\id JAS
\h SANTIAGO
\mt2 Ni Chivinti yu Tsʼoqlhi
\mt1 Santiago
\c 1
\s Ni Santiago jalakmastakʼay ixlapanakni Dios
\p
\v 1 Kitʼin va kSantiago yu ixʼoqxtamati Dios y vachuʼ
ixʼoqxtamati ni Jalhachimoʼonu Jesucristo kunita. Klamastakʼayau
ni uxiknan yu oqxlaqkautʼuy xalapanakni Israel untʼatʼik
yu tʼikl pʼutʼaukʼaʼotʼik taʼakapuchun ni lakamunukpaʼ.
\s Yu ox jatapastakʼati yu xtaʼa ni Dios
\p
\v 2 Ni uxiknan yu ketʼalaqaunin, kʼalhiʼachʼantʼaʼutʼik
tejkan pulhuu maqanlqajnati tapaxtoqniyan.
\v 3 Uxiknan kʼatsʼayatʼikcha ni tejkan maʼanlʼajnanatʼik
por milhakapuʼatikʼan ex kʼalhixajtʼachipitik tacha
lapanakni yu laqsaval tamaqantʼaqniy taʼan lhitaʼay.
\v 4 Kʼamaʼantʼaqnitʼik kun mintapʼastkʼan y ox vas
katʼaylhipʼintʼik la metsukuntikʼan tus jantu tuʼuchun
katsʼanqal.
\p
\v 5 Incha alin xaqayntaun ni uxiknankʼan yu tsʼanqaniy
jatapastakʼati, ex maqskʼiniy kaskʼinil ni Dios y yucha
kaxtaqniyaʼ. Ni Dios ayaj lhuu xtaʼa y jantu aqtaun
najun incha jantu.
\v 6 Kʼaskʼinitʼik pero vachuʼ ox kalhakʼapʼupʼintʼik
ni kalaʼaʼiyapitik porke yu jantu lhakapuʼan lhiʼakxajachal
tacha xaxkan lakamar yu maqyaulhitsukuy ni un la ixʼukxna.
\v 7 Incha matichun va putʼuy jalakpastaknan ex jantu
lay laqaʼiniy tuʼuchun ni Jalhachimoʼonu Dios
\v 8 por tʼuy jatapastakʼati makay. Chavay putaun pastakʼa
y ataun julchan aputaun pastakʼa ex yucha jantu lay
vas taylhaʼan la ixlakatin.
\s Yu kilpatanin ali yu maqalinin
\p
\v 9 Qayntaun kilaqajkʼan incha ayaj kilpataniʼ ex ni
yucha lay ay kakʼatsal porke Dios ay makay.
\v 10 Chavay yu maqaliʼ lay ay kakʼatsal vamun incha
Dios lakatʼuniy makay. Yu maqaliʼ yucha va tacha xaxanati
qaltaun javan yu jantu taqmaqay.
\v 11 Tejkan xajachil julchan ayaj pʼays jaskʼunun ex
yu javan xixacha y yu xaxanati patajuycha ex maqatsʼanqaʼojoycha
ixkʼusixtu. Vachu chun katapasayaʼ ni maqaliʼ, yucha
katsʼanqayaʼ tejkan vananaj taylhaʼan la ixlhitapatsa.
\s Yu tayaniy ixmaqanlqajnati
\p
\v 12 Yu tayaniy ixmaqanlqajnati y jantu makauntijlay
ixlhakapuʼati yucha ayaj lhiʼachantajuy. Incha kamaqantʼaqniyaʼ
tachun ixmaqanlqajnati ex kalaqaʼiyaʼ yu ox jatsukunti
tus tacha laqataun korona yu Dios naul kalaqxtaqniyaʼ
ixlapanakni yu laqsaval taʼachaniy.
\p
\v 13 Tejkan qayntaun makaputun tuʼuchun laqtaqal yucha
jantu lay kanaul incha va Dios malakpastakʼaniy para
kamakal laqtaqal. Dios jantu jamalakpastakʼaninin para
kʼamakʼatʼi yu jantu ox. Yucha jantu matichun chuncha
malakpastakʼaniy.
\v 14 Va ixlaqʼaman ni lapanaki chuncha jalakpastaknan
yu jantu ox yu makaputun la ixjatsukunti y yucha xʼaman
maqxtaqkan para kachʼapakal.
