\id 1JN
\h 1 JUAN
\mt2 Yu Xapʼunaj Karta yu Tsʼoqlhi ni
\mt1 Juan
\c 1
\s Ni chivinti yu xtaʼa jatsukunti
\p
\v 1 Klatsʼoqniyau ni uxiknankʼan chivinti yu lhichiviniy
ni lapanaki yu ixtʼajuncha tejkan tachun puʼaqtaynil.
Ni yucha yu ijqasmaktau y yucha klaqtsʼiu la kilaqchulkʼan.
Laqsaval klaqtsʼiu y ikchʼapau kun kimakakʼan. Anchanu
lapanaki va yu chivinti yu xtaʼa jatsukunti.
\v 2 Ni jatsukunti tasul y kijnankʼan klaqtsʼiu y vachu
klaqputeʼeu. Chavaycha vachu klalaqputeʼeniyau ni aniy
jatsukunti yu jantu aqtaun kamiʼoyaʼ. Yucha yu ixtʼavilchal
ni Dios y kintatasunin.
\v 3 Laqsaval klalaqputeʼeniyau yu klaqtsʼiu y yu ijqasmakvi
para chʼantaun kʼaʼuntʼik ni uxiknan kun kijnan, chuncha
tacha kijnan chʼantaun kuntau kun kimPaykʼan Dios ali
Sasʼatʼa Jesucristo.
\v 4 Xlhiyucha klatsʼoqniyau para kaʼalinʼol miʼachatkʼan.
\s Ni Dios va tacha maklku
\p
\v 5 Ni aniy chivinti va yucha yu kintamasunin ni Jesucristo
y kijnankʼan klalaqputeʼeniyau ni uxiknan. Ni Dios va
tacha maklku y kun yucha jantu alin japutsʼisniʼ.
\v 6 Chavay incha naunau va chʼantaun juntau kun yucha
y vananaj tiʼukxuyanau valiʼiy laka putsʼisniʼ, ex va
jalaklkananau, jantu makayau yu laqsaval.
\v 7 Pero licha tiʼukxuyanaucha ni laka maklku chuncha
tacha yucha alinta la ixmaklku ex chʼantaun alintau
kun yucha. Ex yu Jesucristo yu Sasʼatʼa Dios kintaxakaniʼoyan
kintalaqalhinkʼan kun ixjakʼalna.
\p
\v 8 Incha naunau ni jantu kalhitsukuu talaqalhin ex
keʼemankʼan makanukanau, jantu laqsaval kaval yu naunau.
\v 9 Pero licha tapayniniyau ni Dios para kaxakamaʼal
kintalaqalhinkʼan, ex ni Dios lay lhakapuʼaniyau ni laqsaval
kamakayaʼ yu ox. Kintamalaqmixiniyan kintalaqalhinkʼan
y vachu kintaxakaniyan kilaqtaqalkʼan.
\v 10 Licha naunau ni jantu kalhitsukuu laqtaqal ex
naunau ni Dios jantu laqsaval yu najun y jantukaʼ laqaʼiyau
ixchivinti.
\c 2
\s Jesucristo kintaʼaqanixtuyan tejkan makayau laqtaqal
\p
\v 1 Kesʼatʼan untʼatʼik, klatsʼoqniyau ni aniy chivinti
para jantu kamaqtʼaʼalhinintʼik. Chavay incha matichun
makay laqtaqal ex lhitʼaunau qayntaun yu kintaʼaqanixtuyan
kun ixchivinti la ixlakaʼukxpuʼ kimPaykʼan Dios. Yucha
va Jesucristo yu jantu kalhitsukul laqtaqal.
\v 2 Yucha maqxtaqkal tacha lapaxkan para kintamalaqmixinin
kintalaqalhinkʼan y jantu vamun kintalaqalhinkʼan ni
kijnan. Vachu laqmalaqmixiniy ixtalaqalhinkʼan ni lapanakni
yu tatʼajun taʼakchun lakamunukpaʼ.
