\id EPH
\h EFESIOS
\mt2 Ni Chivinti yu Jalaqtsʼoqnil Pablo Ixlapanakni Dios yu Tavilanal Éfeso
\c 1
\s Ni Pablo jalakmastakʼay ixlapanakni Dios yu tavilanal Éfeso
\p
\v 1 Kitʼin kPablo ixtamalaqachan Jesucristo va por
chuncha naul ni Dios. Klamastakʼayau ni uxiknankʼan
yu vilanantʼik laka putaulan Éfeso yu ixnavin Dios untʼatʼik
yu ox tʼaylhipʼinatʼik lhakapuʼanan chʼantaun kun Cristo
Jesús.
\v 2 Katamapaynin yu ox y katamalakaʼulan ni kimPay
Dioskʼan kun kiJalhachimoʼonukʼan Jesucristo.
\v 3 Ay kamakakal ni Dios yu ixPay kiJalhachimoʼonukʼan
Jesucristo. Ni yucha kintamalaqachanitan tachun yu ox
yu alin laktʼiyan para ketsukuntikʼan ni kijnan yu ukxuyanau
chʼantaun kun Cristo.
\v 4 La maqancha tejkan jantukaʼ ixmakakan ni lakamunukpaʼ,
vananaj exnicha ixkintalaksaktancha ni va chʼantaun
ixjuu kun Cristo para vamun yuʼ ixnavin kajuu y jantu
kintamukʼanin kilaqtaqalkʼan. Kintapaxkan
\v 5 y xlhiyucha la maqancha ixnajunta kintamakayan
sasʼatʼan por yu makal Jesucristo porke chuncha ixʼachaniy
ixmakal.
\v 6 Va chuncha ay kamakakal ni Dios por yu ay ixjamapayninti
yu kintaxtaqnin por ixjatsukunti istsʼal yu apalay achaniy.
\v 7 Ni kijnankʼan yu lhitanumanau kun Cristo va kintamalaqtaxtun
por mapalal kun ixjakʼalna. Xlhiyucha kintamalaqmixiniyan
kintalaqalhinkʼan por yu ay ixjamapayninti.
\v 8 Kintalalhavanin ixjamapayninti y kintaxtaqnin tachun
jatalaniti ali jatapastakʼati.
\v 9 Kintamamispanin yu maqancha ixpastakʼa kamakayaʼ.
Jantu ixmispakan pʼunaj pero ox lhilal kintamamispan
yu ixmakaputunta kun Cristo.
\v 10 Ex tejkan kaminaʼ ni anchanuʼ julchan va katapasayaʼ
tachun yu ixnajunta ixmakal. Kamaqxtoqniʼoyaʼ la ixpalhachimoʼon
ni Cristo tachun yu alin, kaval laktʼiyan kaval lakamunukpaʼ.
\p
\v 11 Va por Cristo kintapaxtoqniyan yu lajʼoxi yu tapaxtoqniy
sasʼatʼan Dios. Ni yucha la maqancha ixlhilkamaʼatachal
ni kijnan yu kintalaksaknitan. Va chuncha ixnajunta
kamakal y vamun yuʼ lay makay tachun yu yucha najun.
\v 12 Chuncha makal para ay kamakakal ni Dios la ketsukuntikʼan
ni kijnan yu pʼunaj ixpakxanʼitau yu kalaqaʼiu kun Cristo.
\p
\v 13 Tejkan uxiknan vachu asmaktʼik yu laqsaval yu
ox chivinti yu pʼulaqtʼaxtʼutʼik ex va lhakʼapʼupʼintʼik.
Ex por chʼantaun untʼik kun Cristo, ni Dios va taxtaqnin
ni Espíritu Santo yu naul ni laqsaval kaxtaqyaʼ para
kaseyolakʼantʼikcha la milhitsukunukʼan.
\v 14 Xtaqnikantaucha ni Espíritu Santo para kapukʼatsau
ni Dios laqsaval kintaxtaqniyan yu paxtoqniy sasʼatʼan.
Kintaxtaqniyan tejkan kalaqchaanacha ni anchanuʼ julchan
para katalaqtaxtuʼol ixlapanakni yu laksaklhi. Ex chuncha
katoʼoyakanaʼ por ixʼoxixtu.
\s Ni Pablo tapayniniy Dios por yu tavilanal Éfeso
\p
\v 15 Kintajunin ni ox lhakʼapʼupʼinatʼik kiJalhachimoʼonukʼan
Jesús y vachu ox jalakpʼaxkʼayatʼik ixlapanakni Dios
tus chavaycha.
\v 16 Xlhiyucha jantu ijkastaknan ixtaqnika lhimalaqpuchuncha
ni Dios por uxiknan, va si klapastakʼau tejkan kskʼin
Dios.
\v 17 Ktapayninin ni Dios yu ixPay kiJalhachimoʼonukʼan
Jesucristo, vamun yu ay jaPay junita. Va kskʼin para
kataxtaqnin jatapastakʼati yu minchal kun ixʼEspíritu
para kʼamalaʼasitʼik yu kintamasuniyan Dios para apalay
ox kamispʼatʼik.
\v 18 Vachu kskʼiniy Dios katamasunin yu tsʼanqay la
melhanutkʼan para katapulkuʼol mijatapastakʼatikʼan.
Chuncha kʼamispʼayapitik yu ox junita yu pʼakxanʼiyatʼik
yu talhijuntaʼin ni Dios. Ex kʼamispʼayapitik yu ayaj
ay maqaliti yu kalaqxtaqniyaʼ ixlapanakni.
