\id EPH
\h Efesios
\toc1 Efesios
\mt Nihánj me cartá caꞌnéé Pabló rihaan nij síí ya̱nj chumanꞌ Éfeso a
\c 1
\p
\v 1 Síí cuꞌna̱j Pabló mej, ne̱ cuneꞌ Cristó Jesús mán ꞌu̱nj caꞌa̱nj nata̱ꞌ ꞌu̱nj snana̱ soꞌ rihaan nij yuvii̱, cheꞌé se da̱nj me rá Yaꞌanj qui̱ꞌyáj a. ꞌYáá ꞌu̱nj yanj cartá nihánj caꞌne̱j ꞌu̱nj rihaan nij soj xꞌneꞌ yuvii̱ noco̱ꞌ man Yaꞌanj ya̱nj chumanꞌ Éfeso si̱j ꞌo̱ amán rá niꞌya̱j man Cristó Jesús a.
\v 2 Me rá ꞌu̱nj quiꞌya̱j ndoꞌo Rej níꞌ Yaꞌanj do̱ꞌ, quiꞌya̱j Jesucristó Si̱j ꞌNi̱j Raꞌa man níꞌ do̱ꞌ, se lu̱j cheꞌé nij soj, ne̱ me rá ꞌu̱nj ga̱a̱ xe̱j nimán nij soj, quiꞌya̱j ro̱j soꞌ a.
\s Quiꞌyaj ndoꞌo Yaꞌanj se lu̱j cheꞌé nij síí israelitá do̱ꞌ, nij síí yaníj do̱ꞌ a
\p
\v 3 Cata̱j níꞌ se vaa ina̱nj sa̱ꞌ uxrá vaa Yaꞌanj Rej Jesucristó Si̱j ꞌNi̱j Raꞌa man níꞌ, ne̱ veꞌé ndoꞌo quiꞌyaj soꞌ cheꞌé níꞌ a. Ne̱ rqué soꞌ da̱j a̱ se sa̱ꞌ man níꞌ, ne̱ se sa̱ꞌ cavii rej xta̱ꞌ cavii maꞌa̱n ya̱ Nimán Yaꞌanj me rqué Yaꞌanj man níꞌ, cheꞌé se síí noco̱ꞌ man Cristó me níꞌ a.
\v 4 Asi̱j ataa quiꞌya̱j Yaꞌanj chumii̱ nihánj me narii soꞌ man níꞌ cunu̱u sa̱ꞌ nimán níꞌ rihaan maꞌa̱n soꞌ, ne̱ se̱ tumé níꞌ cacunꞌ, rá soꞌ a̱ maꞌ. Ne̱ dan me se cunuu ꞌe̱e̱ rá soꞌ man níꞌ,
\v 5 ne̱ cuneꞌ soꞌ man níꞌ canoco̱ꞌ níꞌ man Jesucristó ne̱ gu̱un taꞌni̱j maꞌa̱n soꞌ man níꞌ, nda̱a vaa quirii nimán maꞌa̱n soꞌ quiꞌya̱j soꞌ cheꞌé níꞌ ado̱nj.
\v 6 Da̱nj quiꞌyaj soꞌ cheꞌé yan veꞌé caꞌmi̱i̱ níꞌ ni̱ꞌyaj níꞌ man Yaꞌanj, ne̱ cata̱j níꞌ se vaa veꞌé ndoꞌo quiꞌyaj soꞌ se lu̱j cheꞌé níꞌ, cheꞌé se noco̱ꞌ níꞌ man Cristó síí ꞌe̱e̱ rá soꞌ niꞌya̱j soꞌ man na̱nj ado̱nj.
\p
\v 7 Ne̱ cheꞌé ton cayanj man Cristó ga̱a caviꞌ soꞌ cheꞌé níꞌ roꞌ, cheꞌé dan navij cacunꞌ xráá níꞌ, cheꞌé se sa̱ꞌ uxrá vaa rá Yaꞌanj niꞌya̱j Yaꞌanj man níꞌ a.
\v 8 Ne̱ Yaꞌanj roꞌ, me síí quiꞌyaj ndoꞌo se lu̱j cheꞌé níꞌ se vaa rqué ndoꞌo soꞌ nana̱ cu̱u man níꞌ, ne̱ xcaj ndoꞌo níꞌ cuentá, quiꞌyaj soꞌ ado̱nj.
\v 9 ꞌO̱ se soꞌ me síí quiꞌyaj xcaj níꞌ cuentá cheꞌé nana̱ sa̱ꞌ yuve̱ aꞌmii cheꞌé da̱j me rá maꞌa̱n soꞌ quiꞌya̱j soꞌ cheꞌé níꞌ si̱j noco̱ꞌ man Cristó
\v 10 asa̱ꞌ quisíj güii caꞌna̱ꞌ uún Cristó rihaan chumii̱ nihánj a. Dan me se güii yoꞌ me se gu̱un chij Cristó rihaan cunuda̱nj rasu̱u̱n, quiꞌya̱j Yaꞌanj, ne̱ gu̱un chij Cristó rihaan cunuda̱nj nij rasu̱u̱n ma̱n rej xta̱ꞌ do̱ꞌ, rihaan cunuda̱nj nij rasu̱u̱n ma̱n rihaan chumii̱ nihánj do̱ꞌ a.
\p
\v 11-12 Ne̱ cheꞌé Cristó me se narii Yaꞌanj man núj si̱j israelitá si̱j amán rá niꞌya̱j man Cristó, ne̱ dan me se narii soꞌ man núj cheꞌé se a̱j cuneꞌ soꞌ man núj gu̱un núj nij síí ga̱a̱ nucua̱j rá ga̱a asino ya̱a̱n man Cristó, cheꞌé rej veꞌé nata̱ꞌ núj se vaa sa̱ꞌ uxrá vaa Yaꞌanj a. Dan me se ina̱nj da̱nj guun rá Yaꞌanj quiꞌya̱j soꞌ, ne̱ soꞌ me síí avii ndoꞌo raa̱ da̱j quiꞌya̱j, ne̱ soꞌ me síí ꞌyaj nu̱ꞌ nda̱a vaa avii raa̱ soꞌ quiꞌya̱j soꞌ ado̱nj.
\p
\v 13 Ne̱ vaa nij soj si̱j yaníj uún, ne̱ cuno soj nana̱ ya̱ nana̱ sa̱ꞌ taj se vaa caꞌve̱e nani̱i̱ soj rihaan sayuun ne̱ cavi̱i̱ sa̱ꞌ soj quiꞌya̱j Cristó a. Ne̱ cuchumán rá soj niꞌya̱j soj man Cristó, ne̱ cheꞌé Cristó me se caꞌnaꞌ Nimán Yaꞌanj catúj Nimán Yaꞌanj nimán soj, nda̱a vaa cataꞌ tuꞌva Yaꞌanj ga̱a naá a. Ne̱ cheꞌé se nu̱u̱ Nimán Yaꞌanj nimán níꞌ roꞌ, cheꞌé dan neꞌen ya̱ níꞌ se vaa me níꞌ taꞌníí Yaꞌanj
\v 14 ne̱ ya̱ rque̱ ndoꞌo Yaꞌanj se sa̱ꞌ man níꞌ vaa güii na̱nj ado̱nj. Dan me se rqué Yaꞌanj Nimán Yaꞌanj rihaan níꞌ tihaa̱n Yaꞌanj se vaa ya̱ naca̱j Yaꞌanj man níꞌ vaa güii, ne̱ nani̱i̱ níꞌ rihaan sayuun, cheꞌé rej cata̱j níꞌ se vaa niꞌndaj ya̱ sa̱ꞌ veꞌé vaa Yaꞌanj a.
\s Cachíín niꞌya̱j Pabló rihaan Yaꞌanj se vaa xca̱j sa̱ꞌ doj nij síí ma̱n Éfeso cuentá cheꞌé Cristó quiꞌya̱j Yaꞌanj a
\p
\v 15 Dan me se cunó ꞌu̱nj nana̱ se vaa amán rá nij soj niꞌya̱j soj man Jesús Si̱j ꞌNi̱j Raꞌa man níꞌ, ne̱ cunó ꞌu̱nj nana̱ se vaa ꞌe̱e̱ rá soj man ta̱ranꞌ nij síí noco̱ꞌ man Cristó a. Ne̱ cheꞌé se vaa quiꞌyaj Yaꞌanj cheꞌé níꞌ si̱j noco̱ꞌ man Cristó roꞌ,
\v 16 cheꞌé dan ꞌo̱ taj ꞌu̱nj guun niꞌya̱j níꞌ rihaan Yaꞌanj cheꞌé soj ga̱a achíín ni̱ꞌyáá ꞌu̱nj cheꞌé soj rihaan Yaꞌanj ado̱nj.
\v 17 Dan me se Yaꞌanj me Taꞌanj Jesucristó Si̱j ꞌNi̱j Raꞌa man níꞌ, ne̱ Rej níꞌ síí nicu̱nꞌ xta̱ꞌ me uún Yaꞌanj, ne̱ síí uun chij sa̱ꞌ uxrá me soꞌ ado̱nj. Ne̱ cheꞌé dan achíín ni̱ꞌyáá ꞌu̱nj rihaan Yaꞌanj se vaa rque̱ ndoꞌo soꞌ nana̱ cu̱u sa̱ꞌ nimán soj, ne̱ achíín ni̱ꞌyáá ꞌu̱nj se vaa gu̱un nucua̱j soj nari̱ꞌ soj nu̱ꞌ nana̱ naca̱ tihaa̱n soꞌ man níꞌ, ga̱a ne̱ sa̱ꞌ doj xca̱j maꞌa̱n soj cuentá cheꞌé soꞌ á.
\p
\v 18 Dan me se sa̱ꞌ doj xca̱j soj cuentá, ne̱ queneꞌe̱n soj me cheꞌé nacúún Yaꞌanj man soj, ne̱ queneꞌe̱n soj nu̱ꞌ se vaa quiꞌya̱j Yaꞌanj cheꞌé soj, ne̱ gu̱un ya̱ rá soj se vaa vaa cheꞌé ndoꞌo nocoꞌ soj man Cristó ado̱nj. Queneꞌe̱n soj se vaa niꞌndaj ya̱ sa̱ꞌ vaa se quiꞌya̱j Yaꞌanj cheꞌé ta̱ranꞌ níꞌ si̱j noco̱ꞌ man soꞌ,
\v 19 ne̱ queneꞌe̱n soj se vaa niꞌndaj ya̱ veꞌé gu̱un nucua̱j ya̱ Yaꞌanj ra̱cuíj Yaꞌanj man níꞌ si̱j amán rá niꞌya̱j man soꞌ a. Nucua̱j ndoꞌo Yaꞌanj ado̱nj.
