\id REV
\h APOCALIPSIS
\mt2 Yu Masunikal ni Juan yu Katapasayaʼ
\c 1
\s Yu Jesucristo masunil ni Juan
\p
\v 1 Ni aniy chivinti ni Dios masunil ni Jesucristo
para kalakmasunichoqol ixlapanakni yu tatapatsaniy.
Aniy masuy yu nimancha katapasayaʼ. Ex ni Jesucristo
kimalaqachanil ixmayul ni kitʼin Juan, yu ixʼoqxtamati
kunita.
\v 2 Kitʼin iktsʼoqʼulaʼol tachun yu klaqtsʼil, vachuʼ
ixchivinti Dios yu kijunil ni Jesucristo.
\v 3 Ox kalhixajtachal ni lapanakni yu taputeʼey ali
yu taqasmatʼa ni aniy chivinti yu minchal kun Dios, incha
tamakay kuenta tachun yu aniy jatsʼoqʼulanti. Va laycha
kalakachil ni julchan tejkan chuncha katapasayaʼ.
\s Ni Juan jalaqtsʼoqniy oqxlaqtujun ixlapanakni Dios
\p
\v 4 Kitʼin Juan klatsʼoqniyau tachun uxiknan yu oqxlaqtujun
ixlapanakni Dios untʼatʼik yu vilananchipitik xaʼestado
Asia. Katamapaynin y oxamaktaun katamakan ni Dios yu
tʼajun mas va tavanancha, mas kaval pʼunaj, mas chavaycha,
y yucha kaminaʼ astan. Vachu katamapaynin yu pumatujun
espíritus yu alin taʼan jalhachimoʼonun Dios
\v 5 vachuʼ katamapaynin ni Jesucristo. Yucha lay lhakapuʼanikan
yu lhichiviniy. Yucha pʼunaj takukchoqol tejkan ixnita.
Va jalhichimoʼoy tachun yu talhachimoʼonun lakamunukpaʼ.
Yucha ayaj kintapaxkayan y kintamalaqmixinitan kintalaqalhinkʼan.
Chuncha oxamaktauncha kintamakaʼojon kun ixjakʼalna.
\v 6 Kintamakan para kajuu jalhachimoʼonun ali kuras
para katoʼoyau ni Dios yu ixPay. Vamun yuʼ ay kamakakal,
vamun yuʼ lhitʼajun tapʼasta, mas va tavanancha kaval,
jantu aqtaun katamaktal. Va chuncha kavalcha.
\p
\v 7 Aniy mintacha ni Cristo laka taputsʼi. Tachun ni
lapanakni katalaqtsʼinaʼ. Mas yu tatanqalaqltoqol vachuʼ
katalaqtsʼinaʼ. Tachun lapanakni yu alin lakamunukpaʼ
ayaj katamaqaninanaʼ y katalajqalhunaʼ por yucha. Chuncha
kavalcha.
\p
\v 8 “Kitʼin kunita tacha yu pʼunaj letra yu junkan
Alfa, vachuʼ kunita tacha yu xaʼastan yu junkan Omega.
Va kitʼin ikpuʼaqtaynikal tachun, vachu tamaktay kun
kitʼin.” Chuncha najun ni Jalhachimoʼonu Jesucristo.
Yucha ixʼalinta pʼunaj, vachu alinta chavaycha, vachuʼ
kaminchoqoyaʼ astan. Va lhitʼaunʼojoy tachun tapʼasta.
\s Ni Juan laqtsʼil ixʼayaxtu ni Jesucristo
\p
\v 9 Kitʼin Juan va mintʼalaqajunkʼan kunita. Vachu
va chun ikmaqanlqajnan tacha uxiknan. Vachuʼ chʼantaun
lhitanumanau taʼan lhachimoʼonun ni Dios. Vachuʼ chʼantaun
maqantʼaqniyau tacha Jesucristo. Kitʼin por klaqputeʼey
ixchivinti Dios yu kimaqxtaqnil ni Jesús, ikvilchil tachʼin
taʼan junkan Patmo, taun lakatʼun yu tanʼajvil lakamar.
\v 10 Ex chuncha tejkan xajulchan jastaknati val, va
kilaqchaʼal ni Espíritu. Ijqasmaklhi laqataun chivinti
la kimpulakan, ixqalpʼaysnixtu tus tacha kapusuntajukal
sqol.
\v 11 Ex va kunkal:
\p —Katsʼoqʼulatʼi laka jalhiki tachun yu laqtsʼin y kʼamalaʼachʼanin
yu oqxlaqtujun ixlapanakni Dios yu tavilanal Asia. Kʼalaqmalaʼachʼanin
yu tavilanal laka putaulan Éfeso ali Esmirna ali Pérgamo
ali Tiatira ali Sardis ali Filadelfia ali Laodicea.
\p
\v 12 Ex kitʼin iktalaqaspʼiklhi para kaklaqtsʼil taʼayucha
ixkintʼajun xaqalan. Tejkan iktalaqaspʼiklhi ex klaqtsʼil
laqatujun xaputayan kantila yu si oro ixjunita.
\v 13 Ixtanʼajna taʼan ixyal ni laqatujun xaputayan
kantila, ancha klaqtsʼil ixyal qayntaun tus tacha Sasʼatʼa
Lapanaki ixtasuy. Ixʼulata aqxtaun laqchʼiti tus la
ixchʼajaʼ ixchinita. Vachuʼ ixʼoxatanun aqxtaun cinturón
taʼakchun ixtankilakna si oro ixjunita.
\v 14 La ixʼaqtsul ixlhitʼajun ixʼaji va si laqxnapapa,
tacha ixmakachʼauti borrego yu ox xnapapa, tus tacha
miki. Yu ixlaqchul tus tacha jikmi yu lap lap maqtajiy.
\v 15 Ixchʼaja ixtamaqtajiy tus tacha tsasnati yu bronce
yu ox maqastalay, va tacha kataxtulkaʼ laka horno. Ixchivinti
tus tacha yu pʼays makatʼajun taʼan patajuy xkan.
\v 16 La ixmajkanaj ixchʼapata laqatujun jastʼakun.
Ixkiltaxtuta aqxtaun aqtsupipi chitaj yu paʼextʼuy ixkikxtuy.
Ixʼukxpuʼ ixtasuy tacha julchan yu ox kʼuliksnaʼ maqtajiy.
\p
\v 17 Tejkan klaqtsʼil ex niman iktaqtal la ixchʼaja,
iktamakaul tus tacha janiniʼ. Ex yucha kimoqslanil ixmajkanaj
makaʼ, ex kijunil:
\p —Jantu katʼalhan. Kitʼin va yu iktʼajun mas kaval pʼunaj,
mas kaval astan.
\v 18 Kitʼin chavay iktʼajuncha. Va xaknita pero chavay
iktʼajun mas va tavanancha. Chavay kitʼincha kimpaxtoqniy
kakxtaqnil lakatin tasvanancha kaniyaʼ qayntaun lapanaki
y tasvanancha jantu. Kitʼincha klhitʼajun ixpumalaqltiʼakan
taʼan alin janinin yu laqnin.
\v 19 Katsʼoqʼulatʼi tachun axtoqnuʼ yu xalaqtsʼin, vachuʼ
yu alin chavaycha, vachuʼ yu katapasayaʼ astan.
\v 20 Yu xalaqtsʼin laqatujun jastʼakun la kimajkanaj
y vachuʼ yu laqatujun kantila yu si oro, yucha inchineʼ
naunputun. Yu laqatujun jastʼakun naunputun qayntujun
ixmayulnin Dios yu tatapatsaniy oqxlaqtujun ixlapanakni
ni Dios. Yu laqatujun kantila naunputun oqxlaqtujun
ixlapanakni Dios yu lakatujun tavilanal xalakatʼun Asia.
\c 2
\s Ni Jesucristo jamalaqachaniy chivinti ixlapanakni Dios yu tavilanal laka putaulan Éfeso
\p
\v 1 ’Inchine katsʼoqnin ixmayul Dios yu jalhistakʼa
ixlapanakni Dios yu tavilanal laka putaulan Éfeso: “Yu
chʼapay ni laqatujun jastʼakun la ixmajkanaj, yu tiʼukxuntayay
taʼan vil laqatujun kantila yu si oro, yucha inchine
najun:
\v 2 Kitʼin ikmispaʼojoy tachun yu makʼayatʼik y vachuʼ
ni pʼays tʼapʼatsʼayatʼik. Vachuʼ ijkʼatsay ni ayaj
maʼantʼaulayatʼik. Vachuʼ ijkʼatsay ni jantu xtʼaqyatʼik
lakatin ni kaʼalil tuʼuchun yu jantu lajʼoxi siya uxiknan.
Vachuʼ ijkʼatsay ni ox lakpʼuxkʼaulaqtsʼinatʼik lapanakni
yu tanajun Cristo jalaqmalaqachal mas jantu laqsaval
kaval. Jalakmispʼayatʼik ni yuʼuncha va talaklkanan.
\v 3 Vachuʼ kitʼin ijkʼatsay ni ayaj maʼanlʼajnanatʼikcha
y pʼays tʼapʼatsʼayatʼik para katoʼoyakal kintaqaʼuti.
Jantu aqtaun tachaniyan.
\v 4 Pero alin taun tuʼuchun yu tatsʼanqaniyan yu kitʼin
jantu ox klhilay. Jantucha lapʼaxkʼayatʼik tacha pʼunaj.
\v 5 Xlhiyucha kapʼastʼaktʼik yu makʼauntʼijlatʼatʼik.
Kamapʼaxachʼoʼotʼikcha mijatapastakʼatkʼan y kʼamakʼachʼoʼotʼikcha
tacha yu pʼunaj ixmakʼayatʼik. Incha jantu kʼamapʼaxayapitik
mijatapastakʼatkʼan ex kajkʼantachal, kaklamaqosuniyau
ixputayan minkantilajkʼan.
\v 6 Pero alin taun tuʼuchun yu makʼayatʼik yu kʼachaniy.
Ayaj xkʼayyatʼik yu tamakay ni lapanakni yu lakjunkan
Nikolaítas. Kitʼin vachu ayaj ikxkajiy tacha tamakay.
\v 7 Yu talhitʼajun ixpaqasmaknikʼan va kataqasmaklhi
yu jalakjuniy ni Espíritu oqxlaqtamin ixlapanakni Dios.
Tachun yu kamaqalhajayaʼ yu jantu lajʼoxi, yucha kakxtaqniyaʼ
lakatin para kataʼul xaʼunikan ni kʼiu yu xtaʼa ox jatsukunti.
Yucha alinta laktʼiyan taʼan vil ni Dios.”
\s Ni Jesucristo jamalaqachaniy chivinti ixlapanakni Dios yu tavilanal laka putaulan Esmirna
\p
\v 8 ’Vachuʼ inchine katsʼoqnin ixmayul Dios yu jalhistakʼa
ixlapanakni Dios yu tavilanal laka putaulan Esmirna:
“Yu aqtsʼiyajcha tʼajun, mas kaval pʼunaj y vachuʼ katsukuyaʼ
astan, yu ixnitacha pero chavay kujchoqotacha, ni yucha
va inchine najun:
\v 9 Kitʼin ijkʼatsay ni ayaj maʼanlʼajnanatʼik. Vachuʼ
ijkʼatsay ni va kilpatanin untʼatʼik pero laqsaval va
maqalinin untʼatʼik la melhanutkʼan. Vachuʼ ijkʼatsay
yu jantu ox talhichivinanan yu jalakjunkan israelitas
mas jantu laqsaval kataval. Yuʼuncha va xataqxtoʼati
ixlapanakni Satanás tajunita.
\v 10 Jantu katʼalhaunitʼik yu kʼamaʼanlʼajnanapitik.
Ni aqmoqxnuʼ katachʼapayan lati ni uxiknan y katamanuyan
laka pachʼin. Chuncha katasuyaʼ incha laqsaval milhakapuʼatkʼan.
Kʼamaʼanlʼajnanapitik tus paqkau. Ox katʼaylhipʼintʼik
mas katamaqnin. Kitʼin klamaqxtaqniyau milhilhajatkʼan,
va yu ox jatsukunti.
\v 11 Yu talhitʼajun ixpaqasmaknikʼan va kataqasmaklhi
yu jalakjuniy ni Espíritu oqxlaqtamin ixlapanakni Dios.
Yu kamaqalhajayaʼ yu jantu lajʼoxi, yucha jantu kamaqanlqajnanaʼ
tejkan kaʼalinchoqoyaʼ yu ataun lhinin.”
\s Ni Jesucristo jamalaqachaniy chivinti ixlapanakni Dios yu tavilanal laka putaulan Pérgamo
\p
\v 12 ’Vachuʼ katsʼoqnin ixmayul Dios yu jalhistakʼa
ixlapanakni Dios yu tavilanal laka putaulan Pérgamo
yu inchine: “Yu lhitʼajun aqxtaun aqtsupipi espada
yu paʼextʼuy kikxtuy, ni yucha va inchine najun:
\v 13 Kitʼin ijkʼatsay ni uxiknan vilanantʼik taʼan
lhachimoʼonun ni Satanás pero ox tʼaylhipʼinatʼik kun
kitʼin. Vananaj oxicha kilalhakapuʼanau, mas ancha la
mimputaulankʼan tamaqnil ni Antipas yu ox ixkilhichiviniy.
Pero mas exnicha ni uxiknan jantu kilamakauntijlau ancha
taʼan vil ni Satanás.
\v 14 Pero alin lati axtoqnuʼ yu makʼayatʼik yu jantu
tsʼuniy ox klaqtsʼin. Alin lati lapanakni siya uxiknan
yu jantu tamakauntijlaputun ni jatapastakʼati yu maqancha
ixjamalaninin ni Balaam. Yucha masunil Balak yu lay
kalakmakanil ni israelitas para katamakaputul talaqalhin.
Va para kataʼul axtoqnuʼ lhiʼuti yu moqslanikan antivas
y katatʼatamal lapanakni yu jantu ixnavinkʼan kataval.
\v 15 Vachuʼ alin siya uxiknan yu talhakapuʼan yu tamasuy
ni Nikolaítas.
\v 16 Xlhiyucha kamapʼaxachʼoʼotʼikcha mijatapastakʼatkʼan.
Incha jantu, ex kaklalaqʼantachaʼau, kajkachʼapayanta
ni anchanu lapanakni kun kiʼespada yu taxtuy la kinkilna.
\v 17 Yu talhitʼajun ixpaqasmaknikʼan va kataqasmaklhi
yu jalakjuniy ni Espíritu oqxlaqtamin ixlapanakni Dios.
Yu kamaqalhajayaʼ yu jantu lajʼoxi, kitʼin kakxtaqniyaʼ
ixvayti yu maqsaqkantacha. Vachuʼ kakxtaqniyaʼ yu xutʼutʼu
chiyux taʼan jatsʼoqʼulanti yu saystʼi ixtaqaʼuti. Yucha
jantu matichun mispay, vamun mispay yu laqaʼiy.”
\s Ni Jesucristo jamalaqachaniy chivinti ixlapanakni Dios yu tavilanal laka putaulan Tiatira
\p
\v 18 ’Vachuʼ katsʼoqnin yu jalhistakʼa ixlapanakni
Dios yu tavilanal laka putaulan Tiatira yu inchineʼ:
“Yu Sasʼatʼa Dios yu lhitʼajun ixlaqchul tacha jikmi
yu lap lap maqtajiy y vachuʼ lhitʼajun ixchʼajaʼ tacha
tsasnati yu bronce yu maqastalalakanta, ni yucha va inchine
najun:
\v 19 Kitʼin ox ikmispay tachun yu makʼayatʼik y tacha
tʼiʼukxuyanantʼik paxkanan y ox tʼaylhipʼinapitik la
milhakapuʼatkʼan, laʼaqtʼayʼuyatʼik, y ayaj maʼantʼaulatʼik.
Chavaycha apalay lhuu makʼayatʼik xajantu yu ixmakʼayatʼik
pʼunaj.
\v 20 Pero klamispayau putaun yu makʼayatʼik yu kitʼin
jantu kimaqamay. Xtʼaqyatʼik lakatin ni anchanu xanati
yu junkan Jezabel yu najun lhichiviniy ixchivinti Dios
pero vamun jalakmakanuy kilapanakni yu kintatapatsaniy.
Jalaklhijuniy katatʼatamal lapanakni yu jantu ixnavinkʼan
kaval. Vachuʼ jalaklhijuniy kataʼul axtoqnuʼ yu moqslanikan
antivas.
\v 21 Anchanu xanati ikxtaqnil lakatin kamapaxal ixjatapastakʼati.
Pero jantu mapaxaputun ixjatapastakʼati, jantu makauntijlay
maqtaqalhinin kun joʼakna.
\v 22 Xlhiyucha kitʼin kaknaqʼaqtayaʼ ex katamayantacha
taqanʼan laka putaman. Tus tachun ixlapanakni kakmamaqanlqajnivayaʼ.
Tachun yu tamakay laqtaqal kun yucha va chuncha klakmakayaʼ
incha jantu tamapaxay ixjatapastakʼatkʼan.
\v 23 Klaqmaqniʼoyaʼ, ex chuncha tachun ixlapanakni Dios
kataxtaqniyaʼ kuenta ni kitʼin ikmispaniʼojoy tus taʼan
ixpulmanixtu ixjatapastakʼatkʼan y vachuʼ la ixjalhanutkʼan.
Kaklaxtaqniyau yu tapaxtoqniyan kʼalaʼaʼitʼik por qayntamin.
\v 24 Pero lati ni uxiknan yu vachuʼ machaqan Tiatira
jantu laʼaʼiyatʼik yu masuy ni Jezabel. Vachuʼ jantu
aqtaun kʼamispʼatʼik yu lajʼay talaqalhin yu tamakay
laqatamaqsaq. Yucha tajuniy ixjatapastakʼati ni Satanás.
Kitʼin iknajun ni jantucha klalhijunchoqoyau kʼamakʼatʼik
tuʼuchun aputaun.
\v 25 Vamun katʼaylhipʼintʼikcha tacha ni makʼayatʼikcha
tus kakminchoqoyaʼ.
\v 26 Yu katamaqalhajayaʼ yu jantu lajʼoxi y katataylhaanaʼ
makanan kilhitapatsa tus tachun kalaʼoyaʼ, va yuʼuncha
klaqxtaqniyaʼ xapalhachimoʼon talakachux ni lakamunukpaʼ.
\v 27 Katalhachimoʼonunaʼ kun tapʼasta. Va tacha maqataun
palik yu tsasnati laqcheʼeputaukʼay aqchoq yu jamakanti
kun tʼun. Vachu chun tacha kimPay kimakal Jalhachimoʼonuʼ,
vachu va chun ni yuʼuncha.