\v 19 Vachuʼ kʼamispʼayapitik yu ay ixtapʼasta, yu jantu
alin taʼan katamaktal, yu kintaʼaqtayjuyan ni kijnankʼan
yu lhakapuʼanau. Ni anchanu ay tapʼasta va yucha yu
putapatsay ni Dios.
\v 20 Ni anchanu tapʼasta va yucha yu pumajkujuchoqol
ni Cristo tejkan ixnitacha y lhiʼulal la ixlhijakanaj
ancha laktʼiyan.
\v 21 Chuncha ni Cristo va apalay ay junita xajantu
tachun ni jalhachimoʼonun ali machʼalkʼakni ali yu lajʼay
ukxtinin laktʼiyan ali yu ancha talhitʼajun tapʼasta.
Chuncha vachuʼ apalay ay katoʼoyakanaʼ ixtaqaʼuti xajantu
tachun yu lay lhimapaqaʼukan, mas va yu aniy lakamunukpaʼ
mas va yu kaʼalinakaʼ.
\v 22 Ni Dios maqxtaqniʼol la ixtamakaʼ ni Cristo tachun
yu alin y vachuʼ jamaqxtaqnil tachun ixlapanakni yu
talhakapuʼan para yucha xaʼaqtsul kaval.
\v 23 Yu ixlapanakni ni Cristo va ixlakatunaj tajunita
y chuncha taqayntsaycha ni yucha y Cristo laqentsaʼojoy
tachun yu alin.
\c 2
\s Ni Dios kintamalaqtaxtuyan por ixjamapayninti
\p
\v 1 Yu uxiknan va tacha ixnitʼatʼikcha la metsukuntikʼan
por mintalaqalhinkʼan ali milaqtaqalkʼan.
\v 2 Chuncha ixtʼiʼukxuyanantʼik y ixtʼaylhipʼinatʼik
xatin aniy lakamunukpaʼ tacha lhinajun xaʼukxtin ni
aqmoqxnuʼ yu takyautʼajun taʼakchun ni lakamunukpaʼ.
Ni anchanuʼ espíritu va yucha yu jalakmapʼasniy ni lapanakni
yu jantu taqalasmatʼa Dios.
\v 3 Tacha yuʼuncha tajunita vachu chun ixtiʼukxuyanau
ni kintachunkʼan. Ixmakayau tacha tamakay yu valiʼiy
lapanakni, ixmakayau yu ixlhinajun kilakatunajkʼan ali
kijatapastakʼatkʼan. Chuncha ixkintapaxtoqniyan kalaqaʼiu
ixlhilukuj ni Dios vachu tacha yu tapaxtoqniy tachun
yu alati.
\v 4 Pero Dios yucha la ay ixjamapayninti y ayaj kintapaxkayan.
\v 5 Xlhiyucha kintamajkujuchoqon chʼantaun kun Cristo
mas ixnitaucha la ketsukuntikʼan por kintalaqalhinkʼan.
Laqtaxtutaucha por ixjamapayninti.
\v 6 Kintamajkujuchoqon chʼantaun kun Cristo y chʼantaun
kintatʼaʼulan laktʼiyan.
\v 7 Chuncha makal para katasul mas va tavanancha ni
va la ay ixjamapayninti yu kintalhipaxkayan por yu makal
ni Cristo Jesús.
\v 8 Va tamapaynin y xlhiyucha pʼulaqtʼaxtʼutʼatʼik
milhakapuʼatkʼan. Jantu va meʼemankʼan kʼalaqtʼaxtʼutʼik,
va ixlhacheʼevan ni Dios.
\v 9 Jantu lay kʼapʼulaqtʼaxtʼu por yu kʼamakʼatʼi, xlhiyucha
jantu matichun lay ay makakan.
\s Ni Cristo kintamaʼoxamaktamin
\p
\v 10 Dios kintamakan. Va chʼantaun kun Cristo juntau
xlhiyucha kintamakan para kamakau yu lajʼox yu maqancha
laksaklhi Dios para chuncha kaputiʼukxuntayau.
\v 11 Kapʼastʼaktʼik ni uxiknankʼan yu jantu israelitas
kʼaʼuntʼik, va jantu ixlapanakni Dios ixʼuntʼatʼik porke
chuncha pʼutsʼukʼutʼik. La milakatunajkʼan jantu kaxvililichʼukʼupʼuxnikʼantʼik,
xlhiyucha jantu ox ixtalaqtsʼinan ni israelitas yu jalakxvililichukʼunikanta
la ixlakatunajkʼan.
\v 12 Kʼapʼastʼaktʼik ni exnicha jantu ixlhitʼanumanantʼik
kun Cristo, y jantu ixlhitʼanumanantʼik kun xalapanakni
Israel. Chuncha jantu katapaxtoqnin kalaʼaʼitʼik ni
lhacheʼevan yu Dios jalakjunil kalaqxtaqniyaʼ ixlapanakni.
Ixtʼiʼukxuyanantʼik lakamunukpaʼ. Jantu ixpʼakxanʼiyatʼik
yu ox y jantu ixmispʼayatʼik Dios.
\v 13 Chavaycha chʼantauncha untʼatʼik kun Cristo Jesús.
Mas pʼunaj maqati ixtʼaunatʼik kun yucha pero chavaycha
ni Cristo tamaʼukstsʼunitan por ixjakʼalna.
