\id COL
\h COLOSENSES
\mt2 Ni Chivinti yu Jalaqtsʼoqnil Pablo Ixlapanakni Dios yu Tavilanal Colosas
\c 1
\s Ni Pablo jalakmastakʼay ixlapanakni Dios yu tavilanal Colosas
\p
\v 1 Kitʼin kPablo ixtamalaqachan Jesucristo kunita
va por chuncha naul ni Dios. Aniy chʼantaun iktʼavil
kilaqajkʼan Timoteo.
\v 2 Klamastakʼayau ni uxiknankʼan ketʼalaqaunin yu
vilanantʼik laka putaulan Colosas yu ixlapanakni Dios
untʼatʼik. Ox tʼaylhipʼinatʼik chʼantaun kun Cristo.
Katamapaynin y oxamaktaun katamakan ni kimPay Dioskʼan
ali kiJalhachimoʼonukʼan Jesucristo.
\s Ni Pablo skʼin Dios por yuʼuncha
\p
\v 3 Si iktapayniniyau por uxiknan, vachuʼ ikxtaqniyau
lhimalaqpuchuncha ni kimPaykʼan Dios ali kiJalhachimoʼonukʼan
Jesucristo por uxiknan.
\v 4 Ijqasmakvi ni ox lhakʼapʼupʼinatʼik ni Cristo Jesús
y ox jalakpʼaxkʼayatʼik tachun ixlapanakni Dios.
\v 5 Chuncha makʼayatʼik va por alin yu pʼakxanʼiyatʼik.
Yucha Dios talhilkamaʼanitan laktʼiyan. Va chuncha lanitʼik
tejkan asmaktʼik ni ox chivinti yu laqsaval, yu lhichiviniy
tas lay kʼapʼulaqtʼaxtʼutʼik.
\v 6 Ni anchanu ox chivinti chaʼal tus taʼan vilanantʼik,
va tacha ajin tus taʼakchun ni lakamunukpaʼ y lhixajachal
yu lajʼox. Vachu chun val kun uxiknankʼan ni anchanu
julchan tejkan asmaktʼik y laqsaval mispʼatʼik ixjamapayninti
Dios.
\v 7 Chuncha tamalanin Epafras yu kʼachaniyau ali yu
kintatʼatapatsayan. Yucha ox tapatsaniy ni Cristo para
kataʼaqtayjun.
\v 8 Yucha vachu kintaputeʼenin tacha ni Espíritu Santo
tamakayan para kʼalapʼaxkʼatʼik.
\p
\v 9 Xlhiyucha, tejkan pʼunaj chuncha ijqasmakvi tus
chavaycha, jantu aqtaun ikmakaunau iskʼinka Dios por
uxiknan. Iktapayniniyau para kʼamispʼaʼotʼik yu Dios
lhinajun. Chuncha kʼamalaʼasitʼik yu ox jatapastakʼati
yu minachal kun ni Espíritu Santo.
\v 10 Chuncha kskʼinau Dios para katʼiʼukxuntʼayatʼik
tacha tapaxtoqniy ixlapanakni kiJalhachimoʼonukʼan, ex
chuncha kalhipaʼinil Dios. Ex ox kaxajchal tachun yu
ox makʼayatʼik. Va chuncha katalhaval ixmispaka Dios
la metsukuntikʼan.
\v 11 Vachuʼ ikskʼinau para kʼalhitsʼukʼutʼik tachun
tapʼasta yu minachal kun yu la ay ixtapʼasta Dios. Ex
lay kʼatʼayanitʼik va tisuncha kaval y uxamaʼay kʼaʼuntʼik.
\v 12 Chuncha kun achati kaxtʼaqnitʼik lhimalaqpuchuncha
ni kimPay Dioskʼan. Yucha kintalaʼoxinitancha ketsukuntikʼan
para vachu kalaqaʼiu yu kalaqxtaqniyaʼ ixlapanakni taʼan
jamapulkunti.
\v 13 Kintamaxtutancha taʼan ixlhachimoʼonun ni xaʼukxtin
japutsʼisniʼ y kintalhilhaʼan taʼan lhachimoʼonun isTsʼal
yu la achaniy.
