\id COL
\h Colosenses
\toc1 Colosenses
\mt Nihánj me cartá caꞌnéé Pabló rihaan nij síí ya̱nj chumanꞌ Colosas a
\c 1
\p
\v 1 ꞌU̱nj roꞌ, me síí cuꞌna̱j Pabló, ne̱ si̱j cuneꞌ Cristó Jesús caꞌa̱nj nata̱ꞌ snana̱ soꞌ rihaan yuvii̱ mej nda̱a vaa guun rá Yaꞌanj, ne̱ ya̱nj tinúꞌ Timoteo ga̱ ꞌu̱nj cuano̱ a.
\p
\v 2 ꞌYaj rój yanj nihánj caꞌne̱j rój rihaan nij soj xꞌneꞌ nij síí noco̱ꞌ man Yaꞌanj amán rá niꞌya̱j man Cristó ya̱nj chumanꞌ Colosas a. Cheꞌé se amán rá soj niꞌya̱j soj man Cristó roꞌ, cheꞌé dan nuu tinu̱j níꞌ, ne̱ nucua̱j rá rój neꞌen rój man soj cuano̱, tinu̱j, nocoj.
\p Me rá rój quiꞌya̱j Rej níꞌ Yaꞌanj se lu̱j cheꞌé soj, ne̱ me rá rój ga̱a̱ xe̱j nimán soj, quiꞌya̱j Yaꞌanj uún ado̱nj.
\s Cachíín niꞌya̱j Pabló rihaan Yaꞌanj cheꞌé nij síí noco̱ꞌ man Cristó ya̱nj chumanꞌ Colosas a
\p
\v 3 Niga̱nj achíín niꞌya̱j rój rihaan Yaꞌanj Rej Jesucristó Si̱j ꞌNi̱j Raꞌa man níꞌ cheꞌé soj, ne̱ taj rój guun niꞌya̱j níꞌ rihaan Yaꞌanj cheꞌé soj,
\v 4 cheꞌé se caꞌnaꞌ nana̱ rihaan rój se vaa amán rá soj niꞌya̱j soj man Cristó Jesús ne̱ ꞌe̱e̱ rá soj niꞌya̱j soj cunuda̱nj ꞌó nij síí noco̱ꞌ man Cristó a.
\v 5 Da̱nj vaa rá soj cuano̱, cheꞌé se cuno soj nana̱ sa̱ꞌ cheꞌé Cristó nana̱ ya̱, ne̱ uun ya̱ rá soj se vaa ma̱n ndoꞌo se sa̱ꞌ rej xta̱ꞌ quiri̱ꞌ soj vaa güii ado̱nj.
\v 6 Dan me se a̱j cuchiꞌ nana̱ sa̱ꞌ nihánj rihaan cunuda̱nj nij yuvii̱ ma̱n rihaan chumii̱, ne̱ doj a̱ doj a̱ vaa nij yuvii̱ cuchumán rá nana̱ sa̱ꞌ yoꞌ a. Ne̱ ꞌo̱ cuya̱a̱n quiꞌyaj nij soj ga̱ ꞌó nij síí cuno nana̱ yoꞌ, ne̱ dan me se ga̱a cuchiꞌ nana̱ nihánj rihaan soj, ne̱ cuno soj, ne̱ xcaj soj cuentá cheꞌé se lu̱j ꞌyaj Yaꞌanj cheꞌé níꞌ, ne̱ cuchumán rá soj ado̱nj.
\v 7 Ne̱ síí cuꞌna̱j Epafras me síí tucuꞌyón nana̱ yoꞌ man soj, ne̱ dan me se síí ꞌyaj se‑su̱u̱n Yaꞌanj ga̱ núj me soꞌ, ne̱ ꞌe̱e̱ rá núj man soꞌ, ne̱ ꞌo̱ ꞌyaj soꞌ se‑su̱u̱n Cristó cheꞌé soj ado̱nj.
\v 8 Ne̱ cataj xnaꞌanj soꞌ rihaan núj se vaa ꞌe̱e̱ uxrá rá soj man tinúú soj, quiꞌyaj Nimán Yaꞌanj ado̱nj.
\p
\v 9 Cheꞌé dan asi̱j cuno núj nana̱ cataj soꞌ rihaan núj, ne̱ niga̱nj achíín niꞌya̱j núj rihaan Yaꞌanj cheꞌé soj se vaa rque̱ Nimán Yaꞌanj nana̱ sa̱ꞌ cu̱u nimán soj, ne̱ xca̱j soj cuentá da̱j me rá Yaꞌanj quiꞌya̱j soj,
\v 10 cheꞌé rej quiꞌya̱j soj nu̱ꞌ se vaa no̱ xcúún níꞌ si̱j noco̱ꞌ man Síí ꞌNi̱j Raꞌa man níꞌ quiꞌya̱j níꞌ, ne̱ gu̱un niha̱ꞌ rá Yaꞌanj ni̱ꞌyaj Yaꞌanj man soj á. Ne̱ cunuda̱nj suun sa̱ꞌ quiꞌya̱j ndoꞌo soj, ga̱a ne̱ doj a̱ sa̱ꞌ xca̱j soj cuentá da̱j vaa maꞌa̱n Yaꞌanj a.
\v 11 Yaꞌanj me síí nucua̱j uxrá, ne̱ achíín niꞌya̱j núj se vaa caꞌne̱j ndoꞌo Yaꞌanj se nucua̱j nimán soj, ga̱a ne̱ caꞌve̱e ga̱a̱ sca̱ꞌ rá soj rihaan sayuun quiꞌya̱j yuvii̱ man soj, ne̱ ga̱a̱ ina̱j nimán soj, ne̱ ga̱a̱ niha̱ꞌ nimán soj,
\v 12 ne̱ cata̱j soj guun niꞌya̱j níꞌ rihaan Yaꞌanj Rej Jesucristó á. Nu̱ꞌ dan achíín niꞌya̱j rój rihaan Yaꞌanj cheꞌé soj, ne̱ neꞌen soj se vaa a̱j cunuu sa̱ꞌ níꞌ quiꞌyaj Yaꞌanj, ne̱ cheꞌé dan me vaa güii quiri̱ꞌ níꞌ se sa̱ꞌ rque̱ Yaꞌanj man ta̱ranꞌ nij síí noco̱ꞌ man soꞌ, cheꞌé se yuvii̱ xcaj cuentá chéé rej ranga̱ꞌ me níꞌ chugua̱nj.
