\id PHP
\h FILIPENSES
\mt2 Ni Chivinti yu Jalaqtsʼoqnil Pablo Ixlapanakni Dios yu Tavilanal Filipos
\c 1
\s Ni Pablo jalakmastakʼay ixlapanakni Dios yu tavilanal Filipos
\p
\v 1 Kitʼin kPablo kun Timoteo ixʼoqxtamatin Jesucristo
kuntau. Klamastakʼayau mintachunkʼan yu ixlapanakni
Dios untʼatʼik por yu makal Jesucristo, yu vilanantʼik
laka putaulan Filipos. Vachuʼ yu xalajʼaynin yu talhakapuʼan
ali yu taʼaqtayjunun.
\v 2 Katamapaynin y oxamaktaun katamakan ni Dios kimPaykʼan
kun kiJalhachimoʼonukʼan Jesucristo.
\s Ni Pablo skʼin Dios por yuʼuncha
\p
\v 3 Kitʼin ikxtaqniy lhimalaqpuchuncha ni kimPay Dioskʼan
tejkan klapastakʼau.
\v 4 Tejkan ikskʼin Dios por mintachunkʼan va ikskʼin
kun achati.
\v 5 Va chʼantaun kilatʼatapatsayau para kalaqputeʼekal
ni ox chivinti yu lhichiviniy Cristo. Aqtʼaynitʼik tejkan
lhakʼapʼupʼintʼik tus chavaycha vananaj ox tʼaylhipʼinatʼik.
\v 6 Ni Dios aqtayl tatapatsaniyan la metsukuntikʼan.
Kitʼin ox ijkʼatsay yucha kataylhaanaʼ tus tejkan kaminchoqoyaʼ
ni Jesucristo.
\v 7 Kitʼin chuncha laqsaval ijkʼatsay, va por klaʼachaniyau
kun tachun la kelhanuti. Ni Dios tamapayniyan mintachunkʼan,
vachu chun tacha kimapayniy ni kitʼin tejkan iktanuy
laka pachʼin o tejkan klhiʼeltsajuy yu ox chivinti y
ikmasuy ni va laqsaval.
\v 8 Ni Dios ox kʼatsay ni kitʼin ayaj klalaqtsʼinputunau
mintachunkʼan, va klaʼachaniyau kun ixjapaxkanti ni Jesucristo.
\v 9 Kitʼin ikskʼiniy Dios para kalalhaval mepaxkantikʼan
y vachu para ox kʼalakpʼastʼaknantʼik y tachun kʼamispʼatʼik
\v 10 para kʼalaksaktʼik vamun yu lajʼox. Chuncha jantu
kalhitayal yu jantu ox la metsukuntikʼan y vachu jantu
kʼamukʼanikʼantʼik laqtaqal tus tejkan kaminchoqoyaʼ
ni Cristo.
\v 11 Ex tachun yu kʼamakʼayapitik si lajʼox kaxajtachal
la metsukuntikʼan para ay kamakakal ni Dios y vachuʼ
katoʼoyakal.
\s Ni Pablo vamun ni Cristo maqskʼiniy la ixjatsukunti
\p
\v 12 Ketʼalaqaunin, ni kitʼin va klamakʼatsaniputunau
ni tachun yu aniy klhitapasay va xlhiyucha talhavay
ixlaqputeʼeka yu ox chivinti.
\v 13 Chuncha tachun ni tropas yu tatapatsay laqa ay
chaqaʼ kun tachun yu alati lapanakni, yuʼuncha takʼatsaʼojoy
ni kitʼin klhichʼikanta ixlhitapatsa ni Cristo.
\v 14 Qaynlhuu ketʼalaqaunin takʼatsaycha ni ikchʼikanta
ni kitʼin. Xlhiyucha jantucha tatalhanan katalaqputeʼel
ixchivinti Dios. Va apalay talhakapuʼan kiJalhachimoʼonukʼan
y tatapʼaysnin.
\p
\v 15 Laqsaval lati talaqputeʼey ixchivinti ni Cristo
va por kintaʼakchaʼaniyan y kintaxkayan, pero yu alati
yu talaqputeʼey, va laqsaval tamakaputun yu lajʼoxi lhitapatsa.
