\id ACT
\h LOS HECHOS
\mt2 Yu Tamakal yu Jamalaqachal ni Jesús
\c 1
\s Kamalaqachakanaʼ ni Espíritu Santo
\p
\v 1 Ni karta yu pʼunaj kmalaqachanin, Teófilo, ancha
xaktsʼoqnitan tachun yu makal ni Jesús. Vachu ancha
xaktsʼoqnitan tachun yu jamalaninil mas tus tejkan pʼunaj
yu puʼaqtaynil makanaʼ ixlhitapatsa
\v 2 tus tejkan anchoqol laktʼiyan. Ixʼalin lapanakni
yu ixjalaksakta y jalaqmalaqachal tejkan jantukaʼ ixʼan
laktʼiyan, ex kun ixtapʼasta ni Espíritu Santo jalakmasunil
yu maqskʼiniy katamakal.
\p
\v 3 Tejkan nil ni Jesús ex astan aqlhuvaj jalaktasunichoqol.
Tus tʼuy pʼuxaun julchan ixtʼajun jalaktasuniniʼ para
katakʼatsal ni laqsaval ixkujchoqotacha y laqlhixaqalal
tacha lhachimoʼonun ni Dios.
\v 4 Tejkan vananaj ixjalaktʼavil va jalakjunil ni jantu
katataxtul laka putaulan Jerusalén, y va lakjunil:
\p —Pʼunaj kapʼakxanʼelayapitik yu ixnajun laqsaval kataxtaqniyan
kimPay Dios chuncha tacha klajuniu.
\v 5 Ni Juan va xkan ixpumaqchajʼavanan pero va laycha
kalakachil ni julchan tejkan kʼapʼumaqchʼajʼavakʼanapitik
ni Espíritu Santo.
\s Ni Jesús pataxtuchoqolcha laktʼiyan
\p
\v 6 Ex chuncha tejkan tataqxtoqlhi va talhisakmil ni
Jesús va tajunil:
\p —¿Jalhachimoʼonuʼ, chavaycha kalakmapʼaxayeʼecha ni
jalhachimoʼonun la kilakatʼunkʼan para kalhichimoʼochoqoocha
ni kijnankʼan yu israelitas juntau?
\p
\v 7 Ex va lakjunil ni Jesús:
\p —Ni uxiknankʼan jantu tapaxtoqniyan kakʼatsʼatʼik tisuncha
julchan u tisuncha hora chuncha katapasayaʼ. Yu kimPay
Dios yucha paxtoqniy kalhinaul tas vanancha kamakayaʼ
tuʼuchun.
\v 8 Katanuyaʼ ni Espíritu Santo la melhanutikʼan ex
chuncha kalaʼaʼiyapitik ixtapʼasta. Ex kilalhichivinanau
ni kitʼin aniy laka putaulan Jerusalén y vachuʼ tachun
aniy xalakatʼun Judea y vachuʼ tus xalakatʼun Samaria
y mas tus yu apalay laqmaqati lakamunukpaʼ.
\p
\v 9 Tejkan chuncha naunʼol ni Jesús ex talaqtsʼil va
lhaʼankalcha, pataxtulcha laktʼiyan. Tanulcha laka taputsʼi,
y jantucha apalay katasul.
\p
\v 10 Tejkan sniy ixtatʼajun laqtsʼinin taʼan puʼal
laktʼiyan ex tsʼalaj tatasul qayntʼuy lapanakni. Ixtalhilakayanal
yu pʼays laqxutʼutʼu laqchʼiti y laktʼatayal chʼantaun
kun yuʼuncha.
\p
\v 11 Va tanaul:
\p —Uxiknan, lapanakni yu machaqan Galilea untʼatʼik, ¿valiʼiycha
lakʼapʼinatʼikcha laktʼiyan? Ni Jesús yu pataxtulcha
laktʼiyan y tamakajuncha, yucha kaminchoqoyaʼ vachu va
chun tacha xalaqtsʼinatʼik tejkan xaʼan.
\s Talakʼulal ni Matías para kamakal ixlhitapatsa yu makaul Judas
\p
\v 12 Ex chuncha yu jamalaqachal ni Jesús tataʼeltajul
laka aspajun yu junkan Xaʼaspajun Olivos. Taʼanchoqol
ni laka ay putaulan Jerusalén. Ancha jantu ixlhimaqati
ixjunita, ukxchuncha tacha yu ixtapaxtoqniy kataltanal
ni israelitas tejkan xajulchan jastaknati ixjun.
\v 13 Ex tachaʼalcha ni laka putaulan va tataukʼalcha
taʼan talaqtʼuy chaqaʼ ixjunita taʼan ixtaloqojya. Yu
taʼal va Pedro ali Jacobo ali Juan ali Andrés ali Felipe
ali Tomás ali Bartolomé ali Mateo ali Jacobo yu istsʼal
Alfeo ali Simón yu ixmapaxaputun ni gobierno ali Judas
ixpʼisaqa Jacobo.
\v 14 Aqlhuu ixtataqxtoqya y vamun ixtaskʼin Dios tachun
ni yuʼuncha kun ixtʼalaqaunin Jesús ali María, yu ixnati,
ali alati xanatin.
\p
\v 15 Tejkan ataun julchan val, ex tataqxtoqlhi ni yuʼuncha
tus tacha ciento veinte lapanakni. Ex tayal ni Pedro
la ixlakaʼukxpukʼan, va lakjunil:
\p
\v 16 —Ketʼalaqaunin, laqsaval ixmaqskʼiniy chuncha kaval
tacha yu maqancha ixnajun ni ay jalhachimoʼonuʼ David
tejkan machivinil ni Espíritu Santo. Ni David lhichivinil
ni Judas yu lakmapʼulnil ni lapanakni yu tachʼapal ni
Jesús.
\v 17 Ni Judas ixmispakan tacha kintʼaltanakʼan y va
ixlaksakkanta para chʼantaun kintatʼatapatsan.
\v 18 Pero yu ixlhilhajati yu lhajal por maqxtaqlhi
ni Jesús va kun yucha lhiʼil aqxtaun tʼun ex ancha nil.
Y patajul tus tatanpusʼea la ixpajan y taxtuʼol ixpalun.
\v 19 Ex tachun yu ixtavilanal Jerusalén takʼatsal y
talhimapaqaʼul ni anchanuʼ lakatʼun Aseldama, yucha naunputun
la ixlhichivinkʼan Xatʼun Jakʼalnan.
\v 20 La xalibro Salmos yu tsʼoqlhi David, ancha lhichiviniy
Judas, inchine najun:
\q Kamakauntijlalcha taʼan ixvil,
\q jantucha kaʼalil matichun yu lay ancha kataulal.
\m Vachuʼ alakataun najun:
\q Aqayntauncha kalhitsukul ixlhitapatsa.
\m
\v 21 Ex taylhaanil ixchivinti ni Pedro, va naul:
\p —Xlhiyucha maqskʼiniy kalaksakvi aqayntaun lapanaki.
Kalaksakʼau qayntaun yu chʼantaun tijuyal kun kijnan
mas tus tejkan ixtʼaʼukxuyanau ni Jesús.
\v 22 Tsʼanqay kaval xaqayntaun yu kintʼaltanakʼan junita
mas tus tejkan ixmaqchajʼavanan ni Juan tus anchoqol
laktʼiyan ni Jesús la kintalakavantikʼan. Chuncha ni
yucha vachuʼ kintatʼalaqputeʼeyan chʼantaun kun kijnan
ni laqsaval kujchoqolcha ni Jesús —naul ni Pedro.
\p
\v 23 Ex talakʼulal pumatʼuy lapanakni. Xaqayntaun va
José Barsabás yu vachuʼ ixjunkan Justo. Yu aqayntaun
ixjunkan Matías.
\v 24 Ex va taskʼinil ni Dios va tanaul:
\p —KiJalhachimoʼonuʼ kʼatʼi. Uxintʼi kilamispaniʼoyau
kelhanutikʼan. Kilamasuniu tas ayucha yu uxintʼi laksakʼa
\v 25 para katapatsal kun uxintʼi y para kaʼal laqputeʼeniʼ
minchivinti. Va yucha kapaxtoqnil ni lhitapatsa yu makaul
Judas por ixtalaqalhin tejkan al taʼan maqskʼiniy.
\p
\v 26 Ex tamakal taun qamanti para katasul taʼayucha
kapaxtoqniyaʼ y va paxtoqnil Matías. Ex ancha tamanulcha
kun yu pumakautaun lapanakni yu jamalaqachal ni Jesús.
\c 2
\s Tanulcha ni Espíritu Santo la ixjalhanutikʼan yu talhakapuʼan Dios
\p
\v 1 Tejkan lakachilcha ixkʼatankʼan ni israelitas yu
junkan xajulchan Pentecostes, ex tachun yu ixtalhakapuʼan
ni Jesús va chʼantaun ixtataʼaqxtoqnun.
\v 2 Taval pʼaysni makatʼaunkal, tus tacha taun pʼays
un ixmakatʼajun. Minchal tus laktʼiyan y taqasmakʼol
ni lapanakni tus tapulakchux ni laqa chaqaʼ taʼan ixtavilanal.
\v 3 Ex niman talaqtsʼil taun tuʼuchun tacha jikmi, y
tataukʼanichal laktsʼuninin por qayntamin la ixʼaqtsulkʼan
yu ancha ixtavilanal.
\v 4 Ex tanul ni Espíritu Santo la ixjalhanutikʼan.
Taʼaqtaylcha tachiviniy alati lhichivin yu jantu aqtaun
ixtachiviniy. Chuncha lakmachivinil ni Espíritu Santo.
\p
\v 5 Chuncha ni laka putaulan Jerusalén ixtachaʼanta
israelitas yu ox ixtataylhaʼan tacha ixputsukukʼan ixjunita,
va ixtaminʼotachal taʼakapuchun ni lakamunukpaʼ por
ixkʼatankʼan yu ixtamakay.
\v 6 Tejkan taqasmaklhi tacha ixtachiviniy yu ixtalhakapuʼan
ni Jesús, ex ni yuʼuncha va tataqxtoqlhi y tus saq tatayal
porke ixtaqasmatʼa ixlhichivinkʼan yu ixtalhichiviniy
yuʼuncha la ixlakatʼunkʼan.
\v 7 Ex chuncha tus taun takʼatsal. Va tus tumpaj talhilal,
va ixtalajuniy siya yuʼuncha:
\p —Tachun ni aniy lapanakni yu tatʼajun chivinin va si
machaqan xalakatʼun Galilea.
\v 8 ¿Ex tas laycha tapuchiviniy kilhichivinkʼan yu
chivinanau?
\v 9 Lati ni kijnankʼan va machaqan Partia juntau, y
lati va machaqan Media, vachu lati va machaqan Elam ali
machaqan Mesopotamia, ali machaqan Judea, ali machaqan
Kapadosia, ali machaqan Ponto, ali machaqan Asia,
\v 10 ali machaqan Frigia, ali machaqan Panfilia, ali
machaqan Egipto, ali machaqan xaputaulanaxna Libia yu
vilchal xlhiʼavintʼi Cirene, ali machaqan Roma. Lati
ni kijnankʼan va israelitas juntau va por chuncha pupaqvi,
y lati mas jantu katapupaqlhi tacha israelitas pero
vachu talhakapuʼan Dios tacha kijnankʼan yu israelitas
juntau.
\v 11 Y vachuʼ alin yu machaqan Kreta ali machaqan Arabia.
Chavaycha tachun ni kijnankʼan qasmatʼau la kilhichivinkʼan
yu lajʼay axtoqnuʼ yu makay Dios —chuncha talajunil ni
lapanakni.
\p
\v 12 Tachun ayaj ixtapastakʼuta, y jantu ixtamispay
yu ixtatʼajun laqtsʼintapasanan. Ixtalalhisakmiy:
\p —¿Chavaycha suncha tapasaycha ni aniy?
\p
\v 13 Pero alati lapanakni ayaj ixtalajʼachan, va tanaul:
\p —Ka va taʼapʼanin.
\s Ni Pedro jalaqxaqalay ixtalhavaxtu ni lapanakni
\p
\v 14 Ex chuncha ni Pedro va laktʼatayal yu pumakautaun
yu jamalaqachal ni Jesús. Va la pʼays chivinil va lakjunil
tachun ni lapanakni:
\p —Kintʼaʼisraelitas y vachuʼ tachun yu chavaycha vilanantʼik
aniy laka putaulan Jerusalén. Ox kilaqasmakniu kinchivinti
yu klajunau.
\v 15 Ni kijnankʼan jantu taʼapʼanin kajkuu yu tacha
uxiknankʼan pʼastʼakʼatʼik. Chavaycha va laqanajatsikaʼ
puvakuj.
\v 16 Yu tʼajun tapasanaʼ va chuncha tacha lhichivinil
Joel yu maqancha ixlaqputeʼey ixchivinti Dios, va naul:
\q
\v 17 Inchine najun ni Dios, tejkan valaycha kamiʼoyaʼ
ni lakamunukpaʼ
\q kaklaqxtaqniyaʼ ni Espíritu Santo tachun ni lapanakni.
\q Yu mintsʼalankʼan ali metsiʼinkʼan katalaqputeʼeyaʼ
kinchivinti.
\q Yu mintsʼalankʼan katalaqtsʼinaʼ la ixtalakavantikʼan
yu katapasayaʼ astan.
\q Vachu yu xapaynin kalaqxaqalakanaʼ la ixʼaqlaqavantikʼan.
\q
\v 18 Vachuʼ ni anchanu julchan kaklaqxtaqniyaʼ ni Espíritu
Santo yu joʼakna ali xanatin yu kiʼoqxtamatin tajunita,
\q ex ni yuʼuncha katalaqputeʼeyacha kinchivinti.
\q
\v 19 Vachuʼ kakmasuyaʼ lajʼay axtoqnuʼ laktʼiyan.
\q Vachuʼ lakatʼun kaʼalinaʼ yu jantu aqtaun katalaqtsʼil
ni lapanakni:
\q Kaʼalinaʼ lhilukuj, lhuu jakʼalnan, lhuu jikmi, ali lhuu
jin tus tacha taputsʼi kunaʼ.
\q
\v 20 Yu julchan jantucha kamapulkuyaʼ, putsʼista kunaʼ.
\q Yu malkuyuʼ tacha jakʼalnan katasuyaʼ.
\q Ex astan kachinaʼ ixjulchan ni ay Jalhachimoʼonuʼ Dios,
\q tejkan kaʼalinaʼ lajʼay axtoqnuʼ yu kalaqtsʼinʼokanaʼ.
\q
\v 21 Ex tachun yu katatapayniniyaʼ ni Jalhachimoʼonuʼ
Dios, yuʼuncha katalaqtaxtuyaʼ.
\p
\v 22 Ex ni Pedro va taylhaʼal ixchivinti, va naul:
\p —Kintʼaʼisraelitas, ox kilaqasmakniu yu klajunau: Ni
Dios tamasunin ni Jesús yu machaqaʼ Nazaret. Xtaqnil
ixtapʼasta para lay kamakal la milakaʼukxpukʼan yu lajʼay
axtoqnuʼ yu jantu matichun lay makay. Chuncha makal
ni Dios para kakʼatsʼatʼik ni laqsaval va yucha malaqachal.
Uxiknankʼan ox malaʼasiyatʼik ni laqsaval chuncha val.
\v 23 Chuncha tacha maqancha ni Dios ixnajun kunaʼ tus
chun val. Va maqxtʼaqnitʼik ni Jesús la ixtamakakʼan
ni laktuʼunun lapanakni para kamakxtukmukʼakal y kamaqnikal
laka kurus.
\v 24 Pero astan ni Dios majkujuchoqol la ixtapʼasta
tejkan nil. Va malaqtaxtul la ixjamaqanlqajnati y yu
lhinin jantu lay kamaqalhajal.
\v 25 Yu maqancha tsʼoqlhi ni David yucha lhichiviniy
Jesús va inchine najun:
\q Kitʼin si xaklaqtsʼin ni ay Jalhachimoʼonuʼ Dios yu
ixkintʼatiʼukxuyal para jantu aqtaun kaktalhanal,
\q
\v 26 xlhiyucha la ijkʼachan tachun la kelhanuti y la
kinkil ay ikmakay ni Dios.
\q Vachuʼ mas kanil kilakatunaj pero oxamaktaun kakpakxanʼiyaʼ
ni kajkujchoqoyaʼ astan.
\q
\v 27 Porke uxintʼi, Dios kʼatʼi, jantu kʼimakʼauneʼe taʼan
alin janinin.
\q Jantu naʼun kapuchʼil kilakatunaj ni kitʼin yu kʼilaksaktʼa.
\q
\v 28 Uxintʼi kʼimasunin ni tin yu xtaʼa jatsukunti.
\q Laqsaval kajkʼachanaʼ tejkan kaktʼataultachaʼan.
\m Va chuncha tsʼoqlhi ni David tejkan ixlhichiviniy
ni Jesús.
\p
\v 29 Ketʼalaqaunin, kijnan ox kʼatsayau ni maqancha
nil y maknukal ni kimpaykʼan David. Mas tus chavaycha
lay laqtsʼinau taʼan aknuy.
\v 30 Ni David ixlaqputeʼey ixchivinti Dios. Dios junil
ni laqsaval ni xaqayntaun ixpapanti yu kaminaʼ maqan
yucha va ay jalhachimoʼonuʼ Cristo kunaʼ.
\v 31 Ni David ixtʼaunkan makʼatsanika ni kakujchoqoyaʼ
ni Cristo. Naul ni Dios ni laqsaval jantu aqtaun kamakaunaʼ
taʼan alin janinin, y vachuʼ jantu kapuchʼiyaʼ ixlakatunaj.
\v 32 Y yucha va Jesús yu Dios majkujuchoqol y vachu
va yuʼ yu klaqtsʼiu yu kujchoqol tachun ni kijnankʼan.
\v 33 Ex ni Dios ayaj ay makal tejkan mulal la ixlhijakanaj
taʼan vilchal ni yucha. Ex ni Jesús laqaʼil ni Espíritu
Santo chuncha tacha junil ni Dios. Vachuʼ kintamalaqachanin
ni kijnankʼan. Tachun yu laqtsʼinatʼik y yu asmatʼatʼik
va si la ixtapʼasta ni Espíritu Santo val.
\v 34 Ni David yucha jantu kaʼal laktʼiyan kun ixlakatunaj
mas inchine naul:
\q Ni Jalhachimoʼonuʼ Dios junil ni kiJalhachimoʼonuʼ
Cristo:
\q “Kintʼatʼaultʼachiy la kilhijakanaj”
\q
\v 35 tus tejkan kakmaqalhajaʼoyaʼ tachun yu taxkayyan.
\p
\v 36 ’Xlhiyucha klajunau kakʼatsʼatʼik tachun uxiknankʼan
yu kintʼaʼisraelitas untʼatʼik. Ni Jesús yu maqnitʼik
laka kurus va yucha yu Dios makal ay Jalhachimoʼonuʼ
y va yucha ni Cristo yu Dios laksaklhi —naul ni Pedro.
\p
\v 37 Tejkan chuncha taqasmaklhi ni lapanakni ayaj tamaqaninil
la ixjalhanutikʼan. Ex jalhisakmikal ni Pedro kun yu
alati yu jamalaqachal ni Jesús:
\p —Ketʼalaqaunin, ¿tisuncha tsʼanqay kakmakau chavaycha?
\p
\v 38 Ex ni Pedro lakjunil:
\p —Kʼamapʼaxatʼik mijatapastakʼatkʼan, kʼapʼuʼaqchʼajʼautʼikcha
la ixtaqaʼuti ni Jesucristo para kʼamalaqmixinikʼantʼik
mintalaqalhinkʼan. Ex chuncha kʼalaʼaʼiyapitik ni Espíritu
Santo.
\v 39 Maqancha ni Dios naul ni laqsaval kataxtaqniyan
ni Espíritu Santo ni uxiknankʼan kun mesʼatʼankʼan y
vachuʼ kalaqxtaqniyaʼ tachun ni lapanakni yu kalaksakʼaʼ
ni Dios kiJalhachimoʼonukʼan mas va toʼoxtaycha kaval.
\p
\v 40 Chuncha jalaqxaqalal ni Pedro y jalaqxtaqnil alati
jatapastakʼati. Va naul:
\p —Kʼalaqtʼaxtʼutʼikcha para jantu kalaktʼapʼintʼik ni
lapanakni yu jantu ox ixjatsukuntikʼan.
\p
\v 41 Ex chuncha tachun ni lapanakni yu talhakapuʼal
ixchivinti va taʼaqchajʼaul. Y ni anchanu julchan va
tus laʼatʼutu mil lapanakni talhakapuʼal ni Jesús.
\v 42 Ni yuʼuncha va si ixtamakay kuenta yu ixtamasuy
yu jamalaqachal ni Jesús. Va si chʼantaun ixtajunita,
y si chʼantaun ixtalaqcheʼey ni pan yu ixtaʼuy, y si
ixtaskʼin Dios.
\s Tas junitacha ixputsukukʼan yu ixtalhakapuʼan ni Jesús
\p
\v 43 Ex chuncha tachun yu alati lapanakni va si ixtatalhananta
porke yu jamalaqachal ni Jesús ixtamakay lajʼay axtoqnuʼ
yu jantu aqtaun ixlaqtsʼinkan, yu ixmasuy ixtapʼasta
Dios.
\v 44 Tachun yu ixtalhakapuʼan ni Jesús va chʼantaun
ixtajunita y tachun yu ixtamaqalin va chʼantaun ixtamakata.
\p
\v 45 Ixtastʼay ixtʼunkʼan kun yu ixtamaqalin, ixtalalvaqniy
siya yuʼuncha ni tumin tacha yu ixtamaqskʼiniy qayntamin
por qayntamin.
\v 46 Taun taun julchan ixtataqxtoʼa laka ay lakatajtan
y la ixchaqakʼan ixtalatʼaʼuy ni pan y ixtalatʼavajin
kun achati y ox chʼantaun ixtajunita la ixjalhanutikʼan.
\v 47 Ay ixtamakay ni Dios y tachun yu alati lapanakni
yu jantu ixtalhakapuʼan ni Jesús va lajqalʼoxin ixtalhilay.
Ni Dios lhilhiy ixlalhavay ni lapanakni yu istsʼanqay
katalaqtaxtul.
\c 3
\s Qayntaun chʼanlkʼavil lapanaki palay junchoqol
\p
\v 1 Tauncha julchan ni Pedro ali Juan ixtaʼanta yu
ay lakatajtan Jerusalén. Va laʼatʼutu putoqoxata ixjunita,
yucha va xahora tejkan ixtaskʼin Dios.
\v 2 Ancha lhilhiy ixtaulay qayntaun lapanaki yu chʼanlkʼavil
ixjunita yu aqtsʼiyaj chuncha tsukul. Va ancha ixʼankan
ulaka ni ay lakatajtan la xamatiʼ yu ixjunkan Kʼus.
Ancha ixjapuskʼiniy tumin yu ixtatanuyachal lakatajtan.
\v 3 Ex ni anchanu chʼanlkʼavil lapanaki tejkan jalaqtsʼil
ni va laycha katatanuchal lakatajtan ni Pedro ali Juan,
ex aqtayl jalakskʼiniy tumin.
\v 4 Ex ni Pedro ali Juan va aqtayl sniy talaqtsʼin.
Ex ni Pedro junil:
\p —Kilalaqtsʼiu ni kijnankʼan.
\p
\v 5 Ex ni anchanu lapanaki ox jalaqtsʼil, ixjapakxanʼiniy
kataxtaqnil tumin.
\p
\v 6 Pero ni Pedro va junil:
\p —Ni tumin jantu kaklhitsukul. Pero kakxtaqniyan yu
klhitʼajun. La ixtapʼasta ni Jesucristo yu machaqaʼ
Nazaret, katʼaycha y kʼaltʼancha.
\p
\v 7 Ex ni Pedro maqchʼapal la ixmajkanaj, maqayaul ni
lapanaki. Va niman palay junchoqol ixchʼajaʼ kun la
ixpixtu ixchʼajaʼ.
\v 8 Ex jakʼiuklnil, va ostayalcha, aqtaylcha jaltanan.
Ex laktʼatanul lakatajtan ni Pedro ali Juan. Ancha aqtayl
tapuchoqotsukuy, y vachuʼ ixjakʼiuklnin, y ay ixmakay
ni Dios kun achati.
\v 9 Chuncha tachun ni lapanakni talaqtsʼil ni ixjaltanan
y ixlhikilʼan ni Dios.
\v 10 Ixtamispay ni yucha va yu lapanaki yu ixtaulay
la xamatiʼ lakatajtan yu junkan Kʼus, y ancha ixpuskʼin
tumin. Xlhiyucha tachun ni lapanakni yu talaqtsʼil tus
taun talhilal y tus vak takʼatsal.
\s Ni Pedro jalaqxaqalay ni lapanakni laka ay lakatajtan
\p
\v 11 Ni chʼanlkʼavil lapanaki yu palay junchoqol jantu
ixjalakmakaunputun ni Pedro ali Juan. Tachun ni lapanakni
va niman talaqmil ni yuʼuncha taʼan ixtayanal la ixlhimaqspaʼ
ni lakatajtan taʼan xapuchʼanan Salomón ixjunkan. Va
tus vak takʼatsal.
\p
\v 12 Tejkan chuncha laqtsʼil ni Pedro, va lakjunil ni
lapanakni:
\p —Kintʼaʼisraelitas, ¿valiʼiycha tus tumpaj lhilayatʼik
yu aniy? ¿Valiʼiycha sniy kilalaqtsʼinaucha? Ka va lhilayatʼik
por kintapʼastkʼan palay kpumakau ni lapanaki u kavalay
pʼastʼakʼatʼik va por ayaj ox lapanakni kuntau. Pero
jantu laqsaval kaval. Yu palay makal va Dios.
\v 13 Vachu va yuʼ ixDioskʼan kimpaykʼan Abraham ali
Isaac ali Jacob ali yu alati kepayankʼan. Vachu va yuʼ
yu la ay makal ni Jesús yu istsʼal. Va yucha yu maqxtʼaqnitʼik
ni lhachimoʼonun tejkan Pilato ixxʼoqputun pero uxiknankʼan
jantu katalhipaʼinin.
\v 14 Ni uxiknankʼan jantu katalhipaʼinin kaxʼoqkal
ni anchanuʼ ox lapanaki yu jantu kalhitsukul tuʼuchun
talaqalhin, pero uxiknan apalay talhipaʼinin kataxʼoqnin
qayntaun jamaqniniʼ.
\v 15 Ni Jesús yu xtaʼa jatsukunti va yucha yu maqnitʼik
pero Dios majkujuchoqol la ixlhinin y kijnankʼan klaqtsʼiu
ni laqsaval kujchoqotacha.
\v 16 Va por ixtaqaʼuti ni Jesús palay junchoqol ni
aniy lapanaki yu chavay laqtsʼinatʼik y mispʼayatʼik.
Yucha palay junchoqol porke klhakapuʼau ni Jesús lay
kaʼaqtayjul.
\p
\v 17 Ketʼalaqaunin, kitʼin kʼatsay ni uxiknan jantu
kʼamalaʼasitʼik yu makʼatʼik tejkan maqnitʼik ni Jesús.
Vachuʼ milhachimoʼonunkʼan jantu katamalaqasil.
\v 18 Maqancha yu ixtalaqputeʼey ixchivinti Dios tanaul
ni Cristo yu kamalaqachakanaʼ ayaj kamaqanlqajnanaʼ.
Y chavay laqsaval chuncha tapasal tacha yu ixnajunta
Dios.
\v 19 Xlhiyucha klajunau ni kʼamapʼaxatʼikcha mijatapastakʼatkʼan.
Kʼalhakʼapʼupʼintʼik ni Dios ex yucha kataxakaniyan
mintalaqalhinkʼan. Ex chuncha katamaʼeltajuniyan yu
kʼamaqskʼiniyapitik la metsukuntikʼan.
\v 20 Ex katamalaqachanichoqoyan ni Jesucristo yu maqancha
laksakkal para katamin malaqtaxtunun.
\v 21 Pero chavaycha maqskʼiniy kataulchal laktʼiyan
tus tejkan Dios kalasastʼiʼoyaʼ tachun yu alin. Chuncha
tacha tanaul yu maqancha ixtalaqputeʼey ixchivinti Dios
yu laqsaval ixlapanakni ixtajunita.
\v 22 Ni Moisés inchine lakjunil kepayankʼan yu maqancha
ixtatʼajun, va naul: “Ni Dios yu miJalhachimoʼonukʼan
kalaksakʼaʼ xaqayntaun mintʼaʼisraelitaskʼan yu katalaqputeʼeniyan
ixchivinti chuncha tacha kitʼin. Yucha ox kaʼalasmakniʼoyapitik
tachun yu katajunan.
\v 23 Tachun ni lapanakni yu jantu kataqalasmakputunaʼ
ni yuʼuncha kalaqnaqxtʼukkanaʼ para jantucha chʼantaun
katatʼaval kun ixlapanakni Dios,” chuncha naul ni Moisés.
\v 24 Vachuʼ ni Samuel ali tachun yu alati yu ixtalaqputeʼey
ixchivinti Dios maqancha tus chavaycha va si ixtalhichiviniy
yu chavaycha tapasay.
\p
\v 25 ’Ni xalaqputeʼenin ixchivinti Dios chuncha tanaul
maqancha para laqsaval chuncha kaval ixchivintikʼan
kun uxiknan. Vachuʼ ni Dios va taun jatapastakʼati jatʼatamakaul
ni kepayankʼan tejkan junil inchine ni Abraham: “Tus
tachun yu oqxlaqtamin lapanakni yu alin lakamunukpaʼ,
si katalhitsukuyaʼ ox jatsukunti por qayntaun mimpapanti
yu kaʼalinaʼ maqan.”
\v 26 Ni Dios tejkan majkujuchoqol isTsʼal va uxiknankʼan
yu pʼunaj tamalaqachanin para kataxtaqnin yu ox jatsukunti
y vachuʼ para kʼamakʼauntʼijlatʼik mintalaqalhinkʼan.
\c 4
\s Ni Pedro ali Juan jalakchʼapakal
\p
\v 1 Chuncha vananaj ixtataylhaʼanta jalaqxaqalanan
ni lapanakni tejkan tachil ni xakuras israelitas ali
ixʼukxtinkʼan policias yu ixtatapatsay lakatajtan ali
ni saduceos.
\v 2 Ayaj ixtalhilukujlhay yu ixlakmalanikan ni lapanakni
y vachuʼ por ixjalakjunkan ni Jesús kujchoqotacha y
chuncha takʼatsalcha ni laqsaval katakujchoqoyaʼ yu
janinin.
\v 3 Ex chuncha tachʼapal ni Pedro ali Juan. Nimancha
tamanul laka pachʼin porke toqoxatacha ixjunita y tapakxanil
tus katunkuʼelal.
\v 4 Pero qaynlhuvaj talhakapuʼal yu taqasmaknil ixchivintikʼan
ni Pedro ali Juan. Ex chuncha por tachun yu ixtalhakapuʼan
ni Jesús laqchaʼal tus laqakis mil joʼakna.
\s Ni Pedro ali Juan tatʼachiviniy ni jalhachimoʼonun laka pulakchivin
\p
\v 5 Tejkan tunkunchoqolcha ex tataqxtoqlhi ni lhachimoʼonun
ali ni xalajʼay xapaynin ali yu ixtamasuy ixlhachimoʼonkʼan
ni israelitas laka putaulan Jerusalén.
\v 6 Vachuʼ kun yu ixʼukxtinkʼan kuras yu ixjunkan Anás
y vachuʼ Caifás ali Juan ali Alejandro ali yu alati
ixjatʼalaqaunin ni Anás.
\v 7 Ex ancha jalakʼulakal la ixlakaʼukxpukʼan, va jalaklhisakmikal
ni Pedro ali Juan:
\p —¿Taʼayucha taxtaqnin tapʼasta y taʼayucha taxtaqnin
lakatin para kamakʼatʼik yu makʼayatʼik uxiknankʼan?
\p
\v 8 Ex ni Espíritu Santo laqtanuʼol ni Pedro, ex ni
yucha jalakjunil:
\p —Uxiknan yu jalhachimoʼonun untʼatʼik, y yu xalajʼay
xapaynin untʼatʼik:
\v 9 chavaycha kilalhisakmiyau valiʼiycha kmakau yu
la ox y tas palaycha kpumakachoqoo qayntaun taqanʼan.
\v 10 Chavaycha knaunau kakʼatsʼatʼik ni uxiknankʼan
y vachuʼ katakʼatsal tachun ni israelitas, ni lapanaki
yu aniy yal yu palaycha junchoqota va chuncha val por
ixtapʼasta Jesucristo yu machaqaʼ Nazaret yu uxiknan
maqnitʼik laka kurus pero ni Dios majkujuchoqol.
\v 11 Uxiknankʼan untʼatʼik va tacha lapanakni yu tamaqayajuy
chaqaʼ. Ni Jesús va tacha taun chiyux yu uxiknankʼan
ixmajʼantʼatʼikcha pero astan val tacha taun chiyux
yu xamatau chaqaʼ, yu apalay pʼays maqskʼinikan.
\v 12 Jantu alin ataun jamalaqtaxtunuʼ porke ni Dios
jantu kintajunin ixtaqaʼuti aqayntaun para kintamalaqtaxtun,
vamun ni Jesús —va naul ni Pedro.
\s Ni Pedro ali Juan laqatapʼasta jalaktanchanikal para jantucha katalaqputeʼel ixchivinti ni Jesús
\p
\v 13 Ex yu xalajʼay xapaynin tus vak takʼatsal porke
ni Pedro ali Juan jantu katatalhanal, mas yuʼuncha va
tsʼuniy jatalaniti ixtalhitʼajun y mas valiʼiy lapanakni
ixtajunita. Va chuncha taxtaqnil kuenta ni Pedro ali
Juan va ixtatʼatijuntayay ni Jesús.
\v 14 Tejkan talaqtsʼil ni ancha ixlaktʼayal ni lapanaki
yu palaycha ixjunchoqota ex jantu tuʼuchun laqtaqal
lay kamukʼanikal.
\v 15 Ex chuncha jalakjunkal katataxtul taun panchʼix
laka pulakchivin y xʼamankʼan talakchivinil ni lhachimoʼonun.
\v 16 Tanaul:
\p —¿Tas kalakmakayaucha ni aniy lapanakni? Laqsaval tamasul
taun ay tuʼuchun yu jantu aqtaun laqtsʼinkan. Jantu
lay junau ni lapanakni incha jantu laqsaval yu tamakal
porke tus takʼatsaʼol taʼakchun yu tavilanal laka putaulan
Jerusalén.
\v 17 Pero para jantucha apalay kaputaukʼal yu tacha
tamakal, tsʼanqay kalaklhijuniu laqatapʼasta ni jantucha
apalay katalhichivinil la ixtaqaʼuti ni Jesús.
\p
\v 18 Ex chuncha tajunchoqol para katatanuchoqolcha
ixpulakna ni Pedro ali Juan, y laqatapʼasta talaktanchanil
para jantucha katalaqputeʼel ixchivinti ni Jesús y jantucha
apalay katamasul axtoqnuʼ kun ixtaqaʼuti.
\p
\v 19 Pero taqaltayanal ni Pedro ali Juan, tanaul:
\p —¿Tisuncha lhilayatʼik yu apalay ox kakmakau? ¿Yu kilalhijunau
uxiknankʼan u yu kintalhijunan Dios? ¿Tisuncha yu apalay
kalhipaʼinil Dios? Ancha kalakpʼastʼaknantʼik.
\v 20 Ni kijnankʼan jantu lay kmakauntijlayau ixlaqputeʼeka
yu klaqtsʼiu y yu ijqasmakvi.
\p
\v 21 Ex ni lhachimoʼonun laka lhilukuj taxaqalal y
jantucha katamanul laka pachʼin. Jantu lay katamukʼanil
laqtaqal porke tachun ni lapanakni va si ay ixtamakay
Dios kun achati por yu tamakal ni Pedro ali Juan.
\v 22 Ni anu lapanaki yu palay junchoqol la ixtapʼasta
Dios, ni yucha ixlhiʼoqslaycha cuarenta ixjachʼitin.
\s Yu talhakapuʼan taskʼin Dios para jantu katatalhanal
\p
\v 23 Taval tejkan lakmakaunchoqokalcha ni Pedro ali
Juan ex talaqʼanchoqolcha alati yu ixtalhakapuʼan Jesús.
Ex talaqputeʼeniʼochoqol tachun tacha tanaul ni xaʼukxtinin
kuras kun ni lhachimoʼonun.
\v 24 Tejkan chuncha taqasmaklhi ex chʼantaun taʼaqtayl
tatʼachiviniy ni Dios. Tanaul:
\p —Uxintʼi Dios yu ay Jalhachimoʼonuʼ kʼatʼi, uxintʼi
makʼatʼi laktʼiyan, ali lakatʼun, ali xkan ali tachun
axtoqnuʼ yu alinta.
\v 25 Maqancha ni uxintʼi makʼatʼi para kachivinil miʼoqxtamati
David kun ixtapʼasta miʼEspíritu Santo, va naul:
\q ¿Valiʼiycha la talukujlaycha ni lapanakni yu jantu
talhakapuʼan?
\q ¿Valiʼiycha tapastakʼacha katamakal yu jantu tuʼuchun
ixtapal kaval?
\q
\v 26 Ni jalhachimoʼonun yu alin aniy lakamunukpaʼ va
lakataun tavilanal kun
\q yu xalajʼay lapanakni y chʼantaun tataqxtoʼa
\q para kataxkayl ni Dios kiJalhachimoʼonukʼan y vachuʼ
para kataxkayl yu malaqachal.
\p
\v 27 ’Laqsaval aniy Jerusalén tataqxtoqlhi Herodes
kun Pilato kun alati yu jantu israelitas kataval kun
yu kintʼaʼisraelitas tajunita para kataxkayl ni minTsʼal
Jesús yu laksaktʼi.
