\id 1PE
\h 1 PEDRO
\mt2 Yu Xapʼunaj Karta yu Tsʼoqlhi ni
\mt1 Pedro
\c 1
\s Ni Pedro jamastakʼay yu talhakapuʼan ni Jesucristo
\p
\v 1 Kitʼin, kPedro, ixtamalaqachan ni Jesucristo kunita.
Aniy klatsʼoqniyau ni uxiknan yu tus tʼikl pʼutʼaukʼavilanantʼik
xalakatʼun Ponto, Galacia, Capadocia, Asia ali Bitinia.
\v 2 Yu vananaj maqancha ni kimPay Dioskʼan talaksakchaʼan.
Va najun IxʼEspíritu katamakan ni ixnavin kʼaʼuntʼik.
Talaksakchaʼan para kaʼalasmaktʼik ni Jesucristo y para
katachaʼamajʼanin mintalaqalhinkʼan kun ixjakʼalna.
Va ayaj katamapaynin ni Dios y oxamaktaun katamakan.
\s Tʼaunau pakxanʼinin ni Cristo
\p
\v 3 Va katoʼoyakal ni Dios yu ixPay kiJalhachimoʼonukʼan
Jesucristo. Yucha ayaj kintamapaynin y xlhiyucha kintamakan
para katsukuchoqoo sastʼi. Chuncha kintamakan por kujchoqol
ni Jesucristo tejkan ixnitacha. Chuncha va tacha taylhaaniyaucha
ixpakxanʼika.
\v 4 Chuncha ni Dios tamaʼanitan ancha laktʼiyan yu
kataxtaqniyan. Yu kataxtaqniyan, yucha jantu lay miʼojoy
y jantu lay xqalilin y jantu lay puchʼiy.
\v 5 Chavay por lhakʼapʼupʼinatʼik ni Dios, yucha tapulhistakʼan
ixtapʼasta para lay kʼalaqtʼaxtʼutʼik. Chuncha lay kalaʼaʼitʼik
ni ox jatsukunti yu talhilkamaʼanitan. Yucha kʼamasunikʼanapitik
tejkan xaputamaktanacha kunaʼ.
\p
\v 6 Xlhiyucha ni uxiknankʼan ayaj lhiʼachʼantʼaʼuyatʼik
mas chavaycha lay kaʼalil pulhuu maqanlqajnati.
\v 7 Milhakapuʼatkʼan va tacha oro. Tsʼanqay kamapʼukal
laka jikmi para kalaqtsʼintanukal incha va laqsaval
oro. Chavay milhakapuʼatkʼan yu tayaniy maqanlqajnati
apalay xtapal xajantu yu oro yu lay miʼojoy. Chuncha
milhakapuʼatkʼan kaxajtachal para ox kalaqtsʼinkʼanapitik,
lajʼay kamakʼakʼanapitik y katʼoʼoyakʼanapitik tejkan
kaminchoqoyaʼ ni Jesucristo.
\v 8 Yucha achʼaniyatʼik mas jantu laqtsʼinatʼik. Mas
jantukaʼ laqtsʼinatʼik, va lhakʼapʼupʼinatʼik. Ayaj ox
lhiʼachʼantʼaʼuyatʼik tus jantucha pʼastʼakʼatʼikcha
tacha lay kʼalhichʼivinintʼik.
\v 9 Ox xajachal milhakapuʼatkʼan, va kalaqtaxtuyaʼ milhitsukunukʼan.
\p
\v 10 Ni lapanakni yu maqancha ixtalaqputeʼey ixchivinti
Dios tejkan jantukaʼ ixmin Jesucristo, yuʼuncha ixtalhichiviniy
yu kintaxtaqniyan Dios por ixjamapayninti. Va ixtamispaputun
y ayaj ixtalakxkajuy tacha kintapumalaqtaxtuyan ni Dios.
\v 11 Mas jantukaʼ ixmin ni Cristo, ixʼEspíritu ixtanun
la ixjatsukuntikʼan ni anchanu lapanakni. Xlhiyucha
ixtalhichiviniy ni Cristo yu Dios kamalaqachayaʼ. Vachuʼ
ixtalhichiviniy yu ixmaqanlqajnati ni Cristo yu kalhitapasayaʼ
ali ixʼayaxtu yu astan kalaqaʼiyaʼ. Pero ayaj ixtamispaputun
taʼayucha kunaʼ y tavanancha chuncha kunaʼ.
