\id ROM
\h ROMANOS
\mt2 Ni Chivinti yu Jalaqtsʼoqnil Pablo Ixlapanakni Dios yu Tavilanal Roma
\c 1
\s Ni Pablo jalakmastakʼay yu tavilananchal Roma
\p
\v 1 Kitʼin kPablo, ixʼoqxtamati Jesucristo kunita. Yucha
kilaksakta y kimalaqachal puteʼeniʼ yu ox ixchivinti
Dios.
\v 2 La maqancha ni Dios ixnajuntacha ni kaʼalinaʼ ni
anchanu chivinti. Chuncha tatsʼoqlhi la ixchivinti Dios
ixlapanakni yu maqancha ixtalaqputeʼey ixchivinti.
\v 3 Ixtalhichiviniy ni Jesucristo kiJalhachimoʼonukʼan,
yu Sasʼatʼa Dios. La ixlakatunaj va ixpapanti David
ixjunita
\v 4 pero yu Espíritu Santo masul ni vachuʼ va Sasʼatʼa
Dios. Va chuncha masul kun tapʼasta tejkan kujchoqol
mas va ixnitacha.
\v 5 Por yucha ni Dios kimapaynil, va kilaksaklhi para
kaklaqputeʼel ixchivinti mas va toʼoxtaycha lakamunukpaʼ.
Va najun katalhakapuʼal lapanakni y katamakal tacha
yucha lhinajun para chuncha katoʼoyakal ixtaqaʼuti.
\v 6 Va chuncha ni uxiknan mas maqati vilanantʼik, vachu
ni Dios talaksakni para ixlapanakni Jesucristo kʼaʼuntʼik.
\v 7 Klatsʼoqniyau tachun uxiknan yu vilanantʼik laka
putaulan Roma, yu Dios tapaxkayan y talaksakni para ixlapanakni
kʼaʼuntʼik. Katamapaynin y oxamaktaun katamakan kimPay
Dioskʼan kun kiJalhachimoʼonukʼan Jesucristo.
\s Ni Pablo najun ni jalaqʼuxaʼan yu tavilananchal Roma
\p
\v 8 Pʼunaj klajunputunau ni va kxtaqniy lhimalaqpuchuncha
ni kiDios por mintachunkʼan, tejkan ktʼachiviniy Dios
por yu makata Jesucristo. Milhakapuʼatkʼan va puteʼekan
mas va toʼoxtaycha kaval.
\v 9 Tejkan klaqputeʼey ni ox chivinti yu lhichiviniy
Sasʼatʼa, va ktapatsaniy Dios kun tachun la kelhanuti.
Yucha kʼatsay ni si klapastakʼalhiyau tejkan ktapayniniy.
\v 10 Ikskʼin ni Dios para lay kaklalaqʼau ni uxiknan
incha yucha najun ox kaval.
\v 11 Ayaj klalaqtsʼinputunau para klaʼaqtayjuu kalaʼaʼitʼik
taun aqtayjunti yu xtaʼa ni Espíritu para chuncha apalay
pʼas kaval milhakapuʼatkʼan.
\v 12 Chuncha knajun ni uxiknan ali kitʼin kalaxtaqniu
tapʼasta la kilhakapuʼatkʼan.
\v 13 Ketʼalaqaunin, va iknajun kakʼatsʼatʼik ni aqlhuu
klalaqʼuxanachaʼau laqtsʼinin pero mas tus chavaycha
va tacha alin yu kilaktanchaniy. Va klhajaʼiputun lapanakni
yu katalhakapuʼal taʼan vilanantʼik, chuncha tacha ikmakal
alati laka putaulanin.
\v 14 Va ijkʼatsan tacha kaʼalil yu kaklhaanil tachun
ni lapanakni mas yu griegos y mas yu jantu griegos kataval,
yu talakpastaknan ali yu jantu talakpastaknan.
\v 15 Xlhiyucha va ayaj klalaqputeʼeniputunau yu lajʼoxi
chivinti ni uxiknan yu vilananchipitik laka putaulan
Roma.
\s Ixtapʼasta ni ox chivinti yu lay tapulaqtaxtuy lapanakni yu talhakapuʼan
\p
\v 16 Ni kitʼin jantu klhimaxanan kaklaqputeʼel yu ox
chivinti, va ixtapʼasta Dios yu lay katapulaqtaxtul tachun
yu talhakapuʼan, pʼunaj yu israelitas pero vachu yu alati
lapanakni.
\v 17 Va chuncha tasuy ni Dios kintalaqtsʼinan tacha
lajʼoxin lapanakni, vamun por lhakapuʼanau. Va chuncha
najun ixchivinti Dios yu tsʼoqkanta: “Ni lapanakni
yu Dios ox laqtsʼin, yucha va por ixlhakapuʼati katsukuyaʼ.”
\s Ixlaqtaqalkʼan ni lapanakni
\p
\v 18 Tasuy ni va lukujlay Dios laktʼiyan por tachun
laqtaqal yu tamakay ni lapanakni. Dios jantu ox jalaqtsʼin
tacha tatiʼukxuntayay, vachu tamakay laqtaqal para jantu
lay kamispakal yu laqsaval.
\v 19 Lay tapumispay ni Dios por tachun yu alin, chuncha
ni Dios va lakmasunil tacha junita.
\v 20 Yu ixtapʼasta ni Dios kun tachun ixʼoxixtu mas
jantu tasuy, va ox mispakan, tejkan pʼunaj makal yu lakamunukpaʼ
tus chavaycha. Va jamispakan por tachun yu makal. Xlhiyucha
ni lapanakni jantu lay tanajun ni jantu tamispay tacha
junita ni Dios.
\v 21 Mas ixtakʼatsay ni alin Dios, jantu aqtaun ay katamakal
tacha Dios, jantu aqtaun kataxtaqnil lhimalaqpuchuncha.
Ex chuncha va tacha jantu kaʼalil ixjatapastakʼatkʼan,
tus va tacha putsʼista la ixjatapastakʼatkʼan.
\v 22 Tanajun va lhuvaj jatapastakʼati talhitʼajun pero
jantu laqsaval kaval, va tontos.
\v 23 Ni Dios yu jantu aqtaun kamiʼoyaʼ, yucha jantucha
tatoʼoyay. Yu tatoʼoyay va antivas yu tasuy tacha valiʼiy
lapanakni yu tamiʼojoy y tacha tsʼoʼon, tacha talhitsukukna,
tacha tsapulin.
\v 24 Xlhiyucha lakmakaul ni Dios para katamakal tacha
yu tamakaputun. Mas va yu laqtaqal yu lhitamaxanikan,
talamakaniy la ixlakatunajkʼan.
\v 25 Tamapaxata yu laqsaval yu masuy ni Dios para kaval
jalaklkanti. Apalay tatoʼoyay yu ixtamakan Dios, jantucha
tatoʼoyay ni Dios yu mero jalakmakal, va yucha ay kamakakal
mas va tavanancha. Va chuncha kaval.
\p
\v 26 Xlhiyucha ni Dios lakmakajuntacha para katamakal
yu lhitamaxanikan. Mas lati yu xanatin talhimapaxata
ixputsukukʼan, talamakaniy laqxoqta va siya yuʼuncha
yu jantu maqskʼiniy katamakal.
\v 27 Vachu va chun lati yu joʼakna tamakajun yu tacha
laklhijuniy Dios katamakal kun xanatin. Apalay talakatsastayay
para katalamakanil siya yuʼuncha yu lhitamaxanikan.
Ex chuncha talaqaʼiy la ixlakatunajkʼan ni maqanlqajnati
yu tapaxtoqniy.
\v 28 Jantucha ixtamispaputun ni Dios, xlhiyucha ni Dios
lakmakajuntacha katapastaklhi yu jantu ox y katamakal
yu jantu maqskʼiniy.
\v 29 Talaqtanuʼol tachun yu jantu ox kaval, tamakay
talaqalhin, vamun tapastakʼuy para kaʼalil ixmaqalitkʼan
y vachu ayaj talaktuʼunun. Vamun ayaj taʼakchaʼan, talukujlay,
tamaqninin, tamakanunun, taxkayanan, tamanuy jalaklkanti.
\v 30 Jantu ox talhichiviniy yu alati, taxkajiy ni Dios,
taʼayajnan, la lajʼay takʼatsan, lajʼay lakmakakan por
ixchivintikʼan, tapastakʼa tacha lay katapumakal alati
talaqalhin, jantu taqalasmatʼa ixpayankʼan.
\v 31 Jantu talakpastaknanputun, jantu tamakay yu tanajun,
jantu matichun tapaxkay y jantu matichun tamapayniy.
\v 32 Ni Dios lhinajun yu chuncha tamakay, tapaxtoqniy
katanil. Chuncha takʼatsay pero tataylhaʼan makanan.
Vachuʼ ox talhilay tejkan alati lapanakni vachu chun
tamakay.
\c 2
\s Vamun paxtoqniy Dios kamukʼal laqtaqal
\p
\v 1 Xlhiyucha mas va taʼayucha kʼatʼi jantu paxtoqniyan
kʼamukʼanin laqtaqal yu aqayntaun. Tejkan uxintʼi mukʼaniy
laqtaqal yu aqayntaun ex vachu mukʼanikʼan mimaqanlqajnati.
Vachu va chun makʼay laqtaqal ni uxintʼi.
\v 2 Kʼatsayau ni Dios ox makay tejkan lakmukʼaniy ixlaqtaqalkʼan
ni lapanakni yu tamaqtaqalhinin.
\v 3 Chavay incha kʼalakmukʼanin laqtaqal yu alati pero
yu uxintʼi vachu va chun makʼay, ¿lhakʼapʼupʼin ni jantu
kamukʼaniyan laqtaqal ni Dios?
\v 4 Va tacha akchʼintʼamay yu ay ixjamapayninti ni
Dios yu jantu tsʼalaj lukujlay, yu ayaj maqantaulay.
¿Jantu kʼatsʼay ni Dios mapayniyan para kʼamapʼaxa mijatapastakʼati?
\v 5 Pero uxintʼi pʼas makʼay melhanuti, jantu aqtaun
mapʼaxapʼutʼun. Chuncha tʼaʼuncha lalhavanaʼ mimaqanlqajnati
yu kaʼalinaʼ. Ni anchanuʼ julchan Dios kamasuyaʼ ni
ox lakmukʼaniy laqtaqal ni lapanakni.
\v 6 Yucha kalaqxtaqniyaʼ ixlhilhajatkʼan qayntamin
tacha tapaxtoqniy por yu tamakay.
\v 7 Yu tamakay yu lajʼoxi, yuʼuncha kalaqxtaqniyaʼ ni
jatsukunti yu jantu aqtaun kamiʼoyaʼ. Yuʼuncha tapuxkajuy
yu ox para kalaktoʼoyakal y katatsukul mas va tavanancha.
\v 8 Lati aqspuknin y jantu taqasmakputun yu laqsaval,
vamun tamakaputun yu jantu ox. Dios kalaqtalqauniyaʼ
y kalaqxtaqniyaʼ maqanlqajnati.
\v 9 Katalaqaʼiyaʼ maqanlqajnati kun maqaniti tachun
yu tataylhaʼan makanan laqtaqal. Chuncha tapaxtoqniy
yu israelitas pero vachu tapaxtoqniy yu alati lapanakni.
\v 10 Pero tachun yu tamakay yu lajʼox yuʼuncha katalaqaʼiyaʼ
ni oxixtu yu xtaʼa ni Dios, kalaktoʼoyakanaʼ, oxamaktamin
katajunaʼ. Va chuncha tapaxtoqniy ni israelitas pero
vachu tapaxtoqniy yu alati lapanakni.
\v 11 Yu Dios va aqstanchunin japuxkaulaqtsʼin lapanakni.
\s Va si ox makay ni Dios tejkan mukʼay laqtaqal
\p
\v 12 Yu jantu tamispay yu lhinajun Dios yu tsʼoqkanta,
incha tamakay talaqalhin, yuʼuncha kataniyaʼ sin katamispal.
Yu ox tamispay yu lhinajun Dios, incha tamakay talaqalhin
yuʼuncha kalakmukʼanikanaʼ laqtaqal por jantu katamakal
yu lhinaunkan.
\v 13 Yu vamun taqasmatʼa yu lhinaunkan, yuʼuncha ni
Dios jantu jalaqaʼiy. Va jalaqaʼiy yu tamakay tacha
lhinaunkan.
\v 14 Lati yu jantu israelitas kataval mas jantu tamispay
yu lhinajun Dios yu tsʼoqkanta, tamakay yu lhinaunkan,
va tacha tamispay yu lhinaunkan.
\v 15 Ex chuncha tamasuy ni va tacha tsʼoqkanta la ixjalhanutkʼan
yu lhinaunkan. Vachu taʼukskʼatsay tisuncha yu ox ali
tisuncha yu jantu ox kʼamakʼatʼi. Vachu la ixjatapastakʼatkʼan
kalakmukʼanikanaʼ laqtaqal ixlaqʼamankʼan, vachuʼ kalaqʼaqanixtukanaʼ.
\v 16 Anchanu julchan ni Dios kalaqlaqtsʼintanuniyaʼ
ixjatapastakʼatkʼan mas yu tamakay laqatamaqsaq. Chuncha
najun yu lajʼox chivinti yu klaqputeʼey.
\s Ni israelitas ali ixlhachimoʼon Dios yu laqaʼil Moisés
\p
\v 17 Ka va uxintʼi naʼun va israelita kʼatʼi, lhilay
kʼapʼulaqtʼaxtʼuyeʼecha por kʼamispʼatʼi ixlhachimoʼon
Dios. Vachu ay makʼakʼan por naʼun ox mispʼay ni Dios.
\v 18 Vachu lhilay ni mispʼay yu lhinajun Dios. Vachu
naʼun ni ixlhachimoʼon masuniʼoyan tisuncha yu apalay
ox maqskʼiniy.
\v 19 Ayaj kʼatsʼancha, naʼun ni lay kʼalaklhitʼa yu
jantu tamispay tacha laʼachʼixin kataval. Kʼatsʼancha
tacha maklku yu maputunkujuy taʼan putsʼista.
\v 20 Makʼakʼan tacha kalakmalanitʼi yu jantu tuʼuchun
tamispay, tacha kalakmamoʼotʼi yu tontoskaʼ. Lhitʼaʼun
ixlhachimoʼon Dios, xlhiyucha lhilay kʼatsʼaʼoʼoy tachun
y mispʼay yu laqsaval.
\v 21 Uxintʼi jamalaniniʼ kʼatsʼan. ¿Ex valiʼiycha jantu
malanikʼan meʼeman? Chavay laqpʼutʼeʼey ni jantu kʼaʼalhavan.
¿Ex valiʼiycha alhavanan?
\v 22 Vachuʼ naʼun jantu kʼatʼatʼamatʼi qayntaun yu
jantu minavin. ¿Ex valiʼiycha tʼatʼamay qayntaun yu
jantu minavin? Lakxkʼaʼiy yu antivas. ¿Ex valiʼiycha
jalakʼalhaumaxtʼunin yu taʼan tatoʼoyanan?
\v 23 Uxintʼi ay makʼakʼan por mispʼay yu lhinajun ni
Dios pero jantu makʼay tacha lhinajun. Ex chuncha jantu
tʼoʼoyay ni Dios.