\v 28 Chuncha tamakal tacha yu maqancha uxintʼi lhichʼivin
la mintapʼasta katapasayaʼ.
\v 29 Chavaycha, Jalhachimoʼonuʼ kʼatʼi, kamakʼatʼi kuenta
yu ixkintaxaqalayan kun lhilukuj yu jantu kintaʼuyujjunan
kaklhichiviniu mintaqaʼuti. Kilaxtaqniu tapʼasta para
lay kaklaqputeʼeu minchivinti y jantu kun talhanti.
\v 30 Vachuʼ kilaxtaqniu ixtapʼasta minTsʼal Jesús para
lay palay kakmakau taqanʼanin y para lay kakmakau yu
lajʼay axtoqnuʼ para katapukʼatsal ni lapanakni ni laqsaval
milapanakni kuntau.
\p
\v 31 Chuncha tejkan tatʼachivinʼol ni Dios ex aqtayl
xkapʼiknin ni chaqaʼ. Ex talaqtanuʼol ni Espíritu Santo
la ixjatapastakʼatikʼan y taʼaqtaylcha talaqputeʼey
ixchivinti Dios y jantu kun talhanti.
\s Tachun yu ixtalhakapuʼan ni Jesús va chʼantaun ixtamakay ixʼaxtoqnukʼan
\p
\v 32 Ex chuncha tachun yu ixtalhakapuʼanta ni Jesús
va chʼantaun ixjunita ixjatapastakʼatikʼan. Jantu matichun
ixnajun va xʼaman ixnavin yu ixmaqalin. Tachun yu ixtalhitʼajun
va chʼantaun ixtamakay y va si ixnavinkʼan ixjunita.
\v 33 Ex yu jamalaqachal ni Jesús va kun tapʼasta tataylhaʼal
laqputeʼenin ni ixkujchoqotacha ni Jalhachimoʼonuʼ Jesús.
Ayaj ixtalapaxkay la ixjatsukuntikʼan
\v 34 porke jantu kaʼalil matichun yu kaval kilpataniʼ.
Yu ixlhitʼajun ixtʼun u ixchaqaʼ va istʼay y ixlhiminʼojoy
yu xatapal.
\v 35 Ixtamaqxtaqniy yu jamalaqachal ni Jesús para katalaqlvaqnil
yu alati lapanakni chuncha tacha ixtamaqskʼiniy.
\v 36 Ixʼalin qayntaun lapanaki yu machaqaʼ Chipre va
Levita ixjunita. Yucha ixjunkan José pero yu jamalaqachal
ni Jesús va talhimapaqaʼuchoqol va Bernabé, yucha naunputun
la ixlhichivinkʼan va xaqayntaun yu malakaʼulanan.
\v 37 Ni anchanu lapanaki stʼal aqxtaun ixtʼun, lhimil
xatapal, va laqmaqxtaqniʼol yu jamalaqachal ni Jesús.
\c 5
\s Ni Ananías ali Safira tanil por ixtamakanuputun ni Espíritu Santo
\p
\v 1 Vachuʼ qayntaun lapanaki yu ixjunkan Ananías kun
ixanati Safira tastʼal aqxtaun ixtʼunkʼan.
\v 2 Ni anchanu lapanaki jantu kaxtaqʼol xatumin, pero
tejkan lhaʼanil yu jamalaqachal ni Jesús ex makakal
tacha kaxtaqniʼol tachun xatapal. Yu ixanati ox ixkʼatsay
tacha makal ni yucha.
\v 3 Ex ni Pedro junil ni Ananías:
\p —¿Valiʼiycha xtʼaqnincha lakatin ni Satanás katanul
la mijatapastakʼati? Uxintʼi ixmakʼanupʼutʼun ni Espíritu
Santo porke chʼapamatʼi lati xatapal mintʼun.
\v 4 Tejkan jantukaʼ istʼay ni mintʼun va minavin ixjunita.
Mas tejkan stʼatʼicha vananaj minavin ixjunita xatumin.
¿Ex valiʼiycha pʼastʼaktʼi chuncha kamakʼatʼi? Uxintʼi
jantu ixjamakʼanupʼutʼun yu valiʼiy lapanakni, va Dios
yu ixmakʼanupʼutʼun.
\p
\v 5 Tejkan chuncha qasmaklhi ni Ananías ex nimancha
tʼuluj taqtalcha, va nilcha. Tachun ni lapanakni yu takʼatsal
va ayaj tatalhanal.
\v 6 Ex ancha ixtayanal lati yu tsʼalankaʼ, va tapachʼinil
ixlakatunaj ni Ananías y taʼalcha maknunun.
\p
\v 7 Chuncha tejkan laʼatʼutu hora val ex vachuʼ tanuchal
ancha ixanati ni Ananías y jantu ixkʼatsay yu tapasal.
\v 8 Ex ni Pedro lhisakmil:
\p —Kiʼun incha laqsaval va chuncha xtapal lhistʼatʼik
ni mintʼunkʼan.
\p Ex yu xanati va naul:
\p —Chun, va chuncha xtapal.
\p
\v 9 Ex ni Pedro junil:
\p —¿Valiʼiycha chʼantauncha untʼik para kalaqtsʼintʼanutʼik
IxʼEspíritu Santo ni Jalhachimoʼonuʼ Dios? Laka matiʼicha
taminchoqota yu takimaknul mixapay. Chavaycha uxintʼi
vachuʼ kataʼanan maknunun.
\v 10 Ex chuncha ni xanati va nimancha tʼuluj taqtal
taʼan ixchʼatay ni Pedro, ex nilcha. Tejkan tatanuchoqolcha
ni tsʼalan la ixpulakna ni laqa chaqaʼ, tatemal ni xanati
taʼan ixnimal. Ex vachuʼ tamaxtulcha y talhaʼalcha maknunun
taʼan ixʼaknuy ixapay.
\v 11 Ex chuncha tachun yu ixtalhakapuʼan ni Jesús kun
tachun alati yu taqasmaklhi va ayaj tatalhanal.
\s Yu jamalaqachal ni Jesús tamakal lajʼay axtoqnuʼ kun ixtapʼasta ni Dios
\p
\v 12 Yu jamalaqachal ni Jesús ixtamakay lajʼay axtoqnuʼ
y chuncha ox ixtasuy ixtapʼasta ni Dios. Si ixtataqxtoʼa
ixlhimaqspaʼ ni ay lakatajtan taʼan ixjunkan ixjapuchʼanan
Salomón.
\v 13 Pero yu alati lapanakni jantu ixtatapujuy katataqxtoqlhi
chʼantaun kun yuʼuncha mas ox ixtatoʼoyay por ixlhakapuʼatikʼan.
\v 14 Ex chuncha lhilhiy ixtalhavay ni lapanakni yu
ixtalhakapuʼan ni Jalhachimoʼonuʼ Jesús, mas joʼakna
kun xanatin.
\v 15 Tus ixtamaxtuy ni taqanʼanin lakatinixnan ixtamamay
laka putaman para katatapasanil mas va ixmaqtsʼansilaqa
ni Pedro tejkan katapasal lakatin para palaycha katajunchoqolcha.
\v 16 Vachuʼ ixtaminachal lhuu lapanakni yu machaqan
alati putaulanaxna ixlhiʼukstsʼuniy Jerusalén. Ixtalhimin
taqanʼanin kun lapanakni yu ixtachʼapata jantu ox espíritus.
Tus tachun palay ixtajunchoqoy.
\s Ni Pedro ali Juan aaqtaun jachʼapachoqokal
\p
\v 17 Ex chuncha ayaj akchaʼal ni xaʼukxtin kura kun
tachun ixtʼaltanan yu saduceos ixtajunita.
\v 18 Talhinaul kalakchʼapakal yu jamalaqachal ni Jesús,
ex nimancha lakmanukal laka pachʼin.
\v 19 Pero tejkan tsʼis ixjunita, ex qayntaun ixmayul
Dios kimalaqltiʼachil la xamatiʼ ni pachʼin, ex jalakmaxtul
y jalakjunil:
\p
\v 20 —Kʼapʼinchʼoʼotʼikcha taʼan ay lakatajtan. Kalaqpʼutʼeʼeniʼotʼik
ni lapanakni tachun ni chivinti yu lhichiviniy ni sastʼi
jatsukunti.
\p
\v 21 Ex chuncha tejkan ixtunkumintacha tatanuchoqolcha
lakatajtan, taʼaqtayl tamasuy yu ox chivinti tacha jalakjunkal.
\p Ni ixʼukxtinkʼan kuras kun ixtʼaltanan talhinaul katamakal
taun ay taqxtoʼati y va tamaqxtoqlhi kun tachun ixlhachimoʼonunkʼan
ni israelitas. Talhinaul ixjaʼikakʼan yu jamalaqachal
ni Jesús yu ixtatanumanal laka pachʼin.
\v 22 Pero tejkan tachaʼal ni policias laka pachʼin
jantucha katatemal. Ex taʼanchoqol juninin ixʼukxtinkʼan,
\v 23 va tanaul:
\p —Tejkan kchaʼau laka pachʼin ox ixlakchajuy la xamatiʼ.
Y yu jalhistaknan ancha ixtayananʼol la xakiltalakxtuti.
Pero tejkan kmalaqltiʼau, jantu matichun ixtanun ixpulakna.
\p
\v 24 Tejkan chuncha takʼatsal ni ixʼukxtinkʼan kuras
kun yu ixʼukxtinkʼan xapolicias lakatajtan kun yu xalajʼay
kuras va tus taun talhilal y va aqtayl talakpastaknan
tisuncha tapasalcha.
\p
\v 25 Ex chil aqayntaun lapanaki yu naul:
\p —Ni lapanakni yu ixjalakmanutʼatʼik laka pachʼin, yuʼuncha
tayananchal lakatajtan, tatʼajun lakmasuninin lapanakni.
\p
\v 26 Ex ni ixʼukxtinkʼan xapolicias lakatajtan jalaklhaʼal
ixpolicias y talhiminchoqol yu jamalaqachal ni Jesús.
Jantu laqatapʼasta katalhimil porke ixtatalhauniy yu
alati lapanakni, va lay kalaklakatʼalmakal.
\p
\v 27 Tejkan laklhiminkal, laqmaqayaukal la ixlakaʼukxpukʼan
ixʼukxtinkʼan ni kuras. Va tajunil:
\p
\v 28 —Kijnan laqatapʼasta klalhichimoʼoo para jantucha
kʼalhixaʼalatʼik ni lapanakni la ixtaqaʼuti ni anu lapanaki.
Pero chavaycha jamalaniʼotʼatʼikcha tachun xalapanakni
aniy Jerusalén y vachuʼ kilamukʼaniputunau laqtaqal
ixmaqnika anu lapanaki.
\p
\v 29 Chuncha ni Pedro kun alati yu jamalaqachal ni
Jesús taqaltayanal y tanaul:
\p —Kijnan apalay maqskʼiniy kakmakau yu lhinajun Dios
y jantu yu talhinajun lapanakni.
\v 30 Ni ixDioskʼan yu maqaniyaʼ kepayankʼan yucha majkujuchoqol
ni Jesús yu uxiknankʼan maqnitʼik tejkan makxtʼukmukʼatʼik
laka kurus.
\v 31 Pero ni Dios kun ixtapʼasta la ay makal y mulal
la ixlhijakanaj para kalhachimoʼonul y kamalaqtaxtul
lapanakni y chuncha katamapaxal ixjatapastakʼatkʼan
ni kintʼaʼisraelitaskʼan y kalaqmalaqmixinikal ixtalaqalhinkʼan.
\v 32 Ni kijnankʼan ox klhitaulau ni laqsaval chuncha
tapasal. Y yu Espíritu Santo vachuʼ ox lhitaulay ni
va chuncha val. Yucha va yu laqxtaqnil Dios tachun ni
lapanakni yu tamakay tacha lhinajun.
\s Ni Gamaliel jalakchivijvay para kalaklhistakkal ixtʼalhachimoʼonun
\p
\v 33 Ex ni lhachimoʼonun tejkan chuncha taqasmaklhi
va ayaj talukujlal tus ixtamaqniputun yu jamalaqachal
ni Jesús.
\v 34 Pero ancha chʼantaun kun yu alati jalhachimoʼonun
ixyal qayntaun fariseo yu ixjunkan Gamaliel. Yucha ixjamalaninin
ixlhachimoʼonkʼan ni israelitas y tachun ni lapanakni
si ixtatoʼoyay. Yucha lhinaul kalakmaxtukal maqspaʼ
yu jamalaqachal ni Jesús.
\v 35 Ex lakjunil ni ixtʼalhachimoʼonun:
\p —Kintʼaʼisraelitas, chuncha tacha lakmakʼanipʼutʼunatʼik
ni aniy lapanakni, kitʼin klajunau kʼalhistʼajkʼantʼikcha
kun yuʼuncha.
\v 36 Kapʼastʼaktʼik ni jantukaʼ maqan ostaulal qayntaun
lapanaki yu ixjunkan Teudas. Yucha ixjunputun ay jalhachimoʼonuʼ
y yu ixlapanakni va tacha laʼatʼati ciento ixtajunita.
Pero taval maqnikal y tachun yu ixtʼaltanan valiʼiy
tʼikl taputaukʼaʼol. Ex ancha tamaktalcha, jantucha tuʼuchun
katataylhaʼal.
\v 37 Astan vachuʼ ixʼalin qayntaun yu ixjunkan Judas
yu machaqaʼ Galilea. Yucha ostaulal tejkan ixtʼaunkan
laqtsʼoqolaka ni lapanakni. Ex yucha lakmakanul lhuu
lapanakni para chʼantaun katatʼaval. Pero yucha vachuʼ
maqnikal y tachun yu ixtʼaltanan valiʼiy tʼikl taputaukʼaʼol.
\v 38 Xlhiyucha klajunau kʼalakmakʼauntʼikcha ni aniy
lapanakni. Yu tamakay ni yuʼuncha jantu katataylhaaniyaʼ
incha valiʼiy lapanaki yu lhinajun.
\v 39 Pero incha va Dios lhinajun yu tamakay ni yuʼuncha,
ex uxiknankʼan jantu lay kʼalaktʼanchʼaniyapitik porke
ex laqsaval va kun Dios kʼalachʼapʼayapitik —naul ni
Gamaliel.
\p
\v 40 Ex chuncha yu ixtʼalhachimoʼonun talhipaʼinil
tacha naul. Ex tamalaqachanal ixjalakʼika yu malaqachal
ni Jesús y talhinaul ixjalaqmaqanaqka. Jalaktanchanikal
ni jantucha katalhichivinil ni Jesús. Chuncha astan
jalaqxtaqnil lakatin para kataʼanchoqolcha.
\v 41 Pero ni yuʼuncha tejkan jalakmakaunkalcha kataʼanchoqol
va apalay talhiʼachantajul mas ixtalamaqanlqajnan porke
ni Dios jalaksaklhi para kalhilaktuʼukal por ixtalhakapuʼan
ixtaqaʼuti ni Jesús.
\v 42 Ex taun taun julchan ixtalaqputeʼey taʼan ay lakatajtan
y vachuʼ laqa chaqan. Jantu ixtastaknan ixmasuka ni
Jesús va Cristo yu ixnajun kamalaqachayaʼ Dios.
\c 6
\s Jalaksakkan pumatujun yu kataʼaqtayjul ixlapanakni Dios
\p
\v 1 Chuncha ni anchanu julchan ixtatalhavay ni lapanakni
yu ixtalhakapuʼan ni Jesús. Ex lati yu ixtachiviniy
griego taʼaqtaylcha tachivintanuniy yu ixtachiviniy
hebreo por ni xanatin yu tiyaunin. Ixtanajun jantu qayntsay
yu lhilhiy ixjalaqlvaqnikan ixlhiʼutikʼan yu ixtʼamachivinkʼan
griego y yu hebreos chun.
\v 2 Ex yu pumakautʼuy yu jamalaqachal ni Jesús tamaqxtoqʼol
tachun yu ixtalhakapuʼan, va tajunil:
\p —Kijnan jantu maqskʼiniy kakmakajuu ixlaqputeʼeka ixchivinti
Dios para kaklatsukuu laqlvaqninin milhiʼutikʼan.
\v 3 Xlhiyucha klajunau, ketʼalaqaunin, kalaksaktʼik pumatujun
lapanakni siya uxiknan yu ox jalaktoʼoyakan y yu talaqtanuʼojota
ni Espíritu Santo la ixjatsukuntikʼan y vachuʼ yu lhuu
jatapastakʼati talhitʼajun. Va yuʼuncha katataylhaʼal
makanan ni aniy lhitapatsa.
\v 4 Pero ni kijnankʼan kaktaylhaʼanau skʼinin ni Dios
y vachuʼ kaktaylhaʼanau laqputeʼenin ixchivinti —chuncha
tanaul yu jamalaqachal ni Jesús.
\p
\v 5 Ex ni lapanakni tachun talhipaʼinil yu tanaul.
Ex talaksaklhi Esteban yu ox ixlhakapuʼan, yu ixlaqtanuʼojota
ni Espíritu Santo. Vachuʼ talaksaklhi Felipe, ali Prókoro,
ali Nikanor, ali Timón, ali Parmenas y vachuʼ Nicolás
yu machaqaʼ Antiokía. Yucha jantu israelita ixjunita
pero tejkan jantukaʼ ixlhakapuʼan Jesús, ixlhakapuʼanta
Dios vachu chun tacha yu israelitas.
\v 6 Ex ni yu jalaksakkal jalaklhaʼankal taʼan ixtayanal
yu jamalaqachal ni Jesús. Yuʼuncha taskʼinil Dios y
tamoqslanil ixmakakʼan.
\p
\v 7 Ex chuncha apalay maqati ixputaukʼay ixchivinti
Dios y apalay qaynlhuu ixtalhakapuʼan ni Jesús xalakaputaulan
Jerusalén. Vachuʼ qaynlhuvaj xakuras ni israelitas talhakapuʼal.
\s Tachʼapal ni Esteban
\p
\v 8 Ni Dios ox ixʼaqtayjuy ni Esteban y ixtaqniy lhuu
ixtapʼasta. Va yucha ixpumakay lajʼay axtoqnuʼ yu lay
katapalakpastaknal ni lapanakni y vachuʼ ixmasuy yu
jantu aqtaun ixlaqtsʼinkan.
\v 9 Ancha ixʼalin lapanakni yu taminchal taʼan ixtataqxtoʼa
israelitas yu ixlakjunkan Oqxtamatin yu Tamakauntijlal
Ixʼukxtinkʼan. Vachuʼ ixʼalin lati yu machaqan Cirene
ixtajunita y lati yu machaqan Alejandría, ali lati yu
machaqan xalakatʼun Cilicia vachuʼ kun yu machaqan xalakatʼun
Asia. Ixtachunkʼan va si talhilakchivinil ixlhakapuʼati
ni Esteban.
\v 10 Pero yuʼuncha jantu aqtaun lay katamaqalhajal
ni Esteban por ixjatapastakʼati yu ixtaqnil ni Espíritu
Santo.
\v 11 Ex chuncha lakmapalkal lapanakni para katamanul
jalaklkanti. Xlhiyucha tanaul:
\p —Kijnan ijqalasmakvi ni Esteban kiltaxtul laqxtoqnu
chivinti, va lhichivinil Moisés kun Dios.
\p
\v 12 Ex chuncha talapumalukuklal tachun ni lapanakni
kun yu xalakʼay lapanakni israelitas kun yu ixtamalaninin
ixlhachimoʼonkʼan. Va talaqʼal ni Esteban y tachʼapal,
talhaʼal taʼan ixtamakay junta yu xalajʼaynin.
\v 13 Vachuʼ talakxkaul lati lapanakni para katamanul
jalaklkanti, ex vachuʼ tanaul:
\p —Yu aniy lapanaki jantu aqtaun ox lhichiviniy yu ay
kilakatajtankʼan kun kilhachimoʼonkʼan.
\v 14 Kijnan klajqasmakniu ni yucha najun ni Jesús yu
machaqaʼ Nazaret kamaqtayaʼ yu ay kilakatajtankʼan.
Vachuʼ najun ni Jesús kamapaxayaʼ kilhachimoʼonkʼan
yu la maqancha kintamakaunin Moisés.
\p
\v 15 Ex tachun yu ancha ixtavilanal tus sniy ixtalaqapulaqtsʼin
la ixʼukxpuʼ ni Esteban, va ixtasuy tacha ixʼukxpuʼ qayntaun
ixmayul Dios.
\c 7
\s Ni Esteban lajqaltayl yu tatislajmay
\p
\v 1 Ni yu xaʼukxtin kura lhisakmil ni Esteban, va junil:
\p —¿Laqsaval yu tanajun?
\p
\v 2 Ex va naul ni Esteban:
\p —Ketʼalaqaunin ali kepayan yu xapaynincha untʼatʼik,
ox kilaqasmakniu kinchivinti. Maqancha ni ay Dios tasunil
ni kimpaykʼan Abraham. Tasunil tejkan vananaj ixvilchal
xalakatʼun Mesopotamia tejkan jantukaʼ ixʼan laka putaulan
Harán.
\v 3 Ni Dios junil ni Abraham: “Katʼaxtʼucha la mintʼun,
kʼalakmakʼaucha lati milapanakni yu mintʼamachaqan.
Kapiticha lakatʼun taʼan kakmasuniyan.”
\v 4 Ex ni Abraham taxtuchalcha la ixlakatʼunkʼan ni
Kaldeos, va alcha tus laka putaulan Harán. Ex ancha nichal
ixpay. Ex chuncha ni Dios malaqachal ni Abraham tus
taʼan chavaycha vilanantʼik uxiknankʼan aniy lakatʼun.
\v 5 Ni Dios jantu kamaqxtaqnil ni aniy lakatʼun para
kaval ixnavin, mas va tsʼuniy mas va taʼan lay katachʼatal
la ixchʼajaʼ. Pero ni Dios tʼatamakaul chʼantaun ni
Abraham ni kaxtaqniyaʼ ni lakatʼun astan tejkan katatsukuyaʼ
ixpapanakna, mas jantukaʼ ixʼalin xaqayntaun sasʼatʼa.
\v 6 Vachuʼ ni Dios junil ni Abraham: “Ni mepapanakna
yu katatsukuyaʼ maqan, kataʼanaʼ jatsukunun alakataun
lakatʼun, katajunaʼ tacha jachinin. Ancha kalakmakakanaʼ
oqxtamatin y ox kalaqlhimaqchapukanaʼ tus katapasayaʼ
laʼatʼati ciento jachʼitin.”
\v 7 Vachuʼ naul ni Dios: “Pero kitʼin kaklakmukʼaniyaʼ
ixmaqanlqajnatikʼan yu ixʼukxtinkʼan yu kalaklhichimoʼoyaʼ,
y katamajkʼatsayaʼ. Ex ancha katataxtuchoqoyacha mepapanakna
y kataminacha aniy lakatʼun y kintatoʼoyayaʼ.”
\v 8 Ni Dios va taun jatapastakʼati tʼatamakaul ni Abraham,
va junil: “Kaxvililichʼukʼupʼuxnikʼaneʼe mextaʼa y
chuncha kun tachun mintsʼalan.” Ex xlhiyucha tejkan
tsukul istsʼal ni Abraham yu ixjunkan Isaac, vachuʼ xvililichukʼupʼuxnil
xaxtaʼa tejkan laqchaʼal laqatsajin julchan. Vachuʼ
Isaac vachu chun makanil istsʼal yu ixjunkan Jacob y
yu Jacob vachu chun makanil yu pumakautʼuy istsʼalan.
Yuʼuncha yu kepayankʼan yu maqancha ixtatʼajun.
\p
\v 9 ’Ex ni yuʼuncha taʼakchaʼanil ixpʼisaqakʼan yu
José ixjunkan. Xlhiyucha tachʼapal y tastʼal para kalhaʼankal
alakataun tʼun yu ixjunkan Egipto. Pero ni Dios ixlhistakʼa
ni José
\v 10 y maxtul taʼan ixmaqanlqajnan. Va aqtayjul, va
xtaqnil lhuu jatapastakʼati y chuncha makal para kalhipaʼinil
ni Faraón yu ay jalhachimoʼonuʼ Egipto. Ni Dios vachuʼ
makal para kaval lhachimoʼonuʼ ancha xalakatʼun Egipto
ni José y chuncha makal xaʼukxtin tachun yu ixtatapatsay
la ixchaqaʼ Faraón.
\v 11 Ex ancha Egipto alil ay chavan kun lhuu maqanlqajnati
y vachuʼ xalakatʼun Canaán. Yu kepayankʼan jantu ixtatemay
ixvaytikʼan.
\v 12 Pero tejkan kʼatsal ni Jacob vananaj ixʼalin lhiʼuti
ancha Egipto ex pʼunaj laqmalaqachaʼelal istsʼalan y
yuʼuncha takiʼil.
\v 13 Ex aqtaun taʼanchoqol inin lhiʼuti. Ex ni José
jalakjunil ni va ixtʼalaqajunkʼan ixjunita ni yuʼuncha.
Ex chuncha ni Faraón lakmispal ixlapanakni ni José.
\v 14 Ex ni José jalaqmalaqachal ixtʼalaqaunin kataʼal
juntaʼinin ixpaykʼan kun tachun ixlapanaknikʼan. Ex
chuncha yuʼuncha va setenta y cinco lapanakni ixtajunita.
\v 15 Ex chuncha ni Jacob alcha jatsukunuʼ xalakatʼun
Egipto. Ancha nichal y vachuʼ taniʼochal ni kepayankʼan.
\v 16 Taval laklhaʼanʼochoqokal ixjalukutkʼan laka putaulan
Sikem. Ancha tataknul taʼan puqapaj talpa taʼan il Abraham,
va yu tastʼanil istsʼalan Hamor yu machaqan Sikem.
\p
\v 17 ’Chuncha tejkan maqancha val, yu ixpapanakna ni
Abraham va ayaj ixtatalhavatacha ancha xalakatʼun Egipto
y valaycha ixlaqchaʼal ni julchan tejkan ni Dios istsʼanqay
kamakal tacha junil ni Abraham.
\v 18 Ex aqtaylcha lhachimoʼonun aqayntaun yu jantu
ixmispay ni José.
\v 19 Ni anchanu lhachimoʼonuʼ jalakmakanul kilapanaknikʼan
y vachuʼ jalaqlhimaqchapul. Laqatapʼasta laklhijunil
para kataʼal tanqalhunun sasʼatʼankʼan ni israelitas
yu talhitsukuykaʼ para katanilcha.
\v 20 Chuncha tejkan chuncha ixjunita, exnicha tsukul
ni Moisés y yu Dios lhiʼachantajul por tsukul ni Moisés.
Laʼatʼutu malkuyuʼ tamaʼayal la ixchaqaʼ ixpay kun ixnati.
\v 21 Ex taval tejkan tamakaulcha ni anchanu tsʼal, ex
istsiʼi ni Faraón va temal, va maʼayal tacha istsʼal
kaval.
\v 22 Ex chuncha tamalanil tachun ixjatalanitkʼan ni
lapanakni yu ancha machaqan Egipto. La laqapʼasni val
y lhuu jatalaniti lhitsukul.
\p
\v 23 ’Tejkan lhitsukulcha cuarenta ixjachʼitin ex ni
Moisés pastaklhi kalaqlaqʼal ixtʼaʼisraelitas.
\v 24 Ex va chuncha al y va laqtsʼil qayntaun machaqaʼ
Egipto ixtʼajun lhimaqchapunuʼ qayntaun ixtʼaʼisraelita
ni Moisés. Ex niman aqanixtul, va maqnil yu machaqaʼ
Egipto.
\v 25 Ni Moisés ixlhilay ixtakʼatsaycha ni ixtʼaʼisraelitas
ni va Dios ixmalaqachata para kalaqmalaqtaxtul pero
yuʼuncha jantu ixtakʼatsay.
\v 26 Ex yu ataun julchan val ni Moisés aaqtaun jalaqpaxtoqchoqol
pumatʼuy ixtʼaʼisraelitas. Ni yuʼuncha ixtatʼajun lasanin.
Chuncha ni Moisés va ixjalaqlvaqputun, va naul: “Ketʼalaqaunin,
uxiknankʼan va tʼalaqaunin untʼatʼik. ¿Valiʼiycha lalhimaqchʼapʼuyatʼikcha?”
\v 27 Ex yu ixtʼajun lhimaqchapunuʼ ixlaqaj va niman
samajʼal ni Moisés, va naul: “¿Taʼayucha lakʼulatan
uxintʼi para kilalhichimoʼoo?”
\v 28 Vachuʼ lhisakmikal: “¿Vachuʼ kʼimaqnipʼutʼun
chuncha tacha yu kutancha maqnitʼi qayntaun lapanaki
yu machaqaʼ Egipto?”
\v 29 Ex tejkan chuncha qasmaklhi ni Moisés, va limancha
makaul y jaqosnulcha, alcha alakataun putaulan yu junkan
Madián. Ancha tsukuchalcha taʼan jantu machaqaʼ kaval
y vachuʼ lhitsukuchal pumatʼuy istsʼalan.
\p
\v 30 ’Tejkan laqchaʼalcha cuarenta jachʼitin, tasunikal
lakakʼavinan taʼan ixlhiʼukstsʼuniy yu ay aspajun yu
junkan Sinaí, ancha tasunil qayntaun ixmayul Dios laka
jikmi yu ixmaqtajita va qaltaun yu ay javan.
\v 31 Ex chuncha ni Moisés tus vak kʼatsal por yu laqtsʼil.
Tejkan ixtalakanuputun para apalay ox kalaqtsʼil ex
va qasmaklhi ixchivinti ni Jalhachimoʼonuʼ Dios.
\v 32 Yucha va naul: “Kitʼin va yu ixDioskʼan kunita
ni Abraham ali Isaac ali Jacob.” Ex ni Moisés tus aqtayl
jaxkapʼiknin ixtalhanti, ex jantucha apalay ixlaqtsʼinputun.
\v 33 Ex naul ni Jalhachimoʼonuʼ Dios: “Kintʼoʼoyatʼi
ni kitʼin, kachʼantʼaxtʼucha ni mivarachi. Aniy lakatʼun
taʼan chʼintʼatʼa ancha kʼalinta ni kitʼin.
\v 34 Kitʼin klaqtsʼinta ixmaqanlqajnatikʼan kilapanakni
yu tavilanal Egipto y vachuʼ klajqasmakniy ixqalhutikʼan.
Va yucha klhilaqmintan para kajkamalaqtaxtul. Ex chavay,
katʼatʼicha. Kitʼin kakmalaqachayan para kapiti Egipto.”
\p
\v 35 ’Ni anchanu Moisés vachu va yuʼ yu jantu ixtaʼachaniy
ni ixtʼaʼisraelitas por tajunil yu najun inchine: “¿Tasʼayucha
lakʼulatan para kilalhichimoʼoo?” Yucha va Dios ixmalaqachata
para kalhachimoʼonul y kamalaqtaxtul ixlapanakni, por
ixmayul Dios yu tasunil laka ay javan va yucha lhijunil.
\v 36 Ni Moisés va yucha yu jamaqaxtul ni kepayankʼan
taʼan xalakatʼun Egipto. Va si ixmakay lajʼay axtoqnuʼ
kun ixtapʼasta Dios, mas va ancha Egipto y vachuʼ lakamar
yu ixlhitapaqaʼuy Xlapul y vachuʼ ali lakakʼavinan taʼan
ixtatiʼukxuntayay tus cuarenta jachʼitin.
\v 37 Ni anchanuʼ Moisés va yucha yu lakjunil ni ixtʼaʼisraelitas,
yu naul inchine: “Ni Dios katamalaqachaniyan aqayntaun
lapanaki yu kalaqputeʼeyaʼ ixchivinti. Kamalaqachayaʼ
qayntaun mintʼaʼisraelitakʼan vachu chun tacha kimalaqachal
ni kitʼin.”
\v 38 Moisés va yucha yu chʼantaun ixjatʼatijuyal ixlapanakni
Dios lakakʼavinan y va yucha yu tʼachivinil ixmayul
ni Dios laka aspajun yu junkan Sinaí. Ex astan jalaqputeʼenichoqol
kepayankʼan ixchivinti Dios yu xtaʼa jatsukunti. Ex
yuʼuncha vachuʼ kintamapasanin kijnankʼan anchanu chivinti.
\p
\v 39 ’Pero yu kepayankʼan yu maqancha ixtatʼajun jantu
ixtaqalasmakputun ni Moisés, va ixtakiltsʼakʼastukʼa,
va ayaj ixtaʼuxaʼanchoqoy xalakatʼun Egipto.
\v 40 Tejkan ixjukʼachal ni Moisés laka aspajun ex tajunil
ni Aarón: “Kilamakaniu kidioskʼan para yucha kintamapʼulnin
lakatin. Jantu lhikʼatsan tisuncha xatapasay ni anchanu
Moisés yu kintamaxtuchaʼan xalakatʼun Egipto.”
\v 41 Ex chuncha tamakal laqataun ixdioskʼan, va ixtasuy
tacha laqataun sasʼatʼa vakax. Ex tamaqnil lhuu talhitsukukna
para katamoqslanil ixdioskʼan y tamakʼatanil por tamakal
yuʼuncha la ixmakakʼan.
\v 42 Xlhiyucha ni Dios jalajqosmajʼalcha y jalakmakauntijlalcha
para katatoʼoyal ni jastʼakun kun julchan kun malkuyuʼ.
Chuncha tsʼoqkanta la ixjalhikikʼan yu maqancha ixtalaqputeʼey
ixchivinti Dios. Ancha tsʼoqʼulakanta yu naul ni Dios:
\q Uxiknan yu israelitas untʼatʼik, tejkan ixʼukxuyanantʼik
cuarenta jachʼitin lakakʼavinan,
\q jantu kilamaqniniu mintalhitsukutkʼan y jantu kilamoqslaniu
laka altar.
\q
\v 43 Va chʼixlhipʼintʼik kun chux xachaqaʼ midioskʼan
yu junkan Molok.
\q Vachuʼ lhipʼintʼik ni xajastʼaku yu ixtasuy tacha midioskʼan
yu junkan Refán.
\q Va uxiknan lakmakʼatʼik para katʼoʼoyatʼik.
\q Va por yucha kaklamaxtuyau la mintʼunkʼan.
\q Kaklalhaʼanau taʼan apalay maqati, tus xlhiʼavintʼi
xalakatʼun Babilonia.
\p
\v 44 ’Tejkan vananaj ixtatiʼukxuyanal ni kepayankʼan
maqancha lakakʼavinan, ixtalhitʼajun ixlakatajtankʼan
yu ixtalhipaqay laqchʼiti. Ancha ixlakmaʼakan ni chiyux
taʼan tsʼoqmukʼakanta ixlhachimoʼon Dios. Ni anu lakatajtan
ixmakakanta tacha ixlhijunkanta Moisés, vachu chun tacha
masunil ni Dios.
\v 45 Ex astan jamapasanikal kepayankʼan ni anu lakatajtan
yu ixtalhipaqay laqchʼiti. Yuʼuncha chʼantaun kun Josué
yu ixlhachimoʼonukʼan va talhimil anchanu lakatajtan
tejkan talhajal ni aniy tʼun taʼan Dios jalaqnaqxtul
yu jantu israelitas ixtajunita. Ex chuncha va si ixtalamapasalhaaniy
ni anu lakatajtan tus tejkan aqtayl lhachimoʼonun ni
David.
\v 46 Ni David ox ixtiʼukxuyal chʼantaun kun Dios. Pero
tejkan skʼinil Dios para kamakanil taun ay lakatajtan
ixtʼaʼisraelitas ex ni Dios jantu kaʼuyujunil.
\v 47 Pero yu istsʼal David yu ixjunkan Salomón va yucha
makal ni ay lakatajtan.
\v 48 Pero ni Dios yu vilchal laktʼiyan yucha jantu
taulay taʼan maqayaukan laka makaʼ. Chuncha tacha tanaul
ni lapanakni yu maqancha ixtalaqputeʼey ixchivinti Dios
yu tanaul:
\q
\v 49 Yu laktʼiyan ancha la kimpalhachimoʼon taʼan kvil
ni kitʼin,
\q yu lakamunukpaʼ ancha vamun kinchʼajaʼ kmastakniy.
\q ¿Tas laycha kilamakaniu chaqaʼ para lay ancha kakstaknal?
\q
\v 50 Tachun yu alin va kitʼin kmakaʼol, naul ni Dios
\p —va chuncha puteʼeʼol ni Esteban.
\p
\v 51 Ex chuncha ni Esteban taylhaʼal jalaqxaqalanaʼ
ni lajʼay lapanakni:
\p —Klajunau ni uxiknankʼan va la pʼays makʼayatʼik melhanutkʼan.
Jantu lhakʼapʼupʼinatʼik Dios y jantu asmakpʼutʼunatʼik
ixchivinti. Untʼatʼik tacha yu talaktuʼunun lapanakni.
Jantu aqtaun alasmakpʼutʼunatʼik ni Espíritu Santo.
Vachu chun untʼatʼik tacha ixtajunita mepayankʼan.
\p
\v 52 ’Yuʼuncha talaqlhimaqchapul tachun ni lapanakni
yu maqancha ixtalaqputeʼey ixchivinti Dios. Vachuʼ tamaqnil
ni lapanakni yu ixtanajun kaminaʼ aqayntaun yu lhitʼajun
ox vas jatsukunti. Chavaycha por melaktuʼuntikʼan maqxtʼaqtʼik
y maqnitʼik ni anchanuʼ lapanaki.
\v 53 Mas uxiknankʼan xtʼaqnikʼantʼik ixlhachimoʼon
Dios yu tamaqxtaqnin ixmayulnin pero jantu makʼayatʼik
tacha lhinajun —naul ni Esteban.
\s Talakatʼalmaqnil ni Esteban
\p
\v 54 Tejkan chuncha taqasmaklhi yu ancha ixtavilanal
va ayaj tatalqamal, tus taʼaqtayl talaktsakʼay ixtatsalatikʼan.