\v 12 Ni Dios lakmakʼatsanil ni jantu katapaxtoqniyaʼ
ni anchanuʼ chivinti yu ixtalaqputeʼey, va kijnankʼan
kintapaxtoqniyan astan. Ni anchanuʼ chivinti yu ixtalaqputeʼey
ni yuʼuncha, va yu chavaycha laqpʼutʼeʼenikʼantʼik. Talaqputeʼenitan
lapanakni yu ox chivinti kun ixtapʼasta ni Espíritu
Santo yu minchal laktʼiyan. Tus ixmayulnin Dios ixtakʼatsaputun
yu naunputun anchanuʼ chivinti.
\s Ni Dios kintajuntaʼiyan ni kalhitsukuʼojoo yu ox la kimputsukukʼan
\p
\v 13 Xlhiyucha kakʼatsʼajtsʼukʼutʼikcha la mijatapastakʼatkʼan,
va ox kʼalhistʼajkʼantʼik. Vamun kapʼakxanʼitʼik yu
lajʼoxi yu kintaxtaqniyan ni Dios tejkan kaminchoqoyaʼ
ni Jesucristo.
\v 14 Kʼaʼuntʼik tacha jasʼatʼan yu ox taqalasmaknan.
Jantucha kʼamakʼatʼik yu tacha ixmakʼapʼutʼunatʼik tejkan
jantukaʼ ixmispʼayatʼik ni Dios.
\v 15 Ox katʼiʼukxuntʼayatʼik tacha ixlapanakni Dios.
Dios lhitʼaunʼojoy ixʼoxixtu y yucha tajuntaʼin.
\v 16 Va tsʼoqkanta taʼan Dios najun: “Kalhitsʼukʼuʼotʼik
yu ox la metsukuntikʼan tacha kitʼin klhitʼaunʼojoy
kiʼoxixtu.”
\p
\v 17 Va tʼachʼivinanatʼik ni Dios tacha mimPaykʼan.
Yucha va aqstanchun laqtsʼintanuy ixputsukukʼan tachun
ni lapanakni. Xlhiyucha maqskʼiniy katʼoʼoyatʼik tejkan
tʼiʼukxuntʼayayatʼik ni aniy lakamunukpaʼ, tacha jantu
aniy machaqan kʼaʼuntʼik.
\v 18 Chuncha tacha ixtʼiʼukxuyanantʼik, mimputsukukʼan
jantu xtapal kaval, vamun yu tamalanin mepayankʼan maqancha.
Uxiknan kʼatsʼayatʼik ni Dios tamalaqtaxtun ni anchanuʼ
putsuku. Jantu katamalaqtaxtun kun oro nisin plata,
\v 19 va talhimalaqtaxtun ixjakʼalna ni Cristo yu ayaj
ixtapal. Yucha va tacha sasʼatʼa borrego yu jantu tuʼuchun
tsʼanqaniy y jantu kalhitsukul tuʼuchun yu jantu ox.
Va moqslanikanta ni Dios tacha taun lapaxkan.
\v 20 Tejkan vananaj jantukaʼ ixʼalin ni lakamunukpaʼ
ni Dios naul ni Cristo kalhimaqxtaqkalcha. Pero tus
chavaycha kilatachil para uxiknan.
\v 21 Va por yucha lhakʼapʼupʼintʼatʼik ni Dios. Yucha
majkujuchoqol Jesucristo tejkan ixnitacha ex ay makachal
laktʼiyan. Xlhiyucha lhakʼapʼupʼinatʼik ni Dios, vachuʼ
pʼakxanʼitʼatʼik yu kataxtaqniyan.
\p
\v 22 Chavaycha alasmaktʼatʼikcha ni chivinti yu laqsaval.
Xlhiyucha ni Espíritu tapulaqchaʼaxtun mintalaqalhinkʼan
la metsukuntikʼan. Chuncha laqsaval lapʼaxkʼayatʼik
tacha ox tʼalaqaunin. Maqskʼiniy kalapʼaxkʼatʼik kun
tachun melhanutkʼan ali tachun mintapʼastakʼan.
\v 23 Uxiknan va sastʼi tsʼukʼuchʼoʼotʼik, jantucha por
ixtapʼastakʼan lapanakni yu miʼojoy. Va tsʼukʼuchʼoʼotʼik
por ixchivinti Dios yu jantu aqtaun miʼojoy. Yucha lhitʼajun
tapʼasta y tʼajun mas va tavanancha.
\v 24 La ixchivinti Dios najun:
\q Tachun ni lapanakni va tacha javan tajunita.