\v 13 Asino ya̱a̱n me se guun chij Síí Chre̱e rihaan níꞌ, ne̱ ase vaa síí chéé rej rmi̱ꞌ roꞌ, da̱nj vaa níꞌ ga̱a rque̱ a. Tza̱j ne̱ ya̱j me se tinanii Yaꞌanj man níꞌ rihaan Síí Chre̱e, ne̱ ya̱j uun chij Taꞌníí Yaꞌanj rihaan níꞌ quiꞌyaj Yaꞌanj ado̱nj. Dan me se ꞌe̱e̱ ndoꞌo rá Yaꞌanj man Taꞌníí soꞌ,
\v 14 ne̱ cheꞌé Taꞌníí soꞌ navij cacunꞌ tumé níꞌ, ne̱ ti̱nanii Taꞌníí soꞌ man níꞌ rihaan sayuun ado̱nj.
\s Nataꞌ Pabló cheꞌé me síí me Cristó a
\p
\v 15 Ne ruviꞌ Yaꞌanj niꞌya̱j yuvii̱ maꞌ. Ma̱an se queneꞌen níꞌ man Cristó, ne̱ xcaj níꞌ cuentá da̱j vaa maꞌa̱n Yaꞌanj ado̱nj. Asi̱j ataa quiꞌya̱j Yaꞌanj chumii̱, ne̱ a̱j nicu̱nꞌ Cristó ga̱ soꞌ ado̱nj.
\v 16 Dan me se nicu̱nꞌ Cristó ga̱ Yaꞌanj ga̱a quiꞌyaj Yaꞌanj se ma̱n xta̱ꞌ do̱ꞌ, se ma̱n rihaan chumii̱ do̱ꞌ, rasu̱u̱n ruviꞌ niꞌya̱j yuvii̱ do̱ꞌ, rasu̱u̱n ne ruviꞌ niꞌya̱j yuvii̱ do̱ꞌ, da̱j a̱ nij se‑mo̱zó Yaꞌanj uun chij rihaan chumii̱ nihánj do̱ꞌ, cunuda̱nj rasu̱u̱n yoꞌ me se quiꞌyaj Yaꞌanj á. Dan me se caꞌneꞌ Yaꞌanj suun rihaan Cristó quiꞌya̱j Cristó cunuda̱nj rasu̱u̱n, ne̱ ina̱nj cheꞌé Cristó vaa cunuda̱nj rasu̱u̱n yoꞌ, ne̱ dan me se me rá Yaꞌanj ni̱caj yuꞌunj Cristó man cunuda̱nj rasu̱u̱n yoꞌ na̱nj ado̱nj.
\v 17 Asi̱j ataa curuvi̱ꞌ cunuda̱nj nij rasu̱u̱n, ne̱ a̱j nicu̱nꞌ Cristó, ne̱ cheꞌé o̱rúnꞌ Cristó vaa cunuda̱nj rasu̱u̱n yoꞌ cuano̱ ado̱nj.
\p
\v 18 Ne̱ soꞌ me síí uun chij ndoꞌo rihaan níꞌ á. Dan me se ase vaa rii taꞌngaꞌ cúú yave̱ yuvii̱ rihaan maꞌa̱n yuvii̱ roꞌ, da̱nj vaa rii taꞌngaꞌ Cristó rihaan cunuda̱nj níꞌ xꞌneꞌ yuvii̱ noco̱ꞌ man soꞌ chugua̱nj. Asino soꞌ me síí cunuu iꞌna̱ꞌ uún ga̱a caviꞌ soꞌ, ne̱ da̱nj ina̱nj ga̱a̱ cunu̱u iꞌna̱ꞌ uún níꞌ, quiꞌya̱j soꞌ, ga̱a ne̱ gu̱un soꞌ síí ra̱a̱ doj rihaan cunuda̱nj níꞌ ado̱nj.
\v 19 Ase vaa maꞌa̱n Yaꞌanj roꞌ, da̱nj vaa Cristó, quiꞌyaj Yaꞌanj, ne̱ soꞌ me síí nica̱j cunuda̱nj snucua̱j Yaꞌanj ado̱nj.
\v 20 Asino quiriꞌ nu̱ꞌ chumii̱ rihaan Yaꞌanj cheꞌé cacunꞌ quiꞌyaj yuvii̱, tza̱j ne̱ caviꞌ Cristó rihaan rcutze̱ cheꞌé yuvii̱, quiꞌyaj Yaꞌanj a. Ne̱ caꞌve̱e cunu̱u sa̱ꞌ yuvii̱ do̱ꞌ, nu̱ꞌ chumii̱ do̱ꞌ, rihaan Yaꞌanj, ne̱ gu̱un niha̱ꞌ rá Yaꞌanj ni̱ꞌyaj Yaꞌanj nu̱ꞌ se ma̱n rihaan chumii̱ do̱ꞌ, nu̱ꞌ se ma̱n xta̱ꞌ do̱ꞌ na̱nj ado̱nj. Yoꞌ me se vaa quiꞌyaj Yaꞌanj ga̱a caꞌnéé Yaꞌanj man Cristó rihaan chumii̱ nihánj ne̱ cayanj ton man Cristó ga̱a caviꞌ soꞌ rihaan rcutze̱ na̱nj ado̱nj.
\s Cunuu rcuaꞌa̱a̱n níꞌ ga̱ Yaꞌanj, quiꞌyaj Cristó a
\p
\v 21 Ga̱a naá me se yuvii̱ yaníj me soj, ne̱ yuvii̱ ta̱j riꞌyunj man Yaꞌanj me soj a. ꞌO̱ se qui̱j vaa rá soj, ne̱ ina̱nj se chiꞌi̱i̱ quiꞌyaj soj ado̱nj.
\v 22 Tza̱j ne̱ guun Cristó yuvii̱, ne̱ caviꞌ soꞌ, ne̱ cheꞌé dan cunuu rcuaꞌa̱a̱n soj ga̱ Yaꞌanj, quiꞌyaj soꞌ, ne̱ vaa güii canicu̱nꞌ soj rihaan Yaꞌanj, quiꞌya̱j Cristó, ne̱ si̱j nuu sa̱ꞌ nimán rihaan Yaꞌanj gu̱un soj, ne̱ taj cacunꞌ tu̱mé soj a̱ maꞌ.
\v 23 Dan me se cavi̱i̱ sa̱ꞌ soj, sese ꞌo̱ canoco̱ꞌ soj stucua̱nj Cristó na̱nj ado̱nj. Raan canoco̱ꞌ soj man soꞌ á. A̱j cuno soj nana̱ sa̱ꞌ cheꞌé Cristó, ne̱ cheꞌé dan uun ya̱ rá soj se vaa cavi̱i̱ sa̱ꞌ soj, ne̱ se̱ guun cata̱j soj se vaa ne ya̱ vaa nana̱ sa̱ꞌ cuno soj maꞌ. ꞌO̱ se nana̱ caꞌmii natáj nii rihaan cunuda̱nj nij yuvii̱ ma̱n rihaan chumii̱ me nana̱ sa̱ꞌ yoꞌ, ne̱ ꞌu̱nj nihánj guun ꞌo̱ síí aꞌmii natáj snana̱ Yaꞌanj nana̱ sa̱ꞌ yoꞌ rihaan yuvii̱ na̱nj ado̱nj.
