\id 2TH
\h 2 TESALONICENSES
\mt2 Yu Xaʼaqxtʼiyunuʼ Karta yu Jalaqtsʼoqnil Pablo Ixlapanakni Dios yu Tavilanal Tesalónica
\c 1
\s Ni Pablo jalakmastakʼay ixlapanakni Dios yu tavilanal Tesalónica
\p
\v 1 Yu kijnankʼan, Pablo ali Silvano ali Timoteo, aniy
klatsʼoqniyau taun chivinti uxiknan yu oqxlaqtaun ixlapanakni
untʼatʼik yu kimPay Dioskʼan kun kiJalhachimoʼonukʼan
Jesucristo laka putaulan Tesalónica.
\v 2 Katamapayanin y oxamaktaun katamakan kimPay Dioskʼan
ali kiJalhachimoʼonukʼan Jesucristo.
\s Ni Dios kalakmukʼaniyaʼ ixmaqanlqajnatkʼan ni lapanakni yu tapaxtoqniy
\p
\v 3 Ketʼalaqaunin, maqskʼiniy kakxtaqniʼalhiu lhimalaqpuchuncha
ni Dios por uxiknankʼan. Va ayʼan milhakapuʼatkʼan y
vachu apalay ox lapʼaxkʼayatʼik mintachunkʼan.
\v 4 Kijnankʼan klalhichivinanau uxiknankʼan mas va
toʼoxtaycha tataqxtoʼa yu talhakapuʼan Dios. Ox tʼayaniyatʼik
y ox lhakʼapʼupʼinatʼik mas tamamaqanlqajnivayan alati
lapanakni y mas va la lhitaʼay metsukuntikʼan.
\p
\v 5 Chuncha ox kintamasuniyan ni Dios ox jalakpuxkaulaqtsʼinin
ni lapanakni yu tamakay. Yucha tamakayan para katapaxtoqnin
kʼatʼanutʼik taʼan lhachimoʼonun, va por yucha maʼanlʼajnanatʼik.
\p
\v 6 Vachu najun tapaxtoqniy kalaqxtaqnil ixmaqanlqajnatkʼan
yu tamamaqanlqajnivayan.
\v 7 Yu kijnankʼan yu maqanlqajnantau va kintaxtaqniyan
taun jastaknati para oxamaktaun kaʼaliu. Chuncha kunaʼ
tejkan katasuyaʼ laktʼiyan kiJalhachimoʼonukʼan Jesucristo
kun yu laqpʼaysnin ixmayulnin.
\v 8 Katasuyaʼ kun ay jikmi y kalakmukʼaniyaʼ ixmaqanlqajnatkʼan
por ixlaqtaqalkʼan yu jantu katamispal ni Dios y jantu
kataqalasmaklhi ni ox chivinti yu lhichiviniy kiJalhachimoʼonukʼan
Jesús.
\v 9 Kalakmukʼaniyaʼ ixmaqanlqajnatikʼan yu kamamiʼonil
ixjatsukuntikʼan mas va tavanancha. Chuncha jantu aqtaun
katatʼaʼalinaʼ ni Jalhachimoʼonu yu ayaj ox, yu lhitʼajun
tachun tapʼasta.
\v 10 Ni anchanu julchan tejkan kaminaʼ kiJalhachimoʼonukʼan
va ay katamakayaʼ tachun ixlapanakni, katatoʼoyayaʼ tachun
yu talhakapuʼan. Vachu ancha kaʼalinapitik ni uxiknankʼan
por lhakʼapʼupʼintʼik yu klalaqputeʼeniu.
\p
\v 11 Xlhiyucha klalhitapayniʼalhiyau ni Dios por uxiknan
para katʼiʼukxuntʼayatʼik tacha tapaxtoqniy ixlapanakni
yu lakjuntaʼiy. Vachu kskʼinau Dios para kataxtaqnin
ixtapʼasta. Ex lay kamakʼatʼik ni lajʼoxi yu makʼapʼutʼunatʼik
por lhakʼapʼupʼinatʼik.
\v 12 Ex chuncha por metsukuntikʼan katoʼoyakanaʼ ixtaqaʼuti
kiJalhachimoʼonukʼan Jesucristo. Vachu yucha kamakayaʼ
para kʼatʼoʼoyakʼantʼik. Lajʼoxi tamapayniyan kiDioskʼan
ali kiJalhachimoʼonukʼan Jesucristo.