\v 24 Xlhiyucha laqsaval yu tsʼoqkanta la ixchivinti
Dios taʼan najun:
\q Va milaqtaqalkʼan uxiknan
\q ni taʼakchʼintamay ni Dios yu jantu tamispay.
\p
\v 25 Chavay incha kʼamakʼaʼo tacha tsʼoqkal laka lhachimoʼon
ex paxtoqniy kʼaxvililichʼukʼupʼuxnikʼa. Pero incha
jantu kamakʼaʼo tacha lhinajun, ex jantu xtapal mas kʼaxvililichʼukʼupʼuxnikʼa.
\v 26 Xlhiyucha ni Dios ox jalaqtsʼin yu tamakay yu
lhinajun, mas jantu israelitas kataval, mas jantu kalakxvililichukʼupʼuxnikal.
\v 27 Ex chuncha yu makay tacha lhinaunkan mas jantu
kalakxvililichukʼupʼuxnikal, yuʼuncha katamukʼaniyan
milaqtaqalkʼan yu israelitas untʼatʼik. Mas xvililichʼukʼupʼuxnikʼantʼatʼik,
jantu alasmatʼatʼik yu lhinaunkan.
\v 28 Qayntaun lapanaki jantu lay kaval israelita vamun
por kaxvililichukʼupʼuxnikal. Jantu maqskʼiniy kaxvililichukʼupʼuxnikal
vamun la xaxtaʼa.
\v 29 Yu laqsaval israelita maqskʼiniy kaxvililichukʼupʼuxnikal
yu jantu ox la ixjalhanuti. Chuncha makay ni Espíritu
Santo, jantu chuncha makay ni chivinti yu tsʼoqkanta.
Ex mas jantu ox talaqtsʼin yu alati lapanakni, pero yu
Dios ox laqtsʼin.
\c 3
\s Mas yu lapanakni jantu lay lhakapuʼanikan, yu Dios lay kalhakʼapʼupʼi
\p
\v 1 ¿Ex tisuncha xtapal kʼapʼutsʼukʼu israelita? ¿Tas
kaʼaqtayjun incha kʼaxvililichʼukʼupʼuxnikʼa?
\v 2 Ayaj xtapal kʼapʼutsʼukʼu israelita. Va yuʼuncha
ni Dios pʼunaj jaxtaqnil ixchivinti.
\v 3 Pero lati jantu katalhakapuʼanil ixchivinti. ¿Exni?
¿Lhilay va xlhiyucha ni Dios jantucha lay lhakapuʼanikan?
\v 4 Jantu chuncha kaval. Dios si najun yu laqsaval
mas tachun ni lapanakni talaklkanan. Va chuncha tsʼoqkanta,
junkan ni Dios:
\q Kakʼatsakanaʼ ni laqsaval minchivinti.
\q Vachu incha matichun mukʼaniputunan laqtaqal, si ox
kʼaxajtʼachiy.
\p
\v 5 Tejkan makayau talaqalhin, ex apalay ox tasuy ni
Dios tachun ox makay. ¿Exni? ¿Lhilay va xlhiyucha ni
Dios jantu ox makay tejkan kintamukʼaniyan laqtaqal?
(Chuncha tanajun lati lapanakni.)
\v 6 Jantu laqsaval kaval. Incha Dios jantu ox makay
ex jantu kalayaʼ kamukʼaniyaʼ laqtaqal yu xalapanakni
lakamunukpaʼ.
\v 7 Lati tanajun ni apalay ox kʼalaklkʼan. Ex chuncha
apalay ox katasul ni laqsaval yu najun ni Dios, ex apalay
katoʼoyakal. Xlhiyucha jantu maqskʼiniy kimukʼanil kilaqtaqal.
\v 8 Vachu tanajun: “Apalay ox kamakau talaqalhin para
kaxajchal yu lajʼox.” Yuʼuncha tanajun va chuncha ikmalaniy
kitʼin pero kintamanuniy jalaklkanti. Va yuʼuncha tapaxtoqniy
ixmaqanlqajnatkʼan.
\s Jantu kaʼalil matichun yu ox kun Dios
\p
\v 9 ¿Exni? ¿Lhilay ni kijnankʼan yu israelitas apalay
lajʼox juntau xajantu yu alati lapanakni? Jantu laqsaval
kaval. Yu tacha va aniykaʼ klamasuniu, mas yu israelitas,
mas yu alati lapanakni, va si kintalhajayan ixtapʼasta
talaqalhin.
\v 10 Va chuncha najun taʼan tsʼoqkanta la ixchivinti
Dios:
\q Jantu kaʼalil matichun yu ox kun Dios, jantu matichun.
\q
\v 11 Jantu matichun malaqasiy.
\q Jantu matichun lakxkajuy ni Dios.
\q
\v 12 Tachun ni lapanakni valiʼiy taʼoqspalatʼajun tus
jantucha tuʼuchun ixtapalkʼan kataval.
\q Jantu kaʼalil matichun yu makay yu lajʼox, jantu matichun.
\q
\v 13 La ixkilkʼan va tacha putaknuncha lvaa kiluvil.
\q La isimaʼatkʼan tamakanunun.
\q Tacha yu laktuʼunun tsapulin, ixqaqxtaʼakʼan si ixvenenokʼan
talakmaʼata.
\q
\v 14 Ixkilkʼan qaqsun tajunita, va si laqxtoqnuʼ tachiviniy.
\q
\v 15 Tatakyautʼajun vamuncha para katamaqninil.
\q
\v 16 La ixtinkʼan talaqalhilhaʼan y tamakaulhaʼan jamaqaniti
taʼan tapuʼan.
\q
\v 17 Jantu aqtaun tamispay yu lakatin taʼan puʼan yu
oxamaktaun putsuku.
\q
\v 18 Jantu aqtaun tatalhauniy Dios.
\p
\v 19 Kʼatsayau ni tachun yu lhinajun Dios la ixlhachimoʼon
yucha laklhijuniy ni lapanakni yu tapaxtoqniy katamakal.
Xlhiyucha tachun ni lapanakni lakamunukpaʼ maqskʼiniy
saq katataulal tejkan Dios lakmukʼaniy ixlaqtaqalkʼan.
\v 20 Jantu matichun lay ox kaval kun Dios por kamakaputul
yu lhinaunkan. Va por yu lhinaunkan pukʼatsayau ni alin
kilaqtaqalkʼan.
\s Ni Dios ox jalaqaʼiy ni lapanakni yu talhakapuʼan ni Jesucristo
\p
\v 21 Chavaycha ni Dios masuy ni kintalaqtsʼinan tacha
lajʼoxin lapanakni, pero jantu va por kamakau yu lhinaunkan.
Vachu va chuncha yu la maqancha tatsʼoqlhi ixchivinti
Dios, yuʼuncha ixtanajun chuncha katasuyaʼ. Chuncha ixtanajun
ni lapanakni yu tatsʼoqlhi ixlhachimoʼon ali vachu yu
ixtalaqputeʼey ixchivinti.
\v 22 Ni Dios jalaqtsʼin lapanakni tacha lajʼoxin kataval
incha talhakapuʼan ni Jesucristo, mas va tachun yu talhakapuʼan.
Va aqstanchunin, mas va taʼayucha kaval.
\v 23 Tachun ni lapanakni tamaqtaqalhinin, va tatsʼanqaniy
ixʼoxixtu ni Dios.
\v 24 Pero Dios jalakmapayniy y jalaqtsʼin tacha lajʼoxin
lapanakni. Yucha va por ixjamapayninti por yu makal
ni Cristo Jesús yu jamalaqtaxtuy.
\v 25 Yucha ni Dios laksaklhi para kanil ex chuncha
val tacha taun lapaxkan yu moqslakal. Ex chuncha jantucha
kintalukujlaniyan ni Dios incha lhakapuʼanau ni katapulaqtaxtuyau
ixjakʼalna ni Jesús. Chuncha makal ni Dios para katasul
ni ayaj ox makay. Va ox maqantaulay, jantu kintamukʼanin
maqanlqajnati por yu makataucha.
\v 26 Va chuncha makal para katasul ni ayaj ox makanan
mas va chavaycha. Ex chuncha mispakan ni Dios ox makanan.
Vachu mispakan ni Dios jalaqtsʼin tacha lajʼoxin lapanakni
tachun yu talhakapuʼan ni Jesucristo.
\v 27 ¿Chavay vananaj paxtoqniy para ay kakʼatsʼa? Jantu
tsʼuniy. ¿Valiʼiycha? Jantu kalaqtaxtuyau por yu lhachimoʼon
yu lhinajun suncha kʼamakʼatʼi, va por yu lhachimoʼon
yu lhinajun kʼalhakʼapʼupʼi.
\v 28 Chavay kʼatsayau ni Dios jalaqtsʼin tacha lajʼoxin
kataval ni lapanakni por talhakapuʼan, jantu por tamakay
yu lhinaunkan laka lhachimoʼon.
\v 29 ¿Lhilayatʼik ni Dios vamun ixDioskʼan ni israelitas?
Jantu laqsaval kaval. Vachu va ixDioskʼan yu jantu israelitas
kataval.
\v 30 Yu Dios va taun. Xlhiyucha jalaqtsʼin tacha lajʼoxin
lapanakni tachun yu talhakapuʼan, mas va yu israelitas
yu jaxvililichukʼupʼuxnikal y mas va yu alati lapanakni.
\v 31 Chuncha vamun maqskʼiniy kalhakʼapʼupʼi, pero jantu
iknaunau ni jantucha xtapal ni lhachimoʼon. Iknaunau
ni apalay xtapal.
\c 4
\s Ni Abraham lhakapuʼanil ixchivinti Dios, xlhiyucha ni Dios ox laqtsʼil
\p
\v 1 Chavaycha yu Abraham va kimpaykʼan kintachunkʼan
yu israelitas juntau. ¿Tas kalhichiviniucha ni yucha?
\v 2 Ni Dios laqtsʼil ni Abraham tacha ox lapanaki pero
jantu kaval por tuʼuchun yu makal. Incha kaval por yu
makal, ex kapaxtoqnil la ay kakʼatsal, pero jantu la ixlakaʼukxpuʼ
ni Dios.
\v 3 La ixchivinti Dios najun ni Abraham lhakapuʼal
ni Dios, xlhiyucha ni Dios laqtsʼil tacha ox lapanaki.
\v 4 Qayntaun oqxtamati yu tapatsay yucha lhajay por
ixlhitapatsa, jantu por ixmapaynika.
\v 5 Yu jantu talaqtaxtuputun por tamakay yu ox, incha
talaqtaxtuputun por talhakapuʼan, ex ni Dios jalaqaʼiy
tacha lajʼoxin lapanakni por ixlhakapuʼatkʼan, mas alin
ixtalaqalhinkʼan.
\v 6 Vachu va chuncha maqancha naul ni David ni va ayaj
achan ni lapanaki yu Dios laqaʼiy tacha ox junita mas
jantu por yu makay.
\v 7 Va inchineʼ tsʼoqlhi ni David:
\q Talajʼachantacha ni lapanakni yu laqmalaqmixiniʼokanta
ixtalaqalhinkʼan,
\q yu lakxakaniʼokantacha ixlaqtaqalkʼan.
\q
\v 8 Ayaj achan ni lapanaki yu Dios jantu makaniy kuenta
ixlaqtaqal.
\p
\v 9 Yu anuʼ achati, jantu vamun para yu israelitas yu
lakxvililichukʼupʼuxnikanta, vachu para yu alati lapanakni.
Tacha iknaunau, ni Dios laqaʼil ni Abraham tacha ox lapanaki
tejkan lhakapuʼal.
\v 10 ¿Tas ixjunitacha ni Abraham tejkan laqaʼikal, tejkan
laqaʼil Dios? ¿Va ixvililichukʼupʼuxnikantacha o jantu?
Va jantukaʼ ixvililichukʼupʼuxnikanta.
\v 11 Yu Abraham laqaʼikal tacha qayntaun lapanaki yu
ox kaval tejkan jantukaʼ ixchukʼupʼuxnikanta. Ex astan
chukʼupʼuxnikal para kamasul ni laqsaval ni Dios laqaʼil
por ixlhakapuʼati. Chuncha val xajapay tachun yu jalaqaʼikan
tacha lajʼoxin kataval por ixlhakapuʼatkʼan mas jantukaʼ
lakchukʼupʼuxnikanta.
\v 12 Vachu val xajapay tachun ni israelitas yu lakchukʼupʼuxnikan
pero jantu xajapay kaval por lakchukʼupʼuxnikan, maqskʼiniy
katalhakapuʼal. Chuncha ni Abraham va xajapay tachun
yu talhakapuʼan tacha lhakapuʼal ni yucha tejkan jantukaʼ
ixchukʼupʼuxnikanta.
\s Ni Abraham lhakapuʼal, xlhiyucha Dios naul ni kaxtaqniyaʼ yu ox
\p
\v 13 Ni Abraham va junkal ni lakamunukpaʼ va ixnavinkʼan
kunaʼ ni sasʼatʼan. Jantu chuncha kajunkal por ixmakay
yu lhinaunkan, va por ixlhakapuʼan. Xlhiyucha ni Dios
ixlaqtsʼin tacha ox lapanaki.
\v 14 Incha Dios ixnaul ixnavinkʼan kunaʼ vamun incha
katamakal yu ixlhinajun, ex jantu xtapal kaval ixlhakapuʼatkʼan
y jantu lay matichun kalaqaʼil yu kaxtaqlhi ni Dios.
\v 15 Ixlhilukuj ni Dios tapaxtoqniy yu jantu tamakay
yu lhinajun. Pero incha jantu kalhinaul tuʼuchun ex
jantu kaʼalil laqtaqal.
\p
\v 16 Ni Dios junil ni Abraham ni kaxtaqniyaʼ ni lakamunukpaʼ
va por ixlhakapuʼati, jantu por yu ixmakay, va por ixjamapayninti
ni Dios. Ex paxtoqniy tachun sasʼatʼan ni Abraham, jantu
vamun ni israelitas yu tamakay yu lhinaunkan, va tachun
yu talhakapuʼan tacha lhakapuʼal ni Abraham. Yucha va
kimpaykʼan kintachunkʼan.
\v 17 Va chuncha tsʼoqkanta la ixchivinti Dios, va junkal
ni Abraham: “Kakmakayan xajapay oqxlaqlhuu lapanakni.”
Va chuncha kintalaqtsʼinan ni Dios tacha sasʼatʼan ni
Abraham. Yucha lhakapuʼal ni Dios yu majkujuchoqoy ni
janinin, yu lhinajun kaʼalil yu jantukaʼ alin.
\p
\v 18 Mas ixtasuy tacha jantu kaʼalinaʼ yu junil Dios,
Abraham vananaj ixpakxanʼita y lhakapuʼanil. Va chuncha
val xajapay oqxlaqlhuu lapanakni. Vachu va tacha junkal:
“Oqxlaqlhuu kaʼalinaʼ yu mesʼatʼan.”