\v 16 Yu talaqputeʼey ixchivinti Cristo kun akchaʼati,
yuʼuncha lajʼay tanajun kamakakal y va tʼuy jatapastakʼati
tamakay. Chuncha tamakay por tanajun apalay kakmaqanlqajnal
ni kitʼin aniy laka pachʼin.
\v 17 Pero yu alati talaqputeʼey ixchivinti Cristo kun
japaxkanti. Va takʼatsay ni aniy ikvil laka pachʼin
para kajklhiʼeltsʼaul yu ox chivinti yu lhichiviniy
Cristo.
\v 18 ¿Exni? Mas lati va tʼuy ukxpuʼ tamakay y lati
vas tachiviniy pero yu oqxlaqtʼuy si laqsaval talaqputeʼey
ni Cristo y yucha klhiʼachantajuy ni kitʼin.
\p Chavay apalay kajkʼachanaʼ.
\v 19 Ni kitʼin ox ijkʼatsay ni tachun yu klhitapasay
la ox kakxajtachal por skʼiniyatʼik Dios, vachu por ni
aqtayjunti yu kixtaqniy ixʼEspíritu ni Jesucristo.
\v 20 Ni kitʼin ijkʼatsay y ox ikpakxanʼiy ni jantu
kaklhimaxananaʼ por yu kaklhitapasayaʼ. Va iknajun ni
jantu kaktalhanal y ay kakmakal ni Cristo la ketsukunti,
mas iktʼajun u mas kaknil.
\v 21 Ni kitʼin vamun ni Cristo ikmaqskʼiniy la ketsukunti.
Mas kakniyaʼ, kaklhajayaʼ yu apalay ox.
\v 22 Pero incha iktaylhaʼan tsukunuʼ aniy lakamunukpaʼ
ex vananaj lay kaklhitapatsaniyaʼ ni Dios. Xlhiyucha
jantu ijkʼatsay tichichuncha kaklaksaklhi, o va kaknil
o vananaj kaktsukul aniy.
\v 23 Va tʼuy jatapastakʼati klhitʼajun. Va iktaxtuputuncha
aniy lakamunukpaʼ para kaktʼataulchalcha ni Cristo.
Ex chuncha apalay ox kaval para kitʼin.
\v 24 Pero uxiknan apalay maqskʼiniyatʼik para kaklatʼatiʼukxuntayau
aniy la kilakatunaj.
\v 25 Xlhiyucha la ox ijkʼatsay ni kaktamakaunaʼ y kaktaylhaʼanaʼ
kun uxiknan para katalhaval milhakapuʼatkʼan y kʼalhitsʼukʼutʼik
lhuu achati por lhakʼapʼupʼinatʼik.
\v 26 Ex chuncha tejkan klalaqchanchoqoyau aaqtaun ex
kalhiʼachʼantʼaʼuyapitik por yu kimakaniy kitʼin ni
Cristo Jesús.
\s Katʼiʼukxuntʼayatʼik tacha lhinaunkan
\p
\v 27 Katʼiʼukxuntʼayatʼik makanan tacha paxtoqniy kun
yu ox chivinti yu lhichiviniy Cristo. Ex chuncha va
chʼantaun kaʼunapitik. Chuncha kajkʼatsayaʼ incha klalaqʼanau
o mas maqati kaktaulal y chuncha kintajunin. Ex chʼantaun
kʼatʼapʼatsʼayapitik kun tapʼasta para katalhakapuʼal
ni ox chivinti yu lapanakni.
\v 28 Jantu katʼalhaunitʼik yu talaktanchaniyan. Ex
chuncha katakʼatsayaʼ ni va katatsʼanqayaʼ ni yuʼuncha
y yu uxiknan kʼalaqtʼaxtʼuyapitik por ixtapʼasta ni
Dios.
\v 29 Ni Dios taxtaqniyan taun jatapayniti jantu vamun
para kalhakʼapʼupʼintʼik ni Cristo, vachu para kʼamaʼanlʼajnantʼik
por yucha.
\v 30 Uxiknan vachu tʼapʼasayatʼik yu lhitaʼay la metsukuntikʼan,
vachu va tacha yu kitʼin iktapasal. Chuncha kilalaqtsʼiu
y chavaycha kʼatsʼayatʼik yu iktʼajun tapasanaʼ.
