\id 1TI
\h 1 Timoteo
\toc1 1 Timoteo
\mt Nihánj me cartá ꞌo̱ caꞌnéé Pabló rihaan Timoteo a
\c 1
\p
\v 1 ꞌU̱nj nihánj me síí cuꞌna̱j Pabló síí cuneꞌ Cristó Jesús caꞌa̱nj nata̱ꞌ snana̱ soꞌ rihaan yuvii̱ a. Yoꞌ me suun caꞌneꞌ Yaꞌanj Si̱j Tinanii man níꞌ rihaan Sayuun do̱ꞌ, Cristó Jesús si̱j nucua̱j ya̱ rá níꞌ quiꞌya̱j cavi̱i̱ sa̱ꞌ níꞌ do̱ꞌ ado̱nj.
\p
\v 2 ꞌYáá ꞌu̱nj yanj cartá nihánj caꞌne̱j ꞌu̱nj rihaan so̱ꞌ si̱j cuꞌna̱j Timoteo a. Dan me se tihaán ꞌu̱nj snana̱ Yaꞌanj rihaan so̱ꞌ, ne̱ cuchumán rá so̱ꞌ nana̱ yoꞌ, ne̱ cheꞌé dan ase vaa ꞌo̱ taꞌníj roꞌ, da̱nj vaa yá so̱ꞌ rihanj ado̱nj.
\p Me rá ꞌu̱nj se vaa Rej níꞌ Yaꞌanj ga̱ Cristó Jesús Si̱j ꞌNi̱j Raꞌa man níꞌ quiꞌya̱j ndoꞌo se lu̱j cheꞌé so̱ꞌ, ne̱ ga̱a̱ ꞌe̱e̱ rá ro̱j soꞌ mán so̱ꞌ, ne̱ ga̱a̱ xe̱j nimán so̱ꞌ, quiꞌya̱j ro̱j soꞌ, raj a.
\s Caꞌmii Pabló cheꞌé nij síí tucuꞌyón tucuáán ne̱ a
\p
\v 3 Dan me se a̱j neꞌén so̱ꞌ se vaa ga̱a ataa caꞌa̱nj ꞌu̱nj estadó Macedonia, ne̱ rqueé ꞌu̱nj mán so̱ꞌ se vaa quina̱j so̱ꞌ chumanꞌ Éfeso a. Ne̱ veé da̱nj rqueé ꞌu̱nj mán so̱ꞌ se vaa caꞌne̱ꞌ so̱ꞌ suun rihaan taꞌa̱j nij síí ma̱n Éfeso se vaa se̱ tucuꞌyón nij soꞌ tucuáán ne̱ rihaan nij tinúú níꞌ maꞌ.
\v 4 Dan me se cata̱j so̱ꞌ rihaan nij tinúú níꞌ, ne̱ a̱ se̱ nanó xre̱j nij soꞌ cuentó ma̱n ga̱a naá do̱ꞌ, cuentó cheꞌé da̱j vaa da̱j a̱ xi̱i nij soꞌ síí ma̱n ga̱a naá do̱ꞌ maꞌ. ꞌO̱ se aꞌmii unuꞌ uxrá yuvii̱ cheꞌé nana̱ yoꞌ, tza̱j ne̱ ne racuíj nana̱ yoꞌ man níꞌ sa̱ꞌ doj canoco̱ꞌ níꞌ man Yaꞌanj maꞌ. ꞌO̱ se me rá Yaꞌanj ga̱a̱ nucua̱j rá níꞌ man maꞌa̱n Yaꞌanj ado̱nj.
\v 5 ꞌO̱ se aꞌnéꞌ ꞌu̱nj suun yoꞌ rihaan so̱ꞌ cheꞌé se me rá ꞌu̱nj ga̱a̱ ꞌe̱e̱ rá níꞌ tuviꞌ níꞌ á. Sese naruvii nimán níꞌ, ne̱ sese taj cacunꞌ tumé níꞌ rá níꞌ, ne̱ sese amán ya̱ rá níꞌ niꞌya̱j níꞌ Yaꞌanj, ne̱ caꞌve̱e ga̱a̱ ꞌe̱e̱ rá níꞌ ni̱ꞌyaj níꞌ tuviꞌ níꞌ ado̱nj.
\v 6 Dan me se vaa taꞌa̱j nij yuvii̱, ne̱ taꞌaa nij soꞌ ꞌó chrej aꞌmii nij soꞌ, ne̱ dan me se riꞌ rmaꞌa̱n tiempó, ꞌyaj nij soꞌ, aꞌmii nij soꞌ cheꞌé ꞌó tucuáán na̱nj á.
\v 7 ꞌO̱ se me rá nij soꞌ gu̱un nij soꞌ maestró tucuꞌyón stucua̱nj Moisés, tza̱j ne̱ ne neꞌen nij soꞌ me taj nij soꞌ a̱ maꞌ. Ne̱ sa̱ꞌ uxrá vaa nana̱ tucuꞌyón nij soꞌ rá maꞌa̱n nij soꞌ, tza̱j ne̱ ne neꞌen uxrá nij soꞌ nana̱ yoꞌ a̱ maꞌ.
\s Nataꞌ Pabló se vaa ina̱nj cheꞌé nij síí ꞌyaj cacunꞌ vaa stucua̱nj Moisés a
\p
\v 8 Neꞌen níꞌ se vaa sa̱ꞌ vaa stucua̱nj Moisés, ne̱ cataj Yaꞌanj rihaan Moisés da̱j quiꞌya̱j nij yuvii̱ israelitá canoco̱ꞌ nij soꞌ man Yaꞌanj, tza̱j ne̱ xca̱j níꞌ cuentá me cheꞌé me caꞌmii Yaꞌanj da̱nj á.
\v 9 Neꞌen níꞌ se vaa xa̱ꞌ yuvii̱ nica̱ nimán, tza̱j ne̱ taj tucuáán achiin man nij soꞌ canoco̱ꞌ nij soꞌ Yaꞌanj maꞌ. Tana̱nj cuchruj Yaꞌanj stucua̱nj Moisés cheꞌé yuvii̱ ne uno suun caꞌneꞌ Yaꞌanj do̱ꞌ, yuvii̱ tucuáá do̱ꞌ, yuvii̱ ne nocoꞌ man Yaꞌanj do̱ꞌ, yuvii̱ tumé ndoꞌo cacunꞌ do̱ꞌ, yuvii̱ ne vaa sa̱ꞌ nimán do̱ꞌ, yuvii̱ ne acaj cuentá cheꞌé Yaꞌanj do̱ꞌ, yuvii̱ ticaviꞌ rej do̱ꞌ, yuvii̱ ticaviꞌ nii do̱ꞌ, yuvii̱ ticaviꞌ me maꞌa̱n ꞌó yuvii̱ do̱ꞌ ado̱nj.
\v 10 Ne̱ veé da̱nj cuchruj Yaꞌanj stucua̱nj Moisés cheꞌé yuvii̱ otoj ga̱ ꞌó yuvii̱ né ni̱ca̱ me do̱ꞌ, chii cha̱na̱ do̱ꞌ, síí otoj ga̱ chii cha̱na̱ do̱ꞌ, yuvii̱ tuꞌvéj man tuviꞌ do̱ꞌ, yuvii̱ aꞌmii nana̱ ne̱ do̱ꞌ, yuvii̱ ataꞌ tuꞌva aꞌmii ne̱ do̱ꞌ, yuvii̱ ꞌyaj me maꞌa̱n rasu̱u̱n ino̱ vaa ga̱ tucuáán ya̱ do̱ꞌ ado̱nj.
\v 11 Ne̱ tucuáán ya̱ yoꞌ roꞌ, ꞌo̱ cuya̱a̱n aꞌmii yoꞌ ga̱ snana̱ Yaꞌanj si̱j sa̱ꞌ ndoꞌo, nana̱ niꞌndaj ya̱ sa̱ꞌ vaa, ne̱ nana̱ yoꞌ me se cuneꞌ Yaꞌanj mán ꞌu̱nj nata̱ꞌ ꞌu̱nj rihaan yuvii̱ ado̱nj.
\s Nataꞌ Pabló se vaa cunuu ꞌe̱e̱ ndoꞌo rá Cristó man soꞌ a
\p
\v 12 Taj ꞌu̱nj guun niꞌya̱j níꞌ rihaan Cristó Jesús Si̱j ꞌNi̱j Raꞌa man níꞌ cheꞌé se nariꞌ nucuáá ꞌu̱nj, quiꞌyaj soꞌ a. Dan me se uxrá ya̱ cataj Yaꞌanj se vaa xraan canocóꞌ ꞌu̱nj man soꞌ, ne̱ cuneꞌ soꞌ mán ꞌu̱nj qui̱ꞌyáá ꞌu̱nj se‑su̱u̱n soꞌ ado̱nj.
