va lakjunil
ixtʼaltanan:
\p —Kʼamakʼauntʼik ni jasʼatʼan para kintalaqmil. Jantu
kʼalakmaspʼiktʼik. Yu talhakapuʼanan tacha jasʼatʼan,
va yuʼuncha yu laklhichimoʼoy Dios.
\v 17 Laqsaval klajunau qayntaun lapanaki maqskʼiniy
kalaqaʼil ni kalhichimoʼol ni Dios vachu va tacha qayntaun
jasʼatʼa laqaʼiy kalhichimoʼokal. Incha jantu, ex jantu
aqtaun katanuyaʼ taʼan lhachimoʼonun ni Dios.
\s Qayntaun maqaliʼ tʼachyvinil ni Jesús
\r (Mt. 19:16-30; Mr. 10:17-31)
\p
\v 18 Ex chuncha qayntaun ay lapanaki va lhisakmil ni
Jesús:
\p —Jamalaniniʼ, ox kʼatʼi, kʼiʼun suncha kakmakalcha para
kaʼalil ketsukunti yu jantu aqtaun kamiʼol.
\p
\v 19 Ex ni Jesús junil:
\p —¿Valiʼiycha kʼiʼuniy ox kunita? Jantu matichun ox,
vamun ni Dios.
\v 20 Uxintʼi kʼatsʼaycha tacha junita ixlhachimoʼon
Dios. Va najun jantu kʼamaʼanchʼaʼoluxnun, jantu kʼamaqnin,
jantu kaʼalhavan, jantu kalaklkʼan y katʼoʼoyatʼi mimpay
ali minati.
\p
\v 21 Ex va naul ni ay lapanaki:
\p —Yucha tachun ikmakaʼojotacha tejkan lakatʼuniy xajkunita
tus chavaycha.
\p
\v 22 Tejkan chuncha qasmaklhi ni Jesús, va naul:
\p —Va tsʼuniy tsʼanqaniyan. Kastʼaʼocha yu lhitʼaʼun,
kʼalaqxtʼaqnitʼi kilpatanin. Ex chuncha kʼalhitsʼukʼuyeʼe
milhilhajati laktʼiyan. Ex katʼatʼicha, kʼintʼixkʼaulhipʼi.
\p
\v 23 Tejkan chuncha qasmaklhi ni ay lapanaki va ayaj
maqaninil, va ayaj maqaliʼ ixjunita.
\v 24 Tejkan ni Jesús chuncha laqtsʼil maqaninil, ex
va naul:
\p —Ayaj lhitaʼay katatanul ni maqalinin taʼan lhachimoʼonun
Dios.
\v 25 Laqataun camello jantu lay tapasay taʼan pusalal
ni makskati. Pero apalay lhitaʼay katatanul taʼan lhachimoʼonun
Dios yu talhitʼajun lhuvaj maqaliti.
\p
\v 26 Ex ni lapanakni yu ancha tayanal va tanaul:
\p —¿Ex taʼayuchacha lay katalaqtaxtul?
\p
\v 27 Ex ni Jesús lakjunil:
\p —Yu jantu lay katamakal ni lapanakni, ni Dios yucha
lay makay.
\p
\v 28 Ex chuncha ni Pedro va junil ni Jesús:
\p —Pero ni kijnankʼan ikmakaunʼotaucha yu klhitʼaunau
para kaklatʼaltanau.
\p
\v 29 Ex ni Jesús va lakjunil:
\p —Laqsaval klajunau mas va taʼayucha yu makajun ixchaqaʼ,
u ixpayan, u ixtʼalaqaunin, u ixanati, u sasʼatʼan para
Dios kalhichimoʼol,
\v 30 ex ni yucha kalaqaʼiyaʼ alati aniy lakamunukpaʼ
y vachuʼ kalaqaʼiyaʼ xatsukunti yu jantu aqtaun kamiʼoyaʼ
tejkan kaminaʼ yu ataun lakamunukpaʼ.
\s Ni Jesús naunchoqol ni kaniyaʼ
\r (Mt. 20:17-19; Mr. 10:32-34)
\p
\v 31 Ex ni Jesús laklhaʼal pumakautʼuy ixtʼaltanan
alakataun, va lakjunil:
\p —Chavaycha kaʼanau laka putaulan Jerusalén. Ancha kaʼalinacha
tacha yu tatsʼoqlhi yu maqancha ixtalaqputeʼey ixchivinti
Dios tejkan kintalhitsʼoqlhi kitʼin yu Sasʼatʼa Lapanaki.
\v 32 Va kakmaqxtaqkanaʼ la ixtamakakʼan yu jantu israelitas
kataval, ex yuʼuncha kintalaktuʼuyaʼ, pʼas kintalhiʼachanaʼ,
kintalakapuchujvayaʼ.
\v 33 Ex kintalaqanaqmaʼelayaʼ ex kintamaqniyacha. Ex
tejkan paqtʼutu kunaʼ, kajkujchoqoyaʼ.
\p
\v 34 Pero ixtʼaltanan jantu katamalaqasil, jantu kalakmasunikal,
jantu katakʼatsal tas ixnaunputuntacha.
\s Ni Jesús palay makal qayntaun laʼachʼix
\r (Mt. 20:29-34; Mr. 10:46-52)
\p
\v 35 Ex chuncha tejkan va laycha kachaʼal ni putaulan
Jericó ancha ixvil qayntaun laʼachʼix, ixpuskʼin tumin
lakatin.
\v 36 Tejkan qasmaklhi ni ixtatapasay lhuvaj lapanakni
lakatin, ex va laklhisakmil ni laʼachʼix, va naul:
\p —¿Suncha alin?
\p
\v 37 Ex yuʼuncha va tajunil:
\p —Va tʼajun tapasanaʼ ni Jesús yu machaqaʼ Nazaret.
\p
\v 38 Ex tʼasal ni laʼachʼix, va naul:
\p —Jesús, istsʼal kʼatʼi ni ay jalhachimoʼonuʼ David.
Kʼimapʼaynitʼicha kitʼin.
\p
\v 39 Yu ixtapʼulanan ni lapanakni va talaqʼaymal ni
laʼachʼix para saqcha kaval pero yucha apalay matʼasal.
Va naul:
\p —Istsʼal kʼatʼi ni ay jalhachimoʼonuʼ David, kʼimapʼaynitʼicha
kitʼin.
\p
\v 40 Ex tayal ni Jesús, va malaqachanal ixʼika. Ex tejkan
laqchaʼalcha, va lhisakmikal ni laʼachʼix:
\p
\v 41 —¿Suncha naʼuncha kakmakanin?
\p Ex ni laʼachʼix qaltayanal, va naul:
\p —Jalhachimoʼonuʼ, va klakavananputun.
\p
\v 42 Ex va naul ni Jesús:
\p —Kalakʼavancha. Palaycha kʼaʼunchʼoʼo, va kʼilhakʼapʼupʼin.
\p
\v 43 Ex va limancha lakavananchoqol, va tʼaʼal ni Jesús
va ay ixmakay ni Dios. Tejkan talaqtsʼil ni lapanakni
yu tacha tapasal, tus tachun va ay tamakal ni Dios.
\c 19
\s Ni Jesús ali Zaqueo
\p
\v 1 Ex ni Jesús tanul laka putaulan Jericó va ancha ixtapasaʼanta.
\v 2 Ancha ixʼalin qayntaun lapanaki yu ixjunkan Zaqueo. Ni yucha va xaʼukxtin jachʼiniʼ impuestos y va maqaliʼ ixjunita.
\v 3 Ni yucha ixmispaputun tacha tasuy ni Jesús. Pero la lhuvaj lapanakni ixtaʼanta, jantu lay kalaqtsʼil, va por jantu putanʼay kaval.
\v 4 Ex takyaujapʼulal, va taukʼal laka kʼiu para lay kalaqtsʼil, va ancha ixpuminta ni Jesús.
\p
\v 5 Ex tejkan ancha chaʼal ni Jesús, talaqstʼal laka kʼiu, laqtsʼil ni Zaqueo, va junil:
\p —Va knajun kʼapʼatʼaʼutʼicha, chavaycha kakloqojaʼ la minchaqaʼ.
\p
\v 6 Ex va tsʼalaj patajul ni Zaqueo, va achajlaqaʼil ni Jesús.
\v 7 Tejkan chuncha talaqtsʼil ni lapanakni ex talhichivinil ni Jesús, va ixtalajuniy:
\p —Ni Jesús va al loqojnuʼ la ixchaqaʼ qayntaun jalaktuʼunuʼ lapanaki.
\p
\v 8 Ex chuncha tayal ni Zaqueo, va junil ni Jalhachimoʼonuʼ Jesús:
\p —Chavay, Jalhachimoʼonuʼ kʼatʼi, pakltaun kimaqaliti klaqxtaqniyaʼ kilpatanin y va taʼayucha yu ikmakanuxtunil kakxtaqnichoqoyachaʼ aqtʼati chuncha tacha kmaxtunil.
\p
\v 9 Ex chuncha va naul ni Jesús:
\p —Chavaycha yu tatanumanal ni aniy chaqaʼ va talaqtaxtutacha, vachu laqsaval ixpapanti Abraham junita.
\v 10 Kitʼin yu kval Sasʼatʼa Lapanaki klakminta puxkaunaʼ ni lapanakni yu tatsʼanqatacha para kaklaqmalaqtaxtuyaʼ.
\s Ni pumakau oqxtamatin yu jalaqxtaqnikal tumin
\p
\v 11 Va chuncha ni Jesús ixtʼajun chivin y ni lapanakni ixtatʼajun qasmaknan. Va lakjunil taun chivinti yu xtaʼa jatapastakʼati. Va laycha katachaʼal yu la ay putaulan Jerusalén y yuʼuncha ixtapastakʼa ni Dios va niman ixlhachimoʼonul.
\v 12 Xlhiyucha va naul:
\p —Qayntaun ay lapanaki va maqati al taʼan ataun xalakatʼun. Va al laqaʼiniʼ ixpalhachimoʼon para kalaklhichimoʼol ixtʼamachaqan la ixtʼun.
\v 13 Va jalakjuntaʼiʼelal pumakau ixʼoqxtamatin. Laqxtaqnil qayntamin lhuu tumin, va lakjunil: “Kʼapʼutʼapʼatsʼatʼik ni aniy tumin tus kakminchoqoyaʼ.”
\v 14 Pero yu lapanakni yu ancha ixtʼamachaqan va ixtaxkajiy yu junputun lhachimoʼonuʼ. Tamalaqachal chivinti, va tanaul: “Kijnankʼan iknaunau jantu kaval kiJalhachimoʼonukʼan.”
\v 15 Pero tejkan chinchoqol ni ay lapanaki la ixputaulan va ixlaqaʼitacha ixpalhachimoʼon. Jalakjuntaʼil ixʼoqxtamatin yu ixlaqxtaqnita tumin. Va ixkʼatsaputun tacha tamakatacha qayntamin.