\p
\v 20 Cheꞌé snucua̱j Yaꞌanj roꞌ, cheꞌé dan cunuu iꞌna̱ꞌ ya̱ uún Cristó, quiꞌyaj Yaꞌanj ga̱a caviꞌ Cristó, ne̱ caꞌanj ca̱yáán Cristó rej xta̱ꞌ rej xꞌnu̱j Yaꞌanj rej nuva̱ꞌ Yaꞌanj, quiꞌyaj uún Yaꞌanj ado̱nj.
\v 21 Veé dan, ne̱ rej xta̱ꞌ yoꞌ me se uun chij soꞌ doj rihaan da̱j a̱ nij síí nucua̱j do̱ꞌ, da̱j a̱ nij síí rii taꞌngaꞌ do̱ꞌ, da̱j a̱ nij síí uun chij do̱ꞌ, da̱j a̱ nij síí nica̱j suun do̱ꞌ a. Ne̱ se‑chuvi̱i soꞌ me se sa̱ꞌ doj vaa yoꞌ rihaan se‑chuvi̱i ta̱ranꞌ nij síí uun chij rihaan chumii̱ nihánj do̱ꞌ, rihaan rej xta̱ꞌ do̱ꞌ ado̱nj. Tza̱j ne̱ ne do̱j cuano̱ me uun chij soꞌ maꞌ. ꞌO̱ se gu̱un chij soꞌ nu̱ꞌ cavii nu̱ꞌ caꞌanj na̱nj ado̱nj.
\v 22 Ne̱ uun chij Cristó rihaan cunuda̱nj rasu̱u̱n, quiꞌyaj Yaꞌanj, ne̱ dan me se Yaꞌanj me síí quiꞌyaj rii taꞌngaꞌ Cristó rihaan cunuda̱nj rasu̱u̱n cheꞌé xꞌneꞌ cunuda̱nj níꞌ si̱j noco̱ꞌ man soꞌ ado̱nj.
\v 23 Ne̱ ase vaa nee̱ man Cristó roꞌ, da̱nj vaa níꞌ, uno níꞌ rihaan soꞌ a. Ne̱ dan me se soꞌ me Síí ꞌNi̱j Raꞌa man cunuda̱nj rasu̱u̱n ma̱n rihaan nu̱ꞌ cachra̱ꞌ chumii̱ a. Ne̱ soꞌ me síí rqué nu̱ꞌ se vaa achiin man nu̱ꞌ nij rasu̱u̱n ma̱n rihaan chumii̱ nihánj ado̱nj.
\c 2
\s Quiꞌyaj ndoꞌo Yaꞌanj se lu̱j cheꞌé nij síí yaníj a
\p
\v 1 Ga̱a rque̱ me se maꞌa̱n nij soj me síí tumé ndoꞌo cacunꞌ, ne̱ cheꞌé dan quiriꞌ nu̱ꞌ nimán nij soj na̱nj ado̱nj. Ne̱ taj se quiꞌyáꞌ caꞌve̱e nani̱i̱ soj rihaan sayuun a̱ maꞌ.
\v 2 Dan me se quiꞌyaj soj nda̱a vaa ꞌyaj yuvii̱ ma̱n rihaan chumii̱ nihánj a. Ne̱ quiꞌyaj soj nu̱ꞌ rasu̱u̱n chiꞌi̱i̱ rasu̱u̱n niha̱ꞌ rá Síí Chre̱e síí rii taꞌngaꞌ rihaan chumii̱ nihánj cuano̱ síí chéé uun chij rque nana̱, ne̱ soꞌ me síí rii taꞌngaꞌ rihaan nimán nij yuvii̱ naꞌvej rá cuno̱ rihaan Yaꞌanj a.
\v 3 Ne̱ ase vaa ꞌyaj nij yuvii̱ vaa da̱nj roꞌ, da̱nj quiꞌyaj gue̱e̱ ta̱ranꞌ níꞌ ga̱a rque̱, ne̱ quiꞌyaj níꞌ cacunꞌ ga̱ nij soꞌ, ne̱ quiꞌyaj níꞌ ina̱nj se me rá nee̱ man níꞌ quiꞌya̱j níꞌ a. Ina̱nj se cavii raa̱ maꞌa̱n níꞌ quiꞌyaj níꞌ, ne̱ yuvii̱ caꞌmaan rá Yaꞌanj niꞌya̱j Yaꞌanj man me níꞌ ga̱a rque̱ a. Ne̱ ase vaa nij yuvii̱ chéé rihaan chumii̱ nihánj cuano̱ roꞌ, taꞌngaꞌ da̱nj vaa níꞌ ga̱a rque̱ ado̱nj.
\p
\v 4 Tza̱j ne̱ cunuu ꞌe̱e̱ ndoꞌo rá Yaꞌanj man níꞌ,
\v 5 ne̱ queneꞌen Yaꞌanj se vaa a̱j quiriꞌ nu̱ꞌ nimán níꞌ cheꞌé cacunꞌ tumé níꞌ a. Ne̱ cheꞌé dan, ase vaa cunuu iꞌna̱ꞌ uún Cristó quiꞌyaj Yaꞌanj roꞌ, taꞌngaꞌ da̱nj vaa uún níꞌ cunuu sa̱ꞌ nimán níꞌ, quiꞌyaj Yaꞌanj, ne̱ cheꞌé dan caꞌve̱e ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj na̱nj ado̱nj. ꞌO̱ se ma̱an cheꞌé se lu̱j quiꞌyaj Yaꞌanj cheꞌé soj me se caꞌve̱e nani̱i̱ soj rihaan sayuun ne̱ cavi̱i̱ sa̱ꞌ soj ado̱nj.
\v 6 Ne̱ ase vaa cavii Cristó Jesús cayáán soꞌ rej xta̱ꞌ quiꞌyaj Yaꞌanj roꞌ, da̱nj quiꞌyaj uún Yaꞌanj cheꞌé níꞌ, cheꞌé se si̱j noco̱ꞌ man Cristó Jesús me níꞌ, ne̱ vaa güii cavi̱i̱ níꞌ caꞌa̱nj ca̱yáán níꞌ ga̱ soꞌ rej xta̱ꞌ ado̱nj.
\v 7 Nda̱a síj, ga̱a ne̱ nu̱ꞌ cavii nu̱ꞌ caꞌanj ti̱haa̱n Yaꞌanj man nij yuvii̱ se vaa quiꞌyaj ndoꞌo Yaꞌanj se lu̱j cheꞌé níꞌ, ne̱ dan me se queneꞌe̱n nij yuvii̱ se vaa cunuu ꞌe̱e̱ ndoꞌo rá Yaꞌanj man níꞌ cheꞌé se síí noco̱ꞌ man Cristó Jesús me níꞌ na̱nj ado̱nj.
\p
\v 8 Dan me se xca̱j nij soj cuentá se vaa ina̱nj cheꞌé se lu̱j quiꞌyaj Yaꞌanj cheꞌé soj me nanii soj rihaan chrej chiꞌi̱i̱ do̱ꞌ, rihaan sayuun do̱ꞌ á. Dan me se ma̱an cheꞌé se amán rá soj niꞌya̱j soj man soꞌ me cavii sa̱ꞌ soj ado̱nj. Né maꞌa̱n soj me síí ꞌyaj aꞌvee avii sa̱ꞌ soj maꞌ. Ma̱an se Yaꞌanj racuíj man soj dan aꞌvee avii sa̱ꞌ soj na̱nj ado̱nj.
\v 9 Né cheꞌe̱ rasu̱u̱n sa̱ꞌ quiꞌyaj soj me cavii sa̱ꞌ soj maꞌ. ꞌO̱ se naꞌvej Yaꞌanj caꞌmi̱i̱ xta̱ꞌ yuvii̱ cata̱j yuvii̱ se vaa maꞌa̱n nij yuvii̱ me síí quiꞌyaj cavii sa̱ꞌ nij yuvii̱ maꞌ.
\v 10 ꞌO̱ se Yaꞌanj me síí quiꞌyaj man níꞌ, ne̱ quiꞌyaj Yaꞌanj man níꞌ cheꞌé rej canoco̱ꞌ níꞌ man Cristó Jesús ne̱ veꞌé quiꞌya̱j níꞌ suun sa̱ꞌ, rá Yaꞌanj, ne̱ cheꞌé maꞌa̱n Yaꞌanj me caꞌve̱e quiꞌya̱j níꞌ suun sa̱ꞌ yoꞌ na̱nj ado̱nj.
\p
\v 11 Dan me se neꞌen soj se vaa né yuvi̱i̱ israelitá me soj maꞌ. ꞌO̱ se yuvii̱ yaníj me soj, ne̱ dan me se cataj núj si̱j israelitá se vaa nij vaa nee̱ man soj ado̱nj. Tza̱j ne̱ cutaꞌ núj taꞌngaꞌ man nee̱ man maꞌa̱n núj, ne̱ cheꞌé dan me síí ata̱ꞌ taꞌngaꞌ me núj, taj yuvii̱ niꞌya̱j yuvii̱ man núj ado̱nj. ꞌO̱ xca̱j soj cuentá
\v 12 se vaa ga̱a rque̱ roꞌ, né si̱j noco̱ꞌ man Cristó me nij soj maꞌ. ꞌO̱ se si̱j yaníj rihaan núj si̱j israelitá me soj ga̱a naá na̱nj ado̱nj. Dan me se né si̱j no̱ xcúún a̱ ꞌó xcoꞌ canoco̱ꞌ man Yaꞌanj me soj ga̱a rque̱ maꞌ. Ma̱an se si̱j ya̱nj rmaꞌa̱n rihaan chumii̱ me soj na̱nj ado̱nj. Dan me se ya̱ cataꞌ tuꞌva Yaꞌanj cheꞌé núj si̱j israelitá da̱j caꞌve̱e cavi̱i̱ sa̱ꞌ núj, tza̱j ne̱ taj nana̱ cataꞌ tuꞌva Yaꞌanj cheꞌé nij soj ga̱a rque̱ maꞌ. Dan me se a̱j queneꞌen nij soj se vaa se̱ cavii sa̱ꞌ nij soj do̱ꞌ, se̱ racuíj Yaꞌanj man nij soj do̱ꞌ, ga̱a maan ado̱nj. Ma̱an se chéé u̱u̱n nij soj rihaan chumii̱ ga̱a rque̱ na̱nj ado̱nj.
\v 13 Tza̱j ne̱ nda̱ꞌ se asino ya̱a̱n yáán ga̱nꞌ soj ga̱ Yaꞌanj, tza̱j ne̱ ya̱j me se quinichrunꞌ soj rihaan Yaꞌanj cheꞌé ton cayanj man Cristó na̱nj ado̱nj.
