\id 1TH
\h 1 Tesalonicenses
\toc1 1 Tesalonicenses
\mt Nihánj me cartá ꞌo̱ caꞌnéé Pabló rihaan nij síí ya̱nj chumanꞌ Tesalónica a
\c 1
\p
\v 1 Síí cuꞌna̱j Pabló do̱ꞌ, Silvano do̱ꞌ, Timoteo do̱ꞌ, me núj, ne̱ ꞌyaj núj yanj nihánj caꞌne̱j núj rihaan nij soj xꞌneꞌ yuvii̱ ya̱nj chumanꞌ Tesalónica noco̱ꞌ man Rej níꞌ Yaꞌanj do̱ꞌ, man Jesucristó Si̱j ꞌNi̱j Raꞌa man níꞌ do̱ꞌ a. Me rá núj quiꞌya̱j ndoꞌo Rej níꞌ Yaꞌanj ga̱ Jesucristó Si̱j ꞌNi̱j Raꞌa man níꞌ se lu̱j cheꞌé soj, ne̱ ga̱a̱ xe̱j nimán soj a.
\s Nij síí cuchumán rá niꞌya̱j man Cristó ya̱nj chumanꞌ Tesalónica roꞌ, sa̱ꞌ uxrá nocoꞌ nij soꞌ man Yaꞌanj a
\p
\v 2 Niga̱nj taj núj guun niꞌya̱j níꞌ rihaan Yaꞌanj cheꞌé cunuda̱nj soj, ne̱ ga̱a achíín niꞌya̱j núj roꞌ, aꞌmii núj rihaan soꞌ cheꞌé soj ado̱nj.
\v 3 Dan me se ꞌo̱ nuû rá núj rihaan Rej níꞌ Yaꞌanj se vaa caꞌnéé uxrá nimán soj cuchuma̱n rá soj ni̱ꞌyaj soj man Jesucristó do̱ꞌ, se vaa ꞌo̱ ꞌyaj soj se‑su̱u̱n Jesucristó cheꞌé se ꞌe̱e̱ ya̱ rá soj man yuvii̱ do̱ꞌ, se vaa ꞌo̱ xraan naꞌvi̱j soj cavi̱i̱ sa̱ꞌ soj quiꞌya̱j Jesucristó Si̱j ꞌNi̱j Raꞌa man níꞌ do̱ꞌ ado̱nj.
\v 4 Ya̱ ya̱ ꞌe̱e̱ rá Yaꞌanj man soj, tinu̱j, nocoj. Ne̱ neꞌen núj se vaa narii Yaꞌanj man soj gu̱un soj se‑chuma̱nꞌ soꞌ ado̱nj.
\p
\v 5 ꞌO̱ se ga̱a nataꞌ núj nana̱ sa̱ꞌ cheꞌé Cristó rihaan soj, ne̱ né na̱na̱ u̱u̱n nataꞌ núj rihaan soj maꞌ. Tana̱nj racuíj Nimán Yaꞌanj man núj ꞌyaj núj suun sa̱ꞌ noco̱o, ne̱ guun ya̱ rá soj se vaa nana̱ ya̱ me nana̱ nataꞌ núj a. Ga̱a cayáán núj ga̱ soj, ne̱ queneꞌen soj da̱j quiꞌyaj núj cheꞌé se ꞌe̱e̱ rá núj niꞌya̱j núj man soj a.
\p
\v 6 Ne̱ ase quiꞌyaj gue̱e̱ núj do̱ꞌ, ase ꞌyaj gue̱e̱ Síí ꞌNi̱j Raꞌa man níꞌ do̱ꞌ, da̱nj quiꞌyaj gue̱e̱ soj chugua̱nj. Dan me se nda̱ꞌ se quiranꞌ soj sayuun quiꞌyaj nij yuvii̱ ne nocoꞌ man Cristó, tza̱j ne̱ ꞌo̱ canocoꞌ soj snana̱ Yaꞌanj, ne̱ guun niha̱ꞌ rá soj, quiꞌyaj Nimán Yaꞌanj ado̱nj.
\v 7 Ne̱ cunuda̱nj nij yuvii̱ noco̱ꞌ man Cristó ma̱n estadó Macedonia ga̱ estadó Acaya roꞌ, xcaj nij soꞌ cuentá cheꞌé se vaa quiꞌyaj soj, ne̱ da̱nj me rá nij soꞌ quiꞌya̱j gue̱e̱ nij soꞌ uún ado̱nj.
\p
\v 8 Dan me se a̱j cuno ndoꞌo yuvii̱ snana̱ Síí ꞌNi̱j Raꞌa man níꞌ, quiꞌyaj soj, ne̱ dan me se né ina̱nj nij yuvii̱ ma̱n estadó Macedonia ga̱ estadó Acaya cuno nana̱ se vaa amán rá soj niꞌya̱j soj man Yaꞌanj maꞌ. ꞌO̱ se yuvii̱ ma̱n nu̱ꞌ canó ya̱ rej cuno nana̱ yoꞌ na̱nj ado̱nj. Cheꞌé dan me taj cheꞌé cata̱j xnaꞌanj núj rihaan nij yuvii̱ cheꞌé se vaa quiꞌyaj soj maꞌ.
