\id TIT
\h TITO
\mt2 Ni Chivinti yu Tsʼoqnil Pablo ni
\mt1 Tito
\c 1
\s Ni Pablo mastakʼay yu Tito
\p
\v 1 Kitʼin kPablo, va ixʼoqxtamati Dios kunita. Ni Dios
jalaksakta ixlapanakni y Jesucristo kimalaqachata para
kaklaqputeʼenil y katalhakapuʼal. Ex lay katamispal
tas maqskʼiniy katatiʼukxuntayal kun Dios.
\v 2 Tapakxanʼiy ni jatsukunti yu jantu aqtaun kamiʼoyaʼ.
La maqancha tejkan jantukaʼ aqtaynil ni lakamunukpaʼ
ni Dios naul kaxtaʼaʼ ni anchanuʼ jatsukunti. Yucha
jantu makanunun.
\v 3 Ni Dios masul ixchivinti tejkan ox val para katasul.
Va masul por ixlaqputeʼeka, yucha ni lhitapatsa yu kixtaqnil
Dios yu kiJamalaqtaxtunukʼan.
\p
\v 4 Va ikmastakʼayan uxintʼi, Tito, va tacha laqsaval
kintsʼal kʼatʼi va por chʼantaun kilhakapuʼatkʼan. Ni
kimPay Dioskʼan kun Jesucristo yu kiJamalaqtaxtunukʼan
kaxtaqnin jamapayninti y oxamaktaun kamakan.
\s Ni Tito junkan yu tsʼanqay kamakal laka Kreta
\p
\v 5 Va ikmakaunchaʼan ancha Kreta para kalaʼoxitʼi
yu tsʼanqay y para kalakʼulatʼi xalajʼaynin yu talhakapuʼan
taun taun japutaulan tacha klhijunin.
\v 6 Qayntaun lapanaki para kalakʼulakal tacha xaʼay
jalhakapuʼanan maqskʼiniy ox katiʼukxuntayal. Jantu
lay kamukʼanikal laqtaqal, vamun qayntaun xanati katʼatsukul.
Yu sasʼatʼan vachuʼ maqskʼiniy katalhakapuʼal, jantu
kalakmispakal tacha jalaktuʼunun. Ox taqalasmaknan yu
laklhijunkan.
\v 7 Qayntaun lapanaki yu ulakan tacha xajalhistaknaʼ
yu talhakapuʼan, yucha va xtaqnikan ixlhitapatsa Dios.
Xlhiyucha maqskʼiniy ox katiʼukxuntayal. Jantu lay kamukʼanikal
laqtaqal, jantu lay ay kʼatsan, jantu lay akxaunaʼ joʼati
kaval, jantu kataʼapʼal, jantu kalakasamanal, jantu kamakanuskʼil
tumin.
\v 8 Maqskʼiniy kaval qayntaun yu ox jalaqaʼiy lapanakni
la ixchaqaʼ. Vachuʼ kun achati makay yu lajʼoxi, vachuʼ
lhistakkan ixjatapastakʼati, ox ukxuyal, makay yu lhipaʼiniy
Dios, ox lhistakkan ixputsuku.
\v 9 Maqskʼiniy kataylhaʼal kun ni chivinti yu lhakapuʼankan
vachu va tacha malanikantacha. Chuncha lay kalakmalanil
yu alati kun ni chivinti yu laqsaval. Vachu maqskʼiniy
lay kalaqxaqalal ni lapanakni yu talaktanchay ni ox
chivinti.
\p
\v 10 La alin yu jantu tatoʼoyay yu xalajʼaynin. Yuʼuncha
va ayaj chivinʼoj lapanakni yu tamakanununputun. La
alin israelitas yu chuncha talay.
\v 11 Yuʼuncha jalaktʼilhiniy ixjatapastakʼatkʼan lapanakni
yu aqataun chaqaʼ tavilanal. Chuncha talay por yu chivinti
yu jamalaninin por tamakanulhajaputun tumin. Xlhiyucha
maqskʼiniy saq kalakmakakal.
\v 12 Qayntaun yu machaqaʼ Kreta yu ixtoʼoyakan tacha
profeta va naul: “Yu machaqan Kreta tamakanununʼalhiy,
va tacha maqtalin yu ayajnan, va jamalhaqnin, y ayaj lhuu
tavajin.”
\v 13 Va laqsaval yu naul. Xlhiyucha laqatapʼasta kalaqxaʼalatʼi
ixlapanakni Jesucristo para ox kaval ixlhakapuʼatkʼan.
\v 14 Ex chuncha jantucha katamakal kuenta yu valiʼiy
kuentos yu tamakay ni israelitas. Vachu jantu katamakal
kuenta yu tanajun alati lapanakni yu tamakauntijlay
yu laqsaval. Yuʼuncha talhinajun tisuncha yu ox ali
tisuncha yu jantu ox, mas jantu laqsaval.