\p
\v 14 Ni Cristo va yucha kintamaʼoxamaktamin. Yu oqxlaqtʼuy
ixjuntau, ni israelitas kun yu jantu israelitas kataval,
va taun lapanaki kintamakan. Lakpujʼol yu ixkintapulvaqyan
yu ixmakay para tʼalaxkaynin kajuu.
\v 15 Chuncha makal ni Cristo tejkan nil la ixlakatunaj
para jantucha kintapaxtoqnin ixlhachimoʼon Moisés kun
yu ancha ixlhinaunkan. Chuncha makal para va oqxlaqtauncha
kintamakan para jantucha kalaxkajiu.
\v 16 Chuncha val para ox kalalaqtsʼiu kun Dios ni kijnankʼan
y tacha taun lakatunaj kajuu yu oqxlaqtʼuy ixjuntau.
Chuncha val por yu makal laka kurus y chuncha pumamiʼonil
yu laxkayati.
\p
\v 17 Yucha kintakilaqputeʼenichin yu ox chivinti yu
masuy tas laycha ox kalalaqtsʼiu kun Dios mas uxiknan
yu maqati ixtʼaunatʼik kun Dios y vachuʼ kijnan yu israelitas
yu ukstsʼuniy xaktʼaunau.
\v 18 Va chʼantaun juntau kun Cristo xlhiyucha ni Espíritu
Santo va aqstanchunin kintaʼaqtayjuyan kataʼukstsʼuniu
kun kimPay Dioskʼan mas va oqxlaqtʼuy ixjuntau.
\v 19 Pʼunaj jantu lay ixtʼanuyatʼik kun ixlapanakni
Dios, jantu chʼantaun ixʼuntʼatʼik. Pero chavaycha vachuʼ
tapaxtoqniyan tachun yu tapaxtoqniy ixlapanakni ni Dios,
va tacha lakataun machaqan untʼatʼik kun kijnan.
\v 20 Tus tacha aqataun chaqaʼ makʼakʼanatʼik y tacha
kʼapʼutʼayatʼik ixchivintikʼan ni lapanakni yu jalaqmalaqachal
ni Jesucristo kun yu alati yu talaqputeʼey ixchivinti
Dios. Ni Cristo Jesús va tacha yu xapʼunaj chiyux yu
tanʼajvil yu ox puyal xamatau.
\v 21 Por yucha ni kijnan va tacha aqataun chaqaʼ yu
ox talachʼapata y chuncha taʼayaʼan. Chuncha kajuu tacha
taun lakatajtan yu ixnavin ni Jalhachimoʼonuʼ Dios.
\v 22 Ex chuncha uxiknan yu tʼanumanantʼik kun Cristo
va chʼantaun makʼakʼanatʼik kun kijnan tacha aqataun
chaqaʼ taʼan vil ni Dios por yu ixʼEspíritu Santo.
\c 3
\s Ni Pablo xtaqnikal ixlhitapatsa para kalhixaqalal yu jantu israelitas kataval
\p
\v 1 Xlhiyucha kitʼin kPablo ktanun laka pachʼin, va
klhichʼikanta ni Cristo Jesús porke klaqlaqputeʼenil
ni la ox chivinti yu jantu israelitas kataval tacha
uxiknan.
\v 2 Uxiknankʼan mispʼayatʼik ni lhitapatsa yu kilhilakʼulal
ni Dios. Chuncha kixtaqnil ni aniy lhitapatsa kun ixjamapayninti
para kalaqpʼuteʼenikʼantʼik ni ox chivinti.
\v 3 Mas jantu ixmispakan, chavaycha ni Dios kimasunil
yu kaʼalinaʼ astan. Chuncha klatsʼoqniucha mas jantu
kun lhuu chivinti.
\v 4 Tejkan kʼapʼutʼeʼeyapitik ni aniy karta yu klamalaqachaniyau
ex lay kʼamispʼayapitik tacha kpumalaqasil ni anchanu
chivinti yu ixmaqsaqmaʼakanta yu lhichiviniy Cristo.
\v 5 Ni anchanu jantu kalakmasunikal ni lapanakni yu
maqancha ixtatʼajun. Pero chavaycha ni Espíritu Santo
jalakmasunitacha ni lapanakni yu malaqachal Jesucristo
kun yu alati yu jalaksakta ni Dios para katalaqputeʼel
ixchivinti.
\v 6 Ni anchanu jatapastakʼati yu jantu ixmispakan va
najun ni ox yu tapaxtoqniy ni israelitas vachu tapaxtoqniy
yu jantu israelitas kataval incha talhakapuʼan ni ox
chivinti. Va chʼantaun tatanuy, va taun lakatunaj tajun,
y va chʼantaun katalaqaʼiyaʼ tachun yu lajʼox yu Dios
najun kalaqxtaqniyaʼ por Cristo Jesús.
\p
\v 7 Por ixjamapayninti ni Dios kitʼin kval ixʼoqxtamati.
Kimpaxtoqniy kaklaqputeʼel ni anchanu lajʼox chivinti.
Yucha kimaqxtaqnil ni anchanu lhitapatsa y kiʼaqtayjuy
kun ixtapʼasta.
\v 8 Kitʼin mas apalay lakatʼuniy kunita xajantu tachun
ixlapanakni ni Dios pero ikmaqxtaqnikal ni aniy jamapayninti.
Yucha kimpaxtoqniy kaklaqputeʼel tachun ixmaqaliti ni
Cristo yu jantu lay mispaʼokan para katakʼatsal ni lapanakni
yu jantu israelitas kataval.