\v 9 Maꞌa̱n nij yuvii̱ taj xnaꞌanj rihaan tuviꞌ nij soꞌ se vaa veꞌé uxrá caꞌmii soj ga̱ núj ga̱a cayáán núj ga̱ soj ado̱nj. Ne̱ taj xnaꞌanj nij soꞌ se vaa tanáj soj yaꞌanj quiꞌyaj maꞌa̱n yuvii̱ canocoꞌ soj ga̱a rque̱, ne̱ ya̱j me se canica̱j soj canocoꞌ soj man Yaꞌanj si̱j vaa iꞌna̱ꞌ ya̱ ya̱,
\v 10 ne̱ naꞌvi̱j soj caꞌna̱ꞌ uún maꞌa̱n Jesús Taꞌníí Yaꞌanj rej xta̱ꞌ a. Ne̱ soꞌ roꞌ, me síí cunuu iꞌna̱ꞌ ya̱ uún quiꞌyaj Yaꞌanj ga̱a caviꞌ soꞌ, ne̱ ti̱nanii Jesús man níꞌ rihaan sayuun asa̱ꞌ quisíj güii quiꞌya̱j uxrá Yaꞌanj sayuun man nij síí tumé cacunꞌ ado̱nj.
\c 2
\s Veꞌé tucuꞌyón Pabló snana̱ Yaꞌanj rihaan nij síí noco̱ꞌ man Cristó ya̱nj chumanꞌ Tesalónica a
\p
\v 1 Neꞌen maꞌa̱n soj se vaa cavii sa̱ꞌ suun quiꞌyaj núj ga̱a cayáán núj ga̱ soj, tinu̱j, nocoj.
\v 2 Neꞌen soj se vaa asino ya̱a̱n quiranꞌ núj sayuun chumanꞌ Filipos, ne̱ qui̱j ndoꞌo caꞌmii nij síí ma̱n chumanꞌ yoꞌ niꞌya̱j nij soꞌ man núj a. Ne̱ nda̱ꞌ se sayu̱u̱n ndoꞌo vaa nataꞌ núj snana̱ Yaꞌanj nana̱ sa̱ꞌ rihaan soj quiꞌyaj nij síí ma̱n chiháán soj, tza̱j ne̱ ne cuchuꞌvi̱ꞌ núj maꞌ. Tana̱nj caꞌnéé nimán núj doj a̱ nata̱ꞌ núj nana̱ sa̱ꞌ rihaan soj, quiꞌyaj Taꞌanj núj a.
\p
\v 3 Vaa cheꞌé caꞌmii natáj núj snana̱ Yaꞌanj rihaan soj, ne̱ dan me se né si̱j noco̱ꞌ tucuáán ne̱ me núj maꞌ. Ne qui̱j vaa nimán núj maꞌ. Né si̱j tihaꞌ yuꞌunj man yuvii̱ me núj maꞌ.
\v 4 ꞌO̱ se guun nucua̱j rá Yaꞌanj man núj, ne̱ caꞌneꞌ soꞌ suun rihaan núj nata̱ꞌ núj nana̱ sa̱ꞌ cheꞌé Cristó, ne̱ da̱nj ꞌyaj gue̱e̱ núj ado̱nj. Ne uun rá núj cata̱j yuvii̱ se vaa veꞌé ꞌyaj núj maꞌ. Ma̱an se me rá núj gu̱un niha̱ꞌ rá Yaꞌanj ni̱ꞌyaj Yaꞌanj man núj, ne̱ Yaꞌanj me síí acaj cuentá da̱j vaa nimán núj ado̱nj.
\v 5 Neꞌen soj do̱ꞌ, neꞌen maꞌa̱n Yaꞌanj do̱ꞌ, se vaa ne caꞌmi̱i̱ yaꞌa̱nj ndoꞌo núj ga̱ soj, ne̱ ne gu̱un rá núj caꞌne̱e̱ núj saꞌanj man soj maꞌ.
\v 6 Ne quiꞌya̱j núj da̱nj cheꞌé rej cata̱j soj do̱ꞌ, cata̱j ꞌó yuvii̱ do̱ꞌ, se vaa veꞌé ꞌyaj núj maꞌ. Nda̱ꞌ se Cristó me síí cuneꞌ man núj gu̱un núj síí caꞌa̱nj nata̱ꞌ snana̱ soꞌ, tza̱j ne̱ ne cachi̱nj núj rasu̱u̱n man soj maꞌ.
\p
\v 7 Tana̱nj ase ꞌyaj nij chana̱ ga̱ taꞌníí chana̱ neꞌej roꞌ, da̱nj quiꞌyaj núj ga̱ soj ga̱a cayáán núj ga̱ soj, ne̱ veꞌé ina̱nj quiꞌyaj núj ga̱ soj ado̱nj.
\v 8 Dan me se cunuu ꞌe̱e̱ rá núj niꞌya̱j núj man soj, ne̱ cheꞌé dan né ina̱nj snana̱ Yaꞌanj me se vaa rqué núj man soj maꞌ. Tza̱j ne̱ ꞌo̱ caꞌnéé nimán núj ra̱cuíj núj man soj uún ado̱nj.
\v 9 Dan me se neꞌen soj se vaa nuvi̱i niga̱nꞌ ꞌyaj suun núj, ga̱a ne̱ riꞌ núj saꞌanj, ne̱ ránj maꞌa̱n núj rasu̱u̱n achiin rihaan núj, cheꞌé se ne caꞌve̱j rá núj rquee̱ núj rque̱ soj rasu̱u̱n man núj, maan tinu̱j, maan nocoj. Da̱nj ina̱nj quiꞌyaj núj ga̱a caꞌmii natáj núj snana̱ Yaꞌanj nana̱ sa̱ꞌ rihaan soj ado̱nj.
\p
\v 10 Queneꞌen maꞌa̱n soj do̱ꞌ, queneꞌen Yaꞌanj do̱ꞌ, se vaa si̱j sa̱ꞌ nimán do̱ꞌ, si̱j nica̱ nimán do̱ꞌ, si̱j ne quiꞌya̱j cacunꞌ do̱ꞌ, me núj rihaan soj si̱j amán rá niꞌya̱j man Yaꞌanj ado̱nj.
