\id 1CO
\h 1 CORINTIOS
\mt2 Yu Xapʼunaj Karta yu Jalaqtsʼoqnil Pablo Ixlapanakni Dios yu Tavilanal Corinto
\c 1
\s Ni Pablo jalakmastakʼay yu tavilanal laka putaulan Corinto
\p
\v 1 Kitʼin kPablo, ni Dios kilaksaklhi para kimalaqachal ni Jesucristo laqputeʼeniʼ ixchivinti. Vachu iktʼavil ni Sóstenes yu kilaqajkʼan.
\v 2 Klatsʼoqniyau uxiknankʼan yu ixlapanakni Dios untʼatʼik
yu vilanantʼik laka putaulan Corinto. Ni Cristo Jesús
tamaxtunin mintalaqalhinkʼan. Dios tajuntaʼin para ixlapanakni
kʼaʼuntʼik kun tachun yu ay tamakay ixtaqaʼuti kiJalhachimoʼonukʼan
Jesucristo mas va toʼoxtaycha kaval. Yucha ixJalhachimoʼonukʼan
ni yuʼuncha y vachu kiJalhachimoʼonukʼan.
\v 3 Katamapaynin y oxamaktamin katamakan kimPay Dioskʼan
ali kiJalhachimoʼonukʼan Jesucristo.
\p
\v 4 Va ikxtaqniʼalhiy lhimalaqpuchuncha ni Dios por
uxiknankʼan. Ni Dios tamapaynitan tejkan lhakʼapʼupʼintʼik
ni Jesucristo.
\v 5 Taʼaqtayjuyan ni ox kʼachʼivintʼik kun lhuu jatapastakʼati,
va talalhavanin la metsukuntikʼan.
\v 6 Xlhiyucha tasuy la metsukuntikʼan ni chivinti yu
klalhixaqalau ni Cristo va laqsaval.
\v 7 Ex chuncha jantu tuʼuchun tatsʼanqaniyan yu xtaʼa
Dios para kʼapʼutʼapʼatsʼanitʼik. Chuncha pʼakxanʼiyatʼik
tejkan katasuchoqoyaʼ kiJalhachimoʼonukʼan Jesucristo.
\v 8 Yucha katamapʼasniyan para jantu tuʼuchun laqtaqal
kamukʼanikʼantʼik ni anchanu julchan tejkan kaminchoqoyaʼ.
\v 9 Lay kʼalhakʼapʼupʼi ni Dios. Yucha tajuntaʼin para
chʼantaun katʼatʼiʼukxuntʼayatʼik Sasʼatʼa, yucha ni
Jesucristo kiJalhachimoʼonukʼan.
\s Laka putaulan Corinto va tatalaktʼilhil yu talhakapuʼan Dios
\p
\v 10 Klatapayniniyau, ketʼalaqaunin, la ixtaqaʼuti kiJalhachimoʼonukʼan
Jesucristo, va chʼantaun kʼaʼuntʼik, va jantu katʼalaktʼilhitʼik.
Va taun jatapastakʼati kʼamakʼachʼoʼotʼik, va aqstanchunin
kakʼatsʼantʼik.
\v 11 Kintamakʼatsanin ixlapanakni ni Cloé ni va tʼapʼutʼilhiyatʼik.
\v 12 Alin siya uxiknan lati yu tanajun va chʼantaun
tajunita kun kitʼin yu kPablo. Alati tanajun chʼantaun
tajunita kun Apolos. Alati tanajun va chʼantaun kun
Cefas. Alati tanajun va chʼantaun kun Cristo.
\v 13 ¿Chavay klalhisakmiyau incha ni Cristo va laktʼilhil?
Kitʼin Pablo jantu kakmakxtukmukʼakal laka kurus por
uxiknan. Vachu jantu kaʼaqchʼajʼautʼik la kintaqaʼuti
ni kitʼin.
\v 14 Ikxtaqniy lhimalaqpuchuncha ni Dios ni jantu xataʼayuʼ
uxiknankʼan kaklamaqchajʼavau, vamun ni Crispo ali Gayo.
\v 15 Chuncha jantu matichun lay najun va aqchajʼaul
la kintaqaʼuti.
\v 16 Vachu klaqmaqchajʼaval ixlapanakni ni Estéfanas.
Pero klhilay ni jantu matichun alati lapanakni kakmaqchajʼaval.
\v 17 Ni Cristo jantu kimalaqachal para kakmil jamaqchajʼavan,
va kimalaqachal para kakmil laqputeʼeniʼ yu ox chivinti.
Jantu klaqputeʼey kun kʼus chivinti yu minachal xajatapastakʼati
lapanakni. Chuncha jantu katsʼanqal ixtapʼasta ni chivinti
yu masuy yu tapasal Cristo laka kurus.
\s La ixjatsukunti ni Jesucristo tasuy ixtapʼasta ali ixjatapastakʼati ni Dios
\p
\v 18 Ni lapanakni yu tatsʼanqatʼajun, yuʼuncha talhilay
va lhitontoj ni chivinti yu lhichivinkan Cristo yu tacha
tapasal laka kurus. Pero kijnankʼan yu tʼaunau laqtaxtunin,
lhilayau va ixtapʼasta ni Dios.
\v 19 La ixchivinti Dios najun:
\q Kaklaktʼilhiʼoyaʼ ixjatapastakʼatkʼan yu lhuu jatapastakʼati
talhitʼajun.
\q Jantucha tuʼuchun xtapal kakmakayaʼ ixtalanitkʼan yu
talaniʼojota.
\p
\v 20 ¿Ex taʼayucha apalay lhuu jatapastakʼati lhitʼajun?
¿Taʼayucha apalay lhuu jatalaniti lhitʼajun? ¿Taʼayucha
ox lhichiviniy xajatapastakʼati ni lakamunukpaʼ? Dios
masuy ni xajatapastakʼati lakamunukpaʼ va lhitontoj.
\v 21 Ni Dios va lhuu ixjatapastakʼati. Xlhiyucha jamakal
xalapanakni lakamunukpaʼ ni jantu lay katamispal ni
yucha por ixjatapastakʼatkʼan. Mas va tacha lhitontoj
tasuy, ixnajun va kun ixlaqputeʼeka ixchivinti katapulaqtaxtul
yu talhakapuʼan.
\v 22 Yu israelitas taskʼin para katalaqtsʼil yu masuy
ixtapʼasta Dios. Yu griegos talaqtsʼinputun yu lhuu
jatapastakʼati.
\v 23 Pero kijnankʼan klaqputeʼeyau ni makxtukmukʼakal
ni Cristo laka kurus. Yucha jantu taqasmakputun ni israelitas,
va jantu ox talaqtsʼin yu tacha nil. Yu alati lapanakni
jantu taqasmakputun, talhilay va lhitontoj.
\v 24 Pero kijnankʼan yu Dios kintalaksakni, mas va israelitas
o mas va griegos, lhakapuʼanau yu tapasal Cristo yucha
masuy ixtapʼasta ali ixjatapastakʼati ni Dios.
\v 25 Yu makal Dios, mas tasuy va tacha lhitontoj, yucha
va makal kun apalay lhuu jatapastakʼati jantu tacha
ixjatapastakʼatkʼan lapanakni. Mas tasuy va tacha jantu
kalhitsukul tapʼasta, va makal kun apalay lhuu tapʼasta,
jantu tacha ixtapʼastakʼan lapanakni.
\p
\v 26 Ketʼalaqaunin, kʼamakʼatʼik kuenta ni va Dios talaksakni
mas jantu qaynlhuu ni uxiknan kʼalhitsʼukʼutʼik ay jatapastakʼati
ni aniy lakamunukpaʼ. Jantu qaynlhuu uxiknan laqlaqapʼays
lapanakni kʼaʼuntʼik. Jantu qaynlhuu kʼapʼutsʼukʼutʼik
tacha lajʼay lapanakni.
\v 27 Yu tacha laktontos aniy lakamunukpaʼ yuʼuncha
jalaksaklhi Dios para kalakmamaxanikal ni lapanakni
yu lhuu jatapastakʼati talhitʼajun. Yu jantu laqpʼays
lapanakni kataval yuʼuncha jalaksaklhi Dios para kalakmamaxanikal
ni lapanakni yu laqpʼaysnin.
\v 28 Dios jalaksaklhi yu jantu laktoʼoyakan aniy lakamunukpaʼ
ali yu jantu jalaqtsʼinputunkan. Va jalaksaklhi lapanakni
yu jantu tuʼuchun kataval para kaxajchal ni jantucha
tuʼuchun xtapal kataval yu lajʼay lapanakni.
\v 29 Ex chuncha jantu matichun lapanaki ay kamakakal
la ixlakaʼukxpu ni Dios.
\v 30 Yucha tamakan chʼantaun kun Jesucristo. La ixjatsukunti
ni Cristo Jesús kintaxtaqnitan jatapastakʼati. Por yu
makal ni Cristo, ox kintalaqtsʼinan ni Dios, va ixlapanakni
Dios juntau, y va kintamalaqtaxtutan.
\v 31 Xlhiyucha va tsʼoqkanta la ixchivinti Dios taʼan
najun: “Taʼayuʼ ay kʼatsanputun, va ay kakʼatsal por
yu makal ni Dios.”
\c 2
\s Ni Pablo laqputeʼey ni makxtukmukʼakal laka kurus ni Cristo
\p
\v 1 Ketʼalaqaunin, tejkan klakilaqputeʼeniu ixchivinti
Dios yu ixmaqsaqmakakantacha, jantu aqtaun kakchivinil
kun lajkʼus ali lajʼay chivinti.
\v 2 Tejkan klalaqkilau xaknajun katanul la kijatapastakʼati
vamun ni Jesucristo yu makxtukmukʼakal laka kurus.
\v 3 Jantu kaklatʼataulau kun tapʼasta. Kitʼin ayaj
xaktalhanan tus xajkaxkapʼiknin.
\v 4 Tejkan klakilaqputeʼeniu ni ox chivinti jantu kakmapatsal
lajʼay chivinti kun lhuu jatapastakʼati para kalaʼaʼitʼik.
Va klamasuniu kun ixtapʼasta ni Espíritu Santo.
\v 5 Va knajun jantu kʼalhakʼapʼupʼintʼik por ixjatapastakʼatkʼan
lapanakni. Va kʼalhakʼapʼupʼintʼik por mispʼatʼik ixtapʼasta
ni Dios.
\s Yu laqsaval ixjatapastakʼati ni Dios kintamasuniyan ni Espíritu Santo
\p
\v 6 Laqsaval klaqxaqalayau kun lhuu jatapastakʼati
yu oxicha talhakapuʼanta pero jantu kun yu xajatapastakʼati
aniy lakamunukpaʼ. Vachu jantu ikmapatsayau ixjatapastakʼatkʼan
yu talhachimoʼonun ni aniy lakamunukpaʼ yu katalaqmixaʼ.
\v 7 Va klhichivinanau ixjatapastakʼati Dios. Ni aniy
jatapastakʼati jantu ixtasuy, va ixmaqsaqmakakanta. Yucha
va yu pastaklhi ni Dios tejkan jantukaʼ ixʼalin lakamunukpaʼ.
Chuncha lhinaul ni Dios para astan lajʼay kalhixajchaʼau
ni kijnan.
\v 8 Ni anchanu jatapastakʼati jantu katamispal ni lapanakni
yu talhachimoʼonun aniy lakamunukpaʼ. Yu va ixtamispal
ex jantu ixtamakxtukmukʼal ni Cristo yu la ay Jalhachimoʼonu.
\v 9 Va tsʼoqkanta la ixchivinti Dios yu najun:
\q Dios laʼoxita tuʼuchun para yu lapanakni yu taʼachaniy,
\q va taun tuʼuchun yu ox yu jantukaʼ matichun laqtsʼin,
nisin qasmatʼa.
\q Vachuʼ jantu matichun lay pastakʼa tacha junita ni
anchanu yu ayaj ox.
\p
\v 10 Pero ni kijnankʼan Dios kintamasunin kun ni Espíritu
Santo. Ni Espíritu Santo puxkauʼojoy tachun yu paxtoqniy
ni Dios, tus tachun puxkaulaqtsʼin.
\v 11 Jantu matichun lapanaki lay ox mispaniy tacha
pastakʼa ataun lapanaki. Vamun ixlhitsukunuʼ ni anchanu
lapanaki mispaniy tacha ixjatapastakʼati. Ex vachu va
chun jantu matichun lay mispaniy ixjatapastakʼati ni
Dios. Vamun ixʼEspíritu ni Dios lay mispaniy.
\v 12 Pero kijnankʼan jantu kalaqaʼiu yu xaʼespíritu
lakamunukpaʼ. Va laqaʼiu ixʼEspíritu ni Dios para lay
kamispau yu kintaxtaqnin por ixjamapayninti.
\v 13 Ex chuncha klhilakchivinanau yu aniy jantu kun
chivinti yu minachal ixjatapastakʼatkʼan lapanakni.
Va kun chivinti yu kintamasuniyan ni Espíritu Santo.
Chuncha klakmasuniyau ni lapanakni yu talhitʼajun ni
Espíritu, ikmasuniyau yu makay ni Espíritu.
\v 14 Pero yu valiʼiy lapanakni, yuʼuncha jantu lay talaqaʼiy
yu xtaʼa ixʼEspíritu ni Dios. Talhilay va lhitontoj
y jantu lay tamalaqasiy. Yucha lay malaqasikan vamun
kun ni Espíritu Santo.
\v 15 Ni lapanakni yu talhitʼajun ni Espíritu Santo,
yuʼuncha lay tapuxkaulaqtsʼin tachun. Pero jantu matichun
lay puxkaulaqtsʼin qayntaun yu lhitʼajun ni Espíritu
Santo.
\v 16 Va tsʼoqkanta la ixchivinti Dios, najun: “¿Taʼayucha
lay mispay ixjatapastakʼati ni Dios? ¿Taʼayucha lay
jamalaniy ni Dios?” Pero kijnankʼan lhitʼaunau ixjatapastakʼati
ni Cristo.
\c 3
\s Ni Pablo ali Apolos chʼantaun tatapatsaniy ni Dios
\p
\v 1 Ex chuncha, ketʼalaqaunin, kitʼin jantu lay kaklaxaqalau
tacha lapanakni yu ox tamispay ni Espíritu Santo. Maqskʼiniy
kaklaxaqalau tacha valiʼiy lapanakni. Uxiknan la metsukuntikʼan
kun Cristo va tacha lakstʼuniy jasʼatʼan untʼatʼik yu
jantukaʼ maqan tatsukuy.
\v 2 Klaxaqalau kun chivinti yu jantu lhitaʼay kaval,
va tacha ixmatsʼikʼika lakatʼuniy jasʼatʼa. Jantu kaklaxtaqniu
jatapastakʼati yu tacha pʼays vakax. Va klalaqtsʼiu
tacha jantukaʼ lay kʼalaʼaʼitʼik.
\v 3 Vananaj chun layatʼik tacha yu valiʼiy lapanakni.
Vananaj laʼakchʼipʼiniyatʼik y lalaqʼaymayatʼik. Vananaj
tʼiʼukxuntʼayayatʼik tacha talay yu valiʼiy lapanakni.
\v 4 Qayntaun najun: “Kitʼin chʼantaun kunita kun Pablo.”