\v 15 Tejkan chuncha pastakʼa yu makaputun ex yucha
puʼakxajyachal talaqalhin y tejkan lhuucha talaqalhin
laqayntsay ex puʼakxajyachal lhinin.
\p
\v 16 Ketʼalaqaunin yu klapaxkayau, jantu kʼamakʼanukʼantʼik.
\v 17 Tachun yu lajʼox yu xtaqnikanau y tachun yu vas
junita va si talman minachal y va Dios kintaxtaqniyan.
Ni Dios makaʼol tachun maklku yu alin laktʼiyan. Yucha
jantu aqtaun tapaxay tacha tapaxay jalkʼikniʼ.
\v 18 Ni yucha kintaxtaqnin jatsukunti tejkan laqputeʼenikau
yu laqsaval. Va chuncha makaputul para kajuu ni kijnankʼan
chuncha tacha sasʼatʼan yu xapʼunaj tatsukul yu apalay
lhiʼaynikan xajantu tachun yu lakmakal.
\s Yu laqsaval toʼoyay ni Dios
\p
\v 19 Ketʼalaqaunin yu klapaxkayau, kapʼastʼaktʼik yu
klajunau, ni uxiknankʼan maqskʼiniy listujcha kʼaʼuntʼik
para ox kaʼasmaktʼaytʼik. Jantu maqskʼiniy niman kachʼivinintʼik
y jantu maqskʼiniy niman kʼalukujlatʼik.
\v 20 Ni lapanaki yu lukujlay yucha jantu lay lhitsukuy
yu vas jatsukunti yu Dios najun kaʼalil.
\v 21 Chuncha maqskʼiniy kʼamakʼauntʼijlaʼotʼik tachun
yu jantu lajʼox y tachun talaqalhin yu talhavay la metsukuntikʼan.
Kalaʼaʼitʼik ixchivinti Dios yu xtʼaqnikʼantʼik la melhanutkʼan
y vachu jantu ay kakʼatsʼantʼik. Ni anchanu chivinti
yucha lhitʼajun tapʼasta para katamalaqtaxtun.
\p
\v 22 Jantu maqskʼiniy vamun kaʼasmaktʼik ixchivinti
Dios, va maqskʼiniy kʼamakʼatʼik tacha yucha lhinajun.
Incha jantu makʼayatʼik, ex va milaqʼamankʼan makʼanukʼanatʼik.
\v 23 Yu qasmatʼa y jantu makay yu lhinajun ex lhixajyachal
va tacha qayntaun lapanaki yu laqapulaqtsʼinkan kun
speju.
\v 24 Tejkan talakanuy laka speju ox laqtsʼinkan tacha
tasuy ni yucha y tejkan jantucha laqapulaqtsʼinkan laka
speju ex niman kaukchoqoy tacha lakpujun.
\v 25 Pero taʼayucha yu ox makay kuenta ixlhachimoʼon
Dios yu oxamaktaun jamakanan, y jantu kʼapʼa ixchivinti
yu qasmatʼa, yucha ayaj ox makay incha laqsaval vas taylhaaniy
yu lhinajun, ex astan ni yucha kalhiʼachantajuyaʼ por
yu makay.
\p
\v 26 Incha qayntaun pastakʼa ni laqsaval toʼoyay ni
Dios pero la ixkilna va tacha taylhaʼancha chiviniʼ
yu jantu lajʼox ex va xʼamancha makanuchoqokan y yu
makay jantu tuʼuchun xtapal kaval mas va najun toʼoyay
ni Dios.
\v 27 Incha qayntaun lapanaki ox toʼoyaputun ni Dios
sin talaqalhin y sin kalhitayal tuʼuchun yu jantu lajʼox,
ex maqskʼiniy kalaqʼaqtayjul yu tiyaunin yu tamaqanlqajnan
kun jasʼatʼan yu jantucha katalhitsukul ixpayankʼan.
Vachu tsʼanqay kalhistakkal para jantu kamakal tuʼuchun
yu jantu ox putsuku aniy lakamunukpaʼ.
\c 2
\s Jantu siya tumpaj kʼalalaqtsʼintʼik
\p
\v 1 Ketʼalaqaunin, uxiknan yu lhakʼapʼupʼinatʼik ni
ay Jalhachimoʼonu Jesucristo va aqstanchunin kʼalatʼoʼoyatʼik
y jantu siya tumpaj kʼalalaqtsʼintʼik.
