\id 2CO
\h 2 CORINTIOS
\mt2 Yu Xaʼaqxtʼiyunuʼ Karta yu Jalaqtsʼoqnil Pablo Ixlapanakni Dios yu Tavilanal Corinto
\c 1
\s Ni Pablo jalakmastakʼay yu tavilanal laka putaulan Corinto
\p
\v 1 Kitʼin kPablo va kimalaqachal ni Cristo Jesús kaklaqputeʼenil
ixchivinti, va por chuncha naul ni Dios. Va iktʼavil
kilaqajkʼan Timoteo. Klatsʼoqniyau ni uxiknan yu ixlapanakni
Dios untʼatʼik yu vilanantʼik laka putaulan Corinto
y vachu tachun yu ixnavin Dios laka estado Akaya.
\v 2 Ni Dios kun kiJalhachimoʼonukʼan Jesucristo kataxtaqnin
yu lajʼoxi y oxamaktaun katamakan.
\s Ni Pablo najun ni Dios aqtayjuy tejkan maqanlqajnan
\p
\v 3 Ox katoʼoyakal ni Dios ixPay kiJalhachimoʼonukʼan
Jesucristo. Yucha kimPaykʼan yu ayaj mapayninin y va
kiDioskʼan yu kintamalakaʼulayan.
\v 4 Kintamalakaʼulayan mas va tisuncha kimaqanlqajnatkʼan
kaval yu klhitapasayau. Ex chuncha lay klakmalakaʼulayau
yu alati yu tamaqanlqajnan, vachu va tacha ni Dios kintamalakaʼulan
ni kijnankʼan.
\v 5 Cristo ayaj maqanlqajnal y vachu kintapaxtoqniyan
lati ixmaqanlqajnati ni yucha. Pero vachu Cristo la
ox kintamalakaʼulayan la ketsukuntikʼan.
\v 6 Tejkan ikmaqanlqajnanau yucha va para kamalakʼaʼulakʼantʼik
ni uxiknan, para lay kʼalaqtʼaxtʼutʼik. Tejkan Dios kintamalakaʼulayan
ex vachu para kamalakʼaʼulakʼantʼik la metsukuntikʼan.
Ex lay ox katʼayanitʼik tejkan kʼamaʼanlʼajnanapitik
tacha kijnankʼan.
\v 7 Kijnan laqsaval klhakapuʼanau ni ox katʼayaniyapitik.
Ni Dios tamalakaʼulayan ni uxiknan tejkan maʼanlʼajnanatʼik
vachu va tacha kintamalakaʼulayan ni kijnan tejkan ikmaqanlqajnanau.
\p
\v 8 Ketʼalaqaunin, iknaunau ni kakʼatsʼatʼik tacha ikmaqanlqajnau
tejkan xakvilanau xaʼestado Asia, va tus miʼol kintapʼastkʼan.
Xaklhilayau kakniyaucha.
\v 9 Laqsaval xaklhilayau ixkintapaxtoqniyan kakniucha.
Chuncha val para jantucha kajkʼatsau ni va keʼemankʼan
ikmaxajnichaʼau. Va klhakapuʼau vamun ni Dios para kintamalaqtaxtun.
Yucha lay majkujuchoqoy mas yu nitacha.
\v 10 Ni Dios kintamalaqtaxtun para jantu kakniu y ijkʼatsayau
ni kintamalaqtaxtuchoqoyan aaqtaun mas va tavanancha.
\v 11 Chuncha kunaʼ incha skʼinatʼik Dios por kijnankʼan.
Ex chuncha kaxajtachal ni lhuvaj lapanakni va kataxtaqniyaʼ
lhimalaqpuchuncha ni Dios por yu ox yu klaqaʼiyau tejkan
skʼinatʼik Dios.
\s Ni Pablo jantu lay kaʼal laka putaulan Corinto
\p
\v 12 Va yu inchine yu klhiʼachantajuyau. Kun tachun
la kelhanutkʼan ijkʼatsayau ni ox iktiʼukxuntayayau
la ixlakaʼukxpukʼan ni lapanakni aniy lakamunukpaʼ.
Jantu ikmakanunun y chuncha xaktiʼukxuntayayau tejkan
xakvilanau kun uxiknan. Jantu iktiʼukxuntayayau tacha
najun yu xajatapastakʼati ni aniy lakamunukpaʼ, va iktiʼukxuntayayau
kun ixjamapayninti ni Dios.
\v 13 Vamun klatsʼoqnitau yu lay pʼutʼeʼeyatʼik, yu lay
malaʼasiyatʼik. Klhilay ni kaminaʼ julchan tejkan kilamalaqasiniyau
tachun,
\v 14 tacha chavay kilamalaqasiniyau tsʼuniy. Ex chuncha
ni anchanu julchan tejkan kaminchoqoyaʼ kiJalhachimoʼonukʼan
Jesucristo uxiknan lay kalhiʼachʼantʼaʼuyapitik por
kitʼin, vachu va tacha kitʼin kaklhiʼachantajuyaʼ por
uxiknan.
\p
\v 15 Va xajkʼatsaycha ni laqsaval chuncha kalhiʼachʼantʼaʼutʼik
por kitʼin. Xlhiyucha xaklalaqʼanchoqoyau aaqtauncha,
ex chuncha aaqtauncha lay kalhiʼachantajuu por lalaqtsʼinchoqoyau.
\v 16 Va xakpuʼuxaʼan mintʼunkʼan tejkan kʼal lakatʼun
Macedonia, ex aaqtaun xakpuʼuxaminchoqoy taʼan vilanantʼik.
Ex astan lay ixkilamalaqachachoqoo tus xaʼestado Judea.
\v 17 Chuncha xakmakaputun pero jantu chuncha kaxajchal
pero kitʼin jantu ikmakay tʼuy jatapastakʼati. Tejkan
iknajun “chun” jantu iknaunputun incha “jantu”.
\v 18 Dios lay lhakapuʼanikan y vachu ni kijnan lay
kilalhakapuʼaniyau. Jantu aqtaun tʼuy chivinti klajunau
ni “chun” kun ni “jantu”.
\v 19 Kijnan, yu kitʼin ali Silvano ali Timoteo, klalaqputeʼeniu
ni Jesucristo yu Sasʼatʼa Dios. Yucha va si kintajunan
“chun”.
\v 20 Tachun yu kintajunin ni Dios yu kintamakaniʼoyan
va alinʼojota kun Cristo. Chuncha kintajunan “chun”,
ni kaʼalinaʼ yu naul Dios. Ex xlhiyucha naunau “va
chuncha kaval” para ay kamakakal ni Dios.
\v 21 Ni Dios kintaxtaqnitan tapʼasta kun uxiknan para
ox kataylhaʼau kun Cristo. Dios kintalaksaktancha.
\v 22 Makal para kakʼatsakal ni va ixlapanakni juntau.
Kintaxtaqnitancha ni Espíritu Santo para kapukʼatsau
ni laqsaval kintamalaqtaxtuyan.
\p
\v 23 Kitʼin iknajun ni Dios lay kalhitaulal ni jantu
klalaqʼau va por jantu xaklamamaxaniputunau.
\v 24 Jantu klalhichimoʼoputunau laqatapʼasta la milhakapuʼatkʼan.
Va ijkʼatsay ni ox tʼaylhipʼinatʼik, xlhiyucha klaʼaqtayjuputunau
para katsʼukʼutʼik kun achati.
\c 2
\p
\v 1 Xlhiyucha ikpastaklhi ni jantu klalaqʼanchoqoo
para jantu kaklamamaqanixvau.
\v 2 Incha kaklamamaqanixvau ex jantu matichun lay kimaʼachajul.
Vamun uxiknan.
\v 3 Va xlhiyucha klatsʼoqniu para jantu kilamamaqanixvau
tejkan klalaqʼau, va tapaxtoqniyan kilamaʼachajuu. Ox
ijkʼatsaycha ni tejkan kʼachan ni kitʼin ex vachu achʼanatʼik
mintachunkʼan.
\v 4 Tejkan klatsʼoqniu ayaj ixkimpastakʼuy y xakmaqaninin
tus xajqalhun. Jantu klatsʼoqniu para klamamaqanixvau,
va para kakʼatsʼatʼik ni ayaj klapaxkayau.
\s Ni Pablo lakjuniy ni katamalaqmixinil qayntaun yu makal laqtaqal
\p
\v 5 Ni anchanu lapanaki yu kimamaqanixval jantu vamun
kitʼin kimamaqanixval, vachu tamamaqanixvan mintachunkʼan
mas va tsʼuniy. Jantu kimaqamay kaklapasanil kinchivinti
xlhiyucha iknajun va lakatsʼuniy.
\v 6 Va laycha mintachunkʼan xtʼaqnitʼik ixmaqanlqajnati
yu ixpaxtoqniy. Chavaycha ka oxicha.
\v 7 Chavay maqskʼiniy kʼamalaqmixinitʼik y kʼamalakʼaʼulatʼik.
Incha jantu, ka va lay jantu katayaniyaʼ ixmaqaniti.
\v 8 Xlhiyucha klatapayniniyau ni kamasunitʼik mijapaxkantikʼan.
\v 9 Xlhiyucha klatsʼoqniucha para ox kajkʼatsal incha
makʼayatʼik tachun yu klalhijunau.
\v 10 Incha malaqmixiniyatʼik ex kitʼin vachu ikmalaqmixiniy.
Incha kimakanil tuʼuchun ex kmalaqmixiniy por naunatʼik
uxiknan. Va Cristo kilaqtsʼin tejkan ikmalaqmixiniy.
\v 11 Chuncha jantu kintalhajan ni Satanás, ox kʼatsayau
yu makaputun.
