\id 1TI
\h 1 TIMOTEO
\mt2 Yu Xapʼunaj Karta yu Tsʼoqnil Pablo ni
\mt1 Timoteo
\c 1
\s Ni Pablo mastakʼay yu Timoteo
\p
\v 1 Kitʼin kPablo, ixtamalaqachan Jesucristo kunita
va por chuncha kilhijunil Dios kiJamalaqtaxtunuʼ y vachu
Cristo Jesús yu pakxanʼiyau.
\v 2 Aniy iktsʼoqniyan uxintʼi, Timoteo, yu tacha mero
kesʼatʼa untʼi tejkan lhakʼapʼupʼi ixchivinti Dios.
Kamapaynin y kapaxkan y oxamaktaun kamakan kimPay Dioskʼan
kun Cristo Jesús kiJalhachimoʼonukʼan.
\s Jantu kaxtʼaqtʼi lakatin ni kamasukal aputaun lhakapuʼati
\p
\v 3 Klhijunin tejkan xajkʼanta Macedonia va katʼaʼul
laka putaulan Éfeso para kʼalaklhiʼun lati lapanakni
jantucha katamasul aputaun jatapastakʼati yu jantu laqsaval
kaval.
\v 4 Vachu jantu katamakal kuenta yu kuentos y valiʼiy
chivinti yu lhichiviniy yu tatapasal ixpayankʼan la
maqancha. Va yucha talalhikiltsakʼastukʼa ni lapanakni.
Jantu kintaʼaqtayjuyan para lay kamakau ixlhitapatsa
Dios yu lay makakan vamun incha kalhakʼapʼupʼi.
\v 5 Va chuncha klhijunin para katalapaxkal ni lapanakni.
Chuncha lay talapaxkay tejkan jantu kaʼalil talaqalhin
la ixjalhanutkʼan, tejkan ox takʼatsay ni jantu katalhitsukul
laqtaqal, tejkan laqsaval talhakapuʼan.
\v 6 Lati yu jantu vas tataylhaʼan tamaqamay katalhilakchivinil
yu jantu aqtayjunun.
\v 7 Tamalanininputun ixlhachimoʼonkʼan ni israelitas
pero jantu tamalaqasiy tisuncha tachiviniy mas va talaninin
takʼatsan.
\p
\v 8 Kʼatsayau yu lhachimoʼon yucha la ox incha kalhimapʼatsʼatʼi
tacha paxtoqniy.
\v 9 Kʼatsayau ni lhachimoʼon jantu para yu lajʼoxin
kaval, va para yu jantu ox tamakay ali yu talaktuʼunun,
para yu jantu tatoʼoyay Dios ali yu tamaqtaqalhinin,
para yu jantu tatapatsaniy Dios ali yu jantu tatoʼoyay
kilhakapuʼatkʼan, para yu tamaqniy ixpaykʼan kun ixnatikʼan,
para yu jamaqninin,
\v 10 para yu tatʼatamay lapanakni yu jantu ixnavin
kaval, para yu talachʼapay joʼakna tacha xanati kaval,
para yu taʼalhaustʼay lapanakni, para yu jamakanunun,
y para yu tanajun va laqsaval pero talaklkanan. Ni lhachimoʼon
vachu va para jantu kamalanikal chivinti yu kalaktanchal
yu vas lhichiviniy Dios.
\v 11 Chuncha paxtoqniy kun yu ox chivinti yu masuy
ixʼayaxtu Dios yu ay junita. Va yucha kilakʼulal para
kaklaqputeʼel.
\s Ni Pablo xtaqniy lhimalaqpuchuncha por ixjamapayninti Dios
\p
\v 12 Ikxtaqniy lhimalaqpuchuncha ni kiJalhachimoʼonukʼan
Jesucristo yu kixtaqnita tapʼasta. Yucha kilhiʼaynlhi,
va kilakʼulal para kaktapatsanil.
\v 13 Chuncha kimakata mas maqancha jantu ox xaklhichiviniy.