\v 11 Neꞌen soj se vaa ase vaa ꞌyaj snóꞌo ga̱ taꞌníí snóꞌo roꞌ, da̱nj vaa quiꞌyaj núj ga̱ ꞌo̱ ꞌo̱ nij soj a. Ne̱ dan me se guun nucua̱j nimán soj, quiꞌyaj núj, ne̱ narqué núj chrej nucua̱j man soj
\v 12 se vaa quiꞌya̱j soj se vaa no̱ xcúún soj quiꞌya̱j soj cheꞌé se narii Yaꞌanj man soj ca̱yáán soj ga̱ Yaꞌanj güii niꞌndaj ya̱ veꞌé gu̱un chij Yaꞌanj a.
\s Quiranꞌ nij síí noco̱ꞌ man Cristó ma̱n chumanꞌ Tesalónica sayuun, quiꞌyaj nij síí ne nocoꞌ man Cristó a
\p
\v 13 Niga̱nj taj núj guun niꞌya̱j níꞌ rihaan Yaꞌanj cheꞌé soj na̱nj á. Dan me se ga̱a cuno soj snana̱ Yaꞌanj nana̱ caꞌmii natáj núj rihaan soj, ne̱ ne cata̱j soj se vaa snana̱ yuvii̱ u̱u̱n me nana̱ yoꞌ maꞌ. Ya̱ cataj soj se vaa snana̱ Yaꞌanj me nana̱ nataꞌ núj, ne̱ veé ya̱ snana̱ Yaꞌanj me yoꞌ ado̱nj. Ne̱ nuu sa̱ꞌ nimán soj, ꞌyaj nana̱ yoꞌ, cheꞌé se amán rá soj uno soj nana̱ yoꞌ ado̱nj.
\v 14 ꞌO̱ se ase vaa quiranꞌ nij xꞌneꞌ nij síí noco̱ꞌ man Yaꞌanj síí ma̱n estadó Judea roꞌ, da̱nj quiranꞌ uún soj, cheꞌé se si̱j noco̱ꞌ man Cristó Jesús me ta̱ranꞌ soj, tinu̱j, nocoj. Dan me se quiranꞌ nij síí ma̱n estadó Judea sayuun, quiꞌyaj nij yuvii̱ israelitá síí ma̱n chiháán nij soꞌ, ne̱ quiranꞌ uún soj sayuun, quiꞌyaj nij síí ma̱n chiháán soj ado̱nj.
\v 15 Ne̱ nij síí israelitá yoꞌ roꞌ, nij soꞌ me síí ticaviꞌ man Jesús Si̱j ꞌNi̱j Raꞌa man níꞌ do̱ꞌ, man nij síí nataꞌ snana̱ Yaꞌanj ga̱a naá do̱ꞌ, ne̱ nda̱a quirii nij soꞌ man núj rque queꞌe̱e̱ chumanꞌ na̱nj ado̱nj. Nij ndoꞌo ꞌyaj nij soꞌ niꞌya̱j Yaꞌanj, ne̱ ta̱j riꞌyunj nij soꞌ man cunuda̱nj yuvii̱ uún ado̱nj.
\v 16 Dan me se me rá núj nata̱ꞌ núj snana̱ Yaꞌanj rihaan soj si̱j yaníj cheꞌé yan nani̱i̱ soj rihaan chrej chiꞌi̱i̱ do̱ꞌ, rihaan sayuun do̱ꞌ a. Tza̱j ne̱ aráán ndoꞌo nij síí israelitá yoꞌ chrej rihaan núj, ne̱ guun noco̱o uxrá cacunꞌ quita̱j xráá nij soꞌ nu̱ꞌ cavii nu̱ꞌ caꞌanj ado̱nj. Cheꞌé dan ꞌo̱ caꞌmaan rá Yaꞌanj niꞌya̱j Yaꞌanj man nij soꞌ, ne̱ yu̱u̱n cheꞌe̱ quiranꞌ nij soꞌ sayuun, quiꞌyaj Yaꞌanj na̱nj ado̱nj.
\s Me ndoꞌo rá Pabló queneꞌe̱n soꞌ man nij síí noco̱ꞌ man Cristó ma̱n chumanꞌ Tesalónica a
\p
\v 17 Xa̱ꞌ ya̱j me se guun ga̱nꞌ ya̱ núj do̱j rihaan chiháán soj do̱j güii nihánj, tza̱j ne̱ ꞌo̱ nuû rá núj man soj, ne̱ cheꞌé dan me ndoꞌo rá núj queneꞌe̱n raꞌya̱nj núj man soj a.
\v 18 Ne̱ cheꞌé dan guun rá núj cuchi̱ꞌ núj rihaan soj, ne̱ xa̱ꞌ ꞌu̱nj si̱j cuꞌna̱j Pabló me se guun queꞌe̱e̱ ndoꞌo me raj cuchi̱j rej ma̱n soj, tza̱j ne̱ caráán Síí Chre̱e chrej rihaan núj cuchi̱ꞌ núj rihaan soj ado̱nj.
\v 19 Dan me se asa̱ꞌ caꞌnaꞌ uún Jesús Si̱j ꞌNi̱j Raꞌa man níꞌ rihaan chumii̱ nihánj ne̱ gu̱un niha̱ꞌ uxrá rá núj cheꞌé soj, ne̱ nata̱ꞌ núj rihaan Jesús se vaa veꞌé canocoꞌ soj man soꞌ quiꞌyaj núj, ne̱ cavi̱i̱ sa̱ꞌ núj rihaan soꞌ cheꞌé soj á. ꞌO̱ se o̱rúnꞌ ya̱ soj me síí ꞌyaj da̱nj ado̱nj.