\p
\v 14 Ne̱ Cristó roꞌ, me síí naquiꞌyaj dínj man núj si̱j israelitá ga̱ soj si̱j yaníj, ga̱a ne̱ o̱rúnꞌ ya̱ chumanꞌ me ta̱ranꞌ níꞌ cuano̱, quiꞌyaj soꞌ a. ꞌO̱ se tiriꞌ soꞌ chingá caꞌneꞌ tanu̱u̱ man níꞌ ga̱ tuviꞌ níꞌ, ga̱a caviꞌ maꞌa̱n soꞌ rihaan rcutze̱,
\v 15 ne̱ dan me se chingá yoꞌ roꞌ, me stucua̱nj Moisés, ne̱ quisíj rii taꞌngaꞌ rihaan níꞌ ꞌo̱ ꞌo̱ suun cunii no̱ rihaan tucuáán yoꞌ, quiꞌyaj Cristó ga̱a caviꞌ soꞌ na̱nj ado̱nj. Da̱nj quiꞌyaj Cristó cheꞌé yan naquiꞌya̱j rcuaꞌa̱a̱n soꞌ man yuvii̱ israelitá ga̱ yuvii̱ yaníj, ne̱ nahuun nij soꞌ o̱rúnꞌ ꞌo̱ xꞌneꞌ naca̱ yuvii̱ ado̱nj. Soꞌ me síí ꞌyaj se vaa dínj ma̱n rcuaꞌa̱a̱n ro̱j xꞌneꞌ yuvii̱ ado̱nj.
\v 16 Cheꞌé se caviꞌ Cristó rihaan rcutze̱ roꞌ, cheꞌé dan o̱rúnꞌ ya̱ chumanꞌ me níꞌ cuano̱, ne̱ ꞌo̱ quiꞌyaj canaán Cristó man nu̱ꞌ se aꞌmaan rá ma̱n nimán ta̱ranꞌ níꞌ, ne̱ dan me se cunuu rcuaꞌa̱a̱n ta̱ranꞌ níꞌ ga̱ Yaꞌanj, quiꞌyaj Cristó a.
\p
\v 17 Dan me se caꞌnaꞌ Cristó, ne̱ nataꞌ soꞌ nana̱ sa̱ꞌ rihaan nu̱ꞌ soj si̱j yaníj do̱ꞌ, rihaan núj si̱j israelitá si̱j nica̱j stucua̱nj Yaꞌanj do̱ꞌ, se vaa dínj cuma̱n ta̱ranꞌ níꞌ rihaan Yaꞌanj á.
\v 18 ꞌO̱ se cheꞌé Cristó me se racuíj Nimán Yaꞌanj man níꞌ, ne̱ cheꞌé dan vaa yaꞌnúj rihaan ta̱ranꞌ níꞌ cachi̱nj niꞌya̱j maꞌa̱n níꞌ rihaan Rej níꞌ Yaꞌanj ado̱nj.
\p
\v 19 Cheꞌé dan né si̱j ma̱n ꞌó chumanꞌ me soj a̱ maꞌ. ꞌO̱ se si̱j neꞌen man Yaꞌanj me nij soj cuano̱ na̱nj ado̱nj. Né si̱j noco̱ꞌ ꞌó tucuáán me soj maꞌ. Tana̱nj maꞌa̱n soj cunuu rcuaꞌa̱a̱n ga̱ nij síí noco̱ꞌ man Yaꞌanj ya̱j ado̱nj.
\v 20 Xa̱ꞌ tucuáán noco̱ꞌ ta̱ranꞌ níꞌ cuano̱ roꞌ, ase vaa ꞌo̱ veꞌ sa̱ꞌ ꞌyaj nii xráá yuvej sa̱ꞌ ina̱nj roꞌ, da̱nj vaa níꞌ a. Ne̱ nij yuvej sa̱ꞌ yoꞌ me nana̱ caꞌmii natáj núj si̱j cuneꞌ Jesucristó do̱ꞌ, nana̱ caꞌmii natáj nij síí nataꞌ snana̱ Yaꞌanj do̱ꞌ, ne̱ yuvej sa̱ꞌ doj rihaan ta̱ranꞌ nij yuvej na̱j tacóó veꞌ yoꞌ me se maꞌa̱n ya̱ Cristó Jesús me yoꞌ vaa na̱nj chugua̱nj.
\v 21 Dan me se ꞌo̱ chre̱ꞌ ga̱a̱ níꞌ si̱j noco̱ꞌ man Cristó, ga̱a ne̱ ꞌo̱ cuya̱a̱n na̱xcaj ꞌo̱ nuvií gue̱e̱ á. Ne̱ nuvií yoꞌ roꞌ, me nu̱ꞌ níꞌ si̱j noco̱ꞌ man Síí ꞌNi̱j Raꞌa man níꞌ na̱nj ado̱nj.
\v 22 Ne̱ maꞌa̱n nij soj me se cheꞌé se noco̱ꞌ soj man Síí ꞌNi̱j Raꞌa man níꞌ, cheꞌé dan cunuu rcuaꞌa̱a̱n soj ga̱ ꞌó nij síí guun nuvií, ne̱ nihánj me se maꞌa̱n ya̱ Nimán Yaꞌanj yáán scaꞌnúj ta̱ranꞌ níꞌ ado̱nj.
\c 3
\s Caꞌneꞌ Yaꞌanj suun rihaan Pabló nata̱ꞌ soꞌ nana̱ sa̱ꞌ yuve̱ cheꞌé Cristó rihaan nij síí yaníj a
\p
\v 1 Neꞌen nij soj se vaa ꞌni̱j ꞌu̱nj tagaꞌ cheꞌé se nocóꞌ ꞌu̱nj man Cristó Jesús, ne̱ aꞌmii natáj ꞌu̱nj rihaan nij soj si̱j yaníj cheꞌé soꞌ,
\v 2 ne̱ a̱j neꞌen soj se vaa atá ꞌu̱nj suun quiꞌyaj Yaꞌanj cheꞌé soj si̱j yaníj na̱nj ado̱nj. Dan me se quiꞌyaj ndoꞌo Yaꞌanj se lu̱j cheꞌé ꞌu̱nj, ne̱ caꞌneꞌ soꞌ suun rihanj nata̱ꞌ ꞌu̱nj snana̱ soꞌ rihaan soj ado̱nj.
\v 3 Dan me se tihaa̱n naca̱ Yaꞌanj nana̱ sa̱ꞌ yuve̱ rihanj, ne̱ a̱j cachrón ꞌu̱nj do̱j nana̱ cheꞌé se vaa tihaa̱n Yaꞌanj manj rihaan yanj cartá caꞌnéé ꞌu̱nj rihaan soj ga̱a rque̱ ado̱nj.
\v 4 Naya̱a̱ soj yanj cartá yoꞌ, ne̱ xca̱j soj cuentá cheꞌé nu̱ꞌ nana̱ naríꞌ ꞌu̱nj nana̱ sa̱ꞌ yuve̱ cheꞌé nu̱ꞌ se vaa quiꞌyaj Cristó cheꞌé yuvii̱ a.
\v 5 Ga̱a rque̱ roꞌ, ne cata̱j xnaꞌanj Yaꞌanj nana̱ sa̱ꞌ yuve̱ yoꞌ rihaan yuvii̱ maꞌ. Tza̱j ne̱ nda̱a ya̱j roꞌ, me tihaa̱n Nimán Yaꞌanj nana̱ yoꞌ rihaan núj si̱j cunuu sa̱ꞌ nimán rihaan Yaꞌanj, si̱j cuneꞌ Jesucristó caꞌa̱nj nata̱ꞌ snana̱ soꞌ do̱ꞌ, rihaan ꞌó nij síí nataꞌ snana̱ Yaꞌanj rihaan yuvii̱ do̱ꞌ a.
\v 6 Dan me se tihaa̱n soꞌ nana̱ se vaa cuno̱ nij soj si̱j yaníj nana̱ sa̱ꞌ cheꞌé Cristó, ne̱ cunu̱u sa̱ꞌ nimán soj rihaan Yaꞌanj ga̱ núj si̱j israelitá ado̱nj. Ne̱ nana̱ cataꞌ tuꞌva Yaꞌanj cheꞌé nij síí canoco̱ꞌ man Cristó Jesús roꞌ, quisíj ya̱ nu̱ꞌ nana̱ yoꞌ cheꞌé nij soj si̱j yaníj ga̱ núj si̱j israelitá na̱nj chugua̱nj.
\p
\v 7 Ne̱ vaa ndoꞌo suun rihanj nata̱ꞌ ꞌu̱nj nana̱ sa̱ꞌ yoꞌ, ne̱ yoꞌ me se lu̱j quiꞌyaj Yaꞌanj cheꞌej ado̱nj. Nda̱ꞌ se ne nó xcúún ꞌu̱nj quiri̱ꞌ ꞌu̱nj se lu̱j nihánj, tza̱j ne̱ maꞌa̱n ya̱ Yaꞌanj me síí rqué se lu̱j nihánj manj na̱nj ado̱nj. Soꞌ me síí nucua̱j ndoꞌo, ne̱ uun nu̱cuáj ꞌyáj suun nihánj, ꞌyaj Yaꞌanj na̱nj chugua̱nj.
\v 8 Nda̱ꞌ se síí nica̱ꞌ doj rihaan ta̱ranꞌ nij síí noco̱ꞌ man Yaꞌanj mej, tza̱j ne̱ quiꞌyaj Yaꞌanj se lu̱j yoꞌ rihanj, ne̱ caꞌneꞌ soꞌ suun rihanj nata̱j nana̱ sa̱ꞌ rihaan nij soj si̱j yaníj se vaa niꞌndaj uxrá ya̱ se sa̱ꞌ vaa quiꞌyaj Cristó cheꞌé níꞌ ado̱nj.
\v 9 Ne̱ me rá Yaꞌanj nata̱ꞌ yá ꞌu̱nj rihaan yuvii̱ nu̱ꞌ nana̱ sa̱ꞌ yuve̱ cheꞌé se vaa quiꞌya̱j soꞌ cheꞌé nij yuvii̱ a. Dan me se Yaꞌanj me síí quiꞌyaj nu̱ꞌ rasu̱u̱n, tza̱j ne̱ ne nata̱ꞌ ya̱ soꞌ nana̱ sa̱ꞌ yuve̱ yoꞌ rihaan yuvii̱ nu̱ꞌ cavii nu̱ꞌ caꞌnaꞌ maꞌ.
\v 10 Tza̱j ne̱ da̱j a̱ nij síí uun chij rej xta̱ꞌ do̱ꞌ, da̱j a̱ nij síí nica̱j suun rej xta̱ꞌ do̱ꞌ roꞌ, me rá Yaꞌanj xca̱j nij soꞌ cuentá cuano̱ se vaa ina̱nj nana̱ cu̱u sa̱ꞌ ndoꞌo avii raa̱ Yaꞌanj, ne̱ queneꞌe̱n nij soꞌ man xꞌneꞌ ta̱ranꞌ níꞌ si̱j noco̱ꞌ man Cristó, ne̱ xca̱j nij soꞌ cuentá se vaa avii ndoꞌo raa̱ Yaꞌanj ado̱nj.