\p
\v 3 Licha makayau tacha lhinajun ni Dios, ex kʼatsayaucha
ni laqsaval mispayau.
\v 4 Licha matichun najun: “Kitʼin kmispay ni Dios”,
pero jantu makay tacha lhinajun, ex ni anchanu lapanaki
va jalaklkanan y jantu laqsaval kaval yu najun.
\v 5 Pero incha matichun makay tacha najun ixchivinti
Dios, ex yucha laqsaval achaniy ni Dios. Chuncha pukʼatsayaucha
ni chʼantaun juntau kun ni yucha.
\v 6 Taʼayu yu najun chʼantaun tajunita ni Dios maqskʼiniy
katijuntayal tacha ixtijuyal ni Cristo.
\s Ni sastʼi chivinti yu lhinajun Dios
\p
\v 7 Ketʼalaqaunin, klatsʼoqniyau ni kʼalapʼaxkʼatʼik.
Yu aniy chivinti yu lhinajun ni Dios yu klatsʼoqniyau
jantu va sastʼikaʼ kaval, vanaj va yuʼ yu laʼaʼitʼik
maqancha. Yu aniy maqaniyaʼ chivinti yu asmaktʼik jantu
katapaxal.
\v 8 Pero yu aniy xachivinti japaxkanti yu klatsʼoqniyau
va tacha sastʼi chivinti kaval. Yu japaxkanti tasuy
la ixjatsukunti ni Cristo y vachu tasuy la metsukuntikʼan
tejkan lapʼaxkʼayatʼik. Yu japutsʼisniʼ va tapasaʼantacha
y yu laqsaval maklku chavaycha tus tʼoql mapulkuta.
\p
\v 9 Incha matichun najun tijuyal la ixmaklku ni Dios
pero vananaj xkajiy ixtʼalaqajun ex yucha vananaj tijuyal
xajaputsʼisniʼ ni lakamunukpaʼ.
\v 10 Taʼayu yu paxkay ixtʼalaqajun yucha tijuyal la
ixmaklku ni Dios. Jantu lay makanukan para kamakal laqtaqal.
\v 11 Taʼayu yu xkajiy ixtʼalaqajun yucha tʼajun la
xajaputsʼisni ni lakamunukpaʼ, va ancha tijuyal. Jantu
kʼatsʼay toʼoxtaycha kachaanaʼ, va ox laʼachʼix makal
ni xajaputsʼisni ni lakamunukpaʼ.
\p
\v 12 Klatsʼoqniyau yu kesʼatʼan untʼatʼik ni Dios tamalaqmixinin
mintalaqalhinkʼan por Jesucristo.
\v 13 Klatsʼoqniyau ni uxiknan yu japayan untʼatʼik
ni mispʼatʼatʼik yu ixlhiʼalintacha tejkan alil ni lakamunukpaʼ.
Klatsʼoqniyau ni uxiknankʼan yu tsʼalan untʼatʼik ni
maʼalhaʼatʼatʼikcha ni aqmoqxnuʼ.
\p Klatsʼoqniyau yu kesʼatʼan untʼatʼik ni mispʼayatʼik
kimPay Dioskʼan.
\v 14 Klatsʼoqnitau ni uxiknankʼan yu japayan untʼatʼik
ni mispʼatʼatʼik yu ixlhiʼalintacha tejkan alil ni lakamunukpaʼ.
Klatsʼoqnitau ni uxiknankʼan yu tsʼalan untʼatʼik ni
laqpʼaysnin lapanakni untʼatʼik la milhakapuʼatkʼan.
Kun tachun la melhanutikʼan laʼaʼitʼatʼik ixchivinti
Dios. Vachu maʼalhaʼatʼatʼikcha ni aqmoqxnuʼ.
\p
\v 15 Jantu kaʼachʼanitʼik xajatapastakʼati aniy lakamunukpaʼ.
Chavay incha matichun achaniy xajatapastakʼati lakamunukpaʼ,
ex ni yucha jantu lay achaniy kimPay Dioskʼan.