\v 28 Vachuʼ kaklaqxtaqniyaʼ ni ay jastʼaku yu xajachil
vakuj tejkan tunkumin.
\v 29 Yu talhitʼajun ixpaqasmaknikʼan va kataqasmaklhi
yu jalakjuniy ni Espíritu oqxlaqtamin ixlapanakni Dios.”
\c 3
\s Ni Jesucristo jamalaqachaniy chivinti ixlapanakni Dios yu tavilanal laka putaulan Sardis
\p
\v 1 ’Vachuʼ katsʼoqnin ixmayul Dios yu jalhistakʼa
ixlapanakni Dios yu tavilanal laka putaulan Sardis yu
inchine: “Yu laklhichimoʼoy yu laqatujun ixʼespíritus
Dios y vachuʼ lhitʼajun laqatujun jastʼakun, ni yucha
va inchine najun: Kitʼin ikmispaʼojoy tachun yu makʼayatʼik
pero uxiknan mas tʼasuyatʼik tacha vanaj kakʼujtʼik,
va nitʼatʼikcha.
\v 2 Kakʼujtʼikcha, kʼalapʼasnitʼik yu ox la mimputsukkʼan
para jantu katsʼanqaʼol. Kitʼin klalaqtsʼinau tacha
makʼayatʼik ni jantu vas kaval kun Dios.
\v 3 Kapʼastʼaktʼik yu tamalanin pʼunaj y yucha katʼaylhipʼintʼik.
Kamapʼaxatʼikcha mijatapastakʼatkʼan. Incha jantu, ex
kitʼin kaklalaqʼantachaʼau tacha qayntaun alhavanaʼ
yu jantu kakʼatsʼayapitik tejkan kajkʼananta.
\v 4 Pero ancha laka putaulan Sardis lati ni uxiknan
ox tʼiʼukxuntʼayatʼik, va tacha jantu kaxkʼilivatʼik
milaqchʼitkʼan. Uxiknan katʼiʼuntʼayapitik kun kitʼin
kun milaqchʼitkʼan yu ox laqxnapapan, va chuncha tapaxtoqniyan.
\v 5 Yu kamaqalhajayaʼ yu jantu lajʼoxi, yucha kaʼulayaʼ
si xnapapa ixlaqchʼiti. Yucha jantu kaxakaniyaʼ ixtaqaʼuti
la xalibro yu masuy taʼayucha katsukuyaʼ. Kitʼin kaklaqaʼiyaʼ
kun achati la ixlakaʼukxpuʼ kimPay ali ixmayulnin.
\v 6 Yu talhitʼajun ixpaqasmaknikʼan va kataqasmaklhi
yu jalakjuniy ni Espíritu oqxlaqtamin ixlapanakni Dios.”
\s Ni Jesucristo jamalaqachaniy chivinti ixlapanakni Dios yu tavilanal laka putaulan Filadelfia
\p
\v 7 ’Vachuʼ katsʼoqnin ixmayul Dios yu jalhistakʼa
ixlapanakni Dios yu tavilanal laka putaulan Filadelfia
yu inchine: “Yu jantu tsʼuniy kalhitsukul laqtaqal,
yu tachun chivinti si vas chiviniy, yucha lhitʼajun ixllave
ni David yu ay jalhachimoʼonuʼ ixjunita. Taʼan malaqltiʼay
jantu matichun lay malakchajuy. Vachuʼ tejkan malakchajuy
jantu matichun lay malaqltiʼay. Ni yucha va inchine
najun:
\v 8 Kitʼin ox klamispaniyau milhitapatsakʼan. Klamalaqltiʼanitau
aqataun puerta taʼan alintʼatʼik. Yucha jantu matichun
lay malakchajuy. Mas va tsʼuniy tapʼasta lhitʼaunatʼik,
ni uxiknan ox makʼayatʼik kuenta kinchivinti y jantu
aqtaun kilamakauntijlayau.
\v 9 Ixlapanakni ni Satanás va talaklkanan. Tanajun
va israelitas tajunita pero jantu laqsaval kaval. Yuʼuncha
kaklamalaqachaniyau para kataʼal tatsoqoqtanin la milakachʼajakʼan
para katakʼatsal ni kitʼin klapaxkayau.
\v 10 Uxiknan tʼaylhipʼinapitik kun maqantaulati, vachu
tacha klalhijunau. Xlhiyucha kitʼin klataylhaʼanau aqtayjunun.
Katamaqanlqajnanaʼ ni lapanakni taʼakapuchun lakamunukpaʼ
para kaalaqtsʼintanukal, pero uxiknan klalhistakʼau.
\v 11 Kitʼin nimancha kakminaʼ. Xlhiyucha jantu kʼamakʼauntʼijlatʼik
yu lhitʼaunatʼik. Va jantu matichun katamaxtunin milhilhajatkʼan
yu tacha korona.
\v 12 Yu kamaqalhajayaʼ yu jantu ox, kitʼin kakmakayaʼ
tacha xamatau ni chaqaʼ taʼan lhachimoʼonun ni Dios.
Jantu aqtaun kataxtuchoqoyaʼ, si ancha kataulaʼ. Ex la
ixmuntsan kaktsʼoqmukʼayaʼ ixtaqaʼuti ni kiDios, vachuʼ
ixtaqaʼuti yu ay ixputaulan ni Dios. Yucha junkan ni
sastʼi Jerusalén. Va yucha kataʼeltajuyaʼ laktʼiyan
taʼan vilchal Dios. Vachuʼ kaktsʼoqmukʼayaʼ yu sastʼi
kintaqaʼuti.
\v 13 Yu talhitʼajun ixpaqasmaknikʼan va kataqasmaklhi
yu jalakjuniy ni Espíritu oqxlaqtamin ixlapanakni Dios.”
\s Ni Jesucristo jamalaqachaniy chivinti ixlapanakni Dios yu tavilanal laka putaulan Laodicea
\p
\v 14 ’Vachuʼ katsʼoqnin ixmayul Dios yu jalhistakʼa
ixlapanakni Dios yu tavilanal laka putaulan Laodicea
yu inchine: “Yu va laqsaval vas chiviniy, jantu jalaklkanan,
yu va tacha tʼajuncha y vachuʼ makaʼol tachun yu Dios
ixnajunta kaʼalil, ni yucha va inchine najun:
\v 15 Ox ikmispay milhitapatskʼan. La milhakapuʼatkʼan
jantu tsukʼunkʼu kʼaʼuntʼik y vachuʼ jantu kʼatsʼastʼik.
Ox ixval incha va tsukʼunkʼu ixʼuntʼik u incha va istsʼastʼik.
\v 16 Vaqaj palʼon untʼatʼik la milhakapuʼatkʼan, jantu
tsukʼunkʼu kʼaʼuntʼik nisin kʼatsʼastʼik. Xlhiyucha
kitʼin jantucha klalaqaʼiyau, va tacha kakpatʼamajʼanputul
la kinkilna.
\v 17 Naunatʼik ni va ayaj maʼalinin untʼatʼik y ayaj
lajʼox vilanantʼik. Vachuʼ naunatʼik ni jantu tuʼuchun
tatsʼanqaniyan. Jantu makʼayatʼik kuenta ni va lhitsʼisiti
untʼatʼik. Payniʼincha uxiknan, jantu tuʼuchun maʼalinatʼik
y ayaj kilpatanin untʼatʼik. Vachuʼ laʼachʼixin untʼatʼik
y jantucha alin milaqchʼitkʼan.
\v 18 Xlhiyucha klajunau ni kilaskʼiniu oro yu ox maqasqanau
laka jikmi, ex laqsaval maʼalinin kʼaʼuntʼik. Vachuʼ
kilaskʼiniu milaqchʼitkʼan yu ox xnapapa. Ex lay kʼaʼulatʼik
y kʼalhilaʼapʼaʼakʼantʼik la milakatunajkʼan taʼan lhimaxananatʼik.
Vachuʼ kilaskʼiniu xakʼuchʼu milaqchulkʼan para kʼalakʼavananchʼoʼotʼikcha.
\v 19 Kitʼin tachun yu klakpaxkay vachuʼ klaqlaqʼaymay
y vachuʼ klaqxtaqniy maqanlqajnati. Xlhiyucha kun tachun
melhanutkʼan maqskʼiniy kʼamapʼaxatʼik mijatapastakʼatkʼan.
\v 20 Kitʼin klakxtuyal laka matiʼ, va ikxaqalay yu tanun
ixpulakna. Incha matichun qasmatʼa kinchivinti y vachuʼ
kimalaqltiʼaniy ni matiʼ, ex kaktanuyaʼ. Chʼantaun kaktʼavaynaʼ,
vachuʼ yucha kintʼavaynaʼ ni kitʼin.
\v 21 Yu katamaqalhajayaʼ yu jantu lajʼoxi, kaklaqxtaqniyaʼ
taʼan katataulal chʼantaun kun kitʼin taʼan klhachimoʼonun.
Vachu chun tacha kitʼin ikmaqalhajal y chʼantaun iktʼataulal
kimPay taʼan jalhachimoʼonun.
\v 22 Yu talhitʼajun ixpaqasmaknikʼan va kataqasmaklhi
yu jalakjuniy ni Espíritu oqxlaqtamin ixlapanakni Dios.”
\c 4
\s Ay tamakay Dios laktʼiyan
\p
\v 1 Astan, ex klaqtsʼil aqataun puerta laktʼiyan, ixlaqltiʼay.
Ijqasmakchoqol ixchivinti yu pʼunaj ixkixaqalatacha,
makatʼaul tus tacha maqataun sqol, kijunil:
\p —Kapʼatʼaxtʼucha aniy talman. Kitʼin kakmasuniyan tachun
yu katapasayaʼ astan.
\p
\v 2 Ex kitʼin nimancha kilaqachʼapal la ixtapʼasta
ni Espíritu. Ex klaqtsʼil taʼan jalhachimoʼonunkan ancha
laktʼiyan, ancha ixvil qayntaun lapanaki.
\v 3 Ni lapanaki yu ancha ixvil ixtasuy tacha kʼus chiyux
yu junkan jaspe ali yu junkan kornalina. Ni anchanuʼ
taʼan jalhachimoʼonunkan tantilaqachoqo ixʼalin taun
xkulumakchati, ixtasuy tacha kʼus chiyux yu junkan esmeralda.
\v 4 Vachuʼ ixʼalin laqapʼuxauntʼati putaulan tantilaqachoqo
ni laka palhachimoʼon. Kitʼin klaqtsʼil si ixtavilanal
qayntamin xapaynin, qaynpʼuxauntʼati ixtajunita. Ixtaʼulata
laqxnapapa laqchʼiti kun laqatamin korona la ixʼaqtsulkʼan
yu si oro ixjunita.
\v 5 Taʼan taulay ni Jalhachimoʼonu ancha ixchivinkan
y vachuʼ ixmakatʼajun jamaxkan y vachuʼ ixtasuy makaliukniti.
Vachuʼ la ixlakaʼukxpuʼ taʼan jalhachimoʼonunkan ancha
ixʼalin laqatujun maklku yu si jikmi ixjunita. Yucha
va yu laqatujun ixʼespíritus ni Dios.
\v 6 Vachuʼ la ixlakaʼukxpuʼ taʼan jalhachimoʼonunkan
ixtasuy xkan tacha ay lakamar, ixpatasuy jalakavanti
tus tacha spejo. Vachuʼ taʼan jalhachimoʼonunkan ixtantilaqachoqo
ixʼalin laʼatʼati talhitsukuti yu takujta. Tus ixtalaqaʼaqtsamanta
laqchul, la ixʼukxpulakapukʼan ali ixpulakankʼan.
\v 7 Yu pʼunaj talhitsukuti ixtasuy tacha laqataun león
y yu alaqataun ixtasuy tacha laqataun vakax. Yu ataun
ixtasuy tacha qayntaun lapanaki y yu xaʼastan ixtasuy
tacha laqataun atsʼoʼo ixjaltilinijʼanta.
\v 8 Ni anu laʼatʼati talhitsukuti yu takujta, si ixtalhitʼajun
laqachaxan paqachuj la ixmakankʼan y talakachux ixlakatunajkʼan
va ixtalaqaʼaqtsamanta laqchul. Yuʼuncha mas tunkuj
ali tsʼis jantu ixtamamaktay ixchivintikʼan yu inchineʼ
najun:
\q Lhitʼaunʼojoy yu lajʼoxi, yu lajʼoxi, yu lajʼoxi
\q ni kiJalhachimoʼonukʼan Dios yu lhitʼaunʼojoy tapʼasta.
\q Va yucha yu ixtʼajun pʼunaj, yu tʼajun chavaycha, yu
kaminchoqoyaʼ astan.
\p
\v 9 Chuncha ni anu pumatʼati yu tacha laʼatʼati talhitsukuti
yu takujta va tatoʼoyay y ay tamakay ni Dios yu vil
taʼan jalhachimoʼonun. Vachuʼ taxtaqniy lhimalaqpuchuncha
yu tʼajun mas va tavanancha kaval, yu jantu aqtaun katamaktal.
\v 10 Tejkan chuncha tamakay ex yu qaynpʼuxauntʼati
xapaynin tatatsoqoqtaniy ni Dios yu vil taʼan jalhachimoʼonun.
Va tatoʼoyay ni yucha yu tʼajun mas va tavanancha, tamamay
ixkoronajkʼan taʼan vil, tanajun yu inchineʼ:
\q
\v 11 Uxintʼi kiJalhachimoʼonukʼan unitʼa, vachuʼ kiDioskʼan
unitʼa.
\q Uxintʼi paxtoqniyan ay kʼamakʼakʼa,
\q va katʼoʼoyakʼa, va uxintʼi lhitʼaʼunʼoʼoy yu tapʼasta.
\q Va uxintʼi yu makʼaʼo tachun yu alin.
\q Tachun axtoqnuʼ yu alin chavaycha, va uxintʼi la miʼachati
lakmakʼatʼi.
\c 5
\s Aqxtaun jalhiki yu jasmilniti ixjunita ali yu Sasʼatʼa borrego
\p
\v 1 Astan klaqtsʼil ni anchanuʼ yu ixvil taʼan jalhachimoʼonunkan,
va ixchʼapata la ixlhijakanaj makaʼ aqxtaun jalhiki.
Va jasmilniti ixjunita y ukxputʼuy ixtsʼoqkanta, la ixʼukxpuʼ
ali ixlhimakan. Ox ixmalakchaukanta, va lakatujun ixlakaltʼaunkanta.
\v 2 Ex klaqtsʼil qayntaun ixmayul Dios yu pʼays lhasakminil,
va naul:
\p —¿Tasʼayucha paxtoqniy kapuxʼoqlhi ni aniy jalhiki
y kalajʼexnil taʼan ltʼaunikanta?
\p
\v 3 Pero jantu matichun kaʼalil yu oxicha para kapuxʼoqlhi
ni jalhiki yu jasmilniti ixjunita, mas laktʼiyan, mas
lakatʼun, mas ixtaʼapuʼ lakatʼun y jantu matiʼ lay kalaqtsʼil.
\v 4 Jantu matichun lay kapuxʼoqlhi ni jalhiki yu jasmilniti
ixjunita para lay kalaqtsʼil, xlhiyucha kitʼin va ayaj
xajqalhun.
\v 5 Ex chuncha qayntaun xapay yu ixvil taʼan jalhachimoʼonunkan
kijunil:
\p —Jantucha kʼaʼalhu. Alin ni lapanaki yu junkan ni león
yu mintachal xalakatʼun Judá yu ixpapanti David. Yucha
maqalhajatacha ixtʼalaxkaynin. Yucha lay kapuxʼoqlhi
ni jalhiki yu jasmilniti, lay kalajʼexnil yu lakatujun
taʼan ltʼaunikanta.
\p
\v 6 Ex chuncha klaqtsʼil taʼan jalhachimoʼonunkan ixyal
laqataun Sasʼatʼa borrego. Yucha ixtaʼajyal yu laʼatʼati
talhitsukuti yu takujta ali yu pʼuxauntʼati xapaynin.
Ni Sasʼatʼa borrego ixtasuy tacha yu maqnikantacha.
Ixlhitʼajun maqatujun ixʼaqaloqoti ali laqatujun ixlaqchul.
Yucha naunputun va laqatujun ixʼespíritu ni Dios yu
jalaqmalaqachal por taʼakapuchun aniy lakamunukpaʼ.
\v 7 Chuncha ni Sasʼatʼa borrego alcha, va maxtunil ni
jalhiki la ixlhijakanaj makaʼ yu ixvil taʼan jalhachimoʼonunkan.
\v 8 Tejkan chʼapalcha ni jalhiki, ex yu laʼatʼati talhitsukuti
yu takujta ali yu pʼuxauntʼati xapaynin tatatsoqoqtanil
la ixlakaʼukxpuʼ ni Sasʼatʼa borrego. Tachun si ixtalhitʼajun
ixlhisankʼan yu arpa junkan, va si ixtalhaʼanta ixpamapʼuvankʼan
yu si oro ixjunita. Si ox pʼal ixtavilanal pun. Tejkan
ixtaxavay pun yucha naunputun va ixchivintikʼan ixlapanakni
Dios tejkan taskʼin.
\v 9 Yuʼuncha ixtamilpay yu sastʼi milpati yu inchineʼ
najun:
\q Uxintʼi laqsaval paxtoqniyan kachʼapʼa ni jalhiki
\q y kaʼexnin taʼan ltʼaunikanta.
\q Uxintʼi tʼamaqxtʼaqtʼi para kʼanitʼi.
\q Chuncha kun mijakʼalna jalaklhiʼitʼi lapanakni para
Dios,
\q va yu tachiviniy tachun lhichivin, yu machaqan tachun
putaulanaxna,
\q ali yu minchal taʼoqxlaqchux lapanakni lakamunukpaʼ.
\q
\v 10 Uxintʼi kilamakau jalhachimoʼonun y kilamakau kuras
para kaktapatsaniu Dios.
\q Kaklhachimoʼonunau aniy lakamunukpaʼ.
\p
\v 11 Ex klaqtsʼil y ijqasmaknil ixchivintikʼan lhuu
ixmayulnin Dios ali yu pumatʼati yu tatasuy tacha talhitsukuti
ali yu xapaynin. Laqalhuu miyones ixtayanal tantilaqachoqo
taʼan jalhachimoʼonunkan.
\v 12 Ayaj pʼays ixtachiviniy y ixtanajun:
\q Ni Sasʼatʼa borrego yu moqslakal tacha lapaxkan
\q yucha lhitʼajun tachun tapʼasta, tachun maqaliti,
\q tachun jatapastakʼati, xoqta lay makay.