\v 11 Dan me se guun rá Yaꞌanj nu̱ꞌ cavii nu̱ꞌ caꞌnaꞌ se vaa quiꞌya̱j soꞌ da̱nj tiempó ma̱n níꞌ, ne̱ guun rá soꞌ se vaa caꞌne̱j soꞌ man Cristó Jesús Si̱j ꞌNi̱j Raꞌa man níꞌ rihaan chumii̱ nihánj a.
\v 12 Ne̱ cheꞌé se amán rá níꞌ niꞌya̱j níꞌ Cristó roꞌ, cheꞌé dan caꞌve̱e cachi̱nj niꞌya̱j maꞌa̱n níꞌ rihaan Yaꞌanj, ne̱ taj cheꞌé cuchuꞌvi̱ꞌ níꞌ caꞌmi̱i̱ níꞌ ga̱ Yaꞌanj maꞌ.
\p
\v 13 Cheꞌé dan achíín ni̱ꞌyáá ꞌu̱nj se vaa se̱ quiriꞌ rá nimán soj queneꞌe̱n soj sayuun ránꞌ ꞌu̱nj cheꞌé soj maꞌ. ꞌO̱ se tana̱nj a̱ veꞌé uxrá cavi̱i̱ sa̱ꞌ soj doj cheꞌé sayuun ránꞌ ꞌu̱nj nihánj na̱nj ado̱nj.
\s Cachíín niꞌya̱j Pabló rihaan Yaꞌanj se vaa sa̱ꞌ doj xca̱j nij síí ma̱n Éfeso cuentá se vaa ꞌe̱e̱ ndoꞌo rá Cristó man níꞌ a
\p
\v 14 Cheꞌé se cavii sa̱ꞌ ndoꞌo nij soj ga̱ núj, cheꞌé dan yáán ru̱j ꞌu̱nj, ne̱ achíín ni̱ꞌyáá ꞌu̱nj rihaan Rej níꞌ Yaꞌanj cheꞌé soj ado̱nj.
\v 15 Dan me se Yaꞌanj me Rej nu̱ꞌ ta̱ranꞌ nij xꞌneꞌ nij síí ma̱n rej xta̱ꞌ do̱ꞌ, Rej nu̱ꞌ ta̱ranꞌ nij xꞌneꞌ níꞌ si̱j ma̱n rihaan chumii̱ nihánj do̱ꞌ,
\v 16 ne̱ achíín ni̱ꞌyáj rihaan soꞌ cheꞌé soj se vaa, cheꞌé se niꞌndaj ya̱ sa̱ꞌ veꞌé vaa soꞌ ne̱ taj a̱ ꞌó se achiin man soꞌ, nari̱ꞌ nucuaj nimán soj quiꞌya̱j Nimán soꞌ ado̱nj.
\v 17 Ne̱ achíín ni̱ꞌyáj se vaa cuchuma̱n doj rá soj ni̱ꞌyaj soj man Cristó, ne̱ ꞌo̱ natu̱u̱ Cristó nimán soj quiꞌya̱j Yaꞌanj, ga̱a ne̱ ꞌo̱ cunu̱u ꞌe̱e̱ rá soj man ta̱ranꞌ tinúú soj ado̱nj.
\v 18-19 Nda̱a síj, ga̱a ne̱ nari̱ꞌ nucuaj ndoꞌo nimán soj, ne̱ gu̱un nucua̱j soj xca̱j sa̱ꞌ soj cuentá se vaa ꞌe̱e̱ uxrá rá Cristó man níꞌ, ne̱ queneꞌe̱n ta̱ranꞌ níꞌ si̱j noco̱ꞌ man Yaꞌanj se vaa ꞌe̱e̱ uxrá rá Cristó man níꞌ ado̱nj. Taj a̱ ꞌó síí gu̱un nucua̱j maꞌa̱n queneꞌe̱n nu̱ꞌ nda̱a vaa ꞌe̱e̱ uxrá rá Cristó man níꞌ maꞌ. Tza̱j ne̱ guun nucua̱j níꞌ xcaj níꞌ cuentá se vaa ꞌe̱e̱ uxrá rá Cristó man níꞌ, quiꞌyaj Yaꞌanj, ne̱ quiꞌyaj ndoꞌo Yaꞌanj se lu̱j cheꞌé níꞌ, ne̱ dan me se cunu̱u sa̱ꞌ ina̱nj nimán níꞌ, nda̱a vaa maꞌa̱n Yaꞌanj ado̱nj.
\p
\v 20 Achíín ni̱ꞌyáá ꞌu̱nj rihaan síí nucua̱j ndoꞌo quiꞌya̱j doj a̱ rihaan da̱j a̱ se achíín níꞌ, nda̱a da̱j a̱ se nu̱u̱ raa̱ níꞌ, cheꞌé se ꞌyaj suun snucua̱j soꞌ nimán níꞌ ado̱nj.
\v 21 Cheꞌé dan cata̱j xꞌneꞌ níꞌ si̱j noco̱ꞌ man Cristó se vaa niꞌndaj ya̱ sa̱ꞌ veꞌé vaa Yaꞌanj, ne̱ ꞌo̱ da̱nj caꞌmi̱i̱ níꞌ ga̱ taꞌníí níꞌ nu̱ꞌ cavii nu̱ꞌ caꞌanj cheꞌé Cristó Jesús a. Veé da̱nj ga̱a̱ ya̱ ado̱nj.
\c 4
\s Veꞌé quiꞌya̱j níꞌ rihaan tinúú níꞌ, cheꞌé se ase vaa nee̱ man ꞌo̱ yuvii̱ roꞌ, da̱nj vaa ta̱ranꞌ nij tinu̱j níꞌ a
\p
\v 1 Síí ꞌni̱j tagaꞌ cheꞌé se nocóꞌ ꞌu̱nj man Síí ꞌNi̱j Raꞌa man níꞌ mé ꞌu̱nj, ne̱ cheꞌé dan rqueé ꞌu̱nj man nij soj se vaa veꞌé canoco̱ꞌ soj man Yaꞌanj ga̱a chéé soj rihaan chumii̱ nihánj á. ꞌO̱ se Yaꞌanj me síí canacúún man soj canoco̱ꞌ soj man soꞌ a.
\v 2 Ne̱ gu̱un nij soj síí niꞌya̱nj aꞌmii, ne̱ veꞌé quiꞌya̱j soj ga̱ tinúú soj, ne̱ se̱ guun yuva̱a̱ soj man tinúú soj maꞌ. Tana̱nj cunu̱u ꞌe̱e̱ rá soj man tinúú soj, ne̱ ga̱a̱ ina̱j nimán soj ga̱ tinúú soj á.
\v 3 Ne̱ se̱ cunuꞌ soj ga̱ tuviꞌ soj, ne̱ se̱ quitáá riꞌyunj soj tuviꞌ soj maꞌ. Ma̱an se dínj cuma̱n soj ga̱ tinúú soj á. Veꞌé cuno̱ ta̱ranꞌ soj rihaan Nimán Yaꞌanj, ne̱ ase vaa nimán o̱rúnꞌ yuvii̱ roꞌ, da̱nj ga̱a̱ nimán soj ga̱ tinúú soj á.
\v 4 Dan me se o̱rúnꞌ ya̱ yuvii̱ me níꞌ vaa, ne̱ o̱rúnꞌ ya̱ nimán níꞌ vaa, ne̱ dan me se o̱rúnꞌ ya̱ Nimán Yaꞌanj me nuû nimán ya̱ níꞌ ado̱nj. Ne̱ uun ya̱ rá ta̱ranꞌ níꞌ se vaa canacúún Yaꞌanj man ta̱ranꞌ níꞌ, ne̱ ꞌo̱ cuya̱a̱n cavi̱i̱ sa̱ꞌ ta̱ranꞌ níꞌ, quiꞌya̱j Yaꞌanj ado̱nj.
\v 5 O̱rúnꞌ Síí ꞌNi̱j Raꞌa man níꞌ, ne̱ o̱rúnꞌ nana̱ sa̱ꞌ amán rá níꞌ, ne̱ ꞌo̱ cuya̱a̱n vaa cataꞌ ne níꞌ,
\v 6 ne̱ o̱rúnꞌ Yaꞌanj me Rej ta̱ranꞌ níꞌ uún a. Nica̱j yuꞌunj soꞌ man ta̱ranꞌ níꞌ, ne̱ ꞌyaj suun soꞌ nimán ta̱ranꞌ níꞌ, ne̱ ya̱nj soꞌ nimán ta̱ranꞌ níꞌ na̱nj ado̱nj.
\p
\v 7 Tza̱j ne̱ nda̱a ꞌo̱ ꞌo̱ níꞌ rqué Cristó ꞌo̱ ꞌo̱ suun sa̱ꞌ rihaan, nda̱a vaa me rá soꞌ rque̱ soꞌ man níꞌ ado̱nj. Ne̱ quiꞌyaj ndoꞌo Yaꞌanj se lu̱j rihaan ꞌo̱ ꞌo̱ níꞌ se vaa guun nucua̱j ꞌo̱ ꞌo̱ níꞌ quiꞌya̱j níꞌ suun caꞌneꞌ Cristó rihaan níꞌ a.
\v 8 ꞌO̱ cuya̱a̱n vaa nana̱ nihánj ga̱ nana̱ no̱ rihaan Danj Yaꞌanj a:
\q Quiꞌyaj canaán soꞌ rihaan nij síí ta̱j riꞌyunj man soꞌ,
\q ga̱a ne̱ caꞌanj nica̱j soꞌ man nij soꞌ rej xta̱ꞌ,
\q ga̱a ne̱ rqué soꞌ se sa̱ꞌ rihaan nij yuvii̱ a.
\m Da̱nj taj Danj Yaꞌanj a.
\p
\v 9 Ne̱ nana̱ yoꞌ taj se vaa cavii soꞌ xta̱ꞌ, ne̱ neꞌen níꞌ se vaa asino ya̱a̱n nanij soꞌ nda̱a rej cunu̱u̱ doj rque yoꞌóó a.
\v 10 Ne̱ o̱rúnꞌ soꞌ me síí nanij, ne̱ o̱rúnꞌ soꞌ me síí cavii rej xta̱ꞌ uún ado̱nj. Dan me se xta̱ꞌ doj cavii soꞌ rihaan da̱j a̱ rasu̱u̱n, ga̱a ne̱ guun soꞌ síí nica̱j yuꞌunj man da̱j a̱ rasu̱u̱n ado̱nj.
