\id GAL
\h GÁLATAS
\mt2 Ni Chivinti yu Jalaqtsʼoqnil Pablo Ixlapanakni Dios yu Tavilanal Galacia
\c 1
\s Ni Pablo jalakmastakʼay ixlapanakni Dios yu tavilanal Galacia.
\p
\v 1 Kitʼin kPablo kunita. Yu kimalaqachal jantu valiʼiy
lapanaki kaval. Va Jesucristo yu kimalaqachal y vachu
kimPay Dioskʼan. Yucha majkujuchoqol Jesucristo laka
lhinin.
\v 2 Kitʼin kun tachun yu ketʼalaqaunin yu aniy kintatʼavilanal
klamastakʼayau uxiknankʼan yu lhakʼapʼupʼinatʼik yu
tʼaqxtʼoqyatʼik lakatamin putaulan xalakatʼun Galacia.
\v 3 Kataxtaqnin jamapayninti y oxamaktaun katamakan
kimPay Dioskʼan kun kiJalhachimoʼonukʼan Jesucristo.
\v 4 Yucha lhimaqxtaqkal para kamaqnikal por kintalaqalhinkʼan.
Chuncha kintamalaqtaxtun aniy maqtaqalhinin lakamunukpaʼ.
Va chuncha naul ni Dios yu kimPaykʼan.
\v 5 Yucha la ay kamakakal chavaycha mas va tavanancha
kaval, jantu aqtaun katamaktayaʼ. Va chuncha kavalcha.
\s Jantu alin aputaun chivinti yu lay pulaqtaxtukan
\p
\v 6 Laqsaval kitʼin tus taun kʼatsan ni va nimancha
tʼaunchʼoʼoyatʼikcha makauntijlanan ni Dios. Va yucha
tamapaynin y tajuntaʼin por Cristo. Va tʼaylhipʼinatʼik
aputaun lhakapuʼati. Yucha lhilayatʼik ox chivinti yu
lay pulaqtaxtukan.
\v 7 Pero jantu laqsaval kaval. Jantu alin aputaun ox
chivinti yu lay pulaqtaxtukan. Alin lati lapanakni yu
tatʼaunan laktʼilhinin mijatapastakʼatkʼan. Tamapaxaputun
yu ox chivinti yu lhichiviniy Cristo.
\v 8 Incha matichun katalaqputeʼenin aputaun chivinti
para kʼapʼulaqtʼaxtʼu, yu jantu kaval tacha yu klalaqputeʼeniu,
yucha tsʼanqay kalhilhaankal laqnin. Chuncha kaval mas
va kijnankʼan kajkuu o mas va qayntaun ixmayul Dios
kaval.
\v 9 Tacha klajuniu, chavay aaqtaun klajunchoqoyau, incha
matichun katalaqputeʼeniyan aputaun chivinti yu tapaxata
yu jantu kaval tacha yu laʼaʼitʼatʼik, yucha kalhilhaankanaʼ
laqnin.
\p
\v 10 Chavaycha jantu chuncha iknajun para katalhipaʼinil
kinchivinti ni lapanakni. Va iknajun kalhipaʼinil ni
Dios. Incha vamun ikmakay yu katalhipaʼinil ni lapanakni,
ex kitʼin jantu ixʼoqxtamati Cristo kakval.
\s Tacha val ni Pablo ixtamalaqachan ni Jesucristo
\p
\v 11 Kitʼin klamakʼatsaniyau, ketʼalaqaunin, ni ox chivinti
yu ancha klaqputeʼel jantu ixchivinti valiʼiy lapanaki
kaval.
\v 12 Jantu kimasunil matichun yu valiʼiy lapanaki y
jantu matichun kimalanil. Yu kimasunil va Jesucristo.
\p
\v 13 Uxiknan asmaktʼatʼikcha tacha xaktiʼukxuntayay
maqancha tejkan xakmakay ixputsukukʼan ni Israelitas.
Va ayaj xaklaqmamaqanlqajnivay ixlapanakni Dios y xaklakmaʼakxaputun.
\v 14 Kitʼin apalay xakmakay kimputsukukʼan ni israelitas
jantu yu alati israelitas yu tacha kijachʼitin ixtalhitʼajun.
Va apalay pʼas xaktanuy xaputsuku yu kintamakaunin yu
maqaniyaʼ kepayankʼan.
\p
\v 15 Pero kilaksaklhi ni Dios vananajcha tejkan jantukaʼ
xaktsukuy, va por ixjamapayninti kilhijuntaʼil. Tejkan
yucha maqamal
\v 16 ex chuncha kimasunil isTsʼal para kalaqlaqputeʼenil
ni ox chivinti yu lapanakni yu jantu israelitas kataval.
Tejkan chuncha klhitapasal jantu kaklaqʼal matichun
lapanaki para kimakʼatsanil ni ox chivinti.
\v 17 Vachu jantu kajkʼal Jerusalén para kajkalaqʼal
ni lapanakni yu pʼunaj ixjamalaqachata ni Jesús. Kitʼin
va kilal xalakatʼun Arabia. Ex astan ikminchoqol laka
putaulan Damasco.
\p
\v 18 Ex chuncha tejkan laʼatʼutu jachʼitin val, va ijkilal
Jerusalén para kakmispal ni Pedro. Ancha xaktʼavilchal
tʼuy semana.
\v 19 Yu alati ixtamalaqachan Jesús jantu klaqlaqtsʼil.
Vamun yu Jacobo xaklaqʼanta yu ixtʼalaqajun ni Jalhachimoʼonu
Jesús.
