\id 1TH
\h 1 TESALONICENSES
\mt2 Yu Xapʼunaj Karta yu Jalaqtsʼoqnil Pablo Ixlapanakni Dios yu Tavilanal Tesalónica
\c 1
\s Ni Pablo jalakmastakʼay ixlapanakni Dios yu tavilanal Tesalónica
\p
\v 1 Yu kijnankʼan, ni Pablo ali Silvano ali Timoteo,
aniy klatsʼoqniyau taun chivinti uxiknan yu ixlapanakni
kimPay Dioskʼan ali kiJalhachimoʼonukʼan Jesucristo
yu vilanantʼik laka putaulan Tesalónica. Katamapaynin
y oxamaktaun katamakan.
\p
\v 2 Va tacha ikxtaqniʼalhiyaucha lhimalaqpuchuncha
ni Dios por tachun uxiknan. Tejkan iktapayniniyau ni
Dios vachu si klalhitapayniyau por uxiknan.
\v 3 Tejkan iktʼachivinanau kimPay Dioskʼan va klapastakniyau
yu makʼaniyatʼik ni Dios por milhakapuʼatkʼan. Vachu
yu makʼayatʼik por ayaj achʼaniyatʼik ni Dios, vachuʼ
ox maqantʼaqniyatʼik y pʼakxanʼiyatʼik ni kaminchoqoyaʼ
kiJalhachimoʼonukʼan Jesucristo.
\v 4 Ketʼalaqaunin yu Dios tapaxkatan, ijkʼatsayau ni
Dios talaksaktan.
\v 5 Tejkan klalaqputeʼeniu ni ox chivinti, jantu valiʼiy
chivinti kaval. Va kun ixtapʼasta ni Dios ali ni Espíritu
Santo ox tamakʼatsanin ni va laqsaval. Kʼatsʼayatʼik
tejkan xaklatʼavilanau va para klaʼaqtayjuu ni uxiknan.
\p
\v 6 Aqtʼaynitʼik tiʼukxuntayaniy tacha kijnankʼan y
tacha ni kiJalhachimoʼonukʼan. Laʼaʼitʼik ni ox chivinti
kun achati yu xtaʼa ni Espíritu Santo mas yu alati ixtamamaqanlqajnivayan.
\v 7 Ex tachun yu talhakapuʼan yu tavilanal xaʼestado
Macedonia kun Akaya, yuʼuncha lay talaqtsʼiʼiyan tas
maqskʼiniy katatijuntayal.
\v 8 Ixchivinti kiJalhachimoʼonukʼan va minchal kun
uxiknan y talaqpuʼayal xaʼestado Macedonia ali Akaya.
Vachu takʼatsaʼol ni lapanakni taʼakapuchun ni ox lhakʼapʼupʼinatʼik
ni Dios. Ex chuncha jantucha maqskʼiniy kajkamakʼatsanil
ni lapanakni tas untʼatʼikcha.
\v 9 Va yuʼuncha kintajunan ni ox kilalaqaʼiu y makʼauntʼik
yu midioseskʼan yu tamakay lapanakni. Va tʼapʼatsʼaniyatʼik
ni Dios yu laqsaval kujta.
\v 10 Vachu pʼakxanʼiyatʼik ni kaminchoqotachal laktʼiyan
Sasʼatʼa ni Dios yu majkujuchoqol la ixlhinin. Yucha
ni Jesús yu kintamalaqtaxtuyan la ixlhilukuj ni Dios
yu kaʼalina.
\c 2
\s Ni lhitapatsa yu makal Pablo laka Tesalónica
\p
\v 1 Ketʼalaqaunin, kʼatsʼayatʼik ni tejkan klalaqkilau
jantu valiʼiy kaval.
\v 2 Laka putaulan Filipos ikmaqanlqajnau y klaktanchanikau
pero klajuniu ni ox chivinti yu kintaxtaqnin Dios. Yucha
kintamaʼayajnin, xlhiyucha klaqputeʼeu mas kintaxkajin
ni lapanakni.