\v 16 Tachun xajatapastakʼati lakamunukpaʼ, yucha jantu
minachal kun kimPay Dioskʼan. Incha kʼamakʼapʼutʼu y
jantu ox, incha ayaj kachʼapʼapʼutʼu tuʼuchun yu laqtsʼin,
incha va ay kakʼatsʼa por mimaqaliti, anchanu jatapastakʼati
si minachal va lakamunukpaʼ.
\v 17 Yu lakamunukpaʼ miʼoʼantacha ali tachun yu taʼachaniy
yu valiʼiy lapanakni. Chavay yu makay tacha lhinajun
Dios, yucha katsukuyaʼ mas va tavanancha.
\s Yu laqsaval ali yu jalaklkanti
\p
\v 18 Kesʼatʼan, chavaycha xapumiʼonucha lakamunukpaʼ
tʼaunau. Asmaktʼatʼik ni kaminaʼ qayntaun yu ixtʼalaxkayaʼ
ni Cristo. Chavaycha qaynlhuucha taʼostaulata ixtʼalaxkaynin
ni Cristo. Chuncha pukʼatsayau ni tʼaunau xapumiʼonucha
ni lakamunukpaʼ.
\v 19 Ixtajunita chʼantaun kun kijnan pero yuʼuncha
jantu laqsaval ixtalhakapuʼan. Incha va laqsaval ixtalhakapuʼal
kun kijnan ex yuʼuncha ixtataylhaanil, pero talhitaxtul
para chuncha kapumispakal ni jantu laqsaval chʼantaun
kataval kun kijnankʼan.
\p
\v 20 Pero uxiknankʼan taxtaqnin ni Espíritu Santo ni
Cristo para kamispʼatʼik tachun yu lajʼoxi.
\v 21 Jantu klatsʼoqniyau licha va jantukaʼ kamispʼatʼik
yu laqsaval. Va klatsʼoqniyau por mispʼayatʼikcha yu
laqsaval y uxiknankʼan kʼatsʼayatʼikcha ni jantu tuʼuchun
laklkanti minchal kun yu laqsaval.
\p
\v 22 ¿Ex taʼayucha yu jalaklkanaʼ? Va yu najun ni Jesús
jantu Cristo kaval yu malaqachal ni Dios. Va yucha yu
ixtʼalaxkayaʼ ni Cristo. Jantu laqaʼiy kimPay Dioskʼan
y vachuʼ jantu laqaʼiy Sasʼatʼa.
\v 23 Taʼayu yu jantu laqaʼiy Sasʼatʼa Dios, ex vachu
jantu laqaʼiy kimPay Dioskʼan, pero taʼayu yu laqaʼiy
Sasʼatʼa ex vachu laqaʼiy ni kimPay Dioskʼan.
\p
\v 24 Ex chuncha jantu kʼamakʼauntʼijlatʼik ni ox chivinti
yu asmaktʼik maqancha. Ni chivinti yu maqancha asmaktʼik,
incha maʼaʼalhiyatʼik la melhanutikʼan, ex katsʼukʼuʼalhiyapitik
chʼantaun kun kimPay Dioskʼan ali Sasʼatʼa.
\v 25 Ni Cristo kintajunin ni kintaxtaqniyan jatsukunti
yu jantu aqtaun kamiʼoyaʼ.
\p
\v 26 Klatsʼoqniyau ni aniy por yu lapanakni yu tamakanuputunan.
\v 27 Pero uxiknankʼan lhitʼaunatʼik ni Espíritu Santo
yu taxtaqnin ni Cristo. Ex jantu maqskʼiniyatʼik matichun
aqayntaun lapanaki katatsukun masuninin. Ni Espíritu
Santo tamasuniyan tachun yu lajʼoxi. Yu masuy va si
laqsaval, jantu jalaklkanti kaval. Katʼaylhipʼintʼik
chʼantaun kun Cristo tacha tamasunin.
