\id 2TH
\h 2 Tesalonicenses
\toc1 2 Tesalonicenses
\mt Nihánj me síj vi̱j cartá caꞌnéé Pabló rihaan nij síí ya̱nj chumanꞌ Tesalónica a
\c 1
\p
\v 1 Síí cuꞌna̱j Pabló do̱ꞌ, Silvano do̱ꞌ, Timoteo do̱ꞌ, me núj, ne̱ ꞌyaj núj yanj cartá nihánj caꞌne̱j núj rihaan nij soj xꞌneꞌ yuvii̱ ya̱nj chumanꞌ cuꞌna̱j Tesalónica si̱j noco̱ꞌ man Rej níꞌ Yaꞌanj do̱ꞌ, man Jesucristó Si̱j ꞌNi̱j Raꞌa man níꞌ do̱ꞌ a.
\v 2 Me rá núj quiꞌya̱j Rej níꞌ Yaꞌanj ga̱ Jesucristó Si̱j ꞌNi̱j Raꞌa man níꞌ se lu̱j cheꞌé soj, ne̱ ga̱a̱ xe̱j nimán soj a.
\s Veꞌé nocoꞌ nij síí amán rá niꞌya̱j man Cristó ya̱nj chumanꞌ Tesalónica man Yaꞌanj a
\p
\v 3 Doj a̱ doj a̱ amán rá soj niꞌya̱j soj man Yaꞌanj, ne̱ nuu ꞌe̱e̱ doj rá ꞌo̱ ꞌo̱ soj tinúú soj da̱j a̱ güii, ne̱ cheꞌé dan no̱ xcúún núj ꞌo̱ cata̱j núj guun niꞌya̱j níꞌ rihaan Yaꞌanj cheꞌé soj, tinu̱j, nocoj.
\v 4 Dan me se ꞌo̱ sca̱ꞌ nataꞌ núj rihaan nij xꞌneꞌ yuvii̱ noco̱ꞌ man Yaꞌanj ya̱nj queꞌe̱e̱ chumanꞌ se vaa veꞌé ꞌyaj soj a. Ne̱ dan me se taj núj se vaa ꞌyaj ndoꞌo nii sayuun man soj, tza̱j ne̱ ꞌo̱ amán rá soj niꞌya̱j soj man Yaꞌanj, ne̱ ꞌo̱ vaa sca̱ꞌ rá soj rihaan sayuun, ne̱ ꞌo̱ nocoꞌ xraan soj man Yaꞌanj ado̱nj.
\s Caꞌmii Pabló cheꞌé güii quiꞌya̱j Yaꞌanj sayuun man nij yuvii̱ ꞌyaj sayuun man nij síí noco̱ꞌ man Cristó a
\p
\v 5 Cheꞌé se vaa ꞌyaj soj, cheꞌé dan neꞌen níꞌ se vaa nica̱ vaa nana̱ cataj xnaꞌanj Yaꞌanj cheꞌé soj a. Dan me se nuchruj ra̱a̱ Yaꞌanj cheꞌé soj, ne̱ cataj xnaꞌanj Yaꞌanj se vaa caꞌve̱e ca̱yáán soj rej gu̱un chij Yaꞌanj, ne̱ ma̱an cheꞌé dan ranꞌ soj sayuun na̱nj á.
\v 6 Dan me se neꞌen níꞌ se vaa nica̱ vaa rá Yaꞌanj quiꞌya̱j Yaꞌanj sayuun man nij yuvii̱ quiꞌyaj sayuun man soj a.
\v 7 Ne̱ nica̱ vaa rá Yaꞌanj cata̱j xnaꞌanj Yaꞌanj se vaa navi̱j güii ranꞌ soj sayuun, ne̱ nara̱a̱n rá soj ga̱ núj güii curuvi̱ꞌ uún Jesús Si̱j ꞌNi̱j Raꞌa man níꞌ do̱ꞌ, curuvi̱ꞌ nij se‑mo̱zó soꞌ síí nucua̱j ndoꞌo do̱ꞌ, curuvi̱ꞌ rej xta̱ꞌ rque ꞌo̱ yaꞌan chuguu̱n a.