\s Suun ꞌyaj Pabló cheꞌé nij síí noco̱ꞌ man Cristó a
\p
\v 24 A̱j quiránꞌ ꞌu̱nj sayuun cheꞌé nij soj, ne̱ nihánj me guun niha̱ꞌ raj cheꞌé sayuun ránꞌ ꞌu̱nj á. Dan me se ase vaa sayuun quiranꞌ Cristó cheꞌé nij síí noco̱ꞌ man soꞌ roꞌ, da̱nj vaa sayuun ranꞌ ma̱ꞌán ꞌu̱nj cheꞌé xꞌneꞌ yuvii̱ noco̱ꞌ man soꞌ a.
\v 25 Síí ꞌyaj se‑su̱u̱n Yaꞌanj cheꞌé nij soj si̱j noco̱ꞌ man Cristó mej, ne̱ Yaꞌanj me síí cuneꞌ mán ꞌu̱nj nata̱ꞌ ꞌu̱nj cunuda̱nj snana̱ Yaꞌanj rihaan nij soj a.
\v 26 ꞌO̱ vaa yuve̱ snana̱ Yaꞌanj nana̱ sa̱ꞌ nihánj ga̱a naá, tza̱j ne̱ nda̱a ya̱j me tinaruviꞌ sa̱ꞌ Yaꞌanj nu̱ꞌ snana̱ Yaꞌanj nana̱ sa̱ꞌ rihaan níꞌ si̱j noco̱ꞌ man soꞌ ya̱j ado̱nj.
\v 27 Dan me se guun rá Yaꞌanj xca̱j cunuda̱nj níꞌ si̱j noco̱ꞌ man soꞌ cuentá cheꞌé nana̱ sa̱ꞌ yuve̱ nihánj nana̱ tihaa̱n naca̱ Yaꞌanj se vaa niꞌndaj ya̱ sa̱ꞌ quiꞌyaj Yaꞌanj cheꞌé soj si̱j yaníj na̱nj ado̱nj. Dan me se yuvii̱ yaníj me soj, tza̱j ne̱ ya̱nj Cristó nimán soj, ne̱ cheꞌé dan uun ya̱ rá níꞌ se vaa niꞌndaj ya̱ cavi̱i̱ sa̱ꞌ soj ga̱ Yaꞌanj vaa güii na̱nj ado̱nj.
\v 28 Ne̱ maꞌa̱n núj me síí nataꞌ rihaan cunuda̱nj yuvii̱ cheꞌé Cristó, ne̱ nagoꞌ núj chrej nucua̱j man nij yuvii̱ se vaa canoco̱ꞌ nij yuvii̱ man Cristó a. Ne̱ tucuꞌyón núj nana̱ sa̱ꞌ cu̱u rihaan cunuda̱nj yuvii̱, cheꞌé rej asa̱ꞌ cachrón núj man nij soꞌ rihaan Yaꞌanj, ne̱ sa̱ꞌ ina̱nj ga̱a̱ nij soꞌ, cheꞌé se sa̱ꞌ uxrá nocoꞌ nij soꞌ man Cristó a.
\v 29 Cheꞌé dan ꞌyaj uxraj se‑su̱u̱n Cristó cheꞌé se nucua̱j do̱ꞌ, cheꞌé nana̱ sca̱ꞌ do̱ꞌ, nu̱u̱ nimanj quiꞌyaj Cristó ado̱nj.
\c 2
\p
\v 1 Me rá ꞌu̱nj queneꞌe̱n nij soj se vaa ꞌyaj ndoꞌoj se‑su̱u̱n Cristó cheꞌé soj do̱ꞌ, cheꞌé nij síí noco̱ꞌ man Cristó ya̱nj chumanꞌ Laodicea do̱ꞌ, cheꞌé ꞌó nij yuvii̱ noco̱ꞌ man Cristó yuvii̱ ataa queneꞌe̱n manj do̱ꞌ a.
\v 2 ꞌO̱ se me ndoꞌo rá ꞌu̱nj nari̱ꞌ nucuaj nimán soj ne̱ ꞌo̱ cu̱nuû se sa̱ꞌ nimán soj cuma̱n soj ga̱ tuviꞌ soj, ne̱ ꞌo̱ nari̱ꞌ ndoꞌo soj nda̱a gu̱un ya̱ ya̱ rá soj nana̱ sa̱ꞌ yuve̱ tihaa̱n Yaꞌanj se vaa maꞌa̱n Cristó me nana̱ naca̱ yoꞌ na̱nj á.
\v 3 Dan me se rihaan Cristó me se ꞌni̱j yuve̱ cunuda̱nj nana̱ vaa yuꞌvee ndoꞌo ase vaa nana̱ cu̱u do̱ꞌ, nana̱ achiin queneꞌe̱n yuvii̱ do̱ꞌ, me yoꞌ ado̱nj.
\s Ina̱nj Cristó canoco̱ꞌ níꞌ, ne̱ se̱ cuno níꞌ nana̱ tihaꞌ yuꞌunj maꞌ
\p
\v 4 Nana̱ nihánj me taj xnaꞌanj ꞌu̱nj rihaan nij soj cheꞌé se naꞌvej rá ꞌu̱nj tiha̱ꞌ yuꞌunj yuvii̱ veꞌé aꞌmii astuꞌva man soj maꞌ.
\v 5 Nda̱ꞌ se nuvíꞌ ꞌu̱nj nicunꞌ niꞌya̱j soj, tza̱j ne̱ nicu̱nꞌ nimán ꞌu̱nj ga̱ soj chugua̱nj. ꞌO̱ se uun niha̱ꞌ uxrá ya̱ raj se vaa ꞌo̱ veꞌé sa̱ꞌ mán soj, ne̱ ꞌo̱ Cristó nucua̱j rá soj, mán soj ado̱nj.
\v 6 Dan me se nda̱ꞌ rá se guun rá soj ga̱a guun cheꞌe̱ soj canocoꞌ soj man Cristó Jesús Si̱j ꞌNi̱j Raꞌa man níꞌ roꞌ, da̱nj gu̱un rá soj ꞌo̱ canoco̱ꞌ chre̱ꞌ soj man soꞌ á.
\v 7 Dan me se ꞌo̱ gu̱un xe̱j soj rihaan soꞌ, ne̱ ꞌo̱ canicu̱nꞌ xraan soj rihaan soꞌ, ne̱ ꞌo̱ cuno̱ soj rihaan soꞌ, ne̱ ꞌo̱ ca̱yáán soj nda̱a vaa taj tucuáán tucuꞌyón núj man soj, ne̱ o̱rúnꞌ soꞌ cuchuma̱n rá soj ni̱ꞌyaj soj, ne̱ cata̱j uxrá soj guun niꞌya̱j níꞌ rihaan Yaꞌanj á.
