\id PSA - Copala Trique
\mt Chi̱j Chraꞌ Salmó cachráá nij síí israelitá rihaan Yaꞌanj ga̱a naá a
\mt2 Siete salmos en el triqui de Copala
\rem Salmos 1, 23, 51, 91, 95, 100 y 117
\rem Primera edición 1995, 1C, LA LIGA BÍBLICA
\rem Segunda edición 2005, 2C, LA LIGA BÍBLICA
\rem Quinta edición 20xx, versión electrónica, LA LIGA BÍBLICA
\c 1
\s Salmó 1
\q
\v 1 Cavi̱i̱ sa̱ꞌ síí ne noco̱ꞌ snana̱ nij síí ne nocoꞌ man Yaꞌanj do̱ꞌ,
\q síí ne chéé ga̱ nij síí ꞌyaj cacunꞌ do̱ꞌ,
\q síí ne uun tuvi̱ꞌ ga̱ nij síí aꞌngaꞌ naco̱o̱ niꞌya̱j man Yaꞌanj do̱ꞌ ado̱nj.
\q
\v 2 Tana̱nj niha̱ꞌ uxrá rá síí yoꞌ niꞌya̱j soꞌ stucua̱nj Yaꞌanj,
\q ne̱ nuvi̱i niga̱nꞌ acaj soꞌ cuentá cheꞌé tucuáán yoꞌ a.
\q
\v 3 Da̱j se vaa ꞌo̱ chruun achríj nii tuꞌva chráá vaa soꞌ a.
\q Tiempó avii chruj roꞌ, avii sa̱ꞌ chruj raa̱ chruun yoꞌ,
\q ne̱ ne uchrii coj raa̱ chruun yoꞌ maꞌ.
\q Síí vaa da̱nj roꞌ, me maꞌa̱n suun ꞌyaj soꞌ cavi̱i̱ sa̱ꞌ ado̱nj.
\q
\v 4 Ino̱ uxrá vaa nij síí chiꞌi̱i̱ a.
\q Da̱j se vaa squíj xráá ꞌnúú trigó güéj ꞌyaj nana̱ vaa nij soꞌ a.
\q
\v 5 Cheꞌé dan se̱ cavii sa̱ꞌ nij síí chiꞌi̱i̱ güii caꞌne̱ꞌ Yaꞌanj cacunꞌ cheꞌé nij yuvii̱,
\q ne̱ se̱ caꞌvej Yaꞌanj cunu̱u chre̱ꞌ nij soꞌ ga̱ nij síí nica̱ nimán maꞌ.
\q
\v 6 ꞌO̱ se tumé Síí ꞌNi̱j Raꞌa man níꞌ se‑chre̱j nij síí nica̱ nimán,
\q tza̱j ne̱ caꞌa̱nj niꞌya̱ se‑chre̱j nij síí chiꞌi̱i̱ ado̱nj.
\c 23
\s Salmo 23
\q
\v 1 Da̱j se ꞌyaj síí veꞌé tumé daán matzinj roꞌ,
\q veé da̱nj ꞌyaj Síí ꞌNi̱j Raꞌa man níꞌ tumé soꞌ mán ꞌu̱nj a.
\q A̱ ꞌó rasu̱u̱n se̱ cachiin manj maꞌ.
\q
\v 2 Náá ꞌu̱nj rihaan coj chri̱nꞌ maree̱ ndoꞌo ꞌyaj soꞌ,
\q ne̱ nica̱j soꞌ manj ꞌanj soꞌ rej nu̱u̱ na vaa dínj a.
\q
\v 3 Nuu cui̱j rá nimanj ꞌyaj soꞌ a.
\q Racuíj soꞌ manj nocóꞌ ꞌu̱nj chrej chéé síí nica̱ nimán,
\q cheꞌé se me rá soꞌ cavi̱i̱ sa̱ꞌ se‑chuvi̱i maꞌa̱n soꞌ a.
\q
\v 4 Nda̱ꞌ se chéé ꞌu̱nj raxnéé aráán scachu̱nꞌ se ꞌyaj aviꞌ yuvii̱,
\q tza̱j ne̱ a̱ ꞌó se chiꞌi̱i̱ se̱ cuchuꞌvíꞌ ꞌu̱nj cheꞌé se chéé so̱ꞌ ga̱ ꞌu̱nj a.