Aqayntaun najun: “Kitʼin chʼantaun kunita kun Apolos.”
Ex chuncha tʼalaktʼilhitʼik tacha talay yu valiʼiy lapanakni.
\v 5 ¿Ex taʼayucha ni Pablo? ¿Taʼayucha ni Apolos? Vamun
iktapatsaniyau Dios para kʼalhakʼapʼupʼintʼik. Kintaxtaqnin
siya tumpaj kilhitapatskʼan ni Dios.
\v 6 Tejkan klalaqputeʼeniu, va tacha ikchʼal yu ox chivinti
la metsukuntikʼan. Astan ni Apolos va tacha kalajʼaval.
Pero va Dios yu maʼayal.
\v 7 Yu chʼan ali yu lajʼavay jantu tuʼuchun kataval,
vamun ni Dios yu maʼayay.
\v 8 Yu chʼan ali yu lajʼavay va chʼantaun tatapatsay.
Siya tumpaj katalaqaʼiyaʼ ixlhilhajatkʼan por ixlhitapatskʼan
yu katamakal.
\v 9 Va chʼantaun iktapatsaniyau ni Dios. Uxiknankʼan
va tacha ixkuxtu ni Dios untʼatʼik.
\p Vachuʼ untʼatʼik tacha ixchaqaʼ ni Dios.
\v 10 Va por ixjamapayninti ni Dios va kilhijunil kaktapatsal
la metsukuntikʼan tacha qayntaun yu ox makay chaqaʼ.
Chuncha klamakaniu yu xaputayan tejkan kʼaqtaynil ni
lhitapatsa kun uxiknankʼan. Chavaycha aqayntaun makay
yu tsʼanqay. Pero qayntamin yu tatapatsay maqskʼiniy
katakʼatsal tacha katamakalcha ni aniy chaqaʼ.
\v 11 Jantu lay matichun tamakaniyan ataun xaputayan
la milhakapuʼatkʼan. Vamun taun xaputayan alin, yucha
va Jesucristo.
\v 12 Incha ox tamasuniyan para ox katʼaylhipʼintʼik
la milhakapuʼatkʼan ex kaxajtachal tacha chaqaʼ yu kalhimakakal
oro ali plata ali yu la kʼuliksnaʼ chiyux. Incha jantu,
ex kaxajtachal valiʼiy kʼiu ali jatsʼin yu lay xajuy.
\v 13 Astan katasuyaʼ kilhitapatsakʼan. Ni anchanu julchan
katasuyaʼ tisuncha yu jamakanti ni chaqaʼ, incha la ox
kilhitapatskʼan por qayntamin. Va kun jikmi katasuyaʼ.
\v 14 Tachun ox lhitapatsa katayaniyaʼ ni anchanu julchan.
Yu xamakanaʼ kalaqaʼiyaʼ ixlhilhajati.
\v 15 Pero tachun lhitapatsa yu jantu ox kaval, yucha
kalaqxavakanaʼ. Yu xamakanaʼ kajamaqatsʼanqaʼoyaʼ pero
kalaqtaxtuyaʼ mas ixlhitapatsa katsʼanqayaʼ laka jikmi.
\v 16 ¿Jantu kʼatsʼayatʼik ni uxiknankʼan untʼatʼik
tacha laqataun chaqaʼ taʼan vil ni Dios? Vachu ixʼEspíritu
Dios tatʼavilanan chʼantaun kun uxiknankʼan.
\v 17 Incha matichun kalaqlvaqlhi ixlapanakni Dios, yucha
laqlvaʼa ni chaqaʼ taʼan vil ni Dios. Ex ni Dios kamamiʼoniyaʼ
anchanu lapanaki. Ni chaqaʼ taʼan vil ni Dios va yucha
ixnavin y uxiknankʼan ni anchanu chaqaʼ untʼatʼik.
\p
\v 18 Jantu kʼamakʼanukʼantʼik milaqʼamankʼan. Incha
xataʼayuʼ uxiknan kakʼatsal tacha la lhuu jatapastakʼati
kalhitsukul, apalay ox kajunchoqol tacha tontoj laqtsʼinkan
aniy lakamunukpaʼ. Ex lay kalhitsukul yu laqsaval jatapastakʼati.
\v 19 Yu xajatalakpastakʼati aniy lakamunukpaʼ, yucha
ni Dios laqtsʼin va puro lhitontoj. Va tsʼoqkanta la
ixchivinti Dios, najun: “Dios jalaktanchaniy yu ayaj
tamispay takʼatsan.”
\v 20 Vachu najun: “Ni Jalhachimoʼonu Dios mispay ixjatapastakʼatkʼan
ni lapanakni yu ayaj talakpastaknan. Va jalaqtsʼin tacha
jantu tuʼuchun xtapal.”
\v 21 Ex chuncha jantu matichun ay kakʼatsal por yu
makay aqayntaun lapanaki yu ixjamalaniniʼ. Kinchuxkʼan
va si minavinkʼan.
\v 22 Mas kitʼin kPablo, mas Apolos, mas Pedro, va minavinkʼan
kuntau. Vachuʼ mas yu lakamunukpaʼ, yu jatsukunti, yu
lhinin, yu alin chavaycha, yu kaʼalinakaʼ, tachun va si
minavinkʼan.
\v 23 Uxiknankʼan ixnavin Cristo untʼatʼik y yucha ixnavin
ni Dios.
\c 4
\s Ixlhitapatsakʼan yu jamalaqachal Jesucristo
\p
\v 1 Maqskʼiniy kilamispau tacha ixʼoqxtamatin Cristo.
Va kintapaxtoqniyan ixlaqputeʼeka ni ox chivinti yu
Dios ixmaqsaqmaʼata.
\v 2 Chuncha ni lapanaki yu paxtoqniy taun lhitapatsa
maqskʼiniy lay kalhiʼaynkal ni ox kamakayaʼ.
\v 3 Ni kitʼin jantu tuʼuchun kimpastakʼuy mas kilapuxkaulaqtsʼinau
u mas va taʼayucha yu valiʼiy lapanaki kaval yu kimpuxkaulaqtsʼin.
Mas kitʼin jantu ikpuxkaulaqtsʼinkan keʼeman.
\v 4 Kitʼin ijkʼatsan ni jantu tuʼuchun laqtaqal kaklhitsukul
kun uxiknan. Pero mas ox ijkʼatsan, yucha jantu tuʼuchun
naunputun. Vamun ni Dios paxtoqniy kimpuxkaulaqtsʼil.
\v 5 Chavaycha jantukaʼ paxtoqniy matichun lapanaki
kamukʼanil laqtaqal aqayntaun. Kapʼakxanapitik tus tejkan
kaminchoqol ni Jalhachimoʼonu Jesucristo. Yucha kamasuyaʼ
tachun yu maqsaqmakakanta. Ex kamispakanaʼ ixjatapastakʼatkʼan
ni lapanakni. Vachu ni Dios ox kalaklhichivinanaʼ ni
lapanakni tacha tapaxtoqniy.
\p
\v 6 Ex chuncha, ketʼalaqaunin, klhichiviniy ni Apolos
y vachu klhichivinkan keʼeman para kalanitʼik ni jantu
maqskʼiniy kʼalapʼasatʼik yu tsʼoqkanta la ixchivinti
Dios. Ex jantu ay kakʼatsʼantʼik por yu kamakal qayntaun
y jantu kʼalaktʼanchʼanitʼik yu aqayntaun.
\v 7 ¿Taʼayucha talaqtsʼinan tacha apalay ay kʼaʼuntʼik
xajantu yu alati? Tachun yu lhitʼaunatʼik va Dios taxtaqnitan.
Incha chuncha laʼaʼitʼik ex jantu paxtoqniy lajʼay kʼamakʼakʼantʼik
meʼemankʼan.
\p
\v 8 Kʼatsʼanatʼik tacha jantu tuʼuchun katatsʼanqanin,
tacha maʼalinin. Kʼatsʼanatʼik tacha lajʼay lhachimoʼonun
kʼaʼuntʼik. Kitʼin iknajun va chuncha kʼaʼuntʼik, ex
va chʼantaun kaklatʼalhachimoʼonuu.
\v 9 Ni kijnan yu kintamalaqachan ni Jesucristo, kitʼin
klhilay ni Dios kintamakan yu apalay lakstʼuniy. Va
tacha kakxtaqnikau jamaqanlqajnati tus kakniu. Chuncha
tachun ixmayulnin ni Dios kun tachun ni lapanakni kintalaqtsʼinan
tacha ayaj tumpaj kimputsukukʼan.
\v 10 Kijnankʼan va tacha tontos kintalaqtsʼinan por
klhichiviniyau Cristo. Mas uxiknan talaqtsʼinan tacha
ayaj kalakpʼastʼaknantʼik por lhakʼapʼupʼintʼik Cristo.
Kijnankʼan va tacha jantu kaklhitsukuu tapʼasta, uxiknankʼan
talaqtsʼinan tacha laqpʼaysnin lapanakni. Kijnankʼan
jantu klhiʼaynkanau pero uxiknankʼan laktʼoʼoyakʼanatʼik.
\v 11 Tacha chavaycha vananaj ikmaqanlqajnanau por kivaytkʼan.
Vachu ikpukikxixau y jantu klhitsukuyau laqchʼiti. Ni
lapanakni va taxtuj kintamakayan y vachu jantu tʼujuʼ
kinchaqakʼan.
\v 12 Ayaj iktapatsayau la kintamakakʼan. Va iknaunau
ox katatapasal ni lapanakni yu kintalaktuʼuyan. Tejkan
kintamamaqanlqajnivayan va iktayaniyau.
\v 13 Jantu ox kintalhichivinanan pero ox klaktʼachivinanau.
Kintalaqtsʼinan tacha xajamakxtal aniy lakamunukpaʼ
y tacha yu xapʼoqxni ni lapanakni. Chuncha kintamakayan
mas va chavaycha.
\s Ni Pablo jalaqxaqalay tacha sasʼatʼan
\p
\v 14 Jantu klatsʼoqniyau yu aniy para kʼamaxanantʼik.
Klaʼachaniyau tacha kesʼatʼan kʼaʼuntʼik, xlhiyucha va
klaxtaqniputunau ox jatapastakʼati.
\v 15 Mas kʼalhitsʼukʼutʼik laqakau mil lapanakni yu
katamalanin la metsukuntikʼan kun Cristo, jantu kʼalhitsʼukʼutʼik
pumalhuu japayan. Kitʼin ikval tacha mimpaykʼan. Tejkan
lhakʼapʼupʼinatʼik Cristo va por kitʼin yu klalaqputeʼeniu
yu ox chivinti.
\v 16 Xlhiyucha klalhijunau ni chuncha kalatʼik tacha
kitʼin.
\v 17 Xlhiyucha klamalaqachaniucha ni Timoteo yu kʼachaniy
tacha kesʼatʼa por lhakapuʼal ni Jalhachimoʼonu Jesucristo.
Yucha katamapastakniyan tacha kitʼin iktiʼukxuntayay
kun Cristo. Chuncha tacha yu ikmasuy talakachux taʼan
alin yu talhakapuʼan.
\v 18 Lati lajʼay kʼatsʼanatʼik, va lhilayatʼik jantucha
aqtaun kaklalaqʼanau.
\v 19 Pero niman kaklalaqʼanau incha Dios najun. Ex
va aqtaun kaklaqtsʼinaʼ ni lapanakni yu lajʼay takʼatsan,
incha laqsaval alin ixtapʼastkʼan tacha tanajun.
\v 20 Ni Dios yucha lhachimoʼonun jantu vamun kun chivinti,
va lhachimoʼonun kun tapʼasta.
\v 21 Tas naunatʼik, ¿klalaqʼantachaʼau para kaklamamaqanlqajnivau
u kʼantachal laqa achati kun jamapayninti?
\c 5
\s Qayntaun yu vil Corinto makay ay laqtaqal
\p
\v 1 Tanajun ni xaqayntaun ni uxiknan va tʼatamay yu
jantu ixnavin kaval. Chuncha makay taun laqtaqal yu
jantu taks chun tamakay mas yu valiʼiy lapanakni. Va
tʼatsukuchoqoy ixtʼunati.
\v 2 Uxiknankʼan ayaj lajʼay makʼakʼanatʼik pero maqskʼiniy
kalhamaʼaninintʼik y kanaqxtʼutʼik.
\v 3 Mas jantu klatʼataulau la kilakatunaj pero laqsaval
klatʼataulau la kijatapastakʼati. Ex chavay ikmukʼaniy
ixmaqanlqajnati, chuncha ikmakay vachu va tacha klatʼataulau.
\v 4 Tejkan katʼaqxtʼoqyapitik la ixtaqaʼuti ni Jalhachimoʼonu
Jesús kitʼin klatʼataulau la kijatapastakʼati kun ixtapʼasta
ni Jesús kiJalhachimoʼonukʼan.
\v 5 Ex chuncha ni anchanu lapanaki kʼamaqxtʼaqniyapitik
ni Satanás. Ex chuncha mas va kanil yu jantu ox la ixlakatunaj,
yucha kalaqtaxtuyaʼ la ixlhitsukunuʼ ni anchanu julchan
tejkan kaminchoqoyaʼ ni Jesús.
\p
\v 6 Jantu ox ni ay makʼakʼanatʼik. ¿Jantu kʼatsʼayatʼik
ni lakatsʼuniy levadura tus laqlhitayaʼojoy ni harina?
\v 7 Yu aniy yu tapasay vachu va tacha ni levadura.
Ex chuncha kʼatʼanʼalhutʼikcha ni levadura yu jantucha
ox, para laqsastʼin kʼaʼuntʼik. Laqsaval makʼakʼanatʼik
tacha pan yu jantu lhiyaukan levadura yu ukan xakʼatan
Paxku. Chuncha kintapaxtoqniyan kijnankʼan yu ixlapanakni
ni Cristo juntau. Yucha nil por kijnankʼan y chuncha
val tacha laqataun sasʼatʼa borrego yu maqnikan tejkan
xakʼatan Paxku.
\v 8 Ex chuncha katiʼukxuntayau tacha kamakau ni anchanu
xakʼatan Paxku. Va tacha jantu kalhitayal yu maqaniya
levadura la ketsukuntikʼan, yu va jalaktuʼunti kun laqtaqal.
Va katiʼukxuntayau tacha pan yu jantu lhiyaukan levadura
y chuncha ox kaval kijatapastakʼatkʼan y vas kaʼukxpuʼal
ketsukuntikʼan.
\p
\v 9 Tejkan klatsʼoqniu laka karta va klajuniu jantu
katʼatʼiʼukxuntʼayatʼik yu tatʼatamay yu jantu ixnavinkʼan.
\v 10 Pero jantu xaklaklhichiviniy yu valiʼiy lapanakni
yu tamakay laqtaqal, yu taʼakchaʼan, yu taʼalhavanan, yu
tatoʼoyay antivas. Si kʼalaktʼatʼaulapitik ni yuʼuncha,
incha jantu katʼaxtʼuyapitik yu lakamunukpaʼ.
\v 11 Yu kitʼin xaklhichiviniy va jantu katʼatʼiʼukxuntʼayatʼik
kun lapanakni yu tanajun va milaqaj por lhakapuʼan ni
Cristo pero jantu tamakauntijlaputun ixtalaqalhinkʼan.