\v 20 Tachun yu aniy klajunau, ni Dios kʼatsay ni jantu
klalaklkaniyau.
\p
\v 21 Ex astan kilal xalakatʼun Siria ali Cilicia.
\v 22 Ex chuncha xalakatʼun Judea jantukaʼ matichun
ixkintamispay kun ixlapanakni Cristo yu ancha ixtataqxtoʼa.
\v 23 Vamun ixtaqasmatʼa yu ixtakilhuntʼajun ni lapanakni,
va tanaul: “Ni lapanaki yu ixkintamamaqanlqajnivayan
y ixlaktʼilhiputun kilhakapuʼatkʼan, chavay laqputeʼeycha
ni ox chivinti yu lhakapuʼanau.”
\v 24 Ex chuncha apalay pʼas tatoʼoyal ni Dios por kitʼin.
\c 2
\s Yu alati ixtamalaqachan Jesucristo talaqaʼil ni Pablo
\p
\v 1 Tejkan laqakautʼaticha jachʼitin val, kitʼin aaqtaun
ijkilachoqol Jerusalén kun Bernabé y vachu klhaʼal ni
Tito.
\v 2 Va chuncha kimasunil ni Dios ni kajkʼal. Va klaktʼachivinil
xʼamankʼan yu ancha laktoʼoyakan tacha xaʼayan yu talhakapuʼan.
Va klakmasunil tacha klaqputeʼeniy ni ox chivinti yu
jantu israelitas kataval. Chuncha ikmakal para jantu
valiʼiy katsʼanqal tachun kilhitapatsa.
\v 3 Ni Tito yu ixkintʼaʼanta jantu kalhijunkal kaxvililichʼukʼunikal
tacha talhinajun ni israelitas, mas ixtakʼatsay ni yucha
va griego.
\v 4 Ancha tatamaqsaqtanuchal lati israelitas yu jantu
laqsaval ketʼalaqaunin kataval. Tatamaqsaqtanul para
katalaqtsʼil tacha ni Cristo kintamakan oxamaktaun.
Ixtamakaputun para kamakachoqoo ixputsukukʼan. Ex chuncha
kajuu tacha oqxtamatin yu laqnaqlhitsukukan laka lhitapatsa.
\v 5 Pero kijnankʼan ni tsʼuniy jantucha kaklaqxtaqkau
para katalhajal. Ex lay ox kataylhaʼal la metsukuntikʼan
ni ox chivinti yu laqsaval.
\v 6 Ancha ixʼalin yu laktoʼoyakan tacha xalajʼayan,
mas kitʼin jantu ikmakay kuenta va taʼayucha kaval.
Ni Dios va mustaun jamakay ni lapanakni. Pero ni anchanu
lapanakni jantu kintamasunil aputaun chivinti yu maqskʼiniy
kaklaqputeʼel.
\v 7 Va la ox talhilal yu ikmakay, va takʼatsal ni Dios
ixkimaqxtaqnita lhitapatsa para kaklaqputeʼenil ni ox
chivinti yu jantu israelitas kataval. Vachu va chun
tacha ni Pedro ixlhimaqxtaqnikanta kalaqputeʼenil yu
israelitas.
\v 8 Ni Dios xtaqniy tapʼasta ni Pedro para kamalaqachakal
laqputeʼeni taʼan tavilanal ni israelitas. Vachu kixtaqniy
tapʼasta ni kitʼin para kakmalaqachakal laqputeʼeni
taʼan tavilanal yu alati lapanakni.
\v 9 Yu Jacobo ali Pedro ali Juan, yu ancha laktoʼoyakan
tacha xalajʼayan, yuʼuncha takʼatsal ni va Dios kimaqxtaqnil
ni aniy lhitapatsa por ixjamapayninti. Ex xlhiyucha
kintamaktuntajin kitʼin kun Bernabé tacha ox ketʼalaqauninkʼan.
Va chʼantaun ikmakau kijatapastakʼatkʼan para kijnankʼan
kajkʼau tapatsanin kun yu jantu israelitas kataval y
yuʼuncha katataylhaanil ixlhitapatskʼan kun yu israelitas.
\v 10 Vamun kintajunin kajkalakpastakvi para kaklaqʼaqtayjuu
yu kilpatanin. Va yucha yu xakmakaputunta kitʼin kun
tachun la kiʼachati.
\s Ni Pablo laqʼaymal ni Pedro laka putaulan Antiokía
\p
\v 11 Astan tejkan xakvil laka putaulan Antiokía vachu
chinchal ni Pedro. Ex kitʼin klaqʼaymal la ixlakaʼukxpu.
Va taun laqtaqal yu ixtʼajun makan.
\v 12 Tejkan tachil lati ixlapanakni ni Jacobo ex Pedro
aqtayl jalakmakauntijlay yu jantu israelitas kataval.
Jantucha apalay chʼantaun kalaktʼavayl mas pʼunaj ixjalaktʼavajin.
Ni israelitas yu ixtalhinajun kaxvililichʼukʼunikʼa,
yuʼuncha ixtanajun ni jantu maqskʼiniy kalaktʼavay.
Ex Pedro ixlaktalhauniy.
\v 13 Yu alati israelitas ancha vachu tʼuy ukxpuʼ tamakal
tacha makal ni Pedro. Mas kaval Bernabé vachu jalaqtsʼiʼil
y tʼuy ukxpuʼ makal.