\v 9 Vachuʼ kimpaxtoqniy kaklaqmamalaqasinil tachun
ni lapanakni tacha makal ni Dios. Ni Dios yu makal tachun
yu alin yucha va aqtsʼiyajcha ixtʼajun maqsaqmakan yu
ixmakaputun astan.
\v 10 Chuncha makal ni Dios para kamispakal yu pulhuu
ixjatapastakʼati, para katamispal yu talhachimoʼonun
kun yu talhitʼajun tapʼasta laktʼiyan, para chuncha katapumispal
por ixlapanakni ni Dios.
\v 11 Ni Dios aqtsʼiyaj chuncha ixpastakta ni chuncha
kunaʼ y ixnajunta kamakayaʼ por kiJalhachimoʼonukʼan
Cristo Jesús.
\v 12 Por yucha lay taʼukstsʼuniniyau ni Dios jantu
kun talhanti incha lhakapuʼanau.
\v 13 Xlhiyucha klatapayniniyau ni jantu katapastakʼun
la kimaqanlqajnati yu klhitapasay por klamasuniu ixchivinti
Dios ni uxiknan yu jantu israelitas kʼaʼuntʼik. Yu kimaqanlqajnati
va ox kalhixajtachal por uxiknan.
\s Ixjamapayninti ni Cristo
\p
\v 14 Xlhiyucha iktatsoqoqtaniy ni Dios ixPay kiJalhachimoʼonukʼan
Jesucristo.
\v 15 Va kun yucha minchal kintaqaʼutkʼan tachun yu
ixlapanakni mas kaval laktʼiyan mas kaval lakamunukpaʼ.
\v 16 Ikskʼiniy Dios yu lhitʼajun katʼanaj ay ixmaqaliti
para katalapʼasnin kun lhuu ixtapʼasta la metsukuntikʼan
por ixʼEspíritu.
\v 17 Va kskʼiniy para kataulal ni Cristo la melhanutkʼan
porke lhakʼapʼupʼinatʼik. Katʼaylhipʼintʼik kun tachun
japaxkanti yu minachal kun yucha.
\v 18 Vachu kskʼiniy para lay kʼamalaʼasitʼik kun tachun
ixlapanakni ni Dios ni tas junitacha yu ixʼayaxtu kun
tachun ilmanixtu kun ixmuntan kun tachun ixtalmanixtu
\v 19 yu ixjapaxkanti ni Cristo. Ni anchanuʼ japaxkanti
la ay tus jantu lay mispaʼokan. Va knajun jantu katatsʼanqanin
tuʼuchun la ixʼoxixtu ni Dios yu kataxtaqniyan.
\p
\v 20 Dios lhitʼajun lhuu tapʼasta para lay kamakal
apalay lhuu axtoqnuʼ xajantu yu skʼinau y vachuʼ yu
pastakʼau. Yucha tachun lay makay kun ixtapʼasta. Anchanuʼ
tapʼasta va yu kintaʼaqtayjuyan la ketsukuntikʼan.
\v 21 Ay kamakakal ni Dios por yu tamakay tachun ixlapanakni
y vachu por yu makal Cristo Jesús. Ay kamakakal mas
va tavanancha kaval, jantu aqtaun katamaktayaʼ. Va chuncha
kavalcha.
\c 4
\s Chʼantaun juntau incha tanuyau kun ni Espíritu Santo
\p
\v 1 Kitʼin ktachʼin kunita por klaqltapatsay kiJalhachimoʼonukʼan.
Chavaycha klatapayniniyau ni katʼiʼuntʼayatʼik makanan
yu tapaxtoqniyan tacha talakʼulanin Dios y tajuntaʼin.
\v 2 Kʼamalakʼatʼunikʼantʼik la metsukuntikʼan y lajqalʼoxin
kʼaʼuntʼik, ox kʼalamaʼantʼaqnitʼik kun japaxkanti.
\v 3 Kʼatʼapʼasnitʼik para chʼantaun kʼaʼuntʼik tacha
tamakanin ni Espíritu Santo para oxamaktaun katʼiʼuntʼayatʼik.
\v 4 Va taun lakatunaj juntau y vachu va taun Espíritu
lhitʼaunau, vachu chun tacha ni Dios tajuntaʼin para
va putaun kʼapʼakxanʼitʼik.
\v 5 Va taun ni Jalhachimoʼonuʼ junita y va putaun ni
lhakapuʼati y va taun ni aqchajʼauti.
\v 6 Va taun ni Dios yu kimPaykʼan junita kintachunkʼan.
Yucha lhichimoʼojoy tachun yu alin y alinʼojota talakaʼakchun
y vachu alinʼojota la metsukuntikʼan.
\v 7 Pero kijnankʼan mapaynikau qayntamin por qayntamin
chuncha tacha naulcha ni Cristo ni kintaxtaqnin yu lay
putapatsayau.
\v 8 Va tsʼoqkanta inchineʼ:
\q Tejkan pataxtul talman ex jalaqmaqalhajaʼol tachun
yu ixtaxkajiy y taxajchal tacha tachʼinin,
\q ex chuncha jalaqxtaqnil lhacheʼevan ixlapanakni.
\p
\v 9 ¿Valiʼiycha najun ni pataxtul talman? Yu aniy naunputun
ni pʼunaj kitanul taʼan pulman lakatʼun.
\v 10 Yu kilachil aniy lakatʼun va yucha yu pataxtuchoqol
para apalay ay kaval ke tachun yu alin laktʼiyan, ex
chuncha kun yucha kaʼaqtsaunʼol tachun yu alin.