Va xaklhimaqchapuy, xaklaktuʼuy. Pero jantukaʼ xaklhakapuʼan
y jantu xajkʼatsay yu xakmakay xlhiyucha kimapaynil.
\v 14 Va ayaj kimapaynil kiJalhachimoʼonukʼan para kaklhakapuʼal
y kaklhitsukul ixjapaxkanti ni Jesucristo.
\p
\v 15 Va laqsaval y maqskʼiniy kalhakapuʼankal ni inchine
chivinti, ni yu Cristo Jesús kilachil lakamunukpaʼ para
kalaqmalaqtaxtul yu tamaqtaqalhinin. Kun tachun yu tamaqtaqalhinin
kitʼin yu palay ay xajkunita.
\v 16 Xlhiyucha kimapaynil. Chuncha tejkan kimalaqtaxtul
kitʼin, ni yucha apalay masul ni Cristo Jesús va ayaj
jalaqmaqantaulniy ni lapanakni. Chuncha kalakmasunikal
yu ixtalhakapuʼuxaʼan yucha, para katalhitsukul ni jatsukunti
yu jantu aqtaun kamiʼoyaʼ.
\v 17 Va katoʼoyakal ni ay Jalhachimoʼonuʼ y ay kamakakal
mas va tavanancha, jantu aqtaun katamaktal. Yucha si
kalhachimoʼonunaʼ, jantu aqtaun kaniyaʼ, jantu laqtsʼinkan,
vamun yuʼ Dios junita y ay jatapastakʼati lhitʼajun.
Va chuncha kavalcha.
\p
\v 18 Timoteo, kesʼatʼa kʼatʼi, ikxtaqniyan aniy lhitapatsa
para ox katayanin tacha qayntaun tropa yu tanun laka
lhilukuj. Vachu va tacha uxintʼi talhichivinin tejkan
talaqputeʼel ixchivinti Dios.
\v 19 Katʼayanin kun milhakapuʼati y kakʼatsʼa ni jantu
kaʼalil milaqtaqal. Lati jantu chun tapastaklhi y tamaqatsʼanqal
ixlhakapuʼatkʼan vachu va tacha tsʼanqay laqataun barco
tejkan taqalhiy.
\v 20 Chuncha tatapasal ni Himeneo ali Alejandro yu
jantu ox ixtalhichiviniy Dios. Klakmakaul kun ni Satanás
para katalanil ni jantucha chuncha katataylhaʼal.
\c 2
\s Kataskʼil Dios yu talhakapuʼan
\p
\v 1 Pʼunaj klhinajun ni katatʼachivinil Dios yu talhakapuʼan
y va katalhitapaynil y kataskʼinil Dios por tachun ni
lapanakni y kataxtaqnil lhimalaqpuchuncha.
\v 2 Va katatapayninil Dios por lhachimoʼonun ali tachun
yu lajʼay lapanakni para chuncha oxamaktaun kaval ketsukuntikʼan
para lay katoʼoyau ni Dios y lay katiʼukxuntayau tacha
lapanakni yu ox toʼoyakan.
\v 3 Va la ox tejkan chuncha tapayniniyau y chuncha
lhipaʼiniy ni Dios kiJamalaqtaxtunukʼan.
\v 4 Yucha najun katalaqtaxtul tachun ni lapanakni y
katamispal yu mero laqsaval.
\v 5 Va alin taun Dios. Ni Jesucristo val lapanaki y
yucha tanʼajvil para ox katalalaqtsʼinchoqol ni Dios
kun ni lapanakni.
\v 6 Yucha xʼaman xtaqkal para kamaqnikal para lay katalaqtaxtul
tachun ni lapanakni. Chuncha tapasal y laqputeʼekal
tejkan paxtoqnil.
\v 7 Va yucha klakʼulakanta para klaqputeʼel tacha ixtamalaqachan
Jesús, va laqsaval yu knajun, jantu ikmakanunun. Klakʼulakanta
ni kaklakmalanil yu jantu israelitas kataval para katalhakapuʼal
y katamispal yu laqsaval.