\p
\v 15 Chavay yu talhitʼajun ox jatapastakʼati, yuʼuncha
tanajun tachun va lajʼoxi. Pero yu jantu ox talakpastaknan
y jantu talhakapuʼan, yuʼuncha tanajun jantu tuʼuchun
lajʼoxi. Jantu ox kaval ixjatapastakʼatkʼan vachu jantu
lay tamispay tisuncha yu ox, tisuncha yu jantu ox.
\v 16 Tanajun tamispay ni Dios pero la ixputsukukʼan
tasuy ni jantu laqsaval tamispay. Jantu ox laklhaʼankan,
jantu tatoʼoyanan, vachu jantu lay tamakay tuʼuchun yu
ox.
\c 2
\s Kʼamalanin yu laqsaval
\p
\v 1 Tejkan uxintʼi jamalaninin, maqskʼiniy chʼantaun
kaval kun yu ox chivinti yu masukantacha.
\v 2 Kʼalakmalanitʼi ni xapaynin para katalhistaklhi
ixputsukukʼan para katatiʼukxuntayal tacha lay kalakputoʼoyakal.
Ex ox katalhistaklhi ixjatapastakʼatkʼan, vachuʼ ox kaval
ixlhakapuʼatkʼan kun ixjapaxkantikʼan y katatayanil
tejkan lhitaʼay.
\p
\v 3 Vachu va chun ni xanatin maqskʼiniy katatiʼukxuntayal
tacha paxtoqniy ixlapanakni Dios, jantu katalaklkanal,
jantu katataʼapʼal. Maqskʼiniy katamasul yu ox la ixputsukukʼan.
\v 4 Chuncha yuʼuncha lay kalakmalanil yu jatsiʼinkaʼ
xanatin para kataʼachanil ixapaykʼan y katapaxkal sasʼatʼankʼan.
\v 5 Kalakmalanil katalhistaklhi ixputsukukʼan y jantu
katalhitayal yu jantu ox la ixjatsukuntikʼan, y ox katatapatsal
laqa chaqaʼ y kajamapayninil y katatoʼoyal ixapaykʼan.
Tejkan yu alati lapanakni chuncha katalaqtsʼinaʼ, ex
jantu lay katanaul ni jantu ox ixchivinti Dios.
\p
\v 6 Vachu va chun kalaqxaʼalatʼi yu tsʼalankaʼ para
katalhistaklhi ixputsukukʼan.
\v 7 Tachun la mimputsuku kamakʼatʼi yu lajʼoxi y chuncha
lay katalaqtsʼiʼin tacha maqskʼiniy kataputsukul. Tejkan
malaniy ixchivinti Dios jantu kalhitayal yu jantu ox
y jantu kaʼachʼajtʼay.
\v 8 Ox kamakʼatʼi minchivinti para jantu lay katamukʼanin
laqtaqal. Ex chuncha yu talaktanchaniyan katalhimaxananaʼ,
jantu lay kintalhikiltayan.
\p
\v 9 Kalakmalanitʼi ni oqxtamatin para katatoʼoyal ixʼukxtinkʼan
la ixlhitapatskʼan y para katamakal yu katalhipaʼinil
ixʼukxtinkʼan y jantu kataqaltayanal tejkan laklhijunkan
lhitapatsa.
\v 10 Jantu kataʼalhaunil, va katamakal para kalaklhiʼaynkal.
Ex chuncha por tachun yu tamakay katalhimasul ni va
la ox ni chivinti yu lhichiviniy Dios kiJamalaqtaxtunukʼan.
\p
\v 11 Chavaycha Dios va masuta ixjamapayninti yu laqpumalaqtaxtuy
tachun ni lapanakni.
\v 12 Kintamasuniyan ni kamakauntijlau yu jalaktuʼunuʼ
putsuku kun yu makaputunkan aniy lakamunukpaʼ. Vachu
kintamasuniyan kalhistakvi kimputsukukʼan y ox katiʼukxuntayau
tacha lhinajun Dios aniy lakamunukpaʼ.
\v 13 Chavaycha pakxanʼiyau yu kalhiʼachantajuyau tejkan
kun tachun ixʼayaxtu kintatasuniyan yu ay Dios kiJamalaqtaxtunukʼan
Jesucristo.
\v 14 Yucha maqxtaqkal ixmaqnika por kijnankʼan para
kintamalaqtaxtun la kintalaqalhinkʼan. Ex lay kintalaqlaʼoxinin
ketsukuntikʼan para ixlapanakni kajuu yu ayaj makaputunau
yu lajʼoxi.
\p
\v 15 Ex tachun ni anchanu, uxintʼi maqskʼiniy kʼamalanin.
Kʼalakmalakʼaʼulatʼi ni lapanakni y kʼalaqlhixaʼalatʼi
kun mimpalhachimoʼon. Jantu matichun kʼaʼakchʼintaman.
