\id JUD
\h JUDAS
\mt2 Ni Karta yu Tsʼoqlhi ni
\mt1 Judas
\c 1
\s Ni Judas jalaqtsʼoqniy ni lapanakni yu Dios jalaksaklhi
\p
\v 1 Kitʼin kJudas va ixʼoqxtamati Jesucristo kunita
vachu ixlaqaj Santiago kunita. Klatsʼoqniyau uxiknan
yu tajuntaʼitan y tapaxkayan kimPaykʼan Dios. Talhistaktan
ni Jesucristo.
\v 2 Dios ayaj katamapaynin, oxamaktaun katamakan, y ayaj
katapaxkan.
\s Yu tamasuy jalaklkanti
\r (2 Pedro 2:1-17)
\p
\v 3 Ketʼalaqaunin yu klapaxkayau pʼunaj ayaj xaklalhitsʼoqniputunau
tacha pulaqtaxtuyau kintachunkʼan. Pero chavay maqskʼiniy
kaklatsʼoqniu y kaklatapayniniu ni jantu kaxtʼaqnitʼik
lakatin matichun katalaktanchanin milhakapuʼatkʼan.
Ni Dios va aqtauncha kintaxtaqnin ni anchanu chivinti
ni kijnan yu ixlapanakni juntau.
\v 4 Lati yu tamakanunun tatanul kun uxiknan, mas jantu
laklhilayatʼik incha va makanunun. La maqancha va tsʼoqkal
ni katalaqaʼiyaʼ maqanlqajnati. Va jalaktuʼunun, va tanajun
por kintamapayniyan ni Dios lay kamakʼatʼi talaqalhin
yu kʼamakʼapʼutʼu. Jantu talhakapuʼan ni Jesucristo,
vamun yuʼ kiʼUkxtinkʼan y kiJalhachimoʼonukʼan.
\p
\v 5 Chuncha mas kʼatsʼayatʼikcha ni uxiknan, pero kitʼin
klamapastakʼanichoqoyau inchineʼ. Ni Jalhachimoʼonu
Dios jalaqmalaqtaxtul ixlapanakni xalakatʼun Egipto
pero astan jalaqmaqnil yu jantu kataqalasmaklhi.
\v 6 Vachuʼ yu ixmayulnin Dios ixtavilanal kun Dios,
pero lati jantu katamakal tacha ixlaklhiʼulakanta, va
tamakaul. Chuncha ni Dios va lakmaʼata laka pachʼin
taʼan putsʼista mas va tavanancha. Ancha katataulaʼ
tus kaminaʼ ni julchan tejkan kalakmukʼanikanaʼ ixmaqanlqajnatkʼan.
\v 7 Vachu va chun tamakal xalapanakni ni Sodoma ali
Gomorra y kun yu alati ukstsʼuniy putaulanaxna. Yuʼuncha
vamun ayaj ixtamaqamay katalatʼatamal mas va taʼayuchacha,
mas yu jantu tsʼuniy paxtoqniy kʼamakʼatʼi. Yuʼuncha
tamaqanlqajnan laka jikmi yu jantu miʼojoy. Chuncha
val para jantucha kalaqtsʼiʼiu kijnankʼan tacha yuʼuncha
talal.
\p
\v 8 Vachu chun talay ni lapanakni yu taʼaqlaqavanan
y tamakanunun. Talaqalhiy ixlakatunajkʼan. Jantu tatoʼoyay
yu talhitʼajun lhachimoʼon, talaktuʼuy yu talhitʼajun
tapʼasta.
\v 9 Pero mas va yu xaʼukxtin ixmayulnin Dios, yu Miguel
junkan, jantu laktuʼuy yu lhitʼajun tapʼasta. Aqtauncha
talachʼapal laka chivinti kun yu xaʼukxtin aqmoqxnuʼ.
Va ixtalakiltsʼakʼastukʼa taʼayucha kalhaʼal ixlakatunaj
ni Moisés. Pero yu Miguel jantu kalaktuʼul ni aqmoqxnuʼ
la ixtapʼasta. Va naul: “Ni Jalhachimoʼonu Dios kalaqʼayman.”
\v 10 Pero ni aniy lapanakni talaktuʼuy tachun yu jantu
tamispay. Talakpastaknan tacha talhitsukuti, va chuncha
talay. Chuncha va xʼamankʼan lakmukʼanichoqokan maqanlqajnati.
\p
\v 11 ¡Payniʼincha yuʼuncha! Va tataylhaʼanta ixjatapastakʼati
ni Caín. Tamakay laqtaqal tacha yu makal Balaam por
talhajaputun tumin. Kataniyaʼ tacha Kore por talaktanchay
ni Dios.