\v 2 Tejkan tʼaqxtʼoqyatʼik, ex katanuchal qayntaun maqaliʼ
yu kamaqtanul kʼus ixmaqtanuti yu jamakanti kun oro
y vachu kaʼulal yu ox laqchʼiti, ex vachuʼ katanuchal
ancha qayntaun yu oxicha atʼaliʼ ixlaqchʼita,
\v 3 ex chuncha ka va ox kalaʼaʼitʼik yu maqaliʼ y kaʼunitʼik:
“Uxintʼi aniycha katʼaulchiy taʼan alin yu ox siya.”
Ex yu kilpataniʼ yucha ka va kaʼunitʼik: “Uxintʼi ancha
katʼaycha u katʼaʼulcha lakatʼun taʼan chʼatay.”
\v 4 Incha va chuncha makʼayatʼik ex jantucha aqstanchunin
latʼoʼoyayatʼik. Ex va untʼatʼik tacha jueces yu jantu
vas tamakay.
\p
\v 5 Ketʼalaqaunin yu klapaxkayau, ox kʼaʼasmaktʼik yu
klajunau. Ni Dios jalaksaklhi yu kilpatanin aniy lakamunukpaʼ
para kataval tacha maqalinin por ixlhakapuʼatikʼan y
vachuʼ para katalaqaʼil ixmaqalitikʼan yu tapaxtoqniy
taʼan jalhachimoʼonun, yu kamaqxtaqniyaʼ tachun yu taʼachaniy.
\v 6 Uxiknan ox jamamaxaniyatʼik ni kilpatanin pero
yu maqalinin va yuʼuncha yu talhimaqchapuyan y talaqxaqamayan
tejkan talhaʼanan laka pulakchivin.
\v 7 Vachu va yuʼuncha yu takiltajiy ixtaqaʼuti ni Cristo
yu lhimapʼaqaʼukʼantʼatʼik.
\p
\v 8 Uxiknankʼan ayaj ox makʼayatʼik incha laqsaval
makʼayatʼik tacha yu lhinajun kiJalhachimoʼonukʼan Dios
yu najun inchineʼ: “Kapʼaxkʼatʼi mintʼamachaqaʼ chuncha
tacha pʼaxkʼakʼan milaqʼaman.”
\v 9 Pero incha jantu va aqstanchun japʼaxkʼananatʼik
ex makʼayatʼik talaqalhin y la ixlhachimoʼon Dios tamukʼaniyan
laqtaqal por jantu makʼayatʼik yu lhinajun.
\p
\v 10 Incha qayntaun lapanaki tus makaʼojoy tachun yu
lhinajun la ixlhachimoʼon Dios pero vamun kun laqataun
jantu vas makay, ex vachuʼ lhitsukuʼojoy laqtaqal kun
yu alati yu lhinaunkan.
\v 11 Ni Dios naul: “Jantu katʼatʼamatʼi aqayntaun
lapanaki yu jantu minavin kaval y jantu kʼamaqnin.”
Ex chuncha incha qayntaun jantu tʼatamay aqayntaun yu
jantu ixnavin kaval, pero incha jamaqninin ex makaycha
taun laqtaqal yu jantu lhinajun laka lhachimoʼon.
\p
\v 12 Uxiknan tsʼanqay vas kachʼivinintʼik y ox vas
katʼiʼuntʼayatʼik porke katapuxkaulaqtsʼiniyan mimputsukukʼan
ni anchanu lhachimoʼon yu oxamaktaun jamakanan.
\v 13 Yu jantu tamapayniy yu alati lapanakni yuʼuncha
jantu kamapaynikanaʼ tejkan kapuxkaulaqtsʼinkanaʼ ixlaqtaqalkʼan.
Pero yu tamapayninin, yuʼuncha katalhajayaʼ tejkan kalakmakanikanaʼ
kuenta ixputsukukʼan.
\s Yu jantu makay yu lhinaunkan ex jantu xtapal ixlhakapuʼati
\p
\v 14 Ketʼalaqaunin, ¿tisuncha xtapal incha qayntaun
najun lhakapuʼan ni Dios pero jantu makay yu lhinajun?
Yucha jantu lay kalaqtaxtuyaʼ mas najun lhakapuʼan.