\v 20 ꞌO̱ se soj me síí quiꞌyaj cavii sa̱ꞌ núj, ne̱ soj me síí quiꞌyaj guun niha̱ꞌ rá núj ado̱nj.
\c 3
\s Cataj xnaꞌanj Timoteo rihaan Pabló se vaa veꞌé uxrá amán rá nij síí ma̱n Tesalónica niꞌya̱j nij soꞌ man Cristó a
\p
\v 1 Cheꞌé dan ne caꞌve̱j uxrá rá núj ca̱yáán ra̱a̱n ta̱ranꞌ núj chumanꞌ nihánj a̱ maꞌ. Cheꞌé dan cavii raa̱ núj se vaa vi̱j ranꞌ gue̱e̱ rój me síí quina̱j chumanꞌ Atenas nihánj,
\v 2 ne̱ dan me se caꞌnéé núj man tinúꞌ Timoteo cuchi̱ꞌ soꞌ rej ma̱n soj a. Dan me se soꞌ me síí ꞌyaj se‑su̱u̱n Yaꞌanj ga̱ núj suun nataꞌ nana̱ sa̱ꞌ cheꞌé Cristó a. Me rá núj ra̱cuíj soꞌ man soj, narque̱ soꞌ chrej nucua̱j man soj, ne̱ xraan doj canoco̱ꞌ soj man Cristó, quiꞌya̱j soꞌ a.
\v 3 Ne̱ a̱ ꞌó soj se̱ quiriꞌíj tucuáán noco̱ꞌ soj cheꞌé sayuun quiꞌya̱j yuvii̱ man soj, rá núj a̱ maꞌ. ꞌO̱ se neꞌen soj se vaa no̱ xcúún níꞌ quira̱nꞌ níꞌ sayuun rihaan chumii̱ nihánj ado̱nj.
\v 4 Ne̱ ga̱a cayáán núj ga̱ soj, ne̱ cataj ya̱ núj rihaan soj se vaa xraj, ne̱ quira̱nꞌ níꞌ sayuun, ne̱ neꞌen soj se vaa ya̱ quiranꞌ níꞌ sayuun niha̱nꞌ.
\v 5 Cheꞌé se me uxrá rá ꞌu̱nj que̱neꞌén ꞌu̱nj da̱j quiranꞌ soj, ne̱ cheꞌé dan caꞌnéé ꞌu̱nj man Timoteo cuchi̱ꞌ soꞌ rej ma̱n soj, ne̱ cata̱j xnaꞌanj soꞌ rihanj da̱j ꞌyaj soj noco̱ꞌ soj man Yaꞌanj, raj a. Dan me se nano̱ rá ꞌu̱nj sese a̱j caxríj Síí Chre̱e chrej chiꞌi̱i̱ rque soj do̱ꞌ, sese quiriꞌ nu̱ꞌ suun quiꞌyaj núj cheꞌé soj do̱ꞌ, raj a.
\p
\v 6 Dan me se canica̱j uún Timoteo namán soꞌ rihaan núj, ne̱ cataj xnaꞌanj soꞌ se vaa veꞌé uxrá amán rá soj niꞌya̱j soj man Cristó, ne̱ ꞌe̱e̱ rá soj tinúú soj, taj soꞌ, ne̱ niga̱nj veꞌé nuû rá soj man núj, taj soꞌ a. Ne̱ ase vaa me rá núj queneꞌe̱n núj man soj roꞌ, da̱nj me rá soj queneꞌe̱n soj man núj, taj soꞌ a.
\v 7 Nda̱ꞌ se ranꞌ ndoꞌo núj sayuun, tza̱j ne̱ cuano̱ nihánj me guun niha̱ꞌ uxrá rá núj ga̱a cuno núj se vaa veꞌé uxrá amán rá soj niꞌya̱j soj man Cristó, tinu̱j, nocoj.
\v 8 Dan me se cheꞌé se xraan nocoꞌ soj man Síí ꞌNi̱j Raꞌa man níꞌ, cheꞌé dan nariꞌ nucuaj rá núj ca̱yáán núj rihaan chumii̱ nihánj ado̱nj.
\v 9 Dan me se guun niha̱ꞌ uxrá rá núj rihaan Yaꞌanj cheꞌé soj, ne̱ cheꞌé dan no̱ xcúún núj cata̱j ndoꞌo núj guun niꞌya̱j níꞌ rihaan Yaꞌanj cheꞌé soj,
\v 10 ne̱ nuvi̱i niga̱nꞌ achíín niꞌya̱j núj rihaan Yaꞌanj se vaa caꞌve̱j rá Yaꞌanj queneꞌe̱n núj man soj, ne̱ narque̱ núj doj chrej sa̱ꞌ man soj, ne̱ sa̱ꞌ doj canoco̱ꞌ soj Yaꞌanj na̱nj ado̱nj.
\s Cunu̱u ꞌe̱e̱ rá níꞌ man cunuda̱nj yuvii̱ a
\p
\v 11 Me rá núj ra̱cuíj maꞌa̱n Rej níꞌ Yaꞌanj ra̱cuíj Jesús Si̱j ꞌNi̱j Raꞌa man níꞌ ra̱cuíj man núj cuchi̱ꞌ núj rihaan soj a.