\q Tachun ixʼayaxtukʼan va tacha xaxanti.
\q Ni javan va xloʼa y patajuy yu xaxanti.
\q
\v 25 Pero ixchivinti Dios alinta mas va tavanancha.
\p Yucha ni ox chivinti yu laqpʼutʼeʼenikʼantʼik.
\c 2
\p
\v 1 Xlhiyucha kʼamakʼaunʼotʼik tachun yu jalaktuʼunti
kun tachun jamakanunti. Jantu kʼalamakʼanitʼik tʼuy
ukxpuʼ. Jantu kaʼakchʼipʼintʼik y jantu kʼalaklkʼanantʼik.
\v 2 Va tacha lakstʼuniy sʼatʼan yu taʼuputun istsʼikʼitkʼan,
vachu va chun kamispʼapʼutʼuntʼik ixchivinti Dios yu
laqsaval. Va yucha lay kapuʼaynl milhakapuʼatkʼan, ex
chuncha lay kʼalaqtʼaxtʼutʼik.
\v 3 Va kʼatsʼayatʼikcha ni Jalhachimoʼonuʼ Jesucristo,
yucha va la qalʼox kun uxiknan.
\s Ni Cristo va tacha chiyux yu kujta
\p
\v 4 Katʼalakʼanunitʼik ni Jesús. Yucha va kujtacha
y va tacha taun chiyux yu xaputayan chaqaʼ. Jantu katalaqaʼil
ni lapanakni pero ni Dios laksaklhi tacha yu ayaj xtapal.
\v 5 Ex chuncha Dios katamakayan tacha aqataun chaqaʼ
taʼan vil ixʼEspíritu, ancha kʼatʼanuyapitik tacha xachiyuxin
ni chaqaʼ. Chuncha kaʼunapitik tacha yu lapanakni yu
tatapatsaniy Dios. Kʼamoqslaniyapitik metsukuntikʼan
tacha taun lapaxkan yu kalaqaʼiyaʼ ni Dios por yu makal
Jesucristo.
\v 6 Xlhiyucha va tsʼoqkanta taʼan Dios najun:
\q Tejkan tamakay chaqaʼ, tamamay laqataun chiyux yu xaputayan.
\q Vachu chuncha kʼulay qayntaun lapanaki yu kitʼin klaksaktacha
la kimputaulan yu Sión junkan.
\q Yucha kamakayaʼ yu apalay ay lhitapatsa.
\q Yu katalhakapuʼanaʼ jantu aqtaun katatamaxaniyaʼ.
\p
\v 7 Xlhiyucha para uxiknan yu lhakʼapʼupʼinatʼik, va
ayaj xtapal ni Cristo. Pero yu jantu talhakapuʼan, yuʼuncha
talhitapasay tacha tsʼoqkanta la ixchivinti Dios:
\q Mas yu xamakanan chaqaʼ jantu katalaqaʼil ni chiyux,
\q pero ni anchanu chiyux val xaputayan.
\p
\v 8 Vachu tsʼoqkanta:
\q Yucha va taun chiyux yu aystukʼunun y maqalqosunun.
\m Yuʼuncha tataqalqosa va por jantu taqalasmatʼa ni
chivinti. Dios naul ni chuncha katatapasal.
\s Ixlapanakni Dios tajunita
\p
\v 9 Pero uxiknankʼan va oqxlaqtaun lapanakni yu Dios
talaksaktan. Tʼapʼatsʼaniyatʼik yu ay Jalhachimoʼonu
Dios tacha kuras. Oxicha alintʼatʼik kun Dios. Ixlapanakni
Dios untʼatʼik, para lay kʼalaqpʼutʼeʼetʼik yu ay axtoqnuʼ
yu makal ni Dios. Yucha tajuntaʼin taʼan ixvilanantʼik
laka putsʼisniʼ para kʼatʼanutʼik taʼan la kʼus matunkunita
ixmaklku.
\v 10 Pʼunaj jantu ixlapanakni Dios kʼaʼuntʼik pero
chavaycha va ixlapanakni untʼatʼikcha. Jantu ixmapʼaynikʼanatʼik
pero chavaycha Dios tamapaynitancha.
\s Ox katsʼukʼutʼik tapatsaninin Dios
\p
\v 11 Uxiknan yu klapaxkayau, jantu xalapanakni aniy
lakamunukpaʼ kʼaʼuntʼik. Klatapayniniyau jantu kʼamakʼatʼik
axtoqnuʼ yu makʼapʼutʼunatʼik la milakatunajkʼan. Anchanuʼ
axtoqnuʼ talaqalhiniyan metsukuntikʼan.