\v 15 ¿Tas kalhixajchalcha incha kaʼalil qayntaun kintʼalaqajunkʼan
u kintʼalapanatkʼan yu katatsʼanqanil ixlaqchʼitkʼan
y vachuʼ katatsʼanqanil yu kataʼul laka julchan?
\v 16 Ex incha xaqayntaun uxiknankʼan kajunil: “Laksniycha
kapʼinchʼoʼocha, kʼaʼulatʼacha yu qaltanʼay milaqchʼiti
y ox kʼavay.” Pero incha jantu xtʼaqniyatʼik yu maqskʼiniy
ex jantu tuʼuchun xtapal kaval minchivintikʼan.
\v 17 Vachu chun lhitapasay kun milhakapuʼatikʼan, incha
jantu makʼayatʼik yu lhinaunkan, ex jantu tuʼuchun ixtapal
kaval milhakapuʼati, va tacha kanilcha.
\p
\v 18 Qayntaun lay kanaul inchineʼ: “Uxintʼi lhakʼapʼupʼin
ni Dios y kitʼin kmakay yu lhinajun.”
\p Pero ni kitʼin va knajun ni jantu lay kʼimasunin ni
lhakʼapʼupʼin incha jantu makʼay yu lhinajun. Kitʼin
kmasuniyan ni laqsaval klhakapuʼan va por kmakay yu
lhinajun.
\v 19 Uxintʼi lhakʼapʼupʼin ni Dios va laqataun alin.
Chuncha ox makʼay. Ni aqmoqxnun vachu chun talhakapuʼan
pero kun talhanti.
\p
\v 20 Jantu kaʼuntʼi tontoj, mas naʼun ayaj xtapal milhakapuʼati
pero chavay kmasuniyan ni jantu tuʼuchun xtapal kaval
incha jantu makʼay yu lhinaunkan.
\v 21 Ni Abraham yu maqancha kimpaykʼan ixjunita, ni
Dios ox laqtsʼinil ixjatsukunti tacha qayntaun yu jantu
kalhitsukul tuʼuchun laqtaqal. Ni yucha ox laqtsʼinkal
va por yu makal tejkan ixmaqxtaqputun tacha taun lapaxkan
yu istsʼal Isaac.
\v 22 Ex chuncha malaqasikan ni Abraham lhakapuʼal pero
vachuʼ makal yu lhinaul ni Dios. Chuncha por yu makal
tasul ni laqsaval ixlhakapuʼan.
\v 23 Ex chuncha val tacha tsʼoqkanta la ixchivinti
Dios yu najun inchineʼ: “Ni Abraham lhakapuʼal ni Dios
xlhiyucha ni Dios laqaʼil tacha qayntaun lapanaki yu
jantu kalhitsukul laqtaqal.” Ex ni Abraham lhimapaqaʼukal
ixʼamigo ni Dios.
\p
\v 24 Ex chuncha kʼatsʼayatʼik ni Dios ayaj ox laqtsʼin
qayntaun lapanaki por yu makay y jantu vamun por yu
lhakapuʼan.
\v 25 Ni Dios vachu ox laqaʼil ni Rahab, ni anchanu xanati
yu ixmakata talaqalhin kun joʼakna. Yucha ox laqaʼikal
por yu makal tejkan jalaqaʼil yu ixjalaqmalaqachata
Josué ex astan jalaqmalaqachachoqolcha alakataun lakatin.
\p
\v 26 Ni lakatunaj yu jantucha kalhitsukul ixlhitsukunuʼ
yucha nitacha. Vachu chun junita milhakapuʼati incha
jantu makʼay yu lhinajun ni Dios ex tacha kanilcha milhakapuʼati.
\c 3
\s La kinkilkʼan naunau yu jantu lajʼox
\p
\v 1 Ketʼalaqaunin, apalay ox kaval jantu qaynlhuu kʼaʼuntʼik
yu jamalaninanatʼik. Ni kijnan kʼatsayaucha yu jantu
vas jamalaninanau, ni Dios apalay kamakayaʼ kuenta kintalaqalhinkʼan.
\p
\v 2 Tachun kijnan pulhuu laqtaqal makayau. Incha qayntaun
lapanaki jantu aqtaun kiltaxtuy tuʼuchun chivinti yu
jantu ox, ex yucha vas tiʼukxuyal, jantu tuʼuchun tsʼanqaniy
y vachuʼ lay lhichimoʼoy tachun ixlakatunaj.