Lati tatʼatamay yu jantu ixnavinkʼan, lati taʼakchaʼan,
lati tatoʼoyay antivas, lati talaklkanan, lati tataʼapʼanin,
lati taʼalhavanan. Va iknajun nisin katʼavayntʼik.
\v 12 Jantu kimpaxtoqniy kakmukʼanil laqtaqal yu jantu
lhakapuʼan. Va yu talhakapuʼan, va yuʼuncha maqskʼiniy
kalakpʼuxkʼaulaqtsʼintʼik.
\v 13 Yu jantu talhakapuʼan, yuʼuncha Dios lakmukʼaniy
ixlaqtaqalkʼan. Pero uxiknan maqskʼiniy kʼamaxtʼutʼik
ni anchanu yu maqtaqalhinin para jantucha katanul kun
uxiknan.
\c 6
\s Tejkan alin lhilukuj siya yu talhakapuʼan, jantu kalaqpʼintʼik yu jantu talhakapuʼan para katalaʼoxil
\p
\v 1 Tejkan mintʼalaqajunkʼan tamakaniyan laqtaqal ¿valiʼiycha
laqpʼinatʼik lhachimoʼonun yu jantu tamispay Dios y
jantu laqpʼinatʼik yu ixlapanakni Dios?
\v 2 ¿Jantu kʼatsʼayatʼik yu ixlapanakni Dios katalhachimoʼonunaʼ
aniy lakamunukpaʼ? Incha uxiknan kʼapʼuxkʼaulaqtsʼinapitik
xalapanakni aniy lakamunukpaʼ, ¿ex valiʼiycha jantu lay
kalaʼoxitʼik lhilukuj yu jantu lhitaʼay kaval?
\v 3 Mas ixmayulnin Dios kapuxkaulaqtsʼinau. ¿Ex tas
lhijantucha kalal kapuxkaulaqtsʼiu yu tapasay aniy la
ketsukuntikʼan?
\v 4 Ex chuncha tejkan lhitsʼukʼuyatʼik lhilukuj siya
uxiknan yu lhakʼapʼupʼinatʼik, ¿valiʼiycha laqpʼinatʼik
lhachimoʼonun yu jantu tuʼuchun kataval kun yu ixlapanakni
Dios?
\v 5 Chuncha klajunau para klamamaxaniu. Ka alin matichun
kun uxiknan yu apalay kalhitsukul jatapastakʼati para
lay kalaqlaʼoxil lhilukuj siya jatʼalaqaunin.
\v 6 Pero alin lhilukuj siya jatʼalaqaunin, y uxiknan
laqpʼinatʼik yu jantu talhakapuʼan para katalaʼoxil.
\p
\v 7 Laqsaval jantu ox tejkan lachʼivintʼanuniyatʼik
kun jalhachimoʼonun. Apalay ox kaval katʼayanitʼik tejkan
milaqajkʼan tamakaniyan tuʼuchun laqtaqal u tejkan tuʼuchun
taʼalhauniyan.
\v 8 Pero uxiknan ayaj makʼaniyatʼik laqtaqal y laʼalhauniyatʼik
siya uxiknankʼan mas va tʼalaqaunin.
\p
\v 9 ¿Jantu kʼatsʼayatʼik ni yu talaktuʼunun jantu katatanuyanta
taʼan jalhachimoʼonun ni Dios? Jantu kʼalakmakʼanukʼantʼik.
Tachun yu tatʼatamay lapanakni yu jantu ixnavinkʼan
kataval, ali yu tatoʼoyay antivas ali yu tamaqantivinin,
ali yu joʼakna yu talatʼatamay ixtʼajoʼaknakʼan
\v 10 ali yu alhavanan ali yu taʼakchaʼan ali yu taʼapʼanin
ali yu jalaklkanan ali yu tamakanuxtuy tumin, yuʼuncha
jantu katatanuyanta taʼan jalhachimoʼonun ni Dios.
\v 11 Chuncha ixʼuntʼatʼik xalati ni uxiknan. Pero chavaycha
xakʼanikʼantʼatʼikcha mintalaqalhinkʼan, ixlapanakni
Dios untʼatʼik. Dios ox talaqtsʼinan por yu makal ni
Jalhachimoʼonuʼ Jesucristo, vachu por yu makal ixʼEspíritu
Santo.
\s Katʼoʼoyatʼik Dios la milakatunajkʼan
\p
\v 12 Lati tanajun ni lay kʼamakʼatʼi va yu kamakʼapʼutʼucha.
Pero kitʼin iknajun jantu tachun xtapal. Tanajun ni
lay kʼamakʼatʼi va yu kamakʼapʼutʼucha. Pero kitʼin
jantu ikxtaqniy lakatin para kimaqalhajal yu jantu ox.
\v 13 Tejkan vaynau vamun para kimpajankʼan y yu kimpajankʼan
vamun para kavajiu. Va yu laʼatʼuy ni Dios kamamiʼoniyaʼ.
Pero kilakatunajkʼan jantu kaval para katʼatamau yu
jantu kinavinkʼan. Ni kilakatunajkʼan va para kalhitoʼoyau
kiJalhachimoʼonukʼan Jesucristo y yucha kintaʼaqtayjuyan
la kilakatunajkʼan.
\v 14 Ni Dios majkujuchoqol kiJalhachimoʼonukʼan tejkan
ixnitacha. Ex vachu chuncha kintamajkujuchoqoyan kun
ixtapʼasta.
\v 15 ¿Jantu kʼatsʼayatʼik ni milakatunajkʼan va chʼantaun
junita kun Cristo? Chuncha incha kilakatunaj chʼantaun
junita kun Cristo ex jantu lay kakxtaqnil kilakatunaj
qayntaun xanati yu jalaktʼatamay joʼakna. Jantu aqtaun
chuncha kaval.
\v 16 ¿Jantu kʼatsʼayatʼik tejkan matichun lapanaki
chʼantaun tʼajun kun qayntaun xanati va laqataun lakatunaj
tajun? Va tsʼoqkanta la ixchivinti Dios, najun: “Yu
ixlaʼatʼuykʼan va laqataun lakatunaj katajunaʼ.”
\v 17 Matichun yu chʼantaun tʼajun kun ni Jesucristo
va laqataun jun ixlhitsukunukʼan.
\v 18 Kʼamakʼauntʼijlatʼik ixtʼatamaka yu jantu minavinkʼan
kaval. Yu alati laqtaqal yu tamakay lapanakni jantu
laqalhiy ixlakatunajkʼan. Pero yu tatʼatamay yu jantu
ixnavinkʼan, yuʼuncha tamakay laqtaqal yu talaqalhiy
ixlakatunajkʼan.
\v 19 ¿Jantu kʼatsʼayatʼik ni milakatunajkʼan va tacha
taun chaqaʼ taʼan vil ni Espíritu Santo yu Dios taxtaqnin?
Milakatunajkʼan jantu minavinkʼan kaval.
\v 20 Ni Dios taʼitan. Xlhiyucha maqskʼiniy katʼoʼoyatʼik
ni Dios kun milakatunajkʼan.
\c 7
\s Ni Pablo lhichiviniy yu lakxtuklati
\p
\v 1 Chavaycha klajunchoqoyaucha yu kilalhisakmiu la
minkartajkʼan incha qayntaun tsʼal apalay ox kaval jantu
kalakxtuklal.
\v 2 Apalay ox ni xapaynin katalhitsukul qayntamin ixanatikʼan.
Vachu yu xanatin katalhitsukul qayntamin ixapaykʼan
para jantu katatʼatamal yu jantu ixnavinkʼan.
\v 3 Tejkan talakxtuklatacha, yu xapay maqskʼiniy kaxtaqnil
ixlakatunaj ixanati. Vachu yu xanati maqskʼiniy kaxtaqnil
ixlakatunaj ixapay.
\v 4 Yu ixlakatunaj ni xanati va ixnavin ni xapay y
yu ixlakatunaj ni xapay va ixnavin ni xanati.
\v 5 Jantu kʼalalaktʼanchʼanitʼik para kʼalaʼaqchʼapʼatʼik.
Vamun incha milaʼatʼuykʼan va chʼantaun makʼayatʼik
mijatapastakʼatkʼan ni jantu kalaʼaqchʼapʼatʼik va por
tapastakʼuyan ni vamun iskʼinka Dios. Pero jantu paqlhuu
kaval, va kalatʼatʼamachʼoʼotʼik. Chuncha para yu Satanás
jantu katamanunin jatapastakʼati para kʼamakʼatʼik laqtaqal.
\v 6 Jantu klalhijunau laqatapʼasta ni kʼalakxtʼuklatʼik.
\v 7 Va iknajun tachun ni lapanakni va tacha kitʼin
kataval. Pero qayntamin si putamin maqxtaqnil Dios, va
si tumpaj kintamakan.
\p
\v 8 Klajunau ni ox kaval yu jantukaʼ talakxtuklay ali
yu tiyaunin chuncha katatamakaul tacha kitʼin.
\v 9 Pero incha jantu lay katʼiʼuntʼayatʼik valiʼiy
chuncha, ex apalay ox kʼalakxtʼuklatʼik. Apalay ox kʼalakxtʼuklatʼik
para jantu vamun yucha kapʼastʼaklhitsʼukʼutʼik la melhanutkʼan.
\v 10 Uxiknan yu lakxtʼuklatʼatʼik, va klalhijunau ni
yu xanatin jantu valiʼiy katamakauntijlal ixapaykʼan.
Yucha jantu keʼeman iknajun, va chuncha naul kiJalhachimoʼonukʼan
Jesucristo.
\v 11 Pero incha matichun xanati kamakauntijlal ixapay,
ex va katijuntayal ixʼaman u katʼatsukuchoqol ixapay.
Vachu yu xapay jantu valiʼiy kamakauntijlal ixanati.
\p
\v 12 Yu alati uxiknan, mas jantu chuncha kanaul ni Jesucristo,
kitʼin klajunau tacha kʼamakʼatʼik tejkan qayntaun xapay
lhakapuʼan ni Cristo pero ixanati jantu lhakapuʼan.
Incha yu xanati taylhaʼanputun katʼataulal ex yu xapay
jantu lay kamakauntijlal.
\v 13 Vachu chun tejkan qayntaun xanati yu lhakapuʼan
ni Cristo pero ixapay jantu lhakapuʼan. Incha yu xapay
taylhaʼanputun katʼataulal ex yu xanati jantu kamakauntijlal.
\v 14 Incha yu xaxapay jantu lhakapuʼan vachu lay kunaʼ
ixlapanaki Dios por ixanati. Vachu incha xaxanati jantu
lhakapuʼan ex vachu ixlapanaki Dios lay kunaʼ por ixapay.
Incha jantu chuncha katʼaylhipʼi kun mixapay u mixanati,
ex yu mesʼatʼan tacha valiʼiy lapanakni kataval. Pero
chuncha va si ixlapanakni Dios tajunita.
\v 15 Pero incha yu jantu lhakapuʼan jamakauntijlananputun,
ex chuncha kavalcha. Ex yu lhakapuʼan lay tamakajun
oxamaktaun. Yu Dios kintalhijunin katsukuu oxamaktaun.
\v 16 Porke uxintʼi yu xanati kʼatʼi, jantu kʼatsʼay
yu katapasayaʼ. Ka va lay mixapay kalaqtaxtuyaʼ por
uxintʼi. Vachuʼ, uxintʼi yu xapay kʼatʼi, ka va lay mixanati
kalaqtaxtuyaʼ por uxintʼi.
\s Katʼatʼiʼukxuntʼayapitik tacha ni Jalhachimoʼonuʼ tamaqxtaqnin
\p
\v 17 Chuncha katʼatʼiʼukxuntʼayapitik tacha ni Jalhachimoʼonu
Jesucristo tamaqxtaqnin, tacha untʼatʼik tejkan yu Dios
tajuntaʼin para kʼalhakʼapʼupʼintʼik. Chuncha ikmasuy
ni kitʼin mas va toʼoxtaycha taʼan tataqxtoʼa yu talhakapuʼan.
\v 18 Incha matichun xvililichukʼupʼuxnikantacha tejkan
lhakapuʼal ex yucha jantu maqskʼiniy kamapaxal yu ixmakanikanta.
Incha matichun jantu kaxvililichukʼupʼuxnikal tejkan
lhakapuʼal ex yucha jantu maqskʼiniy kaxvililichukʼupʼuxnikal.
\v 19 Jantu maqskʼiniy licha va kaxvililichʼukʼupʼuxnikʼa
u jantu. Yu maqskʼiniy va kʼamakʼatʼi tacha lhinajun
ni Dios.
\v 20 Va taʼayucha kaval, va kataylhaʼal tacha ixjunita
tejkan Dios juntaʼil para kalhakapuʼal.
\v 21 Tejkan Dios juntaʼitan para kʼalhakʼapʼupʼi, incha
va oqxtamati y ixnavin miʼukxtin ixʼunitʼa, jantu kapastakʼun.
Pero incha kaʼalil julchan tejkan kaxtʼaqnikʼa lakatin
para katʼaxtʼu, ex katʼaxtʼu.
\v 22 Incha matichun ixjunita oqxtamati tejkan ni Jalhachimoʼonu
Jesucristo juntaʼil para kalhakapuʼal, chavaycha va oxamaktaun
tapatsaniy ni Jalhachimoʼonuʼ. Vachu va chun taʼayuʼ
yu oxamaktaun ixjunita tejkan juntaʼikal para kalhakapuʼal
chavaycha va ixʼoqtamati Cristo.
\v 23 Ni Dios va laqlhuu talhiʼitan ni uxiknan. Jantu
kaxtʼaqnitʼik lakatin matichun aqayntaun lapanaki katalhichimoʼon.
\v 24 Ex chuncha, ketʼalaqaunin, qayntamin maqskʼiniy
kataylhaʼal kun Dios tacha ixjunita tejkan juntaʼikal
para kalhakapuʼal.
\s Yu jantukaʼ lakxtuklay ali yu tiyaunin
\p
\v 25 Chavay yu jatsiʼinkaʼ jantu kaklhitsukul tuʼuchun
chivinti yu lhinajun ni Jesucristo. Pero kimapaynil
ni Jalhachimoʼonuʼ Jesucristo, xlhiyucha lay kʼalhakʼapʼupʼintʼik
kinchivinti.
\v 26 Chavaycha va lhitaʼay aniy lakamunukpaʼ taʼan
tijuyanau. Xlhiyucha qayntaun lapanaki incha vananaj
ixʼaman tijuyal, kitʼin ox klhilay chuncha kataylhaʼal.
\v 27 Incha lhitʼaʼun mixanati, jantu kʼamakʼauntʼijla.
Chavay incha jantu kʼalhitsʼukʼu, jantu kʼalakxkʼau.
\v 28 Chavay incha lakxtuklay jantu tuʼuchun laqtaqal
makʼay. Vachuʼ incha matichun jatsiʼi lakxtuklay vachu
jantu tuʼuchun laqtaqal kaval para yucha. Pero apalay
lhitaʼay chuncha la metsukuntikʼan. Xlhiyucha chuncha
klajunau, va iknajun jantu kamaʼanlʼajnantʼik.
\v 29 Ketʼalaqaunin, klajunau ni jantucha paqlhuu kintatamakauniyan.