\v 12 Ox katʼiʼukxuntʼayayapitik kun yu jantu talhakapuʼan.
Ex chuncha mas tamanuniyan jalaklkanti, lay talaqtsʼin
ni ox yu makʼayatʼik. Ex ay katamakayaʼ Dios ni anchanuʼ
julchan tejkan kaminaʼ puxkaulaqtsʼiniʼ ni lapanakni.
\p
\v 13 Katʼoʼoyatʼik tachun ni lapanakni yu talhichimoʼoyan,
va chuncha najun kiJalhachimoʼonukʼan. Mas va yu ay
xajalhachimoʼonuʼ aniy lakamunukpaʼ
\v 14 o mas va yu lakstʼuniy jalhachimoʼonun. Yuʼuncha
jamalaqachakanta para katamamaqanlqajnival yu talaktuʼunun
y para katatoʼoyal yu ox tamakay.
\v 15 Va chuncha najun ni Dios, ni kʼamakʼatʼik yu lajʼoxi.
Ex chuncha saq kʼalakmakʼatʼik yu laktontos yu talhichiviniy
yu jantu tamalaqasiy.
\v 16 Oxamaktaun katʼiʼukxuntʼayatʼik, pero jantu oxamaktaun
kʼaʼuntʼik para kalaktʼuʼununtʼik. Katʼiʼukxuntʼayatʼikcha
tacha ixʼoqxtamatin ni Dios.
\v 17 Katʼoʼoyatʼik tachun ni lapanakni. Kapʼaxkʼatʼik
mintʼalaqauninkʼan. Katʼalhaunitʼik ni Dios. Katʼoʼoyatʼik
ni ay jalhachimoʼonuʼ aniy lakamunukpaʼ.
\s Tacha maqanlqajnal ni Cristo
\p
\v 18 Oqxtamatin kaʼalasmaktʼik miʼukxtinkʼan. Katʼoʼoyatʼik
yu lajqalʼoxin, vachuʼ katʼoʼoyatʼik mas yu talaktuʼunun.
\v 19 Tejkan taxtaqniyan maqanlqajnati mas jantu tapaxtoqniyan,
incha makʼayatʼik kuenta ni Dios y ox maʼantʼaqniyatʼik,
ex ni Dios ox talaqtsʼinan.
\v 20 Pero incha makʼayatʼik yu jantu ox ex jantu tuʼuchun
ixtapal kaval mas maʼantʼaqniyatʼik. Va tapaxtoqniyan
maqanlqajnati. Pero incha makʼayatʼik yu lajʼoxi y maʼantʼaqniyatʼik
maqanlqajnati ex yucha ox laqtsʼin ni Dios.
\v 21 Va xlhiyucha ni Dios tajuntaʼin. Ni Cristo maqanlqajnal
por kijnan, y yucha maqskʼiniy kalaqtsʼixtuu. Katʼiʼukxuntʼayatʼik
tacha ixtiʼukxuntayay ni yucha.
\v 22 Yucha jantu tuʼuchun talaqalhin kamakal. Jantu
aqtaun kalaklkanal.
\v 23 Va laktuʼukal pero yucha jantu kalaktuʼuchoqol.
Mas tamamaqanlqajnival pero jantu tuʼuchun kapumaqsvanal.
Va tamaqxtaqnil la ixtamakaʼ ni Dios yu tachun ox laʼoxiy.
\v 24 Yucha lhaʼanʼol kintalaqalhinkʼan la ixlakatunaj
tejkan nil laka kurus. Chuncha ni talaqalhin jantucha
apalay kalhitsukul tapʼasta la ketsukuntikʼan. Ex lay
ox katiʼukxuntayau la ketsukuntikʼan. Va maqanlqajnal
ni yucha, xlhiyucha uxiknan palay unchʼoʼotʼik.
\v 25 Uxiknan ixʼuntʼatʼik va tacha borregos yu taʼoqspalajtsukuy.
Chavaycha tʼaspʼiktʼatʼikcha para kʼatʼapʼintʼik yu
ox Xalhistaknaʼ borregos. Yucha ox talhistakniyan metsukuntikʼan.
\c 3
\s Tacha kataputsukul yu lakxtuklanin
\p
\v 1 Vachu uxiknan xanatin yu lakxtʼuklatʼatʼikcha kaʼalasmaktʼik
mixapaykʼan. Ex chuncha mas lati jantukaʼ taqasmatʼa
ixchivinti Dios lay kamaʼalhaʼatʼik para katalhakapuʼal.