\v 14 Yucha kintalhiʼin ixjakʼalna y chuncha malaqmixiʼol
kintalaqalhinkʼan.
\s Vamun Cristo yu ay
\p
\v 15 La ixjatsukunti ni Cristo tasuy ni Dios yu jantu
laqtsʼinkan. Yucha aqtsʼiyaj ixlhiʼalincha y chuncha
va tacha saʼoqsna junita tachun yu alin.
\v 16 Va yucha makal tachun yu alin laktʼiyan ali yu
alin lakamunukpaʼ, yu laqtsʼinkan ali yu jantu laqtsʼinkan,
kaval xaʼukxtinin lakamunukpaʼ, kaval angeles, kaval yu
talhachimoʼonun, kaval yu talhitʼajun tapʼasta, va tuʼuchun
kavalcha. Tachun va yucha jalakmakal para ixnavin kaval.
\v 17 Yucha aqtsʼiyajcha ixlhiʼalincha y yu alati va
astan. Va por yucha la ox chʼatay tachun yu alin.
\v 18 Yucha junita saʼaqtsul ni kijnan tachun yu lhakapuʼanau.
Kijnan va tacha ixlakatunaj kajuu. Yucha puʼaqtaynil
tachun yu alin y va yucha pʼunaj kujchoqota la ixlhinin.
Xlhiyucha por tachun, yucha apalay ay junita.
\v 19 Tachun ixjatsukunti ni Dios val la ixjatsukunti
ni Cristo, va chuncha lhipaʼinil Dios.
\v 20 Por yu makal ni Cristo, Dios naul ni tachun yu
alin ox katataulal kun yucha. Nil ni Cristo y pumajʼal
ixjakʼalna laka kurus, xlhiyucha tachun yu alin lakamunukpaʼ
ali laktʼiyan oxamaktaun taval kun Dios.
\p
\v 21 Uxiknankʼan maqancha vachuʼ la maqati ixtʼaunatʼik
y tʼalaxkaynin ixʼuntʼatʼik kun Dios por yu ixpʼastʼakʼatʼik
ali yu ixmakʼayatʼik. Pero Dios makal para ox katalaqtsʼinchoqon
ni uxiknan.
\v 22 Chuncha val por yu makal Cristo la ixlakatunaj
tejkan nil. Va para ixlapanakni Dios kʼaʼuntʼik para
ox kʼaʼuntʼik la metsukuntikʼan. Ex jantu lay matichun
katamukʼanin laqtaqal tejkan yucha katalhaʼanan la ixtalakaʼukxpuʼ
Dios.
\v 23 Xlhiyucha maqskʼiniy katʼaylhipʼintʼik la milhakapuʼatkʼan
y laqpʼaysnin kʼaʼuntʼik. Ex jantu kʼamakʼauntʼijlatʼik
yu ox pʼakxanʼiyatʼik yu tamasunin tejkan asmaktʼik
ni ox chivinti. Ni anchanu chivinti laqputeʼekan talakachux
lakamunukpaʼ. Dios kixtaqnil ni kitʼin ni aniy lhitapatsa
yu ixlaqputeʼeka.
\s Ni Pablo laktapatsaniy yu talhakapuʼan
\p
\v 24 Chavaycha klhiʼachantajuy ni klamaqanlqajnan la
kilakatunaj por uxiknan. Ixlapanakni Cristo maqskʼiniy
maqanlqajnanau. Chavay klaqayntsay lati yu maqanlqajnati.
Ikmaqanlqajnan por ixlapanakni Cristo yu tacha ixlakatunaj
tajunita.
\v 25 Kitʼin kval ixʼoqxtamatkʼan yu talhakapuʼan. Va
yucha ni lhitapatsa yu kimaqxtaqnil Dios por uxiknankʼan
para kaklaqputeʼel tachun ixchivinti.
\v 26 Ni aniy chivinti la maqancha ixmaqsaqta ni Dios
pero chavaycha lakmamispanitacha ixlapanakni.
\v 27 Ni Dios tamamispaniputun uxiknan yu jantu israelitas
kʼaʼuntʼik ni anchanu chivinti yu vamun yuʼ ox, yu jantu
ixmispakan. Ni anu chivinti najun ni Cristo va kun uxiknan.