\v 19 Abraham jantu ixʼalin sasʼatʼa, va laycha ixlhitʼajun
taun ciento jachʼitin, la ixlakatunaj jantucha kalhitsukul
tapʼasta. Vachu ixlakatunaj ixanati, yu Sara, jantucha
lay kalhitsukul jasʼatʼa. Pero yu Abraham jantu kamakauntijlal
ixlhakapuʼati.
\v 20 Jantu aqtaun kanaul ni Dios jantu lay kaxtaqnil
sasʼatʼa, va apalay tapʼasnil ixlhakapuʼati. Va la ay
makal ni Dios.
\v 21 Va ixkʼatsʼay ni laqsaval Dios lay kamakaʼoyaʼ
tachun yu junil.
\v 22 Xlhiyucha ni Dios laqaʼil tacha lapanaki yu ox
junita por ixlhakapuʼati.
\p
\v 23 Taʼan chuncha lhitsʼoqkanta Abraham ni va chuncha
laqaʼikal jantu vamun para yucha katsʼoqkal,
\v 24 vachu para kijnankʼan. Chuncha lajʼoxin laqtsʼinkanau
incha lhakapuʼanau Dios yu majkujuchoqol kiJalhachimoʼonukʼan
Jesús tejkan ixnita.
\v 25 Yucha xtaqkal para kamaqnikal por kintalaqalhinkʼan.
Ex majkujuchoqokal para kintalaqaʼin ni Dios tacha lapanakni
yu lajʼoxin juntau.
\c 5
\s Tacha xajachal tejkan ox kintalaqtsʼinan ni Dios
\p
\v 1 Chavay ni Dios kintalaqtsʼinan tacha lajʼoxin lapanakni
va por lhakapuʼanau. Xlhiyucha oxamaktaun juntau kun
Dios por yu makal kiJalhachimoʼonukʼan Jesucristo.
\v 2 Vachu va por yucha lay katanuyau la ixjamapayninti
ni Dios taʼan ox kintalaqtsʼinan taʼan lhiyanau. Vachu
lhiʼachantajuyau ni kamispayau ixʼoxixtu ni Dios.
\v 3 Jantu vamun yuʼ lhiʼachantajuyau. Vachuʼ lhiʼachantajuyau
mas maqanlqajnanau. Kʼatsayau ni maqanlqajnati makay
para lay kamaqantaulau.
\v 4 Incha lay maqantaulau yucha masuy ni va la pʼas
kilhakapuʼatkʼan. Incha la pʼas kilhakapuʼatkʼan yucha
makay para apalay kapakxanʼiu yu Dios naul kaʼalinaʼ.
\v 5 Incha pakxanʼiyau, yucha jantu kalhimaxanau, laqsaval
va chuncha kunaʼ. Chuncha kʼatsayau va por kintaxtaqnitan
ni Espíritu Santo y yucha kintamakʼatsaniyan ni Dios
ayaj kintapaxkayan.
\p
\v 6 Tejkan istsʼanqay kintapʼastakʼan y jantu lay ixʼaqtayjukanau
keʼemankʼan, va exnicha ni Cristo nil por kijnankʼan
mas jantu ixtoʼoyayau ni Dios.
\v 7 Va laycha jantu matichun kanil por aqayntaun mas
ox kaval. Ka va lay kanil por aqayntaun incha ayaj ox
laqtsʼin.
\v 8 Pero ni Dios va inchine masul ni ayaj kintaʼachaniyan.
Tejkan vananaj maqtaqalhinin ixjuntau ex ni Cristo nil
por kijnankʼan.
\v 9 Chavaycha laqtsʼinkanau tacha lajʼoxin lapanakni
por ixjakʼalna ni Cristo tejkan maqnikal. Xlhiyucha
kʼatsayau ni kintamalaqtaxtuniyan ixlhilukuj ni Dios.
\v 10 Tejkan tʼalaxkaynin ixjuntau kun Dios, yu Istsʼal
nil por kijnankʼan ex oxamaktaun juu kun Dios. Chavaycha
oxamaktaun juntau, xlhiyucha apalay ox kʼatsayau ni kintamalaqtaxtuyan
va por kujchoqotacha.
\v 11 Jantu vamun yuʼ. Vachu ay makayau ni Dios por
yu makal kiJalhachimoʼonukʼan Jesucristo. Va por yucha
chavaycha oxamaktaun juntau kun Dios.
\s Yu lhinin puʼalil yu makal Adán pero yu ox jatsukunti puʼalil yu makal ni Jesucristo
\p
\v 12 Yu talaqalhin puʼalil yu makal qayntaun lapanaki
yu ixjunkan Adán. Va xlhiyucha alil lhinin. Chuncha
tachun ni lapanakni va yucha lhiniʼoyau, va por tachun
maqtaqalhininau.
\v 13 La maqancha ixʼalin ixtalaqalhinkʼan ni lapanakni
mas jantukaʼ istsʼoqkʼan ixlhachimoʼon Dios. Pero tejkan
jantukaʼ istsʼoqkan, ex jantukaʼ ixmakakan kuenta yu
talaqalhin.
\v 14 Tejkan ixtʼajun ni Adán tus tejkan ixtʼajun ni
Moisés, ni lhinin ixlhitʼajun tapʼasta mas jantukaʼ ixtamispay
lapanakni yu lhinaunkan. Tanil mas ixtalaqalhinkʼan
jantu kaval tacha ni Adán yu jantu kaqalasmaklhi ni
Dios. Chuncha ni Adán masuy ni maqskʼiniy kamil aqayntaun.
\p
\v 15 Pero ixtalaqalhin ni Adán jantu chun kaxajchal
tacha yu valiʼiy kintaxtaqniyan Dios. Chuncha yu makal
qayntaun lapanaki lhixajchal ni pumalhuu lapanakni katanil.
Pero kintamapayniyan aqayntaun lapanaki yu junkan Jesucristo.
Xlhiyucha apalay lhuu talhaval ixjamapayninti ni Dios
yu kintaxtaqniyan kimpumalhuukʼan.
\v 16 Yu ixtalaqalhin ni Adán jantu lhixajachal tacha
yu xtaʼa ni Dios. Tejkan puxkaulaqtsʼinkal ni anchanu
talaqalhin yucha xajchal maqanlqajnati. Pero mas lhuu
kintalaqalhinkʼan ni Dios va kintamapayniyan. Chuncha
xajtachal para kintalaqtsʼin tacha lajʼoxin lapanakni
kajuu.
\v 17 Chuncha va por ixtalaqalhin qayntaun lapanaki
yu lhinin lhitʼajun tapʼasta. Ex por yu makal Jesucristo
apalay kalhitsukuyau tapʼasta la ketsukuntikʼan tachun
ni kijnan yu laqaʼiyau yu ay ixjamapayninti ni Dios.
Yucha kintaxtaqniyan para kintalaqtsʼin tacha lajʼoxin
lapanakni.
\p
\v 18 Ex chuncha ixtalaqalhin ni anchanu lapanaki lhixajchal
ixmaqanlqajnatkʼan tachun ni lapanakni. Vachu va chuncha
yu ox ixjatsukunti yu aqayntaun, yu Jesucristo, yucha
lhixajchal para tachun kalaqlaqtsʼinkal tacha lajʼoxin
lapanakni kataval.
\v 19 Vachu por ni anchanu lapanaki yu jantu ixqalasmatʼa
ni Dios, xlhiyucha la pumalhuu taval maqtaqalhinin. Pero
yu aqayntaun lapanaki yucha ox ixqalasmatʼa ni Dios,
xlhiyucha pumalhuu taval tacha lajʼoxin lapanakni.
\p
\v 20 Ixlhachimoʼon ni Dios va tsʼoqkal para katasul
ni va lhuu ixlaqtaqalkʼan ni maqtaqalhinin. Pero tejkan
talhaval ixlaqtaqalkʼan ni maqtaqalhinin, ex apalay talhaval
ixjamapayninti ni Dios.
\v 21 Ex chuncha ni talaqalhin lhitʼajun tapʼasta para
kaʼalil lhinin. Vachu va chuncha ixjamapayninti ni Dios
lhitʼajun tapʼasta para kaxajchaʼau tacha lajʼoxin lapanakni.
Chuncha alil ni jatsukunti yu jantu aqtaun kamiʼoyaʼ,
va por yu makal kiJalhachimoʼonukʼan Jesucristo.
\c 6
\s Ni Cristo kintaxtaqniyan yu sastʼi jatsukunti y jantucha kintapaxtoqniyan ni talaqalhin
\p
\v 1 ¿Ex tas kanaunaucha? ¿Va kataylhaʼanau maqtaqalhinin
para chuncha apalay ox kintamapaynin ni Dios?
\v 2 Jantu aqtaun. Tejkan lhakapuʼau va tacha kaniucha
y jantucha kintapaxtoqniyan ni talaqalhin. Xlhiyucha
jantucha lay taylhaʼanau maqtaqalhinin.
\v 3 ¿Jantukaʼ kʼatsʼayatʼik incha aqchajʼajuu por lhakapuʼau
ni Jesucristo, yucha masuy ni va tacha lhitanuu la ixlhinin
ni Jesucristo?
\v 4 Ex chuncha tejkan aqchajʼauyau yucha masuy va tacha
kaniucha y kamaknukaucha. Ex va tacha takukchoqoo vachu
va tacha ni Cristo takukchoqol por ixtapʼasta kimPay
Dioskʼan. Chuncha tapasal para kataylhaʼau kun yu sastʼi
jatsukunti.
\p
\v 5 Incha laqsaval chʼantaun kajuu kun Cristo la ixlhinin
ex va tacha kaniucha. Ex vachuʼ chʼantaun kun yucha
kalhitsukuyau yu sastʼi jatsukunti vachu va tacha kujchoqol
ni yucha.
\v 6 Ex chuncha kʼatsayau tejkan xtukmukʼakal laka kurus
ni Jesús ancha miʼol yu maqaniyaʼ ketsukuntikʼan para
kamiʼol yu xaputsuku talaqalhin. Ex jantucha lay kamakau
yu tacha lhinajun yu talaqalhin.
\v 7 Chavay yu nitacha kun Cristo va oxamaktaun junita,
jantucha mukʼanikan ni talaqalhin.
\v 8 Ex chun niucha kun Cristo, xlhiyucha lhakapuʼanau
ni vachu katsukuchoqoyau kun yucha.
\v 9 Kʼatsayau ni Cristo kujchoqol mas ixnitacha y xlhiyucha
jantucha kanichoqoyaʼ. Yu lhinin jantucha kalhitsukul
tapʼasta kun yucha.
\v 10 Tejkan nil, va aqtauncha nil para jantucha kalhitsukul
tapʼasta ni talaqalhin. Chavaycha va kujchoqotacha y
yu ixjatsukunti va ixnavincha ni Dios.
\v 11 Vachu va chun kakʼatsʼantʼik va tacha kʼanitʼikcha,
xlhiyucha jantucha tapaxtoqniyan yu talaqalhin. Chavaycha
va tacha kakʼujchʼoʼotʼikcha y metsukuntikʼan va ixnavin
Dios yu talaqtsʼinan chʼantaun kun Cristo Jesús.
\v 12 Xlhiyucha jantucha kaxtaqnin lakatin ni talaqalhin
para kalhitsukul tapʼasta la milakatunajkʼan yu kamiʼoyaʼ.
Jantucha kamakʼatʼik laqtaqal yu taskʼiniy milakatunajkʼan.
\v 13 Jantucha kʼamakʼaunitʼik milakatunajkʼan para
kapuʼalil yu talaqalhin. Kʼamaqxtʼaqnitʼik ni Dios.
Mas va tacha kanitʼikcha chavaycha kʼujchʼoʼotʼatʼikcha.
Kʼamaqxtʼaqnitʼik milakatunajkʼan para kamakʼatʼik yu
ox kalaqtsʼil ni Dios.
\v 14 Yu talaqalhin jantucha kalhitsukuyaʼ tapʼasta
la metsukuntikʼan. Jantucha tamukʼaniyan laqtaqal ni
lhachimoʼon, va tamapayniyan ni Dios.
\s Ixʼoqxtamatin Dios juntau
\p
\v 15 ¿Exni? Incha laqsaval jantucha kintamukʼaniyan
laqtaqal ni lhachimoʼon y kintamapayniyan ni Dios ¿Ex
laycha kataylhaʼanau maqtaqalhinin? ¡Jantu tsʼuniy!
\v 16 ¿Jantu kʼatsʼayatʼik ni va ixʼoqxtamatin untʼatʼik
taun ukxtin para kamakʼanitʼik yu talhijunan? Incha
makʼayatʼik yu lhinajun yu talaqalhin ex va ixʼoqxtamatin
talaqalhin untʼatʼik. Chuncha lhixajachal lhinin. Incha
makʼayatʼik yu lhinajun Dios ex va ixʼoqxtamatin Dios
untʼatʼik. Va lhixajachal ni ox untʼatʼik la metsukuntikʼan.
\v 17 Kaxtaqniu lhimalaqpuchuncha ni Dios. Mas uxiknankʼan
ixʼoqxtamatin talaqalhin ixʼuntʼatʼik pero laʼaʼitʼik
kun tachun melhanutkʼan ni chivinti yu malanikʼantʼik.
\v 18 Laqtʼaxtʼutʼatʼikcha la mintalaqalhinkʼan ex untʼatʼikcha
oqxtamatin yu ox tʼiʼukxuntʼayatʼik.
\v 19 Chuncha klaxaqalayau para ox kamalaʼasitʼik. Maqancha
maqxtʼaqkʼantʼik la ixtapʼasta yu talaqalhin para kʼamakʼatʼikcha
yu jantu ox. Chuncha akchʼintʼamatʼik yu lhinajun Dios.
Chavaycha kʼamaqxtʼaqnitʼik milakatunajkʼan para ixʼoqxtamatin
Dios kʼaʼuntʼik y ox katʼiʼukxuntʼayatʼik.
\v 20 Tejkan ixʼoqxtamatin talaqalhin ixʼuntʼatʼik ex
jantu kamakʼatʼik yu lhinaunkan para ox katalaqtsʼin
ni Dios.
\v 21 Pero ¿tisuncha ixlaʼaʼiyatʼik? Yu milhilhajatkʼan
ixjunita va yu chavaycha lhimaxananatʼik, va yu lhixajachal
yu lhinin.
\v 22 Pero chavaycha laqtʼaxtʼutʼatʼikcha ni talaqalhin,
ixʼoqxtamatincha ni Dios untʼatʼik. Va kun yucha lhitʼaunatʼik
milhilhajatkʼan yu lhixajachal ni jatsukunti yu jantu
aqtaun kamiʼoyaʼ.
\v 23 Yu lhilhajati yu jalhimapalnan ni talaqalhin va
lhinin. Pero yu xtaʼa ni Dios yucha va jatsukunti yu
jantu aqtaun kamiʼoyaʼ incha chʼantaun juntau kun Cristo
Jesús kiJalhachimoʼonukʼan.
\c 7
\s Ni lhachimoʼon yu Dios xtaqnil Moisés jantucha kintamukʼaniyan laqtaqal
\p
\v 1 Ketʼalaqaunin, uxiknan yu mispʼayatʼik ni lhachimoʼon,
kʼatsʼayatʼik ni lhachimoʼon lhitʼajun tapʼasta kun
qayntaun lapanaki vamun tejkan vananaj kujta.