\v 8 Ne̱ quiꞌya̱j soꞌ sayuun man nij yuvii̱ ne neꞌen man Yaꞌanj do̱ꞌ, man nij yuvii̱ naꞌvej rá cuno̱ nana̱ sa̱ꞌ cheꞌé Jesús Si̱j ꞌNi̱j Raꞌa man níꞌ do̱ꞌ a.
\v 9 Dan me se quira̱nꞌ nij soꞌ sayuun cheꞌé cacunꞌ quiꞌyaj nij soꞌ, ne̱ dan me se rej yaníj cuma̱n nij soꞌ, caca̱a̱ nij soꞌ nu̱ꞌ cavii nu̱ꞌ caꞌanj a. Se̱ queneꞌen nij soꞌ man Síí ꞌNi̱j Raꞌa man níꞌ do̱ꞌ, se vaa niꞌndaj ya̱ veꞌé vaa snucua̱j soꞌ do̱ꞌ maꞌ.
\v 10 ꞌO̱ se güii caꞌna̱ꞌ uún Síí ꞌNi̱j Raꞌa man níꞌ rihaan chumii̱ nihánj me se cata̱j nij síí noco̱ꞌ man soꞌ se vaa niꞌndaj ya̱ veꞌé vaa soꞌ, ne̱ sa̱ꞌ uxrá vaa nu̱ꞌ se vaa quiꞌyaj soꞌ a. ꞌO̱ se nda̱a soj qui̱ꞌnij scaꞌnúj nij soꞌ cheꞌé se cuchumán ya̱ rá soj cuno soj nana̱ nataꞌ núj rihaan soj ado̱nj.
\s Cachíín niꞌya̱j Pabló rihaan Yaꞌanj se vaa ra̱cuíj Yaꞌanj man nij síí noco̱ꞌ man Cristó a
\p
\v 11 Cheꞌé dan niga̱nj achíín niꞌya̱j núj rihaan Yaꞌanj cheꞌé soj se vaa caꞌve̱e quisi̱j soj gu̱un soj nu̱ꞌ nda̱a vaa me rá Yaꞌanj gu̱un soj ga̱a canacúún Yaꞌanj man soj canoco̱ꞌ soj man soꞌ a. Ne̱ achíín niꞌya̱j núj se vaa ra̱cuíj ndoꞌo Yaꞌanj man soj quiꞌya̱j soj nu̱ꞌ suun sa̱ꞌ me rá soj quiꞌya̱j soj, cheꞌé se si̱j amán rá niꞌya̱j man Cristó me soj a.
\v 12 Dan me se nda̱a síj, ga̱a ne̱ cata̱j soj se vaa sa̱ꞌ uxrá ꞌyaj Jesús Si̱j ꞌNi̱j Raꞌa man níꞌ, ne̱ cata̱j soꞌ se vaa sa̱ꞌ quiꞌyaj soj a. Da̱nj ina̱nj me se lu̱j me rá Yaꞌanj si̱j noco̱ꞌ níꞌ man do̱ꞌ, Jesucristó Si̱j ꞌNi̱j Raꞌa man níꞌ do̱ꞌ, quiꞌya̱j ro̱j soꞌ cheꞌé soj ado̱nj.
\c 2
\s Nataꞌ Pabló cheꞌé síí chiꞌi̱i̱ uxrá caꞌna̱ꞌ rihaan chumii̱ a
\p
\v 1 Dan me se a̱j neꞌen soj se vaa caꞌna̱ꞌ uún Jesucristó Si̱j ꞌNi̱j Raꞌa man níꞌ, ne̱ cunu̱u chre̱ꞌ níꞌ ga̱ soꞌ, tinu̱j, nocoj. Cheꞌé dan rquee̱ núj rihaan soj cuano̱
\v 2 se vaa se̱ guun vi̱j raꞌya̱nj rá soj maꞌ. Se̱ caráyaꞌa̱nj soj nana̱ cuno soj se vaa a̱j quisíj güii caꞌna̱ꞌ uún Síí ꞌNi̱j Raꞌa man níꞌ rihaan chumii̱ maꞌ. Né na̱na̱ ya̱ me nana̱ yoꞌ maꞌ. Caꞌve̱e se nana̱ caꞌmii Nimán Yaꞌanj me yoꞌ taj nii, caꞌve̱e se da̱nj aꞌmii ꞌo̱ síí aꞌmii natáj taj nii, caꞌve̱e se nana̱ cachrón núj rihaan ꞌo̱ yanj cartá me yoꞌ taj nii, tza̱j ne̱ se̱ cuchumán rá soj maꞌ.