\v 16 Yu pʼunaj chinchal, va naul: “Jalhachimoʼonuʼ, chavay yu mintumin talhavatacha aqkau chuncha tacha kʼixtʼaqnin.”
\v 17 Ex ni jalhachimoʼonu va junil: “Ox oqxtamati kʼatʼi. Uxintʼi la ox makʼatʼi mas va kun tsʼuniy, xlhiyucha kʼalhachʼimoʼonuneʼe lakakau putaulan.”
\v 18 Ex chinchal aqayntaun, va naul: “Jalhachimoʼonuʼ, chavay yu mintumin talhavatacha aqkis chuncha tacha kʼixtʼaqnin.”
\v 19 Ex ni jalhachimoʼonuʼ va junil: “Ex uxintʼi kʼalhachʼimoʼonuneʼe lakakis putaulan.”
\v 20 Ex aqayntaun vachu chinchal, va naul: “Jalhachimoʼonu, aniy mintumin. Va xakpachʼimaʼata la kimpayoj.
\v 21 Va xaktalhauniyan uxintʼi. Ijkʼatsay va la pʼas milhachimoʼon, va chʼapʼay yu jantu minavin y xʼanan taʼan jantu chʼan.”
\v 22 Ex ni jalhachimoʼonu va junil: “Kun minchivinti meʼeman mapʼukʼan mintalaqalhin. Laqsaval ixkʼatsay ni va la pʼas kilhachimoʼon y va ikchʼapay yu jantu kinavin y ikxqanan yu jantu ikchʼan.
\v 23 ¿Ex valiʼiychacha jantu kʼamanutʼi kintumin laka banco? Ex chuncha kitʼin xaklhajal sasʼatʼa tejkan ikchinchoqol.”
\v 24 Ex lakjunil yu ancha tayanal: “Kʼamaxtʼunitʼikcha ni tumin, kaxtʼaqnitʼik yu lhajal aqkau chuncha tacha kxtaqnil.”
\v 25 Yuʼuncha tajunil: “Pero, jalhachimoʼonuʼ, yucha lhitʼajuncha aqkau chuncha tacha xtʼaqnin.”
\v 26 Ex ni jalhachimoʼonu lakjunil: “Klajunau mas yu lhitʼajuncha, kaxtaqnikanaʼ alati. Pero yu jantu tuʼuchun kalhitsukul, mas va tsʼuniy yu lhitʼajun kamaxtunichoqokanaʼ.
\v 27 Chavaycha kalaklhitʼantʼikcha aniy ni lapanakni yu kintaxkajiy yu jantu ixkintajuniy xaklhachimoʼonul. Aniy kʼalaqmaqniʼotʼikcha la kintʼalakaʼukxpuʼ.”
\s Ni Jesús tanul ni laka putaulan Jerusalén
\r (Mt. 21:1-11; Mr. 11:1-11; Jn. 12:12-19)
\p
\v 28 Taval tejkan chuncha naul ni Jesús va taylhaʼal ixlakatin para kachaʼal Jerusalén.
\p
\v 29 Tejkan va laycha kachaʼal lakatʼuy putaulanin yu lakjunkan Betfagé y Betania yu ukstsʼuniy ni aspajun yu junkan Olivos, ex jalaqmalaqachal qayntʼuy ixtʼaltanan.
\v 30 Va lakjunil:
\p —Kʼapʼinchʼipitik ni lakatʼuniy putaulan yu ancha vil. Ex taʼan kachʼipʼinapitik, katʼemayapitik laqataun sasʼatʼa burro chʼiʼulakanta yu jantukaʼ matichun putaukʼay. Kaxʼoqʼiyapitik, kalhitʼantʼik.
\v 31 Incha taʼayucha katalhisakmiyan ni valiʼiycha xʼotʼatʼik ni burro, ex kʼaʼunapitik va maqskʼiniy ni Jalhachimoʼonuʼ.
\p
\v 32 Ex taʼal ixtʼaltanan, tatemal va tacha lakjunkal.
\v 33 Tejkan ixtatʼajun xʼoqnun ni burro, ex yu jamanavinin va talaklhisakmil:
\p —¿Valiʼiycha xʼotʼatʼik ni kiburrokʼan?
\p
\v 34 Ex yuʼuncha tanaul:
\p —Va maqskʼiniy ni Jalhachimoʼonuʼ.
\p
\v 35 Ex va talhaʼanilcha ni Jesús, va tamukʼanil ixlaqchʼitikʼan ni burro, ex putaukʼal ni Jesús.
\v 36 Tejkan chuncha alcha ni Jesús, ni lapanakni tamamanil ixlaqchʼitikʼan lakatin para ancha kapuʼal.
\v 37 Va la lhuu lapanakni yu ixtatʼaʼan ni Jesús. Ex chuncha tejkan va lay kachaʼal ni Jesús lakatajunti ni aspajun yu junkan Olivos, va ayaj talhiʼachantajul ni yuʼuncha. Va ixtatʼasay, la ay ixtamakay ni Dios por tachun yu ixtalaqtsʼinta yu makal ni Jesús la ixtapʼasta.
\v 38 Va ixtanajun:
\p —¡Katoʼoyakal yu minta la ixtaqaʼuti ni Jalhachimoʼonu Dios! Ox katalaqtsʼinchoqol ni Dios kun ni lapanakni y katoʼoyakal ni Dios laktʼiyan.
\p
\v 39 Pero lati ni fariseos yu ancha ixtayanal va tajunil ni Jesús:
\p —Jamalaniniʼ, kʼaʼun yu tatʼamintan ni saq kataval.
\p
\v 40 Ex ni Jesús va lakjunil:
\p —Klajunau incha va saq kataval ni lapanakni ex va katalaktʼasal ni chiyuxin, va ay katamakal ni Dios.
\p
\v 41 Ex chuncha tejkan va laycha kachaʼal laka Jerusalén, laqtsʼil ni ay putaulan, va laqlhiqalhul ni lapanakni yu ancha tavilanal.
\v 42 Va naul:
\p —Va ixmalaʼasitʼik chavay tas pulaycha oxicha katʼaulchʼoʼotʼik kun Dios pero jantucha lay kʼamalaʼasiyapitik.
\v 43 Kaminaʼ julchan tejkan kataʼostaulaʼ mintʼalaxkayninkʼan, katamalaqachʼinuyan para jantu lay kʼatʼapʼasatʼik y katamalaqachoqoxnuyan.
\v 44 Katamaʼakxaʼoyan, katamaqniyan uxiknan yu ancha katʼaulapitik. Jantu katamakaunaʼ chiyuxin yu katalaʼakltankukʼataulal. Jantu ixmispʼayatʼik ni Dios tejkan kilachil xlhiyucha katapasayaʼ.
\s Ni Jesús jalakxkauxtul jastʼanan yu ay lakatajtan
\r (Mt. 21:12-17; Mr. 11:15-19; Jn. 2:13-22)
\p
\v 45 Ex va tanul ni Jesús yu ay ixlakatajtankʼan ni israelitas, va jalakxkauxtul yu ixtatʼajun jastʼanan y vachuʼ yu ixtatʼajun jalaktamunun.
\p
\v 46 Va naul:
\p —Va tsʼoqkanta la ixchivinti Dios: “Ni kinchaqaʼ junkan xachaqaʼ taʼan puskʼinkan Dios.” Pero uxiknankʼan makʼayatʼik paʼalhavan.
\p
\v 47 Ex chuncha lhilhiy ixjalakmalaniy yu ay lakatajtan ni Jesús. Pero ni xaʼukxtinin ni kuras ali yu ixtamasuy ixlhachimoʼonkʼan ni israelitas ali yu lajʼay lapanakni, yuʼuncha aqtayl talakpastaknan tas laycha katapumaqnil.
\v 48 Pero tachun ni lapanakni tus ox ixtatʼajun qalasmaknan ni Jesús, xlhiyucha jantu katatemal tas laycha katapumaqnil.
\c 20
\s Lhisakmikal ni Jesús taʼayucha xtaqnil ixpalhachimoʼon
\r (Mt. 21:23-27; Mr. 11:27-33)
\p
\v 1 Taval taun julchan ni Jesús ixvil yu ay lakatajtan.
Ixlakmasuniy ni lapanakni, ixjalaqputeʼeniy tacha lay
katapulaqtaxtul. Ancha tachaʼal ni xaʼukxtinin kuras
ali yu ixtamasuy ixlhachimoʼonkʼan ni israelitas ali
yu lajʼay lapanakni.
\v 2 Yuʼuncha tanaul:
\p —¿Taʼayucha xtaqnin lhachimoʼon ni kʼamakʼatʼi yu aniy
axtoqnu? ¿Taʼayuchacha lhijunan ni chuncha kʼamakʼatʼi?
\p
\v 3 Ex ni Jesús va lakjunil:
\p —Kitʼin vachuʼ kaklalhisakmiyau taun chivinti.
\v 4 Kilajuniu, ¿taʼayucha malaqachal ni Juan para kamaqchajʼavanal?
¿Va Dios u va lapanaki?
\p
\v 5 Ex aqtaylcha talalhisakmiy siya yuʼuncha, ixtalajuniy:
\p —¿Tas kajunaucha? Incha kajunau va Dios yu malaqachal
ni Juan, ex ni Jesús kintalhisakmiyan: “¿Ex valiʼiycha
jantu kalhakʼapʼupʼintʼik?”
\v 6 Pero incha kanaunau valiʼiy lapanakni yu tamalaqachal
ni Juan, ex ni lapanakni kintalakatʼalmayan. Yuʼuncha
talhakapuʼan ni Juan va yu ixlaqputeʼey ixchivinti Dios.
\p
\v 7 Ex chuncha tajunil ni Jesús:
\p —Kijnankʼan jantu ijkʼatsayau taʼayucha malaqachal
ni Juan para kamaqchajʼavanal.
\p
\v 8 Ex Jesús jalakjunil:
\p —Ex ni kitʼin vachuʼ jantu kaklajunau tas ayucha kixtaqnil
palhachimoʼon yu ikpumakay ni aniy axtoqnuʼ.
\s Yu jalaktuʼunun tapatsanin
\r (Mt. 21:33-44; Mr. 12:1-11)
\p
\v 9 Ex aqtaylcha jalaqxaqalay ni lapanakni, va jalakjunil
taun chivinti yu xtaʼa jatapastakʼati. Va naul:
\p —Qayntaun lapanaki chʼal uvas la ixtʼun. Va jalaqxtaqnil
amedias lati tapatsanin. Ex taxtul, la maqan al.
\v 10 Ex lakachilcha ixpupʼuxkan ni uvas. Ni ukxtin
va malaqachal qayntaun ixʼoqxtamati para kaskʼinil lati
yu japʼuxnucha yu ixpaxtoqniy yucha. Pero yuʼuncha tasamajʼal
ni oqxtamati, tamalaqachachoqol, jantu tuʼuchun kataxtaqnil.
\v 11 Ex yu xamanavin tʼun va malaqachachoqol aqayntaun
ixʼoqxtamati. Vachuʼ tasamajʼal ni oqxtamati, tamalaqachachoqol,
jantu tuʼuchun kataxtaqnil.