\s Tejkan ni Pablo ixvil laka putaulan Troas y jantu kapaxtoqlhi ni Tito
\p
\v 12 Tejkan ikchaʼal laka putaulan Troas para kaklaqputeʼel
ni ox chivinti yu lhichiviniy Cristo ancha ox ikxtaqnikal
lakatin para kaktapatsanil kiJalhachimoʼonukʼan.
\v 13 Pero jantu kaktemal kilaqaj Tito, xlhiyucha ixkimpastakʼuy.
Xlhiyucha iktaxtuchal y kʼal xalakatʼun Macedonia.
\s Ni Dios ox kintalhaʼanan para kalhajayau kun Cristo
\p
\v 14 Kaxtaqniu lhimalaqpuchuncha ni Dios, va yucha ox
kintalhaʼanan para kalhajayau kun Cristo. Lakmakʼatsaniy
ni lapanakni ixchivinti talakachux por yu ikmakayau
kijnankʼan y chuncha xajachal tacha tuʼuchun yu ox sʼejenʼe.
\v 15 Kijnankʼan por yu ikmakayau va tacha taun tuʼuchun
yu sʼejenʼe yu Cristo moqslaniy ni Dios. Chuncha xajachal
kilhitapatskʼan kun yu katalaqtaxtuyaʼ ali yu katatsʼanqayaʼ.
\v 16 Kun lapanakni yu katatsʼanqayaʼ ni kijnankʼan
va tacha lhinin yu pʼuks akamin y jamaqninin pero kun
yu katalaqtaxtuyaʼ kijnankʼan va tacha yu sʼej akamin
yu xtaʼa jatsukunti. ¿Taʼayucha lay makay ni aniy lhitapatsa?
\v 17 Kijnan jantu tacha yu vamun tamaqamay katapulhajal
tumin ixlaqputeʼeka ixchivinti Dios. Ni Dios kintamalaqachan
y Dios kintalaqtsʼinan ni vas iktapatsayau tacha ixlapanakni
ni Cristo.
\c 3
\s Ni Pablo lakmasunil ni ox chivinti y xajachal tacha aqxtaun karta la ixjalhanutkʼan
\p
\v 1 Tejkan chuncha iknaunau ka va pʼastʼakʼatʼik ni
kijnankʼan va keʼemankʼan ay ikmakachoqokanau. Jantu
maqskʼiniy kaklhitsukuu aqxtaun karta yu kaklaxtaqniu
yu kilapumispau y vachu jantu maqskʼiniy klaskʼiniu
aqxtaun karta.
\v 2 Pero uxiknan va kinkartajkʼan untʼatʼik. Metsukuntikʼan
va tacha katsʼoqʼulakal la kelhanutkʼan. Ex tachun ni
lapanakni lay tamispaniyan metsukuntikʼan.
\v 3 Uxiknan va tacha aqxtaun karta untʼatʼik yu tsʼoqlhi
ni Cristo yu kijnan klhaʼoxiu tejkan klalaqputeʼeniu
ni ox chivinti. Pero anchanu karta jantu kaputsʼoqkal
tinta. Va putsʼoqkal ni ixʼEspíritu ni Dios yu kujta.
Ni aniy karta jantu katsʼoqmukʼakal laqa ltaʼal chiyux,
va tsʼoqmukʼakal la melhanutkʼan.
\p
\v 4 Chuncha ijkʼatsayau va por klhiʼaynau ni Dios por
yu makal Jesucristo.
\v 5 Kijnan jantu lay iknaunau ni lay kakmakau tuʼuchun
keʼemankʼan. Yu lay ikmakayau vamun por kintaʼaqtayjuyan
ni Dios.
\v 6 Yucha kintaʼaqtayjuyan para lay kaklhitapatsau
ixlaqputeʼeka ni sastʼi chivinti yu kintatʼatamakajun
Dios. Anchanu chivinti jantu va ixlhachimoʼon Moisés
yu tsʼoqkal, va yu xtaʼa ni Espíritu Santo. Ni chivinti
yu tsʼoqkal, yucha mukʼay laqtaqal para kanikal. Pero
ni Espíritu, yucha xtaʼa jatsukunti.
\s Apalay kʼus yu sastʼi chivinti yu minchal kun Dios
\p
\v 7 Ni lhachimoʼon yu tsʼoqmukakal laqa ltaʼal chiyux
xajchal lhinin pero va ayaj kʼus val. Tejkan Moisés
laqaʼil, ox ukxpukʼuliksna val ni Moisés tus jantu lay
katalaqapulaqtsʼil ni ixtʼaʼisraelitas, pero astan laqmixchoqol.
\v 8 Incha chuncha val yu anuʼ, ex apalay kʼus kʼunaʼ
yu xtaʼa ni Espíritu Santo.
\v 9 La kʼus ixjunita tejkan Moisés laqputeʼel ni lhachimoʼon
yu ixmukʼay laqtaqal. Ex apalay kʼus ixlaqputeʼeka ni
chivinti yu kintamaqosuniyan kintalaqalhinkʼan.
\v 10 Chuncha yu ayaj kʼus ixjunita jantucha kʼus tacha
yu chavaycha alin. Yu chavaycha alin va apalay kʼus.
\v 11 Incha la kʼus ixjunita yu miʼojotacha ex apalay
kʼus yu alin chavaycha yu kaʼalinaʼ mas va tavanancha.
\p
\v 12 Chuncha klhakapuʼanau y xlhiyucha klaqputeʼeyau
ni chivinti jantu kun talhanti.
\v 13 Jantu chuncha ixtapasay kun Moisés. Yucha ixlaqpupaqakan
kun laqchʼiti para jantu katalaqtsʼil ni lapanakni ni
ixtʼajun laqmixniʼ ixʼukxpuʼ yu kʼuliksnaʼ ixjunita.
\v 14 Va talapʼaysnil ixjatapastakʼatkʼan ni anchanu
lapanakni. Vananaj chavaycha tejkan taputeʼey yu maqaniyaʼ
ixchivinti Dios va tacha vananaj kataukʼal laqchʼiti
para jantu lay katalaqtsʼil y jantu katamalaqasil. Vamun
ni Cristo lay maqosuy para katamalaqasil.
\v 15 Mas chavaycha tejkan taputeʼey ixchivinti Moisés
va tacha vananaj kataukʼal para jantu lay katamalaqasil.
\v 16 Pero tejkan taspʼikchoqoycha qayntaun lapanaki
para katʼaʼal ni Jalhachimoʼonu Dios ex va tacha kamoqosunikal
ni laqchʼiti para lay kamalaqasil.
\v 17 Ni Jalhachimoʼonu Dios va Espíritu junita y taʼan
alin ni Espíritu ancha alin lakatin para oxamaktaun
katsʼukʼu.
\v 18 Ni tachun ni kijnan va tacha kamaqosunikaucha
ni laqchʼiti para lay kalakavanau. Laqtsʼinau ixʼoxixtu
ni Dios y chuncha kintamapaxalhaaniyan ketsukuntikʼan
para ox kajuu tacha yucha. Va chuncha kintamakayan ni
Jalhachimoʼonu Dios, va yucha ni Espíritu junita.
\c 4
\s Ni lhitapatsa yu Dios xtaqnil Pablo
\p
\v 1 Ni Dios ayaj kintamapaynin y kintaxtaqnin ni aniy
lhitapatsa yu ixlaqputeʼeka ixchivinti Dios. Xlhiyucha
jantu ikmakauntijlayau makanan mas lhitaʼay.
\v 2 Jantu maqsaq ikmakayau tuʼuchun y jantu ikmakayau
yu lhitamaxanikan, jantu klakmakanuyau lapanakni y jantu
ikmapaxayau yu naunputun ixchivinti Dios. Vamun ox ikmasuyau
yu laqsaval para lay kamalaqasikal. Chuncha klakmakʼatsaniyau
ni lapanakni ni kintapaxtoqniyan ni aniy lhitapatsa
y Dios kintalaqtsʼinan.
\v 3 Lati lapanakni jantu tamalaqasiy ni ox chivinti
yu klaqputeʼeyau. Yu jantu tamalaqasiy va yu katatsʼanqayaʼ.
\v 4 Ni lapanakni yu jantu talhakapuʼan, yu xadios aniy
lakamunukpaʼ va tacha laʼachʼixin jalakmakal la ixjatapastakʼatkʼan.
Ex chuncha jantu lay katamalaqasil ni ox chivinti yu
tacha kʼuliksnaʼ maklku yu masuy ixʼayaxtu ni Cristo.
Yucha va aqstanchun junita tacha Dios.
\v 5 Jantu ay ikmakakanau, va klaqputeʼeyau ni Jesucristo
va ni Jalhachimoʼonuʼ. Lakstʼuniy ikmakakanau tacha
miʼoqxtamatkʼan por iktoʼoyayau ni Jesús.
\v 6 Va Dios yu pʼunaj naul kamaktayl maklku taʼan putsʼista.
Vachu va yucha naul kamaktayl maklku la kelhanutkʼan
para kamispau ixʼayaxtu ni Dios tejkan mispayau ni Jesucristo.
\s Ni Pablo taylhaʼan masun ni ox chivinti mas ayaj lhitaʼay
\p
\v 7 Kijnan va tacha laqataun aqchoq yu makakan tʼun
yu jantu xtapal. Pero ixʼayaxtu ni Dios yu manuta la
ketsukuntikʼan va taun ay maqaliti. Chuncha tejkan ni
lapanakni talaqtsʼin ixtapʼasta ni Dios yu alin la ketsukuntikʼan
jantu kintatoʼoyan kijnan, va tatoʼoyay ni Dios.