\v 3 Dan me se naꞌvej uxrá raj tiha̱ꞌ yuꞌunj nii a̱ doj man soj a̱ maꞌ. Dan me se asino tucua̱j ndoꞌo yuvii̱ rihaan Yaꞌanj, ne̱ caꞌna̱ꞌ ꞌo̱ síí chiꞌi̱i̱ uxrá rihaan chumii̱, ne̱ síí se̱ caꞌvej rá cuno̱ rihaan Yaꞌanj gu̱un soꞌ a. Dan me se xa̱ꞌ soꞌ, tza̱j ne̱ si̱j a̱j caca̱a̱ gu̱un soꞌ vaa güii ado̱nj.
\v 4 Dan me se nachri̱ꞌ soꞌ man cunuda̱nj yaꞌanj, ne̱ a̱ ꞌó rasu̱u̱n se̱ caꞌvej rá soꞌ cara̱a̱ gue̱e̱ yuvii̱ rihaan maꞌ. Dan me se catu̱u̱ maꞌa̱n soꞌ nuvií noco̱o ca̱yáán soꞌ rej aráj gue̱e̱ yuvii̱ rihaan Yaꞌanj, ga̱a ne̱ caꞌmi̱i̱ ne̱ soꞌ cata̱j soꞌ se vaa maꞌa̱n soꞌ me Yaꞌanj ado̱nj.
\p
\v 5 Sese nanu̱j rá soj, ne̱ nu̱ꞌ nana̱ nihánj me nana̱ cataj xnaꞌanj ꞌu̱nj rihaan soj asi̱j rque̱ doj ga̱a cayáán ꞌu̱nj ga̱ soj ado̱nj.
\v 6 Ne̱ a̱j neꞌen soj me rasu̱u̱n aráán chrej rihaan síí chiꞌi̱i̱ yoꞌ, se vaa se̱ caꞌvee caꞌna̱ꞌ soꞌ cuano̱ maꞌ. Dan me se ca̱ráán chrej rihaan soꞌ nda̱a se quisi̱j güii cachrón Yaꞌanj caꞌna̱ꞌ soꞌ, ga̱a ne̱ caꞌna̱ꞌ soꞌ ado̱nj.
\v 7 Cuano̱ nihánj a̱j vaa ndoꞌo cacunꞌ ꞌyaj se nucua̱j yuve̱, tza̱j ne̱ ataa queneꞌe̱n níꞌ da̱j ga̱a̱ nu̱ꞌ cacunꞌ quiꞌya̱j síí chiꞌi̱i̱ yoꞌ á. Ne̱ xa̱ꞌ síí aráán chrej caꞌna̱ꞌ síí chiꞌi̱i̱, tza̱j ne̱ vaa güii naxu̱u̱n Yaꞌanj man maꞌa̱n soꞌ ado̱nj.
\v 8 Ga̱a ne̱ caꞌna̱ꞌ síí chiꞌi̱i̱ yoꞌ síí naꞌvej rá cuno̱ rihaan Yaꞌanj, ga̱a ne̱ queneꞌe̱n níꞌ da̱j gu̱un ado̱nj. Tza̱j ne̱ asa̱ꞌ caꞌnaꞌ Jesús Si̱j ꞌNi̱j Raꞌa man níꞌ, ne̱ niꞌndaj ya̱ veꞌé chugu̱u̱n soꞌ, ne̱ caꞌya̱nj u̱u̱n soꞌ man síí chiꞌi̱i̱ yoꞌ, ne̱ quiri̱ꞌ nu̱ꞌ síí chiꞌi̱i̱ yoꞌ ado̱nj.
\v 9 Síí Chre̱e me síí quiꞌya̱j caꞌna̱ꞌ síí chiꞌi̱i̱ yoꞌ, ne̱ maꞌa̱n Síí Chre̱e quiꞌya̱j gu̱un nucua̱j síí chiꞌi̱i̱ yoꞌ quiꞌya̱j soꞌ da̱j a̱ suun noco̱o ni̱ꞌyaj yuvii̱, cheꞌé yan tiha̱ꞌ yuꞌunj soꞌ man nij yuvii̱ se vaa ya̱ Yaꞌanj me soꞌ a.