\v 12 Ne̱ ase vaa ꞌe̱e̱ rá núj man soj roꞌ, da̱nj ga̱a̱ cunu̱u ꞌe̱e̱ ndoꞌo rá soj ni̱ꞌyaj soj tinúú soj do̱ꞌ, cunuda̱nj yuvii̱ do̱ꞌ, quiꞌya̱j Síí ꞌNi̱j Raꞌa man níꞌ, rá núj a.
\v 13 Nda̱a síj, ga̱a ne̱ ꞌo̱ cunu̱u sa̱ꞌ nimán soj rihaan Rej níꞌ Yaꞌanj asa̱ꞌ quisíj güii caꞌna̱ꞌ uún Jesús Si̱j ꞌNi̱j Raꞌa man níꞌ rihaan chumii̱ nihánj ga̱ cunuda̱nj nij síí sa̱ꞌ noco̱ꞌ man soꞌ, ne̱ a̱ ꞌó cacunꞌ se̱ tumé soj ga̱a a̱ maꞌ.
\c 4
\s Nataꞌ Pabló da̱j quiꞌya̱j níꞌ, ne̱ cara̱nꞌ rá Yaꞌanj ni̱ꞌyaj soꞌ man níꞌ a
\p
\v 1 Ya̱j me se cheꞌé se si̱j a̱j noco̱ꞌ man Jesús Si̱j ꞌNi̱j Raꞌa man níꞌ me nu̱ꞌ níꞌ roꞌ, cheꞌé dan cuano̱ nihánj me cata̱j xnaꞌanj núj rihaan soj se vaa doj a̱ doj a̱ canoco̱ꞌ soj nu̱ꞌ tucuáán cuchruj núj rihaan soj ga̱a cataj núj da̱j quiꞌya̱j soj ga̱a mán soj rihaan chumii̱ nihánj ga̱a ne̱ cara̱nꞌ rá Yaꞌanj ni̱ꞌyaj Yaꞌanj man soj, tinu̱j, nocoj.
\v 2 ꞌO̱ se a̱j neꞌen soj me nana̱ cataj xnaꞌanj núj rihaan soj cheꞌé Jesús Si̱j ꞌNi̱j Raꞌa man níꞌ na̱nj á.
\v 3 ꞌO̱ se nihánj me se vaa me rá Yaꞌanj quiꞌya̱j soj, ne̱ dan me se me rá Yaꞌanj cunu̱u sa̱ꞌ nimán soj rihaan soꞌ, ne̱ a̱ doj naꞌvej rá Yaꞌanj coto̱j ꞌo̱ yuvii̱ ga̱ ꞌó yuvii̱ sese né ni̱ca̱ yuvii̱ yoꞌ me maꞌ.
\v 4 Ma̱an se xca̱j ꞌo̱ ꞌo̱ snóꞌo cuentá ne̱ veꞌé tu̱mé soꞌ nee̱ man maꞌa̱n soꞌ á. Sese da̱nj quiꞌya̱j soꞌ, ne̱ síí vaa sa̱ꞌ nimán me soꞌ, ne̱ síí niꞌya̱nj me uún soꞌ a.
\v 5 Dan me se se̱ guun canoco̱ꞌ soj tucuáán noco̱ꞌ nij yuvii̱ ne neꞌen man Yaꞌanj maꞌ. Ma̱an cheꞌé se veꞌé vaa chana̱ rihaan nij soꞌ, ne̱ uun rá nij soꞌ coto̱j nij soꞌ ga̱ chana̱ a.
\v 6 Sese cuno̱ soj nana̱ nihánj, ne̱ se̱ guun soj síí tihaꞌ yuꞌunj man tinúú níꞌ cheꞌé chana̱ maꞌ. ꞌO̱ se a̱j cataj ya̱ núj rihaan soj se vaa quiꞌya̱j Síí ꞌNi̱j Raꞌa man níꞌ sayuun man yuvii̱ tihaꞌ yuꞌunj man tinúú na̱nj ado̱nj.
\v 7 Né cheꞌe̱ se me rá Yaꞌanj quiꞌya̱j níꞌ cacunꞌ yoꞌ me canacúún Yaꞌanj man níꞌ maꞌ. Tana̱nj canacúún Yaꞌanj man níꞌ cheꞌé rej cunu̱u sa̱ꞌ nimán níꞌ rihaan soꞌ ado̱nj.
\v 8 Cheꞌé dan xca̱j soj cuentá se vaa síí riꞌíj yaníj man nana̱ nihánj roꞌ, né sna̱na̱ yuvii̱ me riꞌíj yaníj soꞌ maꞌ. Tana̱nj a̱ snana̱ Yaꞌanj si̱j rqué Nimán Yaꞌanj cu̱nuû nimán níꞌ me nana̱ riꞌíj soꞌ na̱nj ado̱nj.
\p
\v 9 Dan me se taj cheꞌé cachro̱n ꞌu̱nj nana̱ rihaan yanj cartá nihánj cata̱j xnaꞌanj ꞌu̱nj rihaan soj se vaa no̱ xcúún soj ga̱a̱ ꞌe̱e̱ rá soj man tinúú soj maꞌ. ꞌO̱ se maꞌa̱n Yaꞌanj me síí tucuꞌyón man soj se vaa quiꞌya̱j soj da̱nj ado̱nj.
\v 10 ꞌO̱ se da̱nj ina̱nj ꞌyaj ya̱ soj nuu ꞌe̱e̱ rá soj man nu̱ꞌ nij tinúú níꞌ síí ma̱n estadó Macedonia, tza̱j ne̱ ina̱nj me rá núj narque̱ núj chrej sa̱ꞌ man soj se vaa doj a̱ doj a̱ cunu̱u ꞌe̱e̱ rá soj man tinúú níꞌ, tinu̱j, nocoj.