\v 55 Pero ni Esteban yucha tus ixlaqtanuʼojota ni Espíritu
Santo, y tus sniy talaqstʼal laktʼiyan. Va laqtsʼil ixʼoxixtu
ni Dios y vachuʼ laqtsʼil ni Jesús yu ixyal la ixlhijakanaj
Dios taʼan alin ixtapʼasta.
\v 56 Ex va naul ni Esteban:
\p —¡Kʼalaqtsʼintʼik ni uxiknankʼan! Ni kitʼin chavaycha
klaqtsʼinta ni laktʼiyan laqltiʼay y ancha yachal ni
Sasʼatʼa Lapanaki taʼan la ixlhijakanaj Dios.
\p
\v 57 Ex tachun ni lajʼay lapanakni si pʼays talaktʼasal
y laqʼaqatuchʼapakal la ixʼaqaxqolkʼan y tachun tatakyaulaqʼal
para katachʼapachal ni Esteban.
\v 58 Talaqxaqaxtul ni laka putaulan, va tamajʼal ixkujukʼan
ex talakatʼalmal kun chiyux. Yu ixlhistakmata ixkujukʼan
va qayntaun lapanaki yu va tsʼalkaʼ yu ixjunkan Saulo.
\v 59 Ex chuncha tejkan ixtatʼajun lakatʼalmanan ex
ni Esteban aqtayl skʼin Dios, va naul:
\p —KiJalhachimoʼonuʼ Jesús, kalaʼaʼitʼicha ketsukunti.
\p
\v 60 Ex taqtsoqoqtalcha, va pʼays tʼasal, va naul:
\p —KiJalhachimoʼonuʼ, jantu kʼalakmukʼanin laqtaqal por
yu kintamakanil.
\p Ex tejkan chuncha naunʼol va limancha nil.
\c 8
\s Ni Saulo laqlhimaqchapuy yu ixtalhakapuʼan ni Jesús
\p
\v 1 Ni Saulo ayaj ox lhilal por tamaqnil ni Esteban.
\p Ex ni anchanu julchan aqtaynil pʼays laqmamaqanlqajnivakan
tachun yu ixtalhakapuʼan ni Jesús yu ancha ixtavilanal
Jerusalén. Tus taqosʼol y taʼanʼolcha taulnin taʼakapuchun
xalakatʼun ni Judea ali Samaria. Tatamakaul vamun yu
jamalaqachal ni Jesús.
\v 2 Lati lapanakni yu ox ixtalhakapuʼan va tamaknul
ni Esteban, va pʼays talhiqalhul.
\v 3 Pero ni Saulo aqtayl laqlhimaqchapuy yu ixtalhakapuʼan
ni Jesús. Ixtanuy jachaqan por jachaqan, ixjalaqxaqaxtuy
joʼakna kun xanatin para kalakmanul laka pachʼin.
\s Xaʼestado Samaria laqputeʼekan yu Ox Chivinti yu laqsaystʼi
\p
\v 4 Ex chuncha ni lapanakni yu taqosnunchal Jerusalén
mas va toʼoxtaycha taʼan ixtapuʼan va si ixtalaqputeʼey
yu lay katapulaqtaxtul ni lapanakni.
\v 5 Qayntaun yu ixjunkan Felipe, yucha al lakataun xaputaulan
Samaria y aqtayl lhichiviniy ni Cristo.
\v 6 Lhuu lapanakni ixtaʼaqxtoqnun y ixtalaqtsʼin yu
lajʼay axtoqnuʼ yu ixmakay ni Felipe. Va ox ixtasuy
ni laqsaval yu ixnajun. Xlhiyucha ox tamakal kuenta
yu ixlaqputeʼey.
\v 7 Qaynlhuu lapanakni palay tajunchoqol yu ixtalhitʼajun
jantu ox espíritus la ixlakatunajkʼan. Si pʼays ixtalaktʼasay
ni jantu ox espíritus tejkan ixtataxtuchoqoy la ixlakatunajkʼan.
Vachuʼ qaynlhuu lapanakni yu ixtalakanita kun alati
yu jantu lay ixtaltanan va si palay tajunchoqol.
\v 8 Xlhiyucha tachun si talhiʼachantajul yu ixtavilanal
ni anchanu laka putaulan.
\s Ni Felipe paxtoqlhi qayntaun jachavanaʼ
\p
\v 9 Ancha ixʼalinta qayntaun jachavanaʼ yu ixjunkan
Simón y tachun ni lapanakni si lakmakanul. Vachuʼ ixkilhuntsukuy
ni yucha ma vamun yuʼ ay lapanaki ixjunita.
\v 10 Tachun ni lapanakni lajʼay kun lakstʼuniy si talhakapuʼanil
yu ixnajun ni yucha. Si ixtanajun:
\p —Yu aniy lapanaki yucha va yu la ay ixtapʼasta Dios
junita.
\p
\v 11 Ox ixtamakaniy kuenta yu ixnajun porke maqancha
ixtʼajun jalakmakanun por ixjachavanti yu ixmakay.
\v 12 Pero tejkan chinchal ni Felipe va jalakjunil tacha
lhachimoʼonun ni Dios y lhichivinil ni Jesús yu ixtanajunta
kamalaqachayaʼ Dios ex talhakapuʼal y taʼaqchajʼaul
joʼakna kun xanatin.
\v 13 Ex chuncha ni Simón vachuʼ lhakapuʼal y aqchajʼaul.
Yucha tus vak kʼatsal tejkan laqtsʼil yu lajʼay axtoqnuʼ
yu ixmakay ni Felipe yu ixmasuy ixtapʼasta ni Dios y
xlhiyucha aqtayl tʼatiʼukxuntayay ni yucha.
\s Ni Pedro ali Juan vachuʼ talaqputeʼey yu ox chivinti laka Samaria
\p
\v 14 Ex ancha Jerusalén yu jamalaqachal ni Jesús va
takʼatsal va ixtalhakapuʼanta ixchivinti Dios lati yu
tavilananchal Samaria. Ex chuncha tamalaqachal ni Pedro
ali Juan para kataʼal ancha Samaria.
\v 15 Tejkan tachaʼal va taskʼinil Dios para katalaqtanuʼol
ni Espíritu Santo ni lapanakni yu ancha ixtavilanal.
\v 16 Ni yuʼuncha ixtaʼaqchajʼajutacha la ixtaqaʼuti
ni Jesús, pero jantukaʼ ixtalaqtanuy ni Espíritu Santo.
\v 17 Ex ni Pedro ali Juan tamoqslanil ixmakakʼan yu
ixtalhakapuʼanta y va chuncha talaqtanuʼol ni Espíritu
Santo.
\p
\v 18 Ni Simón yu jachavanaʼ jalaqtsʼil ni ixtalaqtanuy
ni Espíritu Santo tejkan ixjamoqslanikan ni ixmakakʼan,
ex ixjalaqxtaqniputun tumin.
\v 19 Va lakjunil ni Pedro ali Juan:
\p —Kilaxtaqniu vachuʼ ni aniy tapʼasta para kalaqtanul
ni Espíritu Santo mas va taʼayucha yu kakmoqslanil kimakaʼ.
\p
\v 20 Ex ni Pedro junil:
\p —Ni uxintʼi kapiticha laqnin kun mintumin incha lhakʼapʼupʼin
ni lay lhiʼikan tumin yu xtaʼa ni Dios.
\v 21 Ni uxintʼi jantu paxtoqniyan kalaʼaʼitʼi yu xtaʼa
Dios, la melhanuti va jantu ox katʼiʼuntʼay kun Dios.
\v 22 Chavay kʼamapʼaxacha mijatapastakʼati, kamakʼauntʼijlacha
milaktuʼunti. Kʼatʼapʼayninin Dios, yucha kʼatsay incha
kamalaqmixiniyan yu pʼastʼakʼa la melhanuti.
\v 23 Kitʼin ijkʼatsay ni uxintʼi ayaj akchʼipʼin y
vachuʼ milaktuʼunti ox laqalhumanitan la mijatapastakʼati.
\p
\v 24 Ex chuncha ni Simón jaqaltaychoqol va lakjunil:
\p —Kʼatʼapʼayninitʼik ni jalhachimoʼonuʼ Dios por kitʼin
para jantu chun kaktapasal tacha kilajunau.
\p
\v 25 Ex chuncha ni Pedro ali Juan jalaqputeʼenil ni
lapanakni yu talaqtsʼil yu makal ni Jesús y vachuʼ talaqputeʼenil
ixchivinti Dios. Astan tachʼapachoqolcha ixlakatinkʼan
para kataʼanchoqolcha laka putaulan Jerusalén. Ni lakatin
taʼan ixtapuʼanta si ixtatapasatijlay laka putaulanaxna
xaʼestado Samaria y ancha ixtalaqputeʼey yu lay katapulaqtaxtul
ni lapanakni.
\s Ni Felipe paxtoqlhi qayntaun yu machaqaʼ Etiopía
\p
\v 26 Ex chuncha taval qayntaun ixmayul Dios laqchaʼal
ni Felipe, va junil:
\p —Kaʼostʼaycha, kapiticha taʼan ixlhisur ni Jerusalén.
Kʼachʼapʼa xatin yu puʼankan laka putaulan Gaza yu tapasay
ni lakatʼun taʼan jantu matichun kataulal.
\p
\v 27 Ex chuncha ni Felipe ostayal, va alcha. Ancha lakatin
paxtoqlhi qayntaun lapanaki. Yucha va qayntaun yu ay
lapanaki yu machaqaʼ xalakatʼun Etiopía taʼan ixlhachimoʼonun
qayntaun xanati yu ixjunkan Kandace. Ni anchanu lapanaki
yu paxtoqlhi ni Felipe va yucha yu ixlhistakniʼojota
tachun ixtumin ni Kandace. Yucha kilal laka putaulan
Jerusalén para katoʼoyal ni Dios.
\v 28 Chuncha va ixʼanchoqotacha la ixtʼun. Ex chuncha
taʼan ixpuʼanta la ixkarro yu taxaqalhaʼan jukin ancha
ixtʼajun puteʼeniʼ ni jalhiki yu tsʼoqlhi ni Isaías
yu maqancha ixlaqputeʼey ixchivinti Dios.
\p
\v 29 Ex ni Espíritu Santo junil ni Felipe:
\p —Kapiticha, katʼematʼi ni anu karro.
\p
\v 30 Tejkan talakanunil ni Felipe, qasmaknil ixchivinti
taʼan ixtʼajun puteʼeniʼ ni jalhiki yu tsʼoqlhi Isaías
yu maqancha ixlaqputeʼey ixchivinti Dios. Ex ni Felipe
lhisakmil:
\p —¿Malaʼasiy yu tʼaʼun puteʼeniʼ?
\p
\v 31 Ex ni anu ay lapanaki va naul:
\p —¿Tas kakpumalaqasilcha incha jantu alin matichun yu
lay kimasunil?
\p Ex chuncha lhijunkal ni Felipe kataukʼalcha y katʼataulal.
\p
\v 32 Yu ixtʼajun puteʼeniʼ va inchine istsʼoqkanta:
\q Qayntaun lapanaki lhaʼankal ixmaqnika tacha laqataun
borrego.
\q Va tacha taun sasʼatʼa borrego yu jantu tʼasay tejkan
makasikkan,
\q yucha vachuʼ jantu tsij najun.
\q
\v 33 Ni lapanakni jantu katalhiʼaynlhi, yuʼuncha tamukʼanil
laqtaqal y jantu matichun kaʼaqtayjul.
\q Va niman tamaqnil,
\q xlhiyucha jantucha lay lhichivinkan ixlapanakni.
\p
\v 34 Ex ni ay lapanaki va lhisakmil ni Felipe, va junil:
\p —Kitʼin kskʼiniyan taun jatapayniti ni uxintʼi, kiʼun
tasʼayucha lapanaki lhichiviniy yu tsʼoqlhi ni aniy
jalhiki. ¿Va lhichivinkan xʼaman yu tsʼoqlhi u va lhichiviniy
aqayntaun lapanaki?
\p
\v 35 Ex chuncha ni Felipe aqtaylcha laqputeʼeniy tacha
naunputun ixchivinti Dios yu ixtʼajun puteʼeniʼ y vachuʼ
laqputeʼenil ni ox chivinti yu lhichiviniy Jesucristo.
\p
\v 36 Ex chuncha tejkan ixtaʼanta lakatin va tachaʼal
taun lakxkan. Ex yu ay lapanaki va junil ni Felipe:
\p —Aniy alin xkan. Kitʼin knajun ka ox kaval kajkʼaqchajʼaul.
\p
\v 37 [Ex ni Felipe va junil:
\p —Incha lhakʼapʼupʼin kun tachun la melhanuti ex chun
kalal kʼaʼaqchʼajʼau.
\p Ex ni yucha va qaltayanal, va naul:
\p —Kitʼin klhakapuʼan ni Jesucristo va yucha yu Sasʼatʼa
Dios junita.]
\p
\v 38 Ex chuncha lhinaul kaʼulakal ni karro. Ex tapatajul
ni yucha kun ni Felipe taʼan ixʼalin xkan. Ex ni Felipe
maqchajʼaval ni anu lapanaki yu machaqaʼ Etiopía.
\v 39 Tejkan tatakukchoqolcha lakxkan ex ni ixʼEspíritu
ni Jalhachimoʼonuʼ Dios va taun laqatsʼalaj lhaʼal ni
Felipe. Ex yu ay lapanaki jantucha aqtaun kalaqtsʼinchoqol.
Ex va chʼapachoqolcha ixlakatin kun achati.
\v 40 Astan ni Felipe xtaqnil kuenta va ixyachal taʼan
ixʼalinachal taun putaulan yu ixjunkan Azoto. Tejkan
taxtuchal ni Azoto ex taun taun putaulan yu ixtapasay
va si ixjalaqputeʼeniy ni lapanakni yu ox chivinti yu
lhichiviniy Cristo, tus chaʼal taʼan laka putaulan Cesarea.
\c 9
\s Ni Saulo vachuʼ lhakapuʼal ni Jesús
\r (Hch. 22:6-16; 26:12-18)
\p
\v 1 Exnicha ni anchanu julchan, ni Saulo va ayaj ixnajun
kalaqmaqnil yu ixtalhakapuʼan ni Jalhachimoʼonuʼ Jesús.
Va laqʼal yu ay ixʼukxtinkʼan xakuras ni israelitas.
\v 2 Va skʼinil para kaxtaqnil lhachimoʼon kun aqxtaun
karta yu lay kalakmasunil ni israelitas yu ixtataqxtoʼa
laka ay putaulan Damasco taʼan ixjamasunikan ixlhachimoʼon
ni israelitas. Chuncha para lay kalaklhimil tachʼinin
laka putaulan Jerusalén ni lapanakni yu kalaktemal yu
ixtalhakapuʼan ni Saystʼi Lakatin, mas kaval joʼakna
ali xanatin.
\p
\v 3 Tejkan ixʼanta lakatin taʼan va ukstsʼuniycha laka
putaulan Damasco va tʼoqx maklkunil taun pʼays maklku
laktʼiyan.
\v 4 Ex niman taqtal laka tʼun, va qasmaklhi taun chivinti
yu naul:
\p —Saulo, Saulo, ¿valiʼiycha kʼixkʼaylhitʼaʼuncha?
\p
\v 5 Yu Saulo va naul:
\p —¿Jalhachimoʼonuʼ, tas ayucha kʼatʼicha ni uxintʼi?
\p Ex va junkal:
\p —Ni kitʼin va Jesús kunita. Va kitʼin yu kixkʼaylhitʼaʼun
ni uxintʼi. [Va milaqʼaman tʼaʼunkʼan mamajkʼatsʼanikʼa
tacha laqataun vakax tejkan chʼintay yu putiltoqolhaankan
yu aqtsupipi.
\p
\v 6 Ex ni Saulo va jaxkapʼiknil ixtalhanti, va naul:
\p —Jalhachimoʼonuʼ, ¿tisuncha naʼun kakmakal ni kitʼin?
\p Ex yu Jalhachimoʼonuʼ va naul:]
\p —Kaʼostʼaʼulcha, kapiticha ni laka putaulan Damasco.
Ancha katajunan yu maqskʼiniy kamakʼatʼi.
\p
\v 7 Ex ni lapanakni yu ixtatʼaʼanta ni Saulo va ayaj
tatalhanal, va taqasmaklhi chivinkal pero jantu matichun
katalaqtsʼil.
\v 8 Taval tayachoqolcha ni Saulo pero tejkan malaqltiʼal
ixlaqchul jantu lay kalakavanal. Ex tamaqchʼapal y talhaʼalcha
laka putaulan Damasco.
\s Ni Ananías laqʼal ni Saulo
\p
\v 9 Ancha paqtʼutu ixvilchal, jantu lay ixlakavanan
y vachuʼ jantu kavayl y jantu tuʼuchun kaʼoqlhi.
\p
\v 10 Ancha Damasco ixvil qayntaun yu ixjunkan Ananías
yu ixlhakapuʼan ni Jesús. Yucha tasunil ni Jalhachimoʼonuʼ
Dios y laqtsʼil la ixtalakavanti, va junil:
\p —Ananías.
\p Ex yu Ananías va naul:
\p —Aniy kʼalinta, Jalhachimoʼonuʼ.
\p
\v 11 Ex ni Jalhachimoʼonuʼ aaqtaun junchoqol:
\p —Kaʼostʼaʼulcha, kapiticha la ixchaqaʼ Judas yu yal
lakatin yu junkan Vas Tin. Ancha kʼalakxkʼauyeʼe qayntaun
joʼati yu machaqaʼ Tarso yu junkan Saulo. Yucha kintʼajun
tapaynininiʼ ni anchanu laqa chaqaʼ.
\v 12 Yucha jalakavanal tus tacha kalaqmil qayntaun
joʼati yu junkan Ananías y va moqslanil ixmakaʼ para
kalal kalakavananchoqol.
\p
\v 13 Ex taval yu Ananías va naul:
\p —Jalhachimoʼonuʼ, qaynlhuucha lapanakni kintalaqputeʼenita
ni anchanu lapanaki, yucha ayaj jalaqlhimaqchapuy milapanakni
yu tavilanal Jerusalén.
\v 14 Y chavay ni aniy putaulan vachuʼ lhiminta ixlhachimoʼon
ni ixʼukxtinkʼan kuras para kalakchʼilhaʼal tachun ni
lapanakni yu talhakapuʼan mintaqaʼuti.
\p
\v 15 Ex yu Jalhachimoʼonuʼ va naul:
\p —Kapiticha. Ni anchanu lapanaki kitʼin klaksakta para
kalhaʼal kintaqaʼuti y kilhichivinil kun lapanakni yu
jantu israelitas kataval y vachuʼ kun ixlhachimoʼonunkʼan
y vachuʼ kun yu israelitas.
\v 16 Kakmasuniyaʼ ni yucha ayaj maqskʼiniy kilamaqanlqajnal.
\p
\v 17 Ex alcha ni Ananías, va tanuchal laqa chaqaʼ taʼan
ixvil ni Saulo. Va moqslanil ixmakaʼ, va junil:
\p —Kintʼalaqajun Saulo, ni Jalhachimoʼonuʼ Jesús yu tasunin
ni lakatin taʼan ixpʼutʼantʼa, va yucha kimalaqachal
para kʼalakʼavananchʼoʼocha y vachuʼ para kalaqtanuʼojon
ni Espíritu Santo.
\p
\v 18 Ex nimancha lakapupatajul tuʼuchun tus tacha ixtaxʼapʼiti
jatanti, ex lakavananchoqolcha. Ex chuncha va ostaulchoqolcha,
va aqchajʼaulcha.
\v 19 Astan vaynchoqolcha y va chʼapachoqolcha ixtapʼasta.
\p Va jalaktʼatamakaul lati julchan para katʼataulal
ancha laka putaulan Damasco yu ixtalhakapuʼan.
\s Ni Saulo laqputeʼey ixchivinti Dios laka putaulan Damasco
\p
\v 20 Ex ni Saulo niman aqtayl jalaqputeʼeniy lapanakni
laqa chaqan taʼan ixtataqxtoʼa ni israelitas. Va jalakjunil
ni lapanakni ni Jesús va Sasʼatʼa Dios junita.
\v 21 Tejkan chuncha taqasmaklhi ni lapanakni va tus
vak takʼatsal, va talalhisakmil y tanaul:
\p —¿Tas ayucha ni aniy joʼati? ¿Jantu yuʼ yu lakxkaulhitʼajun
ni lapanakni ancha Jerusalén yu taskʼin Dios la ixtaqaʼuti
Jesús? Chavay vachuʼ aniy minta vamun para kalakchʼapal
yu talhakapuʼan Jesús y kalaklhaʼanil yu ixʼukxtininkʼan
kuras.
\p
\v 22 Pero ni Saulo ixchiviniy kun tapʼasta yu lhilhiy
ixtalhavaniy, y ox ixlakmasuniy ni Jesús va Cristo yu
laksakta Dios. Va jalaktʼilhinil ixjatapastakʼatkʼan
ni israelitas yu ancha ixtavilanal laka putaulan Damasco.
\s Qoslhi ni Saulo
\p
\v 23 Ex chuncha paqlhuu val, ni israelitas chʼantaun
taval para katamaqnil ni Saulo.
\v 24 Pero yucha kʼatsal yu ixtamakaniputun. Mas laka
julchan u mas laka putsʼista va si ixtapakxanʼiy taʼan
putaxtukan ni anchanu ay putaulan.
\v 25 Pero tejkan tsʼis ixjunita yu ixtalhakapuʼan va
tapumaʼeltajul laqataun ay qaychʼi la xaʼexni ni putaulan.
Ex chuncha tapumaqosulcha ni Saulo.
\s Ni Saulo chaanchoqol Jerusalén
\p
\v 26 Tejkan chaʼal Jerusalén va ixlaktʼatanuputun yu
ancha ixtalhakapuʼan. Pero tachun ixtatalhauniʼojoy,
va jantu katalhakapuʼanil ni yucha incha laqsaval kalhakapuʼal
vachuʼ.
\v 27 Pero qayntaun yu ixjunkan Bernabé yucha va laqaʼil,
y jalakmamispanil yu jalaqmalaqachal ni Jesús. Va jalakjunil
ni yuʼuncha ni Saulo va laqtsʼil lakatin ni Jalhachimoʼonuʼ
Jesús, y va tʼachivinil. Vachuʼ jalakjunil ni Saulo laqputeʼel
ixtaqaʼuti Jesús sin talhanti laka putaulan Damasco.
\v 28 Ex Saulo tamakaunchalcha Jerusalén, jalaktʼatiʼukxuntayalcha
yu ixtalhakapuʼan.
\v 29 Va laqputeʼel ixtaqaʼuti Jesús sin talhanti. Va
jalaktʼachivinil ni israelitas yu ixtachiviniy griego
y yuʼuncha vamun talhilakchivinil kun lhuu lakchivinti.
Vachuʼ ni yuʼuncha ixtamaqniputun.
\v 30 Tejkan chuncha takʼatsal ixjatʼalaqaunin yu vachuʼ
ixtalhakapuʼan, ex va talhaʼal ni Saulo laka putaulan
Cesarea, ex astan tamalaqachal laka putaulan Tarso.
\p
\v 31 Tachun yu ixtalhakapuʼan xaʼestado Judea ali xaʼestado
Galilea ali xaʼestado Samaria va oxamaktaun ixtaʼukxuyanal
y pʼays val ixlhakapuʼatikʼan. Va ayaj ixtatoʼoyay ni
Jalhachimoʼonuʼ Jesús, y ni Espíritu Santo laqʼaqtayjul
para katatalhaval.
\s Ni Pedro palay makachoqol ni Eneas kun ixtapʼasta Dios
\p
\v 32 Ex chuncha ni Pedro va ixjalaqlaqʼan ixlapanakni
Dios, y vachuʼ jalaqʼal yu ixtavilanal laka putaulan
Lida.
\v 33 Ancha paxtoqlhi qayntaun lapanaki yu ixlakanita,
laqatsajin jachʼitin ixmal laka putaman.
\p
\v 34 Ex yu Pedro va junil:
\p —Eneas, ni Jesucristo palaycha makachoqoyan. Kaʼostʼaʼulcha,
kasaktʼicha mixtaʼati.
\p Ex nimancha ostaulal.
\v 35 Tejkan chuncha talaqtsʼil ni lapanakni yu ixtavilanal
laka putaulan Lida kun laka putaulan Sarón, va tamapaxal
ixputsukukʼan, va talhakapuʼal ni Jalhachimoʼonuʼ Jesús.
\s Ni Dorcas kujchoqol mas ixnitacha
\p
\v 36 Laka putaulan Jope ixʼalin qayntaun xanati yu
ixlhakapuʼan yu ixjunkan Tabita yu vachuʼ ixjunkan Dorcas
laka lhichivin Griego. Yucha mas va tavanancha kaval
ixmakay tachun yu lajʼox vachuʼ ixlaqʼaqtayjuy ni kilpatanin.
\v 37 Ex taval taqanʼal ni yucha y va nilcha. Va talaqachaʼal
la ixlakatunaj, ex astan talhaʼal taun kuarto taʼan talman
laqa chaqaʼ yu talaqtʼuy.
\v 38 Yu putaulan Jope va ixlhiʼukstsʼuniy ixjunita
kun Lida taʼan ixvilchal ni Pedro. Tejkan takʼatsal
yu ixtalhakapuʼan ni ancha ixvilchal ni Pedro ex va
tamalaqachal pumatʼuy jaltanan, va tatapayninil ni Pedro,
va tajunil:
\p —Kijnan klalaqmintau para tsʼalaj kilatʼaʼau Jope.
\p
\v 39 Ex yu Pedro nimancha ostaulal, va jalaktʼaʼalcha.
Tejkan chinchal ex tajuntalhaʼal ni laka kuarto taʼan
ixmachal ni janiniʼ. Yu tiyaunin ayaj ixtalhiqalhun,
va tamasunil ni Pedro ixlaqchʼitikʼan yu jalakmakanil
ni Dorcas tejkan vananaj ixtʼajun.
\v 40 Ni Pedro laklhijunil katataxtul maqspaʼ, ex va
taʼaqtsoqoqtanil ni Dios y va tapayninil. Ex astan talaqaspʼiklhi
y laqastal ni janiniʼ, va junil:
\p —Tabita, kaʼostʼaʼulcha.
\p Ex ni janiniʼ talaqpuʼalcha la ixlaqchul y laqtsʼil
ni Pedro, y ostaulalcha.
\v 41 Ex ni Pedro maqchʼapaʼostaulnil y jalakjuntanuchoqolcha
ixpulakna yu ixtalhakapuʼan vachuʼ kun yu tiyaunin, y
lakmasunil va ixkujchoqotacha.
\v 42 Taval takʼatsaʼolcha ni xaputaulan Jope, ex qaynlhuu
lapanakni talhakapuʼal ni Jalhachimoʼonuʼ Jesús.
\v 43 Ex ni Pedro ancha tamakaunchalcha paqlhuu laka
putaulan Jope la ixchaqaʼ qayntaun xalaʼoxiniʼ jaxtaʼan
yu ixjunkan Simón.
\c 10
\s Ni Cornelio tasunil ixmayul ni Dios
\p
\v 1 Ni laka putaulan Cesarea ixvilchal qayntaun lapanaki
yu ixjunkan Cornelio. Yucha va qayntaun kapitan yu ixlhichimoʼoy
cien tropas yu taminchal Italia.
\v 2 Ni yucha kun tachun ixlapanakni ayaj ox ixtatoʼoyay
ni Dios. Y ox jalaqʼaqtayjul ni kilpatanin y lhilhiy
ixtatapayniniy Dios.
\v 3 Tauncha julchan va laʼatʼutu putoqoxata ixjunita,
ex ox tasunil ixmayul ni Dios. Va talakanunil y va junil:
\p —Cornelio.
\p
\v 4 Chuncha ni Cornelio va ayaj talhanal, va aqtaylcha
sniy laqtsʼin, va naul:
\p —¿Tisun naʼuncha, kiʼukxtin?
\p Ex yu ixmayul Dios va naul:
\p —Ni Dios laqaʼinin tacha taun ox lapaxkan tachun yu
mintapayniti kun tachun yu laqxtʼaqnin ni kilpatanin.
\v 5 Chavay kʼalaqmalaʼachʼatʼi lapanakni laka putaulan
Jope para kataʼal juntaʼinin qayntaun lapanaki yu junkan
Simón yu vachuʼ junkan Pedro.
\v 6 Yucha tʼavilchal qayntaun xalaʼoxiniʼ jaxtaʼan
yu vachuʼ junkan Simón, yu yachal ixchaqaʼ va ixlhiʼukstsʼuniy
lakamar. [Yucha kajunan tachun yu maqskʼiniy kamakʼatʼi.]
\p
\v 7 Tejkan anchoqolcha ixmayul ni Dios yu tʼachivinil,
ex ni Cornelio jalakjuntaʼil pumatʼuy ixʼoqxtamatin
kun qayntaun ixtropa yu ixtoʼoyay Dios y ixmakay yu
ixlhijuniy ni Cornelio.
\v 8 Va aqtayl jalaqputeʼeniy tachun yu tapasal ex astan
jalaqmalaqachalcha kataʼal laka putaulan Jope.
\s Yu Pedro tasunil ixmayul ni Dios
\p
\v 9 Ex yu ataun julchan val tejkan atunkujcha ixjunita,
va ixlhiʼukstsʼuniycha para katachaʼal Jope, exnicha
taukʼal ni Pedro la ixʼukxni laqa chaqaʼ, aqtayl tapayniniy
Dios.
\v 10 Taval chʼapachal taun chavan, ixnajuntacha niman
kavayl. Pero tejkan ixtʼaunkan laʼoxinika ixvayti, va
tasunil taun tuʼuchun.
\v 11 Va laqtsʼil tacha katalaqltiʼal ni laktʼiyan.
Ancha tasul tacha kamaʼeltajukal lakatʼun aqxtaun ay
laqchʼiti yu kankatʼati chʼinikanta ixkankatiʼ.
\v 12 Va ixtatajumanal tapuchux talhitsukuti yu maʼatʼati
ixchʼajakʼan ali tsapulin yu alin lakatʼun ali xatsʼoʼon
laktʼiyan.
\v 13 Ex va qasmaklhi taun chivinti, va junkal:
\p —Kaʼostʼaʼulcha, Pedro. Yu aniy talhitsukuti kʼamaqnitʼi
y kʼaʼutʼi.
\p
\v 14 Yu Pedro va naul:
\p —Jalhachimoʼonuʼ, jantu lay kʼuy. Jantu aqtaun kʼuy
yu jantu uyujnajun kʼaʼutʼi la kilhachimoʼonkʼan.
\p
\v 15 Ex va qasmakchoqol ataun chivinti, va junkal ni
Pedro:
\p —Tachun yu najun Dios lajʼox para kʼaʼutʼi yucha jantu
kʼaʼun incha jantu ox kʼaʼutʼi.
\p
\v 16 Ex chuncha aqtʼutu chuncha tapasal. Ex yu ay laqchʼiti
nimancha lhaʼanchoqokal laktʼiyan.
\s Talaqchaʼal ni Pedro ixjaltanan ni Cornelio yu jamalaqachal
\p
\v 17 Tejkan Pedro ixtʼajun pastaknaʼ suncha naunputun
yu laqtsʼitapasal, va exnicha tachinchal ni lapanakni
yu laqmalaqachal ni Cornelio taʼan ixyal ixchaqaʼ ni
Simón y tatalakxtutayal laka matiʼ.
\v 18 Va pʼaysni tachivinil, talhasakminil incha ancha
ixvil ni Simón yu vachuʼ ixjunkan Pedro.
\v 19 Ni Pedro vananaj ixtʼajun pastaknaʼ yu laqtsʼitapasal.
Ex ni Espíritu Santo va junil:
\p —Simón, talakxkauyan qayntʼutu lapanakni.
\v 20 Kaʼostʼaʼulcha, kapʼatʼaʼutʼicha talaktsin. Kalaktʼapiticha
y jantu kapastakʼun tuʼuchun, va kitʼin klaqmalaqachata
para katalaqmin.
\p
\v 21 Ex patajul ni Pedro, va lakjunil:
\p —Va kitʼin ni kilalakxkauyau. ¿Tisuncha kilalhilaqmintau?
\p
\v 22 Ex tanaul:
\p —Kintamalaqachan qayntaun kapitan yu junkan Cornelio.
Yucha va qayntaun yu ayaj qalʼox lapanaki. Ox toʼoyay
Dios y tachun yu israelitas mas va toʼoxtaycha kaval
va si ox talhichiviniy. Qayntaun ixmayul Dios lhinaul
kaklalaqmiu para kapiti la ixchaqaʼ para lay kaqasmaknin
yu kʼaʼuneʼe.
\p
\v 23 Ex ni Pedro jalaklhijunil kataloqojlhi laqa chaqaʼ.
\p Ex yu ataun julchan val, laktʼaʼalcha y vachuʼ tatʼaʼal
lati ixtʼalaqaunin yu ixtavilanal Jope.
\s Ni Pedro tʼachivinil ni Cornelio
\p
\v 24 Ex apaqtaun val, tachaʼal laka putaulan Cesarea.
Y yu Cornelio ancha ixlakpakxanʼita kun alati ixtʼalapanakni
ali ixʼamigos yu ixjalakjuntaʼita.
\v 25 Tejkan Pedro va laycha katanuchal laqa chaqaʼ
exnicha ni Cornelio va paxtoqlhi, va taʼaqtsoqoqtanil
la ixchʼajaʼ ni Pedro para katoʼoyal.
\v 26 Pero Pedro maʼostaulnil, va junil:
\p —Katʼaycha. Kitʼin vachuʼ va lapanaki kunita.
\p
\v 27 Tejkan vananaj ixtʼajun tʼachivin Cornelio ni
Pedro ex tanulcha laqa chaqaʼ y ancha japaxtoqlhi pumalhuu
lapanakni yu ixtaʼaqxtoqnun.
\p
\v 28 Ex yu Pedro lakjunil:
\p —Kʼatsʼayatʼikcha ni kilhachimoʼonkʼan yu israelitas
kuntau jantu kintaxtaqniyan lakatin para kaktaqxtoqvi
chʼantaun kun uxiknan yu jantu israelitas kʼaʼuntʼik.
Pero chavay kimasunil ni Dios ni jantu maqskʼiniy kajkunil
matichun incha jantu ox ixjatsukunti u incha lhitʼajun
laqtaqal.
\v 29 Xlhiyucha tejkan kilajuntaʼiu, jantu tsij kaknaul,
va niman kmil. Chavaycha klalhisakmiyau ¿Valiʼiycha
kilajuntaʼiucha?
\p
\v 30 Ex yu Cornelio junil:
\p —Laʼatʼaticha julchan xajun chuncha tacha chavaycha
aniy hora laʼatʼutu putoqoxata xaktʼajun tapaynininiʼ
Dios aniy la kinchaqaʼ. Ex niman kintasunil qayntaun
lapanaki yu ox kʼuliksnaʼ ixjunita ixlaqchʼiti. Va kijunil:
\v 31 “Cornelio, Dios qasmaknitan mintapayniti y pastakʼan
por yu ox jalaqʼaqtʼayʼuy ni kilpatanin.
\v 32 Kʼamalaʼachʼan ixʼika laka putaulan Jope qayntaun
Simón yu junkan Pedro. Yucha vil la ixchaqaʼ qayntaun
xalaʼoxiniʼ jaxtaʼan yu vachuʼ junkan Simón yu vil ixlhiʼukstsʼuniy
lakamar. [Yucha katʼachivinanan tejkan kaminaʼ.]”
\v 33 Ex niman kmalaqachanal mijuntaʼika y klhiʼachantajuy
ni aniycha viltʼi. Chavaycha aniy alintau la ixlakaʼukxpuʼ
Dios. Knaunau kilajuniu tachun yu lhijunin ni Jalhachimoʼonuʼ
para kaklaqasmakniu.
\p
\v 34 Ex yu Pedro aqtayl chiviniy, va naul:
\p —Chavaycha ox kmalaqasiy ni Dios tachun jalaqaʼiʼojoy
mas va taʼayucha kaval.
\v 35 Ox jalaqaʼiy lapanakni mas va toʼoxtaycha katataulal
incha tatalhauniy ni yucha y tamakay yu lajʼox yu lhinajun.
\v 36 Yucha laqmalaqachanil ni israelitas yu ox chivinti.
Va jalakjunil tacha lay oxamaktaun katapuʼukxuntayal
por yu makal Jesucristo yu xaJalhachimoʼonuʼ tachun
ni lapanakni.
\v 37 Uxiknankʼan ox kʼatsʼayatʼik yu tapasal la xalakatʼun
Judea. Aqtaynichal xaʼestado Galilea tejkan Juan laqxaqalal
ni lapanakni para kataʼaqchajʼaul.
\v 38 Kʼatsʼayatʼik ni Dios xtaqnil palhachimoʼon ni
Jesús yu machaqaʼ Nazaret y chuncha laqtanul ni Espíritu
Santo kun tapʼasta. Chuncha ni Jesús ixʼukxuyal makanaʼ
yu lajʼox y palay ixjalakmakachoqoy tachun ni lapanakni
yu ixjalaqmamaqanlqajnivay ni aqmoqxnuʼ porke Dios ixʼalinta
chʼantaun kun yucha.
\p
\v 39 ’Ni kijnankʼan klaqtsʼinʼojoo tachun yu makal
mas la ixtʼunkʼan ni israelitas y vachuʼ yu ay ixputaulankʼan
Jerusalén, tus tejkan tamaqnil y tamakxtʼukmukʼal laka
kurus.
\v 40 Pero tejkan paqtʼutu val, ex ni Dios va majkujuchoqol
y kintamasunin.
\v 41 Jantu kalaktasuniʼol tachun ni lapanakni. Vamun
kijnan kintatasunin yu Dios ixkintalaksaktan. Tejkan
kujchoqolcha, ex xaktʼavaynau y xaktʼaʼoqyau yu oqkan.