Xlhiyucha pʼakxanʼiniyatʼik ni oxixtu yu kataxtaqniyan.
\v 28 Klhichivinanau y chuncha klakchivijvayau tachun
ni lapanakni. Ox klakmasuniyau kun tachun jatapastakʼati
para jantu tuʼuchun katsʼanqal la ixjatsukuntikʼan kun
Cristo Jesús.
\v 29 Va yucha klhilaqltapatsay kun tachun ixtapʼasta
ni Cristo yu kixtaqniy.
\c 2
\p
\v 1 Va knajun kakʼatsʼatʼik ni la pʼays iktapatsay
por uxiknankʼan ali yu tavilanal laka putaulan Laodicea
y por tachun ni lapanakni yu talhakapuʼan yu jantukaʼ
taks kintalaqtsʼin.
\v 2 Chuncha iktapatsay para kalaksastʼinikal ixjalhanutkʼan
y chʼantaun katalapaxkal para jantu tuʼuchun katsʼanqal
la ixjatapastakʼatkʼan. Vachu ayaj iktapatsay para chuncha
lay katamalaqasil ni anu chivinti yu kimPay Dioskʼan
ixmaqsaqta yu lhichiviniy Cristo.
\v 3 La ixjatsukunti ni Cristo alin tachun yu apalay
ixlaqmiti yu jatapastakʼati kun yu jatalaniti.
\v 4 Chuncha klajunau para jantu matichun katamakanun
mas va qalʼoxicha kachivinil pero jantu laqsaval yu
najun.
\v 5 Mas jantu klatʼataulchaʼau la kilakatunaj pero
la kijatapastakʼati va tacha klatʼataulchaʼau chʼantaun
kun uxiknan. Va klhiʼachantajuy ni ijkʼatsay va chʼantaun
untʼatʼik y la pʼays lhakʼapʼupʼinatʼik ni Cristo.
\p
\v 6 Chuncha tacha tejkan laʼaʼitʼik ni Cristo Jesús
miJalhachimoʼonukʼan, chuncha katʼiʼukxuntʼayatʼik chʼantaun
kun yucha.
\v 7 Chʼantaun kun yucha kʼaʼuntʼik, ox katʼaylhipʼintʼik
kun yucha. Kʼatʼapʼasnitʼik milhakapuʼatkʼan chuncha
tacha tamasunitan. Chuncha apalay katalhaval milhakapuʼatkʼan
y va si kaxtʼaqnitʼikcha lhimalaqpuchuncha ni Dios.
\s La ixjatsukunti ni Cristo alin tachun yu maqskʼiniy
\p
\v 8 Kʼalhistʼajkʼantʼik para jantu matichun katalhimakanun
por yu talaniy ixlaqʼamankʼan, por chivinti yu tacha
lajʼoxi kaval pero jantu laqsaval. Yucha vamun ixputsukkʼan
lapanakni ali xajatakpastakʼati aniy lakamunukpaʼ. Jantu
chʼantaun kataval kun Cristo.
\v 9 Tachun yu Dios junita va la ixlakatunaj ni Cristo
alinʼojota.
\v 10 Va por Cristo lhitʼaunʼoyatʼik tachun yu maqskʼiniy.
Yucha va xaʼaqtsul tachun yu lhachimoʼonun ali tachun
yu talhitʼajun tapʼasta laktʼiyan.
\v 11 Uxiknan va tacha kʼaxvililichʼukʼupʼuxnikʼantʼik
yu talaqalhin la metsukuntikʼan. Jantu valiʼiy lapanaki
kaval yu taxvililichukʼupʼuxnin. Va Cristo yu taxvililichukʼupʼuxnin.
\v 12 Tejkan aqchʼajʼautʼik va tacha katʼaʼaknutʼik
chʼantaun kun yucha. Lhakʼapʼupʼintʼik ni Dios yu majkujuchoqol
la ixlhinin. Xlhiyucha va tacha tʼatʼakʼukchʼoʼotʼik
chʼantaun kun yucha.