\v 11 Por qayntamin kintaxtaqnin ni lhitapatsa yu kintapaxtoqniyan.
Lati jalakʼulakal para kataval ixjamalaqachanti Cristo,
lati para katalaqputeʼel ixchivinti Dios, lati para katamasul
yu ox chivinti, lati para katalhistaklhi yu talhakapuʼan,
y lati para katamalaninil.
\v 12 Chuncha makal para jantu tuʼuchun katatsʼanqanil
ixlapanakni para katatapatsanil y chuncha katalhaval
ixlapanakni. Yuʼuncha tacha ixlakatunaj Cristo tajunita.
\v 13 Chuncha kataylhaʼal tus tejkan chʼantaun kajunʼoyau
la kilhakapuʼatkʼan y chʼantaun kamispaʼoyau Sasʼatʼa
Dios. Va tacha qayntaun kajuu yu jantu tuʼuchun tsʼanqaniy
tus kalaqentsaʼojou para kalhitsukuʼojoo tachun ixʼoxixtu
ni Cristo.
\v 14 Ex chuncha jantucha kajuu tacha sʼatʼan, yu tatapuchoqotsukuy
y jalaklhilhaankan ataklhun la ixjatapastakʼatkʼan.
Chuncha tapasay tejkan jalakmalanikan aputaun chivinti.
Jalakmakanukan taʼan taʼalin lapanakni yu ayaj talhitʼajun
ixpamakanunkʼan.
\v 15 Tsʼanqay kataylhaʼau makanan yu laqsaval kun lhuu
japaxkanti, chuncha kaʼaynʼau la ketsukuntikʼan tus kachaʼau
tacha Cristo yu xaʼaqtsul junita tachun yu lhakapuʼanau.
\v 16 Vamun por Cristo tatapatsay ixlapanakni. Va tacha
lakatunaj yu ox laqxtoqnun, ox takilnunun taʼan talachʼapata
taʼan putapasay yu lhaʼan tapʼasta. Tejkan talakaʼakchun
ni lakatunaxnan ox tapatsay ex ox ajin tachun ni lakatunaj
kun lhuu japaxkanti.
\s Ni sastʼi jatsukunti yu alin kun Cristo
\p
\v 17 Chuncha klalhijunau kun kiJalhachimoʼonukʼan Jesús
ni jantucha katʼiʼukxuntʼayatʼik tacha alati yu jantu
israelitas kataval yu jantu tamispay Dios, yu tataylhaaniy
makanan tacha ixjatapastakʼatkʼan yu jantu xtapal kaval.
\v 18 Yuʼuncha talhitʼajun jatapastakʼati tus tacha
kaputsʼislhi la ixjatsukuntikʼan, jantu tamispay ni jatsukunti
yu xtaʼa Dios. Jantu tuʼuchun tamispay va por pʼays
tamakay ixjalhanutkʼan.
\v 19 Yuʼuncha tus jantu tuʼuchun talhimaxanan la ixjatapastakʼatkʼan.
Vamun tatamaqxtaʼa para katamakal talaqalhin y tatiʼukxuntayay
makanan tachun yu jantu ox kun achati.
\v 20 Pero uxiknankʼan jantu chun kʼalanitʼik tejkan
mispʼatʼik ni Cristo.
\v 21 Laqsaval asmaktʼatʼikcha yu lhichiviniy Cristo
y tejkan ixtʼanumanantʼik kun yucha ex lanitʼik yu laqsaval
chivinti yu minchal kun yucha.
\v 22 Yu mimputsukukʼan yu ixlhitʼaunatʼik maqancha
yu tacha ixpʼutʼiʼukxuyanantʼik, chavaycha maqskʼiniy
kamakʼauntʼijlatʼikcha. Ni anchanuʼ putsuku va tacha
taun tuʼuchun yu niman puchʼiy y va xʼaman makanukan
por yu makaputun.
\v 23 Kʼalasastʼikʼantʼikcha la mijatsukuntikʼan kun
mijatapastakʼatkʼan.
\p
\v 24 Kalhilakʼatʼayatʼikcha yu sastʼi jatsukunti yu
paxtoqniy kun Dios. Ex chuncha kʼalhitsʼukʼutʼik yu
laqsaval jatsukunti yu vas junita y ox alin kun Dios.
\v 25 Xlhiyucha klajunau ni jantucha kʼalaklkʼanantʼik.
Aqstanchunin ox vas kʼalaxaʼalatʼik kun tachun mintʼamachaqankʼan
porke va taun lakatunaj laqxtoqnunau.
\p
\v 26 Tejkan tʼalʼaunatʼik jantu kʼamakʼatʼik talaqalhin,
jantu kʼaxtʼaqkʼantʼik kataqmaqal milhilukujkʼan tus
kapuʼanchal ni julchan.
\v 27 Jantu kʼaxtʼaqnitʼik lakatin ni aqmoqxnuʼ.
\p
\v 28 Taʼayuʼ yu ixʼalhavanan jantucha kaʼalhavanal,
va kamakal lajʼox lhitapatsa kun ixmakaʼ para chuncha
kalhitsukul axtoqnuʼ yu lay kalaktʼaʼul yu tatsʼanqaniy.
\p
\v 29 Jantu kakʼiltʼaxtʼutʼik laqxtoqnuʼ chivinti. Kachʼivinintʼik
chivinti vamun yu lajʼox yu lay kʼapʼuʼaqtʼayʼutʼik
yu tamaqskʼiniy para katamaʼachajul yu taqasmatʼa.