\v 12 Taʼan makʼayatʼik lakvayti por lapʼaxkʼayatʼik,
ancha tatanuy jantu kun tsʼuniy talhanti y chuncha lhimaxan
xajachal. Va tacha xajalhistaknan borregos yu xʼamankʼan
jalhistakkan. Va tacha taputsʼi yu jantu lhaʼan xkan
yu sunlhaʼan un. Va tacha jakʼivin yu jantu taxtaʼa
xalhiʼuti tejkan ixpuʼalin, va tichʼukʼikal, tus tacha
aqtʼuycha katanil.
\v 13 Yuʼuncha va taʼayajnan tacha taʼan pʼays ukxlaklay
xaxkan ni lakamar. Ni xalhimaxan yu tamakay va tacha
ixʼoqxpuputi. Va tacha jastʼakun yu tamaqantsʼanqay
ixtinkʼan, yu tapaxtoqniy katataulal taʼan ox tʼalaj
putsʼista.
\p
\v 14 Qayntaun yu xatampatujunuʼ xapapanakni ni Adán
va Enoc ixjunkan. Yucha naul: “Ni Jalhachimoʼonu Dios
mintacha kun lhuvaj miles ixmayulnin.
\v 15 Kalakmukʼaniyaʼ ixlaqtaqalkʼan tachun ni lapanakni.
Kalakmukʼaniyaʼ ixlaqtaqalkʼan yu tamaqtaqalhinin, yu
tamakay kun ixjalaktuʼuntikʼan. Vachu kalakmukʼaniyaʼ
ixlaqtaqalkʼan por yu tanajun tejkan taʼakchʼintamay
ni Dios.”
\v 16 Ni anchanu lapanakni va si tachivintanuy y takiltayanan,
vamun talakanajun katamakal yu yuʼuncha tanajun katamakal.
La ixkilkʼan va ayaj lajʼay lakmakakan, qalʼox tachiviniy
vamun para kalaqxtaqnikal yu talhitsukuputun.
\s Jalaqxaqalay yu talhakapuʼan Dios
\p
\v 17 Pero uxiknankʼan, yu klapaxkayau, kapʼastʼaktʼikcha
yu tanaul ni lapanakni yu jamalaqachal kiJalhachimoʼonukʼan
Jesucristo.
\v 18 Yuʼuncha tanaul ni tejkan xaputamaktanacha kunaʼ
ex kaʼalinaʼ lapanakni yu jalaktuʼuy alati y vachuʼ
yu vamun tatsukuy makanan talaqalhin yu tamakaputun.
\v 19 Talaktʼilhiy ni lapanakni, tamakay yu tamakaputun
la ixlakatunajkʼan. Jantu katalhitsukul ni Espíritu
Santo.
\p
\v 20 Pero yu uxiknan, yu klapaxkayau, chʼantaun ox katʼaylhipʼintʼik
la milhakapuʼatkʼan yu minchal kun Dios. Kʼatʼapʼayninitʼik
Dios kun ixtapʼasta ni Espíritu Santo.
\v 21 Kʼalhistʼakkʼantʼikcha para jantu kʼamakʼauntʼijlatʼik
ixjapaxkanti ni Dios. Kapʼakxanʼitʼik ixjamapayninti
kiJalhachimoʼonukʼan Jesucristo yu kataxtaqniyan para
katsʼukʼutʼik mas va tavanancha.
\v 22 Kʼaxaʼalatʼik ni lapanakni yu jantukaʼ ox talhakapuʼan.
\v 23 Kʼamalaqtʼaxtʼutʼik alati, va tacha kʼalakmaʼosutʼik
laka jikmi. Vachu yu alati lapanakni kʼalakmapʼaynitʼik
pero katʼalhaunitʼik lakatsʼuniy yu tacha junita ixputsukukʼan.
Kʼalakmapʼaynitʼik pero kʼaxkʼaytʼik yu tamakay, mas
va ixlaqchʼitkʼan yu chuncha lakatsamantacha ixtalaqalhinkʼan.
\s Ni Judas ay makay ni Dios
\p
\v 24 Ay kamakakal ni Dios yu lay talhistakʼan para
jantu kamakʼauntʼijlatʼik. Lay kataʼulayan kun lhuu
achati, kun jantu tuʼuchun laqtaqal, taʼan vil ni yucha
kun tachun ixʼayaxtu.
\v 25 Vamun yuʼ ni Dios junita, va kiJamalaqtaxtunukʼan
por yu makal Jesucristo kiJalhachimoʼonukʼan. Vamun
yucha paxtoqniy tachun yu lajʼoxi, tachun yu lajʼay, tachun
yu tapʼasta, y tachun ni lhachimoʼon, mas va maqancha,
mas va chavaycha y mas va tavanancha. Chuncha kaval.