Ex chuncha yu lakxtuklanin katatiʼukxuntayal tacha yu
jantukaʼ talakxtuklay.
\v 30 Jantucha katapastakʼun yu xanavin aniy lakamunukpaʼ.
Yu taqalhun katatiʼukxuntayal tacha yu jantu taqalhun.
Yu talajʼachajyanal katatiʼukxuntayal tacha yu jantu
talajʼachajtayay. Yu taʼiy axtoqnu yuʼuncha katatsukul
tacha yu jantu katalhitsukul tuʼuchun.
\v 31 Yu tamapatsay yu xaʼaxtoqnuʼ aniy lakamunukpaʼ,
katakʼatsal va tacha jantu katatsukul mapatsanan. Ni
aniy lakamunukpaʼ va tʼajun miʼonuʼ.
\v 32 Va iknajun jantu katapastakʼun tuʼuchun. Yu ixʼaman
tijuntayay lay kapastakʼul vamun yu lhinajun ni Jalhachimoʼonu
Jesucristo. Pastakʼa tas lay kamakal para kalhipaʼinil
ni Jalhachimoʼonuʼ.
\v 33 Pero yu lakxtuklata vachu pastakʼuy yu xanavin
ni aniy lakamunukpaʼ y makaputun yu kamaqamal ixanati.
\v 34 Ex chuncha tʼuy chivinti junita. Vachu va chuncha
yu xanatin yu jantu katalhitsukul ixapaykʼan ali yu
jatsiʼinkaʼ. Yuʼuncha lay katapastakʼul vamun yu lhinajun
ni Jalhachimoʼonu Jesucristo para ixnavin Dios kataval
la ixlakatunajkʼan y vachu la ixlhitsukunukʼan. Pero
qayntaun xanati yu lakxtuklay pastakʼuy yu xanavin ni
aniy lakamunukpaʼ y makaputun yu kamaqamal ixapay.
\v 35 Chuncha klajunau para klaʼaqtayjuu. Jantu klalhichimoʼoyau
laqatapʼasta. Va klajunau para lay ox katʼiʼukxuntʼayatʼik
y jantu tuʼuchun kalaktanchanin para ox kʼatʼapʼatsʼanitʼik
ni Jalhachimoʼonu Jesucristo.
\p
\v 36 Incha qayntaun xapay lhitʼajun istsiʼi yu laqchaanitacha
ixʼaynti, incha yucha najun kalakxtuklal ni istsiʼi ex
lay kamakal yu kamakaputul. Jantu laqtaqal kaval, va
kalakxtuklal.
\v 37 Pero incha matichun xapay najun la ixjalhanuti
ni apalay ox jantu kalakxtuklal istsiʼi y vachu incha
jantu maqskʼiniy kalakxtuklal, ex jantu maqskʼiniy. Incha
chuncha najun la ixjalhanuti, ex lay kalhistaklhi istsiʼi
para jantu kalakxtuklal.
\v 38 Ex chuncha yu maqxtaʼa istsiʼi para kalakxtuklal
la ox makay. Vachu yu jantu maqxtaʼa istsiʼi para kalakxtuklal
ayaj ox xajachal.
\p
\v 39 Qayntaun xanati yu ikantacha va la ixtamakaʼ ixapay
tʼajun incha vananaj tʼajun. Pero incha yu xapay kanil
lay katʼatsukul taʼayucha yu katʼatsukuputul. Pero kaval
qayntaun yu lhakapuʼan ni Jalhachimoʼonu Jesucristo.
\v 40 Pero apalay katijuntayal kun achati incha jantu
kalakxtuklachoqol. Chuncha ikpastakʼa ni kitʼin y klhilay
va chuncha kixtaqniy ixjatapastakʼati ixʼEspíritu ni
Dios.
\c 8
\s Ni lhiʼuti yu moqslanikan antivas
\p
\v 1 Chavay klhichiviniy ni lhiʼuti yu moqslanikanta
antivas. Laqsaval kintachunkʼan lhitʼaunau jatalaniti
pero kun lhuu jatalaniti ay makakan. Pero kun lhuu japaxkanti
ex ox aynau la ketsukuntikʼan.
\v 2 Incha matichun najun ni malaqasiʼojoy tuʼuchun,
ex yucha jantukaʼ kʼatsay tacha paxtoqniy.
\v 3 Incha matichun achaniy ni Dios ex Dios mispay tacha
ixlapanaki.
\p
\v 4 Chavay klhichiviniy incha jantu tuʼuchun kaval
kaʼutʼi yu moqslanikanta antivas. Kʼatsayau ni antivas
va jantu tuʼuchun kataval. Vachu kʼatsayau ni Dios va
taun.
\v 5 Ni lakamunukpaʼ ali ni laktʼiyan ayaj alin yu lakjunkan
dioses ali lhachimoʼonun.
\v 6 Pero kijnan kʼatsayau va laqataun Dios alin yu
kimPaykʼan. Va yucha makaʼol yu alin y vamun para yucha
tsukuyau. Va pumataun alin Jalhachimoʼonuʼ, yucha ni
Jesucristo. Va por yucha alinʼojoy tachun yu axtoqnuʼ
y va yucha putʼaunau.
\p
\v 7 Pero jantu tachun takʼatsay ni yu antivas jantu
tuʼuchun kataval. Lati yu talhakapuʼan va ixtaʼukxʼantacha
jamoqslanan y mas chavaycha jantukaʼ ox talhilay kaʼutʼi
ni anchanu jamoqslanti. Talhilay va yucha ixnavin ni
antivas. Ex chuncha jantukaʼ ox tamispay yu ox ali yu
jantu ox, xlhiyucha la ixjatapastakʼatkʼan talhilay va
mitsʼiti.
\v 8 Jantu incha va por vayti ox kintalaqtsʼinan ni
Dios. Mas jantu kaʼuu, jantu va por yucha apalay ox kintalaqtsʼinan.
Vachuʼ mas kaʼuu jantu tuʼuchun kintaʼaqtayjuyan.
\p
\v 9 Yu milhakapuʼatkʼan taxtaqniyan lakatin para kaʼutʼik
pero kʼalhistʼajkʼantʼik. Alin lapanakni yu vananaj
tatsʼanqaniy katamalaqasil. Jantu kʼamakʼatʼik tuʼuchun
yu lay katapumakal talaqalhin.
\v 10 Incha kapiti vayaʼ laqa chaqaʼ taʼan tatoʼoyay
antivas, ka va lay kalaqtsʼinan milaqaj yu jantukaʼ ox
lhakapuʼan. Ex yucha jantucha katalhananaʼ para kaʼul
vachuʼ, mas la ixjalhanuti lhilay jantu ox kaval.
\v 11 Ex chuncha uxintʼi oxamaktaun tʼiʼuntʼayay por
mispʼaycha kʼatsʼan. Pero xlhiyucha maʼatsʼanʼay mintʼalaqajun
yu jantukaʼ ox lhakapuʼan. Pero va por yucha nil ni
Cristo.
\v 12 Incha chuncha kaval ex jantu ox lakmakʼaniyatʼik
metʼalaqauninkʼan. Va por uxiknan katamakal yu talhilay
jantu ox la ixjatapastakʼatkʼan. Chuncha laqsaval jantu
ox makʼaniyatʼik ni Cristo.
\v 13 Xlhiyucha incha va por kivayti katsukul tsʼanqan
kilaqaj ex jantu aqtaun kajkʼuyaʼ ni vakax para jantu
katsukul tsʼanqan kilaqaj.
\c 9
\s Yu paxtoqniy kalaqaʼil por ixlhitapatsa kun Dios
\p
\v 1 Kitʼin va qayntaun ixtamalaqachan Jesucristo. Klhitʼajun
lakatin para kakmakal yu tamakay yu alati. Kitʼin klaqtsʼil
ni kiJalhachimoʼonukʼan Jesucristo. Va klaqtapatsal
kun uxiknan xlhiyucha lhakʼapʼupʼintʼik ni Jesucristo.
\v 2 Lati jantu kintalaqtsʼin tacha ixtamalaqachan Jesucristo
pero uxiknan chuncha kilamispayau. Lhakʼapʼupʼintʼik
por kilhitapatsa, chuncha tasuy ni laqsaval kimalaqachal
ni Jalhachimoʼonuʼ.
\v 3 Yu kintamukʼaniyan laqtaqal va chuncha klaqlhiqaltajiy.
\v 4 Laqsaval kimpaxtoqniy kaklaqaʼil yu kajkʼul ali
yu kajkʼoqlhi.
\v 5 Vachu lay kaktʼatsukul qayntaun xanati yu lhakapuʼan
y kaklhaʼal taʼan kakpuʼal. Vachu va tacha tamakay alati
ixtamalaqachan ni Jalhachimoʼonu Jesucristo. Vachu tacha
tamakay ixtʼalaqaunin ni Jalhachimoʼonuʼ y vachu ni
Cefas.
\v 6 Vachu kintapaxtoqniyan kitʼin kun Bernabé kaklaqaʼiu
kilhilhajatkʼan para jantu maqskʼiniy kaktapatsau.
\v 7 ¿Maticha tropa lay katapatsal y jantu kalaqaʼil
ixlhilhajati? ¿Taʼayucha kachʼal tuʼuchun y jantu kalaqaʼil
yu xaʼunikan? ¿Taʼayucha kalaklhistaklhi vakaxna y jantu
kalaqaʼil lakatsʼuniy xaleche?
\p
\v 8 Yu iknajun jantu ixjatapastakʼatkʼan ni valiʼiy
lapanakni. Ixlhachimoʼon ni Dios vachu va chuncha najun.
\v 9 La ixlhachimoʼon yu tsʼoqlhi ni Moisés va najun:
“Jantu kamakʼiltʼanutʼi ixvosal ni vakax tejkan tsukuy
xqaxtunuʼ la ixchʼajaʼ ni trigo.” Pero ni Dios jantu
vamun vakaxna jalakpastakʼa.
\v 10 Laqsaval kintapastakni ni kijnan tejkan chuncha
naul. Chuncha tsʼoqkal por kijnan. Yu lqamalhaʼan laka
tʼun pakxanʼiy yu kaʼalinaʼ. Vachu yu laqpʼaqxlhaʼan
trigo pakxanʼiy yu kapaxtoqniyaʼ tejkan kaʼalinaʼ.
\v 11 Ex chuncha kijnankʼan ikchʼau ixchivinti Dios
la melhanutkʼan. Incha klaxtaqniu yu ox jatsukunti, ¿ex
lhilayatʼik jantu kintapaxtoqniyan tsʼuniy mimaqalitkʼan?
\v 12 Incha alati tapaxtoqniy ex apalay kintapaxtoqniyan
ni kijnankʼan.
\p Pero tejkan klatʼataulau jantu aqtaun laqatapʼasta
kaknajuu kilaʼaqtayjuu. Chuncha xaktijuntayau mas kintatsʼanqaniyan
tuʼuchun. Va para ox kalaʼaʼitʼik tejkan klaqputeʼeu
ni ox chivinti yu lhichiviniy Cristo.
\v 13 ¿Jantu kʼatsʼayatʼik ni yu tatapatsay laka ay
lakatajtan taʼuy yu alin ancha? Vachu yu tatapatsay
laka altar yu yal lakatajtan taʼuy yu moqslanikan Dios.
\v 14 Vachu va chun ni Jalhachimoʼonu Jesucristo lhinaul
ni yu talaqputeʼey ni ox chivinti va yucha kataputsukuyaʼ.
\p
\v 15 Pero kitʼin jantu aqtaun klhinaul va chuncha kakputapasal.
Yu chavaycha klatsʼoqniyau jantu va por kaklhajaputul.
Apalay ox kaknil xajantu matichun kixtaqnil tuʼuchun,
va jantucha ox kajkʼatsal por yu ikmakay.
\v 16 Pero para kitʼin jantu ay kʼatsan por klaqputeʼey
yu ox chivinti. Kitʼin maqskʼiniy kaklaqputeʼel, va yucha
klhijunkan. Ay, paynicha ni kitʼin incha jantu kaklaqputeʼel
ni ox chivinti.
\v 17 Ex chuncha incha ikmakay kun chux la kelhanuti
ex kaʼalinaʼ kilhilhajati. Mas jantu kakmakaputul va
maqskʼiniy kakmakal laqatapʼasta. Va klhijunkan ni aniy
lhitapatsa.
\v 18 ¿Ex tis va suncha kilhilhajati? Kilhilhajati vamun
ixlaqputeʼeka ixchivinti ni Cristo sin kakskʼil tuʼuchun.
Chuncha jantu ikskʼin yu kilhilhajati yu kimpaxtoqniy
kaklaqaʼil por klaqputeʼey ni ox chivinti.
\p
\v 19 Mas jantu matichun ixʼoqxtamati kakval va ikmakakan
tacha ixʼoqxtamatkʼan tachun ni lapanakni. Ex chuncha
lay kaklhajaʼil alati lapanakni para katalhakapuʼal.
\v 20 Tejkan klaktʼataulay ni israelitas vachu ikmakakan
tacha qayntaun israelita. Tejkan klaktʼataulay yu tamakay
yu lhinajun ixlhachimoʼon Moisés vachu ikmakakan tacha
yuʼuncha mas jantu maqskʼiniy kakmakal yu lhinaunkan.
Pero va chuncha ikmakakan para lay kaklaklhajaʼil alati
lapanakni para katalhakapuʼal.
\v 21 Tejkan klaktʼataulay yu jantu tamakay yu lhinajun
ixlhachimoʼon Moisés vachu ikmakakan tacha yuʼuncha
para lay kaklaklhajaʼil. Pero kitʼin kimpaxtoqniy ixlhachimoʼon
Cristo. Xlhiyucha jantu ikmakajun yu lhinajun Dios.
\v 22 Tejkan klaktʼataulay yu jantukaʼ ox tamalaqasiy
ixlhakapuʼatkʼan va ikmakakan tacha yuʼuncha. Vachu
va chuncha klay tacha ixputsukukʼan para vachu lay kaklaklhajaʼil.
Chuncha ikmakakan kun tachun ni lapanakni para ox kintalaqtsʼil,
ex chuncha lay katalaqtaxtul por kinchivinti.
\v 23 Chuncha ikmakay para lay kaklaqputeʼel ni ox chivinti
para lay kaklaqaʼil yu lajʼox yu ancha minachal.
\p
\v 24 Kʼatsʼayatʼik ni tejkan alin qamanti takyauti
tachun pʼays tatakyajuy pero va qayntaun yu lhajay.
Ex vachu va chuncha pʼays katʼakyautʼik la ixlakatin
Dios para kʼalhaʼatʼik.
\v 25 Yu taʼostayay para katatanunil qamanti tachun
yuʼuncha tamakauntijlay yu jantu laqʼaqtayjuy. Chuncha
tamakay para katalaqaʼil ixlhilhajatkʼan yu niman kamiʼoyaʼ.
Pero kijnankʼan makauntijlayau yu jantu kintaʼaqtayjuyan
para kaʼalil kilhilhajatkʼan yu jantu aqtaun kamiʼoyaʼ.
\v 26 Ni kitʼin jantu kakval tacha yu ltiyoq takyajuy
y jantu kakval tacha yu qamanan y lakasamanan laka unin.