\v 13 Asino ya̱a̱n me se qui̱j uxrá caꞌmii ꞌu̱nj cheꞌé Cristó, ne̱ quiꞌyaj ndoꞌo ꞌu̱nj sayuun man nij síí noco̱ꞌ man soꞌ, ne̱ caꞌmii xta̱ꞌ ꞌu̱nj niꞌya̱j ꞌu̱nj man soꞌ, tza̱j ne̱ queneꞌen Cristó se vaa cheꞌé se ne queneꞌe̱n yá ꞌu̱nj da̱j vaa soꞌ roꞌ, cheꞌé dan ne cuchuma̱n rá ꞌu̱nj ni̱ꞌyaj ꞌu̱nj man soꞌ a. Tza̱j ne̱ cunuu ꞌe̱e̱ rá Cristó manj, ne̱ ne quiꞌya̱j soꞌ sayuun manj maꞌ.
\p
\v 14 Tana̱nj quiꞌyaj uxrá Cristó Jesús Si̱j ꞌNi̱j Raꞌa man níꞌ se lu̱j ga̱ ꞌu̱nj, se vaa cuchumán rá ꞌu̱nj niꞌya̱j ꞌu̱nj man soꞌ, ne̱ cunuu ꞌe̱e̱ raj tuvij, quiꞌyaj soꞌ ado̱nj.
\v 15 Dan me se ya̱ uxrá vaa nana̱ nihánj, ne̱ ta̱ranꞌ níꞌ no̱ xcúún cuno̱ nana̱ nihánj se vaa me rá Cristó Jesús ti̱nanii soꞌ man nij síí tumé cacunꞌ rihaan chrej chiꞌi̱i̱ do̱ꞌ, rihaan sayuun do̱ꞌ na̱nj ado̱nj. Cheꞌé dan caꞌnaꞌ soꞌ rihaan chumii̱ nihánj ado̱nj. Dan me se noco̱o doj cacunꞌ quiꞌyáá ꞌu̱nj rihaan cacunꞌ quiꞌyaj ta̱ranꞌ ꞌó nij yuvii̱ a.
\v 16 Tza̱j ne̱ cunuu ꞌe̱e̱ rá Cristó Jesús niꞌya̱j soꞌ manj, cheꞌé se guun rá Cristó Jesús se vaa xca̱j ꞌó nij síí cuchuma̱n rá ni̱ꞌyaj man soꞌ cuentá se vaa canoco̱ꞌ nij soꞌ man Cristó Jesús, ne̱ xꞌne̱e̱ cacunꞌ xráá nij soꞌ, ne̱ caꞌve̱e ca̱yáán nij soꞌ ga̱ soꞌ nu̱ꞌ cavii nu̱ꞌ caꞌanj ado̱nj.
\v 17 Nu̱ꞌ cavii nu̱ꞌ caꞌanj cata̱j níꞌ se vaa niꞌndaj ya̱ sa̱ꞌ vaa Yaꞌanj, ne̱ soꞌ me Rey gu̱un chij nu̱ꞌ cavii nu̱ꞌ caꞌanj, ne̱ daj chiha̱a̱ míj se̱ caviꞌ soꞌ maꞌ. Ne ruviꞌ soꞌ niꞌya̱j yuvii̱ maꞌ. Taj va̱j ꞌó Yaꞌanj maꞌ. O̱rúnꞌ soꞌ me Yaꞌanj ya̱ ado̱nj. Veé da̱nj ga̱a̱ ya̱ ado̱nj.
\p
\v 18-19 Timoteo, ase vaa taꞌníí ya̱ ma̱ꞌanj vaa yá so̱ꞌ ado̱nj. Dan me se aꞌneꞌ yá ꞌu̱nj suun rihaan so̱ꞌ ꞌo̱ caꞌmi̱i̱ cunu̱ꞌ sa̱ꞌ yá so̱ꞌ cheꞌé tucuáán sa̱ꞌ ya̱ nihánj á. ꞌO̱ ga̱a̱ nica̱ nimán so̱ꞌ, ne̱ ꞌo̱ ga̱a̱ nucua̱j rá so̱ꞌ cuchuma̱n rá so̱ꞌ, ga̱a ne̱ quisi̱j ya̱ nda̱a vaa ya̱ nataꞌ nij síí caꞌmii Yaꞌanj rihaan cheꞌé so̱ꞌ na̱nj á. Dan me se vaa taꞌa̱j nij síí quiriꞌ rá, ne̱ ne cuchuma̱n ya̱ rá nij soꞌ maꞌ.
\v 20 Dan me se vi̱j nij soꞌ me ro̱j síí cuꞌna̱j Himeneo ga̱ Alejandró síí caꞌmii qui̱j cheꞌé Yaꞌanj a. Dan me se nagoꞌ yá ꞌu̱nj man ro̱j soꞌ raꞌa Síí Chre̱e, ga̱a ne̱ xca̱j ro̱j soꞌ cuentá, ne̱ se̱ caꞌmii qui̱j ro̱j soꞌ cheꞌé Yaꞌanj maꞌ.
\c 2
\s Cachi̱nj niꞌya̱j níꞌ rihaan Yaꞌanj cheꞌé cunuda̱nj yuvii̱ a
\p
\v 1 Narqué ꞌu̱nj chrej nucua̱j man soj cheꞌé suun noco̱o doj se vaa rquee̱ soj man Yaꞌanj ne̱ cachi̱nj niꞌya̱j soj rihaan soꞌ á. Cachi̱nj niꞌya̱j soj cheꞌé se vaa achiin man cunuda̱nj yuvii̱, ne̱ cata̱j soj guun niꞌya̱j níꞌ rihaan Yaꞌanj cheꞌé cunuda̱nj nij yuvii̱ a.
\v 2 Ne̱ cachi̱nj niꞌya̱j soj cheꞌé cunuda̱nj nij síí nica̱j suun, ga̱a ne̱ ga̱a̱ dínj ca̱yáán níꞌ rihaan chumii̱ nihánj, ne̱ veꞌé quiꞌya̱j níꞌ, canoco̱ꞌ níꞌ man Yaꞌanj á.
\v 3 Sa̱ꞌ uxrá vaa sese da̱nj quiꞌya̱j níꞌ ni̱ꞌyaj Yaꞌanj Si̱j Tinanii man níꞌ rihaan Sayuun ado̱nj.
\v 4 Me rá Yaꞌanj nani̱i̱ cunuda̱nj yuvii̱ rihaan sayuun ne̱ cavi̱i̱ sa̱ꞌ nij soꞌ, ne̱ me rá Yaꞌanj nari̱ꞌ cunuda̱nj yuvii̱ nana̱ ya̱ na̱nj á.
\p
\v 5 ꞌO̱ se o̱rúnꞌ Yaꞌanj, ne̱ o̱rúnꞌ ꞌo̱ snóꞌo taj xnaꞌanj rihaan níꞌ da̱j vaa Yaꞌanj, ne̱ soꞌ me síí aꞌmii rihaan Yaꞌanj cheꞌé níꞌ, ne̱ Cristó Jesús me síí ꞌyaj da̱nj ado̱nj.
\v 6 Ne̱ Cristó Jesús me se caꞌvej rá soꞌ cavi̱ꞌ soꞌ cheꞌé cunuda̱nj yuvii̱, cheꞌé rej nani̱i̱ nij yuvii̱ rihaan sayuun a. Dan me se cachrón Yaꞌanj güii cavi̱ꞌ Cristó Jesús, ne̱ güii dan caviꞌ Cristó Jesús, ne̱ tihaa̱n Cristó Jesús se vaa me uxrá rá Yaꞌanj cavi̱i̱ sa̱ꞌ cunuda̱nj yuvii̱ a.
\v 7 Ne̱ cuneꞌ Yaꞌanj mán ꞌu̱nj caꞌmi̱i̱ natáj ꞌu̱nj do̱ꞌ, caꞌa̱nj nata̱ꞌ ꞌu̱nj snana̱ Cristó do̱ꞌ, tu̱cuꞌyón ꞌu̱nj man nij yuvii̱ yaníj da̱j cuchuma̱n rá nij soꞌ ni̱ꞌyaj nij soꞌ man Yaꞌanj ne̱ cuno̱ nij soꞌ nana̱ ya̱ caꞌmii Yaꞌanj do̱ꞌ a. Xa̱ꞌ nana̱ nihánj, tza̱j ne̱ nana̱ ya̱ uxrá me nana̱ nihánj, ne̱ ne aꞌmii ne̱ ꞌu̱nj maꞌ.
\p
\v 8 Dan me se me rej maꞌa̱n nuu chre̱ꞌ soj si̱j noco̱ꞌ man Cristó, ne̱ me rá ꞌu̱nj cachi̱nj niꞌya̱j nij snóꞌo rihaan Yaꞌanj, ne̱ naxca̱j raꞌa nij soꞌ rej xta̱ꞌ cachi̱nj niꞌya̱j nij soꞌ rihaan Yaꞌanj, ne̱ ꞌo̱ gu̱un rá nij soꞌ se vaa veꞌé canoco̱ꞌ nij soꞌ man Yaꞌanj, ne̱ se̱ caꞌmaan rá nij soꞌ do̱ꞌ, se̱ canó tuviꞌ nij soꞌ do̱ꞌ, se̱ caꞌmii cunuꞌ nij soꞌ do̱ꞌ, ꞌo̱ se sa̱ꞌ ina̱nj cachi̱nj niꞌya̱j nij soꞌ na̱nj ado̱nj.