\v 8 Mas si kintalhimaqchapuyan pero lay klaqtaxtuyau.
Aqtamix jantu ijkʼatsayau tas kaklayaucha pero ijkʼatsayau
ni ox kaxajtachal.
\v 9 Kintaxkaulhitsukuyan pero Dios jantu kintamakaunan.
Va kintasalakaputayan pero jantu kintamaqniyan.
\v 10 Ni maqanlqajnati yu klhitsukuyau la kilakatunajkʼan
va tacha ixmaqanlqajnati ni Jesucristo tejkan nil. Pero
iktaylhaʼanau y chuncha vachu tasuy ixjatsukunti ni
Jesucristo la kilakatunajkʼan.
\v 11 Tejkan aniy iktʼaunau va si kintamaqniputunan
por iktapatsaniyau ni Jesucristo. Ex chuncha xajachal
ni va tasuy ixjatsukunti ni Jesucristo la kilakatunajkʼan
mas kakniyau.
\v 12 Ex chuncha ikmaqanlqajnanau tus va laycha kakniu
pero yu uxiknankʼan lhixajachal para katsʼukʼutʼik.
\p
\v 13 Ixʼalin qayntaun yu tsʼoqlhi la ixchivinti Dios,
va naul: “Klhakapuʼal y xlhiyucha ikchivinil.” Vachu
va chuncha kilhakapuʼatkʼan. Klhakapuʼanau y xlhiyucha
ikchivinanau.
\v 14 Ijkʼatsayau ni Dios majkujuchoqol ni Jalhachimoʼonu
Jesús. Vachu kijnan va chʼantaun kun Jesucristo. Xlhiyucha
taun julchan kintamajkujuchoqoyan kijnan kun Jesús.
Ex kintalhaʼanan chʼantaun kun uxiknan taʼan vilchal.
\v 15 Tachun kimaqanlqajnatkʼan va por uxiknan. Chuncha
talhavay ni lapanakni yu jalaqxtaqnikan ni lajʼoxi yu
kintaxtaqniyan Dios. Vachu apalay qaynlhuu kataxtaqniyaʼ
lhimalaqpuchuncha y katatoʼoyayaʼ ni Dios.
\p
\v 16 Xlhiyucha jantu kintachaniyan. Mas kilakatunajkʼan
miʼojoy yu ketsukuntikʼan va lhilhiy tasastʼiʼan.
\v 17 Chavaycha va taun panchʼix ikmaqanlqajnanau tsʼuniy.
Yucha kaxajtachal ni kaklhitsukuyau yu ayaj ox yu jantu
aqtaun kamiʼoyaʼ, yu apalay ay xajantu yu maqanlqajnati.
\v 18 Jantu ikmakayau kuenta tachun yu tasuy, va ikmakayau
kuenta yu jantu tasuy. Yu tasuy aniy lakamunukpaʼ va
panchʼix alin y niman kamiʼoyaʼ pero yu jantu tasuy
yucha kaʼalinaʼ mas va tavanancha.
\c 5
\s Ni sastʼi lakatunaj yu kaputsukuyau laktʼiyan
\p
\v 1 Chavaycha ni kilakatunajkʼan va tacha aqataun pakʼatsa.
Mas kataqtalcha, kʼatsayau ni Dios kintamakanitan ox
chaqaʼ laktʼiyan, yu jantu katamakal lapanakni y jantu
aqtaun kamiʼoyaʼ.
\v 2 Chavaycha jatʼijnintau y ayaj klhilakatayaputunau
la ketsukuntikʼan yu xalakatunaj laktʼiyan.
\v 3 Chuncha tejkan kalhitsukuyau ni anchanu lakatunaj
va tacha kintaʼulaniyan sastʼi laqchʼiti para jantucha
maqaʼasas kaval ketsukuntikʼan.
\v 4 Tejkan tsukuyaukaʼ aniy la kilakatunajkʼan yu tacha
pakʼatsa junita laqsaval lhamaqanininau. Jantu va por
kintachanin yu aniy kilakatunajkʼan. Va ayaj lhitsukuputunau
yu sastʼi kilakatunajkʼan. Ex chuncha kilakatunajkʼan
yu kaniyaʼ lay kamapaxanikanau kun yu jantu aqtaun kamiʼoyaʼ.
\v 5 Ni Dios listuj kintamakan para kaklhitsukuu sastʼi
jatsukunti. Yucha kintaxtaqnitan ni Espíritu Santo yu
pukʼatsayau ni laqsaval chuncha kintamakaniyan.
\p
\v 6 Xlhiyucha kʼatsayau ni ox kaxajtachal. Kʼatsayau
ni tejkan vananaj aniy tʼaunau la kilakatunajkʼan jantu
lay tʼataulau ni Dios kiJalhachimoʼonukʼan.
\v 7 Mas chavaycha jantu lay laqtsʼinau, va taylhaʼanau
la kilhakapuʼatkʼan.
\v 8 Ox kʼatsayau ni ox kaxajtachal y apalay ox lhilayau
kamakajuu yu aniy kilakatunajkʼan y katʼataulau kiJalhachimoʼonukʼan.
\v 9 Ex chuncha mas tʼataulau u mas maqati vilanau va
si makaputunau yu lhiʼachantajuy ni yucha.
\v 10 Kintachunkʼan tsʼanqay kalaqʼau ni Cristo la ixpalhachimoʼon.
Ancha kalaqaʼiyau yu kintapaxtoqniyan por yu makayau
yu aniy la kilakatunajkʼan, mas va yu ox o yu jantu ox.
\s Ni Pablo tapatsay para oxamaktaun katatsukul lapanakni kun Dios
\p
\v 11 Xlhiyucha ox toʼoyayau ni Jalhachimoʼonuʼ y jalaqxaqalayau
ni lapanakni para katalhakapuʼal. Ni Dios ox kintamispayan
y kitʼin iknajun uxiknan vachu kilamispau.
\v 12 Jantu chuncha klajunau para lajʼay kakmakakau,
va klajunau para kalhiʼachʼantʼaʼutʼik por yu ikmakayau.
Ex lay kaʼaltʼaytʼik ni anchanu lapanakni. Yuʼuncha
lajʼay jalakmakakan por yu tasuy, mas jantu lajʼoxi kataval
la ixjalhanutkʼan.
\v 13 Incha lhilayatʼik ni va laklokos kuntau yucha
va por ayaj iktapatsaniyau ni Dios. Incha jantu laklokos
kajkuu yucha va para klaʼaqtayjuyau.
\v 14 Tachun yu ikmakayau va por kintapaxkayan ni Cristo.
Ox ijkʼatsayau ni Cristo nil por kintachunkʼan y xlhiyucha
va tacha kintachunkʼan vachu kaniucha.
\v 15 Va nilcha por kintachunkʼan para jantucha katsukuu
makanan yu makaputunau kijnan. Va para katsukuu makanan
yu najun ni yucha yu nil y kujchoqol por kijnan.
\v 16 Chavaycha jantucha kalaqlaqtsʼinau yu alati lapanakni
tacha talalaqtsʼin yu valiʼiy lapanakni. Mas pʼunaj
ni Cristo xaklaqtsʼinau va tacha yu ixtalaqtsʼin yu
valiʼiy lapanakni. Pero chavaycha jantucha chun klaqtsʼinau.
\v 17 Chavay incha matichun chʼantaun tʼajun kun Cristo
va sastʼi lapanaki junita. Va tapasaʼolcha yu ixʼalin
la ixjatsukunti yu maqancha. Tachun va laqsastʼi junʼochoqol.
\v 18 Tachun yu anuʼ va minchal kun Dios. Va najun oxamaktaun
katsukuu kun yucha. Xlhiyucha malaqachal ni Cristo.
Vachu kintaxtaqnitan ni aniy lhitapatsa para oxamaktaun
katatsukul yu lapanakni kun Dios.
\v 19 Ni Dios ixʼalinta la ixjatsukunti yu Cristo, va
najun oxamaktaun katatsukul kun yucha xalapanakni ni
aniy lakamunukpaʼ. Jantucha jalakmakaniy kuenta ixtalaqalhinkʼan.
Vachu kintaxtaqnitan ni aniy lhitapatsa, va ixlaqputeʼeka
ni ox chivinti para lay oxamaktaun katatsukul kun yucha
ni lapanakni.
\v 20 Ni Cristo kintamalaqachatan kalaqlaqputeʼeniu
ni lapanakni ixchivinti. Chavaycha klaxaqalayau va tacha
ni Dios kataxaqalan. Va klajunau la ixtaqaʼuti ni Jesucristo
ni oxamaktaun katsʼukʼutʼik kun Dios.
\v 21 Mas ni Cristo jantu aqtaun kamakal talaqalhin,
ni Dios mukʼaniʼol tachun kintalaqalhinkʼan. Ex chuncha
lay ox kajuu kun Dios la ketsukuntikʼan incha chʼantaun
tʼajunau ni Cristo.
\c 6
\p
\v 1 Ex chuncha kijnan chʼantaun iktʼatapatsayau ni
Dios. Va klalhijunau jantu valiʼiycha kamaʼatsʼanʼatʼik
yu taxtaqniputunan ni Dios.
\v 2 La ixchivinti Dios najun:
\q Kitʼin klaqasmakniu minchivintikʼan tejkan klamakaniu
yu ox.
\q Klaʼaqtayjuu para kaklamalaqtaxtuu.
\p Kʼamakʼatʼik kuenta. Va chavaycha ni Dios tamakaniputunan
yu ox. Va chavaycha tamalaqtaxtuputunan.
\p
\v 3 Va iknaunau jantu matichun kintalhilaqʼeman kilhitapatsakʼan.