\q Nuu dínj nimán ꞌu̱nj ꞌyaj vará do̱ꞌ, chruun raa̱ ganchó do̱ꞌ, nica̱j so̱ꞌ a.
\q
\v 5 ꞌYaj chu̱vií so̱ꞌ se cha̱ ꞌu̱nj ga̱a chéé ꞌu̱nj scaꞌnúj nij síí ta̱j riꞌyunj manj a.
\q Axríj so̱ꞌ casté raá ꞌu̱nj cheꞌé se narii so̱ꞌ manj a.
\q Veꞌé araa se‑ta̱zá ꞌu̱nj ꞌyáá so̱ꞌ a.
\q
\v 6 Ya̱ uxrá qui̱ránꞌ ꞌu̱nj se lu̱j do̱ꞌ, se ꞌe̱e̱ rá do̱ꞌ,
\q nu̱ꞌ güii vaa iꞌna̱ꞌ ꞌu̱nj rihaan chumii̱ nihánj,
\q ga̱a ne̱ ca̱yáán ꞌu̱nj tucuá Yaꞌanj Si̱j ꞌNi̱j Raꞌa man níꞌ nu̱ꞌ cavii nu̱ꞌ caꞌanj ado̱nj.
\c 51
\s Salmo 51
\q
\v 1 Ga̱a̱ ꞌe̱e̱ rá so̱ꞌ manj, Taꞌanj ꞌu̱nj,
\q cheꞌé se ꞌo̱ ꞌe̱e̱ rá so̱ꞌ man núj a.
\q Cheꞌé se síí ꞌe̱e̱ ndoꞌo rá mé so̱ꞌ,
\q ne̱ ti̱naruvii so̱ꞌ nu̱ꞌ se tucuáá ꞌu̱nj a.
\q
\v 2 Naꞌnu̱ꞌ so̱ꞌ nu̱ꞌ cacunꞌ tumé ꞌu̱nj,
\q ne̱ ti̱naruvii so̱ꞌ nu̱ꞌ se chiꞌi̱i̱ nu̱u̱ nimán ꞌu̱nj a.
\q
\v 3 Neꞌén ꞌu̱nj se vaa tumé ndoꞌo ꞌu̱nj cacunꞌ a.
\q ꞌO̱ nanó rá ꞌu̱nj cheꞌé scacu̱nꞌ ꞌu̱nj a.
\q
\v 4 Quiꞌyáá ꞌu̱nj cacunꞌ rihaan so̱ꞌ,
\q rihaan o̱rúnꞌ ma̱ꞌán so̱ꞌ a.
\q Quiꞌyáá ꞌu̱nj rasu̱u̱n chiꞌi̱i̱ vaa niꞌya̱j so̱ꞌ,
\q ne̱ cheꞌé dan cata̱j nii se vaa ya̱ aꞌmii so̱ꞌ do̱ꞌ,
\q se vaa nica̱ aꞌnéꞌ so̱ꞌ cacunꞌ cheꞌé ꞌu̱nj do̱ꞌ a.
\q
\v 5 Asi̱j güii caꞌngaa ꞌu̱nj,
\q ne̱ síí chiꞌi̱i̱ mé ꞌu̱nj a.
\q Asi̱j güii nariꞌ nií ꞌu̱nj manj,
\q ne̱ síí tumé cacunꞌ mej a.
\q
\v 6 Se me ya̱ rá so̱ꞌ me se vaa nu̱u̱ sa̱ꞌ nana̱ ya̱ nimán núj,
\q ne̱ rej yuve̱ nu̱u̱ nimán ꞌu̱nj caraa sa̱ꞌ so̱ꞌ nana̱ cu̱u ado̱nj.
\q
\v 7 Ni̱caj so̱ꞌ coj hisopo naꞌnu̱ꞌ so̱ꞌ nimanj,
\q ne̱ naruvi̱i̱ nimanj a.
\q Naꞌnu̱ꞌ so̱ꞌ nimanj,
\q ne̱ catzi̱i̱ doj ga̱a̱ ꞌu̱nj rihaan yuꞌveꞌ a.
\q
\v 8 Ne̱ nda̱ꞌ se quiránꞌ ꞌu̱nj sayuun,
\q tza̱j ne̱ ꞌó yuún gu̱un niha̱ꞌ rá nimán ꞌu̱nj qui̱ꞌyáá so̱ꞌ á.