\s Caꞌmii Pabló cheꞌé da̱j quiꞌya̱j chana̱ noco̱ꞌ man Cristó a
\p
\v 9 Ne̱ xa̱ꞌ chana̱, tza̱j ne̱ cu̱nuû chana̱ yatzíj veꞌé aráán nee̱ man chana̱ á. Se̱ caráyaꞌa̱nj ndoꞌo chana̱ cheꞌé yuvé raa̱ noꞌ maꞌ. Se̱ rásuun noꞌ agaꞌ oró do̱ꞌ, chruj perlá do̱ꞌ, se cunuû noꞌ yatzíj tuꞌve̱e̱ ndoꞌo maꞌ.
\v 10 Tana̱nj quiꞌya̱j noꞌ suun sa̱ꞌ ra̱cuíj noꞌ man yuvii̱, ne̱ ase vaa yatzíj veꞌé vaa roꞌ, da̱nj ga̱a̱ suun sa̱ꞌ yoꞌ a. Da̱nj quiꞌya̱j chana̱, ne̱ queneꞌe̱n yuvii̱ se vaa ya̱ vaa nana̱ aꞌmii noꞌ se vaa níí noco̱ꞌ man Yaꞌanj me noꞌ ado̱nj.
\v 11 Ga̱a tucuꞌyón nii snana̱ Yaꞌanj, ne̱ ga̱a̱ dínj tuꞌva nij chana̱ veꞌé cuno̱ nij noꞌ á.
\v 12 Naꞌvej rá ꞌu̱nj tu̱cuꞌyón chana̱ man snóꞌo maꞌ. Se̱ guun gu̱un chij chana̱ rihaan snóꞌo maꞌ. Ma̱an se dínj ga̱a̱ tuꞌva chana̱ ado̱nj.
\p
\v 13 ꞌO̱ se ga̱a guun cheꞌe̱ chumii̱, ne̱ asino quiꞌyaj Yaꞌanj man snóꞌo cuꞌna̱j Adán, ga̱a ne̱ quiꞌyaj Yaꞌanj man chana̱ cuꞌna̱j Eva ado̱nj.
\v 14 Ne tiha̱ꞌ yuꞌunj Síí Chre̱e man Adán maꞌ. Tana̱nj chana̱ tihaꞌ yuꞌunj soꞌ, ne̱ quiꞌyaj noꞌ cacunꞌ rihaan Yaꞌanj, quiꞌyaj Síí Chre̱e ado̱nj.
\v 15 Tza̱j ne̱ cavi̱i̱ sa̱ꞌ nij chana̱ ga̱a cuchru̱j chana̱ neꞌej, sese ꞌo̱ cuchuma̱n rá chana̱ ni̱ꞌyaj chana̱ man Yaꞌanj do̱ꞌ, sese ꞌo̱ cunu̱u ꞌe̱e̱ rá chana̱ tuviꞌ chana̱ do̱ꞌ, sese ꞌo̱ cunu̱u sa̱ꞌ nimán chana̱ rihaan Yaꞌanj do̱ꞌ, ne̱ veꞌé tu̱mé chana̱ man maꞌa̱n chana̱ da̱j quiꞌya̱j noꞌ ado̱nj.
\c 3
\s Nataꞌ Pabló cheꞌé da̱j ga̱a̱ nij snóꞌo tumé sa̱ꞌ rihaan Yaꞌanj man nij yuvii̱ noco̱ꞌ man Cristó a
\p
\v 1 Ya̱ vaa nana̱ nihánj á: Sese me rá ꞌo̱ soꞌ gu̱un soꞌ síí tumé sa̱ꞌ rihaan Yaꞌanj man nij yuvii̱ noco̱ꞌ man Cristó, ne̱ sa̱ꞌ vaa suun me rá soꞌ ca̱ta̱ soꞌ ado̱nj.
\v 2 Xa̱ꞌ síí gu̱un síí tumé sa̱ꞌ man yuvii̱ rihaan Yaꞌanj, tza̱j ne̱ vaa cheꞌé gu̱un soꞌ síí nuviꞌ cacunꞌ tumé do̱ꞌ, síí vaa o̱rúnꞌ chana̱ nica̱ do̱ꞌ, síí chij nimán do̱ꞌ, síí veꞌé acaj cuentá do̱ꞌ, síí niꞌya̱nj rá do̱ꞌ, síí niha̱ꞌ rá cara̱nꞌ yuvii̱ avii ꞌó chumanꞌ tucuá do̱ꞌ, síí ya̱nj tu̱cuꞌyón man yuvii̱ do̱ꞌ ado̱nj.
\v 3 Se̱ guun soꞌ síí niha̱ꞌ rá coꞌo̱ na vinó do̱ꞌ, síí yuva̱a̱ do̱ꞌ maꞌ. Tana̱nj gu̱un soꞌ síí laru̱u rá do̱ꞌ, síí ne niha̱ꞌ rá cano̱ tuviꞌ ga̱ ꞌó yuvii̱ do̱ꞌ, síí ne niha̱ꞌ rá quiri̱ꞌ ndoꞌo saꞌanj do̱ꞌ á.
\v 4 Ma̱an se yan ga̱a̱ soꞌ me se sa̱ꞌ uxrá tu̱mé soꞌ tucuá soꞌ ne̱ gu̱un chij soꞌ do̱ꞌ, veꞌé uxrá cuno̱ taꞌníí soꞌ rihaan soꞌ do̱ꞌ, veꞌé cara̱j cochro̱j taꞌníí soꞌ rihaan soꞌ do̱ꞌ ado̱nj.
\v 5 ꞌO̱ se sese ne neꞌen soꞌ gu̱un chij soꞌ rihaan tucuá soꞌ, ne̱ asa̱ꞌ caꞌve̱e tu̱mé soꞌ man xꞌneꞌ nij síí noco̱ꞌ man Yaꞌanj ga̱.
\v 6 Sese síí noco̱ꞌ naca̱ stucua̱nj Yaꞌanj me ꞌo̱ soꞌ, ne̱ se̱ guun soꞌ síí tumé sa̱ꞌ man yuvii̱, se̱ gaa na̱nj gu̱un xta̱ꞌ nimán soꞌ ne̱ quira̱nꞌ soꞌ sayuun ga̱ Síí Chre̱e se vaa caca̱a̱ soꞌ, quiꞌya̱j Yaꞌanj na̱nj á.
\v 7 Veé ꞌo̱ síí veꞌé aꞌmii yuvii̱ ne nocoꞌ man Cristó cheꞌé gu̱un soꞌ, se̱ gaa na̱nj quiꞌya̱j soꞌ cacunꞌ ne̱ quiri̱ꞌ snana̱ soꞌ do̱ꞌ, se̱ gaa na̱nj catu̱u̱ soꞌ raꞌngaꞌ uchruj Síí Chre̱e do̱ꞌ ado̱nj.
\s Nataꞌ Pabló cheꞌé da̱j ga̱a̱ nij síí nica̱j suun rihaan Yaꞌanj ra̱cuíj man xꞌneꞌ nij síí noco̱ꞌ man Cristó a
\p
\v 8 Ne̱ veé da̱nj ga̱a̱ gue̱e̱ nij yuvii̱ gu̱un síí nica̱j suun rihaan Yaꞌanj ra̱cuíj man xꞌneꞌ nij síí noco̱ꞌ man Cristó uún, ne̱ síí niꞌya̱nj gu̱un nij soꞌ á. Se̱ caꞌmii nij soꞌ nana̱ tihaꞌ yuꞌunj maꞌ. Se̱ gaa niha̱ꞌ rá nij soꞌ coꞌo̱ ndoꞌo nij soꞌ na vinó maꞌ. Se̱ tihaꞌ yuꞌunj nij soꞌ man yuvii̱ caꞌne̱e̱ u̱u̱n nij soꞌ saꞌanj maꞌ.
\v 9 ꞌO̱ canoco̱ꞌ nij soꞌ nana̱ sa̱ꞌ yuve̱ tihaa̱n naca̱ Yaꞌanj man níꞌ, ne̱ tu̱mé nij soꞌ man nij soꞌ se̱ gaa na̱nj quiꞌya̱j nij soꞌ cacunꞌ á.
\v 10 ꞌO̱ se asino xca̱j nii cuentá ni̱ꞌyaj nii man nij soꞌ sese taj cacunꞌ tumé nij soꞌ, ga̱a ne̱ caꞌve̱e gu̱un nij soꞌ síí nica̱j suun rihaan Yaꞌanj ra̱cuíj man xꞌneꞌ nij síí noco̱ꞌ man Cristó ado̱nj.