\p
\v 8 Va iknajun mas va toʼoxtaycha kaval katatapaynil
ni lapanakni y katamaqstal ixmakakʼan jantu kun laqtaqal
nisin jantu katalatalqaunil tejkan taskʼin Dios.
\v 9 Vachu yu xanatin maqskʼiniy katalakatayal kun laqchʼiti
jantu va para ay katakʼatsal. Jantu maqskʼiniy ayaj
ox katalaʼoxil ixʼajikʼan y jantu maqskʼiniy kataʼulal
oro nisin yu laqspututu chiyux yu laqlhuu xtapal, nisin
laqchʼiti yu laqlhuu ixtapal kaval.
\v 10 Yu maqskʼiniy va katamakal yu lajʼoxi lhitapatsa
tacha yu paxtoqniy katamakal xanatin yu ayaj tatoʼoyay
Dios.
\v 11 Yu xanatin va maqskʼiniy saq katamaʼal la ixjatapastakʼatkʼan
yu talaniy y katalaqaʼil yu talhinajun ixapaykʼan.
\v 12 Kitʼin jantu klaqxtaqniy lakatin para katamalaninil
taʼan la alin lapanakni vachu jantu para katalhichimoʼol
ixapaykʼan. Va maqskʼiniy saq kataval.
\v 13 Yu pʼunaj makakal va Adán ex astan yu Eva.
\v 14 Yu Adán jantu kamakanukal, va makanukal yu xanati,
ex chuncha alil ni talaqalhin.
\v 15 Pero ni xanati tejkan lhitsukuy sasʼatʼa kalaqtaxtuyaʼ
incha makay ni lhitapatsa yu paxtoqniy. Kalaqtaxtuyaʼ
incha taylhaʼan lhakapuʼan y japaxkanan y incha tiʼukxuntayay
tacha paxtoqniy ixlapanaki Dios kun ox jatapastakʼati.
\c 3
\s Tacha maqskʼiniy kataval ni lapanakni yu jalaklhistakʼa yu talhakapuʼan
\p
\v 1 Yu inchine va laqsaval, yu laklhistakputun yu talhakapuʼan,
yucha ox lhitapatsa yu makaputun.
\v 2 Xlhiyucha yu kalaklhistakyaʼ yu talhakapuʼan yucha
maqskʼiniy kaval yu jantu lay mukʼanikan laqtaqal. Vamun
qayntaun xanati kalhitsukul, ox yu kalhistakkal la ixjatsukunti,
ox kalakpastaknal, katoʼoyakal, ox kalaqlaqaʼil lapanakni
la ixchaqaʼ y ox jamalaniniʼ kaval.
\v 3 Jantu maqskʼiniy kataʼapʼal, jantu kalakasamanal,
va qalʼox kaval. Vachu jantu kapastaklhi tacha lay kamakanuxtul
tumin. Maqskʼiniy ox jamapaynini lapanaki kaval y jantu
kalakxkaul lhilukuj.
\v 4 Tsʼanqay ox kalhachimoʼonul ixpulakna la ixchaqaʼ
y kalakmakal ni ox kataqasmaknal yu sasʼatʼan y ox katatoʼoyanal.
\v 5 Incha jantu laniy lhachimoʼon la ixpulakna la ixchaqaʼ,
¿tas laycha kapulhistakʼaʼ ixlapanakni Dios?
\v 6 Tsʼanqay kaval lapanaki yu maqancha lhakapuʼan
para jantu ay lapanaki kakʼatsal. Ex jantu chuncha kamukʼanikal
laqtaqal tacha mukʼanikal ni xaʼukxtin aqmoqxnu.
\v 7 Vachu tsʼanqay ox katatoʼoyal yu jantu talhakapuʼan
para jantu kamakal yu jantu ox laqtsʼinkan para jantu
katsukul tamakaunaʼ la isqapa ni aqmoqxnuʼ.
\s Tacha maqskʼiniy kataval yu taʼaqtayjunun
\p
\v 8 Vachu yu aqtayjunin tsʼanqay kataval jatoʼoyanan
lapanakni y jantu tʼuy ukxpuʼ katamakal. Vachuʼ jantu
taʼapʼan kataval y jantu katamakanuxtul tumin.