\v 13 Tejkan jantukaʼ ixakʼanikʼanatʼik mintalaqalhinkʼan,
va ixtʼiʼukxuyanantʼik laka lhinin. Ex ni Dios taxtaqnin
sastʼi jatsukunti y tamalaqmixinin mintalaqalhinkʼan.
\v 14 Ixʼalin yu ixlhaaniyau por jantu ixmakayau yu
ixlhinaunkan, pero yucha malaqmixiʼol. Va tacha aqxtaun
jalhiki taʼan istsʼoqmulakanta kilhaanintikʼan. Yucha
maxtul y xtukmukʼal laka kurus.
\v 15 Va lakmaxtuniʼol ixtapʼastkʼan ni xaʼukxtinin
lakamunukpaʼ ali yu talhachimoʼonun y jalakmalakatʼunil.
Laka kurus ni Cristo jalaqmaqalhajal, ex va tacha jalaqmaqalchoqonil
tacha tachʼinin.
\p
\v 16 Xlhiyucha jantu matichun lay tamukʼaniyan laqtaqal
por yu uyatʼik ali yu oqyatʼik. Vachu jantu lay tamukʼaniyan
laqtaqal por yu talhinajun israelitas xakʼatanax, por
yu talhinajun tamin malkuyuʼ, o por yu lay kʼamakʼatʼi
xajulchan jastaknati.
\v 17 Yu anchanu ixlhinaunkan yu tasul pʼunaj va tacha
ixmaqtsʼansilaqa ni Cristo yu ixminta, pero yu laqsaval
maqskʼiniyatʼik vamun ni Cristo.
\v 18 Jantu kʼamakʼauntʼik katamakanun y katamaxtunin
milhilhajatkʼan anchanu lapanakni. Yuʼuncha va tacha
lakstʼuniy lakmakakan y vachuʼ tatoʼoyay angeles. Yuʼuncha
vamun talhichiviniy yu jantu laqsaval katalaqtsʼil y
lajʼay jalakmakakan ixlaqʼamankʼan. Tapastaknan tacha
valiʼiy lapanakni.
\v 19 Yuʼuncha jantu chʼantaun tatʼajun kun Cristo.
Ni yucha xaʼaqtsul yu lhakapuʼanau, kijnan va ixlakatunaj.
Yucha kintaxtaqniyan tapʼasta y Dios makay para kaʼaynlhi
kilhakapuʼatkʼan. Va tacha taun lakatunaj ajin tejkan
ixjasivikna malakatanuy tapʼasta y ox laqxtoʼa taʼan
talachʼapata.
\p
\v 20 Uxiknankʼan va tacha kʼanitʼik chʼantaun kun Cristo
xlhiyucha jantucha talhichimoʼoyan xaʼukxtinin aniy
lakamunukpaʼ. ¿Valiʼiycha tʼaunatʼikcha tacha vananaj
katalhichimoʼon yu xaʼukxtinin aniy lakamunukpaʼ?
\v 21 Yuʼuncha tanajun: “Jantu kachʼapʼa yu aniy, jantu
kʼaʼutʼi yu anuʼ, jantu klakchʼapʼa yu avintʼi.”
\v 22 Tachun yu chuncha lhinaunkan va lhichiviniy yu
niman tatantsiniy tejkan kʼaʼutʼi. Ni anchanu va yu
talhinajun y tamalaninin yu valiʼiy lapanakni.
\v 23 Ni anchanu chivinti lhijunticha ox jatapastakʼati
y lhijunticha laqsaval ox para katoʼoyau Dios y para
kamalakatʼunikau y para laqatapʼasta kalhistakvi kilakatunajkʼan.
Pero ni anchanu chivinti jantu kintaʼaqtayjuyan para
kamakajuu yu talaqalhin yu makaputunau.
\c 3
\p
\v 1 Uxiknankʼan va tʼaʼostʼaulatʼikcha chʼantaun kun
Cristo. Xlhiyucha kʼalakxkʼautʼik yu alin laktʼiyan
taʼan vilchal ni Cristo la ixlhijakanaj Dios taʼan lay
toʼoyakan.