\v 11 Veé da̱nj ga̱a̱ gue̱e̱ nij chana̱ uún, ne̱ chij ga̱a̱ rá nij noꞌ do̱ꞌ, se̱ caꞌmii ne̱ nij noꞌ do̱ꞌ, chij caꞌmi̱i̱ nij noꞌ do̱ꞌ, ꞌo̱ veꞌé quiꞌya̱j nij noꞌ da̱j a̱ rasu̱u̱n do̱ꞌ á.
\v 12 Xa̱ꞌ nij yuvii̱ gu̱un síí nica̱j suun rihaan Yaꞌanj ra̱cuíj man nij yuvii̱, tza̱j ne̱ o̱rúnꞌ nica̱ nij soꞌ ni̱caj nij soꞌ do̱ꞌ, sa̱ꞌ tu̱mé nij soꞌ man taꞌníí nij soꞌ do̱ꞌ, sa̱ꞌ tu̱mé nij soꞌ man nu̱ꞌ nij tucua̱ nij soꞌ do̱ꞌ na̱nj á.
\v 13 Ne̱ sese sa̱ꞌ ꞌyaj nij soꞌ nu̱ꞌ suun vaa rihaan nij soꞌ, ne̱ síí sa̱ꞌ me nij soꞌ, cata̱j nij yuvii̱ noco̱ꞌ man Yaꞌanj, ne̱ se̱ cuchuꞌviꞌ nij soꞌ cata̱j xnaꞌanj nij soꞌ da̱j quiꞌya̱j níꞌ canoco̱ꞌ níꞌ man Cristó Jesús maꞌ.
\s Nataꞌ Pabló se vaa sa̱ꞌ uxrá vaa nana̱ cataj xnaꞌanj Yaꞌanj rihaan níꞌ nana̱ canocoꞌ níꞌ a
\p
\v 14 Dan me se cachrón ꞌu̱nj nana̱ nihánj rihaan yanj nihánj, ne̱ caꞌne̱j ꞌu̱nj rihaan so̱ꞌ á. Tza̱j ne̱ naꞌvi̱j ꞌu̱nj se vaa cuchi̱ꞌ ꞌu̱nj rihaan so̱ꞌ rque do̱j güii ado̱nj.
\v 15 Tza̱j ne̱ sese se̱ cuchiꞌ raꞌya̱nj ꞌu̱nj, ne̱ taj se ꞌyaj maꞌ. A̱j neꞌén so̱ꞌ da̱j quiꞌya̱j soj si̱j noco̱ꞌ man Yaꞌanj ga̱a yáán soj ga̱ tinúú soj ado̱nj. ꞌO̱ se tucuá Yaꞌanj me xꞌneꞌ cunuda̱nj soj síí noco̱ꞌ man Yaꞌanj si̱j vaa iꞌna̱ꞌ ya̱ na̱nj á. Cheꞌé maꞌa̱n soj me se acaj yuvii̱ cuentá se vaa ya̱ vaa snana̱ Yaꞌanj ne̱ maꞌa̱n soj me síí nica̱j nana̱ ya̱ ado̱nj.
\v 16 Neꞌen cunuda̱nj níꞌ se vaa noco̱o uxrá vaa nana̱ sa̱ꞌ yuve̱ tihaa̱n naca̱ Yaꞌanj man níꞌ nana̱ canocoꞌ níꞌ, ne̱ nihánj me nana̱ yoꞌ a:
\q Curiha̱nj Yaꞌanj rihaan chumii̱, ne̱ guun soꞌ yuvii̱ a.
\q Veꞌé ndoꞌo quiꞌyaj soꞌ, cataj Nimán Yaꞌanj a.
\q Queneꞌen nij se‑mo̱zó Yaꞌanj man soꞌ a.
\q Nataꞌ nii cheꞌé soꞌ rihaan nij yuvii̱ yaníj a.
\q Cuchumán rá taꞌa̱j nij síí ma̱n rihaan chumii̱ nihánj niꞌya̱j nij soꞌ man soꞌ a.
\q Quinanꞌ soꞌ xta̱ꞌ, ne̱ niꞌndaj ya̱ veꞌé nacaj nij síí ma̱n xta̱ꞌ man soꞌ a.
\m Yoꞌ me nana̱ noco̱ꞌ níꞌ a.
\c 4
\s Cuno̱ taꞌa̱j yuvii̱ snana̱ nij síí tucuꞌyón tucuáán ne̱, ga̱a ne̱ quiriꞌi̱j nij yuvii̱ yoꞌ stucua̱nj Yaꞌanj a
\p
\v 1 Tza̱j ne̱ taj nica̱ ya̱ Nimán Yaꞌanj se vaa asa̱ꞌ nichrunꞌ navi̱j chumii̱ nihánj, ne̱ quiriꞌi̱j taꞌa̱j yuvii̱ stucua̱nj Yaꞌanj, ne̱ canoco̱ꞌ nij soꞌ ꞌó tucuáán, ne̱ cuno̱ nij soꞌ nana̱ tihaꞌ yuꞌunj nana̱ tu̱cuꞌyón nij nana̱ chre̱e ado̱nj.
\v 2 Dan me se cuchuma̱n rá nij soꞌ nana̱ caꞌmi̱i̱ síí taj aꞌmii sa̱ꞌ tuꞌva rmaꞌa̱n na̱nj á. Ne̱ síí ne̱ ndoꞌo me nij soꞌ, ne̱ caviꞌ iꞌna̱ꞌ nimán nij soꞌ ne̱ ne naꞌa̱j nij soꞌ cheꞌé cacunꞌ ꞌyaj nij soꞌ a̱ maꞌ.
\v 3 Ne̱ tucuꞌyón nij síí ne̱ rihaan yuvii̱ se vaa ne no xcúún yuvii̱ xca̱j yuvii̱ chana̱, ne̱ cacunꞌ me yoꞌ, taj nij soꞌ a. Ne̱ tucuꞌyón nij soꞌ se vaa ne no xcúún yuvii̱ cha̱ yuvii̱ taꞌa̱j se chá uún a. Tza̱j ne̱ ꞌo̱ se nu̱ꞌ nij rasu̱u̱n ma̱n rihaan yoꞌóó me se rasu̱u̱n chá níꞌ taj níꞌ guun niꞌya̱j níꞌ rihaan Yaꞌanj me yoꞌ, rá Yaꞌanj, dan araa soꞌ rasu̱u̱n yoꞌ rihaan yoꞌóó cheꞌé nij síí amán rá nana̱ ya̱ ado̱nj.
\v 4 Dan me se nu̱ꞌ rasu̱u̱n quiꞌyaj Yaꞌanj me se sa̱ꞌ, ne̱ ne nó xcúún níꞌ nachri̱ꞌ níꞌ ni̱ꞌyaj níꞌ man se vaa quiꞌyaj Yaꞌanj cheꞌé níꞌ maꞌ. Ma̱an se ni̱caj níꞌ man yoꞌ, ne̱ cata̱j níꞌ guun niꞌya̱j níꞌ rihaan Yaꞌanj cheꞌé rasu̱u̱n yoꞌ cha̱ níꞌ á.
\v 5 Neꞌen níꞌ da̱j taj snana̱ Yaꞌanj, ne̱ cheꞌé dan neꞌen níꞌ se vaa sese cachi̱nj niꞌya̱j níꞌ asino ya̱a̱n rihaan Yaꞌanj, ne̱ Yaꞌanj me síí naquiꞌya̱j sa̱ꞌ yoꞌ cha̱ níꞌ ado̱nj.
\s Veꞌé quiꞌya̱j Timoteo suun caꞌneꞌ Yaꞌanj rihaan soꞌ á
\p
\v 6 Sese tu̱cuꞌyón so̱ꞌ tucuáán nihánj rihaan ꞌó nij tinúú níꞌ síí noco̱ꞌ man Cristó, ne̱ síí veꞌé ꞌyaj se‑su̱u̱n Cristó Jesús mé so̱ꞌ chugua̱nj. ꞌO̱ se tucuꞌyón nii tucuáán sa̱ꞌ yoꞌ rihaan so̱ꞌ, ne̱ cuchumán rá so̱ꞌ, ne̱ canocóꞌ so̱ꞌ tucuáán yoꞌ a.
\v 7 Se̱ cunó so̱ꞌ cuentó nataꞌ yuvii̱ cuentó snúú rmaꞌa̱n ne aꞌmii ya̱ cheꞌé Yaꞌanj maꞌ. Tu̱cuꞌyón so̱ꞌ da̱j qui̱ꞌyáá so̱ꞌ, ne̱ veꞌé doj ca̱nocóꞌ so̱ꞌ stucua̱nj Yaꞌanj á.