\v 11 Ne̱ gu̱un rá soj ga̱a̱ dínj cuma̱n soj, ne̱ se̱ tiguíj soj man soj rihaan se‑su̱u̱n tinúú soj maꞌ. Ma̱an se nda̱a se‑su̱u̱n ꞌo̱ ꞌo̱ soj quiꞌya̱j suun soj á. Da̱nj ina̱nj vaa chrej sa̱ꞌ narqué núj rihaan soj asi̱j rque̱ ado̱nj.
\v 12 Sese da̱nj quiꞌya̱j soj, ne̱ nij síí ne nocoꞌ man Cristó roꞌ, cata̱j nij soꞌ se vaa veꞌé ꞌyaj soj, ne̱ se̱ cachiin a̱ doj rasu̱u̱n man soj maꞌ.
\s Nataꞌ Pabló da̱j quira̱nꞌ níꞌ asa̱ꞌ caꞌnaꞌ uún Cristó rihaan chumii̱ nihánj a
\p
\v 13 Me rá núj queneꞌe̱n soj da̱j quira̱nꞌ nij tinúú níꞌ nij síí noco̱ꞌ man Cristó nij síí a̱j caviꞌ, tinu̱j, nocoj. Ne̱ se̱ quinanó rá soj cheꞌé tinúú níꞌ síí caviꞌ maꞌ. Dan me se nij síí ne nocoꞌ man Yaꞌanj roꞌ, nanó ndoꞌo rá nij soꞌ cheꞌé tuviꞌ nij soꞌ síí caviꞌ cheꞌé se ne uun ya̱ rá nij soꞌ se vaa cunu̱u iꞌna̱ꞌ uún tuviꞌ nij soꞌ síí caviꞌ maꞌ.
\v 14 Tza̱j ne̱ amán ya̱ rá níꞌ se vaa caviꞌ Jesús, ne̱ cunuu iꞌna̱ꞌ uún soꞌ, quiꞌyaj Yaꞌanj, ne̱ cheꞌé dan neꞌen níꞌ se vaa xa̱ꞌ nij tinúú níꞌ síí caviꞌ, tza̱j ne̱ caꞌna̱ꞌ uún nij soꞌ ga̱ Jesús, quiꞌya̱j Yaꞌanj ado̱nj.
\p
\v 15 Nihánj me nana̱ cataj xnaꞌanj maꞌa̱n Síí ꞌNi̱j Raꞌa man níꞌ rihaan núj, ne̱ dan me se asa̱ꞌ quisíj güii caꞌna̱ꞌ uún Síí ꞌNi̱j Raꞌa man níꞌ rihaan chumii̱ nihánj, ne̱ níꞌ si̱j ga̱a̱ iꞌna̱ꞌ rihaan chumii̱ nihánj roꞌ, se̱ quitáá ya̱a̱n níꞌ rihaan nij síí caviꞌ maꞌ.
\v 16 ꞌO̱ se cagua̱j maꞌa̱n Síí ꞌNi̱j Raꞌa man níꞌ ga̱a cavi̱i̱ soꞌ rej xta̱ꞌ nani̱j soꞌ rihaan chumii̱ nihánj, ne̱ cagua̱j se‑mo̱zó Yaꞌanj síí uun chij doj, ne̱ caꞌya̱nj ꞌo̱ se‑mo̱zó Yaꞌanj xrúún Yaꞌanj chruun aꞌyánj, ga̱a ne̱ nij tinúú níꞌ nij síí canocoꞌ man Cristó nij síí caviꞌ me se asino nij soꞌ cunu̱u iꞌna̱ꞌ uún a.
\v 17 Ne̱ sese ga̱a̱ iꞌna̱ꞌ níꞌ ca̱yáán níꞌ rihaan chumii̱ nihánj, ne̱ cavi̱i̱ níꞌ rej xta̱ꞌ raa̱ ngaa ga̱ nij síí cunuu iꞌna̱ꞌ uún, quiꞌya̱j Yaꞌanj, ne̱ nari̱ꞌ tuviꞌ níꞌ ga̱ Síí ꞌNi̱j Raꞌa man níꞌ rej xta̱ꞌ, ga̱a ne̱ ca̱yáán níꞌ ga̱ Síí ꞌNi̱j Raꞌa man níꞌ nu̱ꞌ cavii nu̱ꞌ caꞌanj na̱nj ado̱nj.
\v 18 Nihánj me nana̱ cata̱j xnaꞌanj soj rihaan tinúú soj, ne̱ nari̱ꞌ nucuaj nimán ꞌo̱ ꞌo̱ soj, quiꞌya̱j nana̱ nihánj ado̱nj.
\c 5
\s Xca̱j níꞌ cuentá da̱j quiꞌya̱j níꞌ nda̱a se quisi̱j güii caꞌna̱ꞌ uún Cristó á
\p
\v 1 Taj cheꞌé cachro̱n núj nana̱ rihaan yanj cartá nihánj cata̱j xnaꞌanj núj rihaan soj cheꞌé me tiempó do̱ꞌ, me güii do̱ꞌ, caꞌna̱ꞌ uún Cristó, maan tinu̱j, maan nocoj.
\v 2 ꞌO̱ se a̱j neꞌen ya̱ soj se vaa ase vaa ne neꞌen níꞌ me güii catu̱u̱ síí itu̱u̱ quiꞌya̱j itu̱u̱ soꞌ roꞌ, da̱nj vaa ne neꞌen níꞌ me güii caꞌna̱ꞌ uún Síí ꞌNi̱j Raꞌa man níꞌ rihaan chumii̱ nihánj a̱ maꞌ.