\v 42 Jesús kintamalaqachan kajkʼau jalaqputeʼeninin
ni lapanakni ni Dios xtaqnil ixpalhachimoʼon para kapuxkaulaqtsʼinil
ixlaqtaqalkʼan tachun ni lapanakni mas yu takujta y
mas yu tanitacha.
\v 43 Ni Jesús va yucha yu ixtalhichiviniy tachun yu
maqancha ixtalaqputeʼey ixchivinti Dios tejkan tanaul
ni va por ixtaqaʼuti ni yucha kalaqmalaqmixinikanaʼ
ixlaqtaqalkʼan tachun ni lapanakni yu talhakapuʼan.
\s Yu jantu israelitas kataval vachuʼ talaqtanuʼol ni Espíritu Santo
\p
\v 44 Tejkan vananaj ixtʼajun chivin ni Pedro, ex ni
Espíritu Santo talaqtanuʼol tachun yu ancha ixtatʼajun
qasmakninin ixchivinti.
\v 45 Ni israelitas yu ixtalhakapuʼan yu tatʼamil ni
Pedro va tus vak takʼatsal tejkan talaqtsʼil jalaqxtaqnikal
vachuʼ ni Espíritu Santo yu jantu israelitas ixtajunita.
\v 46 Taqasmaklhi ni va ixtatʼajun chivinin kun alati
lhichivin yu jantu ixtamalaqasiy y ay ixtamakay ni Dios.
\v 47 Ex yu Pedro va naul:
\p —Jantu matichun lay laktanchay para jantu kataʼaqchajʼaul
ni aniy lapanakni. Vachuʼ talaqaʼil ni Espíritu Santo
tacha kijnankʼan klaqaʼiu.
\p
\v 48 Ex astan ni Pedro lhinaul kataʼaqchajʼaul la ixtaqaʼuti
ni Jesucristo. Ex talhijunil kalaktʼatamakaul lati julchan
ni Pedro.
\c 11
\s Ni Pedro jalaqlhixaqalay ixlapanakni Dios ancha Jerusalén yu tapasal
\p
\v 1 Yu jalaqmalaqachal ni Jesús kun tachun yu ixtalhakapuʼan
yu ixtavilanachal xaʼestado Judea va takʼatsal ni vachuʼ
talaqaʼil ixchivinti Dios yu jantu israelitas kataval.
\v 2 Ex tejkan chinchoqol ni Pedro laka putaulan Jerusalén
ancha ixtavilanal lati israelitas yu talhakapuʼan. Yuʼuncha
tamukʼanil laqtaqal ni Pedro.
\v 3 Va tanaul:
\p —¿Valiʼiycha jalaqkʼilatʼicha lapanakni yu jantu israelitas
kataval y chʼantaun jalaktʼavay yuʼuncha?
\p
\v 4 Ex ni Pedro va qaltayanal, aqtaylcha jalaqputeʼeniy
tachun yu tapasal. Va naul:
\p
\v 5 —Tejkan xakvil laka putaulan Jope kitʼin xaktʼajun
tapaynininiʼ Dios ex klaqtsʼil aqxtaun ay laqchʼiti
yu kintaʼeltajunil tus laktʼiyan. Kankatʼati ixchʼinikanta
ixkankatiʼ.
\v 6 Ancha klaqtsʼil ixtatajumanal xatalhitsukuti lakatʼun
yu talhitʼajun maʼatʼati ixchʼajakʼan, ali maqtalin ali
tsapulin ali xatsʼoʼon laktʼiyan.
\v 7 Kitʼin ijqasmaklhi taun chivinti, va kijunil: “Kaʼostʼaʼulcha,
Pedro, yu aniy talhitsukuti kamaqnitʼi y kʼaʼutʼi.”
\v 8 Ex kitʼin kunil: “Jantu lay kʼuy, Jalhachimoʼonuʼ.
Jantu aqtaun kʼuy yu najun la kilhachimoʼonkʼan jantu
ox kʼaʼutʼi.”
\v 9 Ex va ijqasmakchoqol ataun chivinti yu minchal
laktʼiyan, va kijunil: “Tachun yu najun Dios lajʼox
para kʼaʼutʼi yucha jantu kʼaʼun incha jantu ox kʼaʼutʼi.”
\v 10 Ex aqtʼutu chuncha tapasal. Taval lhaʼanchoqokalcha
laktʼiyan.
\v 11 Exnicha tachaʼal pumatʼutu lapanakni yu laqmalaqachakal
laqa chaqaʼ taʼan xakvil yu taminchal laka putaulan
Cesarea.
\v 12 Ni Espíritu Santo kilhijunil kaklaktʼaʼal y jantu
kimpastakʼul tuʼuchun. Vachuʼ kintatʼaʼal yu aniy pumachaxan
ketʼalaqauninkʼan. Va ktanuchaʼau la ixchaqaʼ qayntaun
lapanaki.
\v 13 Yucha kintalaqputeʼenin ni vachuʼ laqtsʼil ixmayul
Dios y va lhijunkal kamalaqachanal Jope ixjuntaʼika
qayntaun Simón yu junkan Pedro
\v 14 para kajunil tas lay kapulaqtaxtul ni yucha kun
ixlapanakni.
\v 15 Ex tejkan kitʼin kʼaqtayl klaqxaqalay, va taʼeltajul
ni Espíritu Santo, tus talaqtanuʼol vachu chun tacha
yu pʼunaj kintalaqtanun kijnan.
\v 16 Ex niman kpastakchoqol yu kintajunin ni Jalhachimoʼonuʼ
Jesús tejkan naul: “Ni Juan va xkan ixpumaqchajʼavanan
pero uxiknan kʼapʼuʼaqchʼajʼauyapitik ni Espíritu Santo.”
\v 17 Va Dios yu jalaqxtaqnil ni Espíritu Santo vachu
chun tacha kintaxtaqnin kijnan tejkan lhakapuʼau ni
Jalhachimoʼonuʼ Jesucristo. Ex chuncha kitʼin jantu
klaktanchaputun yu makay Dios.
\p
\v 18 Tejkan chuncha taqasmaklhi yu ancha ixtavilanal
va tus saq taval y ay tamakal ni Dios, va tanaul:
\p —Chavaycha ni Dios mas yu jantu israelitas kataval
vachuʼ jamapaxaniy ixjatapastakʼatkʼan para lay katalaqaʼil
yu ox jatsukunti.
\s Ixlapanakni Dios yu tavilanal laka putaulan Antiokía
\p
\v 19 Tejkan maqnikal ni Esteban ex lati ni lapanakni
aqtayl jalaqmamaqanlqajnivakan por ixlhakapuʼatikʼan.
Ex taʼal jaqosnun tus xaʼestado Fenicia kun Chipre y
vachuʼ laka putaulan Antiokía. Ancha talaqputeʼel ni
sastʼi chivinti yu xtaʼa jatsukunti, pero vamun ni israelitas
jalaqputeʼenikal.
\v 20 Lati yu ixtalhakapuʼan yu machaqan Chipre kun
Sirene yuʼuncha vachuʼ tachaʼal ni laka putaulan Antiokía.
Ex yuʼuncha talaqputeʼenil yu jantu israelitas kataval
ni sastʼi chivinti yu lhichiviniy ni Jalhachimoʼonuʼ
Jesús.
\v 21 Yuʼuncha ixtalhitʼajun ixtapʼasta ni Jalhachimoʼonuʼ,
xlhiyucha pumalhuu lapanakni tapaxal ixputsukukʼan, y
talhakapuʼal ni Jalhachimoʼonuʼ Jesús.
\p
\v 22 Tejkan takʼatsal yu ixtalhakapuʼan ancha laka
putaulan Jerusalén, ex yuʼuncha vachuʼ tamalaqachal ni
Bernabé kaʼal laka putaulan Antiokía.
\v 23 Tejkan ancha chaʼal ni Bernabé va laqtsʼil ni
laqsaval ixjalakmapayniy ni Dios. Ex ni Bernabé ayaj
lhiʼachantajul va laqxaqalal tachun para katataylhaʼal
kun chux la ixjalhanutikʼan ni Jalhachimoʼonuʼ y jantu
aqtaun katamakauntijlal.
\v 24 Yucha va qayntaun lapanaki yu ayaj qalʼox ixjunita.
Va tus ixlaqtanuʼol ni Espíritu Santo, y pʼays ixjunita
ixlhakapuʼati. Va por yucha pumalhuu lapanakni talhakapuʼal
ni Jalhachimoʼonuʼ.
\p
\v 25 Taval ni Bernabé al puxkaunaʼ Saulo laka putaulan
Tarso. Tejkan temachal va lhimil tus laka putaulan Antiokía.
\v 26 Ancha ixlaktʼavil taun jachʼitin yu ixtalhakapuʼan,
jalakmasunil lhuvaj lapanakni. Ni laka putaulan Antiokía
va ancha taʼan pʼunaj lakjunkal Cristianos yu ixtalhakapuʼan
ni Cristo.
\p
\v 27 Ni anchanu julchan, lati lapanakni yu ixtalaqputeʼey
ixchivinti Dios tataxtulcha Jerusalén y taʼal Antiokía.
\v 28 Ex xaqayntaun ni yuʼuncha yu ixjunkan Agabo tayal
taʼan ixtataqxtoʼa yu ixtalhakapuʼan Jesús. Ni Espíritu
Santo va xtaqnil jatapastakʼati, ex va naul yu Agabo
ni kaʼalinaʼ taun ay chavan tachun ni anchanuʼ lakamunukpaʼ.
Astan chuncha val tejkan Claudio ixjunita yu ay jalhachimoʼonuʼ
Romano.
\v 29 Ex chuncha yu ixtalhakapuʼan ancha Antiokía va
chʼantaun tamakal ixjatapastakʼatikʼan para kataʼaqtayjul
ixtʼalaqauninkʼan yu vachuʼ ixtalhakapuʼan yu ixtavilanal
xaʼestado Judea, mas va lakstsʼuninin yu kalal.
\v 30 Ex chuncha laqsaval va tamalaqachanil taun limosnaj
yu xalajʼaynin yu ixtalhakapuʼan xaʼestado Judea. Va
talhaʼal Bernabé ali Saulo.
\c 12
\s Maqnikal ni Jacobo y vachuʼ chʼikal ni Pedro
\p
\v 1 Ex chuncha ni anchanu julchan ni jalhachimoʼonuʼ
Herodes aqtayl lakxkaylhitsukuy lati yu ixtalhakapuʼan.
\v 2 Va malaqachanal ixmaqnika ni Jacobo yu xajayaʼ
Juan ixjunita. Va tamaqnil kun aqxtaun espada.
\v 3 Yu israelitas ayaj tamaqamal xlhiyucha tejkan chuncha
kʼatsal ni Herodes ex vachuʼ malaqachanal ixchʼika ni
Pedro. Chuncha tapasal tejkan ixjunita ixkʼatankʼan
ni israelitas tejkan ixtaʼuy pan yu jantu ixlaqlhitayay
levadura.
\v 4 Tejkan Herodes chʼapal ni Pedro ex manul laka pachʼin,
va laqmaqxtaqnil oqxlaqtʼati tropas para katalhistaklhi.
Va pumatʼatin oqxlaqtamin. Va ixnajun kamaxtul tus katamaktaʼelal
xakʼatan Paxku, para kamukʼanil laqtaqal la ixlakaʼukxpukʼan
ni lapanakni.
\v 5 Ex ni Pedro va ox ixtalhistaknuta laka pachʼin,
pero yu ixtalhakapuʼan Jesús laqatapʼasta ixtatʼajun
tapayninin Dios por yucha.
\s Ni Dios maxtuchoqol laka pachʼin ni Pedro
\p
\v 6 Ex valaycha kalakachil ni julchan tejkan ni Herodes
ixmaxtuputun laka pachʼin ni Pedro para kamukʼanil laqtaqal.
Tejkan tsʼis ixjunita ex yu Pedro ixmal laka pachʼin.
Va ixtamataʼajmata pumatʼuy tropas, ox ixtachʼimata kun
maʼatʼuy kadena y vachuʼ alati tropas ixtalhistaknuta
la xakiltalakxtuti.
\v 7 Ex tsʼalaj tasul ixmayul ni Jalhachimoʼonuʼ Dios
y tʼoql mapulkul taʼakchun laka pachʼin. Va tampasal
ni Pedro, maqloʼol, va junil:
\p —¡Tsʼalaj kaʼostʼaycha!
\p Ex ni kadenas niman talajʼexpatajul la ixmakaʼ ni
Pedro.
\v 8 Ex ni ixmayul Dios va junil:
\p —Kʼamulatʼicha milaqchʼiti y kachʼantʼanutʼicha misapato.
\p Ex chuncha makal ni Pedro. Ex vachuʼ naul ni mayul:
\p —Kʼalhilaqapaqaqkʼacha minkutun y kintʼapʼitʼicha.
\p
\v 9 Ex yu Pedro niman nuks maqayaul ixmayul ni Dios,
y tataxtul laka pachʼin. Pero yu Pedro jantu ixkʼatsay
incha laqsaval ixjunita yu ixtʼajun makaniniʼ ni mayul.
Ixlhilay va ixtʼajun aqlaqavan.
\v 10 Va tapalaqpuslhi taʼan ixtayanal oqxlaqtʼuy tropas,
tachaʼal tus laka puerta yu tsasnati ixjunita, yu paxajtachal
tus lakatin. Va xʼaman talaqltiʼal, ex tataxtul. Va taltanal
maqataun tin. Ex yu mayul laqatsʼalaj makaulcha xʼaman
ni Pedro.
\v 11 Ex yu Pedro lakpukujlhicha, va naul:
\p —Chavay ijkʼatsay ni laqsaval kimalaqachanil ixmayul
ni Jalhachimoʼonuʼ Dios. Kimalaqtaxtul la ixtamakaʼ
ni Herodes kun tachun yu ixkintamakaniputun ni israelitas.
\p
\v 12 Tejkan chuncha pastaklhi ni Pedro, ex alcha la
ixchaqaʼ María yu ixnati qayntaun yu ixjunkan Juan Marcos.
Ancha ixtaʼaqxtoqnun lhuvaj lapanakni, ixtatʼajun tapaynininin
Dios.
\v 13 Tejkan chaʼal laqa chaqaʼ ni Pedro, va tayal la
ixlhimaqspaʼ, aqtayl makasay xapuerta. Qayntaun maqtsukuʼ
yu ixjunkan Rode al laka matiʼ para kamispal tas ayucha
ixjunita.
\v 14 Tejkan aqapimispal va Pedro ixjunita ex ayaj lhiʼachantajul.
Pero jantu kamalaqltiʼal ni puerta porke niman takyautaspʼikchoqol,
va la pʼas naul:
\p —¡Ni Pedro lakxtuyal laka puerta!
\p
\v 15 Yuʼuncha tanaul:
\p —Ka va lokoj kʼatʼi.
\p Pero yucha aqlhuu naul ni va laqsaval. Ex yuʼuncha
tanaul:
\p —Kavalay va ixjalhitsukunuʼ.
\p
\v 16 Yu Pedro taylhaʼal makasanaʼ ni puerta. Ex tejkan
tamalaqltiʼal, tus taun talhilal.
\v 17 Ex ni Pedro va lakmajkunil para saq kataval. Ex
aqtayl jalakjuniy tacha pumalaqtaxtul laka pachʼin ni
Jalhachimoʼonuʼ Dios. Taval jalakjunil:
\p —Kʼalaqpʼutʼeʼeniyapitik ni Jacobo kun yu alati ketʼalaqauninkʼan
yu ktapasal.
\p Ex taxtulcha, alcha alakataun.
\p
\v 18 Tejkan tunkulcha va ayaj taputʼilhil ixjatapastakʼatikʼan
ni tropas porke jantu ixtakʼatsay tisuncha lhitapasalcha
ni Pedro.
\v 19 Ex ni Herodes malaqachanal ixpuxkauka pero jantu
katatemal. Ex jalhisakmil ni tropas tisuncha tapasal
y astan malaqachanal ixjalaqmaqnikakʼan ni anchanu tropas.
\p Ex ni Herodes taxtul ancha laka estado Judea, va al
laka putaulan Cesarea. Ancha taulchalcha.
\s Nil ni Herodes
\p
\v 20 Ni Herodes ixlaklukujlaniy ni lapanakni yu ixtavilananchal
laka putaulan Tiro kun Sidón. Ex yuʼuncha tataqxtoqlhi
laka putaulan Cesarea, ixtatʼachivinputun ni Herodes.
Pʼunaj tatʼachivinʼelal qayntaun yu ixjunkan Blasto
para kalaqʼaqtayjul. Yucha yu ay ixʼoqxtamati ixjunita
ni jalhachimoʼonuʼ Herodes. Skʼinil lakatin para lay
katatʼachivinil Herodes para ox katatiʼukxuntayal porke
ixlhiʼutikʼan va ixminachal laka tʼun taʼan ixjalhichimoʼonun
ni Herodes.
\p
\v 21 Tejkan laqchaʼalcha julchan para katatʼachivinil,
ex ni Herodes ulal ni laqchʼiti yu taʼulay jalhachimoʼonun,
va taulal laka siya taʼan jalhachimoʼonun. Ex laqxaqalal
ni lapanakni.
\v 22 Ex ni lapanakni aqtayl pʼaysni tachiviniy, va tanaul:
\p —Va tacha qayntaun dios akapitʼajun jantu tacha lapanaki.
\p
\v 23 Ni Herodes jantu ay kamakal ni Dios xlhiyucha
niman maqtaqanʼal ixmayul ni Dios. Ex aqtaylcha taʼuniy
tsapulin ixlakatunaj, ex nilcha.
\p
\v 24 Pero ixchivinti Dios yucha laqputeʼekal mas va
toʼoxtaycha kaval y talhavaʼal taʼakapuchun lakamunukpaʼ
yu talhakapuʼal.
\p
\v 25 Tejkan ni Bernabé kun Saulo tamajkanilcha ixpujaltanakʼan
por ixjamalaqachakanta Jerusalén, ex taminchoqochalcha.
Talhimil yu ixjunkan Juan Marcos.
\c 13
\s Jalaksakkanta ni Bernabé ali Saulo para katatapatsanil ni Dios
\p
\v 1 Ancha laka ay putaulan Antiokía ixtataqxtoʼa lapanakni
yu ixtalhakapuʼan Jesús, lati ixtalaqputeʼey ixchivinti
Dios y lati ixtamalaninin. Yuʼuncha ixlakjunkan Bernabé,
ali Simón yu ixjunkan Niger, ali Lucio yu machaqaʼ laka
putaulan Cirene, ali Manaén yu chʼantaun tʼaʼaynl ni
jalhachimoʼonuʼ Herodes, ali Saulo.
\v 2 Tejkan ixtatʼajun toʼoyanan ni Dios y vachuʼ ixtatʼajun
taskʼajanan ex naul ni Espíritu Santo, va lakjunil:
\p —Kilalaksakniu Bernabé kun Saulo para katamakal kilhitapatsa
yu kitʼin kaklaklhijunaʼ.
\p
\v 3 Chuncha tejkan tamamaktal ixtaskʼajatikʼan y tatapayniniʼol
ni Dios ex tamoqslanil ixmakakʼan ni Bernabé ali Saulo
y tamalaqachalcha.
\s Ni Bernabé ali Saulo taʼalcha xalakatʼun Chipre
\p
\v 4 Ex chuncha ni Espíritu Santo laqmalaqachalcha.
Ex ni Bernabé ali Saulo taʼalcha laka putaulan Seleucía.
Ex tataxtulcha ni Seleucía, tapuʼal laqataun barco lakamar,
tachaʼal tus alakataun lakatʼun yu ixjunkan Chipre yu
taʼajmal lakamar.
\v 5 Ancha tachaʼal laka putaulan Salamina y talaqputeʼel
ixchivinti Dios taʼan ixtatamoʼoy ni israelitas. Ni
Juan vachuʼ ixtatʼaʼanta para kaʼaqtayjul.
\p
\v 6 Tapalaqpusʼol taʼakchun ni anchanu lakatʼun yu
taʼajmal lakamar, tachaʼal tus ataun putaulan yu ixjunkan
Pafos. Ancha tapaxtoqlhi qayntaun israelita yu jachavanaʼ
ixjunita, ixjunkan va Bar-Jesús. Anchanu joʼati va ayaj
ixjalaklkanan, ni yucha ixnajun ixlaqputeʼey ixchivinti
Dios mas jantu laqsaval ixjunita.
\v 7 Yucha va chʼantaun ixtʼavil ni gobernador yu ixjunkan
Sergio Paulo, yu ixlhitʼajun lhuu jatapastakʼati. Ni
Sergio Paulo jalaklhijunil katamil ni Bernabé ali Saulo,
va ixqasmakputun ixchivinti Dios.
\v 8 Pero ni jachavanaʼ, yu vachuʼ ixjunkan Elimas, yucha
ixjalaktanchaniputun ni Bernabé ali Saulo para jantu
kalhakapuʼal ni gobernador.
\v 9 Ex ni Saulo, yu vachuʼ ixtajuniy Pablo, yucha ixlaqtanuʼojota
ni Espíritu Santo. Ex laqastal ni Elimas,
\v 10 va junil:
\p —Uxintʼi jamakanunuʼ y jalaklkanaʼ kʼatʼi, va sasʼatʼa
aqmoqxnuʼ unitʼa, uxintʼi unitʼa ixtʼalaxkayaʼ tachun
yu lajʼox. Uxintʼi vamun laktʼanchʼapʼutʼun para jantu
vas kaʼal ixlakatin Dios.
\v 11 Chavay ni Dios kaxtaqniyan maqanlqajnati. Kʼaʼuneʼe
laʼachʼix y paqlhuu jantu kalaqtsʼineʼe julchan.
\p Ex nimancha laʼachʼix val ni jachavanaʼ. Chuncha tiʼukxuntayalcha,
ixlakxkajuy taʼayuʼ kamaqchʼapalhaʼal.
\v 12 Tejkan chuncha laqtsʼil ni gobernador va lhakapuʼal
y tus taun lhilal ni chivinti yu lhichiviniy ni Jalhachimoʼonuʼ
Jesús yu laqputeʼenikal.
\s Ni Pablo ali Bernabé tavilanal laka putaulan Antiokía la xaʼestado Pisidia
\p
\v 13 Ex ni Pablo ali yu alati ixtʼaltanan tataxtulcha
laka putaulan Pafos y tatajuchoqolcha laka barco. Taʼalcha
laka putaulan Perge la xaʼestado Panfilia. Ancha ni
Juan jalakmakaunchoqolcha y nimancha anchoqol Jerusalén.
\v 14 Y yu alati tataxtulcha ni Perge, tataylhaʼal jaltanan
tus laka putaulan Antiokía la xaʼestado Pisidia. Ex
tejkan xajulchan jastaknati val, tatanuchal taʼan ixtatamoʼoy
ni israelitas, ancha tataulal.
\v 15 Tejkan puteʼekal xalibro yu ixjapulhichimoʼonkʼan
ni israelitas y vachuʼ kun ixchivintikʼan yu maqancha
ixtalaqputeʼey ixchivinti Dios, ex ni ixʼukxtininkʼan
ni israelitas yu ancha ixtataqxtoʼa va tajuntaʼil ni
Pablo kun ixtʼaltanan. Va tajunil:
\p —Ketʼalaqaunin, incha lhitʼantʼatʼik taun chivinti para
katatapʼaysnil kun Dios ni lapanakni ex kanauntʼikcha.
\p
\v 16 Ex tayal ni Pablo, niman jalakmajkunil ni lapanakni
kun ixmakaʼ para saq katataulal, y va naul:
\p —Uxiknan tachun yu kintʼaʼisraelitas untʼatʼik y tachun
yu tʼalhauniyatʼik ni Dios, kilaqasmakniu kinchivinti.
\v 17 Ni kiDioskʼan yu israelitas juntau jalaksaklhi
ni kepayankʼan yu maqancha ixtatʼajun. Jalaklalhaval
tejkan ixtavilanal xalakatʼun Egipto mas jantu an machaqan
ixtajunita. Astan ni Dios kun ixtapʼasta jalakmaxtul
ni anu lakatʼun.
\v 18 Yucha jalaqmaqantaulnil ixputsukukʼan lakakʼavinan
tus tacha cuarenta jachʼitin.
\v 19 Jalaqmaqnil oqxlaqtujun lapanakni yu ixtavilanal
la xalakatʼun Canaán ex jalaqlvaqnil ixtʼunkʼan y jalaqxtaqnil
ni israelitas.
\v 20 Chuncha por tachun yu aniy tapasal va taqmaqal
tacha cuatro cientos cincuenta jachʼitin. Ex astan jaxtaqnikal
jueces tus tejkan aqtayl laqputeʼey ixchivinti Dios
ni Samuel.
\v 21 Ex chuncha yuʼuncha taskʼil qayntaun jalhachimoʼonuʼ
para kalaklhichimoʼokal y chuncha yu Dios jamaqxtaqnil
qayntaun yu ixjunkan Saulo, yu istsʼal Sis ixjunita, va
minchal kun Benjamín. Ni Saulo jalaklhichimoʼol tus
cuarenta jachʼitin.
\v 22 Ex taval ni Dios maqosunil ixpulhachimoʼon ni
Saulo, va jamaqxtaqnil kalhichimoʼonul yu David. Ni Dios
lhichivinil David, va naul: “Klaqtsʼin ni David yu istsʼal
Isaí. Yucha va qayntaun lapanaki yu chʼantaun junita
kun kitʼin y yucha makaʼojoy tachun yu kitʼin klhinajun.”
\p
\v 23 Ex vachuʼ naul ni Pablo:
\p —Ni Dios malaqachal qayntaun lapanaki yu minchal kun
David yu junkan Jesús para kamalaqtaxtul xalapanakni
Israel, chuncha tacha ixnajunta kamalaqachayaʼ.
\v 24 Tejkan jantukaʼ ixmin ni Jesús ni Juan lhichivinil
la ixlakaʼukxpukʼan tachun ni israelitas ni kaminaʼ
y jalakjunil ni maqskʼiniy katamapaxal ixjatapastakʼatkʼan
y kataʼaqchajʼaul.
\v 25 Tejkan va laycha kamiʼol ixjatsukunti ni Juan,
va naul: “Kitʼin jantu yuʼ kakval chuncha tacha yu
uxiknankʼan pʼakxanʼiyatʼik, pero astan kaminaʼ yu mas
apalay ay xajantu kitʼin. Ni kitʼin jantu kimpaxtoqniy
mas kaklaqmusxʼoqnil isapato,” naul ni Juan.
\p
\v 26 Ex vachuʼ naul ni Pablo:
\p —Ketʼalaqaunin yu tʼanchʼipitikcha kun Abraham y vachuʼ
uxiknankʼan yu jantu israelitas kʼaʼuntʼik yu tʼalhauniyatʼik
ni Dios, ni aniy chivinti yu pulaqtaxtukan yucha va para
uxiknankʼan.
\v 27 Yu ixtavilanal Jerusalén kun ixjalhachimoʼonunkʼan,
yuʼuncha jantu ixtakʼatsay tasʼayucha ixjunita ni Jesús
y jantu ixtamalaqasiy ixchivinti Dios yu ixlaqputeʼekan
xajulchan jastaknati taʼan ixtatamoʼoy ni israelitas.
Yuʼuncha tamukʼanil laqtaqal ni Jesús ex chuncha tapasaʼol
ni anchanu chivinti yu maqancha tanaul yu ixtalaqputeʼey
ixchivinti Dios.
\v 28 Mas jantu katatemanil tuʼuchun laqtaqal para katamaqnil,
pero taskʼinil ni Pilato para kamalaqachanal ixmaqnika.
\v 29 Tejkan chuncha tamakaʼol, ex tapasaʼol tachun yu
istsʼoqkanta yu lhichiviniy Jesús, tapʼuxlhi ni la ixkurus
y tamaknul.
\v 30 Pero mas nil ni Jesús, ni Dios yucha majkujuchoqol.
\v 31 Astan ni Jesús paqlhuvaj jalaktasunichoqol yu
ixjatʼaʼukxuntayay yu tataxtuchal Galilea y tatʼaʼal
Jerusalén. Chavay va yuʼuncha yu talaqputeʼeniy ni lapanakni
tacha tapasal ni Jesús.
\p
\v 32 Y vachuʼ naul ni Pablo:
\p —Chuncha kijnankʼan klalaqputeʼeniyau taun ox chivinti
yu maqancha jalakjunil kepayankʼan ni Dios yu kamakayaʼ.
\v 33 Laqsaval chuncha makal tacha naul kun kijnankʼan
yu ixjapapanaknakʼan juntau. Chuncha makal tejkan majkujuchoqol
ni Jesús. Chuncha tacha tsʼoqkanta laka Salmo dos taʼan
najun: “Uxintʼi kesʼatʼa unitʼa, chavay kitʼin kval
mimPay.”
\v 34 Ni Dios naul ni kamajkujuchoqoyaʼ laka janinin
xlhiyucha ni ixlakatunaj jantu kapuchʼil. Inchine naul
ni taʼan tsʼoqkanta: “Kakmaqxtaqniʼoyan tachun yu lajʼox
chuncha tacha kunil ni David.”
\v 35 Xlhiyucha ni David vachuʼ tsʼoqlhi taʼan alakataun
Salmo yu inchine najun: “Jantu naʼun kapuchʼil kilakatunaj
ni kitʼin yu kʼilaksaktʼa.”
\v 36 Laqsaval ni David tapatsanil ni Dios tejkan vananaj
ixtiʼukxuyal chuncha tacha Dios lhijunil. Ex nil ni
David, tamaknul chʼantaun taʼan ixtaʼaknunun ixjapayan,
ex astan niman puchʼil ixlakatunaj.
\v 37 Pero yu majkujuchoqol ni Dios yucha jantu kapuchʼil.
\p
\v 38 Ex chuncha, ketʼalaqaunin, tsʼanqay kakʼatsʼatʼik
ni lay kamalaqmixinikʼantʼik tachun milaqtaqalkʼan por
Jesús yu klalhixaqalayau.
\v 39 Va por yucha tachun yu talhakapuʼan va jalaqlaʼoxinikan
ixjatsukuntikʼan para jantucha kalakmukʼanikal ixlaqtaqalkʼan
yu jantu lay xamalaqmixinikan mas ixtamakay ixlhachimoʼon
ni Moisés.
\v 40 Kʼalhistʼakkʼantʼik para jantu chun kalhitʼapʼasatʼik
tacha yu maqancha tatsʼoqlhi yu ixtalaqputeʼey ixchivinti
Dios yu tanaul inchine:
\q
\v 41 Uxiknan yu jalaktʼuʼununatʼik, katʼalhanantʼik, kʼamiʼoyapitik.
\q Ni kitʼin yu Dios kunita kakmakayaʼ lajʼay axtoqnuʼ
taʼan tʼiʼukxuyanantʼik,
\q mas matichun katajunan jantu kalhakʼapʼupʼinapitik,
va naul ni Dios,
\p —chuncha jalaqputeʼenil ni lapanakni ni Pablo.
\p
\v 42 Ex va chuncha taval tejkan tataxtuchoqolcha taʼan
ixtatamoʼoy ni israelitas, ex yu jantu israelitas ixtajunita
talhijunil ni Pablo ali Bernabé para kataminchoqol yu
ataun xajulchan jastaknati para kalhichivinchoqol aaqtaun
ni anu chivinti.
\v 43 Ex chuncha tejkan tamaktalcha ni taqxtoʼati lhuvaj
israelitas y vachuʼ lhuu lapanakni yu talhitanul tacha
israelitas tatixkaulhaʼal ni Pablo ali Bernabé. Ex yuʼuncha
taxtaqnil ox jatapastakʼati para katataylhaʼal la ixjamapayninti
ni Dios.
\p
\v 44 Ex chuncha tejkan ataun semana junchoqol yu xajulchan
jastaknati, va tataqxtoqlhi valaycha tachun ni lapanakni
ni anchanu laka putaulan para kataqasmaklhi ixchivinti
Dios.
\v 45 Pero tejkan talaqtsʼil ni israelitas va lhuu lapanakni
tataqxtoqlhi ex nimancha taʼaqtayl tamakay ixʼakchaʼatikʼan.
Chuncha taʼaqtaynil talhichiviniy ni Pablo yu jantu
laqsaval kaval y talaktuʼul.
\v 46 Pero ni Pablo ali Bernabé jantu katachivinil kun
talhanti, va tanaul:
\p —Ixmaqskʼiniy kalaqputeʼekal ixchivinti Dios pʼunaj
kun uxiknankʼan yu israelitas untʼatʼik. Kijnan klamasuniu
pero uxiknankʼan jantu kalaʼaʼitʼik, lhilayatʼik ni jantu
tapaxtoqniyan jatsukunti yu jantu miʼojoy. Xlhiyucha
kajkʼanaucha jalaqputeʼeninin ixchivinti Dios yu jantu
israelitas kataval.
\v 47 Va chuncha kintalhijunin ni Jalhachimoʼonuʼ, va
naul:
\q Kitʼin klalakʼulatau tacha ixmaklkukʼan ni lapanakni
yu jantu israelitas kataval,
\q para katalaqtaxtul lapanakni tus taʼakapuchun lakamunukpaʼ.
\p
\v 48 Tejkan chuncha taqasmaklhi yu jantu israelitas
ixtajunita, ayaj talhipaʼinil y talhiʼachantajul y nimancha
aqtayl tanajun ni Jalhachimoʼonuʼ Dios la ox ixjunita
ixchivinti. Ex talhakapuʼal tachun yu laqsaval jalaksakkal
para katalhitsukul ni jatsukunti yu jantu aqtaun kamiʼoyaʼ.
\p
\v 49 Chuncha laqputeʼeʼokal ixchivinti Dios tus taʼakchun
anchanu lakatʼun.
\v 50 Pero yu israelitas taxaqalal ni xanatin yu apalay
ixlaktoʼoyakan yu ixtalhakapuʼan Dios y vachuʼ yu joʼakna
yu ixtalhitʼajun tapʼasta. Jalakchivijvakal para kalakxkaykal
ni Pablo ali Bernabé y para chuncha kalaqtinaqxtukal
ni anchanu lakatʼun.
\v 51 Ex chuncha yuʼuncha jalakchʼankʼalapʼuxkal ixchʼanpʼoqxkʼan
para kapumasunikal va jalaktanchanikalcha ni lapanakni
por jantu katalaqaʼil ixchivinti Dios. Ex taʼalcha alakataun
putaulan yu ixjunkan Iconio.
\v 52 Pero yu ixtalhakapuʼan Jesús yu ixtavilanal laka
putaulan Antiokía tus ox ixtalhitʼajun achati y ixtalaqtanun
ni Espíritu Santo.
\c 14
\s Ni Pablo ali Bernabé tavilanal laka putaulan Iconio
\p
\v 1 Ancha laka putaulan Iconio, ni Pablo ali Bernabé
vachuʼ tatanul taʼan ixtatamoʼoy ni israelitas. Lhuvaj
lapanakni talhakapuʼal por tamaqamal ixchivintikʼan
mas yu israelitas y vachuʼ mas yu jantu israelitas kataval.
\v 2 Pero yu israelitas yu jantu ixtalhakapuʼan niman
taʼaqtayl taxaqalay yu jantu israelitas ixtajunita y
tajunil yu jantu laqsaval para kataxkayl yu ixtalhakapuʼan.
\v 3 Xlhiyucha ni Pablo ali Bernabé tataqmaqal kun yuʼuncha.
Ixtalhichiviniy ni Jalhachimoʼonuʼ sin talhanti y yucha
ixjalaqxtaqniy tapʼasta para lay katamasul axtoqnuʼ
y palay katamakachoqol lapanakni para katakʼatsal ni
laqsaval ixtalhichiviniy ixjamapayninti Dios.
\v 4 Pero ni anchanu putaulan ni lapanakni va tʼuy jatapastakʼati
ixtamakata. Lati chʼantaun ixtatʼajun kun yu israelitas,
alati chʼantaun ixtatʼajun kun yu jamalaqachal ni Jesús.
\v 5 Ex chuncha ni israelitas ali yu jantu israelitas
kataval va chʼantaun tamakal ixjatapastakʼatikʼan kun
ixʼukxtininkʼan para katalhimaqchapul y vachuʼ katalakatʼalmal
kun chiyux.
\v 6 Pero tejkan takʼatsal niman taqosnul, taʼalcha laka
putaulan Listra ali Derbe la xaʼestado Likaonia. Vachuʼ
tatapasaʼol mas yu lakstʼuniy putaulanaxna ni anchanu
lakatʼun,
\v 7 y talaqputeʼeʼol ni ox chivinti yu laqsaystʼi.
\s Ni Pablo ali Bernabé tavilanal laka putaulan Listra
\p
\v 8 Ancha laka putaulan Listra ixʼalin qayntaun lapanaki
yu jantu lay ixjaltanan. Ni yucha jantu aqtaun ixjaltanan
porke va chʼanlkʼavil tsukul.
\v 9 Yucha ixtʼajun qasmakniniʼ ixchivinti ni Pablo.
Ex Pablo tus sniy laqastal ni anchanu chʼanlkʼavil, ex
makal kuenta ni yucha ixlhakapuʼan ni lay palay kamakal
ni Dios.
\v 10 Chuncha la pʼays chivinil, va naul:
\p —Kaʼostʼaycha y vascha katʼay.
\p Ex ni anchanu lapanaki niman kiʼukltayal y nimancha
aqtayl jaltanan.
\v 11 Tejkan chuncha talaqtsʼil ni lapanakni yu makal
ni Pablo niman taʼaqtayl tamatʼasay la ixlhichivinkʼan
Likaonia, va tanaul:
\p —Chavay ni dioses tataʼeltajulcha aniy kun kijnankʼan
y taval tacha lapanakni.