\v 2 Kʼalhilakpʼastʼaknantʼik yu alin laktʼiyan jantu
yu xanavin aniy lakamunukpaʼ.
\v 3 Uxiknankʼan va tacha kʼanitʼikcha y chavay maqsaq
maʼanikʼantʼatʼikcha metsukuntikʼan kun Cristo la ixtalakaʼukxpuʼ
Dios.
\v 4 Ni Cristo va yucha yu taxtaqniyan jatsukunti. Tejkan
katasuyaʼ ni Cristo ex metsukuntikʼan vachu katatasuyaʼ
kun tachun ixʼoxixtu.
\s Ni sastʼi jatsukunti ali yu atʼali jatsukunti
\p
\v 5 Kʼamakʼaumaqnitʼikcha tachun yu jantu lajʼoxi la
metsukuntikʼan yu xanavin aniy lakamunukpaʼ. Jantu katʼatʼamatʼik
matichun yu jantu minavinkʼan. Jantu kʼamakʼatʼik yu
jantu lajʼoxi yu ayaj makʼapʼutʼunatʼik. Jantu kʼalalhavapʼutʼuntʼik
mimaqalitkʼan tus va tacha midioskʼan kʼamakʼatʼik.
\v 6 Tachun yu aniy yu tamakay lapanakni, va por yucha
lhitalqaman ni Dios. Xlhiyucha jamalaqachaniy maqanlqajnati
tachun yu jantu taqalasmatʼa.
\v 7 Vachu uxiknankʼan chuncha ixmakʼayatʼik tejkan
chuncha ixjunita mimputsukukʼan.
\v 8 Pero chavay kʼamakʼauntʼikcha tachun yu inchineʼ:
yu lhilukuj, yu talqaunti, yu jaxkayanti, yu jakiltayanti,
y yu laqxtoqnuʼ chivinti yu taxtuy la minkilnakʼan.
\v 9 Jantu kʼalamanunitʼik jalaklkanti, chavay maxtʼunikʼantʼatʼikcha
yu atʼaliʼ jatsukunti kun tachun yu pʼunaj ixmakʼayatʼik.
\v 10 Chavay lhilakʼayanantʼikcha kun yu sastʼi jatsukunti.
Lhilhiy tasastʼiyatʼik para apalay chuncha kʼaʼuntʼik
tacha Dios yu tamakan, tus ox kʼamispʼatʼik.
\v 11 Taʼan alin yu aniy sastʼi jatsukunti jantucha
makayau kuenta incha qayntaun lapanaki va griego u israelita.
Jantucha makayau kuenta incha va kaxvililichʼukʼunikʼantʼik
u incha jantu, u toʼoxtaycha machaqaʼ, u incha jantu kʼalhitsʼukʼu
jatalaniti, u incha va oqxtamati, u incha va xʼaman tapatsay.
Vamun makayau kuenta ni Cristo yu jamanavin tachun.
Yucha alinta la ixjatsukuntikʼan tachun ixlapanakni.
\p
\v 12 Ni Dios talaksakni para ixlapanakni kʼaʼuntʼik
y tapaxkayan. Xlhiyucha kʼalamapʼaynitʼik, ox kʼalalhipʼintʼik,
kʼamalakʼatʼunikʼantʼik, jantu kʼalamakʼanitʼik tuʼuchun
laqatapʼasta, y kʼamaʼantʼaulatʼik.
\v 13 Kʼalamaʼantʼaqnitʼik y kʼalamalaqmixinitʼik incha
tuʼuchun lamakʼaniyatʼik. Tacha Cristo tamalaqmixinin
vachu va chun kalamalaqmixinitʼik.
\v 14 Yu apalay maqskʼiniy va kalapʼaxkʼatʼik. Chuncha
va chʼantaun kʼaʼuntʼik la metsukuntikʼan.
\v 15 Ni Cristo oxamaktaun tamakan, ex chavaycha chuncha
kʼapʼutʼaulatʼik la mijatapastakʼatkʼan. Va xlhiyucha
laksakkʼantʼik para chʼantaun kʼaʼuntʼik. Kʼalhipʼaxkʼalaqtsʼinintʼik.