\v 10 Ne̱ nu̱ꞌ se chiꞌi̱i̱ ndoꞌo quiꞌya̱j soꞌ, tiha̱ꞌ yuꞌunj soꞌ man nij yuvii̱ caꞌa̱nj caca̱a̱ nu̱ꞌ cavii nu̱ꞌ caꞌanj a. Ne̱ nij yuvii̱ yoꞌ me se né yuvi̱i̱ aranꞌ rá cuno̱ nana̱ ya̱ nana̱ quiꞌya̱j nani̱i̱ nij soꞌ rihaan sayuun me nij soꞌ maꞌ.
\v 11 Cheꞌé dan maꞌa̱n Yaꞌanj quiꞌya̱j cuchuma̱n rá nij soꞌ nana̱ ne̱, ne̱ canoco̱ꞌ nij soꞌ chrej tihaꞌ yuꞌunj ado̱nj.
\v 12 Ga̱a ne̱ cata̱j Yaꞌanj se vaa ya̱ síí tumé cacunꞌ me cunuda̱nj nij yuvii̱ ne cuchuma̱n rá nana̱ ya̱, ne̱ ina̱nj chrej chiꞌi̱i̱ niha̱ꞌ rá nij soꞌ canoco̱ꞌ nij soꞌ ado̱nj.
\s Narii Yaꞌanj man níꞌ canoco̱ꞌ níꞌ man soꞌ a
\p
\v 13 Tza̱j ne̱ no̱ xcúún núj niga̱nj cata̱j núj guun niꞌya̱j níꞌ rihaan Yaꞌanj cheꞌé soj si̱j ꞌe̱e̱ rá Síí ꞌNi̱j Raꞌa man níꞌ man, tinu̱j, nocoj. ꞌO̱ se asi̱j tacoo narii Yaꞌanj man soj cunu̱u sa̱ꞌ nimán soj rihaan soꞌ quiꞌya̱j Nimán Yaꞌanj, ne̱ cuchuma̱n rá soj cuno̱ soj nana̱ ya̱ ado̱nj.
\v 14 Dan me se ga̱a nataꞌ núj nana̱ sa̱ꞌ cheꞌé Cristó rihaan soj, ne̱ canacúún Yaꞌanj man soj se vaa cavi̱i̱ sa̱ꞌ soj ga̱ soꞌ, ne̱ cheꞌé dan da̱j se niꞌndaj ya̱ veꞌé vaa Jesucristó Si̱j ꞌNi̱j Raꞌa man níꞌ roꞌ, da̱nj quisi̱j soj ga̱a̱ soj uún ado̱nj.
\p
\v 15 Cheꞌé dan canoco̱ꞌ xraan soj tucuáán cuchruj núj rihaan soj ga̱a caꞌmii núj ga̱ soj do̱ꞌ, ga̱a quiꞌyaj núj yanj cartá caꞌnéé núj rihaan soj do̱ꞌ ado̱nj.
\v 16-17 Ne̱ me rá núj nari̱ꞌ nucuaj nimán soj, quiꞌya̱j maꞌa̱n Jesucristó Si̱j ꞌNi̱j Raꞌa man níꞌ do̱ꞌ, Rej níꞌ Yaꞌanj do̱ꞌ a. Ne̱ Yaꞌanj roꞌ, me síí ꞌe̱e̱ rá man níꞌ, ne̱ quiꞌyaj ndoꞌo soꞌ se lu̱j ga̱ níꞌ se vaa naquiꞌyaj nucua̱j soꞌ nimán níꞌ nu̱ꞌ cavii nu̱ꞌ caꞌanj, ne̱ uun ya̱ rá níꞌ se vaa cavi̱i̱ sa̱ꞌ níꞌ, quiꞌya̱j uún soꞌ ado̱nj. Ne̱ me rá núj gu̱un nucua̱j soj quiꞌya̱j soj nu̱ꞌ suun sa̱ꞌ, ne̱ caꞌmi̱i̱ soj nu̱ꞌ nana̱ sa̱ꞌ, quiꞌya̱j Yaꞌanj ado̱nj.