\c 2
\s Ni Cristo xʼaman malakatʼunikal ex astan ni Dios ay makal
\p
\v 1 Ni laqsaval tamalakaʼulayan ni Cristo, tapaxkayan,
vachu tamaqxtoʼan ni Espíritu Santo, y vachu laʼachʼaniyatʼik
y lapʼaxkʼayatʼik.
\v 2 Ex chavaycha para apalay kilamalhiʼachajuu, va klaskʼiniyau
ni chʼantaun kamakʼatʼik mijatapastakʼatkʼan. Va aqstanchun
kalapʼaxkʼatʼik. Chʼantaun kamakʼatʼik metsukuntikʼan.
Va chʼantaun kaval mijatapastakʼatkʼan.
\v 3 Jantu tuʼuchun kʼamakʼatʼik para kalamaʼalhaʼatʼik.
Jantu ay kamakʼakʼantʼik, va kun kilpatiti kalatʼoʼoyatʼik
yu alati tacha apalay lajʼay kataval jantu uxiknan.
\v 4 Jantu kʼalakxkʼautʼik vamun yu maqskʼiniyatʼik.
Vachuʼ kʼalakxkʼautʼik yu tamaqskʼiniy yu alati.
\v 5 Va chuncha kʼalakpʼastʼaknantʼik tacha ixjatapastakʼati
ni Cristo Jesús.
\v 6 Mas ixjatsukunti ni yucha va ixjatsukunti Dios,
pero jantu kalhinaul ni maqskʼiniy kalaqtsʼinkal tacha
Dios.
\v 7 Va makauntijlalcha yu ixnavin, ixjatsukunti va ixjatsukunti
oqxtamati val, y tsukulcha tacha lapanaki.
\v 8 Tejkan ixtiʼukxuyal tacha lapanaki, yucha malakatʼunikal
xʼaman. Ni yucha ox ixqalasmaknan mas lhijunkal para
kamaqxtaqkal para kanil laka kurus.
\v 9 Xlhiyucha ni Dios laʼayal y xtaqnil ixtaqaʼuti
yu apalay toʼoyakan xajantu ixtaqaʼuti matichun aqayntaun
lapanaki.
\v 10 Ex chuncha tejkan kalaqputeʼekanaʼ ixtaqaʼuti
ni Jesús, katataʼaqtsoqoqtaniyaʼ tachun yu tavilanal
laktʼiyan ali yu tavilanal lakatʼun y mas va laqnin.
\v 11 Vachuʼ chuncha tachun katamispal y katanaul ni
Jesucristo va Jalhachimoʼonuʼ, ex chuncha katoʼoyakanaʼ
ni kimPay Dioskʼan.
\s Ixlapanakni Dios va tacha jastʼakun tajunita aniy lakamunukpaʼ
\p
\v 12 Ex chuncha uxiknan yu klaʼachaniyau, tacha aqsliyaj
kilaqalasmatʼau tejkan klatʼataulau, chavaycha mas jantu
klatʼataulau, apalay kilaqalasmatʼau. Kalaqltʼapʼatsʼatʼik
yu maqskʼiniy y katapastakʼun ni kʼalaqtʼaxtʼuʼotʼik.
\v 13 Va Dios yu tapatsay la metsukuntikʼan para kalakʼanauntʼik
yu lhinajun y para lay kamakʼatʼik.
\v 14 Tachun yu makʼayatʼik jantu kamakʼatʼik kun lhilukuj
y jantu kamakʼatʼik kun lhuu lakchivinti.
\v 15 Ex chuncha jantu katamukʼanin milaqtaqalkʼan, y
jantu kalhitayal yu lakxkiliu la metsukuntikʼan. Kʼaʼuntʼik
yu laqsaval sasʼatʼan Dios. Va laktʼavilanantʼik yu
talaktuʼunun lapanakni yu chavaycha tatʼajun, xlhiyucha
kʼaʼuntʼik tacha jastʼakun yu ox kʼuliksnaʼ tasuy aniy
lakamunukpaʼ.
\v 16 Ox katʼaylhipʼintʼik tacha lhinajun ni chivinti
yu xtaʼa jatsukunti. Ex chuncha tejkan kaminchoqoyaʼ
ni Cristo ayaj kajkʼachanaʼ por uxiknankʼan. Ex jantu
valiʼiy kaval ni klamasuniu ixchivinti Dios y iktapatsal
kun tachun kintapʼasta.