\v 9 Vachuʼ ox kataylhaʼal yu chavay kintamasunincha
Dios yu lhakapuʼanau. Maqskʼiniy ox katakʼatsal ni jantu
katalhitsukul laqtaqal.
\v 10 Maqskʼiniy kalaqtsʼintanuʼelakal. Ex chuncha incha
jantu katalhitsukul tuʼuchun laqtaqal lay kataval tacha
aqtayjunin.
\v 11 Vachu ni xanatin tsʼanqay kataval jatoʼoyanan
y jantu katalaklkanal y ox kalaklhistakkal la ixjatsukuntikʼan,
y kalakmispakal ox tatapatsay mas va tichichuncha lhitapatsa.
\v 12 Yu aqtayjunin kataval va katalhitsukul qayntamin
ixanatikʼan y ox katalhichimoʼol sasʼatʼankʼan la ixchaqakʼan.
\v 13 Yu ox tatapatsay tacha aqtayjunin, yuʼuncha apalay
ox laktoʼoyakan. Chuncha jantucha tatalhanajlhichiviniy
tacha talhakapuʼan ni Cristo Jesús.
\s Mas jantu ixmispakan, va la ay yu makata ni Dios
\p
\v 14 Ikpakxan niman kaklaqʼantachaʼan pero chavaycha
iktsʼoqniyan.
\v 15 Ex chuncha incha kaktaqmaqayaʼ, kakʼatsʼayeʼe tas
laycha kʼapʼutiʼukxuntʼay kun ixlapanakni ni Dios yu
laqsaval kujta. Va por yuʼuncha jantu lay miʼojoy ni
chivinti yu laqsaval, vachu va tacha aqataun chaqaʼ yu
jantu lay miʼojoy por yu ox xaputayan.
\v 16 Jantu va tʼuy chivinti kaval. Mas jantu ixmispakan,
la ay yu makata ni Dios para katoʼoyakal:
\q Tasul tacha qayntaun lapanaki.
\q Ni Espíritu Santo la ay makal.
\q Ixmayulnin Dios talaqtsʼil.
\q Va laqputeʼekal taʼakchun putaulanaxna,
\q va lhiʼaynkal aniy lakamunukpaʼ,
\q va laqaʼikal laktʼiyan.
\c 4
\s Yu katamakauntijlayaʼ ixlhakapuʼatkʼan
\p
\v 1 Yu Espíritu Santo va vas najun ni tejkan va laycha
kamiʼol ni lakamunukpaʼ lati lapanakni katamakauntijlayaʼ
ixlhakapuʼatkʼan. Kataqalasmatʼaʼ jalakmakanunun espíritus
kun yu tamasuy ni aqmoqxnun.
\v 2 Kataqalasmatʼaʼ lapanakni yu tamakanun, yu tʼuy
ukxpuʼ tamakay. Yuʼuncha jantucha taa takʼatsan.
\v 3 Yuʼuncha talaktanchay lakxtuklati y vachu jantu
taʼuyujnajun kʼaʼutʼi axtoqnu lhiʼuti. Chuncha tanajun
mas va Dios makal ni lhiʼuti para lay kataʼul tachun
yu talhakapuʼan y yu tamispay yu laqsaval tejkan taxtaqniy
lhimalaqpuchuncha ni Dios.
\v 4 Tachun yu makal ni Dios si lajʼoxi y jantu lay
kalaktanchau tuʼuchun. Va kalaqaʼiu y kaxtaqnilhaʼau
lhimalaqpuchuncha ni Dios.
\v 5 Ni Dios ox laqtsʼin ni lhiʼuti tejkan xtaqniyau
lhimalaqpuchuncha tacha najun la ixchivinti.