\p
\v 11 Ne̱ maꞌa̱n soꞌ me síí cuneꞌ man taꞌa̱j níꞌ gu̱un taꞌa̱j níꞌ síí ca̱ta̱ suun caꞌa̱nj nata̱ꞌ snana̱ soꞌ, ne̱ ꞌó taꞌa̱j níꞌ me síí cuneꞌ soꞌ nata̱ꞌ nana̱ rqué Yaꞌanj rihaan, ne̱ ꞌó taꞌa̱j níꞌ me síí cuneꞌ soꞌ nata̱ꞌ nana̱ sa̱ꞌ cheꞌé Cristó rihaan nij síí ataa cuchuma̱n rá, ne̱ ꞌó taꞌa̱j níꞌ me síí tumé sa̱ꞌ rihaan Yaꞌanj man nij síí noco̱ꞌ man soꞌ, ne̱ ꞌó taꞌa̱j níꞌ me síí tihaa̱n snana̱ Yaꞌanj rihaan nu̱ꞌ tinúú níꞌ, quiꞌyaj Cristó a.
\v 12 Dan me se da̱nj quiꞌyaj Cristó, cheꞌé se me rá Cristó gu̱un nucua̱j níꞌ si̱j noco̱ꞌ man Cristó quiꞌya̱j níꞌ suun ra̱cuíj níꞌ man tinúú níꞌ, ga̱a ne̱ veꞌé doj cuma̱n ta̱ranꞌ níꞌ si̱j noco̱ꞌ man Cristó, ne̱ sa̱ꞌ doj quiꞌya̱j níꞌ se‑su̱u̱n soꞌ na̱nj ado̱nj.
\v 13 Ne̱ sa̱ꞌ doj cuchuma̱n rá níꞌ ni̱ꞌyaj níꞌ Taꞌníí Yaꞌanj, ne̱ sa̱ꞌ doj queneꞌe̱n níꞌ da̱j vaa soꞌ, ne̱ veꞌé cunu̱u rcuaꞌa̱a̱n ta̱ranꞌ níꞌ ado̱nj. Chij ina̱nj ga̱a̱ rá níꞌ, ga̱a ne̱ da̱j se sa̱ꞌ ndoꞌo vaa Cristó roꞌ, da̱nj ga̱a̱ sa̱ꞌ ta̱ranꞌ níꞌ na̱nj ado̱nj.
\p
\v 14 Tza̱j ne̱ cuano̱ roꞌ, ase vaa xnii vaa níꞌ, ne̱ vaa yuvii̱ tihaꞌ yuꞌunj ndoꞌo man níꞌ, ne̱ dan me se nuchruj ra̱a̱ ndoꞌo nij yuvii̱ da̱j quiꞌya̱j nij soꞌ, ne̱ tihaꞌ yuꞌunj nij soꞌ man níꞌ a. Ne̱ tucuꞌyón ndoꞌo nij síí tihaꞌ yuꞌunj nana̱ naca̱ man níꞌ, ne̱ amán rá níꞌ uno níꞌ náá guun nana̱ tihaꞌ yuꞌunj yoꞌ, ꞌyaj nij soꞌ a. Tza̱j ne̱ asa̱ꞌ quisíj cunuu chij rá níꞌ, ne̱ se̱ cuno níꞌ nana̱ tihaꞌ yuꞌunj yoꞌ a̱ maꞌ.
\v 15 Ma̱an ina̱nj nana̱ ya̱ caꞌmi̱i̱ níꞌ rihaan tinúú níꞌ, cheꞌé se ꞌe̱e̱ rá níꞌ man tinúú níꞌ, ga̱a ne̱ sa̱ꞌ doj queneꞌe̱n níꞌ canoco̱ꞌ níꞌ man Cristó nu̱ꞌ se vaa quiꞌya̱j níꞌ ado̱nj. Dan me se ase vaa rii taꞌngaꞌ cúú yave̱ yuvii̱ rihaan nu̱ꞌ nee̱ man yuvii̱ roꞌ, da̱nj vaa rii taꞌngaꞌ Cristó rihaan níꞌ ado̱nj.
\v 16 Ne̱ ma̱an cheꞌé soꞌ roꞌ, me ase vaa oro̱ꞌ tuviꞌ nu̱ꞌ cúú man ꞌo̱ yuvii̱ roꞌ, da̱nj vaa nocoꞌ tuviꞌ níꞌ ga̱ tinúú níꞌ a. Ne̱ narqué Cristó se nucua̱j achiin rihaan nu̱ꞌ nij tinu̱j níꞌ, ne̱ cheꞌé dan veꞌé doj cuma̱n ta̱ranꞌ níꞌ, ne̱ veꞌé doj cunu̱u ꞌe̱e̱ rá níꞌ tinúú níꞌ ado̱nj.
\s Caꞌne̱ꞌ rá níꞌ ga̱ tucuáán chiꞌi̱i̱, ne̱ veꞌé canoco̱ꞌ níꞌ man Síí ꞌNi̱j Raꞌa man níꞌ á
\p
\v 17 Cheꞌé dan me cata̱j xnaꞌanj yá ꞌu̱nj ꞌo̱ nana̱ rihaan soj, cheꞌé se noco̱ꞌ níꞌ man Síí ꞌNi̱j Raꞌa man níꞌ a. Dan me se quisíj quiꞌyaj soj se vaa ꞌyaj ꞌó nij síí yaníj nij síí ne nocoꞌ man Cristó na̱nj á. Nij síí yaníj yoꞌ me se noco̱ꞌ nij soꞌ nana̱ snúú rmaꞌa̱n nana̱ avii raa̱ maꞌa̱n nij soꞌ,
\v 18 ne̱ ne uun nucua̱j nij soꞌ xca̱j sa̱ꞌ nij soꞌ cuentá a̱ maꞌ. Se̱ cavii sa̱ꞌ nimán nij soꞌ, quiꞌya̱j Yaꞌanj maꞌ. Ma̱an se quira̱nꞌ nij soꞌ sayuun cheꞌé se síí niꞌyo̱n me nij soꞌ ne̱ nichra̱j ndoꞌo nimán nij soꞌ ado̱nj.
\v 19 Ne nanó rá nij soꞌ cheꞌé cacunꞌ ꞌyaj nij soꞌ maꞌ. Tana̱nj ꞌo̱ nocoꞌ nij soꞌ tucuáán chiꞌi̱i̱, ne̱ ꞌyaj ndoꞌo nij soꞌ cacunꞌ se vaa me rá nee̱ man nij soꞌ quiꞌya̱j nij soꞌ, ne̱ niha̱ꞌ ndoꞌo rá nij soꞌ quiꞌya̱j nij soꞌ da̱j a̱ cacunꞌ yoꞌ a. Ne aꞌneꞌ rá nij soꞌ ga̱ suun ꞌyaj cacunꞌ a̱ maꞌ.
\p
\v 20 Tza̱j ne̱ ino̱ uxrá vaa nana̱ nariꞌ soj asi̱j guun cheꞌe̱ soj canocoꞌ soj man Cristó ado̱nj.
\v 21 Cuno nij soj snana̱ soꞌ, ne̱ nariꞌ nij soj cheꞌé soꞌ nda̱a vaa taj nana̱ ya̱ tihaa̱n Jesús man níꞌ ado̱nj.
\v 22 Nana̱ nariꞌ nij soj taj se vaa xa̱ꞌ chrej chiꞌi̱i̱ noco̱ꞌ soj asino ya̱a̱n, tza̱j ne̱ riꞌi̱j soj man nimán nga̱ soj noco̱ꞌ chrej chiꞌi̱i̱ á. ꞌO̱ se síí riꞌyuj me soꞌ cheꞌé se uno soꞌ rihaan nana̱ taꞌyunj ne̱ ꞌyaj soꞌ se vaa me rá nee̱ man soꞌ a.
\v 23 Tza̱j ne̱ cuano̱ nihánj no̱ xcúún soj caꞌve̱j soj cunu̱u sa̱ꞌ nimán soj, ne̱ xca̱j naca̱ soj cuentá á.
\v 24 Ne̱ caꞌve̱j soj gu̱un soj yuvii̱ naca̱ quiꞌya̱j Yaꞌanj á. Dan me se Yaꞌanj me síí quiꞌya̱j cunu̱u nica̱ ya̱ nimán soj, ne̱ cunu̱u sa̱ꞌ ya̱ nimán soj, quiꞌya̱j soꞌ ado̱nj.
\p
\v 25 Cheꞌé dan caꞌne̱ꞌ rá soj ga̱ nana̱ ne̱, ne̱ ina̱nj nana̱ ya̱ caꞌmi̱i̱ soj rihaan tinúú soj, cheꞌé se ase vaa nee̱ man maꞌa̱n soj roꞌ, vaa nee̱ man ta̱ranꞌ nij tinu̱j níꞌ ado̱nj.
\v 26 Nda̱ꞌ se aꞌmaan ndoꞌo rá soj, tza̱j ne̱ se̱ quiꞌyaj soj cacunꞌ maꞌ. Ne̱ raꞌya̱nj naꞌma̱a̱n rá uún soj cuaj na̱nj á. Se̱ caꞌvej rá soj ꞌo̱ ga̱a̱ yuva̱a̱ nimán soj cunu̱ꞌ güii maꞌ.
\v 27 Se̱ gaa yaꞌnúj rihaan Síí Chre̱e caxri̱i̱ Síí Chre̱e chrej chiꞌi̱i̱ rque soj, quiꞌya̱j soj maꞌ.
\v 28 Sese vaa síí itu̱u̱ ꞌni̱j scaꞌnúj soj, ne̱ caꞌne̱ꞌ rá soꞌ ga̱ suun ꞌyaj itu̱u̱ rasu̱u̱n na̱nj á. Tana̱nj veꞌé quiꞌya̱j suun maꞌa̱n soꞌ suun sa̱ꞌ, ga̱a ne̱ sese achiin rasu̱u̱n rihaan tinúú soꞌ, ne̱ gu̱un nucua̱j soꞌ rque̱ maꞌa̱n soꞌ rasu̱u̱n rihaan tinúú soꞌ á.
\v 29 Se̱ caꞌvej soj caꞌmi̱i̱ soj nana̱ qui̱j maꞌ. Tana̱nj gu̱un rá soj veꞌé caꞌmi̱i̱ soj, ne̱ nana̱ sa̱ꞌ nana̱ achiin man tinúú soj roꞌ, yoꞌ me nago̱ꞌ soj rihaan tinúú soj á. Ne̱ cavi̱i̱ sa̱ꞌ doj ta̱ranꞌ nij síí cuno̱ nana̱ caꞌmi̱i̱ soj, sese sa̱ꞌ caꞌmi̱i̱ soj ado̱nj.
\p
\v 30 Ne̱ se̱ guun nano̱ rá Nimán Yaꞌanj, quiꞌya̱j soj maꞌ. Cheꞌé se ya̱nj Nimán Yaꞌanj ga̱ soj roꞌ, cheꞌé dan neꞌen ya̱ soj se vaa cavi̱i̱ sa̱ꞌ soj asa̱ꞌ quisíj güii ti̱nanii Yaꞌanj man níꞌ rihaan sayuun ado̱nj.