\v 17 Mas kaknil, ni kitʼin kakval tacha taun lapaxkan
y vachu chun metsukuntikʼan va tacha taun jamoqslanti
junita. Va lhakʼapʼupʼinatʼik y maqxtʼaqnitʼik metsukuntikʼan
ni Dios. Ex chuncha mas kaknil ayaj klhiʼachantajuy
ni kitʼin chʼantaun kun mintachunkʼan.
\v 18 Va xlhiyucha lhiʼachʼantʼaʼuyatʼik chʼantaun kun
kitʼin.
\s Ni Timoteo ali Epafrodito
\p
\v 19 Incha kiJalhachimoʼonukʼan Jesús najun, ex niman
klamalaqachaniyau ni Timoteo para vachuʼ oxamaktaun
kakval tejkan kajkʼatsayaʼ ni ox alintʼatʼik.
\v 20 Aniy jantu alin aqayntaun lapanaki yu chuncha
kʼatsan tacha kitʼin, laqsaval kapastakʼul por uxiknankʼan.
\v 21 Tachun vamun tamakaputun yu yuʼuncha talhipaʼiniy.
Jantu tamakaputun yu lhinajun ni Jesucristo.
\v 22 Pero uxiknankʼan mispʼayatʼik ni ayaj qalʼox ni
Timoteo. Ni yucha ox kiʼaqtayjuy ni kitʼin para kalaqputeʼekal
ni ox chivinti yu lhichiviniy Cristo, vachu chun tacha
qayntaun tsʼal yu ox aqtayjuy ixpay.
\v 23 Xlhiyucha klamalaqachaniputunau ni yucha, pero
pʼunaj kajkʼatsaʼelayaʼ tisuncha kaktapasayacha.
\v 24 Pero ox ijkʼatsay incha najun ni kiJalhachimoʼonukʼan
Jesús, ka va klalaqʼantachaʼau ni kitʼin vachuʼ.
\p
\v 25 Kitʼin klhilay ni ox kaval kaklamalaqachanichoqoo
vachuʼ ni Epafrodito yu kilaqajkʼan. Yucha kintʼatapatsay
tacha kintʼatropa la ixlhitapatsa Dios. Va yucha yu
malaʼachʼatʼik aniy para kiʼaqtayjul yu xakmaqskʼiniy.
\v 26 Yucha ayaj talaqtsʼinputunan, xlhiyucha klamalaqachanichoqoyau.
Yucha kʼatsal ni uxiknan kʼatsʼatʼik ni va ixtaqanʼay,
xlhiyucha pastakʼuy por uxiknan.
\v 27 Laqsaval ixtaqanʼay y va laycha ixnil. Pero ni
Dios mapaynil y vachu kimapaynil ni kitʼin para jantu
apalay kakmaqaninil.
\v 28 Xlhiyucha niman klamalaqachanichoqoyau para kʼalhiʼachʼantʼaʼutʼik
tejkan kʼalaqtsʼinchʼoʼoyapitik. Ex chuncha ni kitʼin
jantu kaktaulaʼ kun jamaqaniti.
\v 29 Kalaʼaʼitʼik ni yucha kun chux la meʼachatikʼan
tacha ixlapanaki kiJalhachimoʼonukʼan Jesús. Kʼalaktʼoʼoyatʼik
yu alati lapanakni yu chuncha tajunita tacha yucha.
\v 30 Yucha va laycha ixnil por ixlhitapatsa ni Cristo.
Laqsaval ixmaqxtaqputun ixjatsukunti taʼan ayaj lhitaʼay
xaktʼaunau. Chuncha yucha kiʼaqtayjul mas uxiknan jantu
lay ixkilaʼaqtayjuyau por maqati vilanantʼik.
\c 3
\s Ni lapanakni yu laqsaval ixnavin Dios tajunita
\p
\v 1 Ex chuncha, ketʼalaqaunin va kʼalhiʼachʼantʼaʼutʼik
ni kiJalhachimoʼonukʼan Jesús. Jantu kinchaaniy klatsʼoqnichoqoyau
aaqtaun tacha yu klatsʼoqniu pʼunaj, va ayaj xtapal kʼaʼasmakchʼoʼotʼik.