\s Yu ox ixʼoqxtamati ni Jesucristo
\p
\v 6 Incha chuncha kalaqlhixaʼalayeʼe mintʼalaqaunin
ex kʼaʼuneʼe ox ixʼoqxtamati ni Jesucristo. Chuncha
kalhitsʼukʼuyeʼe tapʼasta tejkan tʼaylhipʼin kun yu
ox chivinti yu masunikʼa.
\v 7 Pero jantu kamakʼatʼi kuenta yu axtoqnu chivinti
yu jantu laqsaval kaval. Va kʼatʼapʼasnitʼi kun Dios
para ox katʼoʼoyatʼi.
\v 8 Mas ayaj xtapal kʼatʼapʼasnitʼi la kilakatunajkʼan
pero apalay ixlaqmiti kʼatʼapʼasnitʼi kun Dios. Chuncha
kintalhiminiyan yu ox jatsukunti chavaycha y vachu yu
jatsukunti yu kaʼalinaʼ astan.
\v 9 Yu tacha aniy yucha laqsaval y tachun maqskʼiniy
katalhakapuʼal.
\v 10 Va por yucha la pʼas klhitapatsayau y klhimaqanlqajnanau.
Va pakxanʼiyau ni Dios yu kujta. Yucha lay jamalaqtaxtuy
tachun ni lapanakni, y yucha ox kintamalaqtaxtuyan yu
lhakapuʼanau.
\v 11 Yucha kalaqpʼutʼeʼe y kamasutʼi.
\v 12 Jantu matichun lakatʼuniy katamakan por tsʼalkaʼ
kʼatʼi. Ox katʼiʼukxuntʼay para lay katalaqtsiʼin yu
talhakapuʼan. Chuncha katamispaniyan ni ox minchivinti
kun mimputsuku kun mijapaxkanti kun metsukunti kun milhakapuʼati,
vachu ni jantu kʼamaqtʼaʼalhin.
\v 13 Kalaqpʼutʼeʼe ixchivinti Dios, kaxtʼaqtʼi jatapastakʼati,
y ox kʼamalanin tus tejkan kakchaʼantachal.
\v 14 La ox kʼamakʼatʼi kuenta yu Dios xtaqnitan la
metsukunti para kalaqʼaqtʼayʼutʼi alati yu talhakapuʼan.
Yucha laʼaʼitʼi tejkan ni xalajʼaynin yu talhakapuʼan
talaqputeʼel ixchivinti Dios y tamoqslanin ixmakakʼan.
\v 15 Ox kaʼukxpʼupʼi por tachun yu aniy, ex tachun ni
lapanakni lay katalaqtsʼin tacha yu uxintʼi tʼaylhipʼin.
\v 16 Ox kʼalhistʼajkʼa meʼeman y vachu ox kʼalhistʼaktʼi
ixmasuka ixchivinti Dios. Vas kaʼukxpʼupʼiti tacha lhinajun.
Chuncha kʼalaqtʼaxtʼuyeʼe y vachu katalaqtaxtuyaʼ yu
taqalasmatʼan.
\c 5
\s Tacha maqskʼiniy katʼatʼiukxuntʼay kun alati yu talhakapuʼan
\p
\v 1 Jantu kalaqʼaymatʼi yu xapaynin. Va kalaqxtʼaqnin
jatapastakʼati tacha mimpay kataval. Ox kalaklhipʼi
yu tsʼalan tacha metʼalaqaunin kataval.
\v 2 Ox kalaklhipʼi vachu yu xanatin tacha minati kataval
y vachu ni jatsiʼin tacha mintʼalapanakni, jantu kun
tuʼuchun laqtaqal.
\p
\v 3 Kalaqʼaqtʼayʼutʼi ni tiyaunin yu laqsaval ixʼamankʼan.
\v 4 Pero incha matichun tiyau vananaj lhitʼajun sasʼatʼan
o ixpapanakna va yuʼuncha maqskʼiniy katalhistaklhi
la ixchaqakʼan. Va katamaqalchaunichoqol ni japaxkanti
yu tamaʼayal, va chuncha lhipaʼiniy ni Dios.