\v 12 Ex ni ukxtin va malaqachachoqol aqayntaun pero
yuʼuncha talhimaqchapul y tamaxtulcha ixlhimaqspaʼ ni
lakatʼun.
\p
\v 13 ’Ex ni anchanuʼ xaʼukxtin va naul: “¿Tas kakmakayacha?
Kakmalaqachayaʼ kesʼatʼa yu ayaj kʼachaniy. Ka va yucha
katatoʼoyayaʼ.”
\v 14 Ex tejkan talaqtsʼil yu ixtatʼajun tapatsanin
talaxaqalal siya yuʼuncha, va tanaul: “Yu aniy kalaqaʼiyaʼ
ixlhitapatsa ixpay. Kamaqniu para kinavinkʼan kaval
ixlhitapatsa.”
\v 15 Ex tamaxtul ixlhimaqspa ni anchanu lakatʼun, va
tamaqnil.
\p Ex ni Jesús jalaklhisakmil:
\p —¿Ex chuncha tas kamakayacha ni xaʼukxtin ni tʼun?
\v 16 Va kaminaʼ la ixtʼun, kalaqmaqniʼoyaʼ ni anchanu
tapatsanin. Kaxtaqniyaʼ ni tʼun aqayntaun.
\p Ex ni lapanakni yu taqasmaklhi va tanaul:
\p —Jantu chun kaval.
\p
\v 17 Ex ni Jesús jalaqtsʼil, va naul:
\p —Incha jantu chuncha kaval, ex ¿valiʼiycha inchine najun
yu tsʼoqkanta la ixchivinti Dios?
\q Ni chiyux yu jantu kamapatsaputul yu tamakay chaqaʼ
\q chavay yucha yu apalay maqskʼiniy.
\p
\v 18 Vachuʼ naul ni Jesús:
\p —Mas va taʼayuʼ lapanaki kataqalqoslhi ni anchanuʼ
laka chiyux, kataqalhiyaʼ. Pero incha ni anchanu chiyux
kapatajul y kaʼaktʼalmal qayntaun lapanaki ex va kalhiʼakxajtachal
tacha pʼoqxni.
\s Ni Jesús lhisakmikal incha maqskʼiniy kamapalkal impuestos
\r (Mt. 21:45-46; 22:15-22; Mr. 12:12-17)
\p
\v 19 Ex yu xaʼukxtinin kuras kun yu ixtamasuy ixlhachimoʼonkʼan
ni israelitas va takʼatsal ni Jesús ixlaklhichiviniy
ni yuʼuncha tejkan jalaqputeʼenil ni anchanuʼ chivinti.
Xlhiyucha ancha ixtalakxkajuy tacha katapuchʼapal ni
Jesús. Pero jantu katachʼapal, va ixtatalhauniy ni lapanakni
yu ancha tayanal.
\v 20 Ex ni yuʼuncha jalaqmalaqachal lapanakni yu ixmakakan
tacha ox lapanakni kataval. Va ixtamakanuputun ni Jesús
para kanaul tuʼuchun yu jantu ox. Ex chuncha lay katalhaʼanil
ni xagobernador.
\v 21 Xlhiyucha talhisakmil, va tanaul:
\p —Jamalaniniʼ, ni kijnankʼan ijkʼatsayau va si laqsaval
yu naʼun y si laqsaval yu lakmalaniy ni lapanakni. Vachuʼ
jantu makʼay kuenta taʼayucha ni lapanaki. Uxintʼi ayaj
ox jamasuniy ixchivinti Dios.
\v 22 Va klalhisakmiyau incha maqskʼiniy kamapalniu
impuestos yu xaʼay jalhachimoʼonuʼ Roma u jantu.
\p
\v 23 Pero ni Jesús yucha kʼatsal va ixtamakanuputun.
Va jalakjunil:
\p —¿Valiʼiycha kilalaqtsʼintanuyaucha?
\v 24 Kʼimasunin aqxtaun tumin. ¿Ni aniy tumin tas ayuchacha
ixʼukxpucha? ¿Tas ayucha ixtaqaʼuti aniy tsʼoqmukʼanikanta?
\p Ex chuncha tanaul:
\p —Va ixʼukxpuʼ kun ixtaqaʼuti ni xaʼay jalhachimoʼonuʼ
Roma.
\p
\v 25 Ex chuncha jalakjunil:
\p —Kaxtʼaqnitʼik yu jalhachimoʼonuʼ Roma yu ixnavin yucha
y kaxtʼaqnitʼik Dios yu ixnavin Dios.
\p
\v 26 Ex chuncha jantu lay katamakanul ni Jesús la ixtalakaʼukxpukʼan
ni lapanakni. Tus vak jalakmakal por ixchivinti, ex yuʼuncha
saq taval.
\s Ni Jesús lhichiviniy tejkan katakujchoqoyaʼ ni janinin
\r (Mt. 22:23-33; Mr. 12:18-27)
\p
\v 27 Ex chuncha lati ni saduceos talaqʼal ni Jesús.
Yuʼuncha ixtanajun ni jantu takujchoqoy yu janinin.
Ex va chuncha va tajunil ni Jesús:
\p
\v 28 —Jamalaniniʼ, ni Moisés kintatsʼoqnin la ixlhachimoʼon
incha kanil qayntaun lapanaki y kamakauntijlal ixanati
y jantu kalhitsukunil sasʼatʼa, ex yu ixpʼisaqa maqskʼiniy
katʼatsukuchoqol ixanati para kalhitsukunil sasʼatʼa
por xajayaʼ.
\v 29 Ex chuncha ixʼalin qayntujun tʼalaqaunin. Yu xajayaʼ
lakxtuklal, va nil, jantu kalhitsukul sasʼatʼa.
\v 30 Ex yu pʼunaj ixpʼisaqa tʼatsukuchoqol ixanati
pero vachu nil, jantu kalhitsukul sasʼatʼa.
\v 31 Ex va chuncha yu aqayntaun ixpʼisaqa vachuʼ tʼatsukuchoqol
ni xanati ex vachu nil. Ex vachu va chuncha val kun
tachun ni tʼalaqaunin, jantu katalhitsukunil sasʼatʼa.
\v 32 Ex taval vachuʼ nil ni xanati.
\v 33 Ex tejkan katakujchoqoyaʼ ni janinin, ¿taʼayucha
ixanati kunaʼ? Qayntujun tʼalaqaunin va si ixtatʼatʼajun.
\p
\v 34 Ex ni Jesús va lakjunil:
\p —Ni lapanakni aniy lakamunukpaʼ va talakxtuklay y lakʼikan.
\v 35 Pero ni lapanakni yu tapaxtoqniy katachaʼal yu
ataun lakamunukpaʼ, mas taniy va katakujchoqoyaʼ. Ancha
jantu katalakxtuklayaʼ y jantu kalakʼikanaʼ.
\v 36 Yuʼuncha jantucha kataniyaʼ. Tacha ixmayulnin
Dios katajunaʼ, va yu sasʼatʼan Dios katajunaʼ, va takujchoqotacha.
\v 37 Ni Moisés yucha kintamasuniyan ni takujchoqoy
ni janinin tejkan lhitsʼoqlhi ni javan yu ixmaqtayvil.
Taʼan chuncha tsʼoqlhi, va naul ni Dios: “Kitʼin ixDios
Abraham, ixDios Isaac, ixDios Jacob kunita”, naul ni Dios.
\v 38 Chavay mas naunatʼik va ixtanitacha ni anchanu
lapanakni pero yu Dios naul: “Kitʼin va ixDioskʼan
kunita.” Ex chuncha pukʼatsayau va ixtakujchoqotacha.
Ni Dios jantu Dios kaval kun yu janinin, va ixDioskʼan
yu tatʼajun.
\p
\v 39 Ex lati yu ixtamasuy ixlhachimoʼonkʼan ni israelitas
va ancha ixtayanal, va tajunil ni Jesús:
\p —La ox altʼayan, jamalaniniʼ.
\p
\v 40 Ex chuncha tatalhaunilcha, jantucha apalay tuʼuchun
katalhisakmil.
\s Ni Cristo jantu vamun sasʼatʼa David kaval
\r (Mt. 22:41-46; Mr. 12:35-37)
\p
\v 41 Ex ni Jesús laklhisakmil ni lapanakni:
\p —¿Valiʼiycha tanajun va sasʼatʼa David ni Cristo yu
ixtanajun kamalaqachayaʼ ni Dios?
\v 42 Jantu vamun sasʼatʼa David kaval. David tsʼoqlhi
laka salmos va naul:
\q Ni Dios naul, va junkal kiJalhachimoʼonuʼ:
\q “Aniy kʼintʼatʼaʼul la kilhijakanaj makaʼ para katatoʼoyan
ni lapanakni
\q
\v 43 tus kakmaqalhajaʼoyaʼ tachun mintʼalaxkaynin.”
\m
\v 44 Ex incha David naul ni Cristo va ixJalhachimoʼonuʼ,
ex naunputun ni jantu vamun sasʼatʼa kaval.
\s Ni Jesús lakmukʼanil laqtaqal yu ixtamasuy ixlhachimoʼonkʼan
\r (Mt. 23:1-36; Mr. 12:38-40; Lc. 11:37-54)
\p
\v 45 Ex tachun ni lapanakni taqalasmaklhi ni Jesús
tejkan jalakjunil ixtʼaltanan, va naul:
\p
\v 46 —Kʼalhistʼajkʼantʼikcha para jantu katamakanun
yu tamasuy kilhachimoʼonkʼan. Yuʼuncha tamaqamay katatiʼukxuntayal
kun yu laqlman laqchʼiti tacha taʼulay ni lajʼay lapanakni.
Taʼachaniy kalakmastakʼakal laklhitamau tacha ay lapanakni
kataval. Tataulputun taʼan tataulay yu xalajʼaynin laqa
chaqan taʼan tataqxtoʼa ni lapanakni vachu taʼan alin
lakvayti.
\v 47 Talakmaxtuniy ixchaqakʼan yu tiyaunin. Vachu la
panij tatapayniy Dios para katatoʼoyal ni lapanakni.
Yuʼuncha katalaqaʼiyaʼ apalay lhuu jamaqanlqajnati.
\c 21
\s Qayntaun kilpataniʼ tiyau xtaqnil Dios ixtumin
\r (Mr. 12:41-44)
\p
\v 1 Ex chuncha taʼan ixvil ni Jesús lakatajtan va lakavanal,
va jalaqtsʼil ni maqalinin ixtamujuy ixlimosnajkʼan
laka kajun.
\v 2 Ex ancha laqtsʼil qayntaun kilpataniʼ tiyau va
mujul aqxtʼuy lakstʼuniy tumin.
\v 3 Ex va naul ni Jesús:
\p —Laqsaval klajunau yu aniy kilpataniʼ tiyau apalay
lhuu xtaqlhi xajantu yu alati lapanakni.