Xlhiyucha jantu tuʼuchun ikmakayau yu jantu ox katalhilal
ni lapanakni.
\v 4 Mas va tisuncha yu klhitapasayau klakmasuniyau
ni lapanakni ni laqsaval iktapatsaniyau ni Dios. Va
ox iktayaniyau mas tejkan ikmaqanlqajnanau, mas ayaj
kintatsʼanqaniyan tuʼuchun, mas ayaj lhitaʼay kaval,
\v 5 mas kintalaqanaqmayan, mas kintachʼiyan, mas talakchʼiliy
ni lapanakni, mas pʼays iktapatsayau, mas aqtamix jantu
ikltatayau u jantu ikvaynau.
\v 6 Vachu klakmasuniyau ni iktapatsaniyau ni Dios por
ox kimputsukukʼan, por yu jatapastakʼati yu klhitʼaunau,
por ox ikmaqantaqniyau, por lajqalʼoxin kuntau, por yu
Espíritu Santo yu alin kun kijnankʼan, y por kijapaxkantikʼan
yu jantu tʼuy ukxpuʼ makay.
\v 7 Va klaqputeʼeyau yu laqsaval chivinti, iktiʼukxuntayau
kun ixtapʼasta ni Dios. Ikmapatsayau yu kintaxtaqniyan
Dios para ox kintalaqtsʼinan. Chuncha lay ikpumaqalhajayau
y ikputanchastukʼau yu jantu ox.
\v 8 Aqtamix kintatoʼoyayan, aqtamix jantu. Aqtamix ox
kintalhichivinanan, aqtamix jantu ox. Aqtamix kintajunan
va jamakanunun kuntau mas ikchivinau yu laqsaval.
\v 9 Lati kintamakayan tacha jantu kintamispayan mas
ox ikmispakanau. Iktaylhaʼanau tsukunun mas va laycha
kakniu, kintamamaqanlqajnivayan pero jantu kintamaqniyan.
\v 10 Mas ikmaqanininau pero va tacha klajʼachanaucha.
Tacha kilpatanin kuntau pero qaynlhuu klakmakayau maʼalinin
kun Dios. Va tacha jantu tuʼuchun kaklhitsukuu pero
tachun ikmaqalinau.
\p
\v 11 Ketʼalaqaunin yu machaqan Corinto untʼatʼik, klajunʼoyau
para kʼamispʼatʼik tachun yu kʼukskʼatsayau la kelhanutkʼan.
\v 12 Kijnankʼan jantu klamaqsaqmakaniu ni klapaxkayau
la kelhanutkʼan. Pero uxiknan kilamaqsaqmakaniyau mijapaxkantikʼan
la melhanutkʼan.
\v 13 Klatapayniyau tacha kesʼatʼanin kʼaʼuntʼik ni
kilamasuniu melhanutkʼan vachu va tacha klamasuniu kijnan.
\s Kijnan juntau ixchaqaʼ Dios yu kujta
\p
\v 14 Jantu chʼantaun kʼaʼuntʼik kun yu jantu talhakapuʼan
Jesucristo. Jantu lay chʼantaun kataval yu vas makay
kun yu jantu vas makay. Jantu lay chʼantaun kataval
yu lhitʼajun ixmaklku Dios kun yu tiʼukxuntayay laka
putsʼista.
\v 15 Jantu lay chʼantaun kataval la ixjatapastakʼatkʼan
ni Cristo kun yu Satanás, vachu jantu lay chʼantaun kataval
ixjatapastakʼatkʼan qayntaun yu lhakapuʼan kun aqayntaun
yu jantu lhakapuʼan.
\v 16 Jantu lay chʼantaun kataval ixchaqaʼ ni Dios kun
yu antivas. Kijnan va ixchaqaʼ ni Dios juntau yu laqsaval
kujta. Chuncha najun ni Dios la ixchivinti:
\q Kitʼin kaktsukuyaʼ y kaktijuntayayaʼ kun yuʼuncha.
\q Kitʼin kajkʼunaʼ ixDioskʼan y yuʼuncha va kilapanakni
katajunaʼ.
\m
\v 17 Vachu najun ni Jalhachimoʼonu Dios:
\q Kʼalajʼosmajʼantʼik yu tamaqtaqalhinin,
\q tumpaj kʼaʼuntʼik.
\q Jantu kʼamakʼatʼik yu jantu lajʼoxi.
\q Ex kitʼin kaklalaqaʼiyau.
\q
\v 18 Ex kitʼin kajkʼunaʼ mimPaykʼan,
\q yu uxiknan kintsʼalan ali kintsiʼin kaʼunapitik.
\p Chuncha najun ni Jalhachimoʼonu Dios yu lhitʼaunʼojoy
tachun tapʼasta.
\c 7
\s Ni Pablo lhiʼachantajuy por tamapaxal ixjatapastakʼatkʼan
\p
\v 1 Ex chuncha ketʼalaqaunin, ni Dios kintajunin ni
chuncha kintamakayan sasʼatʼan. Ex maqskʼiniy kamakauntijlau
tachun yu lakxkiliu la kilakatunajkʼan ali ketsukuntikʼan.
Maqskʼiniy katalhauniu ni Dios y chuncha kajunʼaliu
tacha yu laqsaval ixlapanakni.
\p
\v 2 Kilalaqaʼiu la melhanutkʼan. Jantu aqtaun klamakaniu
laqtaqal. Jantu aqtaun matichun ikmalanil kamakal talaqalhin.
Jantu aqtaun klamakanuu.
\v 3 Tejkan chuncha klajunau jantu klamukʼaniputuu laqtaqal.
Tacha klajuniucha va klapastakʼalhiyau la kelhanuti
mas tus va tacha chʼantaun kaklatʼataulau y chʼantaun
kaklatʼaniu.
\v 4 Kitʼin va vas klajunau tacha klamispaniyau mimputsukukʼan.
Por mimputsukukʼan la ox ijkʼatsan, jantu ikmaqaninin
y va ayaj klhiʼachantajuycha mas ikmaqanlqajnan.
\p
\v 5 Tejkan ikchaʼau xalakatʼun Macedonia jantu kalal
kajkastaknau. Vamun maqanlqajnati xaklaqaʼiyau. Ixlhimaqspaʼ
kilakatunaj ixkintalhimaqchapuniy y la kimpulakna xaktalhanan.
\v 6 Pero Dios lakmalakaʼulay ni lapanakni yu jantu
lajʼay takʼatsan y chuncha kimalakaʼulal tejkan chinchal
ni Tito.
\v 7 Jantu vamun por chil ni Tito klakataulal. Vachu
por yu kijunil ni ox maʼachʼaʼutʼik tejkan ixvilchal
kun uxiknan. Vachu kijunil ni ayaj kilaʼachaniyau y
maʼaninintʼik por yu ktapasal y ixtapastakʼuyan por
kitʼin. Ex xlhiyucha apalay klhiʼachantajul.
\v 8 Tejkan laʼaʼitʼik yu ataun karta yu klatsʼoqniu
va tamamaqanixvan pero jantu kimpastakʼul. Mas tejkan
pʼunaj klatsʼoqniu jantu ox xajkʼatsan pero chavaycha
ijkʼatsay ni tamamaqanixvan taun panchʼix por yu jantu
ox ixmakʼayatʼik.
\v 9 Chavaycha klhiʼachantajuy pero jantu por yu maʼaninintʼik.
Klhiʼachantajuy va por maʼaninintʼik y mapʼaxatʼik mijatapastakʼatkʼan.
Chuncha ni mimaqanitkʼan va minchal kun Dios, jantu va
por yu kmakau kijnan.
\v 10 Tejkan kʼamaʼanin tacha lhinajun ni Dios jantu
maqskʼiniy kapastakʼun. Va lhixajachal para kamapʼaxa
mijatapastakʼati y lay kʼalaqtʼaxtʼu. Pero yu valiʼiy
xajamaqaniti aniy lakamunukpaʼ yucha lhixajachal va
lhinin.
\v 11 Kʼamakʼatʼik kuenta ni maqaniti yu lhitsukʼutʼik
yu minchal kun Dios va ox lhixajachal. Chavay ox makʼayatʼik
kuenta yu tacha tapasay. Aqanixtʼupʼutʼunkʼanatʼik, va
lhitʼalʼauntʼik por yu jantu ox tapasal, va tʼalhanantʼik.
Vachu lhixajachal para kilaʼachaniu y katapastakʼun
por kitʼin y para kʼamukʼanitʼik ixlaqtaqal yu jantu
ox makay. Ex chuncha masutʼik ni jantucha alin milaqtaqalkʼan
por yu tapasal.
\v 12 Tejkan klatsʼoqniu ni anchanu karta jantu kaklatsʼoqniu
vamun por qayntaun lapanaki yu makal laqtaqal. Vachu
jantu klatsʼoqniu por qayntaun lapanaki yu makanikal
laqtaqal. Va klatsʼoqniu para chuncha kʼapʼukʼatsʼatʼik
ni tapastakʼuyan por kitʼin la ixlakaʼukxpu ni Dios.
\v 13 Xlhiyucha chavaycha ox klakataulau.
\p Jantu vamun klakataulau. Vachu ox klhiʼachantajuu
por ixʼachati ni Tito. Ni yucha mintachunkʼan va oxamaktaun
makʼachʼoʼotʼik.
\v 14 Va ox xajkʼatsanau por uxiknan tejkan klalhichiviniu
kun Tito tejkan klamalaqachaniu. Chavaycha jantu klhimaxanan
por yu kunil. Tachun yu klajuniu va laqsaval y vachu
laqsaval yu kunil ni Tito tejkan ox klalhichiviniu.