\v 5 Qayntaun xanati yu laqsaval tiyau yu tamakajuntacha
xʼaman, yucha maqskʼiniy vamun Dios kapakxanʼil y katapaynil
y kaskʼil Dios, kaval tunkuj, kaval tsʼisni.
\v 6 Pero yu tiʼukxuyal makanaʼ vamun yu maqamay, yucha
nitacha la ixjatsukunti.
\v 7 Chuncha kalaklhiʼun ni lapanakni para jantu kalakmukʼanikal
laqtaqal.
\v 8 Yu jantu laklhistakʼa ixlapanakni, incha jantu laklhistakʼa
yu taʼalinta la ixchaqaʼ, ex yucha makauntijlay ixlhakapuʼati.
Apalay jantu ox makay xajantu yu jantu talhakapuʼan.
\v 9 Qayntaun tiyau incha lhitʼajuncha sesenta ixjachʼitin,
yucha katsʼoqmulatʼi ni laqsavalcha tiyau incha va qayntaun
ixlhitʼajun ixapay.
\v 10 Vachu tsʼanqay kamispakal por yu ox yu ixmakay
tacha yu inchine. Incha jalakmaʼayal sasʼatʼan, incha
jalaqaʼitacha lapanakni kun achati la ixchaqaʼ, incha
malakatʼunikantacha y lakchʼanchaʼatacha yu talhakapuʼan,
incha jalaqʼaqtayjutacha yu tamaqanlqajnan, incha taylhaʼan
makanaʼ tachun yu alati lajʼoxi.
\v 11 Pero jantu katsʼoqmulatʼi ni tiyaunin yu jantukaʼ
xanatin tajun. Tejkan tamakay yu tamaqamay, talalaktʼilhiy
kun Cristo, niman talakxtuklaputunchoqoy.
\v 12 Chuncha lakmukʼanikan laqtaqal tejkan makajun
yu pʼunaj talhakapuʼal.
\v 13 Talhixajachal malhaqnin y tamakataukʼanan laqa
chaqan. Jantu vamun malhaqnin tajun. Vachu talaklkanan,
tatanuy taʼan jantu maqskʼiniy, talhichiviniy yu jantu
tapaxtoqniy.
\v 14 Xlhiyucha iknajun katalakxtuklal yu tiyaunin yu
va jatsiʼinkaʼ y katalakmaʼayal sasʼatʼankʼan y katalhistaknal
la ixchaqakʼan. Chuncha jantu kataxtaqnil lakatin ni
aqmoqxnuʼ yu kintʼalaxkayakʼan para jantu katakiltayanal.
\v 15 Lati tiyaunin chʼantaun tatʼaʼanta ni Satanás.
\p
\v 16 Matichun yu lhakapuʼan, incha alin tiyau la ixlapanakni
va kalaqʼaqtayjul. Ex chuncha jantu lhitaʼay kaval para
yu alati ixlapanakni Dios. Chuncha yuʼuncha lay kataʼaqtayjul
vamun ni tiyaunin yu laqsaval xʼamankʼan tatamakajun.
\p
\v 17 Yu xalajʼaynin yu ox talhachimoʼonun la ixlapanakni
Dios tsʼanqay katalaqaʼil aqtʼuy chuncha ixlhilhajatkʼan.
Apalay katalhajal incha talaqputeʼey y tamasuy ixchivinti
Dios.
\v 18 Va tsʼoqkanta la ixchivinti Dios, najun: “Jantu
kamakʼiltʼanutʼi ixvosal ni vakax tejkan tsukuy xqaxtunuʼ
la ixchʼajaʼ ni trigo.” Vachu najun: “Paxtoqniy kalhajal
yu tapatsay.”
\v 19 Jantu kʼamakʼatʼi kuenta ixtislajmaka qayntaun
yu xalajʼaynin. Incha alin qayntʼuy u qayntʼutu yu takʼatsay
incha lhitʼajun laqtaqal, ex chun kamakʼatʼi kuenta.
\v 20 Yu tataylhaʼan makanan laqtaqal, kalaqlaqʼaymatʼi
taʼan tachun tataulay para katatalhanal yu alati.