\q
\v 9 Se̱ niꞌya̱j so̱ꞌ doj scacu̱nꞌ ꞌu̱nj maꞌ.
\q Ti̱naruvii so̱ꞌ man yoꞌ rihaan so̱ꞌ á.
\q
\v 10 Taꞌanj ꞌu̱nj, naquiꞌya̱j sa̱ꞌ so̱ꞌ nimanj,
\q ne̱ ꞌo̱ canoco̱ꞌ nimanj mán so̱ꞌ qui̱ꞌyáá so̱ꞌ á.
\q
\v 11 Se̱ quiriꞌíj so̱ꞌ manj rihaan so̱ꞌ,
\q ne̱ se̱ caꞌnéj so̱ꞌ Nimán so̱ꞌ nimán ꞌu̱nj maꞌ.
\q
\v 12 Ga̱a̱ niha̱ꞌ uún rá nimanj, qui̱ꞌyáá so̱ꞌ,
\q cheꞌé se tinanii so̱ꞌ manj rihaan sayuun a.
\q Ne̱ ra̱cuíj so̱ꞌ manj veꞌé canoco̱ꞌ nimanj mán so̱ꞌ á.
\q
\v 13 Dan ga̱a ne̱ tu̱cuꞌyón ꞌu̱nj stucua̱nj so̱ꞌ
\q rihaan nij síí ne nocoꞌ stucua̱nj so̱ꞌ a.
\q Ne̱ nij síí tumé cacunꞌ roꞌ,
\q ca̱nica̱j nimán nij soꞌ rihaan so̱ꞌ ado̱nj.
\q
\v 14 Ti̱naruvii so̱ꞌ cacunꞌ ticavíꞌ ꞌu̱nj yuvii̱ nimanj,
\q Taꞌanj ꞌu̱nj Yaꞌanj tinanii mán ꞌu̱nj rihaan sayuun a.
\q Ne̱ cachra̱a̱ tuꞌvá ꞌu̱nj se vaa síí nica̱ ndoꞌo nimán mé so̱ꞌ a.
\q
\v 15 Naxra̱ꞌ tuꞌvá ꞌu̱nj qui̱ꞌyáá so̱ꞌ,
\q ne̱ cata̱j ꞌu̱nj se vaa sa̱ꞌ ndoꞌo ꞌyáá so̱ꞌ á.
\q
\v 16 Né ina̱nj xcuu me se achiin mán so̱ꞌ maꞌ.
\q Sese xcuu me se achiin,
\q ne̱ ya̱ ti̱cavíꞌ ꞌu̱nj xcuu a.
\q Tza̱j ne̱ ne niha̱ꞌ rá so̱ꞌ niꞌya̱j so̱ꞌ xcuu acaa rihaan mesá altar maꞌ.
\q
\v 17 Se me rá so̱ꞌ si̱j me Taꞌanj ꞌu̱nj
\q me se naquiꞌya̱j nica̱ꞌ ꞌu̱nj nimán ꞌu̱nj ado̱nj.
\q Se̱ nachriꞌ so̱ꞌ ni̱ꞌyaj so̱ꞌ síí nica̱ꞌ nimán do̱ꞌ, síí nanó rá do̱ꞌ maꞌ.
\q
\v 18 Gu̱un ꞌe̱e̱ rá so̱ꞌ ni̱ꞌyaj so̱ꞌ Sion,
\q ne̱ ra̱cuíj so̱ꞌ man chumanꞌ yoꞌ a.
\q Naquiꞌya̱j xraan so̱ꞌ chraan nu̱ꞌ anica̱j chumanꞌ Jerusalén a.
\q
\v 19 Nda̱a síj, ga̱a ne̱ ga̱a̱ niha̱ꞌ rá nimán so̱ꞌ
\q que̱neꞌén so̱ꞌ se vaa veꞌé rqué nij síí nuu sa̱ꞌ nimán xcuu rihaan so̱ꞌ a.
\q Ne̱ veꞌé caca̱a̱ nu̱ꞌ nee̱ man xcuu rihaan so̱ꞌ a.