Jantu kamaʼalhaʼatʼik kun chivinti, vamun por mimputsukukʼan,
\v 2 tejkan talaqtsʼinan ni ox tsʼukʼuyatʼik y tʼoʼoyananatʼik.
\v 3 Milhapaʼinkʼan jantu kaval vamun yu milhilakataykʼan
ali mijaʼoqlnutkʼan ali yu oro o yu laqchʼiti yu la
laqlhuu.
\v 4 Yu milhapaʼinkʼan kaval yu jantu miʼojoy, yu kaʼalil
ixpulakna la melhanutkʼan, yu ox maqantaulnaʼ y oxamajʼay.
Va yucha ni Dios laqtsʼin tacha ayaj ixtapal kaval.
\v 5 Chuncha ixtalhilakatayay ni xanatin yu maqancha
ixtatʼajun. Ox ixtalhakapuʼan Dios, va ixtaqalasmatʼa
ixapaykʼan.
\v 6 Chuncha ni Sara ixqalasmatʼa ni ixapay Abraham
y ixjuniy tacha ixʼukxtin. Uxiknan va tacha Sara untʼatʼik
incha makʼayatʼik yu lajʼoxi y jantu katʼalhanantʼik.
\p
\v 7 Vachu va chun uxiknan yu xapaynin untʼatʼik, lajqalʼoxin
kʼaʼuntʼik kun mixanatikʼan kun ox jatapastakʼati. Ox
katʼoʼoyatʼik mixanatikʼan tacha qayntaun yu jantu laqapʼas
kaval. Va kun yuʼuncha laʼaʼiyatʼik ni ox jatsukunti
yu taxtaqniyan Dios. Chuncha kʼamakʼatʼik para jantu
katsʼanqal yu skʼiniyatʼik Dios.
\s Tamaqanlqajnan mas tamakay yu ox
\p
\v 8 Aniy tamaktaycha yu klajunau. Mintachunkʼan maqskʼiniy
chʼantaun kʼaʼuntʼik la mejatapastakʼatkʼan y ox kʼalamapʼaynitʼik.
Kalapʼaxkʼatʼik tacha tʼalaqaunin, lajqalʼoxin kʼaʼuntʼik
y kamalakʼatʼunikʼantʼik.
\v 9 Incha jantu ox tamakaniyan, ex jantu maqskʼiniy
kʼalakmaspʼiknichʼoʼotʼik yu jantu ox. Incha talaktuʼuyan
jantu maqskʼiniy kʼalaktʼuʼuchʼoʼotʼik, va kaskʼinitʼik
Dios yu lajʼoxi la ixjatsukuntikʼan. Ni Dios tajuntaʼin
uxiknan para kʼalaʼaʼitʼik yu lajʼoxi.
\v 10 La ixchivinti Dios najun:
\q Yu lhitsukuputun achati, yu najun kaʼalil yu lajʼoxi
la ixjatsukunti,
\q yucha maqskʼiniy kalhistaklhi ixkil para jantu kachivinil
yu jantu ox,
\q jantu maqskʼiniy kakiltaxtul yu jamakanunti.
\q
\v 11 Maqskʼiniy kamakauntijlal yu jantu ox y kamakal
yu lajʼoxi.
\q Tsʼanqay kapuxkaul tas lay laqalajʼox katalatʼataulal
kun yu alati.
\q
\v 12 Ni Jalhachimoʼonu ox jalaklhistakʼa yu jalaqtsʼin
tacha ox lapanakni.
\q Ox lajqasmakniy tejkan taskʼin tuʼuchun.
\q Pero jantu ox jalaqtsʼin yu talaktuʼunun.
\p
\v 13 ¿Taʼayucha katamakaniyan yu jantu lajʼoxi incha
vamun makʼapʼutʼunatʼik yu lajʼoxi?
\v 14 Pero incha tuʼuchun kʼalhitʼapʼasatʼik por makʼayatʼik
yu ox, ex kalaʼaʼiyapitik yu ox la metsukuntikʼan. Xlhiyucha
jantucha katʼalhaunitʼik matichun, jantu katʼalhanantʼik.
\v 15 Kʼatʼoʼoyatʼik ni Dios tacha miJalhachimoʼonukʼan
la melhanutkʼan. Listujcha kʼaʼuntʼik para lay kʼaʼalhtʼiyanantʼik
tejkan talhisakmiyan valiʼiycha pʼakxanʼiyatʼik ni Dios.