\p
\v 3 Tejkan jamakiltanuyau ixfrenoskʼan ni jukin para
kintatoʼoyan ex lay japulhaʼanau taʼan japulhiʼuxaʼanau.
\v 4 Vachu ni barcos, mas ayaj lajʼay y yu un pʼays sunlhaʼan,
pero yu xamaltananaʼ va kun lakatʼuniy kʼiu lay pulhaʼan
taʼan pulhiʼuxaʼan.
\v 5 Vachu ni kisimaʼatikʼan mas va lakatʼuniy yu alin
la kilakatunajkʼan pero lay makay axtoqnuʼ yu lajʼay.
\p Ni jikmi mas va lakatsʼuniy pero vachu lay xavaʼojoy
taʼakchun lakakʼavinan.
\v 6 Ni kisimaʼatikʼan va tacha lakatsʼuniy jikmi junita.
Va ancha minachal puchux xatalaqalhin ni lakamunukpaʼ.
Yucha laqalhiʼojoy tus tachun kilakatunajkʼan, va tacha
kamaqtaytaulal tapanchun la ketsukuntikʼan y pumaqtajiy
xajikmi laqnin.
\v 7 Ni lapanakni lay tamamansujlay puchux talhitsukuti,
lay tamamansujlay tsʼoʼon ali tsapulin y vachuʼ yu alin
lakxkan y chavay tamamansujlatacha.
\v 8 Pero jantu matichun lay mamansujlay isimaʼati.
Tejkan tsukuy maqtaqalhiniʼ ni simaʼati ex lhiʼakxajachal
tacha kʼalhitsʼukʼucha taun xalhinin para kʼamaqnin.
\p
\v 9 Kun kisimaʼatikʼan putoʼoyayau kimPaykʼan Dios
y vachu va yucha pulaktuʼuyau ni lapanakni yu jalakmakal
Dios para kataval tacha yucha.
\v 10 Kun kinkilnakʼan kiltaxtuyau chivinti para kaputoʼoyau
ni Dios y vachuʼ para laqxtoqnuʼ kachiviniu. Ketʼalaqaunin,
jantu maqskʼiniy chuncha kaval.
\v 11 Taʼan taxtuy xkan jantu lay putʼuy taxtuy. Jantu
lay lakataun taxtuy yu saqsi xkan kun yu suniya xkan.
\v 12 Ketʼalaqaunin, vachu ni xakʼiu higo jantu lay xtaʼa
xaʼunikan olivas y yu xakʼiu olivas jantu lay xtaʼa
xaʼunikan higos. Vachu va chun taʼan alin xkan yu sʼoʼo
jantu lay taxtuy yu saqsi xkan.
\s Yu laqsaval jatapastakʼati yu minachal laktʼiyan
\p
\v 13 Incha alin qayntaun yu ox jalakpastaknan y chux
malaqasiy ex tsʼanqay jantu ay kamakakal y kamasul yu
ox ixputsuku yu minachal kun ox ixjatapastakʼati.
\v 14 Uxiknan incha alin akchaʼati kun taqspukniti la
melhanutkʼan ex jantu maqskʼiniy ay kakʼatsʼantʼik.
Chuncha va si jalaklkʼananatʼik para jantu lay kamispakal
yu laqsaval.
\v 15 Ni anchanu jatapastakʼati yucha jantu kaminchal
kun Dios, yucha va xajatapastakʼati aniy lakamunukpaʼ
yu pastakʼa yu valiʼiy lapanaki y minachal kun ni aqmoqxnuʼ.
\v 16 Taʼan alin akchaʼati kun taqspukniti ancha jantu
lay vas xajachal tuʼuchun y puchux talaqalhin alin.
\v 17 Pero yu talhitʼajun ni jatapastakʼati yu minachal
kun Dios yuʼuncha talhixajyachal jatsukunti yu jantu
tsʼuniy kalhitayal laqtaqal, va oxamaktaun tajunita, vachu
qalʼox tajunita, vachu jantu ay takʼatsan, va talhitsukuy
jamapayninti, tachun yu tamakay si ox xajachal, va taun
jalaqtsʼinkan y jantu tʼuy ukxpu tamakay.