\p
\v 28 Chavaycha, kesʼatʼan, klajunau ni katʼaylhipʼintʼik
chʼantaun kun Cristo. Ex chuncha tejkan katasuchoqoyaʼ
ni Cristo jantu katalhauniu y vachu jantu kamaxaniu
la ixlakaʼukxpu tejkan kaminchoqoyaʼ.
\v 29 Ni uxiknankʼan kʼatsʼayatʼikcha ni Cristo yucha
jantu kalhitsukul laqtaqal. Ex vachuʼ kakʼatsʼatʼik
ni tachun lapanakni yu tamakay yu lajʼoxi, yuʼuncha va
sasʼatʼan Dios.
\c 3
\s Sasʼatʼan Dios juntau
\p
\v 1 Ayaj kintapaxkayan ni kimPay Dioskʼan tus kintalhimapaqaʼuyan
sasʼatʼan. Laqsaval sasʼatʼan juntau. Yu tatijuyanal
lakamunukpaʼ jantu tamispay ni Dios, xlhiyucha jantu
kintamispayan.
\v 2 Uxiknan yu klaʼachaniyau, chavaycha juntaucha yu
sasʼatʼan ni Dios mas jantukaʼ kʼatsayau tas kajunaucha
astan. Pero kʼatsayau ni tejkan yucha kaminchoqoyaʼ
ex kalaqtsʼinau tacha tasuy ni yucha. Xlhiyucha tacha
yucha kajunau.
\v 3 Taʼayu yu pakxanʼiy kaminchoqol ni Cristo yucha
makauntijlay laqtaqal vachu va tacha ni Cristo yu jantu
kalhitsukul laqtaqal.
\p
\v 4 Taʼayu yu makay laqtaqal yucha jantu qasmatʼa tacha
najun ixlhachimoʼon ni Dios. Yu laqtaqal jantu paxtoqniy
kun ixlhachimoʼon ni Dios.
\v 5 Kʼatsʼayatʼikcha ni Jesucristo kilachil para kamaqosuʼol
tachun kintalaqalhinkʼan. Yucha jantu tuʼuchun talaqalhin
kalhitsukul.
\v 6 Taʼayuʼ yu ox chʼantaun taylhaaniy kun yucha jantu
makay laqtaqal. Taʼayuʼ yu tijuyal makanaʼ laqtaqal,
yucha jantukaʼ mispay ni Jesucristo y jantukaʼ lhakapuʼan.
\v 7 Kesʼatʼan, jantu kʼamakʼanukʼantʼik. Taʼayu yu tijuyal
makanaʼ yu lajʼoxi, yucha jantu lhitsukuy laqtaqal, vachu
chun junita tacha Cristo.
\v 8 Taʼayuʼ yu tijuyal makanaʼ laqtaqal, yucha va ixnavin
ni aqmoqxnuʼ. Yu aqmoqxnuʼ, yucha pʼunaj aqtaynil makanaʼ
laqtaqal mas tejkan puʼaqtaynil ni lakamunukpaʼ tus
chavaycha. Xlhiyucha kilachil ni Sasʼatʼa Dios aniy
lakamunukpaʼ para kalaktʼilhiniʼol ixtapʼasta ni aqmoqxnuʼ.
\p
\v 9 Taʼayuʼ yu lhitsukuy sastʼi jatsukunti kun Dios
yucha jantu tijuntayay makanaʼ laqtaqal. Va lhitʼajun
jatsukunti yu Dios xtaqnil, ex jantu lay taylhaʼan makanaʼ
laqtaqal por va sasʼatʼa Dios junita.
\v 10 La ox mispakan taʼayuʼuncha sasʼatʼan ni Dios,
vachu mispakan taʼayuʼuncha sasʼatʼan ni aqmoqxnuʼ.
Yu makay yu jantu ox, yu jantu paxkay ixtʼalaqajun, yucha
jantu sasʼatʼa Dios kaval.
\s Maqskʼiniy kalapaxkau aqstanchunin
\p
\v 11 Yu aniy chivinti vanaj va yucha yu maqancha pʼunaj
asmaktʼik, va lhinajun kalapaxkau.