\v 8 Nda̱ꞌ se vaa yuꞌvee nó suun ꞌyaj suun nee̱ man níꞌ, tza̱j ne̱ vaa doj yuꞌvee nó nimán níꞌ, canoco̱ꞌ nimán níꞌ man Yaꞌanj na̱nj á. Cheꞌé suun ꞌyaj nimán níꞌ me se cavi̱i̱ sa̱ꞌ níꞌ ga̱a yáán níꞌ rihaan chumii̱ nihánj, ne̱ neꞌen níꞌ se vaa cavi̱i̱ sa̱ꞌ níꞌ ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj ado̱nj.
\v 9 Ya̱ vaa nana̱ yoꞌ, ne̱ vaa cheꞌé cuno̱ níꞌ man yoꞌ chugua̱nj.
\v 10 Dan me se ꞌyaj uxrá níꞌ se‑su̱u̱n Yaꞌanj, ne̱ ne chuꞌviꞌ níꞌ caꞌmi̱i̱ yuvii̱ nana̱ nij cheꞌé níꞌ a̱ maꞌ. Da̱nj ꞌyaj níꞌ cheꞌé se naꞌvi̱j níꞌ cavi̱i̱ sa̱ꞌ níꞌ quiꞌya̱j Yaꞌanj si̱j vaa iꞌna̱ꞌ, ne̱ soꞌ me Síí Ti̱nanii rihaan Sayuun man cunuda̱nj yuvii̱ sese amán rá nij soꞌ niꞌya̱j nij soꞌ man soꞌ a.
\v 11 Tu̱cuꞌyón so̱ꞌ nana̱ yoꞌ rihaan yuvii̱, ne̱ caꞌne̱ꞌ so̱ꞌ suun rihaan nij yuvii̱ se vaa canoco̱ꞌ nij yuvii̱ nana̱ yoꞌ á.
\p
\v 12 ꞌO̱ se xnii mé so̱ꞌ, ne̱ ataa cachi̱j so̱ꞌ, tza̱j ne̱ taj se ꞌyaj yoꞌ maꞌ. Se̱ guun cata̱j yuvii̱ se vaa taj se uún so̱ꞌ maꞌ. Ma̱an se veꞌé qui̱ꞌyáá so̱ꞌ nu̱ꞌ tucuáán noco̱ꞌ níꞌ, se vaa veꞌé caꞌmi̱i̱ so̱ꞌ do̱ꞌ, veꞌé qui̱ꞌyáá so̱ꞌ do̱ꞌ, ga̱a̱ ꞌe̱e̱ rá so̱ꞌ man tinúú so̱ꞌ do̱ꞌ, ga̱a̱ nucua̱j rá so̱ꞌ man Yaꞌanj do̱ꞌ, tu̱mé so̱ꞌ mán so̱ꞌ se̱ quiꞌyáá so̱ꞌ cacunꞌ do̱ꞌ, ga̱a ne̱ xca̱j nij síí noco̱ꞌ man Yaꞌanj cuentá da̱j no̱ xcúún nij soꞌ quiꞌya̱j nij soꞌ uún ado̱nj.
\v 13 Nda̱a güii cuchi̱ꞌ ꞌu̱nj rej tiꞌyaj roꞌ, ꞌo̱ naya̱a̱ so̱ꞌ snana̱ Yaꞌanj cuno̱ nij soꞌ do̱ꞌ, ꞌo̱ narque̱ so̱ꞌ chrej nucua̱j man nij soꞌ do̱ꞌ, ꞌo̱ tu̱cuꞌyón so̱ꞌ man nij soꞌ do̱ꞌ á.
\v 14 Se̱ niꞌyón so̱ꞌ suun sa̱ꞌ caꞌneꞌ Yaꞌanj rihaan so̱ꞌ güii cutaꞌ nij síí tumé sa̱ꞌ rihaan Yaꞌanj man nij yuvii̱ noco̱ꞌ man Cristó raꞌa nij soꞌ raá so̱ꞌ, ne̱ tihaa̱n naca̱ Yaꞌanj ꞌo̱ nana̱ cheꞌé se‑su̱u̱n so̱ꞌ maꞌ.
\v 15 Dan me se ꞌo̱ caꞌne̱j so̱ꞌ raá so̱ꞌ man nij rasu̱u̱n yoꞌ, ga̱a ne̱ queneꞌe̱n cunuda̱nj nij yuvii̱ se vaa va̱j nari̱ꞌ so̱ꞌ qui̱ꞌyáá so̱ꞌ se‑su̱u̱n Yaꞌanj á.
\v 16 Xca̱j so̱ꞌ cuentá cheꞌé se vaa ꞌyáá so̱ꞌ do̱ꞌ, cheꞌé tucuáán tucuꞌyón so̱ꞌ do̱ꞌ á. ꞌO̱ ca̱nocóꞌ so̱ꞌ nu̱ꞌ tucuáán nihánj, ga̱a ne̱ nani̱i̱ ma̱ꞌán so̱ꞌ do̱ꞌ, nij yuvii̱ uno nana̱ aꞌmii so̱ꞌ do̱ꞌ, rihaan sayuun ne̱ cavi̱i̱ sa̱ꞌ soj a.
\c 5
\s Da̱j caꞌmi̱i̱ Timoteo rihaan ꞌo̱ ꞌo̱ yuvii̱ noco̱ꞌ man Yaꞌanj a
\p
\v 1 Se̱ caxríj yuva̱a̱ so̱ꞌ man nij chii nga̱ maꞌ. Tana̱nj veꞌé caꞌmi̱i̱ so̱ꞌ rihaan nij soꞌ narque̱ so̱ꞌ chrej sa̱ꞌ man nij soꞌ á. Da̱j se aꞌmii so̱ꞌ ga̱ réé so̱ꞌ roꞌ, da̱nj caꞌmi̱i̱ so̱ꞌ ga̱ nij chii nga̱ á. Ase aꞌmii so̱ꞌ ga̱ tinúú so̱ꞌ roꞌ, da̱nj caꞌmi̱i̱ so̱ꞌ ga̱ nij síí tachru̱u̱ uún a.
\v 2 Ase aꞌmii so̱ꞌ ga̱ nií so̱ꞌ roꞌ, da̱nj caꞌmi̱i̱ so̱ꞌ ga̱ nij vichij uún a. Ase aꞌmii so̱ꞌ ga̱ raꞌvij so̱ꞌ roꞌ, da̱nj caꞌmi̱i̱ so̱ꞌ ga̱ nij chana̱ tachru̱u̱ á. Se̱ caꞌmii so̱ꞌ a̱ doj nana̱ chiꞌi̱i̱ ga̱ nij noꞌ maꞌ.
\s Caꞌmii Pabló cheꞌé nij chana̱ caviꞌ nica̱ a
\p
\v 3 Cara̱a̱ co̱chróó so̱ꞌ man nij chana̱ caviꞌ nica̱ á. Rque̱ so̱ꞌ rasu̱u̱n achiin man nij noꞌ, sese nuviꞌ tuviꞌ chana̱ racuíj man chana̱ a.
\v 4 Tza̱j ne̱ sese vaa se taꞌníí chana̱ do̱ꞌ, se taꞌnij siꞌno̱ chana̱ do̱ꞌ, ne̱ ta̱j yaꞌanj nij soꞌ man chana̱ yoꞌ á. Da̱nj quiꞌya̱j nij soꞌ, ne̱ quisi̱j suun caꞌneꞌ Yaꞌanj rihaan nij soꞌ se vaa ta̱j yaꞌanj nij soꞌ man tuviꞌ nij soꞌ á. ꞌO̱ se ase vaa quiꞌyaj nii nij soꞌ do̱ꞌ, xcuaꞌa̱nj nij soꞌ do̱ꞌ, man nij soꞌ roꞌ, da̱nj quiꞌya̱j maꞌa̱n nij soꞌ man nii nij soꞌ do̱ꞌ, xcuaꞌa̱nj nij soꞌ do̱ꞌ ado̱nj. Da̱nj quiꞌya̱j nij soꞌ, ga̱a ne̱ cara̱nꞌ rá Yaꞌanj ni̱ꞌyaj Yaꞌanj man nij soꞌ a.
\v 5 Sese ya̱ chana̱ nique̱ me ꞌo̱ noꞌ, ne̱ naꞌvi̱j noꞌ ra̱cuíj Yaꞌanj man noꞌ, ne̱ ꞌo̱ nacúún noꞌ rihaan Yaꞌanj do̱ꞌ, ꞌo̱ achíín niꞌya̱j noꞌ rihaan Yaꞌanj do̱ꞌ, nuvi̱i niga̱nꞌ a.
\v 6 Tza̱j ne̱ sese me ina̱nj rá noꞌ gu̱un niha̱ꞌ rá noꞌ rihaan chumii̱ nihánj, ne̱ nda̱ꞌ se vaa iꞌna̱ꞌ nee̱ man noꞌ, tza̱j ne̱ nimán noꞌ me se a̱j caviꞌ a.