\v 30 Jantu kamamaʼanixvatʼik ixʼEspíritu Santo ni Dios.
Yucha xtʼaqnikʼantʼik para katʼasutʼik ni va laqsaval
ixlapanakni kʼaʼunapitik ni anchanu julchan tejkan kintamalaqtaxtuyan.
\v 31 Kʼamakʼauntʼijlaʼotʼikcha tachun yu tus lhitsʼisiti
laqtsʼinkan, jantucha kʼalukʼujlatʼik, jantucha katʼalʼauntʼik,
jantucha kʼamakʼatʼik lhilukuj, jantucha kakʼiltʼayanantʼik,
jantucha kʼalaxkʼaytʼik.
\v 32 Va lajqalʼoxin kʼaʼuntʼik, kʼalhitsʼukʼutʼik jamapayninti
aqstanchunin siya uxiknan y kʼalamalaqmixinitʼik chuncha
tacha Dios tamalaqmixinin uxiknankʼan por Cristo.
\c 5
\s Tacha maqskʼiniy katatsukul yu sasʼatʼan Dios
\p
\v 1 Kalaqtsʼiʼitʼik makanan tacha makay ni Dios, tacha
sasʼatʼan yu ayaj tapaxkayan.
\v 2 Katʼiʼuntʼayatʼik makanan japaxkanti vachu va chuncha
tacha Cristo kintapaxkan y maqxtaqkal para kanil por
kijnankʼan tacha taun lapaxkan yu sʼejenʼe yu lhipaʼiniy
Dios.
\p
\v 3 Jantu katʼatʼamatʼik lapanakni yu jantu minavinkʼan
kataval, jantu kamaqtʼaʼalhinintʼik, y jantu kaʼakchʼipʼinintʼik.
Nisin tsʼuniy kaʼalil tacha anchanuʼ putsuku siya uxiknan
porke jantu tapaxtoqniy chuncha katamakal ixlapanakni
Dios.
\v 4 Jantu kakʼiltʼaxtʼutʼik chivinti yu lhitamaxanikan
nisin yu lhitontoj y jantu kʼachʼivinintʼik yu jantu
kun jatapastakʼati. Tachun ni yucha jantu maqskʼiniy.
Va kaxtʼaqnitʼik lhimalaqpuchuncha ni Dios.
\v 5 Uxiknan kʼatsʼayatʼikcha ni taʼayuʼ yu tatʼatamay
yu jantu ixnavinkʼan kaval y yu tamaqtaqalhinin y yu
taʼakchaʼan, yuʼuncha va yucha ixdioskʼan tamakay. Jantu
xataʼayuʼ yuʼuncha katatanuyanta taʼan jalhachimoʼonun
ni Cristo kun Dios.
\v 6 Jantu katapumakanun chivinti yu jantu tuʼuchun
xtapal kaval. Por tachun yu aniy laqtaqal va por yucha
kamalaqachaniyaʼ jamaqanlqajnati ni Dios yu chuncha
tamakay.
\v 7 Xlhiyucha jantu kʼalaktʼatʼanutʼik makanan laqtaqal
kun yuʼuncha.
\p
\v 8 Pʼunaj ni metsukuntikʼan va tacha japutsʼisniʼ
ixjunita. Pero chavaycha por chʼantaun tʼanumanantʼik
kun ni Jalhachimoʼonuʼ va maklkʼutʼatʼikcha la metsukuntikʼan.
Katʼiʼukxuntʼayatʼik tacha sasʼatʼan yu mapulkuta.
\v 9 Ni Espíritu Santo yu tamapulkunitan va kun yucha
minachal tachun yu ox ali yu vas jatsukunti ali yu laqsaval.
\v 10 Kʼalanitʼik makanan yu kalhipaʼinil ni Jalhachimoʼonuʼ.
\v 11 Jantu katʼatʼiʼukxuntʼayatʼik makanan yu jantu
xtapal kaval tacha tamakay yu tatijuyanal laka putsʼisni.
Va kʼalakmakʼatsʼanitʼik ni va jantu ox yu tamakay.
\v 12 Va tus lhimaxan kʼalhichʼivin yu tamakay laqatamaqsaq.
\v 13 Tejkan tuʼuchun mataʼaxtukan taʼan pulkuy ex tachun
tasuʼojoy, yu maklku ox masuʼojoy.
\v 14 Xlhiyucha alin chivinti yu inchineʼ najun: “Kʼakʼujtʼicha
uxintʼi yu ltʼatʼay y kaʼostʼaycha mas ixnitʼacha la
metsukunti y Cristo kamapulkuniyan.”
\v 15 Chuncha kʼamakʼatʼik kuenta tacha tʼiʼuyanantʼik.
Jantu katsʼukʼutʼik tacha lapanakni yu jantu talakpastaknan.
Katʼiʼuntʼayatʼik tacha lapanakni yu talhitʼajun jatapastakʼati.
\v 16 Kʼamakʼatʼikcha chavay yu tsʼanqay kʼamakʼatʼik
porke chavay ni aniy julchan la alin talaqalhin.
\v 17 Jantu kʼaʼuntʼik laktontusna, va kʼamalaʼasitʼik
yu najun ni Jalhachimoʼonuʼ.
\v 18 Jantu katʼaʼapʼatʼik porke chuncha pumiʼojoy yu
ox la metsukuntikʼan, va katalaqtanuʼojon ni Espíritu
Santo.