\p
\v 16 Ni chivinti yu lhichiviniy ni Cristo va yucha
ox katanul la mijatsukuntikʼan. Yucha kʼalamasunitʼik
y kʼalachʼivivatʼik kun ox jatapastakʼati. Kʼamilpʼatʼik
salmos ali milpati yu lhitoʼoyakan Dios ali milpati
yu tamasulhaaniyan ni Espíritu Santo. Ex chuncha kun
chux la melhanutkʼan kʼaxtʼaqnitʼik lhimalaqpuchuncha
kiJalhachimoʼonukʼan Jesucristo.
\v 17 Tachun yu kʼamakʼatʼik o yu kʼanauntʼik, kʼamakʼatʼik
la ixtaqaʼuti ni kiJalhachimoʼonukʼan Jesucristo. Va
por yucha kʼalhixtʼaqnitʼik lhimalaqpuchuncha ni Dios.
\s Yu maqskʼiniy kʼalamakʼanitʼik
\p
\v 18 Uxiknankʼan yu xanatin untʼatʼik, katʼoʼoyatʼik
mixapaykʼan. Va chuncha tapaxtoqniy ixlapanakni ni Jalhachimoʼonuʼ
Jesucristo.
\v 19 Uxiknankʼan yu joʼakna untʼatʼik kʼapʼaxkʼatʼik
mixanatikʼan. Jantu aqtaun kalhimaqchʼapʼutʼik.
\p
\v 20 Uxiknankʼan yu sʼatʼan untʼatʼik kʼaʼalʼasmaktʼik
mimpaykʼan kun minatkʼan, va chuncha lhipaʼiniy ni Jalhachimoʼonuʼ
Jesucristo.
\v 21 Uxiknan yu japayan untʼatʼik jantu kalakmalukʼujlatʼik
mesʼatʼankʼan para jantu kataxkanil ixjalhanutkʼan.
\p
\v 22 Uxiknankʼan yu oqxtamatin untʼatʼik kʼaʼalasmaktʼik
miʼukxtininkʼan yu aniy lakamunukpaʼ. Kʼalaktʼapʼatsʼanitʼik
jantu vamun tejkan katatsukun laqtsʼinin y jantu vamun
por ox kalaqtsʼinpʼutʼunkʼantʼik. Va kalaktʼapʼatsʼanitʼik
kun tachun miʼachatkʼan, va tacha kʼatʼoʼoyatʼik Dios.
\v 23 Mas va tisuncha yu kʼamakʼatʼik, kʼatʼapʼatsʼatʼik
kun tachun miʼachatkʼan tacha katsʼukʼutʼik lhilaqltapatsanin
kiJalhachimoʼonukʼan y jantu yu valiʼiy lapanaki.
\v 24 Kʼatsʼayatʼikcha ni kiJalhachimoʼonukʼan Jesucristo
kataxtaqniyan milhilhajatkʼan yu tapaxtoqniyan. Va kiJalhachimoʼonukʼan
yu tʼapʼatsʼaniyatʼik.
\v 25 Yu tamakaʼalhiy yu jantu lajʼoxi, katalaqaʼiyaʼ
yu jantu lajʼoxi por yu tamakal. Dios va mustaun jamakay
tachun lapanakni.
\c 4
\p
\v 1 Uxiknankʼan yu ukxtinin untʼatʼik va ox kʼamakʼatʼik
chuncha tacha yu laqsaval tapaxtoqniy miʼoqxtamatkʼan.
Kʼatsʼayatʼik ni vachuʼ alin miʼukxtinkʼan laktʼiyan.
\p
\v 2 Ox kʼatʼaylhipʼintʼik tʼachivinin Dios kun tachun
mijatapastakʼatkʼan y kʼaxtʼaqnitʼik lhimalaqpuchuncha.
\v 3 Vachuʼ kaskʼintʼik Dios por kijnankʼan para chuncha
kiJalhachimoʼonukʼan kintamalaqltiʼanin kilakatinkʼan.
Ex lay kaklaqputeʼeu ni chivinti yu ixmaqsaqmaʼakanta
yu lhichiviniy Cristo. Va xlhiyucha iktanun laka pachʼin.