\v 15 Chavay ni Tito apalay ayaj taʼachaniyan tejkan
tapastakʼan ni ox alasmaknantʼik. Va laʼaʼitʼik y tʼoʼoyatʼik
kun talhanti ali xkapʼikniti.
\v 16 Klhiʼachantajuy va por ijkʼatsay ni tachun ox
kʼamakʼayapitik.
\c 8
\s Maqskʼiniy kaʼaqtʼayʼutʼik yu kilpatanin
\p
\v 1 Ketʼalaqaunin, klamakʼatsaniputunau tacha Dios por
ixjamapayninti ox laqʼaqtayjuy ixlapanakni yu tavilanal
xalakatʼun Macedonia.
\v 2 Mas yuʼuncha ayaj tamaqanlqajnan va lhuu achati
talhitʼajun. Mas ayaj kilpatanin tajunita va ayaj lhuu
tumin taxtaqlhi.
\v 3 Kitʼin klaqtsʼil ni taxtaqlhi tachun ni tumin yu
lay taxtaqlhi y tus apalay lhuu taxtaqlhi.
\v 4 Tus kintaskʼinil lakatin para vachu lay kataʼaqtayjul
ixlapanakni ni Dios.
\v 5 Jantu vamun tumin kataxtaqlhi tacha xakpastakʼa.
Va tatamaqxtaqnil la ixtamakaʼ ni Dios y vachu kintatamaqxtaqnin
ni kijnan. Ixtakʼatsay ni va Dios chuncha najun.
\v 6 Ex chuncha klhijunil ni Tito para kaʼal pusaknaʼ
kun uxiknan. Yucha aqtaynil ixpusakka ni tumin. Chavay
ox kamajkanil yu aniy xalhitapatsa japaxkanti.
\v 7 Jantu tuʼuchun tatsʼanqaniyan, lhitʼaunʼoyatʼik
tachun yu maqskʼiniy. Ox lhakʼapʼupʼinatʼik, ox chʼivinanatʼik,
y ox jalakpʼastʼaknanatʼik. Vachuʼ ayaj makʼapʼutʼunatʼik
yu ox y ox kilapaxkayau. Chavaycha vachu tsʼanqay kaxtʼaqtʼik
miʼaqtayjuntikʼan.
\p
\v 8 Jantu klalhijunau laqatapʼasta. Va klalaqtsʼiniputunau
mijapaxkantikʼan incha ayaj ox makʼayatʼik tacha yu
tamakay alati.
\v 9 Uxiknan kʼatsʼayatʼik ixjamapayninti kiJalhachimoʼonukʼan
Jesucristo. Mas ayaj maqaliʼ ixjunita, va makakal tacha
kilpataniʼ por uxiknan. Chuncha val para kʼaʼuntʼik
uxiknan tacha maqalinin por ixkilpatiti ni yucha.
\p
\v 10 Klaxtaqniyau jatapastakʼati por yu aniy aqtayjunti.
Uxiknan va yu pʼunaj puʼaqtʼaynitʼik aqtayjunun kʼatacha.
Va ayaj ixʼaqtʼayʼunpʼutʼunatʼik yu kilpatinin y xlhiyucha
xtaqtʼik tumin.
\v 11 Ex chavaycha kʼamajkʼanitʼik ixmakaka yu makʼapʼutʼunatʼik
para kʼamakʼatʼik tacha yu pʼunaj pʼastʼaktʼik y kaxtʼaqtʼik
tacha yu maʼalinatʼikcha.
\v 12 Incha matichun laqsaval xtaqputun tuʼuchun, ni
Dios laqaʼiniy tacha yu laqchaaniy kaxtaqlhi. Jantu
skʼin yu jantu lay kaxtʼaqtʼi.
\p
\v 13 Jantu chuncha klajunau para katamaqalil yu alati
y para uxiknankʼan kilpatanin kʼaʼuntʼik,
\v 14 va para va aqstanchun kʼaʼuntʼik. Chavaycha yu
maʼalinatʼik lay kʼapʼuʼaqtʼayʼutʼik yu tatsʼanqaniy.
Ex astan vachu yu katamaqalinaʼ lay kataʼaqtayjuchoqon
uxiknan yu katatsʼanqaniyan, ex chuncha va aqstanchun
kaval.
\v 15 Va chuncha tsʼoqkanta la ixchivinti Dios yu inchine
najun: “Yu lhuvaj saklhi jantu kaxajnichal y yu va
tsʼuniy saklhi jantu katsʼanqanil.”
\s Ni Tito ali ixtʼaltanan
\p
\v 16 Ikxtaqniy lhimalaqpuchuncha ni Dios por yu makanil
ni Tito para katapaxkan vachu chun tacha klapaxkayau
kitʼin.
\v 17 Yucha niman laqaʼil tejkan klhijunil katalaqʼan
y ayaj talaqʼuxaʼanan, xlhiyucha antachal la ixʼachati.
\v 18 Klatʼamalaqachaniu yu aqayntaun kilaqajkʼan yu
ox talhichiviniy tachun ixlapanakni Dios por yu ox lhitapatsa
makay yu ixlaqputeʼeka ni ox chivinti.
\v 19 Vachu ixlapanakni ni Dios yu talakachux tavilanal
va yucha talaksaklhi para kintatʼalhaʼan yu ikpusakʼau.
Ni anchanu pusaknati va para katasul ni ayaj kalaqʼaqtayjuputunau
ixlapanakni Dios y para ay kamakakal ni Dios.
\v 20 Klhaʼanau kilaqajkʼan para jantu kintalhikiltajin
taʼan klhimapatsayau ni tumin.
\v 21 Klhilaqsoqoyau makanan jantu vamun para ox kaxajchal
kun Dios, vachu para ox kaxajchal kun ni lapanakni.
\v 22 Vachu klatʼamalaqachaniyau aqayntaun kilaqajkʼan.
Yucha aqlhuu klaqtsʼiu ni ayaj aqtayjununputun y chavaycha
takʼatsaniyan ni ox kʼamakʼayapitik, xlhiyucha apalay
aqtayjununputun.
\v 23 Yu Tito yucha kintʼatapatsay por uxiknan. Yu aqayntʼuy
ketʼalaqaunin yuʼuncha tamalaqachal ixlapanakni ni Dios
y por yu ox ixputsukukʼan toʼoyakan ni Cristo.
\v 24 Ex chuncha iknajun kalaʼaʼitʼik para katakʼatsal
ni aniy ketʼalaqaunin ni laqsaval pʼaxkʼananatʼik y
laqsaval lajqalʼoxin untʼatʼik tacha klakjunil. Chuncha
lay katakʼatsal yu talakachux ixlapanakni Dios.
\c 9
\s Pusakkan ni tumin
\p
\v 1 Chavaycha yu ixʼaqtayjuka ixlapanakni ni Dios jantu
maqskʼiniy kaklatsʼoqniu.
\v 2 Kitʼin ijkʼatsay ni ayaj laqʼaqtʼayʼupʼutʼunatʼik
y chuncha klakjunil yu machaqan Macedonia. Va klakjunil
ni uxiknan yu machaqan Akaya untʼatʼik mas kʼatacha
ayaj ixʼaqtʼayʼupʼutʼunatʼik. Ex chuncha lhixajachal
ni qaynlhuu yuʼuncha vachu ayaj taʼaqtayjuputul.
\v 3 Chavaycha klamalaqachaniyau ni aniy tʼalaqaunin
para listujcha kʼaʼuntʼik tejkan kaktapasayaʼ para kaʼaqtʼayʼununtʼik
tacha klalhichiviniu para jantu valiʼiy kaval kinchivinti
yu klakjunil.
\v 4 Incha kintatʼaʼanaʼ lati yu machaqan Macedonia
y katalaqtsʼinan ni jantukaʼ listus untʼatʼik ex va
lay kaktamaxaniu. Va ox xaklalhakapuʼaniyau y vachu
uxiknan va lay katʼamaxaniyapitik.
\v 5 Xlhiyucha ikpastaklhi para klamalaqachaniu ni tʼalaqaunin
para pʼunaj katalaqʼanchaʼan para kataʼaqtayjun ixpusakka
yu ixnaunatʼik kaxtʼaqyapitik. Ex chuncha va para listujcha
kaʼalil tacha yu laqsaval lhuu xtʼaqpʼutʼunatʼik y jantu
katasul por laqatapʼasta xtʼaqyatʼik.
\p
\v 6 Kʼamakʼatʼik kuenta, yu tsʼuniy chʼan va tsʼuniy
xqaʼiy, yu lhuu chʼan va lhuu xqaʼiy.
\v 7 Qayntamin tsʼanqay kataxtaqlhi yu tacha tapastakʼa
la ixjalhanutkʼan pero jantu laqatapʼasta y jantu va
por maqskʼiniy. Ni Dios paxkay yu xtaʼa laqa achati.
\v 8 Ni Dios lay kataxtaqnin tachun yu lajʼoxi para
kaʼalinʼalhil tachun yu maqskʼiniyatʼik para lay lhuu
kaʼalil yu lay kaxtʼaqtʼik para tachun ox lhitapatsa.
\v 9 La ixchivinti Dios najun:
\q Jalaqlvaqnil yu tamaqskʼiniy ni kilpatanin.
\q Va si ox makay mas va tavanancha.
\m
\v 10 Ni Dios xtaqniy xatʼin ni lapanaki yu chʼan y
vachu xtaqniy yu uy. Ex vachu kataxtaqniyan uxiknan
tachun yu maqskʼiniyatʼik y katalalhavaniyan. Chuncha
kataʼaqtayjuyan para lay ox kaxajchal milhitapatsakʼan.