\v 3 Tejkan klaxaqalau va klajuniu yu laqsaval. Jantu
klajuniu yu jantu ox kaval y jantu klamakanuu.
\v 4 Ni Dios ox lhilay kilhitapatsakʼan xlhiyucha kintamalaqachan
puteʼenin ni ox chivinti. Xlhiyucha jantu ikputeʼeyau
para katalhipaʼinil ni lapanakni, va para kalhipaʼinil
ni Dios yu kintalaqtsʼintanuniyan kelhanutkʼan.
\v 5 Kʼatsʼayatʼik ni jantu aqtaun klaxaqalau kun valiʼiy
kʼus chivinti para kalhiʼachʼantʼaʼutʼik, vachu jantu
klamakanuu kun chivinti para kaklhajau tumin. Ni Dios
yucha kʼatsaycha.
\v 6 Jantu kaknajuu kilatoʼoyau uxiknankʼan vachu jantu
kaknajuu kintatoʼoyan alati lapanakni, mas lay kaknajuu
kaktoʼoyakau va por ixtamalaqachan Cristo kuntau.
\v 7 Ni kijnankʼan va laka laksniy kʼukxuyanau kun uxiknan
vachu va tacha qayntaun ox xanati laklhistakʼa sasʼatʼan.
\v 8 Va ayaj ox klapaxkau. Xlhiyucha jantu vamun klaxtaqniu
ni ox chivinti, va klaxtaqniu tus la ketsukuntikʼan, va
por ayaj klaʼachaniu.
\v 9 Ketʼalaqaunin, pʼastʼakʼatʼik yu lhitaʼay lhitapatsa
yu ikmakau. Va iktapatsau tsʼis, tunkuj para kaʼalil
yu xakmaqskʼiniyau. Va para jantu klamaqanchapuu tejkan
xaklalaqputeʼeniyau ni ox chivinti yu lhinajun Dios.
\p
\v 10 Uxiknankʼan kʼatsʼayatʼik y vachu yu Dios kʼatsay
ni xaktiʼukxuyanau tacha paxtoqniy ixlapanakni Dios.
Vas xakʼukxuyanau, jantu tuʼuchun laqtaqal xakmakayau.
\v 11 Klaxtaqniu jatapastakʼati y klamalakaʼulau tachun
uxiknan vachu va tacha qayntaun xapay kun sasʼatʼan.
\v 12 Klalhixaqalau katʼiʼukxuntʼayatʼik tacha paxtoqniy
yu ixnavin Dios. Yucha tajuntaʼiyan para kʼatʼanutʼik
taʼan lhachimoʼonun taʼan tasuy kun tachun ixʼayaxtu.
\v 13 Xlhiyucha va tacha ikxtaqniyau lhimalaqpuchuncha
ni Dios. Tejkan asmaktʼik ni chivinti yu klalaqputeʼeniu
va laʼaʼitʼik jantu tacha valiʼiy ixchivinti lapanakni.
Va laʼaʼitʼik tacha yu laqsaval ixchivinti Dios. Yucha
taʼaqtayjuyan la metsukuntikʼan yu lhakʼapʼupʼinatʼik.
\v 14 Uxiknan, ketʼalaqaunin, aqtʼaynitʼik tiʼukxuntayaniy
vachu va tacha yu alati ixlapanakni Dios xalakatʼun
Judea yu talhakapuʼan Jesucristo. Uxiknan maʼanlʼajnantʼik
la ixtamakakʼan mintʼamachaqankʼan vachu va tacha ancha
Judea ixtʼaʼisraelitaskʼan tamaqanlqajnal.
\v 15 Yuʼuncha tamaqnil ni kiJalhachimoʼonukʼan Jesucristo
y jalaqmaqnil yu maqancha ixtalaqputeʼey ixchivinti
Dios. Vachuʼ kintatixkaulhaʼan. Jantu lhipaʼiniy ni
Dios yu tamakay, va taxkajiy tachun ni lapanakni.