\v 18 Yu talaqlaʼoxinin yu talalhixkajiy para ox katalalaqtsʼinchoqol,
yuʼuncha ox tamakay. Va tacha katachʼal yu ox para kataxqaʼil
yu vas jatsukunti.
\c 4
\s Jantu kaʼalil akchaʼati, kaʼalasmaktʼik ni Dios
\p
\v 1 ¿Tas ancha minachal milhilukujkʼan tejkan lachʼapʼayatʼik
siya uxiknankʼan? Va minachal kun mijatapastakʼatikʼan
porke ayaj lhitsʼukʼupʼutʼunatʼik axtoqnuʼ tus lhiʼakxajyachal
lhilukuj.
\v 2 Alin yu achʼaniyatʼik para kʼalhitsʼukʼutʼik pero
jantu lay lhitsʼukʼuyatʼik. Jamaʼaninanatʼik y vachu
lalhiʼakchʼipʼiniyatʼik tuʼuchun y jantu lay lhitsʼukʼuyatʼik.
Ex makʼayatʼik lhilukuj. Pero jantu laʼaʼiyatʼik yu
skʼinatʼik porke jantu skʼiniyatʼik ni Dios.
\v 3 Tejkan skʼiniyatʼik jantu laʼaʼiyatʼik porke jantu
vas skʼinatʼik, vamun skʼinatʼik para kʼamaʼaqxatʼik
kun yu jantu lajʼox la mimputsukukʼan.
\p
\v 4 Uxiknan lapanakni yu makʼauntʼijlayatʼik yu tapaxtoqniyan,
¿jantu kʼatsʼayatʼik ni yu chʼantaun tʼajun kun yu aniy
lakamunukpaʼ yucha va ixtʼalaxkayaʼ ni Dios? Y taʼayuʼ
yu ayaj achaniy yu jantu lajʼox yu alin lakamunukpaʼ
ex yucha lhiʼakxajyachal ixtʼalaxkayaʼ ni Dios.
\v 5 Va ayaj xtapal ni chivinti yu tsʼoqkanta yu najun
inchineʼ: “Ni espíritu yu kintamalakatanutan ni Dios
va ayaj xiyaxnaʼ.”
\v 6 Pero apalay lhuu ixjamapayninti ni Dios yu kintaxtaqniyan.
Xlhiyucha va tsʼoqkanta la ixchivinti Dios, va najun
inchineʼ:
\q Dios jalaktanchaniy yu lajʼay jalakmakakan
\q pero ox jalakmapayniy yu lakstʼuniy jalakmakakan.
\m
\v 7 Kʼamalakʼatʼunikʼantʼik kun Dios. Kʼalaktʼanchʼanitʼik
yu tamakaniputunan ni aqmoqxnuʼ ex yucha katalajqosmajʼanan.
\v 8 Katsʼukʼutʼik ukstsʼuniy kun Dios ex yucha vachuʼ
ukstsʼuniy katsukuyaʼ kun uxiknankʼan. Uxiknankʼan maqtaqalhinin
untʼatʼik, kʼaxakʼamaʼantʼikcha yu jantu ox makʼayatʼik
la mimakakʼan. Kachʼaʼaxtʼutʼik yu jantu ox la melhanutkʼan
yu putʼuy makʼapʼutʼunatʼik.
\v 9 Kʼamaʼaninitʼik y katʼijnintʼik y kaʼalhuntʼik.
Yu miʼachatkʼan kalhiʼakxajtachal qalhuti vachuʼ yu
miʼachantikʼan kalhiʼakxajtachal jamaqaninti.
\v 10 Lakstʼuniy kakʼatsʼantʼik kun ni kiJalhachimoʼonukʼan
Dios ex yucha lajʼay katamakayan.
\s Jantu kʼamukʼanin laqtaqal yu mintʼalhakapuʼanan
\p
\v 11 Ketʼalaqaunin, jantu maqskʼiniy kʼalalhichʼivinintʼik
yu jantu ox. Taʼayuʼ yu jantu ox lhichiviniy ixlaqaj
y vachu jantu lhiʼajin ex yucha jantu ox lhichiviniy
ixlhachimoʼon ni Dios y vachuʼ jantu lhiʼajin. Incha
matichun jantu lhiʼajin ixchivinti Dios ex yucha jantu
makay yu lhinajun. Yucha ay jalhachimoʼonuʼ kʼatsan
porke jantu lhimukʼay ixlhachimoʼon ni Dios.