\v 2 Incha kanil ex jantucha paxtoqniy. Tejkan qayntaun
xanati vananaj tʼajun ixapay ex vanaj yucha ixnavin,
va chuncha najun ni lhachimoʼon. Pero incha kanil ni
xapay ex ni anchanu lhachimoʼon jantucha paxtoqniy ni
xanati.
\v 3 Chuncha tejkan vananaj tʼajun ixapay incha katʼatsukuchoqol
aqayntaun joʼati ex maqtaqalhinin. Pero incha kanil
yu ixapay ex jantucha paxtoqniy ni anchanu lhachimoʼon.
Lay katʼatsukuchoqol aqayntaun, ex jantucha talaqalhin
kaval.
\v 4 Ex chuncha, ketʼalaqaunin, ni lhachimoʼon paxtoqniy
qayntaun lapanaki vamun tejkan vananaj kujta. Uxiknan
va tacha kʼanitʼikcha tejkan nil ni Cristo. Chuncha
ni lhachimoʼon jantucha tamukʼaniyan laqtaqal. Ex chuncha
katʼatsʼukʼutʼik kun yucha yu ixnitacha pero kujchoqotacha.
Chuncha kaval para kaʼalil la ketsukuntikʼan yu kalhipaʼinil
ni Dios.
\v 5 Tejkan valiʼiy lapanakni ixjuntau, ni lhachimoʼon
ixkintapaxtoqniyan. Pero jantu ixmakaputunau yu lhinajun,
va ixmaqtaqalhinanau. Chuncha lhixajchal lhinin.
\v 6 Pero chavaycha jantucha kintamukʼaniyan laqtaqal
ni lhachimoʼon. Yucha va tacha tachʼinin ixkintalhitʼaunan,
pero chavaycha va tacha kaniucha y jantucha kintapaxtoqniyan.
Ni Espíritu Santo kintaxtaqnitan yu sastʼi jatsukunti
para katapatsaniu ni Dios. Jantucha kintapastakʼuyan
yu maqancha jatsʼoqkal laka lhachimoʼon.
\s La alin talaqalhin la ketsukuntikʼan
\p
\v 7 ¿Ex chuncha tas kanaunaucha? ¿Va ixlaqtaqal ni
lhachimoʼon ni alin kintalaqalhinkʼan? Jantu tsʼuniy.
Incha jantu kaʼalil ni lhachimoʼon ex jantu lay ox kakmispal
yu talaqalhin. Incha jantu katsʼoqkal ni jantu kaʼakchʼipʼi
ex jantu ox kajkʼatsal ni va talaqalhin tejkan kʼakchaʼan.
\v 8 Pero tejkan lhinaunkal tuʼuchun, ex tanul yu talaqalhin
y apalay kimakal para kakmaqtaqalhinil. Incha jantu
kaʼalil ni lhachimoʼon ex jantu la pʼas kaval yu talaqalhin,
va tacha kanilcha.
\v 9 Taun julchan tejkan jantukaʼ xakmispay ixlhachimoʼon
Dios va oxamaktaun xaktijuyal. Pero tejkan kmispal yu
lhinaunkan ex yu talaqalhin tapʼasnichoqol tus va tacha
kaknil.
\v 10 Ex chuncha yu lhachimoʼon va tsʼoqkanta para kaʼalil
yu ox jatsukunti. Pero kitʼin kilhixajniyachal yu lhinin.
\v 11 Tejkan lhinaunkal tuʼuchun, ex ni talaqalhin va
kimakanul. Jantu kakmakal yu lhinaunkan, ex chuncha va
tacha kimaqnil.
\v 12 Ex chuncha laqsaval ni lhachimoʼon la ox junita
y tachun yu lhinaunkan va minchal kun Dios, laqsaval
junita y ox.
\p
\v 13 Ex chuncha yu lhachimoʼon, mas ox junita, ¿va kixajnichal
para kaknil? Jantu tsʼuniy. Va alil para ox katasul
tacha junita yu talaqalhin. Yu talaqalhin putapatsay
yu ox lhachimoʼon para kixajnichal lhinin. Ex chuncha
yu talaqalhin va lhuu talaqalhin xajachal.
\v 14 Ox kʼatsayau ni lhachimoʼon minchal kun ni Espíritu
Santo pero kitʼin va klapanaki kunita. Va tacha kakstʼanikal
yu talaqalhin para kakmakal yu lhinajun.
\v 15 Jantu ikmalaqasiy yu ikmakay. Jantu ikmakay tacha
yu ikmakaputun y yu jantu ikmakaputun va yucha ikmakay.
\v 16 Klhakapuʼan ni va ox ni lhachimoʼon. Xlhiyucha
va jantu ikmakaputun ni talaqalhin yu ikmakay.
\v 17 Ex chuncha va tacha jantu kitʼin ikmakay ni laqtaqal.
Yu makay va yu talaqalhin yu alin la ketsukunti.
\v 18 Ijkʼatsay ni jantu tuʼuchun ox lay ikmakay la
ketsukunti. Mas ayaj ikmakaputun yu ox jantu kaklhitsukul
tapʼasta para kakmakal.
\v 19 Jantu ikmakay yu la ox yu ikmakaputun. Yu ikmakay
va yu jantu ox yu jantu ikmakaputun.
\v 20 Ex chuncha incha ikmakay yu jantu ikmakaputun
ex jantu va yu kitʼin ikmakay, yu makay va yu talaqalhin
yu alin la ketsukunti.
\p
\v 21 Chuncha ikmakay kuenta ni mas ikmakaputun yu ox
pero jantu lay por yu talaqalhin yu alin la ketsukunti.
\v 22 La kilhitsukunuʼ ayaj klhiʼachantajuy ixlhachimoʼon
ni Dios
\v 23 pero la kilakatunaj iktemay aputaun lhachimoʼon.
Yucha talachʼapay kun ixlhachimoʼon ni Dios yu tanun
la kijatapastakʼati. Chuncha kinchʼilhaʼan yu xalhachimoʼon
talaqalhin yu alin la kilakatunaj.
\v 24 ¡Payniycha ni kitʼin! ¿Tasʼayucha kimalaqtaxtuniyaʼ
ni aniy lakatunaj yu kilhaʼan laka lhinin?
\v 25 ¡Ikxtaqniy lhimalaqpuchuncha ni Dios yu kimalaqtaxtuyaʼ
por kiJalhachimoʼonukʼan Jesucristo! Ex chuncha la kijatapastakʼati
iktapatsaniputun ixlhachimoʼon ni Dios. Pero tacha valiʼiy
lapanaki, iktapatsaniy yu xalhachimoʼon talaqalhin.
\c 8
\s Ni Espíritu Santo kintaxtaqniyan jatsukunti
\p
\v 1 Ex chuncha chavaycha jantucha tuʼuchun laqtaqal
mukʼanikanau ni kijnankʼan yu tiʼukxuyanau kun Cristo
Jesús, incha jantucha katijuntayau tacha yu valiʼiy lapanakni,
va katijuntayau tacha lhinajun yu Espíritu Santo.
\v 2 Chavay ni Espíritu Santo xtaʼa jatsukunti yu minachal
kun Jesucristo. Chuncha kimalaqtaxtul la kintalaqalhin
yu lhixajachal lhinin.
\v 3 Yu valiʼiy lapanakni ixtatsʼanqaniy tapʼasta para
lay katamakal yu ixlhinajun laka lhachimoʼon. Pero Dios
malaqachal isTsʼal para kalhitsukul lakatunaj tacha
kijnan yu maqtaqalhinanau. Chuncha kintamaxtunin la
ixtapʼasta ni talaqalhin.
\v 4 Chuncha makal para ox kintalaqtsʼin ni Dios tacha
yu lhinajun ixlhachimoʼon. Chuncha lhitapasayau ni kijnan
yu jantucha katijuntayau tacha yu valiʼiy lapanakni,
va katijuntayau tacha lhinajun ni Espíritu Santo.
\v 5 Yu valiʼiy lapanakni tapastakʼa katamakal vamun
tacha yuʼuncha tamakaputun, pero yu talhitʼajun ni Espíritu
Santo tapastakʼa tacha katamakal yu lhinajun ni Espíritu
Santo.
\v 6 Yu xajatapastakʼati yu valiʼiy lapanaki lhixajachal
lhinin, pero ixjatapastakʼati ni Espíritu Santo lhixajachal
yu ox jatsukunti yu oxamaktaun.
\v 7 Yu valiʼiy lapanaki pastakʼa kamakal tacha yucha
makaputun, va ixtʼalaxkayaʼ junita ni Dios. Jantu makay
kuenta ixlhachimoʼon ni Dios, jantu lay toʼoyay.
\v 8 Yu tatiʼukxuntayay tacha valiʼiy lapanakni jantu
talhipaʼiniy ni Dios.
\p
\v 9 Pero uxiknan jantucha katsʼukʼutʼik tacha valiʼiy
lapanakni. Va lhitʼaunatʼik ni Espíritu Santo incha
laqsaval ixʼEspíritu ni Dios alinta kun uxiknan. Pero
yu jantu kalhitsukul ixʼEspíritu ni Cristo, jantu ixnavin
Cristo kaval.
\v 10 Incha ni Cristo alinta kun uxiknankʼan ex ni Dios
lajʼoxin tamakanin. Mas la milakatunajkʼan va tacha
kʼanitʼik por yu talaqalhin, pero la milhitsukunukʼan
va kʼujtʼatʼik.
\v 11 Ni Dios majkujuchoqol ni Jesús tejkan ixnita.
Chuncha incha ixʼEspíritu Dios alinta kun uxiknan ex
vachu la milakatunajkʼan yu miʼojoy kataxtaqnichoqoyan
jatsukunti. Chuncha kamakayaʼ por ixʼEspíritu yu alinta
kun uxiknankʼan.
\p
\v 12 Ex chuncha, ketʼalaqaunin, alin yu maqskʼiniy katapatsaniu
pero jantucha maqskʼiniy kamakau yu ixmakaputunau tacha
valiʼiy lapanakni.
\v 13 Incha katʼiʼukxuntʼayapitik makanan yu talaqalhin
ex kʼaniyapitik. Pero incha por ixtapʼasta ni Espíritu
Santo kʼamaqniʼoyapitik yu talaqalhin, ex katsʼukʼuyapitik.
\v 14 Tachun yu lakmaʼukxuntayaniy ixʼEspíritu ni Dios
yuʼuncha sasʼatʼancha Dios tajunita.
\v 15 Yu Espíritu yu laʼaʼitʼik, yucha jantu talhaʼanchoqoyan
la xajatsukunti talhanti. Yucha va tamakayan sasʼatʼan
Dios. Ex por ni Espíritu tʼasaniyau ni Dios, naunau:
“¡KimPay, kimPay!”
\v 16 Ni Espíritu Santo kintamakʼatsaniyan la kilhitsukunukʼan
ni va sasʼatʼan Dios juntau.
\v 17 Chavaycha incha sasʼatʼan juntau ex vachu kintamapasaniyan
ixmaqaliti yu kintapaxtoqniyan katʼalaqaʼiyau kun Cristo.
Chuncha kunaʼ incha tʼamaqanlqajnanau para vachu katʼalaqaʼiu
yu ixʼoxixtu.
\p
\v 18 Kitʼin ox ijkʼatsay ni tachun yu chavay lhamaqanlqajnanau
jantu ay kaval tacha ixʼoxixtu Dios yu kintamasuniyankaʼ.
\v 19 Tachun yu makal ni Dios va ayaj tapakxanʼita ni
anchanu julchan tejkan Dios kintamasuyan ni va sasʼatʼan
juntau.
\v 20 Tachun yu makakal va jantucha ox val. Jantu va
chuncha kajunputulcha, va chuncha lhinaunkal. Pero mas
chuncha val, va si tapakxanʼiy
\v 21 ni julchan tejkan kalaqtaxtuyaʼ yu tʼajun talaktʼilhiniʼ,
tejkan oxamaktaun katalaqaʼiyaʼ ixʼoxixtukʼan ni sasʼatʼan
Dios.
\v 22 Kʼatsayau ni lakamunukpaʼ tus chavaycha va jatʼijninta,
tacha tejkan jamaqanlqajnan qayntaun xanati tejkan maqlaqavanan.
\v 23 Jantu vamun ni lakamunukpaʼ jatʼijnin, vachu kijnankʼan.
Lhitʼaunau ni Espíritu Santo, yucha yu pʼunaj kintaxtaqnitan
ni Dios. Maqanlqajnanau y pakxanʼitau ni anchanu julchan
tejkan ni Dios ox kintamakayan sasʼatʼan, tejkan oxamaktaun
katajunaʼ kilakatunajkʼan.
\v 24 Dios kintamalaqtaxtun y kintamakan para kapakxanʼiu
yu ox. Pero incha kʼalaqtsʼicha yu kapʼakxanʼitʼi ex
jantucha maqskʼiniy kapʼakxanʼitʼi. Jantu matichun pakxanʼiy
yu lhitʼajuncha.
\v 25 Pero incha laqsaval pakxanʼiyau yu jantukaʼ laqtsʼinau,
ex vananaj kun maqantaulati pakxanau.
\p
\v 26 Vachu ni Espíritu Santo kintaʼaqtayjuyan tejkan
kintatsʼanqaniyan tapʼasta. Jantu ox kʼatsayau tisuncha
kaskʼiniu Dios. Pero yu Espíritu Santo yucha tapayniy
por kijnankʼan, va lhijatʼijnin yu jantu lay naunkan.
\v 27 Ni Dios yu jalaqtsʼiniy ixjalhanutkʼan ni lapanakni
yucha mispay tacha pastakʼa ixʼEspíritu. Kʼatsaʼojoy
yu skʼin ni Espíritu Santo tejkan tapayniniy por ixlapanakni
tacha najun ni Dios.
\s Jantu tuʼuchun lay kintamamakauniyan ixjapaxkanti ni Dios
\p
\v 28 Ox kʼatsayau ni para yu taʼachaniy Dios, ni Dios
makay para ox kaxajʼochal tachun yu tapasay la ixjatsukuntikʼan.
Va yuʼuncha yu jalakjuntaʼita Dios para kataval tacha
yucha najun.
\v 29 Ni Dios jalakmispal ixlapanakni tejkan jantukaʼ
ixtatsukuy. Jalaksaklhi para kataval tacha ni Cristo
Sasʼatʼa, ex chuncha ni Cristo tacha xajayaʼ kaval yu
pumalhuu ixtʼalaqaunin.
\v 30 Yu jalaksakta vachu yuʼuncha jalakjuntaʼita. Vachu
yu jalakjuntaʼita yuʼuncha jalaqtsʼintacha tacha lajʼoxin
lapanakni. Yu jalaqtsʼinta tacha lajʼoxin lapanakni,
yuʼuncha jamaqxtaqnita ixʼoxixtu.
\p
\v 31 ¿Ex por tachun yu aniy tisuncha kanaunaucha? Incha
Dios alinta kun kijnankʼan ex jantu matichun tuʼuchun
lay kintamakaniyan.
\v 32 Dios jantu kamaʼal Sasʼatʼa, va maqxtaqlhi para
kamaqnikal por kintachunkʼan. Chuncha incha kintaxtaqnin
Sasʼatʼa ex laqsaval chux kintaxtaqniyan.
