\id PHM
\h FILEMÓN
\mt2 Ni Chivinti yu Tsʼoqnil Pablo ni
\mt1 Filemón
\c 1
\s Ni Pablo mastakʼay yu Filemón
\p
\v 1 Kitʼin kPablo, va kchʼikanta por klaqputeʼey ixchivinti
Jesucristo. Va chʼantaun kun yu kilaqaj Timoteo klatsʼoqniyau
uxintʼi Filemón. Ox kilatʼatapatsayau, xlhiyucha ayaj
klapaxkayau.
\v 2 Vachu ikmastakʼayau ni Apia yu kintʼalapanakkʼan
yu ikpaxkayau y vachu Arkipo yu kintatʼataylhaanan ni
lachʼapati por kilhakapuʼatkʼan y vachu ikmastakʼayau
yu talhakapuʼanan yu tataqxtoʼa la minchaqaʼ.
\v 3 Katamapaynin y oxamaktaun katamakan ni kimPay Dioskʼan
kun Jesucristo kiJalhachimoʼonukʼan.
\s Ixjapaxkanti ali ixlhakapuʼati ni Filemón
\p
\v 4 Ikxtaqniʼalhiy lhimalaqpuchuncha ni Dios y klapastakʼau
ni uxiknan tejkan ikskʼin ni Dios.
\v 5 Kintajuniy ni ox achʼaniy y lhakʼapʼupʼin ni Jesús
kiJalhachimoʼonukʼan y lakpʼaxkʼay tachun ixlapanakni.
\v 6 Va ikskʼin Dios para kalakmamispʼanin alati lapanakni
milhakapuʼati y chuncha kaxajchal ni kamispʼatʼi tachun
yu ox yu Dios kintaxtaqniyan kijnankʼan yu chʼantaun
kun Cristo Jesús juntau.
\v 7 Ayaj ijkʼachanau y ox kʼatsanau por mijapaxkanti.
Uxintʼi, laqaj, ox lakmalakaʼulay ni ixlapanakni Dios
la ixjalhanutkʼan.
\s Ni Pablo tapayniy por yu Onésimo
\p
\v 8 Xlhiyucha mas kun Cristo klhitʼajun lhachimoʼon
para kaklhijunin yu maqskʼiniy,
\v 9 pero kʼachaniyan, xlhiyucha vamun iktapayniniyan.
Kitʼin kPablo ayaj xapaycha y chavaycha va ktachʼin
kunita por Cristo Jesús.
\v 10 Va iktapayniniyan por Onésimo. Yucha kilaqmil
taʼan iktanun laka pachʼin y tacha kintsʼal val por
ixlhakapuʼati.
\p
\v 11 Pʼunaj jantu ox ixjunita para kaʼaqtayjun pero
chavaycha ox lay aqtayjuyan y vachu lay kiʼaqtayjuy
ni kitʼin.
\v 12 Chavay yucha ikmalaqachanichoqoyan. La ox kʼalaʼaʼitʼi
vachu va tacha kilaʼaʼitʼi ni kitʼin.
\v 13 Va xaknajun ixtaulal kun kitʼin ex chuncha ixkintapatsanil
por uxintʼi. Va aniy iktanun laka pachʼin por klaqputeʼel
yu ox chivinti yu lhichiviniy Jesucristo.
\v 14 Pero jantu klhijunputun kataulal aniy incha jantukaʼ
mintakʼatsan kaval. Jantu iknajun ni kiʼaqtʼayʼutʼi
laqatapʼasta, va iknajun kiʼaqtʼayʼutʼi laqaʼachati.
\p
\v 15 Ka va lay ixmakauntan taun panchʼix para chavaycha
lay kalaʼaʼichʼoʼo y katʼataulan mas va tavanancha.
\v 16 Jantucha kunaʼ tacha oqxtamati, va tacha milaqaj
yu paxkayan. Chuncha apalay ox xajantu yu valiʼiy oqxtamati.
Yucha ox ikpaxkay ni kitʼin pero apalay kapʼaxkʼatʼi
ni uxintʼi, jantucha tacha valiʼiy lapanaki, va tacha
milaqaj kalaqtsʼi. Milaʼatʼuykʼan va ixlapanaknicha
ni Jalhachimoʼonuʼ Jesucristo untʼatʼik.
\p
\v 17 Incha kilaqtsʼin tacha milaqaj y chʼantaun juntau
ex kalaʼaʼitʼi ni yucha vachu va chun tacha kʼilaʼaʼitʼi
ni kitʼin.
\v 18 Chavay incha yucha va makanitan taun laqtaqal
o incha va lhaaniyan tuʼuchun ex kalaqtsʼi va tacha
ni kitʼin kaklhaanin.
\v 19 Kitʼin Pablo iktsʼoqniyan la kimakaʼ. Va kunan
ni kakmapalniyan, pero jantu ikmaqskʼiniy kajkunin. Uxintʼi
kʼatsʼaycha ni kʼilhipinin metsukunti.
\v 20 Ex chuncha, laqaj, kʼamakʼatʼi yu klhitapayniniyan
por chʼantaun juntau kun yu Jalhachimoʼonuʼ. Chuncha
kʼimalakʼaʼulanin kelhanuti por chʼantaun juntau kun
yu Jalhachimoʼonuʼ Cristo.
\p
\v 21 Iktsʼoqniyan por ijkʼatsaycha ni kiʼalasmatʼeʼe
y apalay kʼamakʼayeʼe tacha klhitapayniniyan kamakʼatʼi.
\v 22 Vachu kʼalaʼoxitʼi taʼan lay kaktaulal la minchaqaʼ.
Klhilay ni por skʼinatʼik ni Dios lay klalaqʼanchoqotachaʼau
taʼan vilanantʼik.
\s Ni Pablo mastakʼachoqoy ni Filemón
\p
\v 23 Vachu mastakʼayan ni Epafras yu kintʼatanun laka
pachʼin por Cristo Jesús.
\v 24 Vachu tamakstakʼayan ni Marcos ali Aristarco ali
Demas ali Lucas yu kintatʼatapatsay.
\v 25 Katamapaynin ni Jalhachimoʼonu Jesucristo la metsukuntikʼan.
Chuncha kavalcha.