\c 2
\s Tejkan kaminaʼ yu maqtaqalhini lapanaki
\p
\v 1 Chavaycha, ketʼalaqaunin, va iknajun kakʼatsʼatʼik
tas kunaʼ tejkan kaminchoqoyaʼ kiJalhachimoʼonukʼan
Jesucristo y katʼataqxtoʼau. Klatapayniniyau, ketʼalaqaunin,
\v 2 ni jantu katʼalhanantʼik y jantu kamaʼaninintʼik
mas lati tanajun tapasatacha ni julchan tejkan ixmil
ni kiJalhachimoʼonukʼan. Ka va lay qayntaun najun ni
chuncha najun ni Espíritu, ka va lay najun ni chuncha
laqputeʼekan, ka va lay tanajun ni chuncha iknajuu kijnankʼan
laka karta.
\v 3 Pero jantu matichun katamakanun. Pʼunaj maqskʼiniy
kachil ni julchan tejkan kataʼakchʼintamayaʼ ixchivinti
Dios y katasuyaʼ yu maqtaqalhini lapanaki. Ni yucha
kalaktʼilhikanaʼ ixjatsukunti.
\v 4 Kalakxkayʼoyaʼ tachun yu mispakan tacha Dios y
tachun yu toʼoyakan. Yucha kataulaʼ la ixchaqaʼ Dios
y kanaunaʼ ni yucha va Dios junita.
\p
\v 5 ¿Jantu pʼastʼakʼatʼik tejkan kitʼin xaklatʼavilanau
y chuncha klalaqputeʼeniu?
\v 6 Uxiknankʼan mispʼayatʼik yu jantukaʼ makajun para
katasul ni anchanu maqtaqalhini lapanaki. Jantu katasuyaʼ
tus tejkan kachilcha ixjulchan tejkan paxtoqniy katasul.
\v 7 Chavaycha mas jantu mispakan, tʼajun tapatsan yu
talaqalhin. Pero alin taun tapʼasta yu laktanchaniy
yu ay talaqalhin. Pero kaminaʼ julchan kataxtuyaʼ yu
ox tapʼasta, ex chuncha kaʼalina yu ay laqtaqal.
\v 8 Ex chuncha katasuyaʼ yu ay maqtaqalhiniʼ lapanaki.
Pero ni Jalhachimoʼonu Jesús kamaqniyaʼ kun ixʼun y
kalaktʼilhiʼoyaʼ por yu qalpʼas ixmaklku tejkan kaminchoqoyaʼ.
\v 9 Katasuyaʼ ni anchanu maqtaqalhini lapanaki por
ixlhitapatsa ni Satanás. Kalhitsukuyaʼ ay tapʼasta y
kamasuyaʼ lajʼay axtoqnuʼ yu makanunun.
\v 10 Chuncha por ixlaqtaqal ni anchanu lapanaki va
kalakmakanuyaʼ ni lapanakni yu katalaktʼilhiyaʼ, va por
jantu kataʼachanil yu laqsaval y xlhiyucha jantu lay
katalaqtaxtul.
\v 11 Xlhiyucha ni Dios makay para kalakmakanukal para
katalhakapuʼal yu jantu laqsaval.
\v 12 Ex chuncha kalakmukʼanikanaʼ ixlaqtaqalkʼan tachun
yu jantu katalhakapuʼal yu laqsaval y vachu yu ayaj
tamaqamay talaqalhin.
\s Ni Dios talaksaktan para kʼalaqtʼaxtʼutʼik
\p
\v 13 Pero uxiknankʼan, ketʼalaqaunin, yu Dios tapaxkayan.
Kijnankʼan maqskʼiniy kakxtaqniʼalhiu lhimalaqpuchuncha
ni Dios. Yucha pʼunaj talaksaktan para kʼalaqtʼaxtʼutʼik.
Chuncha val por ixlhitapatsa ni Espíritu Santo la metsukuntikʼan
para ixlapanakni Dios kʼaʼuntʼik, vachu por lhakʼapʼupʼintʼik
yu laqsaval.
\v 14 Ni Dios tajuntaʼin por yu ox chivinti yu klalaqputeʼeniu
para ay katamakan kun kiJalhachimoʼonukʼan Jesucristo.
\v 15 Xlhiyucha, ketʼalaqaunin, ox katʼaylhipʼintʼik y
jantu kakʼauktʼik yu lanitʼik, mas yu klamasunitau la
milakaʼukxpukʼan u mas va laka karta.
\v 16 Kintapaxkayan kiJalhachimoʼonukʼan Jesucristo
ali kimPay Dioskʼan. Mas va tavanancha kintamalakaʼulayan
y kintamakaniyan yu lajʼoxi para lay kapakxanʼiu yu
kaʼalinaʼ.