\v 4 Yuʼuncha mas va taxtaʼa laqlhuu pero taxtaʼa vamun
yu tamaxajniyachal. Chavay ni kilpataniʼ tiyau mas va
tsʼuniy tumin yu xtaqlhi pero va xtaqʼol tachun yu ixputapasay.
\s Ni Jesús naul ni kalaqcheʼeʼokanaʼ yu ay lakatajtan laka Jerusalén
\r (Mt. 24:1-2; Mr. 13:1-2)
\p
\v 5 Ex chuncha lati ixtatʼajun lhichivinin yu la ay
lakatajtan. Ixtanajun va kun la lajkʼus chiyux ixmaxantilakanta
y vachuʼ kun yu la kʼus axtoqnuʼ yu taxtaqlhi lapanakni.
\v 6 Pero ni Jesús lakjunil:
\p —Kaminaʼ julchan tejkan tachun yu laqtsʼinatʼik kalaqcheʼeʼokanaʼ,
jantu katamakaunaʼ chiyuxin yu katalaʼakltankukʼataulal.
\s Tas katapukʼatsayaʼ ni lapanakni tejkan va laycha kamiʼoyaʼ ni lakamunukpaʼ
\r (Mt. 24:3-28; Mr. 13:3-23)
\p
\v 7 Ex chuncha talhisakmil:
\p —Jamalaniniʼ, ¿tavanancha chuncha katapasayaʼ? Tejkan
va laycha chuncha katapasal, ¿tas kakpukʼatsayaucha?
\p
\v 8 Ex va naul ni Jesús:
\p —Kʼalhistʼajkʼantʼikcha para jantu matichun katamakanun.
Kataminaʼ qaynlhuu la kintaqaʼuti y katanaunaʼ: “Kitʼin
ni Cristo”; y katanaunaʼ: “Chavaycha kamiʼoyaʼ ni
lakamunukpaʼ.” Pero uxiknankʼan jantu kʼalaktʼapʼintʼik.
\v 9 Tejkan kaʼasmaktʼapitik la alin lhilukuj ni lakamunukpaʼ
y tejkan katalachʼapayaʼ ni lapanakni kun lhachimoʼonun
ex jantu katʼalhanantʼik. Chuncha maqskʼiniy pʼunaj
katapasal. Pero tejkan chuncha kunaʼ jantukaʼ kamiʼoyaʼ
ni lakamunukpaʼ.
\p
\v 10 Ex chuncha taylhaʼal ixchivinti ni Jesús, va lakjunil:
\p —Yu oqxlaqtaun lapanakni katalachʼapayaʼ kun aʼoqxlaqtaun
lapanakni. Yu laqataun pais katalachʼapayaʼ kun ataun
pais.
\v 11 Kalaklayaʼ lakatʼun lakalhuu lakamunukpaʼ y lakalhuu
kaʼalinaʼ chavan y lakalhuu kaʼalinaʼ taqanʼati. Vachuʼ
kaʼalinaʼ la ay talhanti laktʼiyan y va yucha katapukʼatsayaʼ
ni lapanakni va laycha kamiʼol ni lakamunukpaʼ.
\v 12 Pero pʼunaj tejkan jantukaʼ chuncha katapasayaʼ
katachʼapayan, katamamajkʼatsanivayan, katamaqxtaqniyan
yu xalajʼay lapanakni laqa chaqan taʼan tataqxtoʼa ni
israelitas. Kalhipʼinikʼanapitik yu lajʼay lapanakni
kun yu jalhachimoʼonun. Kalhipʼinkʼanapitik laka pachʼin.
Va si chun katapasayaʼ por kilapanakni untʼatʼik.
\v 13 Pero tejkan chuncha katapasayaʼ ex laycha kʼachʼivinapitik
para kintamispal.
\v 14 Pero kapʼastʼaktʼik la melhanutkʼan ni jantu katapastakʼun
tas laycha kʼapʼuʼaltʼayanantʼik tejkan katamukʼaniyan
laqtaqal.
\v 15 Ni kitʼin klaxtaqniyau chivinti kun jatapastakʼati.
Chuncha tachun mintʼalaxkayninkʼan katakʼatsayaʼ va
laqsaval yu naunatʼik, jantu lay katanaul yu jantu laqsaval
yu naunatʼik.
\v 16 Mas va mimpaykʼan u minatikʼan katamaqxtaʼan.
Mas va mintʼalaqaunin u miʼamigoskʼan katamaqxtaʼan.
Lati yu uxiknankʼan kʼamaqnikʼanapitik.
\v 17 Tachun ni lapanakni katalhixkayan por kilapanakni
untʼatʼik.
\v 18 Pero jantu kamaʼatsʼanʼayapitik metsukuntikʼan
mas va maqataun miʼajikʼan.
\v 19 Mas va lhitaʼay kunaʼ incha kilalhakapuʼanʼalhiyau
ex kʼalhitsʼukʼuyapitik jatsukunti.
\s Tejkan kalaqmaqniʼokanaʼ xalapanakni ni Jerusalén
\p
\v 20 ’Tejkan kalaqtsʼinapitik va katamalaqachoqoxnuyaʼ
ni tropas ni aniy putaulan yu Jerusalén. Chuncha kakʼatsʼayapitik
va niman kalaqmaqniʼokanaʼ xalapanakni.
\v 21 Tejkan chuncha katapasayaʼ, ex yu tavilanal xaʼestado
Judea maqskʼiniy kataqoslhi laka aspajunuxnan. Yu tavilanal
aniy laka ay putaulan maqskʼiniy katataxtul y yu tavilanal
ixlhimaqspa ni putaulan jantu katatanul.
\v 22 Ni anchanu julchan kaʼalinaʼ maqanlqajnati por
yu talaqalhin. Chuncha laqsaval kunaʼ tachun yu tsʼoqkanta
la ixchivinti Dios.
\v 23 ¡Payniʼincha xanatin yu jaʼaynan katajunaʼ anchanuʼ
julchan, vachuʼ yu katalhitsukuyaʼ lakstʼuniy sasʼatʼakʼan
yu lhimatsʼikʼiti! La kaʼalina maqanlqajnati aniy la
kintʼunkʼan y ni Dios ayaj katalqaunaʼ kun yu aniy lapanakni.
\v 24 Lati kalaqmaqnikanaʼ laka lhilukuj. Lati kalakchʼikanaʼ,
kalaklhaʼankanaʼ ixlhilakalhuu lakamunukpaʼ. Yu aniy
la ixputaulankʼan Jerusalén katataulaʼ yu jantu israelitas
kataval tus tejkan kamiʼoyaʼ julchan yu lakʼulanikanta.
\s Tejkan kaminchoqoyaʼ ni Jesús
\r (Mt. 24:29-35, 42-44; Mr. 13:24-37)
\p
\v 25 ’Ex chuncha laktʼiyan katatapaxayaʼ ni julchan
kun ni malkuyuʼ kun ni jastʼakun para katapulakpastaknal.
Aniy lakatʼun la katatalhananaʼ ni lapanakni, jantu katamalaqasiyaʼ
tejkan ayaj kamakatʼaunaʼ ni lakamar.
\v 26 Jantucha katalhitsukuyaʼ tapʼasta por ixtalhantikʼan
y va por la katapastakʼuyaʼ tisuncha katapasayaʼ lakamunukpaʼ.
Ni julchan ali ni malkuyuʼ ali ni jastʼakun kataxkapʼiknanaʼ.
\v 27 Ex chuncha katalaqtsʼinaʼ ni Sasʼatʼa Lapanaki,
va kaminaʼ laka taputsʼi, kaminaʼ kun ixtapʼasta y tachun
ixʼayaxtu.
\v 28 Tejkan chuncha kaʼaqtayniyacha ex kʼaʼachʼantʼik,
y kʼatalaqstʼatʼik kun achati. Tejkan chuncha kunaʼ
ex kʼalaqtʼaxtʼuyapitikcha.
\p
\v 29 Ex lakjunil ataun chivinti yu xtaʼa jatapastakʼati,
va naul:
\p —Kʼalaqtsʼintʼik ni kʼiu yu junkan higuera, u va taʼayucha
kʼiu kaval.
\v 30 Tejkan kalaqatajuyaʼ xaxqoy ex meʼemankʼan kʼatsʼayatʼik
ni taʼukstsʼuniycha ni lhikʼatsa.
\v 31 Vachu va chun tejkan kalaqtsʼinapitik ni chuncha
tʼajun tapasanaʼ aniy lakamunukpaʼ yu tacha klajuniu,
ex va chuncha kakʼatsʼayapitik ni taʼukstsʼuniycha tejkan
Dios kalhachimoʼonunaʼ.
\v 32 Laqsaval klajunau, ni lapanakni yu chavay tatʼajun,
jantukaʼ kataniʼoyaʼ tus katapasaʼoʼelayaʼ yu klajuntau.
\v 33 Yu lakatʼun kun laktʼiyan katamiʼoyaʼ pero yu
kinchivinti jantu aqtaun kamiʼoyaʼ.
\v 34 Kʼalhistʼajkʼantʼikcha para jantu pʼas kʼamakʼatʼik
melhanutikʼan por mintaʼapʼatikʼan nisin por yu makʼapʼutʼunatʼik
la milakatunajkʼan, y jantu kʼatʼapʼastakʼun tacha kʼapʼutʼapʼasayapitik
la metsukuntikʼan. Ni anchanuʼ julchan va tsʼalaj kachinaʼ.
\v 35 Kaminaʼ tacha laqataun patʼal yu tsʼalaj putaqtay,
va kalaqmaqsvaʼoyaʼ ni lapanakni yu tavilanal talakachux
ni lakamunukpaʼ.
\v 36 Lhistujcha kʼaʼuntʼik, va si kaskʼintʼik Dios para
lay kʼapʼulaqtʼaxtʼutʼik tachun yu katapasayaʼ. Ex chuncha
lay kʼapʼulaqchʼipʼintʼik ni Sasʼatʼa Lapanaki.
\p
\v 37 Tejkan tunkuj, ni Jesús ixlakmalanin laka ay ixlakatajtankʼan
ni israelitas. Chuncha tejkan tsʼis, ixʼan loqojnuʼ taʼan
junkan xaʼaspajun Olivos.
\v 38 Tachun ni lapanakni vakuj ixtalaqʼan ni Jesús
ni ay lakatajtan. Va ixtaʼan qasmaknan ixchivinti.
\c 22
\s Ni Judas Iscariote najun kamaqxtaqyaʼ ni Jesús la ixtamakakʼan yu lajʼay lapanakni
\r (Mt. 26:1-5, 14-16; Mr. 14:1-2, 10-11; Jn. 11:45-53)
\p
\v 1 Ex chuncha ixtaʼuktsʼuniy ni Paxku yu ay ixkʼatankʼan ni israelitas, tejkan ixtaʼuy ni pan yu jantu lhiyaukan levadura.
\v 2 Chuncha ni xaʼukxtinin ni kuras kun yu ixtamasuy ixlhachimoʼonkʼan ni israelitas, va ixtalakxkauniy tas laycha katapumaqnil ni Jesús. Pero va ixtatalhauniy ni lapanakni.