\q Nda̱a síj, ga̱a ne̱ veꞌé ticavi̱ꞌ nii scúj rihaan se‑me̱sá so̱ꞌ mesá altar a.
\c 91
\s Salmo 91
\q
\v 1 Síí ya̱nj rej aráán raꞌa Yaꞌanj Si̱j Uun Chij Doj roꞌ,
\q veꞌé nara̱a̱n rá soꞌ rihaan scachu̱nꞌ Yaꞌanj Si̱j Uun Nucua̱j ꞌYaj Cunuda̱nj a.
\q
\v 2 Cata̱j rihaan Yaꞌanj a:
\q “So̱ꞌ me rej xraan atúj yuve̱ ꞌu̱nj a.
\q Taꞌanj, síí nucua̱j raj, mé so̱ꞌ a.”
\q
\v 3 Ti̱nanii soꞌ mán so̱ꞌ rihaan raꞌngaꞌ uchruj Síí Chre̱e,
\q ne̱ rihaan chiꞌii̱ yuva̱a̱ ndoꞌo a.
\q
\v 4 Da̱j se vaa xee tumé taꞌníí,
\q da̱nj ꞌyaj Yaꞌanj, ca̱ráán raꞌa Yaꞌanj xráá so̱ꞌ,
\q ne̱ veꞌé tu̱mé soꞌ mán so̱ꞌ a.
\q Síí nucua̱j rá níꞌ me Yaꞌanj,
\q ne̱ da̱j se vaa escudó do̱ꞌ, chraan aráán man tanuu do̱ꞌ,
\q vaa Yaꞌanj ga̱ níꞌ a.
\q
\v 5 Se̱ cuchuꞌvíꞌ so̱ꞌ se chiꞌi̱i̱ ꞌnaꞌ rej nii̱,
\q ne̱ se̱ cuchuꞌvíꞌ so̱ꞌ se riha̱ꞌ síí yuva̱a̱ mán so̱ꞌ rej ranga̱ꞌ maꞌ.
\q
\v 6 Se̱ cuchuꞌvíꞌ so̱ꞌ chiꞌii̱ yuva̱a̱ ꞌnaꞌ rej rmi̱ꞌ,
\q ne̱ se̱ cuchuꞌvíꞌ so̱ꞌ chiꞌii̱ anó man yuvii̱ rej caxu̱j maꞌ.
\q
\v 7 Nda̱ꞌ se cavi̱ꞌ ꞌo̱ míj yuvii̱ rej xꞌnu̱j so̱ꞌ,
\q ne̱ nda̱a chi̱ꞌ míj cavi̱ꞌ rej nuva̱ꞌ so̱ꞌ,
\q tza̱j ne̱ taj se qui̱ránꞌ so̱ꞌ maꞌ.
\q
\v 8 Ma̱an se queneꞌe̱n rihaan so̱ꞌ se vaa
\q quira̱nꞌ nij síí chiꞌi̱i̱ sayuun cheꞌé cacunꞌ quiꞌyaj nij soꞌ a.
\q
\v 9 Cheꞌé se ya̱nj rcuaꞌa̱a̱n so̱ꞌ ga̱ Síí Uun Chij Doj,
\q Síí ꞌNi̱j Raꞌa man níꞌ, Yaꞌanj caꞌve̱e ga̱a̱ nucua̱j rá níꞌ,
\q
\v 10 cheꞌé dan taj sayuun qui̱ránꞌ so̱ꞌ maꞌ.
\q Ne̱ taj se chiꞌi̱i̱ caꞌna̱ꞌ tucuá so̱ꞌ maꞌ.
\q
\v 11 Me chrej maꞌa̱n caꞌa̱nj so̱ꞌ,
\q ne̱ caꞌne̱ꞌ soꞌ suun rihaan nij se‑mo̱zó soꞌ
\q tu̱mé nij soꞌ mán so̱ꞌ nanj ado̱nj.
\q
\v 12 Na̱xcaj raꞌa nij soꞌ mán so̱ꞌ
\q se̱ gaa na̱nj cano̱ tacóó so̱ꞌ yahij a.
\q
\v 13 Curuꞌma̱an cheꞌé so̱ꞌ chuvaa̱ do̱ꞌ, xcuáá yuva̱a̱ do̱ꞌ a.