\v 12 Jantu kʼaʼuntʼik tacha ni Caín yu ixnavin ixjunita
ni aqmoqxnuʼ, yu maqnil ixtʼalaqajun. ¿Tisuncha ixlhiʼatal
maqnil? Va por yu Caín ixmakay yu jantu lajʼoxi, chavay
yu ixlaqaj va ixmakay yu lajʼoxi.
\p
\v 13 Ketʼalaqaunin, incha taxkayyan ni lapanakni yu
jantu talhakapuʼan Dios, jantu katapastakʼun.
\v 14 Ni kijnankʼan tapasataucha laka lhinin y chavay
tiʼukxuyanau laka jatsukunti. Chuncha kʼatsayau por
lapaxkayau ketʼalaqauninkʼan. Taʼayuʼ yu jantu paxkay
ixtʼalaqajun yucha vananaj tiʼukxuyal laka lhinin.
\v 15 Tachun lapanakni yu taxkajiy ixtʼalaqajunkʼan
va talhixajyachal tacha jamaqninin. Uxiknankʼan ox kʼatsʼayatʼik
yu jamaqniniʼ jantu kalhitsukul jatsukunti yu jantu
aqtaun kamiʼoyaʼ.
\v 16 Yu Jesucristo lhimaqxtaqlhi ixjatsukunti por kijnan.
Va por yucha pumalaqasiyau tisuncha yu japaxkanti. Chavay
yu kijnan vachu maqskʼiniy kamaqxtaqvi ketsukuntikʼan
por ketʼalaqauninkʼan.
\v 17 Licha qayntaun lapanaki lhitʼajunʼojoy tachun
yu kaputapatsal la ixjatsukunti y laqtsʼin qayntaun
ixlaqaj yu tsʼanqaniy tuʼuchun pero jantu mapayniy, ¿ex
tas ancha alinta ixjapaxkanti ni Dios kun yucha?
\v 18 Kesʼatʼan untʼatʼik, jantu kʼalapʼaxkʼatʼik vamun
kun minchivintikʼan, va laqsaval kalaʼaqtʼayʼutʼik.
\s Tacha pukʼatsayau va ixnavin Dios juntau
\p
\v 19 Licha chuncha makayau ex chuncha pukʼatsayau ni
tʼaunau makanan yu laqsaval maqskʼiniy. Ex chuncha jantu
talhananau la ixlakaʼukxpu ni Dios,
\v 20 Incha la kelhanutikʼan keʼemankʼan mukʼanikanau
kilaqtaqalkʼan, ni Dios apalay ay ixjamapayninti y tachun
mispaʼojoy.
\v 21 Ketʼalaqaunin, incha la kelhanutikʼan jantu ukskʼatsayau
ni alin talaqalhin, ex jantu talhauniyau ni Dios.
\v 22 Yucha kintaxtaqniyan tachun yu kaskʼiniyau por
makaniyau yu kintalhijunan la ixlhachimoʼon y tachun
yu lhipaʼiniy, yucha makayau.
\v 23 Va kintalhijunan ni maqskʼiniy kalhakapuʼau isTsʼal
yu junkan Jesucristo y vachu kalapaxkau aqstanchunin
chuncha tacha kintalhijunan ni yucha.
\v 24 Ni lapanakni yu tamakay yu lhinajun Dios, yuʼuncha
tatʼajun chʼantaun kun yucha. Dios vachu vil kun yuʼuncha.
Ex chuncha pukʼatsayau ni laqsaval vil kun kijnankʼan
va por ixʼEspíritu Santo yu kintaxtaqnin.
\c 4
\s IxʼEspíritu Dios ali yu espíritu yu xkajiy ni Cristo
\p
\v 1 Ketʼalaqaunin, yu klaʼachaniyau, jantu kʼalhakʼapʼupʼintʼik
tachun yu tanajun talhitʼajun ixʼEspíritu ni Dios. Pʼunaj
kalaqtsʼinʼelatʼik para kʼamispʼatʼik licha laqsaval
mintachal kun Dios. Ni lakamunukpaʼ ayaj alin jamakanunun.