\p
\v 12 Ex talhimapaqaʼul ni Bernabé tacha ixdioskʼan
yu ixjunkan Júpiter. Y yu Pablo, por yucha chivinil, xlhiyucha
talhimapaqaʼul Merkurio yu xamayul ixdioseskʼan ixjunita.
\v 13 Taʼan ixlhimaqspaʼ ni putaulan taʼan putanukanachal,
ancha ixyal ni chaqaʼ taʼan ixtatoʼoyay Júpiter. Ex
chuncha ni xakura Júpiter va laklhimil toros ali xanti.
Yucha kun yu lapanakni ixtatoʼoyaputun ni Bernabé kun
Pablo, ixtamaqniputun talhitsukuti tacha taun lapaxkan
yu moqslakan.
\v 14 Chuncha tejkan takʼatsal ni Pablo ali Bernabé
talajʼexputaukʼal ixlaqchʼitikʼan, tus talaktʼasajtanul
taʼan mutʼun ixtayanal ni lapanakni, va tanaul:
\p
\v 15 —¿Valiʼiycha chuncha makʼayatʼik tacha aniy? Kijnankʼan
vachuʼ valiʼiy lapanakni kuntau tacha uxiknankʼan. Kmintau
vamun para kaklajuniu ni kamakʼauntʼikcha tachun yu
aniy axtoqnuʼ yu jantu ixlaqmiti kaval y kalhakʼapʼupʼintʼikcha
ni Dios yu laqsaval kujta, yu makata laktʼiyan ali lakatʼun
vachuʼ yu lakamar kun tachun talhitsukuti yu ancha alin.
\v 16 Mas maqancha ni Dios jalaqxtaqnil lakatin ni lapanakni
para katapuʼal taʼan yuʼuncha katamaqamal,
\v 17 pero ni Dios aqtsʼiyaj va tacha masuycha ni yucha
laqsaval tʼajun. Si makay yu ox y tamalaqachaniyan xkan
y vachuʼ taʼaqtayjuyan para kaʼalil yu ox jaxqanti.
Chuncha talhipaʼiniyan y chuncha taxtaqniyan lhuvaj
vayti y vachuʼ achati para oxamaktaun katsʼukʼutʼik.
\p
\v 18 Mas chuncha tanaul ni Pablo ali Bernabé pero ni
lapanakni laqatapʼasta ixtatoʼoyaputun, y va skʼatsanaj
jalaktanchanil ixjamoqslantikʼan yu ixtamakaputun.
\s Ancha laka putaulan Listra talakatʼalmal ni Pablo
\p
\v 19 Ex astan tachinchal lati israelitas yu ixtaxkajiy
ni Pablo, yu machaqan Antiokía ixtajunita ali Iconio.
Yuʼuncha taxaqalal ni lapanakni tus talhakapuʼal ixchivintikʼan.
Ex talakatʼalmal ni Pablo kun chiyux, ex talaqxaqalhaʼal
ixlhimaqspaʼ ni putaulan, ex ancha tamakaumalcha, ixtalhilay
tamaqnilcha.
\v 20 Ex astan xvilin taʼaqatayal yu ixtalhakapuʼan
Jesús taʼan ixmal ni Pablo ex yucha ostaulchoqol y aqtaun
tanuchoqol ni laka putaulan. Ex ataun julchan val, tʼaʼal
ni Bernabé tus alakataun putaulan yu ixjunkan Derbe.
\s Ni Pablo ali Bernabé taʼanchoqol laka putaulan Antiokía la xaʼestado Siria
\p
\v 21 Anchanu laka putaulan talaqputeʼel ni ox chivinti
y talhajaʼil lhuvaj lapanakni yu talhakapuʼal Jesús.
Ex taʼanchoqolcha laka putaulan Listra, ali Iconio, ali
Antiokía.
\v 22 Ni anchanu putaulanaxna tamapʼaysnil ni lapanakni
yu ixtalhakapuʼan Jesús y ox taxaqalal para ox katataylhaʼal
ixlhakapuʼatikʼan. Tajunil: “Tsʼanqay kamaqanlqajnau
para katanuchaʼau taʼan lhachimoʼonun ni Dios.”
\v 23 Tachun ni putaulanaxna taʼan ixtataqxtoʼa yu ixtalhakapuʼan,
si talakʼulal lati xapaynin yu lay katalhachimoʼonul
ancha. Taskʼinil Dios kun taskʼajati y tamaqxtaqnil
la ixtamakaʼ Dios yu ixtalhakapuʼan.
\v 24 Ex astan tatapasaʼol xalakatʼun Pisidia y tachaʼal
tus xalakatʼun Panfilia.
\v 25 Talaqputeʼel ni ox chivinti laka putaulan Perge,
ex taʼal tus Atalia.
\p
\v 26 Ex tataxtul ni Atalia, tapuʼalcha laka barco, taʼanchoqol
aaqtaun Antiokía taʼan pʼunaj tapuʼaqdaynil, ancha taʼan
pʼunaj jalakskʼinikal Dios y jalaqmalaqachakal kun ixjamapayninti.
Chavay tamajkanilcha ni anchanu lhitapatsa yu ixjalaqmaqxtaqnikanta.
\v 27 Tejkan ancha tachinchoqochal, tamaqxtoqlhi ixlapanakni
Dios yu ancha ixtavilanal, va tajunʼol tachun yu makal
Dios la ixjatsukuntikʼan, y vachu talaqputeʼel tacha
ni Dios jaxtaqnil lakatin para katalhakapuʼal yu jantu
israelitas kataval.
\v 28 Ancha tataqmaqal ni Pablo ali Bernabé kun yu ixtalhakapuʼan
Jesús.
\c 15
\p
\v 1 Ex va chuncha ancha Antiokía tachinchal lati lapanakni
yu taminchal xaʼestado Judea, yuʼuncha taʼaqtaynil masuninin
yu ancha ixtalhakapuʼan, va tajunil:
\p —Incha jantu kʼaxvililichʼukʼupʼuxnikʼa tacha lhinaul
Moisés ex jantu lay kʼalaqtʼaxtʼu.
\p
\v 2 Pero ni Pablo ali Bernabé, yuʼuncha tanaul ni jantu
maqskʼiniy chuncha kʼamakʼatʼi y laqatapʼasta ixtalaktanchay.
Ex Pablo ali Bernabé kun lati yu ancha machaqan va jalaksakkal
para katalaqʼal yu xapaynincha yu ixtalhachimoʼonun
yu ixtalhakapuʼan kun yu jalaqmalaqachal ni Jesús yu
ixtavilanal Jerusalén para katalhilakchivinil.
\s Tataqxtoʼa ixlapanakni Dios Jerusalén
\p
\v 3 Ex ni machaqan Antiokía yu ancha ixtalhakapuʼan
tamalaqachalcha ni Pablo ali Bernabé kun yu alati. Tejkan
taʼalcha, tapuʼal xaʼestado Fenicia ali xaʼestado Samaria.
Ancha talaqputeʼel ni taʼan taminchal va ixtamapaxatacha
ixputsukukʼan lhuu lapanakni mas yu jantu israelitas
ixtajunita. Tejkan chuncha jalaqputeʼenikal ni lapanakni
yu ancha ixtavilanal va ayaj talhiʼachantajul.
\v 4 Tejkan tachaʼal laka ay putaulan Jerusalén va ox
jalaqaʼikal. Va talaqaʼil yu xalajʼaynin lapanakni kun
yu ixtalhakapuʼan ali yu jamalaqachal ni Jesús. Ex ni
Pablo ali Bernabé talaqputeʼel tachun yu makal Dios
la ixlhitapatsakʼan.
\p
\v 5 Pero lati yu ixtalhakapuʼan yu fariseos ixtajunita,
va taʼostayal, va tanaul:
\p —Ni lapanakni yu talhakapuʼan yu jantu israelitas kataval,
yuʼuncha maqskʼiniy kalakxvililichukʼupʼuxnikal y kalaklhijunkal
katamakal ixlhachimoʼon Moisés.
\p
\v 6 Ex tataqxtoqlhi yu jamalaqachal ni Jesús kun yu
xalajʼaynin yu ixtalhakapuʼan para katalaqlaʼoxil.
\v 7 Tejkan panijcha ixtatʼajun lhilakchivinin, ex tayal
ni Pedro, va lakjunil:
\p —Ketʼalaqaunin, uxiknan kʼatsʼayatʼikcha por tachun
kijnankʼan yu aniy yanau, va kitʼin kilaksaklhi Dios
maqancha para kajkalaqputeʼenil yu jantu israelitas
kataval ni ox chivinti para vachuʼ katalhakapuʼal.
\v 8 Ni Dios yu lakmispaniy ixjalhanutikʼan ni lapanakni
yucha laqxtaqnil ni Espíritu Santo vachu chun tacha
kintaxtaqnin kijnan. Chuncha ni Dios masul ni yuʼuncha
vachuʼ ox jalaqaʼiy.
\v 9 Yuʼuncha vachuʼ jalaqtsʼin tacha kintalaqtsʼinan
kijnankʼan. Vachuʼ xakaʼol ixlaqtaqalkʼan la ixjalhanutikʼan
va por talhakapuʼal.
\v 10 Chavaycha, ¿valiʼiycha jantu laʼaʼiyatʼik yu lhinajun
ni Dios? Uxiknan jalakmukʼanipʼutʼunatʼik yu talhakapuʼan
Jesús taun lhachimoʼon yu jantu katatayanil kepayankʼan
y mas kijnan jantu tayaniyau.
\v 11 Pero lhakapuʼanau ni kijnan laqtaxtutaucha por
ixjamapayninti kiJalhachimoʼonukʼan Jesús, vachu chun
tacha yuʼuncha talaqtaxtul —chuncha naul ni Pedro.
\p
\v 12 Ex chuncha taʼaqtayl tachiviniy ni Bernabé ali
Pablo. Tachun ni lapanakni tus saq tajunʼol tejkan taqasmaknil
ixchivintikʼan. Yuʼuncha ixtalhichiviniy yu lajʼay axtoqnuʼ
yu makal Dios por yuʼuncha kun ixtapʼasta tejkan ixtatijuyanal
chʼantaun kun yu jantu israelitas kataval.
\v 13 Tejkan tachivinʼol, ex ni Jacobo va naul:
\p —Ketʼalaqaunin, kilaqasmakniu kinchivinti.
\v 14 Chavay ni Pedro kintalaqputeʼenin tejkan aqtaynil
jalaksaknaʼ ni Dios lati lapanakni yu jantu israelitas
ixtajunita, para kamakal sasʼatʼan.
\v 15 Ex chuncha ni Pedro va aqstanchun chiviniy tacha
yu maqancha tachivinil yu ixtalaqputeʼey ixchivinti
Dios. Yuʼuncha inchine tatsʼoqlhi yu naul Dios:
\q
\v 16 Astan kakminchoqoyaʼ ni kitʼin yu Dios kunita,
\q kajkʼulachoqoya qayntaun sasʼatʼa ni David la ixpalhachimoʼon.
\q Va tacha taun chaqaʼ yu kaklaʼoxichoqoyaʼ yu talaqcheʼeʼojotacha,
\q vas kakmaqayauchoqoyaʼ,
\q
\v 17 para kintalakxkaul ni kitʼin yu Jalhachimoʼonuʼ
kunita tachun yu alati lapanakni,
\q tachun yu klaklaksakta yu jantu israelitas ixtajunita
para kilapanakni kataval.
\q
\v 18 Chuncha najun ni Jalhachimoʼonuʼ yu maqancha kintamasunin
yu kaʼalinaʼ.
\p
\v 19 ’Xlhiyucha kitʼin knajun jantu maqskʼiniy kalhinajuu
yu lhitaʼay para yu jantu israelitas kataval yu tataspʼikchoqotacha
kun Dios.
\v 20 Vamun tsʼanqay klaqtsʼoqniu karta para jantu kataʼul
vayti yu moqslanikan antivas y para jantu katatʼatamal
lapanakni yu jantu ixnavinkʼan kaval y para jantu kataʼul
talhitsukuti yu pixtutʼoqlkan y vachuʼ jantu kataʼul
jakʼalnan.
\v 21 Chuncha najun la ixlhachimoʼon Moisés y chuncha
mas va toʼoxtaycha putaulan kaval si chun laqputeʼekan
mas tus va maqancha taʼan tataqxtoʼa ni israelitas tejkan
xajulchan jastaknati —naul ni Jacobo.
\s Jamalaqachanikal karta yu jantu israelitas kataval yu vachuʼ talhakapuʼan Dios
\p
\v 22 Ex yu jalaqmalaqachal ni Jesús ali yu xapaynin
yu ixtalhachimoʼonun lakatajtan ali tachun yu ixtalhakapuʼan
va tamaqamal ixchivinti Jacobo. Talalaksaklhi lati lapanakni
para katʼamalaqachakal laka putaulan Antiokía kun Pablo
ali Bernabé. Va jalaksakkal qayntʼuy lapanakni, yu junkan
Judas Barsabás ali Silas, yu ixlapanakni Dios va ox ixtatoʼoyay
ni yuʼuncha.
\v 23 Va laqmalaqachal kun taun karta yu inchine najun:
\p “Kijnankʼan yu mintʼalaqauninkʼan kuntau kun yu jalaqmalaqachal
Jesús kun yu xapaynincha yu talhachimoʼonun lakatajtan.
Klamastakʼayau ni uxiknan yu jantu israelitas kʼaʼuntʼik
yu lhakʼapʼupʼinatʼik yu vilanantʼik laka putaulan Antiokía
ali xaʼestado Siria ali xaʼestado Cilicia.
\v 24 Kijnan kʼatsau ni la mimputaulankʼan tachanchal
lati kilapanaknikʼan. Yuʼuncha tamamaqanixvan ni uxiknankʼan
kun ixchivintikʼan y vachuʼ talaktʼilhinin mijatapastakʼatikʼan,
mas jantu klaklhijuniu.
\v 25 Astan tejkan chʼantaun kmakau kijatapastakʼatikʼan
yu aniy kvilanau, ex kintamaqaman kaklaklaksakvi lapanakni
yu kaklamalaqachaniu kun Bernabé ali Pablo yu ayaj klakpaxkayau.
\v 26 Yuʼuncha va lapanakni yu tamaqxtaqtacha ixjatsukuntikʼan
kun kiJalhachimoʼonukʼan Jesucristo.
\v 27 Vachuʼ klamalaqachaniyau ni Judas ali Silas para
katajunin la milakaʼukxpukʼan va aqstanchun tacha yu
aniy klatsʼoqnitau.
\v 28 Lhipaʼinil ni Espíritu Santo y vachuʼ kijnan para
kaklalhijuniu ni aniy yu maqskʼiniy kʼamakʼatʼik, yu
najun inchine:
\v 29 Vamun jantu kʼaʼutʼik yu moqslanikan antivas ali
jakʼalna ali talhitsukuti yu pixtutʼoqlkan. Vachuʼ jantu
katʼatʼamatʼik lapanaki yu jantu minavinkʼan kaval.
Incha tachun yu aniy jantu kamakʼayapitik, ex oxicha.
Ox kaʼalintʼik la metsukuntikʼan.”
\p
\v 30 Taval tejkan laqmalaqachakalcha ni lapanakni va
taʼalcha laka putaulan Antiokía. Talaqmaqxtoqlhi yu
ancha ixtalhakapuʼan, ex tamaqxtaqlhicha ni jalhiki.
\v 31 Ex taputeʼel y ayaj talhiʼachantajul y jantucha
apalay katamaqaninil.
\v 32 Ex ni Judas ali Silas yu xalaqputeʼenin ixchivinti
Dios va taxtaqnil jatapastakʼati y tamakuvilal tachun
yu ancha ixtalhakapuʼan.
\v 33 Ancha paqlhuu ixtavilanal ex astan ox lakmastakʼachoqokal
y malaqachachoqokal para katalaqʼanchoqolcha yu ixtamalaqachananta.
[
\v 34 Pero yu Silas maqamal kalaktʼataulal ancha.]
\v 35 Vachuʼ Pablo ali Bernabé ancha tataylhaʼal laka
putaulan Antiokía. Yuʼuncha kun alati lapanakni ixtamasuy
y ixtalaqputeʼey yu ox chivinti yu lhichiviniy ni Jalhachimoʼonuʼ
Jesucristo.
\s Ni Pablo ali Bernabé tatalaqlvaqlhicha
\p
\v 36 Tejkan paqlhuucha val, ex ni Pablo junil ni Bernabé:
\p —Kaʼaucha, kalaqʼanchoqoocha ketʼalaqauninkʼan talakachux
putaulanin taʼan laqputeʼeu ixchivinti ni Jalhachimoʼonuʼ,
para kakʼatsau tas tajunitacha.
\p
\v 37 Ni Bernabé va ixlhiʼuxaʼan ni Juan Marcos.
\v 38 Pero Pablo jantu kalhipaʼinil katalhaʼal porke
ni Juan Marcos valiʼiy lakmakauntijlal laka estado Panfilia
y jantu kataylhaʼal kun ixlhitapatsakʼan yu ixtatʼajun
makanaʼ.
\v 39 Ex laqatapʼasta talalaktanchanil tus tatalaqlvaqlhi.
Chuncha ni Bernabé tʼaʼalcha chʼantaun ni Marcos y tapuʼal
barco, tachaʼal tus Chipre.
\v 40 Pero yu Pablo laksaklhi ni Silas para yucha chʼantaun
katʼaʼal, ex chuncha tachun yu jatʼalaqaunin ali yu jatʼalapanakni
taskʼinil ixjamapayninti ni Dios por yuʼuncha, ex taʼalcha.
\v 41 Va tatapasaʼol xaʼestado Siria ali xaʼestado Cilicia
y tamaʼayajnil tachun yu ancha ixtalhakapuʼan.
\c 16
\s Ni Timoteo jalaktʼaʼal ni Pablo ali Silas
\p
\v 1 Ex va tachaʼal laka putaulan Derbe ali laka putaulan
Listra. Ancha ixvil qayntaun yu ixlhakapuʼan yu ixjunkan
Timoteo. Yu ixnati vachuʼ ixlhakapuʼan. Yucha va qayntaun
israelita ixjunita pero yu ixpay va qayntaun griego
ixjunita.
\v 2 Ni lapanakni yu ixtalhakapuʼan yu ixtavilanal laka
putaulan Listra ali laka putaulan Iconio ox ixtalhichiviniy
ni Timoteo.
\v 3 Ni Pablo maqamal katʼaʼal ni Timoteo. Pero pʼunaj
xvililichukʼupʼuxniʼelal, va tamakal tacha ixputsukukʼan
ni israelitas para ox katalaqtsʼil ni israelitas yu
ancha ixtavilanal porke tachun ixtakʼatsay ni ixpay
va griego ixjunita.
\v 4 Tejkan ixtatapasay ni putaulanaxna va ixtaxaqalay
yu ancha ixtalhakapuʼan. Talhichivinil tachun yu talhinaul
yu jamalaqachal ni Jesús ali yu xalajʼaynin yu ixtalhakapuʼan
yu ixtavilanal Jerusalén. Va ixtamasuniy para katamakal
chuncha tacha jamasunikal.
\v 5 Chuncha yu ixtalhakapuʼan apalay ox talhakapuʼal
y lhilhiy ixtatalhavay.
\s Ni Pablo laqtsʼil la ixtalakavanti qayntaun yu machaqaʼ Macedonia
\p
\v 6 Ni Espíritu Santo jantu kalakmakaul kataʼal laqputeʼenin
ni ox chivinti tus Asia. Xlhiyucha tapuʼal xaʼestado
Frigia ali xaʼestado Galacia.
\v 7 Tejkan tachaʼal xaʼestado Misia va ixtaʼuxaʼan
Bitinia pero ni Espíritu Santo jantu kalakmakaul.
\v 8 Tejkan tatapasaʼol laka estado Misia va tachaʼalcha
tus laka putaulan Troas.
\p
\v 9 Ex tejkan tsʼis val ni Pablo tasunil la ixtalakavanti
qayntaun lapanaki yu machaqaʼ xaʼestado Macedonia yu
ancha ixyal. Ni anchanu lapanaki tapayninil, va naul:
“Kʼatʼantʼikcha Macedonia para kilaʼaqtayjuu.”
\v 10 Tejkan chuncha laqtsʼil ni Pablo la ixtalakavanti,
ex niman klaqlaʼoxiu kiʼaxtoqnukʼan para kajkʼaucha
xaʼestado Macedonia porke ox kʼatsau ni va Dios kintalhijunin
kaklaqlhixaqalau yu ox chivinti yu ancha ixtavilanal.
\s Ni Lidia vachuʼ lhakapuʼal Dios laka putaulan Filipos
\p
\v 11 Chuncha ni kijnan ktaxtuucha Troas, va kpuʼau barco,
vas kʼau tus laka putaulan Samotracia. Ex ataun julchan
val vachuʼ kpuʼau barco, kchaʼau tus laka putaulan Neápolis.
\v 12 Ex ancha kpatajuucha ex kʼaucha laka putaulan
Filipos taʼan ixtavilanal ni Romanos. Yucha va taun
putaulan yu apalay ay ixjunita ancha la xaʼestado Macedonia.
Ancha jantu paqlhuu kaktaulau.
\v 13 Tejkan val xajulchan jastaknati ktaxtuucha laka
putaulan, kʼaucha ixlhimaqspaʼ tus laʼaxkan, ijkʼatsau
ni ancha lay katʼematʼi taʼan ixtaskʼin Dios. Ancha
ktaulau, klaktʼachiviniu ni xanatin yu ancha ixtaʼaqxtoqnun.
\v 14 Qayntaun xanati yu kintaqasmaknin va ixjunkan
Lidia. Va machaqaʼ Tiatira ixjunita. Yucha istʼay ox
laqchʼiti yu laqlhuu xtapal. Yucha ayaj ixtoʼoyay ni
Dios. Ni Jalhachimoʼonuʼ Dios aqtayjul para kalhakapuʼal
ixchivinti ni Pablo.
\v 15 Ex tejkan aqchajʼaul ni anchanuʼ xanati chʼantaun
kun ixlapanakni va kintatapayninin, va naul:
\p —Incha lhilayatʼik ni laqsaval klhakapuʼan ni Jalhachimoʼonuʼ,
ex kʼatʼapʼasayapitik la kinchaqaʼ para ancha kaloʼojtʼik.
\p Ex laqa tapʼaysni kintalhijunin kakloqojvi la ixchaqaʼ.
\s Chʼikal ni Pablo ali Silas
\p
\v 16 Tauncha julchan ni kijnan xkʼantau skʼinin Dios,
va kpaxtoqvi qayntaun jatsiʼi yu ixlhitʼajun jantu ox
espíritu. Ni anu espíritu ixmasuniy ni jatsiʼi yu katapasayaʼ
astan yu jantukaʼ ixtapasay. Yu ixʼukxtinin ni anchanuʼ
jatsiʼi ox ixtapulhajay por ixchivinti yu ixnajun.
\v 17 Ni jatsiʼi ixkintatixkaulhaʼantan ni kijnankʼan
ali Pablo, va la pʼays ixtʼasay, va ixnajun:
\p —Ni aniy lapanakni yuʼuncha va ixʼoqxtamatin ni Dios
yu vilchal laktʼiyan. Yuʼuncha talaqputeʼeniyan tas
laycha kʼapʼulaqtʼaxtʼutʼik.
\p
\v 18 Ni anchanu jatsiʼi paqlhuucha chuncha ixkintatixkaulhitʼaunan.
Ex ni Pablo jantu kamaqamal, va talaqaspʼiklhi y junil
ni jantu ox espíritu:
\p —Kitʼin ijkunan la ixtaqaʼuti ni Jesucristo, kʼamakʼaunchʼoʼocha
ni aniy jatsiʼi.
\p Ex va nimancha taxtuchoqol ni jantu ox espíritu.
\p
\v 19 Tejkan talaqtsʼil ixʼukxtinin ni jatsiʼi tacha
tapasal y takʼatsal ni jantucha lay katalhajal tumin
ex tachʼapal ni Pablo ali Silas, talhaʼal laklhitamau
taʼan ixtavilanal ni jalhachimoʼonun.
\v 20 Ex yuʼuncha tachivintanunil ni jalhachimoʼonun,
va tanaul:
\p —Ni aniy lapanakni yuʼuncha va israelitas tajunita,
chavaycha tamalukujlay ni lapanakni yu tavilanal aniy
laka putaulan.
\v 21 Yuʼuncha talhinajun aputaun putsuku taʼan kijnan
jantu xtaqnikanau lakatin kamakau yu Romanos juntau.
\p
\v 22 Ex tus tachun ni lapanakni va chʼantaun tamakal
ixchivintikʼan. Ex yu jalhachimoʼonun talhinaul ixlajʼexnikkʼan
ixlaqchʼitikʼan ni Pablo ali Silas y vachuʼ ixlaqmaqanaqkan.
\v 23 Ex tus ox jalaqmaqanaqkal, y astan ankal jalaqmaqanuka
laka pachʼin. Talhijunil ni jalhistaknaʼ ox kalaklhistaklhi.
\v 24 Tejkan chuncha lhijunkal ex laklhaʼal apulaktaun
taʼan ox ixpulakna ni pachʼin. Ancha jalaqtsʼanʼaqsʼulakanchalcha
kun kʼiu.
\s Yu xalhistaknaʼ tachʼinin lhakapuʼal ni Cristo
\p
\v 25 Tejkan laqchaʼal pakltaun tsʼis ni Pablo ali Silas
ixtaskʼin Dios y vachuʼ ixtamilpay y yu alati tachʼinin
ixtaqasmatʼa.
\v 26 Ex nimancha alil ay jaxkapʼikniti tus laklaʼol
xaputayan ni pachʼin. Va talaqltiʼaʼol tachun ni xamatiʼ
y tus talajʼexʼol tachun ixkadenaskʼan ni tachʼinin.
\v 27 Chuncha niman kujlhi ni jalhistaknaʼ y laqtsʼil
tachun ni xapuertas tus ixtalaqltiʼaʼojota. Ex niman
maxtul ixespada, va ixmaqniputunkan ixlaqʼaman porke
lhilal taqosʼol tachun ni tachʼinin.
\v 28 Pero Pablo la pʼays chivinil, va junil:
\p —Jantu kʼalhimaqchʼapʼukʼa milaqʼaman. Tachun ni kijnankʼan
va si aniy kʼalintau.
\p
\v 29 Ex ni jalhistaknaʼ skʼinlhi qachitaun qaʼichi
yu kamapulkul y takyautanuchal laka pachʼin. Taʼaqtsoqoqtanil
ni Pablo ali Silas. Tus ox ixjaxkʼapʼikninta.
\v 30 Ex lakmaxtul, va lakjunil:
\p —Xapaynin, ¿tisuncha maqskʼiniy kakmakal para kaklaqtaxtul?
\p
\v 31 Ex tanaul:
\p —Kalhakʼapʼupʼi ni Jalhachimoʼonuʼ Jesucristo ex kʼalaqtʼaxtʼuyeʼe
kun tachun milapanakni yu tavilanal la minchaqaʼ.
\p
\v 32 Ex ni Pablo ali Silas talhixaqalal ixchivinti
ni Jalhachimoʼonuʼ Jesús vachuʼ kun tachun yu ixtavilanal
la ixchaqaʼ.
\v 33 Ni jalhistaknaʼ laklhaʼalcha para kalaqchaʼanil
taʼan ixtataqalhita. Ex astan niman aqchajʼaul kun tachun
ixlapanakni.
\v 34 Ex jalaklhaʼal ixpulakna la ixchaqaʼ y va jalakmulal
laka mesa para kalakvaval. Tachun yu ixlapanakni ayaj
talhiʼachantajul porke talhakapuʼal ni Dios.
\p
\v 35 Tejkan tunkunchoqolcha ex ni jalhachimoʼonun tamalaqachal
ixpoliciaskʼan para katalaqʼal ni jalhistaknaʼ y katamaxtuchoqolcha
ni Pablo ali Silas.
\p
\v 36 Ex ni jalhistaknaʼ junil ni Pablo:
\p —Chavay ni jalhachimoʼonun kintalhijunil kaklamaxtuchoqoocha.
Chavay laycha katʼaxtʼutʼik y oxamaktauncha kapʼinchʼoʼotʼik.
\p
\v 37 Pero ni Pablo lakjunil ni policias:
\p —Kijnankʼan va Romanos kuntau. Pero mas chuncha kintalaqmaqanaqni
la ixlakaʼukxpukʼan ni lapanakni y kintamanun laka pachʼin.
Chavaycha kintamaxtuputunan laqatamaqsaq. Pero kijnan
jantu kajkʼanau. Tsʼanqay yuʼuncha kintamin maxtunun.
\p
\v 38 Ex ni policias taʼalcha laqputeʼeninin ni jalhachimoʼonun.
Tejkan takʼatsal ni yuʼuncha va Romanos ixtajunita ex
ayaj tatalhanal.
\v 39 Ex yuʼuncha tamil tapaynininin para kalaqmalaqmixinikal,
ex chuncha tamaxtulcha y tatapayninil para katataxtulcha
ni laka putaulan.
\v 40 Tejkan tataxtulcha laka pachʼin va taʼal la ixchaqaʼ
Lidia. Va ancha talaqʼal yu ixtalhakapuʼan Dios y tamalakaʼulal.
Ex taval taʼanchoqolcha.
\c 17
\s Laka putaulan Tesalónica tatalaktʼilhil ni lapanakni
\p
\v 1 Tatapasal xaputaulan Anfípolis kun xaputaulan Apolonia,
ex tachaʼal tus xaputaulan Tesalónica. Ancha ixʼalin
chaqaʼ taʼan ixtataqxtoʼa ni israelitas.
\v 2 Ex ancha tanul ni Pablo porke aqtsʼiyaj va chuncha
ixjunita ixputsuku. Aqtʼutu jakitʼachivinil ni lapanakni
kun ixchivinti Dios tejkan xajulchan jastaknati ixjun.
\v 3 Jalaqputeʼenil para katamalaqasil ixchivinti Dios
yu tsʼoqkanta y lakmasunil ni Cristo yu laksaklhi Dios
yucha ixmaqskʼiniy kamaqanlqajnal y kanil y astan kakujchoqol
laka putaknun.
\v 4 Ex lati yu israelitas va talhakapuʼal y chʼantauncha
taval kun Pablo ali Silas. Vachuʼ talhakapuʼal pumalhuu
yu jantu israelitas ixtajunita yu ixtatoʼoyay Dios y
vachuʼ lhuvaj xanatin yu ixlaktoʼoyakan tacha lajʼay
lapanakni.
\p
\v 5 Pero yu alati israelitas yu jantu katalhakapuʼal
yuʼuncha talhixiyaxlhi ni Pablo. Ex tamaqxtoqlhi yu
talaktuʼunun lapanakni yu ixtayanal laklhitamau para
katalaktʼilhil ni anchanu putaulan. Ex tatakyautanul
laqatapʼasta la ixchaqaʼ Jasón, va ixtapuxkajuy Pablo
ali Silas, para katalhaʼal taʼan ixʼalin ixtalhavaxtu
lapanakni.
\v 6 Pero jantu katatemal. Ex talhimil yu Jasón kun
alati yu ixtalhakapuʼan, va talhiminil taʼan ixtavilanal
ni jalhachimoʼonun. Pʼays talaktʼasal, va tanaul:
\p —Ni Pablo ali Silas tatʼajun lakltʼilhinin tus taʼakapuchun
ni lakamunukpaʼ, chavaycha vachuʼ tachil aniy.
\v 7 Yu aniy Jasón jalaqaʼil la ixchaqaʼ. Ni anchanu
lapanakni jantu tamakay yu lhinajun ni ay jalhachimoʼonuʼ
César. Yuʼuncha tanajun alin aqayntaun yu ay Jalhachimoʼonuʼ
yu junkan Jesús.
\p
\v 8 Tejkan chuncha taqasmaklhi ni jalhachimoʼonun kun
ixtalhavaxtu ni lapanakni, ayaj pʼaysni tatalakchʼilil.
\v 9 Ex ni Jasón kun yu alati yu ixtalhakapuʼan va tamakaunil
tumin ni jalhachimoʼonun y vachuʼ taxtaqlhi ixchivintikʼan
ni laqsaval jantu kataqosaʼ, para kataminchoqol astan.
Ex taʼalcha.
\s Yu machaqan laka putaulan Berea ox talaqaʼil ixchivinti Dios
\p
\v 10 Tejkan putsʼislhicha ex yu ixtalhakapuʼan tamalaqachal
ni Pablo ali Silas laka putaulan Berea. Tejkan ancha
tachaʼal, ex taʼal laqa chaqaʼ taʼan ixtataqxtoʼa ni
israelitas.
\v 11 Ni anchanu lapanakni yu machaqan Berea apalay
ox ixtalakpastaknan xajantu yu ixtavilanal Tesalónica
porke yuʼuncha ixtaqasmatʼa ni ox chivinti kun ay achati.
Va lhilhiy ixtaputeʼey ixchivinti Dios yu tsʼoqkanta
para katakʼatsal licha laqsaval kaval ixchivinti ni
Pablo.
\v 12 Qaynlhuu ni israelitas talhakapuʼal y vachuʼ talhakapuʼal
qaynlhuu xanatin yu ixlaktoʼoyakan tacha lajʼay lapanakni
yu jantu israelitas ixtajunita y vachuʼ qaynlhuu joʼakna.
\p
\v 13 Ni israelitas yu ixtavilananchal Tesalónica va
takʼatsal ni Pablo ixlaqputeʼey ixchivinti Dios laka
putaulan Berea. Ex vachuʼ taʼal laktʼilhinin ixtalhavaxtu
ni lapanakni ancha Berea.
\v 14 Ex yu ixtalhakapuʼan va niman tamalaqachal ni
Pablo kaʼalcha taʼan ixkilpaʼ lakamar pero yu Silas
kun Timoteo va tatamakaul ancha laka putaulan Berea.
\v 15 Lati lapanakni tatʼaʼal ni Pablo y tapuʼal laka
putaulan Atenas. Ancha ni Pablo jalaqmalaqachachoqolcha
para kataminchoqolcha Berea y katajunil ni Silas kun
Timoteo para niman katalaqʼal taʼan ixvilchal ni yucha.
\s Ni Pablo laqputeʼel ixchivinti Dios laka putaulan Atenas
\p
\v 16 Ex ni Pablo va ixlakpakxanʼita para katachaʼal
ni Silas kun Timoteo. Va ayaj maqaninil tejkan laqtsʼil
ni xalapanakni Atenas por lhuvaj ixdioseskʼan ixtalhitʼajun
yu ixtatoʼoyay.
\v 17 Yucha ixjalaqputeʼeniy ni israelitas taʼan ixtataqxtoʼa
chʼantaun kun yu jantu israelitas kataval yu ixtatoʼoyay
Dios. Vachuʼ laklhitamau lhilhiy ixjalaqputeʼeniy ni
lapanakni.
\v 18 Anchanu laka putaulan ixtavilanal lapanakni yu
pulhuu jatalaniti ixtamispay, lati ixtamasuy yu tsʼoqlhi
ni Epikúreo y lati ixtamasuy yu tsʼoqlhi Estoiko. Yuʼuncha
vachuʼ tatʼachivinil ni Pablo kun lhuu lakiltsakʼastukni.
Lati lapanakni ixtalajuniy:
\p —¿Ka tisuncha najun ni aniy jachivinʼoj lapanaki?
\p Lati tanaul:
\p —Ka va lhichiviniy aputaun dioses.
\p Chuncha ixtanajun porke Pablo ixlhichiviniy Jesús
y vachuʼ ixlhichiviniy tacha pukujchoqol mas ixnitacha.
\v 19 Ex va tajuntalhaʼal taʼan junkan Areópago. Ancha
tajunil ni Pablo:
\p —Kijnan knaunau kilamasuniu yu sastʼi jatalaniti yu
uxintʼi masuy.
\v 20 Kilalhiminitau saystʼi jatapastakʼati y ijkʼatsaputunau
suncha naunputun.
\p
\v 21 Chuncha tanaul porke tachun yu machaqan Atenas
y vachuʼ lapanakni yu alakataun machaqan yu ancha ixtavilanal
vamun yuʼ ixtamaqamay katalhichivinil y kataqasmaklhi
yu saystʼi jatapastakʼati.
\p
\v 22 Ex ni Pablo ostaulal la ixlakaʼukxpukʼan yu ancha
ixtavilanal laka Areópago. Va lakjunil:
\p —Lapanakni yu vilanantʼik aniy Atenas. Kitʼin klaqtsʼil
la mimputaulankʼan ayaj tʼoʼoyayatʼik midioseskʼan.
\v 23 Va xaktijuyal la mimputaulankʼan y klaqtsʼil yu
xaʼaltares midioseskʼan. Laqataun altar va inchine tsʼoqmukʼakanta:
“XAʼALTAR DIOS YU JANTU MISPAKAN.” Va yucha yu kaklalaqputeʼeniyau
yu tʼoʼoyayatʼik mas jantu mispʼayatʼik.
\p
\v 24 ’Ni Dios yu makal ni lakamunukpaʼ y tachun yu
axtoqnuʼ va yucha xaJalhachimoʼonuʼ junita laktʼiyan
ali lakamunukpaʼ. Yucha jantu kataulal laqa chaqan yu
tamakay lapanakni para katatoʼoyal.
\v 25 Yucha jantu tuʼuchun maqskʼiniy yu lay katamakanil
ni lapanakni. Va yucha jalaqxtaqniy ixjatsukuntikʼan
ni lapanakni kun ixjaxanitikʼan y tachun axtoqnuʼ.
\p
\v 26 ’Yucha makal qayntaun lapanaki para kapuʼalil
tachun lapanakni por taʼakapuchun lakamunukpaʼ. Va yucha
lakʼulanil julchan tas vanancha kataqmaqayaʼ laqatamin
paises y vachuʼ toʼoxtaycha tapaxtoqniy katataulal.
\v 27 Ni Dios chuncha makal va para lay katalakxkaul
ni lapanakni y katatemal. Yucha jantu maqati katsukul
por qayntamin kijnankʼan.