\v 33 ¿Taʼayucha lay kintatislajmayan yu kintalaksaktan
ni Dios? Va Dios yu ox kintalaqtsʼinan.
\v 34 ¿Taʼayucha lay kintamukʼaniyan laqtaqal? Ni Cristo
nil y kujchoqol, ex taulnil la ixlhijakanaj ni Dios, ancha
kintalhitapayniyan.
\v 35 ¿Taʼayucha lay kintamamakauniyan yu ixjapaxkanti
ni Cristo? Jantu yu jamaqanlqajnati, jantu yu lhitaʼay
la ketsukuntikʼan, jantu yu kintalhixkayan, jantu yu ay
chavan, jantu tejkan kintatsʼanqaniyan kilaqchʼitkʼan,
jantu tejkan va laycha kaniu, jantu tejkan kintamaqniputunan.
\v 36 Va chuncha tsʼoqkanta, va junkan ni Dios:
\q Por uxintʼi va lhilhiy kintamaqniputunan.
\q Kintalaqtsʼinan tacha borregos yu va laycha kalaqmaqnikal.
\m
\v 37 Pero mas tachun yu anchanu iktapasayau, si ikmaqalhajaʼoyau
kun ixtapʼasta ni Cristo yu kintapaxkayan.
\v 38 Tus ox ijkʼatsay ni jantu tuʼuchun lay kintamamakauniyan
ixjapaxkanti ni Dios, jantu yu lhinin, jantu yu tapasay
la ketsukuntikʼan, jantu ixmayulnin Dios vachuʼ jantu
yu aqmoqxnun, jantu yu chavay tapasay, jantu yu katapasayaʼ,
jantu tuʼuchun yu lhitʼajun tapʼasta,
\v 39 mas yu alin talman, mas yu alin pulman, mas tuʼuchun
yu makakanta, jantu lay kintamamakauniyan ixjapaxkanti
ni Dios yu alin la ixjatsukunti ni Cristo Jesús kiJalachimoʼonukʼan.
\c 9
\s Ni Dios jalaksakta sasʼatʼan ni Abraham yu israelitas tajunita para ixlapanakni kataval
\p
\v 1 Kitʼin va ixlapanaki Cristo, vachu ni Espíritu Santo
kʼatsay yu alin la kijatapastakʼati. Xlhiyucha klajunau
yu laqsaval, jantu klaklkanan.
\v 2 Ayaj ikmaqaninin y taylhaʼan ixkanti kelhanuti.
\v 3 Va kakxtaqkal mas kakmukʼanikal maqanlqajnati y
mas jantucha ixnavin Cristo kakval, incha chuncha lay
katalaqtaxtul yu ketʼalaqaunin,
\v 4 yu sasʼatʼan Israel. Yuʼuncha ni Dios jalaqaʼita
tacha sasʼatʼan, va yuʼuncha laqxtaqnikan ixʼoxixtu Dios,
va yuʼuncha ni Dios jatʼatamakaul taun jatapastakʼati,
va yuʼuncha laqxtaqnikal yu lhachimoʼon, va yuʼuncha
lakjunkal tacha maqskʼiniy katatoʼoyal ni Dios, va yuʼuncha
ni Dios lakjunil tacha kalaqpuʼaqtayjul.
\v 5 Ixjapayankʼan ox ixtatiʼukxuyanal kun Dios la maqancha.
Va kun yuʼuncha minchal ni Cristo tejkan val lapanaki,
yucha ni Dios yu xoqta lhichimoʼoy. Va yucha katoʼoyakal
mas va tavanancha, va chuncha kavalcha.
\p
\v 6 Jantu tachun talhakapuʼan, pero jantu kaʼoqspalal
ixchivinti Dios. Yu taminchal kun Israel, vamun yu talhakapuʼan
va laqsaval sasʼatʼan tajunita.
\v 7 Yu maqancha taminchal kun Abraham, jantu tachun
jalakmispakan tacha sasʼatʼan. Ni Dios va junil Abraham:
“Vamun por yu Isaac kaʼalinaʼ yu sasʼatʼan yu minavin.”
\v 8 Jantu tachun yu sasʼatʼan yu taminchal la ixlakatunaj
Abraham va sasʼatʼan ni Dios. Vamun yu talaqaʼil ixchivinti
Dios yu junil Abraham tejkan naul kamakaniyaʼ yu lajʼoxi.
Va yuʼuncha jalaqtsʼinkan tacha ixmaqlaqapʼu.
\v 9 Tejkan Dios junil ni Abraham ni kamakaniyaʼ yu
lajʼoxi, va naul: “Exnicha kakminchoqoyaʼ y kalhitsukuyaʼ
sasʼatʼa ni Sara.”
\p
\v 10 Jantu vamun yuʼ. Vachuʼ chuncha tapasal kun yu
ixjunkan Rebeca. Va lhitsukul chiyan por yu Isaac yu
maqancha kimpaykʼan.
\v 11 Tejkan jantukaʼ ixtatsukuy y jantukaʼ ixtamakay
yu ox u yu jantu ox, ni Dios laksaklhi qayntaun. Chuncha
val porke Dios laksakʼa yu laksakputun, jantu por yu
tamakay lapanakni, va por yu najun Dios.
\v 12 Chuncha junkal ni Rebeca: “Yu xajayaʼ katapatsayaʼ,
katapatsanikanaʼ yu xapʼisaqa.”
\v 13 Va chuncha tsʼoqkanta, va naul Dios: “Va kʼachanil
ni Jacob pero va ikxkayl yu Esaú.”
\p
\v 14 ¿Ex tas kanaunaucha? ¿Lhilayatʼik ni jantu ox
makay ni Dios? Jantu laqsaval kaval.
\v 15 Dios junil ni Moisés: “Kitʼin kakpaxkayaʼ yu
ikpaxkaputun, kakmapayniyaʼ yu ikmapayniputun.”
\v 16 Ex chuncha jantu va por yu makay lapanaki, vachu
jantu por ixtapʼasta lapanaki, va por ixjamapayninti
ni Dios.
\v 17 La ixchivinti Dios va junkal ni faraón, yu ixlhichimoʼoy
Egipto: “Kitʼin klhilakʼulan para katasul kintapʼasta
por yu tapasay kun uxintʼi. Ex lay kintamispal ni lapanakni
mas va toʼoxtaycha lakamunukpaʼ.”
\v 18 Ex chuncha yu Dios mapayniy yu mapayniputun. Incha
makaniputun pʼas ixjatapastakʼati aqayntaun para jantu
kalaqaʼil, vachu lay makay.
\p
\v 19 Ex ka va kilajunau: “¿Valiʼiycha mukʼay laqtaqal
ni Dios? Jantu matichun lay laktanchay yu Dios najun.”
\v 20 Uxintʼi valiʼiy lapanaki kʼatʼi. ¿Valiʼiycha xaʼalaycha
ni Dios? ¿Yu aqchoq lay xaqalay yu makal? Jantu, vachu
jantu lay kajunil: “¿Valiʼiycha chuncha kʼimakʼatʼicha?”
\v 21 Yu xamakanaʼ aqchoq, yucha lay makay tacha yu makaputun,
lati aqchoqon yu lajkʼus, lati yu valiʼiy aqchoqon.
\p
\v 22 ¿Ex tas kaval incha Dios va masuputun tacha junita
ixlhilukuj kun ixtapʼasta? Pero va maqantaulniʼojota
mas va yu tapaxtoqniycha ni lhinin.
\v 23 Chuncha makal para kamispakal ni ayaj ay ixʼoxixtu
yu kintaxtaqniyan ni kijnankʼan yu kintamapayniyan.
Kintalhilkanitan ixʼoxixtu yu kintaxtaqniyan.
\v 24 Va kintajuntaʼitan ni kijnankʼan mas lati israelitas
juntau y lati yu jantu israelitas kataval.
\v 25 Vachu va chuncha najun la ixchivinti Dios yu tsʼoqlhi
Hoseas, najun ni Dios:
\q Kaklakjunaʼ va kilapanakni mas jantu kilapanakni ixtajunita.
\q Ni lapanakni yu jantu xaklakʼachaniy, yuʼuncha klakʼachaniyaʼ.
\q
\v 26 Vachu ni lapanakni yu ixlakjunkan, tejkan naul ni
Dios: “Jantu kilapanakni kʼaʼuntʼik”, va yuʼuncha kalakjunaʼ
sasʼatʼan ni Dios yu kujta.
\p
\v 27 Ni Isaías lhilaqputeʼel ni Israel, va naul: “Ni
sasʼatʼan Israel mas va qaynlhuu tacha xakukuj lakamar
tajunita, pero katalaqtaxtuyaʼ vamun yu kaxajtachal tacha
laqsaval sasʼatʼan Israel.
\v 28 Yu Dios va niman laqsaval kalaqlaʼoxiyaʼ ni lakamunukpaʼ
tacha naul.”
\p
\v 29 Vachu maqancha naul ni Isaías:
\q Ni Dios yucha pʼas tacha xalhachimoʼonuʼ tropas.
\q Incha yucha jantu ixmakaul lati kilapanaknikʼan yu
sasʼatʼan Israel,
\q ex ixlhixajchaʼau va tacha yu tapasal xalapanakni Sodoma
ali Gomorra,
\q vachu va chun ixtapasau tus ixmiʼojoo.
\s Lati ni israelitas jantu katalhakapuʼal ni Jesucristo
\p
\v 30 ¿Ex tas kanajuucha? Ni lapanakni yu jantu sasʼatʼan
Israel kataval mas jantu ixtalakxkajuy yu ox putsuku
pero chavay Dios ox jalaqtsʼin por ixlhakapuʼatkʼan.
\v 31 Yu israelitas ixtanajun ni Dios ox kalaqlaqtsʼil
por katamakal yu lhinaunkan laka lhachimoʼon. Pero jantu
lajʼoxin kataval kun Dios.
\v 32 ¿Valiʼiycha? Jantu ixtanajun ni Dios ox kalaqlaqtsʼil
por katalhakapuʼal. Vamun ixtalhiʼajin yu ixtamakay
para lajʼoxin kataval kun Dios. Ex chuncha ixjatapastakʼatkʼan
va tacha taun chiyux yu kataʼaystuklhi taʼan tatiʼukxuntayay.
\v 33 Va chuncha tsʼoqkanta, ni Dios najun:
\q Aniy Sión yu laka putaulan Jerusalén kajkʼulayaʼ qayntaun
lapanaki tacha taun chiyux yu katapuʼaystukʼaʼ lapanakni,
ancha katataqtayaʼ.
\q Pero yu talhakapuʼaniy ixchivinti, yuʼuncha jantu tuʼuchun
katalhimaxananaʼ la ixjatsukuntikʼan.
\c 10
\s Ni israelitas jantu tamakay kuenta yu ox jatsukunti yu xtaʼa ni Dios
\p
\v 1 Ketʼalaqaunin, tus la kelhanuti iknajun katalaqtaxtul
ni israelitas y chuncha klakskʼiniy ni Dios.
\v 2 Kitʼin iknajun laqsaval ayaj tatoʼoyaputun ni Dios
pero jantu tamispay tacha makakancha toʼoyakan.
\v 3 Jantu tamispay tacha lay ox kataval kun Dios, va
ixlaqamankʼan tamakaputun ox ixjatsukuntikʼan, jantu
talhakapuʼan ni Dios lajʼoxin lay kalakmakal.
\v 4 Tachun ni lhachimoʼon yu lhinaul Dios va kiilaqayntsachil
ni Cristo. Xlhiyucha tachun yu talhakapuʼan ni Cristo,
ni Dios jalaqtsʼin tacha lajʼoxin lapanakni.
\p
\v 5 Ni Moisés va tsʼoqlhi tas laycha ox kataval kun
Dios por katamakal yu lhinajun la ixlhachimoʼon. Va
naul: “Ni lapanaki yu kamakaʼoyaʼ yu lhinaunkan, va
yucha kaputsukuyaʼ.”
\v 6 Ni Dios ox laqtsʼinan por kalhakʼapʼupʼi, xlhiyucha
ixchivinti Dios najun: “Jantu maqskʼiniy kʼanau la
melhanuti: ¿Taʼayucha lay kaʼal laktʼiyan para kalhimil
ni Cristo?”
\v 7 Vachu jantu maqskʼiniy kapʼastʼaktʼi: “¿Taʼayucha
kaʼal laqnin para kʼamaxtʼuchʼoʼo ni Cristo laka lhinin?”
\v 8 ¿Tas najun? Va najun: “Ni chivinti yu maqskʼiniy,
yucha alin la minkil, vachu alin la melhanuti.” Yucha
ni chivinti yu lhakapuʼanau, va yucha klaqputeʼeyau.
\v 9 Incha kun minkil kʼanau ni Jesús va yucha miJalhachimoʼonuʼ
y la melhanuti kʼalhakʼapʼupʼi ni Dios majkujuchoqol
tejkan ixnita ex kʼalaqtʼaxtʼuyeʼe.
\v 10 Tus la kelhanutikʼan maqskʼiniy kʼalhakʼapʼupʼi
para ox kalaqtsʼin ni Dios y la minkil maqskʼiniy kʼanau
yu lhakʼapʼupʼin para kʼalaqtʼaxtʼu.
\p
\v 11 Tacha tsʼoqkanta la ixchivinti Dios: “Tachun
yu katalhakapuʼanaʼ, yuʼuncha jantu katatamaxaniyaʼ.”
\v 12 Va aqstanchun mas va taʼayucha kaval mas yu israelitas
mas yu jantu israelitas kataval. Yu Dios yucha ixJalhachimoʼonukʼan
tachun ni lapanakni y jaxtaʼa yu lajʼoxi tachun yu tatapayniniy.
\v 13 Najun la ixchivinti: “Mas va taʼayucha katapayninil
ni Jalhachimoʼonuʼ, yucha kalaqtaxtuyaʼ.”
\p
\v 14 Pero ¿tas kataputapayninil incha jantu talhakapuʼan?
¿Tas katapulhakapuʼalcha incha jantu aqtaun taqasmatʼa?
¿Tas katapuqasmaklhicha incha jantu matichun jalaqputeʼeniy?
\v 15 ¿Tas katapulaqputeʼelcha incha jantu jamalaqachakan?
Tsʼoqkanta la ixchivinti ni Dios, najun: “Ayaj kʼus
tejkan tachin yu talaqputeʼey yu ox chivinti.”
\p
\v 16 Jantu tachun ni israelitas kataqalasmakʼoputul
yu lajʼoxi chivinti. Chuncha maqancha tsʼoqlhi ni Isaías
yu ixnajun: “Jalhachimoʼonuʼ, ¿taʼayucha kintalhakapuʼanincha
yu klaqputeʼeu?”
\v 17 Ex chuncha lhakapuʼankan tejkan qasmakkan y qasmakkan
tejkan laqputeʼekan ixchivinti Cristo.
\p
\v 18 Pero kitʼin klalhisakmiyau: ¿Lhilayatʼik laqsaval
jantu kataqasmaklhi ni israelitas? Chun, taqasmaklhi.
Najun la ixchivinti Dios:
\q Yu chivinti laqputeʼekan tus taʼakapuchun lakatʼun,
\q tus chaʼal taʼan tamaktayachal ni lakamunukpaʼ.