\v 14 Pero kitʼin klaqtsʼil ni jantu ox ixtamakay yu
masuy ni ox chivinti yu laqsaval. Ex kunil ni Pedro
la ixlakaʼukxpukʼan tachun ni lapanakni, va iknaul: “Uxintʼi,
mas va israelita kʼatʼi tʼiʼukxuntʼayay tacha yu jantu
israelitas kataval. ¿Ex chavaycha valiʼiycha naʼun yu
jantu Israelitas kataval maqskʼiniy katamakal xaputsuku
ni Israelitas?”
\s Ni Dios vachuʼ ox jalaqtsʼin yu israelitas por talhakapuʼan ni Jesucristo
\p
\v 15 Kijnankʼan tus ikpupaqvi kilhiʼisraelitakʼan y
jantu kakpupaqvi tacha yu alati lapanakni yu lakjunau
jamaqtaqalhinin.
\v 16 Pero mas chuncha kuntau vachu klhakapuʼanau ni
Cristo para ox kintalaqtsʼin ni Dios. Jantucha klhakapuʼanau
va por ixlhachimoʼon Moisés ox kintalaqtsʼin ni Dios.
Dios jantu matichun ox laqtsʼin incha vamun por kamakal
yu lhinaunkan laka lhachimoʼon.
\v 17 Va lakxkauyau ni ox kintalaqtsʼin ni Dios por
yu makal Cristo. Ex chuncha chʼantaun juntau kun yu
alati lapanakni yu jalakjunau jamaqtaqalhinin. Chuncha
lhixajachal lati lapanakni talhilay ni Cristo va kintamakayan
maqtaqalhinin. Pero jantu laqsaval kaval.
\v 18 Incha kitʼin iktaspʼikchoqoy ni anchanu xaputsuku
ex kintaukʼaniyachal laqtaqal. Va tacha kakmakachoqoputul
aqataun chaqaʼ yu klaktʼilhil.
\v 19 Va tacha kaknilcha, xlhiyucha jantucha kimpaxtoqniy
yu lhinaunkan laka lhachimoʼon. Ex chuncha lay kaktsukul
kun jatsukunti yu minchal kun Dios.
\v 20 La ketsukunti va chʼantaun iktʼaxtukmukʼakanta
kun Cristo. Jantucha kitʼin kaktsukul la ketsukunti,
va Cristo yu tʼajun la ketsukunti. Yu jatsukunti yu
chavay klhitʼajun va por klhakapuʼan Sasʼatʼa Dios.
Yucha kiʼachanil y maqxtaqkal para kanil por kitʼin.
\v 21 Chuncha jantu klaktanchay ixjamapayninti ni Dios.
Incha matichun lhiʼajin kamaxtunikal ixlaqtaqal por
kamakal yu lhinaunkan laka lhachimoʼon, ex chuncha ni
Cristo va tacha jantu por tuʼuchun kaval mas nil.
\c 3
\s Pulaqtaxtuyau yu lhakapuʼati, jantu ixmakaka yu lhinaunkan
\p
\v 1 Uxiknankʼan machaqan Galacia jantu jalakpʼastʼaknanatʼik.
Kitʼin tus ox klalaqputeʼeniu ni Cristo tacha val, makxtukmukʼakal
tus va tacha kalaqtsʼintʼik yu klajuniu. Pero chavaycha
va tacha matichun katachajun para jantucha ox kalakpʼastʼaknantʼik.
\v 2 Vamun klajunau taun chivinti. Uxiknan laʼaʼitʼik
ni Espíritu Santo va por lhakʼapʼupʼintʼik ni ox chivinti
yu asmaktʼik, jantu por makʼatʼik yu lhinaunkan laka
lhachimoʼon.
\v 3 Incha chuncha puʼaqtʼaynitʼik yu sastʼi jatsukunti
kun yu Espíritu Santo, ¿ex valiʼiycha jantu kʼalakpʼastʼaknantʼik
y tʼaylhiʼuxipʼinatʼik kun mintapʼastkʼan?
\v 4 Incha aputaun lhakʼapʼupʼinatʼik, ¿ex tisun xtapal
tachun yu tʼapʼasatʼatʼik por milhakapuʼatkʼan? Va tacha
jantu tuʼuchun xtapal kaval.
\v 5 Ni Dios taxtaqniyan ni Espíritu Santo y makay lajʼay
axtoqnu siya uxiknan. ¿Ex valiʼiy chuncha makay ni yucha?
Jantu por makʼayatʼikcha yu lhinaunkan laka lhachimoʼon.
Va por lhakʼapʼupʼinatʼik ni ox chivinti yu asmaktʼatʼik.
\p
\v 6 Vachu va chun la maqancha ni Abraham ox lhakapuʼal
ni Dios y xlhiyucha ni Dios laqaʼil tacha ox lapanaki.
\v 7 Ex chuncha kakʼatsʼatʼik yu laqsaval sasʼatʼan
ni Abraham tajunita va yu talhakapuʼan.
\v 8 La maqancha ni Dios kʼatsal y naul la ixchivinti
ni kalakmaxtuniyaʼ ixlaqtaqalkʼan tachun yu talhakapuʼan,
mas yu jantu israelitas kataval. Chuncha laqputeʼenikal
ni Abraham, va junkal: “Va taʼayucha lapanakni kataval,
ox katatapasayaʼ por uxintʼi.”
\v 9 Ex chuncha tachun yu talhakapuʼan ox tatapasay
la ixjatsukuntikʼan chʼantaun kun Abraham yu lhakapuʼal.
\p
\v 10 Tachun yu tapulaqtaxtuputun por tamakay yu lhinaunkan
laka lhachimoʼon yuʼuncha lakmukʼanikanta talaqalhin.
Yu ixchivinti Dios najun: “Taʼayuʼ yu jantu kamakaʼol
tachun yu lhinaunkan laka lhachimoʼon yu tsʼoqkanta
yucha lakmukʼanikanta talaqalhin.”