\v 27 Ni kitʼin va ikmamaqanlqajnivay kilakatunaj y
klhijunkan pʼays kaktapatsanil ni Dios. Incha jantu
chuncha kakmakal ex jantu tuʼuchun kaklhajal mas klaqputeʼey
yu ox chivinti.
\c 10
\s Kʼamakʼatʼik kuenta yu maqancha tatapasal ni israelitas
\p
\v 1 Ketʼalaqaunin, iknajun jantu kakʼauktʼik yu maqaniyaʼ
kepayankʼan. Yuʼuncha ixtaltananta ixqaltaʼapuʼ laka
taputsʼi y tachun tatakuklhi ni lakamar.
\v 2 Ex chuncha va tacha kataʼaqchajʼaul laka taputsʼi
y lakamar para chʼantaun kataval kun Moisés.
\v 3 Tachun yuʼuncha ixtaʼuy vayti yu ixminachal kun
ixtapʼasta Dios.
\v 4 Vachu tachun ixtaʼotʼa yu ixminachal kun ixtapʼasta
Dios. Taʼoqtijlal xaxkan laktalpa kun ixtapʼasta Dios
y chuncha taputapasal. Ni anchanu chiyux yucha va Cristo
yu laktʼaʼal.
\v 5 Pero ni Dios jantu kalhipaʼinil yu tamakal qaynlhuu
ni yuʼuncha. Xlhiyucha tanil y tus tʼikl taputaukʼatamal
ixlakatunajkʼan ni lakakʼavinan.
\p
\v 6 Tachun yu aniy tapasal va para kamakau kuenta y
jantu kamakaputuu yu jantu lajʼoxi tacha yuʼuncha ayaj
tamakaputul yu jantu lajʼoxi.
\v 7 Xlhiyucha jantu maqskʼiniy katʼoʼoyatʼik ni antivas
tacha talal ni yuʼuncha. Tsʼoqkanta la ixchivinti Dios
yu najun: “Ni lapanakni tataulal vaynin y taʼoqnul.
Ex taʼostaulchoqol y talachʼapachal y aqtayl talatʼaqamanan.”
\v 8 Jantu maqskʼiniy katʼatamau matichun yu jantu kinavinkʼan,
tacha talal lati ni yuʼuncha. Va por yucha tanil pʼuxauntʼutu
mil lapanakni taun julchan.
\v 9 Vachu jantu kalaqtsʼintanuu ni Jalhachimoʼonuʼ
tacha talal lati ni yuʼuncha. Tatanuchal lhuu tsapulin
y jalaktsakʼamakal.
\v 10 Vachu jantu maqskʼiniy kakʼiltʼaytʼik ni Dios
tacha lati ni yuʼuncha talal. Xlhiyucha ixmayul Dios
yu jamaqniniʼ va jalaqmaqnil.
\p
\v 11 Tachun yu aniy talhitapasal kepayankʼan para kapulaniu.
Va tsʼoqkanta para kapujalakpastaknau ni kijnan yu vilanau
aniy la xapumiʼonucha lakamunukpaʼ.
\v 12 Yu ox tanun kun Dios maqskʼiniy kalhistakkal para
jantu kalhitaxtuchoqol.
\v 13 Jantukaʼ laqtsʼintʼanukʼanatʼik yu ayaj lhitaʼay.
Vachu va chuncha tacha yu tatapasay alati lapanakni.
Mas va kalaqtsʼintʼanukʼantʼik yu lhitaʼay, lay katʼayanitʼik.
Ni Dios jantu xtaʼa lakatin para apalay pʼays kʼalaqtsʼintʼanukʼantʼik.
Ni Dios lay lhakapuʼanikan ni kataʼaqtayjuyan para lay
kʼalajʼosmajʼantʼik ni talaqalhin.
\s Kalajʼosmajʼantʼik ixtoʼoyaka ni antivas
\p
\v 14 Xlhiyucha, klajunau uxiknan yu klaʼachaniyau, ni
kalajʼosmajʼantʼik ixtoʼoyaka ni antivas.
\v 15 Klaxaqalayau tacha lapanakni yu talhitʼajun jatapastakʼati.
Kʼamakʼatʼik kuenta kinchivinti ni va laqsaval.
\v 16 Chʼantaun otʼau laka vaso yu kintamapastakniyan
ixjamapayninti Jesucristo, ex xtaqniyau lhimalaqpuchuncha
ni Dios. Chuncha chʼantaun tanuyau kun ixjakʼalna ni
Cristo. Vachu tejkan laqcheʼeyau ni anchanu pan, va chʼantaun
tanuyau kun ixlakatunaj ni Cristo.
\v 17 Por aqxtaun pan uyau, va tacha taun lakatunaj juntau
mas kilaqalhuukʼan, va latʼaʼuyau aqxtaun pan kintachunkʼan.
\p
\v 18 Kʼamakʼatʼik kuenta ni israelitas ixtaʼuy yu xajamoqslanti
laka altar. Chuncha ixtatanuy kun Dios yu ixmoqslanikan.
\v 19 Chavaycha yu xajamoqslanti antivas, ¿lhilayatʼik
va iknajun incha xtapal kaval ni antivas? ¿U lhilayatʼik
incha xtapal kaval yu moqslakanta? Jantu xtapal kaval.
\v 20 Pero klajunau ni lapanakni yu jantu talhakapuʼan
tejkan tamakay xajamoqslanti antivas, va aqmoqxnun yu
tamoqslaniy, jantu tamoqslaniy Dios. Kitʼin iknajun jantu
kʼatʼanutʼik kun aqmoqxnun.
\v 21 Jantu lay pʼuʼoqnunatʼik xavaso yu pupastakyau
ni Jalhachimoʼonu Jesucristo, incha vachu pʼuʼoqnunatʼik
yu xavaso aqmoqxnuʼ. Vachuʼ jantu lay kavayntʼik laka
mesa taʼan toʼoyakan ni Jalhachimoʼonuʼ, incha vaynatʼik
laka mesa taʼan toʼoyakan aqmoqxnun.
\v 22 ¿Kamakau para kintalhixiyaxnin ni Jalhachimoʼonuʼ?
¿Apalay pʼays juntau xajantu ni yucha?
\s Tachun kʼamakʼatʼik para ox katoʼoyakal ni Dios
\p
\v 23 Tanajun lay kʼamakʼatʼi va yu kʼamakʼapʼutʼucha.
Pero kitʼin iknajun jantu tachun xtapal kaval. Tanajun
lay kʼamakʼatʼi va yu kamakʼapʼutʼucha pero jantu tachun
kintaʼaqtayjuyan.
\v 24 Jantu maqskʼiniy kʼapʼastʼaktʼi yu ox vamun para
uxintʼi, vachu kʼapʼastʼaktʼi yu kalaqʼaqtayjuyaʼ yu
alati lapanakni.
\v 25 Tachun vakax yu stʼakan laklhitamau lay kʼaʼutʼik.
Jantu maqskʼiniy kʼalhasakminintʼik incha ixmoqslanikantacha
antivas, chuncha jantu maqskʼiniy kapastakʼun.
\v 26 Tachun yu alin taʼakchun lakamunukpaʼ va si ixnavin
ni Jalhachimoʼonu Dios.
\p
\v 27 Incha matichun yu jantu lhakapuʼan kajuntaʼin
vayti y uxintʼi uxapʼin, kaʼutʼi tachun yu kaxtaqnincha.
Jantu kalhasakmin tuʼuchun mas kalhilatʼik jantu ox
kʼaʼutʼi.
\v 28 Pero incha matichun kajunin: “Ni aniy vakax va
ixmoqslanikanta antivas”, ex apalay ox jantu kaʼutʼi.
Va pastakniyan ni anchanu lapanaki, va lhilay jantu ox
kʼaʼutʼi.
\v 29 Klhichiviniy yu aqayntaun lapanaki yu lhilay jantu
ox, mas uxintʼi kʼatsʼay ni jantu laqtaqal kaval.
\p Jantu maqskʼiniy kilaktanchanil aqayntaun por yu lhilay
ni jantu ox.
\v 30 Incha ikxtaqniy lhimalaqpuchuncha ni Dios por
yu kʼuy ex jantu paxtoqniy kintatsukul lhikiltaynan.
\v 31 Xlhiyucha mas va kʼavayntʼik u kʼaʼoqtʼik tuʼuchun,
mas va tichichuncha yu kʼamakʼatʼik, kʼamakʼaʼotʼik para
ox katoʼoyakal ni Dios.
\v 32 Jantu kʼamakʼatʼik tuʼuchun yu kalakmalukujlal
alati lapanakni, mas va israelitas, mas yu jantu israelitas
kataval, mas va ixlapanakni Jesucristo.
\v 33 Ni kitʼin iktiʼukxuntayay makanaʼ yu katalhipaʼinil
ni lapanakni. Jantu vamun yu ox la ketsukunti ikpastakʼa.
Va ikpastakʼa yu kalaqʼaqtayjul yu alati, ex chuncha
lay katalaqtaxtul por kinchivinti.
\c 11
\p
\v 1 Kʼamakʼatʼik yu ikmakay ni kitʼin, vachu va chuncha
tacha kitʼin ikmakay yu masuy ni Cristo.
\s Tisun naunputun tejkan laqpapaqakan xanatin
\p
\v 2 Ayaj ox klhilay yu makʼayatʼik. Va kilapastakʼau
ni kitʼin y tachun yu makʼayatʼik va tacha kitʼin klamalaniu.
\v 3 Klamakʼatsaniputunau ni Cristo yucha xaʼaqtsul
tachun ni joʼakna, yu joʼati yucha xaʼaqtsul ni xanati,
y yu Dios va xaʼaqtsul ni Cristo.
\v 4 Tejkan matichun joʼati skʼin Dios u laqputeʼey
ixchivinti Dios y aqtanuy ixʼaqtanuti yucha mamaxaniy
yu xaʼaqtsul.
\v 5 Incha matichun xanati skʼin Dios u laqputeʼey ixchivinti
Dios y jantu laqpapaqakan ex vachuʼ mamaxaniy yu xaʼaqtsul.
Va tacha valiʼiy kaʼaqsikʼokal.
\v 6 Incha qayntaun xanati jantu laqpapaqakan tejkan
skʼin Dios u laqputeʼey ixchivinti ex apalay ox kaval
kaʼaqsijkal. Incha matichun xanati lhimaxanan kaʼaqsijkal
ex kalaqpapaqakal.
\v 7 Ni joʼati jantu lay laqpapaqakan tejkan skʼin Dios
u laqputeʼey ixchivinti. Ixjatsukunti masuy ixʼayaxtu
ni Dios y ixjatsukunti ni xanati masuy ixʼayaxtu ni
joʼati.
\v 8 Yu pʼunaj joʼati jantu kaminchal kun xanati. Va
yu xanati minchal kun yu joʼati.
\v 9 Dios jantu kamakal ni joʼati para yu xanati, va
makal ni xanati para ni joʼati.
\v 10 Xlhiyucha yu xanati maqskʼiniy kalaqpapaqakal
tejkan skʼin Dios u laqputeʼey ixchivinti. Chuncha la
ixʼaqtsul tasuy ni lhichimoʼokan, mas ixmayulnin Dios
talaqtsʼin.
\v 11 Lamaqskʼiniyau la ketsukuntikʼan kun Cristo, ni
joʼati maqskʼiniy yu xanati, vachu yu xanati maqskʼiniy
ni joʼati.
\v 12 Tacha yu xanati minachal kun yu joʼati, vachu yu
joʼati minachal kun yu xanati. Tachun yu alin va si
kun Dios minachal.
\p
\v 13 Uxiknankʼan kapʼastʼaktʼik incha ox kaskʼil Dios
qayntaun xanati mas jantu kalaqpapaqakal.
\v 14 Klalhisakmiyau incha meʼemankʼan jantu lay malaʼasiyatʼik
ni va lhimaxan incha va katsukul malaʼayan ixʼaji qayntaun
joʼati.
\v 15 Pero qayntaun xanati yucha ox toʼoyakan incha
malaʼayay ixʼaji. Yucha ixmaqxtaqnika kalhitsukul la
ay ixʼaji para kalhilaqpaxtaqkal la ixʼaqtsul.
\v 16 Tachun yu aniy, incha alin matichun lapanaki yu
lhilakchivinputun, yucha tsʼanqay kakʼatsal ni va chuncha
kimputsukkʼan. Chuncha junita mas va toʼoxtaycha tataqxtoʼa
ixlapanakni Dios.
\s Jantu ox tamakay tejkan chʼantaun taʼuy yu xapupastakkan ixlhinin Jesucristo
\p
\v 17 Jantu klhiʼachantajuy por yu makʼayatʼik tejkan
tʼaqxtʼoqyatʼik. Mas naunatʼik ox kaxajchal, jantu ox
xajachipitik.
\v 18 Pʼunaj klajunau yu kintajuniy lati lapanakni.
Tanajun ni tʼapʼutʼilhiyatʼik tejkan tʼaqxtʼoqyatʼik
tacha ixlapanakni Dios. Lati yu kintajuniy, kitʼin klhakapuʼan.
\v 19 Laqsaval maqskʼiniy katʼalaqlvaqtʼik. Va chuncha
lay katasul taʼayuʼuncha yu laqsaval tatijuyanal kun
Dios.
\v 20 Tejkan chʼantaun tʼaqxtʼoqyatʼik para kʼaʼutʼik
ixpupastakʼan ixlhinin Cristo, jantucha yucha pʼastʼakʼatʼik.
\v 21 Tejkan aqtʼayniyatʼik ixʼuka, lati niman tapʼulʼan
unan ixvaytkʼan yu talhimin. Jantu talatʼaʼuy yu alati.
Ex chuncha lati tachavajtayay y lati tus tataʼapʼay.
\v 22 ¿Jantu kʼalhitsʼukʼutʼik minchaqakʼan taʼan kavayntʼik
y kaʼoqtʼik? ¿Valiʼiycha jantu tʼoʼoyayatʼik ixlapanakni
Dios y jalakmamaxaniyatʼik yu jantu tuʼuchun katalhitsukul?
¿Tisuncha klajunaucha? Jantu tsʼuniy klhiʼachantajuy
por yu makʼayatʼik.
\s Tacha puʼaqtaynil ixʼuka yu pupastakʼau ixlhinin Jesucristo
\p
\v 23 Kitʼin klaqaʼil ni chivinti yu naul ni Cristo
y vachuʼ klajunchoqoo uxiknankʼan, yu najun inchine.
Ni anchanu putsʼisni tejkan maqxtaqkal ni Jalhachimoʼonu
Jesús, yucha chʼapal ni pan.
\v 24 Va xtaqnil lhimalaqpuchuncha ni Dios, ex laqcheʼel,
va naul: “Kalaʼaʼitʼik y kaʼutʼik. Yu aniy va kilakatunaj
yu laqcheʼekan por uxiknankʼan. Chuncha kʼamakʼatʼik
para kilapastakvi ni kitʼin.”
\v 25 Vachu tejkan tavaynʼolcha, chʼapal ni vaso. Va
naul: “Yu aniy vaso masuy ni Dios va taun sastʼi chivinti
jatʼatamakajun ixlapanakni por kijakʼalna. Va tavanancha
kaʼoqtʼik, kʼamakʼatʼik para kilapupastakvi.”
\v 26 Ex chuncha mas va tavanancha uyatʼik ni anchanu
pan y otʼatʼik yu tajuy laka vaso, va masuyatʼik ixlhinin
ni Jalhachimoʼonu Jesucristo tus kaminchoqoyaʼ.