\v 7 Caꞌne̱ꞌ so̱ꞌ suun cheꞌé nana̱ nihánj rihaan nij síí noco̱ꞌ man Yaꞌanj, se̱ gaa na̱nj cuta̱ꞌ yuvii̱ a̱ doj cacunꞌ xráá nij soꞌ maꞌ.
\v 8 Sese vaa yuvii̱ ne taj yaꞌanj man tuviꞌ yuvii̱ do̱ꞌ, man nij tucua̱ yuvii̱ do̱ꞌ, ne̱ né yuvi̱i̱ noco̱ꞌ stucua̱nj níꞌ si̱j noco̱ꞌ man Yaꞌanj me nij soꞌ maꞌ. Nij doj ꞌyaj yuvii̱ yoꞌ rihaan nij yuvii̱ ne nocoꞌ man Yaꞌanj ado̱nj.
\p
\v 9 Ina̱nj se‑chuvi̱i nij chana̱ va̱j vaꞌnu̱j chiha̱a̱ (60) yoꞌ táá doj cachro̱n so̱ꞌ rihaan yanj no̱ se‑chuvi̱i nij chana̱ caviꞌ nica̱ á. Ne̱ ina̱nj se‑chuvi̱i chana̱ nica̱j xraan man o̱rúnꞌ nica̱ cachro̱n so̱ꞌ uún á.
\v 10 Ne̱ queneꞌe̱n cunuda̱nj nii man nij noꞌ se vaa veꞌé ꞌyaj nij noꞌ suun sa̱ꞌ cheꞌé tuviꞌ nij noꞌ do̱ꞌ, se vaa veꞌé tucuachij nij noꞌ taꞌníí nij noꞌ do̱ꞌ, se vaa rqué nij noꞌ se chá chá yuvii̱ aranꞌ tucuá nij noꞌ do̱ꞌ, se vaa naꞌnuꞌ nij noꞌ tacóó nij síí noco̱ꞌ man Cristó do̱ꞌ, se vaa racuíj nij noꞌ man nij síí quiranꞌ sayuun do̱ꞌ, ne̱ nij noꞌ me caꞌve̱e cachro̱n so̱ꞌ se‑chuvi̱i rihaan yanj no̱ se‑chuvi̱i nij chana̱ caviꞌ nica̱ a.
\p
\v 11 Tza̱j ne̱ se̱ cachrón so̱ꞌ se‑chuvi̱i chana̱ taꞌa̱j rihaan yanj maꞌ. ꞌO̱ se vaa güii gu̱un niha̱ꞌ rá nij chana̱ taꞌa̱j yoꞌ canoco̱ꞌ nij noꞌ ꞌó snóꞌo, ne̱ quiriꞌi̱j nij noꞌ suun ata̱ nij noꞌ cheꞌé Cristó na̱nj ado̱nj.
\v 12 Sese da̱nj quiꞌya̱j nij chana̱ taꞌa̱j, ga̱a ne̱ tu̱mé nij noꞌ cacunꞌ cheꞌé se tanáj nij noꞌ nana̱ cataꞌ tuꞌva nij noꞌ rihaan Cristó a.
\v 13 Da̱nj na̱nj uún, ne̱ ne yáán xe̱j nij noꞌ veꞌ, ne̱ chéé rmaꞌa̱n nij noꞌ da̱j a̱ veꞌ, ne̱ uun rmi̱i̱ nij noꞌ, ne̱ achén u̱u̱n tiempó, ꞌyaj nij noꞌ, ne̱ nanó nij noꞌ cuentó ne̱ uún, ne̱ tiguíj nij noꞌ se‑cuento̱ nij noꞌ rihaan se‑cuento̱ ꞌó nij yuvii̱, ne̱ aꞌmii nij noꞌ náá guun rasu̱u̱n ne nó xcúún nij noꞌ caꞌmi̱i̱ nij noꞌ a.
\v 14 Ma̱an cheꞌé dan me rá ꞌu̱nj xca̱j nij chana̱ taꞌa̱j yoꞌ ꞌó snóꞌo, ne̱ cuchru̱j nij noꞌ neꞌej, ne̱ tu̱mé nij noꞌ veꞌ tucuá nij noꞌ, ne̱ da̱nj ga̱a̱, ga̱a ne̱ se̱ caꞌvee caꞌmi̱i̱ nij síí ta̱j riꞌyunj man níꞌ nana̱ chiꞌi̱i̱ cheꞌé níꞌ maꞌ.
\v 15 ꞌO̱ se vaa taꞌa̱j nij chana̱ caviꞌ nica̱, ne̱ a̱j quiriꞌíj taꞌa̱j nij noꞌ tucuáán noco̱ꞌ níꞌ, ne̱ canocoꞌ nij noꞌ man Síí Chre̱e na̱nj ado̱nj.
\p
\v 16 Tza̱j ne̱ sese vaa chana̱ noco̱ꞌ man Cristó, ne̱ sese vaa tuviꞌ nij noꞌ chana̱ caviꞌ nica̱ ꞌni̱j scaꞌnúj nij noꞌ, ne̱ ra̱cuíj chana̱ noco̱ꞌ man Cristó man tuviꞌ noꞌ chana̱ caviꞌ nica̱ á. Ga̱a ne̱ se̱ cachiin ta̱j yaꞌanj xꞌneꞌ nij síí noco̱ꞌ man Cristó man chana̱ caviꞌ nica̱ yoꞌ maꞌ. Ma̱an se ta̱j yaꞌanj nij soꞌ man nij chana̱ quináj u̱u̱n ina̱nj na̱nj á.
\s Cataj Pabló da̱j quiꞌya̱j níꞌ man nij síí tumé sa̱ꞌ rihaan Yaꞌanj man nij yuvii̱ noco̱ꞌ man Cristó a
\p
\v 17 Vi̱j ya̱ na̱nj go̱ꞌ soj tuꞌvee nij síí tumé sa̱ꞌ rihaan Yaꞌanj man nij síí noco̱ꞌ man Cristó á. Da̱nj quiꞌya̱j soj, ne̱ cara̱a̱ cochro̱j soj rihaan nij soꞌ sese ya̱ si̱j aꞌmii natáj snana̱ Yaꞌanj me nij soꞌ do̱ꞌ, sese ya̱ tucuꞌyón nij soꞌ nana̱ rihaan yuvii̱ do̱ꞌ á.
\v 18 Danj Yaꞌanj taj a: “Se̱ numíj so̱ꞌ tacúún scúj ga̱a ꞌyaj suun scúj utunꞌ scúj ꞌnúú trigó cunu̱u sa̱ꞌ ꞌnúú trigó maꞌ”, taj yoꞌ a. Ne̱ taj uún yoꞌ a: “Naca̱j mozó saꞌanj tuꞌvee soꞌ sese ꞌyaj suun soꞌ á.” Da̱nj taj Danj Yaꞌanj a.
\p
\v 19 Sese cuta̱ꞌ nii cacunꞌ xráá ꞌo̱ síí tumé sa̱ꞌ rihaan Yaꞌanj man nij síí noco̱ꞌ man Cristó, ne̱ se̱ cuchumán rá so̱ꞌ maꞌ. Tza̱j ne̱ sese vaa vi̱j vaꞌnu̱j síí queneꞌen se vaa tumé soꞌ cacunꞌ, ne̱ cu̱nó so̱ꞌ nana̱ caꞌmi̱i̱ nij soꞌ á.
\v 20 Sese vaa ꞌo̱ síí tumé sa̱ꞌ rihaan Yaꞌanj man nij síí noco̱ꞌ man Cristó quiꞌyaj ndoꞌo cacunꞌ, ne̱ caꞌne̱ꞌ so̱ꞌ cacunꞌ cheꞌé soꞌ queneꞌe̱n nu̱ꞌ xꞌneꞌ nij síí noco̱ꞌ man Cristó, ga̱a ne̱ cuchuꞌvi̱ꞌ ꞌó nij síí ata̱ suun cheꞌé Yaꞌanj ne̱ se̱ quiꞌyaj maꞌa̱n nij soꞌ cacunꞌ uún maꞌ.
\p
\v 21 Nihánj me suun caꞌnéꞌ ꞌu̱nj rihaan so̱ꞌ niꞌya̱j Yaꞌanj do̱ꞌ, niꞌya̱j Cristó Jesús do̱ꞌ, niꞌya̱j nij se‑mo̱zó Yaꞌanj narii Yaꞌanj man do̱ꞌ a. Ga̱a caꞌne̱ꞌ so̱ꞌ cacunꞌ cheꞌé yuvii̱, ne̱ ꞌo̱ cuya̱a̱n qui̱ꞌyáá so̱ꞌ ga̱ ꞌo̱ ꞌo̱ nij soꞌ a. Taj se ꞌyaj sese si̱j sa̱ꞌ doj me ꞌo̱ soꞌ rihaan so̱ꞌ maꞌ. Ma̱an se caꞌne̱ꞌ yá so̱ꞌ cacunꞌ me maꞌa̱n cacunꞌ tumé ꞌo̱ ꞌo̱ soꞌ a.