\m
\v 19 Pero vachu klalhisakmiyau: ¿Jantu katamalaqasil
yu ox chivinti yu sasʼatʼan Israel? Pero yu Moisés yucha
pʼunaj jalaqputeʼenil yu naul ni Dios:
\q Klamakayau para kʼalhixiyaxtʼik ni lapanakni yu jantu
kilapanakni kataval.
\q Va kaklaqxaqalayaʼ yu jantu katalhitsukul ox jatapastakʼati,
xlhiyucha kʼalhilukʼujlayapitik.
\m
\v 20 Vachu Isaías jantu katalhanal. Maqancha jalaqputeʼenil
yu naul ni Dios:
\q Kintatemal yu jantu aqtaun kintalakxkaul.
\q Klaktasunil yu jantu aqtaun kintalhasakminil.
\m
\v 21 Pero laklhichivinkan sasʼatʼan Israel taʼan naul
ni Dios: “Tachun ni julchan xakchʼixʼiputun la kimakaʼ
para ixkintalaqmil kilapanakni mas va jalaktuʼunun y
jantu kintaqalasmakputul.”
\c 11
\s Ni Dios jalaksaktacha yu sasʼatʼan Israel
\p
\v 1 Chavay klalhisakmiyau, ¿Lhilayatʼik ni Dios lakmajʼantacha
ixlapanakni? Jantu tsʼuniy. Kitʼin vachu israelita kunita,
va ixpuxniunti ni Abraham kunita, va ixmaqlaqapʼu Benjamín
kunita, yu istsʼal Israel.
\v 2 Ni Dios jantu kalakmajʼal ixlapanakni yu pʼunaj
ixjalaksaktacha. ¿Jantu mispʼayatʼik yu tsʼoqkanta taʼan
lhichivinkan ni Elías? Tejkan yucha tʼachivinil ni Dios
va jalakslajlhi yu sasʼatʼan Israel, va naul:
\v 3 “Jalhachimoʼonuʼ, tachun yu ixtalaqputeʼey minchivinti
jalaqmaqniʼokal. Vachu yu altares taʼan ixtatoʼoyayan
va talaktʼilhiʼol. Vamuncha kitʼin kxajtʼaunachal pero
vachu kintamaqniputun.”
\v 4 ¿Pero ex tas lhiqaltayanal ni Dios? Va naul: “Kitʼin
klaklhilkata laqatujun mil joʼakna yu kilapanakni, yuʼuncha
jantu aqtaun tataʼaqtsoqoqtaniy ni dios yu junkan Baal.”
\v 5 Ex chavaycha vachu va chun ni vananaj taxajtachal
lati israelitas yu ixlapanakni Dios yu jalaksaklhi va
por jalakmapaynil.
\v 6 Chuncha jalaksaklhi por ixjamapayninti, jantu jalaksaklhi
por tamakal yu lajʼox. Incha kaval por tamakal yu lajʼox
ex jantucha kaval vamun por jalakmapaynil ni Dios.
\p
\v 7 Ex chuncha yu ox jatsukunti yu ixtalakxkajuy ni
israelitas jantu katatemal. Vamun yu ixjalaksakta ni
Dios, yuʼuncha tatemal. Yu alati la pʼas jalakmakanikal
ixjatapastakʼatkʼan.
\v 8 Chuncha tsʼoqkanta la ixchivinti Dios: “Ni Dios
va la pʼas jalakmakanil ixjatapastakʼatkʼan. Jalaqxtaqnil
laqchul yu jantu pulakavanankan ali aqaxqol yu jantu
paqasmaknankan, mas tus chavaycha.”
\v 9 Vachu va chun tsʼoqlhi yu David, va naul:
\q Yu ixlakvaytkʼan va kalhixajchal tacha isqapakʼan, katatajuchal
laqa chʼoqxni.
\q Ex chuncha para katamaqanlqajnal tacha tapaxtoqniy.
\q
\v 10 Va katalaqputsʼislhi para jantucha katalakavanal.
\q Va si katataqentatiʼukxuntayalcha.
\s Katalaqtaxtuyaʼ yu jantu israelitas kataval
\p
\v 11 Ex klalhisakmiyau, ni tejkan lakʼaystukʼukal ni
israelitas por ixlhakapuʼatkʼan, ¿lhilayatʼik va para
jantucha katalhakapuʼanchoqol? Jantu. Alil ixlaqtaqalkʼan,
xlhiyucha tapaxtoqnil yu jantu israelitas kataval ni
lay katalaqtaxtul. Talaqtaxtul para katalhixiyaxlhi
yu israelitas.
\v 12 Va por ixlaqtaqalkʼan ni israelitas tatsʼanqal.
Chuncha ox lhixajchal para yu alati lapanakni lakamunukpaʼ
yu jantu israelitas kataval. Ex chuncha tejkan ni israelitas
katatanuchoqotachal kun Dios mas apalay ox kaxajtachal
por tachun yu lapanakni.
\p
\v 13 Uxiknankʼan yu jantu israelitas kʼaʼuntʼik, va
inchineʼ klajunau. Va klhilakʼulakal y ikmalaqachakal
kaklaktapatsanil yu jantu israelitas kataval. La ox
klhilay kilhitapatsa.
\v 14 Iknajun por kilhitapatsa lay katalhixiyaxlhi lati
yu kintʼaʼisraelitas. Chuncha katalhakapuʼanputul vachuʼ,
ex lay katalaqtaxtul.
\v 15 Tejkan ni Dios jantu kalaqlaqaʼil ni israelitas,
yucha ox lhixajchal para yu alati lapanakni, para lay
oxamaktaun kataval kun Dios. ¿Ex tas katapasayacha tejkan
kalaqlaqaʼichoqokanaʼ yu israelitas? Mas va tacha janinin
kataval, katakujchoqoyaʼ.
\v 16 Yuʼuncha va tacha xaskititi ni pan. Tejkan makakan
pan yu pʼunaj cheʼeʼikal laka skititi va moqslanikanta
ni Dios. Yucha naunputun tachun yu skititi vachu ixnavin
ni Dios. Vachu va tacha xamaqlaqapʼu aqataun kʼiu. Incha
yu xatakxiyati ixnavin ni Dios ex yu ixmaqlaqapʼu vachu
ixnavin ni Dios.
\s Ni israelitas va tacha aqataun xakʼiu olivos
\p
\v 17 Chavay lati yu xamaqlaqapʼu ni kʼiu va lajqalhachaqxmajʼankan.
Ex uxintʼi yu jantu israelita kʼaʼuntʼi ltʼaumukʼanikʼa,
mas va tacha xamaqlaqapʼu yu xakʼiu lakakʼivin unitʼa.
Ex chuncha mapasaniyan ixʼoxixtu ni takxiyati.
\v 18 Jantu ay kʼamakʼakʼa kun yu alati mintʼamaqlaqapʼu.
Incha ay makʼakʼan maqskʼiniy kakʼatsʼatʼi ni jantu
uxintʼi aqtʼayʼuy ni takxiyati. Va yu takxiyati aqtayjuyan
ni uxintʼi.
\p
\v 19 Ex uxintʼi naʼun: “Yu alati maqlaqapʼu lajqalhachaqxmajʼankal
para kaktanul ni kitʼin.”
\v 20 Ox yu naʼun. Yuʼuncha jalajqalhachaqxmajʼankal
va por jantu ixtalhakapuʼan. Uxintʼi vamun por lhakʼapʼupʼin,
va xlhiyucha ancha tʼayay kun Dios. Ex chuncha jantu
ay kakʼatsʼa, va maqskʼiniy katʼalhaunin ni Dios.
\v 21 Incha Dios jantu kamalaqmixinil yu laqsaval maqlaqapʼu
ixtajunita, vachuʼ jantu kamalaqmixiniyan incha jantu
katʼaylhipʼineʼe kun yucha.
\v 22 Ex chuncha kʼapʼastʼaktʼi ni Dios va la qalʼox
pero vachu la qalpʼas. Va qalpʼas kun ni lapanakni yu
tamakauntijlal pero va qalʼox kun uxintʼi incha tʼaylhipʼin
kun ixtaqalʼoxixtu. Chavay vachu va chun incha jantu
tʼaylhipʼin ex vachu kʼaʼalhachʼaqxmajʼankʼaneʼe.
\v 23 Chavay yuʼuncha, incha katalhakapuʼanchoqol ex
kalakmanuchoqokanaʼ. Dios lhitʼajun tapʼasta para lay
kalakmanuchoqol.
\v 24 Uxintʼi jantu israelita kʼaʼuntʼi y lay tʼanuy
xakʼiu olivo mas valiʼiy xakʼiu lakakʼivin unitʼa. Ex
apalay paxtoqniy katanuchoqol yu israelitas, yuʼuncha
va yu mero xamaqlaqapʼu tajunita.
\s Tejkan katalaqtaxtuyaʼ yu israelitas
\p
\v 25 Ketʼalaqaunin, para jantu ay kamakʼakʼantʼik, kitʼin
knajun kʼamispʼatʼik yu jantu ixmispakan, yu tacha kamakayaʼ
ni Dios. Ni israelitas va pʼas lakmakanikal ixjatapastakʼatkʼan
pero jantu chuncha katataylhaanaʼ. Chuncha val para
lay katʼatʼanuʼotʼik yu jantu israelitas kʼaʼuntʼik,
tus tachun yu Dios najun katalhakapuʼanaʼ.
\v 26 Ex astan katalaqtaxtuʼoyaʼ tachun yu israelitas,
tacha tsʼoqkanta taʼan najun ni Dios:
\q Laka Jerusalén kamintachal qayntaun yu kalaqmalaqtaxtuyaʼ
ni israelitas.
\q Va sasʼatʼan Jacob tajunita, kalakmapaxaniyaʼ ixjatapastakʼatkʼan
para kintatoʼoyachoqol.
\q
\v 27 Chuncha chʼantaun katʼatamakaunaʼ kun yuʼuncha,
\q tejkan kaklaqmoqosuniyaʼ ixlaqtaqalkʼan, najun ni Dios.
\p
\v 28 Ni israelitas por jantu talhakapuʼan yu ox chivinti
yuʼuncha va tacha tʼalaxkayaʼ tamakay ni Dios. Ex chuncha
lay kʼatʼanutʼik kun Dios uxiknankʼan yu jantu israelitas
kʼaʼuntʼik. Pero Dios jalaksakta ixpayankʼan para ixlapanakni
kataval, xlhiyucha vananaj jalakpaxkay.
\v 29 Yu xtaqninin ni Dios jantucha maxtunichoqonun.
Vachu tejkan jalaksakʼa lapanakni jantucha jalakmakajun.
\v 30 Uxiknankʼan yu jantu israelitas kʼaʼuntʼik, jantu
ixʼalasmatʼatʼik ni Dios pero chavay ni Dios tamapaynitan,
va por jantu kataqalasmaklhi yu israelitas.
\v 31 Chavaycha yuʼuncha jantu taqalasmatʼa, va xlhiyucha
lhixajyachal ni Dios tamapayniyan ni uxiknan. Astan
vachuʼ kalakmapaynichoqoyaʼ ni yuʼuncha.
\v 32 Tachun ni lapanakni ni Dios jalakmakaul tacha
tachʼinin la ixlaktuʼuntikʼan, para lay kalakmapaynil
tachun.
\p
\v 33 Ni Dios va ayaj ay ixmaqaliti ali ixjatapastakʼati,
tus tachun mispaʼojoy. Jantu matichun lay laqputeʼeʼojoy
yu tacha pastakʼa ni Dios. Jantu matichun lay malaqasiy
yu tacha makay.
\v 34 “¿Taʼayucha lay kakʼatsaniʼolcha ixjatapastakʼati
ni Dios? ¿Taʼayucha lay kaxtaqnil jatapastakʼati?
\v 35 ¿Taʼayucha lay kaxtaqniʼelal tuʼuchun ex yucha
kaxtaqchoqol?”
\v 36 Tachun yu alin va kun yucha minchal, va yucha puʼalin,
va para yucha alinta. Vamun yucha ay kamakakal mas va
tavanancha. Chuncha kavalcha.
\c 12
\s Kʼamaqxtʼaqnitʼik metsukuntikʼan ni Dios
\p
\v 1 Xlhiyucha, ketʼalaqaunin, la ay ixjamapayninti ni
Dios. Va yucha klalhitapayniniyau ni kʼamaqxtʼaqnitʼik
metsukuntikʼan ni Dios tacha taun lapaxkan yu kujta,
yu ixnavin Dios, yu lhipaʼiniy ni yucha. Va chuncha tapaxtoqniyan
para katʼoʼoyatʼik ni Dios.
\v 2 Jantu chun kalhixajchoqochal mimputsukukʼan tacha
yu xaputsuku aniy lakamunukpaʼ. Kʼalhitsʼukʼutʼik yu
sastʼi jatapastakʼati para chuncha kʼamapʼaxanikʼantʼik
metsukuntikʼan. Chuncha kʼapʼumispʼayapitik yu Dios
najun kaʼalil la metsukuntikʼan, yu ox laqtsʼin, yu jantu
tuʼuchun tsʼanqay.
\p
\v 3 Kimapaynil ni Dios y kixtaqnil yu aniy lhitapatsa.
Xlhiyucha klajunau mintachunkʼan ni jantu ay kakʼatsʼantʼik
yu jantu tapaxtoqniyan. Kʼalakpʼastʼaknantʼik tacha
yu maqskʼiniy, chuncha tacha yu Dios tamaqxtaqnin milhakapuʼatkʼan
mintachunkʼan.
\v 4 Va taun kilakatunajkʼan lhitʼaunau pero pulhuu
laqxtoqnun y si putamin lhitapatsa lay tamakay.
\v 5 Vachu va chun kijnankʼan mas pumalhuu va tacha
ixlakatunaj Cristo juntau y si lamaqskʼiniyau pumatamin
kijnankʼan.
\v 6 Va si putamin yu lhitapatsa yu kintaxtaqnitan ni
Dios por kintamapaynin. Incha matichun ixlhitapatsa
va ixlaqputeʼeka ixchivinti Dios, ex chuncha kalaqputeʼel
tacha yu paxtoqniy la ixlhakapuʼati.
\v 7 Incha ixlhitapatsa va kalaqʼaqtayjul yu alati ex
kalaqʼaqtayjul. Incha ixlhitapatsa va ixmasuka ixchivinti
Dios ex kamasul.
\v 8 Incha paxtoqniy va kalakmapʼaysnil ex tsʼanqay
chuncha kamakal. Incha paxtoqniy va kaxtaqlhi yu lhitʼajun,
va kaxtaqlhi jantu kun taqspukniti. Incha paxtoqniy
kalaklhichimoʼol ex maqskʼiniy ox kamakal. Incha paxtoqniy
kalaqʼaqtayjul yu kilpatanin, va kamakal kun achati.
\s Yu tsʼanqay katamakal yu talhakapuʼan
\p
\v 9 Laqsaval kʼalapʼaxkʼatʼik, chuncha kamakʼauntʼijlatʼik
yu jantu ox, va katʼaylhipʼintʼik yu lajʼoxi.
\v 10 Kʼalapʼaxkʼatʼik tacha jatʼalaqaunin kun lhuu
achati. Kʼalatʼoʼoyatʼik, kʼalalaqtsʼintʼik tacha yu
aqayntaun va apalay ay xajantu uxintʼi.