\p
\v 3 Ex chuncha ni Satanás va tanunil ni Judas, yu ixtajuniy Iscariote. Yucha xaqayntaun yu ixpumakautʼuykʼan ixtʼaltanan Jesús.
\v 4 Ex yucha jalaqʼal ni xaʼukxtinin kuras kun yu xapolicias ni ay lakatajtan. Va laqlhixaqalal para laycha kalaqmaqxtaqnil ni Jesús ni yuʼuncha.
\v 5 Ex yuʼuncha talhiʼachantajul, va tajunil kataxtaqnil tumin incha kalaqmaqxtaqnil.
\v 6 Ex va lhipaʼinil ni Judas, va aqtayl lakpastaknan tas lay kapumaqxtaqlhi ni Jesús tejkan jantu kaʼalil pumalhuu lapanakni.
\s Ni Jesús laktʼavayl ixtʼaltanan yu xavayti Paxku
\r (Mt. 26:17-29; Mr. 14:12-25; Jn. 13:21-30; 1Co. 11:23-26)
\p
\v 7 Ex chuncha va lakachilcha xakʼatan Paxku, tejkan ixtaʼuy pan yu jantu ixlhiyaukan levadura, vachuʼ ixtamaqniy sasʼatʼa borrego tacha ixlapaxkankʼan.
\v 8 Ni Jesús malaqachal ni Pedro ali Juan, va lakjunil:
\p —Kapʼintʼik laʼoxinin yu kaʼuyau xakʼatan Paxku.
\p
\v 9 Ex va tanaul:
\p —¿Toʼoxtaycha naʼun kaklaʼoxiu?
\p
\v 10 Ex lakjunil ni Jesús:
\p —Tejkan katʼanuyapitik ni laka putaulan ancha kapʼaxtʼoʼapitik qayntaun lapanaki yu lhaʼanta xkan la ixʼaqxau. Yucha katʼapʼinapitik tus laqa chaqaʼ taʼan katanuyanta.
\v 11 Ancha kʼaʼunitʼik ni jamachaqaʼ: “Kijamalaninikʼan va lhasakminin toʼoxtaycha lay kalaktʼavayl ni ixtʼaltanan ni xakʼatan Paxku.”
\v 12 Ex ni yucha katamasuniyan taʼan apulaktaun ni chaqaʼ yu pulajʼay taʼan alinʼojotacha yu axtoqnuʼ. Ancha kʼalaʼoxiyapitik ni lakvayti.
\p
\v 13 Ex chuncha ni yuʼuncha taʼal, tatemal va chuncha tacha lakjunkal. Ancha talaʼoxil xalakvayti ni kʼatan Paxku.
\p
\v 14 Ex chuncha tejkan chaʼalcha ni hora ni Jesús kun ixtʼaltanan tatanul ni laqa chaqaʼ, va tataulal laka mesa.
\v 15 Ex lakjunil ni Jesús:
\p —Kitʼin kun tachun la kelhanuti klatʼavaynputunau yu uxiknan xavayti ni aniy kʼatan Paxku tejkan jantukaʼ ikmaqnikan.
\v 16 Kitʼin klajunau jantucha kajkʼuchoqoyaʼ xavayti ni aniy kʼatan tus tejkan kataqayntsayaʼ yu naunputun aniy kʼatan tejkan kalhachimoʼonunaʼ ni Dios.
\p
\v 17 Ex chuncha chʼapal laqataun vaso, va xtaqnil lhimalaqpuchuncha ni Dios. Ex va lakjunil:
\p —Kachʼapʼatʼik ni vaso, kaʼoqtʼik tachun uxiknankʼan.
\v 18 Laqsaval klajunau jantucha aqtaun kajkʼoqchoqoyaʼ kitʼin yu aniy xaxkan ni uva tus tejkan kaminaʼ jalhachimoʼonuʼ ni Dios.
\p
\v 19 Ex chʼapal ni pan va xtaqnil lhimalaqpuchuncha ni Dios. Va cheʼel, laqxtaqnilcha, va lakjunil:
\p —Yu aniy va kilakatunaj maqxtaqkanta por uxiknankʼan. Va tsaj chuncha kʼamakʼayapitik para kilapupastakvi ni kitʼin.
\p
\v 20 Ex tejkan tavaynʼol vachu va chuncha chʼapal ni vaso, va naul:
\p —Yu aniy vaso masuy ni Dios va taun sastʼi chivinti jatʼatamakajun ixlapanakni por kijakʼalna. Va kataxtuyaʼ kijakʼalnan para kʼalaqtʼaxtʼutʼik ni uxiknan.
\v 21 Pero qayntaun yu kintʼataulay aniy laka mesa yucha kimaqxtaqyaʼ para kakmaqnikal.
\v 22 Chuncha katapasayaʼ, ni kitʼin yu kval Sasʼatʼa Lapanaki ikpuʼan lakatin taʼan kimpaxtoqniy. Pero paynicha ni anchanu lapanaki yu kimaqxtaqyaʼ para kakmaqnikal.
\p
\v 23 Ex yuʼuncha taʼaqtayl talaklhichiviniy taʼayucha kaval yu kamaqxtaqlhi.
\s Yu apalay ay lapanaki maqskʼiniy lakatʼuniy kamakakal
\p
\v 24 Ex chuncha taʼaqtaynilcha talalhisakmiy siya yuʼuncha taʼayucha yu apalay ay kaval yu ixpumakautʼuykʼan.
\v 25 Pero ni Jesús lakjunil:
\p —Ni lajʼay xalhachimoʼonun aniy lakamunukpaʼ talhichimoʼonun tacha pʼas xaʼukxtinin. Yuʼuncha tanajun kalaktoʼoyakal tacha lajʼoxi lapanakni kataval.
\v 26 Pero uxiknan jantu chun kʼamakʼakʼantʼik. Va knajun yu apalay ay junita yucha kaval tacha yu apalay lakatʼuniy. Yu lhinajun, yucha kaval tacha qayntaun oqxtamati.
\v 27 ¿Tas naunatʼikcha uxiknankʼan? ¿Taʼayucha yu apalay ay? ¿Va yu vil laka mesa u va yu jamunuʼ? Va yu vil laka mesa. Pero ni kitʼin ikmakakan tacha miʼoqxtamatkʼan.
\p
\v 28 ’Ni uxiknankʼan jantu aqtaun ixkilamakaunau tejkan lhitaʼay xaktapasay.
\v 29 Xlhiyucha klaxtaqniyau taun palhachimoʼon tacha kixtaqnil palhachimoʼon ni kimPay.
\v 30 Para chuncha lay kilatʼavajiu y kilatʼaʼoqvi la kimesa taʼan kaklhachimoʼonunaʼ ni kitʼin. Kʼatʼaulapitik tacha jalhachimoʼonun. Kʼalhiʼunapitik yu oqxlaqkautʼuykʼan xalapanakni Israel.
\s Ni Jesús najun ni Pedro va kanaunaʼ ni jantu mispay ni yucha
\r (Mt. 26:31-35; Mr. 14:27-31; Jn. 13:36-38)
\p
\v 31 Ex naul ni Jesús, va junil ni Pedro:
\p —¡Ay, Simón kʼatʼi! Ni Satanás taskʼintancha para katatankʼalhan uxiknan vachu va tacha tankʼalhakan ni trigo.
\v 32 Pero kitʼin ikskʼinil Dios por uxintʼi para jantu kamaʼatsʼanʼatʼi milhakapuʼati. Ex tejkan kʼintʼapʼinchʼoʼoyeʼe kʼalaqʼaqtʼayʼutʼi mintʼalaqaunin para ox katataylhaʼal.
\p
\v 33 Ex ni Pedro va junil:
\p —Jalhachimoʼonuʼ, kitʼin va klistujcha kunita para kaktʼaʼan uxintʼi mas lakapachʼin, u mas kaknil kun uxintʼi.
\p
\v 34 Pero ni Jesús va junil:
\p —Pedro, kitʼin kunan chavay tsʼis tejkan jantukaʼ tʼasay ni puyux va aqtʼutu kʼanauneʼe ni jantu kʼimispʼay.
\s Katapaxayaʼ ixputsukukʼan ixpumakautʼuykʼan, la lhitaʼay kunaʼ
\p
\v 35 Ex chuncha va laklhisakmil ni Jesús, va naul:
\p —Tejkan klamalaqachau y jantu ixlhipʼinatʼik ni mintuminkʼan nisin mibolsakʼan nisin misapatojkʼan, ¿ex va tatsʼanqaniyan tuʼuchun?
\p Ex yuʼuncha tajunil:
\p —Jantu.
\p
\v 36 Ex ni Jesús lakjunil:
\p —Pero chavaycha yu alin ixtumin, va kalhaʼal. Vachuʼ kalhaʼal ixbolsa. Yu jantu kalhitsukul ixʼespada, va kalhiʼil ixlaqchʼiti.
\v 37 Kitʼin klajunau va maqskʼiniy kataqayntsal tacha tsʼoqkanta la ixchivinti Dios yu kilhichiviniy kitʼin taʼan najun: “Ni yucha laqtsʼinkal tacha jalaktuʼunuʼ kaval.” Yu anu yu kilhichiviniy kitʼin laqsaval katapasayaʼ.
\p
\v 38 Ex va tanaul ni yuʼuncha:
\p —Jalhachimoʼonuʼ, aniy alin maʼatʼuy kiʼespadakʼan.
\p Ex va naul ni Jesús:
\p —Ka oxicha.
\s Ixtʼaltanan taltatal tejkan ixtʼajun skʼiniʼ Dios ni Jesús
\r (Mt. 26:36-46; Mr. 14:32-42)
\p
\v 39 Ex chuncha ni Jesús taxtul ni laqa chaqaʼ, va anchoqopal ni aspajun yu junkan Olivos, va tatʼaʼal ixtʼaltanan.
\v 40 Ex tejkan ancha tachaʼal, va lakjunil:
\p —Kaskʼintʼik Dios para jantu kʼamakʼanukʼantʼik y kamakʼatʼik yu jantu lajʼox.
\p
\v 41 Ex chuncha va al ixlhimaqati tacha kʼatʼanʼalhutʼi chiyux. Ancha taʼaqtsoqoqtal, aqtayl skʼin Dios.
\v 42 Va naul:
\p —KimPay kʼatʼi, incha va naʼun uxintʼi ex kʼamakʼatʼi para jantu kaktapasal ni maqanlqajnati. Pero jantu kʼamakʼatʼi tacha iknajun kitʼin, va kamakʼatʼi tacha naʼun uxintʼi.
\p
\v 43 Ex ancha tasul taun xamayul laktʼiyan va xtaqnil tapʼasta ni Jesús.
\v 44 Va ayaj ixmajkʼatsay va la pʼas iskʼin Dios. Ixchanita xtʼajlhi tacha jakʼalnan ixjunita, va taʼeltajul laka tʼun.