\v 11 Ni Dios jantu matichun ox laqtsʼin por kamakalcha
yu lhinaunkan laka lhachimoʼon, vamun por kalhakapuʼal.
Chuncha ox mispakan, porke la ixchivinti Dios najun:
“Ni lapanaki yu Dios ox laqtsʼin, yucha va por ixlhakapuʼati
katsukuyaʼ.”
\v 12 Yu xaputsuku laka lhachimoʼon jantu va taun kaval
kun yu xaputsuku jalhakapuʼati. Yu pulaqtaxtuputun por
kamakal yu lhinaunkan laka lhachimoʼon, yucha lay kalhitsukul
jatsukunti vamun incha chuncha kamakaʼol.
\v 13 Ni Cristo kintamaqalchauniʼojon ni lhachimoʼon
para jantucha kalhimakxkavakau talaqalhin tejkan yucha
makiltakal laka kurus. Chuncha taukʼaniʼochal talaqalhin
por kijnankʼan. Tacha ixchivinti Dios najun: “Lhimakxkavakanta
talaqalhin yu makiltakanta laka kʼiu.”
\v 14 Ex chuncha tachun ni lapanakni, mas yu jantu israelitas
kataval, lay katalaqaʼil yu ox chʼantaun kun Abraham
por yu makal Cristo Jesús. Chuncha incha lhakapuʼanau,
lay laqaʼiyau ni Espíritu.
\s Apalay maqskʼiniy ni chivinti yu Dios xtaqnil ni Abraham xajantu ni lhachimoʼon yu xtaqnil ni Moisés
\p
\v 15 Ketʼalaqaunin, klamasuniyau tuʼuchun la ketsukuntikʼan
para kamalaʼasitʼik. Incha qayntaun lapanaki katsʼoqlhi
taʼayucha kamakaunikal ixlhitapatsa y tsʼoqmulaniy ixtaqaʼuti,
ex jantucha lay katalaktʼilhichoqol.
\v 16 Chuncha ni Abraham va junkal ni ixmaqlaqapʼu kalaqaʼiyaʼ
yu lajʼoxi. Jantu kalhichivinkal yu pumalhuu, va lhichivinkal
va qayntaun, va junkal: “la mimaqlaqapʼu”. Yucha va
Cristo.
\v 17 Va inchine klajunau, ni anchanu chivinti yu lhichiviniy
ni Cristo va chʼantaun tʼatamakaul ni Dios kun Abraham.
Ex tejkan tapasal 430 jachʼitin va xtaqnil ixlhachimoʼon ni Moisés.
Pero yucha jantu lay laktʼilhichoqoy ni chivinti yu
Dios tʼatamakaul kun Abraham.
\v 18 Dios junil ni Abraham ni kalaqxtaqniyaʼ yu lajʼoxi
yu sasʼatʼan. Chuncha jantu katapulhajal por katamakal
yu lhinaunkan. Va por ni chivinti yu Dios tʼatamakaul
kun Abraham tejkan junil ni valiʼiy kalaqxtaqniyaʼ.
\p
\v 19 ¿Ex valiʼiycha astan maqxtaqlhi ni Dios yu lhachimoʼon?
Va para katapumispal ixlaqtaqalkʼan ni lapanakni tus
tejkan mil Jesucristo. Yucha ixmaqlaqapʼu Abraham yu
Dios junil kaʼalinaʼ. Ixmayulnin Dios taxtaqnil ni lhachimoʼon
ni Moisés, ex yucha jalakmapasanichoqol ni lapanakni.
\v 20 Ex chuncha ixʼalin qayntaun yu maqxtaqnikal y
alati yu jamapasanikal. Pero Dios va taun y xʼaman xtaqnil
ixchivinti ni Abraham.
\p
\v 21 ¿Lhilayatʼik ni lhachimoʼon yu xtaqnikal Moisés
va laktʼilhil ixchivinti Dios yu junil Abraham? Jantu
laqsaval kaval. Ni lhachimoʼon incha ixtaqlhi jatsukunti
ex lay ox katalaqtsʼin Dios por kʼamakʼatʼik yu lhinaunkan.
\v 22 Pero la ixchivinti Dios najun si chʼikantau por
yu talaqalhin. Ex chuncha yu ox yu Dios naul kaʼalinaʼ
va laqxtaqnikan vamun yu talhakapuʼan ni Jesucristo,
para chuncha katalaqaʼil yu talhakapuʼan.
\p
\v 23 Pero tejkan jantukaʼ ixlhakapuʼanau ni Jesús yu
lay kapulaqtaxtuu, ex ni lhachimoʼon ixkintaxkaulhitʼaunan
tacha tachʼinin ni kijnan yu israelitas juntau. Chuncha
ixjunita tus tejkan kilachil ni Jesucristo yu lhakapuʼanau
para kapulaqtaxtuu.
\v 24 Ni lhachimoʼon lhixajchal tacha qayntaun yu kintamalaniyan
para kintamakʼatsanin ni maqskʼiniy kalhakapuʼau Cristo.
Ex chuncha ni Dios ox kintalaqtsʼin.
\v 25 Pero chavaycha vamun maqskʼiniy kalhakapuʼau para
lay kalaqtaxtuu ex jantucha kintalhichimoʼoyan ni lhachimoʼon.
\p
\v 26 Mintachunkʼan va sasʼatʼan Dios untʼatʼik por
lhakʼapʼupʼinatʼik ni Cristo Jesús.