\v 12 Vamun Dios maqxtaqlhi ni lhachimoʼon y yucha lay
malaqtaxtunun y vachu lay mukʼay laqtaqal. Ex uxintʼi,
¿tas ayucha kʼatʼicha ni mukʼaniputun laqtaqal milaqaj?
\s Jantu katʼamaʼayajnin minchivintikʼan por yu makʼapʼutʼunatʼik
\p
\v 13 Kʼaʼasmaktʼik yu inchineʼ naunatʼik: “Chavaycha
u lhiy kʼanau intachun y kʼanau taʼan ay putaulan. Ancha
kataultachaʼau taun jachʼitin, katapatsayau y kalhajayau
tumin.”
\v 14 Jantu kʼatsʼayatʼik yu lhiy katapasayaʼ la metsukuntikʼan.
¿Tisuncha xtapal metsukuntikʼan? Va tacha taputsʼi yu
tasuy taun panchʼix ex astan niman laqmixchoqoy.
\v 15 Yu tsʼanqay kʼanauntʼik va inchineʼ: “Incha chuncha
maqamay ni kiJalhachimoʼonukʼan Dios, ex chun lay katsukuyau
y lay kamakayau tuʼuchun.”
\v 16 Uxiknan vamun tamaqamayan katʼamaʼayajnin minchivintikʼan.
Tachun anchanu jaʼayajnati va talaqalhin.
\v 17 Incha matichun mispay yu ox yu tsʼanqay kamakal
pero incha jantu makay, ex yucha makay talaqalhin.
\c 5
\s Jalaqxaqalakan yu maqalinin
\p
\v 1 Kaʼasmaktʼik ni uxiknan yu maqalinin untʼatʼik.
Kaʼalhuntʼik y kʼalaktʼasatʼik por kʼamaʼanlʼajnanapitik.
\v 2 Yu mimaqalitkʼan yucha puchʼitacha y yu milaqchʼitkʼan
laqxvayʼojotacha tsapul.
\v 3 Yu miʼorojkʼan ali mimplatajkʼan yuʼuncha talaqmastacha
y anchanuʼ yu mastacha yucha masuy milaqtaqalkʼan y
yucha kʼapʼutsʼanʼayapitik tus tacha katalaqxavaʼon.
Vamun tamaqamayan kʼalalhavatʼik mimaqalitkʼan mas chavaycha
tʼajuncha miʼonuʼ ni lakamunukpaʼ.
\v 4 Kʼamakʼatʼik kuenta. Jantu kʼalakmapʼalatʼik miʼoqxtamatinkʼan
yu taxqanal la milhitapatskʼan. Yuʼuncha tus talaktʼasay
tachivintanuy. Tus taʼan vilchal ni Dios yu jalaklhichimoʼoy
tachun yu talhitʼajun tapʼasta, tus ancha kilchaʼan ixchivintikʼan
miʼoqxtamatinkʼan.
\p
\v 5 La metsukuntikʼan lhitʼaunʼoyatʼik tachun yu lajkʼus
yu alin lakamunukpaʼ y tachun yu skʼinatʼik la melhanutkʼan.
Ex chuncha mimputsukukʼan makʼayatʼik tus tacha yu talajʼonta
vakaxna yu laqchaʼantacha xajulchan para kalaqmaqnikal.
\v 6 Ni lapanakni yu vas tatijuyanal, yuʼuncha jalaqmamaʼanlʼajnivayatʼik
tus jalaqmaqniyatʼik, mas yuʼuncha jantu tuʼuchun talaktanchaniyan.
\s Tsʼanqay lakatʼuniy kʼamakʼakʼa y vachu kʼamaqantʼaqnin
\p
\v 7 Ketʼalaqaunin, uxiknan tsʼanqay kʼamaʼantʼaqnitʼik
tus tejkan kaminchoqoyaʼ ni kiJalhachimoʼonukʼan Jesucristo.
Vachu chun tacha qayntaun yu tapatsay laka kuxtu maqantʼaqniy
tus tejkan tamay ni xkan yu pʼunaj tamay y vachuʼ yu
astan tamay, tus ex pakxanʼiy kaxqaʼil yu ox jaxqanti.