\v 11 Jantu malhaqnin kʼaʼuntʼik la milhitapatsakʼan,
kʼatʼapʼasnitʼik la metsukuntikʼan, kʼatʼapʼatsʼanitʼik
ni kiJalhachimoʼonukʼan kun tachun melhanutkʼan.
\v 12 Kʼalhiʼachʼantʼaʼutʼik por yu pʼakxanʼiyatʼik,
kʼamaʼantʼaqnitʼik memaqanlqajnatkʼan, va kʼaskʼinʼalhitʼikcha
ni Dios.
\v 13 Kʼalaqʼaqtʼayʼutʼik ixlapanakni Dios tejkan tatsʼanqaniy
tuʼuchun, ox kʼalaʼaʼitʼik la minchaqakʼan yu tachinachal.
\p
\v 14 Kaskʼintʼik Dios por ni lapanakni yu tamamaqanlqajnivaputunan.
Kʼaskʼintʼik para ox katalhitapasal, jantu kaskʼintʼik
yu jantu ox.
\v 15 Kʼalhiʼachʼantʼaʼutʼik kun yu taʼachan. Kʼaʼalhuntʼik
kun yu taqalhun.
\v 16 Va taun jatapastakʼati kalhitsʼukʼutʼik, jantu
ay kakʼatsʼantʼik, kʼatʼatʼiʼuntʼayatʼik yu kilpatanin.
Jantu kakʼatsʼantʼik tacha qayntaun lapanaki yu mispaʼojoy
kʼatsan.
\p
\v 17 Jantu kʼalhimaʼalchʼaunichʼoʼo yu jantu ox. Kʼapʼastʼaktʼik
makaninin yu lajʼoxi la ixtalakaʼukxpukʼan tachun ni
lapanakni.
\v 18 Kʼamakʼatʼik yu maqskʼiniy para oxamaktamin katʼatʼaulatʼik
kun tachun yu alati lapanakni.
\v 19 Uxiknan yu klapaxkayau, jantu kʼalhimaʼalchʼaunichʼoʼotʼik
yu jantu ox. Kʼamakʼaunitʼik ni Dios para kamaqalchaunichoqol
ni yucha. Va tsʼoqkanta taʼan Dios najun: “Va kitʼin
kimpaxtoqniy kaklaqmaqalchaunichoqol; va kitʼin kaklaqxtaqniyaʼ
jamaqanlqajnati.”
\v 20 Incha qayntaun mintʼalaxkayaʼ chavaniy, kavavatʼi.
Incha oqputun xkan, katʼaʼoqtʼi. Incha chuncha kʼamakʼayeʼe,
va tacha kʼamukʼanitʼachiy lhimaxan tus tacha kamaqtaytayal
ixʼukxpuʼ.
\v 21 Jantu kamaqalhajan yu jantu ox, kʼapʼumaʼalhaʼatʼi
yu jantu ox kun yu ox.
\c 13
\s Maqskʼiniy katʼoʼoyatʼik ni jalhachimoʼonun aniy lakamunukpaʼ
\p
\v 1 Tachun ni lapanakni maqskʼiniy katatoʼoyal yu jalhachimoʼonun.
Tachun yu talhachimoʼonun, va Dios jalakʼulal.
\v 2 Chuncha yu jantu talhiʼajin ni jalhachimoʼonun,
yuʼuncha jantu talhiʼajin yu lakʼulal ni Dios. Va ixlaqʼamankʼan
lakmukʼanikan ixmaqanlqajnatkʼan.
\v 3 Ni lapanakni yu ox tamakay jantu maqskʼiniy katatalhaunil
ni jalhachimoʼonun, yu maqskʼiniy katatalhaunil va yu
jantu ox tamakay. Incha tʼaulpʼutʼun para jantu katʼalhaunin
ni jalhachimoʼonun ex kʼamakʼatʼi yu ox. Ex chuncha
yu jalhachimoʼonun ox katalaqtsʼinan.
\v 4 Yuʼuncha va Dios tatapatsaniy para ox kaxajchal
la metsukunti. Pero incha jantu ox makʼay ex maqskʼiniy
katʼalhaunin. Jantu valiʼiy kaval yu ixtapʼasta yu lay
katapumukʼanin mimaqanlqajnati. Va Dios tatapatsaniy
para katamaqalchaul kun maqanlqajnati yu jantu ox tamakay.
\v 5 Xlhiyucha maqskʼiniy katʼoʼoyatʼik ni jalhachimoʼonun,
jantu vamun por yu maqanlqajnati yu lay katamukʼanin.
Vachu por mispʼayatʼik yu ox ali yu jantu ox.
\p
\v 6 Va xlhiyucha jamapʼalananatʼik tejkan taskʼin yu
jalhachimoʼonun. Yuʼuncha tatapatsay tacha ixʼoqxtamatin
ni Dios tejkan chuncha tamakay.
\v 7 Kʼamapʼalniʼotʼik yu jalhipʼiniyatʼik. Incha tsʼanqay
kʼamapʼalnitʼik ni jalhachimoʼonun ex kʼamapʼalnitʼik.
Incha tsʼanqay kʼamapʼaltʼik miʼimpuestoskʼan, ex kʼamapʼaltʼik.
Incha tsʼanqay katʼoʼoyatʼik matichun, ex katʼoʼoyatʼik.
Incha tsʼanqay kʼalhiʼayntʼik matichun, ex kʼalhiʼayntʼik.
\s Ox kʼalapʼaxkʼatʼik
\p
\v 8 Jantu kʼalhipʼininintʼik kun matichun, kʼalalhipʼinitʼik
vamun japaxkanti. Yu japaxkanan yucha makaʼojoy ixlhachimoʼon
ni Dios.
\v 9 Taʼan tsʼoqkanta la ixlhachimoʼon Dios najun: “Jantu
kʼatʼatʼamatʼi aqayntaun yu jantu minavin kaval. Jantu
kʼamaqnin. Jantu kaʼalhavan. Jantu kʼamanunin jalaklkanti
matichun. Jantu kʼaʼakchʼipʼi.” Tachun yu anchanu chivinti
va aqstanchun tacha yu inchineʼ tsʼoqkanta: “Kʼapʼaxkʼatʼi
mintʼamachaqaʼ vachu va tacha pʼaxkʼakʼan meʼeman.”
\v 10 Yu japaxkanan jantu makaniy tuʼuchun yu jantu
ox yu aqayntaun. Chuncha yu japaxkanan makaʼojoy yu
lhinajun Dios.
\p
\v 11 Tejkan chuncha makʼayatʼik, kʼamakʼatʼik kuenta
yu chavay tapasay. Va lakachilcha ni julchan para kakujvicha,
jantucha maqskʼiniy kaltatau. Tejkan pʼunaj lhakapuʼau
tus chavaycha apalay ukstsʼuniy lakaminta ni julchan
tejkan kapulaqtaxtuyau.
\v 12 Va laycha katapasaʼol ni japutsʼisniʼ, va taʼukstsʼuniycha
ni anchanu julchan. Xlhiyucha maqskʼiniy kamakauntijlaʼojoo
xalhitapatsa ni japutsʼisniʼ, kalhilakatayau xaputsuku
ni jatunkunaʼ.
\v 13 Ox katijuntayau tacha maqskʼiniy laka jatunkunaʼ.
Jantu maqskʼiniy kataʼapʼau laka kʼatan, jantu katʼatamau
aqayntaun yu jantu kinavinkʼan kaval, jantu kamakau laqxtoqnuʼ.
Jantu maqskʼiniy kalalukujlaniu y jantu kalaʼakchaʼaniu.
\v 14 Maqskʼiniy katiʼukxuntayau tacha kiJalhachimoʼonukʼan
Jesucristo. Jantucha maqskʼiniy kamakau tacha yu tamakaputun
yu valiʼiy lapanakni.
\c 14
\s Jantu kʼalamukʼanitʼik laqtaqal
\p
\v 1 Kʼalaʼaʼitʼik yu jantukaʼ ox lhakapuʼan. Jantu
kalaktʼanchʼanitʼik por aputaun ixputsuku.
\v 2 Lati va puchux taʼuy, pero aqtamix yu jantukaʼ ox
talhakapuʼan jantu taʼuy vakax.
\v 3 Yu puchux uy jantu maqskʼiniy kalaktanchanil yu
jantu uy. Vachu yu jantu uy jantu maqskʼiniy kakiltayl
yu puchux uy. Ni Dios va laqaʼiy.
\v 4 ¿Taʼayucha lapanaki kʼatʼi para kʼamukʼanin laqtaqal
ixʼoqxtamati Dios? Ni Dios va ixʼukxtin, yucha makay
kuenta incha kataylhaʼanaʼ la ixlhakapuʼati u incha
kamakauntijlayaʼ. Pero kataylhaʼanaʼ. Ni Dios va ixʼukxtin,
yucha lay aqtayjuy para kataylhaʼal.
\p
\v 5 Lati talhilay ni apalay xtapal taun julchan xajantu
yu ataun julchan. Pero alati lapanakni talhilay va aqstanchunin
tachun julchan. Qayntamin lapanakni si putamin maqskʼiniy
kalakpastaknal tacha lhakapuʼan.
\v 6 Qayntaun lapanaki yu pastakʼuy taun julchan, chuncha
makay va por toʼoyaputun ni Dios. Vachuʼ yu puchux uy,
va chuncha makay para katoʼoyal ni Dios, va xtaqniy lhimalaqpuchuncha
ni Dios. Vachu yu jantu puchux uy, yucha jantu uy va
por toʼoyaputun ni Dios y vachu xtaqniy lhimalaqpuchuncha
ni Dios por yu uy.
\v 7 Siya kijnankʼan jantu matichun xʼaman tiʼukxuntayay,
mas va kakʼujtʼi, mas kanitʼi.
\v 8 Incha tsukuyau va para ni Jalhachimoʼonu Dios tsukuyau.
Vachuʼ tejkan niyau, va para yucha niyau. Mas katsukuu
mas kaniu, va si yucha ixnavin juntau.
\v 9 Va xlhiyucha ni Cristo nil ex kujchoqol para kaval
ixJalhachimoʼonukʼan yu janinin ali yu takujta.
\p
\v 10 ¿Taʼayucha lapanaki kʼatʼi para kʼamukʼanin laqtaqal
milaqaj? ¿Valiʼiycha jantu ox laqtsʼin milaqaj? Tachun
maqskʼiniy katayau la ixʼukxpu ni Cristo taʼan kamukʼakanaʼ
laqtaqal.
\v 11 La ixchivinti Dios najun:
\q Kitʼin ijkujta, najun ni jalhachimoʼonu.
\q Tachun ni lapanakni kintataʼaqtsoqoqtaniyaʼ.
\q Tachun ni lapanakni katanaunaʼ ni kitʼin va Dios kunita.
\p
\v 12 Ex chuncha qayntamin lapanakni maqskʼiniy kalhitaulau
yu makayau ancha la ixtalakaʼukxpuʼ ni Dios.
\s Jantu kʼamakʼatʼik yu lay kapumakauntijlal ixlhakapuʼati milaqajkʼan
\p
\v 13 Xlhiyucha jantucha maqskʼiniy kalakiltajiu. Maqskʼiniy
kʼalhistʼajkʼantʼik para jantu kʼamakʼatʼik yu jantu
ox laqtsʼin milaqajkʼan, yu lay kapumakauntijlal ixlhakapuʼati.
\v 14 Kitʼin ox ijkʼatsay ni kiJalhachimoʼonukʼan Jesucristo
najun ni jantu tuʼuchun alin yu jantu lay kʼaʼutʼi.
Pero incha matichun pastakʼa ni kaʼalil tuʼuchun yu
jantu lay kʼaʼutʼi, ex para yucha jantu ox kaval.
\v 15 Incha kʼaʼutʼi tuʼuchun y milaqaj jantu ox lhilay
ex ka jantu ox pʼaxkʼay milaqaj. Ni Cristo nil por yucha,
ex chuncha jantu maqskʼiniy kʼamaʼatsʼanʼatʼi por yu
kʼaʼutʼi.
\v 16 Jantu kaxtʼaqtʼik lakatin ni jantu ox kalhichivinkal
yu ox makʼayatʼik.
\v 17 Taʼan lhachimoʼonun ni Dios, jantu maqskʼiniy tisuncha
kʼaʼutʼi u tisuncha kʼaʼoqtʼi. Yu maqskʼiniy va kʼamakʼatʼi
yu ox laqtsʼin ni Dios, oxamaktaun katʼiʼukxuntʼay, y
kʼalhitsʼukʼu ni achati yu xtaʼa ni Espíritu Santo.
\v 18 Yu chuncha tapatsaniy ni Cristo, yucha ni Dios
ox laqtsʼin, vachuʼ ox talaqtsʼin ni lapanakni.
\p
\v 19 Chavaycha kalakxkajuu tas lay oxamaktamin kalatʼataulau
y tas lay kalalapʼasniu la kilhakapuʼatkʼan.
\v 20 Jantu kamaʼatsʼanʼatʼi ixlhitapatsa ni Dios por
yu uy. Laqsaval, tachun va lajʼoxi para kʼaʼutʼi. Pero
jantu kʼaʼutʼi tuʼuchun incha milaqaj kalaqtsʼinan y
por yucha kamakauntijlal ixlhakapuʼati.
\v 21 Incha milaqaj lhilay jantu ox, ex jantu maqskʼiniy
kʼaʼutʼi vakax nisin kaʼoqnu, para jantu kamakaul ixlhakapuʼati.
\v 22 Uxintʼi lhakʼapʼupʼin ni lay kʼaʼutʼi. Yucha kaval
meʼeman kun Dios. Kalhiʼachantajul ni lapanaki yu jantu
xʼaman mukʼanikan ixlaqtaqal tejkan kaʼul tuʼuchun.
\v 23 Incha kʼaʼutʼi tuʼuchun yu lhakʼapʼupʼin ni jantu
ox kʼaʼutʼi ex taukʼaniyachaʼan milaqtaqal. Incha lhakʼapʼupʼin
ni jantu ox kʼamakʼatʼi ex va laqtaqal incha kʼamakʼatʼi.
\c 15
\s Kʼalaqʼaqtʼayʼutʼik yu alati tacha Cristo kintaʼaqtayjuyan
\p
\v 1 Kijnankʼan yu pʼas lhakapuʼanau maqskʼiniy kalaqʼaqtayjuu
yu tatsʼanqaniy tapʼasta la ixlhakapuʼatkʼan. Jantu
maqskʼiniy kamakau vamun yu kalhiʼachantajuu kijnankʼan.
\v 2 Maqskʼiniy kamakau yu ox, yu kalhiʼachantajul ni
kintʼamachaqakʼan para lay kaputalhaval ixlhakapuʼati.
\v 3 Mas Cristo jantu va xʼaman kalhiʼachantajukal yu
makal. Va paxtoqnil tacha tsʼoqkanta taʼan junkal ni
Dios: “Ni lapanakni yu talaktuʼuyan, ixjalaktuʼuntikʼan
va kintaukʼanichal ni kitʼin.”
\v 4 Yu tsʼoqʼulakal maqancha va para kalaniu kijnan.