\v 16 Laqatapʼasta tamakay para jantu lay kaklaqputeʼeniu
tas lay katapulaqtaxtul yu lapanakni yu jantu israelitas
kataval. Ex chuncha yu anchanu israelitas yu jantu talhakapuʼan
va apalay talhavay ixlaqtaqalkʼan. Pero chavaycha ni
Dios laqtalqauniycha.
\s Ni Pablo laqʼuxaʼanchoqoy yu machaqan Tesalónica
\p
\v 17 Ketʼalaqaunin, jantukaʼ maqan jun tejkan klamakajuu.
Mas jantu klatʼataulau pero va chʼantaun kelhanutkʼan.
Kmakau laqatapʼasta para kaklalaqʼanchoqoo. Ayaj xaknaunau
klalaqapulaqtsʼinchoqoo pero jantu kalal.
\v 18 Va xaklalaqʼuxaʼanchoqoyau. Ni kitʼin Pablo aqlhuvaj
xakʼuxaʼanachal pero ni Satanás makal para jantu lay
kajkʼanchaʼau.
\v 19 Va ikpakxanʼiyau ni achati ali ayaxtu yu kaklhajayau.
¿Valiʼiycha kaklalhiʼachantajuyau y ox kajkʼatsanau?
Va por ox kaʼunapitik anchanu julchan tejkan kaminchoqoyaʼ
ni kiJalhachimoʼonukʼan Jesús.
\v 20 Chuncha va ox ijkʼatsanau y kʼachanau por uxiknan.
\c 3
\p
\v 1 Va keʼemankʼan iktamakajuu laka putaulan Atenas,
pero jantucha xaktayaniyau por ayaj xaklalaqʼuxaʼanau.
\v 2 Ex chuncha ikmalaqachau katalaqʼan kilaqajkʼan
Timoteo. Yucha ixʼoqxtamati Dios y kintatʼatapatsayan
para kalaqputeʼekal yu ox chivinti yu lhichiviniy Cristo.
Ikmalaqachau para kataxaqalan para apalay ox kaval milhakapuʼatkʼan.
\v 3 Ex jantu matichun lay katamamakaunin milhakapuʼatikʼan
por yu jamaqanlqajnati. Kʼatsʼayatʼikcha ni kintapaxtoqniyan
jamaqanlqajnati.
\v 4 Tejkan ancha xaklatʼavilanau va xaklajunau ni kaʼalinaʼ
taun maqanlqajnati. Kʼatsʼayatʼikcha ni va chuncha val.
\v 5 Ayaj xaklalaqʼuxaʼanau va tus jantucha lay kaktayanil,
va klamalaqachaniu ni Timoteo para kajkʼatsal tas junitacha
milhakapuʼatikʼan. Xaktalhananau incha katamakanun ni
aqmoqxnuʼ, ex valiʼiy kaval kilhitapatskʼan kun uxiknankʼan.
\p
\v 6 Pero chavaycha va chinchoqol ni Timoteo. Lhimil
taun ox chivinti va kintajunan va la ox alintʼatʼik
por milhakapuʼatkʼan ali mijapaxkantikʼan. Vachu kintajunan
va kilapastakʼau kijnankʼan y ayaj kilalaqtsʼinputunau
vachu va chun tacha kijnankʼan klalaqtsʼinputunau ni
uxiknankʼan.
\v 7 Xlhiyucha, ketʼalaqaunin, mas va lhitaʼaycha iktapasayau
y ikmaqanlqajnanau, va oxamaktaun ijkuu tejkan ijkʼatsau
ni ox milhakapuʼatkʼan.
\v 8 Chavaycha klhiʼachantajuyau ni ox tʼaylhipʼintʼatʼik
kun ni kiJalhachimoʼonukʼan Dios.
\v 9 Va ikxtaqniyau lhimalaqpuchuncha ni Dios por uxiknan
y ayaj klalhiʼachantajuyau tejkan ikskʼinau Dios.
\v 10 Mas va putsʼis mas va tunkuj, va ikskʼinau Dios
para lay kaklalaqtsʼinchoqoo y kaklaʼaqtayjuu yu vananaj
tsʼanqay la milhakapuʼatkʼan.