\q Nda̱a tu̱guáj cheꞌé so̱ꞌ ꞌó xcuu xi̱j yuva̱a̱ do̱ꞌ, xcuáá rca̱j do̱ꞌ a.
\q
\v 14 Taj Yaꞌanj a:
\q “Cheꞌé se aráj cochro̱j soꞌ niꞌya̱j soꞌ manj,
\q ne̱ ti̱nanii ꞌu̱nj man soꞌ rihaan sayuun a.
\q ꞌO̱ rej xraan cune̱ꞌ ꞌu̱nj man soꞌ
\q cheꞌé se neꞌen soꞌ se‑chu̱vií ꞌu̱nj a.
\q
\v 15 Cachi̱nj niꞌya̱j soꞌ rihaan ꞌu̱nj,
\q ne̱ ra̱cuíj ꞌu̱nj man soꞌ a.
\q Ga̱a ranꞌ soꞌ sayuun,
\q ne̱ ca̱yáán ꞌu̱nj ga̱ soꞌ a.
\q Ti̱nanii ꞌu̱nj man soꞌ,
\q ne̱ cavi̱i̱ sa̱ꞌ soꞌ qui̱ꞌyáj a.
\q
\v 16 Ca̱yáán soꞌ queꞌe̱e̱ ndoꞌo yoꞌ rihaan chumii̱ nihánj,
\q ne̱ ti̱nanii ꞌu̱nj man soꞌ rihaan sayuun”,
\q taj Yaꞌanj ado̱nj.
\c 95
\s Salmo 95
\q
\v 1 Caꞌna̱ꞌ soj ga̱a̱ niha̱ꞌ rá níꞌ,
\q cata̱j níꞌ se vaa sa̱ꞌ uxrá vaa Yaꞌanj Si̱j ꞌNi̱j Raꞌa man níꞌ á.
\q Ga̱a̱ niha̱ꞌ uxrá rá nimán níꞌ cachra̱a̱ níꞌ rihaan Yaꞌanj
\q cheꞌé se ase vaa yuvej aráán xráá níꞌ vaa soꞌ a.
\q
\v 2 Cata̱j níꞌ guun niꞌya̱j níꞌ catu̱u̱ níꞌ rihaan soꞌ,
\q ne̱ ga̱a̱ niha̱ꞌ rá níꞌ cachra̱a̱ níꞌ chraꞌ
\q taj se vaa sa̱ꞌ uxrá quiꞌyaj soꞌ á.
\q
\v 3 Da̱nj quiꞌya̱j níꞌ
\q cheꞌé se Yaꞌanj si̱j nucua̱j ndoꞌo me Síí ꞌNi̱j Raꞌa man níꞌ a.
\q Rey rii taꞌngaꞌ rihaan da̱j a̱ yaꞌanj me soꞌ a.
\q
\v 4 ꞌNi̱j raꞌa soꞌ nij yuꞌuj cunu̱u̱ doj rque yuvej,
\q ne̱ toꞌóó soꞌ me nij quij xca̱a̱n doj a.
\q
\v 5 Siꞌyaj soꞌ me na yaꞌa̱nj
\q ese maꞌa̱n soꞌ quiꞌyaj man yoꞌ a.
\q Ne̱ raꞌa maꞌa̱n soꞌ quiꞌyaj soꞌ yoꞌóó naco̱o̱ na̱nj á.
\q
\v 6 Caꞌna̱ꞌ soj, ne̱ quini̱j ru̱j níꞌ cara̱a̱ gue̱e̱ níꞌ á.
\q Caꞌa̱nj ca̱yáán ru̱j níꞌ rihaan Yaꞌanj síí quiꞌyaj man níꞌ,
\q
\v 7 cheꞌé se Taꞌanj níꞌ me soꞌ,
\q ne̱ níꞌ me se‑chuma̱nꞌ soꞌ,
\q ne̱ soꞌ me síí tumé man níꞌ a.
\q ꞌO̱ se ase vaa daán soꞌ matzinj vaa níꞌ ado̱nj.
\q Cuanꞌ, sese uno soj snana̱ soꞌ,
\q
\v 8 ne̱ se̱ caráán soj nimán soj rihaan Yaꞌanj maꞌ.