Ex kun maqantaulati lay kalakataulau y lay kapakxanʼiu
yu ox.
\v 5 Ni Dios xtaʼa maqantaulati y malakaʼulanan. Va
yucha kamakal para taun kaval mijatapastakʼatkʼan tacha
lhinajun ni Cristo Jesús.
\v 6 Chuncha kaval para chʼantaun kʼaʼuntʼik para chʼantaun
ay kʼamakʼatʼik ni Dios ixPay kiJalhachimoʼonukʼan Jesucristo.
\s Laqputeʼenikan ni ox chivinti yu jantu israelitas kataval
\p
\v 7 Chuncha kʼalalaʼaʼitʼik aqstanchunin vachu va tacha
ni Cristo kintalaqaʼin para ay kamakakal ni Dios.
\v 8 Ni Cristo kintakiʼaqtayjuchin ni kijnan yu israelitas
juntau. Va para kataqayntsal ixchivinti ni Dios yu jalakjunil
maqancha kijapayan.
\v 9 Vachu kilachil para ay katamakal ni Dios yu jantu
israelitas kataval por ixjamapayninti. Chuncha tsʼoqkanta,
junkan ni Dios:
\q Xlhiyucha ay kakmakayan mas taʼan tavilanal yu jantu
israelitas kataval.
\q Vachuʼ kaklhimilpayaʼ mintaqaʼuti.
\m
\v 10 Alakataun tsʼoqkanta:
\q Uxiknan yu jantu israelitas kʼaʼuntʼik, kʼalhiʼachʼantʼaʼutʼik
chʼantaun kun ixlapanakni Dios.
\m
\v 11 Vachuʼ alakataun tsʼoqkanta:
\q Ay kʼamakʼatʼik ni Jalhachimoʼonuʼ mintachunkʼan yu
jantu israelitas kʼaʼuntʼik.
\q Kalhimilpʼatʼik, taʼoqxlaqchux lapanakni untʼatʼik.
\m
\v 12 Vachu yu Isaías tsʼoqlhi, va naul:
\q Kaʼalinaʼ qayntaun lapanaki yu ixmaqlaqapʼu qayntaun
yu junkan Isaí.
\q Kaʼostaulaʼ para kalhachimoʼonul tachun ni lakamunukpaʼ.
\q Va yucha katapakxanʼiyaʼ taʼoqxlaqchux ni lapanakni.
\m
\v 13 Ni Dios kintaʼaqtayjuyan kapakxanʼiu yu ox. Chavay
kataxtaqniʼojon achati ni uxiknan y oxamaktamin katamakan
la milhakapuʼatkʼan. Ex chuncha la ixtapʼasta ni Espíritu
Santo va kun achati lay kapʼakxanʼiyapitik yu kaʼalinaʼ.
\s Ixlhitapatsa ni Pablo
\p
\v 14 Ketʼalaqaunin, ox ijkʼatsay ni ayaj qalʼoxin untʼatʼik,
vachu mispʼaʼoyatʼik yu maqskʼiniy, vachu lay laxtʼaqniyatʼik
jatapastakʼati.
\v 15 Pero chavaycha aniy klatsʼoqnitaucha laqatapʼasta
para kapʼastʼakchʼoʼotʼik ni aniy chivinti. Chuncha
klatsʼoqnitau va por chuncha kimpaxtoqniy kilhitapatsa
yu kixtaqnil Dios la ixjamapayninti.
\v 16 Iktapatsaniy ni Jesucristo kun lapanakni yu jantu
israelitas kataval. Klaqlaqputeʼeniy yu ox chivinti
yu minchal kun Dios. Chuncha para kataval tacha taun
jamoqslanti yu ikmaqxtaqniy ni Dios, yu kapaxkalaqaʼil.
Va chuncha kataval ixlapanakni Dios por yu makay ni
Espíritu Santo.
\v 17 Jantu ay ikmakakan por yu ikmakay kitʼin, pero
va ay ijkʼatsan por yu makay Jesucristo tejkan iktapatsaniy
ni Dios.
\v 18 Jantu klhichiviniy ni lhitapatsa yu ikmakay kitʼin.
Klhichiviniy vamun lhitapatsa yu makay Cristo la ketsukunti.
Talhakapuʼan yu jantu israelitas kataval tejkan taqasmatʼa
kinchivinti y talaqtsʼin yu ikmakay.
\v 19 Talaqtsʼin yu lajʼay axtoqnuʼ yu ikmakay yu masuy
ixtapʼasta ni Espíritu Santo. Chuncha mas va Jerusalén,
mas va tus xaʼestado Ilirico, kitʼin klaqputeʼeʼol yu
ox chivinti yu lhichiviniy ni Cristo.
\v 20 Ayaj klaqputeʼeputun yu ox chivinti taʼan jantukaʼ
aqtaun qasmakkan ixtaqaʼuti ni Cristo. Jantu klaqaputapasaputun
taʼan tapasatacha aqayntaun.
\v 21 Va chuncha kaval tacha tsʼoqkanta la ixchivinti
Dios taʼan najun:
\q Ni lapanakni yu jantukaʼ jalaqputeʼenikan, yuʼuncha
kataqasmatʼaʼ.
\q Yu jantukaʼ taqasmatʼa, yuʼuncha katamalaqasiyaʼ.
\s Ni Pablo uxaʼan Roma
\p
\v 22 Xlhiyucha jantukaʼ lay klalaqʼanau mas va aqlhuvaj
klalaqʼuxanachaʼau.
\v 23 Pero chavaycha ikmajkanitacha kilhitapatsa yu
aniy laka putaulanaxna y tus maqancha aqlhuu klalaqʼuxanachaʼau.
\v 24 Xlhiyucha tejkan kajkʼanaʼ España klalaqtapasaputunau
para va aqtauncha kaklalaqtsʼiu, ex chuncha lay kaklhiʼachantajul.
Ex astan chuncha lay kilaʼaqtayjuu la kilakatin.
\p
\v 25 Pero chavaycha ikteʼen Jerusalén para kaklaqʼaqtayjul
ixlapanakni Dios yu ancha tavilanal.
\v 26 Yu tavilanal xalakatʼun Macedonia kun Akaya tamaqamal
katapusaklhi taun ofrenda para katamalaqachanil ixlapanakni
Dios yu kilpatanin yu tavilanal laka Jerusalén.
\v 27 Va chuncha ixtamakaputun, va tacha katalhaaninil.
Yuʼuncha mas jantu israelitas kataval, yu ixlhakapuʼatkʼan
va kun ni israelitas minchal. Chavaycha taʼaqtayjuchoqoy
kun yu tamaqskʼiniy ni israelitas.
\v 28 Chuncha pʼunaj kaklhaanaʼ laka Jerusalén ixʼofrendajkʼan.
Ex tejkan kakmajkaniʼoyacha kaklalaqtapasayau tejkan
kajkʼanaʼ España.
\v 29 Ox ijkʼatsay ni tejkan kajkʼantachal, kaklhaanaʼ
ni ox chivinti yu minachal kun Cristo yu taʼaqtayjuyan
la metsukuntikʼan.
\p
\v 30 Ketʼalaqaunin, Jesucristo va kiJalhachimoʼonukʼan
y ni Espíritu Santo kintaxtaqniyan japaxkanti. Xlhiyucha
klatapayniniyau ni tejkan tʼaqxtʼoqyatʼik ni kaskʼintʼik
Dios por kitʼin.
\v 31 Kaskʼintʼik para jantu tuʼuchun kintamakanil yu
jantu taqasmakputun ixchivinti Dios ancha xalakatʼun
Judea. Vachu kaskʼintʼik ni ox katalaqaʼil ixlapanakni
Dios ancha laka putaulan Jerusalén yu kaklaklhaaniyaʼ.
\v 32 Chuncha para lay klalaqchaʼau kun achati incha
chuncha najun ni Dios y lay chʼantaun kastaknau.
\v 33 Dios yu oxamaktaun jamakanan katatʼataulan mintachunkʼan.
Chuncha kavalcha.
\c 16
\s Ni Pablo jamastakʼay yu tavilanal laka putaulan Roma
\p
\v 1 Kitʼin iknajun ni ox kalaʼaʼitʼik ni kintʼalapanakkʼan
Febe. Yucha lakʼulakan kalaqʼaqtayjul yu talhakapuʼan
laka putaulan Cencrea.
\v 2 Ox kalaʼaʼitʼik, yucha va ixlapanaki kiJalhachimoʼonukʼan.
Kʼalaʼaʼitʼik tacha paxtoqniy ixlapanakni Dios. Kaʼaqtʼayʼutʼik
mas va tisuncha kaval yu maqskʼiniy. Yucha lhuucha jalaqʼaqtayjuta
y vachu kiʼaqtayjul ni kitʼin.
\p
\v 3 Kalakmastʼakʼatʼik ni Priscila ali yu Aquila yu
kintatʼatapatsayan la ixlhitapatsa ni Cristo Jesús.
\v 4 Yuʼuncha ixtamaqxtaqta ixjatsukuntikʼan por kitʼin.
Xlhiyucha ikxtaʼa lhimalaqpuchuncha pero jantu vamun
kitʼin. Vachu tachun ni lapanakni yu talhakapuʼan Dios
yu jantu israelitas kataval, si taxtaʼa lhimalaqpuchuncha
por yuʼuncha.
\v 5 Vachu kʼamastʼakʼatʼik ni lapanakni yu talhakapuʼan
yu tataqxtoʼa la ixchaqakʼan. Kʼamastʼakʼatʼik kiʼamigo
Epeneto yu ikpaxkay. Yucha pʼunaj lhakapuʼal ni Cristo
xalakatʼun Akaya.
\v 6 Kʼamastʼakʼatʼik ni María yu ayaj tapatsal por
uxiknan.
\v 7 Kʼamastʼakʼatʼik Andrónico ali Junias yu kintʼamachaqan
yu ixkintatʼatanun laka pachʼin. Tachun ni lapanakni
yu jamalaqachal ni Jesús tus ox lakmispay ixlaʼatʼuykʼan.
Yuʼuncha pʼunaj talhakapuʼal ni Cristo ex astan kitʼin.
\v 8 Kʼamastʼakʼatʼik ni Amplias yu ikpaxkay tacha ixlapanaki
ni Jalhachimoʼonuʼ.
\v 9 Kʼamastʼakʼatʼik ni Urbano yu kintatʼatapatsayan
la ixlhitapatsa ni Cristo. Vachu kʼamastʼakʼatʼik Estakis
yu ikpaxkay.
\v 10 Kʼamastʼakʼatʼik Apeles, mispakan ni ox lhakapuʼan
ni Cristo. Kʼamastʼakʼatʼik ixlapanakni Aristóbulo.
\v 11 Kʼamastʼakʼatʼik Herodión yu kintʼamachaqaʼ. Kʼamastʼakʼatʼik
ixlapanakni Narsiso yu talhakapuʼan ni kiJalhachimoʼonukʼan.
\v 12 Kʼamastʼakʼatʼik Trifena ali Trifosa yu tatapatsay
kun kiJalhachimoʼonukʼan. Kʼamastʼakʼatʼik Pérsida yu
ox paxkayau. Yucha va lhuu lhitapatsa makaniy kiJalhachimoʼonukʼan.
\v 13 Kʼamastʼakʼatʼik Rufo yu laksakta kiJalhachimoʼonukʼan
y vachu ixnati yu va tacha kinati klaqtsʼin.
\v 14 Kʼamastʼakʼatʼik Asínkrito ali Flegonte ali Hermas
ali Patrobas ali Hermes y tachun yu jatʼalaqaunin yu
tavilanal kun yuʼuncha.
\v 15 Kʼamastʼakʼatʼik ni Filólogo ali Julia ali Nereo
kun ixtʼalapanaki, ali Olimpas ali tachun ixlapanakni
Dios yu tavilanal kun yuʼuncha.
\v 16 Kʼalamastʼakʼatʼik kun jamapayninti tacha paxtoqniy
ixlapanakni Dios. Tachun ixlapanakni Dios yu aniy tavilanal
tamastakʼaʼoyan.
\s Ni Pablo jalaqxtaqniy alati jatapastakʼati
\p
\v 17 Ketʼalaqaunin, klatapayniniyau ni kʼamakʼatʼik
kuenta ni lapanakni yu talaktʼilhiputunan, tamakay para
kamakʼauntʼijlatʼik milhakapuʼatkʼan. Yuʼuncha jantu
tamakay tacha yu lanitʼik uxiknan. Jantu chʼantaun kalaktʼaʼuntʼik.
\v 18 Yuʼuncha jantu tatapatsaniy ni Cristo kiJalhachimoʼonukʼan,
vamun tatapatsay para ixlaqʼamankʼan. Kilkʼus tachiviniy
y chuncha talakmakanuy ni lapanakni yu jantukaʼ ox tamalaqasiy.
\v 19 Tachun ni lapanakni takʼatsay ni ox lhakʼapʼupʼinatʼik,
xlhiyucha klhiʼachantajuy por uxiknankʼan. Ox kʼamispʼatʼik
makanan yu ox, jantu kʼalanitʼik yu jantu ox.
\v 20 Ni Dios yu oxamaktaun makanan, yucha niman kaʼakchʼintamayaʼ
ni Satanás la minchʼajakʼan. Katamapaynin kiJalhachimoʼonukʼan
Jesucristo.
\p
\v 21 Tamastakʼayan ni Timoteo yu kintʼatapatsay, vachu
Lucio ali Jasón ali Sosípater yu kintʼamachaqan.
\v 22 Kitʼin Tercio yu iktʼajun tsʼoqmulan ixchivinti
Pablo vachu klamastakʼayau tacha ixlapanaki kiJalhachimoʼonukʼan.
\p
\v 23 Tamastakʼayan ni Gayo. Kitʼin kPablo kvil la ixchaqaʼ.
Vachu tamastakʼayan tachun ixlapanakni Dios yu tataqxtoʼa
la ixchaqaʼ. Vachu tamastakʼayan Erasto yu maʼay xatumin
laka putaulan. Vachu tamastakʼayan ni Kuarto yu kintʼalaqajunkʼan.
\p
\v 24 Katamapaynin ni kiJalhachimoʼonukʼan Jesucristo.
\s Ni Pablo ay makay ni Dios
\p
\v 25 ¡Ay kamakakal ni Dios! Yucha lay tamapʼasniyan
para ox kʼalhakʼapʼupʼintʼik ni ox chivinti yu klaqputeʼey
yu lhichiviniy ni Jesucristo. Ni anchanuʼ chivinti mas
jantu ixmispakan tejkan aqtaynil ni lakamunukpaʼ
\v 26 va tus chavaykaʼ ni Dios masuy. Va masukan la
ixjatsʼoqnutkʼan ni lapanakni yu maqancha ixtalaqputeʼey
ixchivinti. Ni Dios yu alin mas va tavanancha, yucha
lhinaul va chuncha katamispal tachun ni lapanakni lakamunukpaʼ
para lay kataqalasmaklhi y katalhakapuʼal.
\v 27 Va taun ni Dios y vamun yuʼ lhitʼajun jatapastakʼati.
Va yucha ay kamakakal mas va tavanancha kaval por yu
makal ni Jesucristo. Va chuncha kavalcha.