\q Xlhiyucha tsʼanqay katoʼoyau, ay kamakakal y ox kalhichivinkal.
\p
\v 13 Vachuʼ ijqasmaklhi tachun axtoqnuʼ yu Dios lakmakal,
yu alin laktʼiyan, ali yu alin lakatʼun y vachuʼ yu alin
ixtaʼapuʼ lakatʼun ali yu alin laka mar, tachun yu alin
ixtanajun:
\q Yu vil taʼan jalhachimoʼonunkan ali yu Sasʼatʼa borrego,
\q vamun yuʼuncha ay kalakmakakal y kalaktoʼoyakal y ox
kalaklhichivinkal.
\q Vamun yuʼuncha talhitʼajun tapʼasta mas va tavanancha
kaval, jantu aqtaun katamaktal.
\p
\v 14 Chuncha yu laʼatʼati talhitsukuti yu takujta ixtanajun:
\p —¡Chuncha kaval!
\p Ex yu pʼuxauntʼati xapaynin tatatsoqoqtanil y tatoʼoyal
Dios yu kujta mas va tavanancha, jantu aqtaun katamaktal.
\c 6
\s Lajʼexkan taʼan ltʼaunikanta ni jalhiki
\p
\v 1 Kitʼin klaqtsʼil ni Sasʼatʼa borrego ixchʼapata
ni jalhiki yu jasmilniti yu lakatujun ltʼaunikanta, va
lajʼexnil lakataun taʼan ltʼaunikanta. Ex chivinil qayntaun
ni anchanuʼ laʼatʼati talhitsukuti yu takujta, va ijqalasmaklhi
ixchivinti tus tacha laqpaqnati, va naul:
\p —¡Katʼatʼi y kʼalaqtsʼi!
\p
\v 2 Tejkan klakavanal, ex klaqtsʼil laqataun xnapapa
juki. Yu ixpujukʼal ixchʼapata maqataun arco. Va xtaqnikal
laqataun korona. Yucha ixʼanta maqalhajan yu jantu lajʼox.
Va anta para kataylhaʼal maqalhajan.
\p
\v 3 Ex chuncha ni Sasʼatʼa borrego lajʼexnil lakʼatʼiyunuʼ
taʼan ltʼaunikanta. Ex ijqalasmaklhi yu xalaʼatʼiyunuʼ
talhitsukuti yu kujta, va naul:
\p —¡Katʼatʼi!
\p
\v 4 Ex taxtul alaqataun juki va xlapul. Yu ixpujukʼal
xtaqnikal lhachimoʼon para kalhimil lhilukuj aniy lakamunukpaʼ
para katalamaqnil ni lapanakni. Vachuʼ maqxtaqnikal
maqataun ay espada.
\p
\v 5 Tejkan ni Sasʼatʼa borrego lajʼexnil lakʼatʼutunuʼ
taʼan ltʼaunikanta ni jalhiki, ex ijqalasmaklhi yu qayntʼutunuʼ
talhitsukuti, va naul:
\p —¡Katʼatʼi!
\p Ex klakavanal y klaqtsʼil laqataun sqoyaq juki. Yu
ixpujukʼal ixchʼapata laqataun papulkan.
\v 6 Ijqasmaklhi chivinkal la ixtanʼajna taʼan ixtayanal
yu laʼatʼati talhitsukuti yu takujta, va naul:
\p —Taun kilo trigo ixtapal va tacha paqtaun laka lhitapatsa
kunaʼ. Vachuʼ laʼatʼutu kilo cebada ixtapal va tacha
paqtaun laka lhitapatsa kunaʼ. Pero jantu kʼalaʼalhitʼi
yu xaxkan uva ali aceite.
\p
\v 7 Tejkan ni Sasʼatʼa borrego lajʼexnil yu lakʼatʼatiniʼ
taʼan ltʼaunikanta ni jalhiki, ex ijqalasmaklhi ixchivinti
ni yu laʼatʼatiniʼ talhitsukuti, va naul:
\p —¡Katʼatʼi!
\p
\v 8 Ex klakavanal y klaqtsʼil laqataun xqavau juki.
Yu ixpujukʼal junkan Lhinin. Yu ixtixkaulhaʼanta junkan
Laqnin. Yuʼuncha jaxtaqnikal lakatin para katamaqnil
lapanakni pumataun por pumatʼatin yu alin por tachun
ni lakamunukpaʼ. Va katapumaqnil lhilukuj ali chavan
ali taqanʼati ali maqtalin.
\p
\v 9 Tejkan ni Sasʼatʼa borrego lajʼexnil yu lakakisini
taʼan ltʼaunikan ni jalhiki, ex klaqtsʼil lapanakni la
ixqaltaʼapuʼ ni altar yu tapunil por ixtalaqputeʼey
ixchivinti Dios, vachuʼ por ixtataylhaʼan lhichivinin
Cristo.
\v 10 Pʼays ixtachiviniy, va tanaul:
\p —Uxintʼi yu Jalhachimoʼonu kʼatʼi yu lhitʼaunʼoʼoy
yu lajʼox, yu laqsaval unitʼa. ¿Tas vanancha kʼalakmukʼaniyeʼe
ixlaqtaqalkʼan yu ixkintaxkajiy lakamunukpaʼ y kalaqmamaʼalchʼaunichʼoʼoyeʼe
yu kintamaqnin?
\p
\v 11 Ex jalaqxtaqnikal laqxnapapan laqchʼiti y jalakjunkal
para katapakxal. Pʼunaj maqskʼiniy kataniʼol tachun
ixtʼalaqauninkʼan yu tapaxtoqniy katanil yu talaqputeʼey
ixchivinti Dios, vachu chun tacha tanil yuʼuncha.
\p
\v 12 Kitʼin klaqtsʼil tejkan ni Sasʼatʼa borrego lajʼexnil
yu lakachaxanaʼ taʼan ltʼaunikanta yu jalhiki. Ex alil
taun pʼays jaxkapʼikniti. Yu julchan tapalal tsʼiti
tus tacha aqxtaun laqchʼiti yu pʼays sqoyaq. Yu malkuyuʼ
tasul tus tacha jakʼalna.
\v 13 Yu jastʼakun tapatajul lakatʼun tacha tejkan ni
pʼays un sunpʼuxʼojoy xaʼunikan higo.
\v 14 Yu laktʼiyan tasmilil tacha aqxtaun jalhiki yu
smilkan. Tachun aspajunaxnan ali tʼun yu tanʼajvil laka
mar tus tachun tatalakpaxal.
\v 15 Tachun yu xareyes lakatʼun ali yu talhachimoʼonun
aniy lakamunukpaʼ ali xaʼukxtinin tropas ali maʼalinin
ali yu talhitʼajun lhuu tapʼasta y tachun lapanakni,
mas oqxtamatin ali yu oxamaktaun tatijuyanal, va taʼanʼol
tamaqsaqnin taʼan laqpoqapaj laktalpan.
\v 16 Ixtamatʼasay ni aspajunaxnan ali laktalpan, ixtajuniy:
\p —Kilaʼaktʼalmaʼaucha, kilamaqsaqvicha para jantucha
kintalaqtsʼin yu vil taʼan jalhachimoʼonunkan. Vachuʼ
para jantu kintamukʼanin maqanlqajnati ni anchanu Sasʼatʼa
borrego.
\v 17 Chavay lakachilcha ni julchan tejkan katasuyaʼ
ixlhilukujkʼan. ¿Tasʼayucha yu katayaniyaʼ?
\c 7
\s Yu 144,000 ixlapanakni Dios
\p
\v 1 Ex va chuncha klaqtsʼil ixtayanal pumatʼati ixmayulnin
Dios, paʼextamin la ixpiktunuxnan lakamunukpaʼ. Ixtatanchanita
yu laʼatʼati un yu alin lakatʼun para jantu kaʼunilal
lakatʼun nisin lakxkan nisin laka kʼiu.
\v 2 Vachuʼ klaqtsʼil aqayntaun ixmayul Dios. Ixmintachal
taʼan puxajachil julchan. Ixchʼapalhiminta iseyo ni
Dios yu kujta. Ex ayaj pʼays jalaqxaqalal yu pumatʼati
ixmayulnin Dios yu jalaqxtaqnikal lakatin katalhimaqchapul
ni lakatʼun ali lakxkan. Va naul:
\p
\v 3 —Jantu kʼalhimaqchʼapʼu ni lakatʼun ali laka mar
ali yu kʼivin. Pʼunaj maqskʼiniy kalakmukʼaniu laqatamin
seyo la ixmuntsankʼan ni lapanakni yu tatapatsaniy Dios.
\p
\v 4 Ex astan ijqasmaklhi tas pumachuxicha ixtajunita
yu jalakmukʼanikal seyo. Ixjunita va ciento cuarenta
y cuatro mil por tachun yu oqxlaqkautʼuy ni israelitas.
\v 5 Kautʼuy mil seyado jalakmakakal ixlapanakni Judá,
vachuʼ kautʼuy mil seyado jalakmakakal ixlapanakni Rubén,
vachuʼ kautʼuy mil seyado jalakmakakal ixlapanakni Gad.
\v 6 Vachuʼ kautʼuy mil seyado jalakmakakal ixlapanakni
Aser, vachuʼ kautʼuy mil seyado jalakmakakal ixlapanakni
Neftalí, vachuʼ kautʼuy mil seyado jalakmakakal ixlapanakni
Manasés.
\v 7 Vachuʼ kautʼuy mil seyado jalakmakakal ixlapanakni
Simeón, vachu kautʼuy mil seyado jalakmakakal ixlapanakni
Leví, vachuʼ kautʼuy mil seyado jalakmakakal ixlapanakni
Isakar.
\v 8 Vachuʼ kautʼuy mil seyado jalakmakakal ixlapanakni
Zabulón, vachuʼ kautʼuy mil seyado jalakmakakal ixlapanakni
José, vachuʼ kautʼuy mil seyado jalakmakakal ixlapanakni
Benjamín.
\s Pumalhuu lapanakni ixtalhilakayanal xnapapa laqchʼiti
\p
\v 9 Taval tejkan chuncha tapasaʼol ex klaqtsʼil alati
lapanakni tus jantu matichun lay kaputeʼel por ixtalhavaxtu.
Ixʼalinʼojoy yu machaqan tachun putaulanaxna, taʼoqxlaqchux
lapanakni yu alin lakamunukpaʼ, ixtachiviniy puchux lhichivin.
Ixtayanal taʼan jalhachimoʼonunkan y taʼan ixyal ni
Sasʼatʼa borrego. Tachun ixtalhilakayanal xnapapa laqchʼiti
y si ixtachʼapalhaʼanta chʼapʼa.
\v 10 Tachun va pʼays ixtachiviniy, ixtanajun:
\q Ni Dios yu vil taʼan jalhachimoʼonunkan
\q vachuʼ yu Sasʼatʼa borrego,
\q yuʼuncha kintamalaqtaxtutancha.
\m
\v 11 Tachun ni ixmayulnin Dios ixtayanal tantilaqachoqo
taʼan jalhachimoʼonunkan. Vachu ancha ixtayanal ni xapaynin
ali yu laʼatʼati talhitsukuti yu takujta. Tataʼaqtsoqoqtal
tus tatalakaputatamal lakatʼun, tatoʼoyal ni Dios,
\v 12 va tanaul:
\q Vamun ni Dios ox kalhichivinkal y ay kamakakal.
\q Yucha lhitʼajun tachun jatapastakʼati, va yucha kaxtaqnikal
lhimalaqpuchuncha.
\q Va katoʼoyakal por ixtapʼasta yu xoqta pulay makay.
\q Yucha kiDioskʼan mas va tavanancha, jantu aqtaun katamaktalcha,
va chuncha kavalcha.
\p
\v 13 Ex xaqayntaun yu pʼuxauntʼati xapaynin kilhisakmil,
va kijunil:
\p —¿Matiʼincha ni aniy lapanakni yu talhilakayanal laqxnapapa
laqchʼiti? ¿Tas ancha taminchal?
\p
\v 14 Kitʼin kunil:
\p —Uxintʼi kʼatsʼay, kitʼin jantu ijkʼatsay.
\p Ex yucha kijunil:
\p —Tachun yuʼuncha va si yu talaqtaxtul taʼan alil lhuu
maqanlqajnati. Va yu tachaʼatacha ixlaqchʼitkʼan y laqxnapapan
tamakal kun ixjakʼalna ni Sasʼatʼa borrego.
\v 15 Xlhiyucha tavilanal taʼan jalhachimoʼonun ni Dios
y tatapatsaniy la ixchaqaʼ taʼan toʼoyakan. Ancha tavilanal
mas kaval tsʼis mas kaval tunkuj. Dios yu vil taʼan
jalhachimoʼonunkan yucha kalaktʼataulaʼ y kalaklhistakʼaʼ.
\v 16 Yuʼuncha jantucha aqtaun katachʼapayaʼ chavan
y jantucha katapukikxixaʼ. Jantucha katamichiyaʼ julchan
y jantucha lakajnaʼ katalhilayaʼ.
\v 17 Ni Sasʼatʼa borrego yu vil la ixlakaʼukxpuʼ taʼan
jalhachimoʼonunkan yucha kalaklhistakʼaʼ. Va kalaklhaanaʼ
maʼotʼunuʼ xkan yu xtaʼa jatsukunti. Dios kalaklakpuxakayaʼ
tachun ixlaqpuqalhutkʼan.
\c 8
\s Yu lakatujunuʼ taʼan ltʼaunikanti ni jalhiki yu jasmilniti
\p
\v 1 Tejkan ni Sasʼatʼa borrego lajʼexnil yu lakatujunuʼ
taʼan ltʼaunikanti ni jalhiki yu jasmilniti, ex pakltaun
hora valiʼiy saq val laktʼiyan.
\v 2 Ex klaqtsʼil ni pumatujun ixmayulnin Dios ixtayanal
la ixlakaʼukxpuʼ. Pumatamin jamaqxtaqnikal maqatamin
sqol.
\v 3 Taval chil aqayntaun ixmayul Dios, ancha tayal laka
altar. Ixlhiminta laqataun yu pamapʼuvan yu jamakanti
kun oro. Ancha xtaqnikal lhuu pun para chʼantaun kamakanil
ixchivintikʼan ixlapanakni Dios tejkan tatapayniniy.
Va maqxtaqlhi laka altar yu jamakanti kun oro, taʼan
jalhachimoʼonun Dios.
\v 4 Ex chuncha xajin ni pun yu ixchʼapata ni ixmayul
Dios ali ixjatapaynitikʼan ixlapanakni Dios, va chʼantaun
pataxtul tus talman taʼan vil Dios.
\v 5 Ex astan ni ixmayul Dios chʼapal ni pamapʼuvan,
va laqtsamal kun xajayaqan laka altar. Va tanqalhumal
lakatʼun. Ex niman alil pʼays laktʼasati kun jamaxkan
y vachuʼ va taxtuj makatʼaunlhi y alil makaliukniti
y vachuʼ jaxkapʼiknil tʼun.
\s Tasunuy yu laqatujun sqol
\p
\v 6 Ex ni qayntujun ixmayulnin Dios listujcha taval
para katasunulcha ni anchanuʼ maqatujun sqol.
\v 7 Tejkan yu xapʼunaj ixmayul Dios sunulcha ex patajul
lhuu chajʼiti lakatʼun kun jikmi yu ixlaqlhiyal jakʼalnan.
Tus laqxauʼol ni lakatʼun aqataun por aqatʼutun yu jakʼivinan,
vachuʼ javan yu lakxtakʼau.
\p
\v 8 Taval yu pumatʼiyunuʼ ixmayul Dios sunul isqol.
Ex patajul laka mar taun tuʼuchun yu tacha laqataun
ay aspajun. Ixmaqtajita kun jikmi. Ex tampataun yu laʼatʼutu
taʼan alin yu ay mar va lhiʼakxajachal jakʼalnan.
\v 9 Ex laqataun por laʼatʼutun talhitsukuti yu alin
lakamar taniʼol. Vachuʼ laqataun por laʼatʼutun barcos
yu ancha ixtatajumanal, yuʼuncha tatalaqalhiʼol.
\p
\v 10 Taval yu pumatʼutunuʼ ixmayul Dios sunul isqol.
Ex patajul laqataun ay jastʼaku yu ixmaqtajita kun jikmi.
Va tamachal taʼan alin tampataun yu pumaʼatʼutu yu laʼaxkan
ali laqxqatij yu alin lakamunukpaʼ.
\v 11 Ixtaqaʼuti ni jastʼaku va Sun. Ex tampataun yu
pumaʼatʼutu ni xkan pʼays sun val. Pumalhuu lapanakni
tanil por sun val ni anchanu xkan.
\p
\v 12 Taval yu pumatʼatiniʼ ixmayul Dios sunul isqol.
Ex valiʼiy laqputsʼiti val tampataun yu laʼatʼutun julchan
ali malkuyuʼ y vachuʼ jastʼakun. Ex jantucha katamapulkul
tampataun yu laʼatʼutunuʼ laka julchan y vachuʼ laʼatʼutunuʼ
laka jatatsʼisin.
\p
\v 13 Ex astan klakavanal, ex ijqasmaklhi qayntaun ixmayul
Dios ixjaltilinijʼanta ixtaʼajna laktʼiyan y naul:
\p —¡Payniʼincha, payniʼincha, payniʼincha katʼaunaʼ yu
tavilanal lakamunukpaʼ tejkan katasqolaʼ ixlatʼutukʼan
ixmayulnin Dios yu vananaj tatsʼanqay katasqol!
\c 9
\p
\v 1 Taval yu pumakisiniʼ ixmayul Dios sunul isqol.
Ex klaqtsʼil laqataun jastʼaku patajul laktʼiyan, tamachal
tus lakatʼun. Ex maqxtaqnikal yu pumalaqltiʼakan ni
pachʼin yu la pulman.
\v 2 Tejkan malaqltiʼalcha ex ancha pataxtul lhuu jin
tus tacha xajin laqataun ay horno. Ni anchanuʼ jin tus
maputsʼisiʼol taʼakchun taʼan ixmapulkuy ni julchan.
\v 3 La ixpulakna ni anchanuʼ jin taxajchil lhuu silaqa.
Ex aqtaylcha taltilinin taʼakchun lakatʼun. Jalaqxtaqnikal
ixtapʼastakʼan tacha ixtapʼastakʼan ni statsukun lakamunukpaʼ.
\v 4 Jalakjunkal para jantu katalhimaqchapul ni javan
yu alin lakatʼun, nisin qaltaun yu xtakʼau nisin yu jakʼivinan.