\v 28 Va yucha putʼaunau y va yucha putiʼukxuyanau y
va yucha putsukuyau. Vachu chun tacha tanaul lati milapanaknikʼan
yu tatsʼoqlhi, yu najun inchine: “Kijnan va sasʼatʼan
juntau.”
\v 29 Xlhiyucha va por sasʼatʼan Dios juntau, jantu maqskʼiniy
kalakpastakvi ni Dios va oro junita, y vachuʼ jantu plata
ali chiyux ali axtoqnuʼ yu lay tamakay lapanakni Kun
ixjatapastakʼatkʼan.
\v 30 Tejkan maqancha chuncha ixtamakay ni lapanakni
ex va tacha jantu ixtamakay kuenta ni Dios. Pero chavaycha
laklhijuniy tachun ni lapanakni para katamapaxal ixjatapastakʼatkʼan
mas va toʼoxtaycha kaval taʼan tavilanal.
\v 31 Yucha ox kʼatsay tisuncha julchan vas kalakmukʼaniyaʼ
ixlaqtaqalkʼan tachun ni lapanakni taʼakchun ni lakamunukpaʼ.
Chuncha kamakayaʼ por qayntaun lapanaki yu laksaklhi.
Va chuncha lakmasunil tachun ni lapanakni porke ni Dios
majkujuchoqol ni anchanu lapanaki mas ixnitacha —naul
ni Pablo.
\p
\v 32 Tejkan taqasmaklhi va naul ni kujchoqol qayntaun
janiniʼ ex lati talaktuʼul, pero yu alati tanaul:
\p —Kijnan kaklaqasmaknichoqoyau minchivinti ataun julchan.
\p
\v 33 Chuncha ni Pablo jalakmakaulalcha ex anchoqolcha.
\v 34 Lati lapanakni chʼantaun tatʼaval ni Pablo y talhakapuʼal.
Vachuʼ chʼantaun tʼaval qayntaun yu ixjunkan Dionisio
yu chʼantaun ixjunita kun lapanakni yu ixtataqxtoʼa
Areópago ali qayntaun xanati yu ixjunkan Dámaris ali
alati lapanakni.
\c 18
\s Ni Pablo vil laka putaulan Corinto
\p
\v 1 Ex chuncha ni Pablo taxtuchoqolcha ni Atenas, va
alcha laka putaulan Corinto.
\v 2 Ancha mispal qayntaun joʼati israelita yu ixjunkan
Akila yu tsukul laka putaulan Ponto. Yucha va exnikaʼ
chaʼal laka putaulan Corinto kun ixanati yu ixjunkan
Prisila. Va taminchal Roma porke yu jalhachimoʼonuʼ
Claudio lhinaul katataxtul tachun yu israelitas. Ex
chuncha ni Pablo jalaqʼal ni yuʼuncha.
\v 3 Ancha jalaktʼataulalcha y ixjalaktʼatapatsay kun
yuʼuncha porke va putaun ixlhitapatsakʼan ixtalhitʼajun.
Yuʼuncha ixtamakay chaqaʼ yu makalonaj.
\v 4 Ixlhitamin semana tejkan xajulchan jastaknati ixjun,
ni Pablo si ixʼan taʼan ixtataqxtoʼa ni israelitas kun
yu jantu israelitas kataval. Va ixjalaqxaqalay para
katalhakapuʼal.
\p
\v 5 Chuncha ni Silas kun Timoteo taminchal xaʼestado
Macedonia. Tejkan tachinchal Corinto, ex ni Pablo jantucha
kataylhaanil ixmakaka chaqaʼ porke lhilhiy ixlaqputeʼey
yu ox chivinti yu laqsaystʼi. Va ixlakmasuniy ni israelitas
ni Jesús va Cristo ixjunita yu laksaklhi Dios.
\v 6 Pero lati yu israelitas talhitalqamal y laqxtoqnuʼ
tajunil. Ex ni Pablo kʼalhal ni ixlaqchʼiti, va lakjunil:
\p —Jantucha kimpaxtoqniy klaʼaqtayjuu. Incha katsʼanʼayapitik,
ex meʼemanchkʼan milaqtaqalkʼan kunaʼ. Chavaycha kajkalaqʼanaʼ
yu jantu israelitas kataval.
\p
\v 7 Ex taxtulcha ni Pablo laqa chaqaʼ taʼan ixtataqxtoʼa
ni israelitas, alcha taʼan ixtʼalaqxtoqyanal ataun chaqaʼ
yu ixnavin ixjunita ni Justo yu ixtoʼoyay Dios.
\v 8 Yu xaʼukxtin ixjunita taʼan ixtataqxtoʼa ni israelitas
va ixjunkan Crispo. Yucha lhakapuʼal ni Jalhachimoʼonuʼ
Jesús, vachuʼ talhakapuʼal tachun ixlapanakni. Vachuʼ
qaynlhuu lapanakni ni anchanu putaulan Corinto taqasmaklhi
yu ox chivinti talhakapuʼal y taʼaqchajʼaul.
\p
\v 9 Tauncha julchan tejkan tsʼis ixjunita ex ni Jalhachimoʼonuʼ
xaqalal ni Pablo la ixtalakavanti, va junil:
\p —Jantu katʼalhan. Katʼaylhipʼi laqputeʼeniʼ kinchivinti,
y jantu kakʼikstʼaktʼi.
\v 10 Kitʼin kʼalinta kun uxintʼi y jantu matichun lay
kamakaniyan tuʼuchun. Ni aniy putaulan pumalhuu lapanakni
katajunaʼ kilapanakni.
\p
\v 11 Ex chuncha ni Pablo tamakaul masunuʼ ixchivinti
Dios tus taun jachʼitin apakltaun ancha Corinto.
\v 12 Pero tejkan Galión ixjunita xagobernador ancha
xaʼestado Akaya ex ni israelitas va chʼantaun taval
para katachʼapal ni Pablo, y talhaʼal laka pulakchivin.
\v 13 Tanaul:
\p —Ni aniy lapanaki jantu vas jamasuniy ixtoʼoyaka Dios
ni lapanakni. Yu jamasuniy jantu chʼantaun kaval tacha
kimputsukkʼan kijnan.
\p
\v 14 Pero tejkan va laycha kachivinil ni Pablo ex ni
Galión naul:
\p —Incha aniy lapanaki va laqsaval kalhitsukul taun ay
laqtaqal u incha kamakal yu jantu ox, ex chun kakmakanil
yu kilalhijunau uxiknan yu israelitas untʼatʼik.
\v 15 Pero va por jantu tamaqamayan ixchivinti u ni
taqaʼuti yu lhichiviniy y por jantu va taun lhilayatʼik
kun milhachimoʼonkʼan. Ex kalaqlaʼoxitʼik meʼemankʼan.
Kitʼin jantu kimpaxtoqniy kaklaqlaʼoxil.
\p
\v 16 Ex lhinaulcha katataxtuchoqol laka pulakchivin.
\p
\v 17 Ex ni lapanakni yu ancha ixtayanal tachʼapal qayntaun
yu ixjunkan Sóstenes va qayntaun xaʼukxtin ixjunita
taʼan ixtataqxtoʼa ni israelitas. Va talakasamal ixlhimaqspaʼ
ni pulakchivin. Pero ni Galión jantu kamakal kuenta.
\s Ni Pablo anchoqolcha laka putaulan Antiokía la xaʼestado Siria
\p
\v 18 Chuncha ni Pablo vananaj apaqlhuu tamakaul ancha
laka putaulan Corinto. Ex astan lakmastakʼachoqolcha
yu talhakapuʼan y chʼapalcha ixlakatinkʼan para kaʼal
xaʼestado Siria. Va laktʼaʼal Prisila ali Akila. Tejkan
tachaʼal laka putaulan Cencrea ex ni Pablo aqsikkal
tus laqpaʼasas makakal. Chuncha makakal para kapukʼatsakal
ni va laqsaval kamakayaʼ yu naul, yu junkal ni Dios.
Ex tataxtuchoqolcha Cencrea, tataylhaʼal ixlakatinkʼan
para kataʼal tus xaʼestado Siria. Va tapuʼal barco.
\v 19 Astan tachaʼal laka putaulan Éfeso y ancha jamakauntijlal
ni Prisila ali Akila. Pero ni Pablo tapasaʼelal laqa
chaqaʼ taʼan ixtataqxtoʼa ni israelitas y laktʼachivinil.
\v 20 Yuʼuncha tatapayninil ni Pablo para maqan kataulal
pero yucha naul ni jantu.
\v 21 Va lakmastakʼachoqolcha, va lakjunil:
\p —[Va maqskʼiniy kajkʼal laka Jerusalén para yu kʼatan
yu kaʼalinaʼ.] Incha Dios najun, kaklalaqminchoqoyau
astan.
\p Ex taxtuchoqolcha ancha Éfeso, va puʼal barco.
\p
\v 22 Tejkan chaʼal Cesarea ex jalaqkilal yu ixtalhakapuʼan
ancha Jerusalén ex astan taylhaʼal ixlakatin para kachaʼal
laka putaulan Antiokía.
\v 23 Jantu paqlhuu kataqmaqal ancha, ex taxtuchoqol,
va alcha tiʼukxuntayan talakachux xaputaulanaxna xaʼestado
Galacia kun xaʼestado Frigia. Va ixlaqxaqalay tachun
ni lapanakni yu ixtalhakapuʼan para ox katataylhaʼal
la ixlhakapuʼatikʼan.
\s Alcha ni Apolos laka putaulan Éfeso
\p
\v 24 Ancha laka putaulan Éfeso chaʼal qayntaun israelita
yu ixjunkan Apolos yu machaqaʼ Alejandría ixjunita.
Yucha ayaj kʼusi ixchiviniy y la ox ixmispay ixchivinti
Dios yu istsʼoqkanta.
\v 25 Yucha ixlanita lati yu lhinajun ni Jalhachimoʼonuʼ
Dios. Yucha chivinil kun tachun achati y ox vas ixlhichiviniy
ni Jesús pero ixmispay vamun yu masul ni Juan yu jamaqchajʼavanan.
\v 26 Taval ni Apolos aqtayl laqxaqalay sin talhanti
ni lapanakni laqa chaqaʼ taʼan ixtataqxtoʼa ni israelitas.
Pero tejkan taqasmaklhi ixchivinti ex ni Prisila ali
Akila tajuntalhaʼal la ixchaqakʼan. Ancha tamalanil
para apalay ox kamalaqasil ixlakatin Dios.
\p
\v 27 Taval ni Apolos uxaʼal xaʼestado Akaya ex chuncha
yu ixtalhakapuʼan Jesús ancha Éfeso va taʼaqtayjul para
lay kaʼal. Tatsʼoqnil aqxtaun jalhiki para ox katalaqaʼil
ancha Akaya yu ixtalhakapuʼan Jesús. Tejkan chaʼal Akaya,
ex ni Apolos ox jalaqʼaqtayjul yu ixtalhakapuʼan por
ixjamapayninti Dios.
\v 28 La ixlakaʼukxpukʼan ni lapanakni ni Apolos ox
ixjalaqlhixaqalay ni israelitas yu jantu ixtalhakapuʼan
Jesús taʼan jantu vas ixtamasuy ixchivinti Dios. Ex
yuʼuncha jantu lay ixtalaktanchaniy ni Apolos. Kun ixchivinti
Dios yu tsʼoqkanta yucha ixmasuy ni Jesús va Cristo
yu laksakta Dios.
\c 19
\s Ni Pablo alcha laka putaulan Éfeso
\p
\v 1 Tejkan ixvilchal Apolos laka putaulan Corinto xaʼestado
Akaya ex ni Pablo tapasal laka aspajunaxnan para kachaʼal
laka putaulan Éfeso. Ancha japaxtoqlhi yu ixtalhakapuʼan.
\v 2 Va laklhisakmil:
\p —¿Ni uxiknan laʼaʼitʼik ni Espíritu Santo tejkan lhakʼapʼupʼintʼik?
\p Ex yuʼuncha tanaul:
\p —Kijnan jantu kʼatsayau incha alin ni Espíritu Santo.
\p
\v 3 Ex ni Pablo aaqtaun laklhisakmichoqol:
\p —¿Ex maticha tamasunin kaʼaqchʼajʼautʼik?
\p Ex yuʼuncha tajunil:
\p —Kijnan va Juan kintamasunin.
\p
\v 4 Ex lakjunil ni Pablo:
\p —Chun, ni Juan laqmaqchajʼaval ni lapanakni yu ixtamapaxaputun
ixjatapastakʼatkʼan. Lakjunil para katalhakapuʼal yu
istsʼanqay kamil astan. Yucha va Jesús yu lhichivinil
ni Juan.
\p
\v 5 Tejkan chuncha taqasmaklhi va taʼaqchajʼaul la
ixtaqaʼuti ni Jalhachimoʼonuʼ Jesús para kataval ixlapanakni
ni yucha.
\v 6 Chuncha laqmoqslanil ixmakaʼ ni Pablo y talaqtanuʼol
ni Espíritu Santo, ex taʼaqtaylcha tachiviniy lhichivin
yu jantu ixtamispay y vachuʼ ixtalaqputeʼey ixchivinti
Dios.
\v 7 Por tachun ni yuʼuncha va pumakautʼuy joʼakna ixtajunita.
\p
\v 8 Chuncha laʼatʼutu malkuyuʼ ancha ixvil ni Pablo,
y va si ixʼan taʼan ixtataqxtoʼa ni israelitas. Ixjalaktʼachiviniy
ni lapanakni sin talhanti y ixjalakmasuniy tacha lhachimoʼonun
Dios para katalhakapuʼal.
\v 9 Pero lati por ixlaktuʼuntikʼan jantu katamaqamal
katalhakapuʼal. Yuʼuncha vamun laqxtoqnuʼ talhichivinil
ixlakatin Dios la ixlakaʼukxpukʼan tachun ni lapanakni.
Ex chuncha ni Pablo jalakmakauntijlalcha ni yuʼuncha,
ex yu ixtalhakapuʼan laklhaʼal la iskuela qayntaun lapanaki
yu ixjunkan Tirano. Ancha lhilhiy ixlakmasuniy.
\v 10 Chuncha tatapasal laʼatʼuy jachʼitin y xlhiyucha
tachun yu ixtavilanal xaʼestado Asia mas yu israelitas
ali yu jantu israelitas kataval va si taqasmaklhi ixchivinti
ni Jalhachimoʼonuʼ Jesús.
\s Yu istsʼalan Esceva
\p
\v 11 Ni Dios ixtaqniy tapʼasta ni Pablo para lay kamakal
lajʼay axtoqnuʼ yu jantu aqtaun laqtsʼinkan.
\v 12 Ni lapanakni ixtalhiminiy payo kun laqchʼiti ni
Pablo. Ex mas va tsʼuniy ixtamalakavay va si palay ixtajunchoqoy
tachun ni taqanʼanin yu ixtalhaaniy y ixtataxtuʼojoycha
ni jantu ox espíritus yu ixtalhitʼajun.
\v 13 Ancha ixtaʼalin lati israelitas yu ixtatakyautsukuy
maxtuninin aqmoqxnun ni lapanakni. Ex yuʼuncha vachuʼ
ixtamaxtuniputun aqmoqxnun kun ixtaqaʼuti ni Jalhachimoʼonuʼ
Jesús. Ixtatʼachiviniy ni aqmoqxnun y ixtajuniy:
\p —Kijnan klajunau kun la ixtaqaʼuti ni Jesús yu laqputeʼey
Pablo, katʼaxtʼutʼikcha.
\p
\v 14 Ex vachu chun tanaul yu pumatujun istsʼalan qayntaun
joʼati yu ixjunkan Esceva. Yucha va qayntaun ixʼukxtinkʼan
xakuras ni israelitas.
\v 15 Pero qaltayanal ni jantu ox espíritu, va naul:
\p —Kitʼin ijkʼatsay tasʼayucha ni Jesús y vachuʼ kʼatsay
tas ayucha ni Pablo. Pero yu uxiknan, ¿tasʼayuʼuncha
untʼatʼik?
\p
\v 16 Ex ni lapanaki yu ixlaqtanun ni jantu ox espíritu
va niman jakʼiuklnil va jalakchʼapachal y jalaklhajal
tus laqmaqaʼasasan tataxtul laqa chaqaʼ y tus ox tataqalhil.
\p
\v 17 Ex chuncha takʼatsaʼol tachun yu ixtavilanal laka
putaulan Éfeso mas yu israelitas y mas yu jantu israelitas
kataval. Tus ox tatalhanal y tus tachun ay ixtamakay
ixtaqaʼuti ni Jesús.
\v 18 Lhuvaj lapanakni talhakapuʼal y talhitaulal la
ixlakaʼukxpukʼan ni lapanakni ixtalaqalhinkʼan y taskʼil
para kalaqmalaqmixinikal yu ixtamakay la ixputsukukʼan
yu tamakauntijlal.
\v 19 Vachuʼ qaynlhuu lapanakni yu ixtachavanan tamaqxtoqlhi
ixjalhikixkʼan yu ixlhichiviniy ixlhitapatskʼan, tus
talaqxavaʼol la ixlakaʼukxpukʼan ni lapanakni. Ni xtapal
yu talaqxaval va tacha cincuenta mil xatumin plata ixjunita.
\v 20 Chuncha apalay ixtalhavay yu ixtalhakapuʼan ixchivinti
ni Jalhachimoʼonuʼ Jesús y vachuʼ ixtalaqtsʼin tas ixjunita
ixtapʼasta.
\p
\v 21 Tejkan chuncha tapasal ex ni Pablo va pastaklhi
kapuʼal xaʼestado Macedonia kun xaʼestado Akaya tus
kachaʼal laka putaulan Jerusalén. Vachuʼ ixnajun:
\p —Tejkan kakchaʼanaʼ ex astan vachuʼ kajkʼanaʼ laka
putaulan Roma.
\p
\v 22 Ex ni Pablo laqmalaqachal la xaʼestado Macedonia
qayntʼuy yu chʼantaun ixjatʼatapatsay. Qayntaun va Timoteo,
yu aqayntaun va Erasto ixjunkan. Ni Pablo vananaj taylhaanil
xaʼestado Asia.
\s Talaktʼilhil ni lapanakni laka putaulan Éfeso
\p
\v 23 Ex ancha Éfeso lati yu ancha machaqan va ayaj
talaktʼilhil por jantu ox ixtalaqtsʼin ixlakatin Dios.
\v 24 Qayntaun yu ixjunkan Demetrio yu ixlaqltapatsay
plata, va ixmakay lakstʼuniy xajachaqan yu ixtasuy tacha
xachaqaʼ taʼan ixtoʼoyakan ixdioskʼan yu ixjunkan Diana.
Ni lapanakni yu ixtaʼaqtayjuy Demetrio va ayaj ox ixtalhajay.
\v 25 Ex yu Demetrio jalaqmaqxtoqlhi yuʼuncha kun alati
lapanakni yu va aqstanchun ixlhitapatskʼan ixjunita,
va lakjunil:
\p —Lapanakni, kʼatsʼayatʼik ni aniy kilhitapatskʼan la
ox pulhajayau.
\v 26 Pero laqtsʼinatʼik y asmaktʼatʼik tacha makay
ni anuʼ yu junkan Pablo. Yucha najun ni jantu laqsaval
dios kaval yu tamakay ni lapanakni. Yucha laqxaqalay
y lakmapaxaniy ixjatapastakʼatkʼan lhuvaj lapanakni
aniy laka putaulan Éfeso y va laycha taʼakchuncha xaʼestado
Asia.
\v 27 Chavaycha kavalay katsʼanqayacha kilhitapatsakʼan
ni kijnan y vachuʼ kavalay jantucha katoʼoyakanaʼ ixchaqaʼ
kidioskʼan Diana yu ox toʼoyakan taʼakchun xaʼestado
Asia y mas va toʼoxtaycha lakamunukpaʼ, ex ni yucha ka
jantucha tuʼuchun xtapal kunaʼ kun ni lapanakni —naul
ni Demetrio.
\p
\v 28 Tejkan chuncha taqasmaklhi ayaj tatalqamal, va
pʼays tachivinil, va tanaul:
\p —Jantu aqtaun kamiʼol ni kidioskʼan Diana yu toʼoyayau
aniy Éfeso.
\p
\v 29 Ex tachun ni putaulan tus tatalaktʼilhiʼol. Lati
ni lapanakni tachʼapal qayntʼuy ixtʼaltanan ni Pablo
yu machaqan Macedonia yu ixjunkan Gayo ali Aristarco.
Va jalaqxaqamakal tus jalaklhachankal laqa chaqaʼ taʼan
ixtataqxtoʼa tejkan ixʼalin qamanti.
\v 30 Ni Pablo vachuʼ ixjalaqʼuxaʼan ni lapanakni para
kalaktʼachivinil pero yu ixtalhakapuʼan jantu katamakaul.
\v 31 Vachuʼ lati ni jalhachimoʼonun ni ancha xaʼestado
Asia yu ixʼamigos ni Pablo tamalaqachanil chivinti va
tatapayninil ni Pablo para jantu kaʼal taʼan ixtaʼaqxtoqnun
ni lapanakni.
\p
\v 32 Ex ancha taʼan ixtaʼaqxtoqnun ayaj pʼays ixtatʼasay
ni lapanakni. Lati ixtanajun taun chivinti, y lati aputaun
chivinti ixtanajun porke oxicha ixtatalaktʼilhita. Lati
jantucha ixtamalaqasichoqoy valiʼiycha alil taqxtoʼati.
\v 33 Ni israelitas tasalhaʼal qayntaun yu ixjunkan
Alejandro taʼan ixtayanal ni lapanakni para kalaktʼachivinil.
Lati yu ancha ixtaʼaqxtoqnun talaqputeʼenil ni Alejandro
ixlhilukujkʼan ni lapanakni. Ex yucha jalakmajkunil
para lay kalaktʼachivinil porke ixʼaqtayjuputun ixlapanakni.
\v 34 Pero tejkan takʼatsal ni yucha va israelita ixjunita,
ex taʼaqtaychoqol pʼays talaktʼasay tus tʼuy hora tataqmaqal,
va ixtanajun:
\p —¡Jantu aqtaun kamiʼol ni kidioskʼan Diana, yu toʼoyayau
aniy Éfeso!
\p
\v 35 Ex taval, qayntaun yu jatsʼoqʼulanan laka pulakchivin
va vak jalakmakal ni lapanakni, va jalakjunil:
\p —Uxiknan, yu xajoʼakna aniy laka putaulan Éfeso untʼatʼik,
tus tachun lapanakni takʼatsay ni aniy la kimputaulankʼan
ox toʼoyayau kidioskʼan Diana y vachuʼ ox lhistaktau
ixtʼatasun yu patajuchal laktʼiyan.
\v 36 Jantu matichun lay najun va jalaklkanti junita
yu klajunau. Ex chavaycha apalay ox saqcha kʼaʼuntʼik
y jantu tuʼuchun kamakʼatʼik yu jantu paxtoqniy kun
jatapastakʼati.
\v 37 Uxiknan jalaklhitʼantʼik pumatʼuy lapanakni aniy,
pero yuʼuncha jantu tuʼuchun katamakanil kidioskʼan
y jantu kataʼakchʼintamal kun ixchivintikʼan.
\v 38 Incha tachivintanuputun ni Demetrio chʼantaun
kun ixtʼatapatsanin ex lay kataʼal chivintanunin laka
pulakchivin ancha laqltiʼay y ancha tavilanal ni jalhachimoʼonun.
Va ancha katalaqlaʼoxil.
\v 39 Incha alin ataun yu skʼinpʼutʼunatʼik, ex maqskʼiniy
kaʼalil taun junta para kalaqlaʼoxikal.
\v 40 Pero chuncha tacha makayau, va laycha kamukʼanikau
laqtaqal por laktʼilhiyau ni putaulan. Jantu xtaqkan
lakatin chuncha kamakau y jantu lay tuʼuchun kanaunau
tisuncha ixlhiʼatal taqxtoqyau.
\p
\v 41 Ex tejkan chuncha naunʼol va lakmastakʼachoqolcha
ni lapanakni y taʼanchoqolcha.
\c 20
\s Ni Pablo al xalakatʼun Macedonia ali Grecia
\p
\v 1 Tejkan tamaktalcha ex ni Pablo jalakjuntaʼil yu
ixtalhakapuʼan, va jalakmalakaʼulal y jalakchivijval.
Ex lakmastakʼachoqolcha, va alcha xaʼestado Macedonia.
\v 2 Ancha tapasaʼol tachun putaulanaxna y jalakchivijval
ni lapanakni para katataylhaanil kun Dios. Taval chaʼal
xaʼestado Grecia.
\v 3 Ancha ixvil laʼatʼutu malkuyuʼ. Va ixpuʼuxaʼan
barco tus Siria pero tejkan kʼatsal ixtapakxanʼita ni
israelitas para katamakanil tuʼuchun, ex taspʼikchoqolcha
va puʼanchoqol laka chʼajaʼ xaʼestado Macedonia.
\v 4 Va tatʼaʼal ni Sópater yu machaqaʼ Berea, y vachuʼ
Aristarco ali Segundo yu machaqan Tesalónica, vachuʼ
Gayo yu machaqaʼ Derbe vachuʼ Timoteo y vachuʼ Tíkiko
ali Trófimo yu machaqan xaʼestado Asia.
\v 5 Yuʼuncha tapʼulʼal ex kintapakxanchaʼan tus laka
putaulan Troas.
\v 6 Tejkan paʼalcha ixkʼatankʼan ni israelitas tejkan
taʼuy pan sin levadura, ex ktaxtuucha ni laka putaulan
Filipos, y kpuʼau barco. Tejkan paqkis val va kchaʼau
Troas ancha klapaxtoqchaʼau kun yuʼuncha. Ancha xakvilanau
paqtujun.
\s Ni Pablo al laka putaulan Troas
\p
\v 7 Ex yu xapʼunaj julchan ni semana va chʼantaun ktaqxtoqvi
ni kijnankʼan yu ixlapanakni Jesús kuntau, va chʼantaun
kʼuu ni pan. Yu Pablo ixlakmasuniy ni lapanakni, ex taylhaʼal
ixchivinti tus pakltaun tsʼis val porke va ixmaqskʼiniy
kataxtul yu ataun julchan.
\v 8 Va ktaqxtoqvi yu pulaktaun ni chaqaʼ taʼan talman.
Ancha ixmaqtajita lhuvaj maklku.
\v 9 Taval qayntaun tsʼal yu ixjunkan Eutiko va ixvil
laka ventana. Ex yucha chʼapachal ltatati porke ni Pablo
ayaj panij jamalaninil. Ex ni anchanu tsʼal tus ox ltatal
y patajuchal tus taʼan talaqtʼutu ixtalmanixtu ni chaqaʼ,
va janinicha tasakchoqol.
\v 10 Ex ni Pablo niman taʼeltajul talaktsin, va laqatanul
ni anchanu tsʼal, va naul:
\p —Jantu katʼalhanantʼik. Vananaj kujta.
\p
\v 11 Ex taukʼachoqolcha taʼan talaqtʼutu chaqaʼ ni
Pablo, aqtaylcha lakmapitsiniy ni pan, ex taʼulcha. Chuncha
taylhaʼal ixchivinti tus tunkul ex astan anchoqolcha.
\v 12 Ex ni lapanakni va oxamaktauncha taʼanchoqol y
talhaʼanchoqol jakujnuʼ ni anchanuʼ tsʼal. Jantucha
apalay katamaqaninil.
\s Ni Pablo taxtul ni Troas, va al laka putaulan Mileto
\p
\v 13 Yu kijnankʼan ikpʼulʼau laka barco tus Asón para
ancha chʼantauncha kintatʼaʼan la kibarcokʼan ni Pablo.
Chuncha kmakau kilakchivintikʼan porke yucha maqamal
kaʼal laka chʼajaʼ tus Asón.
\v 14 Ex tejkan ancha klapaxtoqvicha laka putaulan Asón
ex taukʼalcha la kibarcokʼan. Ex kʼaucha ni putaulan
Mitilene.
\v 15 Ex ataun julchan val, kpuʼau ni barco y kchaʼau
ixlhiʼukstsʼuniy Quío. Ex ataun julchan val kchaʼau
laka putaulan Samos taʼan la ixkilpaʼ ni mar. Ex laka
putaulan Trigilio ancha kloqojtijlau. Ex ataun julchan
val taxtuchoqoocha, kʼaucha tus laka putaulan Mileto.
\v 16 Va chuncha kmakau porke Pablo jantu ixtaqmaqaputun
xaʼestado Asia xlhiyucha jantu kapuʼuxaʼal laka putaulan
Éfeso. Niman ixchaʼanputun ni Jerusalén porke ixpastakʼa
katapasachal ancha yu xakʼatan Pentecostes.
\s Ni Pablo lakmastakʼal xalajʼaynin yu ixtalhakapuʼan ancha Éfeso
\p
\v 17 Ancha xakvilanau laka putaulan Mileto, ex ni Pablo
malaqachanal ixlakjuntaʼika xalajʼaynin yu ixtalhakapuʼan
ancha Éfeso.
\v 18 Tejkan tachinchalcha ex lakjunil ni Pablo:
\p —Uxiknan kilamispayaucha tas xajkunitacha kun uxiknan
tejkan xaklatʼavilanau panchuncha aniy xaʼestado Asia.
\v 19 Lhilhiy xaktapatsaniy ni Dios yu kiJalhachimoʼonukʼan
y jantu ay xakmakakan. Tus aqlhuvaj xajqalhun por uxiknan
mas ayaj xakmaqanlqajnan por yu ixkintamakaniy lati
ni israelitas.
\v 20 Kitʼin jantu aqtaun kakmakauntijlal ixlaqputeʼeka
ixchivinti Dios yu lay kataʼaqtayjun. Va xaklamasuniyau
la ixlakaʼukxpukʼan ni lapanakni y vachuʼ la minchaqakʼan.
\v 21 Xajkalaqputeʼeniy ni israelitas ali yu jantu israelitas
kataval, ni va maqskʼiniy katamapaxal ixjatapastakʼatkʼan
kun Dios y katalhakapuʼal ni kiJalhachimoʼonukʼan Jesucristo.
\v 22 Chavaycha va kteʼencha Jerusalén porke chuncha
kilhijuniy ni Espíritu Santo mas jantu kʼatsay tisuncha
kaklhitapasayanta ancha.
\v 23 Vamun ijkʼatsay mas va toʼoxtaycha putaulan kʼan,
ni Espíritu Santo kijuniy kakchʼikanaʼ y kakmaqanlqajnanaʼ
ancha Jerusalén.
\v 24 Mas chuncha jantu kimpastakʼuy porke kijatsukunti
jantu tuʼuchun ixtapal kaval. Vamun kmajkaniputun kun
tachun laqaʼachati ni lhitapatsa yu kixtaqnita ni kiJalhachimoʼonukʼan
Jesús. Yucha va para kaklaqputeʼel ni ox chivinti yu
lhichiviniy ixjamapayninti ni Dios.
\p
\v 25 ’Klalaqputeʼeniu tacha lhachimoʼonun ni Dios y
chavay ox ijkʼatsay ni jantucha aqtaun kilalaqtsʼinchoqoyau.
\v 26 Xlhiyucha klajunau ni jantucha kilaqtaqal kaval
incha matichun katsʼanqayaʼ
\v 27 porke klalaqputeʼeniʼojoo tachun yu najun Dios.
\v 28 Kʼalhistʼajkʼantʼik y vachuʼ kalaklhistʼaktʼik
tachun ni lapanakni yu talhakapuʼan yu taxtaqnin ni
Espíritu Santo. Chuncha ni uxiknankʼan kʼaʼuntʼik va
tacha xajalhistaknan borregos kun ixlapanakni Dios yu
laklhiʼil kun ixjakʼalna.
\v 29 Kitʼin ox kʼatsay ni tejkan kajkʼanchoqoyacha
ex kataminaʼ alati lapanakni yu kalakmakanuputunaʼ vachu
chun tacha maqtalin yu jantu tamapayniy ni borregos.
\v 30 Vachuʼ kun uxiknan kataʼostaulaʼ lati lapanakni
yu kamasuyaʼ jalaklkanti para chʼantaun katatʼaval yu
talhakapuʼan.
\v 31 Ox kʼalhistʼajkʼantʼik. Kapʼastʼaktʼik ni anchanu
laʼatʼutu jachʼitin mas tsʼis mas tunkuj jantu aqtaun
kmakaul klaxtaqniu jatapastakʼati mas kun kilaqpuqalhuti.
\p
\v 32 ’Chavaycha, ketʼalaqaunin, va kaklamakaunaucha kun
Dios ali yu chivinti yu lhichiviniy ixjapaxkanti. Ni
anchanu chivinti lhitʼajun tapʼasta para kaʼayajnantʼik
la metsukuntikʼan y vachuʼ para kalaʼaʼitʼik yu laqxtaqniy
Dios yu ixlapanakni tajunita.
\v 33 Jantu matichun klhitsukunil akchaʼati por ixtumin
nisin por ixlaqchʼiti.
\v 34 Kʼatsʼayatʼik ni xaktapatsay la kimakaʼ para kaʼalil
yu xakmaqskʼiniy y vachuʼ yu ixtamaqskʼiniy yu ixkintatʼavil.
\v 35 Chuncha por tachun yu xakmakay va yucha klapumasuniu
ni maqskʼiniy kaʼaqtayjuu kun kilhitapatskʼan ni lapanakni
yu kilpatanin. Chuncha kʼapʼastʼaktʼik ni ixchivinti
kiJalhachimoʼonukʼan Jesús yu najun inchine: “Apalay
lhiʼachantajuy yu xtaʼa xajantu yu laqaʼiy.”
\p
\v 36 Tejkan chuncha naul ni Pablo ex tatsoqoqtalcha
y aqtayl skʼin Dios kun ixtachunkʼan ni yuʼuncha.
\v 37 Tus tachun taqalhul, y talaqatanul ni Pablo, y vachuʼ
takiltastuklhi.
\v 38 Ayaj tamaqaninil porke va naul ni jantucha aqtaun
katalalaqtsʼinaʼ. Ex taʼal makaunan ni Pablo tus laka
barco.
\c 21
\s Ni Pablo alcha laka putaulan Jerusalén
\p
\v 1 Tejkan klakmakajuucha va kpuʼau barco, va kchaʼau
tus laka putaulan Kos. Ex ataun julchan val kʼau tus
Rodas ex ancha kʼau tus laka putaulan Pátara.
\v 2 Ancha ktemau taun barco yu ixʼanta xaʼestado Fenicia,
ex yucha kpuʼaucha.
\v 3 Taval klaqtsʼiu xalakatʼun ni Chipre yu tanʼajvil
lakamar, kmaqxapaʼiniu la kilhijamaqxukʼan ex astan kchaʼau
tus xaʼestado Siria. Ni barco yu xakpuʼantau ixmaqskʼiniy
kamakauntijlal ixmachʼapati laka putaulan Tiro, ex kijnan
ktanuu ni laka putaulan.
\v 4 Ancha ktemau lapanakni yu ixtalhakapuʼan y klaktʼataulau
paqtujun. Ni Espíritu Santo jalakmasunil ni yuʼuncha
para katajunil ni Pablo jantu kaʼal Jerusalén.
\v 5 Tejkan laqchaʼal laqatujun julchan va ktaxtuchoqoocha.
Ex yu ixtalhakapuʼan kintatʼaʼal kun ixanatinkʼan ali
sasʼatʼankʼan tus laka playa. Ancha ktaʼaqtsoqoqtau
y kskʼiu Dios.
\v 6 Astan ox klamastakʼau kun jalaqatanunti ex ktaukʼachoqoocha
laka barco y yuʼuncha taʼanchoqol la ixchaqakʼan.
\p
\v 7 Chuncha ktaxtuucha ni laka putaulan Tiro, kpuʼau
barco tus Tolemaida. Ancha vachuʼ klakmastakʼau yu ixtalhakapuʼan
y klaktʼataulau taun julchan.
\v 8 Ex ataun julchan val ktaxtuchoqoocha, ex kchaʼau
taun ay putaulan yu junkan Cesarea. Ancha ktanuu la
ixchaqaʼ Felipe yu ixlaqputeʼey ixchivinti Dios. Yucha
va xaqayntaun yu pumatujun yu ixtaʼaqtayjuy yu jamalaqachal
Cristo. Ex ancha kloqojvicha.
\v 9 Ni Felipe ixlhitʼajun pumatʼati ixjatsiʼin yu jantukaʼ
ixtalakxtuklay. Yuʼuncha ixtalaqputeʼey kun ixtapʼasta
Dios yu kaʼalinaʼ astan.
\v 10 Ancha ktaulau lati julchan, taval chinchal qayntaun
lapanaki yu ixlaqputeʼey kun ixtapʼasta Dios yu kaʼalinaʼ
astan. Yucha ixjunkan Agabo va ixmintachal xaʼestado
Judea.
\v 11 Va kintalaqmin y chʼapal ixcinturon ni Pablo, ex
lhimaqchʼikal y lhichʼanchʼikal, va naul:
\p —Ni Espíritu Santo najun lati ni israelitas yu tavilanal
laka putaulan Jerusalén va chuncha katamakayaʼ ni jamanavin
ni aniy cinturón. Katachʼiyaʼ y katamaqxtaqniyaʼ la
ixtamakkʼan lapanakni yu jantu israelitas kataval
\p
\v 12 Tejkan chuncha ijqasmakvi ni kijnankʼan ali yu
ixtalhakapuʼan ancha Cesarea, ex kijnan ktapayniniu ni
Pablo para jantu kaʼal Jerusalén.
\v 13 Ex naul ni Pablo:
\p —¿Valiʼiycha alhunatʼikcha y kilamamaqanixvayau? Kitʼin
jantu kimpastakʼuy mas kakchʼikal u mas kaknil laka
Jerusalén por kiJalhachimoʼonuʼ Jesús.