\v 19 Kʼalalhixaʼalatʼik salmos, himnos, kun milpati yu
minachal kun ni Espíritu Santo. Kʼamilpʼanitʼik y kʼalhikʼilpʼintʼik
ni Jalhachimoʼonuʼ kun tachun melhanutkʼan.
\v 20 Kaxtʼaqnitʼik lhimalaqpuchuncha ni kimPay Dioskʼan
la ixtaqaʼuti ni Jesucristo kiJalhachimoʼonukʼan por
tachun yu alin.
\s Tacha maqskʼiniy katatsukul ni xapaynin kun xanatin
\p
\v 21 Por tʼalhauniyatʼik ni Dios ex kʼalaʼalasmaktʼik
aqstanchunin.
\p
\v 22 Xanatin, kʼalajʼalasmaktʼik mixapaykʼan chuncha
tacha alasmakyatʼik kiJalhachimoʼonukʼan Jesucristo.
\v 23 Yu xapay va xaʼaqtsul junita kun ixanati. Vachu
chun ni Cristo va xaʼaqtsul junita kun tachun kijnan
yu lhakapuʼanau yu tacha ixlakatunaj juntau y yucha
kintamalaqtaxtuyan.
\v 24 Chuncha tacha ixlapanakni Cristo taqalasmatʼa
ni yucha, vachu chun ni xanatin maqskʼiniy kataqalasmakʼol
ixapaykʼan.
\p
\v 25 Xapaynin, kʼalakpʼaxkʼatʼik mixanatikʼan vachu
va tacha Cristo kintapaxkayan yu ixnavin juntau y maqxtaqkal
para kanil por kijnankʼan.
\v 26 Chuncha makal para ox kajuu kun Dios yu ixnavin
juntau por kintalaqchaʼan kun xkan y kintalaqputeʼenin
ixchivinti.
\v 27 Chuncha makal ni Cristo para chʼantaun ox kʼus
kajuu kun yucha ni kijnan yu ixnavin juntau. Va para
jantu kaʼalil taʼan katsaunlhi tuʼuchun y nisin tsʼuniy
chʼiyuu kataval y nisin tuʼuchun yu jantu ox katasul.
Va ox kaval la ketsukuntikʼan. Va para ox kajuu kun
Dios y sin laqtaqal.
\v 28 Yu xapay maqskʼiniy kapaxkal ixanati chuncha tacha
yucha paxkakan la ixlakatunaj. Yu paxkay ixanati yucha
paxkakan xʼaman.
\v 29 Jantu matichun xkajiy ixlakatunaj. Vavakan y ox
lhistakkan vachu chun tacha Cristo kintalhistakʼan yu
ixlapanakni juntau.
\v 30 Ni kijnankʼan va ixlakatunaj juntau, va tacha ixvakax
kun ixjalukukna juntau.
\v 31 Xlhiyucha yu tsʼal lakmakajun ixpay kun ixnati
y tʼatsukuy ixanati para chʼantauncha kataval. Va qayntaun
lapanaki tajun por ixlaʼatʼuykʼan.
\v 32 Tachun yu aniy va taun tuʼuchun yu lhitaʼay ixmalaqasika,
pero yu kitʼin klhichiviniy va Cristo kun ixlapanakni.
\v 33 Pero por qayntamin mintachunkʼan maqskʼiniy kapʼaxkʼatʼik
mixanatikʼan y yu xanatin maqskʼiniy katatoʼoyal ixapaykʼan.
\c 6
\s Sʼatʼan katatoʼoyal ixpaykʼan
\p
\v 1 Jasʼatʼan kaʼalasmaktʼik mimpaykʼan kun minatkʼan
tacha kaʼalasmaktʼikcha ni Jalhachimoʼonuʼ Jesucristo
porke chuncha paxtoqniy.
\v 2 “Katʼoʼoyatʼi mimpay kun minati.” Yucha va yu
xapʼunaj lhachimoʼon yu lhinaul Dios taʼan vachuʼ naul
ni va ox kalaqʼaqtayjuyaʼ yu chuncha katamakal.
\v 3 Va naul: “Chuncha kʼamakʼayeʼe para ox kʼatsʼukʼu
y para maqan kʼatʼiʼukxuntʼay aniy lakamunukpaʼ.”
\p
\v 4 Chavay yu japayan untʼatʼik jantu kʼalakmalukʼujlatʼik
mesʼatʼankʼan. Kʼalakmasunitʼik y kʼalakmalanitʼik tacha
lhinajun ni Jalhachimoʼonuʼ.
\s Oqxtamatin ali ixʼukxtinkʼan
\p
\v 5 Oqxtamatin kaʼalasmaktʼikcha miʼukxtinkʼan yu tʼapʼatsʼaniyatʼik
aniy lakamunukpaʼ. Katʼoʼoyatʼik y katʼalhaunitʼik y
kʼatʼapʼatsʼanitʼik kun melhanutkʼan tacha kʼatʼapʼatsʼanitʼik
Cristo.
\v 6 Jantu vamun ox kʼatʼapʼatsʼanitʼik tejkan tamakayan
kuenta para chuncha katalhipaʼinil ni lapanakni. Kʼatʼapʼatsʼanitʼik
tacha ixʼoqxtamatin Cristo kʼaʼuntʼik, ex chun makʼayatʼik
la melhanutkʼan tacha yu najun Dios.
\v 7 Tus achaj kʼatʼapʼatsʼanitʼik tacha katsʼukʼutʼik
tapatsaninin ni Jalhachimoʼonuʼ Jesucristo, ex jantu
tacha kʼatʼapʼatsʼanitʼik yu valiʼiy lapanaki.