\v 21 La ixʼukxpuʼ ni Dios ali kiJalhachimoʼonukʼan
Jesucristo ali ixmayulnin yu jalaksakta, kitʼin klhijunan
ni ox kamakʼatʼi tachun yu aniy. Va mustaun kalaqtsʼi
ni lapanakni. Jantu kʼalakxkʼay lati y kalakʼachʼanin
yu alati.
\v 22 Jantu niman kamoqslanin mimakaʼ para kalhilakʼulatʼi
qayntaun ni katapatsal tacha xalajʼaynin yu talhakapuʼan.
Jantu kʼatʼanutʼik ixlaqtaqalkʼan alati lapanakni. Chuncha
katʼiʼukxuntʼay sin laqtaqal.
\p
\v 23 Jantucha vamun xkan kaʼotʼeʼe. Va kaʼotʼeʼe tsʼuniy
xaxkan uva para mimpajan, vachu para ni taqanʼati yu
aqlhuu chʼapayancha.
\v 24 Lati lapanakni ox lhikʼatsan incha talhitʼajun
laqtaqal. Pero alati lapanakni jantu niman tasuy ixtalaqalhinkʼan,
va katasuyaʼ tejkan kalaqtsʼintanuyaʼ ni Dios.
\v 25 Vachu yu ox lhitapatsa va mispakan. Mas lati jantu
mispakan chavaycha, va katasuyaʼ astan. Jantu lay maqsaqlhitsukukan.
\c 6
\p
\v 1 Tachun yu oqxtamatin maqskʼiniy ox katatoʼoyal
ixʼukxtininkʼan para jantu kalhijalaktuʼukal ixtaqaʼuti
ni Dios vachu ni chivinti yu masuyau.
\v 2 Yu oqxtamatin yu talhakapuʼan, incha talhitʼajun
ukxtin yu talhakapuʼan, jantu katamalakatʼunil por tʼalaqajun
junita, va apalay katatapatsanil. Ni ukxtin yu tapatsaniy
va lhakapuʼan Dios y Dios paxkay.
\s Toʼoyayau ni Dios y oxamaktaun juntau kun yu lhitʼaunau
\p
\v 3 Inchine kʼamasutʼi y kʼalhinau. Ka va lay kaʼalil
matichun yu kamasuyaʼ aputaun jatapastakʼati yu jantu
va taun kun yu masul kiJalhachimoʼonukʼan Jesucristo.
Jantu masuy tacha lay chʼantaun katʼaʼuntʼi kun Dios.
\v 4 Incha chuncha kaʼalil matichun, yucha va ay kakʼatsanaʼ
mas jantu tuʼuchun mispay. Ayaj maqamay kakiltsakʼastuknul
kun chivinti. Ancha minachalcha akchaʼati, por yucha
tatapulvaʼa ni lapanakni, talakiltajiy, jantu ox talalhaʼan.
\v 5 Talalakatsakʼamay yu jantu talakpastaknan y yu
jantu tamispay yu laqsaval. Talhilay ni va por ixtoʼoyaka
Dios katapujunaʼ maqalinin. Kʼalakmakʼau yu chuncha
ixjatapastakʼatkʼan.
\p
\v 6 Laqsaval lhitʼaunau maqaliti incha toʼoyayau ni
Dios incha oxamaktaun juntau kun yu lhitʼaunau.
\v 7 Jantu tuʼuchun kalhimiu aniy lakamunukpaʼ y jantu
lay tuʼuchun kalhaʼau.
\v 8 Pero incha lhitʼaunau yu kaʼuu ali kilaqchʼitkʼan,
kun yucha kalhiʼachantajuucha.
\v 9 Pero yu tajunputun maqalinin, yuʼuncha tejkan ni
aqmoqxnu jalaqtsʼintanuy niman tamakaputun yu lhitontoj
yu jantu ox xajachal. Chuncha tus tamaqatsʼanqaʼojoy
ixjatsukuntikʼan y chuncha katapuniyaʼ.