\v 11 Ni Dios kataxtaqniyan mimaqalitkʼan para lay lhuu
kʼaxtʼaqtʼik. Ex chuncha por yu kaxtʼaqyapitik, qaynlhuu
kataxtaqniyaʼ lhimalaqpuchuncha ni Dios.
\v 12 Tejkan kaklaklhaʼaniyau yu kaxtʼaqyapitik, ox kalaqʼaqtayjukanaʼ
pero jantu vamun yuʼ. Vachu apalay lhuu kataxtaqniyaʼ
lhimalaqpuchuncha ni Dios.
\v 13 Tejkan chuncha kʼamakʼayapitik ex qaynlhuu ay
katamakayaʼ ni Dios. Va por ox alasmaktʼik ni ox chivinti
yu lhichiviniy ni Cristo. Vachu ay katamakayaʼ Dios
por ox jalaqxtʼaqniyatʼik yu tamaqskʼiniy y por ox laqʼaqtʼayʼuyatʼik
yu alati.
\v 14 Vachuʼ kataskʼiniyaʼ Dios por uxiknan y kataʼachaniyan
por yu ay jamapayninti yu taxtaqnin ni Dios.
\v 15 Kaxtaqniu lhimalaqpuchuncha ni Dios. Jantu tuʼuchun
kaval tacha ixjamapayninti yu kintaxtaqnitan.
\c 10
\s Ni Dios xtaqnil ni Pablo ixpalhachimoʼon
\p
\v 1 Ni kitʼin, yu kPablo, klatapayniniyau taun tuʼuchun.
Ni Cristo va la qalʼox y mapayninin y vachu va chun
tacha ni yucha kitʼin klatapayniniyau. Lati ni uxiknan
lhilayatʼik ni va iktalhanan tejkan klatʼataulau y lhilayatʼik
vamun la kinkarta pʼas klaxaqalayau tejkan maqati iktaulay.
\v 2 Klatapayniniyau ni ox kʼamakʼatʼik para jantu kamaqskʼinil
laqatapʼasta kaklaxaqalau tejkan kajkʼananta. Ijkʼatsay
ni alin lati ni uxiknan yu tanajun ni kitʼin iktiʼukxuyal
tacha qayntaun yu valiʼiy xalapanaki ni aniy lakamunukpaʼ.
Va maqskʼiniy laqatapʼasta kaklaqxaqalal ni yuʼuncha.
\v 3 Laqsaval valiʼiy lapanakni kuntau y iktanuyau laka
lhilukuj pero jantu va aqstanchun tacha yu valiʼiy lapanakni
tejkan tamakay lhilukuj.
\v 4 Jantu ikpumakayau lhilukuj yu tacha pumakakan aniy
lakamunukpaʼ. Va ikpumakayau ixtapʼasta ni Dios yu kintaxtaqniyan
yu lay kakpumaqalhajau yu taxkajiy Dios.
\v 5 Vachu yucha kalaqpumaqalhajayau yu kintakiltsakʼastukʼan
y tachun yu lajʼay takʼatsan y talaktanchay para jantu
kamispakal ni Dios. Ikmapaxaniyau tachun ixjatapastakʼatkʼan
ni lapanakni para kataqalasmaklhi ni Cristo.
\v 6 Tsʼanqay kaʼalasmaknantʼik tachun yu lhinaunkan
ex astan incha kaʼalinaʼ yu jantu kataqalasmaknanaʼ,
kaklaqxtaqniyaʼ ixmaqanlqajnatkʼan.
\p
\v 7 Kʼamakʼatʼik kuenta yu ox tasuy la ketsukuntikʼan.
Ni lapanakni yu tanajun ni vamun yuʼun tatanumanal kun
Cristo, yuʼuncha tsʼanqay katalakpastaknal. Ex katakʼatsayaʼ
ni kijnan vachu iktatanumanau kun Cristo.
\v 8 Mas tasuy tacha ay ikmakakan jantu klhimaxanan
kaklhichivinil ni ay lhitapatsa yu kimaqxtaqnil Dios.
Kimaqxtaqnil para kaklaʼaqtayjuu y jantu para kaklalaktʼilhiu.
\v 9 Jantu iknajun kʼalhilatʼik ni klamaqsvaputunau
kun kinchivinti yu klatsʼoqniyau.
\v 10 Lati tanajun la kinkarta va laqatapʼasta klaxaqalayau
pero tanajun tejkan ancha iktaulay kun uxiknan ex jantu
pʼays klaxaqalayau. Xlhiyucha kintalaktanchaniy kinchivinti.
\v 11 Pero yuʼuncha tsʼanqay katakʼatsal ni tejkan klatsʼoqniyau
karta pumaqati vachu va chuncha klaxaqalayau tacha tejkan
klatʼataulau.
\p
\v 12 Kijnan jantu iktapujuyau klajuniu ni kijnan kuntau
tacha ni anchanu lapanakni yu lajʼay jalakmakakan ixlaqʼamankʼan.
Siya yuʼuncha si lajʼay takʼatsan por talaqtsʼin tacha
tajunita yu alati. Tejkan chuncha talalaqtsʼin ex jantu
ox talakpastaknan.
\v 13 Kijnan jantu ay ikmakakanau tacha yu jantu kintapaxtoqniyan.
Ikchivinanau vamun tacha yu kintapaxtoqniyan por yu
lhitapatsa yu kintamaqxtaqnitan Dios. Anchanu lhitapatsa
talaqchaʼan tus taʼan vilanantʼik ni uxiknan.
\v 14 Jantu ikmakayau yu jantu kintapaxtoqniyan tejkan
klaxaqalayau. Ni kijnan va yu pʼunaj yu klakilaqputeʼeniu
ni ox chivinti yu lhichiviniy Cristo.
\v 15 Kijnankʼan jantu ikpaʼayajnanau por yu ox lhitapatsa
yu makal aqayntaun. Ikpakxanʼiyau kakmakau apalay lhuu
kun uxiknan incha uxiknan apalay ox kalhakʼapʼupʼinapitik.
Vamun kakmakayau tacha yu kintapaxtoqniyan.
\v 16 Ex astan lay kaklaqputeʼeniu yu ox chivinti ni
lapanakni yu tavilananchal mas apalay xlhiʼavintʼi taʼan
vilanantʼik ni uxiknan. Jantu kintamaqamayan ikpaʼayajnau
ixlhitapatskʼan yu tamakal alati lapanakni.
\v 17 Taʼayuʼ ay kʼatsanputun, va ay kakʼatsal por yu
makal ni Dios.
\v 18 Yu ox xajachal kun Dios jantu va yu ay makakan
ixlaqʼaman, va yu Jalhachimoʼonu Dios ay makay.
\c 11
\s Ni Pablo lhichiviniy yu jantu laqsaval talaqputeʼey ixchivinti Dios
\p
\v 1 Va knajun kamaʼantʼaqniyapitik kinchivinti mas
kajkʼatsanaʼ tacha qayntaun tontoj tejkan kaklaxaqalayau.
Klaskʼiniyau kamaʼantʼaqniyapitik.
\v 2 Chavaycha klhixiyaxa va por jantu iknajun kʼalhipʼintʼik
kun aputaun lhakapuʼati. Vachu chun tacha qayntaun tsʼal
tejkan junkan kaxtaqnikanaʼ qayntaun jatsiʼi vachu chun
kaklamaqxtaʼau la ixtamakaʼ ni Cristo y jantu kun milaqtaqalkʼan.
\v 3 Ni tsapul yu ayaj jalakpastaknan makanul ni Eva.
Uxiknan vachu lay katamapaxanin mijatapastakʼatkʼan
para jantucha kamaqxtʼaqtʼik metsukuntikʼan la ixtamakaʼ
ni Cristo. Xlhiyucha kilamaqsvayau.
\v 4 Tejkan matichun chaanachal taʼan vilanantʼik va
makʼayatʼik kuenta ixchivinti mas jantu vas talhixaqalayan
tejkan lhichiviniy ni Jesús. Ex laʼaʼiyatʼik aputaun
espíritu yu jantu va aqstanchun tacha yu laʼaʼitʼik
kun kijnan. Vachu lhakʼapʼupʼinatʼik aputaun chivinti
yu jantu ixlhakʼapʼupʼinatʼik pʼunaj.
\p
\v 5 Kitʼin iknajun ni anchanu lapanakni kun kitʼin,
yuʼuncha jantu lajʼay kataval mas tanajun vamun yuʼuncha
lajʼay tajunita kun yu laqmalaqachal ni Cristo.
\v 6 Mas jantu kʼus ikchiviniy pero ox jatapastakʼati
klhitʼajun tacha uxiknan kilamispaniyau. Va kʼatsʼayatʼik
tacha klamasuniyau mas va tavanancha.
\v 7 Kitʼin iknajun jantu ox kalhilatʼik tejkan klalaqputeʼeniu
yu laqsaystʼi ixchivinti Dios por jantu kaklaskʼiniu
tumin. Chuncha klakatʼuniy ikmakakal para lajʼay kʼaʼuntʼik
uxiknan pero jantu ox lhilayatʼik.
\v 8 Va klakmaxtunil ixtuminkʼan ixlapanakni Dios yu
tavilanal alati putaulanaxna. Va kintaxtaqnil yu ixkintsʼanqaniy
para lay kaklaʼaqtayjuu.
\v 9 Tejkan xaklatʼavilanau mas kintsʼanqanil tuʼuchun
jantu kaklaskʼiniu. Ni ketʼalaqauninkʼan yu ixtaminachal
Macedonia, yuʼuncha ixkintaxtaqniy yu ixkintsʼanqaniy.