\v 27 Va aqchʼajʼautʼik y chuncha masutʼik ni va chʼantaun
kun Cristo untʼatʼik. Chuncha tʼanuyatʼik kun Cristo
y va tacha kʼalakʼatʼayatʼik kun yucha la metsukuntikʼan.
\v 28 Jantu maqskʼiniy tisuncha lapanaki kʼaʼuntʼik,
mas va israelita, mas va griego, mas va oqxtamati, mas
yu oxamaktaun tijuntayay, mas va joʼati, mas va xanati.
Va si chʼantaun untʼatʼik kun Cristo Jesús.
\v 29 Chavay incha ixlapanakni Cristo untʼatʼik ex sasʼatʼan
Abraham untʼatʼik. Ex tamapasaniyan yu lajʼoxi tacha
junil Dios ni Abraham ni kaʼalinaʼ.
\c 4
\p
\v 1 Klajunau ni sʼatʼa yu kamapasanikanaʼ ni ixmaqaliti
ixpay, yucha tejkan sʼatʼakaʼ jun taylhaanikan ixlhistakka
tacha oqxtamati, mas xaʼukxtin tachun ni chaqaʼ kunaʼ.
\v 2 Alin lapanakni yu talhistakʼa ni sʼatʼa y alin
yu tamaʼaniy ixtumin tus kalakachil ni julchan tejkan
ixpay kanaul ni laycha kamakal xʼaman.
\v 3 Vachu chun kijnankʼan tejkan jantukaʼ ixlhakapuʼanau,
ex va tacha sʼatʼan ixjuntau y ixmakayau yu ixlhinajun
ni lakamunukpaʼ tacha ixʼoqxtamatin kajuu.
\v 4 Tejkan lakachil ni julchan yu naul ni Dios ex yucha
malaqachal Sasʼatʼa, para kamil jatsukunuʼ kun qayntaun
xanati. Tsukul tacha qayntaun yu maqskʼiniy kamakal
tacha lhinajun ni lhachimoʼon.
\v 5 Chuncha val para kintamalaqtaxtun yu ixlhinaunkan
laka lhachimoʼon para kintalaqaʼin ni Dios tacha sasʼatʼan.
\v 6 Ex chuncha para katasul ni sasʼatʼan Dios untʼatʼik,
yucha tamalaqachanin ixʼEspíritu ni Sasʼatʼa la melhanutkʼan
y yucha juniy ni Dios: “KimPay, kimPay kʼatʼi.”
\v 7 Ex chuncha jantucha oqxtamatin kʼaʼuntʼik, va sasʼatʼan
untʼatʼik. Va sasʼatʼan Dios untʼatʼik, ex xlhiyucha
katamapasaniyan ixmaqaliti por yu makal ni Cristo.
\s Ni Pablo pastakʼuy ixlhakapuʼatkʼan
\p
\v 8 Pʼunaj tejkan jantukaʼ ixmispʼayatʼik Dios, va ixʼuntʼatʼik
ixʼoqxtamatin axtoqnuʼ yu jantu laqsaval dioses kataval.
\v 9 Pero chavaycha mispʼatʼikcha ni Dios pero apalay
ox kaknaul ni Dios tamispan uxiknan. Ex chavaycha, ¿valiʼiycha
tʼaspʼikchʼoʼoyatʼikcha taʼan kamakʼachʼoʼotʼik yu lhinajun
axtoqnu yu jantu kalhitsukul tapʼasta yu jantu tuʼuchun
xtapal kaval? ¿Valiʼiycha chuncha unchʼoʼoyatʼikcha
tacha oqxtamatin yu kanaqlhitsʼukʼukʼantʼik?
\v 10 Vananaj makʼayatʼik kuenta xajulchan kʼatanaxnan
tacha lhinaunkan laka julchan, laka malkuyuʼ, ali laka
jachʼitin.
\v 11 Tus kilamaqsvayau ni kilhitapatsa va laycha kilamaqatsʼanqaniʼojou
yu klamakaniu.
\p
\v 12 Ketʼalaqaunin, klatapayniniyau ni va kʼatsʼukʼutʼik
tacha kitʼin junita kimputsuku. Tejkan klalaqkilachaʼau
kitʼin ikmakakal tacha uxiknan mas jantu israelitas
kʼaʼuntʼik. Jantu tuʼuchun kilamakaniu.
\v 13 Uxiknankʼan ox kʼatsʼayatʼik ni tejkan skutsaj
klalaqkilachaʼau va xaktaqanʼay. Xlhiyucha ancha iktaulal
y klalaqputeʼeniu ni ox chivinti.
\v 14 Pero ox kilalaqaʼiu y kilalhiʼajiu mas kintaqanʼati
la lhitaʼay ixjunita kun kitʼin. Kilalaqaʼiu tacha ixmayul
Dios kakval tus va tacha Jesucristo kakval.
\v 15 ¿Tas ancha makʼatʼik ni achati yu ixlhitʼaunatʼik
por kitʼin? Kitʼin ox ijkʼatsay ni ixlal ixmaxtʼunikʼantʼik
milaqchulkʼan para ixkilaʼaqtayjuu incha chuncha xaknaul.
\v 16 ¿Ex chavaycha mintʼalaxkayakʼan kilamakayau vamun
por klajunau yu laqsaval?
\v 17 Ni anchanu lapanakni yu ixtaʼanachaʼan makanunun
ayaj tapastakʼuy por uxiknan pero jantu ox yu tamakaniputunan.
Va tapakxanʼiy kalhitʼaxtʼutʼik kun kitʼin para katʼoʼoyatʼik
yuʼuncha.