\v 2 Tachun yu talhakapuʼan ni kilhitsukuchil Cristo
la ixlakatunaj tacha kijnan, yuʼuncha talhitʼajun ixʼEspíritu
ni Dios. Va chuncha lay pʼumispʼatʼik taʼayu lhitʼajun
ixʼEspíritu ni Dios.
\v 3 Yu jantu talhakapuʼan ni chuncha kijunchil, yuʼuncha
jantu ixnavin Dios kataval. Va talhitʼajun ni espíritu
yu xkajiy ni Cristo. Ni uxiknan asmaktʼik ni kaminaʼ
ni anchanu espíritu y chavay aniycha vil lakamunukpaʼ.
\p
\v 4 Kesʼatʼan, yu ixlapanakni Dios untʼatʼik, uxiknan
maʼalhaʼaʼotʼatʼikcha tachun yu jamakanunun. Yu vil
kun uxiknan yucha apalay lhuu tapʼasta lhitʼajun xajantu
yu vil kun xalapanakni lakamunukpaʼ.
\v 5 Yu jamakanunun va xanavin ni lakamunukpaʼ. Xlhiyucha
talhichiviniy yu jantu ox jatapastakʼati y yu jantu
talhakapuʼan Dios va tamakay kuenta.
\v 6 Pero kijnankʼan va ixnavin Dios juntau y taʼayuʼun
yu tamispay Dios kintaqalasmakyan. Pero yu jantu tamispay
Dios jantu kintaqalasmakyan. Xlhiyucha mispayau tasʼayucha
espíritu yu masuy yu laqsaval y tasʼayucha yu jalaklkanan.
\s Ixjapaxkanti ni Dios
\p
\v 7 Ketʼalaqaunin yu klaʼachaniyau, maqskʼiniy kalapaxkau.
Yu japaxkanti mintachal kun Dios. Taʼayu yu japaxkanan,
yucha va sasʼatʼa Dios junita y yucha mispay ni Dios.
\v 8 Yu jantu japaxkanan yucha jantu mispay ni Dios,
ni Dios va ayaj japaxkanan.
\v 9 Ni Dios kintamasunin ixjapaxkanti tejkan malaqachal
vamun yuʼ isTsʼal aniy lakamunukpaʼ para kaputsukuu
ni yucha.
\v 10 Va inchineʼ junita yu ox japaxkanti. Kijnan jantu
pʼunaj kaʼachaniu ni Dios, va yucha pʼunaj kintapaxkan.
Va malaqachal isTsʼal para kamaqxtaqlhi tacha taun jamoqslanti.
Ex va malaqmixiʼokal kintalaqalhinkʼan.
\v 11 Ketʼalaqaunin yu klaʼachaniyau, ni Dios va ayaj
kintapaxkan, xlhiyucha maqskʼiniy kalapaxkau.
\v 12 Ni Dios jantu aqtaun matichun kalaqtsʼil, pero
incha lapaxkayau ex ni Dios alinta kun kijnankʼan. Chuncha
ixjapaxkanti lay tasuy la kimputsukukʼan.
\v 13 Ni Dios kintaxtaqnitan ixʼEspíritu, xlhiyucha pukʼatsayau
ni tʼaunau kun Dios y yucha vachu tʼajun kun kijnan.
\v 14 Chuncha yu kijnankʼan klaqtsʼiu ni Jesús. Klaqputeʼeyau
ni kimPay Dioskʼan va malaqachal Sasʼatʼa para kamil
malaqtaxtun ni lapanakni yu tavilanal ni aniy lakamunukpaʼ.
\v 15 Taʼayu yu lhakapuʼan ni Jesús va Sasʼatʼa Dios
junita, ex ni Dios tʼajun kun yucha y yucha vachu tʼajun
kun Dios.
\v 16 Ex chuncha kijnankʼan kʼatsayau y lhakapuʼanau
ni Dios kintapaxkayan. Ni Dios ayaj japaxkanan. Taʼayu
yu japaxkanan, yucha tʼajun kun Dios y ni Dios tʼajun
kun yucha.