\v 11 Chavaycha va iknaunau kintaʼaqtayjun ni kimPay
Dioskʼan ali kiJalhachimoʼonukʼan Jesucristo para kaklalaqʼanchoqoo.
\v 12 Vachu ikskʼinau ni Jalhachimoʼonu para apalay
ox kalapʼaxkʼatʼik y vachu ox kʼalakpʼaxkʼatʼik tachun
ni lapanakni, vachu va chun tacha kijnankʼan klapaxkayau.
\v 13 Ex chuncha lay katʼayanitʼik y la melhanutkʼan,
jantu kaʼalil tuʼuchun laqtaqal. Chuncha katalaqaʼiyan
kimPay Dioskʼan tejkan kaminchoqoyaʼ ni kiJalhachimoʼonukʼan
Jesucristo kun tachun ixlapanakni.
\c 4
\s Ni putsuku yu lhipaʼiniy Dios
\p
\v 1 Chavay, ketʼalaqaunin, klalhijunau y klatapayniniyau
por kiJalhachimoʼonukʼan Jesús ni katʼiʼukxuntʼayatʼik
tacha klamasuniu. Maqskʼiniy katʼiʼukxuntʼayatʼik tacha
kalhipaʼinil ni Dios. Chuncha katʼaylhipʼintʼik tacha
tʼiʼukxuyanantʼik pero chavay apalay ox kʼamakʼatʼik.
\v 2 Kʼatsʼayatʼik yu klalhijuniu la ixtaqaʼuti ni kiJalhachimoʼonukʼan
Jesús.
\v 3 Dios najun ni katʼatʼiʼukxuntʼayatʼik tacha paxtoqniy
ixlapanakni Dios. Jantu katʼatʼamatʼik matichun yu jantu
minavinkʼan.
\v 4 Kʼamispʼatʼik tacha maqskʼiniy kʼalhitsʼukʼu mixanati
para ixnavin Dios kʼaʼuntʼik y ox katʼoʼoyatʼik.
\v 5 Jantu valiʼiy kʼamakʼatʼik yu makʼapʼutʼunatʼik
la milakatunajkʼan tacha tamakay yu jantu tamispay Dios.
\v 6 Ex chuncha jantu matichun kamakanumaxtunil yu ixnavin
ixlaqaj. Ni kiJalhachimoʼonukʼan kalaqmamaqanlqajnivayaʼ
yu chuncha talay. Va chuncha klalhixaqalau y chuncha
klalhichimoʼoo.
\v 7 Ni Dios jantu kintajuntaʼin para kalaktuʼunuu, va
kintajuntaʼin ni katiʼukxuntayau tacha paxtoqniy ixlapanakni.
\v 8 Yu akchʼintamay ni aniy chivinti yucha jantu lapanaki
akchʼintamay. Yucha akchʼintamay Dios yu kintaxtaqnin
ni Espíritu Santo.
\p
\v 9 Jantu maqskʼiniy klatsʼoqniyau para kʼalapʼaxkʼatʼik
mintʼalaqauninkʼan. Ni Dios yucha tamalanin para kʼalapʼaxkʼatʼik.
\v 10 Laqsaval ayaj japʼaxkʼayatʼik tachun mintʼalaqauninkʼan
yu xalakatʼun Macedonia. Pero klalhitapayniyau ni apalay
kapʼaxkʼanantʼik.
\v 11 Oxamaktaun kʼalatʼatʼaulatʼik, kʼamakʼatʼik milhitapatsakʼan
yu tapaxtoqniyan, kʼatʼapʼatsʼatʼik la mimakakʼan tacha
yu klajuntau.
\v 12 Ex chuncha katatoʼoyayan yu jantu talhakapuʼan
y jantu tuʼuchun katatsʼanqaniyan.
\s Kaminchoqoyaʼ ni Jesucristo
\p
\v 13 Ketʼalaqaunin, va iknaunau kakʼatsʼatʼik tisuncha
tatapasay yu jantucha katakujlhi para jantu kamaʼaninintʼik
tacha lapanakni yu jantu tuʼuchun tapakxanʼiy.