\v 22 Se̱ gaa raꞌya̱nj rá so̱ꞌ cuta̱ꞌ raꞌá so̱ꞌ raa̱ me maꞌa̱n ꞌo̱ soꞌ cheꞌé yan gu̱un soꞌ síí ca̱ta̱ suun cheꞌé Yaꞌanj maꞌ. ꞌO̱ se sese si̱j tumé cacunꞌ me soꞌ, ne̱ taj cheꞌé ra̱cuíj so̱ꞌ man soꞌ gu̱un chij soꞌ maꞌ. Da̱nj ina̱nj qui̱ꞌyáá so̱ꞌ, ga̱a ne̱ se̱ gaa na̱nj tu̱mé so̱ꞌ se‑cacu̱nꞌ soꞌ a. Dan me se ꞌo̱ ina̱nj se̱ caꞌvej so̱ꞌ catu̱u̱ a̱ ꞌó se chiꞌi̱i̱ maꞌ.
\s Coꞌo̱ Timoteo do̱j tzínꞌ na vinó a
\p
\v 23 Cheꞌé se ranꞌ ndoꞌo so̱ꞌ, ne̱ veꞌee̱ rqué so̱ꞌ, ne̱ se̱ coꞌo so̱ꞌ ina̱nj na u̱u̱n maꞌ. Tana̱nj coꞌo̱ so̱ꞌ do̱j tzínꞌ na vinó a.
\s Nataꞌ Pabló se vaa vaa güii, ne̱ ya̱ queneꞌe̱n níꞌ me yuvii̱ tumé cacunꞌ do̱ꞌ, me yuvii̱ quiꞌyaj suun sa̱ꞌ do̱ꞌ a
\p
\v 24 Vaa yuvii̱ tumé cacunꞌ, ne̱ nda̱ꞌ se ataa quira̱nꞌ nij soꞌ sayuun, tza̱j ne̱ a̱j neꞌen cunuda̱nj yuvii̱ se vaa tumé nij soꞌ cacunꞌ ado̱nj. Tza̱j ne̱ ino̱ vaa ꞌó taꞌa̱j nij yuvii̱ tumé cacunꞌ uún na̱nj á. Nda̱ꞌ se ne neꞌen nii se vaa quiꞌyaj nij soꞌ cacunꞌ, tza̱j ne̱ vaa güii quira̱nꞌ nij soꞌ sayuun cheꞌé cacunꞌ tumé nij soꞌ, ne̱ queneꞌe̱n nii man nij soꞌ, ne̱ xca̱j nii cuentá se vaa ya̱ tumé nij soꞌ cacunꞌ ado̱nj.
\v 25 Veé da̱nj vaa uún nij suun sa̱ꞌ ꞌyaj ꞌó taꞌa̱j nij yuvii̱, ne̱ canó yuvii̱ niꞌya̱j man nij suun sa̱ꞌ ado̱nj. Tza̱j ne̱ sese vaa suun sa̱ꞌ ne ruviꞌ do̱ꞌ, ne acaj yuvii̱ cuentá do̱ꞌ, ne̱ taj se ꞌyaj maꞌ. Ma̱an se vaa güii, ne̱ xca̱j cunuda̱nj yuvii̱ cuentá se vaa sa̱ꞌ quiꞌyaj nij soꞌ ado̱nj.
\c 6
\s Narqué Pabló chrej se vaa veꞌé quiꞌya̱j suun mozó rihaan se‑ruꞌve̱e̱ mozó a
\p
\v 1 Ne̱ nij mozó me se veꞌé cara̱a̱ cochro̱j nij mozó rihaan se‑ruꞌve̱e̱ nij soꞌ a. ꞌO̱ se yoꞌ me quiꞌya̱j nij soꞌ, ga̱a ne̱ se̱ caꞌmi̱i̱ qui̱j yuvii̱ cheꞌé se‑chuvi̱i Yaꞌanj do̱ꞌ, cheꞌé tucuáán tucuꞌyón níꞌ do̱ꞌ maꞌ.
\v 2 Ne̱ sese síí noco̱ꞌ man Yaꞌanj me ruꞌvee, ne̱ se̱ guun cata̱j mozó a: “Tinúú ꞌu̱nj me se‑ruꞌve̱e̱ ꞌu̱nj, ne̱ taj cheꞌé quiꞌya̱j suun nu̱cuáá ꞌu̱nj rihaan soꞌ maꞌ.” Se̱ guun caꞌmi̱i̱ mozó da̱nj maꞌ. Tana̱nj veꞌé quiꞌya̱j suun soꞌ rihaan se‑ruꞌve̱e̱ soꞌ, ne̱ ga̱a̱ ꞌe̱e̱ rá soꞌ se‑ruꞌve̱e̱ soꞌ á. ꞌO̱ se neꞌen mozó se vaa si̱j noco̱ꞌ man Yaꞌanj me se‑ruꞌve̱e̱ mozó, ne̱ gu̱un niha̱ꞌ rá mozó se vaa doj a̱ cavi̱i̱ sa̱ꞌ ꞌo̱ tinúú soꞌ cheꞌé suun ꞌyaj suun soꞌ ado̱nj.
\s Caꞌmii Pabló cheꞌé nij síí tucuꞌyón tucuáán ne̱ a.
\p Nana̱ nihánj me chrej nucua̱j nago̱ꞌ so̱ꞌ man nij yuvii̱ a.
\v 3 Sese tucuꞌyón ꞌo̱ soꞌ tucuáán ne̱, ne̱ ne aꞌneꞌ rá soꞌ ga̱ tucuáán ya̱ cuchruj Jesucristó Si̱j ꞌNi̱j Raꞌa man níꞌ do̱ꞌ, ga̱ tucuáán aranꞌ rá Yaꞌanj cuno̱ níꞌ do̱ꞌ,
\v 4 ne̱ síí xta̱ꞌ nimán me soꞌ, ne̱ a̱ doj ne xcaj soꞌ cuentá a̱ maan ado̱nj. Niha̱ꞌ uxrá rá nij soꞌ caꞌmi̱i̱ cunu̱ꞌ nij soꞌ cheꞌé nana̱ aꞌmii nij soꞌ, ne̱ cheꞌé dan uun xco̱j ruva̱a̱ rá nij soꞌ niꞌya̱j nij soꞌ tuviꞌ nij soꞌ, ne̱ unuꞌ ndoꞌo nij soꞌ, ne̱ aꞌmii qui̱j nij soꞌ cheꞌé Yaꞌanj, ne̱ nij ꞌyaj nij soꞌ, utaꞌ nij soꞌ cacunꞌ rmi̱ꞌ xráá tuviꞌ nij soꞌ ado̱nj.
\v 5 Síí niꞌyo̱n me nij soꞌ, ne̱ naꞌvee xca̱j nij soꞌ cuentá a̱ maꞌ. Nana̱ ya̱ naꞌvee cuno̱ nij soꞌ maꞌ. Ma̱an se sese veꞌé canoco̱ꞌ nij soꞌ man Yaꞌanj, ne̱ quiꞌya̱j canaán ndoꞌo nij soꞌ saꞌanj, rá nij soꞌ ado̱nj.
\p
\v 6 Dan me se ya̱ uxrá da̱nj vaa, ne̱ si̱j quiri̱ꞌ uxrá ya̱ se sa̱ꞌ me níꞌ, tza̱j ne̱ ꞌo̱ ga̱a̱ xe̱j nimán níꞌ canoco̱ꞌ níꞌ Yaꞌanj, ga̱a ne̱ caꞌve̱e gu̱un níꞌ síí cavi̱i̱ sa̱ꞌ uxrá ado̱nj.
\v 7 Dan me se xca̱j níꞌ cuentá, ne̱ ga̱a caꞌngaa níꞌ rihaan chumii̱ nihánj, ne̱ taj se nica̱j níꞌ caꞌnaꞌ níꞌ maꞌ. Ne̱ taj rasu̱u̱n ni̱caj níꞌ caꞌa̱nj níꞌ asa̱ꞌ caviꞌ níꞌ a̱ maꞌ.
\v 8 Cheꞌé dan me sese vaa se chá níꞌ do̱ꞌ, sese vaa yatzíj ta̱j xráá níꞌ do̱ꞌ, ne̱ taj cheꞌé gu̱un rá níꞌ ga̱a̱ doj rasu̱u̱n rihaan níꞌ maꞌ.
\v 9 Tza̱j ne̱ xa̱ꞌ nij yuvii̱ me rá gu̱un ruꞌvee me se ne uun nucua̱j nij soꞌ canoco̱ꞌ nij soꞌ man Yaꞌanj a̱ maꞌ. Ne̱ nda̱a uun rá nij soꞌ quiꞌya̱j nij soꞌ cacunꞌ cheꞌé rej quiꞌya̱j canaán nij soꞌ rasu̱u̱n ga̱a̱ rihaan nij soꞌ, ne̱ dan me se ranꞌ ndoꞌo nij soꞌ sayuun, ne̱ síj, ga̱a ne̱ yu̱u̱n cheꞌe̱ quiri̱ꞌ nij soꞌ na̱nj ado̱nj.