\v 18 La ox incha ayaj tʼoʼoyayatʼik yu ox. Pero tsʼanqay
chuncha kaval mas klatʼataulau u jantu.
\v 19 Kesʼatʼanin ikmaqanlqajnanchoqoy tacha qayntaun
xanati yu tsukuy jamaqlaqavan por uxiknan y chuncha
iktaylhaanaʼ tus tejkan katʼiʼuntʼayayapitik tacha Cristo.
\v 20 La ox ixval va ancha xaklatʼataulau para jantu
xaklaxaqalau laqatapʼasta chuncha tacha chavaycha. Chavaycha
jantu ijkʼatsay tacha lay klaʼaqtayjuyau.
\s Yu kintamasuniyan ixputsukukʼan ni Hagar ali Sara
\p
\v 21 Uxiknankʼan yu makʼapʼutʼunatʼik tacha lhinajun
ixlhachimoʼon Moisés, ¿jantu aqtaun kʼapʼutʼeʼetʼik tacha
najun ancha?
\v 22 Ancha tsʼoqkanta ni Abraham lhitsukul qayntʼuy
tsʼalan, qayntaun lhitsukunil ixmaqtsukuʼ yu ixnaqpatsay.
Yu aqayntaun lhitsukunil yu laqsaval ixanati yu oxamaktaun
ixtʼavil.
\v 23 Ni tsʼal yu lhitsukul yu maqtsukuʼ, yucha lhitsukukal
tacha valiʼiy lapanaki. Pero yu lhitsukul ixanati, yucha
tsukul va por Dios naul ni katsukuyaʼ.
\v 24 Ni Dios aqtʼuycha chʼantaun jalaktʼatamakaul ixlapanakni,
yucha kintamasuniyan ni aniy qayntʼuy xanatin. Yu Agar
yucha kintamasuniyan tacha val laka aspajun Sinaí. Ancha
Dios chʼantaun jatʼatamakaul kun ixlapanakni para katamakal
ixlhachimoʼon Moisés. Yuʼuncha va tacha sʼatʼan yu jalhitsukukan
para kalaqnaqpatsakal.
\v 25 Yu ixputsuku Agar yucha xajchal tacha ixlhachimoʼon
Moisés yu xtaqnikal laka Sinaí ni aspajun yu vil xalakatʼun
Arabia. Ni Agar ali yu sasʼatʼan va jalaqnaqpatsakal.
Chuncha va tacha ni lapanakni yu chavaycha tavilanal
laka putaulan Jerusalén yu tataylhaʼan kun ixlhachimoʼon
Moisés.
\v 26 Pero ni xaputaulan laktʼiyan yu vachuʼ Jerusalén
junkan, yucha va tacha ni xanati yu oxamaktaun vil. Ancha
laktʼiyan minchal ketsukuntikʼan y chuncha ni laktʼiyan
xajachal tacha kinatikʼan kaval.
\v 27 Va tsʼoqkanta la ixchivinti Dios:
\q Uxintʼi yu jantu aqtaun lhitsʼukʼuy sʼatʼa, kʼalhiʼachʼantʼaʼutʼi.
\q Tus kʼalhiʼachʼantʼaʼutʼi mas jantukaʼ lay lhitsʼukʼuy
sʼatʼan.
\q Ni xanati yu chavay makauntijlakanta, kaminaʼ julchan
tejkan apalay lhuu katajunaʼ sasʼatʼan xajantu ni xanati
yu lhitʼajun ixapay.
\p
\v 28 Ketʼalaqaunin, kijnankʼan juntau va tacha Isaac
istsʼal ni Sara, vachu va chuncha lhitsukukau va por
Dios chuncha ixnajunta.
\v 29 Ex chuncha kun istsʼalan ni Abraham, qayntaun lhitsukukal
tacha valiʼiy lapanaki. Yucha mamaqanlqajnival yu aqayntaun
tsʼal yu tsukul por ixtapʼasta ni Espíritu Santo. Vachu
va chun tapasay chavaycha.
\v 30 Va inchine tsʼoqkanta la ixchivinti Dios: “Kʼatʼinaqxtʼu
ni maqtsukuʼ kun istsʼal. Yu istsʼal jantu lay chʼantaun
katʼalaqaʼiyaʼ yu kakxtaqniyaʼ istsʼal ni xanati yu
oxamaktaun vil.”
\v 31 Ex chuncha, ketʼalaqaunin, jantu kajuu tacha sasʼatʼan
ni maqtsukuʼ yu ixlaqnaqpatsakan, va kajuu tacha sasʼatʼan
yu oxamaktaun ixvil.
\c 5
\s Ni Dios kintatʼasaʼin para oxamaktaun kajuu
\p
\v 1 Ex chuncha ni Cristo oxamaktaun kintamakan para
oxamaktaun katiʼukxuntayau. Ox katʼaylhipʼintʼik tacha
lapanakni yu oxamaktaun tatʼajun, jantu katʼaspʼikchʼoʼotʼik
makanan yu lhinaunkan taʼan jalaqnaqpatsakan ni lapanakni.
\p
\v 2 Ox kʼamakʼatʼik kuenta yu kitʼin Pablo klajunau.
Incha xtʼaqkʼantʼik para kʼaxvililichʼukʼupʼuxnikʼantʼik
ex para uxiknan ni Cristo jantu tuʼuchun xtapal kaval.
\v 3 Aaqtaun klajunchoqoyau ni taʼayuʼ lapanaki yu xvililichukʼupʼuxnikanta
para katalaqtaxtul vachu tsʼanqay kamakaʼol tachun yu
lhinajun la ixlhachimoʼon Moisés.