\v 17 Ixjapaxkanti Dios tasuy la kimputsukukʼan. Xlhiyucha
jantu maqskʼiniy katalhanau ni anchanuʼ julchan tejkan
ni Dios kamukʼayaʼ maqanlqajnati. Tacha ixtiʼukxuntayay
ni Jesucristo va chuncha tʼaunau kijnan ni aniy lakamunukpaʼ.
\v 18 Taʼan alin japaxkanti jantu alin talhanti, yu ox
japaxkanti tinaqxtuy yu talhanti. Yu talhanan pastakʼa
ixmaqanlqajnati. Taʼayu yu talhauniy ni maqanlqajnati
yu xtaʼa ni Dios, yucha jantu kalhitsukul yu ox japaxkanti.
\p
\v 19 Ni Dios pʼunaj kintapaxkan xlhiyucha kijnankʼan
japaxkananau.
\v 20 Taʼayu yu najun: “Kitʼin kʼachaniy Dios”, pero
xkajiy ixlaqaj, ex ni yucha va jalaklkanan. Incha jantu
paxkay ixlaqaj yu laqtsʼin ex jantu lay achaniy ni Dios
yu jantu laqtsʼinkan.
\v 21 Ni Jesucristo kintaxtaqnin ni aniy lhachimoʼon:
taʼayu yu toʼoyay ni Dios, yucha vachuʼ maqskʼiniy kapaxkal
ixtʼalaqajun.
\c 5
\s Yu pumaqalhajayau xajatapastakʼati ni lakamunukpaʼ
\p
\v 1 Yu talhakapuʼan ni Jesús va yu Cristo yu malaqachal
ni Dios, yuʼuncha va sasʼatʼan Dios. Incha achaniyau
yu kimPay Dioskʼan ex vachu maqskʼiniy kapaxkaniu sasʼatʼan.
\v 2 Licha achaniyau ni Dios y makayau yu tacha lhinajun
ni yucha, ex chuncha kʼatsayau ni laqsaval paxkayau yu
sasʼatʼan Dios.
\v 3 Incha achaniyau ni Dios ex makaniyau yu tacha lhinajun
ixlhachimoʼon. Jantu lhitaʼay kaval kamakau ixlhachimoʼon.
\v 4 Tachun yu tajunita sasʼatʼan ni Dios, yuʼuncha tamaqalhajay
ni xajatapastakʼati ni lakamunukpaʼ. Va por kilhakapuʼatikʼan
maqalhajayau xajatapastakʼati ni lakamunukpaʼ.
\v 5 Taʼayu yu lhakapuʼan ni Jesús va Sasʼatʼa Dios
junita, yucha lay maqalhajay xajatapastakʼati ni lakamunukpaʼ.
\s Yu kintamasuniyan ni Jesucristo va Sasʼatʼa Dios
\p
\v 6 Tejkan kilachil ni Cristo ni aniy lakamunukpaʼ
va aqchajʼaul y tejkan maqnikal va taxtul ixjakʼalna.
Chuncha yu xkan kun ni jakʼalna kintamasuniyan ni Jesucristo
va laqsaval Sasʼatʼa Dios junita. IxʼEspíritu Dios najun
yu laqsaval y yucha kintamasuniyan ni laqsaval kilachil
Sasʼatʼa Dios ni aniy lakamunukpaʼ.
\v 7 Laktʼiyan alin putʼutu yu chuncha kintamasuniyan.
[Va yu kimPay Dioskʼan ali yu Sasʼatʼa Dios ali yu ixʼEspíritu
Dios. Por ixlaʼatʼutukʼan va putaun junita.
\v 8 Vachuʼ lakamunukpaʼ putʼutu alin yu chuncha kintamasuniyan.]
Va yu ixʼEspíritu ni Dios ali yu xkan ali yu jakʼalna.
Por putʼutu va chʼantaun jun.