Jantu aqtaun kaklamaqanchapuu y jantu aqtaun kaklamaqanchapuyau.
\v 10 Ni kitʼin va si laqsaval ikchiviniy tejkan klhichiviniy
Cristo. Laqsaval klajunau ni kitʼin va tacha oxicha
ijkʼatsan mas jantu kaklaskʼiniu tumin por kilhitapatsa.
Oxi ijkʼatsan por yu ikmakal ancha la xalakatʼun Akaya
y jantu matichun lay kilaktanchaniy.
\v 11 ¿Valiʼiycha chuncha klaxaqalayau? ¿Lhilayatʼik
va por jantu klapaxkayau? Ni Dios kʼatsay ni ox klapaxkayau.
\p
\v 12 Kaktaylhaanaʼ makanaʼ yu ikmakay, kaklaqputeʼeyaʼ
ixchivinti Dios mas jantu ikskʼin tumin. Ex chuncha
ni anchanu lapanakni jantu lay lajʼay katakʼatsal, mas
tanajun tamakay ixlhitapatskʼan va aqstanchun tacha
kijnankʼan.
\v 13 Yuʼuncha tanajun va Jesucristo jalaqmalaqachal
pero jantu laqsaval kaval. Tamakanunun y talakatayay
tacha lapanakni yu laqsaval jalaqmalaqachal ni Cristo.
\v 14 Lhikʼatsancha ni aqtsʼiyaj va chuncha tapasay.
Mas yu Satanás lakatayay tacha ixmayul Dios yu mapulkuy.
\v 15 Xlhiyucha jantu taun lhilayau mas ixʼoqxtamatin
ni Satanás talakatayay tacha ixʼoqxtamatin Dios yu ox
tamakay. Astan yuʼuncha katamaqalchauyaʼ por yu jantu
ox lhitapatsa tamakay.
\s Ni Pablo lhichiviniy yu ay lhitapatsa yu xtaqnil Dios.
\p
\v 16 Aaqtaun klajunchoqoyau ni jantu kilalaqtsʼiu tacha
qayntaun tontoj. Mas chuncha kilalaqtsʼinau, va knajun
kilalaqaʼiu mas tacha qayntaun tontoj. Ex chuncha lay
ay kakmakakal mas va tsʼuniy por yu kaklajunau.
\v 17 Tejkan ay ikmakakan jantu ikchiviniy tacha kachivinil
kiJalhachimoʼonukʼan Jesús. Va ikchiviniy tacha qayntaun
tontoj.
\v 18 Alin lhuu lapanakni yu lajʼay jalakmakakan ixʼamankʼan
por yu putsuku talhitʼajun aniy lakamunukpaʼ. Ex kitʼin
vachu ay kakmakakanaʼ.
\v 19 Kun achati laʼaʼiyatʼik ni anchanu lapanakni yu
laktontos, tacha kalhitsʼukʼutʼik ox jatapastakʼati kʼatsʼanatʼik.
\v 20 Uxiknan ox laʼaʼiyatʼik mas tamakayan tacha ixʼoqxtamatinkʼan,
mas taʼuniyan yu maʼalinatʼik, mas tachʼapaniyan yu lhitʼaunatʼik,
mas lajʼay takʼatsan, mas talakapusayan la miʼukxpukʼan,
pero ox laʼaʼiyatʼik.
\v 21 Ex ni kijnan klhixajachaʼau tacha kakmaxanau por
kintatsʼanqaniyan tapʼasta para chuncha kaklamakau vachuʼ.
\p Incha matichun ay makakan ixʼaman ex kitʼin vachu
ay kakmakakanaʼ, mas kaxajchal kinchivinti tacha kachivinil
qayntaun tontoj.
\v 22 Yuʼuncha tachiviniy yu lhichivin Hebreo, kitʼin
vachu. Yuʼuncha va israelitas, kitʼin vachu. Yuʼuncha
tamintachal kun ixpaykʼan Abraham, kitʼin vachu.
\v 23 Yuʼuncha tanajun ixʼoqxtamatin Cristo tajunita.
Chavay kakchivinanaʼ tacha tontoj pero apalay ixʼoqxtamati
Cristo kunita ni kitʼin. Apalay pʼays iktapatsaniy, apalay
va tsaj ikmanukan laka pachʼin, ikmaqanaqkal aqlhuva
tus jantucha lay puteʼekan, aqlhuva va laycha xaknil.
\v 24 Ni israelitas yu jantu talhakapuʼan aqkis talhinaul
kimaqanaqkal kun kuarta, tus treintainueve ixkintalaqayntsaniy
aqtamin.
\v 25 Aqtʼutucha kintamaqanaqlhi kun kʼiu, y aqtauncha
kintalakatʼalmal kun chiyux. Aqtʼutucha anchal ni barco
yu xakpuʼan, y chuncha laka vakni aqtauncha iktapasal
taun julchan kun taun tatsʼisin lakamar.
\v 26 Aqlhuucha kaltananta lakatin. Aqlhuva klaqpusa
laʼaxkan taʼan lhuu. Iktapasal taʼan lhitaʼay por alhavanan.
Lhitaʼay kintamapasal kintaʼisraelitas y vachu yu jantu
israelitas kataval. Lhitaʼay iktapasal taʼan lajʼay
putaulanaxna y vachu taʼan lakakʼivin y vachu lakamar.
Lhitaʼay kintamapasal yu tanajun ketʼalaqaunin pero
jantu laqsaval kataval.
\v 27 Iktapatsal laqatapʼasta mas ayaj lhitaʼay. Aqlhuva
laka putsʼis jantu kakltatal. Aqlhuva xakchavaniy y
xakʼoqputun xkan, aqlhuva jantu kakvayl, xaktiʼukxuntayay
taʼan lhikʼasniy y jantu xakmaqalin kilaqchʼiti.
\v 28 Vachu alin alati yu lhitaʼay yu iktapasal. Vachu
iklakpastakʼa ixlapanakni ni Dios yu tavilanal alati
putaulanaxna.
\v 29 Incha matichun tsʼanqaniy tapʼasta ex kitʼin vachu
ijkʼatsan tacha kintsʼanqanil tapʼasta. Incha matichun
chivijvakan para kamakal laqtaqal ex kitʼin kʼaqxajuy.
\p
\v 30 Incha kitʼin maqskʼiniy ay kakmakakal ex chuncha
ay kakmakakanaʼ por klamasuniyau ni kitʼin kintsʼanqaniy
tapʼasta.
\v 31 Ni Dios yu ixPay kiJalhachimoʼonukʼan Jesús yucha
paxtoqniy katoʼoyakal mas va tavanancha. Yucha kʼatsay
ni kitʼin jantu ikmakanunun.
\v 32 Tejkan xakvil laka putaulan Damasco, ni lhachimoʼonuʼ
yu tapatsanil yu rey Aretas, yucha lhinaul kalaklhistakkal
tachun ni laka puertas taʼan putaxtukan ni putaulan
para lay kintachʼapal.
\v 33 Va kintapumaʼeltajul kun qaychʼi la xaventana
la xaʼex ni putaulan y chuncha ikpuqoslhi.
\c 12
\s Ni Pablo lhichiviniy yu Dios masunil la ixjalakavanti
\p
\v 1 Mas jantu tuʼuchun klhajay incha ay kakmakakal,
maqskʼiniy kaklhichivinil yu Dios kimasunil la kijalakavanti.
\v 2 Ni kitʼin ikmispay qayntaun ixlapanaki ni Cristo
yu kautʼaticha jachʼitin lhitapasal taun tuʼuchun. Pero
jantu ijkʼatsay incha kun chux ixlakatunaj u vamun la
ixlhitsukunuʼ yu lhitapasal pero Dios kʼatsay. Va lhaʼankal
tus laktʼiyan yu apalay talman taʼan vilchal ni Dios.
\v 3 Ni anchanu lapanaki, jantu ijkʼatsay incha pataxtul
kun chux ixlakatunaj u vamun la ixlhitsukunuʼ pero Dios
kʼatsay.
\v 4 Va lhaʼankal tus laktʼiyan taʼan qasmaklhi chivinti
yu jantu lay kiltaxtuy. Jantu xtaqnikan lakatin kalaqputeʼenichoqol
matichun lapanaki.
\v 5 Anchanu lapanaki va kitʼin, xlhiyucha lay ay kakmakakal
por kaklhichivinil yu klhitapasal. Pero kitʼin jantu
ay ikmakaputunkan keʼeman, vamun kaklajunau ni kintsʼanqaniy
tapʼasta.
\v 6 Ex chuncha por yu klhitapasal ni kitʼin incha ay
kakmakaputunkal ex jantu kakchivinil tacha qayntaun
tontoj, va laqsaval. Pero jantu chun ikmakaputun, ka va
lay lati katalhakapuʼal ni va ay kunita por yu klhitapasal.
Vamun iknajun kilalaqtsʼiu tacha junita kimputsuku ali
kinchivinti. Ka va lay lati ay kintalaqtsʼil
\v 7 por yu lajʼay axtoqnu yu Dios kimasunil. Para jantu
ay kajkʼatsal, ni kitʼin ikxtaqnikal taun maqanlqajnati
la kilakatunaj tus tacha klaqaltoqomakal. Ni Satanás
kimalaqachanil para kilhimaqchapul pero yu Dios kixtaqnil
para jantu ay kajkʼatsal.
\v 8 Kitʼin aqtʼutucha ikskʼiniy Dios para kimaqosunil
ni anchanu taʼan lhitaʼay la ketsukunti.