\s Kʼamakʼatʼik kuenta ixʼuka yu pupastakʼau ixlhinin Jesucristo
\p
\v 27 Taʼayuʼ yu uy ni anchanu pan y otʼa yu tajuy laka
vaso yu lhichiviniy ni Jalhachimoʼonuʼ, incha uy tacha
valiʼiy vayti kaval ex yucha taukʼaniyachal taun laqtaqal
por jantu lhiʼajin ixjakʼalna ali ixlakatunaj ni Cristo.
\v 28 Pero qayntamin maqskʼiniy kapʼastʼakʼelatʼik incha
jantu maqtʼalaʼalhininatʼik. Ex lay kʼaʼutʼik ni pan
y kaʼoqtʼik yu tajuy laka vaso.
\v 29 Pero incha uyatʼik y otʼatʼik y jantu makʼayatʼik
kuenta ixlakatunaj ni Jalhachimoʼonu Jesucristo, ex meʼemankʼan
mukʼanikʼanatʼik laqtaqal por yu makʼayatʼik.
\v 30 Xlhiyucha uxiknankʼan lati tʼaʼanʼayatʼik y lati
tatsʼanqaniy tapʼasta y lati tanitacha.
\v 31 Incha puxkaulaqtsʼinkanau keʼemankʼan ex Dios
jantu kintamukʼaniyan laqtaqal.
\v 32 Ni Jalhachimoʼonu kintapuxkaulaqtsʼinan y kintaxtaqniyan
maqanlqajnati. Ex chuncha jantu kalaqaʼiu maqanlqajnati
chʼantaun kun yu xalapanakni aniy lakamunukpaʼ.
\v 33 Ex chuncha, ketʼalaqaunin, tejkan katʼaqxtʼoqtʼik
vaynin kalapʼakxantʼik.
\v 34 Incha alin matichun yu chavaniy, kavaynʼelal la
ixchaqaʼ para Dios jantu kataxtaqnin maqanlqajnati tejkan
tʼaqxtʼoʼatʼik. Yu alati axtoqnuʼ kaklaqlaʼoxiyaʼ tejkan
kajkʼananta.
\c 12
\s Yu xtaʼa ni Espíritu Santo para kamakau ixlhitapatsa Dios
\p
\v 1 Ketʼalaqaunin, va knajun kakʼatsʼatʼik yu kintamaqxtaqniyan
ni Espíritu Santo.
\v 2 Pʼunaj ni uxiknankʼan jantukaʼ ixlhakʼapʼupʼinatʼik
ni Cristo. Ex vamuncha ixmakʼanukʼanatʼik katʼixkʼaulhipʼintʼik
ni antivas yu jantu lay tachiviniy.
\v 3 Chavaycha iknajun kakʼatsʼatʼik incha matichun
lapanaki laqxtoqnu chivinti juniy ni Cristo, yucha jantu
chiviniy kun Espíritu Santo. Matichun yu najun ni Jesús
va yu ay Jalhachimoʼonu ex yucha chiviniy kun ni Espíritu
Santo.
\p
\v 4 Alin pulhuu yu kintamaqxtaqniyan ni Espíritu Santo
pero ni Espíritu Santo va putaun.
\v 5 Alin pulhuu lhitapatsa yu lay kamakaniyau ni Jalhachimoʼonu
Jesucristo pero kiJalhachimoʼonukʼan va qayntaun.
\v 6 Alin pulhuu yu makayau, pero va taun ni Dios yu
kintaxtaqniyan tapʼasta para kintachunkʼan kamakau yu
kintapaxtoqniyan.
\v 7 Ni Dios va maqxtaqniy qayntamin yu lay katapumasul
ixlhitapatsa ni Espíritu Santo. Va maqxtaqnikan para
lay kalaqʼaqtayjukal alati lapanakni yu talhakapuʼan.
\v 8 Lati por ni Espíritu Santo jalaqxtaqnikan chivinti
para lay katachivinil kun lhuu jatapastakʼati. Alati
jalaqxtaqnikan chivinti kun lhuu jatalaniti vachu por
ni Espíritu Santo.
\v 9 Lati jalaqxtaqnikan ay lhakapuʼati vachu por ni
Espíritu Santo. Alati jalaqxtaqnikan tapʼasta para lay
palay katamakal taqanʼanin vachu por ni Espíritu Santo.
\v 10 Lati jalaqxtaqnikan tapʼasta para lay katamakal
yu lajʼay axtoqnuʼ. Alati jalaqxtaqnikan tapʼasta para
lay katalaqputeʼel ixchivinti Dios. Alati jalaqxtaqnikan
tapʼasta para lay katamispal tichichuncha lhitsukunuʼ
talhitsukuy ni lapanakni incha ox o jantu ox. Lati jalaqxtaqnikan
para lay katachivinil laka pulhuu lhichivin yu jantu
tamispay. Alati jalaqxtaqnikan lhitapatsa yu lay katalhichivinchoqol
yu naunputun yu alati lhichivin.
\v 11 Pero tachun yu aniy va taun ni Espíritu yu xtaʼa.
Yucha jalaqxtaqniy por qayntamin vachu va tacha najun
ni yucha.
\s Va taun lakatunaj laqxtoqnunau
\p
\v 12 Qayntaun lapanaki lakalhuu laqxtoʼa ixlakatunaj.
Mas pulhuu lhitʼajun pero yu lakatunaj va taun. Ex vachu
va chun junita ixlakatunaj ni Cristo yu kijnan juntau.
\v 13 Ex vachu chun ni kijnankʼan lhiʼaqchajʼajuu ni
Espíritu Santo para va taun lakatunaj kajuu, mas kajuu
israelitas u mas jantu, mas kajuu oqxtamatin u mas jantu.
Pero va taun ni Espíritu yu kintalaqtanun kijnan.
\p
\v 14 Vachu va chun ni lakatunaj jantu va taun kaval
yu talaqxtoʼa. Va laqalhuu laqxtoqnun.
\v 15 Xlhiyucha mas kanaul yu chʼajaʼ: “Kitʼin jantu
makaʼ kakval. Ka jantu ixnavin kakval ni lakatunaj.”
Pero mas chuncha kanaul, va ixnavin ni lakatunaj.
\v 16 Ex vachu va chun incha yu aqaxqol va kanaul: “Kitʼin
jantu laqchul kakval, ex jantu ixnavin ni lakatunaj kakval.”
Pero mas chuncha kanaul, va ixnavin ni lakatunaj.
\v 17 Incha tachun si laqchul ixval, ¿ex tas ixpaqasmaknaucha?
Incha tachun si paqasmakni ixval, ¿ex tas ancha ixlhitsukuu
kimpaʼutiyankʼan?
\v 18 Pero yu Dios laqmalaqxtoqlhi lakatamin laka lakatunaj
chuncha tacha makaputul ni yucha.
\v 19 Incha tachun lakatunaj yu talaqxtoʼa va putaun
ixval, ¿ex tas ancha ixʼalil ni lakatunaj?
\v 20 Pero alin pulhuu yu talaqxtoʼa y yu lakatunaj
va laqataun.
\p
\v 21 Yu laqchul jantu lay juniy ni makaʼ: “Uxintʼi
jantu ikmaqskʼiniyan.” Vachu yu aqtsul jantu lay juniy
ni chʼajaʼ: “Uxintʼi jantu ikmaqskʼiniyan.”
\v 22 Incha jantu, lati yu jantu lhiʼaykan, yuʼuncha yu
apalay jamaqskʼinikan.
\v 23 La kilakatunajkʼan taʼan alin yu jantu ox lhilayau,
va ox lhilaqapaqakanau kun laqchʼiti. Taʼan lhitʼaunau
yu jantu aqtaun masuyau, ox paqayau y ox lhistakʼau.
\v 24 Pero yu tasuy va apalay kʼus y jantu maqskʼiniy
kapaqakal. Chuncha ni Dios makal ni lakatunaj para kamaqskʼinil
tachun, mas yu jantu toʼoyakan.
\v 25 Chuncha jantu lay katalaqlvaqlhi ni lakatunaj.
Tsʼanqay katalalhistaklhi siya putamin ni lakatunaj.
\v 26 Tejkan jamaqanlqajnan putaun yu ixnavin ni lakatunaj,
ex tachun yu alati yu takilnunun vachu tamaqanlqajnan.
Tejkan putaun yu ixnavin ni lakatunaj va toʼoyakan ex
tachun yu alati talhiʼachantajuy.
\p
\v 27 Uxiknankʼan ixlakatunaj ni Cristo untʼatʼik y
si putamin ixnavin untʼatʼik.
\v 28 Ni Dios lakʼulal lati lapanakni para kataval ixtamalaqachan
Cristo, astan lakʼulal lati yu talaqputeʼey ixchivinti,
ex astan lakʼulal lati yu tamalaninin. Vachu lhinaul
kaʼalil yu tamasuy lajʼay axtoqnu y yu palay tamakay
taqanʼanin y yu taʼaqtayjuy alati lapanakni y vachu
yu talhachimoʼonun laka lhitapatsa y yu tachiviniy alati
lhichivin yu jantu tamispay.
\v 29 Pero jantu tachun ixlapanakni ixtamalaqachan Cristo
kataval. Jantu tachun talaqputeʼey ixchivinti Dios.
Jantu tachun jamalaninin. Jantu tachun lay tamakay lajʼay
axtoqnu.
\v 30 Jantu tachun lay palay tamakay yu taqanʼanin.
Jantu tachun lay tachiviniy alati lhichivin yu jantu
tamispay. Jantu tachun lay tachivinchoqoy yu naunputun
ni anchanu lhichivin.
\v 31 Kalhilaqsoʼotʼik laqaʼinin yu apalay ixlaqmiti
para kʼamakʼatʼik ixlhitapatsa Dios. Pero kitʼin klamasuniyau
taun lakatin yu apalay ox.
\c 13
\s Yu apalay xtapal va japaxkanti
\p
\v 1 Mas lay kakchivinʼol tachun ixlhichivinkʼan ni
lapanakni u mas yu talhichiviniy angeles, incha kintsʼanqaniy
japaxkanti ex klhixajachal tacha taun tsasnati yu qalpʼays
kaval u tacha taun kampana yu jantu kʼus makatʼajun.
\v 2 Vachu mas lay kaklhichivinil yu katapasayaʼ y tus
kakmispaʼol yu jantu matichun mispay, vachu mas ox kaklhakapuʼal
tus lay kakmalakpaxal taun aspajun, incha jantu kaklhitsukul
japaxkanti ex jantu tuʼuchun xtapal kakval.
\v 3 Mas kaklaqlvaqniʼol tachun yu ikmaqalin ni kilpatanin
y tus kakmaqxtaqlhi kilakatunaj laka jikmi por kilhakapuʼati,
incha jantu kaklhitsukul japaxkanti ex jantu tuʼuchun
xtapal kakval.
\p
\v 4 Yu japaxkanan, yucha maqantaqniy y qalʼox jun. Yu
japaxkanan jantu akchaʼaʼ kaval, jantu ay kʼatsan, vachu
jantu ay makakan.
\v 5 Yu japaxkanan, yucha jantu laqxtoqnu chiviniy, jantu
kapastakʼul vamun yu yucha maqskʼiniy, jantu jamalukujlanan
y jantu pastakchoqoy yu katamakanil lapanakni.
\v 6 Jantu aqtaun lhiʼachantajuy tejkan makakan laqtaqal.
Lhiʼachantajuy tejkan makakan yu ox.
\v 7 Yu japaxkanan yucha chux tayaniy. Mas va tuʼuchun
tapasay, va lhakapuʼanan y japakxanʼiy yu lajʼoxi. Va
tachun maqantaqniʼojoy.
\p
\v 8 Yu japaxkanti jantu aqtaun kamiʼoyaʼ. Pero kaminaʼ
julchan tejkan katamaktayaʼ ixlaqputeʼeka ixchivinti
Dios. Vachu jantucha apalay kaʼalinaʼ lapanakni yu tachiviniy
alati lhichivin yu jantu tamispay. Vachu katamaktaʼoyaʼ
ni ay jatapastakʼati.
\v 9 Chavaycha ni anchanu jatapastakʼati va xantaʼan
mispayau, y xantaʼan jantu mispayau. Vachu ixchivinti
Dios xantaʼan laqputeʼeyau y xantaʼan jantu laqputeʼeyau.
\v 10 Pero kaminaʼ julchan tejkan jantu tuʼuchun kintatsʼanqaniyan.
Ex kamiʼoyaʼ tachun yu mispayau xantaʼan.
\p
\v 11 Chuncha tacha tejkan jasʼatʼa xajkunita ni kitʼin,
xakchiviniy tacha qayntaun jasʼatʼa y xaklakpastaknan
y xakmalaqasiy tacha taun jasʼatʼa. Pero tejkan aycha
lapanaki ikval ex ikmakauntijlaʼol kilhisʼatʼa.
\v 12 Chavaycha vananaj kintatsʼanqaniyan kamispaʼojoo.
Va tacha katsukuu laqapulaqtsʼinin laka spejo yu oxicha
lakapulpipij. Pero astan kalaqtsʼinau Dios ukxpuʼ kun
ukxpuʼ. Chavaycha va xantaʼan ikmispay y xantaʼan jantu
ikmispay pero astan ex kakmispaʼoyaʼ vachu va chun tacha
kimispaʼojoy ni Dios.
\v 13 Chavaycha alin lhakapuʼati y vachu yu pakxanʼiyau
y vachu alin japaxkanti. Yu aniy putʼutu alin pero yu
apalay ixlaqmiti va yu japaxkanti.
\c 14
\s Yu jamaqxtaqnikan katachivinil laka lhichivin yu jantu mispakan
\p
\v 1 Kʼalhilaqsoʼotʼik lhitsukunun japaxkanti. Ex vachu
kʼalhilaqsoʼotʼik laqaʼinin yu xtaʼa ni Espíritu Santo.
Pero apalay kaskʼintʼik para lay kʼalaqpʼutʼeʼetʼik
ixchivinti Dios.
\v 2 Taʼayu yu maqxtaqnikan kachivinil alati lhichivin
yu jantu mispay, yucha jantu matichun lapanaki malaqasiniy
yu najun. Jantu va lapanakni yu jatʼachiviniy, va Dios
yu tʼachiviniy. Va kun ixlhitsukunuʼ chiviniy yu jantu
mispakan.
\v 3 Pero qayntaun lapanaki yu laqputeʼey ixchivinti
Dios ox jalakmasuniy ni lapanakni. Ex ox lay kataʼayal
ixlhakapuʼatkʼan y ox jalaqxtaqniy jatapastakʼati y
ox jalakmalakaʼulay.
\v 4 Yu chiviniy alati lhichivin yu jantu mispakan yucha
va xʼaman aqtayjukan la ixjatsukunti para ox kataʼayal
ixlhakapuʼati. Pero yu laqputeʼey ixchivinti Dios yucha
jalaqʼaqtayjuy alati ixlapanakni Dios para ox kataʼayal
ixlhakapuʼatkʼan.
\p
\v 5 Kitʼin iknajun ox kaval incha mintachunkʼan lay
kachʼivinintʼik lhichivin yu jantu mispakan. Pero yu
apalay iknajun va kʼalaqpʼutʼeʼetʼik ixchivinti Dios.