\v 45 Ex chuncha skʼinʼol va tayachoqolcha, jalaqʼal ixtʼaltanan, va jalaqtsʼil va ixtaltatay. Va tamaqaninil yuʼuncha.
\v 46 Ex va lakjunil:
\p —¿Valiʼiycha ltʼatʼayatʼik? Kaʼostʼaulatʼik, kaskʼintʼik Dios para jantu kʼamakʼanukʼantʼik y kamakʼatʼik yu jantu lajʼox.
\s Ni Judas Iscariote maqxtaqlhi ni Jesús para katachʼil
\r (Mt. 26:47-56; Mr. 14:43-50; Jn. 18:2-11)
\p
\v 47 Ex chuncha tejkan vananaj ixtʼajun chivin, va tachaʼal lhuu lapanakni. Xaqayntaun ixpumakautʼuykʼan ixtʼaltanan ni Jesús yu ixjunkan Judas, yucha japʼulatal. Va taʼuktsʼuniniycha taʼan ixyal ni Jesús, va laqmil para kakiltastuklhi.
\v 48 Pero ni Jesús va lhisakmil:
\p —Judas, ¿uxintʼi kʼinkʼiltʼastʼukʼa vamun para kʼimpʼumaqxtʼaqyeʼe ni kitʼin yu Sasʼatʼa Lapanaki?
\p
\v 49 Ex yu ixtatʼavilanal ni Jesús tejkan takʼatsal yu va laycha katapasal, va talhisakmil:
\p —Jalhachimoʼonuʼ, ¿tas naʼuncha? ¿Va kalakchʼapayaucha kun espada u jantu?
\p
\v 50 Ex qayntaun maxtul ixʼespada, va chaqxlhi ixʼoqxtamati yu xaʼukxtin ni kuras, va chaqxpʼuxnil ixlhijakanaj aqaxqol.
\v 51 Ex jaqaltayl ni Jesús, va naul:
\p —Ancha katamaktalcha.
\p Ex ni Jesús va saknil ni ixʼaqaxqol, va mukʼanichoqol.
\v 52 Yu ixtachaʼanta para katachʼapal va ni xaʼukxtinin kuras ali yu xaʼukxtinin policias lakatajtan ali yu xalajʼaynin. Ex chuncha ni Jesús va lakjunil:
\p —¿Va tacha alhavanacha kakval ni kilalaqminau kun kʼiu ali espada?
\v 53 Mas va lhilhiy xaklatʼataulau lakatajtan jantu aqtaun kilachʼapau. Pero chavay va putsʼista y va chuncha kilamakayau va por tapaxtoqniyan yu xalhachimoʼon putsʼista.
\s Ni Pedro naul jantu mispay ni Jesús
\r (Mt. 26:57-58, 69-75; Mr. 14:53-54, 66-72; Jn. 18:12-18, 25-27)
\p
\v 54 Ex chuncha tachʼapal ni Jesús, va talhaʼal, va tamanul la ixchaqaʼ yu xaʼukxtin kura. Ni Pedro va paqmaqati ixtixkaulhaʼanta.
\v 55 Ancha ixtamalkulata taʼan malaqachoqoxnuta ni chaqaʼ, valiʼiy ixvilin ixtavilanal. Vachu laktʼataulal ni Pedro.
\v 56 Ex qayntaun maqtsukuʼ laqtsʼil laka jikmi va aqtayl oqspulaqtsʼin va naul:
\p —Yu aniy lapanaki va ixtʼaltanaʼ ni Jesús.
\p
\v 57 Pero ni Pedro va naul ni jantu, va junil ni maqtsukuʼ:
\p —Xanati, kitʼin jantu kmispay ni yucha.
\p
\v 58 Ex taun panchʼix val, aqayntaun laqtsʼil, va naul, junkal ni Pedro:
\p —Uxintʼi vachuʼ ixtʼaltanaʼ kʼatʼi.
\p Pero ni Pedro va junil:
\p —Joʼati, jantu kitʼin.
\p
\v 59 Ex taun hora val, aqayntaun va pʼas chivinil, va naul:
\p —Laqsaval, yu aniy lapanaki va ixtʼaltanaʼ, va machaqaʼ Galilea.
\p
\v 60 Ex va naul ni Pedro:
\p —Joʼati, jantu laqsaval kaval yu naʼun.
\p Ex tejkan vananaj ixtʼajun chivin va tʼasal ni puyux.
\v 61 Ex ni Jesús talaqaspʼiklhi, laqtsʼil ni Pedro. Ex va pastaklhi ni Pedro tacha naul ni Jesús: “Va aqtʼutu kʼanauneʼe ni jantu kʼimispʼay tejkan jantukaʼ istʼasay ni puyux.”
\v 62 Ex taxtul ni Pedro, va la pʼays qalhul.
\s Laktuʼukan ni Jesús
\r (Mt. 26:67-68; Mr. 14:65)
\p
\v 63 Taval ni lapanakni yu ixtachʼapata ni Jesús va talaktuʼul, va tanaqlhi.
\v 64 Ex talaqpuchʼil, tanaqlhi, va tajunil:
\p —Kilajuniu taʼayucha yu naqnicha.
\p
\v 65 Va pulhuu laqxtoqnuʼ chivinti tapulaktuʼul.
\s Ni Jesús lhaʼankal taʼan talhachimoʼonun yu lajʼay lapanakni
\r (Mt. 26:59-66; Mr. 14:55-64; Jn. 18:19-24)
\p
\v 66 Ex va tunkulcha tataqxtoqlhi yu lajʼay xapaynin yu xaʼukxtinin kuras kun yu ixtamasuy ixlhachimoʼonkʼan ni israelitas. Yuʼuncha ixtalhichimoʼoy ixputsukkʼan. Ancha lhiminkal ni Jesús.
\v 67 Ex va tajunil:
\p —Kilajuniu incha laqsaval ni Cristo kʼatʼi, yu ixtanajun kamalaqachayaʼ ni Dios.
\p Ex ni Jesús va lakjunil:
\p —Mas va kaklajuniu, jantu kilalhakapuʼau.
\v 68 Mas va kaklalhisakmiu jantu kʼaʼaltʼayanantʼik nisin jantu kilaxʼotau.
\v 69 Pero chavay y mas va tavanancha, kitʼin yu kval Sasʼatʼa Lapanaki kaktaulaʼ la ixlhijakanaj Dios, kaklhitsukuyaʼ ixtapʼasta.
\p
\v 70 Ex tachun ni anchanu lajʼay lapanakni va tanaul:
\p —¿Ex uxintʼi Sasʼatʼa Dios kʼatʼi?
\p Ex ni Jesús lakjunil:
\p —Chun, tacha uxiknan naunatʼik.
\p
\v 71 Ex chuncha ni yuʼuncha va tanaul:
\p —¿Tisuncha alati chivinti maqskʼiniyau para kamukʼaniu ixlaqtaqal? Oxicha kun yu xanajun.
\c 23
\s Ni Jesús lhaʼankal la ixpulakchivin ni Pilato
\r (Mt. 27:1-2, 11-14; Mr. 15:1-5; Jn. 18:28-38)
\p
\v 1 Ex tachun ni anchanuʼ lajʼay lapanakni tatayal, va talhaʼal ni Jesús taʼan vil yu xalhachimoʼonuʼ romanos yu junkan Pilato.
\v 2 Ex taʼaqtayl tachivintanuy, va junkal ni Pilato:
\p —Yu aniy lapanaki iktemau, yucha va lakmalukujlay ni lapanakni para jantucha katatoʼoyal ixlhachimoʼonunkʼan. Va lakjuniy jantu katamapalal ixʼimpuestoskʼan y vachu najun va yucha ni Cristo yu Jalhachimoʼonuʼ.
\p
\v 3 Ex ni Pilato va lhisakmil:
\p —¿Uxintʼi xajalhachimoʼonuʼ kʼatʼi ni israelitas?
\p Ex ni Jesús va junil:
\p —Chun, tacha naʼun uxintʼi.
\p
\v 4 Ex ni Pilato va lakjunil ni xaʼukxtinin kuras kun tachun ni lapanakni, va naul:
\p —Aniy lapanaki jantu tuʼuchun laqtaqal kaktemanil.
\p
\v 5 Pero apalay pʼas tamanul jalaklkanti ni lapanakni, va tanaul:
\p —Pero aniy lapanaki ayaj lakmalukujlay ni lapanakni kun ixchivinti y malaninin tachun la kintʼunkʼan yu israelitas kuntau, yu xaʼestado Galilea tus aniy.
\s Ni Jesús lhaʼankal la ixpulakchivin ni Herodes
\p
\v 6 Ex tejkan chuncha qasmaklhi ni Pilato, va laklhisakmil incha ni Jesús machaqaʼ xaʼestado Galilea ixjunita.
\v 7 Tejkan kʼatsal va ancha machaqaʼ ixjunita taʼan ixlhachimoʼonun ni Herodes, ex yucha malaqachanil ni Jesús. Ni Herodes va chilkaʼ ni anchanu putaulan Jerusalén y ancha ixvil tejkan xajulchan kʼatan ixjunita.
\v 8 Ex chuncha tejkan ni Herodes laqtsʼil ni Jesús, va ayaj lhiʼachantajul. Va la maqancha ixlaqtsʼinputun, va ixqasmaktacha yu ixmakay y va ixlaqtsʼinputun kamakal tuʼuchun yu ay.
\v 9 Ex chuncha la lhuu chivinti lhisakmil pero ni Jesús jantu tsij kanaul.
\v 10 Va ancha tayanal ni xaʼukxtinin kuras kun yu ixtamasuy ixlhachimoʼonkʼan israelitas. Yuʼuncha va la pʼas tamukʼanil laqtaqal.
\v 11 Chuncha ni Herodes kun ixtropas jantu katatoʼoyal, va la lhuu laqxtoqnu chivinti tajunil. Ex chuncha talaktuʼul, va taʼulanil aqxtaun laqchʼiti yu taʼulay jalhachimoʼonun. Ex va chuncha tapulaktuʼul, va tamalaqachanichoqol ni Pilato.
\v 12 Ex chuncha ni anchanu julchan ni Herodes kun Pilato va amigos taval. Pʼunaj ixtalaxkajiy pero ni anchanu julchan va chuncha talamakal tacha amigos.
\s Lhinaunkal ixmaqnika ni Jesús
\r (Mt. 27:15-26; Mr. 15:6-15; Jn. 18:39–19.16)
\p
\v 13 Ex chuncha taval ni Pilato va laqmaqxtoqlhi ni xaʼukxtinin kuras ali ni jalhachimoʼonun ali ni lapanakni.
\v 14 Ex va lakjunil:
\p —Va kilalhiminiu yu aniy lapanaki, va kilajuniu ni lakmalukujlay ni lapanakni para jantucha katatoʼoyal ixlhachimoʼonunkʼan. Pero la mintalakaʼukxpukʼan kitʼin klhisakmil incha laqsaval kaval tacha naunatʼik. Jantu kaktemanil ni ixlaqtaqal yu mukʼaniyatʼik.