\v 9 Pero yucha kijunil: “Katʼaylhipʼi vamun kun yu
ikxtaqniyan, yucha oxicha. Tejkan tsʼanqaniyan tapʼasta
ex apalay ox tasuy kintapʼasta la metsukunti”, kijunil.
Xlhiyucha ay ijkʼatsan vamun por kintsʼanqaniy tapʼasta,
va chuncha apalay alin ixtapʼasta ni Dios la ketsukunti.
\v 10 Xlhiyucha ox klhiʼachantajuy tejkan kintsʼanqaniy
tapʼasta, tejkan kintakiltajiy, vachu taʼan ikmaqanlqajnan
taʼan iktiʼuntayay, vachu tejkan kintalhimaqchapuy, y
vachu taʼan la lhitaʼay klhitapasay por Cristo. Tejkan
miʼojoy tachun kintapʼasta la kilakatunaj vamun ex klhitsukuy
tapʼasta yu kixtaqniy Dios.
\s Ni Pablo pastakʼuy por ixlhakapuʼatkʼan yu machaqan Corinto
\p
\v 11 Kitʼin ijkʼatsan tacha qayntaun tontoj por ox
klhichivinkan keʼeman. Pero chuncha iknaul va por ixmaqskʼiniy
kakʼatsʼatʼik por kitʼin yu laqsaval. Jantu kimpaxtoqniy
ox kaklhichivinkal kitʼin keʼeman. Va uxiknan tapaxtoqniyan
ox kilalhichiviniu. Mas yu ancha tachaʼal apalay lajʼay
jalaqtsʼinkan tacha yu jamalaqachal ni Jesucristo, pero
kitʼin jantu lakatʼuniy kakval kun yuʼuncha. Pero kitʼin
va lakatʼuniy ijkʼatsan.
\v 12 Tejkan xaklatʼavilanau chʼantaun uxiknan, kitʼin
klamasuniu lajʼay axtoqnuʼ yu lay kilapumispau ni va
kimalaqachal ni Jesucristo.
\v 13 ¿Valiʼiycha lhilatʼik ni klalaqtsʼiu tacha apalay
lakstʼuniy lapanakni kʼaʼuntʼik xajantu yu alati ixlapanakni
ni Dios yu tavilanal alati putaulanaxna? Ka va por jantu
kaklaskʼiniu tuʼuchun. Kilamalaqmixiniu.
\p
\v 14 Aqtʼuycha klalaqkilatau, chavaycha aaqtaun klalaqʼanchoqoyau.
Jantu tuʼuchun kaklamaxtuniyau. Jantu klhajaputun yu
lhitʼaunatʼik, va uxiknan yu klalhajaʼiputunau. Vachu
chun tacha qayntaun xapay kun sasʼatʼan. Yu japayan
yuʼuncha tapaxtoqniy katalalhaval axtoqnu para sasʼatʼakʼan
y jantu tapaxtoqniy katalalhaval yu jasʼatʼan para japayan.
\v 15 Kun chux la kiʼachati kakmaʼakxayaʼ yu kmaqalin
y vachu kijatsukunti para kaklaʼaqtayjuu ni uxiknankʼan.
Mas jantu ox kilalaqtsʼinau ni uxiknan pero kitʼin klaʼachaniyau.
\v 16 Ox kʼatsʼayatʼik ni jantu tuʼuchun kaklaskʼiniu.
Pero lati takilhuntʼajun ni kitʼin va jamakanunuʼ kunita
y vachu tanajun ni kitʼin klamakanuxtunitau mintuminkʼan.
\v 17 ¿Lhilayatʼik ni klamalaqachaniu lapanakni para
takiʼichal mintuminkʼan?
\v 18 Kitʼin ikmalaqachal ni Tito katalaqʼanchaʼan y
vachu iktʼamalaqachal yu aqayntaun kintʼalaqajunkʼan.
Uxiknan ox kʼatsʼayatʼik ni Tito jantu katamakanun.
Kʼatsʼayatʼik ni Tito kun kitʼin va aqstanchun ox iktiʼukxuntayayau,
va taun jatsukunti klhitʼaunau.
\p
\v 19 ¿Lhilayatʼik va kʼaqanixtukanau yu kilalhipastakʼau?
Jantu laqsaval. Kijnan va chʼantaun kuntau kun Cristo
y Dios makay kuenta yu iknaunau. Tachun yu klajunau
va para apalay ox kʼalhakʼapʼupʼintʼik.
\v 20 Ni kitʼin iktalhanan kaklapaxtoqvi katsʼukʼutʼik
makanan yu jantu kimaqamal tejkan kaklalaqʼantachaʼau.
Ex uxiknan vachu jantu katamaqamayan tacha kunita. Ni
kitʼin kimpastakʼuy por lachʼapʼayatʼikcha, laʼakchʼipʼiniyatʼik,
lalukujlaniyatʼik, latʼaqspʼukniniyatʼik, lalaklkʼaniyatʼik,
lakʼiltʼayatʼik, lajʼay kʼatsʼanatʼik, y lalaktʼilhiyatʼik.
\v 21 Tejkan kaklalaqʼantachaʼau, iktalhauniy kimamaxanil
ni Dios por uxiknan, va kaklalhiqalhunau por mintalaqalhinkʼan.
Alin qaynlhuu kun uxiknan yu jantu tamapaxaputun ixjatapastakʼatkʼan.
Tatʼatamay lapanakni yu jantu ixnavinkʼan kataval y
alati talaqalhin tamakay.
\c 13
\s Ni Pablo jalakmastakʼachoqoy
\p
\v 1 Aqtʼuycha klalaqkilau y chavaycha aaqtaun klalaqʼanchoqoyau.
Kakpuxkaulaqtsʼinaʼ yu lhitʼapʼasayatʼik. Pero taukʼaniyachal
laqtaqal matichun vamun incha alin qayntʼuy u qayntʼutu
yu takʼatsay yu makal y talhitaulay.
\v 2 Tejkan klalaqkilachoqoo va klaqxaqalal ni lapanakni
yu ixtamakay talaqalhin. Chavaycha aniy klatsʼoqniyau
mas maqati ikvilchil y klaqxaqalay yu tatʼajun makanan
talaqalhin. Tejkan klalaqʼanchoqoyau ex jantu klaqmalaqmixiniyaʼ
yu tataylhaʼan makanan.
\v 3 Chuncha pʼas kajkunaʼ por naunatʼik kaklamasuniu
ni va ikchiviniy kun ixtapʼasta ni Cristo. Ni Cristo
yucha jantu tsʼanqaniy tapʼasta. Va tamasunin ni ayaj
pʼas junita.
\v 4 Laqsaval tejkan makxtukmukʼakal laka kurus va tacha
jantu kalhitsukul tapʼasta. Pero chavaycha va kujchoqotacha
por ixtapʼasta ni Dios. Vachuʼ ni kijnan va tacha jantu
kaklhitsukuu tapʼasta pero chʼantaun kun yucha kaklhitsukuyau
ixtapʼasta ni Dios.
\p
\v 5 Kʼamakʼatʼik kuenta incha vas tʼaylhipʼinatʼik
la milhakapuʼatkʼan. Ox kʼalaqtsʼintʼanukʼantʼik. ¿Jantu
kʼatsʼayatʼik ni Cristo vil la melhanutkʼan? Pero incha
jantu ox tʼaylhipʼinatʼik, ex jantu kataulal la melhanutkʼan.
\v 6 Ikpakxanʼiy kamakʼatʼik kuenta ni kijnan vas taylhaanau
la kilhakapuʼatkʼan.
\v 7 Ikskʼinau Dios para jantu kʼamakʼatʼik tuʼuchun
laqtaqal. Jantu chuncha ikskʼinau para katanaul yu alati
ni ox iktaylhaʼanau. Va chuncha ikskʼinau para kʼamakʼatʼik
yu lajʼox mas yu alati lapanakni kintajunin jantu ox
iktaylhaʼanau la kilhakapuʼatkʼan.
\v 8 Jantu lay ikmakayau tuʼuchun yu jantu paxtoqniy
kun yu laqsaval. Vamun lay ikmakayau yu paxtoqniy kun
yu laqsaval.
\v 9 Kijnan klhiʼachantajuyau mas jantu tasuy kintapʼastkʼan
incha uxiknan lhitsʼukʼuyatʼik tapʼasta. Ikskʼinau Dios
para ox katʼaylhipʼintʼik la metsukuntikʼan.
\v 10 Xlhiyucha chavay klatsʼoqniyau para jantu kamaqskʼinil
kaklalhichomoʼoo laqatapʼasta tejkan klalaqʼanchoqotachaʼau.
Ni Jalhachimoʼonuʼ Jesús kixtaqnil lhachimoʼon, jantu
para kaklaputiliu, va para kaklaʼaqtayjuu para katalhaval
yu ox la metsukuntikʼan.
\p
\v 11 Chavay, ketʼalaqaunin, kalhiʼachʼantʼaʼutʼik. Kʼalaʼoxitʼik
yu tsʼanqay la metsukuntikʼan. Kʼamakʼatʼik kuenta ni
chivinti yu klajunau. Chʼantaun kaval mijatapastakʼatkʼan,
ox kalalaqtsʼintʼik. Ex katatʼataulan ni Dios yu ayaj
japaxkanan y oxamaktaun jamakanan.
\v 12 Kʼalamastʼakʼatʼik kun lakiltastukni tacha ixlapanakni
ni Dios.
\p
\v 13 Tachun ixlapanakni ni Dios yu aniy tavilanal tamastakʼayan.
\p
\v 14 Va katamapaynin ni kiJalhachimoʼonukʼan Jesucristo,
va katapaxkan ni Dios, y va chʼantaun katamakan ni Espíritu
Santo. Chuncha kaval.