\v 31 Caꞌne̱ꞌ rá soj ga̱ suun nachriꞌ niꞌya̱j tinúú á. Caꞌne̱ꞌ rá soj ga̱ suun axríj yuva̱a̱ man tinúú á. Caꞌne̱ꞌ rá soj ga̱ suun aꞌmaan rá á. Se̱ caguáj soj doj rihaan tinúú soj maꞌ. Se̱ caꞌmii soj doj nana̱ nij cheꞌé tinúú soj maꞌ. Quiriꞌi̱j soj cunuda̱nj chrej chiꞌi̱i̱ á.
\v 32 Dan me se veꞌé quiꞌya̱j soj rihaan tinúú soj á. Ga̱a̱ ꞌe̱e̱ rá soj ni̱ꞌyaj soj tinúú soj á. Neꞌen soj se vaa tinavij Yaꞌanj cacunꞌ tumé níꞌ, cheꞌé se caviꞌ Cristó cheꞌé níꞌ a. Cheꞌé dan no̱ xcúún ya̱ soj cara̱a̱ xꞌnaa soj ni̱ꞌyaj soj tinúú soj ado̱nj.
\c 5
\p
\v 1 Neꞌen nij soj se vaa taꞌni̱j Yaꞌanj me soj cuano̱, ne̱ ꞌe̱e̱ uxrá rá Yaꞌanj man soj, ne̱ cheꞌé dan ase vaa ꞌyaj maꞌa̱n Yaꞌanj roꞌ, da̱nj ga̱a̱ quiꞌya̱j uún maꞌa̱n soj na̱nj á.
\v 2 ꞌO̱ ga̱a̱ ꞌe̱e̱ rá soj man tinúú soj á. Ina̱nj da̱nj quiꞌyaj Cristó, cunuu ꞌe̱e̱ rá soꞌ man níꞌ, ne̱ caꞌvej soꞌ cavi̱ꞌ soꞌ cheꞌé níꞌ, ne̱ ase vaa rasu̱u̱n rqué yuvii̱ rihaan Yaꞌanj roꞌ, taꞌngaꞌ da̱nj vaa Cristó cheꞌé níꞌ na̱nj chugua̱nj.
\p
\v 3 Se̱ quiꞌyaj soj cacunꞌ ga̱ ꞌó yuvii̱ né ni̱ca̱ soj me maꞌ. A̱ ꞌó se chiꞌi̱i̱ se̱ quiꞌyaj soj maꞌ. Ne̱ se̱ guun niha̱ꞌ rá soj quiri̱ꞌ ndoꞌo soj rasu̱u̱n maꞌ. Síí noco̱ꞌ man Yaꞌanj me soj, ne̱ daj chiha̱a̱ míj se̱ quiꞌyaj soj a̱ doj cacunꞌ vaa da̱nj maꞌ.
\v 4 Ne̱ se̱ caꞌmii soj nana̱ chiꞌi̱i̱ do̱ꞌ, nana̱ nij do̱ꞌ maꞌ. Se̱ caꞌmii soj nana̱ snúú rmaꞌa̱n maꞌ. ꞌO̱ se taj cheꞌé caꞌmi̱i̱ soj nana̱ vaa da̱nj maꞌ. Tana̱nj no̱ xcúún soj cata̱j ina̱nj soj guun niꞌya̱j níꞌ rihaan Yaꞌanj ado̱nj.
\v 5 Dan me se síí ꞌyaj cacunꞌ ga̱ ꞌó yuvii̱ né ni̱ca̱ me roꞌ, quira̱nꞌ soꞌ sayuun, ne̱ síí niha̱ꞌ rá quiri̱ꞌ ndoꞌo rasu̱u̱n roꞌ, quira̱nꞌ soꞌ sayuun ado̱nj. (ꞌO̱ se ase vaa síí aráj gue̱e̱ rihaan yaꞌanj quiꞌyaj maꞌa̱n yuvii̱ roꞌ, da̱nj vaa uún síí niha̱ꞌ rá quiri̱ꞌ ndoꞌo rasu̱u̱n ado̱nj.) Xca̱j ya̱ soj cuentá se vaa a̱ ꞌó síí ꞌyaj cacunꞌ yoꞌ se̱ cayáán ga̱ Yaꞌanj asa̱ꞌ quisíj güii gu̱un chij Cristó do̱ꞌ, gu̱un chij Yaꞌanj do̱ꞌ a̱ maꞌ.
\p
\v 6 Se̱ caꞌvej rá soj caꞌmi̱i̱ yuvii̱ nana̱ ne̱ rihaan soj ne̱ tiha̱ꞌ yuꞌunj nij yuvii̱ man soj maꞌ. Se̱ quiꞌyaj soj se chiꞌi̱i̱ me rá nij yuvii̱ quiꞌya̱j soj maꞌ. ꞌO̱ se yoꞌ me se ꞌyaj nij síí naꞌvej rá cuno̱ rihaan Yaꞌanj, ne̱ cheꞌé dan uyanj rá Yaꞌanj, ne̱ ꞌyaj Yaꞌanj sayuun man nij soꞌ ado̱nj.
\v 7 Cheꞌé dan naxu̱u̱n yaníj soj man soj rihaan nij síí ꞌyaj da̱nj á.
\v 8 Asi̱j rque̱ roꞌ, ase vaa nij síí chéé rej rmi̱ꞌ roꞌ, da̱nj vaa maꞌa̱n soj, ne̱ nuviꞌ cuentá nica̱j soj maꞌ. Tza̱j ne̱ ya̱j roꞌ, canocoꞌ soj man Síí ꞌNi̱j Raꞌa man níꞌ, ne̱ cheꞌé dan ase vaa síí chéé rej ranga̱ꞌ roꞌ, da̱nj vaa soj, nica̱j ndoꞌo soj cuentá, ne̱ cheꞌé dan veꞌé quiꞌya̱j soj ga̱a chéé soj rihaan chumii̱ nihánj na̱nj á.
\v 9 Síí chéé rej ranga̱ꞌ roꞌ, sa̱ꞌ ꞌyaj soꞌ, ne̱ nica̱ vaa nimán soꞌ, ne̱ nana̱ ya̱ ina̱nj aꞌmii soꞌ ado̱nj.
\v 10 Dan me se nuchru̱j ra̱a̱ soj da̱j quiꞌya̱j soj, ne̱ cara̱nꞌ rá Síí ꞌNi̱j Raꞌa man níꞌ ni̱ꞌyaj soꞌ man soj ado̱nj.
\p
\v 11 Ne̱ se̱ guun gu̱un tuvi̱ꞌ soj ga̱ nij síí chiꞌi̱i̱ ne acaj cuentá, ne̱ se̱ quiꞌyaj soj rasu̱u̱n taj se gúnꞌ ga̱ nij soꞌ a̱ maꞌ. Tana̱nj a̱ ti̱haa̱n soj man nij síí ꞌyaj da̱nj se vaa rasu̱u̱n nij ꞌyaj nij soꞌ á.
\v 12 ꞌO̱ se xa̱ꞌ se vaa ꞌyaj yuve̱ nij soꞌ, tza̱j ne̱ nda̱a uun naꞌa̱j yáꞌ caꞌmi̱ꞌ cheꞌé se vaa ꞌyaj yuve̱ nij soꞌ chugua̱nj.
\v 13 Tza̱j ne̱ sese curuvi̱ꞌ da̱j vaa nu̱ꞌ rasu̱u̱n ꞌyaj yuve̱ nij soꞌ, ga̱a ne̱ queneꞌe̱n nij soꞌ da̱j vaa yoꞌ, ne̱ xca̱j ya̱ nij soꞌ cuentá se vaa nij uxrá vaa quiꞌyaj nij soꞌ ado̱nj.
\v 14 ꞌO̱ se yaꞌan chuguu̱n me se ya̱ ruviꞌ nu̱ꞌ nij rasu̱u̱n ꞌyaj yaꞌan ado̱nj. Cheꞌé dan taj nana̱ nihánj a:
\q Nari̱i̱ soj nej, si̱j otoj scaꞌnúj nij xnangá,
\q ne̱ na̱xagaa soj, canicu̱nꞌ caya̱ soj,
\q ne̱ Cristó me síí chugu̱u̱n rihaan soj á,
\m taj nana̱ yoꞌ a.
\p
\v 15 Cheꞌé dan tu̱mé uxrá soj da̱j vaa ꞌyaj soj ga̱a chéé soj rihaan chumii̱ nihánj á. Se̱ quiꞌyaj soj se vaa ꞌyaj nij síí ne acaj cuentá maꞌ. Tana̱nj quiꞌya̱j soj nda̱a vaa ꞌyaj síí cu̱u raa̱ á.
\v 16 Ne̱ se̱ caꞌneꞌ u̱u̱n rá soj cache̱n ndoꞌo orá rihaan soj maꞌ. ꞌO̱ se uun ndoꞌo cacunꞌ cuano̱ nihánj, ne̱ cheꞌé dan no̱ xcúún soj quiꞌya̱j ndoꞌo soj rasu̱u̱n sa̱ꞌ ya̱j ga̱a vaa yaꞌnúj rihaan soj chugua̱nj.
\v 17 Ne̱ se̱ guun soj síí niꞌyo̱n maꞌ. Tana̱nj xca̱j soj cuentá da̱j me rá Síí ꞌNi̱j Raꞌa man níꞌ quiꞌya̱j soj a.
\v 18 Ne̱ se̱ guun xno̱ soj maꞌ. Cheꞌé se uun xno̱ yuvii̱ roꞌ, cheꞌé dan ꞌyaj ndoꞌo nij yuvii̱ cacunꞌ chiꞌi̱i̱ ndoꞌo ado̱nj. Tana̱nj ꞌo̱ cu̱nuû Nimán Yaꞌanj nimán soj á.
\v 19 Ase vaa chraꞌ no̱ rihaan Danj Yaꞌanj do̱ꞌ, chraꞌ aꞌmii cheꞌé Yaꞌanj do̱ꞌ, chraꞌ rqué Nimán Yaꞌanj man soj do̱ꞌ roꞌ, da̱nj ga̱a̱ nana̱ caꞌmi̱i̱ soj ga̱ tinúú soj á. Ne̱ cachra̱a̱ nimán soj chraꞌ rihaan Síí ꞌNi̱j Raꞌa man níꞌ á.
\v 20 Ne̱ niga̱nj cata̱j soj guun niꞌya̱j níꞌ rihaan Rej níꞌ Yaꞌanj cheꞌé cunuda̱nj rasu̱u̱n, cheꞌé se‑chuvi̱i Jesucristó Si̱j ꞌNi̱j Raꞌa man níꞌ á.
\s Veꞌé quiꞌya̱j ꞌo̱ ꞌo̱ níꞌ nda̱a vaa me rá tuviꞌ níꞌ á
\p
\v 21 Veꞌé quiꞌya̱j cunuda̱nj soj nda̱a vaa me rá tuviꞌ soj cheꞌé se aráj cochro̱j uxrá soj rihaan Cristó á.