\v 9 Lhakapuʼanau qayntaun lapanaki tejkan kintalaqputeʼeniyan.
Pero yu kintamasuniyan ni Dios yucha apalay lhitʼajun
tapʼasta, y ni Dios va kintalaqputeʼeniyan ni Jesús va
Sasʼatʼa.
\v 10 Taʼayu yu lhakapuʼan ni Sasʼatʼa Dios, yucha laqaʼiy
la ixjalhanuti yu laqputeʼey ni Dios. Taʼayu yu jantu
lhakapuʼan ni Dios, yucha juniy ni Dios va jalaklkanan,
va jantu lhakapuʼan yu lhichivinil ni Dios yu Sasʼatʼa.
\v 11 Ni Dios kintalaqputeʼenin ni kintaxtaqnitan jatsukunti
yu jantu aqtaun kamiʼoyaʼ. Yu aniy jatsukunti minachal
kun Sasʼatʼa.
\v 12 Taʼayu yu tʼaʼan Sasʼatʼa Dios, yucha lhitʼajun
yu jatsukunti yu jantu aqtaun kamiʼoyaʼ. Pero yu jantu
tʼaʼan yu Sasʼatʼa, yucha jantu kalhitsukul anchanuʼ
jatsukunti.
\s Yu alati chivinti yu laqlhixaqalachoqoy ni Juan
\p
\v 13 Chuncha klatsʼoqniyau ni uxiknankʼan yu lhakapupʼinatʼik
Sasʼatʼa Dios para kakʼatsʼatʼik ni lhitʼaunatʼik jatsukunti
yu jantu aqtaun kamiʼoyaʼ.
\p
\v 14 Jantu talhauniyau Dios, va kʼatsayau ni kintaqalasmakyan
tejkan skʼiniyau yu lhipaʼiniy.
\v 15 Ex licha kʼatsayau ni laqsaval kintaqalasmakyan
tejkan skʼinau, ex chuncha pukʼatsayau ni lhitʼaunaucha
yu skʼiniyau.
\p
\v 16 Incha matichun laqtsʼin ixlaqaj ni tʼajun makan
talaqalhin yu jantu jalhaʼanan laka lhinin, ex maqskʼiniy
kaskʼinil Dios por ixlaqaj. Dios kamaqxtaqniyaʼ ixlaqaj
yu ox jatsukunti. Va klhichiviniy yu laqtaqal yu jantu
jalhaʼanan laka lhinin. Alin laqtaqal yu jalhaʼanan
laka lhinin. Jantu maqskʼiniy kaskʼinkal Dios por ni
lapanaki yu makay ni anchanu laqtaqal.
\v 17 Tachun yu jantu lajʼoxi tamakay ni lapanakni va
laqtaqal. Pero alin laqtaqal yu jantu jalhaʼanan laka
lhinin.
\p
\v 18 Kʼatsayau yu laqsaval sasʼatʼa Dios junita, ni
yucha jantu taylhaʼan makanaʼ laqtaqal. Ni Cristo yu
Sasʼatʼa Dios, yucha lhistakʼa y yu aqmoqxnu jantu tuʼuchun
lay makaniy.
\p
\v 19 Kʼatsayau ni sasʼatʼan Dios juntau. Yu jantu talhakapuʼan
Dios, yuʼuncha tatijuyanal la ixlhachimoʼon ni aqmoqxnuʼ.
\p
\v 20 Vachu kʼatsayau ni Cristo yu Sasʼatʼa Dios va
kilatachil y kintaxtaqnin jatapastakʼati. Chuncha lay
kamispau ni yucha yu laqsaval Dios. Vilanau chʼantaun
kun Jesucristo yu Sasʼatʼa Dios, yu masuy yu laqsaval.
Yucha va yu laqsaval Dios yu kintaxtaqnin jatsukunti
yu jantu aqtaun kamiʼoyaʼ.
\v 21 Kesʼatʼan, jantu katʼoʼoyatʼik yu axtoqnuʼ tacha
Dios kaval. Va chuncha kaval.