\v 10 Ni tumin incha ayaj kʼaʼachʼanin, ancha kaminʼotachal
puchux laqtaqal yu alin. La alin lapanakni yu tamakauntijlal
ixlhakapuʼatkʼan por taʼachanil tumin y ayaj ay val
ixjamaqanitkʼan.
\s Kʼatʼaylhipʼi laqatapʼasta kun milhakapuʼati para kʼalhaʼatʼi
\p
\v 11 Pero uxintʼi yu ixlapanaki Dios kʼatʼi, kalajʼosmajʼa
tachun yu anu jatapastakʼati. Kʼalakxkʼau yu vas jatsukunti,
katʼoʼoyatʼi ni Dios, katʼaylhipʼi lhakapuʼanaʼ, kʼapʼaxkʼan,
kʼamaʼantʼaʼul, kʼamapʼaynin.
\v 12 Kʼatʼaylhipʼi laqatapʼasta kun milhakapuʼati para
kʼalhaʼatʼi. Kʼalhimakpʼi milhilhajati yu jatsukunti
yu jantu aqtaun kamiʼoyaʼ. Va por yucha lhitʼasaʼikʼa
tejkan jalakʼun lhuu lapanakni ni lhakʼapʼupʼi.
\v 13 Chavay la ixʼukxpuʼ ni Dios yu laqxtaqniy jatsukunti
tachun yu alin, vachu la ixʼukxpu ni Cristo Jesús, yu
ox qaltayl ni Poncio Pilato,
\v 14 kitʼin klhijunan ni kaʼalasmaktʼi yu lhiʼunkʼan.
Jantu kamakʼatʼi tuʼuchun talaqalhin, vachu tuʼuchun
yu lay kʼapʼumukʼanikʼa laqtaqal. Chuncha kʼatʼaylhipʼi
tus tejkan kaminchoqoyaʼ kiJalhachimoʼonukʼan Jesucristo.
\v 15 Yucha katasuyaʼ tejkan paxtoqniy. Vamun yuʼ achan,
vamun yuʼ lhitʼajun tapʼasta, yucha xaʼay tachun yu xalajʼayan,
yucha jalaklhichimoʼoy tachun jalhachimoʼonun.
\v 16 Vamun yuʼ jantu aqtaun kaniyaʼ, yucha vil taʼan
tʼoqx tapulkuy ni maklku taʼan jantu lay chaankan. Jantukaʼ
aqtaun matichun laqtsʼin y jantu lay laqtsʼinkan. Vamun
yucha katoʼoyakal, vamun yuʼ ay kamakakal, mas va tavanancha,
va chuncha kavalcha.
\p
\v 17 Kʼalaqxaʼalatʼi ni lapanakni yu maqalinin aniy
lakamunukpaʼ para jantu ay kalakmakakal para jantu katapakxanʼil
yu la ox jatsukunti por ixmaqalitkʼan. Va katapakxanʼil
ni Dios yu xoqta kintaxtaqniyan para kalhiʼachantajuu.
\v 18 Kʼalaklhiʼun ni katamakal yu lajʼoxi para kataval
maqalinin kun Dios por tamakay yu lajʼoxi. Va qalʼoxin
lapanakni kataval, va yu katalhitsukulcha, katatʼaʼul
alati.
\v 19 Chuncha lay katamaʼal ixmaqalitkʼan laktʼiyan
para astan kaʼalil yu apalay xtapal ancha.
\s Ni Pablo mastakʼachoqoy
\p
\v 20 Timoteo, kʼalhistʼaktʼi ni lhitapatsa yu ikmaqxtaqnin.
Jantu chʼantaun kaʼuntʼi kun yu talhilakchiviniy axtoqnu
yu jantu paxtoqniy kun Dios. Vachuʼ jantu katʼapiti
yu talakchiviniy tacha ayaj talaniy yu alin lakamunukpaʼ
mas jantu laqsaval kaval.
\v 21 Lati yu chuncha tanajun ni ox talanil, yuʼuncha
va tamakauntijlal ixlhakapuʼatkʼan. Va chuncha kaval.
\p Ni Dios kamapaynin.