\p
\v 22 Dan me se veꞌé quiꞌya̱j nij chana̱ nda̱a vaa me rá nica̱ noꞌ á. Dan me se da̱j se uun rá níꞌ niꞌya̱j níꞌ man Síí ꞌNi̱j Raꞌa man níꞌ roꞌ, da̱nj gu̱un rá chana̱ ni̱ꞌyaj chana̱ nica̱ noꞌ á.
\v 23 Dan me se Cristó me Síí Tinanii rihaan Sayuun man xꞌneꞌ níꞌ si̱j noco̱ꞌ man soꞌ, ne̱ uun chij soꞌ rihaan níꞌ, ne̱ cheꞌé dan da̱j se uun rá níꞌ niꞌya̱j níꞌ man soꞌ roꞌ, da̱nj ina̱nj gu̱un rá chana̱ ni̱ꞌyaj noꞌ man nica̱ noꞌ á.
\v 24 Ne̱ ase vaa uno xꞌneꞌ níꞌ si̱j noco̱ꞌ man Cristó rihaan Cristó roꞌ, taꞌngaꞌ da̱nj quiꞌya̱j nij chana̱ cuno̱ nij noꞌ nu̱ꞌ nana̱ sa̱ꞌ aꞌmii nica̱ nij noꞌ rihaan nij noꞌ á.
\p
\v 25 Ne̱ nij snóꞌo roꞌ, ga̱a̱ ꞌe̱e̱ uxrá rá nij soꞌ man nica̱ nij soꞌ á. Dan me se ase vaa ꞌe̱e̱ rá Cristó man xꞌneꞌ níꞌ si̱j noco̱ꞌ man soꞌ roꞌ, da̱nj ga̱a̱ ꞌe̱e̱ rá nij snóꞌo man nica̱ nij soꞌ uún ado̱nj. Neꞌen soj se vaa caꞌnéé nimán Cristó cavi̱ꞌ soꞌ cheꞌé níꞌ si̱j noco̱ꞌ man soꞌ,
\v 26 cheꞌé se me rá soꞌ naquiꞌya̱j sa̱ꞌ soꞌ nimán ta̱ranꞌ níꞌ si̱j noco̱ꞌ man soꞌ ado̱nj. Da̱j se vaa naruvii man níꞌ ꞌyaj na roꞌ, da̱nj naꞌnuꞌ snana̱ Yaꞌanj nimán níꞌ ne̱ xꞌnéj cacunꞌ ta̱j xráá níꞌ a.
\v 27 Nda̱a síj, ga̱a ne̱ vaa güii, ne̱ cachro̱n soꞌ man xꞌneꞌ níꞌ si̱j noco̱ꞌ man soꞌ rihaan maꞌa̱n soꞌ, ne̱ niꞌndaj ya̱ sa̱ꞌ ga̱a̱ ta̱ranꞌ níꞌ ni̱ꞌyaj soꞌ, ne̱ a̱ ꞌó cacunꞌ do̱ꞌ, a̱ ꞌó se nij do̱ꞌ, se̱ quitáá xráá níꞌ a̱ maꞌ. Tana̱nj ase vaa vaa sa̱ꞌ Yaꞌanj roꞌ, da̱nj ga̱a̱ sa̱ꞌ ta̱ranꞌ níꞌ ado̱nj.
\p
\v 28 Dan me se ase vaa ꞌyaj Cristó cheꞌé níꞌ roꞌ, da̱nj quiꞌya̱j uún nij snóꞌo cheꞌé nica̱ snóꞌo, ne̱ ase vaa ꞌe̱e̱ rá snóꞌo man nee̱ man maꞌa̱n soꞌ roꞌ, da̱nj ga̱a̱ ꞌe̱e̱ rá soꞌ man nica̱ soꞌ uún á. Dan me se ase vaa nee̱ man maꞌa̱n níꞌ roꞌ, da̱nj vaa chana̱ nica̱ níꞌ rihaan níꞌ, ne̱ cheꞌé dan me se sese ꞌe̱e̱ rá snóꞌo man nica̱ snóꞌo, ne̱ síí ꞌe̱e̱ rá man maꞌa̱n me uún soꞌ na̱nj chugua̱nj.
\v 29 ꞌO̱ se a̱ ꞌó yuvii̱ ne nachriꞌ nee̱ man maꞌa̱n maꞌ. Tana̱nj sese naꞌaan rque níꞌ, ne̱ chá níꞌ, ne̱ aráyaꞌa̱nj uxrá níꞌ man nee̱ man níꞌ ase vaa ꞌyaj Cristó aráyaꞌa̱nj Cristó man xꞌneꞌ níꞌ si̱j noco̱ꞌ man soꞌ ado̱nj.
\v 30 Dan me se ase vaa nee̱ man maꞌa̱n Cristó roꞌ, da̱nj vaa da̱j a̱ níꞌ si̱j noco̱ꞌ xꞌneꞌ nij síí noco̱ꞌ man soꞌ ado̱nj.
\v 31 Ne̱ nihánj me nana̱ no̱ rihaan Danj Yaꞌanj a: “Cheꞌé dan ta̱náj snóꞌo man rej soꞌ do̱ꞌ, man nii soꞌ do̱ꞌ, ne̱ cunu̱u rucuaꞌa̱a̱n snóꞌo ga̱ chana̱ nica̱ soꞌ, ne̱ ase vaa o̱rúnꞌ yuvii̱ roꞌ, da̱nj ga̱a̱ ro̱j soꞌ a”, taj Danj Yaꞌanj a.
\p
\v 32 Nana̱ noco̱o ndoꞌo me nana̱ nihánj nana̱ sa̱ꞌ yuve̱ tihaa̱n naca̱ Yaꞌanj rihaan níꞌ, ne̱ aꞌmii nana̱ nihánj cheꞌé Cristó do̱ꞌ, cheꞌé xꞌneꞌ níꞌ si̱j noco̱ꞌ man soꞌ do̱ꞌ na̱nj ado̱nj.
\v 33 Dan me se sese snóꞌo me soj, ne̱ no̱ xcúún ꞌo̱ ꞌo̱ soj ga̱a̱ ꞌe̱e̱ rá soj man nica̱ soj, ne̱ ase vaa ꞌe̱e̱ rá soj man maꞌa̱n soj roꞌ, da̱nj ga̱a̱ ꞌe̱e̱ rá soj man nica̱ soj á. Ne̱ chana̱ roꞌ, no̱ xcúún chana̱ cara̱a̱ cochro̱j chana̱ rihaan nica̱ chana̱ uún ado̱nj.
\c 6
\p
\v 1 Soj xni̱i noco̱ꞌ Yaꞌanj Si̱j ꞌNi̱j Raꞌa man níꞌ roꞌ, cuno̱ soj rihaan rej soj do̱ꞌ, rihaan nii soj do̱ꞌ, cheꞌé se da̱nj nó xcúún níꞌ quiꞌya̱j níꞌ á.
\v 2 Nihánj me ꞌo̱ suun noco̱o no̱ rihaan Danj Yaꞌanj caꞌneꞌ Yaꞌanj rihaan níꞌ cuno̱ níꞌ a: “Veꞌé cara̱a̱ co̱chróó so̱ꞌ rihaan réé so̱ꞌ do̱ꞌ, rihaan nií so̱ꞌ do̱ꞌ á”, taj Danj Yaꞌanj rihaan níꞌ ado̱nj. Ne̱ scaꞌnúj nij suun caꞌneꞌ Yaꞌanj rihaan níꞌ ga̱a naá roꞌ, suun nihánj me suun uun tuvi̱ꞌ asino ya̱a̱n ga̱ ꞌo̱ se lu̱j ataꞌ tuꞌva Yaꞌanj ado̱nj.
\v 3 Sese da̱nj quiꞌya̱j níꞌ, ga̱a ne̱ cavi̱i̱ sa̱ꞌ níꞌ, ne̱ gu̱un queꞌe̱e̱ doj güii ca̱yáán níꞌ rihaan chumii̱ nihánj a.
\p
\v 4 Ne̱ sese rej xnii me soj, ne̱ se̱ caꞌmaan rá taꞌníí soj quiꞌya̱j soj maꞌ. Tana̱nj veꞌé ta̱cuachij soj man taꞌníí soj á. ꞌO̱ se tu̱cuꞌyón soj snana̱ Yaꞌanj Si̱j ꞌNi̱j Raꞌa man níꞌ man taꞌníí soj, ne̱ narque̱ soj chrej nucua̱j man taꞌníí soj á.
\p
\v 5 Ne̱ mozó roꞌ, veꞌé cuno̱ soꞌ rihaan se‑ruꞌve̱e̱ soꞌ, ne̱ ga̱a̱ niꞌya̱nj nimán mozó, ne̱ cara̱a̱ cochro̱j uxrá mozó rihaan se‑ruꞌve̱e̱ mozó á. Ase vaa ꞌyaj mozó rihaan maꞌa̱n Cristó roꞌ, da̱nj quiꞌya̱j mozó rihaan se‑ruꞌve̱e̱ mozó uún á.
\v 6 Ne̱ se̱ quiꞌyaj mozó yoꞌ se vaa ꞌyaj nij síí vaa qui̱j nimán maꞌ. Dan me se nij síí vaa qui̱j nimán roꞌ, me rá nij soꞌ cara̱nꞌ rá se‑ruꞌve̱e̱ nij soꞌ ni̱ꞌyaj soꞌ man nij soꞌ, tza̱j ne̱ ina̱nj ga̱a niꞌya̱j ruꞌvee man nij soꞌ ꞌyaj suun nij soꞌ, tza̱j ne̱ se̱ guun quiꞌya̱j soj da̱nj maꞌ. Tana̱nj ꞌo̱ caꞌne̱j nimán soj quiꞌya̱j suun soj, ne̱ gu̱un rá soj se vaa se‑mo̱zó Cristó me soj, ne̱ quiꞌya̱j soj nu̱ꞌ se vaa me rá Yaꞌanj quiꞌya̱j soj á.
\v 7 Gu̱un niha̱ꞌ rá soj quiꞌya̱j suun soj á. Se̱ guun rá soj se vaa rihaan yuvii̱ ꞌyaj suun soj maꞌ. Tana̱nj gu̱un rá soj se vaa mozó ꞌyaj suun rihaan maꞌa̱n Yaꞌanj Si̱j ꞌNi̱j Raꞌa man níꞌ me soj á.
\v 8 Xca̱j soj cuentá se vaa sese quiꞌya̱j níꞌ suun sa̱ꞌ, ne̱ taj se ꞌyaj sese mozó me níꞌ do̱ꞌ, sese né mo̱zó me níꞌ do̱ꞌ, taj se ꞌyaj maꞌ. Dan me se ya̱ na̱ruꞌvee Yaꞌanj Si̱j ꞌNi̱j Raꞌa man níꞌ cheꞌé suun sa̱ꞌ ꞌyaj níꞌ na̱nj ado̱nj.