\v 15 Vachuʼ ni Herodes jantu katemanil ixlaqtaqal. Chuncha kʼatsay va por kintamalaqachanichoqon. Xlhiyucha kitʼin knajun jantu kamakal tuʼuchun yu kalhimaqniu.
\v 16 Ex kitʼin kaklhinaunaʼ ixmaqanaqka, ex kakmakaunacha.
\p
\v 17 Ni Pilato ixmaqskʼiniy kaxʼoqlhi qayntaun tachʼin taun taun jachʼitin tejkan kʼatan Paxku.
\v 18 Ex tachun ni lapanakni va chʼantaun taval, va la pʼas tanaul:
\p —Jantu kamakʼau yu aniy lapanaki. Kamakʼau yu junkan Barrabás.
\p
\v 19 Ni Barrabás ixmakata lhilukuj ixpulakna ni putaulan y vachu va maqnil qayntaun, xlhiyucha tamanul laka pachʼin.
\v 20 Pero Pilato va ixmakaunputun ni Jesús, xlhiyucha laqxaqalachoqol aaqtaun ni lapanakni.
\v 21 Pero yuʼuncha apalay pʼas ixtatʼajun lakchivinin, va tanaunchoqol:
\p —¡Kʼamakxtʼukmukʼacha laka kurus!
\p
\v 22 Ex yu aqtʼutunuʼ ni Pilato laqxaqalachoqol, va naul:
\p —¿Valiʼiycha chun unatʼik? Jantu tuʼuchun laqtaqal kamakal. Kitʼin kaklhinaunaʼ ixmaqanaqka, ex kakmakaunacha.
\p
\v 23 Pero yuʼuncha la pʼas ixtachiviniy, ixtaskʼin laqatapʼasta para kamakxtukmukʼakal laka kurus. Ex kun ixchivintikʼan ni lapanakni kun yu xaʼukxtinin kuras va talhajal yu ixtaskʼin.
\v 24 Ex chuncha ni Pilato lhinaul kamakakal tacha ixtaskʼinta ni lapanakni.
\v 25 Ex chuncha makaunkal yu ixtanun laka pachʼin por makal lhilukuj y por maqninil. Ni Jesús va maqxtaqkal para katamakal ni lapanakni tacha ixtaskʼinta.
\s Tamakxtukmukʼal laka kurus ni Jesús
\r (Mt. 27:32-44; Mr. 15:21-32; Jn. 19:17-27)
\p
\v 26 Ex chuncha tejkan talhaʼal ni Jesús va tachʼapayaul qayntaun lapanaki yu Simón ixjunkan, va machaqaʼ xalakatʼun Cirene. Ixminta ixlhimaqspaʼ ni putaulan. Tamaqxʼoʼal ni kurus, va talhijunil kalhaʼal taʼan ixjapʼulʼanta ni Jesús.
\v 27 Va astan ixtaʼanta qaynlhuvaj lapanakni. Vachu ixʼalin xanatin yu ixtamaqaninin, va la ixtaqalhun.
\v 28 Pero ni Jesús va talaqaspʼiklhi va lakjunil:
\p —Xanatin machaqan Jerusalén, jantu kilalhiqalhuu ni kitʼin. Kalhiʼalhuntʼik por metsukuntikʼan y por mesʼatʼankʼan.
\v 29 Kaminaʼ julchan tejkan kanaunkanaʼ: “La ox istsukuntikʼan ni xanatin yu jantu lay talhitsukuy sasʼatʼakʼan ali yu jantu aqtaun katalhitsukul ali yu jantu aqtaun katamatsʼikʼinil.”
\v 30 Vachu katanaunaʼ kalaktapujnul ni aspajun para katanil, y katanaunaʼ kalaktapujnul ni aqstijun para kalaqʼaqxtaqmal.
\v 31 Maqataun kʼiu yu ltakni yucha jantu xavakan. Pero ni kitʼin kakmaqnikanaʼ mas jantu tʼujuʼ kintalaqalhin. ¿Ex tas katamakayan uxiknankʼan yu va tacha xixni kʼiu untʼatʼik?
\p
\v 32 Va talhaʼal ni Jesús kun pumatʼuy tachʼinin yu ixtamakata talaqalhin.
\v 33 Ex chuncha tejkan tachaʼal ni aspajun yu junkan Xajalukuti Aqtsul, va ancha tamakxtukmukʼal ni Jesús kun yu qayntʼuy laktuʼunun, qayntaun la ixlhijakanaj yu aqayntaun la ixlhijamaqxu.
\v 34 Ex chuncha va naul ni Jesús:
\p —KimPay kʼatʼi, kʼalaqmalaqmixinin, va jantu takʼatsay yu tamakay.
\p Ex ancha ni tropas talalaqlvaqnil ixlaqchʼiti ni Jesús. Tamakal taun suerte para katalalhajal.
\v 35 Vachu ancha tayanal ni lapanakni xalaqtsʼinin. Vachu ni lhachimoʼonun ixtalaktuʼuy, va tanaul:
\p —Yu aniy incha laqmalaqtaxtuy lapanakni, ex vachuʼ kamalaqtaxtukal yucha xʼaman incha laqsaval ni Cristo yu laksakta Dios.
\p
\v 36 Ni tropas vachu talaktuʼul. Ixtalaqmin, ixtaxtaqniputun vinagre yu skajni.
\v 37 Va ixtanajun:
\p —Incha laqsaval xalhachimoʼonuʼ israelitas kʼatʼi, ex kʼamalaqtʼaxtʼukʼa meʼeman.
\p
\v 38 Ancha vachuʼ tsʼoqkanta la ixʼaqtsul ni kurus, va najun: “Yu aniy va ixJalhachimoʼonukʼan ni israelitas.” Va chuncha istsʼoqkanta laka lhichivin Griego ali laka lhichivin Latín ali laka lhichivin Hebreo.
\p
\v 39 Vachu qayntaun yu laktuʼunuʼ yu ixtʼajukʼal ni Jesús va ixlaktuʼuy, va najun:
\p —Incha laqsaval ni Cristo kʼatʼi, ex kʼamalaqtʼaxtʼukʼa uxintʼi meʼeman y vachu kilamalaqtaxtuu ni kijnankʼan.
\p
\v 40 Pero yu aqayntaun yu ixtʼajukʼal ni Jesús, va laqʼaymal por laktuʼul ni Jesús, va naul:
\p —Ka jantu tʼalhauniy ni Dios ni vachu va chun maʼanlʼajnan tacha ni yucha.
\v 41 Pero ni kijnankʼan chavaycha laqsaval maqanlqajnanau por yu makau talaqalhin. Pero yu aniy jantu tuʼuchun kamakal.
\p
\v 42 Ex va naul, va junkal ni Jesús:
\p —Jesús, kʼimpʼastʼaktʼi tejkan kʼatʼanchʼoʼoyeʼe jalhachimoʼon.
\p
\v 43 Ex ni Jesús junil:
\p —Laqsaval kunan, chavaycha kʼintʼatʼauleʼe laktʼiyan.
\s Nil ni Jesús
\r (Mt. 27:45-56; Mr. 15:33-41; Jn. 19:28-30)
\p
\v 44 Va atunkuj ixjunita pero va putsʼislhi ni lakamunukpaʼ tus laʼatʼutu putoqoxata.
\v 45 Va tacha kalakapuchʼapakal ni julchan val. Vachuʼ ni ay lakatajtan va taʼexlhi xalaqchʼiti yu ixjukʼal ixtaʼajna lakatajtan taʼan lhimalakchaukanta taʼan ixvil ixtapʼasta Dios.
\v 46 Ex chuncha ni Jesús va la pʼays chivinil, va naul:
\p —KimPay, kmaqxtaqniyancha ketsukunti.
\p Ex tejkan chuncha naul va nimancha nil.
\v 47 Ex chuncha yu xaʼukxtin tropas tejkan laqtsʼil tachun yu tapasal, va ay makal ni Dios tejkan naul:
\p —Laqsaval, yu aniy lapanaki, yucha ox ixjunita. Jantu tuʼuchun laqtaqal kalhitsukul.
\p
\v 48 Tachun ni lapanakni yu ancha ixtayanal tejkan talaqtsʼil yu tapasal, va taʼaqtayl jatankilaksakan por ixjamaqanitkʼan, ex taʼanchoqolcha.
\v 49 Pero tachun ni lapanakni yu ixtamispay ni Jesús la maqati ixtayanal, va ixtalakaʼan, vachu kun ni xanatin yu tatʼaminchal Galilea.
\s Maknukal ni Jesús
\r (Mt. 27:57-61; Mr. 15:42-47; Jn. 19:38-42)
\p
\v 50 Vachuʼ ixʼalin qayntaun lapanaki yu ixjunkan José, va machaqaʼ putaulan Arimatea. Yucha va xaʼay lapanaki kun ni israelitas. Va la ox lapanaki ixjunita.
\v 51 Jantu kalhipaʼinil yu tacha ixtalhichiviniy ni Jesús ni ixtʼalhachimoʼonun, vachu jantu kalhipaʼinil tacha tamakal. Yucha ixpakxanʼita kalhachimoʼonul ni Dios.
\v 52 Taval yucha laqkilal ni Pilato, va kiskʼinil ixlakatunaj ni Jesús.
\v 53 Ex xtaqnikal lakatin kaʼal pʼuxnuʼ. Va pachʼil kun lman laqchʼiti. Ex maknul laka putaknun yu ixmakakanta laktalpa, va sastʼikaʼ ixjunita, jantukaʼ ixtamapatsay.
\v 54 Ex chuncha va laycha xajulchan jastaknati ixjunita tejkan jantu ixlaqxtaqnikan lakatin katatapatsal ni lapanakni.
\v 55 Ni xanatin yu tatʼamil ni Jesús xaʼestado Galilea va tatʼaʼal ni José. Va talaqtsʼil ni putaknun yu tacha makakal taʼan maknukal ni Jesús.
\v 56 Ex taʼanchoqol laqa chaqaʼ, va talaʼoxil ni kʼuchʼu yu laqseʼejenʼe yu ixtʼamaknukan ni janinin. Ex tastaknal yu xajulchan jastaknati tacha ixlhinaunkan.
\c 24
\s Lakjunkal ni xanatin va kujchoqol ni Jesús
\r (Mt. 28:1-10; Mr. 16:1-8; Jn. 20:1-10)
\p
\v 1 Ex chuncha ni laktuminku tejkan ixtunkuminta, taʼal laka putaknun, va talhaʼal ni kʼuchʼu yu laqseʼejenʼe yu ixtalaʼoxita. Vachu ixtalatʼaʼanta alati xanatin.
\v 2 Ex chuncha tachaʼal, talaqtsʼil ni chiyux va ixmoqosukantacha. Yucha ni chiyux yu ixpumalakchaukanta laka putaknun.
\v 3 Tatanul laka putaknun. Jantu katatemal ixlakatunaj ni Jesús.