Apalay ixlaqmiti yu laqputeʼey ixchivinti Dios xajantu
yu chiviniy lhichivin yu jantu mispakan. Pero incha
alin qayntaun lapanaki yu lay kalhichivinchoqol yu naunputun
ni anchanu lhichivin ex vachuʼ ox. Chuncha lay ox katamalaqasil
yu talhakapuʼan y ox kataʼayal ixlhakapuʼatkʼan.
\s Yu lhichivin yu jantu malaqasikan maqskʼiniy kalhichivinchoqokal yu naunputun
\p
\v 6 Xlhiyucha klajunau chavaycha, ketʼalaqaunin, incha
kaklalaqʼanchaʼau y kaklalhixaqalau lhichivin yu jantu
malaʼasiyatʼik ex jantu tuʼuchun taʼaqtayjuyan. Vamun
taʼaqtayjuyan incha kaklalhixaqalau tuʼuchun yu kimasunil
Dios u taun jatapastakʼati. Vachu taʼaqtayjuyan incha
klalaqputeʼeniyau ixchivinti Dios u klamalaniyau tuʼuchun.
\v 7 Incha laqataun sqol u ataun lhisan tacha yu kitarra
jantu siya putamin katakiltʼaunlhi, ¿ex tas laycha kapumispakal
taʼayucha yu kitarra u taʼayucha yu sqol?
\v 8 Vachu sasqol yu sqolkan laka lhilukuj, incha jantu
ox tʼasay, ¿ex tas laycha katapukʼatsal ni tropas para
kataʼalcha laka lhilukuj?
\v 9 Vachu va chun uxiknankʼan incha chʼivinanatʼik
chivinti yu jantu malaqasikan, ¿tas katapumalaqasiniyancha
ni lapanakni? Valiʼiy laka unin chʼivinanatʼik.
\v 10 Alin lhuu lhichivin lakamunukpaʼ pero taun taun
chivinti si alin yu naunputunta.
\v 11 Pero incha matichun kixaqalal kun aputaun lhichivin
yu jantu kakmalaqasil ex klhixajachal tacha qayntaun
yu alakataun machaqaʼ y yucha vachu chun lhixajachal
kun kitʼin.
\v 12 Uxiknan ayaj lhitsʼukʼupʼutʼunatʼik yu xtaʼa ni
Espíritu Santo. Chavay kʼalhilaqsoʼotʼik lhitsukunun
yu ox lay katapuʼaynʼal ixlhakapuʼatkʼan ixlapanakni
Dios.
\p
\v 13 Ex taʼayu yu chiviniy lhichivin yu jantu malaqasikan,
va kaskʼinin ni Dios kaxtaqnin vachu para lay kʼalhichʼivinchʼoʼo
yu naunputun.
\v 14 Incha kitʼin ikskʼin Dios laka lhichivin yu jantu
malaqasikan ex vamun la kilhitsukunuʼ ikskʼin Dios.
La kijatapastakʼati jantu tuʼuchun ikmalaqasiy.
\v 15 ¿Ex tascha kakmakal? Kakskʼinaʼ Dios la kilhitsukunuʼ
pero vachu la kijatapastakʼati. Vachu kakmilpayaʼ la
kilhitsukunuʼ pero vachu la kijatapastakʼati.
\v 16 Incha vamun la milhitsukunuʼ ox lhichʼiviniy Dios,
ex ni lapanaki yu qalasmatʼan jantu malaqasiniyan yu
naʼun. Ex jantu lay kaxtaqniyaʼ lhimalaqpuchuncha Dios
chʼantaun kun uxintʼi, va jantu malaqasiy yu naʼun.
\v 17 Chuncha uxintʼi laqsaval xtʼaqniy lhimalaqpuchuncha
ni Dios pero yu aqayntaun jantu tuʼuchun laqaʼiy para
kaʼaynlhi ixlhakapuʼati.
\v 18 Kitʼin ikxtaqniy lhimalaqpuchuncha ni Dios ni
apalay lay ikchiviniy lhichivin yu jantu mispakan xajantu
mintachunkʼan uxiknan.
\v 19 Pero mas chuncha kunita, tejkan iktayay taʼan tataqxtoʼa
yu talhakapuʼan, apalay ox klhilay kakchivinil laqakis
chivinti yu lay ox katamalaqasil yu ancha tayanal. Apalay
ox klhilay xajantu kaktsukul chivin laqakau mil chivinti
laka lhichivin yu jantu malaqasikan.
\s Yu lhichivin yu jantu mispakan va para kamasul ixtapʼasta Dios
\p
\v 20 Ketʼalaqaunin, jantucha kʼalakpʼastʼaknantʼik tacha
jasʼatʼan. Chun, ox kʼaʼuntʼik tacha jasʼatʼan yu jantu
tamispay laqtaqal pero kalakpʼastʼaknantʼik tacha xapaynincha.
\v 21 La ixlhachimoʼon Dios najun: “Kaklaqlhixaqalayaʼ
ni aniy lapanakni laka lhichivin yu jantu tamalaqasiy,
mas kaval xachivinti yu minchal alakataun. Pero jantu
kintaqalasmatʼaʼ, najun ni Dios.”
\p
\v 22 Ex chuncha, tejkan kʼachʼivin lhichivin yu jantu
mispakan yucha va para kalakmasunil ixtapʼasta Dios
yu jantu talhakapuʼan, jantu para yu talhakapuʼan. Yu
ixlaqputeʼeka ixchivinti Dios yucha va para yu talhakapuʼan.
\v 23 Chuncha incha tachun yu talhakapuʼan tataqxtoʼa
y tachun tachiviniy lhichivin yu jantu malaqasikan ex
katanuchal qayntaun lapanaki yu jantukaʼ laniy u yu
jantukaʼ lhakapuʼan, ex yucha katajunan va lokos untʼatʼik.
\v 24 Pero incha tachun talaqputeʼey ixchivinti Dios,
ex katanuchal qayntaun yu jantu lhakapuʼan u yu jantukaʼ
laniy ex niman kaʼukskʼatsayaʼ ni alin ixtalaqalhin.
Kakʼatsanaʼ ni lhitʼajun laqtaqal por ixchivintikʼan
tachun ni lapanakni.
\v 25 Ex yucha niman kamispayaʼ yu jantu ox ixmaqsaqmaʼata
la ixjalhanuti. Katalakaputatamayaʼ laka tʼun, katoʼoyayaʼ
Dios, va kanaunaʼ: “Laqsaval Dios alinta kun uxiknan.”
\s Tas maqskʼiniy katamakal tejkan tataqxtoʼa yu talhakapuʼan
\p
\v 26 Ex chuncha, ketʼalaqaunin, ¿tisuncha maqskʼiniy
kamakau? Tejkan uxiknankʼan katʼaqxtʼoqtʼik lati lay
katamilpal Salmos, lati lay katamalaninil, lati lay katalaqputeʼel
yu Dios jamasunil, lati lay katachivinil laka lhichivin
yu jantu mispakan, y lati lay katalhichivinchoqol yu
naunputun. Pero tachun katamakal para kataʼayal ixlhakapuʼatkʼan
ixlapanakni Dios.
\v 27 Tejkan chʼivinanatʼik laka lhichivin yu jantu
mispakan va qayntʼuy u qayntʼutu kachʼivinintʼik, pero
va si por qayntamin kalalaksaklhipʼintʼik. Vachu maqskʼiniy
kaʼalil qayntaun yu kalhichivinchoqol yu naunputun.
\v 28 Incha jantu kaʼalil yu lay kalhichivinchoqol yu
naunputun, ex maqskʼiniy valiʼiy saq katataulal taʼan
tataqxtoʼa yu talhakapuʼan. Katatʼachivinil Dios ixʼamankʼan.
\v 29 Va qayntʼuy u qayntʼutu katalaqputeʼel ixchivinti
Dios y yu alati katamakal kuenta incha laqsaval yu tanajun.
\v 30 Incha alin tuʼuchun yu Dios masuniy aqayntaun
yu valiʼiy taulay ex lay kachivinil. Ex yu tsukuy chivin
lay valiʼiy saq kataulal.
\v 31 Mintachunkʼan lay kʼalaqpʼutʼeʼetʼik ixchivinti
Dios por minqayntaminkʼan para tachun lay katalanil
y kalakmapʼaysnikal.
\v 32 Yu talaqputeʼey ixchivinti Dios maqskʼiniy katalhichimoʼol
ixjatsukuntikʼan.
\v 33 Dios yucha jantu lhipaʼiniy talakchʼiliti, va maqamay
yu ox kʼamakʼatʼi. Chuncha maqskʼiniy kaval mas va toʼoxtaycha
taʼan tataqxtoʼa yu talhakapuʼan.
\p
\v 34 Ni xanatin maqskʼiniy saq katataulal la mintaqxtoʼatkʼan.
Yuʼuncha jantu katalhitsukul lakatin katachivinil. Va
kataqasmaknal chuncha tacha najun ixchivinti Dios.
\v 35 Incha takʼatsaputun tuʼuchun, lay katalhisakmil
ixapaykʼan la ixchaqakʼan. Jantu ox tasuy katatsukul
chivinin taʼan tataqxtoʼa yu talhakapuʼan.
\v 36 Jantu kun uxiknan kaminchal ixchivinti Dios. Vachu
jantu vamun para uxiknankʼan kachil ixchivinti Dios.
\v 37 Incha matichun najun ni yucha paxtoqniy kalaqputeʼel
ixchivinti Dios y lhilay ox tijuyal kun ni Espíritu
Santo ex yucha maqskʼiniy kalhakapuʼal ni va ixlhachimoʼon
Dios yu klatsʼoqniyau.
\v 38 Incha jantu lhakapuʼan ex yucha vachu jantu lay
kalhakapuʼanikal.
\p
\v 39 Ex chuncha, ketʼalaqaunin, kalhilaqsoʼotʼik laqputeʼenin
ixchivinti Dios. Jantu kalaktʼanchʼatʼik yu tachiviniy
lhichivin yu jantu mispakan.
\v 40 Tejkan tʼaqxtʼoʼatʼik ox kamakʼatʼik y jantu kʼatʼalakchʼilitʼik.
\c 15
\s Tejkan katakujchoqoyaʼ yu janinin
\p
\v 1 Ketʼalaqaunin, chavaycha iknajun kapʼastʼaktʼik
ni ox chivinti yu klalaqputeʼeniu yu uxiknankʼan laʼaʼitʼik
y yu ox tʼaylhipʼiniyatʼik.
\v 2 Ni anchanu chivinti yucha lay pʼulaqtʼaxtʼuyatʼik
incha ox tʼaylhipʼinatʼik tacha klalaqputeʼeniu. Incha
jantu, ex va tacha jantu tuʼuchun kaval mas lhakʼapʼupʼinatʼik.
\v 3 Klalaqputeʼeniu ni chivinti yu apalay maqskʼiniy
kakʼatsʼatʼik. Vachu chun tacha klaqaʼil ni kitʼin klalaqputeʼeniu
ni Cristo nil por kintalaqalhinkʼan, chuncha tacha ixnajunta
la ixchivinti Dios taʼan tsʼoqkanta.
\v 4 Va maknukal y laʼatʼutu julchan val ex takukchoqol,
chuncha tacha ixnajunta la ixchivinti Dios.
\v 5 Ex tasunil ni Pedro ex astan jalaktasunikal yu
pumakautʼuy.
\v 6 Ex taval jalaktasunikal laqakis ciento lapanakni
yu talhakapuʼan y chʼantaun talaqtsʼil. Chavay pumalhuu
yuʼuncha vananaj takujta mas lati tanitacha.
\v 7 Ex tasunil ni Santiago, ex astan laktasunil tachun
yu ixjalaqmalaqachata.
\v 8 Astan vachu kintasunil ni kitʼin, mas por kilaktuʼunti
va xajkunita tacha jasʼatʼa yu jantu ox kaktsukul.
\v 9 Kitʼin kunita yu apalay lakatʼuniy kun yu alati
ixtamalaqachan ni Cristo. Mas jantu kimpaxtoqniy para
kakval ixtamalaqachan, va ox klaqmamaqanlqajnival ixlapanakni
Dios.
\v 10 Por yu kixtaqnil ni Dios kitʼin kunita tacha yu
kunita. Ni Dios va kintamapaynin pero jantu valiʼiy
kaval ixjamapayninti. Chavay va apalay pʼays iktapatsanil
xajantu yu alati. Pero jantu kaktapatsal keʼeman la
kintapʼasta. Va ixtapʼasta ni Dios yu kixtaqniy por
ixjamapayninti.
\v 11 Chuncha jantu maqskʼiniy kʼamakʼatʼik kuenta mas
kaval kitʼin u mas kaval yuʼuncha, va klalaqputeʼeniu
y uxiknan lhakʼapʼupʼintʼik.
\s Ni janinin katakujchoqoyaʼ
\p
\v 12 Kijnankʼan klalaqputeʼeniyau ni Cristo takukchoqol
laka putaknun. ¿Ex valiʼiycha lati uxiknankʼan naunatʼik
ni jantu katakujchoqoyaʼ yu janinin?
\v 13 Incha jantu lay takujchoqoy yu janinin ex Cristo
vachu jantu kakujchoqol.
\v 14 Incha Cristo jantu kakujchoqol ex jantu tuʼuchun
kaval mas klalaqputeʼeniu y vachu jantu tuʼuchun kaval
mas lhakʼapʼupʼinatʼik.
\v 15 Incha chuncha junita ex kijnankʼan kakxajchaʼau
tacha lapanakni yu jantu laqsaval talhichiviniy Dios.
Pero kijnankʼan klajuniu ni Dios makutuchoqol ni Cristo.
Ex incha jantu laqsaval ni janinin tatakukchoqoy lakaputaknun,
ex vachu ni Dios jantu laqsaval kamakutuchoqol ni Cristo.
\v 16 Incha yu janinin jantu takujchoqoy ex Cristo vachu
jantu kakujchoqol.
\v 17 Incha Cristo jantu kakujchoqol ex milhakapuʼatkʼan
jantu tuʼuchun xtapal kaval. Vananaj ixtʼiʼuyanantʼik
la mintalaqalhinkʼan.
\v 18 Incha laqsaval chuncha junita ex yu tanitacha
yu ixtalhakapuʼan Cristo, yuʼuncha valiʼiy tatsʼanqata.
\v 19 Incha vamun para ni aniy jatsukunti pakxanʼiyau
ni Cristo ex apalay payniʼincha ni kijnan.
\p
\v 20 Pero laqsaval ni Cristo yucha kujchoqol y chuncha
val yu xapʼunaj kun yu alati janinin. Yucha pʼunaj kujchoqol
ex astan yu alati.
\v 21 Vachu chun tacha puʼaqtaynil ni lhinin por yu
makal qayntaun lapanaki. Ex chuncha vachuʼ por yu makal
aqayntaun lapanaki puʼaqtaynil takujchoqoy ni janinin.
\v 22 Chuncha tachun niyau por minchaʼau kun Adán. Ex
vachuʼ tachun yu chʼantaun juntau kun Cristo kalhitsukuyau
jatsukunti.
\v 23 Pero jantu va qayntaun paxtoqniy. Xapʼunaj paxtoqnil
ni Cristo y yucha kujchoqol. Ex astan katapaxtoqniyaʼ
yu ixlapanakni ni Cristo tejkan kaminchoqoyaʼ.