\v 14 Va lhakapuʼanau ni Jesús va nil y kujchoqol. Vachu
va chun lhakapuʼanau ni Dios kalaklhiminaʼ tachun yu
tanitacha yu ixtalhakapuʼan Jesús.
\v 15 Xlhiyucha klajunau yu naul ni kiJalhachimoʼonukʼan.
Ni kijnankʼan yu vananaj tʼaunau tejkan kaminchoqoyaʼ
ni Jesús jantu kapʼulayau kun yu tanitacha.
\v 16 Ni kiJalhachimoʼonukʼan kaminanta laktʼiyan, kamatʼasananaʼ
y yu xaʼukxtin ixmayulnin la pʼas kachivinaʼ y kasqolkanaʼ
isqol Dios. Ex chuncha pʼunaj yu tanitacha yu talhakapuʼal
ni Cristo yuʼuncha katakujʼelayaʼ.
\v 17 Ex kijnankʼan yu vananaj kujtau vachu kalhaʼankanau
chʼantaun kun yuʼuncha laka taputsʼi. Ex chuncha kapaxtoʼau
ni kiJalhachimoʼonukʼan laktʼiyan. Ex mas va tavanancha
katʼaʼalinau ni kiJalhachimoʼonukʼan.
\v 18 Xlhiyucha kalamalakʼaʼulatʼik kun yu aniy chivinti.
\c 5
\p
\v 1 Jantu maqskʼiniy kaklatsʼoqniu tavanancha chuncha
katapasayaʼ u tas kunacha.
\v 2 Ox kʼatsʼayatʼikcha ni jantu lhikʼatsan tavanancha
kaminaʼ ni kiJalhachimoʼonukʼan. Ni anchanu julchan
vachu va tacha qayntaun alhavanaʼ yu min laka putsʼisni.
\v 3 Tejkan tanajun ni lapanakni: “Oxamaktaun juntau,
jantu tuʼuchun kaʼalinaʼ”, exnicha kalaktʼilhiʼokanaʼ.
Va kunaʼ vachu va tacha tejkan qayntaun xanati yu maqlaqavananputun.
Jantucha kaʼalina toʼoxtaycha katapuqoslhi.
\v 4 Pero uxiknankʼan, ketʼalaqaunin, jantucha tʼiʼukxuyanantʼik
taʼan putsʼista. Tejkan kaminaʼ ni anchanu julchan jantu
vak kakʼatsʼanapitik tacha kamil qayntaun alhavanaʼ.
\v 5 Uxiknankʼan va tacha alintʼatʼik laka jatunkunuʼ
va por malaʼasiyatʼik ixchivinti Dios. Jantu kajuu tacha
yu taʼukxuyanal laka putsʼisni yu jantu talhakapuʼan
ni Dios.
\v 6 Xlhiyucha jantu maqskʼiniy kaltatau la kijatapastakʼatkʼan
tacha yu jantu talhakapuʼan. Maqskʼiniy kakujvi y ox
kalakpastaknau tacha yu laqa aqstunkuj lapanakni.
\v 7 Yu jantu talhakapuʼan Dios va tacha ni lapanakni
yu taltatay laka putsʼisni. Jantu takʼatsay suncha katapasayaʼ.
Vachu va tacha lapanakni yu tataʼapʼay laka putsʼisni.
Jantu takʼatsay yu tamakay.
\v 8 Pero kijnankʼan va alintau laka jatunkunuʼ. Xlhiyucha
maqskʼiniy ox kalakpastaknau tacha yu laqa aqstunkuj
lapanakni. Ox kapaxkanau y ox kalhakapuʼau ni Dios, va
tacha kaʼulau kilaqchʼitkʼan yu tsasnati para jantu
lay katʼalkau. Vachu maqskʼiniy ox kapakxanʼiu kalaqtaxtuu,
va tacha kʼaqtanuu tsasnati para jantu lay katʼalkau.