\v 4 Chuncha va vak takʼatsal. Ex ancha tatasul qayntʼuy lapanakni, va laktʼatayakal ni xanatin.
\v 5 Ex ayaj tatalhanal, va tataʼaqtsoqoqtal, tamaqayntal ixʼaqtsulkʼan laka tʼun. Va lakjunkal:
\p —¿Valiʼiycha lakxkʼauyatʼik yu kujta taʼan tataknuy yu janinin?
\v 6 Jantucha aniy katamal, va kujchoqotacha. Kʼapʼastʼaktʼik yu tajunin tejkan ixtiʼukxuyal Galilea.
\v 7 Va tajunin yu Sasʼatʼa Lapanaki va kamaqxtaqkanaʼ la ixtamakakʼan yu talaktuʼunun, va kamakxtʼukmukʼakanaʼ laka kurus pero kakujchoqoyaʼ yu laʼatʼutunuʼ julchan.
\p
\v 8 Ex chuncha ni xanatin va tapastakchoqol yu laqlhixaqalal ni Jesús.
\v 9 Ex tataxtuchoqol ni laka putaknun, taʼal, va talajunʼol yu pumakautaun kun yu alati ixtʼaltanan ni Jesús.
\v 10 Ni anchanu xanatin va María yu machaqaʼ Magdala, ali Juana ali María ixnati ni Jacobo, ali vachuʼ yu alati xanatin, va chuncha talajunil yu ixtamalaqachan Jesús.
\v 11 Pero yu ixtamalaqachan Jesús va talhilal ni va lokoj ixchivintikʼan ni xanatin, xlhiyucha jantu katalhakapuʼal.
\v 12 Pero ni Pedro ostaulal, takyauʼal laka putaknun, talaknul, va laqtsʼil ni va ixʼaman mal ni laqchʼiti. Ex chuncha anchoqol laqa chaqaʼ, valiʼiy saq lakpastaknal.
\s Ni Jesús laktʼaʼal qayntʼuy ixtʼaltanan xalakatin Emaus
\r (Mr. 16:12-13)
\p
\v 13 Ex chuncha ni anchanuʼ julchan qayntʼuy ixtʼaltanan Jesús ixtaʼanta taun putaulan yu junkan Emaus, va tacha laqakautaun kilometros ixlhimaqati Jerusalén.
\v 14 Ixtalhilakchiviniy tachun yu tapasal.
\v 15 Taval tejkan chuncha ixtalakchiviniy, ex ni Jesús yucha chil, va laktʼaʼal.
\v 16 Pero lakmakakal para jantu katamispal.
\v 17 Ex ni Jesús va lakjunil:
\p —¿Tisuncha lhilakchʼivinatʼik aniy lakatin? ¿Valiʼiycha maʼanininatʼik?
\p
\v 18 Ex yu junkan Cleofas va naul:
\p —Tachun ni lapanakni yu ixtatʼajuncha laka putaulan Jerusalén takʼatsay yu ancha tapasal, ka vamun uxintʼi jantu kʼatsʼay.
\p
\v 19 Ex ni Jesús laklhisakmil:
\p —¿Tisuncha tapasal?
\p Ex tanaul:
\p —Va yu Jesús yu machaqaʼ Nazaret, yucha va qayntaun lapanaki yu ixlaqputeʼey ixchivinti Dios. La ixtalakaʼukxpuʼ Dios y la ixtalakaʼukxpukʼan tachun ni lapanakni va ixtasuy ixtapʼasta yu ixmakay kun yu ixchiviniy.
\v 20 Pero ni xaʼukxtinin kuras kun kijalhachimoʼonunkʼan tamukʼanil laqtaqal para kamaqnikal. Ex chuncha tamakxtukmukʼal laka kurus.
\v 21 Pero ni kijnankʼan va xakpastakʼau va yucha yu ixkintamalaqtaxtun ni kijnankʼan yu israelitas juntau. Pero chuncha tapasal y chavaycha va paqtʼutucha nita.
\v 22 Pero lati ni xanatin yu kintʼaltanankʼan va kintamaqsvan. Chavay tunkuminta tejkan taʼal laka putaknun,
\v 23 jantu katatemal ixlakatunaj. Ex taminchoqol va kintajunin va talaqtsʼil ixmayulnin Dios yu tanaul ni va kujta ni Jesús.
\v 24 Ex lati yu ketʼalaqaunin va taʼal laka putaknun, va talaqtsʼil vachu va tacha tanaul ni xanatin, jantu katatemal.
\p
\v 25 Ex chuncha ni Jesús lakjunil:
\p —Va la pʼas mijatapastakʼatkʼan, jantu ox lhakʼapʼupʼinatʼik tachun yu tanaul yu ixtalaqputeʼey ixchivinti Dios maqancha.
\v 26 Ka jantu kʼatsʼayatʼik va tachun yu majkʼatsal ni Cristo va chuncha ixmaqskʼiniy katapasal para ex chuncha apalay ay kamakakal.
\p
\v 27 Ex chuncha ni Jesús aqtayl lakmasuniy tachun yu lhichiviniy ni yucha la ixchivinti Dios. Va aqtaynil kun yu istsʼoqta ni Moisés y vachuʼ yu ixtatsʼoqta yu maqancha ixtalaqputeʼey ixchivinti Dios.
\p
\v 28 Ex chuncha tachaʼal ni putaulan taʼan ixtaʼuxaʼan. Ex ni Jesús lal va tacha kaʼuxaʼal taʼan apalay maqati.
\v 29 Pero yuʼuncha laqatapʼasta talhijunil kalaktʼataulal, va tanaul:
\p —Kilatʼataulau, va toqoxalcha, va laycha kaputsʼislhi.
\p Ex chuncha laktʼatanul laqa chaqaʼ para kalaktʼataulal.
\v 30 Ex chuncha tejkan ixlaktʼavil laka mesa, chʼapal ni pan, xtaqnil lhimalaqpuchuncha ni Dios, va laqcheʼel, ex laqmaqxtaqnil.
\v 31 Ex chuncha ni Dios va lakmakal para katamispachoqol ni Jesús. Ex va niman laqmixtayal.
\v 32 Ex talajunil siya yuʼuncha:
\p —Laqsaval, la xaʼachanau tejkan ixkintaxaqalayan lakatin y vachuʼ tejkan ixkintamalanin tacha naunputun ixchivinti Dios yu tsʼoqkanta.
\p
\v 33 Ex chuncha tatayal, va niman taʼanchoqol laka putaulan Jerusalén. Ancha talapaxtoqlhi yu pumakautaun kun yu alati ixtʼaltanan ni Jesús, va ancha ixtataqxtoqta.
\v 34 Ex tachun ni yuʼuncha tanaul, va lakjunkal yu qayntʼuy:
\p —Laqsaval, kujchoqolcha kiJalhachimoʼonukʼan. Vachuʼ tasunil ni Simón.
\p
\v 35 Ex chuncha yu qayntʼuy va talaqputeʼel yu tacha tatapasal lakatin y tacha tapumispachoqol ni Jesús tejkan laqcheʼel ni pan.
\s Ni Jesús laktasunil ixtʼaltanan
\r (Mt. 28:16-20; Mr. 16:14-18; Jn. 20:19-23)
\p
\v 36 Ex tejkan chuncha ixtalaxaqalay va laktasunil ni Jesús va ancha tayal, lakmastakʼal, va naul:
\p —Oxamaktauncha kʼaʼuntʼik.
\p
\v 37 Ex tatalhanal, va laqmaqsvakal. Ixtalhilay va qayntaun janiniʼ yu ixtalaqtsʼin.
\v 38 Ex ni Jesús lakjunil:
\p —¿Valiʼiycha tʼalhanantʼik? ¿Valiʼiycha chun pʼastʼakʼatʼikcha la melhanutikʼan?
\v 39 Kalaqtsʼintʼik kimakaʼ kun kinchʼajaʼ. Va kitʼin kunita. Kilachʼapau para kakʼatsʼatʼik, para kilamispau. Taun jalhitsukunuʼ jantu lhitsukuy vakax nisin jalukuti tacha kilalaqtsʼinau chuncha kunita.
\p
\v 40 Tejkan chuncha lakjunil, va lakmasunil ixmakaʼ kun ixchʼajaʼ.
\v 41 Pero jantukaʼ ixtalhakapuʼan mas ixtalhakapuʼanputun kun achati, va ixtatalhanan. Ex ni Jesús laklhisakmil:
\p —¿Alin vayti?
\p
\v 42 Ex taxtaqnil tsʼuniy makchaunti jatanti kun aqxtaun istsʼalukʼu seraj.
\v 43 Ex chʼapal, va uʼol, ancha la ixtalakaʼukxpukʼan.
\v 44 Ex lakjunil:
\p —Tejkan xaklatʼatiʼukxuntayayau, ixklajunau va maqskʼiniy chuncha kaktapasal tachun yu tsʼoqkanta yu kilhichiviniy kitʼin la ixlhachimoʼon Moisés y la ixchivinti yu maqancha ixtalaqputeʼey ixchivinti Dios kun yu tsʼoqkanta laka salmos.
\p
\v 45 Ex chuncha va lakmalanil para katamalaqasil ni ixchivinti Dios yu tsʼoqkanta.
\v 46 Va lakjunil:
\p —Va chuncha kilhitsʼoqkanta ni kitʼin yu Cristo kunita. Ikmaqskʼiniy kakmaqnikal ex yu laʼatʼutunuʼ julchan kajkujchoqol.
\v 47 Vachu tsʼoqkanta kaputeʼekanaʼ ni kintaqaʼuti ni kalaklhijunkal tachun ni lapanakni para katamapaxal ixjatapastakʼatkʼan para kalaqmalaqmixinikal. Va chuncha kalaqlaqputeʼenikanaʼ aniy laka putaulan Jerusalén tus talakapuchux ni lakamunukpaʼ.
\v 48 Kʼanaunapitik tachun yu tapasal tacha laqtsʼintʼik.
\v 49 Kitʼin klamalaqachaniyaucha yu naul kimPay kataxtaqniyan. Pero uxiknan katʼaulchʼipitik aniy laka putaulan tus tejkan kʼalaʼaʼiyapitik ni tapʼasta yu kamintachal laktʼiyan.
\s Ni Jesús lakmakaul ixtʼaltanan ex alcha laktʼiyan
\r (Mr. 16:19-20)
\p
\v 50 Ex chuncha ni Jesús va laklhaʼal ixtʼaltanan tus alakataun putaulan yu junkan Betania. Ex laqmaqstal ixmakaʼ va lakskʼinil Dios para ox kataval ixjatsukuntikʼan.
\v 51 Ex chuncha tejkan tʼajun skʼiniʼ, lakmakaul ixtʼaltanan, va lhaʼankal laktʼiyan.
\v 52 Ex chuncha yuʼuncha tatoʼoyal, va taʼanchoqolcha laka putaulan Jerusalén, va ayaj taʼachal.
\v 53 Lhilhiy ixtavilanal lakatajtan, ay ixtamakay Dios. Chuncha kavalcha.