\v 10 Ma̱an cheꞌé se uun ndoꞌo rá yuvii̱ ga̱a̱ ndoꞌo saꞌanj rihaan nij soꞌ roꞌ, cheꞌé dan ꞌnaꞌ da̱j a̱ sayuun ado̱nj. Nij yuvii̱ aranꞌ rá saꞌanj roꞌ, quiriꞌíj nij soꞌ stucua̱nj Yaꞌanj tucuáán canocoꞌ nij soꞌ asi̱j rque̱ doj, ga̱a ne̱ quiranꞌ ndoꞌo nij soꞌ sayuun, ne̱ quinanó ndoꞌo rá nij soꞌ ado̱nj.
\s Me rá Pabló se vaa veꞌé cuno̱ níꞌ nu̱ꞌ snana̱ Yaꞌanj a
\p
\v 11 Tza̱j ne̱ so̱ꞌ si̱j noco̱ꞌ man Yaꞌanj me se se̱ guun rá so̱ꞌ quiꞌya̱j canaán so̱ꞌ noco̱o saꞌanj maꞌ. Tana̱nj nano̱ꞌ so̱ꞌ naquiꞌya̱j nica̱ so̱ꞌ man yuvii̱ do̱ꞌ, canoco̱ꞌ xraan so̱ꞌ man Yaꞌanj do̱ꞌ, cuchuma̱n uxrá rá so̱ꞌ man Yaꞌanj do̱ꞌ, ga̱a̱ ꞌe̱e̱ rá so̱ꞌ man yuvii̱ do̱ꞌ, ga̱a̱ nucua̱j nimán so̱ꞌ rihaan sayuun do̱ꞌ, ga̱a̱ naj nimán so̱ꞌ do̱ꞌ á.
\v 12 Quiꞌya̱j uxrá so̱ꞌ suun sca̱ꞌ sa̱ꞌ caꞌneꞌ Yaꞌanj rihaan níꞌ si̱j noco̱ꞌ man soꞌ, ga̱a ne̱ ca̱yáán so̱ꞌ ga̱ Yaꞌanj nu̱ꞌ cavii nu̱ꞌ caꞌanj a. Cheꞌé dan cuneꞌ Yaꞌanj mán so̱ꞌ qui̱ꞌyáá so̱ꞌ se‑su̱u̱n soꞌ, ne̱ cataj yá so̱ꞌ cuno queꞌe̱e̱ tinúú níꞌ se vaa ya̱ qui̱ꞌyáá so̱ꞌ se‑su̱u̱n Yaꞌanj ca̱nocóꞌ so̱ꞌ man soꞌ á.
\p
\v 13 Neꞌén so̱ꞌ se vaa Yaꞌanj me síí quiꞌyaj vaa iꞌna̱ꞌ cunuda̱nj rasu̱u̱n, ne̱ neꞌén so̱ꞌ da̱j quiꞌyaj Cristó Jesús ga̱a canicunꞌ soꞌ rihaan síí nica̱j suun Poncio Pilató, se vaa nataꞌ ya̱ soꞌ cheꞌé suun cata̱ soꞌ a. Ne̱ cuno̱ Yaꞌanj cuno̱ Cristó cuno̱ chrej narqué ꞌu̱nj nihánj mán so̱ꞌ á.
\v 14 Dan me se ꞌo̱ cu̱nó so̱ꞌ nu̱ꞌ suun nihánj, ne̱ qui̱ꞌyáá so̱ꞌ nda̱a vaa taj yoꞌ, ne̱ tu̱mé so̱ꞌ man ma̱ꞌán so̱ꞌ se̱ quiꞌyáá so̱ꞌ cacunꞌ maꞌ. Da̱nj qui̱ꞌyáá so̱ꞌ nda̱a güii caꞌna̱ꞌ uún Jesucristó Si̱j ꞌNi̱j Raꞌa man níꞌ rihaan chumii̱ nihánj á.
\v 15 ꞌO̱ se Yaꞌanj me síí quiꞌya̱j caꞌna̱ꞌ soꞌ güii cachrón maꞌa̱n Yaꞌanj a. Xa̱ꞌ Yaꞌanj, tza̱j ne̱ sa̱ꞌ uxrá vaa soꞌ, ne̱ o̱rúnꞌ soꞌ gu̱un chij a. Rey uun chij doj rihaan ꞌó da̱nj rey do̱ꞌ, síí nica̱j suun noco̱o doj rihaan ꞌó da̱nj síí nica̱j suun do̱ꞌ, me soꞌ ado̱nj.
\v 16 O̱rúnꞌ soꞌ me síí vaa iꞌna̱ꞌ nu̱ꞌ cavii nu̱ꞌ caꞌanj, ne̱ ya̱nj soꞌ rej acoꞌ yaꞌan chuguu̱n rej naꞌvee nichru̱nꞌ yuvii̱ á. A̱ ꞌó yuvii̱ ne queneꞌe̱n man soꞌ, ne̱ daj chiha̱a̱ míj se̱ caꞌvee queneꞌe̱n yuvii̱ man soꞌ maꞌ. Cheꞌé dan cara̱a̱ cochro̱j níꞌ rihaan soꞌ, ne̱ ga̱a̱ nucua̱j ndoꞌo soꞌ nu̱ꞌ cavii nu̱ꞌ caꞌanj rugua̱nj. Veé da̱nj ga̱a̱ ya̱ ado̱nj.
\s Nataꞌ Pabló cheꞌé da̱j quiꞌya̱j nij ruꞌvee a
\p
\v 17 Narque̱ so̱ꞌ chrej nucua̱j man nij síí ruꞌvee ya̱nj rihaan chumii̱ nihánj cuano̱ se vaa se̱ guun cata̱j nij soꞌ se vaa si̱j sa̱ꞌ uxrá me nij soꞌ cheꞌé se vaa saꞌanj rihaan nij soꞌ maꞌ. Se̱ gaa nucua̱j rá nij soꞌ man siꞌyaj nij soꞌ maꞌ. Xraj, ne̱ caꞌa̱nj niꞌya̱ se‑saꞌa̱nj nij soꞌ a. Cheꞌé dan ꞌo̱ ga̱a̱ nucua̱j rá nij ruꞌvee man Yaꞌanj, ne̱ Yaꞌanj me síí rqué cunuda̱nj se sa̱ꞌ rihaan níꞌ, cheꞌé rej gu̱un niha̱ꞌ rá níꞌ quiꞌya̱j rasu̱u̱n yoꞌ a.
\v 18 Ma̱an se cata̱j xnaꞌanj so̱ꞌ rihaan nij síí ruꞌvee se vaa quiꞌya̱j nij soꞌ suun sa̱ꞌ, cheꞌé rej gu̱un ruꞌvee nij soꞌ rihaan Yaꞌanj, ne̱ veꞌé rque̱ nij soꞌ rasu̱u̱n achiin man tinúú nij soꞌ síí nique̱ á.
\v 19 Da̱nj quiꞌya̱j nij ruꞌvee cheꞌé rej cata̱j Yaꞌanj vaa güii se vaa ya̱ cuno ruꞌvee yoꞌ rihaan Yaꞌanj, ga̱a ne̱ ca̱yáán ruꞌvee yoꞌ ga̱ Yaꞌanj nu̱ꞌ cavii nu̱ꞌ caꞌanj, ne̱ doj a̱ ya̱ ya̱ ga̱a̱ iꞌna̱ꞌ nij síí ca̱yáán ga̱ Yaꞌanj rihaan nij síí ma̱n rihaan chumii̱ nihánj cuano̱ ado̱nj.
\s Cataj Pabló se vaa se̱ cuno Timoteo ꞌó nana̱ maꞌ
\p
\v 20 ꞌO̱ tu̱mé so̱ꞌ se‑su̱u̱n Yaꞌanj suun caꞌneꞌ Yaꞌanj rihaan so̱ꞌ, tinu̱j. Se̱ cunó so̱ꞌ ꞌó nana̱ cu̱u tucuꞌyón nii, nana̱ aꞌmii yuvii̱ u̱u̱n maꞌ. ꞌO̱ se avii ndoꞌo raa̱ nij síí noco̱ꞌ ꞌó nana̱, rá nij soꞌ, tza̱j ne̱ ne neꞌen uxrá nij soꞌ a̱ maꞌ.
\v 21 Vaa yuvii̱ noco̱ꞌ ꞌó nana̱ yoꞌ, tza̱j ne̱ veé da̱nj a̱j tanáj nij soꞌ stucua̱nj Yaꞌanj na̱nj ado̱nj.
\p Me rá ꞌu̱nj quiꞌya̱j ndoꞌo Yaꞌanj se lu̱j cheꞌé ta̱ranꞌ soj ado̱nj.