Jalhijunkal katalhimaqchapul vamun lapanakni yu jantu
katalhitsukul iseyo ni Dios la ixmuntsankʼan.
\v 5 Pero jantu kalaqxtaqnikal lakatin para katamaqnil
lapanakni. Vamun para kamamaqanlqajnivakal kun lhuu
ixkayaxtu tus laqakis malkuyuʼ. Yu ixkayaxtu va aqstanchun
tacha tejkan kachajun statsuku.
\v 6 Exnicha anchanu julchan ni lapanakni kataniputunaʼ
pero jantu lay kataniyaʼ.
\p
\v 7 Ni anchanu silaqa ixtatasuy tacha jukin yu listujcha
para kataʼal laka lhilukuj. La ixʼaqtsulkʼan ixtalhaʼanta
laqatamin tuʼuchun tacha korona yu jamakanti kun oro.
Ixʼukxpukʼan va tacha lapanakni.
\v 8 Ixʼaykʼan ixtasuy tacha ixʼaji xanati. Ixtatsalatkʼan
va tacha ixtatsalati león.
\v 9 Ixlaqchʼitkʼan yu ixtaʼulata la ixtankilaknakʼan
ixtasuy tacha apuro tsasnati. Ixpaqachuj ixpakatʼajun
tacha tejkan lhuu jukin katalaqxaqamalhaʼal carros laka
lhilukuj.
\v 10 Vachuʼ ixtalhitʼajun ixtiʼistajkʼan tacha ixtiʼistaj
statsuku. Va ox laqʼaqatantsupipi para kalaqmamaqanlqajnival
ni lapanakni tus laqakis malkuyuʼ.
\v 11 Ixʼalin ixʼukxtinkʼan yu laklhichimoʼoy. Yucha
va qayntaun ixmayul Dios yu lhistakʼa taʼan la pulman
pachʼin. Ni anchanu ukxtin laka lhihebreo junkan Abadón,
laka lhigriego junkan Apolión, naunputun yu Jalaktʼilhinin.
\p
\v 12 Ex tapasatacha yu pʼunaj maqanlqajnati, pero vananaj
tsʼanqay alaʼatʼuy.
\p
\v 13 Taval ni pumachaxanaʼ ixmayul Dios sunul isqol.
Ex ijqasmaklhi laqataun chivinti makatʼaul taʼan alin
yu maʼatʼati aqaloqoti ni laka altar taʼan vil Dios.
\v 14 Va jaxaqalakal yu pumachaxanaʼ ixmayul Dios yu
ixchʼapata ni sqol, va junkal:
\p —Kʼalaqxʼoqtʼicha yu pumatʼati mayulnin yu tavilanal
tachʼinin yu ay laʼaxkan yu junkan Eufrates.
\p
\v 15 Ex jalaqxʼoqlhicha ni pumatʼati mayulnin. Yuʼuncha
oxicha listuj ixtavilanal vamun para exnicha, ni anchanuʼ
julchan ali anchanuʼ malkuyuʼ ali anchanuʼ jachʼitin.
Va ixlakʼulata para katamaqniʼol tampataun yu pumaʼatʼutu
lapanakni yu alin lakamunukpaʼ.
\v 16 Kitʼin ijqasmaklhi ixtalhavaxtu ixtropas ali jukin
tus doscientos miyones ixtajunita.
\p
\v 17 Chuncha klaqtsʼil ni jukin yu ixtapujukʼanal.
Ixtalhaʼanta laqatamin tsasnati la ixtankilaknakʼan.
Va xlapul tus tacha jikmi, vachuʼ azul ali xqavau. Ixʼaqtsulkʼan
ni jukin ixtasuy tacha ixʼaqtsul león. La ixkilnakʼan
ixtaxtuy jikmi ali jin, vachuʼ azufre.
\v 18 Tampataun yu pumaʼatʼutu lapanakni yu alin lakamunukpaʼ
tus taniʼol. Yu jalaqmaqnil va yu ixtakiltaxtuy ni jukin,
va jikmi ali yu jin ali yu azufre.
\v 19 Ixtapʼastakʼan ni jukin ixtalhitʼajun la ixkilnakʼan
vachuʼ la ixtiʼistajkʼan. Yu ixtiʼistajkʼan ixtasuy
tacha maqataun tsapul, yu lhitʼajun ixʼaqtsul. Va yucha
lay ixtapamaqninin.
\p
\v 20 Ni lapanakni yu jantu katanil, yuʼuncha jantu katamakauntijlal
ixtoʼoyaka ni aqmoqxnuʼ, jantu katamakauntijlal ixdioskʼan
yu jantu laqsaval. Yucha jamakanti kun oro ali plata
ali bronce ali chiyux ali kʼiu. Jantu lay jalakavanan,
jantu lay jaqasmaknan, jantu lay jaltanan.
\v 21 Jantu katamakauntijlal jamaqninti, vachuʼ jantu
katamakauntijlal jachavanti. Vachuʼ tataylhaʼal tʼatamanan
lapanakni yu jantu ixnavinkʼan kaval. Vachuʼ tataylhaʼal
jaʼalhavanti.
\c 10
\s Yu ixmayul Dios lhimin aqxtaun lakatʼuniy jalhiki yu smilkanta
\p
\v 1 Astan klaqtsʼil aqayntaun ixmayul Dios kun lhuu
tapʼasta. Ixtaʼeltajuminta laktʼiyan, ixtanun ixpulakna
laka taputsʼi. Vachuʼ xkʼavin ixʼalinta xkulumakchati
la ixʼaqtsul. La ixʼukxpuʼ ixmaqtajiy tus tacha julchan.
La ixqatuʼ ixtasuy tacha matau yu si jikmi.
\v 2 Ixchʼapata aqxtaun lakatʼuniy jalhiki yu smilkanta
pero va puxʼoqkantacha. La ixchʼajaʼ yu ixlhichʼankanaj
tachʼatal laka mar. Yu ixlhichʼanmaqxu tachʼatal lakatʼun.
\v 3 Ex pʼays tʼasal, tus tacha laqataun león. Tejkan
tʼasaʼol ex aqtujun makatʼaul jamaxkan.
\v 4 Tejkan aqtujun makatʼaunʼol yu jamaxkan, ex kitʼin
xaktsʼoqʼulaputun. Ex ijqasmaklhi laqataun chivinti,
va kunkal:
\p —Vamun saq kʼamaʼatʼi tachun yu xatanajun ni laqatujun
jamaxkan. Jantu katsʼoqʼulatʼi.
\p
\v 5 Astan ni mayul yu xaklaqtsʼintacha, yu ixchʼatay
laka mar ali lakatʼun, yucha maqstal ixlhimajkanaj makaʼ
laktʼiyan.
\v 6 Va naul ni laqsaval ixchivinti, va lhichivinil la
ixtaqaʼuti ni Dios yu kujta mas va tavanancha yu jantu
aqtaun katamaktal, yu makal laktʼiyan ali lakatʼun ali
lakamar y tachun axtoqnuʼ yu alin. Va naul:
\p —Jantucha kataqmaqayaʼ tachun yu xalaqtsʼin.
\v 7 Tejkan yu pumatujunuʼ ixmayul Dios kasunaʼ isqol,
ex kalaqchaanacha julchan tejkan katapasaʼoyaʼ yu Dios
ixmakaputunta, yu jantu ixmispakan. Chuncha kunaʼ tacha
jalakjunil ixlapanakni yu maqancha ixtalaqputeʼey ixchivinti.
\p
\v 8 Ex aaqtaun ijqasmakchoqol taun chivinti yu minchal
laktʼiyan yu kijunil:
\p —Kapiticha. Kachʼapʼacha ni jalhiki yu puxʼoqkantacha
yu chʼapata ni mayul yu chʼatay laka mar ali lakatʼun.
\p
\v 9 Chuncha klaqʼalcha ni ixmayul Dios. Ex ikskʼinil
ni kixtaqnil ni jalhiki. Ex yucha kijunil:
\p —Aniycha alinta ni jalhiki. Kachʼapʼacha y kaʼutʼicha.
La minkil ayaj saqsi kunaʼ tacha xaxkan seraj, pero la
mimpajan ayaj sun kunaʼ.
\p
\v 10 Ex kimaqxtaqnil ni jalhiki, ex kʼulcha. Va ayaj
saqsi ixjunita la kinkilna, va tacha xaxkan seraj. Pero
astan la kinpajan ayaj sun val.
\v 11 Astan kijunil:
\p —Uxintʼi tsʼanʼay kʼalaqpʼutʼeʼecha yu katapasayaʼ
oqxlaqlhuu lapanakni lakamunukpaʼ, lakalhuu putaulanaxna,
mas va tichichuncha lhichivin yu talhichiviniy, vachuʼ
pumalhuu jalhachimoʼonun.
\c 11
\s Laqmaqnikan yu pumatʼuy lapanakni yu talhichiviniy Dios
\p
\v 1 Ex ikmaqxtaqnikal maqataun akltiyati, tacha maqataun
kʼiu, yu papulkanankan. Va kunkal:
\p —Kaʼostʼaycha y kʼalkʼatʼi ni chaqaʼ taʼan vil ni Dios.
Vachuʼ kʼalkʼatʼi laka altar. Vachuʼ kʼapʼutʼeʼe tas
qaynchuxicha yu tatoʼoyanan ancha.
\v 2 Taʼan ixlhimaqspaʼ ixchaqaʼ Dios, ancha jantu kʼalkʼatʼi.
Ancha jamaqxtaqnikantacha lapanakni yu jantu katamispal
ixchivinti Dios. Yuʼuncha katachʼintayaʼ ni anchanu
putaulan yu ixnavin Dios, va katachʼintayaʼ 42 malkuyuʼ.
\v 3 Kitʼin ikmalaqachayaʼ pumatʼuy lapanakni. Kintalhichivinanaʼ
y klaqxtaqniyaʼ lakatin para katalaqputeʼel kinchivinti
tus 1260 julchan. Katalakatayayaʼ tacha lapanakni yu
tamaqaninin.
\p
\v 4 Yu aniy qayntʼuy yu kintalhichiviniy va tacha aqatʼuy
kʼiu yu junkan olivo y tacha laʼatʼuy yu xaputayan kantila.
Ni anchanu lapanakni tayanal la ixlakaʼukxpuʼ Dios yu
makal ni lakamunukpaʼ.
\v 5 Incha matichun kalhimaqchapuputul, yuʼuncha tamaxtuy
jikmi la ixkilnakʼan, tus talaqxavaʼojoy tachun ixtʼalaxkayakʼan.
Ex mas va taʼayucha kaval yu kalhimaqchapuputul, yucha
maqskʼiniy kanil.
\v 6 Yuʼuncha talhitʼajun tapʼasta para jantu katamal
xkan tampachun katalaqputeʼeyaʼ ixchivinti Dios. Vachuʼ
talhitʼajun tapʼasta para katamaʼakxajnichal jakʼalnan
ni xkan. Yuʼuncha lay kataxtaqnil maqanlqajnati ni lakamunukpaʼ,
va tavanancha yu yuʼuncha katanaul.
\v 7 Tejkan katalaqputeʼeʼoyacha ixchivinti Dios ex
ni maqtaliʼ yu pataxtuy taʼan pulman laka pachʼin, yucha
kalakmakaniyaʼ lhilukuj. Ex kamaqalhajayacha tus kalaqmaqniyaʼ.
\v 8 Ixlakatunajkʼan katatamakaunaʼ laka tin yu ay putaulan
taʼan makxtukmukʼakal ni ixJalhachimoʼonukʼan. Ni anchanu
putaulan vachu lay kalhimapaqaʼukal Sodoma o Egipto
por ixtalaqalhinkʼan.
\v 9 Tus taʼoqxlaqchux lapanakni yu alin, ali tachun
putaulanaxna ali yu talhichiviniy tachun lhichivin, mas
va toʼoxtaycha kataval, yuʼuncha katalaqtsʼitapasayaʼ
ixlakatunajkʼan taʼan katatamayaʼ ni anu pumatʼuy lapanakni.
Chuncha katapasayaʼ laʼatʼutu julchan apakltaun. Jantu
kaxtaqnikanaʼ lakatin kalakmaknukal.
\v 10 Ex tachun lapanakni ayaj katalhiʼachantajuyaʼ
tus katamakayaʼ kʼatan. Katalaxtaqniyaʼ axtoqnuʼ por
tanitacha ni anu pumatʼuy lapanakni yu ixtalaqputeʼey
ixchivinti Dios. Ni anchanuʼ pumatʼuy ayaj ixtamamaqanlqajnivay
ni lapanakni. Xlhiyucha tejkan kataniyaʼ ayaj katalhiʼachantajuyaʼ.
\v 11 Astan tejkan taqayntsalcha laʼatʼutu julchan apakltaun
ex tanul la ixlakatunajkʼan ni ixʼun ni Dios yu xtaʼa
jatsukunti. Ex taʼostayachoqolcha aaqtaun. Ex tachun
yu ancha ixtalaqtsʼitapasal ayaj tatalhanal.
\v 12 Ex ni pumatʼuy lapanakni pʼays jamatʼasakal kun
chivinti yu minchal tus laktʼiyan, va jalakjunkal:
\p —¡Kʼapʼatʼaxtʼutʼantʼikcha aniy!
\p Ex tapataxtulcha laka taputsʼi y tachun yu ixtʼalaxkayninkʼan
tus ox talaqtsʼil.
\v 13 Va exnicha nimancha aqtayl jaxkapʼiknin lakatʼun.
Laqatamin por laqakavin xachaqan ni anchanuʼ putaulan
tus talaqcheʼeʼol. Tanil laqatujun mil lapanakni. Chuncha
yu vananaj taxajchal va tatalhanal. Taʼaqtayl ay tamakay
ni Dios yu vilchal laktʼiyan.
\v 14 Ni aqtʼiyunu maqanlqajnati chavay tapasaʼolcha.
Chavay mintacha yu aqtʼutunu maqanlqajnati.
\s Yu pumatujunuʼ ixmayul Dios pusuntajuy isqol
\p
\v 15 Ni pumatujunuʼ ixmayul Dios sqolil. Ex yu ixtavilanal
laktʼiyan va pʼays tamakatʼaul, tanaul:
\q Chavaycha xapalhachimoʼon ni lakamunukpaʼ va ixnavin
ni Dios
\q vachuʼ ni Cristo yu ulakal para kalhachimoʼonul.
\q Yucha kalhachimoʼonunaʼ mas va tavanancha kaval.
\m
\v 16 Ex ni pʼuxauntʼati xapaynin yu ixtavilanal la
ixlakaʼukxpuʼ Dios taʼan talhachimoʼonun, yuʼuncha tatalakaputatamal
lakatʼun, aqtayl tatoʼoyay ni Dios, va tajunil:
\q
\v 17 KiJalhachimoʼonu Dios kʼatʼi, klaxtaqniyau lhimalaqpuchuncha.
\q Uxintʼi lhitʼajun tachun tapʼasta.
\q Uxintʼi tʼaʼun, vachuʼ ixtʼaʼun mas va maqancha, vachuʼ
kaminchoqoyaʼ.
\q Chavaycha aqtʼayniy jalhachimoʼonun.
\q
\v 18 Ni lapanakni yu jantu katamispan, tatalqauniyan.
\q Chavay uxintʼi tʼalʼaman.
\q Laqchaʼalcha julchan para kʼamukʼanin ixlaqtaqalkʼan
ni lapanakni yu tanitacha.
\q Chavaycha kaxtʼaqniyeʼe ixlhilhajatkʼan ni lapanakni
yu tatapatsanin yu talaqputeʼey minchivinti,
\q vachu milapanakni yu tatoʼoyay mintaqaʼuti,
\q yu lajʼay ali yu jantu lajʼay kataval.
\q Chavay vachuʼ katamaqanlqajnanaʼ yu tamamaqanlqajnival
milapanakni lakamunukpaʼ.
\p
\v 19 Ex talaqltiʼal ixchaqaʼ ni Dios yu alintachal
laktʼiyan. La ixpulakna tasul ni kaja taʼan tajun ni
chivinti yu xtaqlhi ni Dios para chʼantaun kaval kun
ixlapanakni. Ex alil taun pʼays makaliukniti kun laktʼasati,
yu lakatʼun pʼays jaxkapʼiknil y tamal lhuu chajʼiti.
\c 12
\s Ni xanati ali yu ay tsapul
\p
\v 1 Ex ni laktʼiyan tasul taun tuʼuchun yu jantu aqtaun
katasul. Va qayntaun xanati yu ixlhilakayal julchan.
Yu malkuyuʼ ixjukʼal la ixqaltaʼapuʼ ixchʼajaʼ. Laqakautʼuy
jastʼakun ixtajukʼanal la ixʼaqtsul.
\v 2 Ni anu xanati jaʼaynaʼ ixjunita, va ayaj pʼays ixtʼasay,
va ixmaqanlqajnan por ixpaqputunta.
\v 3 Vachuʼ ni laktʼiyan tasul aputaun ay tuʼuchun, yu
tacha ay tsapul ixtasuy. Va la xlapul y va laqatujun
ixʼaqtsul kun laqatamin korona ali maqakau ixʼaqaloqoti.
\v 4 La ixtiʼistaj va puxaqamalhaʼal lhuu jastʼakun,
tampataun yu pumaʼatʼutu xaqamalhaʼal, ex laqtanqalhumal
lakatʼun. Ni anchanu ay tsapul aqatayal ukstsʼuniy ni
xanati para niman kaʼunil sasʼatʼa tejkan kalhitsukuyaʼ.
\v 5 Taval ni anchanu xanati lhitsukulcha sasʼatʼa, va
tsʼal. Va yucha yu kalhachimoʼonunaʼ taʼakapuchun lakamunukpaʼ
kun lhuu tapʼasta la ixmakaʼ. Ni anchanu sʼatʼa niman
lhaankal taʼan vilchal Dios tus taʼan jalhachimoʼonun.
\v 6 Ex ni xanati nimancha jaqosnul, alcha lakatʼun taʼan
jantu matichun kataulal. Ancha Dios ixlaʼoxita taʼan
lay kataulal, ancha kavavayaʼ tus 1260 julchan.
\p
\v 7 Exnicha alil taun ay lhilukuj laktʼiyan. Ni Miguel
ali alati ixmayulnin Dios talachʼapachal kun ni anchanu
ay tsapul ali ixmayulnin.
\v 8 Taval tatsʼanqal ni tsapul kun ixmayulnin. Ex jantucha
apalay kalaqxtaqnikal lakatin katataulal laktʼiyan.
\v 9 Ni anchanu ay tsapul va tatinaqxtulcha laktʼiyan
kun ixmayulnin. Yucha ni tsapul yu alil maqancha, vachu
junkan Diablo ali Satanás. Yucha jamakanuy tachun ni
lapanakni lakamunukpaʼ.