\p
\v 14 Tejkan jantucha lay kakmaqalhajau ixaqalaka, ex
kmakajuucha, va knajuu:
\p —Chaqxi kamakakal yu lhinajun ni Jalhachimoʼonuʼ Dios.
\p
\v 15 Ex chuncha klaqlaʼoxiucha kiʼaxtoqnukʼan, ktaxtuchoqoocha
ni Cesarea, ex kʼaucha ni Jerusalén.
\v 16 Pero vachuʼ kintatʼaʼan lati yu ixtalhakapuʼan
yu machaqan Cesarea. Yuʼuncha kintajunin kajkʼau loqojnun
la ixchaqaʼ qayntaun yu ixjunkan Mnasón ancha Jerusalén.
Yucha va machaqaʼ Chipre ixjunita y maqancha ixlhakapuʼanta.
\s Ni Pablo laqʼal ni Jacobo
\p
\v 17 Tejkan kchaʼaucha Jerusalén yu ketʼalaqauninkʼan
kintalaqaʼin kun achati.
\v 18 Ex ataun julchan val yu Pablo kun kijnankʼan klaqʼau
ni Jacobo. Ancha vachuʼ ixtavilanal tachun yu xalajʼaynin
yu ixtalhakapuʼan.
\v 19 Ex ni Pablo lakmastakʼal, va jalakjunʼol tachun
yu makal Dios la ixlhitapatsa kun yu jantu israelitas
kataval.
\v 20 Tejkan chuncha taqasmaklhi ay tamakal ni Dios.
Va tajunil ni Pablo:
\p —Pablo yu kilaqajkʼan unitʼa, kʼatsʼaycha ni aniy alin
miles israelitas yu talhakapuʼantacha. Yuʼuncha ayaj
tanajun kamakakal ixlhachimoʼon Moisés.
\v 21 Ni aniy jamakʼatsanikantacha ni uxintʼi jalakmasuniy
ni israelitas yu laqmaqati tavilanal la ixputaulankʼan
yu jantu israelitas kataval. Uxintʼi va jalakmasuniy
katamakauntijlal ixlhachimoʼon Moisés y jalakʼuniy jantucha
kataxvililichukʼupʼuxnil istsʼalankʼan y jantucha katamakal
tacha ixputsukukʼan.
\v 22 ¿Ex tas kamakayaucha? Laqsaval ni lapanakni katataqxtoʼaʼ
tejkan katakʼatsayaʼ ni uxintʼi chʼitʼa aniy.
\v 23 Tsʼanqay kʼamakʼatʼi tacha klalhijunau kijnan:
Aniy alin qayntʼati kun kijnankʼan yu tajunil ni Dios
kun ixchivintikʼan yu katamakayaʼ.
\v 24 Kalaktʼapiticha, vachu chun kʼamakʼayeʼe tacha
yuʼuncha tejkan kalakpaxkʼikkanaʼ tacha lhinajun ixlhachimoʼon
Moisés. Uxintʼi kalakmapʼalnin yu maqskʼiniy para lay
kalakpaxkʼikkal. Ex chuncha tachun ni lapanakni katakʼatsayaʼ
ni jantu laqsaval kaval yu taqasmaknin. Vachuʼ katakʼatsayaʼ
ni uxintʼi vananaj toʼoyay ixlhachimoʼon Moisés.
\v 25 Yu jantu israelitas kataval yu talhakapuʼan, kijnan
klaqtsʼoqnitaucha taun karta yu tacha kijnankʼan kpastakʼau
yu najun inchine: Uxiknan jantu maqskʼiniy katapastakʼun
kimputsukkʼan. Vamun tsʼanqay jantu kʼaʼutʼik vakax
yu moqslanikan antivas, ali jakʼalna, ali ixvakax taun
talhitsukuti yu pixtutʼoqlkan, y tsʼanqay jantu katʼatʼamatʼik
aqayntaun yu jantu minavinkʼan kaval.
\p
\v 26 Ex yu ataun julchan val ni Pablo va laklhaʼalcha
ni anchanu pumatʼati lapanakni y jalakpaxkʼikkal. Ex
jakimakʼatsanil ni laka ay lakatajtan tas vanancha katamajkaniyaʼ
ixchivintikʼan yu tajunil ni Dios para ex katamoqslanil
ixlapaxkankʼan ni pumatʼati lapanakni.
\s Chʼapakal ni Pablo laka putaulan Jerusalén
\p
\v 27 Tejkan va laycha katamaktal ni laqatujun julchan
lati israelitas yu machaqan xaʼestado Asia talaqtsʼil
ni Pablo laka ay lakatajtan. Yuʼuncha tapukiltʼasanil
tachun ni lapanakni y tus tatalaktʼilhiʼol para katachʼapal
ni Pablo.
\v 28 Pʼays tachivinil y tanaul:
\p —Kintʼaʼisraelitas, kilaʼaqtayjuu. Mas va toʼoxtaycha
kaval ni aniy lapanaki yucha lakmalaniy tachun ni lapanakni
para kintaxkajin kijnan y vachuʼ para kataxkayl ixlhachimoʼon
Moisés ali yu aniy ay kilakatajtankʼan. Chavaycha aniy
laklhiminta lapanakni yu jantu israelitas kataval y
chuncha taxkilivay yu aniy lakatajtan yu ixnavin Dios.
\p
\v 29 Chuncha tanaul porke va ixtalaqtsʼinta ni Pablo
kun qayntaun yu ixjunkan Trófimo yu machaqaʼ Éfeso y
va ixtalhilay ni Pablo ixlhaʼanta lakatajtan.
\p
\v 30 Ex chuncha tachun talukujlal ni anchanu ay putaulan
y ni lapanakni va tatakyaumil, ex tachʼapachalcha ni
Pablo, talaqxaqalhaʼal ixlhimaqspaʼ ni lakatajtan, ex
niman tamalakchaunil ni xapuertas.
\v 31 Tejkan valaycha katamaqnil ni Pablo ex tamakʼatsanil
ni komandante tachun yu xalapanakni ni putaulan va talukujlaʼol.
\v 32 Ex niman laqmaqxtoqlhi ixtropas ali xaʼukxtinin
ni tropas, va tatakyaumil taʼan ixtayanal ni lapanakni.
Tejkan ni lapanakni talaqtsʼil ni komandante kun ixtropas
ex niman tamakaul ixlakasamaka ni Pablo.
\p
\v 33 Tejkan chaʼal ni komandante, va chʼapal ni Pablo,
y chʼil kun maʼatʼuy kadenas. Ex lhisakmil tas ayuchacha
ixjunita y tisuncha laqtaqal makal.
\v 34 Ex ni lapanakni va poql talakchivinil. Lati putaun
tanaul, y yu alati vachuʼ aputaun tanaul. Ex chuncha
por yu talakchʼiliti ixʼalin, ni komandante jantu lay
kamalaqasinil ni Pablo. Va lhinaul kalhaʼankal la ixchaqakʼan
ni tropas.
\v 35 Tejkan tachaʼal taʼan la xaskalera ni chaqaʼ yu
jamakanti kun chiyux, ex ni tropas tus tachʼixlhaʼal
ni Pablo porke ayaj pʼays ixtalukujlata ni lapanakni.
\v 36 Tachun ixtaxkaulhiminta y pʼays ixtalaktʼasajminta,
ixtanajun:
\p —¡Kijnan knaunau kanilcha! ¡Kanilcha!
\s Ni Pablo aqanixtukan kun ixchivinti
\p
\v 37 Tejkan ni tropas ixtamanuputuncha ni Pablo la
ixchaqakʼan, ex junil ni komandante:
\p —¿Kʼixtʼaqniy lakatin kaktʼachivinin panchʼix?
\p Ex yu komandante va naul:
\p —¿Ex uxintʼi vachuʼ laniy ni lhichivin Griego?
\v 38 ¿Ni uxintʼi jantu yuʼ kʼatʼi yu machaqaʼ Egipto,
yu tauncha julchan makal taun lhilukuj para kamapaxakal
ni jalhachimoʼonuʼ, y chʼantaun tatʼaʼal laʼatʼati mil
xamakanan lhilukuj taʼan lakatʼun yu jaxixninta?
\p
\v 39 Ex naul ni Pablo:
\p —Kitʼin va israelita kunita y va kmachaqaʼ Tarso kunita,
yu ay putaulan xaʼestado Cilicia. Va knajun kimakʼanin
jamapayninti para kaklaktʼachivinil ni lapanakni.
\p
\v 40 Ex ni komandante xtaqnil lakatin. Ex Pablo tayal
taʼan xaskalera yu jamakanti kun chiyux, va saq lakmakal
ni lapanakni kun ixmakaʼ. Tejkan saq taval, ex jalaqxaqalal
laka lhihebreo yu ixlhichivinkʼan ni yuʼuncha. Va naul:
\c 22
\p
\v 1 —Ketʼalaqaunin ali xapaynin, kitʼin knajun kilaqasmakniu
kinchivinti para kʼamalaʼasitʼik ni kitʼin jantu kakmakal
tuʼuchun laqtaqal.
\p
\v 2 Ex tejkan taqasmaknil ixchivinti ni Pablo la ixlhichivinkʼan
laka lhihebreo, va apalay saq taval. Yu Pablo va lakjunil:
\p
\v 3 —Kitʼin laqsaval va israelita kunita. Va laka putaulan
Tarso ktsukul taʼan xaʼestado Cilicia, pero va aniy kʼaynl
laka putaulan Jerusalén. Yu kimalanil va Gamaliel, y
yucha kimalanil ixlhachimoʼonkʼan yu maqancha kepayankʼan.
Kitʼin ktapatsaniy ni Dios kun tachun kintapʼasta vachu
chun tacha makʼayatʼik uxiknankʼan chavaycha.
\v 4 Kitʼin laqsaval maqancha xaklakxkaulhitʼajun ni
lapanakni yu ixtalhakapuʼan yu junkan Saystʼi Lakatin
para kalaqmaqnikal. Va xakmalaqachanan ixchʼapakkʼan
joʼakna ali xanatin para kaklakmanul laka pachʼin.
\v 5 Yu xaʼukxtin ni kuras kun yu alati kilhachimoʼonunkʼan
yuʼuncha ox takʼatsay yu xakmakay porke yuʼuncha kintaxtaqnil
kartas yu lay kamaqxtaqnil kilhachimoʼonunkʼan laka
putaulan Damasco, para kaklakchʼapal yu ixtalhakapuʼan
ni Jesús y kaklaklhimil tachʼinin aniy Jerusalén.
\s Ni Pablo laqputeʼey tejkan mispal ni Jesús
\r (Hch. 9:1-19; 26:12-18)
\p
\v 6 ’Pero tejkan va laycha atunkuj, y va ixlhiʼukstsʼuniycha
xakchaʼal ni Damasco, ex olaql kimaklkunil laktʼiyan
taun pʼays maklku.
\v 7 Ex kitʼin niman ktaqtal laka tʼun, ijqasmaklhi taun
chivinti yu kijunil: “Saulo, Saulo, ¿valiʼiycha kʼixkʼaylhitʼaʼuncha?”
\v 8 Ex klhisakmil: “¿Jalhachimoʼonuʼ, tas ayucha kʼatʼicha
ni uxintʼi?” Ex kijunil: “Ni kitʼin va Jesús kunita
yu machaqaʼ Nazaret, y va kitʼin yu kʼixkʼaylhitʼaʼun.”
\v 9 Yu kintʼaltanan vachuʼ talaqtsʼil ni maklku y ayaj
tatalhanal pero jantu katamalaqasil ni chivinti yu taqasmaklhi.
\v 10 Ex kitʼin va knaul: “Jalhachimoʼonuʼ, ¿suncha
tsʼanqay kakmakal?” Ex kijunil: “Kʼaʼostʼaycha, kapiticha
Damasco. Ancha katajunan yu maqskʼiniy kʼamakʼatʼi.”
\v 11 Chuncha ni kitʼin jantucha lay xaklakavanan porke
pʼays mapulkul ni maklku, ex yu kintʼaltanan kintamaqchʼapalhaʼal
tus Damasco.
\p
\v 12 ’Ancha ixvil qayntaun lapanaki yu ixjunkan Ananías
yu ox ixtoʼoyay ixlhachimoʼon Moisés y tachun ni israelitas
yu ancha ixtavilanal Damasco si ox ixtalhichiviniy ni
yucha.
\v 13 Exyucha kilaqmil, tejkan chinchal taʼan xakvil,
kijunil: “Kilaqaj Saulo, kalakʼavananchʼoʼocha.” Ex
nimancha klakavananchoqol y klaqtsʼil ni Ananías.
\v 14 Ex kijunil: “Yu ixDios kepayankʼan va laksakni
para kamalaʼasitʼi yu najun y para kalaqtsʼi ni Jesús
yu vas makay tachun y para laqsaval kaʼasmaknin ixchivinti
la ixkil.
\v 15 Chuncha makal porke va maqskʼiniy kʼalaqputʼeʼenin
tachun ni lapanakni yu laqtsʼi kun yu asmaktʼi.
\v 16 Ex jantucha apalay kapʼakxanin. Kʼaʼostʼaʼulcha
y kaʼaqchajʼaucha, kʼalhikʼilpʼicha ixtaqaʼuti para kʼamalaqmixinikʼacha
mintalaqalhin”, chuncha kijunil ni Ananías.
\s Ni Pablo laqputeʼey tejkan malaqachakal kalaqʼal yu jantu israelitas kataval
\p
\v 17 ’Ex tejkan kchinchoqol Jerusalén, ni kitʼin xaktʼajun
skʼiniʼ Dios laka ay lakatajtan. Ex klaqtsʼil la kintalakavan
ni Jalhachimoʼonuʼ Jesús,
\v 18 va kijunil: “Katʼaxtʼu, y tsʼalaj kʼapiti porke
aniy ni Jerusalén jantu katalhakapuʼaniyan yu kilhichʼivinaneʼe.”
\v 19 Ex kitʼin knaul: “Jalhachimoʼonuʼ, yuʼuncha takʼatsay
ni kitʼin xajkʼan lakalhuu taʼan tataqxtoʼa ni israelitas.
Va xakmalaqachanan ixlhaʼanka laka pachʼin y xaklaklakasamay
tachun yu ixtalhakapuʼanan uxintʼi.
\v 20 Vachuʼ ni Esteban yu ixlhichivinanan ni uxintʼi,
tejkan lhavanal ixjakʼalna y nil, ancha xakyal vachuʼ
chʼantaun xajkunita kun yu jamaqninin y va xaklhistakmata
ixlaqchʼitikʼan”, kunil ni Jalhachimoʼonuʼ.
\v 21 Ex yucha kijunil: “Kapiticha taʼan maqati. Kitʼin
kakmalaqachayan taʼan tavilananchal yu jantu israelitas
kataval.”
\s Ni Pablo tʼachiviniy yu xakomandante tropas
\p
\v 22 Ex chuncha ni israelitas jantucha apalay kataqasmakniputul
ixchivinti ni Pablo. Va pʼays tapukiltʼasanil kun ixchivintikʼan
y tanaul:
\p —¡Kanilcha, kanilcha ni anu lapanaki! ¡Jantucha maqskʼiniy
katsukul!
\p
\v 23 Tataylhaʼal tʼasanan, talakmajʼal ixlaqchʼitikʼan
ex taputanqalhul pʼoqxni.
\v 24 Ex yu komandante jamalaqachanal ixmanuka la ixchaqakʼan
ni tropas ni Pablo y lhinaul ixlaqanaqmaka para kalhitaulal
valiʼiycha talhilukujlaniycha ni lapanakni.
\v 25 Tejkan chʼikal para kalaqanaqmakal ex ni Pablo
junil ni kapitan yu ancha ixyal:
\p —¿Xtaqkan lakatin kʼalaʼanaqmatʼi qayntaun yu tsʼoqʼulakantacha
tacha xalapanaki Roma mas jantu puxkaulaqtsʼiniʼelakan
ixlaqtaqal?
\p
\v 26 Tejkan chuncha qasmaklhi ni kapitan va niman laqʼal
ni komandante, va lhisakmil:
\p —¿Tas kamakʼayeʼecha? Yu aniy lapanaki va tsʼoqʼulakantacha
tacha xalapanaki Roma.
\p
\v 27 Ex ni komandante niman laqmil ni Pablo y lhisakmil:
\p —¿Laqsaval tsʼoqʼulakʼantʼacha tacha xalapanaki Roma?
\p Ex naul ni Pablo:
\p —Chun, laqsaval.
\p
\v 28 Ex junchoqol ni komandante:
\p —Kitʼin ayaj laqlhuu ikmapalal para kaktsʼoqʼulakal
tacha xalapanaki Roma.
\p Ex Pablo naul:
\p —Pero kitʼin va chuncha kpupaqlhi.
\p
\v 29 Ex chuncha nimancha tamakaul ni Pablo yu ixtalaqanaqmaputun.
Vachuʼ ni komandante tejkan kʼatsal va xalapanaki Roma
ixjunita, ayaj talhanal por ixchʼita.
\s Lhaʼankal ni Pablo taʼan tataqxtoqlhi yu lajʼay xajalhachimoʼonun ni israelitas
\p
\v 30 Ex ataun julchan val ni komandante ixkʼatsaputun
yu laqsaval valiʼiycha ni israelitas ixtamukʼaniputun
laqtaqal ni Pablo. Chuncha maqxʼoqchoqolcha ni Pablo
taʼan ixmaqchʼita kun kadena va lhinaul katataqxtoqlhi
ni xaʼukxtinin kuras kun yu alati xalajʼaynin jalhachimoʼonun
ni israelitas. Va ancha ulal ni Pablo la ixlakaʼukxpukʼan.
\c 23
\p
\v 1 Ex ni Pablo jalaqtsʼil tachun ni lhachimoʼonun,
va lakjunil:
\p —Ketʼalaqaunin, va tacha oxicha oxamaktaun kʼatsan la
kijatapastakʼati porke jantu kaʼalil kilaqtaqal la ixlakaʼukxpuʼ
Dios mas chavaycha.
\p
\v 2 Ex yu xaʼukxtin ni kuras yu ixjunkan Ananías va
laklhijunil katapukiksal ni Pablo yu ancha ixtayanal.
\v 3 Ex naul ni Pablo:
\p —Uxintʼi Dios kasayan, va tʼuy ukxpuʼ makʼay. Uxintʼi
viltʼi para kimpʼuxkʼaulaqtsʼinin incha alin kilaqtaqal
tacha najun ixlhachimoʼon Moisés. ¿Ex valiʼiycha lhinaʼuncha
kintasal mas jantu xtaqkan lakatin la ixlhachimoʼon
Moisés?
\p
\v 4 Ex yu ancha ixtayanal va tajunil ni Pablo:
\p —Chuncha tacha naʼun ni uxintʼi akchʼintʼamay yu xaʼukxtin
ni kuras yu laksakta Dios.
\p
\v 5 Ex ni Pablo naul:
\p —Ketʼalaqaunin, kitʼin jantu xajkʼatsay incha xaʼukxtin
kura ixjunita. La ixchivinti Dios tsʼoqkanta yu najun
inchine: “Jantu aqtaun kaʼakchʼintʼamatʼi ixjalhachimoʼonukʼan
milapanakni.”
\p
\v 6 Ex ni Pablo xtaqnil kuenta ni lapanakni yu ancha
ixtaʼaqxtoqnun lati va saduceos y alati va fariseos
ixtajunita. Ex pʼays naul:
\p —Ketʼalaqaunin, kitʼin va kfariseo kunita, y kimpay vachuʼ
va fariseo ixjunita. Kilatʼaunau puxkaulaqtsʼininin
kilaqtaqal porke klhakapuʼan ni janinin katakujchoqoyaʼ.
\p
\v 7 Tejkan chuncha naul, ex ni fariseos ali saduceos
aqtayl talakiltsakʼastukʼa kun lakchivinti. Ex chuncha
tatalaqlvaqlicha taʼan ixtaʼaqxtoqnun.
\v 8 Yu saduceos tanajun ni janinin jantu katakujchoqoyaʼ
vachuʼ tanajun jantu alin angeles nisin espíritus, pero
yu fariseos yuʼuncha talhakapuʼan tachun.
\v 9 Tus tachun ni lapanakni pʼays talaktʼasal kun ixchivintikʼan.
Ex yu ixtamasuy ixlhachimoʼonkʼan ni israelitas yu talhiyal
ni fariseos va taʼostayal y tanaul:
\p —Aniy lapanaki jantu kalhitsukul laqtaqal. Incha va
xaqalal taun espíritu u angel jantu lay laktanchaniyau
kun Dios.
\p
\v 10 Ex apalay pʼays val ni lhilukuj tus talhanal ni
komandante porke ixlhilay katamaqniyaʼ ni Pablo. Xlhiyucha
jamalaqachanal iniʼ ni tropas para katamaxtul laqatapʼasta
y katalhaʼanchoqol la ixchaqakʼan ni tropas.
\p
\v 11 Ex yu ataun julchan val tejkan putsʼisni, ni Jalhachimoʼonuʼ
Jesús tasunil ni Pablo, va junil:
\p —Jantu katʼalhan Pablo, chuncha tacha ixkʼilhichʼiviniy
aniy Jerusalén vachu chun kʼilhichʼivinaneʼe laka putaulan
Roma.
\s Ni lapanakni chʼantaun tamakay ixjatapastakʼatikʼan para katamaqnil ni Pablo
\p
\v 12 Ex yu ataun julchan val tataqxtoqlhi lati yu israelitas.
Va chʼantaun tamakal ixjatapastakʼatkʼan para katamaqnil
ni Pablo. Tanaul ni tsʼanqay laqsaval jantu katavayl
y jantu kataʼoqnul tus katamaqniʼelal ni Pablo.
\v 13 Va ixtapasata cuarenta joʼakna yu chʼantaun ixtajunita.
\v 14 Yuʼuncha talaqʼal ni xaʼukxtinin kuras kun yu
xalajʼaynin israelitas, va tajunil:
\p —Kijnankʼan va chʼantaun kmakau kijatapastakʼatkʼan
para jantu kakvajiu incha jantu kakmaqniʼelau ni Pablo.
\v 15 Chavay uxiknan kun yu alati kilhachimoʼonunkʼan
israelitas kaskʼinitʼik ni komandante para lhiy katalhiminin
ni Pablo. Kaʼunitʼik ni uxiknan va lhisakmipʼutʼunatʼik
alati chivinti. Tejkan kaminaʼ lakatin ex kakmaqniyaucha
kijnan.
\p
\v 16 Pero yu istsʼal ixtʼalapanaki ni Pablo va kʼatsal
tacha tanaul. Ex niman chuncha al juniniʼ ni Pablo la
ixchaqakʼan ni tropas.
\v 17 Ex ni Pablo tʼasaʼil qayntaun kapitan, va junil:
\p —Ni aniy tsʼal kalhipʼinichiy ni komandante para kajunil
laqataun chivinti.
\p
\v 18 Ex lhaʼanil, tejkan lhachaʼal ex junil ni komandante
ni kapitan:
\p —Ni Pablo yu vil tachʼin kilhijunil kaklhiminin ni
aniy tsʼal porke va tʼachivinputunan.
\p
\v 19 Ex ni komandante maqchʼapalhaʼal taʼan xʼaman
ni tsʼal, va lhisakmil:
\p —¿Tisuncha kʼiʼunpʼutʼuncha?
\p
\v 20 Ex qaltayl ni tsʼal, va junil:
\p —Ni israelitas va chʼantaun tajunita. Tanajun ni yuʼuncha
kataskʼiniyan para lhiy kʼalhipʼi ni Pablo taʼan tavilanal
yu xalhachimoʼonun ni israelitas, va katajunan para katalhisakmil
alati chivinti.
\v 21 Pero jantu kalhakʼapʼupʼi porke tapasata cuarenta
joʼakna tapakxan ni Pablo para katamaqnil. Va chʼantaun
tamakal ixjatapastakʼatkʼan para jantu katalhivayl y
jantu kataʼoqnul tus kaniʼelal ni Pablo. Chavaycha oxicha
tapakxanʼita minchivinti yu kʼanauneʼe uxintʼi.
\p
\v 22 Ex ni komandante mastakʼachoqolcha ni tsʼal, va
lhijunil para jantu matichun kalhitaulnil ni anchanu
chivinti.
\s Ni Pablo malaqachakal para kalaqʼal yu Gobernador Félix
\p
\v 23 Ex ni komandante jalakjuntaʼil pumatʼuy kapitanes,
va laklhijunil para listujcha katamakal tʼuy ciento
tropas yu taʼan laka chʼajaʼ ali setenta tropas yu tapuʼan
laka juki ali tʼuy ciento tropas yu talhaʼan lanzas
para kataʼal laka putaulan Cesarea tejkan lakaputsʼisni
laqanajatsi hora ixjunita.
\v 24 Vachuʼ laklhijunil para listujcha katamakanil
ixjukin para kataukʼal ni Pablo para ox kalaqchaʼal
ni gobernador Félix y jantu tuʼuchun kalhitapasal.
\p
\v 25 Ni komandante vachuʼ malaqachal aqxtaun jalhiki
yu inchine najun:
\p
\v 26 “Kitʼin yu Claudio Lisias kunita, kmastakʼayan
ni uxintʼi, Félix. Uxintʼi ayaj ox gobernador unitʼa.
\v 27 Ni israelitas tachʼapal ni aniy lapanaki, va laycha
ixtamaqnil pero kitʼin kʼaqtayjul, klakmaxtunil la ixtamakakʼan
kun kintropas porke ijkʼatsal ni yucha va jatsʼoqʼulakantacha
tacha xalapanaki Roma.
\v 28 Xajkʼatsaputun suncha ixlhiʼatal tamukʼaniy laqtaqal.
Xlhiyucha klhaʼal taʼan ixtaʼaqxtoqnun yu xalajʼaynin
israelitas.
\v 29 Chuncha kpukʼatsal ni lapanakni ixtamukʼaniy laqtaqal
va por ixlhachimoʼonkʼan pero jantu kalhitsukul tuʼuchun
laqtaqal y jantu ixpaxtoqniy katanul laka pachʼin u
kamaqnikal.
\v 30 Ex astan vachuʼ kʼatsal ni israelitas va chʼantaun
tamakal ixjatapastakʼatkʼan para katamaqnil ni aniy
lapanaki, va xlhiyucha kmalaqachaniyan uxintʼi. Vachuʼ
klaklhijunil katalaqmin laqlaʼoxinin kun uxintʼi ni
lapanakni yu tamukʼaniputun laqtaqal. Vamun yuʼ ni aniy
yu ktsʼoqniyan.”
\p
\v 31 Ex chuncha ni tropas tamakal tacha laklhijunkal,
talhaʼalcha ni Pablo laka tatsʼisin tus laka putaulan
Antípatris.
\v 32 Ex yu ataun julchan val, ni tropas yu ixtaʼanta
laka chʼajaʼ tataspʼikchoqolcha la ixchaqakʼan, pero
yu ixtapuʼanta juki yuʼuncha tataylhaʼal ixlakatinkʼan
kun Pablo.
\v 33 Tejkan tachaʼal laka putaulan Cesarea va tamaqxtaqnil
ni jalhiki ni gobernador y vachuʼ tamaqxtaqlhicha ni
Pablo.
\v 34 Ni gobernador puteʼel ni chivinti ex lhisakmil
ni Pablo incha toʼoxtaycha machaqaʼ ixjunita. Tejkan
kʼatsal ni va machaqaʼ Cilicia ixjunita
\v 35 ex va junil:
\p —Kajqasmakniyan minchivinti tejkan katachinaʼ yu taxkayyan.
\p Ex lhinaul kalhistakkal laqa ay chaqaʼ yu makal Herodes.
\c 24
\s Ni Pablo slajkan la ixlakaʼukxpuʼ yu Gobernador Félix
\p
\v 1 Taval tejkan paqkisicha val, ni Ananías, yu ixʼukxtinkʼan
xakuras ni israelitas, kun lati yu xalajʼaynin ali qayntaun
abogado yu ixjunkan Tértulo va tachaʼalcha ni Cesarea.
Ex talaqʼal ni gobernador, va tatislajmal ni Pablo.
\v 2 Tejkan talhichinchal ni Pablo ex ni Tértulo aqtaylcha
tislajmay, va junil ni Félix:
\p —Por uxintʼi ayaj ox ktiʼukxuyanau y por mijatapastakʼati
ayaj ox jalhachimoʼonuʼ unitʼa.
\v 3 Mas va toʼoxtaycha kaval ayaj klhiʼachantajuyau
milhachimoʼon ni uxintʼi, Félix, porke ayaj ox jalhachimoʼonun.
\v 4 Para jantu panij klamaqatsʼanqaniu mijulchan va
kskʼiniyan taun jatapayniti para kilaqasmakniu kinchivintikʼan
taun panchʼix.
\v 5 Ni aniy lapanaki kʼatsaniyau ni yucha va qayntaun
yu lakmakanuy lapanakni y jalaktʼilhiy ni israelitas
mas va toʼoxtaycha kaval lakamunukpaʼ. Yucha va qayntaun
xaʼaqtsul yu talhakapuʼan ni anchanu lapanaki yu machaqaʼ
Nazaret.
\v 6 Ni aniy lapanaki jantu tsʼuniy toʼoyay yu ay kilakatajtankʼan
porke ixmanuputun lapanakni yu talhitʼajun laqtaqal.
Kijnan kchʼapau y xakmukʼaniputunau laqtaqal tacha najun
kilhachimoʼonkʼan. [
\v 7 Pero yu komandante Lisias laqatapʼasta kintamaxtunin
la kintamakakʼan.
\v 8 Kintalhijunin kaklalaqmiu ni kijnankʼan yu kmukʼaniyau
laqtaqal.] Incha kʼalhisakmiyeʼe uxintʼi tachun yu makal
ni aniy lapanaki ex chuncha kʼapʼukʼatsʼayeʼe ni va
laqsaval yu klajunau.
\p
\v 9 Ni israelitas yu ancha ixtayanal vachuʼ tanaul
ni va laqsaval tacha naul ni Tértulo.
\s Ni Pablo qaltajiy ni Félix para kaʼaqanixtukal kun ixchivinti
\p
\v 10 Ex ni gobernador va lakpajunil ni Pablo para kachivinil.
Ex yu Pablo va junil:
\p —Kun tachun la kiʼachati klajqaltayaʼ yu kintatislajmay
la milakaʼukxpuʼ, porke kitʼin kʼatsay ni uxintʼi maqancha
lhachimoʼonun ni aniy estado.
\v 11 Uxintʼi lay kʼalhasakmin incha laqsaval yu ijkunan.
Va laqakautʼuykaʼ julchan kchaʼal Jerusalén para kaktoʼoyal
ni Dios.
\v 12 Jantu aqtaun kintalhitajul kaktsukul jatʼachivin
laqatapʼasta kun la kiltsakʼastukni y vachuʼ jantu aqtaun
kaklakmalukujlal ni lapanakni mas taʼan ay lakatajtan,
mas taʼan laqa chaqan taʼan tataqxtoʼa ni israelitas,
y mas taʼan laka ay putaulan.
\v 13 Ni lapanakni yu kintatislajmay yuʼuncha jantu
lay talhitaulay incha laqsaval yu tanajun.
\v 14 Vas klhitaulniyan ni kitʼin va ktapatsaniy ixDioskʼan
yu maqancha kepayan y ktaylhaʼan yu Saystʼi Lakatin
yu yuʼuncha tanajun va aputaun lhakapuʼati. Pero kitʼin
klhakapuʼan tachun ixlhachimoʼon Moisés ali yu tatsʼoqlhi
yu ixtalaqputeʼey ixchivinti Dios.
\v 15 Ni kitʼin vachu va chun tacha yuʼuncha kpakxanʼiy
ni Dios kalakmajkujuchoqoyaʼ ni janinin mas yu ox putsuku
talhitʼajun y mas yu jantu.
\v 16 Xlhiyucha ox klhistakkan para kajkʼatsal ni jantu
alin kilaqtaqal mas kun Dios mas kun lapanakni.
\p
\v 17 ’Kitʼin xaktiʼukxuyal laqalhuu jachʼitin alakataun
lakatʼun ex taval kminchoqol la kintʼun, klaklhiminil
tumin yu kilpatanin y vachuʼ kmaqxtaqlhi kilapaxkan.
\v 18 Chuncha xaktʼajun makanaʼ laka ay lakatajtan tejkan
kintalaqtsʼil lati israelitas yu machaqan xaʼestado
Asia. Kitʼin xaklakapaxkʼikkantacha chuncha tacha lhinajun
kimputsukkʼan. Ancha jantu ixʼalin lhuu lapanakni y
vachuʼ jantu kaʼalil talakchʼiliti.
\v 19 Ex yu kintalaqtsʼil laka ay lakatajtan yuʼuncha
tsʼanqay katamil aniy para katalhitaulal incha alin
kilaqtaqal yu kintapuxkajiy.
\v 20 Incha jantu tamin, ex yu tayanal aniy lay katanaul
incha kintatemanil laqtaqal tejkan xajkʼalinta kun yu
xalajʼaynin israelitas.
\v 21 Kavalay kintapuxkajiy por pʼas kchivinil taʼan
ixtaʼaqxtoqnun tejkan knaul inchine: “Kitʼin klhakapuʼan
ni janinin katakujchoqoyaʼ y xlhiyucha kilamukʼaniyau
laqtaqal”, chuncha klakjunil.
\p
\v 22 Ni gobernador Félix ox ixmalaqasiy yu xalhakapuʼati
ni Saystʼi Lakatin, ex chuncha valiʼiy makaul ni anchanu
yu ixtatʼajun lhilakchivinin, va naul:
\p —Tejkan kaminaʼ ni komandante Lisias ex apalay ox kajkʼatsayaʼ
yu lhichʼivinanatʼik, exnicha kaklaqlaʼoxiyaʼ.
\p
\v 23 Ex lhinaulcha kataylhaʼal ixlhistaklhitsukuka
ni Pablo la ixtamakaʼ ni kapitan pero vachuʼ xtaqnil
lakatin katijuntayal y vachuʼ lay katalaqmil ixʼamigos
para kataʼaqtayjul.
\s Tʼuy jachʼitin ixchʼikanta ni Pablo laka putaulan Cesarea
\p
\v 24 Tejkan jantukaʼ paqlhuu ixjun va chinchoqolcha
aqtaun ni Félix kun ixanati yu ixjunkan Drusila yu israelita
ixjunita. Ex malaqachanal ixʼika ni Pablo para kaqasmaknil
tacha kʼamakʼatʼicha para lay kʼalhakʼapʼupʼi ni Jesucristo.
\v 25 Ex ni Pablo laqputeʼenil yu vas putsuku ali yu
kʼalhistʼakʼa yu kʼamakʼatʼi. Vachuʼ laqputeʼenil tejkan
kalakmukʼanikanaʼ ixlaqtaqalkʼan ni lapanakni. Ex ni
Félix ayaj talhanal, va junil:
\p —Kʼapʼinchʼoʼocha chavay. Tejkan kakpakxanaʼ kijulchan
ex kajkuntaʼichoqoyan.
\p
\v 26 Ni Félix ixpakxanʼiy kaxtaqnil tumin ni Pablo
para kamakaunchoqolcha. Xlhiyucha aqlhuvaj juntaʼil
y tʼachivinil.
\p
\v 27 Tejkan laqchaʼalcha tʼuy jachʼitin ex tapaxalcha
ni Félix ixpugobernador. Ex yu Porcio Festo yucha tanul
ixpugobernador. Pero Félix va ixnajun ox katalaqtsʼil
ni israelitas xlhiyucha makaul tachʼin ni Pablo.
\c 25
\s Ni Pablo skʼin para kalhaankal kun yu ay jalhachimoʼonuʼ romano
\p
\v 1 Tejkan laʼatʼutucha julchan tanul ixpugobernador
ni Festo ex taxtul xaputaulan Cesarea, va alcha Jerusalén.
\v 2 Ex ancha talaqmil yu xaʼukxtinin kuras ali yu xalajʼaynin
israelitas va takichivintanunichil por Pablo.
\v 3 Va taskʼinil taun jatapayniti para kamalaqachanal
ixlhiminka Jerusalén. Chuncha tajunil por ixtamaqniputun
lakatin.
\v 4 Ni Festo lakjunil:
\p —Ni Pablo vil tachʼin Cesarea y kitʼin vachuʼ niman
kajkʼanchoqoyaʼ ancha.
\v 5 Ex lati yu xaʼukxtinin uxiknan maqskʼiniy kilatʼaʼau
para kachʼivintʼanutʼik ancha incha lhitʼajun laqtaqal.
\p
\v 6 Ancha ixvilchal ni Festo va laqatsajin u laqakau
julchan, ex anchoqolcha Cesarea. Yu ataun julchan val,
va taulal la ixpulakchivin y malaqachanal ixʼika ni
Pablo.
\v 7 Tejkan lhachaankalcha ex tatalakanulcha ni israelitas
yu taminchal Jerusalén. Aqtaylcha tamukʼaniy yu ay laqtaqal
pero jantu kalal katamukʼanil yu ixtanajun yuʼuncha.
\v 8 Ex ni Pablo jalajqaltayl yu ixtatislajmaputun, va
naul:
\p —Kitʼin si ox ktoʼoyay yu lhinajun la ixlhachimoʼonkʼan
ni israelitas, vachuʼ jantu tuʼuchun laqtaqal kmakanil
yu ay lakatajtan ali yu ay xajalhachimoʼonuʼ Romano.
\p
\v 9 Ex ni Festo por ox ixlaktʼaʼuxaʼan ni israelitas
va lhisakmil ni Pablo:
\p —¿Uxapʼin Jerusalén para ancha lay kalaqlaʼoxichaʼau
yu talhixkayan?
\p
\v 10 Ex ni Pablo va naul:
\p —Kitʼin aniycha kʼalinta laka pulakchivin yu ixnavin
ni César yu ay jalhachimoʼonuʼ romano y aniy maqskʼiniy
kalaqlaʼoxikal yu kintalhixkajiy. Uxintʼi ox kʼatsʼay
ni jantu tuʼuchun laqtaqal kaklakmakanil ni israelitas.