\p
\v 8 Tu̱mé soj man soj se̱ gaa na̱nj tiha̱ꞌ yuꞌunj yuvii̱ man soj maꞌ. Me rá nij yuvii̱ canoco̱ꞌ soj stucua̱nj nij soꞌ, tza̱j ne̱ nuviꞌ yuꞌvee nó stucua̱nj nij soꞌ rihaan tucuáán sa̱ꞌ noco̱ꞌ níꞌ maꞌ. Ma̱an se tucuáán yoꞌ roꞌ, nana̱ tucuꞌyón na̱nj tuviꞌ nij yuvii̱ rihaan nij yuvii̱ me nana̱ yoꞌ, ne̱ snana̱ nij nana̱ chre̱e ma̱n rihaan chumii̱ nihánj me nana̱ yoꞌ, tza̱j ne̱ né sna̱na̱ Cristó me nana̱ yoꞌ maꞌ.
\v 9 ꞌO̱ se ase vaa maꞌa̱n Yaꞌanj roꞌ, da̱nj vaa Cristó, tza̱j ne̱ vaa nee̱ man Cristó, ne̱ cheꞌé dan ruviꞌ Cristó rihaan níꞌ, ne̱ xcaj níꞌ cuentá da̱j vaa maꞌa̱n Yaꞌanj uún chugua̱nj.
\v 10 Ne̱ Cristó me síí uun chij rihaan nu̱ꞌ nij nana̱ chre̱e ma̱n rihaan chumii̱ nihánj, ne̱ ya̱nj Cristó ga̱ soj, ne̱ cheꞌé dan taj se achiin man soj cuano̱ maꞌ.
\v 11 Da̱nj na̱nj uún, ne̱ ma̱an cheꞌé se nuu rcuaꞌa̱a̱n soj ga̱ Cristó roꞌ, ma̱an cheꞌé dan a̱j ta̱j taꞌngaꞌ sa̱ꞌ ina̱nj man soj vaa ado̱nj. Né taꞌnga̱ꞌ ta̱j nee̱ man yuvii̱ me taꞌngaꞌ yoꞌ maꞌ. Taꞌngaꞌ ꞌyaj caꞌvee tanáj soj nu̱ꞌ rasu̱u̱n chiꞌi̱i̱ me yoꞌ ado̱nj. ꞌO̱ se cheꞌé yan tanáj soj nu̱ꞌ rasu̱u̱n chiꞌi̱i̱ roꞌ, cheꞌé dan ase vaa táá taꞌngaꞌ nee̱ man soj vaa ya̱ ado̱nj.
\v 12 ꞌO̱ se ga̱a cataꞌ ne soj, ne̱ ase vaa cachinꞌ nii man Cristó ne̱ naꞌnúj uún soꞌ roꞌ, da̱nj vaa soj, cheꞌé se cuchumán rá soj se vaa veé ya̱ Yaꞌanj si̱j nucua̱j ndoꞌo quiꞌyaj ya̱ cunuu iꞌna̱ꞌ uún Cristó ado̱nj.
\p
\v 13 Ga̱a naá ga̱a ataa queneꞌe̱n soj si̱j yaníj man Cristó, ne̱ quiꞌyaj ndoꞌo soj cacunꞌ, ne̱ taj taꞌngaꞌ cutaꞌ nii man nee̱ man soj maꞌ. Tza̱j ne̱ tinavij u̱u̱n Yaꞌanj nu̱ꞌ cacunꞌ ta̱j xráá soj, ne̱ ase vaa cunuu iꞌna̱ꞌ uún Cristó ga̱a caviꞌ soꞌ roꞌ, da̱nj vaa soj, ne̱ ꞌo̱ cunuu sa̱ꞌ nimán soj, quiꞌyaj Yaꞌanj na̱nj á.
\v 14 Ne̱ dan me se ase vaa tinavij nii ꞌo̱ yanj actá cheꞌé ꞌo̱ síí naruꞌvee cheꞌé scacu̱nꞌ soꞌ roꞌ, taꞌngaꞌ da̱nj tinavij Yaꞌanj cacunꞌ tumé níꞌ cheꞌé se ne cuno̱ níꞌ nu̱ꞌ stucua̱nj Moisés a. Da̱nj quiꞌyaj Yaꞌanj ga̱a goꞌ nii caquíí raꞌa Cristó ne̱ cachrón nii man soꞌ rihaan rcutze̱ a.
\v 15 Dan me se cheꞌé se caviꞌ Cristó rihaan rcutze̱ roꞌ, cheꞌé dan quiꞌyaj canaán Yaꞌanj man da̱j a̱ nij nana̱ chre̱e uun chij do̱ꞌ, da̱j a̱ nij nana̱ chre̱e nica̱j suun do̱ꞌ, ne̱ caxríj naꞌa̱j ranga̱ꞌ Yaꞌanj man nij soꞌ a.
\p
\v 16 Cheꞌé dan se̱ caꞌvej rá soj cata̱j yuvii̱ rihaan soj me rasu̱u̱n se̱ caꞌvee cha̱ soj do̱ꞌ, me rasu̱u̱n se̱ caꞌvee coꞌo̱ soj do̱ꞌ, me güii navi̱j rá soj chaꞌanj cheꞌé Yaꞌanj do̱ꞌ, da̱j quiꞌya̱j soj güii naránj rá soj do̱ꞌ maꞌ.
\v 17 Tucuáán tucuꞌyón nij yuvii̱ rihaan soj me tucuáán canocoꞌ nij yuvii̱ israelitá ga̱a naá a. Ne̱ a̱j tihaa̱n tucuáán yoꞌ do̱j tzínꞌ cheꞌé da̱j ga̱a̱ gu̱un vaa güii, tza̱j ne̱ ya̱j roꞌ, cheꞌé Cristó me se xcaj níꞌ cuentá sa̱ꞌ doj, se vaa maꞌa̱n soꞌ canoco̱ꞌ níꞌ a.
\p
\v 18 Se̱ caꞌvej soj quiri̱ꞌ soj quiꞌya̱j nij síí taj se vaa nica̱ꞌ ndoꞌo aꞌmii nij soꞌ maꞌ. Caꞌve̱e se cata̱j nij soꞌ se vaa aráj gue̱e̱ nij soꞌ rihaan se‑mo̱zó Yaꞌanj do̱ꞌ, caꞌve̱e se nucuiꞌ ndoꞌo rá nij soꞌ se vaa neꞌen nij soꞌ rasu̱u̱n tihaa̱n Yaꞌanj rihaan nij soꞌ taj nij soꞌ do̱ꞌ, tza̱j ne̱ tuꞌva rmaꞌa̱n nij soꞌ, ne̱ ma̱an rasu̱u̱n avii raa̱ maꞌa̱n nij soꞌ me yoꞌ na̱nj ado̱nj.