\p
\v 10 Ex alil taun pʼays chivinti yu naul:
\p —Chavay ni Dios kintamalaqtaxtutancha. Chavay chintacha
ni Dios tacha ay Jalhachimoʼonuʼ kun lhuu tapʼasta, chintacha
ni Cristo yu ulakal kun ixpalhachimoʼon. Va tatinaqxtulcha
laktʼiyan ni anchanuʼ yu si mukʼay laqtaqal. Yucha ixlaktislajmay
ketʼalaqauninkʼan, tsʼis ali tunkuj, la ixlakaʼukxpu ni
Dios.
\v 11 Ni ketʼalaqauninkʼan tamaqalhajal ni ay tsapul.
Tapulhajal ixjakʼalna ni Sasʼatʼa borrego vachu por
ni chivinti yu ixtalaqputeʼey. Jantu katatalhanal, va
ixtatamaqxtaqtacha mas katanil.
\p
\v 12 ’Xlhiyucha kʼalhiʼachʼantʼaʼutʼikcha uxiknan yu
vilanantʼik laktʼiyan. Payniʼincha uxiknan yu vilanantʼik
lakatʼun ali lakamar. Ni ay aqmoqxnuʼ chavay talaqʼanchaʼancha
taʼan vilanantʼik. Yucha ayaj lukujlata, va kʼatsay ni
jantucha maqan kataulaʼ.
\p
\v 13 Tejkan ni anchanuʼ ay tsapul tinaqmalaqachakal
lakatʼun ex niman takyauʼal lakxkaunaʼ ni xanati yu
lhitsukul qayntaun istsʼal.
\v 14 Pero ni xanati maqxtaqnikal pakatʼuy paqachuj
tus tacha ixpaqachuj atsʼoʼo para lay kaltilinijʼal
taʼan laʼoxikantacha para kataulal lakakʼavin. Va ixlhimaqati
taʼan kataulal ni ay tsapul. Ancha kavavakanaʼ laʼatʼutu
jachʼitin apakltaun.
\v 15 Ex ni tsapul xnaq kiltaxtul lhuu xkan tus tacha
maqataun ay laʼaxkan para kamamuxtul ni xanati taʼan
ixvil.
\v 16 Pero ni lakatʼun ayaj aqtayjul ni xanati. Niman
lvaq tapulqal, ex ancha talaqtsʼanqaʼol tachun ni laʼaxkan
yu kiltaxtul ni tsapul.
\v 17 Chuncha ni tsapul ayaj lukujlanil ni xanati. Ex
alcha makan lhilukuj kun alati sasʼatʼan ni xanati.
Yuʼuncha tamakay yu lhinajun ni Dios y ox tataylhaaniy
la ixchivinti Jesucristo.
\c 13
\s Laʼatʼuy maqtalin
\p
\v 1 Ni kitʼin xakyal laka kukuj taʼan ixkilpaʼ ni lakamar.
Ex klaqtsʼil ni takuklhi laqataun ay maqtaliʼ. Va laqatujun
ixʼaqtsul ixjunita, ixlhitʼajun maqakau ixʼaqaloqoti.
La ixʼaqaloqoti ixʼalin laqakau korona. Ixlakpajukʼal
laqxtoqnu chivinti yu jantu ox lhichiviniy Dios.
\v 2 Ni maqtaliʼ yu klaqtsʼil va tacha laqataun tigre
ixtasuy, la ixchʼajaʼ tus tacha ixchʼajaʼ oso ixtasuy,
la ixkilna tus tacha ixkilna león. Ex ni ay tsapul maqxtaqnil
ixtapʼasta ali ixpalhachimoʼon para kalhachimoʼonul.
\v 3 Ex klaqtsʼinil laqataun ixʼaqtsul ni maqtaliʼ.
Ixtasuy tacha kalaqpacheʼekal tus kanil, pero astan palay
junchoqol. Ex ni lapanakni tus taun talhilal y tachun
chʼantaun tatʼaval.
\v 4 Tatoʼoyal ni ay tsapul, va yucha maqxtaqnil ixtapʼasta
ni maqtaliʼ. Vachu tatoʼoyal ni maqtaliʼ. Tatatsoqoqtanil,
va tanaul:
\p —¿Taʼayucha ay tacha yucha? ¿Taʼayucha lay makay lhilukuj
kun yucha?
\p
\v 5 Vachu ni ay tsapul xtaqnil lakatin ni maqtaliʼ
para ay kamakakal y jantu ox kalhichivinil ni Dios.
Va xtaqnil tapʼasta para kalhachimoʼonul 42 malkuyuʼ.
\v 6 Chuncha aqtaylcha juniy chivinti yu jantu ox lhichiviniy
Dios, jantu ox lhichiviniy ixtaqaʼuti Dios. Jantu ox
ixlhichiviniy taʼan Dios toʼoyakan, vachu jantu ox ixlhichiviniy
tachun yu ancha tatʼavilanal ni Dios laktʼiyan.
\v 7 Xtaqnikal lakatin kamakanil lhilukuj ixlapanakni
Dios tus kalaqmaqalhajal. Vachuʼ xtaqnikal lhuu tapʼasta
para kalhichimoʼol taʼoqxlaqchux lapanakni, talakachux
putaulan, mas va tisuncha ixlhichivinkʼan, mas va tisuncha
palhachimoʼon.
\v 8 Tatoʼoyal ni maqtaliʼ tachun ni lapanakni lakamunukpaʼ
yu jantu katsʼoqʼulakal la ixlibro ni Sasʼatʼa borrego
yu maqnikal. Yu talhitʼajun jatsukunti ancha jatsʼoqʼulakanta
mas tus tejkan jantukaʼ ixʼalin lakamunukpaʼ.
\p
\v 9 Yu talhitʼajun ixpaqasmaknikʼan va kataqasmaklhi
yu inchineʼ.
\v 10 Yu talhaʼan lapanakni lakapachʼin yuʼuncha vachuʼ
kataʼanaʼ lakapachʼin. Yu japumaqninin espada yucha
vachuʼ kapuniyaʼ espada. Yu laqsaval ixlapanakni Dios
tajunita, yuʼuncha tsʼanqay katamaqantaulal yu katapasayaʼ,
va katataylhaanil la ixlhakapuʼatkʼan.
\p
\v 11 Astan klaqtsʼil alaqataun maqtaliʼ ixpataxtuta
lakatʼun. Ixlhitʼajun maʼatʼuy ixʼaqaloqoti tacha ixʼaqaloqoti
sasʼatʼa borrego. Ixchiviniy tacha yu ay tsapul.
\v 12 Yu ixtapʼasta va aqstanchun tacha yu pʼunaj maqtaliʼ,
ancha chʼantaun ixtʼayal. Ni anu maqtaliʼ laqatapʼasta
jalakmakal ni lapanakni lakamunukpaʼ ni katatoʼoyal
yu pʼunaj maqtaliʼ. Yucha yu laqpacheʼekal y ixtasuy
tacha kaniyaʼ pero palay junchoqol.
\v 13 Yu ataun maqtaliʼ vachuʼ ixmakay lajʼay axtoqnuʼ
yu jantu aqtaun laqtsʼinkan. Lay ixmaʼeltajuy jikmi
laktʼiyan para katamachil lakatʼun la ixtalakavantikʼan
tachun ni lapanakni.
\v 14 Chuncha xtaqnikanta tapʼasta para kamakal lajʼay
axtoqnuʼ la ixlakaʼukxpuʼ yu pʼunaj maqtaliʼ. Xlhiyucha
ox jalakmakanul ni lapanakni lakamunukpaʼ. Jalaklhijunil
katamakanil laqataun antivaj chuncha tacha tasuy yu
pʼunaj maqtaliʼ yu ixlaqpaqcheʼekal pero jantu kanil.
\v 15 Vachuʼ xtaqnikal tapʼasta para lay kamaqloʼol
ni antivaj yu ixtʼatasuy yu pʼunaj maqtaliʼ. Tus lay
kachivinil ni antivaj y kamaqniʼol tachun yu jantu katatoʼoyal.
\v 16 Yucha lhinaul kalakmuntimukʼakal laqatamin jatsʼoqnuti
la ixmajkanajkʼan tachun ni lapanakni, mas yu lakstʼuniy
ali yu lajʼay, yu maʼalinin ali yu kilpatanin, yu oqxtamatin
ali yu jantu oqxtamatin kataval.
\v 17 Yu jantu kalhitsukuyaʼ ni jatsʼoqnuti jantu lay
kaʼiyaʼ u kastʼayaʼ tuʼuchun. Ni anu jatsʼoqnuti va
ixnumero u ixtaqaʼuti ni maqtaliʼ.
\v 18 Maqskʼiniy jatapastakʼati para kʼamalaʼasitʼi
yu inchineʼ. Taʼayuʼ yu mispay, va kamalaqasil ixnumero
ni maqtaliʼ. Va xanumero lapanaki. Ni anchanuʼ numero
va 666.
\c 14
\s Tamilpay yu 144,000 lapanakni
\p
\v 1 Ex klakavanal, va klaqtsʼil ni Sasʼatʼa borrego
ixyal laka aspajun yu junkan Sión. Ancha ixlaktʼayal
144,000 lapanakni. La ixmuntsankʼan ixtalhitʼajun
ixtaqaʼuti ni Sasʼatʼa borrego ali ixtaqaʼuti ixPay.
\v 2 Astan ijqasmaklhi ni pʼays ixmakatʼajun taun tuʼuchun
laktʼiyan tacha kamil maqataun laʼaxkan, tacha makaliukniti
ali laktʼasati ixmakatʼajun. Yu ijqasmaklhi va tacha
lhuu arpas yu tasay lapanakni.
\v 3 Ixtamilpay titaun saystʼi milpati taʼan vil ni
Jalhachimoʼonu Dios. Ixtamilpay la ixlakaʼukxpukʼan
yu laʼatʼati talhitsukuti yu takujta ali yu pʼuxauntʼati
ay lapanakni. Jantu matichun lay ixlaniy ni milpati,
vamun yu 144,000 lapanakni yu jamalaqtaxtukal lakamunukpaʼ.
\v 4 Yuʼuncha va yu jantu katamakal laqtaqal kun xanatin,
ox jalaklhistakkal la ixjatsukuntikʼan. Tatʼaʼan ni
Sasʼatʼa borrego mas va toʼoxtaycha puʼan. Va chʼantaun
ixtajunita kun xalapanakni aniy lakamunukpaʼ pero jamalaqtaxtukal
para kataval tacha taun ox lapaxkan yu jamoqslanikan
ni Dios ali yu Sasʼatʼa borrego.
\v 5 La ixkilnakʼan jantu aqtaun katakiltaxtul jalaklkanti.
Jantu katalhitsukul tuʼuchun laqtaqal.
\s Yu tanaul ni pumatʼutu ixmayulnin Dios
\p
\v 6 Astan klaqtsʼil apumataun ixmayul Dios, ixjaltilinijʼanta
la ixtanʼajna laktʼiyan. Ixlhaʼanta yu laqsastʼi chivinti
yu la ox yu jantu miʼojoy. Va para kalaqputeʼenil tachun
ni lapanakni yu tavilanal lakamunukpaʼ, mas va toʼoxtaycha
palhachimoʼon, mas va tisuncha lhichivin yu tachiviniy,
taʼoqxlaqchux lapanakni.
\v 7 Pʼays ixchiviniy, va najun:
\p —¡Katʼoʼoyatʼik ni Dios kun talhanti! ¡Chavay va laqchaʼalcha
julchan para kamukʼanil laqtaqal ni lapanakni yu tapaxtoqniy!
¡Katʼoʼoyatʼik, va yucha makal laktʼiyan ali lakatʼun
ali lakamar ali laqxqatij!
\p
\v 8 Astan chinchaʼal aqayntaun ixmayul Dios, va najun:
\p —¡Chavay taqtalcha, va taqtalcha, talaqalhiʼolcha ni
ay putaulan Babilonia! Va jamamaqtaqalhinil taʼoqxlaqchux
lapanakni lakamunukpaʼ. Va tacha kalakmalanil jaʼoqnuti
kun ixlhiʼotʼati.
\p
\v 9 Astan vachuʼ chinchal aqayntaun ixmayul Dios, yu
pumatʼutunuʼ, pʼays ixchiviniy, va najun:
\p —Jantu ox yu katatoʼoyayaʼ ni maqtaliʼ ali ixʼantivaj
yu ixtʼatasun. Vachuʼ jantu ox yu katalaqaʼiyaʼ ixjatsʼoqnuti
la ixmuntsan u la ixmakaʼ.
\v 10 Yuʼuncha katalaqaʼiyaʼ ixlhilukuj Dios. Va tacha
kataʼoqyaʼ pʼays maqanlqajnati yu jalaʼoxinti laka vaso.
Katamaqanlqajnanaʼ laka azufre, va pʼays maqtajita la
ixtalakavantikʼan ixmayulnin ni Dios ali yu Sasʼatʼa
borrego.
\v 11 Xajin ni lapanakni yu katalaqaʼiyaʼ jamaqanlqajnati
katantʼaqstʼayaʼ talman mas va tavanancha y jantu aqtaun
katamaqtayaʼ. Yuʼuncha jantu katastaknanaʼ mas tsʼis,
mas tunkuj. Va por tatoʼoyal ni maqtaliʼ ali ixʼantivaj
y talaqaʼil xajatsʼoqnuti ixtaqaʼuti la ixlakatunajkʼan.
\v 12 Xlhiyucha maqskʼiniy katamaqantʼaqnil ixlapanakni
Dios, yu tamakay yu lhinajun, yu ox tataylhaʼan kun Jesucristo.
\p
\v 13 Ex ijqasmaklhi chivinti yu minchal laktʼiyan, va
kijunil:
\p —Katsʼoqʼulatʼi ni aniy chivinti: “Chavay katalhiʼachantajuyaʼ
tachun yu taniy incha chʼantaun tajunita kun ni Jalhachimoʼonu
Jesús.” Najun ni Espíritu yuʼuncha katastaknanacha,
jantucha katatapatsayaʼ. Ox lhitapatsa tamakal aniy
lakamunukpaʼ, xlhiyucha ancha katalaqaʼiyaʼ yu lajʼox.
\s Xajaxqanti lakamunukpaʼ
\p
\v 14 Ex klakavanal y klaqtsʼil taputsʼi yu ox xutʼutʼu.
La ixʼukxna ni laka taputsʼi ancha ixvil qayntaun yu
ixtasuy tacha Sasʼatʼa Lapanaki. La ixʼaqtsul ixlhaʼanta
laqataun korona si oro. Ixchʼapalhaʼanta aqxtaun chitaj
yu ox kikxtuy.
\v 15 Ex chuncha la ixchaqaʼ ni Dios takyautaxtul aqayntaun
ixmayul Dios. Pʼays ixmatʼasay, junil yu ixvil laka taputsʼi:
\p —¡Kʼamapʼatsʼatʼi ni minchitaj, kʼaxʼaʼitʼicha yu jaxqanti.
Laqchaʼalcha julchan para kʼamaʼatʼi, oxicha katʼata!
\p
\v 16 Chuncha yu ixvil la ixʼukxna laka taputsʼi matajul
ixchitaj lakatʼun. Ex taʼakapuchun ni lakamunukpaʼ jaxqananʼokalcha.
\p
\v 17 Ex taxtul aqayntaun ixmayul Dios ni anchanu chaqaʼ
laktʼiyan. Vachu ixlhaʼanta aqxtaun chitaj yu ox kikxtuy.
\v 18 Vachu taxtul aqayntaun ixmayul Dios ni laka altar.
Yucha ixlhichimoʼoy ni jikmi. Pʼays pukiltʼasanil, junil
ni mayul yu ixlhaʼanta chitaj, va naul:
\p —¡Kʼalaqchʼaqxpʼuxnincha ixlaqapʼu ni uva yu alin lakamunukpaʼ!
Oxicha katʼata xaʼunikan.
\p
\v 19 Ex ni mayul matajul ixchitaj lakatʼun, va pʼuxʼolcha
ni uva. Va lakataun mujul xaʼunikan taʼan xapachʼikni
uva. Ancha tus ox pʼal ixvil ixlhilukuj ni Dios.
\v 20 Ni uva laqpichʼaqxkal ixlhimaqspaʼ taʼan ay putaulan.
La xapachʼikni tixajchal maqataun maqaʼay laʼaxkan si
jakʼalnan. Jaltanal tus 300 kilometros ixpuʼayaxtu ixjunita, ixtalmanixtu
tacha ixqaltsʼan laqataun juki.
\c 15
\s Pumatujun ixmayulnin Dios yu talhimin maqanlqajnati
\p
\v 1 Ni laktʼiyan klaqtsʼil ataun ay tuʼuchun, yu kitʼin
tus vak ijkʼatsal. Klaqtsʼil pumatujun ixmayulnin Dios,
si ixtalhaʼanta laqatamin maqanlqajnati. Yucha va yu
kapumamaktayacha ni Dios ixlhilukuj yu kalaqxtaqniyaʼ
ni lapanakni.
\p
\v 2 Vachuʼ klaqtsʼil taun lakamar tacha spejo, va ixlaqlhiyal
jikmi. Ancha ixtayanal lapanakni yu tamaqalhajal ni
ay maqtaliʼ ali ixʼantivaj ali ixnumero tejkan talachʼapal.
Tachun si ixtachʼapalhaʼanta arpas yu Dios jaxtaqnil.
\v 3 Ixtamilpay ixmilpati ni Moisés yu ixtapatsaniy
Dios, ali ixmilpati ni Sasʼatʼa borrego, va ixtanajun:
\q Dios, uxintʼi tachun axtoqnuʼ yu makʼay va si lajʼay.
\q Uxintʼi unitʼa ay Jalhachimoʼonu Dios, chux lay makʼay.
\q Uxintʼi vas makʼay tachun milhitapatsa.
\q Xajalhachimoʼonuʼ kʼatʼi taʼoqxlaqchux lapanakni.
\q
\v 4 Jalhachimoʼonuʼ, ¿taʼayucha jantu ay makaputun mintaqaʼuti?
\q ¿Taʼayucha jantu katoʼoyan?
\q Vamun uxintʼi lhitʼaunʼoʼoy yu lajʼox.
\q Taʼoqxlaqchux lapanakni katalaqminan, katatoʼoyayan.
\q Takʼatsay ni ox pʼuxkʼaulaqtsʼin laqtaqal.
\p
\v 5 Astan klaqtsʼil talaqltiʼal taʼan toʼoyakan Dios
ni chaqaʼ yu talhipaqay laqchʼiti.