\v 8 Kʼatsʼayatʼik yu lajʼox yu tamakay por qayntamin
lapanaki yucha ni Jalhachimoʼonuʼ kalaqxtaqnichoqoyaʼ
ixlhilhajatkʼan, mas va oqxtamati kaval, mas va ukxtin
kaval.
\v 9 Vachu uxiknan yu ukxtinin untʼatʼik vachu va chun
ox kʼalakmakʼanitʼik miʼoqxtamatinkʼan jantu kun laka
lhilukuj. Va kʼatsʼayatʼik ni miʼukxtinkʼan yu vilchal
laktʼiyan vachu va yuʼ ixʼukxtinkʼan. Yucha va aqstanchunin
jalaqtsʼinin, jantu matichun tumpaj laqtsʼin.
\s Yu tapʼasta yu kintaxtaqniyan Dios para kalhajau ni aqmoqxnuʼ
\p
\v 10 Chavay, ketʼalaqaunin, pʼas kʼamakʼakʼantʼikcha
chʼantaun kun ni Jalhachimoʼonuʼ kun tachun ixtapʼasta.
\v 11 Kʼalakʼatʼayatʼikcha kun tachun yu pʼas milhilakataykʼan
yu taxtaqniyan Dios la metsukuntikʼan para chuncha lay
ox katʼayanitʼik tachun yu tamakaniputunan ni aqmoqxnuʼ.
\v 12 Jantu lachʼapayau kun lapanakni yu talhitʼajun
vakax ali jakʼalna. Va lachʼapayau kun jalhachimoʼonun
yu jantu lay laqtsʼinkan, yu talhitʼajun tapʼasta, yu
lajʼay ukxtinin laka japutsʼisniʼ aniy lakamunukpaʼ
ali yu jantu ox espíritus yu tatiʼukxuyanal laktʼiyan.
\v 13 Xlhiyucha kalakʼatʼayatʼikcha kun tachun yu pʼas
milhilakataykʼan yu taxtaqniyan Dios la metsukuntikʼan.
Chuncha lay ox kʼatʼayanitʼik tejkan kachinaʼ ni julchan
tejkan la lhitaʼay kunaʼ. Chuncha tejkan kʼalachʼapʼaʼoyapitikcha
katʼaylhipʼiniyapitik maqantaqninin.
\v 14 Kʼalhitʼanpʼachʼikʼantʼik yu laqsaval y kʼalaqlhitʼampʼaqʼakʼantʼik
yu vas jatsukunti yu taxtaqniyan Dios.
\v 15 Vachuʼ kʼachʼantʼanutʼik para listujcha kʼaʼuntʼik
para lay kʼalaqlhixaʼalatʼik ni lapanakni tas lay laqalajʼox
katataulal kun Dios.
\v 16 Kun tachun ni aniy, vachuʼ kʼachʼapʼatʼik mimpatanchastuknikʼan,
yucha va milhakapuʼatkʼan yu lay kʼapʼutʼanchʼanitʼik.
Va yucha kʼapʼumamixinitʼik tachun ixpatsajni ni aqmoqxnuʼ
yu tamaktajita yu tapulakatʼalmayan la metsukuntikʼan
para kʼamakʼatʼik talaqalhin.
\v 17 Kʼaʼaqtʼanutʼik yu maqapʼasni miʼaqtanutkʼan, yucha
va ixjamalaqtaxtunti Dios. Vachu kʼachʼapʼatʼik xaʼespada
ni Espíritu Santo, yucha va ixchivinti Dios.
\v 18 Si kʼatʼapʼayniniʼalhitʼik ni Dios chʼantaun kun
ni Espíritu Santo tejkan skʼiniyatʼik Dios y tejkan
tʼachʼivinanatʼik. Ox kʼalakpʼukʼujtʼik y mas va tavanancha
katʼaylhipʼintʼik skʼininin por tachun ixlapanakni Dios
\v 19 y vachu por kitʼin. Chuncha kaskʼintʼik para kixtaqnil
chivinti ni Dios tejkan kchiviniy para chuncha kun ayajnati
lay kaklakmakʼatsanil ni lapanakni ni ox chivinti yu
jantu ixmispakan.
\v 20 Va xlhiyucha kilhimalaqachal ni Cristo y xlhiyucha
klhimanukal laka pachʼin. Kilalhitapayniu para kaklhichivinil
kun jaʼayajnati tacha maqskʼiniy kakchivinil.
\s Jalakmastakʼay ni Pablo
\p
\v 21 Tachun yu ktapasay ni kitʼin yucha katamakʼatsaniyan
ni Tíkiko yu kilaqajkʼan yu paxkayau. Yucha lay lhakapuʼanikan
y ox taylhaʼan tapatsaniniʼ ni Jalhachimoʼonuʼ.
\v 22 Va xlhiyucha klalhimalaqachanitachaʼau para katamakʼatsanin
yu ktapasayau ni kijnan y katamalakaʼulanin melhanutkʼan.
\p
\v 23 Yu kimPay Dioskʼan kun yu Jalhachimoʼonuʼ Jesucristo
oxamaktamin kalakmakal yu talhakapuʼan y kalakmapaynil
y kalaqxtaqnil jalhakapuʼati.
\v 24 Kalakmapaynil ni Dios tachun yu taʼachaniy kiJalhachimoʼonukʼan
Jesucristo yu tataylhaʼan achanin. Va chuncha kaval.