\v 24 Ex astan katamaktayaʼ tachun. Cristo kaminaʼ maqosun
tachun palhachimoʼon kun tachun tapʼasta. Ex kamaqxtaqnichoqoyaʼ
ixpalhachimoʼon la ixtamakaʼ ixPay Dios.
\v 25 Yucha maqskʼiniy kalhachimoʼonul tus tejkan kalhajaʼoyaʼ
tachun ixtʼalaxkaynin.
\v 26 Vachu yu lhinin va ixtʼalaxkayaʼ y yucha va astan
kamaqosuyaʼ.
\v 27 Va tsʼoqkanta la ixchivinti Dios ni kamaqxtaqnikal
tachun yu alin ni Cristo para kaʼakchʼintamaʼol. Chuncha
najun ni laqsaval kalhichimoʼoyaʼ tachun yu alin, pero
jantu kalhichimoʼoyaʼ ni Dios, va yucha yu maqxtaqnil.
\v 28 Tejkan tachun ixnavin kunaʼ ex yu Sasʼatʼa Dios
va ixnavin kunaʼ ni Dios yu maqxtaqnil tachun. Ex chuncha
Dios kalhachimoʼonunʼol tachun yu alin.
\p
\v 29 Incha jantu katakujchoqoyaʼ ni janinin, ¿ex tisuncha
xtapal tejkan taʼaqchajʼajuy para ixlapanaknikʼan yu
tanitacha?
\v 30 Ex chuncha vachu kijnankʼan, ¿valiʼiycha iktiʼukxuntayayaucha
chux julchan chux hora laqa lhitaʼay la ketsukuntikʼan?
\v 31 Ketʼalaqaunin, klhiʼachantajuy por uxiknankʼan
ni chʼantaun untʼatʼik kun Jesucristo kiJalhachimoʼonukʼan.
Laqsaval klajunau ni lhilhiy iktijuyal laqa lhitaʼay
taʼan lay kaknil.
\v 32 Kitʼin iktayanil yu machaqan laka putaulan Éfeso
tus tacha maqtalin ixtajunita. ¿Pero tisuncha klhajay
mas chuncha kintamakal incha laqsaval jantu katakujchoqoyaʼ
ni janinin? Ex apalay ox kaval tacha tanajun lati: “Chavaycha
ox kavajiu, y ox kaʼoqnuu, va niman kaniyau.”
\p
\v 33 Jantu kʼamakʼanukʼantʼik. Tacha najun titaun chivinti:
“Ni lapanakni yu talaktuʼunun, valiʼiy kintamaqatsʼanqaniyan
yu ox la kimputsukkʼan.”
\v 34 Kʼamapʼaxatʼik mijatapastakʼatkʼan para ox kaval
y kʼamakʼauntʼijlatʼik mintalaqalhinkʼan. Lati uxiknankʼan
jantu mispʼayatʼik Dios. Chuncha klajunau para kalhimaxanantʼik.
\s Tacha kunaʼ yu lakatunaj tejkan katakujchoqoyaʼ ni janinin
\p
\v 35 Ka va lay alin yu kalhasakmininaʼ: “¿Tas katapukujchoqoyacha
ni janinin? ¿Tisuncha lakatunaj katalhitsukuyaʼ?”
\v 36 Va lhitontoj yu lhasakminin. Laqataun xataltsʼi
incha kachʼantʼi, tsʼanqay kapuchʼiʼelal tacha kanil
ex astan lay pʼunchoqoy.
\v 37 Jantu chʼankan xajavan yu pʼuncha, va yu valiʼiy
xataltsʼi chʼankan mas kaval kʼispa u trigo u tichichuncha.
\v 38 Ex Dios xtaqniy xaxqoy tacha makaputul ni yucha.
Laqatamin xataltsʼi si putamin talhitsukuy xaxqoy tacha
yu paxtoqniy.
\v 39 Jantu tachun lakatunaj va taun kaval. Ixlakatunaj
lapanaki taun tasuy, ixlakatunajkʼan talhitsukuti aputaun
tasuy, vachu ixlakatunajkʼan jatanti aputaun junita y
tsʼoʼon vachu aputaun lakatunaj talhitʼajun.
\v 40 Yu alin laktʼiyan va putaun, yu alin lakamunukpaʼ
va aputaun. Vachu yu ayaj kʼus yu alin laktʼiyan va
tumpaj y yu kʼus yu alin lakamunukpaʼ aputaun junita.
\v 41 Chuncha tacha yu julchan aputaun lhitʼajun ixkilmaknauxtu,
yu malkuyuʼ aputaun, y yu jastʼakun aputaun. Laqatamin
jastʼaku va tumpaj ixmaklkukʼan.
\v 42 Vachu chun katapasayaʼ tejkan katakujchoqoyaʼ
ni janinin. Tumpaj jun ixlakatunajkʼan yu lakmaknukan,
va niman puchʼiy, pero yu katakujchoqoyaʼ yucha jantucha
aqtaun kapuchʼiyaʼ.
\v 43 Yu maknukan oxicha miʼojota ixlakatunaj pero tejkan
katakukchoqoyaʼ ex ox kalaqauntayachoqoyaʼ. Tejkan katakukchoqoyaʼ
ex ox kalhitsukuchoqoyaʼ ixtapʼasta.
\v 44 Yu maknukan yucha valiʼiy lakatunaj yu lhitsukukan
aniy lakamunukpaʼ, pero yu katakukchoqoyaʼ yucha va xalakatunaj
laktʼiyan kunaʼ. Alin putʼuy lakatunaj, alin yu lhitsukukan
aniy lakamunukpaʼ y alin yu xalakatunaj laktʼiyan.
\p
\v 45 Xlhiyucha va tsʼoqkanta la ixchivinti Dios: “Yu
pʼunaj Adán yucha lhitsukul xalakatunaj aniy lakamunukpaʼ.”
Pero ni Cristo yucha val yu xaʼastan Adán. Yucha xtaʼa
ni Espíritu yu xtaʼa jatsukunti.
\v 46 Ni jatsukunti yu xtaʼa ni Espíritu jantu pʼunaj
lhitsukukan. Yu pʼunaj lhitsukukan va yu xalakatunaj
aniy lakamunukpaʼ. Ex astan lhitsukukan yu ox jatsukunti.
\v 47 Yu pʼunaj lapanaki makakal tʼun y tsukul aniy
lakamunukpaʼ. Yu xaʼastan lapanaki yu kiJalhachimoʼonukʼan
minchal laktʼiyan.
\v 48 Yu alin lakamunukpaʼ va aqstanchun tacha ni lapanaki
yu jamakanti tʼun. Yu tapaxtoqniy laktʼiyan va tacha
ni lapanaki yu minchal laktʼiyan.
\v 49 Chavaycha vachu chun tasuyau tacha ni lapanaki
yu jamakanti tʼun, ex vachu chun katasuyau tacha ni lapanaki
yu minchal laktʼiyan.
\p
\v 50 Ketʼalaqaunin, iknajun kakʼatsʼatʼik yu valiʼiy
kivakaxkʼan ali kejakʼalkʼan jantu lay tanuyachal taʼan
lhachimoʼonun Dios. Vachu yu kilakatunajkʼan yu puchʼiy
jantu lay xajachal para jantu aqtaun kapuchʼil.
\v 51 Iknajun kakʼatsʼatʼik taun chivinti yu jantu ixmispakan.
Jantu tachun kaniyau pero tachun katapaxaʼoyau.
\v 52 Va taun laqatsʼalaj, va tacha aqtaun tsʼupʼiks
kalakpʼuʼu tejkan kapusuntajukanaʼ ni sasqol yu kaputamaktayaʼ
ni lakamunukpaʼ. Laqsaval kamakatʼaunaʼ ni sqol, ex yu
janinin katakujchoqoyaʼ kun ixlakatunajkʼan yu jantu
aqtaun kamiʼoyaʼ, y kijnan yu vananaj katsukuyau katapaxaʼoyau.
\v 53 Laqsaval kilakatunajkʼan yu puchʼiy maqskʼiniy
katapalal lakatunaj yu jantu aqtaun kapuchʼiyaʼ. Vachu
kilakatunajkʼan yu niy maqskʼiniy katapalal lakatunaj
yu jantu aqtaun kaniyaʼ.
\v 54 Chuncha tejkan yu puchʼiy kalhixajanta yu jantu
puchʼiy, yu niy kalhixajanta yu jantu aqtaun niy. Ex
katapasayaʼ tacha tsʼoqkanta la ixchivinti Dios taʼan
najun:
\q Yu lhinin jantucha apalay kalhitsukul tapʼasta, va lhajakalcha.
\q
\v 55 Lhinin, chavaycha, ¿tas ancha alin mintapʼasta para
kilamiu unan?
\q ¿Toʼoxtaycha alin mintapʼasta para kilalhajau?
\m
\v 56 Chavaycha yu lhinin lay kintaʼuyan, va por alin
talaqalhin. Chuncha yu talaqalhin ayaj lhitʼajun tapʼasta,
va por ixlhachimoʼon Dios kintamukʼaniyan laqtaqal.
\v 57 Pero ayaj lhuu ikxtaqniy lhimalaqpuchuncha ni
Dios. Yucha kintaxtaqniyan tapʼasta para kalhajau por
Jesucristo kiJalhachimoʼonukʼan.
\p
\v 58 Xlhiyucha, ketʼalaqaunin yu klaʼachaniyau, ox kaʼukxpʼupʼintʼik,
jantu matichun katamaʼoqspalnin. Apalay kʼatʼapʼatsʼanitʼik
ni kiJalhachimoʼonukʼan. Va kʼatsʼayatʼik ni jantu valiʼiy
kaval tejkan pʼays tʼapʼatsʼaniyatʼik.
\c 16
\s Ni tumin yu pusakkan para kilpatanin yu talhakapuʼan
\p
\v 1 Chavay klalhixaqalayau ni tumin yu pusakkan para
kilpatanin yu talhakapuʼan. Katʼaylhipʼinitʼik makanan
vachu chun tacha klaklhijunil yu tavilanal xaʼestado
Galacia.
\v 2 Xapʼunaj julchan laka semana minqayntamin kalhilkʼamaʼatʼik
mintuminkʼan yu xajachal para chuncha jantu katsʼukʼutʼik
maqxtoqnun tus tejkan kakchaanchal.
\v 3 Tejkan kaklalaqchaantachaʼau kilalaksakniu jaltanan
para katalhaʼal mintuminkʼan laka putaulan Jerusalén
kun kinkartas yu lay kalakpumispakal.
\v 4 Incha ox kaval kajkʼal ni kitʼin vachuʼ ex lay
chʼantaun kintatʼaʼal.
\s Ni Pablo lhichiviniy toʼoxtaycha kapuʼanaʼ
\p
\v 5 Kaktapasaʼelayau xaʼestado Macedonia ex kaklalaqchaantachaʼau.
Va maqskʼiniy kaktapasal Macedonia.
\v 6 Ka va lay kaklatʼataulau paqlhuu mas panchuncha
laka lhikʼasnin kaklatʼataulau. Ex astan tejkan kajkʼanchoqoya
alakataun lay kilaʼaqtayjuyau para kilakatin.
\v 7 Chavaycha jantu iktapasatijlaputun vamun kaklalaqtsʼiu.
Va klatʼataulputunau paqlhuu incha Dios najun.
\v 8 Pero aniy kaktaulaʼ laka putaulan Éfeso tus kalakachinaʼ
xakʼatan Pentecostes.
\v 9 Chavaycha aniy ox lay kaktanuchal para kaklalhaval
ixlhitapatsa Dios mas la alin yu tʼalaxkaynin.
\p
\v 10 Incha kachaʼananta ni Timoteo kalhilaqsoʼotʼik
katatʼataulan oxamaktaun. Yucha ox tapatsay la ixlhitapatsa
ni Jalhachimoʼonu Jesucristo, chuncha tacha iktapatsay
ni kitʼin.
\v 11 Jantu xataʼayuʼ uxiknankʼan kʼalaktʼanchʼanitʼik.
Tejkan kaminchoqoyaʼ ox kaʼaqtʼayʼutʼik la ixlakatin
para lay kilaqminchoqol. Kitʼin va ikpakxanʼiy kilaqmil
kun alati ketʼalaqauninkʼan.
\v 12 Yu kintʼalaqajunkʼan Apolos, yucha aqlhuu iktapayninil
para katalaqʼanchaʼan kun yu alati ketʼalaqauninkʼan.
Pero chavaycha jantu uxaʼanachal, pero chun kaʼananta
tejkan lay kalhilayaʼ.
\s Ni Pablo lakmastakʼachoqoy
\p
\v 13 Ox kʼalhistʼajkʼantʼik y ox kʼatʼapʼasnitʼik la
milhakapuʼatkʼan. Jantu katʼalhanantʼik. Kʼaʼuntʼik
laqpʼaysnin lapanakni.
\v 14 Tachun yu makʼayatʼik, va kamakʼatʼik kun lhuu
japaxkanti.
\v 15 Ketʼalaqaunin, kʼatsʼayatʼik ni Estéfanas chʼantaun
kun yu tavilanal la ixchaqaʼ, yuʼuncha pʼunaj talhitanul
yu ox chivinti ancha xaʼestado Akaya. Va si pʼas tamakay
para kataʼaqtayjul alati yu talhakapuʼan.
\v 16 Klatapayniniyau ni chuncha kʼamakʼatʼik tacha
tanajun yuʼuncha y vachu kamakʼatʼik tacha tanajun tachun
yu chʼantaun tatapatsay kun yuʼuncha.
\v 17 Klhiʼachantajuy por kintalaqchil ni Estéfanas
ali Fortunato ali Akaiko. Yuʼuncha lay kiʼaqtayjul taʼan
uxiknankʼan jantu lay kilaʼaqtayjuu va por maqati vilananchipitik.
\p
\v 18 Ox kintamalakaʼulanil kelhanuti y vachu katamalakaʼulaniyan
melhanutkʼan. Ox kʼalaktʼoʼoyatʼik.
\p
\v 19 Tachun yu talhakapuʼan aniy xaʼestado Asia tamalaqachaniyan
jamastakʼanti. Vachu ni Akila ali Priscila tamastakʼayan
tacha sasʼatʼan Dios. Vachu tachun yu talhakapuʼan yu
tataqxtoʼa la ixchaqaʼ tamastakʼayan.
\v 20 Tachun ketʼalaqauninkʼan tamastakʼayan. Ox kʼalamastʼakʼatʼik
kun la kiltastukni tacha yu laqsaval ixlapanakni Dios.
\p
\v 21 Kitʼin kPablo chavay klamastakʼayau kun kijatsʼoqnuti
la kimakaʼ.
\p
\v 22 Incha matichun jantu achaniy kiJalhachimoʼonukʼan
Jesucristo ex kamukʼanikalcha maqanlqajnati. Niman kaminchoqol
kiJalhachimoʼonukʼan.
\p
\v 23 KiJalhachimoʼonukʼan Jesucristo kataxtaqnin yu
lajʼoxi la metsukuntikʼan.
\v 24 Tachun uxiknankʼan yu ixlapanakni Cristo Jesús
ox klapaxkayau. Chuncha kavalcha.