\v 6 Ancha tataxtul ni pumatujun ixmayulnin Dios yu
ixtalhitʼajun laqatujun maqanlqajnati. Ixtaʼulata yu
kʼus xnapapa laqchʼiti. Ixjalhitampachʼikanta kun cinturón
yu oro.
\v 7 Ex xaqayntaun yu laʼatʼati talhitsukuti yu takujta
jamaqxtaqnil laqatamin vaso yu jamakanti kun oro ni
pumatujun mayulnin. Pʼal ixtavilanal ixlhilukuj Dios
yu tʼajun mas va tavanancha kaval, jantu aqtaun katamaktal.
\v 8 Ni chaqaʼ tus puʼaqtsaunʼol jin yu minchal ixʼayaxtu
ali ixtapʼasta ni Dios. Jantu matichun lay ixtanuyachal,
pʼunaj maqskʼiniy katamaktaʼelal ni putujun maqanlqajnati
yu ixtalhaʼanta ni qayntujun mayulnin.
\c 16
\s Xavasos maqanlqajnati
\p
\v 1 Ex ijqasmaklhi la ixchaqaʼ Dios ixjamatʼasakan
kun pʼays chivinti ni pumatujun mayulnin, ixnaunkan:
\p —Kapʼintʼikcha laqxteqenin lakatʼun ni laqatujun vasos
yu pʼal tavilanal ixlhilukuj ni Dios.
\p
\v 2 Ex yu xapʼunaj ixmayul Dios va alcha laqxteqemanaʼ
lakatʼun ixlhilukuj ni Dios laka vaso. Ex tachun ni
lapanakni yu ixtalhitʼajun ixjatsʼoqnuti ni maqtaliʼ
y vachu yu tatoʼoyal ixʼantivaj ni yucha, yuʼuncha niman
talakaxajchil lakapuchʼiti yu pʼays xkay.
\p
\v 3 Taval aqayntaun ixmayul Dios laqxteqemajʼal la
ixvaso ixlhilukuj ni Dios taʼan la ixʼukxna lakamar.
Ex ni xkan tapalal jakʼalnan tacha ixjakʼalna qayntaun
janiniʼ. Tachun talhitsukuti yu alin lakamar taniʼol.
\p
\v 4 Tejkan ixtaʼantacha yu qayntʼuy ex aqayntaun ixmayul
Dios laqxteqemajʼal la ixvaso ixlhilukuj ni Dios tachun
laʼaxkan y vachu tachun laqxqatij. Ex si tatapalal jakʼalnan.
\v 5 Ex ijqalasmaklhi ixmayul Dios yu laqalhil ni xkan,
va naul:
\p —Uxintʼi, kiJalhachimoʼonu Dios kʼatʼi, uxintʼi va yu
ixtʼaʼun maqancha, mas chavaycha, mas va tavanancha. Uxintʼi
tachun laqlaʼoxiy, va ox lakmukʼay ni aniy jamaqanlqajnati.
\v 6 Yuʼuncha talhavanal ixjakʼalnankʼan milapanakni
ali ixjakʼalnankʼan yu ixtalaqputeʼey minchivinti tejkan
tamaqnil. Chavaycha uxintʼi jalakmaʼotʼuy jakʼalnan,
chuncha tapaxtoqniy katalaqaʼil maqanlqajnati.
\p
\v 7 Vachuʼ ijqasmaklhi chivinchoqokal tus laka altar,
va naul:
\p —¡Laqsaval, Jalhachimoʼonu Dios kʼatʼi, uxintʼi chux
lay makʼay. Vas pʼuxkʼaulaqtsʼin laqtaqal yu tapaxtoqniy!
\p
\v 8 Tejkan ixʼantacha yu qayntʼutu ixmayulnin Dios,
ex aqayntaun ixmayul laqxteqemajʼal la ixvaso ixlhilukuj
ni Dios ni laka julchan. Chuncha ni julchan lhitsukul
tapʼasta para kajalaqxaval lapanakni kun jikmi.
\v 9 Ni lapanakni pʼays ixtaʼichiy kun ixkilmaknauxtu
ni julchan. Mas vamun Dios lhitʼajun tapʼasta para kamalaqachanil
jamaqanlqajnati, ni lapanakni vamun laqxtoqnuʼ chivinti
tajunil ni Dios. Jantu katamapaxal ixjatapastakʼatkʼan,
jantu katatoʼoyal ni Dios.
\p
\v 10 Tejkan ixʼantacha ni qayntʼati ixmayulnin Dios
ex aqayntaun ixmayul laqxteqemajʼal la ixvaso ixlhilukuj
ni Dios taʼan jalhachimoʼonun ni maqtaliʼ. Ex tus taʼakapuchun
taʼan lhachimoʼonun putsʼisʼol. Chuncha ni lapanakni
yu tatoʼoyal tus ixtapatsʼakʼamay isimaʼatkʼan por ixkayaxtu.
\v 11 Mas chuncha val, jantu katamakauntijlal ixtalaqalhinkʼan.
Vamun laqxtoqnuʼ chivinti tajunil ni Dios yu vilchal
laktʼiyan por pʼays ixtaxkaniy ixlakapuchʼitkʼan.
\p
\v 12 Tejkan ixʼantacha ni qaynkis ixmayulnin Dios ex
aqayntaun ixmayul laqxteqemajʼal la ixvaso ixlhilukuj
ni Dios taʼan ay laʼaxkan yu junkan Eufrates. Tachun
ni xkan tus xixʼol. Xlhiyucha ni lajʼay jalhachimoʼonun
yu takuktachal, taʼan putʼakʼuta julchan, lay talaqpusa
para katachinchal.
\p
\v 13 Ex klaqtsʼil laʼatʼutu espíritus yu ixtalaktuʼunun,
ixtatasuy tacha terunin. Laqataun taxtul la ixkilna
ni ay tsapul, yu alaqataun taxtul la ixkilna ni maqtaliʼ.
Yu ataun taxtul la ixkilna ni lapanaki yu najun ni laqputeʼey
ixchivinti Dios mas jantu laqsaval kaval.
\v 14 Yuʼuncha va ixʼespírituskʼan ni aqmoqxnun yu lay
tamakay lajʼay axtoqnuʼ. Yuʼuncha jalaqmaqxtoʼa ni lajʼay
xajalhachimoʼonun taʼakapuchun lakamunukpaʼ. Najun kataʼal
makanan lhilukuj ni anchanu julchan tejkan kaminaʼ ni
ay Jalhachimoʼonu Dios yu lhitajun tachun tapʼasta.
\v 15 Jesucristo najun: “Kʼamakʼatʼik kuenta. Ni kitʼin
tsʼalaj kakchinaʼ tacha qayntaun alhavanaʼ. Ox kaxajtachal
ni lapanaki yu ox kʼatsajvil y ox ulata ixlaqchʼiti.
Ex jantu katijuntayal tiʼasas y jantu kalhitamaxanil.”
\p
\v 16 Ex jamaqxtoqkal ni jalhachimoʼonun taʼan junkan
Armagedón laka lhihebreo.
\p
\v 17 Tejkan ixʼantacha yu qaynchaxan ixmayulnin Dios
ex yu aqayntaun ixmayul laqxteqemajʼal la ixvaso ixlhilukuj
ni Dios laka unin. Ex makatʼaul taun pʼays chivinti
laqa chaqaʼ, taʼan jalhachimoʼonun Dios, va naul:
\p —¡Tachun tamaktaʼolcha!
\p
\v 18 Chuncha alil makaliukniti, pʼays chivinkal, makatʼaul
taun pʼays jamaxkan, vachu jaxkapʼiknil lakatʼun. Ayaj
pʼays jaxkapʼiknil tus jantu aqtaun chuncha kaxkapʼiknil
mas tus tejkan puʼaqtaynil tatsukuy lapanakni lakamunukpaʼ.
\v 19 Ex ni ay putaulan tapucheʼel tus pumaʼatʼutu val.
Tachun putaulanaxna yu alin lakamunukpaʼ talaqcheʼetamaʼol.
Dios pastakʼol tachun ixtalaqalhin ni ay putaulan Babilonia.
Ex maʼotuʼol tachun xaxkan uva yu ixtajun laka vaso
yu ixlhilukuj Dios.
\v 20 Ex tachun lakatʼun yu ixtavilanal la ixtanʼajna
lakamar ali vachu aspajunaxnan, si valiʼiy vak talaqmixlhi.
\v 21 Ex patajul lajʼay chajʼiti ni lakatʼun taʼan ixtavilanal
ni lapanakni tus tʼuy pʼuxaun kilos istsʼinkʼixtu laqatamin.
Ni lapanakni ayaj pʼays ixtamaqanlqajnan, xlhiyucha ayaj
laqxtoqnuʼ tajunil ni Dios.
\c 17
\s Ni ay putaulan va tacha maqtaqalhini xanati
\p
\v 1 Ex chuncha mil xaqayntaun yu pumatujun ixmayul
Dios yu ixtalhitʼajun laqatujun vasos yu ixputajun ixlhilukuj
Dios. Va kijunil:
\p —Katʼatʼi aniy. Kitʼin kakmasuniyan tacha Dios kamukʼaniyaʼ
ixmaqanilqajnati ni anu maqtaqalhini xanati yu vil la
ixʼukxna lakamar.
\v 2 Ni xajalhachimoʼonun lakamunukpaʼ tamakal laqtaqal
kun anu xanati. Xalapanakni lakamunukpaʼ va tacha tataʼapʼal
kun ixlhiʼotʼati tejkan tamakal laqtaqal kun yucha.
\p
\v 3 Chuncha ixmayul Dios kilhaʼal lakakʼavin, ancha
ni Espíritu kimasunil tuʼuchun. Ancha klaqtsʼil qayntaun
xanati ixputaukʼalhaʼanta laqataun xlapul maqtaliʼ.
Taʼakchun ixlakatunaj ni maqtaliʼ ixlaqatsʼoqmukʼakanta
taqaʼuti yu jantu ox lhichiviniy Dios. Ixlhitʼajun laqatujun
ixʼaqtsul ali maqatujun ixʼaqaloqoti.
\v 4 Ni anu xanati ixlakayal kun aqxtaun laqchʼiti yu
ixlhimanikanta xlapul ali stʼunuu. Vachuʼ ixlakaxantilakanta
kun oro ali chiyux yu laqlhuu xtapal ali yu laqspututu
kʼuliksnaʼ chiyux. Vachuʼ ixchʼapata laqataun vaso yu
jamakanti kun oro. Tus pʼal ixvil tachun ixtalaqalhin
yu makal kun joʼakna.
\v 5 La ixmuntsan ixmuntijukʼal laqataun taqaʼuti yu
jantu mispakan, va naunputun: “Ay putaulan Babilonia,
ixnatikʼan tachun maqtaqalhinin xanatin. Vachu ixnati
tachun laqtaqal yu tamakay xalapanakni lakamunukpaʼ.”
\v 6 Astan ikmakal kuenta ni anu xanati ox taʼapʼan
ixjunita. Ixlhitaʼapʼata ixjakʼalnankʼan ixlapanakni
Dios yu jamaqnikal por ixtalhichiviniy ni Jesucristo.
Tejkan klaqtsʼil tus taun klhilal.
\v 7 Ni mayul kijunil:
\p —¿Valiʼiycha tus taun lhilay? Kitʼin kajkunan para
kamalaʼasitʼi ni anu xanati ali yu maqtaliʼ yu putaukʼalhaʼanta
yu lhitʼajun laqatujun ixʼaqtsul ali maqakau ixʼaqaloqoti.
\v 8 Ni maqtaliʼ yu laqtsʼi yucha ixtʼajun pʼunaj pero
chavay jantucha tʼujuʼ. Yucha katakukchoqoyaʼ la xajapoʼan
yu la pulman. Ex astan kamiʼoyaʼ. Tejkan puʼaqtaynil
ni lakamunukpaʼ lati lapanakni jatsʼoqʼulakal ixtaqaʼutkʼan
laka libro yu masuy taʼayucha katsukuyaʼ. Tachun yu
jantu katsʼoqʼulakal ancha tus taun katalhilayaʼ tejkan
katalaqtsʼinaʼ ni maqtaliʼ yu ixtʼajun pʼunaj, chavay
nitacha, pero aaqtaun katsukuchoqoyaʼ.
\p
\v 9 ’Tsʼanqay jatapastakʼati para kamalaʼasitʼi: Yu
laqatujun ixʼaqtsul naunputun laqatujun aspajun taʼan
vil ni xanati.
\v 10 Vachu naunputun qayntujun yu lajʼay jalhachimoʼonun.
Qaynkis tamaqatsʼanqal ixpalhachimoʼonkʼan. Qayntaun
chavaycha tajun. Yu aqayntaun jantukaʼ min jalhachimoʼon.
Tejkan kaminaʼ jantu maqan kalhachimoʼonunaʼ.
\v 11 Tejkan katapasayacha qayntujun jalhachimoʼonun,
ex kaʼalinchoqoyaʼ qayntaun yu ixʼalin. Yucha ni maqtaliʼ
yu ixtʼajun maqancha yu chavay jantucha tʼujuʼ. Va chʼantaun
kun yu qayntujun. Kanichoqoyaʼ tejkan kaminchoqoyaʼ
jalhachimoʼon.
\p
\v 12 ’Yu maqakau ixʼaqaloqoti ni maqtaliʼ yucha naunputun
qaynkau jalhachimoʼonun pero jantukaʼ talaqaʼiy ixpalhachimoʼonkʼan.
Vamun taun panchʼix katalhachimoʼonunaʼ chʼantaun kun
ni maqtaliʼ.
\v 13 Yuʼuncha tachun va chʼantaun ixjatapastakʼatkʼan
y tachun ixpalhachimoʼonkʼan si katamaqxtaqniyaʼ ni
maqtaliʼ.
\v 14 Katalaqataqyaʼ ni Sasʼatʼa borrego pero yucha
kalaqmaqalhajayaʼ. Yucha vamun yuʼ ay Jalhachimoʼonuʼ
junita, apalay ay xajantu tachun jalhachimoʼonun. Ixlapanakni
yu chʼantaun tatʼaʼalinta, yuʼuncha va jalaksakta, jalakjuntaʼita,
y ox tataylhaanita.
\p
\v 15 Vachu ni ixmayul Dios kijunil:
\p —Ni xkan yu xalaqtsʼin yu puvil ni maqtaqalhini xanati
yucha naunputun pumalhuu putaulanaxna, oqxlaqlhuu lapanakni,
yu lakalhuu minchal, yu tachiviniy pulhuu lhichivin.
\v 16 Ni maqakau aqaloqoti yu xalaqtsʼin ali yu maqtaliʼ,
yuʼuncha kataxkayyaʼ ni anu maqtaqalhini xanati. Maqaʼasas
katamakaunaʼ, kataʼuniyaʼ ixvakax, ex katalaqxavayaʼ laka
jikmi.
\v 17 Ni Dios jalakmanunil jatapastakʼati la ixjalhanutkʼan
para katamakal yu lhinajun ni yucha. Vachuʼ para chʼantaun
kataval ixjatapastakʼatkʼan. Ex chuncha katamaqxtaqniʼoyacha
tachun ixpalhachimoʼonkʼan ni maqtaliʼ tus tejkan katapasaʼoyaʼ
tachun yu Dios najun katapasal.
\v 18 Ni maqtaqalhini xanati yu xalaqtsʼin, yucha naunputun
yu ay putaulan yu jalaklhichimoʼoy tachun jalhachimoʼonun
yu alin lakamunukpaʼ.
\c 18
\s Talaqcheʼeʼol yu ay putaulan Babilonia
\p
\v 1 Astan vachuʼ klaqtsʼil aqayntaun ixmayul Dios yu
minchal laktʼiyan yu ixlhitʼajun lhuu tapʼasta. Taʼakchun
ni lakamunukpaʼ tus tʼoqx tapulkuʼol por ixmaklku.
\v 2 Yucha pʼays pukiltʼasal, va naul:
\p —¡Chavay taqtalcha, va talaqcheʼeʼojotacha ni ay putaulan
Babilonia! Val ixchaqakʼan aqmoqxnun, ancha tavilanalcha
tachun yu jantu lajʼox espíritus ali tsʼoʼon yu jantu
lajʼoxi yu tus jalhitsʼisiti tatasuy.
\v 3 Xalapanakni lakamunukpaʼ va tacha tataʼapʼal kun
ixlhiʼotʼati tejkan tamakal laqtaqal kun yucha. Tachun
yu lajʼay lhachimoʼonun si tamakal laqtaqal kun yucha.
Tachun yu jastʼanan aniy lakamunukpaʼ si taval maʼalinin
por ni tumin yu minchal kun laqtaqal yu ancha makakal.
\p
\v 4 Astan ijqasmaklhi ataun yu pʼays chivinil laktʼiyan,
va naul:
\p —¡Tachun yu kilapanakni untʼatʼik, katʼaxtʼutʼikcha,
kamakʼauntʼikcha ni anchanu ay putaulan! Jantu kʼamakʼatʼik
laqtaqal tacha yu tamakay ni yuʼuncha para jantu katʼalaʼaʼitʼik
ixmaqanlqajnatkʼan.
\v 5 Ni Dios lakmakaniy kuenta ixlaqtaqalkʼan. Va tus
laktʼiyan chaanʼol ixtalaqalhinkʼan.
\v 6 Kaxtʼaqnitʼik ni anchanu putaulan jamaqanlqajnati
chuncha tacha jalaqxtaqnil yu alati. Tsʼanqay kalaqaʼil
aqtʼuy chuncha tacha makal. Va tacha kʼalaʼoxinitʼik
ixlhiʼotʼati yu apalay pʼays, aqtʼuy chuncha ixtalhavaxtu
tacha jaxtaqnil alati para kaʼoqlhi.
\v 7 Yucha ay makakal, makal laqtaqal kun achati tacha
ay maʼaliʼ. Chavay vachu va chuncha kaxtʼaqnitʼik maqanlqajnati
ali jamaqaniti. Yucha najun la ixjalhanuti: “Kitʼin
ikvil aniy tacha ay jalhachimoʼonuʼ, jantu tiyau kakval,
jantu aqtaun kakmaqaninanaʼ.”
\v 8 Xlhiyucha taun julchan kachinaʼ tachun ixmaqanlqajnati.
Taun tsʼalaj kachinaʼ ixlhinin, ixmaqanlqajnati, ali ixchavan.
Astan kalaqxavakanaʼ laka jikmi. Lhuu tapʼasta lhitʼajun
ni Dios yu mukʼaniy ixlaqtaqal.