\v 4 Lati uxiknan naunatʼik ni Dios ox katalaqtsʼin
por kamakʼatʼik yu lhinaunkan, xlhiyucha tʼaxtʼutʼatʼikcha
kun Cristo. Ex jantucha tapaxtoqniyan ixjamapayninti
ni Dios.
\v 5 Pero kijnankʼan ikpakxanʼiyau ni Dios ox kintalaqtsʼinan
por yu makay ni Espíritu Santo por kilhakapuʼatkʼan.
\v 6 Incha chʼantaun juntau kun Cristo ex jantu maqskʼiniy
mas kʼaxvililichʼukʼupʼuxnikʼa u jantu. Yu maqskʼiniy
va kalhakapuʼau y chuncha katapatsau kun japaxkanti.
\p
\v 7 La ox ixʼukxpʼupʼintʼatʼik. ¿Maticha talaktanchanin
para jantucha kaʼalasmaktʼik yu laqsaval?
\v 8 Ni jatapastakʼati yu chavay lhitʼaunatʼik jantu
kaminchal kun Dios yu tajuntaʼiyan.
\v 9 Tacha tanajun: “Mas va tsʼuniy levadura yu kalhiyau
xaskititi harina va lhitayaʼojoy tachun.”
\v 10 Ox ijkʼatsay ni uxiknan vachu va chun kʼapʼastʼakʼapitik
tacha kitʼin. Pero yu talaktʼilhiniyan mijatapastakʼatkʼan
yucha Dios kamukʼaniyaʼ maqanlqajnati mas va taʼayucha
kaval.
\v 11 Ketʼalaqaunin, ni kitʼin klhinajun ni jantucha
maqskʼiniy kaxvililichʼukʼupʼuxnikʼa. Xlhiyucha kintaxkayan.
Tejkan klhichiviniy yu tapasal laka kurus jantu katalukujlal
incha kaknaul ni maqskʼiniy kʼaxvililichʼukʼupʼuxnikʼa.
\v 12 Ni anchanu lapanakni yu talaktʼilhiyan y talhijunan
para kʼaxvililichʼukʼupʼuxnikʼantʼik, kitʼin iknajun,
¡apalay ox kalakchʼukʼupʼuxniʼokal!
\p
\v 13 Ketʼalaqaunin, ni Dios tajuntaʼin para oxamaktaun
kʼaʼuntʼik pero mas oxamaktaun untʼatʼik jantu maqskʼiniy
kʼamakʼatʼik tacha yu makaputun yu valiʼiy lapanaki.
Va kʼalapʼaxkʼatʼik y kʼalaʼaqtʼayʼutʼik.
\v 14 Tachun yu lhinaunkan laka lhachimoʼon va lhinaunkan
kun taun chivinti, yu najun: “Kapʼaxkʼatʼi mintʼamachaqaʼ
vachu va tacha pʼaxkʼakʼan meʼeman.”
\v 15 Incha kalamatʼiʼutʼik y kalalakʼatsʼakʼamatʼik
ex kʼalhistʼajkʼantʼik para jantu kalalaktʼilhitʼik.
\s Ixputsuku yu valiʼiy lapanaki ali ixputsuku yu tiʼukxuntayay tacha lhinajun ni Espíritu Santo
\p
\v 16 Va inchine klajunau, ni katʼiʼukxuntʼayatʼik tacha
lhinajun ni Espíritu Santo y jantu kʼamakʼatʼik tacha
yu makaputun yu valiʼiy lapanaki.
\v 17 Yu makaputun yu valiʼiy lapanaki, yucha jantu chʼantaun
tʼajun kun yu lhinajun ni Espíritu Santo. Va putʼuy
jatapastakʼati tajunita, jantu tapaxtoqniy. Xlhiyucha
jantu tsʼuniy lay makʼay yu makʼapʼutʼun.
\v 18 Incha ni Espíritu Santo tamaltanayan la milakatinkʼan
ex jantucha tapaxtoqniyan kʼamakʼatʼik ixlhachimoʼon
Moisés.
\p
\v 19 Ox mispakan tacha yu makaputun la ixjatapastakʼati
yu valiʼiy lapanaki. Va tatʼatamay yu jantu ixnavinkʼan
kataval, talaktuʼunun, tamakay axtoqnu yu jantu lajʼoxi
kaval,
\v 20 tatoʼoyay dioses yu makakanta laka makaʼ, tachavanan,
jatʼalaxkayan talamakay, talachʼapay, talaxiyaxa, talalukujlaniy,
laqʼaqspʼuknin, tatalaqlvaʼa, va taun taun talay,
\v 21 talaʼakchaʼaniy, jamaqninin, taʼapʼanin, tamakay
xakʼatan ay lakvayti taʼan tamaqtaqalhinin y tamakay
alati axtoqnu yu chuncha. Klajunchoqoyau vachu va tacha
pʼunaj klajuniu: ni lapanakni yu chuncha tataylhaʼan
makanan jantu aqtaun katatanuyaʼ taʼan jalhachimoʼonun
ni Dios.
\p
\v 22 Pero yu laqxtaʼa ni Espíritu Santo yucha va japaxkanti,
jaʼachanti, oxamaktaun jamakanan, xtaʼa maqantaulati, qalʼox
jamakanan, makaniyan para ox kʼamakʼanin yu alati, para
lay kʼalhakʼapʼupʼinikʼa yu naʼun,
\v 23 para kʼalalakʼatʼunikʼa, para kʼalhistʼakkʼa yu
kʼamakʼatʼi. Jantu intachun alin laka lhachimoʼon taʼan
kalhinaunkal yu jantu chun kʼamakʼatʼi.