\v 4 Vachu kʼaskʼintʼik para ox kaklhichivinil yu klaqputeʼey,
tacha kimpaxtoqniy kakchivinil.
\p
\v 5 Ox kʼatʼiʼukxuntʼayatʼik kun yu jantu talhakapuʼan.
Ox kʼalakpʼastʼaknantʼik para jantu valiʼiy katsʼanqal
mijulchankʼan.
\v 6 Kʼalaktʼachʼivinintʼik kun chivinti yu ox kalhixajchalcha,
yu katalhipaʼinil. Ex chuncha kʼamispʼayapitik tacha
maqskʼiniy kʼalhiʼaltʼaychʼoʼotʼik qayntamin.
\s Ni Pablo jamalaqachaniy jamastakʼanti
\p
\v 7 Tachun yu iktapasay kitʼin ancha katamakʼatsaniyan
ni Tíkiko yu kʼachaniy tacha kilaqaj y yu kiʼaqtayjunuʼ.
Yucha ox taylhaʼan y chʼantaun iktapatsaniyau ni kiJalhachimoʼonukʼan.
\v 8 Va yucha klamalaqachaniyau para kʼakʼatsʼatʼik
tacha kʼalintaucha para katamaʼayajnin melhanutkʼan.
\v 9 Vachu katʼaʼantachal ni Onésimo yu kintʼalaqajunkʼan
yu ox taylhaaniy y yu kʼachaniyau. Yucha va mintʼamachaqakʼan
junita. Yuʼuncha katamakʼatsaniyan tachun yu iktapasayau
aniy.
\p
\v 10 Tamastakʼayan ni Aristarco yu kintʼatachʼin y
vachuʼ Marcos ixpuxniunti Bernabé. Uxiknankʼan unkʼantʼatʼikcha
tacha maqskʼiniy kʼamakʼanitʼik. Incha ancha katalaqchaʼan
ox kalaʼaʼitʼik.
\v 11 Vachu tamastakʼayan Jesús yu vachuʼ junkan Justo.
Mas va lhuucha alin yu israelitas pero vamun yuʼuncha
kintatʼatapatsay para kalaqputeʼekal tacha lhachimoʼonun
ni Dios. Yuʼuncha ox kintamalakaʼulata.
\p
\v 12 Vachu aniy tamastakʼayan Epafras yu ixʼoqxtamati
Cristo y mintʼamachaqakʼan junita. Yucha va tacha skʼincha
Dios kun tachun ixtapʼasta para apalay kaʼaynʼal milhakapuʼatkʼan
y para kʼamaqxtʼaqkʼantʼik tachun yu najun Dios.
\v 13 Kitʼin klajunau ni ijkʼatsay ni Epafras va pastakʼuy
por uxiknankʼan y por tachun yu talhakapuʼan laka putaulan
Laodicea ali laka putaulan Hierapolis.
\v 14 Vachuʼ aniy tamastakʼayan Lucas yu doctor junita
yu achaniyau y vachuʼ Demas.
\p
\v 15 Uxiknankʼan vachu kʼamastʼakʼatʼik yu talhakapuʼan
Jesucristo laka putaulan Laodicea. Vachu kʼamastʼakʼatʼik
Nimfas y tachun yu talhakapuʼan yu tataqxtoʼa la ixchaqaʼ.
\v 16 Tejkan kʼapʼutʼeʼeʼoyapitik ni aniy karta kʼalakmapʼasanitʼik
yu talhakapuʼan laka putaulan Laodicea para chuncha
vachuʼ kataputeʼel. Vachu kʼapʼutʼeʼetʼik ni karta yu
ancha talhitʼaunachal.
\v 17 Kaʼunapitik ni Arkipo para ox kamakaʼol ni lhitapatsa
yu xtaqnil ni Jalhachimoʼonuʼ Jesucristo.
\p
\v 18 Kitʼin kPablo klamastakʼaʼoyau. Aniy klatsʼoqniyau
kintaqaʼuti kun la kimakaʼ. Kapʼastʼaktʼik ni kitʼin
va ktachʼin kunita. Katamapaynin ni Dios. Chuncha kavalcha.