\v 17 Ikskʼinau ni Dios para katamalakaʼulan y katamaʼayajnin
para vas kachʼivinintʼik y vachuʼ kamakʼatʼik yu lajʼoxi.
\c 3
\s Kʼatʼapʼayninitʼik Dios para kamispakal ixchivinti
\p
\v 1 Chavaycha, ketʼalaqaunin, kʼatʼapʼayninitʼik Dios
por kijnankʼan para tsʼalaj kaputaukʼal ixchivinti ni
Jalhachimoʼonu Jesús y para ox kalaqaʼikal tacha uxiknan
laʼaʼitʼik.
\v 2 Vachu kʼatʼapʼayninitʼik ni Dios para ox kaklaqxajchaʼau
la ixtamakakʼan yu talaktuʼunun lapanakni yu jantu vas
tamakay. Jantu tachun talhakapuʼan.
\v 3 Pero ni Jalhachimoʼonu Jesús yucha lay lhakapuʼanikan.
Yucha katamaʼayajniyan y katalhistakʼan para jantu katamakanin
yu jantu lajʼoxi.
\v 4 Kintamakʼatsaniyan ni Jalhachimoʼonu ni ox makʼayatʼik
yu klalhijunau y katʼaylhipʼinapitik makanan.
\v 5 Ni Jalhachimoʼonu kataxtaqnin la melhanutkʼan ixjapaxkanti
ni Dios y kamakal para ox kamaʼantʼaqnitʼik tacha maqantaqnil
ni Cristo.
\s Jantu malhaqnin kʼaʼuntʼik
\p
\v 6 Ketʼalaqaunin, klalhijunau la ixtaqaʼuti ni Jesucristo
ni jantu katʼatʼiʼukxuntʼayatʼik milaqajkʼan yu malhaqnin
yu jantu tamakaputun tacha klamasuniu.
\v 7 Kʼatsʼayatʼik ni maqskʼiniy kilalaqtsʼiʼiu yu xakmakayau
tejkan xakvilanau kun uxiknan. Ox xaktapatsayau.
\v 8 Jantu aqtaun valiʼiy kajkʼuniu ixvaytkʼan matichun
lapanaki. Va la pʼas xaktapatsayau mas tunkuj mas tsʼisni
para jantu klalhimaqanchapuu xataʼayuʼ uxiknan.
\v 9 Mas ixkintapaxtoqniyan kaklaskʼiniu vayti jantu
chuncha kakmakau va para kilalaqtsʼiʼiu tacha kijnankʼan
y vachu chun katʼiʼuntʼayatʼik.
\v 10 Tejkan xaklatʼavilanau, klalaqputeʼeniu yu inchine:
Yu jantu tapatsaputun, yucha jantu maqskʼiniy kavayl.
\p
\v 11 Chavay ijqasmakvi va lati kun uxiknan jantu talakanajun
lhitapatsa pero talakanajun katatanul taʼan jantu jamaqskʼinikan.
\v 12 Ni yuʼuncha klaklhijunau la ixtaqaʼuti ni Jalhachimoʼonu
Jesucristo ni oxamaktaun katatapatsal para kaʼalil ixvaytkʼan
yu kataʼul.
\v 13 Uxiknan, ketʼalaqaunin, jantu aqtaun katachaanin
kʼamakʼatʼik yu lajʼoxi.
\p
\v 14 Incha matichun jantu makaputun tacha yu aniy klatsʼoqniyau
ex kʼamakʼatʼik kuenta y jantu katʼatʼiʼukxuntʼayatʼik,
para chuncha kamaxanal.
\v 15 Pero jantu kalaqtsʼintʼik tacha tʼalaxkayaʼ kaval.
Kʼalaxaʼalatʼik tacha tʼalaqajun para jantucha chun
kalal.
\s Ni Pablo lakmastakʼachoqoy
\p
\v 16 Va si oxamaktaun katamakan ni Jalhachimoʼonu mas
va tisuncha yu katapasayacha. Va tatʼaʼalintan ni Jalhachimoʼonuʼ
mintachunkʼan.
\v 17 Chavaycha kitʼin Pablo klatsʼoqniyau la kimakaʼ
taun jamastakʼanti. Va chuncha ikmakay tachun kinkartas
yu klaqmalaqachay, chuncha iktsʼoqnun.
\v 18 Katamapaynin mintachunkʼan ni kiJalhachimoʼonukʼan
Jesucristo. Chuncha kavalcha.