\v 3 Dan me se vaa güii cata̱j yuvii̱ a: “Ya̱j me se dínj vaa rihaan chumii̱, ne̱ taj cheꞌé cuchuꞌvi̱ꞌ níꞌ maꞌ”, cata̱j nij yuvii̱ a. ꞌO̱ se güii yoꞌ me se ta̱j niꞌyo̱n ne̱ ase vaa ranꞌ chana̱ cuchru̱j neꞌej roꞌ, da̱nj ga̱a̱ quira̱nꞌ ndoꞌo nij yuvii̱ sayuun, ne̱ se̱ nanii nij soꞌ maꞌ.
\p
\v 4 Xa̱ꞌ soj, tza̱j ne̱ né si̱j chéé rej rmi̱ꞌ ne acaj cuentá me soj, maan tinu̱j, maan nocoj. ꞌO̱ se güii caꞌna̱ꞌ uún Cristó me se taj cheꞌé cuchuꞌvi̱ꞌ soj nda̱a vaa chuꞌviꞌ nij síí neꞌen man síí itu̱u̱ maꞌ.
\v 5 Ino̱ vaa soj rihaan nij síí ne nocoꞌ man Cristó á. Dan me se xa̱ꞌ soj, tza̱j ne̱ si̱j chéé ranga̱ꞌ me soj, ne̱ si̱j acaj sa̱ꞌ cuentá me soj uún, ne̱ né si̱j chéé rej rmi̱ꞌ do̱ꞌ, rej nii̱ do̱ꞌ, me soj maꞌ.
\v 6 Cheꞌé dan se̱ guun gu̱un níꞌ síí otoj nda̱ꞌ rá se vaa ꞌyaj taꞌa̱j nii maꞌ. ꞌO̱ se vaa cheꞌé ni̱ꞌyaj ranga̱ꞌ rlij rihaan níꞌ á. Se̱ canocoꞌ níꞌ tucuáán noco̱ꞌ ꞌó nij yuvii̱ maꞌ. Tana̱nj ꞌo̱ ga̱a̱ yuꞌve̱ níꞌ, ne̱ se̱ gaa xno̱ níꞌ maꞌ.
\v 7 Dan me se nij síí ma̱n rihaan chumii̱ nihánj roꞌ, síí va̱j rej rmi̱ꞌ me nij soꞌ, ne̱ taj se ꞌyáꞌ xca̱j nij soꞌ cuentá maꞌ. Cheꞌé dan ase vaa ꞌo̱ síí otoj nu̱ꞌ do̱ꞌ, ase vaa síí xno̱ do̱ꞌ, vaa nij soꞌ, ne̱ ne neꞌen nij soꞌ da̱j uun a̱ maꞌ.
\v 8 Xa̱ꞌ níꞌ, tza̱j ne̱ si̱j va̱j rej ranga̱ꞌ me níꞌ, ne̱ acaj níꞌ cuentá da̱j ꞌyaj níꞌ na̱nj á. Dan me se ꞌo̱ ga̱a̱ nucua̱j rá níꞌ man Cristó, ne̱ ga̱a̱ ꞌe̱e̱ rá níꞌ man tinúú níꞌ, ne̱ ase vaa aráán rihaan nimán tanuu ꞌyaj agaꞌ no̱ rucua̱a̱ tanuu roꞌ, da̱nj ga̱a̱ ca̱ráán rihaan nimán níꞌ a. Ne̱ gu̱un ya̱ rá níꞌ se vaa ya̱ nani̱i̱ níꞌ rihaan sayuun ne̱ cavi̱i̱ sa̱ꞌ níꞌ, ne̱ ase vaa avii sa̱ꞌ tanuu ꞌyaj agaꞌ nu̱u̱ raa̱ tanuu roꞌ, da̱nj ga̱a̱ cavi̱i̱ sa̱ꞌ níꞌ a.
\p
\v 9 Né cheꞌe̱ se me rá Yaꞌanj quiꞌya̱j Yaꞌanj sayuun man níꞌ me cataj Yaꞌanj se vaa canoco̱ꞌ níꞌ man soꞌ maꞌ. ꞌO̱ se cataj Yaꞌanj da̱nj cheꞌé se me rá Yaꞌanj nani̱i̱ níꞌ rihaan sayuun ne̱ cavi̱i̱ sa̱ꞌ níꞌ cheꞌé Jesucristó Si̱j ꞌNi̱j Raꞌa man níꞌ ado̱nj.
\v 10 Ne̱ Cristó me síí caviꞌ cheꞌé níꞌ, ne̱ cheꞌé dan asa̱ꞌ caꞌnaꞌ uún soꞌ caꞌve̱e se a̱j cavi̱ꞌ níꞌ, caꞌve̱e se ga̱a̱ iꞌna̱ꞌ níꞌ, tza̱j ne̱ ca̱yáán rcuaꞌa̱a̱n cunuda̱nj níꞌ ga̱ soꞌ ado̱nj.
\v 11 Cheꞌé dan ase vaa ꞌyaj soj cuano̱ roꞌ, da̱nj na̱nj nago̱ꞌ soj nana̱ sa̱ꞌ man tinúú soj, cheꞌé rej nari̱ꞌ nucuaj nimán tinúú soj, ne̱ ra̱cuíj soj man tinúú soj yan sa̱ꞌ doj canoco̱ꞌ nij tinu̱j nij soj man Yaꞌanj á.