\v 11 Incha klaninin taun laqtaqal u tuʼuchun yu paxtoqniy
para kakpunil, ni kitʼin jantu lay klaktanchay. Pero
incha jantu laqsaval kaval yu kintaputislajmay ex jantu
matichun kalhitsukul lakatin yu lay kintamaqxtaqlhi
la ixtamakakʼan. Kitʼin knajun kalaqlaʼoxil yu ay jalhachimoʼonuʼ
Romano.
\p
\v 12 Ex chuncha jalaktʼachivinil ixʼaqtayjunin ni Festo,
ex aqtaun junchoqol ni Pablo:
\p —Uxintʼi skʼin para kalaqlaʼoxinin ni César yu ay jalhachimoʼonuʼ
romano ex yucha kalaqpʼineʼecha.
\s Ni Pablo tʼachiviniy yu jalhachimoʼonuʼ Agripa
\p
\v 13 Tejkan tapasal lati julchan, ex ni jalhachimoʼonuʼ
Agripa kun Berenice yu ixtʼalapanaki va taʼal mastakʼanan
yu jalhachimoʼonuʼ Festo laka putaulan Cesarea.
\v 14 Tejkan yuʼuncha paqlhuucha ixtavilananchal, ex
ni Festo laqputeʼenil ni anchanu jalhachimoʼonuʼ yu
lhitapasal ni Pablo, va junil:
\p —Tejkan taxtul ixpugobernador ni Félix va makaul qayntaun
lapanaki tachʼin.
\v 15 Tejkan kitʼin kilal Jerusalén yu xaʼukxtinin kuras
kun yu xalajʼaynin israelitas kintalaqmil y kintachivintanunil,
va kintaskʼinil para kakmamaqanlqajnival por ixlaqtaqal.
\v 16 Kitʼin klakjunil ni kijnankʼan yu xalhachimoʼonun
Romanos jantu chun kimputsukkʼan kaval. Jantu lay valiʼiy
kmaqxtaqyau ixmaqnika qayntaun lapanaki. Pʼunaj maqskʼiniy
kachivinil kun ixchivinti para lay kaʼaqanixtukal ixlaqʼaman
la ixlakaʼukxpukʼan yu tamukʼaniy laqtaqal.
\v 17 Astan tejkan tachil aniy, kitʼin jantu kakpakxanil.
Yu ataun julchan val, nimancha kʼal taul laka pulakchivin
y kmalaqachanal ixʼika ni anchanu joʼati.
\v 18 Pero tejkan takichivintanuchil jantu katamukʼanil
tuʼuchun laqtaqal tacha kitʼin xakpastakʼa ixtamukʼanil.
\v 19 Vamun tamukʼanil laqtaqal por ixlhakapuʼatikʼan
y vachuʼ porke Pablo ixlhichiviniy qayntaun yu junkan
Jesús yu nitacha y Pablo najun ni yucha kujchoqotacha.
\v 20 Ex ni kitʼin jantu xajkʼatsay tas kakmakalcha
yu talhitapasay xlhiyucha klhisakmil ni Pablo incha
kaʼuxaʼal Jerusalén para ancha katalaqlaʼoxinil.
\v 21 Pero yu Pablo naul ni kalaqlaʼoxil yu ay jalhachimoʼonuʼ
Augusto. Ex klhinaul ox kalhistakkal tus tejkan kakmalaqachanil
ni ay jalhachimoʼonuʼ.
\p
\v 22 Ex ni Agripa junil ni Festo:
\p —Kitʼin vachuʼ ijqalasmakputun ni anchanu lapanaki.
\p Ex naul ni Festo:
\p —Kaʼasmakniyeʼe ixchivinti lhiy.
\p
\v 23 Ex yu ataun julchan val ni Agripa ali Berenice
va xvakʼakʼa tatanuchal laka pulakchivin. Ox lakatayanin.
Vachuʼ tatʼatanuchal yu xaʼukxtinin tropas ali yu xalajʼaynin
ni anchanu putaulan. Ex ni Festo malaqachanal ixʼika
ni Pablo,
\v 24 y astan naul:
\p —Jalhachimoʼonuʼ Agripa, y vachuʼ tachun yu tʼantʼatʼik
kun kijnan, kalaqtsʼintʼik ni aniy lapanaki. Tachun ni
israelitas mas Jerusalén mas aniy Cesarea laqatapʼasta
kintalhijuniy kamaqnikal, tanajun ni yucha jantucha maqskʼiniy
katsukul.
\v 25 Pero kitʼin jantu ijkʼatsaniy kamakal tuʼuchun
laqtaqal para kalhimaqnikal. Pero yucha skʼil para kalaqlaʼoxinil
ni jalhachimoʼonuʼ Augusto, ex kitʼin kmalaqachaniputun.
\v 26 Pero kitʼin jantu ijkʼatsay tas kakmakal kaktsʼoqnil.
Xlhiyucha klalhiminitau uxiknankʼan, ali uxintʼi, jalhachimoʼonuʼ
Agripa, para katʼemanin ixlaqtaqal yu lay kaktsʼoqʼulanil.
\v 27 Jantu paxtoqniy kakmalaqachal qayntaun tachʼin
ni ay jalhachimoʼonuʼ incha jantu kaktsʼoqnil yu lhitapasay.
\c 26
\s Ni Pablo laqputeʼeniy ni Agripa yu lhitapasal
\p
\v 1 Ex yu Agripa va junil ni Pablo:
\p —Chavaycha kʼachʼivin tachun chivinti yu uxintʼi naunpʼutʼun
yu lay kʼapʼuʼaqʼanixtʼukʼa milaqʼaman.
\p Ex majkul ni Pablo, va aqtayl chiviniy, va naul:
\p
\v 2 —Jalhachimoʼonuʼ Agripa, ayaj kimaqamay kakchivinil
la milakaʼukxpuʼ kun chivinti yu kitʼin klhilay lay
kakpuʼaqanixtukal tachun yu kintalhixkajiy ni israelitas.
\v 3 Chuncha kimaqamay kakchivinil porke uxintʼi kʼatsʼaʼoʼoy
tachun kinputsukkʼan yu israelitas kuntau kun tachun
yu klhilakchivinanau. Xlhiyucha kskʼiniyan para laka
laksniy kʼiʼalasmaktʼi.
\s Ixputsuku ni Pablo tejkan jantukaʼ ixlhakapuʼan ni Jesús
\p
\v 4 ’Tachun ni israelitas ox takʼatsay tacha kpuʼukxuyal
kun yuʼuncha la kintʼun laka putaulan Jerusalén, mas
tejkan sʼatʼa xajkunita tus chavaycha.
\v 5 Yuʼuncha ox takʼatsay y lay vas katanaul ni mas
tus tejkan tsʼal xajkunita, kitʼin xajkalakʼakxkajuy
ni fariseos. Yuʼuncha vamun yuʼ vas tamakay kilhachimoʼonkʼan
chuncha tacha klhakapuʼanau yu israelitas kuntau.
\v 6 Chavaycha tachivintanul por kitʼin va por kpakxanʼiy
katakujchoqoyaʼ ni janinin chuncha tacha maqancha jajunil
ni Dios kepayankʼan.
\v 7 Tachun yu sasʼatʼankʼan ni anchanu pumakautʼuy
sasʼatʼan Israel, yuʼuncha vachuʼ ixtapakxanʼiy kamakayaʼ
Dios tacha naul y xlhiyucha tatapatsaniy ni Dios mas
laka julchan u mas laka putsʼista. Chavaycha, jalhachimoʼonuʼ
Agripa, va por kpakxanʼiy katakujaʼ janinin, xlhiyucha
kintamukʼaniy laqtaqal.
\v 8 ¿Ex uxiknankʼan valiʼiycha jantu lhakʼapʼupʼinatʼik
ni Dios majkujuchoqoy ni janinin?
\s Ni Pablo ixlakxkaulhitsukuy yu ixtalhakapuʼan ni Jesucristo
\p
\v 9 ’Maqancha ni kitʼin vachuʼ xakpastakʼa ni tsʼanqay
kakmakal axtoqnuʼ para kakxkayl ixtaqaʼuti ni Jesús
yu machaqaʼ Nazaret.
\v 10 Chuncha xakmakay laka putaulan Jerusalén. Va por
ixlhachimoʼonkʼan ni xaʼukxtinin kuras klakmanul laka
pachʼin lhuvaj lapanakni yu ixtalhakapuʼan. Tejkan ixjamaqnikan
vachuʼ xaklhiʼachantajuy.
\v 11 Laqa chaqan taʼan tataqxtoʼa ni israelitas aqlhuvaj
klaqmamaqanlqajnival para katamakauntijlal ixlhakapuʼatkʼan.
Ayaj ixkintamalukujlay y xaklakxkaulhitsukuy mas taʼan
laqmaqati putaulanaxna.
\s Ni Pablo laqputeʼechoqoy yu tacha mispal ni Jesucristo
\r (Hch. 9:1-19; 22:6-16)
\p
\v 12 ’Tejkan xajkʼanta Damasco va yucha xaklhilaqʼanta.
Ixkintamalaqachata ni ixʼukxtininkʼan xakuras ni israelitas.
\v 13 Ex chuncha, jalhachimoʼonuʼ, tejkan atunkujcha ixjunita,
kitʼin xajkʼantacha lakatin. Va klaqtsʼil taun pʼays
maklku laktʼiyan apalay laqpupʼays ixjunita xajantu
yu xamaklku ni julchan. Tus olaql kilakamaklkul kun
tachun yu ixkintatʼaʼanta.
\v 14 Ex va chuncha tachun ktaqtaʼojoo lakatʼun, ex kitʼin
ijqasmaklhi taun chivinti laka lhihebreo, va kijunil:
“Saulo, Saulo, ¿valiʼiycha kʼixkʼaylhitʼaʼuncha ni kitʼin?
Va milaqʼaman tʼaunkʼan lhimakʼakʼa tacha laqataun vakax
yu jalhoqnun tejkan chʼintay yu putiltoqolhaankan.”
\v 15 Ex ni kitʼin knaul: “¿Tas ayucha kʼatʼicha ni
uxintʼi, Jalhachimoʼonuʼ?”
\p ’Ex yu Jalhachimoʼonuʼ kijunil: “Kitʼin va Jesús
kunita, va yucha yu uxintʼi xkʼaylhitʼaʼun.
\v 16 Kaʼostʼaʼulcha y katʼayachʼoʼocha. Ni kitʼin ktasunin
para kintʼapʼatsʼanin. Kʼalaqpʼutʼeʼeyeʼe tachun yu
xalaqtsʼin y vachuʼ kʼalaqpʼutʼeʼeyeʼe yu kmasuniyan
astan.
\v 17 Kakmalaqtaxtuyan la ixtamakakʼan ni israelitas
y vachuʼ yu jantu israelitas kataval y va yuʼuncha yu
klhijunan kaalaqpiti.
\v 18 Kmalaqachayan para kʼamalaqltʼiʼanin ixlaqchulkʼan,
para katamakauntijlalcha ni lakatin taʼan putsʼista
y katapuʼalcha taʼan tunkujunta. Vachuʼ para katamakauntijlalcha
ixtapʼasta ni Satanás y katatiʼukxuntayal kun Dios.
Y por kintalhakapuʼanaʼ ni kitʼin ex kalaqmalaqmixinikanaʼ
ixtalaqalhinkʼan y vachuʼ katalaqaʼiyaʼ ixlhilhajatikʼan
yu paxtoqniy ixlapanakni Dios.”
\p
\v 19 ’Ex chuncha, jalhachimoʼonuʼ Agripa, laqsaval kmakal
kuenta yu kilhijunil yu klaqtsʼil laktʼiyan.
\v 20 Pʼunaj klaqlaqputeʼenil yu ixtavilanal Damasco,
ex astan yu ixtavilanal Jerusalén y mas va toʼoxtaycha
xaʼestado Judea, ex astan klaqlaqputeʼenil yu jantu israelitas
kataval. Kitʼin klaklhijunil ni katamapaxal ixjatapastakʼatkʼan
para katatʼaʼal ni Dios. Iknaul ni katamakal yu lajʼox
ex katasul ni laqsaval tamapaxatacha ixjatapastakʼatkʼan.
\v 21 Va por yucha kintachʼapal ni israelitas laka ay
lakatajtan y ixkintalhimaqniputun.
\v 22 Pero va kun ixʼaqtayjunti Dios tus chavaycha ktaylhiminta.
Va klaqlaqputeʼeniy yu lakstʼuniy kun yu lajʼay lapanakni.
Vamun yuʼ klaqputeʼey tacha yu maqancha ixtalaqputeʼey
Moisés ali yu alati yu ixtalaqputeʼey ixchivinti Dios.
Yuʼuncha ixtalhichiviniy yu ixtapasal astan y chavay
tapasatacha.
\v 23 Ixtanajun ni Cristo ixmaqskʼiniy kamaqanlqajnal
y kanil para yucha kaval yu pʼunaj kujchoqol taʼan taʼaknunun
janinin, y para kalakmasunil ni israelitas yu ox maklku
yu lay pulaqtaxtukan y vachuʼ kalakmasunil mas yu jantu
israelitas kataval.
\s Ni Pablo jaxaqalay ni jalhachimoʼonuʼ Agripa
\p
\v 24 Tejkan Pablo vananaj ixtʼajun chivin yu lay kapuxajchal,
ex yu Festo pʼays chivinil, va naul:
\p —Uxintʼi, Pablo, va lokoj kʼatʼi. Por lhuu jatalaniti
lhitʼaʼun, unitʼacha lokoj.
\p
\v 25 Ex yu Pablo va naul:
\p —Uxintʼi, yu ox jalhachimoʼonuʼ Festo kʼatʼi, kitʼin
jantu lokoj kakval. Yu klhichiviniy va yu laqsaval y
si vas paxtoqniy.
\v 26 Ni aniy jalhachimoʼonuʼ Agripa yucha ox malaqasiy
yu klhichiviniy. Xlhiyucha jantu ktalhanan ktʼachivinil.
Kitʼin knajun yucha ox kʼatsay yu tacha tapasal porke
kitʼin klhichiviniy axtoqnuʼ yu takʼatsaʼol ni lapanakni
y jantu kamaqsaqmakakal.
\v 27 Jalhachimoʼonuʼ Agripa, ¿Uxintʼi lhakʼapʼupʼin
tacha ixtanajun yu maqancha ixtalaqputeʼey ixchivinti
Dios? Kitʼin knajun lhakʼapʼupʼin.
\p
\v 28 Ex ni Agripa junil ni Pablo:
\p —Va laycha kʼilhaʼatʼi para kaklhakapuʼal.
\p
\v 29 Ex yu Pablo va naul:
\p —Mas va tsʼuniycha tsʼanqay para kalhakʼapʼupʼi u mas
amaqan kalhakʼapʼupʼineʼe, pero kitʼin ktapayniniy Dios
para kʼaʼuntʼik tacha kitʼin tachun ni uxiknan yu kilaqasmakniyau,
pero jantu kaval kun kadena yu kpumaqchʼikanta.
\p
\v 30 Tejkan tamaktalcha ixchivinti ni Pablo, ex tayal
ni jalhachimoʼonuʼ Agripa ali ni gobernador Festo ali
ni Berenice kun tachun yu ancha ixtavilanal.
\v 31 Ex tumpajcha tapuʼal, va aqtaylcha talaxaqalay
siya yuʼuncha, va tanaul:
\p —Ni aniy lapanaki jantu tuʼuchun laqtaqal kamakal para
kalal kalhichʼikal y kamaqnikal.
\p
\v 32 Ex yu Agripa va junil ni Festo:
\p —Incha jantu iskʼil para kalaqlaʼoxinil ni César yu
ay jalhachimoʼonuʼ romano, ex lay niman oxamaktaun xakmakaunchoqol.
\c 27
\s Ni Pablo lhaʼankal laka putaulan Roma taʼan xalakatʼun Italia
\p
\v 1 Taval tapastaklhi para kintamalaqachan xalakatʼun
Italia. Ex Pablo kun yu alati tachʼinin va jalaqmaqxtaqkal
la ixtamakaʼ qayntaun kapitan yu ixjunkan Julio yu ixtanun
laka batallón taʼan ixnavin ni ay jalhachimoʼonuʼ César
Augusto.
\v 2 Ex ktaxtuucha ni laka putaulan Cesarea, kpuʼaucha
laqataun barco yu minchal laka putaulan Adrumentina
yu ixpuʼuxaʼan la ixkilpanaxnan xaputaulanaxna xaʼestado
Asia. Vachuʼ ixkintatʼaʼantan qayntaun yu ixjunkan Aristarco
yu machaqaʼ laka putaulan Tesalónica taʼan xaʼestado
Macedonia.
\p
\v 3 Ex yu ataun julchan val, kchaʼaucha la ixkilpaʼ
ni mar taʼan laka putaulan Sidón. Ex ni Julio ayaj mapaynil
ni Pablo porke xtaqnil lakatin kalaqlaqʼal ixʼamigos
para kataxtaqnil ixmaqskʼiniti.
\v 4 Astan ktaxtuchoqoocha ni Sidón kun ni barco yu
ixkpuʼantau. Pero yu xalakatʼun Chipre yu tanʼajvil
lakxkan, yucha kmakauntijlau la kilhijamaqxkʼan porke
yu un jantu ixkintaxtaqniyan lakatin para vas kajkʼau.
\v 5 Ex kpuʼau ni anchanu lakamar taʼan ixlhiʼukstsʼuniy
xaʼestado Cilicia ali xaʼestado Panfilia, taval kchaʼau
laka ay putaulan Mira taʼan xaʼestado Licia.
\v 6 Ancha ni kapitan temal ataun barco yu minchal laka
putaulan Alejandría yu ixʼuxaʼan Italia. Ex ancha kintamukʼancha.
\v 7 Ex paqlhuu va si laksniy xakpuʼantau ni barco por
pʼays ixkintalakatastukʼan ni un ex va skʼatsanaj kmaqxapuʼiniu
ixlhiʼukstsʼuniy laka putaulan Gnido. Ex xlhiyucha kpuʼau
ixlhisur xalakatʼun Kreta yu tanʼajvil lakxkan, ixlhiʼukstsʼuniy
laka putaulan Salmón.
\v 8 Ancha ayaj lhitaʼay kiltutapasau la ixpiktuʼ ni
Kreta. Taval kchaʼaucha ni putaulan yu junkan Taʼan
Lay Ox Tataulay Barcos, va ixlhiʼukstsʼuniy xaputaulan
Lasea.
\p
\v 9 Chuncha paqlhuucha kmaqatsʼanqau kijulchankʼan,
y jantucha apalay lay kajkʼau kun barco porke va tsʼuniycha
istsʼanqay para kalakachilcha xajulchan tejkan ayaj
taxkaaniy y unilay. Vachuʼ ixpaʼantacha ni malkuyuʼ
tejkan ixtataskʼajay ni israelitas. Xlhiyucha ni Pablo
va laqxtaqnil jatapastakʼati yu tatapatsay laka barco,
\v 10 va lakjunil:
\p —Xapaynin, kitʼin knajun la lhitaʼay kunaʼ incha kataylhaanau
laka barco. Kamaqatsʼanqayau ni barco kun ixmachʼapati
y vachuʼ mas ketsukuntikʼan lay kamaqatsʼanqau.
\p
\v 11 Pero yu xakapitan tropas apalay lhakapuʼanil ixchivinti
yu manavin ni barco kun ixchivinti ni ixʼukxtinkʼan
yu ixtatapatsay laka barco. Jantu kalhakapuʼanil ixchivinti
ni Pablo.
\v 12 Ni anchanu putaulan taʼan ixvil ni barco jantu
ox ixjunita para ancha kamukʼulatʼi ni barco tejkan
pʼaysni ixtamay xkan kun un. Xlhiyucha ixtapastakʼa
apalay ox katataxtulcha y kataʼalcha laka putaulan Fenice
para ancha kataʼulal ni barco. Ni Fenice va taun putaulan
xalakatʼun Kreta pero va ixvil taʼan ixputakʼutʼa ni
julchan.
\s Alil uniyaxkan lakamar
\p
\v 13 Ixtapakxanʼiy kaʼunilal laksniy para lay katapuʼal
barco. Ex tejkan laksniycha aqtayl unilay, va talhilal
ni laycha kaktaxtuu. Taval kpuʼaucha ixlhiʼukstsʼuniy
ixkiltuʼ ni tʼun.
\v 14 Pero va panchʼixkaʼ val nimancha tinik talakanunil
ni kibarcokʼan ni un yu minachal laka noroeste.
\v 15 Ni anchanu un sunlhaʼal ni barco tus jantu lay
vas kajkʼau. Xlhiyucha kmakajuu para kintalhaʼan taʼan
ixpuʼan ni un.
\v 16 Ex ktapasau ixlhiʼukstsʼuniy lakataun lakatʼun
yu tanʼajvil lakxkan yu junkan Klauda. Ancha jantucha
chapuj pʼays ixʼunilata, ex va skʼatsanaj kmukʼau yu
lakatʼuniy kibarcokʼan yu xakchʼikilnutau taʼan ay laka
barco yu xakpuʼantau.
\v 17 Tejkan kmukʼau ni lakatʼuniy barco taʼan ay barco
ex tatampachʼil kun laso ni ay barco para kalhitsukul
tapʼasta xaltaʼalakʼiu para jantu katacheʼel. Va ixtatalhauniy
kapulhaankal laka kukuj taʼan jantu pulman lakxkan yu
junkan Sirte. Ex tamatajul yu pumaqayaulhaankan ni barco
y jaxtaqkal kasunlhaʼankal kun un.
\v 18 Ex yu ataun julchan val, va la pʼaysni taylhaʼal
uniyaxkan, va tamakutul ixmachʼapati ni barco, va tamajʼalcha
lakxkan.
\v 19 Ex yu paqtʼutu julchan val, talaqtanqalhuʼolcha
ixputapatskʼan xamaltananan ni barco.
\v 20 Paqlhuu jantu katasul ni julchan ali jastʼakun,
va la pʼays taylhaʼal ni uniyaxkan. Jantucha xakpastakʼau
incha kakxajchaʼau.
\p
\v 21 Ex chuncha paqlhuucha jantucha xakvaynau, ex ni
Pablo tayal taʼan ixtavilanal ni lapanakni, va naul:
\p —Xapaynin, yu va ixkilalhakapuʼaniu kinchivinti y jantu
ixtaxtuu ni Kreta ex jantu ixmajkʼatsau tacha tʼaunau
majkʼatsanan chavaycha.
\v 22 Kitʼin klajunau jantu tuʼuchun katapastakʼun y
jantu katʼalhanantʼik. Mas katsʼanqayaʼ ni barco pero
uxiknankʼan jantu xataʼayuʼ katsʼanʼayapitik.
\v 23 Chuncha kʼatsay porke kutancha tsʼis kintasunil
ixmayul ni Dios, y yucha va Dios yu ixnavin kunita kitʼin
y yucha ktapatsaniy.
\v 24 Yu anchanu ixmayul kijunil: “Jantu katʼalhan,
Pablo. Uxintʼi maqskʼiniy kalaqpiti ni ay jalhachimoʼonuʼ
Romano. Por uxintʼi ni Dios kalaqʼaqtayjuyaʼ tachun
yu tatʼaʼantan laka barco.”
\v 25 Xlhiyucha, xapaynin, jantu tuʼuchun katapastakʼun.
Kitʼin klhakapuʼan ni Dios y kʼatsay ni yucha chuncha
kamakayaʼ tacha kijunil ni ixmayul.
\v 26 Pero maqskʼiniy katalakanuchaʼau taun lakatʼun
yu tanʼajvil lakxkan.
\p
\v 27 Ex tejkan tapasal tʼuy semana vananaj ixkintasunlhaʼantan
ni un lakamar yu junkan Adria. Ex pakltaun tsʼis val
yu xaʼoqxtamatin laka barco va tamakal kuenta ni xaktʼaunaucha
taʼukstsʼuninin ixpiktuʼ laka tʼun.
\v 28 Ex talkal ixpulmanixtu ni xkan va treinta y seis
metros ixjunita. Chuncha kaltanau alakatsʼuniy, ex aqtaun
talkachoqol va veinte y siete metros ixlhitʼajun ixpulmanixtu.
\v 29 Pero ayaj ixtatalhauniy katalakanunil chiyux ni
barco ex la ixtimusna tamatajul maʼatʼati yu pumaqayaulhaankan
ni barco. Va ayaj ixtanajun katunkulcha.
\p
\v 30 Yu xaʼoqxtamatin laka barco va ixtaqosputun. Ex
chuncha ixtamaʼeltajuputun lakxkan ni lakatʼuniy barco
la ixkankatiʼ yu ay barco. Pero ixjamakakan tacha katatsukul
munun alati yu pumaqayaulhaankan ni barco.
\v 31 Pero ni Pablo jalaqtsʼil, ex chuncha al juniniʼ
ni kapitan kun ixtropas, va naul:
\p —Incha kataqoslhi ni xaʼoqxtamatin laka barco ex jantu
lay kalaqxajtʼachʼipitik —naul ni Pablo.
\p
\v 32 Ex chuncha ni tropas niman tachʼukʼunil xalaso
ni lakatʼuniy barco, ex tajulcha lakxkan chuncha puqapaj.
\p
\v 33 Tejkan ixtunkumintacha ni Pablo laqlhixaqalal
katavayl tachun ni lapanakni, va naul:
\p —Tʼuycha semana va si kun talhanti tʼaunatʼik y jantu
vaynatʼik.
\v 34 Chavay klatapayniniyau kavayntʼik, chuncha maqskʼiniy
para lay kʼalaqxajchipitik. Jantu matichun katsʼanqayaʼ,
mas va maqataun miʼajikʼan la miʼaqtsulkʼan jantu katsʼanqayaʼ.
\p
\v 35 Tejkan chuncha naul, va tayal la ixlakaʼukxpukʼan
ni lapanakni, chʼapal aqxtaun pan y xtaqnil lhimalaqpuchuncha
ni Dios. Va laqcheʼel y aqtaylcha vajin.
\v 36 Chuncha jantucha apalay katamaqaninil ni lapanakni.
Aqtaylcha tavajin vachuʼ.
\v 37 Xajkuntau doscientos setenta y seis lapanakni
por tachun.
\v 38 Tejkan tavaynʼolcha ex tamajʼalcha lakxkan ni
trigo yu xajchal para jantucha katatsʼinkʼil ni barco.
\s Ni barco anachal lakxkan
\p
\v 39 Tejkan tunkulcha, talaqtsʼilcha ni lakatʼun pero
jantu katamispal. Vachuʼ talaqtsʼil taʼan ayaj ay maqlqatanun
xkan ni lakatʼun y va si kukuj ixjunita taʼan ixkilpaʼ.
Ex ancha ixtamalakanuputun ni barco.
\v 40 Va tachukʼunil xalaso yu pumaqayaulhaankan ni
barco y tamakaul lakxkan. Vachuʼ taxʼoqnil ixpumaltanakan
ni barco. Ex va tachʼimukʼanil yu ay laqchʼiti para
kasunlhaʼal ni un para kachaʼal ni barco la ixkilpaʼ
ni xkan.
\v 41 Pero astan talakanunil taʼan mutʼun ixvil ni kukuj
lakxkan. Yu ixkankatiʼ ayaj ox talakanuchal ex jantucha
lay kataxtuchoqol. Ex yu ixtimusna ni barco tus talaqcheʼeʼol
por pʼays talakanunil ni xkan.
\p
\v 42 Ex chuncha ni tropas ixtamaqniputun ni tachʼinin
para jantu kataqoslhi tejkan katatoqslatakukchal.
\v 43 Pero yu kapitan yucha jantu ixnajun kanil ni Pablo.
Ex chuncha jantu kaʼuyujnaul para kalaqmaqnikal ni tachʼinin.
Va laklhijunil katatoqslatakuklhi yu talaniy jaxkivinti
para katatakukchal la ixkilpaʼ.
\v 44 Vachuʼ laklhijunil yu jantu talaniy jaxkivinti
kataputakuklhi ltaʼalakʼiu u mas va taʼayucha kʼiu xatacheʼeniʼ
ni barco. Chuncha tachun si ox ktakukchaʼau lakatʼun.
\c 28
\s Ni Pablo chaʼal xalakatʼun Malta yu tanʼajvil lakxkan
\p
\v 1 Tejkan ox ktakukʼoʼchaʼaucha, ex kʼatsau ni anchanuʼ
ay lakatʼun yu tanʼajvil lakxkan va ixjunkan Malta.
\v 2 Ni lapanakni yu ancha ixtavilanal va ox kintamapaynin.
Yuʼuncha kintamalkulanin y kintalhijunin ukstsʼuniy
kaktayau para kaksʼoo porke ixtamay xkan y vachuʼ lhikʼasnin
ixjunita.
\v 3 Ex Pablo al saknaʼ kʼiu yu lakxixta. Tejkan mapʼul
laka jikmi niman taxtul maqataun tsapul, va ixqosputun
por lakaʼichil laka jikmi, ex va maktsakʼal ni Pablo.
\v 4 Tejkan ni lapanakni yu ancha machaqan talaqtsʼil
ni tsapul ixjukʼal la ixmakaʼ ni Pablo va talajunil:
\p —Ni aniy lapanaki kavalay va jamaqniniʼ. Mas ox talaqxajchal
lakamar pero jantucha xtaqnikan lakatin kataylhaʼal
tsukunuʼ por ixlaqtaqal.
\p
\v 5 Pero Pablo niman majkʼalhapʼuxkal laka jikmi ni
tsapul y jantu tuʼuchun kalhitapasal mas maktsakʼakal.
\v 6 Ni lapanakni ixtapakxanʼiy kakʼunlhi taʼan tsakʼanikal
u nimancha ixtaqtal janiniʼ. Pero mas panijcha val, jantu
katalaqtsʼil tuʼuchun kalhitapasal. Ex tamapaxachoqol
ixjatapastakʼatkʼan, va aqtayl tajuniy ni Pablo va taun
dios ixjunita.
\p
\v 7 Ancha ukstsʼuniy ixʼalin ixtʼun qayntaun yu ixjunkan
Publio yu xalhachimoʼonuʼ ixjunita ni anchanu lakatʼun
yu tanʼajvil lakxkan. Yucha ox kintalaqaʼin la ixchaqaʼ,
paqtʼutu si ox ixkintalhistaktan.
\v 8 Yu ixpay ixmal laqa saqati va ixchʼapata skakati
kun jakʼalnamaqpanti. Ex ni Pablo al laqtsʼiniʼ ni taqanʼan,
va tapayninil Dios y moqslanil ixmakaʼ y chuncha palay
makal.
\v 9 Tejkan chuncha tapasal, ex tamil alati taqanʼanin
yu ancha machaqan y vachuʼ palay taval.
\v 10 Ex chuncha ni lapanakni ayaj ox kintatoʼoyan y
kintaʼaqtayjun. Tejkan xaktaxtuputunchoqoyaucha kun
yu ataun barco ex chux kintaxtaqnin yu xakmaqskʼiniyau
para kilakatinkʼan.
\s Ni Pablo chaʼal laka putaulan Roma
\p
\v 11 Tejkan klaqayntsaucha laʼatʼutu malkuyuʼ ni ancha
xakvilanau ex ktaxtuchoqoocha. Kpuʼau taun barco yu
ancha ixvil yu ixpakxanta katapasaʼelal tejkan tamay
xkan ali un. Ni anchanu barco va yu ixmintachal laka
putaulan Alejandría. La ixkankatiʼ va ixjukʼanil laʼatʼuy
ixdioskʼan yu lakjunkan Cástor ali Polux.
\v 12 Ex kpuʼau anchanu barco, kchaʼau laka putaulan
Sirakusa. Ancha xakvilanau paqtʼutu.
\v 13 Astan ikpuʼanchoqoocha barco, kʼaucha laka putaulan
Regio. Yu ataun julchan val, va ostaulal un yu minchal
ixlhisur y va yucha kintasunlhaʼan. Ex yu ataun julchan
val, kchaʼau laka putaulan Puteoli.
\v 14 Ancha klaqpaxtoqvi lati yu ixtalhakapuʼan Jesús.
Yuʼuncha kintalhijunin kakloqojvi taun semana la ixchaqakʼan.
Ex chuncha ktaxtuchoqoo, va ktaylhaʼau kejaltantikʼan
para kchaʼau laka ay putaulan Roma.
\v 15 Ni lapanakni yu ixtalhakapuʼan Jesús yu ixtavilanal
ancha va takʼatsal ni ancha kakchaʼanau. Ex kintamin
tastukʼinin tus xalaklhitamau Apio y vachuʼ yu putaulan
yu ixjunkan Aqatʼutu Tiendas. Tejkan ni Pablo jalaqtsʼil
ex xtaqnil lhimalaqpuchuncha ni Dios y jantucha apalay
kamaqaninil.
\v 16 Tejkan kchaʼaucha yu ay putaulan Roma ex ni kapitan
jamaqxtaqnilcha xaʼukxtin tropas ni tachʼinin. Pero
ni Pablo xtaqnikal lakatin para xʼaman kataulal kun
pumataun tropa yu kalhistaklhi.
\s Ni Pablo laqputeʼey ixchivinti Dios laka ay putaulan Roma
\p
\v 17 Ex paqtʼutu julchan val, ni Pablo jamalaqachanal
ixjuntaʼika yu xalajʼaynin ni israelitas yu ancha ixtavilanal.
Tejkan tataqxtoqʼolcha, ex lakjunil ni Pablo:
\p —Ketʼalaqaunin, mas jantu tuʼuchun laqtaqal kaklakmakanil
ni kintʼaʼisraelitas y jantu kaklaktanchanil ixputsukukʼan
kepayankʼan yu maqancha ixtatʼajun pero ancha Jerusalén
va kmaqxtaqkal la ixtamakakʼan xatropas Romanos.
\v 18 Yuʼuncha kintalhisakmil tisuncha laqtaqal xakmakata.
Ex astan ixkintamakaunputunchoqoy porke jantu tuʼuchun
laqtaqal kintatemanil yu lay kintapumaqnil.
\v 19 Pero yu israelitas tanaul ni jantu kintamakaul.
Xlhiyucha kskʼil para kalaqlaʼoxil ni ay jalhachimoʼonuʼ
Romano. Pero jantu tuʼuchun laqtaqal klakmukʼaniputun
kintʼaʼisraelitas.
\v 20 Va xlhiyucha klajuntaʼiu para kaklatʼachiviniu.
Kitʼin kchʼikal va por kpakxanʼiy yu kamakayaʼ Dios
vachu chun tacha tapakxanʼiy tachun ni israelitas.
\p
\v 21 Ex chuncha ni yuʼuncha tajunil:
\p —Jantu kaklaqaʼiu karta yu kaminchal xaʼestado Judea
yu kalhichivinin uxintʼi. Vachuʼ ni ketʼalaqauninkʼan
yu ancha taminchal jantu tuʼuchun katalhichivinin, jantu
tamukʼaniyan laqtaqal.
\v 22 Pero kijnan ijkʼatsaputunau mejatapastakʼati porke
ijkʼatsayau ni mas va toʼoxtaycha kaval jantu ox talhichiviniy
ni anchanuʼ saystʼi jatapastakʼati.
\p
\v 23 Chuncha ni yuʼuncha tamachʼantamil ixjatapastakʼatikʼan
para katalaqminchoqol ni Pablo ataun julchan. Ex apalay
qaynlhuu talaqʼal taʼan ixvil. Ex vakuj tus toqoxata
va jalakmasunil y jalaqputeʼenil tacha lhachimoʼonun
ni Dios. Vachuʼ laqlhixaqalal ixlhachimoʼon Moisés kun
yu maqancha tatsʼoqlhi xalaqputeʼeniʼ ixchivinti Dios
para katalhakapuʼal ni Jesús.
\v 24 Lati talhakapuʼanil ixchivinti, lati jantu.
\v 25 Chuncha siya yuʼuncha jantu katamachʼantamil ixchivintikʼan.
Ex aqtaylcha taʼanchoqoy. Pero pʼunaj jalakjunil ni
Pablo:
\p —Laqsaval naul ni Espíritu Santo tejkan mapasanil ixchivinti
ni Isaías yu maqancha ixlaqputeʼey ixchivinti Dios, yucha
inchine lhichivinil mepayankʼan, va naul:
\q
\v 26 Kʼalaqpiti ni anchanu lapanakni,
\q kalakʼun mas ox kataqasmakyaʼ pero jantu katamalaqasiyaʼ,
\q mas katalaqtsʼinaʼ pero jantu katamispayaʼ.
\q
\v 27 Pʼays tamakay ixjalhanutikʼan ni lapanakni,
\q jantu taqasmatʼa kun ixpaqasmaknikʼan,
\q va talaqpustoqnun la ixlaqchulkʼan,
\q para jantu tuʼuchun katalaqtsʼil,
\q para jantu tuʼuchun kataqasmaklhi,
\q para jantu tuʼuchun katamalaqasil la ixjalhanutikʼan,
\q para jantu katamapaxal ixputsukukʼan y chuncha palay
kaklakmakal.
\m
\v 28 Chuncha naul ni Dios y chavay klamakʼatsaniyau
ni Dios vachuʼ kalaqmalaqachaniyaʼ yu jantu israelitas
kataval ni ox chivinti yu pulaqtaxtukan. Yuʼuncha kataqasmatʼaʼ
—naul ni Pablo.
\p [
\v 29 Tejkan chuncha naul, ex taʼanchoqolcha ni israelitas,
va pʼays ixtalakchiviniy siya yuʼuncha.]
\p
\v 30 Va tʼuy jachʼitin ancha ixvil ni Pablo laqa chaqaʼ
taʼan mapalkan renta. Va ox jalaqaʼil tachun yu ixtalaqʼan.
\v 31 Sin talhanti ixlaqputeʼey tacha lhachimoʼonun
ni Dios, ixlhichiviniy ni Jalhachimoʼonuʼ Jesucristo
y jantu matichun ixlaktanchaniy.