\v 2 Kʼalhistʼajkʼantʼik para jantu katamakanun ni anchanuʼ
lapanakni yu tacha jalaktuʼunuʼ xʼoyun tajunita, yu jantu
ox tamakay. Yuʼuncha talhinajun maqskʼiniy kaxvililichʼukʼupʼuxnikʼantʼik
tacha lhinaunkan laka lhachimoʼon.
\v 3 Yu kijnankʼan va yu laqsaval ixlapanakni Dios juntau.
Toʼoyayau ni Dios la ketsukuntikʼan y lhiʼachantajuyau
ni Cristo Jesús y jantu pastakʼau ni lay kamakau tuʼuchun
la kilakatunajkʼan para oxicha kajuu kun Dios.
\v 4 Kitʼin xakmakay ixlhachimoʼon Moisés. Incha matichun
lapanaki najun ni kapulaqtaxtul por makay yu lhinaunkan,
ex kitʼin apalay.
\v 5 Va ikxvililichukʼupʼuxnikal tacha lhinaunkan, tejkan
laqatsajincha julchan val tejkan iktsukul. Va israelita
ijkunita, va ikminchal kun Benjamín y vachu ikchiviniy
yu lhihebreo yu ixchiviniy kimpay. Vachuʼ va fariseo
xajkunita, xlhiyucha xakmakaʼojoy ixlhachimoʼon Moisés.
\v 6 Vachuʼ laqatapʼasta xaklaqmamaqanlqajnivay yu ixtalhakapuʼan
ni Cristo y jantu tuʼuchun ixkintsʼanqaniy yu tacha
lhinaunkan la kilhachimoʼonkʼan. Jantu matichun ixlay
kintamukʼanin laqtaqal.
\v 7 Tachun yu anuʼ yu xakmakay va ayaj xtapal xaklhilay,
pero taval va por Cristo ikmakauntijlaʼol tacha jantucha
xtapal kaval.
\v 8 Chavaycha apalay ikmaqatsʼanqaʼojotacha tachun
para apalay kakmispal ni Jesucristo kiJalhachimoʼonuʼ.
Vamun xtapal kamispʼatʼi ni yucha. Va por yucha klaqmaqatsʼanqal
tachun y chavay klaqtsʼin va tacha jamakxtalcha. Ex
chuncha vamun ni Cristo ayaj xtapal junita para kitʼin.
\v 9 Chuncha yucha ixlapanaki kunita. Ox kilaqtsʼin
ni Dios, jantu va por ikmakay yu lhinaunkan, va por klhakapuʼan
ni Cristo. Va Dios yu kimaxtuniʼol kilaqtaqal por klhakapuʼal
ni Cristo.
\v 10 Vamun yuʼ ikmispaputun para chuncha kaʼalil la
ketsukunti ni anchanuʼ tapʼasta yu pumajkujuchoqokanta
laka janinin ni Cristo. Vachuʼ para kakmaqanlqajnal
tacha lhamaqanlqajnal ni yucha. Chuncha kunputun tacha
ixjunita ni Cristo tejkan nil
\v 11 para chuncha lay kajkujchoqol tejkan katakujaʼ
ni janinin.
\s Ni Pablo va taylhaʼan para lay kalhajal
\p
\v 12 Laqsaval ni kitʼin jantukaʼ iknajun va ikmakaʼojoy
tachun yu maqskʼiniy, vananaj alin yu kintsʼanqaniy.
Pero va iktaylhaʼan para lay kaklhajal ni anchanu. Va
xlhiyucha kilaksaklhi ni Jesús.
\v 13 Ketʼalaqaunin, jantu iknajun incha klhajatacha.
Pero va putaun yu ikmakay. Ikmakauntijlay yu tapasatacha
y ikmakaputun kun kintapʼasta yu vananaj tsʼanqay
\v 14 para kakchaʼal taʼan maqskʼiniy para chuncha kaklhajal
yu najun ni Dios kintaxtaqniyaʼ por yu makal ni Jesucristo.
\p
\v 15 Kijnankʼan yu oxicha lhakapuʼanau chuncha maqskʼiniy
kapastakvi. Incha alin tuʼuchun yu jantu chuncha pʼastʼakʼatʼik
tacha ikpastakʼa kitʼin, ex ni Dios katamasuniyan yu
laqsaval.
\v 16 Pero maqskʼiniy kataylhaʼau makanaʼ tachun yu
mispataucha.