\c 3
\s Me rá nij tuvi̱ꞌ Pabló cachi̱nj niꞌya̱j nij síí noco̱ꞌ man Cristó rihaan Yaꞌanj cheꞌé nij soꞌ a
\p
\v 1 Dan me se vaa ꞌó nana̱ me rá núj caꞌne̱j núj rihaan soj, tinu̱j, nocoj. ꞌO̱ se me rá núj cachi̱nj niꞌya̱j soj rihaan Yaꞌanj se vaa xnaꞌa̱nj uxrá nij síí cuno̱ snana̱ Síí ꞌNi̱j Raꞌa man níꞌ, ne̱ cata̱j yuvii̱ se vaa sa̱ꞌ uxrá vaa nana̱ yoꞌ, nda̱a vaa cataj soj cheꞌé nana̱ yoꞌ ga̱a cuno maꞌa̱n soj a.
\v 2 Ne̱ cachi̱nj niꞌya̱j soj cheꞌé núj se vaa nani̱i̱ núj rihaan nij síí chiꞌi̱i̱ uún á. ꞌO̱ se vaa yuvii̱ ne amán rá niꞌya̱j man Cristó a̱ maan ado̱nj.
\s Vaa cheꞌé ga̱a̱ nucua̱j rá níꞌ man Síí ꞌNi̱j Raꞌa man níꞌ a
\p
\v 3 ꞌO̱ se vaa cheꞌé ndoꞌo ga̱a̱ nucua̱j rá níꞌ man Síí ꞌNi̱j Raꞌa man níꞌ, ne̱ soꞌ me síí quiꞌya̱j nari̱ꞌ nucuaj rá soj, ne̱ tu̱mé soꞌ man soj se vaa se̱ quiꞌyaj canaán Síí Chre̱e man soj ado̱nj.
\v 4 Ne̱ nucua̱j rá núj man Síí ꞌNi̱j Raꞌa man níꞌ se vaa ꞌo̱ ꞌyaj ya̱ soj nu̱ꞌ se vaa cataj núj rihaan soj, ne̱ dan me se veé ꞌo̱ da̱nj ya̱ quiꞌya̱j soj á.
\p
\v 5 Ne̱ me rá núj se vaa ra̱cuíj Síí ꞌNi̱j Raꞌa man níꞌ man maꞌa̱n soj da̱j quiꞌya̱j soj, cara̱a̱ cochro̱j soj rihaan Yaꞌanj, ne̱ ꞌo̱ canoco̱ꞌ soj man Yaꞌanj nda̱a vaa quiꞌyaj maꞌa̱n Cristó, ne̱ se̱ caꞌneꞌ rá soj ga̱ suun ꞌyaj da̱nj maꞌ.
\s Se̱ gaa rmi̱i̱ níꞌ maꞌ
\p
\v 6 Cheꞌé se‑chuvi̱i Jesucristó Si̱j ꞌNi̱j Raꞌa man níꞌ, aꞌneꞌ núj ꞌó suun rihaan soj, tinu̱j, nocoj. Dan me se gu̱un yaníj soj rihaan nu̱ꞌ nij tinúú níꞌ nij síí noco̱ꞌ chrej rmi̱i̱ naꞌvej rá quiꞌya̱j suun á. ꞌO̱ se si̱j ne nocoꞌ tucuáán cuchruj núj rihaan me nij soꞌ a̱ maꞌ.
\v 7 ꞌO̱ se a̱j neꞌen soj se vaa no̱ xcúún soj quiꞌya̱j soj nda̱a vaa quiꞌyaj núj ga̱a cayáán núj ga̱ soj, ne̱ dan me se ne ga̱a̱ rmi̱i̱ núj ga̱a cayáán núj scaꞌnúj soj maꞌ.
\v 8 Ne̱ ne cha̱ u̱u̱n núj rihaan soj maꞌ. ꞌO̱ se nu̱ꞌ se chá núj naruꞌvee núj saꞌanj rihaan soj ado̱nj. Tza̱j ne̱ ꞌo̱ se nuvi̱i niga̱nꞌ quiꞌyaj suun uxrá núj quiri̱ꞌ núj cha̱ núj, ne̱ ne quiꞌya̱j suun soj cheꞌé núj, quiꞌyaj núj maꞌ.