\p
\v 9 Ne̱ soj si̱j ruꞌvee roꞌ, veꞌé quiꞌya̱j soj ga̱ se‑mo̱zó soj uún á. Caꞌne̱ꞌ rá soj ga̱ suun axríj yuva̱a̱ man mozó, ne̱ caꞌne̱ꞌ rá soj ga̱ suun tuchuꞌviꞌ man mozó uún á. ꞌO̱ se neꞌen soj se vaa nicu̱nꞌ Síí ꞌNi̱j Raꞌa man soj do̱ꞌ, man se‑mo̱zó soj do̱ꞌ, rej xta̱ꞌ, ne̱ ꞌo̱ cuya̱a̱n vaa ta̱ranꞌ níꞌ rihaan soꞌ ado̱nj.
\s Da̱j quiꞌya̱j níꞌ, ne̱ caꞌve̱e quiꞌya̱j canaán níꞌ rihaan Síí Chre̱e a
\p
\v 10 Da̱j ꞌó nana̱ cata̱j xnaꞌanj ꞌu̱nj rihaan soj a. ꞌO̱ ga̱a̱ chre̱ꞌ soj ga̱ Yaꞌanj Si̱j ꞌNi̱j Raꞌa man níꞌ á. Caꞌve̱j soj caꞌne̱j Síí ꞌNi̱j Raꞌa man níꞌ se nucua̱j nimán soj, ne̱ da̱j se vaa se nucua̱j nica̱j maꞌa̱n soꞌ roꞌ, da̱nj ga̱a̱ se nucua̱j ni̱caj maꞌa̱n soj, quiꞌya̱j soꞌ chugua̱nj.
\v 11 Dan me se nu̱ꞌ se nucua̱j rqué Yaꞌanj man soj roꞌ, caꞌne̱j soj se nucua̱j yoꞌ nimán soj, ne̱ gu̱un nucua̱j soj quiꞌya̱j canaán soj rihaan Síí Chre̱e ga̱a me rá soꞌ tiha̱ꞌ yuꞌunj soꞌ man soj ado̱nj.
\v 12 Da̱nj quiꞌya̱j níꞌ cheꞌé se nij síí unuꞌ ga̱ níꞌ me nij nana̱ chre̱e uun chij rihaan chumii̱ nihánj do̱ꞌ, nij nana̱ chre̱e nica̱j suun do̱ꞌ, nij nana̱ chre̱e rii taꞌngaꞌ rihaan rej rmi̱ꞌ ma̱n rihaan chumii̱ nihánj do̱ꞌ, nij xꞌneꞌ ri̱i̱ nana̱ chre̱e chéé rej xta̱ꞌ do̱ꞌ ado̱nj.
\v 13 Cheꞌé dan caꞌne̱j soj nu̱ꞌ se nucua̱j rqué Yaꞌanj man soj nimán soj, ne̱ güii quiꞌya̱j ndoꞌo Síí Chre̱e sayuun rihaan chumii̱ nihánj roꞌ, ne̱ gu̱un nucua̱j soj quiꞌya̱j canaán soj rihaan soꞌ ado̱nj. Ne̱ asa̱ꞌ cunuꞌ soj ga̱ Síí Chre̱e yoꞌ, ne̱ síí ga̱a̱ nucua̱j doj rihaan soꞌ gu̱un soj ado̱nj.
\p
\v 14 Dan me se nano̱ꞌ soj da̱j quiꞌya̱j soj cunu̱ꞌ soj ga̱ Síí Chre̱e yoꞌ á. Uxrá canoco̱ꞌ soj nana̱ ya̱, ne̱ ase vaa nuj ꞌni̱j catuu̱n tanuu roꞌ, da̱nj ga̱a̱ nana̱ yoꞌ rihaan soj, ne̱ gu̱un nucua̱j soj cunu̱ꞌ soj ga̱ Síí Chre̱e yoꞌ ado̱nj. Ne̱ caꞌve̱j soj cunu̱u sa̱ꞌ nimán soj rihaan Yaꞌanj, ne̱ ase vaa agaꞌ aráán nu̱ꞌ rucua̱a̱ tanuu roꞌ, da̱nj ga̱a̱ se ca̱ráán nimán soj, quiꞌya̱j Yaꞌanj, ga̱a ne̱ se̱ guun nucua̱j Síí Chre̱e quiꞌya̱j chiꞌi̱i̱ Síí Chre̱e yoꞌ nimán soj a̱ maꞌ.
\v 15 Ne̱ ga̱a̱ listó soj, ne̱ cavi̱i̱ soj caꞌa̱nj soj, nata̱ꞌ soj nana̱ sa̱ꞌ cheꞌé Cristó rihaan yuvii̱, ne̱ cuno̱ nij yuvii̱ nana̱ sa̱ꞌ yoꞌ, ne̱ dínj ca̱yáán nij yuvii̱ ga̱ Yaꞌanj ado̱nj. Ne̱ ase vaa canu̱j ꞌni̱j tacóó tanuu roꞌ, da̱nj ga̱a̱ nana̱ sa̱ꞌ yoꞌ rihaan soj a.
\v 16 Ne̱ niga̱nj ga̱a̱ nucua̱j uxrá rá soj man Cristó, ga̱a ne̱ ase vaa tanuu noco̱ꞌ rcuchra̱ꞌ ma̱nj raꞌa roꞌ, da̱nj ga̱a̱ maꞌa̱n soj uún, ne̱ sese go̱ꞌ Síí Chre̱e chruun ta̱j tanj raa̱ acoꞌ yaꞌan man soj, ne̱ gu̱un nucua̱j soj ti̱naꞌáj soj yaꞌan yoꞌ chugua̱nj.
\v 17 Ne̱ gu̱un ya̱ rá soj se vaa nani̱i̱ soj rihaan sayuun, quiꞌya̱j Yaꞌanj, ne̱ ase vaa nave̱ aga̱ꞌ nu̱u̱ raa̱ tanuu roꞌ, da̱nj ga̱a̱ nana̱ sa̱ꞌ cu̱nuû raa̱ soj, ne̱ se̱ guun nucua̱j Síí Chre̱e quiꞌya̱j Síí Chre̱e se chiꞌi̱i̱ man soj maꞌ. Ne̱ canoco̱ꞌ uxrá soj snana̱ Yaꞌanj nana̱ sa̱ꞌ nana̱ rqué Nimán Yaꞌanj rihaan níꞌ, ne̱ ase vaa neê espadá noco̱ꞌ raꞌa tanuu roꞌ, da̱nj ga̱a̱ snana̱ Yaꞌanj rihaan soj, ne̱ gu̱un nucua̱j soj go̱ꞌ soj man Síí Chre̱e, quiꞌya̱j snana̱ Yaꞌanj yoꞌ ado̱nj.
\p
\v 18 Ne̱ niga̱nj cachi̱nj niꞌya̱j uxrá soj rihaan Yaꞌanj, ne̱ ra̱cuíj Nimán Yaꞌanj man soj nacu̱nj soj ne̱ cachi̱nj niꞌya̱j soj ado̱nj. Se̱ caꞌneꞌ rá soj maꞌ. Tana̱nj ꞌo̱ cachi̱nj niꞌya̱j uxrá soj cheꞌé ta̱ranꞌ nij síí noco̱ꞌ man Cristó na̱nj á.
\v 19 Ne̱ cachi̱nj niꞌya̱j soj cheꞌé ma̱ꞌán ꞌu̱nj se vaa rque̱ Yaꞌanj nana̱ cu̱u caꞌmi̱i̱ ꞌu̱nj rihaan yuvii̱, ne̱ sca̱ꞌ ti̱haán ꞌu̱nj nu̱ꞌ nana̱ sa̱ꞌ cheꞌé Cristó rihaan nij yuvii̱ á. Dan me se nana̱ sa̱ꞌ yuve̱ tihaa̱n naca̱ Yaꞌanj man níꞌ me nana̱ sa̱ꞌ yoꞌ,
\v 20 ne̱ nda̱ꞌ se nu̱mií ꞌu̱nj agaꞌ ne̱ꞌ, tza̱j ne̱ ꞌu̱nj me síí quiriꞌ suun nata̱ꞌ nana̱ sa̱ꞌ yoꞌ rihaan yuvii̱, ne̱ cachi̱nj niꞌya̱j soj rihaan Yaꞌanj se vaa se̱ cuchuꞌvíꞌ ꞌu̱nj caꞌmi̱i̱ ꞌu̱nj nana̱ sa̱ꞌ yoꞌ rihaan yuvii̱, cheꞌé se no̱ xcúún yá ꞌu̱nj caꞌmi̱i̱ sca̱ꞌ yá ꞌu̱nj nana̱ sa̱ꞌ yoꞌ rihaan yuvii̱ ado̱nj.
\s Caꞌnéé Pabló man síí cuꞌna̱j Tíquico cuchi̱ꞌ soꞌ rihaan nij síí ma̱n Éfeso a
\p
\v 21 Cata̱j xnaꞌanj tinúú níꞌ síí cuꞌna̱j Tíquico rihaan soj nu̱ꞌ se vaa quiránꞌ ꞌu̱nj a. Síí ꞌe̱e̱ ndoꞌo rá níꞌ man me soꞌ, ne̱ veꞌé ndoꞌo nuû soꞌ rihaan Síí ꞌNi̱j Raꞌa man níꞌ chugua̱nj.
\v 22 Ne̱ me rá ꞌu̱nj queneꞌe̱n soj nu̱ꞌ se vaa quiranꞌ núj, ne̱ me rá ꞌu̱nj nari̱ꞌ nucuaj nimán soj, ne̱ cheꞌé dan caꞌne̱j ꞌu̱nj man soꞌ cuchi̱ꞌ soꞌ rihaan soj á.
\s Me rá Pabló quiꞌya̱j ndoꞌo Yaꞌanj se lu̱j cheꞌé nij síí noco̱ꞌ man Cristó ya̱nj chumanꞌ Éfeso a
\p
\v 23 Me rá ꞌu̱nj ga̱a̱ xe̱j nimán nij tinu̱j nij soj, ne̱ ga̱a̱ ꞌe̱e̱ rá soj tinúú soj, ne̱ ga̱a̱ nucua̱j rá soj man Yaꞌanj, quiꞌya̱j Rej níꞌ Yaꞌanj do̱ꞌ, quiꞌya̱j Jesucristó Si̱j ꞌNi̱j Raꞌa man níꞌ do̱ꞌ ado̱nj.
\v 24 Ne̱ me rá ꞌu̱nj quiꞌya̱j ndoꞌo Yaꞌanj se lu̱j cheꞌé ta̱ranꞌ nij soj si̱j ꞌo̱ aráj cochro̱j rihaan Jesucristó Si̱j ꞌNi̱j Raꞌa man níꞌ nu̱ꞌ cavii nu̱ꞌ caꞌanj a.