\s Nagoꞌ Pabló chrej man nu̱ꞌ nij síí noco̱ꞌ man Cristó a
\p
\v 12 Cuano̱ nihánj me cata̱j xnaꞌanj núj rihaan soj se vaa cara̱a̱ cochro̱j soj rihaan nij síí uun chij rihaan soj, tinu̱j, nocoj. Dan me se nij soꞌ roꞌ, me síí nica̱j yuꞌunj man soj rihaan Síí ꞌNi̱j Raꞌa man níꞌ, ne̱ narqué nij soꞌ chrej sa̱ꞌ man soj,
\v 13 ne̱ cheꞌé dan ga̱a̱ ꞌe̱e̱ rá soj man nij soꞌ, ne̱ cara̱a̱ cochro̱j soj rihaan nij soꞌ á. Ne̱ dínj cuma̱n soj ga̱ tinúú soj á.
\p
\v 14 Ne̱ cuano̱ nihánj me rquee̱ núj man soj se vaa nago̱ꞌ soj chrej nucua̱j man nij síí rmi̱i̱ se vaa quiꞌya̱j suun nij soꞌ, tinu̱j, nocoj. Sese vaa síí chuꞌviꞌ nimán, ne̱ caꞌmi̱i̱ soj nana̱ sa̱ꞌ rihaan soꞌ, ne̱ nari̱ꞌ nucuaj nimán soꞌ, quiꞌya̱j soj á. Ra̱cuíj soj man nij yuvii̱ ninaj nimán, ne̱ ga̱a̱ ina̱j nimán soj ni̱ꞌyaj soj man cunuda̱nj yuvii̱ á.
\p
\v 15 Tu̱mé soj man soj se̱ guun quiꞌya̱j chiꞌi̱i̱ ꞌo̱ tuviꞌ soj man síí ꞌyaj chiꞌi̱i̱ man soꞌ maꞌ. Tana̱nj ina̱nj suun sa̱ꞌ quiꞌya̱j soj cheꞌé tuviꞌ soj do̱ꞌ, cheꞌé cunuda̱nj yuvii̱ do̱ꞌ á.
\p
\v 16 Niga̱nj ga̱a̱ niha̱ꞌ rá nimán soj,
\v 17 ne̱ se̱ caꞌneꞌ rá soj ga̱ suun achíín niꞌya̱j rihaan Yaꞌanj maꞌ.
\v 18 Ne̱ caꞌve̱e se me maꞌa̱n sayuun quira̱nꞌ soj, tza̱j ne̱ ꞌo̱ cata̱j soj guun niꞌya̱j níꞌ rihaan Yaꞌanj á. Da̱nj me rá Yaꞌanj quiꞌya̱j soj cheꞌé se si̱j noco̱ꞌ man Cristó Jesús me soj ado̱nj.
\p
\v 19 Se̱ guun ca̱ráán soj chrej rihaan Nimán Yaꞌanj maꞌ.
\v 20 Se̱ nachriꞌ soj man nana̱ cata̱j xnaꞌanj naca̱ Nimán Yaꞌanj rihaan soj maꞌ.
\v 21 Tza̱j ne̱ xca̱j soj cuentá da̱j vaa ꞌo̱ ꞌo̱ nana̱ cuno̱ soj, ga̱a ne̱ queneꞌe̱n soj sese ya̱ nana̱ caꞌmii Nimán Yaꞌanj me yoꞌ, ne̱ sa̱ꞌ cu̱nuû rá soj nu̱ꞌ nana̱ sa̱ꞌ yoꞌ á.
\v 22 Ne̱ se̱ caꞌvej rá soj quiꞌya̱j soj da̱j a̱ se nij maꞌ.
\p
\v 23 Yaꞌanj roꞌ, me síí naquiꞌyaj xe̱j nimán níꞌ, ne̱ me rá núj cunu̱u sa̱ꞌ ina̱nj nimán soj rihaan soꞌ, quiꞌya̱j maꞌa̱n soꞌ, ne̱ tu̱mé Yaꞌanj man maꞌa̱n soj nda̱a se quisi̱j güii caꞌna̱ꞌ uún Jesucristó Si̱j ꞌNi̱j Raꞌa man níꞌ a. Ne̱ dan me se me rá núj tu̱mé Yaꞌanj man nimán soj do̱ꞌ, man nee̱ man soj do̱ꞌ, ne̱ a̱ ꞌó cacunꞌ se̱ tumé soj a̱ maꞌ.
\v 24 Dan me se Yaꞌanj me síí nacúún man soj canoco̱ꞌ soj man soꞌ, ne̱ vaa cheꞌé ga̱a̱ nucua̱j rá soj man soꞌ se vaa tu̱mé soꞌ man soj ado̱nj.
\p
\v 25 Ne̱ cachi̱nj niꞌya̱j soj rihaan Yaꞌanj cheꞌé núj, tinu̱j, nocoj.
\p
\v 26 Ga̱a nariꞌ tuviꞌ nij soj, ne̱ veꞌé ndoꞌo caꞌmi̱i̱ soj ga̱ tuviꞌ soj rihaan Yaꞌanj á.
\v 27 Ma̱an cheꞌé se Síí ꞌNi̱j Raꞌa man níꞌ rqué suun manj, cheꞌé dan me no̱ xcúnj cata̱j xnaꞌanj ꞌu̱nj rihaan soj se vaa naya̱a̱ soj yanj cartá nihánj rihaan cunuda̱nj nij tinúú níꞌ síí noco̱ꞌ man Cristó ado̱nj.
\v 28 Ne̱ me rá núj quiꞌya̱j ndoꞌo Jesucristó Si̱j ꞌNi̱j Raꞌa man níꞌ se lu̱j cheꞌé soj ado̱nj.