\p
\v 17 Ketʼalaqaunin, kilalaqtsʼiʼiu la kimputsuku. Vachuʼ
kʼamakʼatʼik kuenta tas junitacha ixputsukukʼan ni lapanakni
yu chuncha tatiʼukxuntayay tacha klamasuniu.
\v 18 Va aqlhuu xaklajunau ni la alin lapanakni yu talhilay
va jantu xtapal kaval mas nil Jesús laka kurus. Chavaycha
tus ijqalhun ni klajunchoqoyau aaqtaun, ni yuʼuncha
\v 19 katatsʼanqayaʼ tejkan kataniyaʼ. Vamun tamakaputun
yu lhinajun ixlakatunajkʼan tacha ixdioseskʼan kaval.
Lajʼay talhikʼatsan yu maqskʼiniy katalhimaxanal. Vamun
tapastakʼa yu alin aniy lakamunukpaʼ.
\v 20 Pero kijnankʼan va machaqan laktʼiyan juntau.
Pakxanʼiyau ni ancha kamintachal yu kintamalaqtaxtuyan,
yucha va kiJalhachimoʼonukʼan Jesucristo.
\v 21 Kilakatunajkʼan yu chavaycha lhitʼaunau va tatsʼanqaniy
tapʼasta. Ex yucha saystʼi kintamakaniyan kilakatunajkʼan
vachu chun tacha ixlakatunaj ni yucha. Va chuncha kamakayaʼ
kun ixtapʼasta yu kapulhachimoʼonunaʼ tachun.
\c 4
\s Kalhiʼachʼantʼaʼutʼikcha ni kiJalhachimoʼonukʼan Jesús
\p
\v 1 Ketʼalaqaunin, xlhiyucha chuncha maqskʼiniy ox katʼaylhipʼintʼik
kun kiJalhachimoʼonukʼan Jesús. Ni kitʼin klapaxkayau
ni uxiknankʼan y vachuʼ ayaj klalaqtsʼinputunau. Va
klalhiʼachantajuyau ni uxiknan, va tacha kilhilhajati
untʼatʼik.
\p
\v 2 Klakskʼiniy ni Evodia ali Síntike ni chʼantaun
katamakal ixjatapastakʼatikʼan. Chuncha tamaqskʼiniy
yu ixlapanakni ni kiJalhachimoʼonukʼan Jesús.
\v 3 Vachu iktapayniniyan ni uxintʼi, yu ox kintʼaʼoqxtamati
kʼatʼi, va iknajun ni kalaqʼaqtʼayʼutʼi anchanuʼ xanatin
para chʼantaun kataval. Ni yuʼuncha ayaj kintʼatapatsal
ixlaqputeʼeka ni ox chivinti yu lhichiviniy Cristo.
Vachu ayaj ixtatʼatapatsay ni Clemente ali yu alati
yu ixkintaʼaqtayjuy. Yuʼuncha jalaqtsʼoqʼulanikantacha
ixtaqaʼutikʼan la xalibro jatsukunti.
\p
\v 4 Kalhiʼachʼantʼaʼutʼikcha por ni kiJalhachimoʼonukʼan
Jesús. Aaqtaun klajunchoqoyau: ¡Kʼalhiʼachʼantʼaʼutʼikcha!
\v 5 Katakʼatsanin tachun ni lapanakni ni va qalʼoxin
lapanakni untʼatʼik. Va ukstsʼuniycha minta ni kiJalhachimoʼonukʼan.
\v 6 Jantu tuʼuchun katapastakʼun. Kaskʼintʼik Dios,
kamakʼatsʼanitʼik Dios mintapaynitkʼan. Va si kaxtʼaqnitʼik
lhimalaqpuchuncha.
\v 7 Ex chuncha ni Dios kataxtaqniyan oxamaktaun jatsukunti
yu apalay ox yu jantu matichun lay malaqasiy. Chuncha
ni Dios kalhistakʼaʼ melhanutkʼan kun mijatapastakʼatkʼan
por yu makal ni Cristo Jesús.