\v 9 Ni Dios jantu najun kamaqanlqajnau la ixlhilukuj,
va najun katalaqtaxtuu por yu makal ni Jalhachimoʼonu
Jesucristo.
\v 10 Yucha nil por kijnankʼan para katʼataultachaʼau
kun yucha tejkan kaminchoqoyaʼ, mas va kakujvi u mas
va kaniu.
\v 11 Ex chuncha kun yu aniy chivinti kalamakʼuvilatʼik
y kʼalamaʼayajnitʼik la milhakapuʼatkʼan vachu va tacha
tʼaunatʼik makanan.
\s Ni Pablo jaxaqalay ixlapanakni Dios
\p
\v 12 Ketʼalaqaunin, klatapayniniyau kalaktʼoʼoyatʼik
yu ayaj tatapatsay kun uxiknan. Talhijunan tacha najun
ni Jalhachimoʼonu Jesús y taxtaqniyan jatapastakʼati.
\v 13 Va ox kalaktʼoʼoyatʼik y kalakpʼaxkʼatʼik por
ni lhitapatsa yu tamakaniyan. Laqa lajʼoxi kaʼalintʼik.
\v 14 Ketʼalaqaunin, vachu klalhijunau kʼalaqxtʼaqnitʼik
jatapastakʼati yu jantu tatapatsay, kʼalakmaʼayajnitʼik
yu tatalhanan, kalaqʼaqtʼayʼutʼik yu tatsʼanqaniy tapʼasta
la ixjatsukuntikʼan y kamaʼantʼaulnitʼik tachun ni lapanakni.
\v 15 Kʼalhistʼajkʼantʼik. Jantu tuʼuchun kʼamakʼanichʼoʼotʼik
yu tamakaniyan yu jantu lajʼoxi. Kʼalamakʼaniʼalhitʼik
yu lajʼoxi siya uxiknan y vachu kun tachun yu alati
lapanakni.
\v 16 Kaʼachʼanʼalhitʼik.
\v 17 Kaskʼinʼalhitʼik ni Dios.
\v 18 Mas va tisuncha yu tapasaycha kaxtʼaqnitʼik lhimalaqpuchuncha
ni Dios. Chuncha najun Dios kamakʼatʼik va por ixnavin
Cristo Jesús untʼatʼik.
\v 19 Jantu kalaktʼanchʼanitʼik ixlhitapatsa ni Espíritu
Santo.
\v 20 Jantu kalaktʼanchʼanitʼik tejkan laqputeʼekan
ixchivinti Dios.
\v 21 Kʼapʼuxkʼaulaqtsʼintʼik tachun ni chivinti, incha
laqsaval ex ox kʼalaʼaʼitʼik.
\v 22 Jantu kʼatʼanutʼik tuʼuchun yu jantu ox kaval.
\p
\v 23 Ni Dios yu lakmaʼoxamaktamiy lapanakni va yucha
katamakanin ixnavin tachun metsukuntikʼan. Va najun
katʼaʼayntsʼatʼik y jantu kaʼalil tuʼuchun laqtaqal
la metsukuntikʼan ali milhitsukunukʼan ali milakatunajkʼan
tejkan kaminaʼ kiJalhachimoʼonukʼan Jesucristo.
\v 24 Dios yu tajuntaʼitan yucha lay lhakapuʼanikan,
si makay tacha yu najun.
\s Ni Pablo jalakmastakʼachoqoy
\p
\v 25 Ketʼalaqaunin, kaskʼinitʼik Dios para kintaʼaqtayjun.
\p
\v 26 Kalakmastʼakʼatʼik tachun yu talhakapuʼan kun
taun jakiltastuknuti tacha paxtoqniy yu ixnavin Dios.
\p
\v 27 Kitʼin klalhijunau kun ixtapʼasta kiJalhachimoʼonukʼan
ni kʼalaqpʼutʼeʼenitʼik ni aniy karta tachun yu alati
ketʼalaqauninkʼan.
\p
\v 28 Katamapaynin ni kiJalhachimoʼonukʼan Jesucristo.
Va chuncha kaval.