Pero kʼamalakʼatʼunikʼantʼik y katʼoʼoyanantʼik tejkan
alhtʼiyananatʼik.
\v 16 Kʼamakʼatʼik kuenta ni jantu kʼalhitsʼukʼutʼik
laqtaqal. Ex chuncha mas talaktuʼuyan y tamukʼaniyan
laqtaqal, katalaqtsʼinaʼ ni ox tʼiʼukxuyanantʼik kun
Cristo. Xlhiyucha va xʼamankʼan katalhitamaxaniyaʼ ixchivintikʼan.
\v 17 Incha Dios najun ni kʼamaʼanlʼajnantʼik, kaval
por makʼayatʼik yu ox, jantu por makʼayatʼik yu jantu
ox.
\p
\v 18 Vachu chun ni Cristo va aqtauncha maqanlqajnal
por kintalaqalhinkʼan, yu ox lapanaki nil por kijnan
yu jantu ox juntau para lay ox katsukuu kun Dios. Va
maqnikal la ixlakatunaj pero majkujuchoqokal la ixlhitsukunuʼ.
\v 19 Chuncha la ixlhitsukunuʼ laqkilaqputeʼenil taʼan
lakchʼikanta ixlhitsukunukʼan ni lapanakni yu ixtanitacha.
\v 20 Va yuʼuncha yu jantu ixtaqalasmaknan maqancha
tejkan Dios vananaj ixmaqanvil tejkan Noé ixtʼajun makanaʼ
ni ay barco. Va yucha tapulaqtaxtul vamun qayntsajin
lapanakni, va taxajchal tejkan jalaqmixnil kun xkan.
\v 21 Ni anchanuʼ xkan va tacha ni aqchajʼauti yu chavaycha
pulaqtaxtuyau. Yu aqchajʼauti jantu vamun ixchaʼaka
kilakatunajkʼan kaval. Va masuy ni jantucha kintamukʼaniyan
laqtaqal y chuncha skʼiniyau Dios. Kujchoqol ni Jesucristo,
va xlhiyucha laqtaxtuyau.
\v 22 Va pataxtuchoqol laktʼiyan y chavay vil la ixlhijakanaj
kimPay Dioskʼan. Ancha laklhichimoʼoy tachun ixmayulnin
Dios kun xalhachimoʼonun laktʼiyan y tachun yu talhitʼajun
tapʼasta.
\c 4
\s Ox kʼatʼapʼatsʼanitʼik Dios kun ixtapʼasta
\p
\v 1 Ni Cristo maqanlqajnal la ixlakatunaj por kijnan.
Ex xlhiyucha vachu va chuncha kaval mijatapastakʼatkʼan
tacha yucha. Qayntaun lapanaki yu maqanlqajnantacha
la ixlakatunaj jantucha maqtaqalhininputun.
\v 2 Chuncha jantucha kʼamakʼatʼik axtoqnuʼ tacha yu
tamakaputun yu valiʼiy lapanakni. Va kʼamakʼapʼutʼuntʼik
yu lhinajun Dios.
\v 3 Chavaycha tapasatacha ni julchan tejkan ixmakʼayatʼik
yu tamaqamay yu jantu talhakapuʼan. Ixmakʼayatʼik yu
ixmakʼapʼutʼunatʼik la milakatunajkʼan. Ayaj ixmaqtʼaʼalhinanatʼik,
ixtʼaʼapʼayatʼik. Ixpʼinatʼik kʼataninin taʼan va taxtuj
ixlayatʼik, ixtʼaqxtʼoʼatʼik taʼan la ox ixtʼaʼapʼayatʼik.
Ixtʼoʼoyayatʼik antivas yu jantu tsʼuniy ox kataval.
\v 4 Chavaycha jantucha laktʼaʼuxapʼinatʼik yu jantu
talhakapuʼan taʼan ayaj tamakay axtoqnuʼ yu jantu ox.
Xlhiyucha tus vak tamaqatsʼanqayan, va talaktuʼuyan.
\v 5 Pero yuʼuncha kataxtaqyaʼ kuentas kun Dios. Yucha
va listujcha para kalakmukʼanil ixlaqtaqalkʼan ni lapanakni,
mas yu takujta o mas yu tanitacha.
\v 6 Xlhiyucha ni ox chivinti vachu laqputeʼenikal lapanakni
yu chavay tanitacha. Yuʼuncha va ixlakmukʼanikanta laqtaqal
por yu ixtamakata la ixlakatunajkʼan. Pero va ixlaqputeʼenikantacha
ni ox chivinti para lay katakujchoqol la ixlhitsukunukʼan
tacha najun ni Dios.