\v 19 Dan me se taj cúú yave̱ nij soꞌ táá gaán chihá nij soꞌ vaa, ese taj Cristó rihaan nij soꞌ maꞌ. Ne uno nij soꞌ snana̱ Cristó maꞌ. Ne̱ ase vaa rii taꞌngaꞌ cúú yave̱ níꞌ rihaan nee̱ man níꞌ roꞌ, da̱nj vaa rii taꞌngaꞌ Cristó rihaan ta̱ranꞌ níꞌ si̱j noco̱ꞌ man soꞌ, ne̱ sa̱ꞌ doj nocoꞌ níꞌ man Yaꞌanj, ꞌyaj Cristó, ne̱ ina̱nj da̱nj me rá Yaꞌanj quiꞌya̱j níꞌ na̱nj ado̱nj. Ne̱ ase vaa vaa sca̱ꞌ nee̱ man níꞌ ꞌyaj yaꞌaâ man níꞌ roꞌ, da̱nj vaa cuya̱a̱n vaa ta̱ranꞌ níꞌ si̱j noco̱ꞌ man Yaꞌanj ꞌyaj Cristó ado̱nj.
\p
\v 20 Cheꞌé se caviꞌ Cristó cheꞌé nij soj roꞌ, cheꞌé dan ne nó xcúún soj daj chiha̱a̱ míj cuno̱ soj suun aꞌneꞌ nij nana̱ chre̱e ma̱n rihaan chumii̱ nihánj a̱ maꞌ. Cheꞌé dan, me cheꞌé ꞌyaj ndoꞌo soj se vaa ꞌyaj nij yuvii̱ ma̱n u̱u̱n rihaan chumii̱ nihánj ga̱. Dan me se me cheꞌé niha̱ꞌ rá soj cuno̱ soj suun taj se vaa
\v 21 vaa rasu̱u̱n se̱ guun cha̱ soj do̱ꞌ, vaa rasu̱u̱n se̱ guun xca̱j tuꞌva soj da̱j chá yoꞌ do̱ꞌ, vaa rasu̱u̱n se̱ guun cano̱ raꞌa soj do̱ꞌ ga̱.
\v 22 Me cheꞌé uno rmaꞌa̱n soj suun vaa da̱nj ga̱. ꞌO̱ se rasu̱u̱n yoꞌ me se navi̱j yoꞌ vaa güii ado̱nj. Ne̱ xa̱ꞌ suun vaa da̱nj, tza̱j ne̱ suun avii u̱u̱n raa̱ yuvii̱ me suun yoꞌ, ne̱ niha̱ꞌ rá nij yuvii̱ caꞌne̱ꞌ nij yuvii̱ suun vaa da̱nj rihaan tuviꞌ nij yuvii̱ na̱nj ado̱nj.
\v 23 Ne̱ avii raa̱ yuvii̱ uno suun yoꞌ, taj nii, ne̱ sa̱ꞌ uxrá nariꞌ nij soꞌ chrej canoco̱ꞌ nij soꞌ Yaꞌanj, taj nii, ne̱ síí niꞌya̱nj aꞌmii me nij soꞌ, taj nii, tza̱j ne̱ ne ya̱ ya̱ si̱j noco̱ꞌ man Yaꞌanj me nij soꞌ maꞌ. Ma̱an se cheꞌé nana̱ noco̱ꞌ nij soꞌ roꞌ, ꞌyaj ndoꞌo nij soꞌ na̱j guun cacunꞌ me rá nee̱ man nij soꞌ quiꞌya̱j nij soꞌ na̱nj ado̱nj.
\c 3
\p
\v 1 Dan me se ase vaa cunuu iꞌna̱ꞌ uún Cristó roꞌ, da̱nj vaa cunuu sa̱ꞌ nimán soj, ne̱ canocoꞌ soj chrej sa̱ꞌ, quiꞌyaj Cristó a. Cheꞌé dan cheꞌé ina̱nj rasu̱u̱n ma̱n rej xta̱ꞌ nano̱ rá soj, ne̱ cuano̱ nihánj me se xꞌnúú Yaꞌanj rej nuva̱ꞌ Yaꞌanj yáán Cristó cuano̱ ado̱nj.
\v 2 Dan me se nano̱ rá soj cheꞌé rasu̱u̱n ma̱n rej xta̱ꞌ, ne̱ se̱ nanó rá soj cheꞌé rasu̱u̱n ma̱n rihaan chumii̱ nihánj maꞌ.
\v 3 Dan me se a̱j caviꞌ soj rihaan chumii̱ nihánj vaa, ne̱ cuano̱ nihánj me se nu̱u̱ sa̱ꞌ nimán soj rej xta̱ꞌ rej ya̱nj Yaꞌanj, ꞌyaj Cristó a.
\v 4 Ne̱ Cristó me síí ꞌyaj vaa iꞌna̱ꞌ nimán soj, ne̱ vaa güii caꞌna̱ꞌ uún soꞌ rihaan chumii̱ nihánj, ne̱ niꞌndaj ya̱ veꞌé ga̱a̱ curuvi̱ꞌ soj ga̱ soꞌ na̱nj ado̱nj.
\s Nataꞌ Pabló cheꞌé tucuáán nga̱ do̱ꞌ, cheꞌé tucuáán cuchruj Pabló do̱ꞌ a
\p
\v 5 Cheꞌé se síí noco̱ꞌ man Cristó si̱j ya̱nj rej xta̱ꞌ me soj roꞌ, cheꞌé dan yu̱u̱n cheꞌe̱ caꞌne̱ꞌ rá soj ga̱ suun ꞌyaj me maꞌa̱n se chiꞌi̱i̱ ꞌyaj nij síí noco̱ꞌ se‑chre̱j chumii̱ nihánj á. ꞌO̱ se se chiꞌi̱i̱ yoꞌ roꞌ, me se otoj níꞌ ga̱ ꞌó yuvii̱ sese né ni̱ca̱ níꞌ me yuvii̱ do̱ꞌ, se canique̱ do̱ꞌ, se nij niha̱ꞌ rmaꞌa̱n rá nee̱ man níꞌ quiꞌya̱j níꞌ do̱ꞌ, se chiꞌi̱i̱ me ndoꞌo rá níꞌ quiꞌya̱j níꞌ do̱ꞌ, se ꞌe̱e̱ rá saꞌanj do̱ꞌ a. ꞌO̱ se síí ꞌe̱e̱ rá saꞌanj roꞌ, da̱j se vaa síí aráj gue̱e̱ rihaan yaꞌanj quiꞌyaj yuvii̱ vaa soꞌ na̱nj á.