\v 8 Uxiknan ox katʼaylhipʼintʼik y kʼamaʼantʼaqnitʼik
vachuʼ, porke ni Jalhachimoʼonuʼ jantucha maqan kaminchoqoyaʼ.
\v 9 Ketʼalaqaunin, jantu tuʼuchun kʼalaʼunitʼik para
jantu tuʼuchun laqtaqal kʼamukʼanikʼantʼik. Ni Dios
yu mukʼay laqtaqal, yucha va laycha kachil, va lakxtuyalcha
laka puerta.
\p
\v 10 Ketʼalaqaunin, kalaqtsʼiʼitʼik ixputsukukʼan ni
lapanakni yu maqancha ixtalaqputeʼey ixchivinti Dios.
Ox ixtamaqantʼaqnita mas ixtamaqanlqajnan tejkan ixtalhichiviniy
ixtaqaʼuti ni Jalhachimoʼonu Dios.
\v 11 Kijnan kʼatsayau ni anchanu lapanakni yu ixtamaqanlqajnan,
yuʼuncha ixtalhitʼajun lhuu achati. Uxiknan asmaktʼatʼik
tas valcha kun Job. Yucha maqantʼaqniʼol tachun ixmaqanlqajnati
ex mapaynil ni Jalhachimoʼonu Dios. Yucha ayaj paxkanan
y mapayninin.
\p
\v 12 Ketʼalaqaunin, alin taun tuʼuchun yu ayaj maqskʼiniy.
Tejkan chʼivinanatʼik jantu kʼanauntʼik: “por Dios”,
para kʼamasutʼi ni laqsaval yu naunatʼik. Vachu jantu
kʼanauntʼik: “por ixtapʼasta ni laktʼiyan”, nisin:
“por yu lakamunukpaʼ”, nisin por ataun tuʼuchun. Vas
kalaʼunitʼik. Incha naunatʼik: “chun”, vamun kaval:
“chun”. Incha naunatʼik: “jantu”, vamun kaval: “jantu”,
para jantu tuʼuchun laqtaqal kʼamukʼanikʼantʼik.
\s Iskʼinka ni Dios
\p
\v 13 Incha alin qayntaun uxiknan yu jamaqaninin, yucha
tsʼanqay kaskʼinlhi Dios. Vachu incha alin qayntaun
yu ayaj achan, yucha tsʼanqay kamilpal.
\v 14 Incha qayntaun taqanʼay, tsʼanqay kalakjuntaʼil
ni xalajʼaynin lapanakni yu ox talhakapuʼanan para kataskʼinil
Dios y para katalhilakaxapal aceite kun la ixtaqaʼuti
ni kiJalhachimoʼonukʼan.
\v 15 Incha ox talhakapuʼan tejkan kataskʼiniyaʼ Dios
ex palay kunaʼ ni taqanʼan. Yu kiJalhachimoʼonukʼan
kamaʼostaulniyaʼ. Incha makal tuʼuchun talaqalhin ex
yucha kamalaqmixinikanaʼ.
\p
\v 16 Xlhiyucha kʼalamasavalatʼik mintalaqalhinkʼan
y kʼalaskʼinitʼik Dios para palay kaʼunchʼoʼotʼik. Qayntaun
lapanaki yu ox alinta kun Dios yucha skʼin Dios y yu
ixtapayniti lhitʼajun tapʼasta y ox lhiʼakxajachal.
\p
\v 17 Ni Elías yucha va qayntaun lapanaki ixjunita tacha
kijnankʼan. Pero tejkan ayaj skʼinlhi ni Dios para jantu
katamal xkan, ex jantucha katamal lakatʼun tus laʼatʼutu
jachʼitin apakltaun.
\v 18 Ex astan aaqtaun skʼinchoqol Dios ex tamachoqolcha
xkan, ex alinchoqolcha jatachʼanati ni lakatʼun.
\p
\v 19 Ketʼalaqaunin, incha alin qayntaun yu makauntijlay
ixchivinti Dios yu laqsaval ex yu aqayntaun aqtayjuy
para kataspʼikchoqol,
\v 20 ex kakʼatsʼatʼik ni yucha malaqtaxtuycha qayntaun
maqtaqalhini lapanaki taʼan ixpaxtoqniy kanil. Tejkan
chuncha aqtayjuy ex lhuu talaqalhin malaqmixinikan ni
anchanu lapanaki yu aqtayjukan.