\p
\v 7 Lakamintacha ni julchan tejkan tachun kamiʼoyaʼ.
Xlhiyucha ox kʼalakpʼastʼaknantʼik, va katsʼukʼutʼikcha
skʼinin Dios.
\v 8 Yu apalay maqskʼiniy va ox kʼalapʼaxkʼatʼik. Yu
japaxkanti pumalaqmixikan lhuvaj talaqalhin.
\v 9 Ox kʼalalaʼaʼitʼik la minchaqakʼan kun achati, jantu
katʼalʼauntʼik.
\v 10 Ni uxiknankʼan por qayntamin xtʼaqnikʼantʼik tapʼasta
para pulhuu lhitapatsa yu lay pʼutʼapʼatsʼaniyatʼik
ni Dios. Ex chuncha ox kʼalapʼuʼaqtʼayʼuchʼoʼotʼik.
\v 11 Chavay incha matichun xtaqnikanta para lay ox
kachivinil, ex yucha maqskʼiniy kalaqputeʼel yu najun
Dios. Incha matichun xtaqnikanta para lay ox kaʼaqtayjunul,
yucha maqskʼiniy kaʼaqtayjunul kun ixtapʼasta Dios.
Chuncha tachun yu makʼayatʼik va por yucha la ay kamakakal
ni Dios la metsukuntikʼan por chʼantaun untʼatʼik kun
Jesucristo. Vamun yuʼ paxtoqniy ay kamakakal, yucha lhitʼajun
tachun tapʼasta mas va tavanancha kaval, jantu aqtaun
katamaktayaʼ. Va chuncha kavalcha.
\s Tamaqanlqajnan yu chʼantaun tajunita kun Cristo
\p
\v 12 Uxiknan yu klapaxkayau, jantu vak kakʼatsʼantʼik
por yu maqanlqajnati yu lhitʼapʼasayatʼik, mas kaval
tacha jikmi. Va chuncha tapaxtoqniyan.
\v 13 Va kʼalhiʼachʼantʼaʼutʼik ni tʼamaʼanlʼajnanatʼik
ni Cristo. Ex chuncha kʼalhitsʼukʼuyapitik lhuu achati
tejkan kaminchoqoyaʼ y katasuyaʼ ixʼayaxtu.
\v 14 Tejkan talhilaktuʼuyan ni lapanakni por lhakʼapʼupʼinatʼik
ni Cristo va kʼalhiʼachʼantʼaʼutʼik. IxʼEspíritu ni
Dios kun chux ixʼayaxtu va alintacha kun uxiknan. [Yuʼuncha
talaktuʼuy Dios pero uxiknan la ay makʼayatʼik.]
\v 15 Incha majkʼatsʼayatʼik ex jantu kaval por kamaqninintʼik,
kaʼalhavanantʼik, kʼalaktʼuʼununtʼik, o kʼatʼapʼaknutʼik
taʼan jantu tapaxtoqniyan.
\v 16 Incha majkʼatsʼayatʼik por mispʼakʼanatʼik tacha
ixlapanakni Cristo, ex jantu kʼalhimaxanantʼik. Va ay
kʼamakʼatʼik ni Dios por mispʼakʼanatʼik tacha ixlapanakni
Cristo.
\v 17 Va chilcha ni julchan tejkan Dios kintamukʼaniyan
maqanlqajnati para kaqasmaknau. Ex incha chuncha kintaxtaqniyan
ni kijnan yu lhakapuʼanau, ¿tas kunacha para lapanakni
yu jantu taqalasmatʼa yu ox ixchivinti Dios?
\v 18 Ayaj lhitaʼay talaqtaxtuy mas ni lapanakni yu
ox tatoʼoyay Dios. ¿Ex tas katapasayacha yu jantu tatoʼoyay
ali yu tamaqtaqalhinin?
\v 19 Ex chuncha incha Dios najun ni kamajkʼatsau, ex
katamaqxtaqniu la ixtamakaʼ ni Dios yu kintamakan, yucha
lay kʼalhakʼapʼupʼinin. Maqskʼiniy kataylhaʼau makanan
yu lajʼoxi.
\c 5
\s Ni Pedro jalaqxaqalay yu xalajʼaynin
\p
\v 1 Klatapayniniyau uxiknankʼan yu xalajʼaynin untʼatʼik.