\v 6 Ne̱ cheꞌé cacunꞌ yoꞌ roꞌ, cuya̱nj uxrá rá Yaꞌanj, ne̱ quiꞌya̱j ndoꞌo Yaꞌanj sayuun man nij síí ꞌyaj cacunꞌ yoꞌ ado̱nj.
\v 7 ꞌO̱ cuya̱a̱n vaa cacunꞌ yoꞌ ga̱ cacunꞌ quiꞌyaj maꞌa̱n soj asi̱j naá, ga̱a nocoꞌ soj tucuáán chiꞌi̱i̱ ado̱nj.
\p
\v 8 Tza̱j ne̱ cuano̱ nihánj me se se̱ quiꞌyaj nij soj da̱nj maꞌ. Se̱ cuyanj rá soj ne̱ se caꞌmaan rá soj maꞌ. Se̱ guun rá soj quiꞌya̱j chiꞌi̱i̱ soj man ꞌó yuvii̱ maꞌ. Se̱ caꞌmii soj nana̱ nij cheꞌé tuviꞌ soj maꞌ. Se̱ caꞌmii nachriꞌ soj ni̱ꞌyaj soj tuviꞌ soj maꞌ.
\v 9 Se̱ caꞌmii ne̱ soj rihaan tuviꞌ soj maꞌ. Yoꞌ me se quiꞌyaj soj ga̱a ataa canoco̱ꞌ soj man Cristó, tza̱j ne̱ ya̱j me se cunuu sa̱ꞌ soj, ne̱ se̱ quiꞌyaj soj a̱ doj da̱nj a̱ maꞌ.
\v 10 Cunuu sa̱ꞌ nimán soj, quiꞌyaj Yaꞌanj, ne̱ cheꞌé dan sa̱ꞌ doj namán nana̱ sa̱ꞌ cu̱u raa̱ soj ꞌo̱ ꞌo̱ güii ado̱nj. Neꞌen soj se vaa Yaꞌanj me síí quiꞌyaj man nimán soj se naca̱, ne̱ ase vaa maꞌa̱n Yaꞌanj roꞌ, da̱nj ga̱a̱ uún nimán soj ado̱nj.
\v 11 Ya̱j me se taj se ꞌyaj sese na̱j guun yuvii̱ me soj maꞌ. Caꞌve̱e se si̱j israelitá do̱ꞌ, caꞌve̱e se si̱j yaníj do̱ꞌ, caꞌve̱e se si̱j ta̱j taꞌngaꞌ man do̱ꞌ, caꞌve̱e se né si̱j ta̱j taꞌngaꞌ man do̱ꞌ, caꞌve̱e se si̱j ma̱n ꞌó chumanꞌ do̱ꞌ, caꞌve̱e se mozó siꞌyaj ꞌó yuvii̱ do̱ꞌ, caꞌve̱e se si̱j chéé maꞌa̱n do̱ꞌ, taj se ꞌyaj maꞌ. O̱rúnꞌ Cristó me se achiin man ꞌo̱ ꞌo̱ xꞌneꞌ yuvii̱, ne̱ ꞌo̱ cuya̱a̱n yáán soꞌ nimán ꞌo̱ ꞌo̱ nij soꞌ ado̱nj.
\p
\v 12 Dan me se narii Yaꞌanj man soj canoco̱ꞌ soj man soꞌ, ne̱ cunuu sa̱ꞌ nimán soj rihaan Yaꞌanj, ne̱ ꞌe̱e̱ rá Yaꞌanj man soj, ne̱ cheꞌé dan cunu̱u ꞌe̱e̱ rá soj tuviꞌ soj chugua̱nj. Dan me se ga̱a̱ sa̱ꞌ nimán soj, ne̱ ga̱a̱ nica̱ꞌ nimán soj, ne̱ se̱ guun yuva̱a̱ soj man tuviꞌ soj maꞌ. Tana̱nj ga̱a̱ ina̱j nimán soj na̱nj á.
\v 13 Sese quiꞌyaj chiꞌi̱i̱ tuviꞌ soj rihaan soj, ne̱ cara̱a̱ xꞌnaa ꞌo̱ ꞌo̱ soj rihaan tuviꞌ soj á. Da̱nj quiꞌyaj Síí ꞌNi̱j Raꞌa man níꞌ cheꞌé soj, tinavij soꞌ cacunꞌ tumé soj, ne̱ cheꞌé dan cara̱a̱ xꞌnaa soj rihaan tuviꞌ soj ado̱nj.
\v 14 Nu̱ꞌ yoꞌ quiꞌya̱j soj, ne̱ vaa ꞌó se sa̱ꞌ doj quiꞌya̱j uún soj, ne̱ yoꞌ me se ga̱a̱ ꞌe̱e̱ ya̱ ya̱ rá soj tuviꞌ soj, ne̱ yoꞌ me quiꞌya̱j gu̱un xraan rcuaꞌa̱a̱n rá soj cuma̱n soj á.
\v 15 Ne̱ ga̱a̱ dínj nimán soj quiꞌya̱j Cristó a. Cheꞌé se me rá maꞌa̱n Yaꞌanj ga̱a̱ dínj nimán soj, cheꞌé dan narii Yaꞌanj man soj, ne̱ naquiꞌyaj rcuaꞌa̱a̱n soꞌ man nu̱ꞌ nij tinu̱j soj, ne̱ cheꞌé dan niga̱nj cata̱j soj guun niꞌya̱j níꞌ rihaan Yaꞌanj á.
\v 16 Cu̱nuû uxrá snana̱ Cristó nimán soj, ne̱ cavi̱i̱ nana̱ sa̱ꞌ cu̱u raa̱ soj, ne̱ tu̱cuꞌyón soj nana̱ sa̱ꞌ rihaan tuviꞌ soj, ne̱ nago̱ꞌ soj chrej sa̱ꞌ man tuviꞌ soj á. Cachra̱a̱ soj chraꞌ salmó do̱ꞌ, chraꞌ nataꞌ cheꞌé Yaꞌanj do̱ꞌ, chraꞌ rqué Nimán Yaꞌanj do̱ꞌ, ne̱ cata̱j soj guun niꞌya̱j níꞌ rihaan Yaꞌanj na̱nj á.
\v 17 Ne̱ quiꞌya̱j soj da̱j me rá Cristó quiꞌya̱j soj do̱ꞌ, caꞌmi̱i̱ soj do̱ꞌ, ne̱ ma̱an cheꞌé se‑chuvi̱i Jesús Si̱j ꞌNi̱j Raꞌa man níꞌ cata̱j soj guun niꞌya̱j níꞌ rihaan Rej níꞌ Yaꞌanj ado̱nj.