\p
\v 9 Xalhachimoʼonun aniy lakamunukpaʼ, va laqaʼachati
tamakal laqtaqal kun yucha kun ay maqaliti. Yuʼuncha
ayaj katamaqaninanaʼ y katalhiqalhunaʼ tejkan katalaqtsʼiniyaʼ
xajin yu kamintachal taʼan katsukuyaʼ laqxaunaʼ.
\v 10 Tus saq katatayayaʼ ixlhimaqati, tus kataxkapʼiknanaʼ
ixtalhantikʼan y katanaunaʼ:
\p —¡Paynicha, paynicha yu ay putaulan Babilonia, ayaj lhuu
tapʼasta ixlhitʼajun! Chavay va taun tsʼalaj chil tachun
ixmaqanlqajnati.
\p
\v 11 Yu jastʼanan lakamunukpaʼ, chavaycha jantucha matichun
kaʼalinaʼ yu lay kaʼil ixlhistʼatkʼan. Xlhiyucha katamaqaninanaʼ
y kataqalhunaʼ.
\v 12 Ancha chux ixtastʼay. Ixtastʼay oro ali plata
ali lajkʼus chiyux yu laqlhuu xtapal ali yu laqspututu
kʼuliksnaʼ chiyux. Vachu ixtastʼay ox laqchʼiti yu lino
junkan, ali stʼunuu laqchʼiti, ali kʼus laqchʼiti yu seda
junkan ali xlapul laqchʼiti. Ixtastʼay pulhuu kʼiu yu
sʼejenʼe, ali axtoqnu yu jamakanti kun yu marfil junkan,
ali yu jamakanti kun kʼiu yu laqlhuu ixtapal, ali cobre
ali tsasnati yu hierro ali yu kʼus chiyux yu marmol
junkan.
\v 13 Vachuʼ ixtastʼay kanela, ali yu lhilaʼoxikan vayti,
ali pun, ali yu sʼejenʼe, ali xaxkan uva, ali aceite, ali
ox harina kun trigo, ali vakaxna kun borregos, jukin kun
karretas. Vachu ixtastʼay lapanakni para kalakmapatsakal.
\v 14 Katanaunaʼ, kajunkanaʼ ni ay putaulan:
\p —Tachun axtoqnuʼ yu ayaj ixmaqamayan chavay jantucha
maʼalin. Tachun axtoqnuʼ yu lajkʼus y tachun mimaʼaliti
maqatsʼanqaʼotacha. Chavay jantucha kʼalhitsʼukʼuchʼoʼoyeʼe.
\p
\v 15 Tachun ni anchanu jastʼanan yu ox ixtapulhajay
ixlhistʼatkʼan, yuʼuncha katatalhauniyaʼ ixmaqanlqajnatkʼan
ni ay putaulan. Xlhiyucha katatayanta maqati, katamaqaninanaʼ,
kataqalhunaʼ, katanaunaʼ:
\p
\v 16 —¡Paynicha, paynicha, ay putaulan Babilonia! Xalapanakni
ixtalakatayay kun yu kʼus laqchʼiti yu lino junkan, ali
yu pʼays xlapul laqchʼiti ali yu stʼunuu. Ixlakaxantilakanta
kun oro ali chiyux yu laqlhuu xtapal ali laqspututu
kʼuliksnaʼ chiyux.
\v 17 ¡Va taun tsʼalaj tsʼanqaʼol tachun ixmaʼaliti!
\p Tachun yu tamaltanay barcos ali yu ancha tapuʼan, tachun
yu tatapatsay lakamar, yuʼuncha va tatayaʼol ixlhimaqati
ni putaulan.
\v 18 Tejkan talaqtsʼil xajin ni putaulan yu ixtʼajuncha
laqxaunaʼ, tachun talaktʼasal, va tanaul:
\p —¿Tas ancha alin ataun putaulan tacha ni anuʼ ay putaulan?
\p
\v 19 Ex chuncha tamaqantʼaqstʼal pʼoqxni talman, jalakpamukʼakal
la ixʼaqtsulkʼan. Pʼays tamaqaninil, taqalhul, va tanaul:
\p —¡Paynicha, paynicha ni ay putaulan! Tachun lapanakni
yu tatapatsay lakamar si maʼalinin taval por ixmaʼaliti
ni yucha. Chavay va taun tsʼalaj tsʼanqaʼol ixmaʼaliti.
\p
\v 20 Uxiknan yu vilanantʼik laktʼiyan, kalhiʼachʼantʼaʼutʼik.
Vachuʼ kalhiʼachʼantʼaʼutʼik uxiknan yu ixlapanakni
Dios untʼatʼik, yu Cristo tamalaqachan, ali yu laqpʼutʼeʼeyatʼik
ixchivinti Dios. Va por uxiknan ni Dios mukʼanil ixlaqtaqal
ni ay putaulan, mukʼanil ixmaqanlqajnati.
\p
\v 21 Ex chuncha ostayal qayntaun ixmayul Dios yu ixlhitʼajun
lhuu tapʼasta. Saklhi laqataun ay chiyux tacha laqataun
chiyux yu pulaqsvaʼakan trigo, va tanqalhul lakamar.
Ex naul:
\p —Chuncha tacha xaktanqalhuy ni chiyux, vachu chun katanqalhukanaʼ
ni ay putaulan Babilonia. Ex ancha kalaqmixacha y jantucha
aqtaun katemachoqokanaʼ.
\v 22 Tachun yu xajasanti ni arpas ali yu lakstʼuniy
sqol ali yu ay sqol ali yu tamilpay, yucha jantucha aqtaun
kaqasmajkanaʼ laka putaulan. Yu xamaestros lhitapatsa
jantucha katataulaʼ. Vachu jantucha kaqasmajkanaʼ yu
pulaqsvaʼakan trigo.
\v 23 Tachun ixmaklku jantucha aqtaun kamaqtaychoqoyaʼ.
Vachu jantucha kaʼalinaʼ lakxtuklati laka putaulan.
Chuncha kunaʼ mas ayaj lhuucha tapʼasta ixtalhitʼajun
ni jastʼanan yu ancha ixtavilanal. Vachu jalakmakanul
kun jachavanti xalapanakni taʼakapuchun ni lakamunukpaʼ.
\p
\v 24 Ni anchanu ay putaulan, va ancha taʼan tanil ixlapanakni
Dios ali yu ixtalaqputeʼey ixchivinti. Ancha temakal
ixjakʼalnankʼan tachun yu jalaqmaqnikal lakamunukpaʼ.
\c 19
\s Ay tamakay Dios laktʼiyan
\p
\v 1 Ex astan ijqasmaklhi ixchivintikʼan pumalhuu lapanakni
laktʼiyan tus pʼays tapukiltʼasal, va tanaul:
\q ¡Ay kamakakal ni Dios! Ni kiDioskʼan vamun yuʼ lay
jamalaqtaxtunun, vamun yuʼ ay junita, lhitʼajun tachun
tapʼasta.
\q
\v 2 Yucha si vas makay tejkan mukʼay laqtaqal.
\q Va mukʼanil ixmaqanlqajnati ni anu putaulan yu tacha
maqtaqalhini xanati.
\q Ancha jalakltʼilhil ni lapanakni por ixlaqtaqalkʼan.
\q Ancha jalaqmaqnikal yu ixtalaqputeʼey ixchivinti Dios,
\q xlhiyucha jaxtaqnil ixmaqanlqajnatkʼan.
\p
\v 3 Vachu tanaul:
\p —¡Ay kamakakal ni Dios! Ancha ni xajin va katantʼaqstʼayaʼ
mas va tavanancha kaval, yu jantu aqtaun katamaktal.
\p
\v 4 Ex ni pʼuxauntʼati xapaynin ali yu laʼatʼati talhitsukuti
yu takujta, yuʼuncha tatalakaputatamal lakatʼun. Tatoʼoyal
ni Dios yu vil taʼan jalhachimoʼonun, tanaul:
\p —¡Va chuncha kavalcha! ¡Ay kamakakalcha ni Dios!
\p
\v 5 Ancha taʼan jalhachimoʼonunkan xajchil taun pʼays
chivinti, va naul:
\q Ay kʼamakʼatʼik kiDioskʼan,
\q tachun ni uxiknan yu tʼapʼatsʼaniyatʼik ali tʼoʼoyayatʼik,
\q mas va yu lakstʼuniy untʼatʼik ali yu lajʼaynin untʼatʼik.
\s Kalakxtuklayaʼ yu junkan Sasʼatʼa borrego
\p
\v 6 Ex ijqasmaklhi tus tacha katalakchivinil lhuu lapanakni
tacha tejkan makatʼajun maqalhuu laʼaxkan. Kun pʼays
laktʼasati tacha tejkan tʼasay maxkan, va tanaul:
\q ¡Ay kamakakal Dios!
\q Chavay aqtaynitacha jalhachimoʼonun ni kiDioskʼan yu
lhitʼaunʼojoy tapʼasta.
\q
\v 7 Chavay kalhiʼachantajuu kun lhuu achati y ay kamakau
ni Dios.
\q Lakachilcha ni julchan tejkan kalakxtuklayaʼ pumataun
yu junkan Sasʼatʼa Borrego.
\q Va katʼatsukuyacha ni jatsiʼi yu ixnavin
\q yu kʼus lakatayaycha para katʼaʼal.
\q
\v 8 Ni jatsiʼi xtaqnikal lakatin para kalakatayal kun
yu kʼus laqchʼiti,
\q yu olaqlnaʼ, yu jamakanti kun ox lino, pʼays snapapa.
\m (Yu kʼus lino naunputun ni ixlapanakni Dios jantu
katalhitsukul laqtaqal la ixjatsukuntikʼan.)
\p
\v 9 Ex astan ni ixmayul Dios kijunil:
\p —Katsʼoqʼulatʼi: “Ayaj katalhiʼachantajuyaʼ ni lapanakni
yu jalakjuntaʼikal laka kʼatan taʼan lakxtuklay yu junkan
Sasʼatʼa borrego.”
\p Vachu kijunil:
\p —Yu aniy chivinti, yucha va ixchivinti Dios, jantu jalaklkanti
kaval.
\p
\v 10 Ex kitʼin niman iktalakaputatamal lakatʼun taʼan
ixyal ixmayul Dios para kaktoʼoyal. Pero yucha kijunil:
\p —¡Jantu chun kʼalatʼi! Kitʼin vachu va mintʼaʼoqxtamati
kunita, vachu va chun tacha uxintʼi. Vachu tacha metʼalaqaunin
yu tataylhaʼan lhichivinin Jesucristo. ¡Katʼoʼoyatʼi
Dios!
\p Ni anchanu chivinti yu lhichiviniy Jesucristo va yucha
yu maqancha talhichivinil yu ixtalaqputeʼey ixchivinti
Dios.
\s Yu ixputaukʼay yu xnapapa juki
\p
\v 11 Ex klaqtsʼil ni laktʼiyan lvaq ixlaqltiʼay. Ancha
klaqtsʼil laqataun xnapapa juki, ixpujukʼal qayntaun
lapanaki. Yucha ixtaqaʼuti junkan yu Lay lhakapuʼankan,
vachu junkan yu Laqsaval. Yucha vas makay tejkan mukʼay
laqtaqal, vachuʼ tejkan makay lhilukuj.
\v 12 La ixlaqchul tus ixlaqmaqtajiy tacha jikmi. Vachu
la ixʼaqtsul ixlhaʼanta lhuu koronas. La ixmuntsan istsʼoqmukʼakanta
taqaʼuti y anchanu taqaʼuti vamun yucha ixmispay.
\v 13 Ixʼulata aqxtaun laqchʼiti yu tus ox jalhipaxanti
jakʼalnan. Yu ixtaqaʼuti ixjunkan va Ixchivinti Dios.
\v 14 Ixtatixkaulhaʼanta xatropas laktʼiyan, ixtaputaukʼalhaʼanta
laqxnapapa jukin. Ixtaʼulata laqxnapapa ixlaqchʼitkʼan
yu jamakanti kun yu ox laqchʼiti, jantu tsʼuniy xkiliu
kaval.
\v 15 La ixkilna ni anu lapanaki taxtuy aqxtaun espada
yu ox kikxtuy. Va yucha kapulhimaqchapul talakachux
palhachimoʼon lakamunukpaʼ. Yucha kalhachimoʼonunaʼ
kun lhuu tapʼasta la ixmakaʼ. Kamukʼaniyaʼ ixlaqtaqalkʼan
chuncha tacha qayntaun lapanaki tejkan papichʼaqxa uva
la ixchʼaja. Kataxtuyaʼ maqanlqajnati yu xtaʼa Dios
tacha xaxkan uva, yucha lhitalqaman yu tamakay lapanakni.
\v 16 Ni anu lapanaki la ixlaqchʼiti ali la istsʼaspuʼ
istsʼoqmukʼakanta taqaʼuti yu najun: “Apalay ay yu
aniy xajantu tachun yu xalajʼaynin, apalay ay Jalhachimoʼonu
xajantu tachun jalhachimoʼonun.”
\p
\v 17 Astan klaqtsʼil qayntaun ixmayul Dios, va ixyal
laka julchan. Pʼays jalaktʼasanil tachun tsʼoʼon yu
taltʼilinin laktʼiyan, jalakjunil:
\p —¡Kʼatʼantʼikcha, katʼaqxtʼoqtʼikcha para kaʼutʼik ni
lhivay yu Dios taxtaqniyan!
\v 18 Kʼalakʼunitʼik ixlakatunajkʼan ni lajʼay jalhachimoʼonun
ali xaʼukxtinin tropas ali lapanakni yu ixtalhitʼajun
tapʼasta ali ixvakaxkʼan jukin ali yu ixtaputaukʼalhaʼanta.
Kʼaʼunitʼik ixlakatunajkʼan tachun lapanakni, oqxtamatin
yu ali yu valiʼiy tatiʼukxuntayay, lakstʼuniy lapanakni
ali yu lajʼay.
\p
\v 19 Ex klaqtsʼil ni maqtaliʼ ali yu lajʼay xalhachimoʼonun
lakamunukpaʼ ali ixtropaskʼan. Va chʼantaun tataqxtoqlhi
para katamakanil lhilukuj ni anu lapanaki yu ixpujukʼal
juki kun ixtropas.
\v 20 Ni maqtaliʼ niman chʼikal chʼantaun kun ni lapanaki
yu jantu vas kalaqputeʼel ixchivinti Dios, yu ixmakay
lajʼay axtoqnuʼ la ixlakaʼukxpuʼ ni maqtaliʼ. Va chuncha
ixjalakpumakanutacha ni lapanakni para kalakmukʼanikal
ixtaqaʼuti ni maqtaliʼ. Vachu ixjamakanutacha para katatoʼoyal
ixʼantivaj. Ixlaʼatʼuykʼan jalaqtanqalhupʼukal laka
jikmi jakujnun taʼan maqtayvil kun azufre.
\v 21 Yu alati lapanakni jalaqmaqnikal kun yu espada
yu ixtaxtuta la ixkilna ni lapanaki yu ixpujukʼal xnapapa
juki. Ex tachun ni tsʼoʼon tus ox talhiʼotsal ixlakatunajkʼan
ni lapanakni.
\c 20
\s Ni aqmoqxnuʼ chʼiʼulakal taun mil jachʼitin
\p
\v 1 Astan klaqtsʼil ni ixtaʼeltajuminta qayntaun ixmayul
Dios laktʼiyan. Ixchʼapalhiminta ixpumalaqltiʼakan yu
xajapuʼan yu la pulman. Vachuʼ ixchʼapata maqataun maqaʼay
kadena.
\v 2 Ex niman chʼapachal ni ay tsapul yu maqancha tʼajun,
junkan Diablo vachu junkan Satanás. Ox chʼiʼulal kun
ixkadena para ancha kataulal tus taun mil jachʼitin.
\v 3 Ixmayul Dios tanqalhumul ni tsapul la xajapuʼan.
Ancha ox malaqachʼinul, vachuʼ ltʼaunikal para jantucha
apalay kamakanul tachun ni lapanakni tus kataqayntsal
taun mil jachʼitin. Astan kataxtuchoqoyaʼ para katijuntayal
pero jantu maqan.
\p
\v 4 Vachuʼ klaqtsʼil taʼan tataulay pumalhuu jalhachimoʼonun.
Yu ancha tataulal si jalaqxtaqnikal palhachimoʼon para
katamukʼal laqtaqal. Vachuʼ klaqtsʼil ni lapanakni yu
japixtuchaqxpʼuxkal por ixtalaqputeʼey ixchivinti Dios
yu lhichiviniy Jesucristo. Yuʼuncha jantu katatoʼoyal
ni maqtaliʼ ali ixʼantivaj. Vachu jantu kalaqxtaqkal
kalakmukʼanikal ixtaqaʼuti la ixmuntsankʼan ali la ixmakakʼan.
Klaqtsʼil ni yuʼuncha takujchoqol mas ixtanitacha. Ex
talhachimoʼonul chʼantaun kun Jesucristo taun mil jachʼitin.
\v 5 Yuʼuncha va yu pʼunaj takujchoqol laka lhinin.
Yu alati yu vananaj tatamakaul, yuʼuncha katakujchoqoyaʼ
tus tejkan kataqayntsayaʼ taun mil jachʼitin.
\v 6 Ayaj katalhiʼachantajuyaʼ ni lapanakni yu pʼunaj
tapaxtoqnil katakujchoqol, va ixlapanakni Dios tajunita.
Yuʼuncha jantucha katapaxtoqniyaʼ yu ataun lhinin, va
katajunaʼ ixkuras Dios ali Jesucristo. Katatʼalhachimoʼonunaʼ
Jesucristo taun mil jachʼitin.
\p
\v 7 Tejkan kataqayntsayacha taun mil jachʼitin ex ni
Satanás kamaxtuchoqokanacha taʼan vil laka pachʼin.
\v 8 Katataxtuyaʼ y kalakmakanuyaʼ ni lapanakni tus
taʼakapuchun lakamunukpaʼ. Kalakmakanuyaʼ xalakatʼun
Gog ali Magog, kamaqxtoqyaʼ ixtropaskʼan para katamakal
lhilukuj. Yuʼuncha va pumalhuu, tacha xakukuj lakamar
yu jantu lay puteʼekan.
\v 9 Ex chuncha taʼalcha tus taʼakapuchun ni lakamunukpaʼ,
tamalaqachoqoxnul ni putaulan yu Dios achaniy, taʼan
ixtavilanal ixlapanakni Dios. Pero ni Dios jamaʼeltajunil
jikmi laktʼiyan, ex jalaqxavaʼol.