Kitʼin vachuʼ xaʼay kunita y vachu klaqtsʼil tacha maqanlqajnal
ni Cristo. Vachuʼ klaqtsʼil ixʼayaxtu yu katasuyaʼ.
Ni anchanu ayaxtu chʼantaun kajkatʼalaqaʼiyaʼ yu alati
yu talhakapuʼan.
\v 2 Qayntaun xalhistaknaʼ borregos ox laklhistakʼa
yu paxtoqniy. Vachu chun uxiknankʼan kʼalhistʼaktʼik
ixlapanakni Dios yu tapaxtoqniyan. Jantu kaval por mimaqltaskʼinitkʼan,
va por miʼachatkʼan, jantu por kʼalhaʼapʼutʼuntʼik tumin,
kʼatʼapʼatsʼatʼik kun tachun laqa achati.
\v 3 Jantu laqatapʼasta kʼalaqlhichʼimoʼotʼik. Ox kaval
mimputsukukʼan para lay katalaqtsʼiʼin yu alati.
\v 4 Ex tejkan kachinchoqoyaʼ yu xaʼay Jalhistaknaʼ,
kalaʼaʼiyapitik milhilhajatkʼan. Yucha tacha taun korona
yu ayaj ox yu jantu aqtaun miʼojoy.
\p
\v 5 Chavay vachu uxiknan yu tsʼalankaʼ untʼatʼik, kaʼalasmaktʼik
yu xalajʼaynin. Kamalakʼatʼunikʼantʼik siya uxiknan.
Va tsʼoqkanta:
\q Ni Dios jantu jalaqaʼiy yu ay takʼatsan.
\q Va ayaj jalakmapayniy yu jamalakatʼunikan.
\m
\v 6 Xlhiyucha kʼamalakʼatʼunikʼantʼik la ixtamakaʼ
ni Dios yu lhitʼajun tachun tapʼasta, ex la ay katamakayan
tejkan kachinaʼ xajulchan.
\v 7 Kʼamakʼauniʼotʼik ni Dios tachun yu tapastakʼuyan,
yucha va ox talhistakʼan.
\p
\v 8 Kʼalakpʼastʼaknantʼik y kʼalakpʼukʼujtʼikcha. Yu
mintʼalaxkayakʼan va yu aqmoqxnuʼ. Yucha tiʼukxuyal
tacha taun pukiltʼasajtsukunuʼ maqtaliʼ yu lakxkajuy
qayntaun yu lay kaʼuʼol.
\v 9 Jantu kaxtʼaqnitʼik lakatin para lay kalaqpuslhi.
Katʼayanitʼik kun milhakapuʼatkʼan. Kʼatsʼayatʼik ni
vachu va chun tatʼajun maqanlqajnan mintʼalaqauninkʼan
taʼakchun ni lakamunukpaʼ.
\v 10 Tejkan maʼanlʼajnanatʼik taun panchʼix ex ni Dios
katalaʼoxiyan. Kataxtaqniyan tapʼasta la milhakapuʼatkʼan
para lay ox katʼaylhipʼintʼik y ox kataʼulayan. Kun
yucha minchal tachun japaxkanti y yucha tajuntaʼitan
por Jesucristo para lay kalaʼaʼitʼik ixʼayaxtu yu jantu
aqtaun kamiʼoyaʼ.
\v 11 Va yucha ay kamakakal y kalhachimoʼonul mas va
tavanancha kaval, jantu aqtaun katamaktalcha. Va chuncha
kavalcha.
\s Ni Pedro Jamastakʼachoqoy
\p
\v 12 Silvano yu kilaqajkʼan, yucha vas ukxpuʼanta la
ixlhakapuʼati. Yucha tsʼoqlhi ni aniy kinchivinti. Klamalaqachaniyau
ni aniy chivinti para klaxtaqniu tapʼasta la milhakapuʼatkʼan.
Vachu para kʼakʼatsʼatʼik ni laqsaval kintamapayniyan
ni Dios. Chuncha ox katʼaylhipʼintʼik.
\v 13 Tamastakʼayan ixlapanakni ni Dios yu aniy tavilanal
laka putaulan yu tacha Babilonia junita. Vachu ni Marcos
yu tacha kintsʼal junita tamastakʼayan.
\v 14 Kʼalamastʼakʼatʼik kun xakiltastuknuti japaxkanti.
Oxamaktaun kʼaʼuntʼik tachun uxiknan yu ixlapanakni
Jesucristo untʼatʼik. Va chuncha kaval.