\s Caꞌmii Pabló cheꞌé da̱j quiꞌya̱j ꞌo̱ ꞌo̱ níꞌ rihaan tuviꞌ níꞌ a
\p
\v 18 Cata̱j xnaꞌanj ꞌu̱nj rihaan nij chana̱ vaa nica̱, se vaa veꞌé cuno̱ nij noꞌ rihaan nica̱ nij noꞌ á. Da̱nj vaa no̱ xcúún nij noꞌ quiꞌya̱j nij noꞌ, ese chana̱ noco̱ꞌ man Cristó Si̱j ꞌNi̱j Raꞌa man níꞌ me nij noꞌ a.
\p
\v 19 Ne̱ veꞌé ga̱a̱ ꞌe̱e̱ rá nij snóꞌo man nica̱ nij soꞌ á. Se̱ caxríj yuva̱a̱ nij snóꞌo man nica̱ nij soꞌ maꞌ. Se̱ quiꞌyaj qui̱j snóꞌo man noꞌ maꞌ.
\p
\v 20 Veꞌé cuno̱ nij xnii nu̱ꞌ nana̱ aꞌmii rej xnii ga̱ nii xnii uún, ne̱ gu̱un niha̱ꞌ rá Yaꞌanj Si̱j ꞌNi̱j Raꞌa man níꞌ ni̱ꞌyaj soꞌ man xnii veꞌé uno a.
\p
\v 21 Se̱ caxríj yuva̱a̱ uxrá rej xnii man xnii, se̱ gaa na̱nj caꞌma̱an rá xnii ne̱ quiri̱ꞌ nimán xnii, quiꞌya̱j rej xnii a.
\p
\v 22 Cuno̱ sa̱ꞌ mozó rihaan se‑ruꞌve̱e̱ mozó á. Se̱ naquiꞌyaj rmi̱i̱ mozó man mozó rihaan se‑ruꞌve̱e̱ mozó maꞌ. Nda̱ꞌ se ne niꞌya̱j se‑ruꞌve̱e̱ mozó, tza̱j ne̱ ꞌo̱ quiꞌya̱j suun mozó á. Síí ꞌNi̱j Raꞌa man níꞌ roꞌ, niꞌya̱j soꞌ man mozó yoꞌ, ne̱ cheꞌé dan cuchuꞌvi̱ꞌ mozó ne̱ veꞌé quiꞌya̱j suun soꞌ a.
\v 23 Né riha̱a̱n yuvii̱ u̱u̱n ꞌyaj suun mozó maꞌ. Tana̱nj rihaan Síí ꞌNi̱j Raꞌa man níꞌ ꞌyaj suun soꞌ, ne̱ cheꞌé dan ꞌo̱ caꞌne̱j nimán soꞌ quiꞌya̱j suun uxrá soꞌ nu̱ꞌ suun vaa rihaan soꞌ, ne̱ se̱ naquiꞌyaj rmi̱i̱ soꞌ nimán soꞌ maꞌ.
\v 24 A̱j neꞌen soj se vaa maꞌa̱n Síí ꞌNi̱j Raꞌa man níꞌ me síí rque̱ se vaa cataꞌ tuꞌva soꞌ rihaan soj, ne̱ cheꞌé dan veꞌé quiꞌya̱j suun soj rihaan Cristó Si̱j ꞌNi̱j Raꞌa man níꞌ á.
\v 25 Ne̱ síí quiꞌyaj cacunꞌ roꞌ, ina̱nj sayuun quira̱nꞌ soꞌ, ne̱ ꞌo̱ cuya̱a̱n quiꞌya̱j Yaꞌanj caꞌne̱ꞌ Yaꞌanj cacunꞌ cheꞌé me maꞌa̱n yuvii̱ na̱nj ado̱nj. Xa̱ꞌ Yaꞌanj, tza̱j ne̱ cuya̱a̱n vaa cunuda̱nj yuvii̱ rihaan Yaꞌanj na̱nj ado̱nj.
\c 4
\p
\v 1 Dan me se veꞌé quiꞌya̱j soj si̱j ruꞌvee rihaan se‑mo̱zó soj á. Se̱ tihaꞌ yuꞌunj soj si̱j ruꞌvee man se‑mo̱zó soj maꞌ. Xca̱j soj si̱j ruꞌvee cuentá se vaa ase vaa mozó rihaan soj roꞌ, da̱nj vaa maꞌa̱n soj rihaan Yaꞌanj uún ado̱nj.
\s Me rá Pabló se vaa cachi̱nj niꞌya̱j nij síí noco̱ꞌ man Cristó rihaan Yaꞌanj cheꞌé soꞌ a
\p
\v 2 Dan me se se̱ caꞌneꞌ rá soj ga̱ suun cachi̱nj niꞌya̱j rihaan Yaꞌanj maꞌ. Ne̱ ta̱dó soj cuma̱n soj, ne̱ niga̱nj cata̱j soj guun niꞌya̱j níꞌ rihaan Yaꞌanj á.
\v 3 Dan me se cachi̱nj niꞌya̱j uún soj rihaan Yaꞌanj cheꞌé núj se vaa ga̱a̱ yaꞌnúj rihaan núj caꞌmi̱i̱ núj snana̱ Cristó nana̱ sa̱ꞌ yuve̱ tihaa̱n naca̱ Yaꞌanj rihaan níꞌ á. Cheꞌé nana̱ yoꞌ me ꞌnij ꞌu̱nj tagaꞌ nihánj cuano̱ ado̱nj.
\v 4 Vaa suun rihaan ꞌu̱nj ti̱haán ꞌu̱nj snana̱ Cristó rihaan yuvii̱, ne̱ cheꞌé dan cachi̱nj niꞌya̱j soj rihaan Yaꞌanj se vaa caꞌve̱e caꞌmi̱i̱ natáj sca̱ꞌ ꞌu̱nj rihaan nij soꞌ á.
\s Nuchru̱j ra̱a̱ níꞌ da̱j caꞌmi̱i̱ níꞌ rihaan nij síí ataa cuchuma̱n rá ni̱ꞌyaj man Cristó á
\p
\v 5 Asa̱ꞌ chéé soj ga̱ nij síí ataa cuchuma̱n rá ni̱ꞌyaj man Cristó, ne̱ sa̱ꞌ nuchru̱j ra̱a̱ soj da̱j caꞌmi̱i̱ soj ga̱ nij soꞌ, ne̱ se̱ quiriꞌ u̱u̱n tiempó quiꞌya̱j soj ga̱ nij soꞌ maꞌ.