\v 9 Dan me se sese guun rá núj cachi̱nj núj se chá rihaan soj, ne̱ caꞌve̱e quiꞌya̱j núj da̱nj, tza̱j ne̱ ne caꞌve̱j rá núj quiꞌya̱j núj da̱nj maꞌ. Ma̱an se guun rá núj cuchru̱j núj tucuáán rihaan soj da̱j quiꞌya̱j maꞌa̱n soj ado̱nj.
\v 10 ꞌO̱ se ga̱a cayáán núj ga̱ soj, ne̱ caꞌneꞌ núj suun nihánj rihaan soj caꞌmi̱i̱ soj a: Sese vaa ꞌo̱ síí naꞌvej rá quiꞌya̱j suun, ne̱ se̱ chá soꞌ maꞌ, taj núj rihaan soj ado̱nj.
\p
\v 11 A̱j namán nana̱ rihaan núj se vaa ꞌni̱j síí rmi̱i̱ scaꞌnúj soj, ne̱ nij soꞌ me se naꞌvej rá nij soꞌ quiꞌya̱j suun nij soꞌ, tza̱j ne̱ tiguíj rmaꞌa̱n nij soꞌ nana̱ rihaan tuviꞌ nij soꞌ a.
\v 12 Cheꞌé Jesucristó Si̱j ꞌNi̱j Raꞌa man níꞌ aꞌneꞌ núj suun cuano̱ rihaan yuvii̱ ꞌyaj da̱nj, se vaa dínj ga̱a̱ tuꞌva nij soꞌ, ne̱ quiꞌya̱j suun nij soꞌ, ne̱ quira̱a̱n maꞌa̱n nij soꞌ se chá cha̱ nij soꞌ á.
\p
\v 13 Ne̱ xa̱ꞌ maꞌa̱n soj, tza̱j ne̱ se̱ caꞌneꞌ rá soj quiꞌya̱j soj suun sa̱ꞌ, maan tinu̱j, maan nocoj.
\v 14 Sese ꞌo̱ tuviꞌ soj naꞌvej rá cuno̱ nana̱ cachrón núj rihaan yanj nihánj, ne̱ xca̱j soj cuentá me síí naꞌvej rá cuno̱ nana̱, ne̱ se̱ nica̱j tuviꞌ rcuaꞌa̱a̱n soj ga̱ soꞌ maꞌ. Nda̱a síj, ga̱a ne̱ gu̱un naꞌa̱j soꞌ a.
\v 15 Tza̱j ne̱ se̱ nachriꞌ soj ni̱ꞌyaj soj man síí rmi̱i̱ yoꞌ maꞌ. Tana̱nj veꞌé quiꞌya̱j soj, nago̱ꞌ soj chrej nucua̱j man soꞌ á. ꞌO̱ se tinúú soj me soꞌ ado̱nj.
\s Veꞌé cuma̱n nij síí noco̱ꞌ man Cristó ya̱nj chumanꞌ Tesalónica, rá Pabló a
\p
\v 16 O̱rúnꞌ Síí ꞌNi̱j Raꞌa man níꞌ neꞌen quiꞌya̱j ga̱a̱ xe̱j nimán níꞌ, ne̱ me rá núj ꞌo̱ quiꞌya̱j soꞌ da̱nj cheꞌé soj a. Ne̱ caꞌve̱e se me maꞌa̱n sayuun quira̱nꞌ soj, tza̱j ne̱ dínj ga̱a̱ nimán soj, quiꞌya̱j soꞌ á. Ne̱ me rá núj ca̱yáán Síí ꞌNi̱j Raꞌa man níꞌ ga̱ ta̱ranꞌ soj ado̱nj.
\p
\v 17 Ma̱ꞌanj si̱j cuꞌna̱j Pabló roꞌ, raꞌaj ma̱ꞌanj achronj nana̱ nihánj se vaa veꞌé cuma̱n soj raj a. Da̱nj ina̱nj ꞌyáá ꞌu̱nj achronj do̱j nana̱ rihaan cunuda̱nj nij yanj cartá aꞌnéé ꞌu̱nj, ne̱ na̱nj vaa letrá achronj a.
\v 18 Me rá núj quiꞌya̱j ndoꞌo Jesucristó Si̱j ꞌNi̱j Raꞌa man níꞌ se lu̱j cheꞌé cunuda̱nj soj ado̱nj.