\s Kapʼastʼaktʼik vamun yu lajʼox kun yu lay toʼoyakan
\p
\v 8 Chavay, ketʼalaqaunin, kapʼastʼaktʼik vamun yu lajʼox
kun yu lay toʼoyakan. Kapʼastʼaktʼik tachun yu laqsaval
ali tachun yu toʼoyakan ali tachun yu vas junita ali
tachun yu mispakan tacha ox ali tachun yu ixlaqmiti
ali tachun yu ox lhichivinkan.
\v 9 Yu klamasuniu, yu laʼaʼitʼik ali yu asmaktʼik, ali
yu kilalaqtsʼintau la kimputsuku, va yucha kamakʼatʼik.
Ex chuncha ni Dios yu oxamaktaun makanan, yucha katatʼataulan
chʼantaun kun uxiknan.
\s Ni Pablo paxkajlaqaʼiy yu tamalaqachanil
\p
\v 10 Ayaj klhiʼachantajuy ni kiJalhachimoʼonukʼan Jesús
porke ni uxiknankʼan pʼastʼaktʼik ni kilaʼaqtayjuchoqoyau.
Si ixkilapastakʼau pero chavaycha lay kilaʼaqtayjuchoqoyau.
\v 11 Kitʼin jantu iknajun incha alin yu ikmaqskʼiniy.
Va klhiʼachantajuy yu klhitsukuy y si oxamaktaun iktijuntayay.
\v 12 Kitʼin ikmispay tas laycha kakputaulal kilhikilpatiti
y vachu tas laycha kakputaulal kilhimaqaliti. Mas va
tichun iktapasaycha la ketsukuntikʼan, ni kitʼin klaniʼojota
y oxamaktaun kʼalinta mas kajkʼotsal o kakchavanil, mas
lhuu kakmaqalil o kakmaqanlqajnal kun kilpatiti.
\v 13 Kitʼin va tachun lay iktayaniy, va por Cristo yu
kiʼaqtayjuy.
\v 14 Pero ox makʼatʼik tejkan kilaʼaqtayjuu y chuncha
kilatʼamaqanlqajnanau.
\p
\v 15 Uxiknan yu machaqan Filipos untʼatʼik, kʼatsʼayatʼik
ni tejkan iktaxtul la milakatʼun Macedonia, va xajkʼanta
laqputeʼeni ixchivinti Dios. Jantu matichun kiʼaqtayjul,
mas yu alati yu talhakapuʼan. Vamun uxiknan kilamalaqachaniu
milapaxkankʼan, va por ox ixpʼaxkʼalaqtsʼinatʼik yu laʼaʼitʼik.
\v 16 Vachu tejkan vananaj xakvilchal laka putaulan
Tesalónica, aqtamin aqtʼiyun ixkilamalaqachaniyau yu
xakmaqskʼiniy.
\v 17 Pero ni kitʼin jantu incha vamun ikpastakta kaklaskʼiniu
tuʼuchun. Va iknajun apalay katalhaval milhilhajatikʼan
kun Dios por yu ox makʼayatʼik.
\v 18 Chavaycha klaqaʼil tachun yu ikmaqskʼiniy tus
kixajnichal. Tus lhiʼoqslay yu kilaxtaqniu yu kilhiminil
ni Epafrodito. Yu kilamalaqachaniu va tacha taun tuʼuchun
yu sʼejenʼe para Dios, tacha taun ox jamoqslanti yu lhipaʼiniy.
\v 19 Ni kimPay Dioskʼan yucha kataxtaqniyan tachun
yu katatsʼanqaniyan, va tacha ayaj maqalinin, chuncha
tacha tasuy la ixjatsukunti ni Cristo Jesús.
\v 20 Va la ay kamakakal ni Dios yu kimPaykʼan mas va
tavanancha, jantu aqtaun katamaktal. Va chuncha kavalcha.
\s Ni Pablo jalakmastakʼachoqoy yu talhakapuʼan
\p
\v 21 Kalakmastʼakʼatʼik por kitʼin tachun ixlapanakni
Dios por yu makata ni Cristo Jesús. Vachuʼ tamastakʼayan
ni ketʼalaqaunin yu aniy kintatʼavil.
\v 22 Tamastakʼayan tachun yu aniy ixlapanakni Dios
tajunita. Yu apalay tamastakʼayan va yu tatapatsay la
ixʼaychaqaʼ ni César yu ay jalhachimoʼonuʼ.
\v 23 Va katamapaynin ni Jesucristo mintachunkʼan. Chuncha
kavalcha.