\v 6 Nu̱ꞌ cuentó nanó soj ga̱ nij soꞌ me se ina̱nj cuentó veꞌé lu̱j caꞌmi̱i̱ do̱ꞌ, ina̱nj cuentó sa̱ꞌ aranꞌ rá nij soꞌ do̱ꞌ, caꞌmi̱i̱ soj, ga̱a ne̱ queneꞌe̱n soj me nana̱ caꞌmi̱i̱ soj rihaan ꞌo̱ ꞌo̱ nij síí xnáꞌanj man soj cheꞌé tucuáán noco̱ꞌ soj ado̱nj.
\s Veꞌé cuma̱n nij síí noco̱ꞌ man Cristó ya̱nj chumanꞌ Colosas, rá nij tuvi̱ꞌ Pabló a
\p
\v 7 Síí cuꞌna̱j Tíquico me tinúú níꞌ síí ꞌe̱e̱ ndoꞌo rá níꞌ, ne̱ síí ꞌo̱ ꞌyaj ndoꞌo se‑su̱u̱n Síí ꞌNi̱j Raꞌa man níꞌ ga̱j me soꞌ a. Soꞌ me síí caꞌne̱j ꞌu̱nj cuchi̱ꞌ ni̱caj nana̱ cheꞌé núj rihaan soj ado̱nj.
\v 8 Ne̱ me rá ꞌu̱nj cata̱j xnaꞌanj soꞌ rihaan soj da̱j quiranꞌ núj, ga̱a ne̱ gu̱un ya̱ rá soj, ne̱ nari̱ꞌ nucuaj nimán soj na̱nj á.
\v 9 Ne̱ caꞌne̱j ꞌu̱nj man tinúꞌ Onésimo cuchi̱ꞌ soꞌ ga̱ tinúꞌ Tíquico yoꞌ, ne̱ síí ma̱n chiháán soj me tinúꞌ Onésimo, ne̱ ꞌe̱e̱ rá níꞌ man soꞌ, ne̱ nucua̱j rá ꞌu̱nj man soꞌ a. Cata̱j xnaꞌanj ro̱j soꞌ rihaan soj nu̱ꞌ se vaa quiranꞌ núj rej nihánj ado̱nj.
\p
\v 10 A̱j neꞌen soj man síí cuꞌna̱j Aristarco uún a. Cuano̱ nihánj me se ꞌni̱j soꞌ tagaꞌ ga̱ ꞌu̱nj, ne̱ me rá soꞌ se vaa veꞌé cuma̱n soj a. Ne̱ vaa síí cuꞌna̱j Marcos tinúú tachru̱u̱ síí cuꞌna̱j Bernabé a. Veé da̱nj veꞌé cuma̱n soj, rá soꞌ uún a. A̱j cuchiꞌ nana̱ rihaan soj cheꞌé Marcos, se vaa sese cuchi̱ꞌ soꞌ chiháán soj, ne̱ veꞌé caꞌmi̱i̱ soj ga̱ soꞌ á.
\v 11 Ne̱ neꞌen soj man síí cuꞌna̱j Jesús síí tucuꞌnáj nii Justo uún a. Soꞌ roꞌ, me rá se vaa veꞌé cuma̱n soj a. Síí cuꞌna̱j Aristarco do̱ꞌ, Marcos do̱ꞌ, Justo do̱ꞌ roꞌ, o̱rúnꞌ vaꞌnu̱j nij soꞌ me yuvii̱ israelitá racuíj man núj cheꞌé yan gu̱un chij Yaꞌanj nimán doj yuvii̱, ne̱ nariꞌ nucuaj doj rá ꞌu̱nj, quiꞌyaj nij soꞌ ado̱nj.
\p
\v 12 Ne̱ veꞌé cuma̱n soj, rá síí cuꞌna̱j Epafras uún a. Síí cavii chiháán soj me soꞌ, ne̱ ꞌyaj uxrá soꞌ se‑su̱u̱n Cristó a. Ne̱ nu̱ꞌ güii achíín niꞌya̱j uxrá ya̱ soꞌ rihaan Yaꞌanj cheꞌé soj, ne̱ me rá soꞌ ga̱a̱ chij rá soj, ne̱ gu̱un ya̱ rá soj se vaa neꞌen soj da̱j me rá Yaꞌanj quiꞌya̱j soj a.
\v 13 Ne̱ ꞌu̱nj me síí neꞌen ya̱ se vaa quiꞌyaj uxrá Epafras se‑su̱u̱n Cristó cheꞌé soj ga̱ nij yuvii̱ noco̱ꞌ man Cristó ya̱nj chumanꞌ Laodicea do̱ꞌ, chumanꞌ Hierápolis do̱ꞌ a.
\v 14 Síí naquiꞌyaj conoꞌó man yuvii̱ cuꞌna̱j Lucas síí ꞌe̱e̱ ndoꞌo rá núj me se me rá soꞌ se vaa veꞌé cuma̱n soj uún a. Ne̱ da̱nj na̱nj síí cuꞌna̱j Demas uún, ne̱ me rá soꞌ se vaa veꞌé cuma̱n soj a.
\p
\v 15 Cata̱j soj rihaan nij yuvii̱ noco̱ꞌ man Cristó ya̱nj chumanꞌ Laodicea do̱ꞌ, rihaan chana̱ cuꞌna̱j Ninfas do̱ꞌ, rihaan xꞌneꞌ yuvii̱ noco̱ꞌ man Cristó nuu chre̱ꞌ tucuá noꞌ do̱ꞌ, se vaa veꞌé cuma̱n nij soꞌ, rá ꞌu̱nj ado̱nj.
\v 16 Asa̱ꞌ navij nayaa soj yanj cartá nihánj, ne̱ caꞌne̱j soj yanj nihánj caꞌa̱nj yoꞌ rihaan xꞌneꞌ yuvii̱ noco̱ꞌ man Cristó ya̱nj chumanꞌ Laodicea, ne̱ naya̱a̱ nij soꞌ uún á. Ne̱ caꞌne̱j nij soꞌ yanj caꞌnéé ꞌu̱nj rihaan nij soꞌ, naya̱a̱ soj uún a.
\p
\v 17 Ne̱ cata̱j soj rihaan síí cuꞌna̱j Arquipo se vaa ꞌo̱ caꞌne̱j nimán soꞌ quiꞌya̱j soꞌ nu̱ꞌ suun caꞌneꞌ Síí ꞌNi̱j Raꞌa man níꞌ rihaan soꞌ á.
\p
\v 18 Rej navij yanj cartá nihánj roꞌ, raꞌa ma̱ꞌanj si̱j cuꞌna̱j Pabló cachrón nana̱ nihánj ado̱nj. Se̱ niꞌyón soj se vaa ꞌni̱j ꞌu̱nj tagaꞌ maꞌ. Me rá ꞌu̱nj quiꞌya̱j ndoꞌo Yaꞌanj se lu̱j cheꞌé nij soj ado̱nj.