\v 24 Ixlapanakni Cristo juntau. Va tacha maqniʼojoo
laka kurus ni talaqalhin yu ixmakaputunau, chuncha jantucha
kintapaxtoqniyan kamakau yu jantu maqskʼiniy.
\v 25 Incha ni Espíritu Santo kintaxtaqnin ketsukuntikʼan
ex vachu maqskʼiniy katijuntayau kun ni Espíritu Santo.
\v 26 Jantu maqskʼiniy ay kamakakau, vachu jantu kalamalukujlau,
vachu jantu kalaʼakchaʼaniu.
\c 6
\s Kʼalaʼaqtʼayʼutʼik siya uxiknankʼan
\p
\v 1 Ketʼalaqaunin, incha matichun lapanaki makay tuʼuchun
laqtaqal, ex uxiknankʼan yu tʼiʼuyanantʼik kun ni Espíritu
Santo kaʼaqtʼayʼutʼik para kaʼostaulchoqol. Pero jantu
ay kʼakʼatsʼantʼik tejkan chuncha aqtʼayʼuyatʼik. Ox
kʼalhistʼajkʼantʼik para jantu vachu chun kʼalhitʼapʼasatʼik.
\v 2 Kʼalaʼaqtʼayʼutʼik kun yu lhitaʼay la metsukuntikʼan
ex chuncha kʼamakʼaʼotʼik yu lhinajun la ixlhachimoʼon
ni Cristo.
\v 3 Incha matichun lhilakan ay lapanaki junita, mas
jantu ay kaval va makanukan ixʼaman.
\v 4 Taun taun lapanaki maqskʼiniy kamakal kuenta tacha
junita ixputsuku kun Dios. Ex chuncha lay ox kakʼatsal
por yu makay xʼaman y jantu maqskʼiniy kapastaklhi yu
makay aqayntaun.
\v 5 Qayntamin lapanaki maqskʼiniy kamakal ixlhitapatsa
xʼaman yu paxtoqniy.
\p
\v 6 Yu malanikan ixchivinti Dios tsʼanqay katʼaʼul
yu ox axtoqnu yu malaninin yu lay kaputapasal la ixjatsukunti.
\v 7 Jantu kamakʼanukʼantʼik meʼemankʼan, jantu matichun
lay laktuʼuy ni Dios. Tachun yu kachʼantʼi, aqtsʼiyaj
va yucha kaxqaʼiyeʼe.
\v 8 Incha kachʼantʼi yu jantu ox tacha makaputun valiʼiy
lapanaki ex vachu va chun kaxqaʼiyeʼe yu jantu ox yu
lhixajachal lhinin. Incha kachʼantʼi yu lhinajun ni
Espíritu Santo ex por yucha kaxqaʼiyeʼe jatsukunti yu
jantu aqtaun kamiʼoyaʼ.
\v 9 Chuncha jantu maqskʼiniy kalaqalhoqoo ixmakaka
yu lajʼoxi. Incha ox taylhaʼanau ex astan kalaqaʼiyau
ox jaxqanti.
\v 10 Xlhiyucha tejkan kalal mas va tavanancha, tsʼanqay
kalakmakaniu yu ox tachun ni lapanakni, pero apalay maqskʼiniy
ox kalakmakaniu yu kintatʼalhakapuʼanan.
\s Ni Pablo jalaqxtaqniy alati jatapastakʼati, vachuʼ jalakmastakʼachoqoy
\p
\v 11 Kʼamakʼatʼik kuenta ni aniy klatsʼoqnitau la kimakaʼ
kun lajʼay letra.
\v 12 Ni lapanakni yu laqatapʼasta talhijunan kʼaxvililichʼukʼupʼuxnikʼantʼik
va chuncha tamakay vamun para ox katatamakaul kun lapanakni.
Va para jantu kalaqmamaqanlqajnivakal tejkan talaqputeʼey
yu tapasal ni Cristo nil laka kurus.
\v 13 Mas yu talhinajun kʼaxvililichʼukʼupʼuxnikʼantʼik
jantu tamakaʼojoy tachun ixlhachimoʼon Moisés. Vamun
chuncha talhinajun kʼamakʼatʼik para ay katakʼatsal
por yu makʼanikʼantʼik la milakatunajkʼan.
\p
\v 14 Pero kitʼin jantu lay ay kajkʼatsal por tuʼuchun,
vamun por yu makal kiJalhachimoʼonukʼan Jesucristo laka
kurus. Xlhiyucha ni lakamunukpaʼ jantucha xtapal kaval
para kitʼin. Va tacha jantucha kaʼalil. Vachu va tacha
kaknil ni kitʼin y jantucha kimpaxtoqniy yu jantu ox
yu alin lakamunukpaʼ.
\v 15 La ketsukuntikʼan kun Cristo Jesús va jantu xtapal
kaval mas kaxvililichukʼupʼuxnikau o jantu. Yu maqskʼiniy
vamun yu sastʼi jatsukunti.
\v 16 Tachun yu chuncha tʼaylhipʼinatʼik oxamaktamin
katʼaulatʼik y kʼamapʼaynikʼantʼik. Chuncha kataval
tachun ixlapanakni Dios yu tacha sasʼatʼan Israel kataval.
\p
\v 17 Chavaycha jantucha apalay iknajun matichun kimaqanchapul.
La alin la kilakatunaj taʼan laklhimiu vamun por ixlaqputeʼeka
ni Jesús.
\p
\v 18 Ketʼalaqaunin, katamapaynin la metsukuntikʼan kiJalhachimoʼonukʼan
Jesucristo. Va chuncha kavalcha.