\v 10 Ni aqmoqxnuʼ yu jalakmakanul ni lapanakni tanqalhupʼukal
laka jikmi taʼan maqtayvil kun azufre, vachuʼ an taʼan
tanqalhupʼukal ni maqtaliʼ ali ni lapanaki yu jantu
vas kalaqputeʼel ixchivinti Dios. Ancha katatsukuyaʼ
maqanlqajnan tsʼis ali tunkuj, jantu aqtaun katamaktayaʼ.
\s Lakmukʼanikan ixlaqtaqalkʼan ni lapanakni
\p
\v 11 Ex astan klaqtsʼil laqataun ay siya, ox xnapapa
ixjunita, taʼan taulay yu ay Jalhachimoʼonuʼ. La ixlakaʼukxpuʼ
yu ancha ixvil tus taqoslhi ni laktʼiyan ali lakamunukpaʼ
y jantucha aqtaun kalaqtsʼinchoqokal.
\v 12 Ex klaqtsʼil ancha ixtayanal ni lapanakni yu ixtanitacha,
yu lajʼay ali lakstʼuniy la ixlakaʼukxpuʼ ni Dios. Ex
japuxʼoqkalcha libros. Ni anchanuʼ janinin jalakmakanikal
kuenta ixlaqtaqalkʼan tacha tsʼoqʼulakanta yu tamakatacha.
Vachuʼ tapuxʼoqlhi ataun libro, yucha va taʼan jatsʼoqʼulakanta
ixtaqaʼutkʼan tachun ni lapanakni yu talhitʼajun jatsukunti.
\v 13 Ni lakamar jamaqxtaqʼol tachun janinin yu ancha
tanil, vachu ni putaknun taʼan ixtaʼaknunun, vachu yu
laqnin. Ex tachun si jalakmakanikal kuenta qayntamin
tacha ixtamakatacha.
\v 14 Astan yu laqnin ali ni putaknun taʼan tavilanal
janinin, yuʼuncha jalaqnaqpʼukal taʼan pʼays maqtayvil
jikmi. Ancha, taʼan maqtayvil jikmi, yucha naunputun va
aqtʼuy taniy.
\v 15 Vachu ancha jalaqtanqalhupʼukal ni lapanakni yu
jantu katemanikal ixtaqaʼutkʼan ni laka libro taʼan
jatsʼoqkanta ixtaqaʼutkʼan yu talhitʼajun jatsukunti.
\c 21
\s Ni sastʼi laktʼiyan ali sastʼi lakamunukpaʼ
\p
\v 1 Taval klaqtsʼil taun sastʼi laktʼiyan ali sastʼi
lakamunukpaʼ. Ni laktʼiyan ali lakatʼun yu ixʼalin pʼunaj,
yuʼuncha ixtalaqmixtacha, vachuʼ yu lakamar jantucha
ixʼalin.
\v 2 Ex va chuncha ni kitʼin yu Juan kunita klaqtsʼil
ni sastʼi putaulan Jerusalén yu ixnavin Dios, taʼeltajuminchal
laktʼiyan taʼan vilchal Dios. Yucha ayaj kʼus ixjunita
tacha qayntaun jatsiʼi yu ox lakatayay para kalakxtuklal
kun ixapay.
\v 3 Ex ijqasmaklhi taun pʼays chivinti yu minchal taʼan
yal ni siya taʼan lhachimoʼonunkan, va naul:
\p —Chavaycha ni Dios vil chʼantaun kun lapanakni. Yucha
kalaktʼataulaʼ. Yuʼuncha katajunaʼ ixlapanakni. Dios
kalaktʼataulaʼ, va ixDioskʼan kunaʼ.
\v 4 Chuncha ni Dios kalakpuxakaʼoyaʼ ixlaqpuqalhutkʼan.
Jantucha kaʼalinaʼ lhinin, vachu jantucha kaʼalinaʼ qalhuti,
jantucha matichun katʼijnanaʼ por ixkayaxtu. Tachun
yu ixʼalin pʼunaj tapasaʼolcha.
\p
\v 5 Ex yu ixvil taʼan jalhachimoʼonunkan va naul:
\p —Kitʼin klasastʼiy tachun yu alin.
\p Astan kijunil:
\p —Chuncha katsʼoqʼulatʼi. Ni chivinti yu kunan, yucha
jantu jalaklkanti kaval. Lay kʼalhakʼapʼupʼi, va laqsaval.
\p
\v 6 Ex kijunil:
\p —Va tamaktalcha. Kitʼin kunita tacha yu pʼunaj letra
ali yu xaʼastan, yu puʼaqtayniy ali yu putamaktay. Taʼayuʼ
yu oqputun xkan, kitʼin kakxtaqniyaʼ xkan yu taxtuta
laqxqatij yu xtaʼa jatsukunti, valiʼiy kakxtaqniyaʼ.
\v 7 Taʼayucha lapanaki yu kamaqalhajayaʼ yu jantu ox,
yucha kalaqaʼiʼoyaʼ tachun yu aniy yu kapaxtoqniyaʼ.
Kitʼin kajkunaʼ ixDios, yucha kunaʼ kesʼatʼa.
\v 8 Pero ni lapanakni yu tatalhanan ali yu jantu talhakapuʼan
ali yu talaktuʼunun ali yu jamaqninin ali yu tatʼatamay
lapanakni yu jantu xnavinkʼan ali yu jachavanan ali
yu tatoʼoyay antivas ali yu talaklkanan, yuʼuncha si
kataʼanaʼ taʼan maqtayvil jikmi laka azufre. Yucha naunputun
ni katanichoqoyaʼ aaqtaun.
\s Ni sastʼi ay putaulan Jerusalén
\p
\v 9 Taval kilaqmil xaqayntaun yu pumatujun ixmayulnin
Dios. Va yuʼuncha yu ixtachʼapata laqatujun vasos si
pʼal ixtavilanal yu maqanlqajnati yu kaʼalinaʼ astan.
Ni anchanuʼ mayul kintʼachivinil, va naul:
\p —Katʼatʼi, kitʼin kakmasuniyan ni jatsiʼi yu kalakxtuklayaʼ
kun yu junkan Sasʼatʼa borrego.
\p
\v 10 Kilaqtanul ni Espíritu ex ixmayul Dios kilhaʼal
laka aspajun yu ayaj talman. Ancha kimasunil ni ay putaulan
Jerusalén yu ixnavin Dios. Ixtaʼeltajumintachal laktʼiyan
taʼan vilchal Dios.
\v 11 Ni anu ay putaulan tus ox ixlaqamaqtajiy kun ixmaklku
ni Dios. Olaql ixtasuy tus tacha laqataun chiyux yu
ayaj laqlhuu xtapal. Tacha taun chiyux yu junkan jaspe
yu la kʼus paxqaqay maklku.
\v 12 Yu xaʼex ni anchanu putaulan la ay ixjunita, vachuʼ
talman. Kilkautʼuy taʼan ixputanukan, lakatamin si ixtayanal
qayntamin ixmayul Dios. Vachuʼ istsʼoqmukʼakanta ixtaqaʼutkʼan
yu oqxlaqkautʼuy xalapanakni Israel.
\v 13 Yu xaʼex taʼan puminachal julchan, ancha ixʼalin
laʼatʼutu puertas. Yu ixlhinorte vachu ixʼalin laʼatʼutu
puertas. Yu ixlhisur vachuʼ ixʼalin laʼatʼutu puertas.
Taʼan anachal ni julchan vachu ixʼalin laʼatʼutu puertas.
\v 14 Ni xaʼex anchanuʼ putaulan ixpuyal laqakautʼuy
chiyux la ixtaʼapuʼ. Laqatamin ni chiyux ancha istsʼoqʼulakanta
ixtaqaʼutkʼan yu pumakautʼuy lapanakni yu jamalaqachal
ni anchanuʼ yu junkan Sasʼatʼa borrego.
\p
\v 15 Ni ixmayul Dios yu ixkintʼajun tʼachivin, ixlhitʼajun
maqataun palkan, si oro ixjunita. Va yucha kapulkayaʼ
taʼakchun ni ay putaulan, vachu xaʼex ali xapuertas.
\v 16 Ni putaulan ox kuadrado ixjunita, yu ilmanixtu
va aqstanchun ixlhitʼajun tacha ixpuʼayaxtu. Ni mayul
lkal kun ixpalkan, ni putaulan laqchaʼal va laqakautʼuy
mil estadios ilmanixtu ali ixpuʼayaxtu ali ixtalmanixtu
va aqstanchun ixjunita.
\v 17 Astan lkal ixtalmanixtu la xaʼex ni putaulan.
Laqchaʼal tus 144 makan. Ni mayul ixtʼajun lkan tacha talkay yu
valiʼiy lapanakni.
\p
\v 18 Tachun chiyux yu ixmapatsakanta ni laqa exni si
chiyux ixjunita yu junkan jaspe. Tachun yu ay putaulan
si oro ixjunita. Ox ixpatasuy jalakavanti tacha yu kʼus
spejo.
\v 19 Yu ixpuvil la ixqaltaʼapuʼ xaʼex ni ay putaulan
ixmalakayaukanta si kun lajkʼus chiyux yu laqlhuu xtapal.
Yu pʼunaj chiyux junkan jaspe, yu ataun junkan zafiro,
yu ataun junkan kalcedonia, yu ataun junkan esmeralda,
\v 20 yu ataun junkan sordonika, ataun kornalina, ataun
krisólito, ataun berilo, ataun topasio, ataun krisopraso,
ataun jasinto, ataun amatista.
\v 21 Yu aqakautʼuy puertas va si kʼuliksnaʼ chiyux
yu xnapapa, aqatamin puerta si laqatamin chiyux. La xatin
ni putaulan si oro ixjunita yu tus olaql ixpatasuy jalakavanti.
\p
\v 22 Ni anchanuʼ ay putaulan jantu kaklaqtsʼil katayal
lakatajtan. Ancha vil ni Jalhachimoʼonu Dios ali yu
junkan Sasʼatʼa borrego, xlhiyucha jantucha maqskʼiniy
yu ay lakatajtan.
\v 23 Ni anchanu ay putaulan jantu maqskʼiniy xamaklku
julchan ali malkuyuʼ. Ni ay Dios tus olaql mapulkuta,
yu xamaklku ixjunita va yu junkan Sasʼatʼa borrego.
\v 24 Oqxlaqchux lapanakni yu jamalaqtaxtukanta, yuʼuncha
katatijuntayayaʼ taʼan katapulkuyaʼ ni anuʼ ay putaulan.
Tachun yu lajʼay jalhachimoʼonun lakamunukpaʼ ancha
katalhaanaʼ ixʼayaxtukʼan ali ixmaqalitkʼan.
\v 25 La xakiltalakxtuti jantu aqtaun katalakchauyaʼ.
Vachuʼ jantu aqtaun kaputsʼisaʼ.
\v 26 Taʼoqxlaqchux ni lapanakni si ancha katalhiminaʼ
ixʼayaxtukʼan ali ixmaqalitkʼan.
\v 27 Pero ancha jantu matichun lapanaki katanuyanta
yu lhitʼajun talaqalhin ali yu laktuʼunun ali yu jalaklkanan.
Katatanuyanta vamun yu jatsʼoqʼulanti ixtaqaʼutkʼan
la ixlibro ni Sasʼatʼa borrego, yu masuy taʼayucha lhitʼajun
jatsukunti.
\c 22
\p
\v 1 Ex astan ni mayul kimasunil maqataun laʼaxkan yu
kʼus, yu xtaʼa jatsukunti. Ni anchanu xkan ixtaxtuta
taʼan vil ni Jalhachimoʼonuʼ Dios ali yu junkan Sasʼatʼa
borrego. Ayaj lajkʼus ixjunita, ixpatasuy jalakavanti
tacha spejo.
\v 2 La ixtanʼajna xatin ni putaulan, ancha ixyal kʼiu
paʼextʼuy ixkilpaʼ ni laʼaxkan. Va ixlhitʼajun xaʼunikan
yu xtaʼa jatsukunti. Yu xaʼunikan ixtaʼa va ixlhitamin
malkuyuʼ, va aqkautʼuy ixtaʼa laka jachʼitin. Yu xaxqoy
lay ixlhimapatsakan tacha kʼuchʼu para kakʼuchʼukal
taʼoqxlaqchux xalapanakni lakamunukpaʼ.
\v 3 Ancha jantucha kaʼalinaʼ tuʼuchun yu jantu lajʼox.
Ancha vil ni Dios la ixpalhachimoʼon y vachuʼ yu junkan
Sasʼatʼa borrego. Vachuʼ tachun ixʼoqxtamatin ancha
katatoʼoyayaʼ.
\v 4 Yuʼuncha ox katalaqtsʼinaʼ ixʼukxpuʼ Dios y katalhitsukuyaʼ
ixtaqaʼuti la ixmuntsankʼan.
\v 5 Ancha jantucha aaqtaun kaputsʼisaʼ. Ni lapanakni
jantu katamaqskʼiniyaʼ tuʼuchun maklku ali julchan.
Ni Dios, yucha kamapulkuniyaʼ. Ancha katalhachimoʼonunacha
mas va tavanancha, jantu aqtaun katamaktayaʼ.
\s Kaminchoqoyaʼ ni Jesucristo
\p
\v 6 Ex astan va kunkal:
\p —Tachun yu aniy chivinti va laqsaval, lay ox kʼalhakʼapʼupʼi.
Ni Jalhachimoʼonu Dios, yucha jaxtaqniy ixjatapastakʼati
ni lapanakni yu talaqputeʼey ixchivinti. Chavay malaqachanitancha
uxintʼi ixmayul para kʼalakmasunichʼoʼo ixlapanakni
yu tatapatsaniy tachun yu niman katapasayaʼ.
\p
\v 7 —¡Nimancha kakminchoqoyaʼ!
\p Ox kalhixajtachal ni lapanaki yu makay kuenta ixchivinti
Dios yu tsʼoqkanta ni aniy laka libro.
\p
\v 8 Kitʼin Juan klaqtsʼil y ijqasmaklhi tachun ni aniy
axtoqnuʼ. Tejkan ijqasmakʼol y klaqtsʼinʼol, ex kitʼin
niman iktatsoqoqtal taʼan ixyal ni mayul yu kimasunil,
va xaktoʼoyaputun.
\v 9 Pero yucha niman kijunil:
\p —¡Jantu chun kʼalatʼi! Kitʼin va mintʼaʼoqxtamati kunita
chuncha tacha metʼalaqaunin yu talaqputeʼey ixchivinti
Dios ali tachun yu tamakay kuenta yu tsʼoqkanta ni aniy
laka libro. ¡Uxintʼi katʼoʼoyatʼi vamun Dios!
\p
\v 10 Ex va chuncha ni mayul vachuʼ kijunil:
\p —Jantu valiʼiy saq kʼamaʼatʼi ixchivinti ni Dios yu
tsʼoqʼulatʼi aniy laka libro. Tachun yu aniy axtoqnuʼ
jantucha kataqmaqayaʼ.
\v 11 Matichun lapanaki yu makay laqtaqal, va kataylhaʼal
makan laqtaqal. Yu maqtaqalhinin, va kataylhaʼal maqtaqalhinin.
Yu vas tiʼukxuntayay, maqskʼiniy ox kataylhaanil y yu
ixnavin Dios maqskʼiniy kataylhaʼal tsukunuʼ tacha qayntaun
yu ixnavin Dios.
\p
\v 12 Ex va kunkal:
\p —¡Kitʼin niman kakminchoqoyaʼ! Kaklhiminaʼ ixlhilhajatkʼan
yu katapaxtoqniyaʼ qayntamin lapanakni por yu tamakal.
\v 13 Kitʼin kunita tacha yu pʼunaj letra yu junkan
Alfa ali yu xaʼastan yu junkan Omega. Va kitʼin kimpuʼaqtayniy
tachun vachuʼ kimputamaktay.
\p
\v 14 Ayaj talhiʼachantajuy ni lapanakni yu tachaʼay
ixlaqchʼitkʼan tus ox snapapa tamakay. Yuʼuncha kalaqxtaqnikanaʼ
lakatin kataʼunil xaʼunikan ni kʼiu yu xtaʼa jatsukunti.
Vachu lay kataputanuyanta taʼan tayanal xakiltalakxtuti
ni ay putaulan.
\v 15 Pero katatamakaunaʼ ixlhimaqspaʼ ni ay putaulan
tachun ni lapanakni yu tacha xʼoyun tajunita, ali tachun
yu jachavanan ali yu tatʼatamay lapanakni yu jantu ixnavinkʼan,
ali jamaqninin, ali yu tatoʼoyay antivas, ali yu tamaqamay
katalaklkanal.
\p
\v 16 —Kitʼin va Jesús kunita. Ni uxiknan klamalaqachaniu
ni kimayul para katajunin tachun ni aniy chivinti para
katakʼatsal lakatamin taʼan tataqxtoʼa kilapanakni.
Kitʼin yu laqsaval ikminchal kun yu ay jalhachimoʼonuʼ
David. Vachuʼ va tacha ni ay jastʼaku kunita yu mapulkuy
puvakuj.
\p
\v 17 Ni Espíritu Santo ali yu katatʼalakxtuklayaʼ Jesús
yu ixlapanakni tajunita, yuʼuncha tanajun, junkan ni Jesús:
\p —¡Katʼatʼi!
\p Yu taqasmatʼa vachu katajunil:
\p —¡Katʼatʼi!
\p Taʼayuʼ yu oqputun xkan, tsʼanqay kamilcha, kaʼoqlhi
ni xkan yu valiʼiy xtaqkan, yu xtaʼa jatsukunti.
\p
\v 18 Kitʼin klaqxaqalay tachun yu taqasmatʼa ni chivinti
yu aniy tsʼoqkanta, ni va laqsaval yu iknajun. Incha
matichun kalalhavayaʼ ni chivinti, ex ni Dios kalalhavaniyaʼ
ixmaqanlqajnati yu tsʼoqkanta aniy laka jalhiki.
\v 19 Vachuʼ incha matichun kamaqosuniyaʼ lati ixchivinti
Dios ni aniy laka jalhiki, ex ni Dios vachuʼ kamaxtuniyaʼ
yu paxtoqniy kalaqaʼil yu lhichiviniy aniy jatsʼoqnuti.
Jantu lay kaʼuyaʼ xaʼunikan ni kʼiu yu xtaʼa jatsukunti
y jantu lay katanuyaʼ la ixputaulan Dios.
\p
\v 20 Yu laqputeʼey tachun yu aniy masukanta najun:
\p —Laqsaval niman kakminchoqoyaʼ.
\p ¡Chuncha kaval! ¡Katʼatʼi uxintʼi, Jesús, Jalhachimoʼonu
kʼatʼi!
\p
\v 21 Ni Jalhachimoʼonu Jesucristo katamapaynin mintachunkʼan.
Chuncha kavalcha.