\q Taj Yaꞌanj a:
\q “Se̱ quiꞌyaj soj se vaa quiꞌyaj xi̱i soj ga̱a naá
\q rej cuꞌna̱j Meriba do̱ꞌ, rej naco̱o̱ ndoꞌo cuꞌna̱j Masah do̱ꞌ maꞌ.
\q ꞌO̱ se tucuáá ndoꞌo nij soꞌ rihaan ꞌu̱nj rej yoꞌ a.
\q
\v 9 Nij xi̱i soj, a̱j queneꞌen nij soꞌ rasu̱u̱n sa̱ꞌ noco̱o quiꞌyáj,
\q tza̱j ne̱ tucuáá nij soꞌ ne̱ riꞌyunj nij soꞌ manj a.
\q
\v 10 Vi̱j chiha̱a̱ (40) ya̱ yoꞌ aꞌmaan rá ꞌu̱nj niꞌya̱j ꞌu̱nj man nij síí ma̱n ga̱a naá a.
\q Cataj ꞌu̱nj se vaa síí caꞌanj niꞌya̱ me nij soꞌ,
\q ne̱ ne nocoꞌ nij soꞌ se‑chre̱j ꞌu̱nj maꞌ.
\q
\v 11 Cheꞌé dan caꞌmaan rá ꞌu̱nj,
\q ne̱ cataꞌ tuꞌvá ꞌu̱nj se vaa daj chiha̱a̱ míj se̱ catúj nij soꞌ
\q rej qui̱ꞌyáá ꞌu̱nj nara̱a̱n rá nimán nij soꞌ a̱ maꞌ”,
\q taj Yaꞌanj a.
\c 100
\s Salmo 100
\q
\v 1 Ga̱a̱ niha̱ꞌ rá soj cachra̱a̱ soj
\q rihaan Yaꞌanj Si̱j ꞌNi̱j Raꞌa man níꞌ,
\q cunuda̱nj soj si̱j ma̱n nu̱ꞌ cachra̱ꞌ chumii̱ á.
\q
\v 2 Ga̱a̱ niha̱ꞌ rá cunuda̱nj soj
\q cara̱a̱ gue̱e̱ soj rihaan Síí ꞌNi̱j Raꞌa man níꞌ á.
\q Cachra̱a̱ soj chraꞌ catu̱u̱ soj rihaan soꞌ á.
\q
\v 3 Xca̱j soj cuentá se vaa maꞌa̱n Yaꞌanj me Síí ꞌNi̱j Raꞌa man níꞌ á.
\q Soꞌ roꞌ, me síí quiꞌyaj man níꞌ,
\q ne̱ síí nu̱u̱ rihaan soꞌ me níꞌ ado̱nj.
\q Se‑chuma̱nꞌ soꞌ me níꞌ,
\q ne̱ ase vaa daán soꞌ matzinj chá coj rihaan toꞌóó soꞌ vaa níꞌ uún a.
\q
\v 4 Gu̱un niꞌya̱j níꞌ, cata̱j níꞌ rihaan Yaꞌanj,
\q ne̱ sa̱ꞌ uxrá quiꞌyáá so̱ꞌ, cata̱j níꞌ catu̱u̱ níꞌ tucuá soꞌ á.
\q
\v 5 Da̱nj quiꞌya̱j níꞌ
\q cheꞌé se sa̱ꞌ uxrá vaa Yaꞌanj Si̱j ꞌNi̱j Raꞌa man níꞌ ado̱nj.
\q Daj chiha̱a̱ míj se̱ caꞌneꞌ rá soꞌ ga̱ suun ꞌe̱e̱ rá niꞌya̱j man níꞌ maꞌ.
\q Ne̱ ꞌo̱ ra̱cuíj soꞌ man níꞌ nu̱ꞌ cavii nu̱ꞌ caꞌanj ado̱nj.
\c 117
\s Salmo 117
\q
\v 1 Cata̱j níꞌ si̱j ma̱n cunuda̱nj chumanꞌ,
\q síí sa̱ꞌ uxrá me Yaꞌanj Si̱j ꞌNi̱j Raꞌa man níꞌ,
\q
\v 2 cheꞌé se ꞌo̱ ꞌe̱e̱ ndoꞌo rá soꞌ man níꞌ,
\q ne̱ ra̱cuíj soꞌ man níꞌ nu̱ꞌ cavii nu̱ꞌ caꞌanj á.
\q Aleluya.