\c 3
\s Yu maqskʼiniy katamakal yu talhakapuʼan
\p
\v 1 Kʼalakmapʼastʼaknitʼi ni lapanakni ni maqskʼiniy
katatoʼoyal ni jalhachimoʼonun ali yu talhitʼajun palhachimoʼon.
Va katamakal yu lhinaunkan, va katapastakʼalhil tacha
lay katamakal yu la ox.
\v 2 Va jantu katalhimanul jalaklkanti matichun. Va
laqalajʼox katatʼatiʼukxuntayal yu alati. Ayaj katatoʼoyanal
y lakstʼuniy katakʼatsal kun yu alati lapanakni.
\p
\v 3 Kijnankʼan vachu tontos ixjuntau, jantu ixtoʼoyayau,
vamun ixmakayau yu ixmakaputunau ali yu ixkintalhipaʼinin.
Ixpuʼukxuyanau lhilukuj kun akchaʼati. Jantu ox ixkintalaqtsʼinan
y ixlaxkayyau.
\v 4 Ex kintamasunin ixjamapayninti kun ixjapaxkanti
ni Dios kiJamalaqtaxtunukʼan.
\v 5 Yucha kintamalaqtaxtun por ixjamapayninti, jantu
va por yu ox yu ixmakayau. Kintapumalaqtaxtun tejkan
kintachaʼanin kijatsukuntikʼan. Chuncha tsukuchoqoo
kun sastʼi jatsukunti y kintamapaxan ni Espíritu Santo.
\v 6 Ni Dios kintaxtaqniʼojon ni Espíritu Santo por
yu makal ni Jesucristo kiJamalaqtaxtunukʼan.
\v 7 Ex chuncha ox kintalaqtsʼinan por ixjamapayninti
para kalaqaʼiu ni jatsukunti yu jantu aqtaun kamiʼoyaʼ.
Va yucha pakxanʼiyau.
\p
\v 8 Yucha va laqsaval chivinti yu lay lhakapuʼankan.
Ni yucha laqatapʼasta kʼalhichʼivin. Ex chuncha yu talhakapuʼan
Dios va katapastakʼaʼ tacha lay katapuʼukxuntayal makanan
yu lajʼoxi. Ni anchanu chivinti va la ox y lay laqʼaqtayjuy
tachun ni lapanakni.
\v 9 Jantu kʼatʼanutʼi lakchivinti yu jantu aqtayjuy,
vachu jantu kʼatʼanutʼi yu lhichiviniy yu tatapasal
ixpayankʼan la maqancha. Vachuʼ jantu kʼatʼanutʼi lakchivinti
tejkan alin tʼuy jatapastakʼati y talukujlata por yu
najun ixlhachimoʼon Moisés. Ni anchanu lakchivinti jantu
tuʼuchun aqtayjuy va jantu maqskʼiniy.
\p
\v 10 Incha kaʼalil qayntaun yu jalakltʼilhiy ni lapanakni
para tʼuy jatapastakʼati kaval ex kaxaʼalatʼi. Incha
aaqtauncha makachoqoy ex kaxaʼalachʼoʼo. Ex incha chuncha
taylhaʼan jantucha kalaʼaʼitʼi.
\v 11 Va chuncha kʼapʼukʼatsʼayeʼe ni jantu ox kaval
ni anchanu lapanaki, va maqtaqalhiniʼ. Va xʼaman mukʼanikan
ixlaqtaqal.
\s Ni Tito junkan ni katachaʼanaʼ lapanakni
\p
\v 12 Kakmalaqachaniyan Artemas o Tíkiko. Tejkan ancha
kachaʼanaʼ, kamakʼatʼi laqatapʼasta para kilaqtʼatʼi
laka putaulan Nikópolis. Va ikpastaktacha ni ancha kaktapasayaʼ
laka lhikʼasnin.
\v 13 La ox kʼalaqʼaqtʼayʼutʼi ni Zenas yu abogado ali
ni Apolos la ixlakatinkʼan, kʼalaqxtʼaqniyeʼe tachun
yu tamaqskʼiniy.
\v 14 Kilapanaknikʼan maqskʼiniy katalanil tacha lay
katapuʼukxuntayal makanan yu lajʼoxi para lay kalaqʼaqtayjul
ni lapanakni kun yu tamaqskʼiniy. Ex chuncha kataxqananaʼ
yu lajʼox la ixjatsukuntikʼan.
\s Ni Pablo mastakʼachoqoy ni Tito
\p
\v 15 Tachun yu kintatʼaʼalinta tamastakʼayan. Kʼalakmastʼakʼatʼi
yu kintaʼachaniyan yu chʼantaun kilhakapuʼatkʼan. Ni
Dios katamapaynin mintachunkʼan. Chuncha kavalcha.