\id 2JN
\h 2 JUAN
\mt2 Yu Xaʼaqxtʼiyunuʼ Karta yu Tsʼoqlhi ni
\mt1 Juan
\c 1
\s Ni Juan jamastakʼay
\p
\v 1 Kitʼin va yu xaʼay kunita siya yu talhakapuʼan.
Va iktsʼoqniyan aqxtaun karta ni uxintʼi yu xanati yu
laksaktan ni Dios, kun tachun mesʼatʼan. Va laqsaval
klapaxkayau pero jantu vamun ni kitʼin. Tachun yu tamispatacha
yu laqsaval vachu tapaxkayan.
\v 2 Ayaj klapaxkayau ni uxiknankʼan, va lhitʼaunau la
kelhanutikʼan yu laqsaval. Yucha kaʼalinaʼ kun kijnankʼan
mas va tavanancha kaval.
\p
\v 3 Ni kimPaykʼan Dios y vachu yu Sasʼatʼa kiJalhachimoʼonukʼan
Jesucristo va kataxtaqniyan yu lajʼoxi y katamapayniyan
y vachu oxamaktaun katamakayan. Ex chuncha lay katʼaylhipʼintʼik
kun yu laqsaval y lay kʼalapʼaxkʼatʼik.
\s Ni Dios lhinajun kalapaxkau
\p
\v 4 Chavay klhiʼachantajuy ni klaqpaxtoqlhi lati mesʼatʼan
yu tataylhaʼan kun yu laqsaval vachu chun tacha kintalhijunin
ni kimPay Dioskʼan.
\v 5 Chavay, kintʼalapanaki yu ayaj iktoʼoyayan, iktapayniniyan
ni kalapaxkau. Ni aniy lhachimoʼon yu klatsʼoqniyau
jantu saystʼi kaval, vanaj va yuʼ yu laqaʼiu pʼunaj tejkan
puʼaqtaynil lhakapuʼanau.
\v 6 Yu laqsaval japaxkanti alin tejkan tsukuyau makanan
ixlhachimoʼon ni Dios. Ixlhachimoʼon ni Dios va yucha
yu asmaktʼik tejkan puʼaqtʼaynitʼik milhakapuʼatikʼan,
va katʼiʼuntʼayatʼik japaxkanan.
\s Yu jamakanunun
\p
\v 7 Chavay ayaj lhuu jamakanunun tatijuyanal ni lakamunukpaʼ.
Yuʼuncha tanajun ni Jesucristo jantu kamil tacha qayntaun
lapanaki. Yu chuncha najun, yucha va jamakanunuʼ y vachuʼ
va xkajiy ni Cristo.
\v 8 Ox kʼalhistʼajkʼantʼik para kʼalaʼaʼitʼik milhilhajatikʼan
yu tapaxtoqniyan. Jantu kʼamaʼatsʼanʼatʼik milhilhajatikʼan
yu kaʼalinaʼ por milhitapatsakʼan.
\p
\v 9 Taʼayuʼ yu tumpaj makaputun y jantu taylhaʼan yu
tacha masul ni Cristo, ex ni yucha jantu katʼatijuntayal
ni Dios. Pero taʼayu yu makay yu tacha masul ni Cristo
ex ni yucha tʼatijuyal kun kimPay Dioskʼan, y vachu kun
Cristo yu Sasʼatʼa.
\v 10 Incha matichun talaqʼanchaʼan y jantu tamasuniyan
tacha lhinajun Cristo, ex jantu kʼalaʼaʼitʼik la minchaqakʼan
y jantu kʼamastʼakʼatʼik.
\v 11 Yu laqaʼiy, ex va tacha chʼantauncha tʼajun kun
yucha.
\s Ni Juan jamastakʼachoqoy
\p
\v 12 Ayaj lhuu chivinti klhitʼajun yu klajunputunau,
pero jantu klatsʼoqniputunau kun jalhiki. Va klalaqʼuxanachaʼau
para kaklatʼachiviniu kun laka ukxpuʼ. Ex chuncha kataqayntsal
kiʼachatkʼan.
\p
\v 13 Vachu tamalaqachaniyan taun jamastakʼanti yu sasʼatʼan
mintʼalapanakni yu jalaksakta ni Dios. Chuncha kaval.